សង្គម និងសេដ្ឋកិច្ច - La Reine Media

បេសកជនចិន 2ពាន់នាក់ មកចូលរួមអបអរឆ្នាំវប្បធម៌ និងទេសចរណ៍កម្ពុជា-ចិន2019

បេសកជនចំនួនប្រមាណ 2ពាន់នាក់បានធ្វើដំណើរមកដល់អាកាសយានដ្ឋានអន្តរជាតិ ខេត្តសៀមរាបហើយកាលពីថ្ងៃទី4 ខែមិថុនា ឆ្នាំ2019 ម្សិលមិញនេះ ដើម្បីចាប់ផ្ដើមដំណើរទស្សនកិច្ច នៅកម្ពុជាចូលរួមអបអរសាទរ «ឆ្នាំវប្បធម៌ និងទេសចរណ៍កម្ពុជា-ចិន 2019»។

រដ្ឋាភិបាលសាធារណរដ្ឋប្រជាមានិតចិន បានចាត់បញ្ជូនលោក ចាង ស៊ុ អនុរដ្ឋមន្ត្រីក្រសួងវប្បធម៌ និងទេសចរណ៍ ដឹកនាំគណៈប្រតិភូក្រសួងវប្បធម៌ និងទេសចរណ៍របស់ខ្លួនរួមជាមួយបេសកជនចិនប្រមាណ 2ពាន់នាក់ឱ្យធ្វើដំណើរមកទស្សនកិច្ចនៅកម្ពុជាដើម្បីអបអរសាទរ «ឆ្នាំនៃវប្បធម៌ និងទេសចរណ៍កម្ពុជា-ចិន 2019» ចាប់ពីថ្ងៃទី2-8 ខែមិថុនា ឆ្នាំ2019។
បើតាមព័ត៌មានពីមន្រ្តីក្រសួងទេសចរណ៍បានឱ្យដឹងថា គណៈប្រតិភូក្រសួងវប្បធម៌ និងទេសចរណ៍ចិន ដឹកនាំដោយលោក ចាង ស៊ុ អនុរដ្ឋមន្ត្រីក្រសួងវប្បធម៌ និងទេសចរណ៍ចិន បានមកដល់អាកាសយានដ្ឋានអន្តរជាតិភ្នំពេញ នាយប់ថ្ងៃទី4 ខែមិថុនានេះ ក្រោមការត្រៀមទទួលស្វាគមន៍ពីថ្នាក់ដឹកនាំនៃក្រសួងទេសចរណ៍កម្ពុជា។

បើតាមព័ត៌មានពីមន្រ្តីក្រសួងទេសចរណ៍ដដែលបានឱ្យដឹងថា នៅល្ងាចថ្ងៃទី5 ខែមិថុនានេះ ក្រសួងទេសចរណ៍ និងក្រសួងវប្បធម៌ និងវិចិត្រសិល្បៈកម្ពុជា សហការជាមួយភាគីចិននឹងរៀបចំការសម្ដែងសិល្បៈរួមគ្នាកម្ពុជា-ចិននៅសាលមហោស្រពកោះពេជ្រ ក្រោមអធិបតីភាព ឯកឧត្តមឧបនាយករដ្ឋមន្ត្រីប៊ិន ឈិន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងសម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា។ បន្ទាប់មកក៏នឹងមានពិធីលៀងសាយភោជន៍ស្វាគមន៍ជូនបេសកជនចិនទាំងអស់នាល្ងាចថ្ងៃដដែលនោះផងដែរ។

នៅក្នុងដំណើរទស្សនកិច្ចនេះ ភាគីកម្ពុជា-ចិនក៏បាននាំមកនូវវេទិកា «Business Matching Between Tour Operators of Cambodia and China» ឬហៅថា វេទិកាផ្គូផ្គងដៃគូធុរកិច្ចទេសចរណ៍រវាងក្រុមហ៊ុនការីទេសចរណ៍ចិន (អ្នកទិញ) ចំនួន 50ក្រុមហ៊ុន ជាមួយក្រុមហ៊ុនការីទេសចរណ៍ កម្ពុជា (អ្នកលក់) ចំនួន 50ក្រុមហ៊ុនផងដែរ។
សូមជម្រាបថា កិច្ចសហប្រតិបត្តិការរវាងក្រសួងវប្បធម៌ និងទេសចរណ៍ចិន និងក្រសួងទេស ចរណ៍កម្ពុជា គឺស្របនឹងការកំណត់យកឆ្នាំ2019 ជាឆ្នាំវប្បធម៌ និងទេសចរណ៍កម្ពុជា-ចិន ដើម្បី ជំរុញការផ្លាស់ប្ដូរវប្បធម៌ និងទេសចរណ៍រវាងប្រជាជាតិទាំង2 កាន់តែខ្លាំងថែមមួយកម្រិតទៀត។

សូមបញ្ជាក់ថា «ឆ្នាំនៃវប្បធម៌ និងទេសចរណ៍កម្ពុជា-ចិន» នេះត្រូវបានផ្តួចផ្តើមឡើងដោយ ក្រសួងវប្បធម៌ និងទេសចរណ៍ចិន សហការជាមួយក្រសួងទេសចរណ៍កម្ពុជា ដើម្បីពង្រឹង និងពង្រីក កិច្ចសហប្រតិបត្តិការរួមគ្នាលើផ្នែកទេសចរណ៍ និងវប្បធម៌រវាងប្រទេសទាំង2 បន្ថែមទៀត មានដូច ជាការជំរុញការផ្សព្វផ្សាយទេសចរណ៍រួមគ្នា ការផ្លាស់ប្ដូរទស្សនកិច្ចសិក្សា ការបណ្ដុះបណ្ដាលធន ធានមនុស្ស និងការសម្ដែងសិល្បៈរួមគ្នាជាដើម។

គណៈប្រតិភូបេសកជនចិនទាំង 2,000នាក់ដែលបានមកទស្សនាកម្ពុជានៅពេលនេះនឹង បានឈ្វេងយល់អំពីឱកាសវិនិយោគក្នុងវិស័យទេសចរណ៍ ជួយផ្សព្វផ្សាយសក្តានុពលទេសចរណ៍ កម្ពុជាដល់ប្រជាជនចិន ក៏ដូចជាទាក់ទាញអ្នកទេសចរចិនមកកម្ពុជាឱ្យបានកាន់តែច្រើនថែមទៀតដែរ៕

June 5, 2019

ទទួលទានស្ករសូកូឡា ដើម្បីសុខភាពបេះដូងរឹងមាំ

ក្រុមអ្នកវិទ្យាសាស្ដ្រជាច្រើនបានអះអាងថា ការទទួលទានស្ករសូកូឡាអាចជួយកាត់បន្ថយជំងឺបេះដូង និងជួយឱ្យប្រព័ន្ធខួរក្បាលដំណើរការបានល្អ។ បើយោងតាមទិន្នន័យសុខភាពនៅតំបន់ប្រទេសដែលមានអាកាសធាតុត្រជាក់ ទទួលបានពីការស្រាវជ្រាវទៅលើអ្នកជំងឺបេះដូងមួយក្រុមបង្ហាញថា ការទទួលទានស្ករសូកូឡាអាចជួយកាត់បន្ថយការប្រឈមមុខនឹងជំងឺបេះដូង និងបញ្ហាប្រព័ន្ធខួរក្បាលប្រហែលជា70%។ តាមមាត្រដ្ឋានស្ករសូកូឡា100 ក្រាមមានសារធាតុកាកាវ 70% – 85% ជួយធ្វើឱ្យសម្ពាធឈាមមានលក្ខណៈធម្មតា ប្រឆាំងនឹងការរលាក និងឈាមកកបាន។

យ៉ាងណាមិញលទ្ធផលពិសោធក៏បានបង្ហាញទៀតថា អ្នកដែលបានទទួលទានស្ករសូកូឡាមួយប្រអប់អាចកាត់បន្ថយការប្រឈមមុខនឹងជំងឺបេះដូងបាន37% និងបញ្ហាប្រព័ន្ធខួរក្បាលបាន29% បើប្រៀបធៀបទៅនឹងអ្នកទទួលទានស្ករសូកូឡាចំនួនតិចតួចបំផុត និងអ្នកដែលមិនបានទទួលទានសោះ។ អ្នកជំនាញខាងបញ្ហាសុខភាពបេះដូងពិភពលោកបានអះអាងថា “យើងត្រូវតែបន្តការស្រាវជ្រាវបន្ថែមទៀត ដើម្បីបញ្ជាក់ឱ្យបានកាន់តែច្បាស់ពីប្រសិទ្ធភាពនៃការការពាររបស់ស្ករសូកូឡាចំពោះសុខភាពរបស់មនុស្ស។ ក្នុងការពិសោធនោះដែរ ក្រុមវិទ្យាសាស្ត្របានឱ្យអ្នកមានបញ្ហាចង្វាក់បេះដូងដើរញាប់ និងមិនទៀងទាត់ ឱ្យទទួលទានស្ករសូកូឡាពណ៌ខ្មៅ ដើម្បីសង្កេតពីការជួយពង្រឹងចលនាសម្ពាធឈាមក្នុងបេះដូង។ ជាលទ្ធផលគេទទួលបានប្រសិទ្ធភាពរបស់ស្ករសូកូឡាក្នុងជួយការពារជំងឺបេះដូងបានពិតមែន។ ទោះបីជាវាអាចជួយសុខភាពបានពិតប្រាកដមែនក៏ដោយ ប៉ុន្តែលោកអ្នកមិនគួរទទួលទានវាក្នុងចំនួនដ៏ច្រើនលើសលប់ពេកនោះទេ ពីព្រោះវាអាចបង្កឱ្យមានបញ្ហាផ្សេងៗបាន។ ក្រុមអ្នកវិទ្យាសាស្ត្រ បានបញ្ជាក់ថា អ្នកអាចទទួលទានសូកូឡាក្នុងបរិមាណ 30ក្រាមក្នុងមួយថ្ងៃ និងមួយប្រអប់ក្នុងរយៈពេលមួយសប្ដាហ៍តែប៉ុណ្ណោះ។ ហើយចំពោះក្រុមអ្នកជំងឺបេះដូងដែលមានអាយុចន្លោះពី50ឆ្នាំ ទៅ60ឆ្នាំ មិនត្រូវបានអនុញ្ញាតិឱ្យទទួលទានក្នុងបរិមាណច្រើននោះទេ។មួយវិញទៀត ស្ករសូកូឡាក៏មានផ្ទុកនូវសារធាតុសរីរាង្គជាច្រើន ដែលតួនាទីជាសារធាតុប្រឆាំងអុកស៊ីតកម្មផងដែរ។ មិនតែប៉ុណ្ណោះមានរួមបញ្ចូលទាំងសារធាតុ Polyphenols ,សារធាតុFlavonoids, សារធាតុ Catechins ក្នុងនោះទៀតផង។ សារធាតុប្រឆាំងអុកស៊ីតកម្ម Flavonoids នៅក្នុងស្ករសូកូឡាអាចជំរុញ endothelium ដែលជាស្រទាប់ខាងក្នុង នៃសរសៃឈាមអាទែរ ដើម្បីផលិត Nitric Oxide (NO) ដែលជាឧស្ម័នម្យ៉ាង។មុខងារនៃ NO គឺបញ្ជូនព័ត៌មានទៅក្នុងសរសៃឈាមដែលទប់ទល់ និងចលនារបស់ឈាមកុំឱ្យដើរលឿនហួសកម្រិត និងជួយកាត់បន្ថយសម្ពាធឈាម។ដូច្នេះហើយបានជា ស្ករសូកូឡាមានផ្ទុកទៅដោយសារធាតុចិញ្ចឹម ដែលអាចជួយឱ្យអ្នកមានសុខភាពល្អ បើមានការទទួលទានបានត្រឹមត្រូវ។ព្រោះបានផលិតចេញពីគ្រាប់ធញ្ញជាតិរបស់ដើមកាកាវ ហើយមានផ្ទុកនូវជាតិស្ករតិចបំផុត ដែលអាចជួយបំប៉នដល់សុខភាពរបស់អ្នក និងកាត់បន្ថយដល់ការកើតមាននូវជំងឺបេះដូងបានយ៉ាងពិតប្រាកដ៕

June 5, 2019

ចេះតែអស់កម្លាំងល្ហិតល្ហៃតើអ្នកបានបណ្ដេញជាតិពុលពីក្នុងខ្លួនហើយឬនៅ?

ធាតុពិតអ្នកចង់ឱ្យរាងកាយគ្មានជាតិពុល ប៉ុន្តែភ័យខ្លាចមិនដឹងថា ត្រូវកម្ចាត់ជាតិពុលពីក្នុងរាងកាយបានដោយវិធីណា ទាំងបានដឹងខ្លួនហើយថា រវល់ជាមួយការងារច្រើនសឹងតែរកពេលទំនេរគ្មានសោះ។ ក្រៅពីការហាត់ប្រាណ មានអ្នកខ្លះព្យាយាមក្នុងការទទួលទានទឹកភេសជ្ជៈ ឬទឹកផ្លែឈើ ដែលខ្លួនគិតថា វាអាចជួយបណ្ដេញជាតិពុលចេញពីក្នុងខ្លួន តែអ្នកភ្លេចគិតថា វាអាចបណ្ដាលឱ្យប៉ះពាល់ដល់ប្រព័ន្ធរំលាយអាហារ ជាពិសេសគឺ ក្រពះ និងពោះវៀន។

មនុស្សស្ទើរគ្រប់រូប សុទ្ធតែមានផ្ទុកនូវជាតិពុលក្នុងខ្លួន ជាតិពុលដែលមាននៅក្នុងអាហារ និងគ្រឿងស្រវឹងទាំងនោះ បណ្តាលមកពីកត្តាមួយចំនួន ដែលតែងតែមើលរំលងដូចជា ទឹក ចំណីអាហារសម្រេច ឬអាហារកំប៉ុង និងបរិស្ថាននៅជុំវិញខ្លួនផងដែរ។ ការប្រើប្រាស់សារធាតុគីមី ដើម្បីថែរក្សាចំណីអាហារទុកបានយូរ ឬឆាប់ទទួលបានផល ក៏ធ្វើឱ្យប៉ះពាល់ដល់សុខភាព និងបង្កជាតិពុលនៅក្នុងរាងកាយផងដែរ។ បញ្ហាទាំងនេះ គឺជាកង្វល់ដ៏សំខាន់មួយសម្រាប់ប្រជាពលរដ្ឋរស់នៅលើពិភពលោក ដែលកំពុងតែជួបប្រទះ វាបណ្តាលឱ្យប៉ះពាល់ដល់សុខភាពរាងកាយមនុស្ស ធ្វើឱ្យសុខភាពចុះខ្សោយ ឆាប់ឈឺ និងមានសុខភាពមិនល្អ។ នៅក្នុងថ្ងៃនេះ ទស្សនាវដ្ដី ឡារ៉ែន សូមណែនាំអ្នកឱ្យសាកល្បងវិធីសាស្រ្តងាយៗមួយចំនួន ដែលមានប្រសិទ្ធភាពក្នុងការការពារ ព្យាបាល និងកម្ចាត់ជាតិពុលចេញពីក្នុងខ្លួនមនុស្ស បានយ៉ាងឆាប់រហ័ស។

1. ខ្ពុរមាត់ជាមួយប្រេង
ស្ដាប់មើលទៅដូចជារាងប្លែកបន្តិច ប៉ុន្តែការពិតនោះគឺថា ការខ្ពុរមាត់ជាមួយនឹងប្រេង ដូចជា ប្រេងល្ង ប្រេងដូង ឬប្រេងអូលីវជាដើម អាចជួយរុញច្រាន ឬបណ្ដេញពពួកបាក់តេរីចេញពីក្នុងប្រអប់មាត់របស់អ្នក ដែលអ្នកកំពុងជួបបញ្ហាក្លិនមាត់មិនល្អ។ ក្នុងអំទ្បុងពេលអ្នកក្រោកពីដំណេក សូមប្រើប្រេងខ្ពុរមាត់ចំនួនមួយស្លាបព្រាបាយដាក់ចូលទៅក្នុងមាត់ បន្ទាប់មកសឹមដុសសម្អាតធ្មេញតាមធម្មតា វាមិនត្រឹមតែជួយសម្អាតកំណកកំបោរ និងបាក់តេរីនៅលើធ្មេញប៉ុណ្ណោះទេ ប៉ុន្តែវាថែមទាំងជួយឱ្យអ្នកមានខ្យល់ដង្ហើមស្រស់ថ្លាទៀតផង។

2. ទម្លាប់ល្អរបស់ជនជាតិចិន
តាមការសិក្សាស្រាវជ្រាវបានរកឃើញថា ការទទួលទានទឹកតែ ដែលជាប្រពៃណីដ៏ពេញនិយមរបស់ជនជាតិចិន ដូចជា ប្រភេទតែបៃតង តែអ៊ូឡុង ឬតែទឹកឃ្មុំក្រូចថ្លុងជាដើម អាចជួយកាត់បន្ថយភាពតានតឹង និងបង្កើនផលិតភាពបាន។ មិនត្រឹមតែប៉ុណ្ណោះ ការទទួលទានទឹកតែក្ដៅឧណ្ហៗ ក៏បានជួយជំរុញជាតិពុលចេញពីក្នុងខ្លួនផងដែរ ដោយការជួយសម្រួលដល់ដំណើរការប្រព័ន្ធបន្ទោរបង់បានយ៉ាងល្អ។ ហើយមានតែប្រភេទខ្លះទៀត ត្រូវបានជនជាតិចិនឱ្យតម្លៃថា ជាឱសថបុរាណចិនដ៏មានប្រសិទ្ធភាពបំផុតក្នុងការលាងគ្រាប់ឈាម ហើយជំនួយដល់សុខភាពបានយ៉ាងល្អ។

3. ការងូតទឹកក្ដៅ ឬត្រាំទឹកក្ដៅ
អ្នកប្រហែលជាគិតថា ជាតិពុលមានតែផ្នែកខាងក្នុងខ្លួនតែប៉ុណ្ណោះ ប៉ុន្តែធាតុពិតវិញផ្នែកខាងក្រៅនៃរាងកាយក៏មានជាតិពុលដូចគ្នាដែរ។ ហេតុដូចនេះ នៅពេលដែលអ្នកងូតទឹក អ្នកគួរប្រើស្បៃដុសខ្លួនជាមួយនឹងសាប៊ូក្នុងការសម្អាត និងម៉ាស្សាជាចលនារាងរង្វង់ 2 ឬ3ដងក្នុងមួយសប្តាហ៍ ដើម្បីជួយឱ្យចរន្តឈាមរត់បានស្រួល និងជំរុញជាតិពុលឱ្យចេញពីក្នុងខ្លួន និងជួយកម្ចាត់បាក់តេរីដែលតោងជាប់នឹងស្បែកផងដែរ។

4. ការទទួលទានទឹកក្ដៅជំនួសទឹកកក
អ្នកគប្បីដឹងថា ទឹកកកដែលផលិតឡើង និងដាក់លក់នៅតាមទីផ្សារ ក៏មានប្រើប្រាស់សារធាតុគីមីដែលជួយឱ្យត្រជាក់ ហើយកកបានយូរ។ ក៏ដូចគ្នាដែរ ការទទួលទានទឹកកកច្រើន វាបណ្ដាលឱ្យអ្នកមានសាច់ក្បាលពោះធំដោយមិនដឹងខ្លួន។ កត្តាដែលល្អសម្រាប់សុខភាព អ្នកគួរតែទទួលទានទឹកក្តៅ 1កែវ លាយជាមួយនឹងទឹកក្រូចឆ្មារ 1ផ្លែ រួចកូរចូលគ្នាឱ្យសព្វ ទទួលទានវាជារៀងរាល់ថ្ងៃ រាល់ព្រឹក រហូតដល់អ្នកមានសុខភាពល្អប្រសើរឡើងវិញ មិនសូវមានអារម្មណ៍នឿយហត់ខ្លាំង ឬកើតអាការខ្យល់ក្នុងខ្លួន។

5. អំបិលលាងជាតិពុលក្នុងរាងកាយ
អ្នកអាចយកអំបិល 2កែវកាហ្វេ លាយទៅក្នុងធុង ឬអាងទឹក រួចចាក់ទឹកក្តៅឧណ្ហៗចូល បន្ទាប់មកត្រាំខ្លួនរបស់អ្នកនៅក្នុងអាងទឹកនោះ រយៈពេល15នាទីជាការស្រេច។ អ្នកគួរតែធ្វើបែបនេះឱ្យបាន3ដង ក្នុង1សប្តាហ៍។ តែអ្នកក៏ត្រូវដឹងថា វិធីនេះមិនបានអនុញ្ញាតចំពោះមនុស្សដែលមានជំងឺលើសឈាម និងអ្នកជំងឺបេះដូងឡើយ៕

June 5, 2019

ភាពស្រស់ស្អាតដែលនារីៗតែងមើលរំលង

តើអ្នកដឹងឬទេថា តើរឿងណាទៅដែលនារីៗច្រើនតែមើលរំលងនៅក្នុងរឿងរូបសម្ផស្សស្រស់ស្អាតនោះ? ថ្ងៃនេះ ឡារ៉ែន មានចម្លើយមកជម្រាបជូនដូចតទៅ។

– មិនប្រើគ្រីមថែបំប៉ន និងមិនប្រើគ្រីមការពារកម្តៅថ្ងៃ
គ្រីមថែបំប៉ន និងគ្រីមការពារកម្តៅថ្ងៃ គឺជាការការពារ និងការថែទាំស្បែកមុខក្នុងរយៈពេលវែងដ៏ល្អបំផុត ទោះជាគ្រីមដែលជ្រើសរើសប្រើនោះមិនបានផ្សំដោយសារធាតុចម្រាញ់មានតម្លៃខ្ពស់ក៏ដោយ តែការបន្ថែមជាតិទឹកដល់ស្បែក និងតាមដោយការការពារកម្តៅថ្ងៃជារៀងរាល់លើកពេលចេញពីផ្ទះ នឹងជួយពន្យឺតអាយុស្បែកបានយូរ និងថែមទាំងការពារមិនឱ្យមានសម្លាកស្នាម ជាំ និងអាចម៍រុយបានយ៉ាងល្អ។

– ប្រើផលិតផលល្បីតាមគ្នា
ផលិតផលលើកសម្រស់ដែលទិញតាមពាក្យគេប្រាប់ អាចមិនស័ក្តិសមល្អសម្រាប់អ្នក ដូចជា មេកអាប់ដែលពណ៌មិនស៊ីគ្នាជាមួយស្បែក ឡេឡូស្សិនដែលមិនស័ក្តិសមជាមួយសភាពស្បែក ឬផលិតផលដែលមានតម្លៃថ្លៃលើសការពិតជាដើម។

– មិនពិនិត្យមើលអាយុរបស់ផលិតផល
គួរប្រើផលិតផលលើកសម្រស់តាមអាយុរបស់ផលិតផលនោះ អាចសង្កេតមើលបាននៅលើស្លាកដែលបិទនៅលើដប ដែលមានបញ្ជាក់ប្រាប់ថា ប្រើបានយ៉ាងពេញប្រសិទ្ធភាពក្នុងអំឡុងពេលប៉ុន្មានឆ្នាំ ដែលផលិតផលរូបមន្តធម្មជាតិច្រើនមានអាយុខ្លីជាងប្រមាណជា2-3ឆ្នាំតាមលក្ខខណ្ឌរបស់ធម្មជាតិ។

– ចូលចិត្ត តែមិនព្រមប្រើ
ភ្លេចខ្លួនទិញផលិតផលលើកសម្រស់មកសន្សំទុករហូតប្រើស្ទើរតែមិនទាន់ ទីបំផុតក៏ត្រូវបោះចោលព្រោះផុតកំណត់។ លើកក្រោយ ចូរសាកល្បងកត់ត្រារបស់ដែលត្រូវការពិតប្រាកដរៀងរាល់ពេល ដើម្បីកុំឱ្យភ្លេចខ្លួនទិញទុកចោលទៀត នាំតែអស់លុយឥតប្រយោជន៍។

ដឹងបែបនេះហើយ នារីៗដែលមានទង្វើដូចចំណុចខាងលើនេះ គួរតែបែរមកយកចិត្តទុកដាក់រឿងរូបសម្ផស្សវិញល្អជាង៕

June 4, 2019

4ទង្វើ បំផ្លាញ “ខួរក្បាល” ដោយមិនដឹងខ្លួន

ខួរក្បាល ជាអវយវៈមួយផ្នែកដែលសំខាន់ចំពោះរាងកាយខ្លាំងណាស់ ព្រោះក្រៅពីពេញទៅដោយខ្សែសរសៃប្រសាទដែលមានភាពស្មុគស្មាញរាប់លានសរសៃហើយនោះ បើខួរក្បាលធ្វើការខុសប្រក្រតី នឹងហុចផលប៉ះពាល់ទៅដល់អវយវៈផ្នែកផ្សេងៗក្នុងរាងកាយ និងមិនអាចរកខួរក្បាលថ្មីមកផ្លាស់ប្ដូរ ឬដូច្នេះបានឡើយ។ខួរក្បាល អាចរាប់បានថាជាអវយវៈដ៏សំខាន់របស់រាងកាយ ដោយមានតួនាទីជាមជ្ឈមណ្ឌលកណ្ដាលគ្រប់គ្រងកម្មវិធីផ្សេងៗដែលកើតឡើងក្នុងរាងកាយមនុស្ស មិនថាតែការលោតរបស់បេះដូង ការធ្វើចលនាផ្សេងៗ ឬការដកដង្ហើមជាដើម ដោយខួរក្បាលនឹងគ្រប់គ្រង និងបញ្ជារាងកាយឱ្យធ្វើការតាមការគិត ដើម្បីឱ្យមនុស្សអាចបំពេញការងារក្នុងជីវិតប្រចាំថ្ងៃបានយ៉ាងប្រក្រតី។ ខួរក្បាលធ្វើការងារគ្រប់ពេលវេលា ដូច្នេះហើយទើបការយកចិត្តទុកដាក់លើទង្វើដែលគួរប្រតិបត្តិ ដើម្បីឱ្យខួរក្បាលធ្វើការបានល្អ គឺជារឿងដែលមនុស្សគ្រប់គ្នាគួរផ្ដល់ភាពសំខាន់ ដើម្បីសុខភាពដ៏ល្អរបស់ខួរក្បាល និងចៀសវាងពីទង្វើអាក្រក់ៗដែលអាចបំផ្លាញខួរក្បាលបាន។

4ទង្វើបំផ្លាញខួរក្បាល
1. ភាពធុញថប់តានតឹង : ជាផលអាក្រក់ដល់ស្ថានភាពផ្លូវចិត្ត និងហុចផលប៉ះពាល់ដល់ខួរក្បាល ធ្វើឱ្យខូចសមាធិ ឬអ្នកខ្លះអាចឈានទៅរកសភាវសោកសៅ និងមានបញ្ហាផ្លូវចិត្តបានទៀតផង។
2. បរិស្ថានដែលមានខ្យល់អាកាសមិនល្អ :ការស្ថិតនៅក្នុងខ្យល់អាកាសដែលល្អ នឹងធ្វើឱ្យខួរក្បាលបានទទួលអុកស៊ីហ៊ែ្សនគ្រប់គ្រាន់ ដូច្នេះគួរចៀសវាងការស្នាក់អាស្រ័យនៅក្នុងទីកន្លែងដែលខ្យល់អាកាសមិនបរិសុទ្ធ ឬពេញទៅដោយពិសពុលខាងអាកាសគ្រប់ពេលវេលា។
3. ជក់បារី : អ្នកដែលជក់បារីជាប់ជាប្រចាំ ក្រៅពីធ្វើឱ្យកើតរោគមហារីកសួតហើយ នៅធ្វើឱ្យរាងកាយ និងខួរក្បាលបានទទួលអុកស៊ីហ៊ែ្សនកាន់តែតិច និងជាមូលហេតុរបស់ជំងឺសរសៃឈាមខួរក្បាល។
4. ជំងឺប្រចាំកាយប្រភេទខ្លះ : ដូចជាទឹកនោមផ្អែម លើសឈាម ខ្លាញ់ក្នុងឈាមខ្ពស់ ជាបច្ច័យប្រថុយប្រថានរបស់ជំងឺខួរក្បាលជាច្រើនដូច្នេះ បើរកឃើញថាខ្លួនឯងមានជំងឺប្រចាំកាយ គួរព្យាបាលតាំងពីដំបូងៗ ដើម្បីការពារមិនឱ្យកើតផលអាក្រក់ ព្រោះការព្យាបាលនៅពេលកើតការបំផ្លាញខួរក្បាលហើយ នឹងមិនអាចធ្វើឱ្យខួរក្បាលត្រឡប់មកធ្វើការបានពេញលេញដូចប្រក្រតីបានឡើយ ហើយផ្លូវចិត្តក៏នឹងធ្វើការខុសប្រក្រតីដែរ។

5វិធីបំប៉នខួរក្បាល
វេជ្ជបណ្ឌិតជំនាញខាងប្រព័ន្ធប្រសាទវិទ្យាបាននិយាយថា ខួរក្បាលមានភាពពាក់ព័ន្ធជាមួយអារម្មណ៍ និងការរៀនយល់ដឹង ដូច្នេះហើយទើបទាំងអស់នេះ មនុស្សគួរបែរមកយកចិត្តទុកដាក់លើទង្វើអភិវឌ្ឍខួរក្បាល ដែលមានទង្វើល្អៗ 5យ៉ាងដូចខាងក្រោម៖
1. បរិភោគល្អ គឺទទួលទានអាហារដែលមានប្រយោជន៍គ្រប់ទាំង 5ប្រភេទក្រុមកាត់បន្ថយចំណីអាហារប្រភេទខ្លះ ជាពិសេសអាហារដែលមានស្ករច្រើនដែលអាចនឹងប្រថុយប្រថានក្នុងការកើតជំងឺទឹកនោមផ្អែម និងជំងឺសរសៃឈាមខួរក្បាល។
2. ហាត់ប្រាណល្អ ការហាត់ប្រាណនឹងធ្វើឱ្យរាងកាយជារួម និងសរសៃឈាមរឹងមាំ គ្មានសភាវលើសទម្ងន់។

3. គេងសម្រាកល្អ ការគេងសម្រាកឱ្យបានគ្រប់គ្រាន់នឹងជួយឱ្យរាងកាយមានពេលសម្រាកដើម្បីជួសជុលខ្លួនឯង ដូច្នេះគួរមានពេលវេលាសម្រាក គេងលក់ឱ្យបានយ៉ាងតិច 6-8ម៉ោងក្នុងមួយថ្ងៃ។
4. គិតល្អ ការហ្វឹកហាត់គិត ហ្វឹកហាត់ចាប់ផ្ដើមធ្វើ នឹងជួយឱ្យខួរក្បាលកើតការរៀនយល់ដឹងនិងអភិវឌ្ឍកម្មវិធីការគិតឱ្យកាន់តែលឿនឡើង។
5. សន្ទនាល្អ ការហ្វឹកហាត់សន្ទនា ជជែកនិយាយជាមួយអ្នកដទៃជាប្រចាំ និងជាប់លាប់ នឹងជួយឱ្យខួរក្បាលមានការហ្វឹកហាត់ក្នុងការចេះកែបញ្ហាល្អ។ ចំណែកឯអ្នកដែលសម្ងំនៅតែឯង មិនចូលចិត្តជួបមនុស្សម្នា គេរកឃើញថា ខួរក្បាលមានកម្មវិធីការធ្វើការលើការកែបញ្ហាផ្សេងៗយឺតយ៉ាវ៕

June 4, 2019

ថៃផ្តល់សេវាអប់រំដល់កូនពលករខ្មែរ ឱ្យសិក្សារហូតដល់អាយុ15ឆ្នាំដោយឥតគិតថ្លៃ…

ស្របពេលសង្គមកំពុងត្រូវការការអភិវឌ្ឍ និងប្រកួតប្រជែងផ្នែកទីផ្សារការងារ ការអប់រំជាផ្នែកមួយដ៏សំខាន់ដែលមិនអាចខ្វះបានសម្រាប់កម្ពុជា តែកន្លងមកកុមារកម្ពុជាជាច្រើនដែលជាកូនរបស់ពលករទៅធ្វើការងារនៅបរទេស បានប្រឈមនឹងបញ្ហាការសិក្សារៀនសូត្រ ប្រសិនបើពួកគេទៅតាមម្តាយឪពុកដែលធ្វើចំណាកស្រុក។ ដោយមើលឃើញពីបញ្ហានេះ ភាគីកម្ពុជា និងថៃ បានពិភាក្សាគ្នាដើម្បីធ្វើយ៉ាងណាឱ្យកុមារកម្ពុជា ដែលរស់នៅជាមួយឪពុកម្តាយដែលជាពលករទៅធ្វើការងារនៅប្រទេសថៃទទួលបានសេវាអប់រំសម្រាប់អភិវឌ្ឍសមត្ថភាពដើម្បីកសាងអនាគតឱ្យបានល្អប្រសើរ។

លោកជំទាវ ជូ ប៊ុនអេង អនុប្រធានអចិន្ត្រៃយ៍នៃគណៈកម្មការជាតិប្រយុទ្ធប្រឆាំងអំពើជួញដូរមនុស្ស បានលើកឡើងថា រដ្ឋាភិបាលថៃ នឹងផ្តល់ការសិក្សាដល់កុមារកម្ពុជារយៈពេល 15ឆ្នាំពេញ ដើម្បីសិក្សានៅប្រទេសថៃដោយឥតគិតថ្លៃ។ ជាលក្ខខណ្ឌ កុមារដែលអាចទទួលបានសេវាអប់រំនេះ ចាំបាច់ត្រូវតែជាកុមារដែលមានអាណាព្យាបាលជាទេសន្តរប្រវេសន៍ស្របច្បាប់នៅប្រទេសថៃ ចំពោះអ្នកចំណាកស្រុកខុសច្បាប់មិនអាចទទួលបានការឧបត្ថម្ភនេះទេ។

លោកជំទាវ ជូ ប៊ុនអេង មានប្រសាសន៍ថា៖ “បច្ចុប្បន្ននេះពលករខ្មែរប្រមាណ 1លាននាក់កំពុងស្នាក់នៅជាទេសន្តរប្រវេសន៍នៅប្រទេសថៃ ដោយក្នុងនោះកុមារដែលកើត និងរស់នៅជាមួយឪពុកម្តាយមានចំនួនប្រមាណចន្លោះពី 6% ទៅ10% នៅប្រទេសថ”។

លោកជំទាវបានបន្ថែមទៀតថា កុមារដែលរស់នៅជាមួយឪពុកម្តាយចំណាកស្រុកទៅប្រទេសថៃទាំងអស់នោះមានបញ្ហាប្រឈមជាច្រើនដែលអាចប៉ះពាល់ដល់ស្ថានភាពរស់នៅបច្ចុប្បន្ន និងអនាគតរបស់គេ។ កុមារទាំងអស់នោះភាគច្រើនមិនចេះអក្សរ ហើយថែមទាំងមិនចេះនិយាយភាសាកំណើតទៀតផង ដែលបញ្ហានេះអាចធ្វើឱ្យពួកគេមានបញ្ហាប្រឈមមួយបន្ថែមទៀត គឺមិនមានសញ្ជាតិច្បាស់លាស់។ លោកជំទាវក៏បានលើកឡើងផងដែរថា ស្ថានភាពពលករកម្ពុជាឆ្លងដែនចូលក្នុងប្រទេសថៃ បច្ចុប្បន្នមានទាំងស្របច្បាប់ និងមិនស្របច្បាប់ ហើយចំពោះការឆ្លងដែនមិនស្របច្បាប់ គឺកាន់តែប្រឈមនឹងបញ្ហាជាច្រើន ព្រោះពួកគេមានជីវភាពខ្វះខាត ហើយធ្វើការងារឆ្លងដែនផ្សងព្រេងទាំងប្រថុយគ្រោះថ្នាក់ដើម្បីចូលទៅធ្វើការងារនៅប្រទេសថៃ។ ប្រជាជនចំណាកស្រុកចូលទៅក្នុងប្រទេសថៃគិតត្រឹមឆ្នាំ 2014កន្លងទៅ មានចំនួន1,830,000នាក់ ហើយចាប់ពីឆ្នាំ 2017 រហូតមកដល់បច្ចុប្បន្ននេះ មានកំណើនប្រមាណជាង 1លាននាក់ ដោយក្នុងនោះអ្នកចូលទៅធ្វើការងារមិនស្របច្បាប់ក៏មានចំនួនច្រើនដែរ។

ស្ថាបនិក និងនាយកមូលនិធិបណ្តាញជំរុញសិទ្ធិការងាររបស់ប្រទេសថៃ លោក Sopong Sravaenបានលើកឡើងថា ការផ្តល់ឱកាសដល់កុមារកម្ពុជាឱ្យទទួលបានការសិក្សានេះ ត្រូវបានធ្វើឡើងក្រោយពេលរដ្ឋាភិបាលថៃមើលឃើញថា កុមារកម្ពុជាជាច្រើនមិនទាន់ទទួលបានការសិក្សា ហើយមិនចេះទាំងភាសាកំណើតរបស់ខ្លួនទៅទៀត ដែលកត្តាទាំងនេះអាចនឹងធ្វើឱ្យពួកគេធំឡើងក្នុងស្ថានភាពគ្មានជំនាញ។ ក្រៅពីនេះពួកគេក៏អាចប្រឈមច្រើនផងដែរពីការចាញ់បោកក្រុមជួញដូរមនុស្សទៀតផង។

គួរបញ្ជាក់ផងដែរថា បច្ចុប្បន្ននេះភាគីកម្ពុជា និងភាគីថៃ កំពុងព្យាយាមខិតខំប្រឹងប្រែងដើម្បីបង្កើនកិច្ចសហប្រតិបត្តិការល្អលើការទប់ស្កាត់ការជួញដូរមនុស្ស និងការគាំពារសិទ្ធិអ្នកចំណាកស្រុកដោយធ្វើយ៉ាងណាជំរុញឱ្យពួកគេធ្វើចំណាកស្រុកដោយស្របច្បាប់ និងផ្តល់ការអប់រំដើម្បីឱ្យពួកគេទទួលបានវិជ្ជាជីវៈសម្រាប់យកធ្វើជាអាជីពដើម្បីចិញ្ចឹមជីវិតនៅថ្ងៃខាងមុខ។\

កិច្ចប្រជុំរវាងភាគីពាក់ព័ន្ធ កម្ពុជា ថៃ ដើម្បីពង្រឹងកិច្ចសហការក្នុងការដោះស្រាយបញ្ហាទេសន្តរប្រវេសន៍

សម្រាប់កម្មវិធីចុះហត្ថលេខាជាផ្លូវការស្តីពីគម្រោងផ្តល់ការអប់រំរយៈពេល 15ឆ្នាំដោយឥតគិតថ្លៃនេះ ភាគីទាំង2 បានរៀបចំគម្រោងរួចរាល់ហើយ តែមិនទាន់បានកំណត់ថ្ងៃចុះអនុស្សរណៈយោគយល់គ្នាជាក់លាក់នៅឡើយទេ៕

June 4, 2019

ជំងឺផ្លូវចិត្ត ឬជំងឺសោកសៅ (Depression Disorder)

នរណាដែលមិនធ្លាប់សោកសៅខ្លះ? ប្រហែលជាគ្មានទេ ព្រោះអារម្មណ៍សោកសៅជាអារម្មណ៍ដែលមាននៅក្នុងខ្លួនមនុស្សគ្រប់រូប និងក្នុងមួយថ្ងៃៗកម្រិតរបស់អារម្មណ៍ក៏មានឡើង មានចុះ និងមានច្រើនបែប ផ្លាស់ប្ដូរគ្រប់ពេលវេលាតាមរឿងរ៉ាវដែលចូលមកប៉ះពាល់អារម្មណ៍ និងការដឹងឮរបស់មនុស្សម្នាក់ៗ។

សោកសៅគឺជាអ្វី?
“សោកសៅ” ខាងវេជ្ជសាស្ត្រហៅថា ClinicalDepression មានន័យពីសភាវសោកសៅដែលមានខ្លាំងជាងអារម្មណ៍កម្សត់ ជាសភាវម្យ៉ាងដែលប្រទះឃើញនៅក្នុងជំងឺផ្លូវចិត្តជាច្រើន ជាពិសេសជំងឺខាងអារម្មណ៍ ជំងឺសោកសៅ ជំងឺ Bipolar Disorder និងសារធាតុថ្នាំមួយចំនួនក៏អាចធ្វើឱ្យកើតអាការសោកសៅយ៉ាងធ្ងន់ធ្ងរបានដែរ។

មូលហេតុនៃជំងឺសោកសៅ
ជំងឺសោកសៅ អាចរាប់បានថាជាជំងឺខាងផ្នែកផ្លូវចិត្តដែលប្រទះឃើញច្រើនក្នុងលំដាប់មុខៗគេរបស់ពិភពលោក បណ្ដាលមកពីមូល-ហេតុចម្បងៗ 2យ៉ាងគឺ បច្ច័យខាងសរីរៈ ឬពូជអម្បូរ និងបច្ច័យផ្នែកផ្លូវចិត្ត ឬបរិស្ថានជុំវិញ។
បច្ច័យខាងសរីរៈ ឬពូជអម្បូរ ដោយសារតែមានការប្រែប្រួលរបស់សារធាតុទំនាក់ទំនងប្រព័ន្ធប្រសាទក្នុងខួរក្បាល ឬភាពច្របូកច្របល់របស់កម្រិតអ័រម៉ូនដែលសំខាន់។
ចំណែកបច្ច័យផ្នែកផ្លូវចិត្ត ឬបរិស្ថានជុំវិញដែលហៅថាបច្ច័យខាងអារម្មណ៍ ជាលទ្ធផលបណ្ដាលមកពីស្ថានការណ៍ភាពតានតឹងខាងអារម្មណ៍ ដូចជា បើជាសភាវសោកសៅក្នុងវ័យកុមារ អាចមានមូលហេតុពីភាពតានតឹងក្នុងគ្រួសារ ហេតុការណ៍រំជួលចិត្តយ៉ាងធ្ងន់ធ្ងរ សភាវសោកសៅក្នុងជំងឺសរសៃប្រសាទ ដែលអាចរកឃើញតម្រុយថា ត្រូវបានកៀបសង្កត់យ៉ាងខ្លាំងក្លាកាលនៅក្មេង ហើយផ្ទុះចេញមកក្នុងអំឡុងជីវិតនៅពេលក្រោយ។ សភាវសោក-សៅព្រោះតែភាពចាស់ជរា មានជីវិតឯកោ និងសភាវរំជួលចិត្តក្រោយចូលនិវត្តន៍(បាត់បង់គុណតម្លៃលើខ្លួនឯង អត់ការងារធ្វើ មានអា-រម្មណ៍ថា គ្មានសមត្ថភាព)ជាដើម។

សង្កេតអាការ
នៅពេលមនុស្សក្នុងក្រុមគ្រួសារ ឬអ្នកជិតដិតណាម្នាក់ហាក់ដូចជាសោកសៅ គោល-ការណ៍សង្កេតងាយៗ គឺសង្កេតមើលទង្វើដូចតទៅនេះ៖
1. ទង្វើដែលកើតពីការផ្លាស់ប្ដូរខាងការគិត គឺច្រើនតែមានការគិតទៅខាង Negative Thinking ឬការគិតដែលអវិជ្ជមានគ្រប់ពេលវេលា។ ច្រើនតែមានអារម្មណ៍អស់សង្ឃឹម មើលឃើញជុំវិញខ្លួនសុទ្ធតែរឿងអាក្រក់មានអារម្មណ៍ថាខុស ថាខ្លួនឯងគ្មានតម្លៃ គ្មានន័យ និងគិតថាគ្មានថ្នាំព្យាបាលឱ្យជា ទីបំផុតក៏គិតចង់បំផ្លាញខ្លួនឯង នឹកឃើញតែរឿងស្លាប់ និងព្យាយាមសម្លាប់ខ្លួន។
2. ទង្វើដែលកើតចេញពីការប្រែប្រួលខាងការរៀនយល់ដឹង ឬការធ្វើការងារ មិនខ្វល់នឹងអ្វីៗជុំវិញខ្លួន មានអារម្មណ៍នឿយល្វើយ ធ្វើការងារយឺតយ៉ាវ ការងារចុះខ្សោយ គ្មានសមាធិ ការចងចាំចុះខ្សោយ ការសម្រេចចិត្តក៏យ៉ាប់យ៉ឺន។
3. ទង្វើដែលកើតចេញពីការផ្លាស់ប្ដូរខាងអារម្មណ៍ គឺច្រើនតែមានអារម្មណ៍សោកសៅ កង្វល់គ្រប់ពេលវេលា ច្រើនតែមួម៉ៅឆេវឆាវ ឆាប់ខឹង នៅមិនសុខ រសាប់រសល់ ជាដើម។
4. ទង្វើដែលប្រែប្រួលយ៉ាងមើលឃើញច្បាស់ ដូចជា គេងមិនលក់ ឆាប់ភ្ញាក់ ឬអ្នកខ្លះគេងលក់ខ្លាំងជ្រុលពេក អ្នកខ្លះធុញទ្រាន់ចំណីអាហារ ធ្វើឱ្យស្រកទម្ងន់។ មានអាការខាងរាងកាយ ព្យាបាលដោយថ្នាំធម្មតាមិនបាត់ ដូចជា អាការឈឺក្បាល ណែនក្នុងពោះ ឈឺរ៉ាំរ៉ៃ សម្ព័ន្ធភាពជាមួយអ្នកដទៃកាន់តែមិនល្អ។

ការមើលថែទាំខ្លួនឯងពេលកើតជំងឺសោកសៅ
1. កុំតាំងគោលដៅក្នុងការធ្វើការងារ កុំប្រតិបត្តិខ្លួនដែលធ្វើឱ្យលំបាកខ្លាំងជ្រុល ឬទទួលខុសត្រូវច្រើនជ្រុល។
2. ញែកបំបែកបញ្ហាធំៗឱ្យទៅជាផ្នែកតូចៗ ព្រមទាំងចាត់រៀងតាមលំដាប់ភាពសំខាន់មុនក្រោយ និងចាប់ផ្ដើមធ្វើតាមដែលអាចធ្វើទៅបាន។
3. ព្យាយាមធ្វើកិច្ចការងារផ្សេងៗរួមជាមួយបុគ្គលដទៃ ប្រសើរជាងនៅតែម្នាក់ឯង។
4. ជ្រើសរើសធ្វើកិច្ចការងារណាដែលសាងនូវអារម្មណ៍ល្អៗ ឬជក់ចិត្ត និងមិនធ្ងន់ធ្ងរខ្លាំងពេក ដូចជា មើលកុន ហាត់ប្រាណស្រាលៗ និងការចូលរួមធ្វើកិច្ចការងារក្នុងសង្គម ជាដើម។
5. កុំសម្រេចចិត្តក្នុងរឿងដែលសំខាន់ចំពោះជីវិតច្រើនពេក ដូចជា ការសុំឈប់ពីការងារ ការរៀបការ ឬការលែងលះ ដោយមិនបានប្រឹក្សាជាមួយមនុស្សជិតដិតដែលស្គាល់គ្នាច្បាស់ និងត្រូវតែបុគ្គលដែលអាចពិចារណាហេតុការណ៍នោះយ៉ាងទៀងត្រង់ មានភាពជាកណ្ដាល និងប្រាសចាកការអគតិដែលកើតពីអារម្មណ៍មកបិទបាំង។ បើអាចទៅរួច និងល្អបំផុតនោះគឺលើកពេលសម្រេចចិត្តទៅថ្ងៃក្រោយ រហូតទាល់តែសភាវសោកសៅរលាយបាត់ ឬល្អប្រសើរឡើងច្រើនហើយ។
6. មិនគួរទិតៀន ឬដាក់ទោសខ្លួនឯងដែលមិនអាចធ្វើបានដូចដែលត្រូវការ ព្រោះមិនមែនជាកំហុសរបស់ខ្លួនឯងទេ និងគួរធ្វើតាមដែលខ្លួនឯងអាចធ្វើបាន។

ការមើលថែទាំអ្នកកើតជំងឺសោកសៅ
1. យល់ចិត្ត : ការយល់ដឹងពីជំងឺដែលអ្នកជំងឺកំពុងជួបប្រទះ អាចជួយឱ្យសាច់ញាតិកាត់បន្ថយសេចក្ដីរំពឹង ភាពមួម៉ៅក្ដៅក្រហាយ និងភាពទើសទាល់ក្នុងចិត្តចំពោះអ្នកជំងឺបាន។
2. ទទួលស្ដាប់ : ការស្ដាប់អ្នកជំងឺដោយការយល់ចិត្ត យកចិត្តទុកដាក់ និងមិនប្រកាន់ នឹងជួយឱ្យអារម្មណ៍របស់អ្នកជំងឺល្អប្រសើរឡើង។
3. ទម្លាយអារម្មណ៍ : នៅពេលអ្នកជំងឺបានទម្លាយគំនិត និងអារម្មណ៍ដែលមិនល្អផ្សេងៗចេញមក ជាពិសេសគំនិតចង់ធ្វើអត្តឃាតនោះ នឹងជួយបន្ធូរបន្ថយភាពធុញថប់តានតឹងនៅក្នុងចិត្តបាន។
4. ហាត់ប្រាណ : ការហាត់ប្រាណ ជួយឱ្យរាងកាយរបស់អ្នកជំងឺរឹងមាំ ចិត្តគំនិតស្រស់ថ្លា។ បើសិនបានហាត់ប្រាណរួមជាមួយអ្នកដទៃផងនោះ នឹងរឹតតែជួយបង្កើនការចូលក្នុងសង្គមមនុស្ស និងមិនមានអារម្មណ៍ថាឯកោ។
5. ផ្លាស់ប្ដូរបរិយាកាស : គួរនាំអ្នកជំងឺទៅដើរកម្សាន្តដើម្បីផ្លាស់ប្ដូរបរិយាកាស នឹងជួយឱ្យចិត្តគំនិតរបស់អ្នកជំងឺស្រស់ថ្លាឡើងមួយកម្រិតដែរ។
6. ការពារការធ្វើបាបខ្លួនឯង : សាច់ញាតិត្រូវប្រយ័ត្នអ្នកជំងឺធ្វើបាបខ្លួនឯង ដោយត្រូវប្រមូលទុកដាក់ឧបករណ៍ដែលអ្នកជំងឺអាចយកមកធ្វើបាបខ្លួនឯងឱ្យនៅឆ្ងាយពីអ្នកជំងឺ។
7. សង្កេតមើលអាការ : ឧស្សាហ៍សង្កេតមើលអាការអ្នកជំងឺថា តើមានរឿងសោកសៅ ធុញថប់ ឬគិតប្រុងធ្វើបាបខ្លួនឯងដែរឬទេ? បើនិយាយណែនាំហើយមិនល្អប្រសើរឡើងនោះ គួរប្រញាប់នាំទៅជួបគ្រូពេទ្យដើម្បីប្រឹក្សាពីអាការ។
8. មើលថែទាំកិច្ចការងារប្រចាំថ្ងៃ តាមដានការញ៉ាំថ្នាំ : សាច់ញាតិគួរជួយមើលថែទាំកិច្ចការងារប្រចាំថ្ងៃរបស់អ្នកជំងឺ ដូចជា ញ៉ាំអាហារឱ្យបានសមរម្យ ភ្ញាក់ និងគេងឱ្យបានទៀងពេល រួមទាំងតាមដានការញ៉ាំថ្នាំឱ្យត្រឹមត្រូវតាមវេជ្ជបញ្ជា និងស៊ូទ្រាំ ព្រោះការព្យាបាលឱ្យទទួលបានលទ្ធផលល្អ ត្រូវប្រើពេលវេលាយូរ៕

June 4, 2019

iOS 13 ចេញជាផ្លូវការហើយ តែគួរឱ្យស្តាយ iPhone ខ្លះអាប់ឌែតអត់បាន

ក្នុងព្រឹត្តិការណ៍ WWDC 2019 ក្រុមហ៊ុន Apple បានប្រកាសបញ្ចេញស្មាតហ្វូនជំនាន់ប្រព័ន្ធប្រតិបត្តិការ iOS 13 ជាផ្លូវការហើយ។

ក្នុងនោះគេសង្កេតឃើញមានមុខងារថ្មីៗជាច្រើនដូចជា Dark Mode(ជួយសន្សំសំចៃថាមពលថ្ម) ជាដើម ព្រមទាំងផ្លាស់ប្តូរមុខមាត់កម្មវិធី iTune ផងដែរ។ ដើម្បីដំណើរការ Dark Mode អ្នកប្រើប្រាស់អាចធ្វើការកំណត់បានក្នុងកម្មវិធី Settings ស្ថិតនៅខាងក្នុងនៃផ្នែក Display & Brightness ដែលមានកំណត់ជា Light (ភ្លឺធម្មតា) ឬ Dark (ងងឹត) និងម្យ៉ាងទៀតក៏អាចកំណត់ថេរវេលាលើការប្រើមុខងារនេះដោយស្វ័យប្រវត្តិថែមទៀតផង។

តែអ្វីដែលគេចាប់អារម្មណ៍នោះ គឺនៅត្រង់ថា iPhone ស៊េរីចាប់ពី iPhone 5s, iPhone 6 និង iPhone 6 Plus មិនអាចអាប់ឌែតឡើងបានទេ សូម្បីតែ Facebook ក៏លេងមិនបានដែរ និយាយរួមទៅ បានតែលេងលើ Safari ប៉ុណ្ណោះ។ ក្រៅពីនោះសុទ្ធតែអាចអាប់ឌែត iOS 13 បានទាំងអស់៕

June 4, 2019

ការពិតអ្នកកីឡាកាសអាមេរិកាំង សុទ្ធតែជា FAN ក្លិបបាល់ទាត់នៅ Premier League

ស្ថាប័នកីឡាកាសពិភពលោក WWE ដែលមានមូលដ្ខាននៅសហរដ្ឋអាមេរិក គីជាកន្លែងប្រជុំទៅដោយអ្នកកីឡាកាសកម្រិតពិភពលោកល្បីៗ។

តែបើក្រឡេកទៅមើលជ្រុងមួយទៀតនៃចំណង់ចំណូលចិត្តរបស់ពួកគេវិញនោះ Super Stars នៅ WWE ទាំងអស់សុទ្ធតែជាអ្នកគាំទ្រ និងតាមដានក្រុមបាល់ទាត់នៅអង់គ្លេស។ ក្នុងនោះដែរមានដូចជា៖

-John Cena ជាអ្នកគាំទ្រក្រុមបាល់ទាត់ Tottenham Hotspur
-Rey Mysterio ជាអ្នកគាំទ្រក្រុមបាល់ទាត់ Manchester United
-Triple H ជាអ្នកគាំទ្រក្រុមបាល់ទាត់ West Ham United
-Kurt Angle ជាអ្នកគាំទ្រក្រុមបាល់ទាត់ West Ham
ជាដើម៕

June 4, 2019

កីឡាវាយកូនបាល់កម្ពុជា ជឿជាក់ថា នឹងឡើងដល់កម្រិត3 ក្នុងព្រឹត្តិកាណ៍ Davis-Cup ឆ្នាំនេះ

ក្នុងព្រឹត្តិការណ៍ Davis-Cup ឆ្នាំ2019 នេះ ក្រុមវាយកូនបាល់ជម្រើសជាតិកម្ពុជាមានជំនឿចិត្តថា កម្ពុជា នឹងមិនបន្តនៅក្នុងក្រុមកម្រិតទី4 ទៀតទេ គឺត្រូវតែឡើងទៅក្រុមកម្រិតទី3 ហើយនឹងត្រូវបន្តឡើងទៅលេងនៅក្រុមកម្រិតទី2 ឱ្យទាល់តែបាន។

លោក ទេព រិទ្ធីវិទ្ធ អគ្គលេខាធិការនៃសហព័ន្ធកីឡាវាយកូនបាល់កម្ពុជា បានបញ្ជាក់ប្រាប់ឱ្យដឹងថា ឆ្នាំ2019 នេះព្រឹត្តិការណ៍ Davis-Cup នឹងលេងនៅប្រទេសអូម៉ង់ ហើយនៅក្នុងក្រុមកម្រិតទី4 នឹងមានប្រទេសចំនួន15 ចូលរួម។

គួរបញ្ជាក់ផងដែរថា កាលពីឆ្នាំមុនក្រុមវាយកូនបាល់ជម្រើសជាតិកម្ពុជាបានលេងនៅក្នុងកម្រិតទី3 ប៉ុន្តែទទួលបានលទ្ធផលត្រឹមលេខ4 ក្នុងពូល ដូច្នេះត្រូវជម្រុះចេញពីកម្រិត3 ក្រោយចាញ់ក្រុមបាតតារាងក្នុងពូលផ្សេងទៀត៕

June 4, 2019

Category: សង្គម និងសេដ្ឋកិច្ច