សង្គម និងសេដ្ឋកិច្ច - La Reine Media

រដ្ឋបាលរាជធានីភ្នំពេញត្រៀមដាក់ឱ្យដំណើរការផ្លូវអាទិភាពមួយចំនួនសម្រាប់រថយន្តក្រុង

ដើម្បីបង្កលក្ខណៈងាយស្រួលក្នុងការដឹកញ្ជូនអ្នកដំណើរតាមរយៈរថយន្តក្រុងសាធារណៈ រដ្ឋបាលរាជធានីភ្នំពេញបានត្រៀមដាក់ឱ្យដំណើរការផ្លូវអាទិភាពមួយចំនួនក្នុងរាជធានីភ្នំពេញ សម្រាប់ការដឹកជញ្ជូនខ្សែរថយន្តក្រុងស្វយ័តរបស់រដ្ឋប្រកបដោយភាពរហ័សទាន់ចិត្ត និងកាត់បន្ថយគ្រោះថ្នាក់ចរាចរណ៍។

ឯកឧត្តម ឃួង ស្រេង អភិបាលរាជធានីភ្នំពេញបានអៈអាងថា ការកំណត់ផ្លូវអាទិភាពសម្រាប់រថយន្តក្រុងសាធារណៈនេះ គឺដើម្បីកែលម្អប្រព័ន្ធដឹកជញ្ជូនតាមរយៈមធ្យោបាយសាធារណៈរួមមួយនេះឱ្យកាន់តែទទួលបានប្រជាប្រិយភាព ពោលគឺទាក់ទាញអ្នកជិះឱ្យបានកាន់ច្រើន ដែលជួយកាត់បន្ថយការប្រើប្រាស់មធ្យោបាយផ្ទាល់ខ្លួន សំដៅរំដោះការកកស្ទះចរាចរណ៍យ៉ាងមានប្រសិទ្ធភាព។ អភិបាលរាជធានីភ្នំពេញ បានបញ្ជាក់ឱ្យដឹងថា រដ្ឋបាលរាជធានីភ្នំពេញ និងចាត់ក្រុមអ្នកជំនាញចុះសិក្សាជាមួយភាគីជប៉ុនដើម្បីកំណត់បណ្តាញផ្លូវមួយចំនួនជាផ្លូវឯកទិស និងផ្លូវអាទិភាពសម្រាប់រថយន្តក្រុងសាធារណៈ បានបើកបរដោយគ្មានការរំខាន និងឧបសគ្គអ្វីមួយកើតឡើង។

ឯកឧត្តមអភិបាលបានអៈអាងថា រដ្ឋបាលរាជធានីភ្នំពេញនឹងពន្លឿនការធ្វើកិច្ចការនេះឱ្យបានឆាប់ជាទីបំផុត ដើម្បីដោះស្រាយបញ្ហាកកស្ទះចរាចរណ៍ដែលកំពុងកើតឡើងជាញឹកញាប់នៅក្នុងរាជធានីភ្នំពេញ និងកាត់បន្ថយការរំខានដល់ការធ្វើដំណើររបស់ប្រជាពលរដ្ឋប្រកបដោយភាពងាយស្រួល និងធានាសុវត្ថិភាព។

ថ្លែងក្នុងពិធីសម្ពោធដាក់ឱ្យប្រើប្រាស់ស្ថានីយចំណតរថយន្តក្រុង និងទទួលរថយន្តក្រុងពីរដ្ឋាភិបាលជប៉ុននៅព្រឹកថ្ងៃទី19 ខែមិថុនានេះ ឯកឧត្តម ឃួង ស្រេង បានបញ្ជាក់បន្ថែមថា គម្រោងកែលម្អផ្លូវអាទិភាពសម្រាប់រថយន្តក្រុងសាធារណៈនៅរាជធានីភ្នំពេញនេះ គឺដោយសារតែបណ្តាផ្លូវខ្សែរត់រថយន្តក្រុងមួយចំនួន មានការចតយានយន្តគ្មានសណ្តាប់ធ្នាប់ ហើយមានការរំលោភលើចំណីផ្លូវសាធារណៈដែលបង្កការរំខានដល់ការធ្វើដំណើររបស់រថយន្តក្រុងពុំបានលឿនរហ័សទាន់ចិត្ត។

ឯកឧត្តម ហូរីណូអ៊ូជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា បានមានប្រសាសន៍ថា មធ្យោបាយដឹកជញ្ជូនតាមរយៈរថយន្តក្រុង គឺមានផលប្រយោជន៍ច្រើនសម្រាប់ទីក្រុង និងមានសុវត្ថិភាពសម្រាប់អ្នកដំណើរ ដូច្នេះការគាំទ្ររបស់ប្រជាពលរដ្ឋនឹងជួយជំរុញឱ្យរាជធានីភ្នំពេញដោះស្រាយបានបញ្ហាកកស្ទះចរាចរណ៍។

សូមបញ្ជាក់ថា មកដល់ពេលនេះ រដ្ឋបាលរាជធានីភ្នំពេញបានដាក់ឱ្យដំណើរការសេវារថយន្តក្រុងសាធារណៈបានចំនួន 13ខ្សែនៅតាមបណ្តាផ្លូវសំខាន់ៗក្នុងរាជធានីភ្នំពេញ ហើយជាមធ្យមក្នុង 1ថ្ងៃៗមានប្រជាពលរដ្ឋធ្វើដំណើរតាមរយៈសេវាកម្មមួយនេះចន្លោះពី 2ម៉ឺន6ពាន់នាក់ ទៅ3ម៉ឺននាក់៕

June 19, 2019

កសិកជំរុញការផលិតបន្លែសុវត្ថិភាព តែមិនទាន់អាចពង្រីកខ្លួនបំពេញតម្រូវការទីផ្សារបាននៅឡើយ

រាជរដ្ឋាភិបាលកម្ពុជាតាមរយៈក្រសួងកសិកម្មតែងបានប្រកាសឱ្យអាជ្ញាធរតាមបណ្តាខេត្តទាំងអស់ជំរុញឱ្យប្រជាពលរដ្ឋខិតខំដាំបន្លែដែលមានសុវត្ថិភាពឱ្យបានច្រើនបន្ថែមទៀត ដើម្បីផ្គត់ផ្គង់ទីផ្សារ ខណៈបច្ចុប្បន្នតម្រូវការបន្លែប្រភេទនេះមានតម្រូវការកើនឡើងខ្ពស់ ដោយហេតុថាការផ្គត់ផ្គង់បន្លែនៅកម្ពុជាបើប្រៀបទៅនឹងតម្រូវការក្នុងស្រុកនៅមានការខ្វះខាតច្រើន ទើបមានការនាំចូលបន្លែយ៉ាងច្រើនសន្ធឹកសន្ធាប់ពីប្រទេសជិតខាង។បញ្ហាប្រឈមក្នុងវិស័យនេះរួមមាន៖ផ្ទៃដីផលិត

មានទំហំតូច ទិន្នផលមធ្យមទាប ការបាត់បង់ផលដំណាំបន្ទាប់ពីការប្រមូលផល ផលិតផលមិនស្របតាមគុណភាព និងការបំពេញតម្រូវការទីផ្សារមិនគ្រប់គ្រាន់។ ការលើកកម្ពស់ផលិតកម្មបន្លែនឹងផ្តល់នូវជម្រើសដល់កសិករខ្នាតតូចដើម្បីធ្វើឱ្យផលិតកម្ម និងឱកាសទីផ្សាររបស់ពួកគាត់មានភាពសម្បូរបែប និងបង្កើនប្រាក់ចំណូលសម្រាប់កសិករ។

ដើម្បីរួមចំណែកដោះស្រាយបញ្ហាប្រឈមក្នុងវិស័យនេះ គម្រោងជំរុញទីផ្សារសម្រាប់កសិកម្មតូចបានបង្កើតជាសហគមន៍កសិករ ក្រុមផលិតបន្លែសុវត្ថិភាព តាមខេត្តគោលដៅរបស់គម្រោងដើម្បីជំរុញទីផ្សារបន្លែសុវត្ថិភាព និងសម្របសម្រួលភាពជាដៃគូវិស័យសាធារណៈ-ឯកជន និងដៃគូអភិវឌ្ឍន៍ ដើម្បីលើកកម្ពស់ផលិតភាព និងផលចំណេញលើវិស័យបន្លែ។

កសិករ ឌីន ឈិត និងអ្នកស្រី សុខ ហៀង ជាប្រពន្ធ ជាអ្នកផលិតបន្លែសុវត្ថិភាពបានប្រាប់កាសែតឡារ៉ែនពាណិជ្ជថា៖“ការចងជាសហគមន៍ កសិករនឹងមិនជួបបញ្ហាលំបាកក្នុងការរកទីផ្សារ និងប្រឈមតម្លៃឡើងចុះខ្លាំងពេកទេ”។

អ្នកស្រីហៀងបានពន្យល់ថា៖“កសិករដាំដំណាំដូចៗគ្នា និងចង់លក់បានថ្លៃពេលទីផ្សារបន្លែធ្លាក់ចុះ ក្នុងខណៈដែលការផលិត ឬដាំដំណាំបានធ្វើឡើងក្នុងរដូវដែលត្រូវនឹងពេលបន្លែទទួលផលបានល្អ ធ្វើឱ្យការប្រមូលទិញក៏ពុំមានការប្រកួតប្រជែងរវាងអ្នកប្រមូលទិញដូចគ្នាទេ។ ប៉ុន្តែបច្ចុប្បន្ន មានការបញ្ជាទិញពីឈ្មួញ ឬក្រុមហ៊ុនផ្សារទំនើបចំនួនច្រើននូវបន្លែសុវត្ថិភាពដែលសហគមន៍មិនភ័យព្រួយពីបញ្ហាលក់ទៀតនោះឡើយ តែបារម្ភពីបញ្ហាផលិតមិនបានគ្រប់ចំនួនដែលគេបញ្ជាទិញទៅវិញ”។

យោងតាមអ្នកស្រី សុខ ហៀង អាយុប្រមាណ 60ឆ្នាំ មុខរបរជាកសិករដាំបន្លែដែលរស់នៅភូមិសំបូរ ឃុំសូភាស ស្រុកស្ទឹងត្រង់ ខេត្តកំពង់ចាមដែលបានដាំដំណាំបន្លែសរីរាង្គ(គ្មានសារធាតុគីមី) ដោយខ្លួនឯងសម្រាប់លក់នៅតាមផ្សារក្នុងស្រុកបានអះអាងថា ការដាំបន្លែរួមផ្សំ ផ្តល់អត្ថប្រយោជន៍ជាច្រើន ដូចជាកាត់បន្ថយ ការទិញបន្លែពីផ្សារដែលផ្ទុកសារជាតិគីមី។

អ្នកស្រីហៀងបានឱ្យដឹងទៀតថា៖“ការដាំបន្លែរួមផ្សំទាំងនោះតាមលំនៅឋាន ក៏ដូចជានៅតាមចម្ការ ក៏អាចមានជីវភាពល្អប្រសើរដូចកសិករដទៃទៀតដែលនៅទំនេរចាំតែធ្វើស្រែមួយមុខហើយការដាំបន្លែនេះ មួយផ្នែកសម្រាប់ផ្គត់ផ្គង់ជីវភាពហូបចុកប្រចាំថ្ងៃ និងសម្រាប់លក់ឱ្យឈ្មួញចុះទិញដល់លំនៅឋាន មិនចាំបាច់មានដីចម្ការច្រើនហិកតានោះទេ គឺកសិករអាចដាំក្នុងទីធ្លាបរិវេណជុំវិញលំនៅឋានកំពុងរស់នៅផ្ទាល់តែម្តងក៏បានដែរ”។

សម្រាប់អ្នកស្រី សុខ ហៀង ដែលមានដីទំហំត្រឹមជាង 20អា តែក៏អាចដាំបន្លែសុវត្ថិភាពបានជាច្រើនមុខ ហើយបន្លែដែលអ្នកស្រីដាំ រួមមានស្ពៃក្រញាញ់ ស្ពៃចង្កឹះ និងស្ពៃខៀវ និងបន្លែរួមផ្សំមានស្លឹកស្អំ ប្រពាយ ដំឡូងដៃខ្លា ដំឡូងកៅពឹង ននោង និងម្ទេសជាដើម។

អ្នកស្រីបានបន្តថា សម្រាប់រូបគាត់មានផ្ទៃដីតិចពេកមិនអាចដាំបានច្រើនដូចគេអ្នកភូមិដទៃនោះទេ គឺមានដីត្រឹមតែជាង 20អា ដែលអាចដាំចម្រុះជាបន្លែជាច្រើនមុខ សម្រាប់ផ្គត់ផ្គង់ទៅទីផ្សារ ដោយដាំតាមបច្ចេកទេសដែលខាងកសិកម្មបានចុះមកបង្ហាត់បង្ហាញណែនាំ និងការប្រើជីធម្មជាតិ សុទ្ធសាធមិនមាន ប្រើជីគីមីនោះទេ ។

អ្នកស្រី សុខ ហៀង បានបញ្ជាក់ឱ្យដឹងថា៖“ចំពោះបន្លែស្ពៃទាំង 3មុខ ដែលខ្ញុំបានដាំ គឺបានហុចផលជាបន្តបន្ទាប់ ព្រោះខ្ញុំបានដាំជាបន្តបន្ទាប់ដើម្បីឱ្យបានលក់ជាបន្តបន្ទាប់ដែរ។ រីឯតម្លៃស្ពៃទាំង 3ប្រភេទនេះ ខ្ញុំអាចលក់ចេញបានក្នុងតម្លៃ 4,000 ទៅ5,000រៀលក្នុង 1គីឡូក្រាមដោយទទួលបានកម្រៃក្នុង 1ថ្ងៃប្រមាណ 3ម៉ឺនទៅ 4ម៉ឺនរៀល បើគិតជាទឹកប្រាក់ក្នុង1ខែ ក៏បានប្រហែល 1លាន2សែនរៀលដែរ(ប្រមាណ300ដុល្លារអាមេរិក)”។ បើយើងគិតជាប្រាក់សរុបក្នុង 1ឆ្នាំគ្រួសារអ្នកស្រីទទួលបាន 3600ដុល្លារអាមេរិកដែរសម្រាប់ផ្គត់ផ្គង់ជីវភាព នេះយើងមិនបានគិតពីកម្រៃដែលបានពីបន្លែរួមផ្សំនៅឡើយទេ។អ្នកស្រីក៏បានបញ្ជាក់ថា ក្នុង 1ឆ្នាំអ្នកស្រីអាចដាំបានពី 4ទៅ 6លើក ក្នុង 1លើកៗមានរយៈពេល 1ខែទៅ1ខែកន្លះ ហើយប្រាក់ទាំងនោះក៏ខ្ញុំយកទៅចំណាយសម្រាប់ការដាំជាបន្តបន្ទាប់ដែរ តែវាបានជួយឱ្យជីវភាពគ្រួសារខ្ញុំបានធូរធារ ទោះបីជាយើងមានដីទំហំតូចក៏ដោយក៏យើងអាចទទួលផលចំណេញពីវា និងចូលរួមក្នុងសហគមន៍ជំរុញការដាំដុះបន្លែសុវត្ថិភាពសម្រាប់ផ្គត់ផ្គង់ទីផ្សារក្នុងស្រុករបស់យើងឱ្យបានគ្រប់គ្រាន់។

អ្នកស្រី សុខ ហៀងក៏បានអំពាវនាវឱ្យប្រជាពលរដ្ឋខិតខំដាំបន្លែដែលមានសុវត្ថិភាពឱ្យបានច្រើនបន្ថែមទៀត ដើម្បីផ្គត់ផ្គង់នៅលើទីផ្សារ ព្រោះបច្ចុប្បន្នតម្រូវការបន្លែប្រភេទនេះមានការកើនឡើងខ្ពស់ណាស់។ ជាមួយគ្នានេះសហគមន៍បាន និងកំពុងយកចិត្តទុកដាក់ខ្ពស់បំផុត ស្របគ្នាទៅនឹងគោលដៅអភិវឌ្ឍន៍ដែលបានកំណត់ថា ទៅថ្ងៃអនាគត ផលិតកម្មកសិកម្ម គឺផលិតឡើងប្រកបទៅដោយបរិមាណ និងគុណភាព សុវត្ថិភាពអាចផ្គត់ផ្គង់បានគ្រប់តាមតម្រូវការទីផ្សារ៕

June 19, 2019

អ្នកចាត់ការក្រុមជម្រើសជាតិកម្ពុជា អាចនឹងផ្ទេរទៅលេងនៅ Serie A វិញ ដោយគ្មានតម្លៃខ្លួន

អ្នកចាត់ការក្រុមជម្រើសជាតិកម្ពុជា ត្រូវបានក្លិបបាល់ទាត់មួយដែលទើបតែបានឡើងមកកាន់លីកកំពូលអ៊ីតាលី Brescia Calcio ចាប់អារម្មណ៍ ហើយអាចនឹងផ្ទេរទៅលេងក្នុងក្លិបមួយនេះនារដូវកាលក្រោយនេះតែម្តង។

យោងតាមសារព័ត៌មានអ៊ីតាលីមួយ calciomercato កាលពីពេលថ្មីៗនេះបានចុះផ្សាយពាក្យចចាមអារ៉ាមថា ក្លិបទើបឡើងមកលីកកំពូលអ៊ីតាលី Brescia Calcio បានចាប់អារម្មណ៍ក្នុងការនាំយកអតីតកីឡាករដែលធ្លាប់មានបទពិសោធនៅលីកកំពូលអ៊ីតាលី AC Milan ទៅចូលរួមជាមួយក្រុមរបស់ខ្លួន ជាមួយនឹងការផ្ទេរដោយគ្មានតម្លៃខ្លួន ខណៈដែលអ្នកចាត់ការទូទៅ និងជាកីឡាករវ័យ 32ឆ្នាំរូបនេះកំពុងស្ថិតក្នុងស្ថានភាពទំនេរគ្មានក្លិបប្រកបអាជីពជាមួយក្រោយផុតកិច្ចសន្យាជាមួយក្លិប Melbourne Victory របស់អូស្ត្រាលីរួចមក៕

June 19, 2019

ក្រុមហ៊ុន Nike បញ្ចេញបាល់ថ្មីសម្រាប់ Premier League រដូវកាល2020

ក្រុមហ៊ុន Nike និង Premier League បានសហការគ្នាអស់រយៈពេល 20ឆ្នាំមកហើយក្នុងការផលិតបាល់ដើម្បីប្រើប្រាស់គ្រប់ការប្រកួតទាំងអស់ក្នុងក្របខ័ណ្ឌ Premier League។

ចំពោះរដូវកាលថ្មីឆ្នាំ2020 ខាងមុខនេះ បាល់ដែលមានឈ្មោះថា Nike Merlin នេះ ត្រូវបានសម្រិតសម្រាំងឡើងដោយភ្ជាប់ជាមួយនឹងបច្ចេកវិទ្យា Nike’s All Conditions Control (ACC) ជាមួយនឹងពណ៍ភ្លឺ និងស្អាត ដែលធ្វើឱ្យលេចធ្លោនៅគ្រប់ស្ថានភាព ទោះបីជាក្នុងអាកាសធាតុបែបណាក៏ដោយ ក៏គេអាចមើលឃើញបាល់មួយនេះច្បាស់ជាជាងបាល់ប្រភេទដទៃ។

គួរបញ្ជាក់ផងដែរថា រដូវកាលឆ្នាំ2019 ក្រុមបាល់ទាត់ Manchester City គឺជាម្ចាស់ជើងឯកនៅលីកអង់គ្លេស English Premier League ក្រោយឆ្លងកាត់ 38ប្រកួត ឈ្នះ32 ស្មើ2 និងចាញ់4 មាន 98ពិន្ទុ ឈរពីលើ Liverpool តែ 1ពិន្ទុតែប៉ុណ្ណោះ៕

June 19, 2019

លំនៅឋានតម្លៃសមរម្យរបស់ក្រុមហ៊ុន តំបន់សេដ្ឋកិច្ចពិសេសភ្នំពេញអាចនឹងចាប់ផ្តើមនៅឆ្នាំក្រោយ

ក្រុមហ៊ុនតំបន់សេដ្ឋកិច្ចពិសេសភ្នំពេញ (Phnom Penh SEZ) បានឱ្យដឹងថា ខ្លួនអាចនឹងចាប់ផ្តើមសាងសង់លំនៅឋានតម្លៃសមរម្យនៅឆ្នាំក្រោយនេះសម្រាប់អ្នកដែលមានចំណូលទាប និងមធ្យម ជាពិសេសសម្រាប់កម្មករដែលធ្វើការនៅក្នុងតំបន់សេដ្ឋកិច្ចពិសេសភ្នំពេញតែម្ដង។

លោក Hiroshi Uematsu អគ្គនាយកនៃក្រុមហ៊ុនតំបន់សេដ្ឋកិច្ចពិសេសភ្នំពេញ Phnom Penh SEZ Public Limited Company បានឱ្យដឹងថា ក្រុមហ៊ុនលោកនឹងដាក់សំណើទៅកាន់រដ្ឋាភិបាលនៅពេលផែនការមេនៃគម្រោងសាងសង់លំនៅឋានតម្លៃសមរម្យបានចប់សព្វគ្រប់។ លោកថ្លែងថា ខណៈពេលនេះក្រុមហ៊ុនកំពុងស្វែងរកដីប្រមាណ 7ហិកតាសម្រាប់សាងសង់គម្រោងនេះ ដែលទីតាំងនៃគម្រោងលំនៅឋានតម្លៃសមរម្យនេះ គឺស្ថិតក្នុងតំបន់សេដ្ឋកិច្ចពិសេសភ្នំពេញតែម្ដង។

លោក Uematsu បានឱ្យដឹងថា ក្រុមហ៊ុនរបស់លោកបានបម្រុងទុកដីប្រមាណ 7ហិកតាសម្រាប់សាងសង់ម្តងហើយ តែដោយសារតែមានក្រុមហ៊ុនចិនមួយមកវិនិយោគនៅក្នុងតំបន់នេះដែរ ហើយត្រូវការដីប្រមាណជាង 40ហិកតា ដែលជាប់នឹងដីបម្រុងទុកនោះ ទើបក្រុមហ៊ុនតំបន់សេដ្ឋកិច្ចពិសេសភ្នំពេញ ស្វែងរកទីតាំងថ្មីទៀត ដែលស្ថិតនៅក្នុងតំបន់សេដ្ឋកិច្ចពិសេសដដែល។ លោកថា ក្រុមហ៊ុននឹងសាងសង់ផ្ទះចំនួន 3ពាន់ខ្នង ដោយអភិវឌ្ឍជាដំណាក់កាល។

កំណើនសម្រាប់លំនៅឋានតម្លៃសមរម្យមានការកើនឡើងពី 1ឆ្នាំទៅ 1ឆ្នាំ ដោយសារអត្រានៃកំណើនប្រជាជនបានកើនឡើង ជាពិសេសការបំផ្លាស់ទីពីទីជនបទមកទីក្រុង ដែលមានកំណើនប្រមាណ 30ភាគរយនៅក្នុងឆ្នាំ2015 បើធៀបនឹងឆ្នាំ1990 ដែលមានតែ 15ភាគរយប៉ុណ្ណោះ។ មួយវិញទៀត ការកើនឡើងនៃប្រាក់ឈ្នួលអប្បបរមាក៏ជាកត្តាជំរុញឱ្យមានតម្រូវការផ្ទះផងដែរ។ នេះបើយោងតាម កម្មវិធីអភិវឌ្ឍន៍អង្គការសហប្រជាជាតិ (UNDP)។

អង្គការយូអិនឌីភី (UNDP) បានរាយការណ៍ថា តម្រូវការលំនៅឋាននឹងកើនឡើងជាង 1លានខ្នងផ្ទះនៅឆ្នាំ2030 ដោយតំបន់ប្រជុំជន និងទីក្រុងភ្នំពេញនឹងមានតម្រូវការប្រមាណ 80ម៉ឺនខ្នង ព្រមជាមួយនឹងគោលនយោបាយល្អពីរដ្ឋាភិបាល និងសេដ្ឋកិច្ចដែលលូតលាស់ល្អ ទើបជំរុញកំណើនតម្រូវការផ្ទះសំបែងនេះ។

កាលពីឆ្នាំ2017 រដ្ឋាភិបាលបានដាក់ឱ្យប្រើប្រាស់នូវគោលនយោបាយនៃការអភិវឌ្ឍលំនៅឋានតម្លៃសមរម្យ នឹងបើកផ្លូវឱ្យក្រុមហ៊ុនជានីតិបុគ្គល ដែលបានចុះបញ្ជីនៅកម្ពុជា ត្រូវបានអនុញ្ញាតឱ្យសាងសង់លំនៅឋានតម្លៃសមរម្យនេះ ដោយការអភិវឌ្ឍត្រូវភ្ជាប់ជាមួយនឹងទីធ្លា និងបរិស្ថានល្អត្រឹមត្រូវ មានទីផ្សារ ឬមជ្ឈមណ្ឌលផ្សេង។

គោលនយោបាយនៃការអភិវឌ្ឍលំនៅឋានតម្លៃសមរម្យ គឺកំណត់តម្លៃ និងហេដ្ឋារចនាសម្ព័ន្ឋសមស្របមួយ សម្រាប់គម្រោងលំនៅឋាន ដែលផ្តោតលើប្រជាជនមានជីវភាពមធ្យម និងទាប។ គម្រោងអភិវឌ្ឍន៍លំនៅឋានតម្លៃសមរម្យ ត្រូវមានមានលំនៅឋានចាប់ពី 100ឯកតា ត្រូវមានទីតាំងចម្ងាយ 20គីឡូម៉ែត្រពីរាជធានី ក្រុង នឹងត្រូវលក់ក្នុងតម្លៃចន្លោះពី 15,000ដុល្លារ ទៅដល់ 30,000ដុល្លារអាមេរិក។

ផ្អែកលើគម្រោងអភិវឌ្ឍន៍លំនៅឋានតម្លៃសមរម្យនេះ រាជរដ្ឋាភិបាលចង់ឱ្យប្រជាពលរដ្ឋ ដែលពុំទាន់មានផ្ទះសំបែងឱ្យមានលំនៅឋានមួយរស់នៅសមរម្យ គឺជាការជំរុញបត់បែនទៅតាមជំហានរីកចម្រើន ក៏ដូចជាការកាត់បន្ថយសេវាសាធារណៈឱ្យកាន់តែប្រសើរឡើង កាត់បន្ថយអសន្តិសុខ ពង្រីកវប្បធម៌ សាមគ្គីធម៌ឱ្យកាន់តែទូលាយផងដែរ។

នេះបើតាម លោកអគ្គនាយកនៃក្រុមហ៊ុនតំបន់សេដ្ឋកិច្ចពិសេសភ្នំពេញ Phnom Penh SEZ Public Limited Company៖ “តម្លៃរបស់យើងនឹងសមរម្យសម្រាប់ប្រជាជនដែលមានចំណូលទាប និងមធ្យម ជាពិសេសសម្រាប់បុគ្គលិក និងកម្មករធ្វើការនៅក្នុងតំបន់សេដ្ឋកិច្ចពិសេស។ លោកបញ្ជាក់ថា “តម្លៃគឺប្រមាណពី15,000 ទៅ 30,000ដុល្លារក្នុង 1ខ្នង”។

លោកបានឱ្យដឹងទៀតថា ការចាប់ផ្តើមសាងសង់គម្រោងលំនៅឋានសមរម្យ សម្រាប់អ្នកដែលមានចំណូលទាប និងមធ្យម នេះគឺជាគោលគំនិតរបស់ថ្នាក់ដឹកនាំរបស់ក្រុមហ៊ុន ខណៈអ្នកអភិវឌ្ឍន៍ផ្សេងទៀតចាប់អារម្មណ៍លើគម្រោងអភិវឌ្ឍន៍លំនៅឋានដែលមានតម្លៃខ្ពស់។

លោកបានបន្តថា ការបង្កើតគម្រោងសាងសង់លំនៅឋានតម្លៃសមរម្យនេះ គឺក្រុមហ៊ុនចង់ចូលរួមលើកកម្ពស់នូវសុខុមាលភាពកម្មករ និងផ្តល់ជូននូវបរិយាកាសរស់នៅដែលល្អមួយ ហើយវាជាការចង់បានពីសំណាក់ក្រុមហ៊ុនឧស្សាហកម្មដែលមានខ្សែចង្វាក់តម្លៃបន្ថែមខ្ពស់នៅក្នុងតំបន់សេដ្ឋកិច្ចពិសេសនេះផងដែរ។

លោក Uematsu មានប្រសាសន៍ថា៖“យើងនឹងសហការជាមួយក្រុមហ៊ុនទាំងអស់នោះ ទាក់ទងនឹងកម្ចី ដោយសារកម្មកររោងចក្រមិនមានលទ្ធភាពក្នុងការបង់ថ្លៃផ្ទះ 1ដងក្នុងពេលដំបូងនោះទេ ដូច្នេះយើងត្រូវរៀបចំយន្តការនៃការបង់ប្រាក់ជាមួយអាត្រាការប្រាក់ទាប បើធៀបនឹងគ្រឹះស្ថានហិរញ្ញវត្ថុ គឺពួកគេខ្ពស់ជាងយើង”។

ក្រុមហ៊ុននឹងរៀបចំ ធ្វើការជាមួយក្រុមហ៊ុនធំៗនៅក្នុងតំបន់ ដូច្នេះក្រុមហ៊ុនអាចផ្តល់កម្ចីរបស់ក្រុមហ៊ុន ជាមួយអាត្រាការប្រាក់ តែឥឡូវយើងផ្លាស់ប្តូរទីតាំង ដូច្នេះយើងនឹងកែសម្រួលផែនការមេរបស់យើង។ យើងនឹងដាក់គម្រោងរបស់យើងជូនក្រសួងសេដ្ឋកិច្ច និងហរិញ្ញវត្ថុ ព្រមជាមួយនឹងភាគីពាក់ព័ន្ធផ្សេងៗទៀត។

លោកបានបន្ថែមថា កម្ចីទិញផ្ទះគួរតែសមរម្យ សម្រាប់ពួកគេ(កម្មករនិយោជិត) គឺប្រមាណ 30ភាគ-រយនៃប្រាក់ចំណូលសរុបរបស់គេ ដែលសរុបចំនួនស្នាក់នៅក្នុងតំបន់នេះមានប្រមាណ 3,000នាក់។

លោក សំ វង្សី ប្រធានអង្គភាព ភាពជាដៃគូរវាងរដ្ឋ និងឯកជនថ្នាក់កណ្តាលនៃក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ឱ្យដឹងថា មកទល់ពេលនេះមានគម្រោងតែ 2ប៉ុណ្ណោះដែលបានដាក់ពាក្យស្នើសុំសាងសង់លំនៅឋានតម្លៃសមរម្យ គឺក្រុមហ៊ុន វើលប្រ៊ីជហូម និងក្រុមហ៊ុនតំបន់សេដ្ឋកិច្ចពិសេស តែមានតែក្រុមហ៊ុនវើលប្រ៊ីជហូម មួយប៉ុណ្ណោះដែលគុណវុឌ្ឍិគ្រប់គ្រាន់។

លោកបន្តថា រដ្ឋាភិបាលបានដាក់ឱ្យប្រើប្រាស់ គោលនយោបាយនៃការអភិវឌ្ឍលំនៅឋានតម្លៃសមរម្យ នេះកាលពីឆ្នាំ2017 តែគោលនយោបាយនេះមិនទាន់បានផ្សព្វផ្សាយទូលំទូលាយនៅឡើយ ហើយក្រសួងក៏កំពុងតែរៀបចំក្របខ័ណ្ឌក្នុងការវាយតម្លៃលើគម្រោងនីមួយៗដែរ។

លោកបន្តទៀតថា ក្រោយពីគម្រោងទី1 បញ្ជប់យើងអាចដកស្រង់បទពិសោធ និងមេរៀនខ្លះលើការងារនេះ ដើម្បីកែសម្រួលសម្រាប់គម្រោងក្រោយៗទៀត។ ដោយសារតែតម្លៃអចលនទ្រព្យកើនឡើងពី 1ឆ្នាំទៅ 1ឆ្នាំ ដូច្នេះរាល់គម្រោងនានាដែលបានដាក់ពាក្យស្នើសុំសាងសង់ រដ្ឋាភិបាលនឹងពិនិត្យជាក់ស្តែងនូវរាល់គម្រោងនីមួយៗដែលបានដាក់ស្នើមកក្រសួង ដោយពិនិត្យពីតម្លៃគម្រោងសរុប និងតម្លៃលក់ថា តើវាចំណេញឬខាត? ដូចនេះក្រសួងនឹងពិនិត្យលើការលើកទឹកចិត្តតាមស្ថានភាពជាក់ស្តែង៕

June 19, 2019

ល្ងាចនេះក្រុមហ្វ៊ុតសាល Downtown Sport នឹងតំណាងឱ្យកម្ពុជាក្នុងពានរង្វាន់ហ្វ៊ុតសាលកម្រិតអាស៊ាន

ការប្រកួតពានរង្វាន់ក្លិបបាល់ទាត់ក្នុងសាល ឬហ្វ៊ុតសាលអាស៊ាន AFF Futsal Club Championship នឹងចាប់ផ្តើមហើយនៅពេលល្ងាចនេះ ដោយក្រុម Downtown Sport តំណាងឱ្យកម្ពុជា ត្រូវប៉ះជាមួយនឹងក្រុម Melaka តំណាងឱ្យម៉ាឡេស៊ី ម៉ោង 4ល្ងាចនេះក្នុងជំនួបបើកឆាកនៃពានរង្វាន់នេះ។

គួរបញ្ជាក់ផងដែរថា AFF Futsal Club Championship 2019 ត្រូវបានធ្វើឡើងនៅខេត្តណៈខនរ៉ាតចៈស៊ីម៉ា នៃប្រទេសថៃ ដោយក្រុមមកពីកម្ពុជា (Downtown Sport) បានស្ថិតនៅក្នុងពូល B ជាមួយនឹងម៉ាឡេស៊ី (Melaka) និងមីយ៉ាន់ម៉ា (Imperial University) ខណៈដែលពូល A ក៏មានក្រុមចំនួន3 ដែរគឺ ថៃ វៀតណាម និងឥណ្ឌូនេស៊ី៕

June 19, 2019

វិធីថែរក្សាបបូរមាត់ ដើម្បីទទួលបានបបូរមាត់ទន់ និងពណ៌ផ្កាឈូក

បបូរមាត់ពណ៌ផ្កាឈូក ប្រកបដោយសុខភាពល្អគឺជាក្តីសុបិនរបស់ស្ត្រីគ្រប់រូប។ ពណ៌នៃបបូរមាត់អាចបញ្ជាក់ឱ្យដឹងពីសុខភាព និងបែបបទនៃការរស់នៅរបស់អ្នក។ សម្រាប់អ្នកដែលមានទម្លាប់ជក់បារី ទទួលទានជាតិអាល់កុល និងការសាកល្បងប្រើប្រាស់គ្រឿងសម្អាងស្ទើរគ្រប់ប្រភេទនោះ នៅលើបបូរមាត់របស់អ្នកអាចធ្វើឱ្យវាមើលទៅខ្មៅ និងមិនមានផាសុកភាព។ ខណៈពេលដែលផ្ទៃមុខរបស់អ្នកកំពុងតែមានភាពស្អាតផូរផង់ហើយនោះ ហេតុអីអ្នកត្រូវទ្រាំនឹងការដែលបបូរមាត់ខ្មៅទៅវិញ? អ្នកពិតជាអាចទៅដល់គោលដៅនៃបបូរមាត់ទន់ និងមានពណ៌ផ្កាឈូកបាន ដោយគ្រាន់តែចំណាយពេលបន្តិច ដើម្បីមើលថែបបូរមាត់តាមវិធីដូចខាងក្រោម៖

* លាបទឹកឃ្មុំលើបបូរមាត់ មុនពេលចូលគេង ហើយម៉ាស្សាលើបបូរមាត់ រួចយកច្រាស់ទន់ៗ មកដុសទឹកឃ្មុំនោះចេញនាពេលព្រឹក។ ការធ្វើបែបនេះគឺដើម្បីសម្អាតស្រទាប់ស្បែកដែលស្ងួត និងចាស់ៗចោល។
* យកស្រទាប់ផ្កាកុលាបមួយទូកដៃ បន្ថែមជាមួយនឹងក្រែមបន្តិច រួចកិន ឬបុកវាចូលគ្នា រួចយកមកលាបលើបបូរមាត់ នោះអ្នកនឹងឃើញថា បបូរមាត់របស់អ្នកនឹងមានភាពទន់ ហើយពណ៌ក៏មើលទៅស្អាតជាងមុនជាមិនខាន។
* ប្រេងអូលីវកន្លះស្លាបព្រា លាយជាមួយនឹងស្ករស និងទឹកឃ្មុំបន្តិច ទុកសម្រាប់លាបលើបបូរមាត់ ប្រសិនបើអ្នកប្រាថ្នាចង់បានបបូរមាត់ដែលមានសភាពទន់ និងមានពណ៌ផ្កាឈូក ដែលជាសម្រស់តាមបែបធម្មជាតិពិតៗ។
* ទឹកដោះគោយកទៅរម្ងាស់ឱ្យក្លាយជាគ្រីមរួចយកគ្រីមនោះទៅលាបលើបបូរមាត់ ដើម្បីជាការផ្តល់សំណើម និងធ្វើឱ្យបបូរមាត់ទន់ល្អ។
* ការលាបជែល Vaseline ឬ Petroleum ជាប្រចាំ នឹងជួយរក្សាភាពស្រស់ស្អាត ទន់ដល់បបូរមាត់គ្រប់ពេល។
* Glycerin និងទឹកក្រូចឆ្មារ អាចជួយកម្ចាត់សភាពខ្មៅស្រគាំចេញពីបបូរមាត់បាន។សូមសាកល្បងតាមវិធីសាស្ត្រខាងលើ ប្រសិនបើអ្នកគិតថា បបូរមាត់របស់អ្នកនៅមិនទាន់មានភាពទន់ និងមានពណ៌ស្រស់ស្អាតសមតាមបំណងរបស់អ្នក ដើម្បីឱ្យបបូរមាត់របស់អ្នកមានភាពស្រស់ស្អាតគួរជាទីពេញចិត្ត និងទាក់ទាញតាមបែបធម្មជាតិ៕

June 19, 2019

ម៉ូដសម្លៀកបំពាក់នារីម៉ាក LOOKSWOMEN លេខ 133

June 19, 2019

នេះគឺតម្លៃ និងថ្ងៃខែដែល Samsung នឹងប្រកាសចេញ Galaxy Note 10

នៅបាំងតែ 1ខែទៀតប៉ុណ្ណោះ ស្មាតហ្វូនជំនាន់ថ្មីរបស់ក្រុមហ៊ុន Samsung នឹងបង្ហាញខ្លួនហើយ ដែលវានឹងធ្វើឱ្យអ្នកតាមដានព័ត៌មានបច្ចេកវិទ្យា និងអ្នកជំនាញ review ទូរស័ព្ទទន្ទឹងរង់ចាំ។

យោងតាមប្រភពពីគេហទំព័របច្ចេកវិទ្យានានា បាននាំគ្នាវិភាគពីថ្ងៃប្រកាស ថ្ងៃចេញលក់ និងជម្រើសតម្លៃដូចខាងក្រោមនេះ៖

ចំពោះថ្ងៃខែប្រកាសចេញស៊េរី Note ជារៀងរាល់ឆ្នាំ ក្រុមហ៊ុន Samsung តែងធ្វើនៅក្នុងអំឡុងខែកក្កដា តាំងពីជំនាន់ Note 8 មកម្ល៉េះ។
-Note 8 ប្រកាសចេញថ្ងៃ23 ខែកក្កដា ឯថ្ងៃចេញលក់ផ្លូវការ គឺ15 សីហា។
-Note 9 ប្រកាសចេញថ្ងៃ9 ខែកក្កដា ឯថ្ងៃចេញលក់ផ្លូវការគឺ 24 កក្កដា។
-ដូចនេះ Note 10 អាចនឹងប្រកាសថ្ងៃ8 ខែកក្កដា ឯថ្ងៃចេញលក់ផ្លូវការវិញ ប្រហែលជាថ្ងៃ23 ខែកក្កដា។

ចំពោះតម្លៃនៅថ្ងៃចេញលក់ដំបូងវិញ ស៊េរី Note ជារៀងរាល់ឆ្នាំតាំងពីជំនាន់ Note 8 មក មានដូចជា៖
-Note 8 ចេញលក់ដំបូង ជម្រើសមេម៉ូរី 64GB តម្លៃ 929ដុល្លារ(មានតែមួយជម្រើស)
-Note 9 ចេញលក់ដំបូង ជម្រើសមេម៉ូរី 128GB តម្លៃ 999ដុល្លារ - មេម៉ូរី 512GB តម្លៃ 1,249ដុល្លារ។
-ដូចនេះ Note 10 អាចនឹងចេញលក់ដំបូង ជាមួយជម្រើសមេម៉ូរី 128GB តម្លៃ 1,099 ដុល្លារ - មេម៉ូរី 512GB តម្លៃ 1,349ដុល្លារ - មេម៉ូរី 1TGB តម្លៃ 1,699ដុល្លារ។ ឯជម្រើសពណ៌វិញ លើ Note 10 អាចនឹងមាន 6ពណ៌ឯណោះ រួមទាំងសមត្ថភាពកាមេរ៉ា ក៏ខ្លាំងរៀងគ្នាផងដែរ៕

June 19, 2019

Facebook ប្រកាសចេញរូបិយប័ណ្ណឌីជីថលផ្លូវការ ប្រជែងនឹង BitCoin

Facebook បានប្រកាសចេញរូបិយប័ណ្ណឌីជីថលថ្មីជាផ្លូវការកាលពីថ្ងៃអង្គារ ខែមិថុនានេះ ដោយឱ្យឈ្មោះថា Libra។ នេះបើតាមការចុះផ្សាយរបស់ The Verge។

បន្ថែមពីនេះបុគ្គលិក Facebook ដែលសិក្សាលើគម្រោងការណ៍នេះ អាចមានជម្រើសយកប្រាក់ចំណូលជារូបិយប័ណ្ណឌីជីថលនេះ ជំនួសឱ្យសាច់ប្រាក់សុទ្ធដែលស្រដៀងនឹង BitCoin ដែរ។ របាយការណ៍កន្លងទៅបានឱ្យដឹងថា ការដាក់ឱ្យប្រើប្រាស់រូបិយប័ណ្ណនេះលើសកលលោក នឹងចាប់ផ្ដើមនៅឆ្នាំ2020 ខាងមុខ។ រូបិយប័ណ្ណឌីជីថលនេះនឹងត្រូវប្រើប្រាស់នៅលើផលិតផល Facebook ដូចជា WhatsApp, Messenger និងផ្សេងៗទៀត។

ជាងនេះទៅទៀត បណ្ដាហាងដែលទទួលយករូបិយប័ណ្ណឌីជីថលរបស់ Facebook សម្រាប់ការទូទាត់ នឹងអាចទទួលបានប្រាក់រង្វាន់លើកទឹកចិត្តទៀតផង។ សកម្មភាពនេះ គឺស៊ីគ្នានឹងការសម្រុកទៅកាន់ផ្នែកលក់ទំនិញអនឡាញរបស់ Facebook។

នៅក្នុងកម្មវិធី F8 ក្រុមហ៊ុន Facebook បានប្រកាសពីមុខងារទិញទំនិញថ្មីៗដែលនឹងមកដល់ឆាប់ៗ ដូចជា អនុញ្ញាតឱ្យអ្នកប្រើ Instagram ទិញទំនិញពីគណនីលក់ទំនិញណាមួយក៏បាន។ ឱ្យហាងដាក់បង្ហាញផលិតផលរបស់ខ្លួនលក់លើ WhatsApp និងអនុញ្ញាតឱ្យអ្នកលក់លើ Facebook Marketplace ដឹកទំនិញតាមរយៈកម្មវិធី Facebook នៅក្នុងមួយទ្វីបអាមេរិក ដើម្បីឱ្យការទិញលក់កាន់តែងាយស្រួលឡើង។

ដើម្បីសាងទំនុកចិត្តពីអ្នកប្រើប្រាស់ Facebook បានស្វែងរកដៃគូបង្កើតនូវក្រុមមួយដើម្បីគ្រប់គ្រងរូបិយប័ណ្ណថ្មីនេះ។ The Information បានសរសេរថា Facebook បានល្បួងស្ថាប័នហិរញ្ញវត្ថុ និងក្រុមហ៊ុនបច្ចេកវិទ្យាផ្សេងទៀត ដើម្បីចូលរួមលើក្រុមឯករាជ្យមួយ ដែលនឹងជួយបណ្ដាក់ទុន និងជួយគ្រប់គ្រងរូបិយប័ណ្ណឌីជីថលនេះ។

វានឹងមានអ្នកប្រើប្រាស់ធំជាងរូបិយប័ណ្ណឌីជីថលមុនៗទៀត ដោយមានមនុស្ស 2.3 ពាន់លាននាក់ប្រើប្រាស់ Facebook ជុំវិញពិភពលោកនៅត្រីមាសទី1 ឆ្នាំ2019 ។ នេះមិនទាន់គិតបញ្ចូលទាំង WhatsApp និង Instagram ផង ខណៈដែល Facebook ពិតជាសម្រេចជោគជ័យលើរូបិយប័ណ្ណឌីជីថលនេះមិនខាន៕

June 19, 2019

Category: សង្គម និងសេដ្ឋកិច្ច