ក្រសួងការបរទេសនៃប្រទេសក្នុងតំបន់អាស៊ានទាំងមូលដែលរួមមានទាំងកម្ពុជាផងដែរនោះ បានសហការគ្នាយល់ព្រម ដាក់សំណើទៅកាន់ស្ថាប័ន FIFA ដើម្បីឈរឈ្មោះធ្វើជាម្ចាស់ផ្ទះ FIFA WORLD CUP 2034។
ការដាក់សំណើនេះមានន័យថា តំបន់អាស៊ានទាំងមូលមានបំណងធ្វើជាម្ចាស់ផ្ទះព្រឹត្តិការណ៍ World Cup 2034 រួមគ្នា ដែលមានប្រទេសចូលរួមចំនួន48 ចែកចេញជា 16ពូល ដូច្នេះមានន័យថា បើសិនជាសំណើនេះឈ្នះក្នុងការបោះឆ្នោតជ្រើសរើសប្រទេសម្ចាស់ផ្ទះរៀបចំព្រឹត្តិការណ៍ FIFA WORLD CUP 2034មែននោះ ប្រទេសទាំង11 នៃតំបន់អាស៊ាន យ៉ាងហោចណាស់ក៏អាចធ្វើជាម្ចាស់ផ្ទះក្នុងការប្រកួតយ៉ាងហោចណាស់ក៏ 1ពូលដែរ។
គួរបញ្ជាក់ផងដែរថា ដោយសារតែប្រទេសកាតាធ្វើជាម្ចាស់ផ្ទះ FIFA WORLD CUP 2022 ហើយ ដូច្នេះប្រទេសក្នុងទ្វីបអាស៊ីដទៃទៀតមិនអាចឈរឈ្មោះជាម្ចាស់ផ្ទះក្នុងអំឡុងឆ្នាំ2020 បានឡើយ ដោយសារច្បាប់ឈរឈ្មោះរបស់ FIFA គឺទ្វីបមួយអាចធ្វើជាម្ចាស់ផ្ទះ World Cup យ៉ាងឆាប់បំផុតគឺ 10ឆ្នាំម្តង៕
Category: សង្គម និងសេដ្ឋកិច្ច
តំបន់អាស៊ាន រួមទាំងកម្ពុជាផង ត្រៀមធ្វើម្ចាស់ផ្ទះ WORLD CUP 2034
ក្មួយស្រី កែវ រំចង់ ជាម្ចាស់ខ្សែក្រវាត់ប្រដាល់ 3គ្រឿង មានវ័យត្រឹមតែ 16ឆ្នាំ
កីឡាការិនីកូនខ្មែរ អាមេរិក Samontha ដែលត្រូវបានគេស្គាល់ថា ជាក្មួយស្រីរបស់កីឡាករប្រដាល់ចិត្តខ្លាំងកម្ពុជា កែវ រំចង់។
ដោយសារតែមានឈាមជ័រជាអ្នកប្រដាល់ បូករួមជាមួយនឹងចំណង់ចំណូលចិត្តផ្ទាល់ខ្លួនរបស់នាងផងនោះ ធ្វើឱ្យនាងបានខិតខំហ្វឹកហាត់ប្រដាល់ជារៀងរាល់ថ្ងៃ ខណៈដែលបច្ចុប្បន្ន Samontha គឺជាកីឡាការិនីប្រដាល់ដែលមានវ័យត្រឹមតែ 16ឆ្នាំប៉ុណ្ណោះ តែជាម្ចាស់ខ្សែក្រវាត់ជើងឯកប្រដាល់ដល់ទៅ 3គ្រឿងឯណោះ។
គួរបញ្ជាក់ផងដែរថា កាលពីខែតុលា ឆ្នាំ2018 កន្លងទៅ នៅសហរដ្ឋអាមេរិក នាងបានចូលរួមប្រកួតក្នុងកម្មវិធី TBA Tournament Rev Gear Tournament of Champions ដើម្បីដណ្ដើមខ្សែក្រវាត់ទម្ងន់ 48គីឡូក្រាម តែទទួលបានលទ្ធផលមិនសមប្រកបឡើយ៕
ឈិន ឈឿន ធ្វើម៉ូដសក់នេះ ស្រដៀង Zlatan Ibrahimovic មែនទែន
កីឡាករល្បឿនលឿនជម្រើសជាតិកម្ពុជា ឈិន ឈឿន ដែលពាក់អាវលេខ17 ក្នុងក្រុមជម្រើសជាតិកម្ពុជា ពិតជាមានសភាពដូចគ្នាទៅនឹងកីឡាករ ស៊ុយអែត Zlatan Ibrahimovic នៅពេលដែលពួកគេទាំង2 ធ្វើម៉ូដសក់បែបចងលើកទៅខាងក្រោយបែបនេះ។
ក្នុងឆ្នាំ2019 នេះ ឈិន ឈឿន នៅតែរក្សាទម្រង់លេងល្អខ្លាំងដដែល តែមិនត្រូវបានគ្រូបង្វឹកជម្រើសជាតិកោះហៅចូលក្រុមជម្រើសជាតិសម្រាប់វគ្គជម្រុះពានរង្វាន់ (FIFA WORLD CUP 2022)ទេ។ ហើយក្នុងឆ្នាំ2019 នេះផងដែរ កីឡាកររូបនេះបានប្តូរម៉ូដសក់ថ្មី ធ្វើឱ្យអ្នកតាមដានទាំងឡាយសង្កេតឃើញថា ពួកគេទាំង2 (ឈិន ឈឿន និង Zlatan Ibrahimovic) ហាក់ដូចជាមានពុម្ពមុខតែមួយ ព្រោះមានទម្រង់មុខស្ទើរតែដូចគ្នាបេះដាក់ ដូចបងប្អូនបង្កើតនឹងគ្នាមែនទែន។
គួរបញ្ជាក់ផងដែរថា កីឡាករ ឈិន ឈឿន ជាកីឡាករខ្សែបម្រើរបស់ក្លិបក្រសួងការពារជាតិ និងក្រុមជម្រើសជាតិកម្ពុជា ខណៈដែលកីឡាករ Zlatan Ibrahimovic គឺជាកីឡាករល្បីឈ្មោះរបស់ក្រុមជម្រើសជាតិស៊ុយអែត ដែលបច្ចុប្បន្នកំពុងតែប្រកបអាជីពនៅក្លិបលីកកំពូលរបស់អាមេរិក៕
មូលហេតុដែលធ្វើឱ្យអ្នកក្លាយជាអ្នកជំងឺមហារីកស្បូន
ស្បូនជាផ្នែកមួយដ៏សំខាន់បំផុតសម្រាប់មនុស្សស្រីយើង វាជាទីតាំងបង្កកំណើតដែលអាចឱ្យស្ត្រីយើងរក្សាទារកក្នុងផ្ទៃឱ្យលូតលាស់ធំធាត់ពីមួយថ្ងៃទៅមួយថ្ងៃ ប៉ុន្តែប្រសិនបើស្បូនមានបញ្ហានោះ ឱកាសនៃការធ្វើជាអ្នកម្តាយ ដែលស្ត្រីភាគច្រើនតែងប្រាថ្នាចង់បាននោះ ក៏នឹងត្រូវរលាយបាត់ទៅវិញដែរ។ ហេតុដូច្នេះហើយទើបការមើលថែទាំស្បូនឱ្យគេចផុតពីជំងឺមហារីកគឺជារឿងចាំបាច់បំផុតដែលស្ត្រីគ្រប់រូបមិនគួរមើលរំលង។ ជំងឺមហារីកស្បូនមានច្រើនប្រភេទច្រើនយ៉ាង ហើយអ្នកក៏មិនអាចដឹងដោយខ្លួនឯងបានដែរថា តើអ្នកកំពុងប្រឈមនឹងជំងឺប្រភេទនេះដែរ ឬអត់។ មហារីកស្បូនមិនមែនចេះតែកើតមានចំពោះស្ត្រីគ្រប់គ្នានោះទេ គឺវាអាចកើតឡើងតាមរយៈលក្ខខណ្ឌផ្សេងៗគ្នា ហើយខាងក្រោមនេះគឺជាមូលហេតុតូចៗដែលអាចរួមផ្សំចូលគ្នា ហើយបង្កឱ្យក្លាយជាជំងឺមហារីកដែលស្ត្រីគ្រប់រូបគួរប្រុងប្រយ័ត្ន ៖
1. ធាត់ខ្លាំង មានជាតិខ្លាញ់លើសកំណត់
2. ជំងឺទឹកនោមផ្អែម
3. លើសឈាម
4. ស្ត្រីដែលមានរដូវមិនទៀងទាត់(ម្តងមានម្តងរាំង)
5. ឆាប់មានរដូវពេក ហើយក៏ឆាប់បាត់រដូវពេក
6. ស្ត្រីអារ(ស្ត្រីដែលមិនអាចមានកូន)
7. ស្ថានភាពអូវ៉ែអ្នកជំងឺមានពកច្រើន
8. អ្នកមានជំងឺមហារីកអូវ៉ែ
9. ស្ត្រីដែលប្រើប្រាស់ Estrogen
អ្នកជំនាញតែងណែនាំឱ្យអ្នកទៅពិនិត្យតាមដានរកជំងឺនេះរាល់12ខែម្តង។ ដូច្នេះបើទោះជាអ្នកធ្លាប់បានពិនិត្យម្តង ឬពីរដងរួចទៅហើយក្តីនិងទទួលបាននូវលទ្ធផលល្អជាធម្មតាក៏មិនមែនមានន័យថា អ្នកអាចគេចផុតពីជំងឺនេះមួយជីវិតដែរ។ ដូច្នេះការទៅជួបគ្រូពេទ្យ ដើម្បីពិនិត្យរកមើលជំងឺមហារីកស្បូនរៀងរាល់12ខែម្តង គឺគួរតែអនុវត្តឱ្យបានទៀងទាត់ ហើយបើអ្នកក៏ជាមនុស្សម្នាក់ដែលមានផ្ទុកនូវចំណុចមួយចំនួនដូចរៀបរាប់ខាងលើទៀតនោះគឺរឹតតែត្រូវប្រុងប្រយ័ត្នទៅទៀត៕
ខ្ជះខ្ជាយពេលវេលា គឺបណ្តោយឱ្យជីវិតខិតទៅជិតទីបញ្ចប់ដោយគ្មានន័យ…
មនុស្សគ្រប់គ្នាសុទ្ធតែត្រូវឆ្លងកាត់ដំណើរជីវិតក្នុងពេលវេលាដែលចេះតែរំកិលទៅមុខឥតឈប់ឈរ ហេតុនេះពី 1ថ្ងៃទៅ 1ថ្ងៃប្រសិនបើយើងមិនអាចគ្រប់គ្រងខ្លួនឯងបានល្អទេនោះ យើងនឹងធ្វើឱ្យពេលវេលាក្នុងដំណើរជីវិតរបស់យើងខ្ជះខ្ជាយដែលកត្តាទាំងអស់នេះក៏អាចកំណត់បានពីវាសនាល្អ ឬអាក្រក់របស់យើងសម្រាប់ថ្ងៃអនាគតផងដែរ។
លោក នឹម ឈុន្នី សហស្ថាបនិក ក្រុមហ៊ុនអនាគតអាស៊ី បានលើកឡើងថា ការគ្រប់គ្រងពេលវេលាមានសារៈសំខាន់ខ្លាំងណាស់សម្រាប់មនុស្សម្នាក់ៗ ព្រោះពេលវេលាមិនអាចត្រឡប់ថយក្រោយបាននោះទេ ហេតុនេះប្រសិនបើយើងមិនអាចគ្រប់គ្រងពេលវេលាបាន យើងនឹងខ្ជះខ្ជាយពេលវេលា ហើយធ្វើឱ្យជីវិតរបស់យើងជួបការលំបាក។ មនុស្សម្នាក់ៗត្រូវតែគ្រប់គ្រងពេលវេលាឱ្យបានល្អ ព្រោះភាពជាមនុស្សគឺអាចធ្វើរឿងរ៉ាវដ៏អស្ចារ្យជាច្រើន តែកន្លងមកមនុស្សខ្លះចេះតែបណ្តែតបណ្តោយឱ្យពេលវេលាខាតបង់ទៅដោយមិនបានបង្កើតស្នាដៃ ឬធ្វើការងារឱ្យមានប្រសិទ្ធភាព។
លោក នឹម ឈុន្នី បាននិយាយថា៖ “បើមិនចង់ឱ្យយើងខាតបង់ពេលវេលាច្រើន មនុស្សម្នាក់ៗគួរឧស្សាហ៍រំឭកខ្លួនឯង ដោយតាមដានឱ្យដឹងពីអ្វីដែលត្រូវធ្វើ និងមិនទាន់ធ្វើក្នុងថ្ងៃនីមួយ។ យើងគួរចំណាយពេលធ្វើសមាធិនៅមុនពេលគេង ហើយគិតពិចារណាពីការងារដែលយើងបានធ្វើនៅក្នុងថ្ងៃនេះ ដើម្បីឱ្យដឹងថា តើយើងបានធ្វើអ្វីខ្លះ? និងមិនទាន់បានធ្វើអ្វីខ្លះ?”។
អ្នកជំនាញផ្នែកអភិវឌ្ឍន៍សមត្ថភាពផ្លូវចិត្តខាងលើកឡើងផងដែរថា ក្រៅពីការតាមដានស្មារតី និងសកម្មភាពការងារមុនពេលគេងហើយ យើងក៏គួរតែចេះគ្រប់គ្រងខ្លួនឯងពេលភ្ជាក់ពីគេងផងដែរ ដើម្បីឱ្យយើងមានស្មារតីល្អដើម្បីបំពេញការងារដែលមានន័យសម្រាប់ជីវិតរបស់យើងពេញ 1ថ្ងៃ។ ការងារដែលយើងត្រូវធ្វើដំបូងមុនពេលគេង គឺស្ទាបខ្លួនឯង ហើយអរគុណសម្រាប់ខ្លួនឯងដែលនៅមានជីវិត មានស្មារតី មានសុខភាពល្អ និងបានធ្វើការងារដ៏មានន័យជាច្រើនសម្រាប់ខ្លួនឯង បន្ទាប់មកយើងគួរពិចារណាពីការងារដែលយើងកំណត់អាទិភាពសម្រាប់ធ្វើនៅក្នុងថ្ងៃនេះ ដើម្បីធានាថាយើងអាចធ្វើការងារដោយតុល្យភាព មិនលោភហួសមាឌពេក និងមិនខ្ជះខ្ជាយពេលវេលាច្រើនពេក។ ប្រសិនបើយើងអាចរៀបចំបែបនេះបានហើយ យើងនឹងមើលឃើញថា តាមពិតទៅ យើងអាចធ្វើរឿងជាច្រើនបានដោយល្អ ដោយរីករាយ និងមិនស្មុគស្មាញនោះទេ។
ព្រះតេជគុណ គូ សុភាព សាស្ត្រាចារ្យនៃសាកលវិទ្យាល័យបញ្ញាសាស្ត្រកម្ពុជា បានលើកឡើងថា ពេលវេលាទំពាស៊ីជីវិតមនុស្សរាល់ថ្ងៃ ហើយគ្មានអ្នកណាម្នាក់អាចឃាត់ឃាំងពេលវេលាមិនឱ្យទៅមុខបានទេ។ ចំណុចនេះមានន័យថា មនុស្សត្រូវចាស់ឡើងៗរាល់ថ្ងៃ ទោះយើងធ្វើការងារ ឬរស់នៅបានល្អ ឬមិនល្អ ក៏ពេលវេលាវាចេះតែដើរទៅមុខទៅជារៀងរហូត។ហេតុនេះប្រសិនបើយើងមិនចង់ឱ្យជីវិតយើងរស់នៅនិងចាស់ទៅដោយឥតន័យ យើងគួរចេះធ្វើល្អឱ្យច្រើននិងគ្រប់គ្រងពេលវេលាឱ្យបានល្អ។ មនុស្សដែលខ្ជះខ្ជាយពេលវេលាច្រើនដោយឥតន័យ ភាគច្រើនជាមនុស្សឡេះឡោះ គិតនេះគិតនោះមិនច្បាស់លាស់។ការគិតបែបនេះនឹងធ្វើឱ្យមនុស្សបាត់បង់ថាមពលនៃការផ្តោត ហើយធ្វើឱ្យយើងបានត្រឹមតែគិតយ៉ាងគ្មានសណ្តាប់ធ្នាប់ បន្ទាប់មកមិនដឹងចាប់ចំណុចមួយណាធ្វើមុន ក៏បណ្តោយឱ្យវាកន្លងផុតទៅទាំងអស់ដោយមិនបានធ្វើ។ បួនដប់ឆ្នាំក្រោយមក យើងនឹងមើលឃើញថា គំនិតដែលយើងគិតទាំងអស់នោះក៏រលាយទៅតាមពេលវេលាដែលយើងគ្មានភាពច្បាស់លាស់នោះដែរ។
ព្រះតេជគុណ គូ សុភាព បានមានសង្ឃដីកាថា៖“មនុស្សយើងម្នាក់ៗត្រូវដឹងខ្លួនឱ្យច្បាស់ថា យើងកំពុងធ្វើអ្វី ហើយត្រូវរៀបចំទាំងគំនិត និងសកម្មភាពឱ្យមានរបៀបរៀបរយ ឱ្យមានសមាធិ ដើម្បីផ្តោតលើការងារមួយឱ្យបានល្អ”។
ព្រះតេជគុណបានបន្ថែមទៀតថា មនុស្សពូកែ តែប្រសិនបើឡេះឡោះ មិនព្រមធ្វើសកម្មភាព ពេលខ្លះមិនអាចសម្រេចកិច្ចការងារបានច្រើន និងល្អបានទេ តែពេលខ្លះមនុស្សធម្មតាម្នាក់ ធ្វើម្តងបានបន្តិចៗ តែរក្សាសកម្មភាពជាប់ជាប្រចាំដោយការព្យាយាម យូរទៅក៏អាចបង្កើតបានស្នាដៃជាច្រើន។ ហេតុនេះការគ្រប់គ្រងខ្លួនឯងមានសារៈសំខាន់ខ្លាំងណាស់ទាំងការរស់នៅ ការរកស៊ី ឬការធ្វើការងារជាដើម។ ប្រសិនបើយើងមានរបៀប ការងារទាំងអស់ដែលធ្លាប់គិតថាលំបាកវានឹងទៅជាការងារងាយស្រួល ព្រោះយើងបានតាមដានដឹងពីចំណុចល្អិតៗនៃការងារនោះ បន្ទាប់មកក៏ចាប់ផ្តើមធ្វើវាតាមលំដាប់លំដោយ៕
វិស័យឧស្សាហកម្មកាត់ដេរ និងវាយនភណ្ឌកំពុងត្រៀមខ្លួនសម្រាប់ឧស្សាហកម្ម 4.0
អ្នកជំនាញក្នុងវិស័យឧស្សាហកម្មកាត់ដេរ បានពិភាក្សាអំពីតួនាទីនៃការធ្វើស្វ័យប្រវត្តិកម្មនៅក្នុងវិស័យកាត់ដេរ និងវាយនភណ្ឌ ដែលជាវិស័យមួយសម្រាប់ការផ្លាស់ប្តូរ ដែលនឹងកើតមានជាលទ្ធផលនៃបដិវត្តន៍ឧស្សាហកម្មទី4 ដែល“កិច្ចពិភាក្សាឌីជីថលអនាគត: ឧស្សាហកម្ម 4.0 Focus Garment”ជាព្រឹត្តិការណ៍ដែលរៀបចំឡើងសំដៅលើសហគ្រាស រោងចក្រត្រូវតែប្រកាន់យកនូវនិន្នាការបច្ចេកវិទ្យាថ្មីៗ និងទំនើបដើម្បីរក្សាការប្រកួតប្រជែង។
ការពិភាក្សាអំពីបដិវត្តន៍ឧស្សាហកម្មលើកទី4និងឥទ្ធិពលរបស់វាលើវិស័យផលិតកម្មរបស់ប្រទេស បានកើតឡើងនៅពេលដែលព្រះរាជាណាចក្រកម្ពុជាកំពុងប្រឈមនឹងលទ្ធភាពបាត់បង់ឋានៈចំពោះប្រព័ន្ធ “អ្វីគ្រប់យ៉ាង ដែលមិនមែនជាអាវុធ (EBA)” ពីសហភាពអឺរ៉ុបដែលជាអ្នកនាំចូលសម្លៀកបំពាក់កម្ពុជាដ៏ធំបំផុត។
ប៉ុន្តែ ពួកគេបានអះអាងថា រោងចក្រសហគ្រាសនៅកម្ពុជា ទោះបីជាប្រឈមនឹងបញ្ហាមួយចំនួនយ៉ាងណាក៏ដោយ ក៏ក្នុងការស្វែងរកទំនើបកម្ម រួមទាំងការផ្តល់នូវការបណ្តុះបណ្តាលដែលចាំបាច់ គឺជាកិច្ចការដ៏សំខាន់ចំពោះមុខដើម្បីបង្កើនកម្លាំងពលកម្មជំនាញរបស់ពួកគេ។
អ្នកជំនាញបានឯកភាពថា ឌីជីថល និងស្វ័យប្រវត្តិកម្មក្នុងវិស័យផលិតកម្ម នឹងធ្វើឱ្យផលិតផលកម្ពុជាកាន់តែមានភាពល្អប្រសើរក្នុងការនាំចេញទៅបរទេស ដែលរួមចំណែកដល់កំណើនសេដ្ឋកិច្ចរយៈពេលវែងរបស់ប្រទេស។ ទោះជាយ៉ាងណាក៏ដោយ ពួកគេបានសម្តែងនូវកង្វល់ថា រលកនៃស្វ័យប្រវត្តិកម្មនេះ អាចបណ្តាលឱ្យបាត់បង់ការងារពលកម្មសម្រាប់មនុស្សរាប់ពាន់នាក់ទៅឱ្យម៉ាស៊ីនគ្រឿងចក្រ។
លោក Jhon Cha សមាជិកនៃគណៈកម្មាធិការប្រតិបត្តិនៃសមាគមរោងចក្រកាត់ដេរនៅកម្ពុជា the Garment Manufacturers Association in Cambodia (GMAC) បានបញ្ជាក់ពីការព្រួយបារម្ភទាំងនេះ។ លោកមានប្រសាសន៍ថា “យើងមានការបញ្ជាទិញកាន់តែច្រើន យើងត្រូវការកម្មករបន្ថែមទៀត។ ហើយឥឡូវនេះយើង៖“មានស្វ័យប្រវត្តិកម្មច្រើនជាងនេះបើប្រៀបធៀបទៅនឹង 20ឆ្នាំមុនដែលអ្វីគ្រប់យ៉ាងត្រូវបានប្រើដោយដៃ”។
លោក Cha បានមានប្រសាសន៍ថា៖“ការធ្វើស្វ័យប្រវត្តិកម្ម មិនបានលុបចោលកម្មករទេ។
តែមានកម្រិតនៃការបន្សាំខ្លួនទៅក្នុងឧស្សាហកម្ម4.0 ដោយហេតុថា រោងចក្រមួយចំនួនកំពុងស្ថិតនៅដំណាក់កាលដំបូង តែរោងចក្រខ្លះមានកម្រិតខ្ពស់ហើយ”។
លោកបានថ្លែងថា កម្ពុជាកំពុងស្ថិតលើផ្លូវដែលអាចសម្របខ្លួនបានដោយជោគជ័យទៅនឹង ឧស្សាហកម្ម4.0 ហើយ GMAC មានយុទ្ធសាស្ត្រផ្ទាល់ខ្លួនដើម្បីជួយដល់កម្មករក្នុងការផ្លាស់ប្តូរទៅរកកន្លែងធ្វើការដោយស្វ័យប្រវត្តិ។
លោក Cha បានបន្ថែមថា៖“យើងនឹងព្យាយាមឱ្យអស់ពីសមត្ថភាពរបស់យើង ហើយយើងនឹងបន្តរស់រានមានជីវិត”។ បុគ្គលិក កម្មករ និយោជិតណាម្នាក់មកពីរោងចក្រដែលជាសមាជិក GMAC នឹងអាចទទួលបានការបណ្តុះបណ្តាលពីវិទ្យាស្ថានបណ្ដុះបណ្ដាលវិជ្ជាជីវៈកាត់ដេរកម្ពុជា ហើយនេះគឺជាអ្វីដែលយើងកំពុងធ្វើការដើម្បីបង្កើនការប្រកួតប្រជែងរបស់យើង។ យើងកំពុងធ្វើការ ដើម្បីកែលម្អនៅក្នុងលក្ខខណ្ឌនៃការចំណាយ ការដឹកជញ្ជូន និងបញ្ហាប្រឈមផ្សេងទៀតនៅក្នុងឧស្សាហកម្មរបស់យើង។ថ្លែងនៅក្នុងសិក្ខាសាលាកម្រិតខ្ពស់មួយ ស្តីពីបដិវត្តន៍ឧស្សាហកម្មទី4 នេះដែរ លោកផាន់ ផល្លា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា អ្នកបង្កើតគោលនយោបាយកម្ពុជាកំពុងផ្តោតលើការធានាឱ្យប្រទេសជាតិមានឱកាសល្អក្នុងការទទួលបានផលប្រយោជន៍ថ្មីៗ បច្ចេកវិទ្យាជឿនលឿន។
លោកបានមានប្រសាសន៍ថា រដ្ឋាភិបាលមានបំណងធានាថា ប្រទេសនេះអាចសម្របខ្លួន និងផ្លាស់ប្តូរស្របតាមការប្រែប្រួលនៃនិន្នាការបច្ចេកវិទ្យា ទន្ទឹមនឹងការកាត់បន្ថយចំណាយសង្គម និងសេដ្ឋកិច្ចនៃការផ្លាស់ប្តូរទៅជាសេដ្ឋកិច្ចជឿនលឿនខាងបច្ចេកវិទ្យា។
លោកបានបញ្ជាក់ថា៖“បច្ចេកវិទ្យាថ្មីៗ ជាពិសេសបញ្ញាសិប្បនិម្មិត ចារកម្មការពិត និម្មិតបច្ចេកវិទ្យា blockchain និងការបោះពុម្ព 3D អាចផ្តល់ឱ្យប្រទេសដែលមានការអភិវឌ្ឍតិចជាងនូវឱកាសដើម្បីលោតពីសេដ្ឋកិច្ចដោយឆ្លងកាត់ដំណាក់កាលប្រពៃណីនៃការអភិវឌ្ឍ។ ដូច្នេះបដិវត្តន៍ឧស្សាហកម្មទី4 អាចនាំមកនូវឱកាសរួមគ្នា រួមទាំងការបង្កើនទ្រព្យសម្បត្តិផលិតភាព និងការដើរតួនាទីជាកម្លាំងដ៏ខ្លាំងក្លាសម្រាប់ការដាក់បញ្ចូលក្នុងសេដ្ឋកិច្ច”។
លោកបានបន្តទៀតថា “បច្ចេកវិទ្យាថ្មី បង្ហាញពីបញ្ហាប្រឈមដ៏ធ្ងន់ធ្ងរមួយចំនួន សម្រាប់ប្រទេសទាំងអស់ ដូចជាការបាត់បង់ការងារធ្វើ បង្កើនភាពអត់ការងារធ្វើក្នុងចំណោមកម្មករជំនាញទាប និងការវាយប្រហារតាមអុីនធើណិត ដែលអាចបង្ហាញថា ជាការបំផ្លិចបំផ្លាញ និងចំណាយខ្ពស់ ជាការវាយប្រហារធ្ងន់ធ្ងរទៅលើប្រទេស”។
លោកបានបន្ថែមថា៖“ការរៀបចំសម្រាប់សេដ្ឋកិច្ចឌីជីថល និងការឆ្លើយតបទៅនឹងបដិវត្តន៍ឧស្សាហកម្មទី4 គឺជាអាទិភាពមួយក្នុងចំណោមអាទិភាពចម្បងៗ របស់រាជរដ្ឋាភិបាលក្នុងអាណត្តិបន្ទាប់”៕
រ៉ូបូតកូនទា ចេះហែលទឹកជួយថែដំណាំស្រូវក្នុងស្រែនៅប្រទេសជប៉ុន(មានវីដេអូ)
រ៉ូបូតកូនទា(Duck robot) ជាផលិតផលរបស់ក្រុមវិស្វករជំនាញរបស់ក្រុមហ៊ុន Nissan បានបង្កើតឡើងក្នុងគោលបំណងដើម្បីតាមដាន និងចាប់សត្វល្អិតក្នុងវាលស្រែ(ដូចសត្វទាមែនទែន) ដែលបច្ចុប្បន្នវាស្ថិតនៅក្នុងតំបន់មួយនៅប្រទេសជប៉ុន ដែលកំពុងតេស្តនៅឡើយ និងមិនទាន់បានដាក់ប្រើប្រាស់លើទីផ្សារទេ។
រ៉ូបូតកូនទាដ៏ឆ្លាតវៃនេះ មានទម្ងន់សរុប 1.5គីឡូក្រាមប្រើប្រាស់ម៉ូទ័រនៅខាងក្រោមដើម្បីបង្វិលខ្លួនហែលទឹកបាន ព្រមទាំងមានសេនស័រ និងបង្កប់កាមេរ៉ានៅនឹងភ្នែកទាំងសងខាងរបស់វាទៀតផង។
ចង់ដឹងច្បាស់ សូមទស្សនាវីដេអូខាងក្រោម៖
រដ្ឋាភិបាលអាមេរិក អាចនឹងទាមទារឱ្យបង្កើតឧបករណ៍ប្រើជាមួយ 5G បាននៅក្នុងប្រទេសផ្សេង ក្រៅពីចិន
នៅពេលគិតដល់ចង្វាក់ផលិតកម្មដ៏ច្រើនសម្បើម និងសម្បូរបែប ក្រុមហ៊ុនធំៗតែងតែងាកទៅរកចិនមុនគេ ព្រោះតែតម្លៃពលកម្មធូរថ្លៃ និងមានមនុស្សច្រើនសម្រាប់បម្រើការក្នុងរោងចក្រនីមួយៗ រហូតដល់បានបណ្ដាក់ទុនរកស៊ីជាមួយចិនរាប់សិបកោដិលានដុល្លាររួចទៅហើយ។
យោងតាមប្រភពព័ត៌មានចេញផ្សាយដោយ The Wall Street Journal បានឱ្យដឹងថា ប្រការនេះហើយបានធ្វើឱ្យកាលពីពេលថ្មីៗកន្លងទៅនេះ រដ្ឋាភិបាលអាមេរិកអាចនឹងទាមទារ ឬបង្កើតច្បាប់ថ្មីទាក់ទងនឹងឧបករណ៍ណា (គាំទ្រ 5G) ប្រើជាមួយ5Gបាន ត្រូវតែផលិតនៅប្រទេសណាមួយផ្សេង ក្រៅពីចិន ដែលអាមេរិកធ្លាប់បានលើកឡើងថា ផលិតផលបច្ចេកវិទ្យា 5G របស់ចិនមិនមានសុវត្ថិភាព ឬជាស្ពានក្នុងការលួចព័ត៌មាននានាពីអ្នកប្រើប្រាស់ ឧទាហរណ៍ដូចការចោទប្រកាន់ទៅលើ 5G របស់ក្រុមហ៊ុន Huawei ជាដើម។
ក្រោយក្រុមហ៊ុនHuawei បានប្រកាសចេញបច្ចេកវិទ្យា 5G មុនសហរដ្ឋអាមេរិក ធ្វើឱ្យក្រុមហ៊ុនធំៗងាកទៅចិនយ៉ាងច្រើនសន្ធឹក (អាមេរិកទិញចូលច្រើន នាំចេញតិច) បណ្ដាលឱ្យកើតមានជម្លោះ ឬសង្គ្រាមពាណិជ្ជកម្មរវាងអាមេរិក និងចិន រហូតដល់ក្រុមហ៊ុន Google អាមេរិកសម្រេចចិត្តបិទផ្លូវ Huawei ដោយមិនឱ្យដំណើរការប្រព័ន្ធប្រតិបត្តិការ Android បានតទៅទៀត ខណៈដែលក្រុមហ៊ុនជាច្រើននៅអាមេរិកត្រូវសម្រេចចិត្តបិទផ្លូវរកស៊ីជាមួយចិនដែរ។
ដូចដែលយើងទាំងអស់គ្នាដឹងហើយថា ចិនជាប្រទេសមួយដែលមានកម្មករ ក៏ដូចជា មានធនធានច្រើនដើម្បីផលិតឧបករណ៍អេឡិចត្រូនិកនានា រួមទាំងឧបករណ៍ដែលអាចគាំទ្របច្ចេកវិទ្យា 5G បានផងដែរ។
ត្រឹមតែ 8ថ្ងៃ ឧបករណ៍មួយរបស់ Xiaomi លក់ដាច់បានជាង 1លានគ្រឿង
Xiaomi Mi Band 4 ដែលគេស្គាល់ថា ជាឧបករណ៍អេឡិចត្រូនិកសម្រាប់ពាក់លើដៃមានតួនាទីតាមដានចង្វាក់បេះដូង មានមុខងារជំនួយសំឡេងឆ្លាតវៃ(Voice Assistant) មុខងារបង់ប្រាក់អនឡាញ NFC ដែលទើបនឹងប្រកាសចេញលក់លើទីផ្សារកាលពីដើមខែមិថុនាកន្លងទៅ។
យោងតាមប្រភពព័ត៌មានបានឱ្យដឹងថា Mi Band 4 នេះលក់ដាច់ខ្លាំងណាស់នៅក្នុងប្រទេសចិន ត្រឹមតែ 8ថ្ងៃប៉ុណ្ណោះ ឧបករណ៍នេះត្រូវបានគេកុម្ម៉ង់ទិញតាមរយៈវេបសាយអនឡាយជាង 1លានគ្រឿងទៅហើយ។ ខណៈដែលទីផ្សារប្រទេសផ្សេងទៀតដូចជាទីផ្សារអឺរ៉ុបនឹងមានលក់នៅថ្ងៃទី 26 ខែមិថុនាខាងមុខនេះ។
ចំពោះតម្លៃដាក់លក់នៅចិន គឺប្រមាណជា 169 យន់ (23 ដុល្លារ) និងមួយបែបទៀតមានមុខងារ NFC លក់តម្លៃប្រមាណជា 229យន់ (34 ដុល្លារ)៕
Huawei nova 5 ចេញលក់នៅចិនភ្លាម តេស្តល្បឿនដំណើរការបានពិន្ទុខ្ពស់ខ្លាំងភ្លាមដែរ
ថ្មីៗនេះក្រុមហ៊ុនផលិតស្មាតហ្វូន Huawei បានបញ្ចេញផលិតផលថ្មីដែលគេដឹងថាជា Nova 5 បំពាក់ដោយបន្ទះឈីបរបស់ Huawei ផ្ទាល់តែម្ដង គឺ Kirin 810(Nova 5 ធម្មតា) និង Kirin 980(Nova 5i និង Nova 5Pro)។
មិនត្រឹមតែប៉ុណ្ណោះ ឈីបដែលដាក់លើ Nova 5 នោះធ្វើឱ្យអ្នកធ្វើតេស្តល្បឿនភ្ញាក់ផ្អើលមិនស្ទើរទេ ព្រោះតែល្បឿនដំណើការរបស់វារលូនសឹងតែគ្រប់កម្មវិធីទាំងអស់ ជាពិសេសលឿនជាងឈីប Snapdragon 730 របស់ក្រុមហ៊ុន Qualcomm ដល់ទៅ 13% ឯណោះ។
តារាងពិន្ទុពីកម្មវិធី Antutu ក្រោយពេលតេស្តបានរកឃើញថា Nova 5 បានពិន្ទុខ្ពស់ណាស់គឺ 237437។ ចំណែកលក្ខណសម្បត្តិផ្សេងទៀត មានដូចជា នៅប្រើប្រាស់ប្រព័ន្ធប្រតិបត្តិការ Android 9 នៅឡើយ។ បំពាក់ GPU Mali-G52 មានជម្រើសប្រភេទ RAM 8GB មេម៉ូរីម៉ាស៊ីន 256GB(អាចថែមមេម៉ូរីកាតក្រៅបានទៀតផង)។
Nova មាន 3ប្រភេទ គឺ Nova 5, Nova 5i និង Nova 5 Pro ចំពោះតម្លៃប្រកាសផ្លូវការ គឺ៖
Nova 5Pro ជម្រើស RAM 8GB មេម៉ូរីម៉ាស៊ីន 128GB តម្លៃ 435 ដុល្លារ Nova 5 និង 5i ជម្រើស RAM 6GM/128GB និងជម្រើស RAM 8GB/128 តម្លៃ 260 ដុល្លារ និង 320 ដុល្លារតាមលៀខរៀង។លើសពីនេះទៀត Huawei ក៏ដាក់ឱ្យមានឆ្នាំងសាកល្បឿនលឿនភ្ជាប់មកជាមួយ និងកម្លាំងបញ្ចូន 18W (វ៉ាត់) នៅក្នុងប្រអប់មកទៀតផង៕
