កីឡាកររបស់ក្លិប Juventus ដែលនៅលីគកំពូលអ៊ីតាលី Cristiano Ronaldo ត្រូវបានគេប្រទះឃើញកំពុងតែលំហែកាយនៅឆ្នេរសមុទ្រភាគខាងត្បូងប្រទេសបារាំង ជាមួយមិត្តស្រី រួមជាមួយនឹងកូនប្រុសច្បងរបស់ខ្លួន។
ក្នុងដំណើរកំសាន្តនេះផងដែរ គេឃើញកីឡាកររូបនេះបានផ្តល់លុយធីបក្នុងចំនួនដ៏ច្រើនគឺប្រហែលជា ២មឺនដុល្លា ដល់បុគ្គលិកដែលបម្រើលើកប៉ាល់ ដែលខ្លួនសម្រាកលំហែកាយ
គួរបញ្ជាក់ផងដែរថាកីឡាកររូបនេះបានចំណាយពេលលំហែរកាយ ក្រោយជួយក្រុមព័រទុយហ្គាល់ ក្នងពាន Nations League កាលពីដើមខែកន្លងទៅ៕
ពេលខ្លះអ្នកមានការធ្វេសប្រហែស ធ្វើឱ្យរលាកភ្លើង ឬវត្ថុក្ដៅ។ មានប្រិយមិត្តជាច្រើនបានជ្រាបអំពីវិធីងាយៗ ក្នុងការដោះស្រាយបញ្ហារលាកភ្លើង ឬទឹកក្តៅ គឺគ្រាន់តែយកផ្នែកពណ៌សនៃស៊ុតមាន់ ទៅលាបឱ្យសព្វលើបរិវេណដែលត្រូវទឹកក្តៅរលាក ទុកចោលមួយសន្ទុះ រហូតដល់ស្ងួត ទើបលាងជម្រះដោយទឹកឱ្យស្អាតជាការស្រេច។ វិធីនេះអាចបំបាត់ស្នាមដំបៅក្រហម ឬពងបែកនៅលើស្បែកបាន ប៉ុន្តែករណីដែលរលាកខ្លាំង ហើយធ្ងន់ធ្ងរនោះ វិធីងាយមួយនេះ ក៏មិនបានហុចផលឱ្យស្បែកជាសះស្បើយទាំងស្រុងនោះទេ។ នៅពេលអ្នកជួបប្រទះនូវបញ្ហារលាកភ្លើង ឬរលាកទឹកក្ដៅខ្លាំង សូមប្រតិបត្តិតាមវិធីសាស្ត្រសង្គ្រោះបឋមមួយចំនួនដូចខាងក្រោមនេះ៖
1- សង្គ្រោះរាងកាយ
ក្នុងករណីត្រូវទឹកក្ដៅរលាកទាំងសម្លៀកបំពាក់ ចូរប្រញាប់ឆក់ ឬដោះសម្លៀកបំពាក់ចេញពីរាងកាយឱ្យបានលឿនជាទីបំផុត ឬបើមិនអាចយកចេញបានទេ ចូរប្រញាប់យកទឹកត្រជាក់មកស្រោចពីលើរាងកាយភ្លាម។ ក្នុងករណីដែលអ្នកត្រូវភ្លើងរលាក បើសម្លៀកបំពាក់ឆេះភ្លើង ត្រូវប្រញាប់យកទឹកមកជះពន្លត់ភ្លាម។ បើមិនមានទឹកនៅក្បែរនោះទេ ចូរគេងទៅលើដី ហើយប្រមៀលចុះឡើង ដើម្បីពន្លត់ភ្លើងដែលឆេះខោអាវនោះជាមុនសិន។
2- បញ្ចុះកម្ដៅដល់ស្បែក
អ្នកត្រូវបញ្ចុះកម្ដៅស្បែកត្រង់បិវេណដែលរលាក ដោយទឹកត្រជាក់ ឬទឹកកក ព្រោះបើអ្នកមិនបញ្ចុះកម្ដៅភ្លាមៗទេ ស្បែកត្រង់បរិវេណនោះវានឹងរីកពងទឹក។ ការបញ្ចុះកម្ដៅស្បែកអាចធ្វើបានដោយការស្រោចទឹកត្រជាក់ដោយផ្ទាល់ ឬយកទឹកកកខ្ចប់ក្នុងក្រណាត់ស្អាតមកស្អំពីលើស្បែកក៏បាន។ តែហាមយកអ្វីដែលត្រជាក់ ហើយមិនស្អាតមកបិទជាដាច់ខាត ព្រោះវាអាចធ្វើឱ្យមុខរបួសរលាកភ្លើងឆ្លងមេរោគបាន។
3- សម្អាតស្បែកត្រង់បរិវេណ ដែលត្រូវភ្លើង ឬទឹកក្ដៅរលាក
លាងសម្អាតដោយសាប៊ូស្រាលៗ ជាមួយនឹងទឹកស្អាត។ ចូរចងចាំថា មិនត្រូវដុសស្បែកដែលរលាកពងនោះទេ ព្រោះអាចធ្វើឱ្យឆ្លងមេរោគ ហើយប្រែទៅជាដំបៅក្លាយខូចស្បែកកាន់តែធំ។
4- រុំមុខរបួសឱ្យជិតស្អាត
ក្រោយពេលសម្អាតស្បែកត្រង់កន្លែងដែលរលាកនោះរួចហើយ ចូរប្រើបង់រុំដំបៅ ឬសំឡីស្អាតដែលសម្លាប់មេរោគរួចមកជូតស្នាមរបួសឱ្យស្អាតថ្នមៗ។ បន្ទាប់មកសឹមបិទមុខរបួសដោយបង់ដែលមិនមានមេរោគ ដើម្បីការពារស្នាមរបួសឱ្យមានអនាម័យជានិច្ច។ ក្នុងករណីស្នាមរបួសតូចតាច អ្នកគ្រាន់តែលាបថ្នាំផ្សះសម្រាប់រលាកភ្លើង ឬរលាកទឹកក្ដៅ ឬក៏អាចប្រើសាច់ប្រទាលកន្ទុយក្រពើ ដែលចិតសម្រកខាងក្រៅចេញទុកតែសាច់ខាងក្នុងថ្លាៗដូចចាហួយ និងលាងសម្អាតជ័រហើយមកបិទពីលើស្នាមរលាកក៏បាន
5- ប្រញាប់បញ្ចូនអ្នករបួសទៅមន្ទីរពេទ្យ ក្នុងករណី៖
– កើតមានអាការស្លុត ឬឆក់ខ្សែភ្លើង
– មានអាការខ្វះជាតិទឹក ក្នុងករណីរលាកភ្លើងធ្ងន់ធ្ងរ វាអាចបណ្ដាលឱ្យរាងកាយអ្នកខ្វះជាតិទឹក។
– ស្នាមរលាកមានមុខធំ ឈឺចាប់ខ្លាំង រលាកហើមប៉ោង ឬពងទឹកខ្លាំង។
– ក្ដៅខ្លួនខ្លាំងលើស38អង្សាសេ។
– រលាកលើផ្នែកសំខាន់ៗ ដូចជា ក្បាល ក មុខនិងខ្នងជាដើម។
– អ្នករលាក គឺជាមនុស្សចាស់ ឬក្មេងអាយុតិចជាង5ឆ្នាំ។
– អ្នករលាក គឺជាអ្នកជំងឺទឹកនោមផ្អែម អ្នកជំងឺបេះដូង និងអ្នកជំងឺលើសឈាមជាដើម៕
ផ្អែកតាមហ្វេសប៊ុករបស់លោក ជុំ លីណូ បានបង្ហោះឱ្យដឹងថា ឳពុករបស់ខ្លួនស្ថិតក្នុងការសង្គ្រោះបន្ទាន់នៅក្នុងមន្ទីរពេទ្យកាល់ម៉ែត្របានប៉ុន្មានម៉ោងប៉ុណ្ណោះ ក៏មានដំណឹងថាឳពុករបស់តារាចម្រៀង ជុំ លីណូ ទទួលមរណភាពទៅហើយ កាលពីម៉ោងជិត7យប់ថ្ងៃទី26 មិថុនា ឆ្នាំ2019។ មរណភាពរបស់ឳពុកលោក ក៏ទើបកើតឡើង តែប៉ុន្មានម៉ោង ក្រោយពីបទ”ជីវិតកម្មករ” របស់លោក ជុំ លីណូ ដែលនិយាយពីសោកនាដ្យកម្មបាត់បង់ជីវិតក្នុងហេតុការណ៍រលំអគារនៅខេត្តព្រះសីហនុ ទើបតែដាក់បង្ហោះផងដែរ។
ថ្លែងបន្ទាប់ពីឳពុកស្លាប់ លោក ជុំ លីណូ និយាយថា ឳពុករបស់លោក មានជំងឺប្រមាណច្រើនឆ្នាំមកហើយ ដោយជំងឺចាប់ផ្ដើមធ្វើទុក្ខកាន់តែខ្លាំង លើផ្នែកលើសឈាម ខ្សោយក្រលាន និងទឹកនោមផ្អែម ។ លោកថា ឳពុករបស់លោកមានជំងឺរ៉ាំរ៉ៃច្រើនឆ្នាំមកហើយ ទើបធ្វើឱ្យលោកក៏អារម្មណ៍មិមនឹងន នៅក្នុងអាជីពសិល្បៈ។ យ៉ាងណាមិញ លោកក៏ប្រកាសមិនចោលនោះដែរ ទើបលោកនៅតែបន្តចេញបទចម្រៀង ដោយក្នុងពេលនេះបទ”ជីវិតកម្មករ”ទើបតែចេញបង្ហោះសោះ ក៍ផ្ទុះការគាំទ្រទៅហើយ។
សូមជម្រាបផងដែរ លោកឳពុករបស់លោក មានឈ្មោះថា មាស ម៉ៅ អាយុ៦៤ឆ្នាំ ដោយនេះក៍ជាដំណឹងដ៏ក្រៀមក្រំរបស់លោក សម្រាប់អ្នកសិល្បៈដែលស្រលាញ់រាប់អានលោកផងដែរ៕
បទចម្រៀងយ៉ាងក្ដុកក្ដួលរបស់តារាចម្រៀង លោក ជុំ លីណូ កំពុងត្រូវបានមហាជនចាប់អារម្មណ៍យ៉ាងខ្លាំង ខណៈបញ្ចេញបទ « ជីវិតកម្មករ» ដែលអត្ថន័យក្នុងបទចម្រៀងកំពុងដុតរោលអារម្មណ៍មហាជន នៅក្នុងហេតុការណ៍បាក់អគារដែលជាព្រឹត្តិការណ៍ក្ដៅគគុកនៅក្នុងពេលនេះ។
អ្វីដែលស្ទើរទប់ទឹកភ្នែកមិនបានទៅទៀត គឺបទចម្រៀងមួយនេះ ត្រូវបានបង្ហោះឡើងស្របគ្នា ដែលលោកបានប្រកាសនៅលើហ្វេសប៑ុកថា ឳពុករបស់លោកស្ថិតក្នុងការសង្គ្រោះបន្ទាន់នៅក្នុងមន្ទីរពេទ្យកាល់ម៉ែត្រ។
លោក ជុំ លីណូ បានឆ្លើយបញ្ជាក់ថា បើទោះជាឳពុករបស់លោកមានជំងឺរុាំរ៉ៃអស់រយៈពេលច្រើនឆ្នាំ និងកំពុងសង្គ្រោះបន្ទាន់នៅក្នុងមន្ទីរពេទ្យ ក៍លោកនៅចេញបកស្រាយបទចម្រៀងដើម្បីរំលែកទុក្ខដល់ក្រុមកម្មករសំណង់ ដែលរងគ្រោះថ្នាក់ក្នុងហេតុការណ៍បាក់អគារនៅខេត្តព្រះសីហនុផងដែរ។ លោករំពឹងថា បទចម្រៀងមួយនេះ នឹងទទួលការចាប់អារម្មណ៍ ហើយលោកក៍បួងសួងឱ្យឳពុករបស់លោកជាសះស្បើយ និងឆ្លងផុតគ្រោះក្នុងពេលឆាប់ៗ៕
កិច្ចការដ៏សំខាន់មួយសម្រាប់អ្នករស់នៅជាប់បឹងទន្លេសាប គឺការកែច្នៃត្រីស្រស់ទៅជាអាហារទុកបម្រុងដែលអាចរក្សាទុកបរិភោគបានយូរ មានដូចជា ប្រហុក ផ្អក ត្រីឆ្អើរ ហើយត្រីងៀតក៏ជាអាហារបម្រុងដ៏ពេញនិយមមួយដែរ តែកំពង់ចាមជាខេត្តមួយដែលមានដងទន្លេមេគង្គដ៏ធំស្ថិតនៅចំកណ្ដាលដែលក៏ជាជង្រុកត្រីទឹកសាបដ៏ធំមួយដែរនៅប្រទេសកម្ពុជា ហើយស្រុកមួយចំនួននៃខេត្តនេះក៏មានភាពល្បីល្បាញក្នុងការកែច្នៃត្រីស្រស់មិនចាញ់ខេត្តពោធិ៍សាត់ និងច្រើនជាងខេត្តផ្សេងៗទៀតដែលនៅជុំវិញបឹងទន្លេសាបដែរ ហើយខេត្តកំពង់ចាមអាចចាត់ទុកថាជាខេត្តដែលនាំចេញ និងចែកចាយត្រីងៀតធំជាងគេផងដែរក្នុងប្រទេសកម្ពុជា។
ក្នុងចំណោមឈ្មួញត្រីងៀតធំៗនៅខេត្តកំពង់ចាម អ្នកកែច្នៃផលិតផលត្រីធ្វើជាត្រីងៀតម្នាក់ដែរ គឺលោក សុខ ឃីម ម្ចាស់សិប្បកម្មត្រីងៀតឆ្ងាញ់កំពង់ចាម ស្ថិតនៅភូមិកំប៉ាល ឃុំសណ្តែក ស្រុកបាធាយខេត្តកំពង់ចាមបានមានប្រសាសន៍ប្រាប់ឡារ៉ែនពាណិជ្ជថា លោកបានកែច្នៃ និងប្រកបអាជីវកម្មត្រីងៀតនេះអស់រយៈពេលយូរឆ្នាំមកហើយ តែទើបតែ 3ឆ្នាំចុងក្រោយប៉ុណ្ណោះដែលផលិតផលត្រីងៀតឆ្ងាញ់កំពង់ចាមរបស់លោកទទួលបានចំណាប់អារម្មណ៍ច្រើនពីអតិថិជនក្នុងស្រុក ក៏ដូចជាក្រៅស្រុកដែរ ដោយមានការជាវ និងបញ្ជាទិញជាហូរហែ ដែលធ្វើឱ្យលោកមានគោលដៅនឹងពង្រីកមុខរបរឱ្យមានលក្ខណៈធំជាងនេះទៀត។
លោក សុខ ឃីម បានឱ្យដឹងថា៖“ជាង15ឆ្នាំរហូតដល់ពេលនេះ ដែលកាលដំបូងឡើយ ការកែច្នៃផលិតផលត្រីងៀត ខ្ញុំបានធ្វើជាលក្ខណៈគ្រួសារប៉ុណ្ណោះ គឺម្តាយរបស់ខ្ញុំជាអ្នកប្រកបរបរនេះតាំងពីដើមរៀងមក។ ទើបតែ 2-3ឆ្នាំចុងក្រោយនេះ អាជីវកម្មត្រីងៀតលក្ខណៈគ្រួសាររបស់ខ្ញុំក៏បានពង្រីកខ្លួនដោយបានធ្វើការផ្សព្វផ្សាយតាមហ្វេសប៊ុកYouTube ពីបច្ចេកទេសនៃការប្រឡាក់ត្រី ការរៀបចំអនាម័យ ប្រសើរជាងអ្វីដែលធ្លាប់បានអនុវត្ត គួបផ្សំ និងប្រវត្តិដែលគ្រួសាររបស់ខ្ញុំបានធ្វើ ទើបធ្វើឱ្យមានការទទួលស្គាល់ច្រើនឡើង ហើយទីផ្សារក៏មានការរីកចម្រើនធំជាងមុនដែរ”។
លោក សុខ ឃីម វ័យ 28ឆ្នាំ ម្ចាស់សិប្បកម្មត្រីងៀតឆ្ងាញ់កំពង់ចាម ក៏បានរំឭកឱ្យដឹងផងដែរថាកាលពីដំបូង ការធ្វើត្រី 1រដូវ គឺមានតែប្រមាណ 200គីឡូក្រាមប៉ុណ្ណោះ។ តែមកដល់ពេលបច្ចុប្បន្ន ការធ្វើរយៈពេល 1ខែបានជាង 30គីឡូក្រាម ឬក៏2-3ខែអាចបានជាង 90គីឡូក្រាមដែរ។ ឯត្រីដែលយកមកផលិតជាងៀត គឺបាននាំមកពីបឹងទន្លេសាប និងត្រីទន្លេ និងបឹងនៅក្នុងប្រទេសយើង ហើយត្រីងៀតត្រូវបានធ្វើឡើងពីត្រី 3ប្រភេទ គឺត្រីរ៉ស់ ត្រីដៀប និងត្រីឆ្តោ។ ត្រីរស់ត្រូវបានយកពីបែនៅក្នុងទន្លេមានចម្ងាយប្រហែល25គីឡូម៉ែត្រពីផ្ទះរបស់លោក។
លោក សុខ ឃីម បានឱ្យដឹងទៀតថា៖“ការច្នៃត្រីងៀត គឺច្រើនធ្វើចាប់ពីខែធ្នូ រហូតដល់ដើមខែមិថុនា ប៉ុន្តែឥឡូវឱ្យតែមានអ្នកបញ្ជាទិញ គឺយើងត្រូវរៀបចំឱ្យម៉ូយជាបន្ត ដោយត្រីងៀតមួយចំនួនធំត្រូវលក់ទៅម៉ូយនៅភ្នំពេញ ដែលភាគច្រើនយកទៅលក់នៅបុរី ដែលក្នុង1ម៉ូយទទួលយកទៅលក់ប្រមាណ ជា110-120kg ហើយក៏មានមួយចំនួនទៀត នាំទៅខេត្តផ្សេងៗផងដែរ”។
លោកបានបញ្ជាក់ថា៖“នៅឆ្នាំនេះខ្ញុំច្នៃត្រីបានច្រើនជាងការរំពឹងទុក ព្រោះថាការបញ្ជាទិញត្រីរបស់ខ្ញុំមិនត្រឹមតែអ្នកនៅក្នុងស្រុកទេ ក៏មានអ្នកនៅក្រៅស្រុកបានបញ្ជាទិញជាច្រើនគួរសមដែរ។សម្រាប់ការបញ្ជាទិញពីអ្នកនៅក្រៅស្រុក មានអ្នកអាណិកជន ពីប្រទេសអាមេរិក កាណាដា អូស្ត្រាលី អុីតាលី ជប៉ុន និងកូរ៉ ហើយវាក៏ជាទីផ្សារដែលអាចរីកចម្រើននៅពេលខាងមុខបាន”។
លោកបានបញ្ជាក់ថា៖“ខ្ញុំមិនមែនមានតែផលិតផល កែឆ្នៃត្រីងៀតតែមួយមុខទេ ខ្ញុំមានផលិតផលកែឆ្នៃត្រីច្រើនមុខ ព្រោះមានផលិតផលច្រើនដែលបានផលិត។ ផលិតផលត្រីទាំងនោះ រួមមានត្រីងៀតត្រីរ៉ស់ ត្រីងៀតប្រភេទឆ្តោ ត្រីកន្ធរ ត្រីប្រឡាក់ ប្រហុក ផ្អក ត្រីផាត់ និងងៀតគោជាដើម ដែលងៀតគោ ក៏ត្រូវបានគេចាប់ផ្តើមបញ្ជាទិញជាបណ្តើរៗហើយដែរ”។
លោក បាននិយាយបន្តថា បន្ទាប់ពីច្នៃរួច ត្រីងៀតប្រភេទត្រីរ៉ស់ងៀតលោកលក់ចេញក្នុងតម្លៃ1គីឡូក្រាមថ្លៃ6ម៉ឺនរៀល រីឯត្រីដៀបអាចមានតម្លៃថោកជាងបន្តិចបន្តួច ត្រីប្រឡាក់ ផ្សេងទៀតក៏មានតម្លៃផ្សេងៗគ្នាដែរ។ តម្លៃនេះបើគិតទៅលើទីផ្សារមិនជាថ្លៃ លើតម្លៃសិប្បកម្មកែច្នៃដទៃទៀតទេ ដោយសាររបស់យើងមានអនាម័យ និងការទទួលស្គាល់ពីម៉ូយ ដែលពួកគាត់អាចទទួលយកបាន។
លោកសុខ ឃីមបានឱ្យដឹងដែរថាបច្ចុប្បន្នការបញ្ជាទិញ បើគិតជាមធ្យមគឺប្រមាណ 90Kg ក្នុង1 ខែ(90×60,000=5,400,000 (ប្រាំលានបួនសែនរៀលស្មើនឹង1300$)និងមានការបញ្ជាទិញថ្មី ពីផ្សារ ធម្មជាតិនៅភ្នំពេញចំនួន150-200kgផងដែរ។ នេះគ្រាន់តែ ជាការគិត ត្រឹមតែផលិតផល កែឆ្នៃត្រីងៀតត្រីរ៉ស់មួយមុខទេ នៅមានផលិតផលកែច្ចៃជាច្រើនមុខទៀត។
ចំពោះការបញ្ជាទិញទៅក្រៅប្រទេសវិញ លោកសុខ ឃីមបានឱ្យដឹងថា៖“ខ្ញុំទទួលបានការបញ្ជាទិញទៅកាន់សហរដ្ឋអាមេរិក កាណាដាប្រមាណជា30-40Kg ដែលក្នុង1ម្ចាស់ប្រមាណជា10kg ហើយ ក្នុង1kg ខ្ញុំលក់បានតម្លៃ18$ តែតម្លៃផ្ញើតាមប្រៃសណីយ៍កម្ពុជា អ្នកបញ្ជាទិញគេជាអ្នកចំណាយ។ បើគិតទៅ ត្រីត្រឹម5Kgត្រូវចំណាយប្រហែលជា200$។ ពោលគឺបើគិតជាមធ្យមត្រី1kgអាចមានតម្លៃ45$”។
លោកបានរៀបរាប់អំពីរបៀបធ្វើត្រីងៀតដូចតទៅ៖ បន្ទាប់ពីប្រឡាក់អំបិល និងស្កររួច ត្រីនោះត្រូវហាលថ្ងៃរយៈពេល 2ថ្ងៃកន្លះ ទៅ3ថ្ងៃ។ លោកពន្យល់ថា ត្រីងៀតមិនព្រួយបារម្ភថាមានមេរោគទេ ព្រោះមុនបរិភោគត្រូវចម្អិន។ រូបមន្តធ្វើត្រីងៀតស្តង់ដារ ឆ្ងាញ់ត្រូវប្រើគ្រឿងផ្សំ៖ត្រីរ៉ស់ធម្មជាតិ ធ្វើស្អាតវះជាបន្ទះៗចំនួន10គីឡូក្រាមត្រូវប្រើអំបិល350g និងស្ករ800g(ប៊ីចេង1ចឹបដាក់ក៏បាន មិនដាក់ក៏បាន)។ ពេលធ្វើត្រូវលាងត្រីទុកឱ្យស្រស់ទឹក រួចដាក់ចូលចានដែកធំមួយ រួចយកអំបិលលាយជាមួយស្ករ និងប៊ីចេងរួចយកល្បាយអំបិលនោះមកចាក់លើសាច់ត្រីច្របល់ច្របាច់ ប្រឡាក់វាចូលគ្នារហូតដល់វាចេញទឹករួចបន្តច្របាច់ឱ្យសព្វសាច់ត្រីរហូតដល់ទឹកវាឡើងខាប់ស្អិត សឹមឈប់រួចយកត្រីនោះទៅក្លាស្សេក្នុងទូត្រជាក់ ឱ្យសាច់ត្រីត្រជាក់ស្រឹប សឹមលើកវាហាលថ្ងៃពេលមេឃកំពុងក្តៅខ្លាំង ល្ងាចសាវាទុក ព្រឹកលើកវាហាលជាបន្តទៀត ហាល2-3ថ្ងៃឱ្យល្មមវាក្រៀមល្អ សឹមឈប់ហាល។ត្រូវរក្សាត្រីងៀតក្នុងកន្លែងត្រជាក់តែស្ងួតល្អ។គេអាចទទួលទានត្រីងៀតអាំង ឬចៀនជាមួយបាយស បបរស ឬអាំងវាបុកធ្វើសាច់ត្រីផាត់ ច្រកក្រឡទុកទទួលទាន ឬច្នៃវាធ្វើជាម្ហូបផ្សេងៗទៀតនៅពេលក្រោយ។
លោកសុខ ឃីមបានបញ្ជាក់ពីគោលបំណងរបស់លោកថា៖“ខ្ញុំគិតថា នឹងពង្រីកការកែច្នៃសិប្បកម្មត្រីងៀតរបស់ខ្ញុំឱ្យធំជាងនេះ ព្រោះបច្ចុប្បន្នវានៅជាលក្ខណៈគ្រួសារនៅឡើយ។ ខ្ញុំនឹងបង្កើតShopតូចមួយនៅភ្នំពេញ ងាយស្រួលនឹងធ្វើការចែកចាយទៅកាន់ទីផ្សារក្នុងស្រុក ក៏ដូចជាទីផ្សារក្រៅស្រុកដើម្បីសម្របសម្រួលកិច្ចការ ដែលមានការបញ្ជាទិញកាន់តែច្រើនឡើង និងអាចបង្កើនបុគ្គលិកផងដែរសម្រាប់អាជីវកម្មរបស់ខ្ញុំ”៕
ក្រោយផ្ទុះរឿងឌឺដងផ្លែផ្កាគ្នារវាងលោក ថៃ នរៈសត្យា និង អ្នកនិពន្ធ ងិន ម៉ានីយ៉ា នៅលើបណ្ដាញសង្គមហ្វេសប៊ុកយ៉ាងកក្រើកនាពេលកន្លងទៅថ្មីៗនេះ ស្រាប់តែគេមើលឃើញថា អតីតហ្រ្វេសស៊ី ថៃ នារីសុជាតា ដែលត្រូវជាកូនស្រីរបស់អ្នកទាំងពីរ បានធ្លាក់ខ្លួនឈឺចូលមន្ទីរពេទ្យភ្លាមៗក្រោយពីឆ្លងថ្ងៃខួបកំនើតរបស់ខ្លួនបានប៉ុន្មានថ្ងៃ ។ មុនចូលមន្ទីរពេទ្យប៉ុន្មានថ្ងៃ ថៃ នារីសុជាតា ទើបរៀបចំពិធីខួបកំណើតយ៉ាងរីករាយដោយមានការចូលរួមជូនពរពីសំណាក់ក្រុមគ្រួសារ និង មិត្តភក្តិជាច្រើនផងដែរ។
នៅថ្ងៃទី 22 ខែមិថុនា នេះ ថៃ នារីសុជាតា បានបង្ហាញរូបភាពជាច្រើនសន្លឹកក្នុងស្ថានភាពគេងនៅក្នុងមន្ទីរពេទ្យដោយ រូបខ្លះថែមទាំងកំពុងជិះរទេះដែលមើលទៅគួរឱ្យអាណិតផងដែរ ។ ក្នុងនោះក៏មានសួរនាំដល់ ថៃ នារីសុជាតា ថាមានជំងឺអ្វីបានជាគេងពេទ្យបែបនេះ ហើយមិត្តភក្តិខ្លះក៏បានលើកទឹកចិត្តនិងជូនពរដល់ស្រីស្អាតនេះឱ្យរឹងមាំ និង ឆាប់ជាសះស្បើយ ។
ថៃ នារីសុជាតា មិនបានប្រាប់ថាមានជម្ងឺអ្វីទេគ្រាន់តែបង្ហោះសារខ្លីថា « សប្បាយ ចិត្តទេ ? សម្ពាធឈាមឡើងខ្ពស់...» ។ មានការលើកឡើងពីអ្នកលេងបណ្ដាញសង្គមថាប៉ុន្មានថ្ងៃនេះ ថៃ នារីសុជាតា មានការប៉ះពាល់ផ្លូវចិត្តខ្លាំង ព្រោះឪពុកម្តាយរបស់នាងដែលបានចែកផ្លូវគ្នារាប់ឆ្នាំទៅហើយនោះបានទម្លាយរឿងរ៉ាវ ផិតក្បត់ជាច្រើនទៅវិញទៅមក ហើយដែលពេលនេះលោក ថៃ នរៈសត្យា ជាឪពុកក៏បានបញ្ចប់តំណែងជារដ្ឋលេខាធិការក្រសួងវប្បធម៌ និង វិចិត្រសិល្បៈកាលពីថ្ងៃទី 19 កន្លងទៅ ។
ហើយនៅថ្ងៃទី 25 មិថុនា ម្សិលមិញនេះ ថៃ នារីសុជាតា បានបង្ហោះសារម្ដងទៀតថា «អរគុណប៉ាដែលបានមកសួរសុខទុក្ខកូន» ដែលនាងចង់ប្រាប់អ្នកគាំទ្រថា ទោះមានរឿងអ្វីកើតឡើងក៏ដោយ ក៏ឪពុករបស់នាងនៅតែបារម្ភ និងស្រឡាញ់ស្រីម្នាក់នេះផងដែរ៕
បើទោះបីជាតារាចម្រៀង ប៊ុត សីហា ដែលអតីតម្ចាស់ពានរង្វាន់ The Voice Cambodia រដូវកាលទី ១ មិនសូវបង្ហាញមុខនៅលើវីថីសិល្បៈចម្រៀងភ្លូកទឹកភ្លូកដីដូចមុនកាលផ្ទុះរឿងអាស្រូវពាក់ព័ន្ធជាមួយគ្រឿង តែតារាចម្រៀងប្រុសរូបនេះ នៅតែទទួលបានការចាប់អារម្មណ៍ខ្លាំងដដែរ ចំពោះបទចម្រៀងមួយៗដែលបានបង្ហោះនៅលើបណ្ដាញសង្គមហ្វេសប៊ុក និងយូធូប។ ដោយឡែកថ្មីៗនេះស្រាប់តែ ប៊ុត សីហា បានលេចមុខជាមួយ MV ចម្រៀងថ្មីមួយយ៉ាងប្លែកមានចំណង «បងមិនទាន់ចាស់ទេ» ដែលមាននៅក្នុងផលិតកម្ម JOB ។
សូមជម្រាបថា នេះជាបទចម្រៀងដំបូងរបស់លោក ប៊ុត សីហា នៅក្នុងផលិតកម្មថ្មីនេះមានទាំងចេញជា Audio Lyrics និង MV ព្រមគ្នាតែម្តង ។ ជាក់ស្តែងនៅក្នុងបទចម្រៀងនេះផងដែរគឺមានការដឹកនាំសម្តែងដោយលោក សយ រតនា និង និពន្ធទំនុកច្រៀងដោយលោក សុខលីម រក្សា និង សម្រួលបទភ្លេងដោយ លោក អ៊ិច សំណាង ។ នៅពុំទាន់ដឹងថាលោក ប៊ុត សីហា បានចុះកុងត្រាជាមួយផលិតកម្មនេះរយៈ ពេលយូរកម្រិតណានោះទេគ្រាន់តែតាមរយៈបទចម្រៀង «បងមិនទាន់ចាស់ទេ» របស់ ប៊ុត សីហា ចេញភ្លាមសន្ទុះនៃការគាំទ្រ ចាប់ផ្តើមខ្លាំងជាបណ្តើរៗ សូម្បីតែផលិតកម្ម មរតក មេឌៀ ក៏បានយកបទ ចម្រៀងលោកទៅផ្សព្វផ្សាយផងដែរ ។ តោះទស្សនា MV ចម្រៀងថ្មីរបស់ ប៊ុត សីហា ទាំងអស់គ្នា ។
កុំឱ្យខកខានយូរ សូមទស្សនាវីដេអូខាងក្រោមនេះ ៖
ក្រសួងសាធារណការ និងដឹកជញ្ជូន បានចុះហត្ថលេខាជាមួយនឹងក្រុមហ៊ុនកូរ៉េ Hanshin Engine ering and Construction Co., Ltd លើកិច្ចសន្យាសាងសង់គម្រោងធ្វើឱ្យប្រសើរឡើងវិញផ្លូវជាតិលេខ2 និងផ្លូវលេខ22 kalBIថ្ងៃទី25 ខែមិថុនា ឆ្នាំ2019។
សូមជម្រាបថា គម្រោងនេះ គឺស្ថិតក្រោមឥណទានពីធនាគរនីហរ័ណអាហរ័ណកូរ៉េ (Export – Import Bank of Korea) នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) ដែលមានចំនួនទឹកប្រាក់សរុប 56,100,000 ដុល្លារអាមេរិក (Loan Agreement)។ ដោយឡែកពិធីចុះហត្ថ លេខាថ្ងៃនេះ គឺមានទំហំទឹកប្រាក់សរុបចំនួន 47,750,000ដុល្លារអាមេរិក។
ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងក្រោយពិធីចុះហត្ថលេខានេះដោយរំពឹងថា ការបើកការដ្ឋានសាងសង់ផ្លូវជាតិលេ2 និងលេខ22នេះ នឹងធ្វើឡើងក្នុងអំឡុងខែវិច្ឆិកា ឬខែធ្នូខាងមុខ។
គម្រោងនេះ មានប្រវែងសរុប 72,17គីឡូម៉ែត្រ ដោយឆ្លងកាត់រាជធានី-ខេត្តចំនួន3 រួមមានខេត្តកណ្តាល រាជធានីភ្នំពេញ និងខេត្តតាកែវ គិតចាប់ពីរង្វង់មូលតាខ្មៅ (ស្ថិតក្នុងក្រុងតាខ្មៅ ខេត្តកណ្តាល) ដល់រង្វង់មូលអូរចំបក់ (ស្ថិតក្នុងក្រុងដូនកែវ ខេត្តតាកែវ) និងផ្លូវជាតិលេខ22 ពីរង្វង់មូលអូរចំបក់ដល់ផ្លូវជាតិលេខ3 ត្រង់ផ្សារអង្គតាសោម។គម្រោងនេះបែងចែកជា3កំណាត់ផ្លូវធំៗមានដូចជា៖
-កំណាត់ទី1- ចាប់ផ្តើមចេញពីរង្វង់មូលតាខ្មៅ ដល់រង្វង់មូលស្រ្តីបីកួរស្រូវ ដែលមានប្រវែង 8,7គ.ម ។ ពង្រីកពី 2គន្លង ទៅ 4គន្លង ដែលនៅតំបន់ទីប្រជុំជន ប្រវែង 4,3គ.ម មានទទឹងផ្លូវ 15មនិងក្រៅតំបន់ទីប្រជុំជនមានទទឹងផ្លូវ 20,5ម។ កំណាត់ផ្លូវនេះក្រាលបេតុងកៅស៊ូ (AC) ដែលមានកម្រាស់ 12ស.ម។
-កំណាត់ទី2- ចាប់ផ្តើមពីរង្វង់មូលស្រ្តីបីកួរស្រូវ ដល់រង្វង់មូលអូរចំបក់ ដែលមានប្រវែង 53,81គ.ម ស្ថិតក្នុងតំបន់ជនបទ។ កំណាត់ផ្លូវនេះមាន2គន្លង និងទទឹង 13ម ក្រាលបេតុងកៅស៊ូ (AC) ដែល មានកម្រាស់ 10ស.ម។
-កំណាត់ទី3- ចាប់ផ្តើមពីរង្វង់មូលអូរចំបក់ ដល់ផ្សារអង្គតាសោម (ផ្លូវជាតិលេខ22) ដែលមានប្រវែង 9,6គ.ម ស្ថិតក្នុងតំបន់ជនបទ។ កំណាត់ផ្លូវនេះ មានទំហំទទឹងផ្លូវសរុប 13ម ក្រាលបេតុង កៅស៊ូ (AC) ដែលមានកម្រាស់ 10ស.ម។
គម្រោងខាងលើធ្វើការពង្រីកលើផ្លូវចាស់ដោយក្រាលកៅស៊ូ AC សាងសង់ស្ពានថ្មីចំនួន11កន្លែង និងស្ថាបនាលូរំដោះទឹកភ្លៀង មានលូជ្រុងកាត់ទទឹងថ្នល់ 56កន្លែង និងលូមូលកាត់ទទឹងថ្នល់ 17កន្លែង។ ការស្ថាបនានេះ គ្រោងនឹងប្រើរយៈពេល 30ខែ (ប្រហែល2ឆ្នាំកន្លះ)៕
ថ្ងៃនេះជាថ្ងៃខួបកំណើតរបស់កីឡាករបាល់ទាត់ដ៏ល្បីល្បាញ នៅលើពិភពលោក Lionel Messi ដែលគិតមកទល់នឹងពេលនេះ រូបគេមានវ័យ៣២ឆ្នាំហើយ។
Lionel Messi ជាកីឡាករខ្សែប្រយុទ្ធរបស់ក្រុមជម្រើសជាតិ អាហ្សង់ទីន និងលេងអោយក្លិប FC Bacelona បានកើតនៅប្រទេសអាហ្សង់ទីន ក្នុងទីក្រុង រ៉ូហ្សារីយូ ក្នុងឆ្នាំ១៩៨៧៕
ចូលលេងឲ្យឈុតធំជិត៧០០ប្រកួត Messi ជួយ Barca ឈ្នះពាន La Liga ១០ដង, Copa del Rey ៦ដង, Champions League ៤ដង និងពានផ្សេងៗជាច្រើនទៀត តែសម្រាប់ក្រុមជម្រើសជាតិវិញហាក់មិនទាន់បានអ្វីជាដុំកំភួនឡើយ៕
ដោយ៖ ឃូរ៉ា
ប្រភព៖ Messi
តាមរយៈទំព័រផេចក្រសួងវប្បធម៌និងវិចិត្រសិល្បៈបានឱ្យដឹងថា អ្នកជំនាញថៃ ដែលកំពុងបម្រើការងារនៅក្នុងវិស័យបេតិកភណ្ឌវប្បធម៌ សុំចែករំលែកបទពិសោធន៍និងចំណេះដឹងអំពីការជួសជុលនិងអភិរក្សប្រាសាទឥដ្ឋបុរាណពីអ្នកជំនាញអភិរក្សប្រាសាទ បុរាណខ្មែរ។
តបតាមការអញ្ជើញរបស់នាយកដ្ឋានវិចិត្រសិល្បៈថៃកាលពីថ្ងៃទី១៧ ដល់ថ្ងៃទី២១ ខែមិថុនា ឆ្នាំ២០១៩កន្លងមក អ្នកជំនាញអភិរក្សប្រាសាទ បុរាណខ្មែរចំនួនបីរូបនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការនៃអាជ្ញាធរជាតិអប្សរា បាន អញ្ជើញចូលរួមក្នុងសិក្ខាសាលាស្តីពី “ការស្វែងយល់អំពីបច្ចេកទេសបុរាណនិងការប្រើសម្ភារៈបុរាណ ដើម្បីជួសជុលប្រាសាទឥដ្ឋនៅតំបន់អង្គរ”នៅខេត្តស្រះកែវ ។
ក្នុងសិក្ខាសាលានេះ អ្នកជំនាញខ្មែរទាំងបីរូបមាន៖ លោក លី វណ្ណា បុរាណវិទូនិងជាប្រធាននាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ លោក តាន់ សុផល អ្នកអភិរក្សឥដ្ឋ និងលោក ហួន សុខជាតិ វិស្វករ បានចែករំលែកបទពិសោធន៍ ចំណេះដឹងអំពីបច្ចេកទេសបុរាណ និងការប្រើសម្ភារៈបុរាណដើម្បីជួសជុលប្រាសាទបុរាណសាងអំពីឥដ្ឋដល់អ្នកជំនាញថៃជាង៣០នាក់ ដែលកំពុងបម្រើការងារនៅក្នុងវិស័យបេតិកភណ្ឌវប្បធម៌ មកពីការិយាល័យប្រចាំតំបន់ទូទាំងប្រទេសនៃនាយកដ្ឋានវិចិត្រសិល្បៈនៃប្រទេសថៃ។
លោក លី វណ្ណា បានឱ្យដឹងថា សិក្ខាសាលានេះគឺផ្តើមចេញពីការយល់ឃើញថា ដើម្បីអភិរក្សនិងជួសជុលប្រាសាទមួយឱ្យរក្សាបាននូវតម្លៃដើម យើងត្រូវប្រើបច្ចេកទេសបុរាណនិងសម្ភារៈបុរាណគួបផ្សំជាមួយនឹងតម្រូវការក្នុងពេលចាំបាច់នៃការប្រើបច្ចេកទេសនិងសម្ភារៈទំនើបដែលមិនប៉ះពាល់ដល់លក្ខណៈសម្បត្តិបុរាណរបស់ប្រាសាទ។ នេះក៏ដោយសារកន្លងមក ការជួសជុលប្រាសាទឥដ្ឋនៅប្រទេសថៃប្រើបាយអរដែលជាល្បាយបានមកពីការលាយបញ្ចូលគ្នានៃខ្សាច់ កំបោរ និងស៊ីម៉ង់តិ៍ផតឡែនដ៍ពណ៌សដើម្បីបិទ បៀក និងភ្ជាប់ឥដ្ឋ។ ការប្រើប្រភេទល្បាយស៊ីម៉ង់តិ៍ដូចនេះ មិនត្រូវគ្នាជាមួយឥដ្ឋបុរាណឡើយ ដោយសារសម្ភារៈសំណង់ទាំងពីរប្រភេទនេះមានលក្ខណៈរឹងមាំខុសគ្នាខ្លាំង ម៉្យាងទៀតស៊ីម៉ង់តិ៍អាចនាំមកនូវការកកើតអំបិលបំផ្លាញដល់ឥដ្ឋបុរាណនៃប្រាសាទ។
លោកបុរាណវិទូរូបនេះបន្តថា កត្តានេះហើយដែលនាយកដ្ឋានវិចិត្រសិល្បៈនៃប្រទេសថៃមានកង្វល់យ៉ាងខ្លាំងអំពីបញ្ហានៃការប្រើស៊ីម៉ង់តិ៍ ហើយក៏ងាកមកគិតអំពីការរិះរកមធ្យោបាយប្រើបច្ចេកទេសជួសជុលប្រាសាទឥដ្ឋតាមបែបបុរាណនិងប្រើបាយអរបុរាណ។ល។ ទើបនាយកដ្ឋានវិចិត្រសិល្បៈនៃប្រទេសថៃផ្តួចផ្តើមគំនិតរៀបចំសិក្ខាសាលានេះឡើង ដើម្បីយកបច្ចេកបុរាណនេះទៅអនុវត្តនៅក្នុងគម្រោងជួសជុលប្រាសាទខាវលួនដែលជាប្រាសាទឥដ្ឋមួយមិនទាន់ដឹងកាលបរិច្ឆេទច្បាស់លាស់ស្ថិតនៅក្នុងស្រុកតាប្រាយ៉ានៃខេត្តសាកែវ ។
សូមបញ្ជាក់ថា នេះជាលើកទី១ដែលអ្នកជំនាញអភិរក្សប្រាសាទបុរាណខ្មែរបានបំពេញបេសកកម្មជាប្រវត្តិសាស្រ្តលើកដំបូងនិងជាទីមោទនភាពសម្រាប់ប្រទេសកម្ពុជា ដែលមានធនធានមនុស្សដ៏មានសមត្ថភាពក្នុងការផ្តល់នូវចំណេះដឹង បទពិសោធន៍អំពីការជួសជុលប្រាសាទឥដ្ឋក្នុងតំបន់អង្គរទៅកាន់អន្តរជាតិ៕
