សង្គម និងសេដ្ឋកិច្ច - La Reine Media

រាងកាយទារកដែលអ្នកម្តាយត្រូវតែស្គាល់…

ព្រោះតែរាងកាយកូនតូចនៅខ្ចី គួរឱ្យថ្នាក់ថ្នម ទើបតម្រូវឱ្យលោកឪពុកអ្នកម្តាយត្រូវតែនៅចាំមើលថែទាំយ៉ាងដិតដល់ ជាពិសេសរឿងសុខភាពរាងកាយកូនតូច។ ថ្ងៃនេះយើងនាំគ្នាមកស្គាល់អំពីការធ្វើការងាររបស់អវយវៈសំខាន់ផ្សេងៗនៅលើរាងកាយកូនតូច ព្រមទាំងវិធីមើលថែទាំដ៏ត្រឹមត្រូវទាំងអស់គ្នា។

បង្ហើយគឺជាផ្នែកមួយរបស់លលាដ៍ក្បាលដែលនៅមិនទាន់ជាប់គ្នាណែនល្អ ទើបកើតមានជាកន្លែងទន់ៗមួយនៅលើក្បាល។ ពេលយើងសង្កត់នឹងទ្រុឌចុះ ដែលទាំងអស់មាន 2កន្លែង គឺបង្ហើយមុខ មានរាង 4ជ្រុង និងបង្ហើយក្រោយ មានរាងត្រីកោណដែលមានទំហំតូចជាង។ បង្ហើយមុខនឹងឡើងរឹងនៅពេលកូនតូចអាយុបាន 1ឆ្នាំទៅ 1ឆ្នាំកន្លះ ចំណែកបង្ហើយក្រោយនឹងឡើងរឹងនៅពេលអាយុបានប្រមាណ 6ខែ។
ចំណុចគួរប្រយ័ត្ន ៖ កុំកង្វល់បារម្ភក្នុងការប៉ះពាល់បង្ហើយ គ្រាន់តែប្រយ័ត្នកុំចុចសង្កត់ ឬប៉ះខ្លាំងៗទៅបានហើយ។ បើស្ទាបប៉ះទៅឃើញថា ទ្រុឌចុះខ្លាំង ហើយកូនតូចនៅស្ងៀម មិនលេង មិនសើចញញឹម មិនរវើកដូចសព្វដង ភ្នែករាងខូង នោះជាសញ្ញាបញ្ជាក់ថា កូនអាចកើតអាការខ្វះជាតិទឹកធ្ងន់ធ្ងរ ឬបើឃើញថា បង្ហើយឡើងប៉ោងទុល មិនលោតដូចចង្វាក់ជីពចរ នោះបញ្ជាក់ថា កូនតូចអាចមានបញ្ហាពាក់ព័ន្ធនឹងខួរក្បាល គួរនាំកូនតូចទៅជួបលោកគ្រូពេទ្យជាបន្ទាន់។

ស្លឹកត្រចៀកគឺជាអវយវៈសំខាន់ក្នុងការស្តាប់ និងឮ កើតឡើងដោយសាររលកសំឡេងធ្វើដំណើរទៅប៉ះនឹងក្រដាសត្រចៀក ឆ្លងកាត់ឆ្អឹងត្រចៀកមកសរសៃប្រសាទត្រចៀក រួចមកដល់ខួរក្បាល ដូច្នេះហើយទើបត្រចៀកមានភាពសំខាន់ដល់ការរៀនយល់ដឹងពីអ្វីៗជុំវិញខ្លួន តាមរយ:ការស្តាប់សំឡេង ការបានឮ។ បើសិនជាកើតមានភាពខុសប្រក្រតីទាក់ទងនឹងការបានឮតាំងពីតូច ការវិវឌ្ឍខាងការនិយាយក៏មានបញ្ហាដែរ។
ចំណុចគួរប្រយ័ត្ន ៖ អាចម៍ត្រចៀកនឹងជួយការពារសត្វល្អិត ដូចជាស្រមោច ឬចៃឆ្កែមិនឱ្យចូលបាន ដូច្នេះអ្នកម្ដាយមិនគួរខ្វេះ ឬកេះត្រចៀកឡើយ ព្រោះមិនត្រឹមតែធ្វើឱ្យអាចម៍ត្រចៀកចូលទៅញ៉ុកណែននៅខាងក្នុងប៉ុណ្ណោះទេ តែនៅអាចធ្វើឱ្យកូនតូចឈឺត្រចៀក ឬក្រដាសត្រចៀកអាចនឹងធ្លុះបានទៀតផង។ ជាធម្មតាអាចម៍ត្រចៀកដែលកើតឡើងនោះ នៅពេលដែលវាមានច្រើន វានឹងជ្រុះចេញមកក្រៅដោយឯកឯង។ ចំណែកទារកដែលបានឮជាធម្មតា ត្រូវតែចេះញញឹម ចេះមើលមុខ សម្លឹងភ្នែក និងបែរមើលតាមសំឡេងបាន តែបើកន្លងផុតទៅ 6ខែហើយ នៅតែធ្វើដូចការរៀបរាប់មកមិនបាន នោះបង្ហាញថា កូនតូចអាចនឹងមានបញ្ហាខាងការស្តាប់ឮហើយ ដូច្នេះគួរតែនាំកូនតូចទៅប្រឹក្សាជាមួយលោកគ្រូពេទ្យ។

កែវភ្នែកតាមធម្មជាតិ ក្រពេញទឹកភ្នែកអាចបង្ហូរទឹកភ្នែកចេញមកបាន ដែលប្រកបទៅដោយ អេនហ្សៃម៍ ឡៃសូហ្សៃម៍(Lysozyme) អាចបំផ្លាញសម្បកកោសិការបស់មេរោគបាក់តេរីបាន ដូច្នេះទើបទឹកភ្នែកជាសារធាតុរលាយដែលការពារការឆ្លងមេរោគនៅក្នុងកែវភ្នែក។ បើមានវត្ថុចម្លែកចូលក្នុងកែវភ្នែក ក្រពេញទឹកភ្នែកនឹងធ្វើការ ដោយបញ្ចេញទឹកភ្នែកមកភ្លាម ដើម្បីលាងសម្អាតវត្ថុចម្លែកនោះចេញ។
ចំណុចគួរប្រយ័ត្ន ៖ មិនគួរប៉ះពាល់ ឬរវល់នឹងកែវភ្នែកកូនតូចឡើយ តែបើឃើញមានភាពខុសប្រក្រតីណាមួួយ ដូចជា ភ្នែកពណ៌សមិនស តែមានពណ៌ក្រហមព្រឿងៗ ភ្នែកហើមឡើងក្រហម ភ្នែកសើមមានទឹកភ្នែកដក់ជាប់រហូត ឃើញមានចំណុចសៗនៅក្នុងប្រស្រីភ្នែក ភ្នែកញាក់ៗ គ្រាប់ភ្នែកញ័រៗ មានអាចម៍ភ្នែកពណ៌លឿងលាយបៃតង ពេលបើកភ្នែក ត្របកភ្នែកបើកឡើងមិនស្មើគ្នា ឬអាយុ 2-3 ខែហើយ តែនៅមិនទាន់ចេះមើលមុខឪពុកម្តាយ ភ្នែកប៉ះពន្លឺមិនបាន ធ្វើភ្នែកក្រឡឺតក្រឡាប់មិនកើត ពេលសម្លឹងមើលទៅខាងៗក៏បែរទៅទាំងក្បាលជាដើម… បើសង្កេតឃើញមានកើតអាការមួយណាក្នុងចំណោមអាការទាំងអស់ដែលបានរៀបរាប់មកនោះ លោកឪពុកអ្នកម្តាយគួរប្រញាប់នាំកូនទៅជួបលោកគ្រូពេទ្យដើម្បីពិនិត្យកែវភ្នែកកូនជាបន្ទាន់។

ច្រមុះ
ច្រមុះមានតួនាទីដកដង្ហើម និងហិតក្លិនផ្សេងៗ។ នៅក្នុងច្រមុះមានរោមតូចៗជាច្រើន ដើម្បីការពារកម្ទេចលម្អងធូលី ឬសត្វល្អិតដែលប៉ុនប៉ងចូលទៅក្នុងផ្លូវដង្ហើម ព្រមទាំងមានតួនាទីចាំស្ទាក់ចាប់វត្ថុចម្លែកដែលស្រូបចូលទៅ និងកណ្តាស់ចេញមកវិញ។ សាច់ជាលិកាដែលក្រាលខាងក្នុងប្រហោងច្រមុះ នឹងបំពេញតួនាទីបញ្ចេញជាតិទឹកមកចិញ្ចឹមប្រហោងច្រមុះ ពេលដកដង្ហើមចូលទៅ ជាតិទឹកនៅក្នុងច្រមុះជាអ្នកបន្ថែមសំណើមឱ្យខ្យល់។ បើសាច់ជាលិកាក្នុងច្រមុះរលាក ទឹកច្រមុះ(ទឹកសំបោរ)នឹងត្រូវបានបញ្ចេញមកច្រើនជាងធម្មតា។
ចំណុចគួរប្រយ័ត្ន ៖ ពេលកូនតូចមិនស្រួលខ្លួន កើតផ្តាសាយ តែងតែមានទឹកសំបោរច្រើន អ្នកម្ដាយគួរយកក្រណាត់ជ្រលក់ទឹកអំបិលជូតថ្នមៗ។ បើប្រើសំឡីត្បារត្រចៀកជូតសម្អាត ត្រូវប្រយ័ត្នពេលកូនតូចរើ ព្រោះអាចនាំឱ្យកើតឧប្បត្តិហេតុបាន។ រឿងដែលត្រូវប្រយ័ត្ននោះគឺ អ្នកម្ដាយកុំយកម្រាមដៃរបស់ខ្លួនទៅកេះច្រមុះកូន ព្រោះក្រចកដៃអាចធ្វើឱ្យរយះសាច់ច្រមុះកូនតូចបាន។ ចំណែកច្រមុះដែលមានស្នាមអុចៗសៗ ស្រដៀងមុនខ្សាច់នោះ មិនបាច់កេះចេញទេ ព្រោះវាមិនបណ្តាលឱ្យមានគ្រោះថ្នាក់អ្វីទេ។

ក្រចកដៃក្រចកដៃមានតួនាទី អេះ កេះ កោស ខ្វាច ហែកចំណីអាហារ ឬរបស់ផ្សេងៗឱ្យក្លាយជាបំណែកតូចៗ។ ក្រចកដៃជើងរបស់កុមារតូចៗ ក៏ដូចក្រចកដៃ-ជើងរបស់មនុស្សធំដែលឆាប់វែងដែរ។ គេសង្កេតឃើញថា អត្រានៃការដុះរបស់ក្រចកដៃ តែងវែងលឿនជាងក្រចកជើងដល់ទៅ 2ដង ដូច្នេះហើយទើបយើងត្រូវកាត់ក្រចកដៃញឹកញាប់ជាងក្រចកជើង។ ជាធម្មតាគេនិយមកាត់ក្រចករៀងរាល់ 1-2សប្តាហ៍ម្តង ចំណែកលក្ខណៈរបស់ក្រចក ជាធម្មតាច្រើនមានពណ៌ផ្កាឈូកស្តើងៗ រាបស្មើគ្នា គ្មានស្នាមរួញ ឬកោងងឡើយ។
ចំណុចគួរប្រយ័ត្ន ៖ ពេលកាត់ក្រចកដៃឱ្យកូនតូច ត្រូវប្រយ័ត្នកុំឱ្យប៉ះសាច់កូន គួរធ្វើនៅពេលដែលកូនតូចគេងលក់។ គួរជ្រើសរើសប្រើកន្ត្រៃកាត់ក្រចកសម្រាប់ទារក និងពេលកាត់ហើយ គួររូសក្រចកឱ្យទាលផង ហើយបើឃើញមានអ្វីខុសប្រក្រតីដែលកើតឡើងនៅលើក្រចកកូនតូច គួរទៅប្រឹក្សាជាមួយលោកគ្រូពេទ្យ ដូចជា ក្រចកឡើងពណ៌ខ្មៅជាំ ឬមានពណ៌ខុសប្រក្រតី ក្រចកដុះចេញមកវៀច រួញ ក្រិន ឬផ្សេងទៀត។ល។

រន្ធផ្ជិតជាប្រក្រតី ចំណែករបស់ទងផ្ចិតនឹងស្ងួតជាបណ្តើរៗ ហើយជ្រុះដោយខ្លួនឯងក្នុងរយ:ពេល 2-3សប្តាហ៍ តែគេក៏ធ្លាប់ជួបប្រទះដែរថា ទារកខ្លះអាចប្រើពេលយូរជាងនេះទៅទៀត។ តាមការណែនាំរបស់លោកគ្រូពេទ្យ គោលការណ៍នៃការសម្អាត គឺជាវិធីមួយដែលល្អបំផុត ដើម្បីការពារការឆ្លងមេរោគដែលអាចបង្កគ្រោះថ្នាក់ដល់កូនតូចបាន។
ចំណុចគួរប្រយ័ត្ន ៖ បើទងផ្ចិត និងស្រទាប់ស្បែកជុំវិញឡើងពណ៌ក្រហម និងមានធំុក្លិននោះបញ្ជាក់ថា អាចមានឆ្លងមេរោគ ឬបើសង្កេតឃើញផ្ចិតរបស់កូនឡើងសើម ផ្ចិតរលាកក្លាយ មានឈាមចេញមកតាមផ្ចិត… អ្នកម្តាយគួរប្រញាប់នាំកូនទៅជួបគ្រូពេទ្យជាបន្ទាន់។ សម្រាប់ផ្ចិតប៉ោង ឬទុលឡើង អ្នកម្តាយមិនគួរកង្វល់បារម្ភឡើយ ព្រោះផ្ចិតនឹងរួញចូលវិញដោយឯកឯងក្នុងអំឡុងពេល 2-3ខែ ឬមានទារកខ្លះអាចយូរដល់ 1ឆ្នាំក៏មាន។

ស្បែកទារកក្នុងវ័យទើបនឹងកើត អ្នកម្តាយអាចសង្កេតឃើញថា នៅលើស្បែករបស់កូនមានស្នាមអុចៗក្រហមៗពេញខ្លួន ដែលភាគច្រើននឹងរលប់បាត់ទៅវិញដោយឯកឯងនៅពេលដែលធំឡើងជាបណ្តើរៗ តែស្នាមដែលបង្ហាញពីភាពខុសប្រក្រតីខ្លះ ដូចជា ស្នាមនៅលើមុខ ស្នាមនៅលើកំប៉េះគូទ គួរតែប្រញាប់រកមើលមូលហេតុ និងមើលថែទាំតាមអាការ។
ចំណុចគួរប្រយ័ត្ន ៖ ភាពស្អាតបាតមានអនាម័យ គឺជារឿងសំខាន់ណាស់សម្រាប់ស្បែករបស់ទារក ដូច្នេះបើឃើញមានស្នាមដែលគួរឱ្យសង្ស័យ ដូចជាស្នាមនៅលើគូទជាដើម គួរតែសម្អាត ឬជូតឱ្យស្អាត និងផ្លាស់កន្ទបឱ្យរៀងរាល់ពេលបន្ទាប់ពីទារកបន្ទោបង់រួច និងមិនគួរស្លៀកខោទឹកនោមគ្រប់ពេលវេលានោះទេ គួរស្លៀកក្រណាត់កន្ទបផាឌិប ឬក៏ឱ្យស្បែកកូនបានប៉ះនឹងខ្យល់អាកាសខ្លះផង៕

June 28, 2019

ការមើលថែទាំសុខភាពប្រអប់មាត់សម្រាប់ស្ត្រីមានគភ៌

ការមានសុខភាពដែលល្អក្នុងអំឡុងពេលមានគភ៌ គឺជារឿងមួយដែលអនាគតអ្នកម្តាយគ្រប់រូបចង់បាន…។ ស្ត្រីមានគភ៌គ្រប់រូបអាចនឹងមានក្តីកង្វល់ចំពោះការប្រែប្រួលផ្សេងៗរបស់រាងកាយ និងតែងខំប្រឹងមើលថែទាំសុខភាពគភ៌ និងកូននៅក្នុងផ្ទៃឱ្យបានល្អ តែយ៉ាងណាក៏ដោយចូរអ្នកកុំភ្លេចពីសុខភាពប្រអប់មាត់របស់ខ្លួនឱ្យសោះ ព្រោះវាមានផលប៉ះពាល់ដល់សុខភាពរបស់ទារកនៅក្នុងផ្ទៃ។1. ការប្រែប្រួលរបស់អ័រម៉ូនក្នុងអំឡុងពេលមានគភ៌មានផលជំរុញធ្វើឱ្យកើតរោគរលាកអញ្ចាញធ្មេញកាន់តែងាយជាងអំឡុងពេលប្រក្រតី។ ការមានកំណកកំបោរច្រើនអាចធ្វើឱ្យកើតរោគធ្មេញពុក រលាក ហើមអញ្ចាញធ្មេញ និងមានចេញឈាមទៀតផង។
2. មានរបាយការណ៍មួយបញ្ជាក់ថា មេរោគបាក់តេរីដែលធ្វើឱ្យកើតសភាវរលាកអញ្ចាញធ្មេញនៅលើស្ត្រីមានគភ៌នោះ អាចឆ្លងចូលទៅក្នុងលោហិត និងជំរុញឱ្យមានអ័រម៉ូន Prostaglandin E2 កើនឡើង ដែលអ័រម៉ូននេះនឹងកើតមាននៅពេលជិតគ្រប់កំណត់ឆ្លងទន្លេ ដូច្នេះហើយទើបគេតែងប្រទះឃើញនៅលើស្ត្រីមានគភ៌ជិតគ្រប់ខែតែងមានសភាវរលាកអញ្ចាញធ្មេញធ្ងន់ធ្ងរ ដែលអាចបណ្ដាលឱ្យឆ្លងទន្លេមុនពេលកំណត់ ហើយនិងទារកកើតមកមានទម្ងន់ខ្លួនតិច។
3. អាការក្អួតចង្អោរបណ្តាលមកពីការចាញ់កូនញឹកញាប់ ធ្វើឱ្យមានអាស៊ីតចេញពីក្រពះអាហារហូរបញ្ច្រាស់មកក្នុងប្រអប់មាត់ បើមិនលាងជាតិអាស៊ីតនោះចេញជាបន្ទាន់ទេ អាចធ្វើឱ្យអវយវៈក្នុងប្រអប់មាត់សឹករេចបាន។
4. ការបរិភោគអាហារដែលមានរសជាតិជូរញឹកញាប់ ក៏មានផលប៉ះពាល់ធ្វើឱ្យធ្មេញសឹកពុកបានដែរ។
5. ស្ត្រីមានគភ៌ច្រើនតែបរិភោគបានតិច តែច្រើនដង។ ការបរិភោគញឹកញាប់ បរិភោគបង្អែម និងអាហារដែលជាប់ធ្មេញ នឹងធ្វើឱ្យកើតជំងឺពុកធ្មេញ។
6. សម្រាប់ទារក ធ្មេញទឹកដោះនឹងចាប់ផ្តើមដុះតាំងពីមានអាយុនៅក្នុងគភ៌មាតាបាន 4-6សប្តាហ៍។ ការកកើតធ្មេញ ត្រូវការសារធាតុអាហារច្រើនប្រភេទ ដូចគ្នានឹងការរីកលូតលាស់របស់រាងកាយដែរ ជាពិសេសសារធាតុរ៉ែពពួកកាល់ស្យូម ផូស្វ័រ ដែលវានឹងទៅស្រោបធ្មេញធ្វើឱ្យសាច់ធ្មេញមានភាពរឹងមាំ។

ការណែនាំសម្រាប់ស្ត្រីមានគភ៌
1. ដុសធ្មេញ និងប្រើខ្សែអំបោះខាត់ធ្មេញរៀងរាល់ថ្ងៃ យ៉ាងហោចណាស់ 1ថ្ងៃ 2ដង ព្យាយាមដុសខាត់ឱ្យស្អាតទាំងក្នុងប្រឡោះធ្មេញ និងម្តុំជើងអញ្ចាញធ្មេញ និងគួរខ្ពុរមាត់ ឬដុសធ្មេញរៀងរាល់លើក ក្រោយពេលបរិភោគអាហាររួច។
2. បើមានអាការចាញ់កូន ក្អួតចង្អោរ គួរខ្ពុរមាត់ដោយទឹកស្អាត ឬទឹកថ្នាំខ្ពុរមាត់ផ្លួអរ៉ាយ ដើម្បីកាត់បន្ថយបរិមាណអាស៊ីតដែលចេញពីក្រពះ និងហាមដុសធ្មេញរយៈពេល 30នាទីបន្ទាប់ពីក្អួត ព្រោះអាស៊ីតដែលចេញមកនោះ វាធ្វើឱ្យស្រទាប់ធ្មេញខាងលើទន់ផុយ បើសិនដុសធ្មេញភ្លាមៗនឹងធ្វើឱ្យធ្មេញឆាប់សឹកអស់(គួរខ្ពុរមាត់សិន មុននឹងដុសធ្មេញ)។
3. បរិភោគអាហារឱ្យគ្រប់ 5ប្រភេទក្រុម ដើម្បីសុខភាពរបស់ម្តាយ និងកូនក្នុងផ្ទៃ។ កាល់ស្យូមជាសារធាតុអាហារសំខាន់ក្នុងការសាងធ្មេញរបស់ទារក ដោយទារកនឹងបានទទួលកាល់ស្យូមតាមរយៈឈាមរបស់ម្តាយ ដូច្នេះម្តាយគួរបរិភោគកាល់ស្យូមឱ្យបានគ្រប់គ្រាន់។
4. គួរចៀសវាងអាហារផ្អែមៗ ឬអាហារណាដែលស្អឹតជាប់ធ្មេញ ដើម្បីការពារកុំឱ្យធ្មេញពុក។
5. គួរទៅត្រួតពិនិត្យធ្មេញរៀងរាល់ 6ខែម្តងហើយបើមានអាការឈឺ ហើម ឬមានរលាកអញ្ចាញធ្មេញ គួរតែទៅទទួលការព្យាបាលជាបន្ទាន់ ព្រោះសុខភាពក្នុងប្រអប់មាត់របស់មាតាមានផលប៉ះពាល់ដល់សុខភាពរបស់ទារក។
មេរោគបាក់តេរីនៅក្នុងប្រអប់មាត់របស់ស្ត្រីមានគភ៌អាចបញ្ជូនតទៅដល់កូនក្នុងផ្ទៃបានដូច្នេះការមានសុខភាពប្រអប់មាត់ល្អ គ្មានធ្មេញពុក ឬរលាកអញ្ចាញធ្មេញ នឹងជួយកាត់បន្ថយបរិមាណមេរោគបាក់តេរីដល់ទារកបាន៕

June 28, 2019

តើស្រ្តីមានគភ៌គួរជ្រើសរើសពាក់ស្បែកជើងបែបណាដើម្បីសុវត្ថិភាពខ្លួនឯងនិងកូនក្នុងផ្ទៃ?

ចង់ក្លាយជានារីដែលមើលមកឃើញស្អាត មានមន្តស្នេហ៏តាំងពីក្បាលដល់ចុងជើង ចូរកុំមើលរំលងស្បែកជើងដែលយើងត្រូវពាក់ដើររាល់ថ្ងៃនោះឱ្យសោះ ជាពិសេសក្នុងអំឡុងពេលមានគភ៌ ដែលជើងត្រូវទទួលទ្រទម្ងន់ខ្លួនដែលកាន់តែកើនជារឿយៗ រហូតដល់គួរឱ្យអាណិត។ ដូច្នេះហើយទើបការជ្រើសរើសស្បែកជើងរបស់អ្នកមានផ្ទៃពោះដែលត្រូវពាក់ឱ្យសប្បាយជើង និងមានសុវត្ថិភាពនោះ គឺជារឿងសំខាន់ខ្លាំងណាស់ ។

ការជ្រើសរើសស្បែកជើងសម្រាប់ទៅធ្វើការងារក្រៅផ្ទះ
. ស្រ្តីមានគភ៌គួរជ្រើសរើសពាក់ស្បែកជើងដែលគ្មានកែងខ្ពស់ ដើម្បីការពារទាំងការរអិលដួល និងការឈឺខ្នងចង្កេះផង ។
. ជ្រើសរើសពាក់ស្បែកជើងណាដែលស័ក្តិសមនឹងរូបរាងជើង ដែលអាចទទួលទ្រទម្ងន់ខ្លួនស្រ្តីមានគភ៌ និងទប់ទល់ការប៉ះទង្គិចបានយ៉ាងល្អ។
. កុំជ្រើសរើសយក ឬពាក់ស្បែកជើងតាមលេខដែលខ្លួនធ្លាប់ពាក់ដោយមិនបានល ព្រោះទំហំជើងអាចប្រែប្រួលនៅពេលមានគភ៌ និងពេលពាក់ហើយ គួរទុកឱ្យនៅសល់ចន្លោះរវាងចុងម្រាមជើង និងចុងស្បែកជើងប្រវែង 1សង់ទីម៉ែត្រ។
. ពិនិត្យមើលបាតស្បែកជើងណាដែលតោងស្អិតនឹងកម្រាលឥដ្ឋ និងជ្រើសរើសយកពណ៌ណាដែលលេចច្បាស់ជាងសម្លៀកបំពាក់ដែលពាក់ទៅធ្វើការ និងមើលទៅឃើញរាងផ្លូវការបន្តិច។
. បើត្រូវឈរធ្វើការយូរ គួរពាក់ស្បែកជើងដែលមានបាតរាបស្មើ ស្បែកទន់ៗ ដើម្បីកាត់បន្ថយការឈឺស្រពន់របស់សាច់ដុំជើង និងបាតជើង។
. ឈានចូលដល់ត្រីមាសទី3 នៃការមានគភ៌ គួរចៀសវាងស្បែកជើងណាដែលពិបាកពាក់នៅពេលធ្វើការ ដូចជា ស្បែកជើងដែលមានខ្សែចង ខ្សែរឹតបន្តឹង ឬមានក្បាលគន្លឹះដែលធ្វើឱ្យត្រូវឱន-ងើបៗនៅពេលពាក់ចូល ឬពេលដោះចេញជាដើម។

ការជ្រើសរើសស្បែកជើងសម្រាប់ពាក់ធ្វើការនៅផ្ទះ
. ក្នុងអំឡុងពេលមានគភ៌ ជើងនឹងហើម ហើយធំជាងប្រក្រតី ដូច្នេះគួរជ្រើសរើសប្រើស្បែកជើងណាដែលមានលក្ខណៈធំទូលាយ ហើយស្រាល ពាក់ហើយសប្បាយស្រួលជើង ដូចជាស្បែកជើងសម្រាប់ស្ត្រីមានផ្ទៃពោះ ឬស្បែកជើងផ្ទាត់ជាដើម។
. ជ្រើសរើសបែប ឬម៉ូដណាដែលសមគ្នានឹងរូបរាងបាតជើងរបស់ខ្លួនបំផុត ដូចជាកន្លែងធំបំផុតរបស់ស្បែកជើង និងបាតជើងរបស់យើងគួរតែឱ្យមានទំហំប៉ុនគ្នា។
. ជ្រើសរើសពាក់ស្បែកជើងណាដែលមានបាតតោងស្អិតនឹងកម្រាលឥដ្ឋ មិនងាយរអិល បាតខាងក្នុងទន់ ទទួលរងនឹងការប៉ះ ឬបុកបាន ដើម្បីកាត់បន្ថយការឈឺជង្គង់ និងឈឺ-កជើងជាដើម។
. ជាធម្មតាបាតជើងរបស់មនុស្សយើងច្រើនតែមានទំហំខុសគ្នាបន្តិច ដូច្នេះគួរវាស់បាតជើងទាំងសងខាងជាមុនសិន មុននឹងទិញ និងត្រូវរើសយកតាមខ្នាតជើងដែលធំ។
. ជ្រើសរើសពាក់ស្បែកជើងណាដែលមានភាពយឺតយារ ពង្រីកខ្លួនតាមរូបរាងបាតជើងរបស់យើងបានល្អ។ មិនត្រូវទិញស្បែកជើងណាដែលរឹបណែនដោយសារតែគិតថា ពាក់យូរទៅ វាគង់តែយារនោះទេ។
. តមពាក់ស្បែកជើងកែងចោត ព្រោះអាចប្រថុយប្រថាននឹងការជំពប់ជើងដួល និងធ្វើឱ្យឈឺខ្នងទៀតផង។
. បើចង់ឱ្យល្អមែនទែន គួរជ្រើសរើសពាក់ស្បែកជើងសុខភាព ដែលផលិតឡើងដើម្បីទ្រទម្ងន់របស់ជើង និងបាតជើងរបស់ស្រ្តីមានគភ៌ជាពិសេសទើបជាការប្រសើរ។
. ពេលវេលាដ៏សមស្របបំផុតដែលអ្នកមានផ្ទៃពោះគួរទិញស្បែកជើង គឺពេលថ្ងៃរសៀល ព្រោះពេលនេះជើងរបស់ស្រ្តីមានគភ៌នឹងហើម ហើយរីកធំជាងពេលធម្មតា៕

June 28, 2019

បច្ចុប្បន្ននេះនិស្សិតកម្ពុជាអាចទទួលសញ្ញាបត្របច្ចេកវិទ្យាថ្នាក់អន្តរជាតិពីជប៉ុនតែមិនចាំបាច់ទៅជប៉ុនទេ…

បច្ចុប្បន្ននេះ ប្រទេសជប៉ុនត្រូវបានគេទទួលស្គាល់ថាជាប្រទេសដែលមានសក្តានុពលខ្លាំងផ្នែកការអប់រំ ជាពិសេសលើជំនាញវិទ្យាសាស្ត្រ និងបច្ចេកវិទ្យាជាដើម។ ស្របជាមួយនឹងភាពល្បីល្បាញនេះ ជប៉ុនក៏មានគម្រោងពង្រីកការបណ្តុះបណ្តាលដល់បណ្តាប្រទេសនានាដែលខ្លួនបានដាក់ទុនវិនិយោគ ដើម្បីបណ្តុះបណ្តាលធនធានមនុស្សឆ្លើយតបជាមួយនឹងទីផ្សារការងារនាយុគសម័យថ្មីនេះ។

កម្ពុជាជាប្រទេសមួយផងដែរ ដែលមានកិច្ចសហការល្អជាមួយរដ្ឋាភិបាល និងប្រជាជនជប៉ុន។ ហេតុនេះហើយទើបជានិច្ចកាលជប៉ុនបានជួយដល់កម្ពុជាជាច្រើនលើផ្នែកអប់រំ និងបណ្តុះបណ្តាល។ នៅពេលថ្មីៗនេះវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) បានសហការជាមួយសាកលវិទ្យាល័យជាតិគ្រប់គ្រង និងអង្គការមូលនិធិគាំទ្រការអប់រំអន្តរជាតិ (CIESF) របស់ជប៉ុន បានបើកវគ្គបណ្តុះបណ្តាលថ្មីមួយលើជំនាញបច្ចេកវិទ្យាព័ត៌មានវិទ្យា ក្រោមការគាំទ្រភាពជាដៃគូពីទីភ្នាក់ងារ JICA។ វគ្គបណ្តុះបណ្តាលនេះមានឈ្មោះថា IT Passport ដែលវាជាកម្មវិធីកម្រិតដំបូងក្នុងចំណោមកម្មវិធីសំខាន់ៗជាច្រើនទៀតដើម្បីត្រៀមប្រឡងយកសញ្ញាបត្រវិស្វករបច្ចេកវិទ្យាព័ត៌មាន (Information Technology Engineers Examination – ITEE) ដែលជាកម្មវិធីទទួលស្គាល់ជាផ្លូវការដោយប្រទេសជប៉ុន។ សញ្ញាបត្រនេះនឹងធ្វើឱ្យនិស្សិតទទួលបានការទុកចិត្ត និងទទួលស្គាល់ពីក្រុមហ៊ុនឯកជនជាច្រើនរបស់ជប៉ុនដែលកំពុងវិនិយោគនៅកម្ពុជា ព្រោះជំនាញ ITEE នេះជាជំនាញដែលកំពុងមានតម្រូវការខ្ពស់ក្នុងទីផ្សារការងារ។

តាមការបញ្ជាក់ពីវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) បានឱ្យដឹងថា ITEE ជាការប្រឡងវិស្វករផ្នែកបច្ចេកវិទ្យាដែលគ្រប់គ្រងដោយ IPA របស់ជប៉ុន។ វាជាការប្រឡងថ្នាក់ជាតិធំបំផុតមួយនៅក្នុងប្រទេសជប៉ុន ដែលជារៀងរាល់ឆ្នាំមានអ្នកចូលរួមប្រមាណ 600,000នាក់។ ការប្រឡងនេះត្រូវធ្វើឡើងកងតាមកាលបរិច្ឆេទនិងសំណួរដូចគ្នាជាមួយបណ្តាប្រទេសដែលជាសមាជិកនៃវិទ្យាស្ថាន ITPEC (Information Technology Professionals Examination Council) ដែលការប្រឡងនេះនឹងត្រូវធ្វើឡើង2ដងក្នុង1ឆ្នាំ គឺក្នុងខែ មេសានិងខែតុលា។

សម្រាប់កម្រិតនៃការប្រឡង ITEE នេះវិញត្រូវបានវិទ្យាស្ថាន ITPEC រៀបចំជា4កម្រិតគឺ ទី1 ការប្រឡងកម្រិត IP (IT Passport Exam) ដែលការប្រឡងនេះសម្រាប់បេក្ខជនទូទៅដែលបានបញ្ចប់ការសិក្សា ហើយចង់បានវិញ្ញាបនបត្រ ITEE ថែមទៀតដើម្បីបញ្ជាក់ពីកម្រិតជំនាញវិជ្ជាជីវៈមូលដ្ឋានផ្នែកព័ត៌មានវិទ្យា។ កម្រិតទី2 គឺការប្រឡងវិស្វករព័ត៌មានវិទ្យាមូលដ្ឋាន FE (Fundamental Information Technology Engineer Examination) សម្រាប់អ្នកជំនាញបច្ចេកវិទ្យាព័ត៌មាន និងនិស្សិតបញ្ចប់ការសិក្សា ឬនិស្សិតពាក់ព័ន្ទនឹងផ្នែកបច្ចេកវិទ្យា។ កម្រិតទី3 គឺការប្រឡងវិស្វករព័ត៌មានវិទ្យា AP (Applied Information Technology Engineer Examination) សម្រាប់អ្នកជំនាញបច្ចេកវិទ្យា និងអ្នកមានបទពិសោធការងារស្រាប់។ ចុងក្រោយកម្រិតទី4 គឺការប្រឡងកម្រិតខ្ពស់ AE (Advance Examination) សម្រាប់អ្នកជំនាញដែលមានបទពិសោធជាក់លាក់។

ស្ថាប័នដដែលបានបញ្ជាក់ផងដែរថា ការប្រឡងនេះត្រូវបានគេទទួលស្កាល់ថាជាការប្រឡងវាស់ចំណេះដឹង នៃនិស្សិតបញ្ចប់ការសិក្សាបច្ចេកវិទ្យា និងដើម្បីលើកកម្ពស់ឱកាសការងារទាំងក្នុង និងក្រៅប្រទេស ព្រោះសញ្ញាបត្រនេះទទួលស្គាល់យ៉ាងទូលំទូលាយក្នុងបណ្តាប្រទេសអាស៊ីមួយចំនួនដូចជា ចិន កោះតៃវ៉ាន់ ជប៉ុន ឥណ្ឌា កូរ៉េ សិង្ហបុរី ម៉ាឡេស៊ី ហ្វីលីពីនម៉ុងហ្គោល មីយ៉ាន់ម៉ា ថៃ វៀតណាម និងបង់ក្លាដែស។ សម្រាប់កម្ពុជាយើងកំពុងដំណើរការដំបូងក្នុងការរៀបចំទទួលស្គាល់ផងដែរ ព្រោះកម្ពុជាមិនទាន់មានមជ្ឈមណ្ឌលប្រឡងលើកម្រិតទាំងអស់នេះ ហេតុនេះបេក្ខជនដែលមានពិន្ទុល្អពីសាលា ហើយមានបំណងចង់ប្រឡងយកសញ្ញាបត្រកម្រិតខ្ពស់នេះ នឹងទទួលបានការស្នាក់នៅ និងប្រឡងនៅប្រទេសវៀតណាម។

និស្សិតដែលចង់សិក្សាវគ្គ IT Passport អាចទាក់ទងដោយផ្ទាល់ជាមួយនឹង វិទ្យាស្ថានជាតិប្រៃសណីយ៍ទូរគមនាគមន៍ បច្ចេកវិទ្យាគមនាគមន៍ និងព័ត៌មាន(NIPTICT) ដោយការបណ្តុះបណ្តាលមានរយៈពេល3សប្តាហ៍ ដែលចាប់ផ្តើមពីថ្ងៃទី 15 ខែកក្កដា រហូតដល់ថ្ងៃទី2 ខែសីហា ឆ្នាំ2019 ខាងមុខនេះ។ ទីតាំងបណ្តុះបណ្តាលស្ថិតនៅក្នុងសាកលវិទ្យាល័យជាតិគ្រប់គ្រង៕

June 28, 2019

នោះ!! ឆ័យលី ដាឡែន និង រុន ណាកូ លេងឱបស្អិតអ៊ីចឹងហ្មង...

តារាសម្ដែងដើមទ្រូងស្អាត អ្នកនាង ឆ័យលី ដាឡែន និង តារាម៉ូដែល លោក រុន ណាកូ ដែលត្រូវគេស្គាល់ថាជាម្ចាស់ពានគ្រងឈុតបុរាណមួយរូបរបស់គ្រួសារតារាកម្ពុជា ឱបរឹតគ្នាម៉ាឈ្នះដៃតែម្ដង នៅក្នុងកម្មវិធីហ្គេម របស់ទូរទស្សន៍ My TV កាលពីល្ងាចថ្ងៃទី27 ខែមិថុនា។ យ៉ាងណាមិញអ្នកទាំងពីរបញ្ជាក់ថា អត់មានអារម្មណ៍អ្វីប្លែករវាងបុរស និងនារីនោះទេ ខណៈដែលអ្នកនាង ឆ័យលី ដាឡែន ក៏ប្រកាសប្ដីមិនប្រច័ណ្ឌទេត្រឹមរូបភាពសិល្បៈបែបហ្នឹង បើទោះជាអ្នកនាងទើបបញ្ចប់ដំណឹងបែកប្ដីក្ដៅៗ។

តាមរយៈការប្រមាញ់រូបភាពនិងទម្លាយចេញមកស្រាប់តែ អ្នកនាង ឆ័យលី ដាឡែន ទទួលស្គាល់ថា អ្នកនាង និង តារាវ័យក្មេង លោក រុន ណាកូ ពិតជាឱបរឹតគ្នាភ្លេចខ្លួនពិតមែន រហូតមានអ្នកឃើញរូបនេះ លើកឡើងជាច្រើនថា តិចស្វាមីរបស់អ្នកនាងប្រច័ណ្ឌ ស្របគ្នាដែលអ្នកនាង និងស្វាមី ក៏ទើបបញ្ចប់ព័ត៍មានបែកបាក់គ្នាក្ដៅៗ។ អ្នកនាង ឆ័យលី ដាឡែន អះអាងថា រូបភាពឱបរឹតនៅក្នុងកម្មវិធីប្រកួតប្រជែងហ្គេមនោះ គឺគ្រាន់តែរូបភាពសិល្បៈ ក្នុងនាមអ្នកនាងជាមេក្រុម ឱបរឹតកូនក្រុមទៅវិញទៅមក ក្រោយពេលឈ្នះទឹកប្រាក់ក្នុងមួយវគ្គៗប៉ុណ្ណោះ មិនមែនក្នុងន័យចម្លែកនោះទេ ដ្បិតថា រូបភាពនោះ គឺឱបរឹតគ្នាម៉ាឈ្នះដៃភ្លេចខ្លួនមែន។ អ្នកនាងថា រវាងអ្នកនាង និងស្វាមីដ្បិតមិនសូវឃើញបណ្ដើរគ្នាព្រោះរវល់រៀងខ្លួន ហើយនៅក្នុងសិល្បៈ អ្នកនាងក៍ត្រូវសម្ដែង ឬ លេងកម្មវិធី ប៉ះតារាប្រុសក្មេងៗបែបនេះញឹកញាប់ ប៉ុន្តែស្វាមីអ្នកនាងបែងចែកច្បាស់ណាស់ សម្រាប់ការងារសិល្បៈ។

មិនខុសគ្នា លោក រុន ណាកូ ដែលមានសំណាងបានវិញបានឱបរឹតអ្នកនាងយ៉ាងណែនដៃនោះ បានអះអាងថា នោះគ្រាន់តែជារូបភាពសប្បាយៗក្នុងពេលប្រកួតប្រជែង ក្នុងនាមប្អូនប្រុសរំភើបចិត្តហើយស្ទុះឱបបងស្រី ឬ ឱបរៀមច្បង ដែលជាមេក្រុមប៉ុណ្ណោះ។ បើទោះជាលោក និងអ្នកនាង ឆ័យលី ដាឡែន មិនសូវបានទាក់ទងគ្នា ប៉ុន្តែលោក និងអ្នកនាង ក៏ឧស្សាហ៍ជួបគ្នាក្នុងកម្មវិធីគ្រួសារតារាកម្ពុជាកន្លងមក ដោយលោកក៏មិនដែលរំលងក្នុងការលើកដៃសំពះអ្នកនាង ក្នុងនាមជារៀមច្បងផងដែរ ទើបលោក និងអ្នកនាង ហ៑ានអោបរឹតគ្នា ដូចបងស្រីប្អូនប្រុស លើឆាករហូតភ្លេចខ្លួន និងសង្ឃឹមថា នេះមិនមែនជារូបភាពធ្វើឱ្យស្វាមីអ្នកនាងប្រច័ណ្ឌ៕

June 28, 2019

មិនធម្មតា!! ស្ងាត់ៗ ភិន សុដាលីស បញ្ចប់ជំនាញ Professional Design

កាលពីថ្ងៃទី២៧ កក្កដា ដោយធ្វើឱ្យស្រទាប់មហាជន និងតារាសិល្បៈដូចគ្នាកោតសរសើរយ៉ាងខ្លាំង ដោយសារតារាសម្ដែង អ្នកនាង ភិន សុដាលីស បានបញ្ចប់ជំនាញរចនាម៉ូដ Professional Design ពីសាលាល្បីៗហើយថ្លៃសិក្សាខ្ពស់។

មុខវិជ្ជាដែលនាងសិក្សា គឺជាឯកទេសពេញនិយម ក្រៅពីចំណាយសិក្សាខ្ពស់ទម្រាំទាល់តែចប់ ក៍មិនងាយនឹងរៀនចប់ជោគជ័យស្រួលៗដែរ បើគ្មានដុង និងភាពវ័យឆ្លាត។ ចាត់ទុកជាមោទភាពយ៉ាងខ្លាំង ដែលតារាសម្ដែង អ្នកនាង ភិន សុដាលីស ស្រាប់តែត្រូវគេឃើញទទួលបានបរិញ្ញាប័ត្រផ្នែកឌីហ្សាញកម្រិតខ្ពស់ ដែលនេះជាជំនាញយ៉ាងកាលីព សម្រាប់តារាសិល្បៈ ដែលត្រូវគេស្គាល់ថា ជាអ្នកសិល្បៈដ៍មមាញឹកម្នាក់។

អ្នកនាង ភិន សុដាលីស បង្ហោះរូបរំភើប និងោកសប្បាយមិនតិចទេ ក្នុងពេលដែលនាង តស៊ូសិក្សាមុខវិជ្ជា Professional Design ហើយបញ្ចប់ដោយជោគជ័យទៀត នៅក្នុងសាកលវិទ្យាល័យអន្តរជាតិល្បីឈ្មោះ ក្នុងពេលដែលនាងក៍ត្រូវគេឃើញសកម្មនឹងការសម្ដែង ដែលម្នាក់ៗស្មាននាងបោះបង់ការសិក្សាបាត់់ទៅហើយ។ លោក អ៊ិន សុភិន បង្ហាញមោទនភាពយ៉ាងខ្លាំង ដែលកូនស្រីរបស់លោក បញ្ចប់ការសិក្សា លើឯកទេសដ៍លំបាកបានសម្រេច។ យ៉ាងណាមិញ លោកថាភិន សុដាលីស មិនច្បាស់ពីការបោះបង់សិល្បៈ ហើយចាប់អាជីពជាអ្នកឯកទេសឌីហ្សាញនោះទេ ដោយលោកគ្រាន់តែអះអាងថា នាងនឹងអាចមានការងារខ្លះទាក់ទងនឹងការឌីហ្សាញ បន្ថែមពីលើសិល្បៈ។ អ៊ីចឹងហើយ ទើបនាងឧស្សាហ៍ចេញចូលក្រៅប្រទេស ដោយសារតែនាងមានការងារលើផ្នែកឌីហ្សាញនោះឯង៕

June 28, 2019

អាហារផ្អែមបែបណា ដែលស័ក្តិសមនឹងស្ត្រីមានផ្ទៃពោះបំផុត?

អាហារដែលមានរសជាតិផ្អែមជាអាហារដែលត្រូវមាត់មនុស្សជាច្រើន រសជាតិផ្អែមជួយជំរុញភាពឃ្លានអាហារបានយ៉ាងល្អ ហើយមនុស្សភាគច្រើនក៏និយមអាហាររសជាតិផ្អែម រហូតដល់លើសពីតម្រូវការរបស់រាងកាយ ដែលជាមូលហេតុបណ្តាលឱ្យកើតជំងឺផ្សេងៗបានដែរ។ ដូច្នេះពេលនេះយើងនាំគ្នាមកស្គាល់ពីអាហាររសជាតិផ្អែមថា តើគួរបរិភោគប៉ុនណាទើបសមរម្យល្មមសម្រាប់ស្ត្រីអ្នកមានផ្ទៃពោះ។

លោកគ្រូពេទ្យបានណែនាំឱ្យអ្នកមានផ្ទៃពោះ គ្រប់គ្រងការបរិភោគអាហារដែលមានរសជាតិផ្អែម ឱ្យស្ថិតនៅក្នុងកម្រិតសមល្មម គឺកុំបរិភោគតាមចិត្តចង់ កាត់បន្ថយអាហារផ្អែមឱ្យបានច្រើនបំផុត និងគ្រប់គ្រងការបរិភោគជាតិស្ករ ឬបង្អែមដូចខាងក្រោមនេះ ៖
. ញ៉ាំទឹកផ្លែឈើស្រស់ដែលមិនដាក់ស្ករ ជំនួសភេស្ជជៈកំប៉ុង។
. កាត់បន្ថយស្ករក្នុងការផ្សំគ្រឿងម្ហូបអាហារចំនួនពាក់កណ្តាលពីទម្លាប់ចាស់។
. បរិភោគផ្លែឈើស្រស់ និងបន្លែឱ្យបានច្រើនព្រោះវានឹងធ្វើឱ្យរាងកាយទទួលបានជាតិស្ករល្អយ៉ាងគ្រប់គ្រាន់។
. ចៀសវាងអាហារកញ្ចប់ ឬកំប៉ុងផ្សេងៗ តែបើចាំបាច់ត្រូវបរិភោគ គួរមើលពីគ្រឿងផ្សំថា តើមានជាតិស្ករតិច ឬច្រើនប៉ុនណា។
. ខ្ពុរមាត់ ឬដុសធ្មេញក្រោយពេលបាយ ឬក្រោយពេលបរិភោគបង្អែមរួច និងគួរប្រើខ្សែអំបោះខាត់សម្អាតធ្មេញ។យ៉ាងហោចណាស់ 1ថ្ងៃម្តង ដើម្បីកុំឱ្យមានកម្ទេចអាហារនៅជាប់សេសសល់តាមប្រឡោះធ្មេញ។
. បើសិនត្រូវប្រើស្ករ គួរជ្រើសរើសប្រើស្ករអំពៅ ជំនួសស្ករ-ស។
. មិនគួរបរិភោគស្ករ-សលើសពី 3ស្លាបព្រាបាយក្នុង 1ថ្ងៃឡើយ (សម្រាប់មនុស្សដែលមានរាងកាយមាំមួន)។
. ជាធម្មតា ពេលយើងបរិភោគបាយ បន្លែ និងផ្លែឈើនោះ គឺយើងបានទទួលជាតិស្ករគ្រប់គ្រាន់តាមតម្រូវការរបស់រាងកាយស្រាប់ទៅហើយ។

តើយើងទទួលបានរសជាតិផ្អែមដោយវិធីណា?
មនុស្សយើងឆាប់ទទួលយករសជាតិផ្អែមខ្លាំងបំផុត ព្រោះនៅលើអណ្តាតមានក្រពេញទទួលរសជាតិផ្អែមច្រើនជាងរសជាតិផ្សេងៗ ដូច្នេះបើយើងបរិភោគអាហារដែលមានរសជាតិផ្អែមញឹកញាប់ នឹងធ្វើឱ្យយើងញៀនរសជាតិផ្អែមជាពិសេសការបរិភោគស្ករដែលយើងដាក់នៅក្នុងអាហារផ្សេងៗនោះ នឹងធ្វើឱ្យរាងកាយយើងទទួលបានជាតិស្ករច្រើនជ្រុលដោយមិនដឹងខ្លួន ទាំងអាហារពីធម្មជាតិក៏មានជាតិស្ករស្រាប់ទៅហើយ មានដូចជា ៖
-ខាបូហាយដ្រេត ពេលឆ្លងកាត់កម្មវិធីរំលាយអាហារហើយ វានឹងក្លាយទៅជាជាតិស្ករ គ្លុយខូសហើយនឹងត្រូវបានបឺតជ្រាបចូលទៅក្នុងខ្សែលោហិតជាបន្ត ទៅធ្វើជាថាមពលការងារដល់កោសិកាអវយវៈផ្សេង។
-ផ្លែឈើស្ទើរតែគ្រប់ប្រភេទមានជាតិស្ករជាចំណែកផ្សំដោយធម្មជាតិស្រាប់ទៅហើយ និងអាចយកទៅប្រើប្រាស់បានភ្លាមតែម្តង។
-អាហារកញ្ចប់ និងអាហារកំប៉ុងផ្សេងៗ ដូចជា ទឹកញាំសាលាដ ទឹកដោះគោ យ៉ាអួ នំខេក ឬសូម្បីតែទឹកស៊ីអុីវក៏មានស្ករជាចំណែកផ្សំដែរ៕

June 28, 2019

អ្នកនាងចន ច័ន្ទលក្ខិណា ដឹកនាំសិល្បករបង្សុកូលឧទ្ទិសកុសលជូនវិញ្ញាណក្ខន្ធកម្មករស្លាប់ក្នុងឧបទ្ទវេហតុបាក់អាគារនៅខេត្តព្រះសីហនុ

នៅព្រឹកថ្ងៃទី២៧ ខែមិថុនា ឆ្នាំ ២០១៩ នេះ អ្នកនាង ចន ច័ន្ទលក្ខិណា ដែលជាប្រធានសមាគមមិត្តសិល្បករ បានដឹកនាំសិល្បករសិល្បការិនី នឹងរៀបចំពិធីបង្សុកូលបុណ្យគំរប់ ៧ ថ្ងៃដើម្បីឧទ្ទិសបុណ្យកុសលជូនវិញ្ញាក្ខន្ធជនរងគ្រោះដែលទទួលមរណភាពដោយសារតែបាក់រលំអគារកម្ពស់៧ជាន់នៅក្រុងព្រះសីហនុ។

ដោយអ្នកនាង ចន ច័ន្ទលក្ខិណា បានប្រាប់សារព័ត៌មានឡារ៉ែនថា ថ្ងៃទី២៧ នេះប្អូនស្រី សូ ដានីតា លោក សែម សង្វាត ដួង ម៉ានិច និង នាងខ្ញុំព្រមទាំងបងប្អូនសិល្បៈមួយចំនួន នឹងរៀបចំពិធីបុណ្យគំរប់ ៧ ថ្ងៃនៅវត្តនាគវ័ន្ត ចំពោះ វិញ្ញាណក្ខន្ធបងប្អូនជនរងគ្រោះដែលបានទទួលមរណៈភាពក្នុងសោកនាដកម្មបាក់រលំអាគារនៅក្រុង ព្រះសីហនុ ។ អ្នកនាងថា ឆ្នាំនេះនាងខ្ញុំអត់អាចចូលរួមពិធីបុណ្យសព ឬ បុណ្យ ៧ ថ្ងៃ ឬ ១០០ថ្ងៃបានទេ តែលើកនេះគឺមិនអាចតមបានឡើយ ដោយសារតែនាងខ្ញុំឃើញសោកនាដកម្មនេះហើយ ស្វែកសោកអាណិតនៅក្នុងចិត្តជាទៅបំផុត។ នាងខ្ញុំ និងសិល្បករទាំងអស់ សូមជូនកុសលនេះ ដល់វិញ្ញាណក្ខន្ធបងប្អូនជនរងគ្រោះ ឱ្យបានទៅកាន់សុគតិភព។

គួររំលឹកថាប្រតិបត្តិការរុករកជនរងគ្រោះ ក្នុងឧបទ្ទវហេតុរលំបាក់អគារកម្ពស់៧ជាន់ នៅខេត្តព្រះសីហនុ បានបិទបញ្ចប់ហើយ នៅវេលាម៉ោង៧៖៣០នាទីយប់ម្សិលមិញ បន្ទាប់ពីបើកប្រតិបត្តិការរុករក និងសង្រ្គោះអស់រយៈពេល២ថ្ងៃកន្លះ។ ជនរងគ្រោះដែលក្រុមសង្គ្រោះជួយសង្រ្គោះយកចេញពីគំនរអគារបាក់បែក មានចំនួនសរុបចំនួន៥៤នាក់ ក្នុងនោះស្លាប់ចំនួន២៨នាក់ ស្រី០៤នាក់ និងរងរបួសចំនួន២៦នាក់ ស្រី០២នាក់៕

June 27, 2019

Samsung Galaxy S10 5G 80ថ្ងៃ លក់បាន 1លានគ្រឿង

យោងតាមប្រភពព័ត៌មាននានាបានចុះផ្សាយថា ស្មាតហ្វូនត្រកូល Galaxy S10 របស់ក្រុមហ៊ុន Samsung ម៉ូដែល 5G កំពុងលក់ដាច់ខ្លាំងនៅប្រទេសកូរ៉េខាងត្បូង ពោលគឺត្រឹមរយៈពេល 80ថ្ងៃបន្ទាប់ពីការប្រកាស ក្រុមហ៊ុនអាចលក់ចេញបានចំនួន 1លានគ្រឿងបាត់ទៅហើយ។

បើគិតជាមធ្យម ក្នុង 1ថ្ងៃ Samsung លក់បាន Galaxy S10 5G ចំនួន 15,000គ្រឿង។ ចំនួននេះ គឺឈ្នះដាច់ឆ្ងាយ បើធៀបនឹង LG ដែលប្រកាសចេញម៉ូដែល LG V50 ThinQ មាន 5G ដូចគ្នាកាលពីអំឡុងខែឧសភា ដោយលក់បានត្រឹមតែ 280,000គ្រឿងប៉ុណ្ណោះគិតមកដល់ពេលបច្ចុប្បន្ន។

Galaxy S10 5G មិនមែនគ្រាន់តែ Galaxy S10 Plus ប៉ុណ្ណោះទេដែលមានបន្ថែមសេវា 5G ប៉ុន្តែវានៅមានចំណុចដទៃទៀតលើស Galaxy S10 Plus ដូចជា មានកាមេរ៉ា 3D ចំនួន 2គ្រាប់ (ខាងមុខ1/ខាងក្រោយ1) មានអេក្រង់ធំជាង និងមានថ្មធំជាង (4500mAh ធៀបនឹង 4100mAh) ជាដើម។ តម្លៃស្មាតហ្វូន Galaxy S10 5G ជម្រើស RAM 8GB មេម៉ូរីម៉ាស៊ីន 256GB តម្លៃ 1,220ដុល្លារ ចំណែកជម្រើស RAM 8GB មេម៉ូរីម៉ាស៊ីន 512GB តម្លៃ 1,360ដុល្លារ។

សូមបញ្ជាក់ថា ប្រទេសកូរ៉េខាងត្បូងបានប្រកាសចេញបច្ចេកវិទ្យា 5G ដំបូងបង្អស់ក្នុងពិភពលោក ដែលបច្ចុប្បន្នមានក្រុមហ៊ុនទូរគមនាគមន៍ច្រើនជាង5 កំពុងប្រតិបត្តិការលក់កញ្ចប់សេវាអ៊ីនធើណិត ក៏ដូចជាការសហការជាមួយរដ្ឋាភិបាលកូរ៉េខាងត្បូង និងក្រុមហ៊ុនផលិតស្មាតហ្វូនធំៗដូចជា Samsung និង LG ជាដើម៕

June 27, 2019

បច្ចេកវិទ្យាទំនើបរបស់ OPPO អាចតេរកគ្នាបាន ទោះជាអត់សេវាសោះក៏ដោយ

OPPO បានប្រកាសចេញបច្ចេកវិទ្យាទំនាក់ទំនងថ្មីដែលទើបផលិតឡើង ដោយអាចឱ្យអ្នកប្រើប្រាស់ហៅទូរស័ព្ទ ឬផ្ញើសារទៅវិញទៅមកបានក្នុងរយៈចម្ងាយឆ្ងាយគួរសមមួយ ដោយមិនចាំបាច់ប្រើប្រាស់សេវាទូរស័ព្ទ Wi-Fi ឬ Bluetooth អ្វីនោះទេ។បច្ចេកវិទ្យានេះមានឈ្មោះថា MeshTalk ជាប្រព័ន្ធដែលមានការការពារខ្ពស់មួយ ដែល OPPO និយាយថា អាចគ្របដណ្ដប់ក្នុងរយៈចម្ងាយដល់ 3គីឡូម៉ែត្រ (នៅទីធ្លាខាងក្រៅ) ឬអាចឆ្ងាយជាងនេះ បើស្ថិតនៅក្នុងទីប្រជុំជនដែលអាចបាញ់ចេញសេវាតាមឧបករណ៍បាន។ឧបករណ៍ OPPO នឹងអាចបង្កើតបានជា Local Area Network មួយ និងអាចទំនាក់ទំនងដោយផ្ទាល់ជាមួយគ្នា ដោយមិនត្រូវការអង់តែន។

ក្រុមហ៊ុនបានអះអាងថា MeshTalk មិនមានប៉ះពាល់ដល់ថ្មរបស់ឧបករណ៍ឡើយ និងមានគម្រោងថា នឹងបញ្ចូលបច្ចេកវិទ្យានេះជាមួយ Mode Stanby 72ម៉ោង ដូច្នេះទូរស័ព្ទនឹងនៅតែអាចទំនាក់ទំនងគ្នាបាន ទោះជាពេលដែលថ្មនៅសល់តិចតួចក៏ដោយ។

ទោះមិនទាន់មានការបញ្ជាក់ថា បច្ចេកវិទ្យា MeshTalk នឹងអាចប្រើជាមួយស្មាតហ្វូន OPPO នាពេលបច្ចុប្បន្ន ឬយ៉ាងណាក្ដី ក៏ប៉ុន្តែបច្ចេកវិទ្យានេះកំពុងធ្វើការបង្ហាញមុខក្នុងកម្មវិធី MWC Shanghai ដែលកំពុងប្រព្រឹត្តធ្វើឡើងចាប់ពីថ្ងៃទី26 ដល់28 ខែមិថុនាសប្ដាហ៍នេះដែរ៕

June 27, 2019

Category: សង្គម និងសេដ្ឋកិច្ច