សង្គម និងសេដ្ឋកិច្ច - La Reine Media

អតីតអ្នកចាំទីជម្រើសជាតិអ៊ីតាលី វិលមក Juventus វិញ ព្រោះចង់ដឹកនាំ Juventus

ពេលនេះ Buffon អតីតអ្នកចាំទីជម្រើសជាតិអ៊ីតាលី កំពុងធ្វើការចរចាដើម្បីត្រឡប់មកកាន់ Juventusវិញហើយ រួមជាមួយនឹងតំណែងមួយក្រោយពេលដែលរូបគេចូលនិវត្តន៍។

ការត្រឡប់ទៅកាន់ក្លិបដែលខ្លួនធ្លាប់រួមរស់អស់ជិត 20ឆ្នាំនេះ Buffon និងទៅជួយអ្នកចាំទីបច្ចុប្បន្ន ដោយទៅធ្វើជាអ្នកចាំទីបម្រុង ហើយនៅពេលដែលរូបគេចូលនិវត្តន៍ គេនឹងក្លាយជាគ្រូបង្វឹកអ្នកចាំទី ឬទទួលបានមុខតំណែងណាមួយនៅក្នុងក្លិបមួយនេះ។

គួរបញ្ជាក់ផងដែរថា កីឡាកររូបនេះមានវ័យ 42ឆ្នាំហើយ និងធ្លាប់មានស្នាដៃជាច្រើននៅក្នុងក្លិបមួយនេះ រួមទាំងធ្លាប់ជួយឱ្យអ៊ីតាលីបានគ្រងពាន World Cup ទៀតផង៕

June 29, 2019

អតីតតារាល្បី Manchester United គ្រោងបើកមូលនិធិជនពិការមួយនៅកម្ពុជា

លោក Bobby Charlton ធ្លាប់បានមកទស្សនកិច្ចនៅប្រទេសកម្ពុជាកាលពីឆ្នាំ2007 ហើយរូបលោកក៏ ធ្លាប់បានជួបជាមួយជនរងគ្រោះជាច្រើន ជាពិសេសជនពិការដោយសារភ្លើងសង្គ្រាមនៅកម្ពុជា ហើយលោកមាន មហិច្ឆតាផ្ទាល់ខ្លួនដោយធ្លាប់បានប្តេជ្ញាថា នឹងជួយគាំទ្រអ្នករងគ្រោះដោយភ្លើងសង្គ្រាមទាំងអស់នោះតាមគ្រប់លទ្ធភាពដែលលោកមាន ដោយប្រើប្រាស់មូលនិធិ Find A Better Way (FABW) ដើម្បីជួយដល់ជនរងគ្រោះទាំងអស់នោះ។

សូមបញ្ជាក់ថា ៖ លោក Bobby Charlton នឹងបើកដំណើរការមជ្ឈមណ្ឌលរបស់លោក គឺនៅក្នុងខេត្ត ពោធិ៍សាត់ ចាប់ពីខែកញ្ញាខាងមុខនេះតទៅ ដើម្បីលើកកម្ពស់ដល់ជនពិការទាំងអវយវៈសិប្បនិម្មិត ស្មារតី និងជនដែលរស់រានមានជីវិតក្រោយការរងគ្រោះដោយគ្រាប់មីន និងដោយសារភ្លើងសង្គ្រាម ហើយរូបលោកនឹងបណ្តុះបណ្តាលលើជំនាញកុំព្យូទ័របន្ថែមទៀតដល់ពួកគេទាំងនោះ ដើម្បីជួយសម្រួលដល់អាជីព ការងារ មុខរបរ និងផ្តល់ឱកាសការងារផ្សេងៗដល់ពួកគាត់នៅពេលអនាគតផងដែរ៕

June 29, 2019

កម្ពុជាស្នើអង្គការអន្តរជាតិជួយបន្តអភិវឌ្ឍវិស័យការងារ និងបណ្តុះបណ្តាលវិជ្ជាជីវៈឱ្យទាន់បដិវត្តន៍ឧស្សាហកម្មសម័យថ្មី

ប្រព័ន្ធការងារ និងបណ្តុះបណ្តាលវិជ្ជា-ជីវៈនៅកម្ពុជានាពេលបច្ចុប្បន្ននេះ ចាប់ផ្តើមមានសម្ទុះវិជ្ជមានគួរឱ្យគាត់សម្គាល់បន្ទាប់ពីបានសហការជាមួយដៃគូអភិវឌ្ឍន៍ជាច្រើន ដំណាលគ្នាដែលក្រសួងការងារ និងបណ្តុះបណ្តាលវិជ្ជាជីវៈក៏អនុវត្តនូវគោលនយោបាយសំខាន់ៗដើម្បីអភិវឌ្ឍឱ្យកាន់តែប្រសើរ។

ពាក់ព័ន្ធនឹងវិស័យការងារ កម្ពុជាបានចូលជាសមាជិករបស់អង្គការអន្តរជាតិខាងការងារ (ILO)អស់រយៈពេលជាង 50ឆ្នាំមកហើយ ដោយក្នុងនោះយើងទទួលបានផលប្រយោជន៍ជាច្រើនលើការអភិវឌ្ឍការងារ។ទោះជាយ៉ាងនេះក្តីក៏កម្ពុជានៅតែត្រូវការការជួយជ្រោមជ្រែងទាំងបច្ចេកទេស និងថវិកាជាច្រើនបន្ថែមទៀតពីដៃគូអភិវឌ្ឍសំខាន់ៗ។

នៅក្នុងសន្និសីទអន្តរជាតិខាងការងារ នាពេលថ្មីៗនេះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម អុិត សំហេង បានស្នើដល់ដៃគូអភិវឌ្ឍន៍នានា ពិសេសអង្គការអន្តរជាតិខាងការងារ (ILO)ឱ្យបន្តជួយអភិវឌ្ឍដើម្បីឆ្លើយតបនឹងរបត់បដិវត្តន៍ឧស្សាហកម្មទី4 (Industry Revolution 4.0)។ ក្នុងនោះឯកឧត្តមបានលើកឡើងថា ស្របពេលដែលប្រភេទការងារមួយចំនួនបាន និងកំពុងមានការផ្លាស់ប្តូរនៅក្នុងដំណើរការវិវឌ្ឍផ្នែកបច្ចេកវិទ្យា និងបដិវត្តន៍ឧស្សាហកម្ម4.0 កម្ពុជាជឿជាក់ថាគ្រប់ភាគីពាក់ព័ន្ធនឹងចូលរួមជាមួយកម្ពុជា ដើម្បីដាក់ចេញជាវិធានការ និងដំណោះស្រាយចំពោះបញ្ហាប្រឈមនានាដែលកើតឡើងក្នុងទីផ្សារកម្ពុជា និងការងារនាពេលអនាគត។|

ឯកឧត្តម អុិត សំហេង មានប្រសាសន៍ថា៖ “ដើម្បីសម្រេចគោលដៅប្រកបដោយចីរភាព ជាពិសេសគោលដៅទី8 ដែលនិយាយពីការងារសមរម្យ នៅក្នុងបដិវត្តន៍ឧស្សាហកម្មទី4 ប្រទេសជាសមាជិក ILO ចាំបាច់ត្រូវធានាឱ្យបានថា កម្មករនិយោជិត និងយុវជនទទួលបានចំណេះដឹងទូទៅ និងបណ្តុះបណ្តាលបច្ចេកទេសនិងវិជ្ជាជីវៈប្រកបដោយគុណភាព និងឱកាសទទួលបានការសិក្សាពេញមួយជីវិតដើម្បីទទួលបានជំនាញមួយដែលអាចឆ្លើយតបជាមួយតម្រូវការជាក់ស្តែងនៃទីផ្សារការងារ”។

ឯកឧត្តមរដ្ឋមន្ត្រីបានសង្កត់ធ្ងន់ផងដែរថា ក្នុងន័យនេះប្រទេសជាសមាជិកអង្គការអន្តរជាតិខាងការងារគប្បីបផ្តោតលើការបណ្តុះបណ្តាលជំនាញ សមត្ថភាពដល់កម្លាំងពលកម្ម ដើម្បីបង្កើនផលិតភាព និងបង្រួមគម្លាតនៃជំនាញឱ្យបានកាន់តែច្រើន។ ក្រៅពីនេះយើងក៏ត្រូវពង្រឹងសេវានៃការផ្តល់ព័ត៌មានពីទីផ្សារការងារ និងសេវាស្វែងរកការងារឱ្យកាន់តែមានភាពទូលំទូលាយ ស្របពេលដែលយើងបង្កើនគុណភាពអប់រំ និងបណ្តុះបណ្តាលវិជ្ជាជីវៈ ដើម្បីចាប់យកអត្ថប្រយោជន៍ជាច្រើនសម្រាប់ប្រជាជន។ ចំណុចចម្បងមួយផ្សេងទៀតគឺ យើងចាំបាច់កាត់បន្ថយផលប៉ះពាល់អវិជ្ជមាននៃការប្រែប្រួលពិភពការងារ និងដើម្បីឆ្លើយតបនឹងតម្រូវការជំនាញ។ កម្ពុជាសង្ឃឹមថាអង្គការអន្តរជាតិខាងការងារនៅតែបន្តមានតួនាទីសំខាន់ និងជាស្ថាប័នត្រីភាគីមួយដែលចូលរួមចំណែកយ៉ាងសំខាន់ក្នុងការប្រែក្លាយបញ្ហាប្រឈមនៅក្នុងបដិវដ្តឧស្សាកម្ម ទៅជាឱកាសសម្រាប់ប្រជាជនគ្រប់រូប។

ជាចំណុចវិជ្ជមានអង្គការអន្តរជាតិខាងការងារបានបន្តគម្រោងរោងចក្រកាន់តែប្រសើរនៅកម្ពុជាដែលហៅកាត់ថា ILO-BFC ដើម្បីពង្រឹងលក្ខខណ្ឌការងារ ផលិតភាព ការបញ្ជាទិញ និងទាក់ទាញអ្នកវិនិយោគបន្ថែមមកកម្ពុជា។

លោក Dan Rees នាយកគម្រោងការងារល្អប្រសើរជាសកលនៃអង្គការអន្តរជាតិខាងការងារ ILOបានលើកឡើងថា អង្គការ ILO នឹងបន្តកិច្ចសហការជាមួយកម្ពុជាបន្តទៀត ដើម្បីបង្ហាញសាធារណជនឱ្យបានដឹងពីភាពវិជ្ជមាននៃកិច្ចសហការប្រកបដោយនិរន្តរភាព។ លោកក៏បានវាយតម្លៃជាវិជ្ជមានផងដែរចំពោះការខិតខំប្រឹងប្រែងរបស់កម្ពុជាក្នុងការពង្រឹងសុខដុមនីយកម្មក្នុងទំនាក់ទំនងវិជ្ជាជីវៈ។

គួរបញ្ជាក់ថា ថ្មីៗនេះកម្ពុជាក៏កំពុងយកចិត្តទុកដាក់ខ្លាំងផងដែរលើការបណ្តុះបណ្តាលវិជ្ជាជិវៈ ជាពិសេសពាក់ព័ន្ធនឹងបច្ចេកវិទ្យា ព្រោះយើងកំពុងត្រូវការធនធានជាច្រើនដើម្បីបំពេញតម្រូវការការងារសម្រាប់ក្រុមហ៊ុនក្នុងស្រុក និងក្រុមហ៊ុនបរទេស។ ម្យ៉ាងវិញទៀត ការរៀបចំជំរុញការបណ្តុះបណ្តាលនេះ ក៏ដើម្បីធ្វើការប្រកួតប្រជែងជាមួយបណ្តាប្រទេសក្នុងតំបន់ដើម្បីជំរុញកំណើនសេដ្ឋកិច្ចឱ្យកាន់តែប្រសើរ និងដើម្បីសម្រេចគោលដៅអភិវឌ្ឍន៍ឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ 2030៕

June 29, 2019

ស៊ឹម ថៃណា បញ្ចេញបទនិពន្ធថ្មី បើកទំព័រជាតារាចម្រៀងឯករាជ្យ Original Song

បងប្អូននៅចាំ ស៊ឹម ថៃណា ម្ចាស់បទ “បេះដូងឆ្គួតបាន” ដែរឬទេ? តារាចម្រៀងស្រីដែលធ្លាប់មានកេរ្តិ៍ឈ្មោះបោះសំឡេងល្បីមួយរូបក្នុងប្រទេសកម្ពុជា ជាមួយសម្លេងបែបស្អក ច្រៀងបានពីរោះ និងនិយមលេងខ្លួនសិចស៊ី។

ក្រោយពីចាកចេញពីផលិតកម្ម M ហើយ តារាស្រីរូបនេះវិវត្តខ្លួនមកជាតារាចម្រៀងឯករាជ្យ ដោយផលិតបទចម្រៀង Original Song ចំនួន១បទ ដែលបង្ហោះនៅលើបណ្ដាញសង្គមយូរធូបក្នុងឆាណែលផ្ទាល់ខ្លួន «Thaina Official »។

តារាស្រីដែលធ្លាប់ជាប់ឈ្មោះស្រឡាញ់ស្រីដូចគ្នារូបនេះ បានលើកឡើងថា នាងបានចាកចេញពីផលិតកម្មមានរយៈពេលយូរមកហើយ ចាប់តាំងពីម្ដាយនាងបានទទួលអនិច្ចកម្មមកម្ល៉េះ។ ហេតុផលត្រូវបានកញ្ញា ថៃណា អះអាងថា ដោយសារចង់ស្វែងរកអ្វីដែលខ្លួនចង់ធ្វើ មិនរងអារម្មណ៍ពីបុគ្គលណាម្នាក់។ ថៃណា យល់ថា ខ្លួនធ្វើជាតារាចម្រៀងឯករាជ្យសក្ដិសមជាងតារាចម្រៀងចុះកុងត្រា ព្រោះកញ្ញាជាមនុស្សចូលចិត្តធ្វើការងារតាមអារម្មណ៍ ដូច្នេះបើមានបទចម្រៀងចង់ច្រៀងពេលណាក៏ចេញ ជាសិទ្ធសេរីភាពមួយដែលកញ្ញាចង់បានច្រើនជាង។

បទថ្មីដែលបានផលិតដោយមានការជ្រោមជ្រែងពីសំណាក់ថៅកែហាង ភូមិគ្រឹះហ៊ា នោះមានចំណងជើងថា «កុំខ្លាចការបាត់បង់» ពិតជាមានភាពទាក់ទាញមែន ក៏ប៉ុន្ដែក៏ជួបការលំបាកខ្លះដែរ ដោយសារក្រុមការងាររបស់ខ្លួនសុទ្ធតែសកម្មនិងខ្នះខ្នែងធ្វើបទចម្រៀងថ្មីបែបមនោសញ្ចេតនាមួយនេះឡើង មានលាយបញ្ចូលភ្លេងបុរាណ និងឧបករណ៍ភ្លេង SAXOPHONE ដើម្បីឱ្យកាន់ប្លែកត្រចៀកអាចអង្រួនចិត្តអ្នកគាំទ្របានមិនខាន។ ថៃណា បញ្ជាក់ថា នេះជាការខិតខំប្រឹងប្រែងដំបូងក្នុងការផលិតបទនិពន្ធសម្រាប់ខ្លួន បើទោះបីជាមិនទាន់ទទួលបានការគាំទ្រខ្លាំងក៏ពិតតែ តែនាងក៏ទទួលបានកម្លាំងបណ្ដាលចិត្តច្រើនពីអ្នកគាំទ្រនៅលើបណ្ដាញសង្គមឱ្យ ថៃណា កាន់ផលិតបទថ្មីចង្វាក់ភ្លេងបន្ដទៀតដើម្បីបំបែកទីផ្សារចម្រៀង។

ចឹងដឹងថាបទនិពន្ធថ្មីរបស់តារាស្រី ស៊ឹម ថៃណា ពិរោះរណ្ដំចិត្តយ៉ាងណានោះ សូមស្ដាប់បទ «កុំខ្លាចការបាត់បង់» ខាងក្រោមនេះ ៖

June 29, 2019

ទៅទស្សនា មេអំបៅរាប់លានក្បាលនៅក្នុង ឧទ្យានខេត្តស្រះកែវប្រទេសថៃ

ក្នុងអំឡុងខែមិថុនានេះតទៅ គឺជារដូវកាលនៃការទស្សនាសត្វមេអំបៅរាប់លានក្បាលទៀតហើយ ដែលមានទីតាំងស្ថិតនៅក្នុងខេត្តស្រះកែវ ប្រទេសថៃ។ ឧទ្យានជាតិមួយនេះមានឈ្មោះថា “ប៉ាងស៊ីដា” គឺជាឧទ្យានជាតិមួយកន្លែងដែលត្រូវបានគេចាត់ចូលជាសម្បត្តិបេតិកភណ្ឌពិភពលោករួចស្រេចហើយ។ មិនត្រឹមតែសម្បូរទៅដោយសត្វមេអំបៅរាប់លានក្បាលនោះទេ ឧទ្យានជាតិមួយនេះ ក៏ជាទីដ៏មនោរម្យនៃអំណោយផលពីធម្មជាតិផងដែរ។ រហូតដល់គេប្រសិទ្ធនាមឱ្យថា “ផែនដីនៃមេអំបៅ ដែនព្រៃនៃព្រះអាទិត្យរះ” កាលណាបើព្រះអាទិត្យហើយ នោះរុក្ខជាតិ និងសត្វមានជីវិតនៅក្នុងព្រៃ នឹងមកទទួលយកពន្លឺព្រះអាទិត្យយ៉ាងសប្បាយរីករាយ និងស្រស់ត្រកាលបំផុត។

ដំបូង យើងមកស្គាល់អំពីចំណុចពិសេសនៃតំបន់ទេសចរណ៍ដ៏កម្រមួយនេះសិន ដែលភ្ញៀវទាំងអស់អាចចូលទស្សនាសត្វមេអំបៅជាច្រើនប្រភេទ និងទៅតាមតំបន់នីមួយៗ ដែលមានទាំងអស់12កន្លែងធំៗ ហើយតំបន់ដែលទទួលបានការពេញនិយមច្រើនជាងគេនោះគឺមាន3កន្លែងរួមមាន៖
1. ព្រៃមេអំបៅ : គឺជាចំណុចនៃការបង្កើតឧទ្យានមេអំបៅទាំងមូលតែម្ដង។ ភ្ញៀវទេសចរអាចបើករថយន្ដឡើងទៅទស្សនាបានដោយខ្លួនឯង។ តំបន់នេះមានទីធ្លាធំទូលាយ គឺជាកន្លែងដ៏ពេញនិយមខ្លាំងជាងគេនៅក្នុងឧទ្យានជាតិប៉ាងស៊ីដា ដែលជាធម្មតា មនុស្សធំត្រូវបានគិតតម្លៃ 40បាត និង 20បាតសម្រាប់កូនក្មេង។2. បរិវេណទឹកជ្រោះប៉ាងស៊ីដា : មុនពេលភ្ញៀវទេសចរធ្វើដំណើរឡើងទៅកាន់ព្រៃមេអំបៅ នោះអ្នកនឹងបានឃើញផ្លូវទៅកាន់ទឹកជ្រោះ។ នៅបរិវេណនោះ ក៏មានសត្វមេអំបៅច្រើនក្បាលកំពុងរង់ចាំថតរូបយ៉ាងស្អាតជាមួយនឹងភ្ញៀវទាំងអស់គ្នាផងដែរ។ ភាគច្រើននៅតំបន់ទឹកជ្រោះ គឺសម្បូរទៅដោយមេអំបៅចម្រុះពណ៌ ហើយពួកវាហាក់បីដូចជាស្និតស្នាលជាមួយនឹងមនុស្សខ្លាំងណាស់។3. បរវេណថ្មមួយលាន : កន្លែងមួយនេះ ភ្ញៀវទេសចរចាំបាច់ត្រូវការមគ្គុទេសនាំផ្លូវចូលទៅក្នុងព្រៃ បើមិនដូច្នោះទេ អ្នកអាចនឹងវង្វេងផ្លូវក៏ថាបានដែរ ព្រោះព្រៃនៅទីនេះគឺជាព្រៃជ្រៅហើយធំ។ កន្លែងនេះមានឧបសគ្គច្រើនក្នុងការធ្វើដំណើរ មិនងាយស្រួលសម្រាប់កូនក្មេងនោះទេ តែវាទទួលបានការពេញនិយមបំផុតសម្រាប់អ្នកចូលចិត្តរុករានព្រៃ។ ប្រសិនបើអ្នកឡើងទៅចំពេលវេលាល្អ នោះមេអំបៅខ្មៅនឹងបង្ហាញខ្លួនរាប់សែនក្បាលឱ្យអ្នកបានទស្សនា តែបើមិនចំពេលវេលាទេ អ្នកអាចនឹងមិនសូវឃើញមេអំបៅច្រើនដូចក្ដីស្រមៃនោះទេ។
បើអ្នកមានចំណាប់អារម្មណ៍ក្នុងការទៅទស្សនាសត្វមេអំបៅរាប់លានក្បាលនៅក្នុងឧទ្យានជាតិមួយនេះ អ្នកអាចសាកល្បងទៅដោយខ្លួនឯងបាន និងមិនមានចម្ងាយឆ្ងាយពីខេត្តស្រះកែវប៉ុន្មាននោះទេ។ សូមរីករាយជាមួយនឹងដំណើរកម្សាន្ដដ៏អស្ចារ្យនារដូវវស្សាខាងមុខនេះ៕

June 29, 2019

តារាសម្ដែង ឡុង សុខហៀង បង្ហើបមហិច្ចតាពង្រីកសកម្មភាពរ៉ៃអង្គាសជំនួយដល់ទុរគតជន

តារាសម្ដែង ឡុង សុខហៀង ប្រកាសពីមហិច្ចតារបស់ខ្លួន នឹងត្រៀមបង្កើតជាសមាគមស្របច្បាប់ក្នុងពេលឆាប់ៗ ដើម្បីងាយស្រួលក្នុងការពង្រីកសកម្មភាពរ៉ៃអង្គាសលុយជួយទុរគតជនដែលខ្វះខាតឱ្យបានកាន់តែច្រើន។

គេកត់សម្គាល់ឃើញថា ក្នុងប៉ុន្មានខែចុងក្រោយនេះ លោក ឡុង សុខហៀង ដែលជាតារាសម្ដែងមួយរូបនិងជាប្រធានក្លិបសិល្បៈ បានវាយលុកសកម្មភាពរ៉ៃអង្គាសប្រមែប្រមូលថវិកាជួយដល់ជនខ្វះខាតនៅលើបណ្ដាញហ្វេសប៊ុកយ៉ាងខ្លាំង ដោយលោកក៏បានដឹកនាំសិល្បករក្មេងៗនិងសប្បុរសជនគ្រប់ទិសទី ឱ្យចូលរួម និងបរិច្ចាគក្នុងសកម្មភាពសប្បុរសធម៌យ៉ាងខ្លាំង។

រៀបរាប់ប្រាប់សារព័ត៌មាន ឡារ៉ែន លោក ឡុង សុខហៀង និយាយថា បើតាមតែលោកមមាញឹកនឹងការងារផ្ទាល់ខ្លួន ជាពិសេសគឺការងារបណ្ដុះបណ្ដាលសិស្សឱ្យមានជំនាញសិល្បៈ និងដឹកនាំឱ្យចេញថតនៅតាមផលិតកម្មនានា ក៏ដូចជារវល់ក្នុងការផ្សាយលក់ផលិតផល គឺលោកមិនគួរចំណាយពេលរ៉ៃអង្គាសថវិកានោះទេ ប៉ុន្តែបណ្ដាលមកពីលោកចេះតែចិត្តមិនដាច់ នៅពេលមានគេទាក់ទងមកអោយជួយអ្នកនេះជួយអ្នកនោះ ហើយលោកក៏ឃើញពីការលំបាកនោះដោយផ្ទាល់ភ្នែក ទើបលោកចេះតែប្រកូកប្រកាស ហើយដឹកនាំតារាក្មេងៗ និងសប្បុរសជនចុះទៅប្រគល់អំណោយដោយផ្ទាល់ដៃ។

លោកបន្ដបញ្ជាក់ថា ខ្លួនមានលទ្ធភាពបរិច្ចាគថវិកាផ្ទាល់ខ្លួនជួយដល់ជនខ្វះខាតតែបន្តិចបន្តួចប៉ុណ្ណោះ ប៉ុន្តែអ្វីដែលលោកមានកម្លាំងចិត្ត គឺដោយសារតែកម្លាំងទឹកចិត្តពីសប្បុរសជន ដែលធ្វើឱ្យលោកដែលគ្រាន់តែជាអ្នកនាំសារពីទុរគតជន ទទួលបានថវិកាច្រើនជាហូរហែរក្នុងកិច្ចការនេះ។ គោលបំណងដែលលោកកាន់តែសកម្មក្នុងកិច្ចការនេះ គឺដើម្បីបំផុសទឹកចិត្តសិល្បករក្មេងៗ ជាពិសេសគឺសប្បុរសជន ឱ្យកាន់តែមានសកម្មភាពបរិច្ចាគ និងដើម្បីបណ្ដុះទឹកចិត្តអាណិតស្រលាញ់ដល់អ្នកខ្វះខាតឱ្យបានច្រើននៅក្នុងសង្គម។

តារាសម្ដែងរូបនេះបានបន្តថា ក្នុងពេលខាងមុខ លោកនឹងរត់ច្បាប់បង្កើតជាសមាគម ដើម្បីអាចចុះធ្វើសកម្មភាពរៃអង្គាសនានា ឱ្យបានកាន់តែល្អ ជួយដល់ក្រុមទុរគតជនខ្វះខាត។ ក្នុងនោះក៍ដើម្បីងាយស្រួលចាប់ដៃជាមួយស្ថាប័ននេះស្ថាប័ននោះ ក្នុងពេលចង់ធ្វើសកម្មភាពជួយសង្គម ងាយស្រួលក្នុងការពង្រីកសកម្មភាពផងដែរ។ លោកប្រកាសជំហរថា នឹងមិនឈប់សកម្មភាពរ៉ៃអង្គាស និងចុះជួយដល់ជនខ្វះខាតនោះទេ ដោយលោកប្រកាសជំហរសុខចិត្តបោះចោលការងារបានលុយ តែនឹងយកពេលកៀរគរម្ចាស់ជំនួយជួយដល់ខ្វះខាត ដែលបានស្នើមកឱ្យអស់ពីលទ្ធភាពនោះផង៕

June 29, 2019

ទំហំពាណិជ្ជកម្ម កម្ពុជា-កូរ៉េ ក្នុងឆមាសទី1ឆ្នាំ2019នេះ កើនឡើង85លានដុល្លារ

ទំហំពាណិជ្ជកម្មទ្វេភាគីកម្ពុជា-កូរ៉េ នៅត្រឹមឆមាសទី1នៃឆ្នាំ2019នេះ កើនឡើងប្រមាណ 11.21%ដោយការដោះដូរពាណិជ្ជកម្មរបស់ប្រទេសទាំង2 បានកើនឡើងរហូតដល់ 85លានដុល្លារអាមេរិក។នេះបើយោងតាមការប្រកាសនៅលើបណ្តាញទំនាក់ទំនងសង្គមរបស់ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ។

ឯកឧត្ដម ឡុង ឌីម៉ង់ បានលើកឡើងថា៖“ទំហំពាណិជ្ជកម្មរវាងប្រទេសកម្ពុជា-កូរ៉េ ក្នុងខែ ឧសភា 2019 នេះមានទឹកប្រាក់ចំនួន 85លានដុល្លារ ក្នុងនោះ ប្រទេសកូរ៉េបានធ្វើការនាំចូលមកកាន់កម្ពុជា មានទំហំ63,4លានដុល្លារ កើនឡើង ប្រមាណ11.21%។

ចំណែកកម្ពុជា បាននាំចេញទៅកាន់សាធារណរដ្ឋកូរ៉េ មានទំហំទឹកប្រាក់21,6លានដុល្លារ កើនឡើងប្រមាណ4.38 % បើធៀបទៅនឹងរយៈពេលដូចគ្នា កាលពីឆ្នាំ2018។ ទន្ទឹមនេះកម្ពុជា នៅមានឱនភាពពាណិជ្ជកម្ម ជាមួយកូរ៉េចំនួន41,8លានដុល្លារ នៅក្នុងខែឧសភា កន្លងទៅនេះ”។

ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ឱ្យដឹងថា៖“កិច្ចសហប្រតិបត្តិការយ៉ាងជិតស្និទ្ធ រវាងកូរ៉េខាងត្បូង និងប្រទេសកម្ពុជា គឺមានជាយូរណាស់មកហើយ ជាពិសេស ទៅលើវិស័យពាណិជ្ជកម្មតែម្ដង”។

លោកឧកញ៉ាបានជឿជាក់ថានៅពេលបន្ទាប់ ទំហំពាណិជ្ជកម្ម រវាងប្រទេស ទាំង2នេះ នឹងនៅតែបន្តមានការកើនឡើង ហើយលោកក៏បង្ហាញពីក្ដីសាទរចំពោះលទ្ធផល ដែលទទួលបានពីវិស័យពាណិជ្ជកម្មរបស់ប្រទេសទាំង2នេះ។

លោកឧកញ៉ាបានបន្តទៀតថា ការវិនិយោគរបស់កូរ៉េ មកកាន់កម្ពុជាភាគច្រើន គឺជាការនាំចូលផលិតផលសម្រេចដូចជាសម្ភារសំណង់ គ្រឿងអគ្គិសនី គ្រឿងអេឡិចត្រូនិក គ្រឿងចក្រ យានយន្ត ភេសជ្ជៈ ក្រណាត់ គ្រឿងបន្លាស់ផ្ទះ ផលិតផលប្លាស្ទិក និងសម្ភារប្រើប្រាស់ជាច្រើនប្រភេទ។ ខណៈដែលទីផ្សារនៅកម្ពុជា មានជំនឿជឿជាក់ទៅលើកម្រិតគុណភាពនៃផលិតផលរបស់ប្រទេសមួយនេះ។

ចំណែកការនាំចេញផលិតផលក្នុងស្រុកបច្ចុប្បន្នរបស់កម្ពុជា ដែលបានដឹកជញ្ជូនឆ្ពោះទៅកាន់ប្រទេសកូរ៉េខាងត្បូងវិញភាគច្រើនជាផលិតផលលើវិស័យកាត់ដេរ និងកសិផល រួមមានសម្លៀកបំពាក់ គ្រឿងអេឡិចត្រូនិក ស្បែកជើង កាបូប ជ័រកៅស៊ូ និងឱសថ។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មក្នុងជំនួបជាមួយសមាគមអ្នកនាំចូលកូរ៉េ (KOIMA)កាលពីចុងខែឧសភាកន្លងទៅនេះ ក៏បានស្នើសុំឱ្យ អនុប្រធានសមាគមអ្នកនាំចូលកូរ៉េ KOIMA លោកហ្គូ-ហា ជាំង (Gyu-Ha Jang) ធ្វើការវិនិយោគ លើការប្រើប្រាស់បច្ចេកវិទ្យាថ្មីនឹងផ្តល់អត្ថប្រយោជន៍ ដល់ប្រជាជននៅជនបទ ជាពិសេសអ្នកនៅក្នុងតំបន់ដែលមិនមានអគ្គិសនី និងទឹកស្អាត។

ប៉ុន្តែលោក ហ្គូ-ហា ជាំង បានធ្វើការស្នើសុំលម្អិត និងផែនការអាជីវកម្ម ដើម្បីសម្រួលការពិភាក្សា និងស្វែងរកដៃគូអាជីវកម្ម។ ព្រោះគាត់មានបំណងធ្វើជាដៃគូជាមួយអ្នកវិនិយោគក្នុងស្រុកដើម្បីវត្តមានគម្រោងនេះ។ លើសពីនេះទៅទៀតសហការីរបស់សមាគមលោកមានការចាប់អារម្មណ៍យ៉ាងខ្លាំងក្នុងការពិនិត្យមើលលទ្ធភាពនាំម្រេចខេត្តកំពត ពីប្រទេសកម្ពុជាទៅប្រទេសកូរ៉េ។

ដោយហេតុថា ផលិតផលម្រេចកំពត គឺជាផលិតផលភូមិសាស្ត្រ ដែលល្បីល្បាញ និងមានខ្ពស់ជាងម្រេចផ្សេងទៀត។ប្រទេសកម្ពុជា បានលើកទឹកចិត្តឱ្យក្រុមហ៊ុនកូរ៉េ ទៅទស្សនារោងចក្រម្រេចកំពត ដើម្បីសិក្សាបន្ថែម និងពិនិត្យមើលឱកាសនាំចេញ។

សូមបញ្ជាក់ផងដែរថា យោងលើទិន្នន័យរបស់Korea Eximbank បង្ហាញថាក្នុងចំណោមការវិនិយោគសំខាន់ៗកូរ៉េខាងត្បូងនៅកម្ពុជាមាន29% វិស័យអចលនទ្រព្យ21% ធនាគារ និងហិរញ្ញវត្ថុ18% សំណង់រោងចក្រ15% និងវិស័យកសិកម្ម 4%៕

June 29, 2019

4 ហេតុផលដែលបង្ហាញថា ហេតុអីបានការឱប គឺជារង្វាន់ដ៏ល្អបំផុត?

រាត្រីមួយ ខណៈដែលនាងខ្ញុំស្ថិតនៅជាយក្រុង ប៉ូល ស្វាមីរបស់នាងខ្ញុំបានចូលទៅក្នុងព្រះ-វិហារដែលកូនប្រុសពៅរបស់យើងធ្វើជាអ្នកបួសនៅទីនោះ។ គាត់មានសេចក្ដីសុខខ្លាំងណាស់ ពេលបាននៅជាមួយ អេវ៉ា និងណូលែន ដែលជាចៅតូចៗរបស់យើង។ នៅពេលចប់ការងារ ប៉ូល ក៏ពោលពាក្យលាអ្នកទាំងអស់ ហើយគាត់ដើរតម្រង់ទៅទ្វារចេញ តែមួយភ្លែតនោះក៏បានឮស្នូរជើងតូចៗរបស់ណូលែនតាមពីក្រោយខ្នងគាត់ ព្រមទាំងស្រែកហៅថា “លោកតា! លោកតា! កុំអាលទៅអី! ខ្ញុំចង់ឱ្យលោកតាឱបខ្ញុំម្ដងទៀតបានទេលោកតា មុនបែកគ្នា…”។ ត្រូវហើយ នោះគឺជាអំឡុងពេលដ៏សែនរំភើបចិត្ត និងធ្វើឱ្យនាងខ្ញុំនឹកទៅដល់រង្វាន់នៃការឱប…៖

1. ការឱបធ្វើឱ្យមានអារម្មណ៍ធូរស្រាល
ក្រោយពីឪពុករបស់នាងខ្ញុំធ្វើអត្តឃាត ស្ត្រីប្លែកមុខម្នាក់បានឈានជើងចូលមករកនាងខ្ញុំនិងពោលតិចៗឡើងថា “ឪពុករបស់ខ្ញុំ ក៏ធ្វើដូចគ្នាហ្នឹងដែរ…” បន្ទាប់មក គាត់ក៏ឱបខ្ញុំដើម្បីលួងលោម។

2. ការឱប នឹងជួយបញ្ជាក់ពីអត្ថន័យនូវអ្វីដែលយើងមិនអាចនិយាយចេញមកបាន
កាលពីមិនយូរប៉ុន្មានមកនេះ នាងខ្ញុំទើបនឹងទៅចូលរួមក្នុងពិធីបុណ្យសពបុរសម្នាក់ ដែលមានភាពសំខាន់ខ្លាំងណាស់ជាមួយគ្រួសាររបស់យើង។ មានរឿងរ៉ាវច្រើនណាស់ដែលនាងខ្ញុំចង់និយាយជាមួយក្រុមគ្រួសាររបស់គាត់ តែនាងខ្ញុំបែរជាមិនអាចពោលពាក្យទាំងនោះចេញមកបានឡើយ ក្រៅតែពីការឱបភរិយា និងកូនៗរបស់គាត់…។

3. ការឱប គឺការបង្ហាញពីសេចក្ដីស្រឡាញ់
តើមានអ្វីដែលផ្ដល់នូវអារម្មណ៍បានល្អប្រសើរជាងរង្វង់ដៃឱបរបស់កូនៗ ឬរង្វង់ដៃឱបរបស់ក្រុមគ្រួសារដែរទេ? ក្រោយពីរូបអ្នកត្រឡប់មកពីការធ្វើការងារដ៏សែនធ្ងន់ធ្ងរមួយ? ការឱប មានភាពសំខាន់មិនចាញ់ពាក្យសម្ដីឡើយ។

4. ការឱប នឹងជួយបង្កើនភាពជឿជាក់
ក្នុងចិត្តលោកអ្នកគួរតែឱបរឹតកូន មុនពេលគេទៅសាលារៀន និងនិយាយថា “ម៉ាក់ស្រឡាញ់កូនណា៎ និងមិនថាថ្ងៃនេះនឹងមានអ្វីកើតឡើងនៅឯសាលារៀននោះទេ តែសូមឱ្យកូនដឹងក្នុងចិត្តជាប់ជានិច្ចថា អ្នកនៅឯផ្ទះបារម្ភពីកូនជានិច្ច”។រាល់ថ្ងៃនេះ ការព្យាយាមរបស់នាងខ្ញុំ គឺការរកមនុស្សមកឱបរឹត មិនថាតែមនុស្សចាស់ដែលរស់នៅយ៉ាងឯកា ស្ត្រីជាម្ដាយមេម៉ាយដែលរងបន្ទុកដ៏ធ្ងន់តែម្នាក់ឯង មិត្តសម្លាញ់ដែលបាត់បង់គូស្នេហ៍ ក្មេងៗដែលមិនបានទទួលសេចក្ដីស្រឡាញ់ពីក្រុមគ្រួសារ ក្មេងៗកំព្រា និងអ្នកដទៃទៀតជាច្រើន… ងាយៗ គ្រាន់តែយើងចាប់ផ្ដើមធ្វើវាប៉ុណ្ណោះ ព្រោះការឱប គឺជារង្វាន់ដែលចេញពីបេះដូង និងតែងតែក្លាយជារង្វាន់ដ៏ល្អបំផុតមួយសម្រាប់អ្នកដែលត្រូវការវា៕

June 29, 2019

ជួយកូនឱ្យរៀនយល់ដឹង តាមរយៈការធ្វើកិច្ចការផ្ទះ

លោកឪពុក-អ្នកម្តាយខ្លះអាចនឹងកើតអាការមិនត្រូវចិត្តភ្លាមៗតែម្ដង នៅពេលដែលកូនកំពុងធ្វើកិច្ចការផ្ទះហើយទាក់ ឬរអាក់រអួលក្នុងចំណុចដែលខ្លួនគិតថា “ងាយ” ឬជួនកាលកូនធ្វើខុសដោយសារតែគេមិនទាន់បានសង្កេតឃើញចំណុចអ្វីម្យ៉ាងនោះ ឪពុកម្ដាយក៏ស្រាប់តែបញ្ចេញអាការខឹងដាច់ក្បាល ដាច់កន្ទុយ ធ្វើហាក់ដូចជាអ្វីៗលែងអាចកែខៃបានអុីចឹង។ បណ្ដាលឱ្យបរិយាកាសក្នុងការធ្វើកិច្ចការផ្ទះរបស់កូន ប្រែទៅជាស្រងូតស្រងាត់ដូចគ្នានឹងបេះដូងរបស់កូនដែលត្រូវស្វិតទ្រោមអស់ដែរ។

បើមិនចង់ឱ្យអំឡុងពេលនៃការធ្វើកិច្ចការផ្ទះក្លាយជាអំឡុងពេលដ៏អាក្រក់សម្រាប់ទាំងខ្លួនអ្នក និងកូនសម្លាញ់របស់អ្នកនោះពេលនេះទស្សនាវដ្តី ឡារ៉ែន មានអត្តបទស្រាវជ្រាវវិភាគមួយដែលនឹងណែនាំអំពីវិធីធ្វើឱ្យម៉ោងធ្វើកិច្ចការផ្ទះរបស់កូនក្លាយជាម៉ោងនៃការរៀនយល់ដឹងដ៏ល្អមកជម្រាបជូន ព្រោះអ្នកវិភាគស្រាវជ្រាវបានរកឃើញថា ការដែលឪពុកម្តាយ “សម្លឹងមើលអ្វីជុំវិញខ្លួនក្នុងន័យល្អ ចិត្តត្រជាក់ៗ ផ្តល់នូវការគាំទ្រ និងផ្តល់នូវតម្លៃចំពោះការរៀនយល់ដឹង” នោះវានឹងក្លាយទៅជាជំនួយដ៏សំខាន់មួយដែលធ្វើឱ្យកុមារ “បានរៀនចេះដឹង” យ៉ាងពិតៗពីទម្រង់ហ្វឹកហាត់ទាំងអស់នោះ។
ផ្ទុយទៅវិញ ការដែលឪពុកម្តាយសម្លឹងឃើញកិច្ចការផ្ទះរបស់កូនគ្រាន់តែជាអ្វីមួយដែលត្រូវធ្វើឱ្យតែរួចៗពីដៃ ឬក៏ដាច់ខាតត្រូវតែធ្វើចេញមកឱ្យបានល្អស្អាតជ្រុលពេក លើសសមត្ថភាពរបស់ក្មេង(ដោយការបញ្ជាឱ្យសរសេតាម ឬឪពុកម្តាយធ្វើជំនួស) ដើម្បីឱ្យបានពិន្ទុល្អៗពីលោកគ្រូនោះ ទាំងអស់នេះគឺជាការទាញកូនឱ្យធ្លាក់ក្នុងរង្វង់នៃការរៀនសូត្រដែលមិនត្រឹមត្រូវទៅវិញទេ។
ការវិភាគស្រាវជ្រាវមួយនេះបានសិក្សាពីការប្រព្រឹត្តរបស់កុមារថ្នាក់បឋមទី4 ហើយនិងអាណាព្យាបាលចំនួន135នាក់ដោយអ្នកស្រាវជ្រាវមកពីមហាវិទ្យាល័យ Bengurion ប្រទេស អុីស្រាអែល ដែលលោកវេជ្ជបណ្ឌិត Idit Kartz ជាម្ចាស់នៃការងារវិភាគស្រាវជ្រាវនេះបានរៀបរាប់ថា ៖
“ឪពុកម្តាយអាចបង្កើតទំនោរចិត្តដល់កូនក្នុងការធ្វើកិច្ចការផ្ទះបានដោយការយល់ព្រមឱ្យកូនៗធ្វើកិច្ចការផ្ទះដោយខ្លួនឯង មិនចូលទៅលូកលាន់ជ្រុលហួសពេក រួមទាំងមើលរំលងការខុសឆ្គងបន្តិចបន្តួចរបស់កូនខ្លះផង បើវាជាការធ្វើឱ្យកុមារសប្បាយរីករាយក្នុងការធ្វើកិច្ចការផ្ទះរបស់គេនោះ។
ក្រៅពីនោះ ការរៀបចំបរិយាកាសខាងក្នុងផ្ទះឱ្យមានភាពទាក់ទាញដល់ការចង់ធ្វើកិច្ចការផ្ទះរបស់កុមារ គឺជារឿងល្អប្រសើរមួយ ព្រោះបើបរិយាកាសល្អ មានឧបករណ៍សម្រាប់រៀនគ្រប់គ្រាន់ កុមារនឹងមានអារម្មណ៍ថា មានចិត្តចង់រៀន ចង់ធ្វើជាមិនខាន៕

June 29, 2019

កំឡោះសង្ហា 2 នាក់តាមស្នេហ៍ក្នុងពេលតែមួយ « មួយណាទៅគូព្រេងខ្ញុំ» ដាក់បញ្ចាំងហើយ...

អ្នកណាទៅនឹកស្មានទៅថា រឿងរ៉ាយស្នេហារបស់នាង ភិពួន ជាគិលាននុបដ្ឋាយិកផ្នែកសរសៃប្រាសាទស្ដារសារតីនៃជំងឺខួរក្បាល ដែលទើបតែធូរស្រាលពីជំងឺស្នេហាខូចចិត្តរបស់ខ្លួននាង មិនយូរប៉ុន្មានក៏ជួបជាមួយអ្នកតាមមកយកចិត្តទុកដាក់ព្យាបាលផ្លូវចិត្តរបស់នាងទៅ។ ដោយសារតែនាងជាទេពធីតាមានសម្រស់ស្រស់ស្អាតលំដាប់ដាច់គេក្នុងតំបន់ ទើបបណ្ដាលឱ្យគូព្រេងរបស់នាងបង្ហាញមុខម្ដងពីរនាក់ក្នុងពេលតែមួយ។ មនុស្សដំបូងគឺ ស៊ីហូ វិស្វករសង្ហា មានក្រុមហ៊ុនផ្ទាល់ខ្លួន ហើយបានមកជួបនាងដោយចៃដន្យនៅតាមផ្លូវ ខណៈដែលខ្លួនកំពុងតែមកត្រួតពិនិត្យការងារនៅតាមផ្លូវក្បែរមន្ទីរពេទ្យនាងធ្វើការ។

គូព្រេងទី ២ គឺ ជិ ឡ ម្ចាស់ហាងសង្ហាហើយក្មេងបើកលក់អាហារកុម្មង់មួយកន្លែងនៅក្នុងតំបន់នោះដែរ តែភាគច្រើនម៉ើងមាត់ជាមួយការងារ និងពូកែយកចិត្តរឿងស្នេហា។ រឿងរ៉ាវស្នេហារវាងអ្នកទាំង ៣ ត្រូវបានកើតឡើងដោយសភាពរញ៉េរញ៉ៃដូចរទេះភ្លើងបិះនឹងបុកគ្នាម្ដងៗ។ យ៉ាងណាមិញ កំឡោះសង្ហាទាំង២ គឺមានមិត្តភក្ដិរួមតុជល់កែវម្នាក់ទៀត ដែលជាអ្នកចម្រៀងនៅក្នុងហាងកម្សាន្ដពេលរាត្រី។ ឱ្យតែមានរឿងខូចចិត្ត ឬរឿងចែចង់ស្រីៗម្ដង កំឡោះសង្ហាទាំង ២ នាក់នេះ តែងតែមកនិយាយប្រាប់អ្នកចម្រៀងនោះហើយ។

មានថ្ងៃមួយស្រាប់តែជាថ្ងៃបង្ហាញមុខស្រីស្នេហ៍ ( អូ! សង្សារទេ...ហិហិហិ ) រៀងៗខ្លួន ទាំងបុរសសង្ហា ស៊ីហូ និងចុងភៅសម្បូរស្នេហ៍ ជិ ឡ ។ តើហ្វេនៗទាំងអស់គ្នាដឹងទេថា មានរឿងអ្វីកើតឡើង បើគូព្រេងមកជួបគ្នាម្ដងទៅ ២នាក់បែបនេះ។ រទេះភ្លើងបុកគ្នាមែនទេ? តែអ្វីដែលអ្នកកំពុងគិត គឺអាច 50 % ត្រូវ 50 % ហួសចិត្ត។ កុំឱ្យរំលងភាពយន្ដនោះឱ្យសោះ ដែលមានដាក់បញ្ចាំងនៅក្នុងរោងភាពយន្ដ Major Cineplex គ្រប់សាខា ចាប់ពីថ្ងៃ 28 ខែមិថុនា នេះតទៅហើយ៕

https://youtu.be/GOWSPJvhH6Q

June 28, 2019

Category: សង្គម និងសេដ្ឋកិច្ច