បន្លែ និងផ្លែឈើលក់នៅតាមទីផ្សារបច្ចុប្បន្ន ដែលភាគច្រើននាំចូលពីប្រទេសជិតខាង ត្រូវបានក្រសួងកសិកម្មផ្សព្វផ្សាយជារឿយៗ ឱ្យប្រជាពលរដ្ឋប្រុងប្រយ័ត្នអំពីបន្លែ និងផ្លែឈើទាំងនោះដែលអាចប្រើជាតិគីមីខ្ពស់ ធ្វើឱ្យប៉ះពាល់ដល់សុខភាព ដូច្នេះប្រជាកសិករ ត្រូវតែខិតខំជំរុញការដាំដុះបន្លែសុវត្ថិភាព ដែលអាចជួយជំរុញផ្នែកកសិកម្មផង និងជួយបង្កើនបន្លែសុវត្ថិភាពសម្រាប់ទីផ្សារក្នុងស្រុក ថែមទាំងទប់ស្កាត់ការនាំចូលនូវបន្លែមានជាតិគីមីផងដែរ។
យ៉ាងណាមិញកសិផលក្នុងស្រុក ដែលប្រជាកសិករមានការយល់ដឹងអំពីការដាំដុះមិនប្រើជាតិគីមី ឬបន្លែសុវត្ថិភាព ក៏ត្រូវបានដាក់លក់នៅលើទីផ្សារជាច្រើនប្រភេទរួមមានបន្លែប្រភេទស្ពៃសាលាដខាត់ណា ស្ពៃក្តោប ស្ពៃចង្កឹះ ត្រឡាច ននោង ត្រសក់ម្រះ ប៉េងប៉ោះ ត្រប់ និងម្ទេសជាដើម ពិសេសដំណាំត្រប់វែង ត្រប់ចាន(ត្រប់ក្រាំងរមាស) ដែលនៅតែមានតម្រូវការទីផ្សារជាប្រចាំ គួរឱ្យកត់សម្គាល់។
លោក ទួត សេងហ័ង ជាអ្នកទីផ្សាររបស់“សហគមន៍ ត្រសក់ផ្អែមសៀមរាបមានជ័យ”បាន ប្រាប់កាសែតឡារ៉ែន ពាណិជ្ជឱ្យដឹងថា៖“សហគមន៍ខ្ញុំដែលមានទីតាំងក្នុងភូមិតាព្រហ្ម ឃុំសង្វើយ ស្រុកជីក្រែង ខេត្តសៀមរាបមានការដាំបន្លែគ្រប់ប្រភេទ គឺដូចជាដាំបន្លែឆៃថាវ ត្រសក់ ស្ពៃ ត្រឡាច ល្ហុង ត្រប់ ម្ទេសគ្រប់ប្រភេទ ជាពិសេសគឺ ដំណាំត្រប់វែង ត្រប់ចាន នេះតែម្តង ព្រោះវានៅតែមានតម្រូវការទៅតាមទីផ្សារច្រើន ដោយការដាំមានរយៈពេលខ្លី និងងាយឆាប់បានទទួលផលទៀតផង។
លោកបានបន្តឱ្យដឹងថាការដាំត្រប់វែង និងត្រប់ចាននេះគឺប្រើរយៈពេល3-3ខែកន្លះទាំងការសាបព្រោះ និងដាំកូន។ ការព្រោះគ្រាប់ពូជត្រប់ ត្រូវបានប្រជាកសិករយើង ជ្រើសរើសយកគ្រាប់ពូជណា ដែលសុទ្ធល្អ ជ្រើសរើសពីផ្លែត្រប់ណាដែលទុំល្អ និងប្រភេទពូជ ដែលមានតម្រូវការទីផ្សារខ្ពស់។ ដោយដាក់បណ្តុះគ្រាប់ពូជក្នុងកន្ទោងសម្រាប់យកដាំ និងបន្ទាប់មកជ្រើសរើសកូន ដែលថ្លោសៗល្អមកដាំ។
លោកបានបញ្ជាក់ថា មុនពេលដាំយើងភ្ជួរ2ទៅ3ដង ដើម្បីកម្ចាត់ស្មៅ និងឱ្យដីធូរដោយលើកជារង ទទឹងប្រមាណ 6តឹក កម្ពស់ 2តឹក បណ្តោយតាមទំហំដី ហើយត្រូវកាប់រណ្តៅដាំដែលមានទំហំ 2តឹក4ជ្រុង ជម្រៅ 2តឹក ចន្លោះពីដើមនីមួយៗកន្លះម៉ែត្រ ។ពេលដាំត្រូវដាក់ជីកំប៉ុស ជីលាមកសត្វស្ងួត និងកម្ទេចស្លឹកឈើចូល រួចយកដីលុបរណ្តៅ។
ការដាំដុះ យកកូនត្រប់ដែលថ្លោសល្អ និងមានសុខភាពល្អដែលមានស្លឹកដុះ4-5មកដាក់ដាំក្នុងរណ្តៅរួចស្រោចទឹកឱ្យសើមល្មម។ ចំណេកនៅក្នុងការថែទាំវិញ ត្រូវស្រោចទឹករាល់ 3ថ្ងៃម្តង បើមានភ្លៀងញឹកញាប់មិនស្រោចក៏បាន។
រដូវដាំត្រប់ គឺគេដាំចាប់ពីខែឧសភា ដល់ខែធ្នូ ពេញ1រដូវ ដែលជាអាយុកាលរបស់វា។ នៅក្នុងផ្ទៃដីទំហំ20×50ម៉ែត្រអាចដាំត្រប់វែង និងត្រប់ចានបានបរិមាណចាប់ពី 20គីឡូឡើងទៅដល់ 90គីឡូ ដោយបេះផ្លែវាក្នុង 1អាទិត្យ 3ដង ហើយបរិមាណនេះ នៅពេលដែលដើមវាចាស់ អាចនឹងទទួលទិន្នផលថយចុះវិញ។
លោកសេងហ័ងបានឱ្យដឹងថាការដាំត្រប់វែង និងត្រប់ចានតែរយៈពេល3ខែកន្លះ នឹងទទួលផលហើយ បើតាមបទពិសោធ ក្រោយពេលដាំ រយៈ-ពេលពី 3ខែ ទៅ 3ខែកន្លះ យើងទទួលផល និងបេះជាប្រចាំរហូតដល់ 3ទៅ 5ខែ។
លោកបានឱ្យដឹងទៀតថា មន្ត្រីកសិកម្មបានជួយណែនាំក្នុងការដាំឱ្យទទួលបានផលល្អ និងមិនសូវនឿយ ហើយដំណាំត្រប់នេះ បានធ្វើឱ្យជីវភាពធូរធារ ដោយការដាំប្រើរយៈពេលខ្លី ចំណេញពេលវេលា ដូច្នេះហើយទើប លោកសេងហ័ងបានអំពាវនាវឱ្យប្រជាកសិករខ្មែរ ងាកមកដាំបន្លែត្រប់វែង និងត្រប់ចាននេះវិញ ព្រោះផ្លែត្រប់ ជាប្រភេទបន្លែសម្រាប់ចម្អិនជាសម្ល និងជាអន្លក់ក៏បានដែរ។ ត្រប់វែង និងត្រប់ចាន ជាប្រភេទបន្លែដែលវាងាយទទួលផល មានតម្រូវការជាប្រចាំក្នុងទីផ្សារ និងជួយលើកស្ទួយទៅដល់ជីវភាពប្រចាំថ្ងៃ។
អ្នកទីផ្សារសហគមន៍រូបនេះបានឱ្យដឹងថា៖“សហគមន៍ត្រសក់ផ្អែមសៀមរាបមានជ័យរបស់ខ្ញុំភាគច្រើន ដែលមានដីទំហំតូចៗត្រឹមកន្លះហិកតា ក្នុង1គ្រួសារប៉ុណ្ណោះ តែពួកគាត់បានរួមគ្នាដាំត្រប់វែង និងត្រប់ចាន មានផ្ទៃដីសរុបប្រមាណជាង1០ហិកតានៅក្នុងមូលដ្ឋានរបស់ខ្លួន តែក៏មានការដាំត្រឡាចក្នុងចន្លោះនៃបន្លែនោះផងដែរ”។
លោកបញ្ជាក់ថា៖“បើថែទាំបានល្អ ក្នុងទំហំដីដាំត្រប់ជាង10ហិកតានេះ គឺក្នុង1ថ្ងៃទទួលផលបានពី700-800គីឡូក្រាមដែរ ពោលគឺក្នុង1ខែថវិកាបានពីការលក់បន្លែត្រប់វែង និងត្រប់ចាន ក្នុងទឹកប្រាក់ប្រមាណ 36លានរៀល ដោយលក់ក្នុង1គីឡូក្រាម តម្លៃពី 1000ទៅ 1500រៀល ហើយឈ្មួញទៅទទួលទិញដល់ទីតាំងតែម្តង។កាលពីរដូវខ្សត់បន្លែត្រប់នេះ កសិករយើងអាចលក់បានតម្លៃដល់ទៅ 2000រៀលឯណោះក្នុង 1គីឡូក្រាម”។
លោកបានបន្តថា ត្រប់វែង និងត្រប់ចាន របស់លោកបច្ចុប្បន្ន មានតែការចែកចាយតាមទីផ្សារក្នុងស្រុក និងតាមទីផ្សារក្នុងខេត្តសៀមរាប(ផ្សារសាមគ្គី)ផ្សាររលួស ផ្សារកំពង់ក្តី។
នៅក្នុងមហិច្ឆតា នៃការធ្វើចម្ការដំណាំបន្លែត្រប់នេះ លោក សេង ហ័ង បានបញ្ជាក់ឱ្យដឹងដែរថា៖“សហគមន៍របស់លោក ពុំទាន់មានបំណងពង្រីកការដាំដុះបន្លែត្រប់វែង និងត្រប់ចាន បន្ថែមទៀតនៅឡើយទេ ដោយពុំទាន់មានផ្ទៃដីសម្រាប់ពង្រីកដំណាំនេះ”៕
