សង្គម និងសេដ្ឋកិច្ច - La Reine Media

ចុងឆ្នាំនេះប្រជាជនខ្មែរអាចប្រើប្រាក់រៀលនៅក្នុងប្រទេសថៃបានយ៉ាងងាយតាមរយៈ QR Code

ក្នុងសម័យនៃបដិវត្តន៍ឧស្សាហកម្មទី4 នេះ ពិភពលោកចាប់ផ្តើមប្រើប្រាស់បច្ចេកវិទ្យាកាន់តែច្រើនឡើង ដោយក្នុងនោះបច្ចេកវិទ្យាហិរញ្ញវត្ថុ (Fintech)ក៏កំពុងចាប់ផ្តើមរីកលូតលាស់យ៉ាងលឿនពី 1ថ្ងៃទៅ 1ថ្ងៃផងដែរ។ នៅកម្ពុជា បណ្តាធនាគារធំៗជាច្រើនបានចាប់ផ្តើមប្រើប្រាស់បណ្តាញបច្ចេកវិទ្យាក្នុងការទូទាត់សាច់ប្រាក់ជាមួយនឹងក្រុមហ៊ុន ឬដៃគូពាណិជ្ជកម្មនៅក្នុងស្រុក។ រហូតមកដល់ពេលថ្មីៗនេះក្រោមការផ្ចុងផ្តើមនិងសម្របសម្រួលពីធនាគារជាតិនៃកម្ពុជា និងធនាគារកណ្តាលថៃ បានជំរុញឱ្យបណ្តាញធនាគារធំៗមួយចំនួននៅកម្ពុជា បង្កើតកិច្ចសហការទូទាត់សាច់ប្រាក់ឆ្លងប្រទេសតាមរយៈប្រព័ន្ធ QR Code ដើម្បីសម្រួលដល់តម្រូវការនៃប្រទេសទាំង2។

លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា បានបញ្ជាក់ថា ការដាក់ឱ្យប្រើប្រាស់ប្រព័ន្ធទូទាត់សាច់ប្រាក់រៀល និងប្រាក់បាតតាមប្រព័ន្ធ QR Code នេះបានផ្តល់ផលប្រយោជន៍ជាច្រើនដល់ប្រទេសកម្ពុជា ដោយក្នុងនោះវានឹងជំរុញការប្រើប្រាស់រៀលកាន់តែប្រសើរឡើង ព្រោះបច្ចុប្បន្ននេះប្រសិនបើមិនជំរុញបែបនេះទេ ប្រជាជននឹងនៅតែប្រើប្រាស់ប្រាក់ដុល្លារ ឬប្តូរជាប្រាក់បាតដើម្បីប្រើប្រាស់នៅប្រទេសថៃដដែល។ ក្រៅពីនេះ QR Code អាចប្រើប្រាស់បានលុះត្រាតែប្រជាជនមានគណនេយ្យជាប្រាក់រៀលជាមុនសិន ទើបអាចទូទាត់នៅប្រទេសថៃបាន។ ក្រៅពីនេះ វាក៏ជួយសម្រួលផងដែរដល់អតិថិជនក្នុងការទូទាត់ប្រាក់ ព្រោះអតិថិជនអាចទូទាតត់ដោយងាយស្រួល មិនចាំបាច់កាន់សាច់ប្រាក់សុទ្ធតាមខ្លួនដែលអាចប្រឈមនឹងហានិភ័យនៃការបាត់បង់នោះទេ។ លើសពីនេះទៅទៀត ការធ្វើបែបនេះក៏នឹងអាចកាត់បន្ថយហានិភ័យអត្រាប្តូរប្រាក់បានផងដែរ ព្រោះកាលណាប្តូរប្រាក់ គឺធ្វើឱ្យខាតបង់ការកាត់ទឹកនៅពេលប្តូរ ហើយចាយមិនអស់ ក៏ត្រូវខាតម្តងទៀតនៅពេលប្តូរត្រឡប់មកវិញ។ ម្យ៉ាងវិញទៀត ការប្រើប្រាស់ QR Code វិញយើងមិនបាច់ប្តូរចុះប្តូរឡើងទេ គឺអាចចាយបានដោយសេរី។

លោកជំទាវ ជា សិរី បានមានប្រសាសន៍ថា៖ “ការទូទាត់តាមរយៈ QR Code រវាងកម្ពុជា និងថៃនេះនឹងអាចចាប់ផ្តើមនៅចុងឆ្នាំ2019 នេះ ព្រោះការងារធំៗយើងបានសម្រេចរួចអស់ទៅហើយ”។

លោកជំទាវ បានលើកឡើងផងដែរថា ការទូទាត់សាច់ប្រាក់ដោយប្រើប្រាស់ QR Code នេះមិនតម្រូវឱ្យប្រជាជនបង់ថ្លៃសេវាទូទាត់នោះទេ ព្រោះយើងធ្វើតាមរយៈធនាគារ នឹងធនាគារ។ ចំណែកឯអត្រាប្តូរប្រាក់នៃការទូទាត់វិញ គឺធនាគារ នឹងធនាគារ គេនឹងប្តូរឱ្យនៅពេលទូទាត់នោះតែម្តង តាមប្រព័ន្ធច្បាស់លាស់ ហេតុនេះប្រជាជននៃប្រទេសទាំង2 នឹងមានលក្ខណៈងាយស្រួលក្នុងការទូទាត់សាច់ប្រាក់ជាមួយគ្នា។ ការធ្វើបែបនេះអាចជួយដល់សេដ្ឋកិច្ចឱ្យមានការរីកលូតលាស់បានល្អប្រសើរផងដែរ ព្រោះប្រជាជន និងប្រជាជន អាចចរាចរសាច់ប្រាក់របស់ខ្លួនដោយងាយ ដែលធ្វើឱ្យទំហំនៃការផ្លាស់ប្តូរទំនិញ ឬចាយវាយកើនឡើង។ក្រៅពីនេះ វាក៏អាចងាយស្រួលផងដែរចំពោះការទាក់ទាញភ្ញៀវទេសចររវាងប្រទេសទាំង2។

ធនាគារចំនួន 3 នៅកម្ពុជាដែលស្ថិតក្នុងគម្រោងនៃការទូទាត់ប្រាក់រវាងកម្ពុជា និងថៃតាមរយៈ QRCode នេះ មានដូចជា ធនាគារអេស៊ីលីដា ធនាគារពាណិជ្ជកម្មក្រៅប្រទេស និងធនាគារកម្ពុជាពាណិជ្ជ។

គួរបញ្ជាក់ផងដែរថា បច្ចុប្បន្ននេះការប្រកួតប្រជែងបច្ចេកវិទ្យាហិរញ្ញវត្ថុ (Fintech) បានជំរុញឱ្យធនាគារទាំងក្នុងស្រុក និងក្រៅស្រុកជាច្រើនចាប់ផ្តើមបង្កើតសេវាកម្មបន្ថែមដោយឥតគិតថ្លៃតាមរយៈទូរស័ព្ទដៃ (Mobile Apps) ឬតាមរយៈបណ្តាញអុិនធើណិត ដើម្បីទាក់ទាញអតិថិជន និងសម្រួលដល់ការទូទាត់សម្រាប់អតិថិជនដោយមិនចាំបាច់កាន់សាច់ប្រាក់ផ្ទាល់នោះទេ។ ការធ្វើបែបនេះនឹងធ្វើឱ្យការទូទាត់កាន់តែមានភាពងាយស្រួល ទូលំទូលាយ តែក៏ជាកត្តាប្រឈមផងដែរសម្រាប់ប្រជាជន ព្រោះថា ប្រសិនបើយើងមិនអាចគ្រប់គ្រងការចាយវាយបានល្អទេនោះ ចរន្តទឹកប្រាក់របស់យើងក្នុង 1ខែៗនឹងហូរចេញយ៉ាងលឿនជាមួយភាពងាយស្រួល និងឆាប់រហ័សនៃការទូទាត់នេះផងដែរ៕

July 5, 2019

ទស្សនៈពីការត្រៀមខ្លួនរបស់កម្ពុជា ក្នុងការចូលមកដល់របស់បដិវត្តន៍ឧស្សាហកម្មទី4

មជ្ឈមណ្ឌលអភិវឌ្ឍន៍កម្ពុជាបានរៀបចំកម្មវិធីកិច្ចសន្ទនាដោយមានការពិភាក្សារួមគ្នាពីសំណាក់វាគ្មិនល្បីៗចំនួន 4រូប និងមានការចួលរួមពីវាគ្មិនមកពីស្ថាប័នរដ្ឋ និងឯកជនលើប្រធានបទស្ដីពី “កម្ពុជាឧស្សាហកម្ម4.0”។

កិច្ចពិភាក្សាស្ដីពី “កម្ពុជាឧស្សាហកម្ម4.0” ធ្វើឡើងក្នុងគោលបំណងបង្កើនការយល់ដឹងដល់ប្រជាជនកម្ពុជា ពិសេសសិស្ស-និស្សិតអំពីឧស្សាហកម្ម4.0 និងចូលរួមចំណែកដល់ការអភិវឌ្ឍគោលនយោបាយប្រទេសកម្ពុជា ឆ្ពោះទៅរកយុគសម័យថ្មីនៃភាពរីកចម្រើនរបស់បច្ចេកវិទ្យា។

សូមជម្រាបថា បដិវត្តន៍ឧស្សាហកម្មទី4 អាចឆ្ពោះមកបាន ក៏មានការឆ្លងកាត់នូវបដិវត្តន៍ឧស្សាហកម្មទី1 ទី2 និងទី3។ ដោយបដិវត្តន៍ឧស្សាហកម្មទី1កើតឡើងរវាងឆ្នាំ1760 និងឆ្នាំ1840 ហើយផលិតកម្មមេកានិកបង្ហាញខ្លួនលើកដំបូង តាមរយៈការបង្កើតម៉ាស៊ីនដើរដោយចំហាយទឹកគួបផ្សំជាមួយនឹងការប្រើប្រាស់ផ្លូវរថភ្លើង។ បដិវត្តន៍ឧស្សាហកម្មទី2 បង្ហាញខ្លួននៅចុងសតវត្សរ៍ទី19 តាមរយៈរបកគំហើញថាមពលអគ្គិសនី និងការបង្កើតខ្សែចង្វាក់ផលិតកម្មក្នុងរោងចក្រ និងបដិវត្តន៍ឧស្សាហកម្មទី3 បានកើតឡើងផ្អែកលើកការអភិវឌ្ឍន៍ផ្នែកបច្ចេកវិទ្យា ប្រព័ន្ធអ៊ីនធើណិត ព័ត៌មានវិទ្យា (IT) សឺមីកុងឌុចទ័រ និងកុំព្យូទ័រភាវូបនីយកម្ម។

លោកស្រី ចម និមល រដ្ឋលេខាធិការក្រសួងពាណិជ្ជកម្ម បានលើកឡើងថា ក្នុងក្របខ័ណ្ឌក្រសួងពាណិជ្ជកម្ម ក៏បាននិងកំពុងត្រៀមខ្លួនរួចជាស្រេច ដើម្បីទទួលយកនូវឧស្សាហកម្ម4.0នេះ ព្រមទាំងមានទិសដៅ2 ធំៗ ដោយក្នុងនោះទិសដៅទី1 បានអនុវត្តរួចមកហើយ ហើយទី2-កំពុងអនុវត្តក្នុងពេលឆាប់ៗនេះ។

លោកស្រីបន្ដថា៖“ទិសដៅទី1 ដែលក្រសួងពាណិជ្ជកម្មបានរៀបចំនោះគឺ ការចុះបញ្ជីអនឡាញទាំងការចុះបញ្ជីកម្មសិទ្ធិបញ្ញា ការចុះបញ្ជីអាជីវកម្មព្រមទាំងអាជ្ញាប័ណ្ណនាំចេញផ្សេងៗ ខាងក្រសួងពាណិជ្ជកម្មបាននិងកំពុងរៀបចំប្រព័ន្ធអនឡាញដែលអាចទទួលបានការឆ្លើយតប ការដាក់ពាក្យ និងការឆ្លើយតបបែបរហ័សក្នុងរយៈពេល 1-3ថ្ងៃនៃថ្ងៃធ្វើការ”។

ក្រៅពីការសម្រួលទាំងនេះ ក្រសួងបានរៀបចំប្រតិភូកាន់អំណាចដល់អាជ្ញាធរថ្នាក់ក្រោមជាតិ ដើម្បីឱ្យុពួកគាត់មានលទ្ធភាពក្នុងការជួយពង្រីកការបណ្ដុះបណ្ដាលពីរបៀបរបបនៃការចុះបញ្ជី ដើម្បីសម្រួលដល់អាជីវកម្មទូទាំងប្រទេស។

លោកស្រីបានបញ្ជាក់ថា៖“ចំណែកទិសដៅទី2 គឺជាការរៀបចំប្រព័ន្ធអនឡាញក្នុងក្រសួងតែម្ដងគឺជាប្រព័ន្ធមួយសម្រាប់ឆែករបាយការណ៍សម្រាប់ការវិវឌ្ឍរបស់អង្គភាពនីមួយៗ ក្រោមស្ថាប័នពាណិជ្ជកម្មទាំងមូល ដូចជារបាយការណ៍របស់អគ្គនាយកដ្ឋាន នៃអគ្គនាយកដ្ឋានពាណិជ្ជកម្មក្រៅប្រទេស ពាណិជ្ជកម្មក្នុងប្រទេសថា តើពួកគាត់បានដំណើរការដល់ណា ឬវិវឌ្ឍយ៉ាងណាបន្ថែមទៀត?“។

លោក ជី សិលា នាយកប្រតិបត្តិក្រុមហ៊ុនសប្បាយ ឌីជីថល បានឱ្យដឹងថា ;“សម្រាប់គំនិតខ្ញុំៗគិតថា បដិវត្តន៍ឧស្សាហកម្ម4.0នេះ នឹងផ្ដល់ភាពងាយស្រួលខ្លាំងមែនទែន ដែលអាចនិយាយបានថា មិនចាំបាច់ឱ្យមនុស្សនិយាយទេ ត្រឹមតែគិតក៏អាចផ្ដល់ទៅដល់បាន ប៉ុន្ដែសម្រាប់ភាពកាន់តែងាយស្រួលនេះ ក៏មានផលអវិជ្ជមានបន្ដិចផងដែរ គឺកាន់តែងាយស្រួល តែធ្វើឱ្យមនុស្សកាន់តែខ្ជិល”។

លោក អ៊ុង លុយណា អគ្គនាយករងនៃអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ការចូលមកររបស់ឧស្សាហកម្ម4.0 នេះនឹងជួយដល់វិស័យសេដ្ឋកិច្ចជាតិច្រើន។ ជាក់ស្ដែងដូចក្នុងវិស័យកសិកម្មអាចធ្វើឱ្យមានឱកាសក្នុងការ-បង្កើនផលិតភាពរបស់យើង ឧទាហរណ៍ថា ពីមុនយើងធ្វើស្រែចម្ការបានទិន្នផលទាប ប៉ុន្ដែពេលឧស្សាហកម្ម4.0ចូលមក នឹងធ្វើឱ្យផលិតផលកសិកម្មហ្នឹងកាន់តែល្អប្រសើរឡើង។ លោកបន្ដថា ចំណែកឯការគ្រប់គ្រងរបស់រាជរដ្ឋាភិបាលវិញ ក៏កាន់តែងាយស្រួលផងដែរ ដោយរាជរដ្ឋាភិបាលគ្រប់គ្រង និងការបែងចែកធនធាន កាន់តែមានប្រសិទ្ធភាពជាងមុនជាដើម។

ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ធ្លាប់បានមានប្រសាន៍ថា៖“សម្រាប់បណ្តាប្រទេសកំពុងអភិវឌ្ឍន៍ដូចជាកម្ពុជា បច្ចេកវិទ្យាថ្មី ផ្តល់ឱកាសដល់ការលោតទម្លាក់ដំណាក់កាលប្រពៃណី នៃការអភិវឌ្ឍ។ ក្នុងបរិបទនៃសកលភាវូបនីយកម្ម និងសមាហរណកម្មសកលលោក កម្ពុជាពិតជាមិនអាចចៀសវាងផលប៉ះពាល់នៃបដិវត្តន៍ឧស្សាហកម្ម 4.0 បានទេ ហើយទាមទារឱ្យរដ្ឋាភិបាលផ្តោតលើការចាប់យកឱកាសក៏ដូចជាគ្រប់គ្រងហានិភ័យផងដែរ”៕

July 5, 2019

ការបង្ហាញម៉ូដនាឡិកា លេខ 134

July 5, 2019

ម៉ូដសម្លៀកបំពាក់នារីម៉ាក LOOKSWOMEN លេខ 134

July 5, 2019

តារាល្បីៗបង្ហាញវត្តមានថ្ងៃពិសេសរបស់អ្នកដឹកនាំសម្តែង

កាលពីយប់មិញនេះតារាជាច្រើនដួងបានបង្ហាញវត្តមានយ៉ាងស្រស់សោភានាថ្ងៃខួបកំណើតរបស់អ្នកដឹកនាំសម្តែងលោកយ៉េប រ៉ូហ្វាតនាហាងជេកឃុនក្បែរង្វង់មូលផ្សារដើមថ្កូវរាជធានីភ្នំពេញ។ការចូលរួមនេះធ្វើឲសាមីកម្មវិធីរីករាយជាខ្លាំង។

លោកយ៉េប រ៉ូហ្វាតដែលជាម្ចាស់ខួបកំណើតបានឲដឹងថាលោករីករាយដែលបានឃើញសិល្បករទាំងអស់និងភ្ញៀវកិត្តិយសបានចំណាយពេលចូលរួមជូនពរលោកគ្រប់គ្នាថ្ងៃពិសេសនេះ។ លោកថានេះជាលើកទី២ដែលរៀបចំកម្មវិធីធំថ្ងៃកំណើតដោយសារចង់ជួបជុំមិត្តសិល្បករឲសប្បាយម្តងក្រោយធ្វើការច្រៀងសម្តែងកន្លងមក។

តារាដែលចូលរួមមាន៖ ប៉ែន សារ៉ាវ ជួន អមរិទ្ឋ សុខ មុនីរក្សា ញឹម ចាន់ថន អុិន ច័ន្ទរតនា អ៊ុង សុវណ្ណារិទ្ឋិ អោក សុម៉ាវត្តី ជ័យ សុវ៉ាត ម្ចាស់ហាងលោកជេក ឃុន កញ្ញាដាលីសព្រមទាំងតារាច្រើនដួងទៀត។

July 5, 2019

ចិនត្រៀមបង្ហោះផ្កាយរណបសង្កេតផែនដី បញ្ជាដោយប្រព័ន្ធ AI ទាំងអស់

របាយការណ៍របស់ទូរទស្សន៍ CCTV បានបង្ហាញឱ្យឃើញថា រដ្ឋាភិបាលក្រុងប៉េកាំងគ្រោងនឹងដាក់ផ្កាយរណបសង្កេតផែនដីចំនួន 192ដួង ចូលទៅក្នុង “ក្រុមផ្កាយ” នៅឆ្នាំ2021 ដែលគេស្គាល់ឈ្មោះថា Xing shi dai។

ទូរទស្សន៍នេះបានឱ្យដឹងពីប្រភពមួយដែលបាននិយាយថា “វាមានសុវត្ថិភាពក្នុងការនិយាយថាផ្កាយរណបនៅតែជាឧបករណ៍គ្រប់គ្រងពីចម្ងាយ។ នោះមានន័យថា ពួកវាពុំមានមុខងារបញ្ជាដោយស្វ័យប្រវត្តិទេ។ គេរំពឹងថា ក្រុមអ្នកបង្កើតនឹងបំពាក់ប្រព័ន្ធបង្ហោះផ្កាយរណប Leo ថ្មីជាមួយសមត្ថភាពបញ្ជាខ្លួនវាដោយស្វ័យប្រវត្តិ”។

ក្រុមផ្កាយរណប Leo នឹងត្រូវបង្កើតឡើងសម្រាប់ការត្រួតពិនិត្យបរិស្ថាន ការបង្ការគ្រោះមហន្តរាយ និងការគ្រប់គ្រងចរាចរណ៍។ បច្ចេកវិទ្យា AI នឹងដំណើរការរូបភាពដែលថតបានដោយផ្កាយរណប ដោយប្រើឧបករណ៍ចាប់សញ្ញាមាន Resolution ចម្រុះ។ តាមវិធីនេះ រូបភាពដែលមានគុណភាពអន់នឹងត្រូវដកចេញ ហើយមានតែទិន្នន័យដែលមានប្រយោជន៍ប៉ុណ្ណោះដែលនឹងត្រូវបញ្ជូនត្រឡប់មកផែនដីវិញ។

ផ្កាយរណបទាំងនេះទំនងជានឹងត្រូវបាញ់បង្ហោះដោយប្រើយានបាញ់រ៉ុក្កែត Julang-1 ដែលបង្កើតឡើងសម្រាប់ការបាញ់បង្ហោះជាលក្ខណៈពាណិជ្ជកម្ម។ យាន Julang-1 មានសមត្ថភាពដឹកផ្កាយរណប1 ឬច្រើនដែលមានទម្ងន់រហូតដល់ 150គីឡូក្រាមចូលទៅតារាវិថីក្នុងកម្ពស់ 600គីឡូម៉ែត្រ។

ក្រុមអ្នកអភិវឌ្ឍន៍បានប៉ាន់ប្រមាណថា ការចំណាយលើការបាញ់បង្ហោះតាមយាន Julong-1 ម្តងៗ គឺប្រមាណ 25លានយ័ន (3.64លានដុល្លារ)។ ផ្កាយរណបទាំងនេះកំពុងត្រូវបានផលិតឡើងដោយក្រុមហ៊ុន ADASpace ដែលជាក្រុមហ៊ុនឯកជនរបស់ចិនមានមូលដ្ឋាននៅទីក្រុងឈឹងទូ នៃខេត្តស៊ីឈួន ភាគនិរតីប្រទេសចិន៕

July 5, 2019

ប្រទៈឃើញរូបភាពបែកធ្លាយថ្មី ដែលអាចជាស្មាតហ្វូន Mate 30 កាមេរ៉ាជារង្វង់ដំបូងគេរបស់ Huawei

កាលពីពេលថ្មីៗនេះ បន្ទាប់ពីក្រុមហ៊ុន Huawei ទទួលបានភ្លើងខៀវ(បើកផ្លូវ) ពីសហរដ្ឋអាមេរិកវិញ គេប្រទៈឃើញរូបភាព render ជាច្រើនបង្ហាញពីម៉ូដែល Mate 30 ជាសែស្រឡាយធុនកណ្ដាលមួយរបស់ Huawei។

ស៊េរីស្មាតហ្វូនដែលលក់ដាច់ខ្លាំងជាងគេនៅប្រទេសចិននេះ ត្រូវបានអ្នកលេងបណ្ដាញសង្គមចិន Weibo ចែកចាយយ៉ាងព្រោងព្រាត និងថា វាអាចនឹងត្រូវបានក្រុមហ៊ុនប្ដូររូបរាងពីកាមេរ៉ាខាង 4ជ្រុងការ៉េ ទៅជាកាមេរ៉ាក្រោយរាងរង្វង់ 4គ្រាប់វិញម្ដង។

តាមរយៈរូបភាពទាំងនោះ គេនៅមិនទាន់ប្រាកដជាក់ថា ជា Mate 30 ឬ Mate 30 Pro ឬយ៉ាងណានោះទេ ប៉ុន្តែឡេនស៍ Leica ដែលជាចំណែកធំជួយឱ្យស្មាតហ្វូន Huawei ជោគជ័យខ្លាំងនោះ នឹងនៅតែបន្តមានដដែល។
បណ្ដុំកាមេរ៉ាមូលនេះ មិនមែនជារឿងថ្មីឡើយ ដោយគេធ្លាប់ឃើញមានប្រើនៅលើស្មាតហ្វូន Motorola និង Nokia រួចមកហើយ ប៉ុន្តែមិនសូវល្បីល្បាញប៉ុន្មានឡើយ។ ការសម្រេចប្រើម៉ូដនេះ គឺអាចមកពី Huawei ចង់ឱ្យស្មាតហ្វូនរបស់ខ្លួនមានភាពខុសប្លែកពី iPhone និង Google Pixel ជំនាន់ថ្មី ដែលប្រើម៉ូដកាមេរ៉ារាងជ្រុង ដូច្នេះសូមរង់ចាំតាមដានជាបន្តទៀត៕

July 5, 2019

នាំគ្នាមកស្គាល់មនុស្សសំខាន់ 2រូប របស់អ្នកចាត់ការក្រុមជម្រើសជាតិកម្ពុជា

មានចម្ងល់ជាច្រើនតែងតែឆ្ងល់ថា លោក Honda ដែលគាត់ឧស្សាហ៍ដើរហើរទៅណាមកណាតែម្នាក់ឯងនោះ តើការពិត គាត់មានគូស្នេហ៍ហើយឬនៅ? ថ្ងៃនេះ ឡារ៉ែន សូមបង្ហាញពីជីវិតឯកជនរបស់អ្នកចាត់ការក្រុមជម្រើសជាតិកម្ពុជាឱ្យមិត្តអ្នកអានបានដឹង ជាពិសេសសំដៅទៅលើមនុស្សសំខាន់របស់គាត់។

Keisuke Honda មានភរិយារួចហើយ ដោយបានរៀបអាពាហ៍ពិពាហ៍នឹងនាង Misako Honda តាំងពីឆ្នាំ2008 មកម្ល៉េះ ហើយថែមទាំងមានចំណងដៃកូនប្រុសម្នាក់(មនុស្សសំខាន់ទី2)ថែមទៀតផង។ ភរិយារបស់លោក គឺជាអ្នកគ្រូបង្រៀនសាលាមត្តេយ្យម្នាក់ ហើយក៏ធ្លាប់ធ្វើជាអ្នកដឹកនាំក្រុមបាល់ទាត់នៃវិទ្យល័យមួយផងដែរ ដែលឱកាសនោះហើយបានធ្វើឱ្យអ្នកទាំង2 បានចាប់ផ្តើមស្គាល់គ្នាជាលើកដំបូង។ ភរិយារបស់គាត់ពូកែធ្វើម្ហូប ហើយថែមទាំងជាអ្នកគាំទ្រ និងផ្ដល់ជាកម្លាំងចិត្តដល់រូបលោកគ្រប់ពេលវេលា និងគ្រប់ទីកន្លែង ទោះបីជាពួកគេហាក់នៅឆ្ងាយពីគ្នាយ៉ាងណាក៏ដោយ។

រំឭកផងដែរថា Keisuke Honda បានចុះកុងត្រាធ្វើជាគ្រូបង្វឹក តែស្ថិតក្រោមនាមជាអ្នកចាត់ការក្រុម (ដោយសារមិនមានសញ្ញាបត្រគ្រូបង្វឹកបាល់ទាត់) ជម្រើសជាតិកម្ពុជាកាលពីឆ្នាំ2018 ស្របពេលដែលពេលនេះ លោកទើបតែផ្ទេរចេញពីក្លិប Melburn Victory ហើយទំនេរមិនទាន់មានក្លិបថ្មីណាចែចូវនៅឡើយ៕

July 5, 2019

Supachai Jaided ពីគ្មានអ្នកស្គាល់ ក្លាយជាខ្សែប្រយុទ្ធ Super Star របស់ថៃ

កីឡាករវ័យ 19ឆ្នាំ Supachai Jaided(ស៊ុផាឆៃ ចៃឌេត) បានក្លាយជាខ្សែប្រយុទ្ធដ៏មុតស្រួចរបស់ថៃនៅក្នុងពានរង្វាន់ AFF SUZUKI CUP 2018 ដែលបានបង្ហាញខ្លួនឡើងយ៉ាងល្អដោយការរកគ្រាប់បាល់បានដល់ទៅ 3គ្រាប់ គិតត្រឹម 4ប្រកួតដំបូងនៃពានរង្វាន់មួយនៅពេលនោះ។

កីឡាកររូបនេះមានដើមកំណើតនៅខេត្តប៉ាតានី(ខេត្តភាគខាងត្បូង) ប្រទេសថៃ បានចូលហ្វឹកហាត់បាល់ទាត់តាំងពីវ័យ 8ឆ្នាំ បច្ចុប្បន្នជាកីឡាកររបស់ក្លិប Burriram United ដ៏ល្បីល្បាញ។ រូបគេ គឺជាកុមារាម្នាក់ក្នុងចំណោម 10នាក់ដែលត្រូវបានជ្រើសរើសពីថ្នាលបណ្ដុំបណ្ដាលទូទាំងប្រទេសទៅហ្វឹកហាត់នៅប្រទេសស៊ុយអែត។ បន្ទាប់ពីត្រឡប់មកវិញ រូបគេបានចូលរួមជាមួយក្រុម U19 ជម្រើសជាតិថៃ ហើយបានជួយឱ្យថៃលើកពាន AFF U19 Championship។

អ្វីដែលធ្វើឱ្យគ្រូបង្វឹកជម្រើសជាតិថៃ មានការចាប់អារម្មណ៍លើរូបគេនោះគឺ រូបគេមានវ័យត្រឹមតែ 18ឆ្នាំ និងត្រូវបានកោះហៅជាកីឡាករបម្រុងក្នុងឈុត U-23 ដោយកាលនោះរូបគេត្រឹមតែជាកីឡាករប្តូរចូលនៅពេលចុងម៉ោងចំនួន 3ប្រកួតប៉ុណ្ណោះ តែរូបគេរកគ្រាប់បាល់បានដល់ទៅ 3គ្រាប់៕

July 5, 2019

តើប្រទេសដែលល្បីខាងប្រជាជនមានសេចក្តីសុខ ភាគច្រើនមានលក្ខណៈពិសេសអ្វីខ្លះ?…

មិនមែនទ្រព្យសម្បត្តិ ឥទ្ធិពល ឬភាពល្បីល្បាញនោះទេ ដែលធ្វើឱ្យមនុស្សមានសេចក្តីសុខពិតប្រាកដនោះ ហេតុនេះហើយទើបគេសង្កេតឃើញថា ប្រទេសតូចៗមួយចំនួនបានដណ្តើមតំណែងជាប្រទេសដែលប្រ-ជាជនមានសេចក្តីសុខក្នុងសន្ទស្សន៍ល្អៗពីប្រទេសមហាអំណាចធំៗដែលមានការអភិវឌ្ឍឆាប់រហ័ស។ មនុស្សភាគច្រើនប្រហែលជាគិតថាអាមេរិក ចិន ឬប្រទេសដែលមានឧស្សាហកម្មធំៗ មានឥទ្ធិពលខាងសេដ្ឋកិច្ចក្នុងពិភពលោក ជាប្រទេសដែលមានពិន្ទុផ្នែកប្រជាជនមានសេចក្តីសុខខ្ពស់ជាងគេលើពិភពលោកហើយមើលទៅ តែតាមពិតទៅ នៅក្នុងតារាងនៃប្រទេសមានសេចក្តីសុខជាងគេលើពិភពលោកសម្រាប់ឆ្នាំ 2019 (world happiness report) បានបង្ហាញថា អាមេរិកស្ថិតនៅលើចំណាត់ថ្នាក់លេខ18 ចិនស្ថិតនៅក្នុងចំណាត់ថ្នាក់លេខ86 អង់គ្លេសស្ថិតនៅក្នុងចំណាត់ថ្នាក់លេខ19 និងប្រទេសធំៗមួយចំនួនទៀតមិនមែនស្ថិតនៅចន្លោះចាប់ពីលេខ1 ដល់លេខ10នោះទេ។ ផ្ទុយមកវិញ ប្រទេសតូចមួយចំនួនៗ ដែលប្រទេសខ្លះមិនសូវមាន GDP ខ្ពស់ផង តែបែរជាស្ថិតនៅក្នុងចំណាត់ថ្នាក់កំពូលៗនៃតារាងទៅវិញ។

ប្រទេសមួយចំនួនដែលបានប្រែក្លាយខ្លួនពីប្រទេសលំបាក និងគ្មានសេចក្តីសុខបានបង្ហាញពីវិធីសាស្ត្រដើម្បីជំរុញឱ្យមានការប្រែប្រួលយ៉ាងល្អប្រសើរសម្រាប់នាំភាពសុខសាន្តពិតប្រាកដមកជូនប្រជាជន។ នៅឆ្នាំ1948 ប្រទេស Costa Rica បានកាត់បន្ថយ ឬលុបចោលមិនឱ្យមានកងយោធាច្រើន ដើម្បីទុកថវិកាឱ្យបានកាន់តែច្រើនសម្រាប់ចំណាយទៅលើផ្នែកអប់រំ ដែលជាលទ្ធផលមកដល់បច្ចុប្បន្ននេះ ស្ថានភាពនៃការរស់នៅរបស់ប្រជាជនបានល្អប្រសើរឡើងខ្លាំងជាងប្រទេសអ្នកមានមួយចំនួន ដូចជាចក្រភពអង់គ្លេស និងអាមេរិកជាដើម។ នៅក្នុងឆ្នាំ2017 ពួកគេបានវិនិយោគថវិកាប្រមាណ 7.4% នៃផលិតផលក្នុងស្រុកសរុប (GDP) ទៅលើវិស័យអប់រំ។ ការធ្វើបែបនេះ គឺធ្វើឱ្យប្រជាជនចាប់ផ្តើមមានកម្រិតនៃការយល់ដឹងខ្ពស់ឡើង ហើយកាត់បន្ថយស្ថានភាពអនាធិបតេយ្យ និងអំពើទុច្ចរិតនៅក្នុងសង្គម និងនាំមកនូវការកើនឡើងនូវសុចរិតភាព និងប្រសិទ្ធភាពការងារដែលមិនយូរមិនឆាប់ ពួកគេអាចរៀបចំប្រព័ន្ធសេវាសាធារណៈបានយ៉ាងល្អ រួមទាំងទទួលបានធនធានមនុស្សល្អៗយ៉ាងច្រើនសម្រាប់អភិវឌ្ឍន៍ប្រទេសទៀតផង។

ប្រទេសប៊ូតាន ត្រូវបានគេស្គាល់ថា ជាប្រទេសមួយដែលស្ងប់ស្ងាត់ ដែលមាន GDP តិច តែមានភាពល្បីល្បាញរហូតពិភពលោកចាត់ទុកប្រទេសមួយនេះថា ជាដែនដីនៃសេចក្តីសុខ។ ប៊ូតាន បានបំភ្លេចចោល GDP តែផ្តោតសំខាន់លើការកសាងគុណភាពរបស់មនុស្ស ព្រោះពួកគេអាចបណ្តុះផ្នត់គំនិតមនុស្សឱ្យចេះរស់នៅជាមួយធម្មជាតិ និងពឹងពាក់ធម្មជាតិដោយការទាញផលប្រយោជន៍ប្រកបដោយនិរន្តរភាព។ ពួកគេចេះរស់នៅក្នុងជីវភាពរីករាយជាមួយនឹងធនធានដែលពួកគេទទួលបានពីធម្មជាតិ ហើយចេះសោយសុខជាមួយជីវិតដែលរស់នៅបែបសហគមន៍ និងចេះជួយគ្នាគ្រប់កាលៈទេសៈ។ ដោយសារតែបែបនេះហើយ ទើបធ្វើឱ្យប្រទេសប៊ូតាន បានក្លាយជាតំបន់ដ៏ស្មោះត្រង់ចំពោះគ្នា ហើយជាកន្លែងដែលប្រជាជនអាចបង្កបង្កើនផលដំណាំសុខភាពច្រើនជាងគេ។ ចំពោះបរិស្ថានវិញ ក៏ជាប់លំដាប់ថ្នាក់ខ្ពស់បំផុតដែលជាហេតុធ្វើឱ្យប្រជាជនមានសុខភាពល្អ និងមិនចំណាយច្រើនលើការព្យាបាលជំងឺ និងមានថាមពលគ្រប់គ្រាន់សម្រាប់ការសិក្សាពីចំណុចល្អៗនៃការរស់នៅ ដើម្បីបន្តភាពរីកចម្រើនដោយមិនអាចអវត្តមានបាននូវផ្នត់គំនិតរក្សាសេចក្តីសុខសម្រាប់មនុស្សគ្រប់គ្នា និងសង្គមសួនរួម។

ចំពោះប្រទេសនូវែលសេឡង់វិញ ពួកគេបានផ្តោតសំខាន់លើការផ្តល់សេវារក្សាសុខភាពផ្លូវចិត្ត និងចំណាយថវិកាច្រើនដើម្បីអភិវឌ្ឍផ្នែកដ៏សំខាន់នេះ។ក្នុងចំណោមថវិការាប់ពាន់លានដុល្លារនោះរដ្ឋាភិបាលក៏ផ្តោតការយកចិត្តទុកដាក់ខ្លាំងផងដែរ លើការជួយស្តារគ្រួសារដែលទទួលរងអំពើហិង្សា និងកុមារក្រីក្រ ព្រោះគេផ្តោតការយកចិត្តទុកដាក់ខ្លាំងលើកុមារ ដែលជាធនធានសំខាន់សម្រាប់អនាគតសង្គម។ ការធ្វើបែបនេះជាគោលការណ៍សំខាន់មួយនៃគោលដៅរបស់រដ្ឋាភិបាលដែលចង់វិនិយោគយូរអង្វែងដើម្បីស្វែងរកសុភមង្គលសម្រាប់ប្រជាជន ប្រសើរជាងការកើនឡើងនៃសេដ្ឋកិច្ចតែមួយមុខហើយការរស់នៅរបស់ប្រជាជនកាន់តែលំបាកទៅវិញ៕

July 5, 2019

Category: សង្គម និងសេដ្ឋកិច្ច