មិនយូរប៉ុន្មានទៀតទេ ការប្រឡងមធ្យមសិក្សាទុតិយភូមិនឹងចូលមកដល់ ដែលចាប់ពីពេលនេះតទៅ សិស្សានុសិស្សដែលជាបេក្ខជនប្រឡងទាំងអស់ចាំបាច់ត្រូវយកចិត្តទុកដាក់ត្រៀមខ្លួនឱ្យបានល្អ ដើម្បីចាប់យកឱកាសប្រកបដោយភាពសំខាន់នេះសម្រាប់ចាប់ផ្តើមដំណើរជីវិតទៅមុខទៀតឱ្យបាន។
លោក គីម ដារ៉ា ស្ថាបនិកនៃស្ថាប័នបណ្តុះបណ្តាល Start Up Community បានលើកឡើងថា ដើម្បីប្រែក្លាយខ្លួនជាពីសិស្សខ្សោយ និងចង់រំដោះខ្លួនពីសិស្សមិនល្អមកជាប់និទ្ទេសល្អ សិស្សានុសិស្សគួរចាប់ផ្តើមព្យាយាមសិក្សាពីកំហុសឆ្គង និងទម្លាប់អាក្រក់ៗរបស់ខ្លួនមួយចំនួនចេញដើម្បីទុកជាចំណុចផ្លាស់ប្តូរដ៏សំខាន់ដែលអាចនាំដំណើរជីវិតឱ្យឆ្ពោះទៅរកចំណុចវិជ្ជមានវិញបាន។ ក្រៅពីនេះសិស្សដែលធ្លាប់ទទួលបរាជ័យ ឬមានលក្ខខណ្ឌសិក្សាមិនសូវល្អក៏គួរតែផ្លាស់ប្តូរការសេពគប់មិត្តភក្តិមិនល្អ ហើយងាកមកចំណាយពេលវេលាជាមួយមិត្តភក្តិដែលចូលចិត្តរៀនវិញ ព្រោះទោះបីជាយើងខ្សោយ តែបើយើងស្ថិតនៅក្នុងចំណោមអ្នករៀន យ៉ាងហោចណាស់ក៏យើងអាចទទួលព័ត៌មានពីគេបានច្រើនដែរ។
លោក គីម ដារ៉ា បាននិយាយថា៖ “កត្តាសំខាន់មួយផ្សេងទៀតដែលអាចស្តារស្ថានការណ៍បាននាពេលនេះ គឺចាប់ផ្តើមស្វែងរកកន្លែងរៀនដែលមានវិន័យល្អ ប្រព័ន្ធអប់រំល្អ និងគ្រូល្អដែលចេះលើកទឹកចិត្ត និងហ៊ានស្តីបន្ទោសបន្ថែម ដើម្បីជំរុញទឹកចិត្តយើងឱ្យកាន់តែចង់រៀនឱ្យបានខ្លាំងឡើងទៀត”។
អ្នកអប់រំខាងលើបានបន្ថែមផងដែរថា ក្រៅពីកត្តាទាំងប៉ុន្មានខាងលើនេះ ការបង្កើតចំណុចចាប់ផ្តើមដ៏ល្អក៏អាចជាកម្លាំងរុញច្រានទឹកចិត្តសិស្សដែលមិនទាន់ខ្លាំងឱ្យចាប់ផ្តើមខិតខំបានដែរ។ ហេតុនេះគួរចាប់ផ្តើមសិក្សាពីចំណុចតូចៗ និងងាយៗមកមុន ដើម្បីបង្កើតទម្លាប់សិក្សា និងបង្កើនទំនុកចិត្តឱ្យបានល្អ មុនពេលឈានទៅរកចំណុចកាន់តែសាំញ៉ាំសម្រាប់ត្រៀមប្រឡង។ ម្យ៉ាងវិញទៀត បើមិនចង់ឱ្យមានការរំខាន សិស្សគួរបិទទូរស័ព្ទនៅពេលធ្វើលំហាត់ ហើយអានមេរៀនជារៀងរាល់ថ្ងៃ ព្រមទាំងកាត់បន្ថយពេលកម្សាន្តមិនមានប្រយោជន៍ មកជួបមិត្តភក្តិដើម្បីពិភាក្សាគ្នាពីមេរៀនសំខាន់ៗ ព្រោះការធ្វើបែបនេះវាអាចធ្វើឱ្យយើងងាយចងចាំ។ បន្ថែមពីលើនេះក៏គួរកាត់បន្ថយការលេងហ្គេម ហើយស្វែងរកពេលវេលាសមរម្យដើម្បីរំឭកមេរៀនឱ្យបានទៀងទាត់ដើម្បីបង្កើតជាទម្លាប់ល្អ ហើយធ្វើឱ្យយើងចូលចិត្តរៀនកាន់តែខ្លាំង។ បន្ថែមពីលើនេះកត្តាជំរុញសំខាន់មួយទៀតដែលធ្វើឱ្យយើងមានកម្លាំងជំរុញឱ្យចង់ប្រឹងប្រែងកាន់តែខ្លាំង គឺចេះបង្កើតក្តីស្រមៃឱ្យធំសម្រាប់ខ្លួនឯង ព្រោះកាលណាយើងមើលឃើញពីអនាគតល្អ យើងនឹងខំប្រឹងប្រែងដើម្បីជម្នះឧបសគ្គចំពោះមុខនេះបានយ៉ាងល្អ។
ជាមួយគ្នានេះដែរ លោក គង់ វិចិត្រា សហស្ថាបនិកស្ថាប័នអប់រំ Asia Leading Academy បានលើកឡើងថា បច្ចុប្បន្ននេះសិស្សស្ទើរគ្រប់គ្នាសុទ្ធតែមានឧបករណ៍អេឡិចត្រូនិកដែលភ្ជាប់ជាមួយនឹងបច្ចេកវិទ្យាថ្មីៗសម្រាប់ប្រើប្រាស់។ កត្តានេះអាចធ្វើឱ្យសិស្សដែលចេះទាញប្រយោជន៍កាន់តែខ្លាំង ព្រោះពួកគេអាចទទួលបានលំហាត់ និងមេរៀនសម្បូរបែប តែសម្រាប់សិស្សជាច្រើនផ្សេងទៀត ពួកគេបែរជាចំណាយពេលវេលាខ្ជះខ្ជាយច្រើនជ្រុលជាមួយបច្ចេកវិទ្យាកម្សាន្តរហូតប៉ះពាល់ដល់លទ្ធផលសិក្សាថែមទៀតផង។ ហេតុនេះប្រសិនបើចង់ប្រឡងជាប់ សិស្សគួរស្ថិតនៅឱ្យឆ្ងាយបន្តិចពីបច្ចេកវិទ្យា ប្រសិនបើយើងគ្រប់គ្រងខ្លួនឯងមិនបានល្អ ដើម្បីអនុញ្ញាតឱ្យខួរក្បាលរបស់យើងនៅសល់ចន្លោះសម្រាប់ដាក់មេរៀនត្រៀមប្រឡង។ ម្យ៉ាងវិញទៀត បច្ចុប្បន្ននេះយើងឃើញហើយថា នៅតាមហាងកាហ្វេ ឬកន្លែងមានអុីនធើណិតមួយចំនួន សម្បូរទៅដោយយុវជនដែលប្រជុំគ្នាលេងហ្គេមអនឡាញ ដែលបញ្ហានេះក៏ធ្វើឱ្យប៉ះពាល់ផងដែរចំពោះការត្រៀមប្រឡង។ ដើម្បីដោះស្រាយបញ្ហានេះ សិស្សគួរចាប់ផ្តើមកាត់បន្ថយបន្តិចម្តងៗ ហើយងាកមកពិចារណាពីការគ្រប់គ្រងពេលវេលាឱ្យបានល្អពាក់ព័ន្ធនឹងពេលកម្សាន្ត និងពេលរៀន។
លោក គង់ វិចិត្រា បាននិយាយថា៖ “ភាគច្រើន សិស្សយើងមិនសូវរៀបចំការគ្រប់គ្រងពេលវេលាបានល្អទេ ដោយសារពួកគេមិនមានគោលដៅជីវិត ឬមិនទាន់ទទួលបានព័ត៌មានល្អពីការរៀបចំដំណើរជីវិត។ នៅពេលដែលពួកគេមិនយល់ពីសារៈសំខាន់នៃការប្រឡង ដែលជាជំហានសំខាន់ដើម្បីបន្តអាជីពនៅថ្ងៃអនាគត គេអាចនឹងបណ្តោយខ្លួនឯងឱ្យការសប្បាយអូសទាញបានគ្រប់ពេល”។
លោកវិចិត្រា បានបន្ថែមទៀតថា សិស្សគួរចាប់ផ្តើមយកអនាគតមកពិចារណា ថាតើថ្ងៃក្រោយយើងចង់ក្លាយជាអ្វី?។ ហើយជីវិតរបស់យើង 4-5ឆ្នាំទៀតនឹងទៅជាយ៉ាងណាប្រសិនបើយើងប្រឡងជាប់ ហើយករណីប្រឡងមិនជាប់យើងអាចនឹងបាត់បង់អ្វីខ្លះ? ក្រោយពេលពិចារណាហើយ សូមកុំស្លន់ស្លោ ឬភ័យព្រួយខ្លាំងពេក តែគួរចាប់ផ្តើមទាញមេរៀនមករៀបចំពីផ្នែកសំខាន់មកមិនសូវសំខាន់ដើម្បីរំឭកឱ្យបានល្អ ព្រោះចាប់ពីថ្ងៃនេះទៅ ថ្វីដ្បិតតែយឺតជាងគេបន្តិចក្ដី តែមិនទាន់ហួសពេលទេ។ ហេតុនេះ សូមកុំបណ្តោយឱ្យអនាគតដែលអាចគ្រប់គ្រងបាននេះ ត្រូវជួបនឹងរឿងសោកស្តាយដោយសារតែការធ្វេសប្រហែសឱ្យសោះ៕
