សង្គម និងសេដ្ឋកិច្ច - La Reine Media

កម្ពុជា ស្ថិតនៅក្នុងពូល A ពានរង្វាន់ AFF Futsal Championship

កាលពីឆ្នាំមុន ក្រុមបាល់ទាត់ហ្វ៊ុតសាលជម្រើសជាតិកម្ពុជា បានចូលរួមប្រកួតជាលក្ខណៈអន្តរជាតិលើកដំបូងក្នុងពានរង្វាន់ AFF Futsal Championship ដោយបានប្រកួតមិនដែលឈ្នះសោះឡើយក្នុងពូល ពោលគឺចាញ់រហូត និងមិនបានស៊ុតបញ្ចូលទីក្រុមគូប្រកួតបានសោះឡើយសូម្បីតែ 1គ្រាប់។
ចំពោះការប្រកួត AFF Futsal Championship ឆ្នាំ2019 នេះវិញ នឹងត្រូវធ្វើឡើងរយៈពេល1សប្តាហ៍ ចាប់ពីថ្ងៃទី21 ដល់ថ្ងៃទី27 ខែតុលា ឆ្នាំ2019 នៅក្នុងទីក្រុងហាណូយ ប្រទេសវៀតណាមជាម្ចាស់ផ្ទះ ហើយកម្មវិធីការប្រកួតត្រូវបានចែកចេញជា 2ពូល ដែលក្នុង 1ពូលមានចំនួន 4ប្រទេស។

ដោយឡែកឆ្នាំនេះ តាមលទ្ធផលនៃការចាប់ឆ្នោត កម្ពុជាបានស្ថិតនៅក្នុងពូល A រួមជាមួយក្រុមជើងឯក 14សម័យកាលថៃ មីយ៉ាន់ម៉ា និងទីម័រខាងកើត៕

July 24, 2019

Keith Thurman ទទួលស្គាល់លទ្ធផលចាញ់ Pacquiao តែសុំសងសឹក

កាលពីពេលថ្មីៗនេះ កីឡាករ Keith Thurman បានបង្ហាញខ្លួនក្នុងសន្និសីទកាសែតមួយ និយាយអំពីការប្រកួតរបស់ខ្លួនជាមួយនឹងកីឡាករស្តេចប្រដាល់ហ្វីលីពីន Manny Pacquiao ថា ខ្លួនពិតជាចង់សងសឹកខ្លាំងណាស់ប្រសិនបើមានឱកាស ច្បាស់ណាស់គេនឹងសងសឹក និងយកឈ្នះឱ្យបាន។Thurman បានសរសើរវីរបុរសរបស់ហ្វីលីពីនថា ជាអ្នកប្រដាល់ដែលវាយចេញមិនចេះខ្ជិល ហើយគេក៏ពេញចិត្តចំពោះការកាត់សេចក្ដីនេះដោយមិនតវ៉ាអ្វីដែរ។ ជាពិសេសកីឡាករដែលទើបតែចាញ់ជាលើកដំបូងក្នុងអាជីពរបស់ខ្លួននេះក៏បានអរគុណ Pacquiao ដែលបានផ្ដល់មេរៀននេះដល់គេ។គួររំឭកផងដែរថា កីឡាករ Manny Pacquiao បានយកឈ្នះកីឡាករ Keith Thurman កាលពីថ្ងៃអាទិត្យកន្លងទៅបន្ទាប់ពីបានប្តូរកណ្តាប់ដៃគ្នាទៅវិញទៅមករហូត 12ទឹកពេញដោយពិន្ទុមិនឯកច្ឆន្ទ៕

July 24, 2019

ASEAN School Games នៅឥណ្ឌូនេស៊ីឆ្នាំនេះ កម្ពុជាស្ថិតនៅបាតតារាងគ្មានមេដាយមួយពាក់នឹងគេ…

ការប្រកួតកីឡាសិស្សអាស៊ីអាគ្នេយ៍ (11th ASEAN School Games 2019) លើកទី11 នៅប្រទេសឥណ្ឌូនេស៊ីសម្រាប់កម្ពុជា គិតត្រឹមថ្ងៃទី22 ខែកក្កដា គឺបានបញ្ចប់ការប្រកួតហើយ។
កម្ពុជាបានបញ្ជូន 5ប្រភេទកីឡារួមមានកីឡាហែលទឹក កីឡាអត្តពលកម្ម កីឡាវាយសី កីឡាវាយកូនឃ្លីលើតុ និងកីឡាវាយកូនបាល់ទៅចូលរួមប្រកួតដែលមានប្រតិភូសរុប 56នាក់។បើតាមការឲ្យដឹងពីលោក ព្រំ ប៊ុណ្ណយី ដែលជានាយបេសកកម្មរបស់កម្ពុជាសម្រាប់ព្រឹត្តិការណ៍នេះកីឡាករ-កីឡាការិនីត្រូវមានអាយុក្រោម 18ឆ្នាំគិតត្រឹមថ្ងៃប្រកួត។ នេះជាការប្រកួតលើកទី11 តែសម្រាប់កម្ពុជាទើបតែចូលរួមបាន 4លើកទាំងលើកនេះប៉ុណ្ណោះ ហើយជាលទ្ធផល ឆ្នាំនេះកម្ពុជាមិនបានទទួលមេដាយឡើយពីកម្មវិធីនេះ និងបានឈរនៅចំណាត់ថ្នាក់ចុងក្រោយគេទៀតផង៕

July 24, 2019

រឿងត្រូវប្រយ័ត្ន 5យ៉ាង ពេលនាំកូន ដើរក្នុងហាង ឬ ផ្សាទំនើប

តាមរយ:ឧប្បត្តិហេតុជាច្រើនដងដែលតែងតែកើតឡើងនៅក្នុងហាង ផ្សារទំនើបធំៗ និងភាគច្រើនច្រើនកើតឡើងចំពោះកុមារតូចៗ ដោយសារតែស្ថិតក្នុងវ័យដ៏សែនរពឹស និងឪពុកម្តាយមិនបានប្រុងប្រយ័ត្នផងនោះ ទើបធ្វើឱ្យកើតឧប្បត្តិហេតុដែលមិននឹកស្មានដល់ឡើងបាន។ ដូច្នេះការបង្ហាត់ ឬប្រាប់កូនឱ្យចេះប្រុងប្រយ័ត្នជាមុននោះ គឺជាវិធីការពារបញ្ហាជាមុនដ៏ល្អបំផុតមួយ។ នៅក្នុងទស្សនាវដ្តី ឡារ៉ែន លេខនេះ យើងនាំគ្នាមកមើលថា នៅពេលដែលចង់នាំកូនៗទៅលេងផ្សារទំនើបតើមានរឿងអ្វីខ្លះដែលលោកឪពុកអ្នកម្តាយត្រូវប្រយ័ត្ន?

1. ជណ្តើរយន្ត
ត្រូវធ្វើ
-ចាប់កាន់ដៃកូនតូចជាប់ជានិច្ច ខណ:ពេលឡើងជណ្តើរយន្ត។ ឱ្យកូនឈរបែរមុខទៅរកទិសស្របគ្នានឹងការរំកិល(ឡើង ឬចុះ)របស់ជណ្តើរ។
-ពិនិត្យមើលភាពរៀបរយរបស់សម្លៀកបំពាក់កូន ដូចជា ជាយអាវ ជើងខោ ឬជាយសំពត់ ខ្សែចងស្បែកជើង -ល- ថាតើមានផ្នែកណាមួយត្រូវកៀបជាប់នៅក្នុងធ្មេញរបស់កាំជណ្តើរយន្តឬអត់?
-នៅពេលកើតហេតុបន្ទាន់ ដូចជាជណ្តើរយន្តកំពុងកៀបកូន ឬទាញជាយខោអាវ ឬខ្សែស្បែកជើងកូនចូលទៅនោះ ចូរចុចកុងតាក់បញ្ឈប់ជណ្តើរយន្តជាបន្ទាន់(នៅជាប់នឹងបង្កាន់ដៃនៃកាំទី1)ភ្លាម។ បើស្ថិតនៅឆ្ងាយមិនអាចចុចដោយខ្លួនឯងបាន ត្រូវប្រញាប់ប្រាប់បុគ្គលិករបស់ហាងឬអ្នកឡើងជណ្តើយន្តជាមួយគ្នា ឱ្យគេជួយចុចឱ្យក៏បាន។

មិនត្រូវធ្វើ
-កុំឱ្យកូនអង្គុយ ឬលេង ខណ:ពេលកំពុងឡើងជណ្តើរយន្ត (សូម្បីតែការឈរបែរខ្នងដាក់ជណ្តើរក៏មិនគួរធ្វើដែរ) ព្រោះវាអាចប្រថុយនឹងការត្រូវកៀបដៃ ឬជើងបានយ៉ាងងាយ។
-ចៀសវាងការយករទេះកូនក្មេងឡើងតាមជណ្តើរយន្ត តែត្រូវឡើងតាមជណ្តើរយន្តប្រអប់ជំនួសវិញ ព្រោះវាអាចនឹងកើតឧប្បត្តិហេតុ ដូចជារទេះរុញកូនអាចនឹងរបូតពីដៃ រអិលធ្លាក់ទៅក្រោម នាំឱ្យកើតមានគ្រោះថ្នាក់ដល់កូនបាន។

2. ជណ្តើរយន្តប្រអប់
ត្រូវធ្វើ
-ការរង់ចាំឡើងជណ្តើរយន្តប្រអប់យ៉ាងមានសុជីវធម៌ និងមានសុវត្ថិភាពនោះគឺ ឈរតម្រង់ជួរគ្នាមុខក្រោយ។ បើមានមនុស្សរង់ចាំច្រើនពេក អាណាព្យាបាលដែលមានកូនតូចគួររង់ចាំឡើង ឬចុះលើកក្រោយ(បន្ទាប់ទៀត)ក៏បាន ព្រោះការចូលទៅប្រជ្រៀតគ្នាណែននៅក្នុងប្រអប់ជណ្តើរយន្តនោះ អាចធ្វើឱ្យជណ្តើរយន្តគាំងនៅមួយកន្លែង ឬអាចបង្កជាហេតុគ្រោះថ្នាក់អ្វីផ្សេងៗបាន។
-អ្នកម្តាយត្រូវចាំសង្កេតមើល និងប្រាប់កូនកុំឱ្យឈរផ្អែកទ្វារប្រអប់ជណ្តើរយន្ត។
-នៅពេលកើតហេតុរអាក់រអួលផ្សេងៗ ដូចជា ជណ្តើរយន្តប្រអប់គាំងនៅមួយកន្លែងជាដើមលោកឪពុកអ្នកម្តាយត្រូវតាំងស្មារតី ពិនិត្យមើលផ្ទាំងសញ្ញាបញ្ជា(នៅជិតមាត់ទ្វារជណ្តើរយន្ត)ដែលតែងមានកុងតាក់មួយដែលសរសេរថា Emergency Call ចូរចុចកុងតាក់មួយនោះ ដើម្បីប្រាប់ទៅបុគ្គលិករបស់ហាងឱ្យដឹង និងជាការសុំជំនួយ។

មិនត្រូវធ្វើ
-មិនត្រូវបណ្ដោយឱ្យកូនតូចហក់លោត រត់លេងប្រឡែងគ្នានៅក្នុងប្រអប់ជណ្តើរយន្ត ឬចុចកុងតាក់ឡើងចុះលេងនោះទេ ព្រោះអាចបណ្ដាលឱ្យជណ្តើរយន្តមានបញ្ហា និងអាចគាំងដំណើរការ។
-ខណ:ពេលរង់ចាំ មិនគួរនាំកូនតូចទៅឈរនៅជិតមាត់ទ្វារពេកទេ ព្រោះអាចនឹងត្រូវបុកដោយអ្នកដែលនៅខាងក្នុងពេលដែលទ្វារជណ្តើរយន្តបើកឡើង ដែលនឹងធ្វើឱ្យដួល និងទទួលគ្រោះថ្នាក់បាន។-រឿងដែលត្រូវដឹង និងចាំទុកនោះគឺ ពេលមានទឹកលិច ផ្លេកបន្ទោរ រន្ទះ រញ្ជួយផែនដី និងអគ្គិភ័យ មិនត្រូវប្រើជណ្តើរយន្តប្រអប់ជាដាច់ខាត។

3. ទ្វារ និងកម្រាលឥដ្ឋ
ត្រូវធ្វើ
-ពេលដើរចេញ ឬចូលតាមមាត់ទ្វារ ត្រូវឱ្យកូននៅចំកណ្តាលមាត់ទ្វារ ដោយមានលោកឪពុក ឬអ្នកម្តាយនៅក្បែរចាប់ដៃកូន ឬលើកកូនពក៏បានដែរ។
-ពេលដើរនៅក្នុងហាង នៅក្នុងទីកន្លែងដែលស្រឡះៗក៏មិនអាចធ្វេសប្រហែសបានដែរ ព្រោះអាចនឹងមានវត្ថុដែលដាក់ពាំងពីមុខដែលយើងមិនបានមើលឃើញ ឬក៏មានទឹកដក់នៅលើកម្រាលឥដ្ឋជាដើម ដែលអាចធ្វើឱ្យកូនដើរបុក ឬរអិលដួលបាន។

មិនត្រូវធ្វើ
-មិនថាកន្លែងណាក៏ដោយនៅក្នុងហាង សូមកុំបណ្តោយឱ្យកូនរត់លេងស្រេចតែចិត្តតែម្នាក់ឯងឱ្យសោះ ជាពិសេសនៅមុខមាត់ទ្វារចេញចូល ព្រោះបើសិនជាទ្វារដែលបើកបិទដោយស្វ័យប្រវត្តិផងនោះ អាចនឹងធ្វើឱ្យកូនត្រូវទ្វារកៀបបាន។

4. ទូថ្នាក់ៗដាក់ទំនិញ
ត្រូវធ្វើ
-ក្នុងពេលដែលអ្នកម្តាយកំពុងដើររើសទិញទំនិញនៅក្នុងផ្សារទំនើប បើមានមនុស្សធំទៅជាមួយដែរ អ្នកម្ដាយអាចឱ្យអ្នកមកជាមួយនោះនាំក្មេងៗទៅលេងនៅកន្លែងរង់ចាំ ឬក្នុងភោជនីយដ្ឋានណាមួយ រង់ចាំឱ្យអ្នកម្តាយទិញឥវ៉ាន់រួចសិន សឹមជួបគ្នាវិញ។ តែបើសិនគ្មានអ្នកជួយមើលទេនោះ គួរឱ្យកូនតូចអង្គុយនៅក្នុងរទេះសម្រាប់កូនក្មេង ឬរទេះដើរទិញឥវ៉ាន់ទៅជាមួយគ្នាក៏បានដែរ។

មិនត្រូវធ្វើ
-មិនគួរនាំកូនដើរនៅកន្លែងដែលមានការសម្តែងអ្វីម្យ៉ាង កន្លែងដាក់តាំង ឬកន្លែងដាក់លក់ទំនិញ ឬផលិតផលណាដែលងាយបែកបាក់ឡើយ ជាពិសេសគ្រឿងកែវចាន។-ចូរប្រយ័ត្នកន្លែងណាដែលមានទូថ្នាក់ៗដាក់ទំនិញច្រើនជ្រុលពេក និងខ្ពស់ៗ ដោយមិនត្រូវឱ្យកូនដើរទៅជិតទីនោះឡើយ។

5. រទេះដាក់ឥវ៉ាន់
-ការប្រើប្រាស់រទេះដាក់ឥវ៉ាន់ គឺជួយសម្រាលបន្ទុកក្នុងការយួរ ឬកាន់របស់របរផ្សេងៗងាយស្រួលក្នុងការដើររើសទិញទំនិញ តែជាញឹកញាប់ណាស់ដែលយើងសង្កេតឃើញថា រទេះដាក់ឥវ៉ាន់ បានក្លាយជារទេះដឹកកូនក្មេងតូចៗ ដូច្នេះអ្វីដែលត្រូវប្រយ័ត្នឱ្យបានខ្លាំងបំផុតនោះគឺ ការប្រយឹតប្រតោងលេង លោតឡើងចុះ និងក្រោកឈរដើម្បីស្រវាចាប់យកឥវ៉ាន់ ឬរបស់របរផ្សេងៗរបស់កូនៗ ព្រោះវាអាចធ្វើឱ្យកើតឧប្បត្តិហេតុបានយ៉ាងងាយ។
ដូច្នេះ គោលការណ៍ងាយៗដែលគួរប្រត្តិបត្តិនោះគឺ កុំឱ្យកូនរបូតផុតពីខ្សែភ្នែកយើងឱ្យសោះ ព្រោះត្រឹមតែប៉ុន្មាននាទីប៉ុណ្ណោះ ឧប្បត្តិហេតុអាចនឹងកើតឡើងបានជានិច្ច។ ពេលនាំកូនៗទៅលេងហាង ឬផ្សារទំនើប លោកឪពុកអ្នកម្តាយត្រូវតែធ្វើជាអ្នកសង្កេតការណ៍ ភ្នែករហ័ស ត្រចៀករហ័ស ដឹងជាមុន ប្រយ័ត្នជាមុន ដើម្បីសុវត្ថិភាពរបស់កូនជាទីស្រឡាញ់៕

July 24, 2019

កូរ៉េ-កម្ពុជា ជំរុញការបង្កើនកូតាសម្រាប់ពលករកម្ពុជា នៅឆ្នាំបន្តបន្ទាប់

សាធារណរដ្ឋកូរ៉េ នឹងបន្តបង្កើនកូតាសម្រាប់ពលករកម្ពុជាបន្ថែមទៀត នៅក្នុងឆ្នាំបន្តបន្ទាប់ ដោយសារតែការងារនៅសាធារណរដ្ឋកូរ៉េ បានអនុវត្តទៅយ៉ាងល្អប្រសើរ និងកិច្ចសហការល្អ រវាងប្រទេសទាំង2 កម្ពុជា-កូរ៉េ។ នេះជាការលើកឡើងរបស់លោកបណ្ឌិត KIM DONG MAN ប្រធានអង្គភាពអភិវឌ្ឍន៍ធនធានមនុស្សនៃសាធារណរដ្ឋកូរ៉េ ក្នុងជំនួបពិភាក្សាជាមួយ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី22 ខែកក្កដា ឆ្នាំ2019 ស្តីពីប្រព័ន្ធអនុគ្រោះការងារ(EPS) នៅទីស្តីការក្រសួង។

ឯកឧត្តម អ៊ិត សំហេង បានថ្លែងអំណរគុណចំពោះកិច្ចខិតខំប្រឹងប្រែងរបស់ HRD-KOREA ដែលបន្តជួយជ្រើសរើសកម្លាំងពលកម្មបរទេស ជាពិសេសបងប្អូនពលករ-ពលការិនីកម្ពុជា។ លោករដ្ឋមន្ត្រីសង្ឃឹមថា ក្នុងអាណត្តិការងាររបស់លោកបណ្ឌិត KIM DONG MAN រយៈពេល 3ឆ្នាំនេះ នឹងកាន់តែធ្វើឱ្យកិច្ចសហប្រតិបត្តិការរវាងគណៈកម្មាធិការបណ្តុះបណ្តាល និងបញ្ជូនពលករទៅបរទេស នៃក្រសួងការងារ និងបណ្តុះបណ្តាលវិជ្ជាជីវៈ(MTOSB) និងអង្គភាពអភិវឌ្ឍន៍ធនធានមនុស្សនៃក្រសួងមុខរបរ និងការងារនៃសាធារណរដ្ឋកូរ៉េ (HRD-KOREA) នឹងកាន់តែប្រសើរឡើងបន្តទៀត។

ទន្ទឹមនឹងនេះដែរ លោកប្រធានអង្គភាពអភិវឌ្ឍន៍ធនធានមនុស្សនៃសាធារណរដ្ឋកូរ៉េ ប្តេជ្ញាជំរុញនូវកិច្ចសហប្រតិបត្តិការ លើវិស័យនៃការបញ្ជូនពលករនេះឱ្យកាន់តែរឹងមាំបន្ថែមទៀត ដើម្បីបម្រើផលប្រយោជន៍ទៅវិញទៅមករវាងប្រទេសទាំង2។

ក្នុងឱកាសនោះដែរ ភាគីកូរ៉េនឹងផ្តល់ជូននូវអ្នកបច្ចេកទេស ដើម្បីជួយបណ្តុះបណ្តាលផ្នែកបច្ចេកវិទ្យាដល់ពលករកម្ពុជា ដែលកំពុងបម្រើការងារនៅសាធារណរដ្ឋកូរ៉េ ឱ្យទទួលបានជំនាញខាងបច្ចេកវិទ្យានេះកាន់តែប្រសើរ ខណៈពួកគេត្រឡប់មកស្រុកកំណើតវិញ នឹងមានជំនាញមួយច្បាស់លាស់បន្ថែមទៀត។

សូមបញ្ជាក់ថា ចាប់ពីឆ្នាំ2007មក ការប្រឡងតេស្តសមត្ថភាពកូរ៉េ(EPS-TOPIK) រៀបចំបានចំនួន 16លើកមកហើយ(លើកទី16 កំពុងអនុវត្ត) ដែលអនុវត្តដោយអង្គភាពអភិវឌ្ឍន៍ធនធានមនុស្សនៃក្រសួងមុខរបរ និងការងារនៃសាធារណរដ្ឋកូរ៉េ (HRD-Korea) រួមសហការជាមួយគណៈកម្មាធិការបណ្តុះបណ្តាល និងបញ្ជូនពលករទៅបរទេស(MTOSB) ដែលមានបេក្ខជនដាក់ពាក្យសុំសិទ្ធិប្រឡងសរុបចំនួន 434,054នាក់ ហើយបេក្ខជនប្រឡងជាប់សរុបចំនួន 89,393នាក់។

ចាប់ពីឆ្នាំ2018 ការជ្រើសរើសបេក្ខជនដើម្បីដាក់ពាក្យសុំស្វែងរកការងារធ្វើនៅសាធារណរដ្ឋកូរ៉េក្រោមប្រព័ន្ធ EPS ដោយផ្អែកលើកត្តា 3យ៉ាងជាចាំបាច់៖ ទី1-តេស្តភាសាកូរ៉េ EPS-TOPIK តាមប្រព័ន្ធកុំព្យូទ័រ។ ទី2-តេស្តជំនាញ និងទី3-ការវាយតម្លៃសមត្ថភាព។

មានន័យថា បេក្ខជនដែលប្រឡងជាប់តេស្តសមត្ថភាពកូរ៉េ ត្រូវប្រឡងជាប់តេស្តជំនាញ និងការវាយតម្លៃសមត្ថភាព ទើបក្លាយជាបេក្ខជនជាប់ជាស្ថាពរ មានសិទ្ធិដាក់ពាក្យសុំស្វែងរកការងារធ្វើនៅសាធារណរដ្ឋកូរ៉េ(ដែលកន្លងមក បេក្ខជនប្រឡងជាប់តេស្តសមត្ថភាពកូរ៉េ គឺអាចដាក់ពាក្យសុំស្វែងរកការងារធ្វើនៅសាធារណរដ្ឋកូរ៉េបានតែម្តង)។

បច្ចុប្បន្នកម្ពុជាជាប់ចំណាត់ថ្នាក់លេខ4 សម្រាប់រយៈពេលនៃការបញ្ជូននេះ តែបើធៀបជាមួយប្រទេសធំៗវិញ កម្ពុជាទទួលបានចំណាត់ថ្នាក់លេខ1។ ពោលគឺកម្ពុជាទទួលបានចំណាត់ថ្នាក់លេខ1 ដែលបានបញ្ជូនពលករច្រើនជាងគេក្នុងចំណោម 16ប្រទេស ក្នុងឆ្នាំ2019នេះ (លេខ2 ប្រទេសនេប៉ាល់ លេខ3 វៀតណាម លេខ4 ឥណ្ឌូនេស៊ី និងលេខ5 ប្រទេសថៃ)៕

July 23, 2019

ក្រសួងមហាផ្ទៃជំរុញឱ្យកងកម្លាំងយកចិត្តទុកដាក់លើបញ្ហាសន្តិសុខសណ្តាប់ធ្នាប់ក្នុងការប្រឡងបាក់ឌុប ព្រោះមានបេក្ខជនច្រើន

ចាប់តាំងពីការធ្វើកំណែទម្រង់ និងប្រព័ន្ធអប់រំបានរឹតបន្តឹងការប្រឡងមធ្យមសិក្សាទុតិយភូមិមក ការប្រឡងបាក់ឌុបបានក្លាយប្រធានបទដែលគ្រប់ភាគីយកចិត្តទុកដាក់។

ក្រៅពីបញ្ហារឹតបន្តឹងវិន័យក្នុងការប្រឡងហើយ ថ្មីៗនេះសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានណែនាំឱ្យអគ្គស្នងការនគរបាលជាតិ អភិបាលរាជធានី-ខេត្ត និងស្នងការរាជធានី-ខេត្តទាំងអស់ចាំបាច់ត្រូវពង្រឹងសន្តិសុខសណ្តាប់ធ្នាប់ឱ្យបានល្អនៅថ្ងៃប្រឡងមធ្យមសិក្សាទុតិយភូមិឆ្នាំ 2019 នេះ។

សម្តេចរដ្ឋមន្ត្រីក្រសួងមហាផ្ទៃបានបញ្ជាក់ផងដែរថា នៅឆ្នាំនេះមានបេក្ខជនប្រឡងមធ្យមសិក្សាទុតិយភូមិសរុបរហូតដល់ទៅ 119,217នាក់ ក្នុងនោះមាននារីចំនួនជាង 6ម៉ឺននាក់ ដែលឆ្នាំនេះមានចំនួនបេក្ខជនកើនឡើងប្រមាណ 5,852នាក់បើប្រៀបធៀបនឹងឆ្នាំ 2018។ ចំពោះមណ្ឌលប្រឡងវិញក៏មានការកើនឡើងច្រើនជាងឆ្នាំមុនផងដែរ៕

July 23, 2019

រាជរដ្ឋាភិបាលកំណត់យកថ្ងៃ២០-២២ ខែធ្នូ រៀបចំបុណ្យសមុទ្រ លើកទី៨ នៅខេត្តកំពត

(កំពត)៖ រាជរដ្ឋាភិបាលកម្ពុជា បានកំណត់យកថ្ងៃទី២០-២១-២២ ខែធ្នូ ឆ្នាំ២០១៩ រៀបចំពិធីបុណ្យសមុទ្រលើកទី៨ ជុំទី២ នៅខេត្តកំពត ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

ដើម្បីត្រៀមរៀបចំព្រឹត្តិការណ៍ទេសចរណ៍ធំ ប្រចាំឆ្នាំនេះ ប្រកបដោយភាពជោគជ័យ ក្រសួងទេសចរណ៍ រដ្ឋបាលខេត្តកំពត មន្ទីរអង្គភាពពាក់ព័ន្ធជុំវិញខេត្ត បានជួបប្រជុំជាមួយគ្នាជារឿយៗ ជាក់ស្ដែងនាថ្ងៃទី២២ ខែកក្កដា ឆ្នាំ២០១៩នេះ ក្រសួង ស្ថាប័នមន្ទីរ អង្គភាពពាក់ព័ន្ធបានជួបប្រជុំគ្នាជាលើកទី២ នៅសាលាខេត្តកំពត ក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងលោក ជាវ តាយ អភិបាលខេត្តកំពត ដើម្បីត្រួតពិនិត្យ និងកំណត់ការងារសម្រាប់អនុវត្តបន្តទៀត។

បន្ទាប់ពីឯកឧត្តមអភិបាលខេត្ត ជាវ តាយ និងតំណាងផ្នែកទទួលបន្ទុកនីមួយៗរាយការណ៍ពីការងាររៀងៗខ្លួនរួចមក ឯកឧត្តមរដ្ឋមន្ត្រី ថោង ខុន បានលើកឡើងពីការងារមួយចំនួនដែលត្រូវរួមគ្នាអនុវត្តបន្ត ក្នុងនោះរួមមាន៖
* កំណត់យកខេត្តកំពត ជាខេត្តគំរូក្នុងការរៀបចំឱ្យមាន «វិថីម្ហូបអាហារ ឬហៅថា Street Food» ឱ្យបានលេចធ្លោរឡើង។* ជំរុញឱ្យមានការផ្សព្វផ្សាយពីគោលដៅទេសចរណ៍នានា នៅខេត្តកំពតឱ្យបានទូលំទូលាយ ពិសេសរមណីយដ្ឋានឋានសួគ៌បូកគោ តំបន់កសិទេសចរណ៍កូនសត្វ ចម្ការម្រេច និងផលិផលម្រេចកំពត ភ្នំកំពង់ត្រាច រមណីយដ្ឋានទឹកឈូ និងរមណីយដ្ឋានទេសចរណ៍ជាច្រើនទៀត។
* ត្រូវត្រៀមរៀបចំពិព័រណ៍ផលិតផលក្នុងស្រុក ដែលជាផលិតផលកសិកម្មនាំចេញនៅនឹងកន្លែង ដូចជា ធូរេន ចេក សាវម៉ាវ ដូង ស្រកានាគជាដើម។
* ត្រូវត្រៀមរៀបចំព្រឹត្តិការណ៍សិល្បៈ ទស្សនីយភាព របាំ តន្ត្រី និងត្រូវអញ្ជើញក្រុមសិល្បៈរបស់ប្រទេសជិតខាង និងខេត្តដែលជាសម្ពន្ធមេត្រីរបស់ខេត្តកំពត ឱ្យចូលរួមក្នុងព្រឹត្តិការណ៍ខាងមុខនោះ។* ជំរុញឱ្យរដ្ឋបាលខេត្តកំពត គប្បីរៀបចំឆ្នេរខ្សាច់ថ្មីទៀត ដើម្បីបង្កើតជាផលិតផលទេសចរណ៍ទាក់ទាញបន្ថែម។
* ស្នើឱ្យក្រុមហ៊ុនសុខាបូកគោ គប្បីរៀបចំព្រឹត្តិការណ៍កម្សាន្តផ្សេងៗតាមដែលអាចធ្វើទៅបាន ដើម្បីរួមចំណែកក្នុងការទាក់ទាញភ្ញៀវទេសចរបន្ថែមក្នុងព្រឹត្តិការណ៍ធំនេះ ដូចជាព្រឹត្តិការណ៍ដើរកម្សាន្តក្នុងព្រៃ រត់ម៉ារ៉ាតុន ប្រណាំងកង់ ប្រណាំងទូក និងទស្សនាកម្សាន្តនៅតាមតំបន់ទាក់ទាញមួយចំនួនទៀតនៅលើភ្នំបូកគោ។
* លោករដ្ឋមន្ត្រីបានគាំទ្រឱ្យមានព្រឹត្តិការណ៍កីឡាឱ្យបានច្រើន ពិសេសប្រភេទកីឡាដែលនឹងត្រូវដាក់ក្នុងការប្រកួតកីឡាស៊ីហ្គេម មកចូលរួមប្រកួតក្នុងព្រឹត្តិការណ៍បុណ្យសមុទ្រ ឱ្យបានច្រើនតាមដែលអាចធ្វើទៅបាន ដូចជា ជិះកង់ រត់ប្រណាំង កីឡាលើទឹក លើឆ្នេរ និងលើគោក។* ជំរុញឱ្យយកចិត្តទុកដាក់ពង្រឹងគុណភាពសេវាកម្ម អនាម័យចំណីអាហារ ត្រូវបានបដិសណ្ឋារកិច្ចល្អ ត្រូវមានឯកសណ្ឋានឱ្យបានត្រឹមត្រូវ និងត្រូវមានការលើកទឹកចិត្តចំពោះមូលដ្ឋានអាជីវកម្មណា ដែលអនុវត្តបានត្រឹមត្រូវតាមនីតិវិធីនៃការត្រួតពិនិត្យ វាយតម្លៃរបស់ក្រសួងទេសចរណ៍។
* ចំពោះការងារពាក់ព័ន្ធនឹងសហគមន៍ទេសចរណ៍ និងរមណីយដ្ឋាននានានៅខេត្តកំពត កែប និងខេត្តព្រះសីហនុ ត្រូវយកចិត្តទុកដាក់លើការពង្រឹងគុណភាពសេវាកម្ម អនាម័យចំណីអាហារ សុវត្ថិភាពភ្ញៀវទេសចរ ពិសេសត្រូវផ្សព្វផ្សាយឱ្យបានឆាប់រហ័ស អំពីកញ្ចប់ទស្សនកិច្ចទេសចរណ៍មកកាន់ខេត្តកំពត និងតំបន់ឆ្នេរសមុទ្រនៃប្រទេសកម្ពុជាទាំងមូល តាមរយៈកម្មវិធីនៅលើទូរស័ព្ទវៃឆ្លាត (Mobile App)។
* ត្រូវរៀបចំការតុបតែងលម្អឱ្យមានសោភ័ណភាពល្អ ពិសេសគឺការចូលរួមពីសំណាក់ប្រជាពលរដ្ឋ ធ្វើឱ្យយ៉ាងណាឱ្យទូទាំងខេត្ត និងក្រុងកំពតមានភាពស្អាត និងត្រូវមានបង្គន់អនាម័យឱ្យបានគ្រប់គ្រាន់ ត្រូវធ្វើឱ្យមានការប្រែប្រួលគួរជាទីមោទនៈ។ រីឯបង្គន់អនាម័យ និងបន្ទប់ទឹកនៅតាមភោជនីយដ្ឋាន អាហារដ្ឋាន ផ្ទះសំណាក់ សណ្ឋាគារ ស្ថានីយប្រេងឥន្ទនៈ ទីសាធារណៈទៀតសោត ក៏ត្រូវតែស្អាតជានិច្ច៕

July 23, 2019

អីយ៉ា!! ពេលនេះ Salah វ៉ាដាច់ Sanchez រឿងប្រាក់ខែច្រើនជាងគេនៅលីកកំពូលអង់គ្លេស

Mohamad Salah កីឡាករខ្សែប្រយុទ្ធរបស់ក្លិបបាល់ទាត់ Liverpool ដែលកំពុងប្រកបអាជីពនៅលីកកំពូលអង់គ្លេស English Premier League បានយល់ព្រមធ្វើការបន្តកិច្ចសន្យាថ្មីជាមួយនឹងក្លិបរបស់ខ្លួនហើយ។
ក្នុងកិច្ចសន្យាថ្មីនេះ Salah នឹងទទួលបានប្រាក់ឈ្នួលរហូតដល់ទៅ 22.4លានផោន (28លានដុល្លារ) ក្នុង1ឆ្នាំ ដោយបើគិតជាខែវិញ រូបគេនឹងទទួលបានប្រមាណជា 2.3លានដុល្លារក្នុង 1ខែ។
ជាមួយនឹងតម្លៃខ្លួនខ្ពស់បែបនេះ ធ្វើឱ្យកីឡាករអេហ្ស៊ីបរូបនេះ អាចវ៉ាដាច់ Alexis Sanchez របស់ Manchester United ក្នុងនាមជាកីឡាករដែលទទួលបានប្រាក់ខែច្រើនបំផុតនាពេលបច្ចុប្បន្ន៕

July 23, 2019

រកឃើញហើយ ក្រុមម្ចាស់ជើងឯក Africa Cup of Nations

ការប្រកួតដណ្ដើមពានជើងឯកទ្វីបអាហ្វ្រិក ឬ Africa Cup of Nations វគ្គផ្ដាច់ព្រ័ត្របានឈានដល់ទីបញ្ចប់ហើយកាលពីយប់ម្សិលមិញនេះ វេលាម៉ោង 2រំលងអធ្រាត្រដែលជាការប៉ះគ្នារវាង សេណេហ្គាល់ និងអាល់ហ្សេរី។

ជាលទ្ធផល ក្រុមបាល់ទាត់ជម្រើសជាតិនៃប្រទេស អាល់ហ្សេរី បានឈ្នះជើងឯកពានរង្វាន់ប្រចាំទ្វីបអាហ្វ្រិក Africa Cup of Nations នេះ ក្រោយយកឈ្នះ សេណេហ្គាល់ ដោយលទ្ធផល 1ទល់នឹង0 ក្នុងវគ្គផ្តាច់ព្រ័ត្រនៃពានរង្វាន់នេះ។

ដូច្នេះអាល់ហ្សេរីឈ្នះពាន Africa Cup of Nations នេះជាលើកទី2 ក្នុងប្រវត្តិសាស្ត្ររបស់ខ្លួន ដោយឈ្នះដំបូងក្នុងឆ្នាំ1990។ ចំពោះសេណេហ្គាល់វិញមិនធ្លាប់គ្រងពាននេះពីមុនមកទេ៕

July 23, 2019

អ្នករចនាម៉ូដតុក្កតាបាប៊ី ជៀប ស៊ីបូរ៉ា វិលត្រឡប់មកវិញជាមួយស្នាដៃច្នៃម៉ូដបុរាណសម្រាប់តុក្កតាប្រុស

ដូចជាមហាជនបានជ្រាបមកថា សម្លៀកបំពាក់បុរាណខ្មែរយើងត្រូវបានរចនាម៉ូដយ៉ាងស្រស់ស្អាតបំពាក់ឱ្យមនុស្ស ក៏ប៉ុន្តែវានឹងគួរឱ្យចាប់អារម្មណ៍បន្ថែមទៀតប្រសិនបើលៀកបំពាក់ពាក់ទាំងនោះត្រូវបានពាក់នៅលើតុក្កតាប្រភេទកូនក្រមុំ និងកូនកំឡោះ។ ជាក់ស្ដែង អ្នករចនាម៉ូដសម្លៀកបំពាក់បុរាណគឺ លោក ជៀប ស៊ីបូរ៉ា បានវិលត្រឡប់មកវិញជាមួយការច្នៃម៉ូដម្ដងទៀត បន្ទាប់ពីចំណាយពេលសិក្សា និងធ្វើការងារនេះអស់រយៈពេល ៩ ឆ្នាំកន្លងមកហើយ។

លោក ជៀប ស៊ីបូរ៉ា បច្ចុប្បន្នមានវ័យ 26ឆ្នាំ ត្រូវបានមហាជនស្គាល់តាមរយៈស្នាដៃច្នៃម៉ូតសំលៀកបំពាក់ គ្រងលើតុក្កតាបាប៊ី និងធ្លាប់ចាប់ការប្រកួតតុក្កតាបាប៊ីតំណាងឱ្យរាជធានីខេត្តទាំង២៥របស់កម្ពុជា។ អ្នករចនាម៉ូដបុរាណវ័យក្មេងរូបនេះ មានស្រុកកំណើតនៅលើទឹកដីអង្គរធ្លាប់ទទួលបានការគាំទ្រ និងស្ញើចសរសើរជាច្រើនចំពោះស្នាដៃច្នៃម៉ូដសំលៀកបំពាក់របស់លោក ដែលមើលទៅមានសោភ័ណ្ឌភាពស្រស់ស្អាត និងបង្ហាញពីវប្បធម៌របស់ខ្មែរ។ យ៉ាងណាមិញ ដើម្បីសម្រេចក្ដីសុបិនមួយនេះលោកបានចំណាយពេលផ្ទាល់ជាច្រើនឆ្នាំមកហើយ លើការច្នៃម៉ូតសំលៀកបំពាក់ទាំងនោះ។ តែនៅមិនទាន់សម្រេចទាំងស្រុងនោះទេ ព្រោះការច្នៃម៉ូដរបស់លោកកន្លងមក ភាគច្រើនមានតែបំពាក់ឱ្យតុក្កតាបាប៊ីដែលជាភេទស្រី ហើយនៅមិនទាន់មានជាប្រភេទតុក្កតាប្រុសនៅឡើយ។

ទោះជាយ៉ាងក៏ដោយ ក្ដីស្រម៉ៃនៅមិនទាន់បោះបងឡើយ ខណៈដែលលោកធ្លាប់ចង់ចាប់អាជីពជាអ្នកច្នៃម៉ូតសម្លៀកបំពាក់នេះ និងចង់ឱ្យសម្លៀកបំពាក់តំណាងកម្ពុជាមានភាពល្បីល្បាញលើឆាកអន្តរជាតិដូចជាប្រទេសដទៃដែរនេះ បើមានការនឿយហត់ និងបាក់ទឹកចិត្តក្នុងការធ្វើបន្តជាច្រើនដងក៏ពិតមែន តែថ្មីនេះ លោក ជៀប ស៊ីបូរ៉ា បានវិលត្រឡប់មកវិញជាមួយស្នាដៃ ក្នុងរចនាម៉ូដសម្លៀកបំពាក់បុរាណឱ្យតុក្កតាប្រុសវិញម្ដង។ លោក ជៀប ស៊ីបូរ៉ា បានបញ្ជាក់ថា ការរចនាម៉ូដបុរាណឱ្យតុក្កតាប្រុស គឺកើតឡើងពីការស្រម៉ៃ និងបានដកស្រង់ចេញពីចម្លាក់ទេវរូប និងចម្លាក់ផ្សេងៗទៀត ដើម្បីឱ្យច្នៃទៅមិនខុសទម្រង់បុរាណខ្មែរយើង។ លោកបន្ដថា មានម៉ូដខ្លះ ត្រូវបានលោកច្របាច់បញ្ចូលគ្នាដើម្បីឱ្យមើលទៅប្លែកភ្នែក តែនៅរក្សាជាទម្រង់បុរាណដដែរ។

អ្នករចនាម៉ូដសម្លៀកបំពាក់បុរាណទាំងវ័យក្មេងរូបនេះ បានបញ្ជាក់ដែរថា លោករចនាម៉ូដសម្រាប់តុក្កតាប្រុសគឺដើម្បីចង់ឱ្យមហាជនគ្រប់គ្នាបានស្វែងយល់បន្ថែមទៀតអំពីសម្លៀកបំពាក់បុរសរបស់ខ្មែរនាសម័យបុរាណដែលលោកជឿជាក់ថា វាជាចំណេះដឹងល្អមួយក្នុងការសិក្សាពីវា និងបានបញ្ឈប់ការយល់ច្រឡំលើដើមកំណើតសម្លៀកបំពាក់របស់ខ្មែរជាមួយនឹងបណ្តាប្រទេសជិតខាងដទៃទៀត។ លោកថា ការច្នៃម៉ូដនេះមិនមែនសម្រាប់ការប្រកួតអ្វីទាំងអស់ តែគឺដើម្បីការភិរក្ស និងថែរក្សាសម្លៀកបំពាក់បុរាណខ្មែរតែប៉ុណ្ណោះ។

ចង់ដឹងថាការរចនាម៉ូដសម្លៀកបំពាក់បុរាណសម្រាប់តុក្កតាប្រុសនេះប្លែកភ្នែក និងស្រស់សង្ហាកម្រិតណានោះ សូមទស្សនារូបភាពខាងក្រោម៖

July 23, 2019

Category: សង្គម និងសេដ្ឋកិច្ច