សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ឬ CVEA បានបើកវេទិកាមួយស្ដីពី «ការវិនិយោគលើវិស័យអចលនទ្រព្យប្រកបដោយប្រសិទ្ធភាព និងទទួលបានប្រាក់ចំណេញខ្ពស់» ក្រោមការចូលរួមពីសំណាក់តំណាងក្រុមហ៊ុន ភ្នាក់ងារ និងប្រតិបត្តិករពាក់ព័ន្ធក្នុងវិស័យអចលនទ្រព្យប្រមាណ 300នាក់ ជាការចូលរួមជំរុញ និងលើកកម្ពស់វិស័យអចលនទ្រព្យនៅកម្ពុជាឱ្យកាន់តែមានការរីកចម្រើន និងប្រកបដោយភាពរឹងមាំ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជាបានមានប្រសាសន៍ឱ្យដឹងថា ទោះបីជាមិនបានផ្តល់នូវចំណេះដឹងពាក់ព័ន្ធវិស័យអចលនទ្រព្យឱ្យបានទូលាយទាំងអស់ក៏ពិតមែន ប៉ុន្តែវាគឺជាការចែករំលែកបទពិសោធដែលបណ្តាអ្នកជំនាញ និងអ្នកធ្លាប់ទទួលបានជោគជ័យនៅក្នុងវិស័យមួយនេះ ដើម្បីចូលរួមពង្រឹងគុណភាពក្នុងការចេះវាយតម្លៃអចលនទ្រព្យ និងការសម្រេចចិត្តមុនពេលវិនិយោគ។
លោក ម៉ាន់ ចាន់ឌី អគ្គនាយកក្រុមហ៊ុន Premium Housing Co, Ltd បានមានប្រសាសន៍ថា ការវិនិយោគអចលនទ្រព្យឆ្លាតវៃ ទាមទារឱ្យអ្នកវិនិយោគមានភាពអត់ធ្មត់ ព្រោះការវិនិយោគមិនមែនជារឿងប្រថុយប្រថាននោះទេ ព្រោះការវិនិយោគបែបប្រថុយប្រថាន ត្រូវប្រឈមនឹងហានិភ័យខ្ពស់ ប៉ុន្តែអ្នកវិនិយោគឆ្លាតវៃពួកគេតែងតែអនុវត្តរូបមន្តពិសេសរបស់គេ។
លោកបានបន្តថា៖«ដើម្បីរកបានតម្លៃអចលនទ្រព្យទាបជាងទីផ្សារ។ អ្នកភូមិ អ្នកជិតខាង និងមេភូមិដែលស្ថិតនៅក្បែរទីតាំងអចលនទ្រព្យដែលយើងចង់ទិញ គឺជាប្រភពព័ត៌មានច្បាស់លាស់ជាងគេ ដើម្បីដឹងពីតម្លៃអចលនទ្រព្យនោះ និងដឹងពីម្ចាស់អចលនទ្រព្យនោះថាជាប់បំណុល ឬយ៉ាងណា?។ អចលនទ្រព្យខ្លះ ត្រូវការចំណាយពេល 1ឆ្នាំ ឬច្រើនជាងនេះ ដើម្បីទិញបានតម្លៃទាប ឬនៅរក្សាតម្លៃដដែល។ ម្ចាស់អចលនទ្រព្យតែងតែចង់បានតម្លៃថ្លៃ ហើយអ្នកទិញតែងតែចង់បានតម្លៃទាបជាងទីផ្សារ ហេតុនេះអ្នកវិនិយោគ ឬអ្នកទិញត្រូវការការចចារដើម្បីទទួលបានតម្លៃល្អ»។
លោក សន សៀប អគ្គនាយកក្រុមហ៊ុនអចលនទ្រព្យ KEY Real Estate ក៏បានមានប្រសាសន៍ដែរថា វិស័យអចលនទ្រព្យកម្ពុជា នៅតែបន្តភាពរីកចម្រើនដដែល។ ការវិនិយោគក្នុងវិស័យនេះ ចូលរួមយ៉ាងខ្លាំងនៅក្នុងកំណើននៃវិស័យសំណង់នៅកម្ពុជាមួយភាគធំ គឺក្រុមហ៊ុនចិន។ លោកបានបន្តទៀតថា វិស័យអចលនទ្រព្យនៅកម្ពុជាមិនពឹងអាស្រ័យទៅលើប្រពន្ធអនុគ្រោះពន្ធ EBA ពេកនោះទេ»។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បានមានប្រសាសន៍ថា EBA ត្រូវបានគេប្រដូចទៅនឹងកាដូមួយ ដែលសហភាពអឺរ៉ុបផ្តល់ជូនបណ្តាប្រទេសទាំងឡាយណាដែលក្រីក្រ និងប្រទេសដែលកំពុងអភិវឌ្ឍន៍តែប៉ុណ្ណោះ។ ការដកប្រព័ន្ធអនុគ្រោះពន្ធ EBA វាជះឥទ្ធិពលខ្លាំង និងដំបូងគេបំផុត គឺវិស័យកាត់ដេរ។ ចំពោះវិស័យអចលនទ្រព្យ ទោះជាមិនមានប្រព័ន្ធអនុគ្រោះពន្ធមួយនេះ ក៏ហាក់មិនមានឥទ្ធិពលអវិជ្ជមានអ្វីដែរ ព្រោះវាជាសកម្មភាពអភិវឌ្ឍន៍នៅក្នុងប្រទេស ដែលមិនមែនជាការនាំចេញនោះទេ»។
លោកប្រធានសមាគម CVEA ក៏បានឱ្យដឹងដែរថា វិស័យសំណង់ និងអចលនទ្រព្យនៅកម្ពុជា នៅតែមានការវិវឌ្ឍល្អប្រសើរ ហើយលំហូរទុនវិនិយោគបានបន្តកើនឡើង ដែលមិនមានសញ្ញាណាមួយគួរឱ្យបារម្ភនោះទេ ហេតុនេះទោះបីជាប្រព័ន្ឋ EBA នឹងត្រូវដកក៏ដោយ ក៏មិនមានផលប៉ះពាល់ដល់វិស័យនេះទេ ព្រោះសេដ្ឋកិច្ចកម្ពុជានៅតែមានកំណើន ធ្វើឱ្យប្រាក់ចំណូលប្រជាពលរដ្ឋកើនឡើង ហេតុនេះអំណាចនៃការទិញនៅតែមានភាពល្អប្រសើរដដែល។
លោក ច្រឹក សុខនីម បានបន្តទៀតថា៖«កម្ពុជានៅមានសក្ដានុពលល្អច្រើន បើប្រៀបធៀបជាមួយប្រទេសជិតខាងនានាដែលស្ថិតនៅក្នុងតំបន់ ដែលបណ្តាអ្នកវិនិយោគ និងក្រុមហ៊ុនអន្តរជាតិនានាប្រាថ្នាចូលមករកស៊ីជាមួយដើម្បីទួលបានផលប្រយោជន៍ត្រឡប់ទៅវិញ។ ប្រទេសមួយដែលមានផលប្រយោជន៍នៅក្នុងការធ្វើជំនួញ វានឹងទាក់ទាញបណ្តាអ្នកវិនិយោគចូលមកដោយស្វ័យប្រវត្តិ ដូច្នេះការដកប្រពន្ធអនុគ្រោះពន្ធរបស់សហភាពអឺរ៉ុប ហាក់មានឥទ្ធិពលតិចតួចបំផុតមកលើវិស័យមួយនេះ»។
សូមបញ្ជាក់ថា កម្មវិធីនេះ មានលោក យិន លាងគង់ ស្ថាបនិក និងជាអគ្គនាយកគេហទំព័រ www.propertyarea.asia ដែលជាអ្នកសម្របសម្រួល និងអ្នកជំនាញ 4រូប ជាវាគ្មិន គឺលោក ម៉ាន់ ចាន់ឌី លោក សន សៀប លោក ព្រាប កុល និងលោក ច្រឹកសុខនីម ជាអ្នកបកស្រាយពីគន្លឹះក្នុងការវាយតម្លៃអចលនទ្រព្យ ដើម្បីឱ្យអ្នកចូលរួមស្វែងយល់ ដែលអាចឈានទៅរកការសម្រេចចិត្តមុនពេលវិនិយោគដើម្បីអាចចៀសផុតពីហានិភ័យ ទទួលបានជោគជ័យក្នុងវិស័យអចលនទ្រព្យ និងទទួលបានផលចំណេញខ្ពស់៕
