សង្គម និងសេដ្ឋកិច្ច - La Reine Media

បេប៊ី កុងត្រាជាមួយថោនហើយផ្អាកមិនទទួលការសម្តែងភាពយន្ត

ចាប់តាំងពីចុះកុងត្រាជាតារាចម្រៀងពេញសិទ្ធិក្នុងផលិតកម្មថោនមក កញ្ញា បេប៊ី កំពុងមមាញឹកខ្លាំង ក្នុងការហាត់ពត់សំឡេង ជាមួយបទចម្រៀងថ្មីៗ ផលិតកម្មដាក់ឲ្យក្នុងនោះមានទាំងប្រភេទបទ មនោសញ្ចេតនា កម្សត់ និងញាក់កន្ត្រាក់អារម្មណ៍។

កញ្ញា ជុំ រចនាពេជ្រ ហៅ បេប៊ី ត្រូវបានទស្សនិកជនដឹងថា កញ្ញាជាតារាសម្តែង និងពិធីការិនី ដែលមានរូបឆោមស្រស់សោភាមួយដួង កំពុងមានសន្ទុះទីផ្សារនាពេលបច្ចុប្បន្ន។ តាមរយៈបទ “ប្រច័ណ្ឌ” និងបទ “អំណាចលុយ” បានធ្វើឲ្យកញ្ញាវិវត្តន៍ខ្លួនទៅជាតារាចម្រៀងឯករាជ្យថែមទៀតផង។ ដោយសាររូបសម្រស់ ទឹកដម និងសមត្ថភាពរបស់កញ្ញា ធ្វើឲ្យ តារាចម្រៀងរូបស្រស់នេះ ជាតារាឯករាជ្យមិនទាន់បានប៉ុន្មានផង ក៏ត្រូវបានផលិតកម្មថោន បើកភ្លើងខៀវស្វាគមន៍ឲ្យចុះកុងត្រាជាតារាចម្រៀងពេញសិទ្ធិក្នុងផលិតកម្មថោនតែម្តង។

ម្ចាស់បទ “ប្រច័ណ្ឌ” រូបនេះ រៀបរាប់ថា មួយរយៈនេះ ខ្លួនមមាញឹកខ្លាំងណាស់ជាមួយការថត MV ថ្មីរបស់ខ្លួនសម្រាប់ផលិតកម្មថោន ក្នុងនោះមានទាំងប្រភេទបទ បែបមនោសញ្ចេតនា កម្សត់ និងញាក់កន្ត្រាក់អារម្មណ៍។
បេប៊ី បន្តថា កញ្ញាបានផ្អាកមិនទទួលការសម្តែងភាពយន្តពីផលិតករជាច្រើនដែលបានទាក់ទងមកខ្លួន ដើម្បីប្រមូលអារម្មណ៍មកផ្តោតលើបទថ្មីដែលផលិតកម្មថោនរៀបចំឲ្យ។ ប៉ុន្តែសម្រាប់ការងារផ្សេងៗ មិនថាការងារតាមខេត្ត ឬកម្មវិធីក្នុងរាជធានីភ្នំពេញ នៅតែមមាញឹកច្រើនសម្រាប់កញ្ញា។

កញ្ញា បេប៊ី រំពឹងថា តាមរយៈបទថ្មីដែលខ្លួនកំពុងថតជាMVនេះ នៅពេលបញ្ចេញលើទីផ្សារនឹងទទួលបានការគាំទ្រខ្លាំងពីទស្សនិកជន ខណៈបទថ្មីទាំងអស់ដែលខ្លួនកំពុងថត កញ្ញាធ្វើឡើងដោយសម្រិតសម្រាំងបំផុត សម្រាប់ជាចំណីចក្ខុទស្សិនកជន ឲ្យសាកសមសម្រាប់ការទន្ទឹងរង់ចាំរបស់អ្នកគាំទ្រកញ្ញា៕

August 1, 2019

កម្ពុជា ចាញ់ ម៉ាឡេស៊ី ០ទល់នឹង2 ក្នុងពាន AFF U15 Boy Championship 2019

ការប្រកួតជើងទី2 របស់កម្ពុជា ក្នុងពានរង្វាន់ AFF U15 Boy Championship 2019 ក្នុងខេត្តឈុនបុរី នៃប្រទេសថៃ បានបញ្ចប់ហើយកាលពីម្សិលមិញនេះ ដោយក្រុមយុវជនកម្ពុជាបានចាញ់ ក្នុងលទ្ធផល 0ទល់នឹង2។
លទ្ធផលក្នុងវគ្គទី1 ក្រុមម៉ាឡេស៊ីបានដាក់សម្ពាធខ្លាំងមកលើកម្ពុជា តែធ្វើមិនបានសម្រេចឡើយ ដោយស៊ុតជាច្រើនជើងតែមិនចំគោលដៅ។ ឈានចូលដល់វគ្គទី2 ក្រុមកម្ពុជាបានប្តូរទម្រង់ពីការលេងបែបទប់ មកវាយបកវិញ តែធ្វើមិនបានល្អឡើយ និងថែមទាំងរបូតដល់ទៅ 2គ្រាប់ទៀតផង។ គួរបញ្ជាក់ផងដែរថា កម្ពុជាឆ្លងកាត់ 2ប្រកួតចាញ់ទាំង 2ប្រកួត និងកំពុងឈរនៅលេខរៀងទី4 ក្នុងចំណោម 6ប្រទេស នៃពូល B ហើយប្រកួតបន្ទាប់ពីនោះ កម្ពុជានឹងត្រូវជួបក្រុមមិនដែលចាញ់ គឺក្រុមយុវជនថៃ នៅថ្ងៃទី1 ខែសីហា ឆ្នាំ2019 ខាងមុននេះ៕

July 31, 2019

អ្នកចាំទីវ័យ 13ឆ្នាំមួយរូប កំពុងទទួលបានការចាប់អារម្មណ៍ខ្លាំងក្នុងបណ្តាញអ៊ីនធើណិត

កាលពីពេលថ្មីៗនេះ កុមារា Fuaiz Thanawat ដែលជាអ្នកចាំទីក្រុមបាល់ទាត់ជម្រើសយុវជនអាយុក្រោម15ឆ្នាំនៃសាលាអន្តរជាតិ Ascot បានទទួលការចាប់អារម្មណ៍យ៉ាងខ្លាំងពីសំណាក់សិស្សស្រីៗដែលមានអាយុស្របាលគ្នានៅក្នុងប្រទេសថៃ។ ជាមួយគ្នានេះដែរ យុវជនខាងលើមានអាយុទើបតែ 13ឆ្នាំប៉ុណ្ណោះ ហើយកំពុងតែរៀននៅថ្នាក់ទី8 នៃសាលាខាងលើ តែឃើញមានសិស្សស្រីៗនៃសាលាផ្សេងៗជាច្រើនបានបញ្ចេញមតិនៅក្នុងបណ្ដាញសង្គមនានាថា ពួកគេចង់ផ្លាស់ទៅរៀននៅសាលាអន្តរជាតិ Ascot ដែរ ដើម្បីឱ្យបានជួបមុខយុវជនខាងលើ៕

July 31, 2019

Ronaldinho ត្រូវបានរឹបអូសទ្រព្យសម្បត្តិ ដោយសារតែរឿងមិនបង់ពន្ធ

តាមរយៈសារព័ត៌មានក្នុងស្រុកមួយរបស់ប្រទេសប្រេស៊ីលបានឱ្យដឹងថា ទ្រព្យសម្បត្តិរបស់អតីតខ្សែប្រយុទ្ធក្លិប Barcelona និងក្រុមជម្រើសជាតិប្រេស៊ីល Ronaldinho ត្រូវបានរឹបអូស ខណៈលិខិតឆ្លងដែនអេស្ប៉ាញ និងប្រេស៊ីលរបស់លោកក៏ត្រូវបានដកហូតដែរ។ចំពោះមូលហេតុនៃការរឹបអូសទ្រព្យសម្បត្តិនេះ ត្រូវបានគេបង្ហើបឱ្យដឹងថា មកពីកីឡាកររូបនេះបានបំពានច្បាប់ជាច្រើន ជាពិសេសមិនបានបង់ពន្ធលើអចលនទ្រព្យ និងប្រាក់ចំណូលដែលរកបានស្ទើរតែទាំងអស់របស់គេ។

គួរបញ្ជាក់ផងដែរថា កីឡាកររូបនេះត្រូវបានគេប៉ាន់ប្រមាណថា មានទឹកប្រាក់ប្រហែលចន្លោះពី 100 ទៅ 120លានដុល្លាសហរដ្ឋអាមេរិក រួមទាំងអចលនទ្រព្យចំនួន 57កន្លែងទៀតផង៕

July 31, 2019

វិធីសាស្ត្រសំខាន់ៗសម្រាប់ត្រៀមខ្លួនប្រឡងក្នុងរយៈពេលខ្លី…

ការប្រឡងមធ្យមសិក្សាទុតិយភូមិនឹងចូលមកដល់ក្នុងពេលឆាប់ៗខាងមុខនេះ ដែលសិស្សានុសិស្សជាបេក្ខជនប្រឡងទាំងអស់កំពុងយកចិត្តទុកដាក់ត្រៀមខ្លួនយ៉ាងស្វិតស្វាញសម្រាប់ដណ្តើមជោគជ័យលើការប្រឡងដ៏មានសារៈសំខាន់នេះ។

នៅថ្ងៃនេះ កាសែត ឡារ៉ែន ពាណិជ្ជ បានជួបសម្ភាសជាមួយលោកស្រីសាស្ត្រាចារ្យ អុីន វីរលក្ខិណា នាយិកាការិយាល័យ កិច្ចការសិក្សា និងនិស្សិតនៃសាកលវិទ្យល័យបៀលប្រាយដើម្បីចែករំលែកពីគំនិត និងបទពិសោធល្អៗសម្រាប់ត្រៀមខ្លួនប្រឡងសញ្ញាបត្រមធ្យមសិក្សាទុតិយភូមិ។

1.តើមកដល់ពេលនេះសិស្សានុសិស្សដែលជាបេក្ខជនប្រឡងគួរត្រៀមខ្លួនអ្វីខ្លះមុនពេលប្រឡងមធ្យមសិក្សាទុតិយភូមិខាងមុខនេះ?
នៅសល់តែ ជាង20ថ្ងៃទៀតប៉ុណ្ណោះ ការប្រឡងមធ្យមសិក្សាទុតិយភូមិនឹងចាប់ផ្តើមហើយ ហេតុនេះអ្វីដែលបេក្ខជនអាចធ្វើបាននៅពេលនេះ គឺតាមដានព័ត៌មានអំពីការប្រឡងឱ្យបានច្បាស់លាស់ ទាំងថ្ងៃប្រឡង មណ្ឌលប្រឡង បទបញ្ជាផ្ទៃក្នុងនៃការប្រឡង និងត្រៀមខ្លួនឱ្យបានល្អសម្រាប់ការរក្សាសុខភាពល្អ ដើម្បីបង្ការហានិភ័យសុខភាពដែលអាចកើតមានឡើងក្នុងថ្ងៃសំខាន់នេះ។

ក្រៅពីការតាមដានព័ត៌មាន និងរក្សាសុខភាពបេក្ខជនប្រឡងក៏គួរតែរៀបចំពេលវេលាសម្រាប់រំឭកមេរៀនឱ្យបានល្អផងដែរ ដោយការចែកកាលវិភាគឱ្យបានច្បាស់លាស់ទៅតាមមុខវិជ្ជាអាទិភាពរបស់ខ្លួន (វិទ្យាសាស្ត្រសង្គម និងវិទ្យាសាស្ត្រពិត)។

វិធីសាស្ត្រត្រៀមខ្លួនសម្រាប់បេក្ខជនដែលជ្រើសរើសយកថ្នាក់វិទ្យាសាស្ត្រសង្គម គឺរៀបចំកម្មវិធីរំឭកមេរៀនដោយការទន្ទេញ និងកំណត់ចំណាំមួយចំនួន។ ចំពោះមុខវិជ្ជា ភូមិវិទ្យា ប្រវត្តិវិទ្យា ឬពលរដ្ឋវិទ្យា ជាដើមគួរចំណាយពេល 2ម៉ោងរៀងរាល់ព្រឹកដើម្បីទន្ទេញ។ របៀបនៃការទន្ទេញគួរសាកល្បងចំណាយពេលកន្លះម៉ោងសម្រាប់ 1មុខវិជ្ជា ដោយក្នុងនោះត្រូវចំណាយពេល 20នាទីសម្រាប់អានឱ្យឮៗនូវមេរៀនទាំងអស់នោះ ហើយចំណាយពេល 10នាទីដើម្បីធ្វើការកត់ចំណាំ ឬកត់ត្រានូវឆ្នាំ និងព្រឹត្តិការណ៍ជាដើមដែលជាចំណុចស្នូលនៃមុខវិជ្ជាមេរៀន។ ការធ្វើបែបនេះអាចធ្វើឱ្យសិស្សទទួលបានផលល្អ ព្រោះកាលណាយើងអានឮៗ នោះមានន័យថា គ្រប់ផ្នែកទាំងអស់នៃរាងកាយបានដំណើរការ មាត់អាន ត្រចៀកស្តាប់ ហើយចុងក្រោយយើងកត់ចំណាំ ដែលភ្ជាប់ការចងចាំបានយ៉ាងល្អ។ ប្រសិនបើយើងទម្លាប់ធ្វើវាបានត្រឹមតែកន្លះម៉ោងក្នុង 1មុខវិជ្ជាបាន 1មេរៀន ហេតុនេះរយៈពេល 28ថ្ងៃយើងនឹងអាចរំឭកបានដល់ទៅ 28មេរៀនឯណោះ។

ចំណែកឯវិធីសាស្ត្រក្នុងការត្រៀមសម្រាប់ថ្នាក់វិទ្យាសាស្ត្រពិតវិញ មានដូចជាមុខវិជ្ជាគណិតវិទ្យានិងមុខវិជ្ជាវិទ្យាសាស្ត្រមួយចំនួនទៀត យើងគួរតែយកការអនុវត្តជាសំខាន់ មានន័យថា យើងគួរអនុវត្តតាមសៀវភៅលំហាត់ដែលក្រសួងបានចេញឱ្យបានច្រើន។ ចំពោះពេលវេលាល្អវិញ អាចជាចន្លោះពីម៉ោង 9 ទៅម៉ោង 11ព្រឹក ឬម៉ោង 1រសៀលជាដើមដើម្បីសាកល្បងអនុវត្តលំហាត់។ អ្វីដែលយើងអាចធ្វើបាន គឺសាកល្បងរយៈពេល 1ម៉ោងជារៀងរាល់ថ្ងៃដើម្បីអនុវត្តលំហាត់ឱ្យចប់មួយមេរៀន ឬសាកល្បងយកវិញ្ញាសាលំបាកៗមកធ្វើតេស្តសមត្ថភាពរបស់ខ្លួនឯង។ ប្រសិនបើយើងអាចអនុវត្តបានល្អ នោះយើងនឹងផ្សាំុខ្លួនបានល្អជាមួយនឹងការប្រឡង ហើយពេលប្រឡងជាក់ស្តែងយើងអាចនឹងធ្វើដោយមិនសូវមានភាពថ្លោះធ្លោយ ព្រោះយើងអនុវត្តបានច្រើន។ ជារួមរយៈពេលជាង 20ថ្ងៃ មិនយឺតពេលពេកទេសម្រាប់ការត្រៀមប្រឡងមធ្យមសិក្សាទុតិយភូមិ ឱ្យតែយើងតាំងចិត្ត និងដឹងខ្លួនថា ធ្វេសប្រហែសហើយខិតខំអាចនឹងធ្វើឱ្យយើងទទួលបានលទ្ធផលវិជ្ជមាន ប្រសើរជាងមិនបានធ្វើអ្វីសោះ។

2. ដំណាក់កាលនៃការរឹតបន្តឹងនេះ សិស្សជាច្រើនអាចនឹងមានការភ័យខ្លាច ឬព្រួយបារម្ភជាដើម។ តើលោកស្រីសាស្ត្រាចារ្យមានវិធីសាស្រ្ត្រអ្វីដើម្បីកាត់បន្ថយភាពភ័យខ្លាចរបស់សិស្ស?
សូមប្អូនៗចងចាំថា ថ្ងៃទី19 ខែសីហា មិនមែនជាថ្ងៃអវសាននៃពិភពលោកនោះទេ ហេតុនេះកុំព្រួយបារម្ភខ្លាំងពេក។ អ្វីដែលគួរធ្វើ គឺដូចបញ្ជាក់ខាងលើថាគួរត្រៀមខ្លួនបំពេញលក្ខខណ្ឌទម្រង់ថា តើយើងបានបញ្ចប់ ឬមានលក្ខខណ្ឌគ្រប់គ្រាន់ហើយឬនៅសម្រាប់ការប្រឡង។ ប្អូនៗត្រូវចាំថា អ្នកជាប់ក៏ដោយ អ្នកធ្លាក់ក៏ដោយ គឺត្រូវបញ្ចប់ដោយកម្រិតត្រឹមតែ 6អក្សរពី A ដល់ F នេះទេ ហើយម្យ៉ាងការជាប់ ឬធ្លាក់ក៏មិនមែនកំណត់វាសនាពេញមួយជីវិតដែរ ហេតុនេះកុំបារម្ភហួសហេតុដែលនាំឱ្យប៉ះពាល់ដល់ការបញ្ចេញសមត្ថភាពរបស់យើង។

ម្យ៉ាងវិញទៀត មិនថាលទ្ធផលបែបណាក៏ដោយសូមត្រៀមចិត្តទទួលយក កុំអស់សង្ឃឹម មិនថាអ្នកជាប់ ឬអ្នកធ្លាក់នោះទេ សុទ្ធតែមានផ្លូវទៅមុខដូចគ្នាសម្រាប់ស្វែងរកភាពជោគជ័យក្នុងជីវិត។ អ្នកជាប់គាត់ក៏ត្រូវបន្តដំណើរសម្រាប់អភិវឌ្ឍន៍អាជីពការងាររបស់គាត់បន្តទៀត មិនមែនបញ្ចប់ត្រឹមចប់ជាប់បាក់ឌុបនេះទេ ហើយអ្នកមិនទាន់ចប់ក៏អាចមានជម្រើសច្រើនដោយការសិក្សាម្តងទៀត រៀនជំនាញវិជ្ជាជីវៈ ឬអាចចូលសិក្សាថ្នាក់បរិញ្ញាបត្ររងបាន។ ហេតុនេះគ្មានមូលហេតុអ្វីដែលត្រូវព្រួយបារម្ភខ្លាំងពេកនោះទេ សូមទុកកម្លាំងដើម្បីខិតខំប្រឹងប្រែងឱ្យអស់ពីសមត្ថភាពដើម្បីសម្រេចការប្រឡងដ៏សំខាន់នេះ កុំរវល់តែព្រួយបារម្ភខ្លាំងពេក។

3. តើសាកលវិទ្យាល័យបៀលប្រាយ បានជួយអ្វីខ្លះដល់សិស្សានុសិស្សក្នុងដំណាក់កាលមុនប្រឡង និងដំណាក់កាលក្រោយប្រឡង?
សាកលវិទ្យាល័យបៀលប្រាយយើងស្វាគមន៍សម្រាប់សិស្សានុសិស្សដែលមានបំណងចង់ស្វែងរកការប្រឹក្សា ឬចង់ស្វែងរកកន្លែងដើម្បីជួបជុំសិក្សា។ យើងផ្តល់ជូនសិស្សនូវទីកន្លែងសម្រាប់រៀនមុនពេលប្រឡង ដូចជានៅក្នុងបណ្ណាល័យ ឬបន្ទប់រៀនដើម្បីផ្តល់ភាពងាយស្រួលសម្រាប់សិស្សានុសិស្ស។ ក្រៅពីនេះ ក្រោយពេលប្រឡងចប់ គាត់អាចស្វែងរកការប្រឹក្សាពីអាជីព ឬពីចំណុចសំខាន់ៗដែលគាត់គួរត្រៀមខ្លួនសម្រាប់សិក្សាបន្តនៅមហាវិទ្យាល័យ ឬសម្រាប់អាជីពការងារសម្រាប់ជិវិតក៏បាន។

4. តើលោកស្រីសាស្ត្រាចារ្យ មានមតិយោបល់យ៉ាងណាចំពោះសិស្សានុសិស្សដែលត្រៀមប្រឡងមធ្យមសិក្សាទុតិយភូមិ?
ខ្ញុំគ្មានយោបល់អ្វីច្រើនទេ មានតែជូនពរឱ្យប្អូនៗជោគជ័យក្នុងការប្រឡង ហើយត្រូវត្រៀមខ្លួនឱ្យបានល្អនៅរយៈពេល 2ថ្ងៃមុនពេលប្រឡង ព្រោះយើងបានខំច្រើនមកហើយ សូមទុកពេលនេះដើម្បីសម្រាកឱ្យបានល្អ។ សូមថែរក្សាសុខភាព និងកុំភ្លេចពីលក្ខខណ្ឌប្រឡង ក៏ដូចជាសម្ភារដែលគេអនុញ្ញាតសម្រាប់ការប្រឡង ឬសម្ភារដែលចាំបាច់សម្រាប់ការប្រឡង៕

July 31, 2019

រដ្ឋាភិបាលកម្ពុជា បានសម្រេចចាត់វិធានការលើក្រុមហ៊ុននាំសំរាមមកកម្ពុជា

សន្និសីទសារព័ត៌មានទាក់ទងនឹងកាកសំណល់ប្លាស្ទិក ចំនួន 83កុងតឺន័រត្រូវបានរៀបចំឡើងតាមការគ្រោងទុក ដោយមានការចូលរួមពីមន្ត្រីសំខាន់ៗ ដើម្បីត្រៀមខ្លួនឆ្លើយទៅនឹងសំណួររបស់អ្នកសារព័ត៌មានផងដែរ ។

ឯកឧត្តម គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករ បានមានប្រសាសន៍ថា៖« រាជរដ្ឋាភិបាលបានសម្រេចឱ្យក្រុមហ៊ុន CHUNGYUEN PLASTIC MANUFACTURE CO.,LTD ត្រូវអនុវត្តឱ្យបានចប់សព្វគ្រប់ត្រឹមថ្ងៃទី24 ខែសីហា ឆ្នាំ2019 ជាកំហិត។ ក្នុងករណីក្រុមហ៊ុនខកខានមិនបានអនុវត្ត អគ្គនាយកដ្ឋានគយ និងរដ្ឋាករកម្ពុជា នឹងបន្តចាត់វិធានការតាមផ្លូវតុលាការស្របតាមច្បាប់ជាធរមាន ។

ឯកឧត្តម គុណ ញឹម បានបញ្ជាក់ថា៖ «រាជរដ្ឋាភិបាលកម្ពុជា បានសម្រេចចាត់វិធានការលើក្រុមហ៊ុនខាងលើដូចខាងក្រោម៖
1-ត្រូវនាំចេញទំនិញកាកសំណល់ប្លាស្ទិកទាំង 83កុងតឺន័រ ត្រឡប់ទៅប្រទេសដើមវិញ។
2-ត្រូវរងពិន័យរដ្ឋបាលជាប្រាក់ 1,037,500,000រៀល ដែលត្រូវបង់ចូលជាប្រយោជន៍ថវិកាជាតិ។
3-ក្រុមហ៊ុនត្រូវអនុវត្តចំណុចទី1 និងទី2 ខាងលើឱ្យបានចប់សព្វគ្រប់ត្រឹមថ្ងៃទី24 ខែសីហា ឆ្នាំ2019ជាកំហិត។

ឯកឧត្តម នេត្រ ភក្ត្រា អ្នកនាំពាក្យក្រសួងបរិស្ថានបានលើកឡើងថា ការសម្រេចនេះគឺ យោងតាមបញ្ញត្តិស្តីពីទោសទណ្ឌដែលមានចែងក្នុងច្បាប់ជាធរមាន និងស្របតាមអនុសញ្ញាបាសែលស្តីពីការត្រួតពិនិត្យ ចលនាដឹកជញ្ជូន និងការបោះបង់ចោលសំណល់គ្រោះថ្នាក់ឆ្លងដែន។ ឯកឧត្តមបន្តថា បើតាមការស្រាវជ្រាវ និងពិសោធន៍កាកសំណល់ ប្លាស្ទិកចំនួន 83កុងតឺន័រ ទម្ងន់ 1,592 តោន គឺមិនមានផលប៉ះពាល់ដល់សុខភាព និងបរិស្ថាននោះទេ។

យោងតាមសេចក្តីប្រកាសព័ត៌មានរួមរវាងក្រសួងបរិស្ថាន និងអគ្គនាយកដ្ឋានគយ និងរដ្ឋាករកម្ពុជា នៅថ្ងៃទី30 ខែកក្កដា ឆ្នាំ2019នេះ បានឱ្យដឹងថា មុនយកមកទម្លាក់ចោលនៅកម្ពុជា កាក សំណល់ប្លាស្ទិក 83កុងតឺន័រ គឺបានឆ្លងកាត់កំពង់ផែប្រទេសសិង្ហបុរី (22ជើង) ម៉ាឡេស៊ី (2ជើង) និងវៀតណាម (3ជើង)។

ក្នុងសេចក្តីប្រកាសព័ត៌មាននេះបន្តថា ទំនិញជាកាកសំណល់ប្លាស្ទិកបាននាំចូលមកជាច្រើនជើង តាមនាវាដឹកជញ្ជូនចំនួន (27លើក) មកដល់ និងសំចតនៅទីលានកំពង់ផែស្វយ័តខេត្តព្រះសីហនុ ដែលលើកទី1 នាខែកញ្ញា ឆ្នាំ2018 និងលើកចុងក្រោយនាខែមករា ឆ្នាំ2019 សរុបទាំងអស់ចំនួន 83កុងតឺន័រ។ ក្នុងនោះមានកុងតឺន័រចំនួន 70 (ទម្ងន់ 1322តោន) បាននាំចេញមកពីសហរដ្ឋអាមេរិក និងកុងតឺន័រចំនួន 132 (មានទម្ងន់ 270តោន) បាននាំចេញមកពីប្រទេសកាណាដា។

សូមបញ្ជាក់ថា កាកសំណល់បា្លស្ទិកដែលមានទម្ងន់ 1,592តោននេះត្រូវបាននាំមកដល់កំពង់ផែអន្តរជាតិក្រុងព្រះសីហនុ ដោយមានក្រុមហ៊ុន CHUNGYEN PLASTIC MANUFACTURE CO., LTD ជាអ្នកទទួលទំនិញ។ ក្រុមហ៊ុននេះមានប្រធានជាជនជាតិខ្មែរ ហើយបានចុះបញ្ជីនៅក្រសួងពាណិជ្ជកម្ម នៅថ្ងៃទី20 ខែកក្កដា ឆ្នាំ2018៕

July 31, 2019

កម្ពុជាបានបង្កើនទុនបម្រុងអន្តរជាតិដុលកើនដល់ប្រមាណ 11.1 ប៊ីលានដុល្លារ

កម្ពុជាមានទុនបម្រុងអន្តរជាតិកើនដល់ប្រមាណ 11.1ប៊ីលានដុល្លារអាមេរិក ដែលអាចធានាការចូលទំនិញ និងសេវាសម្រាប់គ្រាបន្ទាប់បានរយៈពេលប្រមាណ 5ខែ ហើយកម្រិតខ្ពស់នៃទុនបម្រុងអន្តរជាតិបានពង្រឹងជំនឿទុកចិត្តដល់វិនិយោគិនមកលើភាពធន់នៃសេដ្ឋកិច្ចកម្ពុជា។ នេះបើយោងតាមអគ្គនាយិកាបច្ចេកទេសនៃធនាគារជាតិនៃកម្ពុជា។

លោកជំទាវ ជា សិរី អគ្គនាយិកាបច្ចេកទេសនៃធនាគារជាតិបានថ្លែងថា៖«ធនាគារជាតិនៃកម្ពុជាបានបង្កើនទុនបម្រុងអន្តរជាតិដុល កើនដល់ប្រមាណ 11.1ប៊ីលានដុល្លារ។ ដូច្នេះក្នុងករណីកម្ពុជាមានវិបត្តិ ឬក៏មានការហ៊ុមព័ទ្ធសេដ្ឋកិច្ចណាមួយ កម្ពុជានឹងមានលទ្ធភាពទប់ទល់បញ្ហាទាំងនោះបានរយៈពេលប្រមាណ 5ខែ ដែលអាចឱ្យរដ្ឋាភិបាលពិភាក្សាដើម្បីរកដំណោះស្រាយ ឬចរចាផ្នែកសេដ្ឋកិច្ចជាមួយនឹងបណ្ដាប្រទេសផ្សេងៗបាន»។

លោកជំទាវ បានបន្ថែមថា៖«ការបង្កើតទុនបម្រុងអន្តជាតិនេះ ក៏ជួយជំរុញ និងផ្តល់ទំនុកចិត្តដល់វិនិយោគិនបរទេសឱ្យមកវិនិយោគនៅកម្ពុជាផងដែរ ព្រោះវិនិយោគិនទាំងនោះ នឹងមានភាពជឿជាក់លើប្រាក់រៀលរបស់ធនាគារកណ្ដាល ខណៈមានទុនបម្រុងខ្ពស់ដែលអាចធានាបាននូវស្ថិរភាពហិរញ្ញវត្តុ និងអត្រាប្តូរប្រាក់ក្នុងទីផ្សារ»។

ឯកឧត្តម ជា ចាន់តូ អគ្គទេសាភិបាលនៃធនាគារជាតិក៏បានមានប្រសាសន៍ដែរថា៖« សេដ្ឋកិច្ចកម្ពុជាបន្តមានវឌ្ឍនភាពល្អប្រសើរ ដែលទទួលបានភាពអំណោយផលទាំង2 គឺកត្តាខាងក្រៅ និងខាងក្នុង។

1-កត្តាគាំទ្រខាងក្រៅរួមមាន៖ កំណើនតម្រូវការចំពោះផលិតផលនាំចេញរបស់កម្ពុជា លំហូរចូលនៃវិនិយោគទុនបរទេស និងកំណើនក្នុងវិស័យទេសចរណ៍។
2-កត្តាខាងក្នុង៖ គឺស្ថិរភាពដ៏រឹងមាំ នៃសុខសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងហិរញ្ញវត្ថុ ភាពអំណោយផលនៃបរិយាកាសវិនិយោគ និងធុរកិច្ច ការធ្វើពិពិធកម្មមូលដ្ឋានកំណើន និងការកែទម្រង់ស៊ីជម្រៅរបស់រាជរដ្ឋាភិបាល»។

ឯកឧត្តម បានបញ្ជាក់ថា៖«អតិផរណាមានកម្រិតទាប អត្រាប្តូរប្រាក់មានស្ថិរភាពល្អប្រសើរ ហើយទុនបម្រុងអន្តរជាតិត្រូវបានគរពូនឱ្យកើនឡើងខ្ពស់ដែលបានចូលរួមពង្រឹងស្ថិរភាពម៉ាក្រូសេដ្ឋកិច្ច និងហិរញ្ញវត្ថុ។ លើសពីនេះ វិស័យធនាគារ និងហិរញ្ញវត្ថុកម្ពុជាបានបន្តដើរតួនាទីយ៉ាងសកម្មក្នុងការជំរុញកំណើនសេដ្ឋកិច្ច កាត់បន្ថយភាពក្រីក្រ និងវិសមភាព។ បច្ចុប្បន្ន សេវាហិរញ្ញវត្ថុបានពង្រីកវិសាលភាពទូទាំងប្រទេស ហើយបានផ្តល់ឱកាសដល់ប្រជាជនកាន់តែច្រើនក្នុងការពង្រីកសកម្មភាពសេដ្ឋកិច្ចសម្រាប់លើកស្ទួយជីវភាពរស់នៅឱ្យកាន់តែប្រសើរ»៕

July 31, 2019

ញាក់សាច់!! ទើបតែលើកពានឈុតបុរាណហើយក្ដៅៗ កញ្ញា វណ្ណា វត្តី ចេញបទថ្មីសិចស៊ីស្ទីលប្លែកៗ

អ្នកណាមិនសរសើរ កញ្ញា វណ្ណា វត្តី ខណៈស្លៀកបុរាណចំបុរាណ លេងស្ទីលសម័យសិចស៊ីតាមកាលៈទេសៈ។

គ្មានអ្នកមិនដឹងនោះទេ ថាតារាសម្ដែង និងជាតារាចម្រៀង កញ្ញា វណ្ណា វត្តី បានក្លាយជាម្ចាស់ពានគ្រងឈុតបុរាណ នៅក្នុងព្រឹត្តិការណ៍ការប្រកួតឈុតបុរាណ របស់គ្រួសារតារាកម្ពុជា កាលពីដើមខែកក្កដា ឆ្នាំ២០១៩ និងត្រូវបានតែងតាំងជាទូតសុឆន្ទ: ផ្នែកសប្បុរសធម៌។ ប៉ុន្តែមុននេះបន្តិចកញ្ញា បានចេញបទ “សារគ្រប់ប្រភេទ” ដែលជាប្រភេទបទរ៉េប និងមានស្ទីលសិចស៊ី បែកស្លុយញាក់សាច់ ដែលមានរសជាតិដាច់គ្នាទាំងស្រុង ពីការលេងខ្លួនបែបឈុតបុរាណ ដែលនាងឈ្នះពាន។

បទចម្រៀងដែលទើបបង្ហោះក្ដៅៗនេះ សុទ្ធតែធ្វើឲ្យម្នាក់ៗភ្ញាក់ព្រឺត ដោយសារតែគេទើបតែឃើញនាងលេងស្ទីលស្រគត់ស្រគំ ជាមួយនឹងការឈ្នះពាន ក្នុងឈុតព្រះនាងទេពអប្សរាថ្មីៗ។ យ៉ាងណាមិញស្ទីលថ្មី ដែលនាងបង្ហាញឡើង ក៍ស្ដែងយ៉ាងច្បាស់ថា នាងជាសិល្បការិនីមួយរូប ដែលលេងខ្លួនបែបទម្រង់បុរាណក៏ស្អាតលេចធ្លោ និងបែបសម័យក៍កាលីពទាន់សម័យផងដែរ ខណ:ដែលសមត្ថភាពរ៉េប ក្នុងចម្រៀងរបស់នាង ក៏ពិរោះប្លែកត្រចៀក។

វណ្ណា វត្តី និយាយថា ចម្រៀង “សារគ្រប់ប្រភេទ” របស់នាង ត្រូវបានរៀបចំតាំងពីពេលមុនប្រទ្បងឈុតបុរាណមកម្លេះ មិនមែនទើបតែផលិត និងថតច្រៀងក្រោយពេលមានឈ្មោះ ជាតារាជាប់ពានខាងផ្នែកឈុតបុរាណនោះទេ។ នាងថា ក្នុងនាមជាសិល្បការិនីមួយរូប ត្រូវតែមានស្ទីលប្លែកៗ កប់សារីបង្ហាញមហាជន ប៉ុន្តែក៏មិនហ៑ានសិចស៊ីហួសហេតុ ដែលនាំឲ្យមានការរិះគន់នោះដែរ។ កញ្ញា ក៏គម្រោងនឹងចេញបទយុវវ័យបន្តបន្ទាប់ អមដោយស្ទីលប្លែកៗ បន្ទាប់ពីបទ”សារគ្រប់ប្រភេទ”ចេញបង្ហោះវាយលុកទីផ្សារនេះផងដែរ។

គួរបញ្ជាក់ផងដែរថា តារាចម្រៀង និង ជាតារាសម្ដែង កញ្ញា វណ្ណា វត្តី ត្រូវបានតែងតាំងជាទូតសុឆន្ទ: ឬ Brand Ambassador ប្រចាំគ្រួសាររយ:ពេលមួយឆ្នាំ ដោយកញ្ញា នឹងត្រូវបំពេញការងារក្នុងនាមជាអ្នកលើកស្ទួយវប្បធម៌ និងការងារសប្បុរសធម៌ជាច្រើន ក្នុងរយ:ពេលស្ថិតនៅជាទូតសុឆន្ទ:របស់គ្រួសារតារាកម្ពុជានេះ។ ជាក់ស្ដែងកញ្ញា ទើបតែបានគ្រងឈុតបុរាណ បង្អួតពីតំណែងថ្មីរបស់ខ្លួន នៅលើកញ្ចក់ទូរទស្សន៍ជាច្រើនប៉ុស្តិ៍ ជាមួយម្ចាស់ពានផ្សេងទៀតប៉ុណ្ណោះ៕

July 31, 2019

ចុះឈ្មោះបុត្រ-ធីតាចូលរៀននៅវេសឡាញស្មើនឹងសិក្សាបានមួយគ្រួសារ

ការផ្តល់ឱ្យកូននូវការអប់រំល្អ ជាកាតព្វកិច្ចធំមួយក្នុងចំណោមកាតព្វកិច្ចសំខាន់ៗជាច្រើនផ្សេងទៀតរបស់អាណាព្យាបាលក្នុងការចិញ្ចឹមបីបាច់កូនឱ្យក្លាយជាមនុស្សប្រកបដោយសក្តានុពល និងមានគុណភាពជីវិតខ្ពស់ម្នាក់។

លោក ប៉ិច ប៉ូឡែន អគ្គនាយកនៃក្រុមហ៊ុនវេស្ទឡាញ អេឌ្យូខេសិនគ្រុប បានលើកឡើងថា ការអប់រំជារឿងសំខាន់ណាស់ក្នុងការអភិវឌ្ឍគុណភាពជីវិតរបស់កុមារ និងយុវជន។ ដើម្បីឱ្យកុមារទទួលបានការអប់រំគ្រប់ជ្រុងជ្រោយ លុះត្រាតែកុមារទទួលបានការអប់រំពីគ្រឹះស្ថានអប់រំដែលល្អ ហើយថែមទាំងរស់នៅក្នុងសង្គមគ្រួសារដែលមានបរិស្ថានល្អផងដែរ។ ជាធម្មតាសាលាបណ្តុះបណ្តាលចំណេះ ជំនាញ និងចិត្តគំនិតមួយផ្នែក តែសិស្សក៏អាចទទួលរងឥទ្ធិពលទាំងវិជ្ជមាន និងអវិជ្ជមានមួយផ្នែកធំផងដែរពីគ្រួសារ។ ហេតុនេះ ការជំរុញឱ្យអាណាព្យាបាលទទួលបានចំណេះដឹងក្នុងការគ្រប់គ្រងល្អ មានសេចក្តីសុខ និងលទ្ធភាពល្អ ជាការចូលរួមយ៉ាងសំខាន់ក្នុងការបំពេញបន្ថែមលើការអភិវឌ្ឍសមត្ថភាពរបស់កុមារ និងយុវជនឱ្យកាន់តែគ្រប់ជ្រុងជ្រោយ។

លោក ប៉ិច ប៉ូឡែន បានមានប្រសាសន៍ថា៖ “កុមារ និងយុវជន ជាវ័យដែលងាយនឹងប៉ះទង្គិចខ្លាំងណាស់ ហើយប្រភពព័ត៌មានដែលគេបានជួបពីគ្រប់មជ្ឈដ្ឋាន ទាំងស្ថាប័នអប់រំ និងក្នុងគ្រួសារ នឹងក្លាយជាចំណុចដែលអាចផ្លាស់ប្តូរជីវិតរបស់គេឱ្យក្លាយជាមនុស្សវិជ្ជមាន ឬអវិជ្ជមានបាននៅថ្ងៃអនាគត”។

ស្ថាបិកស្ថាប័នអប់រំខាងលើបានលើកឡើងផងដែរថា ប្រសិនបើសិស្សានុសិស្សរស់នៅក្នុងសង្គមគ្រួសារមួយដែលពោរពេញដោយអំពើហិង្សា ទម្លាប់មិនល្អ ឬអាណាព្យាបាលដែលខ្វះជំនាញភាពជាអាណាព្យាបាល(parenting skills) នោះពួកគេក៏មិនអាចតាំងចិត្តឱ្យស្ងប់ដើម្បីរៀនសូត្រឱ្យបានពូកែដែរ តែប្រសិនបើពួកគេរស់នៅក្នុងគ្រួសារដែលពោរពេញទៅដោយទម្លាប់ល្អ មានភាពកក់ក្តៅ ទទួលបានការផ្តល់ឱកាស និងការយល់ចិត្តខ្ពស់ពីអាណាព្យាបាល ពួកគេក៏អាចអភិវឌ្ឍខ្លួនបានខ្លាំងទាំងសមត្ថភាពចំណេះដឹង និងអត្តចរិត។

ដោយមើលឃើញពីសារៈសំខាន់នៃការចូលរួមចំណែកពីគ្រួសារនេះ វេសឡាញបានផ្តល់ជូននូវកម្មវិធីចុះឈ្មោះបុត្រធីតាសិក្សាបានមួយគ្រួសារ ដើម្បីផ្តល់ឱកាសឱ្យអាណាព្យាបាលទទួលបានវគ្គបណ្តុះបណ្តាលសំខាន់ៗសម្រាប់ជំរុញឱ្យការរស់នៅកាន់តែប្រសើរឡើង។ ចាប់ពីថ្ងៃនេះទៅ ឪពុកម្តាយគ្រាន់តែចុះឈ្មោះចូលរៀនឱ្យសិស្ស ឬកូនណាម្នាក់ក៏ដោយ ក៏អាចទទួលបានវគ្គសិក្សាលើមេរៀនជាច្រើនដូចជា ទី1 ទម្លាប់ល្អទាំង7 សម្រាប់គ្រួសារ និងយុវជន។ ទី2 វគ្គបណ្តុះបណ្តាលអភិវឌ្ឍន៍អាជីពការងារ។ ទី3 វគ្គបណ្តុះបណ្តាលអភិវឌ្ឍអាជីវកម្ម និងទី4 ការប្រឹក្សាយោបល់ផ្នែកអប់រំ និងចិត្តសាស្ត្រ។

សាលារៀន វេសឡាញ និងណត្សឡាញន៍ ចាប់ផ្តើមចុះឈ្មោះចូលរៀនពីថ្ងៃនេះតទៅ និងចូលរៀនកម្មវិធីមត្តេយ្យ ភាសាអង់គ្លេស និងភាសាចិននៅថ្ងៃទី1 ខែសីហា ឆ្នាំ2019 និងថ្នាក់ចំណេះដឹងទូទៅខ្មែរចូលរៀននៅថ្ងៃទី2 ខែកញ្ញា ឆ្នាំ2019៕

July 31, 2019

Oppo Reno 10x Zoom ម៉ូដែលពិសេស FC Barcelona Edition នឹងប្រកាសតម្លៃឆាប់ៗនេះ

ថ្មីៗនេះក្រុមហ៊ុន Oppo បានបញ្ចេញផលិតផលថ្មីម៉ូដែលពិសេសដែលមានត្រឹមតែ 68គ្រឿងប៉ុណ្ណោះ សម្រាប់ទីផ្សារប្រទេសកម្ពុជា ហើយមានតែនៅលើ OPPO Reno FC Barcelona Edition តែ 1គត់។

OPPO Reno 10X Zoom FC Barcelona Edition មានលក្ខណសម្បតិ្តដូចគ្នាទៅនឹងស៊េរី OPPO Reno 10X ZOOM ធម្មតាដែរ គ្រាន់តែវាមានរូបរាងទាក់ទាញជាង ជាមួយនឹងការផលិតមានកំណត់ វាមានអេក្រង់លាតពេញ ទំហំ 6.6អ៊ីញ ជាប្រភេទកញ្ចក់ AMOLED អាចបង្ហាញរូបភាពក្នុងកម្រិត Full HD+ និងមានកម្រិត Aspect Ratio 19.5:9 ឯផ្ទៃខាងមុខរបស់វាអាចលាតបានដល់ទៅ 93.1ភាគរយ និងការពារដោយកញ្ចក់ Gorilla Glass 6 ជំនាន់ក្រោយផងដែរ។

សម្រាប់កាមេរ៉ា 3គ្រាប់នៅផ្នែកខាងក្រោយរបស់ស្មាតហ្វូនស៊េរីថ្មីនេះ រួមមានកាមេរ៉ាទំហំ 48 MP ជាកាមេរ៉ាមេ ប្រើប្រាស់សេនស័រ Sony IMX586 មានកម្រិត Aperture f/1.7 កាមេរ៉ាទំហំ 8MP ជាកាមេរ៉ាពង្រីកមុំថត ឬ (Wide Angle Camera) បូកជាមួយនឹងកាមេរ៉ាទំហំ 13MP ជាកាមេរ៉ា Zoom ប្រវែងវែង ឬ (Telephoto Camera) ផ្សំនឹងមុខងារ OIS (Optical Image Stabilization) ដើម្បីកាត់បន្ថយរំញ័រផងដែរ។

រីឯកាមេរ៉ាខាងមុខវិញ នៅតែរក្សាទម្រង់ដដែល គឺទំហំ 16MP អមដោយ Flash LED 1គ្រាប់ ដោយផុសចេញមកក្រៅបែបបញ្ឆិតដូចទ្វារថយន្តស្ព័រតម្លៃថ្លៃ។

ចំពោះតម្លៃនឹងប្រកាសនាពេលឆាប់ៗខាងមុខនេះ...

July 30, 2019

Category: សង្គម និងសេដ្ឋកិច្ច