សង្គម និងសេដ្ឋកិច្ច - La Reine Media

ម្នាស់ជាបន្លែ និងជាផ្លែឈើដែលទីផ្សារត្រូវការរៀងរាល់ថ្ងៃ

ម្នាស់ជារុក្ខជាតិមួយប្រភេទដែលងាយស្រួលដាំ ដោយសារវាលូតលាស់លឿន និងឆាប់ឱ្យផល តែក៏មិនស្រួលក្នុងការថែទាំប៉ុន្មានដែរ ទាល់តែមានបទពិសោធទើបអាចដាំបានផលល្អ និងអាស្រ័យលើប្រភេទពូជ និងបច្ចេកទេសដាំដុះទៀតផង។ ទោះបីជាយ៉ាងណាក្តី ដំណាំម្នាស់ត្រូវបានប្រជាពលរដ្ឋចូលចិត្តដាំនៅគ្រប់ខេត្តក្រុងនៅក្នុងប្រទេសកម្ពុជាពិសេសម្នាស់ទឹកឃ្មុំ ដោយសារតែវាអាចរស់បាននៅក្នុងតំបន់ដែលមានសីតុណ្ហភាពមធ្យមពី26 ទៅ 28អង្សាសេ។ ដោយឡែកដំណាំនេះកំពុងត្រូវបានប្រជាពលរដ្ឋសហគមន៍សំបូរមានជ័យនាំគ្នាដាំដើម្បីផ្គត់ផ្គង់តម្រូវការទីផ្សារផងដែរ។

លោក ឆេង ថុង ប្រធានសហគមន៍សំបូរមានជ័យ ស្រុកស្ទឹងត្រង់ ខេត្តកំពង់ចាម បានប្រាប់កាសែតឡារ៉ែន ពាណិជ្ជថា សហគមន៍របស់លោកមិនមែនមានដាំតែដំណាំតែមួយមុខទេ តែសហគមន៍របស់លោកនៅមានចម្ការធំៗជាច្រើនទៀត ដូចជាដើមកៅស៊ូ ស្វាយចន្ទី ស្រូវ និងបន្លែបន្ទាប់បន្សំដែលរួមមាន ម្ទេស ម្ទេសប្លោក ត្រប់ស្រួយ ចេក ម្នាស់ ផ្កាខាត់ណា ខ្ទឹមបារាំង ក្រូចឆ្មារ និងស្លឹកគ្រៃផងដែរ។

លោកថុង បានមានប្រសាសន៍ថា៖“ដើមម្នាស់គេអាចបណ្តុះដោយគ្រាប់(គ្រាប់ម្នាស់នៅក្នុងភ្នែកម្នាស់) រួចយកកូនទៅដាំកូន ឬអាចដាំដោយដើមម្នាស់ដែលនៅខាងចុងផ្លែ ឬខ្នែងដែលនៅលើដើមម្នាស់ក៏បាន។ បច្ចុប្បន្នខ្មែរយើងមានបច្ចេកទេសដាំម្នាស់តែក្នុងរយៈពេល 6ខែ ទៅ 7ខែប៉ុណ្ណោះ គឺអាចឱ្យវាចេញផ្លែ(ក្ដិប)បានហើយ និងបន្តពីនោះត្រឹមតែ 2-3ខែទៀតប៉ុណ្ណោះ ផ្លែម្នាស់នឹងទុំ និងអាចប្រមូលផលបានហើយ”។

ដំបូងត្រូវភ្ជួរដីឱ្យបាន 2 ទៅ 3ដង និងរាស់ដីឱ្យម៉ដ្ឋហើយហាលដីឱ្យឆ្អិនទើបធ្វើការដាំដុះបាន។ ដើមម្នាស់មិនអាចរស់បាននៅលើដីដែលលិចទឹកបានទេ ដូច្នេះទើបគេច្រើនដាំម្នាស់នៅរដូវរងារ ឬរដូវប្រាំង(រដូវដែលមិនសូវមានភ្លៀងធ្លាក់)។ បន្ទាប់ពីភ្ជួរ រាស់និងហាលដី 3ដងរួចហើយ គេត្រូវពូនដីជារងដែលមានកម្ពស់ពី2 ទៅ 3តឹក ទទឹង 7តឹក និងបណ្ដោយតាមប្រវែងដី ដោយទុកចន្លោះឆ្ងាយពីរងមួយ ទៅទីរងមួយចម្ងាយ 6តឹក ទៅ 7តឹក និងក្នុង មួយរងគេអាចដាំដើមម្នាស់បាន 2ជួរ។

គេត្រូវជ្រើសរើសកូនម្នាស់ណាដែលល្អមុននឹងយកទៅដាំ។ មុននឹងដាំ គេត្រូវបាចជី ឬកប់ជីទ្រាប់បាតដី ហើយជីទ្រាប់បាតដីនោះ គេត្រូវជ្រើសរើសយកប្រភេទជីធម្មជាតិទើបជាការល្អ ឬអាចប្រើជី NPK ក៏បានដែរ រួចហើយគេត្រូវរាយទុយោទឹកដើម្បីបន្តក់ទឹកលើកូនម្នាស់ទៅតាមជួរ និងគ្របថង់ខ្មៅពីលើដែលមានចោះប្រហោងសម្រាប់ឱ្យកូនម្នាស់លូតលាស់ឡើង និងនៅឆ្ងាយពីគ្នាពី 1ដើម ទៅ 1ដើមប្រមាណជា 60សង់ទីម៉ែត្រ 4ជ្រុង និងមានដង់ស៊ីតេដាំប្រមាណជា 55,000គុម្ពក្នុង 1ហិកតា ឬក្នុងដីមួយរ៉ៃ(40ម៉ែត្រ4ជ្រុង)គេអាចដាំបាន 13000កូន។

ការដាំដុះ ស្រោចទឹក និងដាក់ជី គឺគេត្រូវធ្វើបន្ទាប់ពីដាក់ដាំរួច រហូតដល់កូនម្នាស់អាយុបាន 6ខែ ទៅ 7ខែ ហើយបើដើមម្នាស់មានការលូតលាស់ល្អគេអាចបញ្ជាឱ្យចេញផ្លែបាន និង2 ឬ 3ខែ ក្រោយផ្លែម្នាស់នឹងចាស់ ឬស្រគាលទើបគេអាចកាត់យកទៅលក់បាន។ លោក ឆេងថុង បានប្រាប់ឱ្យដឹងថា សហគមន៍របស់លោកអាចបេះផ្លែម្នាស់យកទៅលក់បានប្រមាណជា2 ទៅ 3តោនក្នុង 1ថ្ងៃ នៅពេលដែលវាចាប់ផ្តើមផ្តល់ផលពេញទំហឹង។

ពូជម្នាស់ទឹកឃ្មុំនេះនៅពេលយើងដាំរួចម្តងហើយ យើងមិនអាចដាំបន្តទៀតបានទេ លុះត្រាតែរកដីថ្មីទៀតដាំទើបម្នាស់ពូជនេះ ទទួលបានផលល្អហើយទាល់តែឆ្នាំបន្ទាប់មកទៀត ទើបយើងអាចវិលមកដាំលើដីចាស់វិញបាន។ នេះជាវិធីសាស្ត្រមួយដែលយើងកែលម្អដីដើម្បីឱ្យអាច ដំណាំម្នាស់នេះបានតទៅទៀតនៅលើដីចាស់។ ដំណាំម្នាស់នេះ គេត្រូវការប្រើដើមទុនច្រើន ក្នុងការថែទាំ តែក៏អាចរកចំណូលបានច្រើនពីម្នាស់ទឹកឃ្មុំនេះបានដែរ។លោក ឆេង ថុង បានឱ្យដឹងទៀតថា សហគមន៍របស់លោកមានចម្ការម្នាស់ទឹកឃ្មុំ នៅលើផ្ទៃដីប្រមាណជា 4ហិកតា(1ហិកតាស្មើនឹងជាង 50,000ដើម) ឬប្រមាណជាជាង 200,000 ដើម ស្ថិតក្នុងភូមិសំបូរ ឃុំសូភាស ស្រុកស្ទឹងត្រង់។ បច្ចុប្បន្នផ្ទៃដី 4ហិកតាដែលដាំម្នាស់របស់លោកនេះ អាចរកប្រាក់ចំណូលបានច្រើនល្មមគ្រប់គ្រាន់ក្នុង1រដូវ។

ដោយឡែករឿងតម្លៃនៅលើទីផ្សារវិញ លោកឆេង ថុង បានប្រាប់កាសែត ឡារ៉ែន ពាណិជ្ជថា៖“ម្នាស់ទឹកឃ្មុំ គឺជាផ្លែឈើដែលមានតម្លៃខ្ពស់ ដោយអាចលក់ចេញបានក្នុង1ឡូ(12ផ្លែ) តម្លៃ24,000រៀល និងលក់បោះដុំនៅនឹងចម្ការតែម្ដងបានតម្លៃ 20,000រៀលដែរក្នុង 1ឡូ ដោយសារតែផ្លែឈើប្រភេទនេះយើងអាចលក់បានថ្លៃគួរសម និងពុំសូវមានការប្រែប្រួលតម្លៃខ្លាំងប៉ុន្មានទេ។បន្ថែមលើនេះដើមរបស់វា ខ្ញុំអាចលក់ទៅឱ្យសួនសត្វ សម្រាប់ធ្វើជាចំណីសត្វដំរីបានក្នុង 1តោន តម្លៃ 13ម៉ឺនរៀលដែរដែលចំការម្នាស់របស់យើងអាចប្រមូលបានប្រមាណជា 40តោនដែរក្នុងមួយរដូវដែលស្មើនឹងជាង 5លានរៀល”។

បច្ចុប្បន្នម្នាស់ទឹកឃ្មុំរបស់សហគមន៍សំបូរមានជ័យ ត្រូវបានផ្គត់ផ្គង់ទៅឱ្យផ្សារ MACRO នៅភ្នំពេញ និងផ្សារទំនើបជាច្រើនទៀត និងដោយសារតែវាមានតម្រូវការច្រើននៅតាមភោជនីយដ្ឋាន និងសណ្ឋាគារធំៗ ទើបមានឈ្មួញមកទទួលយកដល់កន្លែងតែម្ដងក៏មាន។

លោកបានប្រាប់កាសែត ឡារ៉ែន ពាណិជ្ជ ទៀតថា៖“សហគមន៍របស់ខ្ញុំ ក៏មានគោលបំណងពង្រីកការដាំដុះបន្ថែមទៀតដែរ ជាពិសេសម្នាស់ទឹកឃ្មុំនេះតែម្ដង ដើម្បីផ្គត់ផ្គង់ទីផ្សារដែលកំពុងមានតម្រូវការខ្លាំង តែពេលនេះដីដែលត្រូវពង្រីកសម្រាប់ការដាំម្នាស់ទឹកឃ្មុំនេះកំពុងជាប់ប្រើប្រាស់សម្រាប់ដំណាំផ្សេងទៀត ដែលមិនអាចឱ្យសហគមន៍សំបូរមានជ័យយើងពង្រីកការដាំដំណាំម្នាស់ទឹកឃ្មុំនេះបានទៀត”៕

August 1, 2019

រំជើបរំជួល!! Fast & Furious: Hobbs and Shaw បញ្ចាំងថ្ងៃដំបូងនៅលើអេក្រង់ IMAX

នៅថ្ងៃពុធទី ៣១ ខែកក្កដាឆ្នាំ ២០១៩ នេះ កំពូលភាពយន្ដល្បីល្បាញធ្លាប់កើបប្រាក់រាប់លានដុល្លារបានវិលត្រឡប់មកវិញ មានចំណងជើងថា Fast & Furious : Hobbs & Shaw ពីផលិតកម្ម Universal Studio ត្រូវបានបញ្ចាំងថ្ងៃដំបូងនៅលើអេក្រង់ IMAX ក្នុងរោងភាពយន្ត Major Cineplex by Smart Cambodia AEON Mall សែនសុខ បានធ្វើឱ្យអ្នកគាំទ្រពុះកញ្ច្រោលសឹងតែទប់កៅអីមិនជាប់។

Fast & Furious : Hobbs & Shaw (ត្រូវបានគេស្គាល់ជាទូទៅថា Hobbs & Shaw) គឺជាខ្សែភាពយន្តបែបសកម្មអាមេរិកឆ្នាំ ២០១៩ ដឹកនាំដោយកំពូលអ្នកជំនាញផលិតកុន David Leitch និងនិពន្ធសាច់រឿងដោយ Chris Morgan និង Drew Pearce ផ្អែកលើរឿងរបស់ Morgan ។ សាច់រឿងទាំងមូលបានលាតត្រដាងអំពីសិល្បៈនៃការបើករថយន្ដល្បឿនលឿន និងជម្លោះរវាង Luke Hobbs និង Deckard Shaw ដែលអ្នកទាំងពីរជាតួឯកប្រុសនៅក្នុងរឿង ។ យ៉ាងណាមិញ តួអង្គ Dwayne Johnson ត្រូវបានសម្ដែងជា Hobbs និង Jason Statham សម្ដែងជា Shaw។

សូមជម្រាបផងដែរថា ប្រសិនបើអ្នកគាំទ្រទាំងអស់បានទៅទស្សនាខែ្សភាយយន្ដនេះ សូមកុំរំលងក្រេឌីដស៊ីនចំនួន ៣ នៃចុងបញ្ចប់សាច់រឿង នោះអ្នកនឹងដឹងថា និងមានអ្វីហួសចិត្តនឹកស្មានមិនដល់។ ភាពយន្ដនេះ មានដាក់បញ្ចាំងពីថ្ងៃនេះតទៅនៅរោងភាពយន្ដ Major Cineplex by Smart ៕

August 1, 2019

ការវិនិយោគលើដីទំនេរ នៅតែមានផលចំណូលខ្ពស់

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងបញ្ជាក់អំពី “ស្ថានភាពវិស័យអចលនទ្រព្យរបស់កម្ពុជា” ពិសេសកំណើននៃការវិនិយោគលើដីទំនេរដែលនៅតែមានផលចំណូលគួរឱ្យកត់សម្គាល់។

លោក ច្រឹក សុខនីម បានឱ្យដឹងថា៖ “សម្រាប់វិស័យដីធ្លី ឬដីទំនេរនៅក្នុងប្រទេសកម្ពុជាយើងមានសក្តានុពលច្រើនណាស់ ហើយក៏អាចរកចំណូលបានប្រាក់ច្រើនដែរពាក់ព័ន្ធនឹងការវិនិយោគពីវិស័យដីធ្លីនេះ ពីព្រោះដីទំនេរយើងទិញទុកក្នុងរយៈពេលពី5 ទៅ10ឆ្នាំគាត់នឹងទទួលបានផលចំណូលពីការវិនិយោគហ្នឹងខ្ពស់ បើធៀបទៅនិងប្រទេសជិតខាងនៃបណ្តាប្រទេសអាស៊ាន”។

លោក សុខនីម បានមានប្រសាសន៍ថា៖“ការវិនិយោគលើដីទំនេរ បើយើងនិយាយអំពីតំបន់អាស៊ានថៃ វៀតណាម គេដើរមុនយើង ដូចជានៅទីក្រុងហូជីមិញ និងទីក្រុងបាងកក តម្លៃដីគេមានតម្លៃថ្លៃជាងយើងគុណ 1ជា2។ តម្លៃមានការកើនឡើង និងសក្តានុពលនៅកើនឡើងខ្លះមែន តែមិនកើនឡើងដូចយើងទេ។ តម្លៃសេដ្ឋកិច្ចយើង វាមានសក្តានុពលអភិវឌ្ឍន៍ខ្ពស់ ដោយសារតែប្រទេសយើងកំពុងអភិវឌ្ឍន៍ ដូច្នេះរកស៊ីនៅតែបានល្អ ដោយឡែកតម្លៃអចលនវត្ថុក៏កើនឡើងដែរ។ បើថៃ និងវៀតណាមមានតម្លៃ 10,000$ យើងនៅត្រឹមតម្លៃ 5,000-6,000$ ឬអាចនៅកន្លែងខ្លះមានតម្លៃ10,000$ ក៏មាន តែគិតជាមធ្យម តម្លៃយើងប្រហែល 5,000$ ឯគេប្រហែលជា12,000-13,000$”។

លោក ច្រឹក សុខនីម បានបញ្ជាក់ថា៖ “សក្តានុពលតម្លៃ កន្លែងពាណិជ្ជកម្ម Commercialល្អៗ សម្រាប់ 5ឆ្នាំ ទៅ 10ឆ្នាំខាងមុខទៀតក៏នៅតែឡើង តែការឡើងលឿន គឺពីឥឡូវទៅ 5ឆ្នាំជាកម្រិត ខ្ញុំត្រូវគិតថាជាមធ្យមពី 10 ទៅ 15%ក្នុង1ឆ្នាំ។ កន្លែងខ្លះអាចលើសពីហ្នឹង តែក៏អាចតិចជាងហ្នឹងដែរ ប៉ុន្តែមូលហេតុអ្វីបានជាដូច្នេះ? គឺដោយសារតែតំបន់ Commercial ធំៗទាំងនោះ ខ្លះគាត់បានអភិវឌ្ឍនាំឱ្យកំណើននៃការអភិវឌ្ឍក៏កាន់តែរីកចម្រើន ធ្វើឱ្យរបស់ហ្នឹងកាន់តែកម្រទៅ។ ដោយឡែកបើគិតថា តម្លៃ5,000ក្នុង 1ម៉ែត្រការ៉េ ថ្លៃ តែបើគាត់សាងសង់ 40 ឬ50ជាន់ (1ជាន់ថ្លៃ1ការ៉េ100) អុីចឹងតម្លៃដីនៅតែធូរថ្លៃ។ អ្វីក៏ដោយ វាជាតម្លៃសេដ្ឋកិច្ច វាអាស្រ័យទៅលើការប្រើប្រាស់របស់អចលនទ្រព្យ គាត់ច្នៃការប្រើប្រាស់បានល្អ តម្លៃសេដ្ឋកិច្ចហ្នឹងក៏វាចាប់ផ្តើមធូរថ្លៃទៅតាមហ្នឹងដែរ។ ជារួមតម្លៃអចលនទ្រព្យនៅកម្ពុជា នៅមានសក្តានុពលខ្ពស់ក្នុងការធ្វើវិនិយោគ ទើបបណ្តាប្រទេសនៅតំបន់អាស៊ី គាត់មើលឃើញ គាត់មកវិនិយោគនៅស្រុកខ្មែរ មានជនជាតិជាច្រើន មានចិន ថៃជប៉ុនគាត់មកវិនិយោគក្នុងប្រទេសយើង”។

លោកបានបញ្ជាក់ថា៖ “ដូច្នេះហើយ បានជាបរទេសគាត់មានបទពិសោធពីប្រទេសរបស់គាត់ គាត់ទិញដីទំនេរធំៗទុក ឱ្យតែគាត់ដឹងពីម៉ាស្ទ័ផ្លេនរយៈពេលវែងគាត់ទិញដីជិតៗតំបន់ហ្នឹងទុក។ នេះជាបទពិសោធនៃបណ្តាប្រទេសជឿនលឿន គាត់មានបទពិសោធ រួចហើយការទិញដីទុកការទិញអ្វីៗផ្សេងទៀត វាហុចសក្តានុពលក្នុងការវិនិយោគ ចំណូលសម្រាប់បុគ្គលហ្នឹងខ្ពស់ ក្នុងរយៈពេលវែង។ ដោយឡែកសម្រាប់គោលនយោបាយរបស់រាជរដ្ឋាភិបាល ឬពាណិជ្ជកម្ម យើងក៏បានលើកទឹកចិត្តឱ្យទិញដើម្បីការអភិវឌ្ឍ និងដើម្បីជំរុញឱ្យសេដ្ឋកិច្ច កើនខ្ពស់ជាងហ្នឹងបន្តទៅទៀតផងដែរ”។

លោកស្រី តាំង ហួរ នាយិកាក្រុមហ៊ុនអចលនទ្រព្យ Amatak Property Servic ក៏បានមានប្រសាសន៍ប្រាប់ឱ្យដឹងដែរថា៖ “ពាក់ព័ន្ធទៅនឹងការវិនិយោគលើដីទំនេរ វាអាចនឹងក្លាយទៅជាការរកបានចំណូលដ៏ល្អមួយ នៅពេលលក់អចលនទ្រព្យទាំងនេះ។

លោកស្រីបន្តថា៖ “មិនចំពោះតែអ្នកទិញដើម្បីធ្វើការវិនិយោគបន្តនោះទេ គឺតាមរយៈបទពិសោធខ្ញុំសព្វថ្ងៃទិញដីអាចទទួលផលចំណេញច្រើនជាងទិញផ្ទះ ហើយបើសួរថា វាត្រូវប្រើរយៈពេលប៉ុនណាក្នុងការទទួលប្រាក់ចំណេញនោះ? វាមិនទៀងទេ អាស្រ័យលើដីនោះស្ថិតនៅទីតាំងណា? ចំពោះដីនៅក្នុងក្រុងវិញតម្លៃឡើងលឿនណាស់ ដោយសារតំបន់ខ្លះគេហៅថា តំបន់ពាណិជ្ជកម្ម។ ឧទាហរណ៍បើតម្លៃដី5,000ក្នុង 1ម៉ែត្រការ៉េ ហើយបើគេសាងសង់ច្រើនជាន់ គេកាន់តែបានចំណេញខ្ពស់។ ព្រោះដីថ្លៃយើងសង់ទាបមិនអាចចំណេញបានទេ។ តែប្រសិនបើយើងចង់សង់បែបលំនៅឋានទាបៗ ទាល់តែដីនៅតំបន់ជាយក្រុងដែលកំពុងចាប់ផ្តើមអភិវឌ្ឍន៍។

លោកស្រីបន្តផ្តល់យោបល់ថា៖“បើយើងចង់ទិញដីរកផលចំណេញច្រើន យើងគួរតែទិញដីនៅតំបន់អភិវឌ្ឍន៍នៅជាយក្រុង ដល់មានចំងាយ 20-30គីឡូម៉ែត្រពីក្រុង តែជាតំបន់ ឬជាទីតាំងដែលអាចមានអំណោយផលក្នុងការលក់ដូរ និងមានចរន្តក្នុងការជួញដូរ និងការធ្វើពាណិជ្ជកម្មដូចជាតំបន់ និងផ្លូវក្រវាត់ក្រុងជាដើម”៕

August 1, 2019

Galaxy Note 10 និង Note 10+ ពណ៌ស និងពណ៌ផ្កាឈូក បង្ហាញរាងពេញៗ

ក្រុមហ៊ុន Samsung នឹងធ្វើកម្មវិធី Unpacked នៅថ្ងៃទី7 ខែសីហាខាងមុខនេះនៅទីក្រុងបាសេឡូណា ប្រទេសអេស្ប៉ាញ ដោយនឹងបង្ហាញចេញស្មាតហ្វូនម៉ូដែលចុងក្រោយគឺ Galaxy Note 10 , Note 10+ និង Galaxy Note 10 5G ដែលមានពណ៌ចម្រុះជាច្រើន ជាពិសេសពណ៌ប្លែកជាងគេ គឺពណ៌ស និងពណ៌ផ្កាឈូក។

លក្ខណសម្បត្តិលេចធ្លាយមួយចំនួនសម្រាប់ Note សេរ៊ីឆ្នាំ2019 នឹងបំពាក់នូវបន្ទះឈីប Snapdragon 855 Plus មាន RAM ទំហំ 8GB (Note 10) និងទំហំ 12GB (Note 10+) អមថាមពលថ្មធំដល់ 3500mAh និង 4300mAh។

ខណៈតម្លៃវិញ គេក៏រំពឹងផងដែរថា នឹងមិនខុសពីជំនាន់ដាកើបង្ហាញ Note 9 ដោយត្រកូល Note ចុងក្រោយគេនេះ នឹងដាក់លក់ក្នុងតម្លៃ 999ដុល្លារ (Note 10/256GB) និង 1,149ដុល្លារ (Note 10+/256GB)៕

August 1, 2019

កីឡាករល្បីឈ្មោះថៃ យកលុយពីការប្រកួត មកជួយក្លិប ព្រះខែសែនជ័យ ក្នុងខេត្តបាត់ដំបង

ក្រោយពីប្រកួតចាញ់កីឡាករខ្មែរ កែវ រំចង់ លើសង្វៀនឯកភ្នំ ខេត្តបាត់ដំបង អ្នកប្រដាល់ថៃ Iquezang បានយកលុយដែលបានពីការប្រកួតនេះទៅជួយដល់ក្លិបប្រដាល់មួយឈ្មោះថា ព្រះខែសែនជ័យ នៅក្នុងខេត្តបាត់ដំបង ប្រទេសកម្ពុជា។កីឡាករថៃរូបនោះបានថ្លែងថា ខ្លួនពិតជាសប្បាយចិត្តខ្លាំងមែនទែនដែលបានមកវាយជាមួយនឹងអ្នកប្រដាល់ខ្មែរ កែវ រំចង់ ដោយសារតែរូបគេអាចមកជួយក្លិបប្រដាល់នៅកម្ពុជាបានផងដែរ។ Iquezang បាននិយាយថែមទៀតថា រូបគេចង់មកប្រកួតនៅកម្ពុជាម្ដងទៀតតាមដែលអាចធ្វើបាន។ ជាពិសេសគេបានថ្លែងអំណរគុណដល់អ្នកគាំទ្រកម្ពុជាដែលស្វាគមន៍រូបគេ និងចូលមកមើលការប្រកួតយ៉ាងច្រើន។គួរបញ្ជាក់ផងដែរថា កែវ រំចង់ និង Iquezang ធ្លាប់ជួបគ្នាចំនួន 2លើកនៅថៃ និង 1លើកនៅកម្ពុជា ដោយ Iquezang ធ្លាប់ឈ្នះម្តង ខណៈដែល កែវ រំចង់ ធ្លាប់ឈ្នះ 2ដង៕

August 1, 2019

ដឹងតែល្អមើលហើយ! សប្តាហ៏នេះ សង្វៀន Super Champ ដាក់កីឡាករខ្មែរវាយម្តង 4គូ

នៅក្នុងការប្រកួតក្បាច់គុនប្រដាល់បុរាណសង្វៀន Mouy Thai Super Champ ក្រុមអ្នករៀបចំកម្មវិធីបានផ្គូផ្គងកីឡាករខ្មែរចំនួន 4រូបឱ្យបង្ហាញវត្តមានលើសង្វៀនដ៏ល្បីនៅក្នុងប្រទេសថៃនៅថ្ងៃអាទិត្យ ទី4 ខែសីហា ឆ្នាំ2019 ខាងមុខនេះ។

កីឡាករកម្ពុជាចំនួន 4នាក់រួមមាន គង់ សំបូរ ធន់ ចាន់តាក់ ពុយ វណ្ណៈ និង ធី តុងហ៊ី នឹងត្រូវឡើងប្រកួត ដោយកីឡាករគុនខ្មែរ គង់ សំបូរ ត្រូវបានគណៈរៀបចំកម្មវិធីដាក់ឱ្យប្រកួតជាគូឯក ដែលត្រូវជួបជាមួយកីឡាករជើងខ្លាំងមួយថៃឈ្មោះ Rittidech(រីទ្ធីដេត) ខណៈដែលកីឡាករ ធន់ ចាន់តាក់ ក៏ត្រូវប្រកួតក្នុងប្រភេទគូពិសេសផងដែរ។

ការប្រកួតនេះនឹងមានផ្សាយបន្តផ្ទាល់តាមទូរទស្សន៍ប៉ុស្តិ៍លេខ៨ Channel 8 របស់កម្ពុជាផងដែរចាប់ពីម៉ោង 6.20នាទី ល្ងាចថ្ងៃអាទិត្យ ទី4 សីហា ឆ្នាំ2019៕

August 1, 2019

លីកកំពូលកម្ពុជានឹងត្រូវសម្រាក 2សប្តាហ៍ដើម្បីហ្វឹកហាត់ត្រៀមវគ្គជម្រុះ World Cup

កាលពីពេលថ្មីៗនេះ អ្នកចាត់ការទូទៅក្រុមជម្រើសជាតិកម្ពុជា Keisuke Honda បានស្នើសុំធ្វើការផ្លាស់ប្តូរកាលបរិច្ឆេទប្រកួតលីកកំពូលកម្ពុជា ដោយលើកការប្រកួតទៅមុខចំនួន 2សប្តាហ៍ ដោយនឹងចាប់ផ្ដើមលើកពីសប្តាហ៍ទី22 នេះទៅ ហើយសំណើនេះក៏ត្រូវបានទទួលការយល់ព្រមពីគណៈកម្មការរៀបចំការប្រកួតបាល់ទាត់ជាតិកម្ពុជាផងដែរ។ដូចនេះការប្រកួតនៅថ្ងៃទី31 ខែសីហា ឆ្នាំ2019 ដែលជាការប្រកួតសប្តាហ៍ទី22 នឹងត្រូវលើកទៅធ្វើនៅថ្ងៃទី14 ខែកញ្ញា ឆ្នាំ2019 វិញ ពោលគឺក្រោយពីការប្រកួតវគ្គជម្រុះ WORLD CUP 2022 Qatar៕

August 1, 2019

ស្ថាបនិកគ្រួសារតារាកម្ពុជាប្រកាសថា បើទូតសុឆន្ទៈទាំង១២ មិនចេះប្រើឱកាសរបស់ខ្លួនគឺជារឿងគួរឱ្យស្ដាយ

បន្ទាប់ពីបានប្រកាសផ្ដល់តំណែង ដល់ម្ចាស់ពានទាំង១២ ដែលបានចូលរួមក្នុងព្រឹត្តិការណ៍នៅសំបូរព្រៃគុក ជាទូតសុឆន្ទៈ គេកត់សម្គាល់ថាម្ចាស់ពានឈុតបុរាណរបស់គ្រួសារតារាកម្ពុជា មានឱកាសបង្ហាញខ្លួនកាន់តែច្រើនលើឆាកទូរទស្សន៍ ធ្វើឱ្យមហាជនមានការកោតសរសើរ។ ស្ថាបនិកគ្រួសារតារាកម្ពុជា ប្រកាសថា ទូតសុឆន្ទៈបើមិនចេះប្រើឱកាសរបស់ខ្លួន ក្នុងរយៈពេល១ឆ្នាំនេះ គឺមិនខុសពីបោះបង់ឱកាសរបស់ខ្លួនក្នុងការពង្រីកកេរ្តិ៍ឈ្មោះនោះឡើយ។

គួរបញ្ជាក់ថា ម្ចាស់ពានដែលត្រូវបានតែងតាំងជាទូតសុឆន្ទៈរួមមាន៖

1-លោក ឌួង តារាផាឌីន គឺជាតារាចម្រៀងសំលេង២ និងជាម្ចាស់ពានគ្រងឈុតបុរាណចំណាត់ថ្នាក់លេខ១ប្រចាំឆ្នាំ២០១៩។

2-កញ្ញា ភីយ៉ា គឺជាតារាសម្ដែង និងជាម្ចាស់គ្រងឈុងបុរាណចំណាត់ថ្នាក់លេខ១ ប្រចាំឆ្នាំ២០១៩។

3-លោក រុន ណាកូ គឺជាម្ចាស់ពាន២ជំនាន់ ដែលជាម្ចាស់ពានគ្រងឈុតបុរាណត្រូវទម្រង់លេចធ្លោ និងស័ក្ដសម កាលពីឆ្នាំ២០១៨ និងពានប្រជាប្រិយភាពប្រចាំឆ្នាំ២០១៩ ក្នុងចំណោមម្ចាស់ពានឆ្នាំចាស់។

4- អ្នកនាង ម៉ៅ ស៊ីណាត គឺជាតារាចម្រៀង និងជាម្ចាស់ពានគ្រងឈុតបុរាណ ផ្នែកគ្រងឈុតត្រូវទម្រង់ និងលេចធ្លោប្រចាំឆ្នាំ២០១៨។

5-លោក បញ្ញា សិទ្ធិ តារាចម្រៀង និងជាពិធីករ គឺជាម្ចាស់ពានគ្រងឈុតបុរាណចំណាត់ថ្នាក់លេខ២។

6-កញ្ញា ពេជ្រ ចរណៃ គឺជាម្ចាស់ពានគ្រងឈុតបុរាណចំណាត់ថ្នាក់លេខ៣ ប្រចាំឆ្នាំ២០១៩។

7-លោក ស៊ិន សុធារិទ្ធ គឺជាតារាសម្ដែង និងជាម្ចាស់ពានគ្រងឈុតបុរាណកម្រ កាលពីឆ្នាំ២០១៨។

8-កញ្ញា វណ្ណា វត្តី គឺជាតារាចម្រៀង-តារាសម្ដែង និងជាម្ចាស់ពានគ្រងឈុតបុរាណចំណាត់ថ្នាក់លេខ២ប្រចាំឆ្នាំ២០១៩។

9-លោក ម៉ែន អម្រុងរ័ត្ន គឺម្ចាស់ពានគ្រងឈុតបុរាណផ្នែកច្នៃប្រឌិត ដែលលេចធ្លោជាងគេកាលពីឆ្នាំ២០១៨។

10-កញ្ញា ភី សម័យ គឺជាម្ចាស់ពានគ្រងឈុតបុរាណ ច្នៃប្រឌិតកាលពីឆ្នាំ២០១៨។

11-លោក លឿង វិសាល គឺជាម្ចាស់ពានគ្រងឈុតបុរាណចំណាត់ថ្នាក់លេខ៣ ប្រចាំឆ្នាំ២០១៩។

12-កញ្ញា បេប៊ី ម្ចាស់ពានគ្រងឈុតបុរាណលេចធ្លោកាលពីឆ្នាំ២០១៨។

August 1, 2019

សូ ដានីតា ពោលសរសើរអ្នកនាង ចាន់ កែវនិមល និងប្រាប់ពីបទពិសោធន៍ជាអតីតពិធីការិនី

នៅលើបណ្ដាញសង្គមហ្វេសប៊ុកគេបានឃើញថា មានការរិះគន់ពិធីការិនី កែវ ច័ន្ទនិមល តាមរយៈកម្មវិធី “ឋានសួគ៌ឬឋាននរក” ក្នុងនោះសូ ដានីតា អតីតពិធីការិនីដែរនោះ បានបានចែករំលែកបទពិសោធន៍ និងបានស្នើសុំមហាជនកុំស្តីបន្ទោសលើនិមល។

កញ្ញា សូ ដានីតា បានបង្ហោះសារថា “ប៉ុន្មានថ្ងៃនេះ បើក Facebook ឃើញតែរឿងផ្លូវគោក ហើយលឺគេនិយាយតែរឿងផ្លូវគោក ដែលទាក់ទងទៅសំនួរចម្លើយក្នុងកម្មវិធី នាងខ្ញុំសុំនិយាយក្នុងនាមមនុស្សកណ្តាល ហើយនាងខ្ញុំកន្លងមកក៏ធ្លាប់ជាពិធិការិនីក្នុងកម្មវិធីផ្សេងៗ នឹងតាមស្ថានីយទូរទស្សន៍ចំនួន៧ស្ថានីយកន្លងមកហើយ។ សំរាប់ មុល គឺគាត់និយាយថាខុសរឺត្រូវ គឺតាមការរៀបចំរបស់កម្មវិធីរួចជាស្រេច បើមុលដឹងខុស ក៏មុលមិនអាចប្រកែក ព្រោះរាល់កម្មវិធីសំនួរចម្លើយ នឹងក្រដាសសំនួរ&សម្លើយ កម្មវិធីគេយកឲ្យយើងជាពិធីករពិធីការិនីចាំផ្ទៀងចម្លើយបេក្ខជននៅហ្នឹងរួចជាស្រេច ចឹងសូមមេត្តាបងប្អូនកុំជេរស្តីបន្ទោសគាត់អី …”។

មិនថាយ៉ាងណា នេះមិនមែនជាលើកទីមួយនោះទេ ដែលពិធីការីនីពោរពេញទៅដោយវិជ្ជាជីវៈ អ្នកនាង ចាន់ កែវនិមល ទទួលបានការកោតសរសើរមិនដាច់ពីមាត់ ពីសំណាក់មហាជន ក៏ដូចជាមិត្តរួមសិល្បៈ និងម្ចាស់រៀបចំកម្មវិធីផ្សេងៗ ដោយសារតែអ្នកនាងមិនមែនត្រឹមតែជាពិធិការីនី ដែលមានសំនួនវោហារយ៉ាងប៉ិនប្រសប់តែប៉ុណ្ណោះនោះទេ ប៉ុន្តែអ្នកនាងថែមទាំងមានអត្តចរិតថ្លៃថ្នូរ ប្រកបទៅដោយក្រមសីលធម៌ ក្នុងនាមជាពិធីការីនីគួរឲ្យគោរព និងថែមទាំងមានទំនួលខុសត្រូវខ្ពស់ក្នុងការងារថែមទៀតផង។

គួរបញ្ជាក់ដែរថា ទាំងនេះហើយមិនចម្លែកនោះទេ ដែលតារាស្រីជើងចាស់វស្សាប្រឡូកសិល្បៈជិត ២០ឆ្នាំ ដូចជា សូ ដានីតា លាន់មាត់សរសើរយ៉ាងអស់ពីចិត្តចំពោះពិធីការីនីស្រីរូបនេះ រហូតដល់ថ្នាក់ហៅអ្នកនាង ចាន់ កែវនិមល ថា ជាពិធីការីនីលំដាប់កំពូលថែមទៀតផង៕

August 1, 2019

សួស វីហ្សា ដឹកដៃ ថមមី សម្ញែងភាពផ្អែមល្ហែមលើទឹកដីបរទេស

តារាចម្រៀង សួស វីហ្សា បានដឹកដៃ ថមមី ទៅសាងភាពផ្អែមល្ហែមនៅក្រៅប្រទេសយ៉ាងមានក្ដីសុខបំផុតក្រោយពួកគេទាំងពីរថត Pre-Wedding ត្រៀមចូលរោងការកាលពីពេលថ្មីៗនេះ។

ដំណើរកម្សាន្តទៅសាំងហ្គាពួរម្ដងនេះ សួស វីហ្សា និង ថមមី ចង់បង្កើតអនុស្សាវរីយ៍ជាច្រើនជាមួយគ្នាមុនពេលអ្នកទាំងពីរចូលរោងការបញ្ចប់ភាពនៅលីវនាចុងឆ្នាំ២០១៩ ខាងមុខនេះ។ មុនសម្រេចចិត្តជ្រើសរើសយកគ្នាជាគូជីវិតពូកគេទាំងពីរបានស្រឡាញ់មើលចិត្តថ្លើមគ្នាអស់រយៈពេល២ឆ្នាំ មកហើយ។ ដោយ សួស វីហ្សា ទទួលបានថ្លៃបណ្ណាការពីលោក ថមមី ជាង៤ម៉ឺនដុល្លារអាមេរិក។

សូមជម្រាបបន្ថែមថា ទោះជាយ៉ាងណា កាលបរិច្ឆេទច្បាស់លាស់នៃមង្គលការរបស់តារាហង្សមាស រូបនេះ កំណត់យកថ្ងៃណានោះ មិនត្រូវបានតារាហង្សមាស រូបនេះ បញ្ជាក់ឱ្យបានច្បាស់លាស់ឡើយ ដោយនាងគ្រាន់តែប្រាប់ថា នឹងរៀបចំនៅរាជធានីភ្នំពេញ មិនទៅធ្វើនៅស្រុកកំណើតរបស់នាងឯខេត្តស្វាយរៀង ឡើយ។ អ្នកទាំងពីរត្រូវបានគេដឹងថារស់នៅវីឡាទ្រនំស្នេហ៍របស់ពួកគេតម្លៃជាង 20ម៉ឺនដុល្លារ ឯបុរីជីបម៉ុងលែន ផ្លូវជា សុផារ៉ា។ មុនភ្ជាប់ពាក្យ វីសា ក៏បានទិញរថយន្តទំនើប2គ្រឿងរួមគ្នា ជាមួយគូដណ្តឹងជិះយ៉ាងហ៊ឺហាផងដែរ ទើបពេលនេះចំណងស្នេហ៍របស់តារា1គូនេះ កាន់តែខិតកៀកទៅរកថ្ងៃមង្គលការ៕

August 1, 2019

Category: សង្គម និងសេដ្ឋកិច្ច