សង្គម និងសេដ្ឋកិច្ច - La Reine Media

រ៉ូបូតនឹងដណ្តើមការងារមនុស្សប្រមាណជា 20លានកន្លែងនៅឆ្នាំ2030

បច្ចុប្បន្ននេះ នៅក្នុងចង្វាក់ផលិតកម្មសំខាន់ៗបានចាប់ផ្តើមប្រើប្រាស់ម៉ាស៊ីនស្វ័យប្រវត្តិ ឬrobot ជំនួសមនុស្សហើយ ព្រោះវាមានភាពងាយស្រួល ចំណាយតិច មិនបារម្ភពីគ្រោះថ្នាក់ មិនចេះរអ៊ូរទាំ និងធ្វើការងារបានពេញ 24ម៉ោង រាល់ថ្ងៃដោយគ្មានការសម្រាក។ បន្ថែមពីលើនេះដោយសារតែវត្តមាននៃបញ្ញាសិប្បនិម្មិត ឬAI បានធ្វើឱ្យគ្រឿងយន្តកាន់តែមានភាពឆ្លាតវៃ ហើយមានសមត្ថភាពអាចធ្វើការងារជាច្រើនផ្សេងទៀតក្រៅពីការងារប្រើប្រាស់កម្លាំងសុទ្ធសាធនៅក្នុងពិភពលោក។

យោងតាមការសិក្សាថ្មីៗនេះដោយអ្នកសេដ្ឋកិច្ចបានលើកឡើងថា នៅឆ្នាំ2030 គ្រឿងយន្តនឹងទាញយកការងារក្នុងចង្វាក់ផលិតកម្មប្រមាណជាង 20លានការងារ។ តាមការសិក្សាថ្មីៗនេះពីផ្នែកស្រាវជ្រាវសេដ្ឋកិច្ចនៃសាកលវិទ្យាល័យ Oxford បានឱ្យដឹងថា នៅរយៈពេល 11ឆ្នាំទៀត គ្រាន់តែនៅប្រទេសចិនតែមួយ អាចនឹងប្រើប្រាស់ចំនួនរ៉ូបូតដល់ទៅជាង14លានគ្រឿង ដើម្បីធ្វើការងារក្នុងចង្វាក់ផលិតកម្មនានា។ ក្រុមអ្នកស្រាវជ្រាវសេដ្ឋកិច្ចទាំងអស់នោះបានបង្ហាញពីចរន្តនៃថ្ងៃអនាគតផងដែរថា ការធ្វើស្វ័យប្រវត្តិកម្មការងារលើពិភពលោកនឹងកើនឡើង 3ដង ហើយនឹងបន្តកើនឡើងបន្តបន្ទាប់ទៀតដែលវាអាចនឹងប៉ះពាល់ដល់ការងាររបស់មនុស្ស។

ជាលទ្ធផលនៃការធ្វើស្វ័យប្រវត្តិកម្មនេះ ត្រូវបានគេរំពឹងទុកថា វានឹងធ្វើឱ្យសក្តានុពលសេដ្ឋកិច្ចនឹងកើនឡើងខ្លាំង ព្រោះប្រសិទ្ធភាពនៃការផលិតកើនឡើង តែទន្ទឹមនឹងនេះ ប្រទេសក្រីក្រដែលមានប្រជាជនមានចំណេះដឹងទាបអាចនឹងប៉ះពាល់។ កម្មករជំនាញតិចនឹងអស់ការងារ ហើយជំនួសមកវិញនូវម៉ាស៊ីនស្វ័យប្រវត្តិដែលទាមទារឱ្យមនុស្សត្រូវបោះបង់ការងារនោះព្រោះអ្នកវិនិយោគនឹងចាំបាច់ត្រូវតែប្រើប្រាស់ម៉ាសុីនដើម្បីអាចប្រកួតប្រជែងជាមួយចង្វាក់ផលិតកម្មដទៃបានលើពិភពលោក។ ការងារដែលធ្វើដដែលៗនឹងត្រូវបាត់បង់ ព្រោះការងារទាំងអស់នោះត្រូវបានគេចម្លងទៅជាប្រព័ន្ធមួយដែលម៉ាស៊ីនអាចធ្វើបានដូចគ្នា។

ទោះជាយ៉ាងនេះក្តី ទន្ទឹមនឹងក្តីព្រួយបារម្ភសម្រាប់ការផ្លាស់ប្តូរដ៏ធំដែលអាចនឹងកើតមានឡើងក្នុងសេដ្ឋកិច្ចពិភពលោកនេះ អ្នកជំនាញសំខាន់ៗក៏បានបញ្ជាក់ផងដែរថា ស្របពេលដែលអាជីពចាស់ៗត្រូវបាត់បង់អាជីពថ្មីៗក៏នឹងកើតឡើងដែរ។ អ្វីដែលរដ្ឋាភិបាល និងប្រជាជនត្រូវធ្វើ គឺផ្លាស់ប្តូរការអប់រំ បច្ចេកវិទ្យា និងអភិវឌ្ឍន៍សមត្ថភាពឱ្យស្របទៅនឹងរបត់ទីផ្សារជំនាន់ថ្មី។ទន្ទឹមនឹងរបត់បដិវត្តន៍ឧស្សាហកម្មទី4 ត្រូវបានគេអនុវត្ត ពិភពលោកក៏បានបង្កើតប្រព័ន្ធអប់រំ 4.0 ដើម្បីបណ្តុះបណ្តាលមនុស្សឱ្យទទួលបាននូវចំណេះដឹងថ្មីដើម្បីត្រៀមខ្លួនទុកជាមុនផងដែរ។

ប្រសិនបើប្រទេសណាអាចបត់បែនបានជាមួយនឹងចរន្តថ្មីនេះ នោះមានន័យថា គេនឹងនៅតែមានឱកាសក្នុងការប្រកួតប្រជែងកាន់តែទូលំទូលាយ ហើយរក្សាបាននូវលំនឹងសម្រាប់ទីផ្សារការងារ។ ស្ថានភាពវិជ្ជមាននឹងនៅតែកើតមានឡើងក្នុងទីផ្សារការងារ គ្រាន់តែទាមទារឱ្យមនុស្សត្រូវខិតខំប្រឹងប្រែងបន្ថែមឱ្យបានកាន់តែខ្លាំងឡើងលើការអភិវឌ្ឍសមត្ថភាព ដែលមានលក្ខណៈស៊ីជម្រៅ និងភាពជាក់លាក់ខ្លាំងជាងមុន។ ប្រជាជនគួរចាប់ផ្តើមផ្សាំុខ្លួន និងចេះទាញយកផលប្រយោជន៍វិជ្ជមានពីបច្ចេកវិទ្យាដើម្បីទប់ស្កាត់ជាមួយនឹងផលប៉ះពាល់អវិជ្ជមានដែលធ្វើឱ្យបច្ចេកវិទ្យាគ្រប់គ្រងបាន ហើយអាចគ្រប់គ្រងបច្ចេកវិទ្យាដើម្បីជាប្រយោជន៍។ អភិវឌ្ឍសមត្ថភាពក្នុងការគិតពិចារណា ភាពជាអ្នកដឹកនាំ ការបង្កើតថ្មី និងការដឹកនាំការងារជាក្រុមជាដើម ដើម្បីក្លាយជាមនុស្សដែលពិភពលោកនៅតែត្រូវការ ព្រោះចំណេះដឹងទាំងអស់នេះម៉ាស៊ីនមិនអាចជំនួសមនុស្សបាននោះទេ៕

August 9, 2019

Leaderland English Academy ជម្រើសថ្មីក្នុងការសិក្សាដែលផ្តល់ជំនាញសំខាន់ៗ 4មុខក្នុងពេលតែមួយ

ការជ្រើសរើសសាលាសិក្សាផ្នែកភាសា ជារឿងចម្បងមួយដែលអាណាព្យាបាលជាច្រើនកំពុងពិចារណា ព្រោះគោលបំណងសំខាន់របស់គាត់ គឺចង់ឱ្យកូនៗក្លាយជាមនុស្សដែលមានសមត្ថភាពថ្មីៗដែលឆ្លើយតបជាមួយនឹងទីផ្សារការងារនៅថ្ងៃអនាគត។ សាលារៀន Leaderland English Academy ជាសាលាបង្រៀនភាសាដែលឆ្លើយតបបានយ៉ាងល្អជាមួយនឹងតម្រូវការ និងក្តីប្រាថ្នារបស់អាណាព្យាបាលគ្រប់រូប។

លោក ប៉ិច ប៉ូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា ក្នុងចំណោមសាលាភាសាល្អៗទាំងអស់នៅកម្ពុជា Leaderland English Academy អាចជាជម្រើសថ្មីមួយដែលអាចផ្តល់ឱ្យនូវចំណេះដឹងសំខាន់ៗចំនួន 4មុខ ក្នុងពេលតែមួយ គឺចំណេះដឹងផ្នែកភាសាច្បាស់លាស់ ចំណេះដឹងផ្នែកសហគ្រិនភាព ចំណេះដឹងភាពជាអ្នកដឹកនាំ និងចំណេះដឹងផ្នែកបច្ចេកវិទ្យា។ ការបញ្ចូលគ្នានូវកញ្ចប់បណ្តុះបណ្តាលទាំងអស់នេះ គឺត្រូវធ្វើឡើងដោយភ្ជាប់ការបណ្តុះបណ្តាលឱ្យសិស្សានុសិស្សអាចសិក្សាផង និងអនុវត្តផងជាមួយគ្នា ដើម្បីបង្កើតជាប្រភេទនៃការអប់រំថ្មីមួយដែលអាចធ្វើឱ្យសិស្សចេះទាំងភាសា មានជំនាញជាសហគ្រិនភាព មានភាពជាអ្នកដឹកនាំ និងមានជំនាញបច្ចេកវិទ្យាក្នុងពេលតែមួយ។

លោក ប៉ិច ប៉ូឡែន បាននិយាយថា៖“យើងផ្តល់ជូនកម្មវិធីទាំងអស់នេះ ដោយសារតែយើងមើលឃើញថា ការសិក្សាតែផ្នែកភាសា មិនទាន់គ្រប់គ្រាន់នៅឡើយទេក្នុងការធ្វើឱ្យសិស្សក្លាយជាមនុស្សខ្លាំង និងមានសមត្ថភាពខ្ពស់ម្នាក់។ ហេតុនេះការផ្តល់ជម្រើសថ្មីនេះ អាចជាគំនិតល្អមួយសម្រាប់អាណាព្យាបាលក្នុងការពិចារណា ដើម្បីជួយកូនៗឱ្យក្លាយជាមនុស្សខ្លាំងពិតប្រាកដទាំងចំណេះដឹង អាកប្បកិរិយា អត្តចរិត និងផ្នត់គំនិតសម្រាប់សតវត្សរ៍ទី21នេះ”។

អ្នកជំនាញអប់រំខាងលើបានលើកឡើងផងដែរថា យើងនឹងធ្វើការអប់រំសិស្សរបស់យើងដោយគ្រូល្អៗខាងផ្នែកភាសាដែលមានបទពិសោធច្បាស់លាស់ ដើម្បីធ្វើយ៉ាងណាឱ្យសិស្សបានសិក្សាផ្ទាល់ជាមួយគ្រូជនជាតិដើម និងជាមួយកម្មវិធីសិក្សាដែលទទួលស្គាល់ជាអន្តរជាតិ។ ក្រៅពីនេះ សាលាក៏មានវគ្គសិក្សាផ្នែកសហគ្រិនភាព ដោយមាននៅក្នុងកម្មវិធីសិក្សាផង និងមានការចូលរួមធ្វើបទបង្ហាញពីបុគ្គលសំខាន់ៗនៅក្នុងសាលសន្និសីទរបស់សាលាផ្ទាល់ផង។ លោកបន្ថែមថា មានអ្នកជំនួញធំៗ ម្ចាស់ក្រុមហ៊ុនសហគ្រាស រួមទាំងស្ថាបនិកផលិតផលប្រកបដោយគុណតម្លៃជាច្រើននឹងត្រូវបានអញ្ជើញឱ្យមកចែករំលែក និងជួបជាមួយសិស្សផ្ទាល់ដើម្បីឱ្យសិស្សកាន់យល់ដឹងពីសហគ្រិនភាព ដោយជួបជាមួយអ្នកអនុវត្តផ្ទាល់ៗតែម្តង។ ក្រៅពីនេះ យើងក៏មានរៀបចំកម្មសិក្សាទៅកាន់ស្ថាប័នធំៗនៅក្នុងប្រទេស ដើម្បីផ្តល់ឱកាសឱ្យសិស្សបានស្វែងយល់ពីវិធីសាស្ត្រធ្វើការងារ រួមទាំងវិធីសាស្ត្រនៃការគ្រប់គ្រងអាជីវកម្មបែបស្តង់ដាទាំងអស់នោះផងដែរ។

បន្ថែមពីលើនេះ លោក ប៉ិច ប៉ូឡែន បានលើកឡើងថា ចំពោះជំនាញភាពជាអ្នកដឹកនាំវិញ យើងនឹងធ្វើការបណ្តុះបណ្តាលសិស្សឱ្យក្លាយជាមនុស្សខ្លាំងតាមរយៈកម្មវិធីទម្លាប់ល្អទាំង 7យ៉ាងរបស់បុគ្គលមានប្រសិទ្ធភាពខ្ពស់ រួមទាំងកម្មវិធីល្បីៗជាច្រើនផ្សេងទៀត។ លើសពីនេះទៅទៀត សិស្សក៏មានលំហាត់ និងមេរៀនជាច្រើនដែលទាមទារឱ្យធ្វើការងារជាក្រុម ធ្វើបទបង្ហាញ និងដឹកនាំសកម្មភាពមួយចំនួនដើម្បីផ្សាំុខ្លួន បណ្តុះភាពជាអ្នកដឹកនាំឱ្យបានរួចរាល់ មុនពេលចាប់ផ្តើមអាជីពការងារពិតប្រាកដរបស់ខ្លួននៅថ្ងៃអនាគត។ ចំណែកឯបច្ចេកវិទ្យាវិញ ក៏ជាផ្នែកពិសេសមួយដែរដែលសាលាផ្តល់ជូន ព្រោះលោកមើលឃើញថា អនាគតទៅ ក្នុងបដិវត្តន៍ឧស្សាហកម្ម 4.0 នេះ បច្ចេកវិទ្យា ជាផ្នែកសំខាន់ដែលសិស្សចាំបាច់ត្រូវតែចេះដើម្បីទាញយកការងារ និងអាចប្រកួតប្រជែងបានជាមួយប្រទេសក្នុងតំបន់។ ហេតុនេះហើយទើបសាលាបំពាក់ដោយបច្ចេកវិទ្យាទំនើបៗដូចជាកុំព្យូទ័រ ទូរទស្សន៍ឆ្លាតវៃ ក្តារខៀនឆ្លាតវៃ រួមទាំងការប្រើប្រាស់កម្មវីធី Virtual Reality (VR) និង AR (Argument Reality) ដើម្បីឱ្យសិស្សស្គាល់ និងសិក្សាដោយផ្ទាល់ជាមួយបច្ចេកវិទ្យាទំនើបៗទាំងអស់នេះ។

សាលាភាសាអង់គ្លេស Leaderland English Academy គឺជាសាលារៀនដែលទំនើបឈានមុខមួយ នៅក្នុងប្រទេសកម្ពុជា ដែលបាននាំយកមកនូវការបង្រៀន បែបបច្ចេកវិទ្យាសម័យទំនើប តាមរយៈប្រព័ន្ធបច្ចេកវិទ្យាបំពាក់លើភ្នែក ដែលមានឈ្មោះថា Virtual Reality (VR) ជាច្រើនគ្រឿង ពីក្រុមហ៊ុន SilVRgrow TECHNOLOGY PTE LTD ដែលជាក្រុមហ៊ុនបច្ចេកវិទ្យា អប់រំឈានមុខគេ ដែលមានឧបករណ៍សម្រាប់បច្ចេកវិទ្យា VR និង AR។ ដោយមានការិយាល័យកណ្តាលនៅប្រទេសសិង្ហបុរី ក្រុមហ៊ុនបានផ្តល់ជូននូវដំណោះស្រាយការសិក្សាថ្មី ដល់សាលារៀនកម្រិតបឋម និងមធ្យមសិក្សានៅអាស៊ីអាគ្នេយ៍ ហើយបច្ចុប្បន្ននេះ មានប្រទេសជឿនលឿន និងកំពុងអភិវឌ្ឍន៍ជាច្រើននៅលើពិភពលោក កំពុងតែដាក់ដំណើរការបច្ចេកវិទ្យា VR មួយនេះ ក្នុងនោះក៏មានប្រទេសកម្ពុជាយើងផងដែរ គឺនៅសាលាភាសាអង់គ្លេស លីដឺលែន នេះផ្ទាល់តែម្តង។

សាលាភាសា លីដឺលែន គឺជាបុត្រសម្ព័ន្ធរបស់ក្រុមហ៊ុន វេសឡាញ អេឌ្យូខេសិន គ្រុប និងមានទីតាំងស្ថិតនៅអគារលេខ9 ផ្លូវលេខ362 ភូមិដើមម៉ាក់ក្លឿ សង្កាត់ច្បារអំពៅ1 ខណ្ឌមានជ័យ រាជធានីភ្នំពេញ។ វគ្គសិក្សាថ្មី នឹងចាប់ផ្តើមនៅថ្ងៃទី1 ខែសីហា ឆ្នាំ2019។កម្មវិធីបង្រៀនភាសាអង់គ្លេស របស់សាលាភាសា លីដឺលែន រួមមាន៖ 1៖ General English Program 2៖ English for Academic Purposes 3៖ English for Business និង 4៖ TOEFL / IELTS Preparation៕

August 9, 2019

តោះលេងម៉ូដសក់រួញមានមន្តស្នេហ៍ម្តងមើល៎

នៅក្នុងទំព័រម៉ូដសក់របស់ទស្សនាវដ្តី ឡារ៉ែន លេខនេះសូមយកចិត្តនារីៗយើងដែលស្រឡាញ់ និងចូលចិត្តម៉ូដសក់អ៊ុតរួញ ឬការលេងម៉ូដសក់រួញម្តង។ សូមក្រឡេកមើលម៉ូដសក់រួញនៅក្នុងទំព័រនេះ ពិតជាស្រស់ស្អាត និងជួយឱ្យអ្នកទទួលបាននូវមន្តស្នេហ៍មិនតិចទេ មើលចុះសក់រួមមានទៅអន់អី អាចលេងម៉ូដសក់បានជាច្រើនម៉ូដ ចងក៏បាន ទម្លាក់ពាក់កណ្តាលក៏បាន ទម្លាក់រំសាយក៏បាន ផ្លុំម៉ូដបន្ថែមក៏បាន គឺពិតជាស្អាតខ្លាំងណាស់ អាចលេងម៉ូដសម្រាប់ដំណើរកម្សាន្តក៏បាន ទៅធ្វើការតាមធម្មតាក៏បាន ឬក៏ទៅចូលរួមនៅក្នុងកម្មវិធីតូចធំផ្សេងៗក៏បាន គឺស្អាតពេញចិត្តតែម្តង ហើយបើនារីៗដែលមានទម្រង់មុខពងក្រពើ ឬរាងតូចវិញគឺកាន់តែស្អាត និងសមនឹងមុខរបស់អ្នកតែម្តង។ សក់រួចស្អាតៗ! ស្អាតពេញចិត្តគ្រប់គ្នា៕

August 9, 2019

ដាក់ទុនក្នុងរឿង ហ៊ុយ យ៉ាឡេង តារាសិចស៊ី ទេព ស្រីពៅ ជឿជាក់

បន្ទាប់ពីមានឱកាសបង្ហាញខ្លួនជាតួអង្គម្នាក់ក្នុងរឿង“ដើម្បីកូន” ដែលជាស្នាដៃប្រកាសផលិតថ្មីរបស់លោកហ៊ុយយ៉ាឡេងតារាសម្ដែងសំបូរសាច់ដើមទ្រូងទ្រលុកទ្រលន់គួរឲ្យក្នាញ់កញ្ញាទេពស្រីពៅហាក់រំពឹងយ៉ាងខ្ពស់ថាភាពយន្តរបស់លោកហ៊ុយយ៉ាឡេងដែលនាងបានសម្ដែងមួយរឿងនេះនឹងជួយឲ្យនាងឈានឡើង។ បើទោះជានាងនិយមស្ទីលចំហរដើមទ្រូងសុិចសុីប៉ុន្តែកញ្ញាបែរជាភាពស្ទាក់ស្ទើរក្នុងការទទួលថតឈុតស្រើបស្រាល។

កញ្ញាទេពស្រីពៅថ្លែងប្រាប់ក្នុងពិធីក្រុងពាលីរបស់លោកហ៊ុយយ៉ាឡេងថាកញ្ញាទើបតែហក់ចូលវិស័យសិល្បៈរយៈពេលខ្លីប៉ុន្តែនាងមានឱកាសបានសម្ដែងពីរបីរឿងមកហើយខណៈដែលឈុតឆាកក្នុងបទចម្រៀងក៍បានប្រឡូកមិនតិច។ ក្នុងនោះនាងបានទាំងច្រានចោលការសម្ដែងមួយចំនួនព្រោះតែរវល់ការងារផ្ទាល់ខ្លួននិងដោយសារតែការសម្ដែងខ្លះទាក់ទងជាន់គ្នាដែលមិនអាចឱ្យនាងជ្រែកខ្លួនបាននោះផង។ នាងថាការប្រឡូកសម្ដែងនាពេលចុងក្រោយបានត្រឹមតែអាចឲ្យនាងមិនដាច់ការងារជាហូរហែរប៉ុណ្ណោះប៉ុន្តែសម្រាប់ឱកាសល្បីឈ្មោះគឺនាងរំពឹងលើស្នាដៃក្នុងរឿង“ដើម្បីកូន” ដែលភាពយន្តថ្មីរបស់លោកហ៊ុយយ៉ាឡេងដោយសារតែភាពយន្តនេះនាងត្រូវផលិតករតម្រូវឲ្យសម្ដែងជានារីលូយឆាយនិងមានឈុតលេចធ្លោក្នុងរឿង។ នាងថាខ្លួនមានឈុតមួយចំនួនត្រូវសម្ដែងសុិចសុីប៉ុន្តែបើឲ្យសម្ដែងសុិចសុីហួសហេតុគឺដាច់ខាតមិនសម្ដែងឡើយ។

ទេពស្រីពៅបន្តថានាងស្រលាញ់វិស័យសម្ដែងនិងចង់ប្រឡូកការសម្ដែងឲ្យបានគ្រប់ទម្រង់មិនថាតួឆ្នាស់តួចិត្តអាក្រក់តួសុិចសុីឬតួកម្សត់នោះទេប៉ុន្តែសម្រាប់ការសម្ដែងក្នុងឈុតស្នេហារោលរាលគឺនាងផ្អើលៗអត់ហ៑ានថតទេ។ ជាក់ស្ដែងបើតាមតែនាងហ៑ានថតគឺនាងប្រហែលជាមានឈ្មោះបោះសំឡេងនៅក្នុងវិស័យភាពយន្តរៀងខ្ពស់ជាងនេះទៅហើយ។នាងថាខ្លួនពេញចិត្តល្បីតាមដំណើរជាជាងបានល្បីក្រោមសម្រែករិះគន់ហើយជាលទ្ធផលធ្វើឲ្យនាងអាម៉ាស់។ នាងគម្រោងឈោងឆាប់ការសម្ដែងឲ្យស៑ប់ពេញទំហឹងដោយក្រោយថតរឿងថ្មីឲ្យលោកហ៊ុយយ៉ាឡេងក៍នឹងត្រៀមទទួលថតភាពយន្តនិងថតMV ដែលកំពុងចចារបន្តបន្ទាប់ផងដែរ៕

August 9, 2019

វេលាជ័យ អ្នកនាង ខ្ញុង និងនាយ កៃដ បានធ្វើឱ្យមហាជនកក្រើកនិងត្រេកអរជាខ្លាំង

វេលាកំណត់ចូលរោងជ័យរបស់តារាកំប្លែងរួមទ្រនំ នាយកៃដ និងនាង ខ្ញុង បានចូលមកដល់ ធ្វើឲ្យមហាជនកើតក្តីសាទររំភើបរីករាយ ខណៈកាលពីម្សិលមិញជាថ្ងៃចូលរោង និងសូត្រមន្តនោះ មានការអញ្ជើញពីមេបាចាស់ទុំទាំងសងខាងក្នុងទឹកមុខពេញចិត្តថ្លើមទាំងសងខាងតែម្តង។ នៅព្រឹកថ្ងៃទី០៨ ខែសីហា ឆ្នាំ២០១៩ អ្នកនាង ខ្ញុង និងនាយ កៃដ បានចូលរោងជ័យទៅតាមប្រពៃណីហើយ ទទួលបានការកោតសរសើរចំពោះអ្នកទាំងពីរយ៉ាងខ្លាំងពីអ្នកគាំទ្រទាំងក្នុងនិងក្រៅសិល្បៈ។

ជាក់ស្តែងអ្វីដែលកាន់តែពិសេសនិងបង្ករការភ្ញាក់ផ្អើល ធ្វើឲ្យមហាជនចាប់អារម្មណ៏ខ្លាំងនោះពិធីមង្គលការរបស់តារាកំប្លែង ខ្ញុង និងនាយ កៃដ ពេលបានបានដឹងពីតួនាទីអ្នកកំដររបស់អ្នកទាំងពីរគឺញាក់សាច់តែម្តង ព្រោះកូនកំដរទាំង៣រូបឋានៈខ្ពស់សុទ្ធតែជាលោកឧកញ៉ាមានដូចជា៖ ឧកញ៉ា ឃ្លោក ឧកញ៉ា ជា ប៉ូរ៉ា និងឧកញ៉ា ប៊ុន ពៅ ដែលធ្វើឲ្យអ្នកគាំទ្រលាន់មាត់គ្រប់ៗគ្នាថាថ្ងៃចូលរោងការប្តីប្រពន្ធមួយគូនេះពិតជាមិនធម្មតាមែន ព្រោះយកសុទ្ធតែអ្នកធំធ្វើជាកូនកំដរទាំងអស់៕

August 8, 2019

សិស្សជាង 200នាក់ទទួលសញ្ញាបត្រ និងបណ្ណសរសើរពីសាលារៀនអន្តរជាតិ ចុង ហ័រ

សាលារៀនអន្តរជាតិ ចុង ហ័រ ដែលជាសាលាមានភាពល្បីល្បាញ និងបទពិសោធយូរឆ្នាំក្នុងការបណ្តុះបណ្តាលដោយផ្តោតសំខាន់លើភាសាចិន ភាសាអង់គ្លេស និងភាសាខ្មែរ បានប្រារព្ធពិធីប្រគល់សញ្ញាបត្រ និងបណ្ណសរសើរដល់សិស្សពូកែប្រមាណជាង 200នាក់នៅព្រឹកថ្ងៃទី8 ខែសីហា ឆ្នាំ2019 នេះ។

លោក ZHU BANGJIANG នាយកសាលាអន្តរជាតិ ចុង ហ័រ បានលើកឡើងថា ថ្ងៃនេះជាថ្ងៃដែលយើងទាំងអស់គ្នាគួរចងចាំ ដោយយើងបានជួបជុំគ្នាដើម្បីអបអរសាទរដល់សិស្សកម្រិតមត្តេយ្យ និងសិស្សបឋមសិក្សាដែលបានទទួលសញ្ញាបត្រ និងបណ្ណសរសើរបន្ទាប់ពីបានបញ្ចប់វគ្គសិក្សា។ យើងទាំងអស់គ្នាមកទីនេះដើម្បីបញ្ជាក់ និងចែករំលែកពីភាពរីកចម្រើនរបស់សិស្សានុសិស្សទាំងអស់គ្នា។

លោក ZHU BANGJIANG បានមានប្រសាសន៍ថា៖ «ថ្ងៃនេះក៏ជាថ្ងៃគម្រប់ខួប 10ឆ្នាំរបស់សាលាអន្តរជាតិ ចុង ហ័រ ផងដែរ។ 10ឆ្នាំដែលឆ្លងកាត់ព្យុះភ្លៀង បានធ្វើឱ្យសាលារីកចម្រើនគ្រប់ផ្នែក។ នៅឆ្នាំនេះ សាលារបស់យើងបានបន្ថែមថ្នាក់អនុវិទ្យាល័យ បន្ទាប់ពីយើងទទួលបានការគាំទ្រពីសំណាក់អាណាព្យាបាល និងសង្គម»។

លោកនាយកសាលាបានបន្ថែមទៀតថា 10ឆ្នាំកន្លងមកនេះ សិស្សរបស់យើងទទួលបានពិន្ទុល្អក្នុងសាលារៀន ហើយក្រោយពេលពួកគេបានបន្តការសិក្សានៅក្រៅប្រទេស ពួកគេនៅតែអាចរក្សាបាននូវកម្រិតពិន្ទុល្អដដែល។ នេះបញ្ជាក់ថា ការសិក្សាភាសាចិននៅក្នុងស្រុក ក៏ទទួលបានផលល្អដូចនៅក្រៅប្រទេសដែរ ដែលនេះជាមោទនភាពមួយសម្រាប់សិស្សរបស់យើង។ លោកនាយកក៏បានលើកឡើងផងដែរថា ការលូតលាស់របស់សិស្ស គឺជាគោលបំណងរបស់អាណាព្យាបាល ហើយលោកសូមថ្លែងអំណរគុណដល់អាណាព្យាបាលគ្រប់រូបដែលតែងតែគាំទ្រ សហការ និងផ្តល់មតិយោបល់ជាមួយសាលាកន្លងមក។ នៅថ្ងៃអនាគត សាលានឹងខិតខំប្រឹងប្រែងអភិវឌ្ឍបន្តទៀតដើម្បីឱ្យសិស្សានុសិស្សមានបរិស្ថានសិក្សាល្អ និងមិនធ្វើឱ្យអាណាព្យាបាលខកបំណងឡើយ។

គួរបញ្ជាក់ផងដែរថា លក្ខណៈពិសេសដែលនាំឱ្យសាលារៀនអន្តរជាតិ ចុង ហ័រ បណ្តុះបណ្តាលសិស្សឆាប់ចេះ និងមានចំណេះផ្នែកភាសាចិនល្អ ដោយសារសាលាជ្រើសរើសគ្រូបង្រៀនដែលជាជនជាតិដើម ជាមួយនឹងបទពិសោធខ្ពស់ទាំងអស់ មិនមែនគ្រូខ្មែរបង្រៀនថ្នាក់ភាសាចិនឡើយ។ ក្រៅពីនេះ សាលារៀនអន្តរជាតិ ចុង ហ័រ ក៏មានបន្ថែមផងដែរនូវវគ្គសំខាន់ៗដើម្បីឱ្យសិស្សអភិវឌ្ឍសមត្ថភាព និងយល់ដឹងពីការរស់នៅកាន់តែល្អ ដោយមានបង្រៀនក្បាច់គុណកុងហ៊្វូ មានបង្រៀនគូរគំនូរ និងតន្ត្រីដល់សិស្សានុសិស្សថែមទៀតផង៕

August 8, 2019

ខាងក្រោមនេះ គឺតម្លៃរបស់ Note 10/ Note 10+ ដែលSamsung ប្រកាសឱ្យ Pre-Order នៅខ្មែរយើង!

កំពូលស្មាតហ្វូន Galaxy Note10 / 10+ ដែលមានរូបរាងកាន់តែពិសេស កាលីប ថ្លៃថ្នូរ សមត្ថភាពខ្ពស់ អេក្រង់ភ្លឺលាតពេញច្បាស់ ពេញភ្នែក និងថាមពលថ្មខ្លាំង ជាពិសេសនោះ គឺប៊ិចវេទមន្ត S Pen តែម្តង។

ខាងក្រោមនេះជាតម្លៃ និងការផ្តល់ជូនពិសេស៖

- Galaxy Note10 - RAM 8GB / ROM 256GB តម្លៃ $899 ថែមជូនកាសឥតខ្សែដ៏កាលីប Galaxy Buds និងស៊ីមកាតលេខពិសេសតម្លៃ $132 របស់ Cellcard រួមទាំងកញ្ចប់អ៊ីនធើណិត 30GB/ខែ សម្រាប់រយៈពេល 6ខែ (វ៉ាវ!!!!)។

- Galaxy Note10+ - RAM 12GB / ROM 256GB តម្លៃ$ 1,059 នឹងទទួលបាននូវការ Free upgrade ទៅ ROM 512GB, ជាមួយនឹងស៊ីមកាតលេខពិសេសតម្លៃ $330 របស់ Cellcard រួមទាំងកញ្ចប់អ៊ីនធើណិត 30GB/ខែ សម្រាប់រយៈពេល 6ខែ(វ៉ាវ and វ៉ាវ!!!!)។

យោងតាមការប្រកាសផ្លូវការដោយក្រុមហ៊ុន Samsung បានឱ្យដឹងថា កម្មវិធី Pre-order នេះ ចាប់ផ្ដើមពីថ្ងៃទី8 ខែសីហា រហូតដល់ថ្ងៃទី18 ខែសីហា 2019 ខាងមុខ (រយៈពេល10ថ្ងៃ) និងទទួលបានទូរស័ព្ទនៅថ្ងៃទី20 - 22 ខែសីហា 2019។

សូមអញ្ជើញទៅហាងដែលមានស្លាកសញ្ញា Pre-order ឬហាងដែលនៅជិតលោកអ្នកបំផុត រួចកុម៉្មង់ឆាប់ៗទៅ នឹងអាលបានប្រើមុនគេ។ លក្ខខណ្ឌផ្សេងទៀតត្រូវបានអនុវត្ត៕

August 8, 2019

បើកឆាក AFF U18 អូស្ត្រាលី លត់កម្ពុជា 5ទល់នឹង1

ការប្រកួត AFF U18 Next Media Cup 2019 នៅកីឡដ្ឋាន Thong Nhat ទីក្រុងហូជីមិញ នៃប្រទេសវៀតណាមកាលពីម្សិលមិញនេះ ក្រុមជម្រើសជាតិយុវជនកម្ពុជាអាយុក្រោម 18ឆ្នាំកម្ពុជា បានចាញ់ក្រុមបាល់ទាត់យុវជនអាយុក្រោម 18ឆ្នាំ អូស្ត្រាលី ក្នុងលទ្ធផល 1ទល់នឹង5 ដោយក្នុងនោះដែរ កម្ពុជារកបាន 1គ្រាប់ដោយកីឡាករវ័យក្មេងរបស់ក្រុមជម្រើសជាតិកម្ពុជាឈ្មោះ សៀង ចន្ធា។

ក្នុងពានរង្វាន់នេះ កម្ពុជាស្ថិតនៅក្នុងពូល B ជាមួយនឹងក្រុមម្ចាស់ផ្ទះវៀតណាម អូស្ត្រាលី ថៃ សិង្ហបុរី និងម៉ាឡេស៊ី។ ក្នុងនោះ នៅការប្រកួតបន្ទាប់ កម្ពុជាត្រូវជួបម្ចាស់ជើងឯកចាស់ថៃ នៅថ្ងៃទី9 ខែសីហា ឆ្នាំ2019 នៅវេលាម៉ោង3 និង 30នាទីរសៀល៕

August 8, 2019

ពាន HUN SEN CUP 2019 បន្តលើកពេល 1សប្តាហ៍

ការប្រកួតពានរង្វាន់ HUN SEN CUP 2019 ថ្នាក់ជាតិលើកទី13 វគ្គ1/4 ជើងទី1 ដែលគ្រោងនឹងធ្វើឡើងនៅថ្ងៃទី7 និង8 ខែសីហា ឆ្នាំ2019 នេះ ត្រូវបានលើកពេលទៅសប្តាហ៍ក្រោយវិញហើយ នេះបើតាមកាលវិភាគថ្មីនៃពានរង្វាន់មួយនេះ។

ចំពោះមូលហេតុនៃការលើកពេលការប្រកួតនេះ មិនត្រូវបានបង្ហាញ និងជម្រាបជូនជាមុនឡើយ ដោយការប្រកួតគឺគ្រោងនឹងធ្វើឡើងនៅសប្ដាហ៍ក្រោយសម្រាប់ជើងទី1 ពោលគឺថ្ងៃទី14 និង15 ខែសីហា មុននឹងជើងទី2 ត្រលប់មកវិញនៅថ្ងៃទី27 និង28 ខែដដែល៕

August 8, 2019

ជំនួបជើងទី2 ល្ងាចនេះ កម្ពុជា ជួបថៃ ក្នុងពានយុវជនអាស៊ានអាយុក្រោម 18ឆ្នាំ

ក្រុមបាល់ទាត់ជម្រើសជាតិកម្ពុជាអាយុក្រោម 18ឆ្នាំ បានបាត់បង់ពិន្ទុក្នុងជំនួបដំបូងប្រចាំពូល B នៃពានរង្វាន់ជើងឯកយុវជនអាស៊ីអាគ្នេយ៍ អាយុក្រោម 18ឆ្នាំ AFF U-18 Championship 2019 ដ៏មានសារៈសំខាន់ បន្ទាប់ពីប្រកួតចាញ់ U-18 អូស្ត្រាលី ក្នុងជំនួបដំបូង។

ចំណែកឯការប្រកួត 2គូទៀត រវាង U-18 ថៃ ជាមួយ U-18 សិង្ហបុរី គឺបញ្ចប់ទៅដោយលទ្ធផលស្មើគ្នា គឺ 1ទល់1។ ដោយឡែកក្នុងពូលនេះផងដែរ ការប្រកួត 1គូទៀត គឺជាការប្រកួតរវាងម្ចាស់ផ្ទះវៀតណាម និងម៉ាឡេស៊ី បានបញ្ចប់ដោយក្រុមម្ចាស់ផ្ទះវៀតណាម ឈ្នះ 1ទល់នឹង0។

នៅវេលាម៉ោង 3:30រសៀល ថ្ងៃទី9 ខែសីហា 2019 រសៀលនេះ ក្រុមជម្រើសជាតិកម្ពុជាអាយុក្រោម 18ឆ្នាំ នឹងត្រូវប្រកួតជាមួយនឹងក្រុមបាល់ទាត់ជម្រើសជាតិថៃ ក្រោមអាយុ 18ឆ្នាំដូចគ្នា ដែលជាជំនួបជើងទី2៕

August 8, 2019

Category: សង្គម និងសេដ្ឋកិច្ច