សង្គម និងសេដ្ឋកិច្ច - La Reine Media

កម្ពុជា ធ្លាក់ចេញពីពាន AFF U18 Championship ហើយ ក្រោយចាញ់ 1ប្រកួតទៀត

ក្រុមយុវជនគោព្រៃជម្រើសជាតិបាល់ទាត់អាយុក្រោម 18ឆ្នាំរបស់កម្ពុជា បានប្រកួតចាញ់ក្រុមបាល់ទាត់ជម្រើសជាតិសិង្ហបុរី កាលពីរសៀលថ្ងៃទី13 ខែសីហា ឆ្នាំ2019 កន្លងទៅនេះ ក្នុងពានរង្វាន់ជើងឯកយុវជនអាស៊ីអាគ្នេយ៍អាយុក្រោម 18ឆ្នាំ AFF U-18 Championship 2019។

ក្រោយពីបញ្ចប់វគ្គទី1 ក្រុមបាល់ទាត់ទាំង2 បានរក្សាភាពស្ងប់ស្ងាត់ដោយលទ្ធផល 0ទល់នឹង0។ ឈានចូលដល់វគ្គទី2 កម្ពុជាបានភ្លាត់ស្នៀតរបូត 1គ្រាប់ ហើយការប្រកួតបានរក្សាលទ្ធផលនេះរហូតដល់ទីបញ្ចប់ ក្នុងលទ្ធផលកម្ពុជាចាញ់ សិង្ហបុរី 0ទល់នឹង1។

លទ្ធផលនេះ បានធ្វើឱ្យកម្ពុជាត្រូវធ្លាក់ពីយុទ្ធនាការនេះជាស្ថាពរ ទោះជានៅសល់មួយប្រកួតបង្គ្រប់កិច្ចជាមួយម្ចាស់ផ្ទះវៀតណាម ដែលនឹងត្រូវធ្វើឡើងនៅយប់ថ្ងៃទី15 ខែសីហា ឆ្នាំ2019 ក៏ដោយ៕

August 15, 2019

កម្ពុជាសង្ឃឹមខ្ពស់ ព្រោះបានធ្វើម្ចាស់ផ្ទះក្នុងវគ្គជម្រុះ AFC U19

កម្ពុជាបានឈ្នះការដេញថ្លៃទទួលសិទ្ធិធ្វើជាម្ចាស់ផ្ទះពានរង្វាន់យុវជនអាយុក្រោម 19ឆ្នាំប្រចាំតំបន់អាស៊ី សម្រាប់ពូល G របស់ខ្លួន ដែលនឹងចាប់ផ្តើមពីថ្ងៃទី2 ដល់ថ្ងៃទី10 ខែកញ្ញា ឆ្នាំ2019 ខាងមុខនេះ។

ក្រុមដែលស្ថិតនៅក្នុងពូល G ដែរនោះ រួមមាន ក្រុមម្ចាស់ផ្ទះកម្ពុជា ថៃ ម៉ាឡេស៊ី ប្រ៊ុយណេ និងកោះម៉ារីណាខាងជើង ខណៈដែលការប្រកួតជ្រើសយកក្រុមខ្លាំងតែមួយប៉ុណ្ណោះដើម្បីឡើងទៅវគ្គចុងក្រោយនៃពានមួយនេះនៅដើមឆ្នាំ2020 ចំណែកឯក្រុមលេខ2 ប្រចាំពូលទាំង11 គឺជ្រើសយកតែក្រុមលេខ២ ដែលមានពិន្ទុខ្ពស់ចំនួន 6ក្រុមប៉ុណ្ណោះ ដើម្បីទៅវគ្គបន្ត៕

August 15, 2019

PSG ដាក់តម្លៃ Neymar 250លានដុល្លារ បើក្លិបណាហ៊ានចង់បាន

កាលពីពេលថ្មីៗនេះ Neymar JR ត្រូវបានក្លិបយក្សបារាំង Paris Saint Germaint ដាក់តម្លៃដ៏មហិមារហូតដល់ទី 250លានដុល្លារសម្រាប់ក្រុមណាមួយដែលចង់បានកីឡាកររូបនេះ ដែលនេះជាតម្លៃដែលមិនធ្លាប់មានឡើយក្នុងពិភពបាល់ទាត់អន្តរជាតិ។

មកទល់នឹងពេលនេះ មានក្លិបអេស្ប៉ាញ2 ដែលកំពុងចាប់អារម្មណ៍ចង់បានកីឡាកររូបនេះ គឺ Real Madrid និង Bacelona FC ដែលក្នុងចំណោមនេះ ក្លិបចាស់របស់ Neymar គឺ Bacelona FC អាចមានភាគរយច្រើនជាងគេ ដោយសារតែកីឡាករសញ្ជាតិប្រស៊ីលរូបនេះបានបង្ហាញចេតនាចង់ទៅក្លិបនេះច្រើនជាង។

គួរបញ្ជាក់ផងដែរថា ក្លិបយក្សបារាំង Paris Saint Germaint បានចំណាយលុយទៅជិត 220លានដុល្លារ ដើម្បីនាំយកកីឡាករវ័យក្មេងនេះមកកាន់ទឹកដីបារាំងកាលពីឆ្នាំ២០១៧ ដោយមកទល់នឹងពេលនេះតម្លៃផ្ទេររូបគេ នៅតែជាតម្លៃខ្ពស់ជាងគេបង្អស់នៅលើពិភពលោក និងមិនទាន់មានកីឡាករណាបំបែកបាននៅឡើយ៕

August 15, 2019

មន្ត្រីបង្ហាញការព្រួយបារម្ភចំពោះប្រាក់កម្ចីរបស់អ្នកអភិវឌ្ឍន៍អចលនទ្រព្យ

និន្នាការកើនឡើងនៃការផ្តល់ប្រាក់កម្ចីដោយក្រុមហ៊ុនអភិវឌ្ឍន៍អចលនទ្រព្យកម្ពុជាបានទាក់ទាញចំណាប់អារម្មណ៍របស់មន្ត្រីពីធនាគារកណ្តាលរបស់ប្រទេសកម្ពុជា ធ្វើឱ្យមន្ត្រីដឹកនាំនៅទីនោះ បានជំរុញឱ្យអ្នកទិញត្រូវប្រុងប្រយ័ត្ន និងពិចារណាពីអត្រាការប្រាក់មុនពេលពួកគេចុះហត្ថលេខាលើកិច្ចព្រមព្រៀង។

លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា បានមានប្រសាសន៍ថា៖“វិស័យអចលនទ្រព្យនៅកម្ពុជាមានការកើនឡើងយ៉ាងខ្លាំងនៅក្នុងតម្រូវការប្រាក់កម្ចីទិញផ្ទះដោយសារថា គូស្វាមីភរិយាវ័យក្មេងកាន់តែច្រើនកំពុងតែស្វែងរកកម្ចីសម្រាប់ទិញផ្ទះផ្ទាល់របស់ខ្លួន”។

លោកជំទាវបានជំរុញឱ្យអ្នកទិញអចលនទ្រព្យធ្វើការស្រាវជ្រាវដោយខ្លួនឯងមុនពេលដាក់ប្រាក់បញ្ញើ។ ព្រោះការយកប្រាក់កម្ចីដាក់បញ្ចាំដោយផ្ទាល់ពីអ្នកអភិវឌ្ឍន៍ ជាធម្មតានឹងមកជាមួយអត្រាការប្រាក់ដែលខ្ពស់ជាងធនាគារ។

លោកជំទាវបានលើកឧទាហរណ៍ពីផ្ទះល្វែងសម្រាប់ជួលនៅតំបន់បឹងកេងកង2 ដែលតម្លៃនៃការជួលមានតម្លៃ 450ដុល្លារក្នុង 1ខែ។ ជាអគារដែលមានគ្រឿងសង្ហារិមពេញលេញនេះមានទាំងផ្ទះមួយ និងមានបន្ទប់2 ជាកន្លែងដែលមានផាសុកភាព ដោយឧបករណ៍ប្រើប្រាស់ជាច្រើនត្រូវបានដាក់បញ្ចូល។ ក្នុងករណីខ្លះអ្នកអភិវឌ្ឍន៍អចលនទ្រព្យកំពុងទាក់ទាញអតិថិជនឱ្យដាក់បញ្ចាំ ឬបង់ប្រាក់ជាមុនសម្រាប់ការទិញគេហដ្ឋាន ដោយលើកលែងការបង់ប្រាក់ទាប ឬការចែងដំណឹងផ្សេងទៀត។

លោកជំទាវបានមានប្រសាសន៍ថា៖ “អ្នកអភិវឌ្ឍន៍គម្រោងមួយចំនួនមិនចង់ជួយសម្រួលដល់ប្រាក់កម្ចីរបស់ធនាគារទេ ពីព្រោះពួកគេចង់ឱ្យអ្នកទិញខ្ចីពីពួកគេ។ មានករណីខ្លះ អ្នកអភិវឌ្ឍន៍មានគោលបំណងពន្យារពេលប្រាក់កម្ចីធនាគារ ឬមិនសហការជាមួយអ្នកទិញដែលខ្ចីប្រាក់ពីធនាគារ។

អ្នកអភិវឌ្ឍន៍ខ្លះគ្រាន់តែចង់ឱ្យអ្នកទិញចិញ្ចឹមពួកគេដោយប្រើប្រាក់កម្ចីដែលមានអត្រាការប្រាក់ខ្ពស់ 18% ក្នុង 1ឆ្នាំ”។ដោយសារអ្នកអភិវឌ្ឍន៍អចលនទ្រព្យស្ថិតនៅក្រោមដែនសមត្ថកិច្ចរបស់ក្រសួងសេដ្ឋកិច្ច និងហិរញ្ញវត្ថុនៅកម្ពុជា ធនាគារជាតិនៃកម្ពុជាមិនដែលរាប់បញ្ចូលប្រាក់កម្ចីទិញផ្ទះរបស់អ្នកអភិវឌ្ឍន៍នៅក្នុងទិន្នន័យផ្តល់ប្រាក់កម្ចីផ្លូវការនោះទេ។

ប្រជាប្រិយភាពនៃប្រាក់កម្ចីហ៊ីប៉ូតែក(ប្រាក់កម្ចីបញ្ចាំ)ដែលចេញដោយអ្នកអភិវឌ្ឍន៍បានផ្ទុះឡើងនៅក្នុងប្រទេសកម្ពុជាក្នុងរយៈពេលប៉ុន្មានឆ្នាំចុង-ក្រោយនេះ។ ជាធម្មតាទាំងអស់នេះ គឺជាកិច្ចសន្យារយៈពេល 30ឆ្នាំ ហើយកម្រតម្រូវឱ្យមានការបង់រំលស់ណាស់។ ទោះបីប្រាក់កម្ចីហ៊ីប៉ូតែកទាំងនេះ ដំបូងមើលទៅគួរឱ្យចាប់អារម្មណ៍សម្រាប់អ្នកទិញក៏ដោយ តែក៏អត្រាការប្រាក់ជារឿយៗ នឹងកើនឡើងទ្វេដង ឬ 3ដងនៃតម្លៃបិទស្លាកផ្ទះ។

ទន្ទឹមនឹងនេះដែរ ធនាគាររបស់ប្រទេសកម្ពុជាជាធម្មតាតម្រូវឱ្យមានការបង់រំលស់យ៉ាងតិច 30%និងមានការត្រួតពិនិត្យរយៈពេលវែងលើប្រវត្តិឥណទាន និងសមត្ថភាពក្នុងការបង់។ ទោះយ៉ាងណាអត្រាការប្រាក់សម្រាប់ប្រាក់កម្ចីមានទ្រព្យបញ្ចាំទាំងនេះ ជាធម្មតាមានរយៈពេលប្រហែល 7% ទៅ12%។

យោងតាមទិន្នន័យចុងក្រោយរបស់ការិយាល័យក្រេឌីតខេមបូឌា (KBB) ប្រាក់កម្ចីមានទ្រព្យបញ្ចាំពីស្ថាប័នផ្តល់ប្រាក់កម្ចីទូទាំងប្រទេសមានចំនួន 3,2ពាន់លានដុល្លារនៅចុងខែមីនា។ នេះបង្ហាញពីការកើនឡើង 34% ធៀបនឹងរយៈពេលដូចគ្នាកាលពីឆ្នាំមុន។ ដោយការអនុវត្តប្រាក់កម្ចីមានទ្រព្យបញ្ចាំដែលផ្តល់ដោយស្ថាប័នហិរញ្ញវត្ថុ គឺពិតជាល្អប្រសើរនៅក្នុងទីផ្សារប្រទេសកម្ពុជា។ និន្នាការនេះកំពុងកើនឡើងក្នុងល្បឿនដូចឆ្នាំមុន ហើយស្របនឹងកំណើនឧស្សាហកម្មទូទៅ។

អ្នកជំនាញផ្នែកអចលនទ្រព្យនៅកម្ពុជាបាននិយាយថា គូស្វាមីភរិយាវណ្ណៈកណ្តាលវ័យក្មេងកំពុងតែជំរុញតម្រូវការប្រាក់កម្ចីមានទ្រព្យបញ្ចាំក្នុងប្រទេស។ ពួកគេនិយាយថា មានមនុស្សកាន់តែច្រើនចង់រស់នៅដាច់ដោយឡែកពីឪពុកម្តាយនៅពេលពួកគេធំពេញវ័យ។

ដូច្នេះធនាគារគួរពិចារណាបន្ថែមអំពីគម្រោងអភិវឌ្ឍន៍អចលនទ្រព្យដែលបានរចនាឡើង ដើម្បីរកប្រាក់ចំណូល ឬប្រាក់ចំណេញពីការលក់ ឬការជួលអចលនទ្រព្យនោះ។ ត្រូវមានការប្រុងប្រយ័ត្នច្រើននៅពេលធ្វើការជាមួយគម្រោងអភិឌ្ឍន៍អចលនទ្រព្យ។ ដោយធនាគារមានកាតព្វកិច្ចមួយចំពោះភាគទុនិក (អតិថិជនដែលតម្កល់ប្រាក់) ក្នុងការគ្រប់គ្រងហានិភ័យ ដើម្បីធានាថា ពួកគេអាចការពារពីការខាតបង់ហិរញ្ញវត្ថុ អាចរក្សាប្រាក់តម្កល់របស់អតិថិជនដោយសុវត្ថិភាព ធានាលើស្ថិរភាពនៃប្រព័ន្ធហិរញ្ញវត្ថុនិងបង្កើតប្រាក់ចំណេញ។ ដូច្នេះពួកគេអាចយកប្រាក់នោះទៅវិនិយោគ និងផ្តល់ជាភាគលាភដល់ភាគហ៊ុនិក និងបង្កើនតម្លៃភាគហ៊ុនបន្ថែមទៀត។

ទាក់ទងនឹងហានិភ័យឥណទាន អ្នកជំនាញផ្នែកអចលនទ្រព្យក៏បានលើកឡើងដែរថា គ្រប់សំណើកម្ចីឥណទានត្រូវបានសិក្សា និងត្រួតពិនិត្យដោយក្រុមអ្នកវិភាគដោយធ្វើការវិភាគវាយតម្លៃលើកម្រិតនៃហានិភ័យនៃគម្រោងនីមួយ។ នៅពេលធនាគារអនុម័តលើប្រាក់កម្ចីដល់អ្នកអភិវឌ្ឍន៍ ពួកគេគិតអំពី “ហានិភ័យ”។ ចំណែកអ្នកអភិវឌ្ឍន៍វិញ ប្រហែលជាមិនគិតច្រើនអំពីហានិភ័យនោះទេ។ អ្នកអភិវឌ្ឍន៍ជាធម្មតាគិតអំពីប្រាក់ចំណេញនៃការវិនិយោគអចលនទ្រព្យ កេរ្តិ៍ឈ្មោះ ក្រុមហ៊ុនអភិវឌ្ឍន៍ និងគម្រោង និងរូបភាព ឬចំណុចល្អៗនៃគម្រោង និងអ្នកសាងសង់តែប៉ុណ្ណោះ៕

August 14, 2019

ធនាគារជាតិ៖ ផ្នែកមីក្រូហិរញ្ញវត្ថុរក្សាបាននូវកំណើនខ្ពស់

ធនាគារជាតិនៃកម្ពុជា (NBC) បានរាយការណ៍ពីលទ្ធផលហិរញ្ញវត្ថុដ៏រឹងមាំ ដោយបានបញ្ជាក់នៅក្នុងរបាយការណ៍ចុងក្រោយរបស់ខ្លួនថា ប្រាក់កម្ចី និងកំណើនប្រាក់បញ្ញើនៅក្នុងវិស័យហិរញ្ញវត្ថុនៅកម្ពុជានៅតែមានកម្រិតខ្ពស់ក្នុងឆមាសទី 1នៃឆ្នាំនេះ ដែលជាលទ្ធផលនៃការគ្រប់គ្រងម៉ាក្រូសេដ្ឋកិច្ច និងស្ថិរភាពនយោបាយ។

របាយការណ៍របស់ធនាគារជាតិនៃកម្ពុជាបានឱ្យដឹងថា ប្រាក់កម្ចីក្នុងវិស័យធនាគារ និងមីក្រូហិរញ្ញវត្ថុបានកើនឡើងប្រហែល 22.4%នៅក្នុងឆមាសទី1 កើនឡើង 27,7ពាន់លានដុល្លារ។ តម្លៃនៃប្រាក់កម្ចីបានកើនឡើងដល់ 21,5ពាន់លានដុល្លារក្នុងវិស័យធនាគារ និង 6,2ពាន់លានដុល្លារក្នុងឧស្សាហកម្មមីក្រូហិរញ្ញវត្ថុ។

ឥណទានសរុបរបស់ធនាគារមានជាង 21ប៊ីលានដុល្លារអាមេរិក និងបានផ្តល់ទៅកាន់វិស័យ សេដ្ឋកិច្ចសំខាន់ដូចជាការជួញដូររាយ 16% ការជួញដូរដុំ11%ការខ្ចីទិញលំនៅឋានជាកម្មសិទ្ធិផ្ទាល់ ខ្លួន 10% កសិកម្ម 9% សំណង់10% តម្រូវការផ្ទាល់ខ្លួន 8% ការ-ជួញដូរអចលនទ្រព្យ 7% និងកម្មន្ត សាលកម្ម 5%។ គ្រឹះស្ថានមីក្រូហិរញ្ញវត្ថុបានផ្តល់ឥណទានសរុបមានទឹកប្រាក់ 6,2 ប៊ីលានដុល្លារអាមេរិកទៅកាន់ក្រុមគ្រួសារ 36% វិស័យកសិកម្ម20% វិស័យពាណិជ្ជកម្ម18% សេវា13% និងសំណង់ 3%។

ឯកឧត្តមជា ចាន់តូ ទេសាភិបាលធនាគារជាតិនៃកម្ពូជាបានមានប្រសាសន៍ថា វិស័យធនាគារ និងមីក្រូហិរញ្ញវត្ថុបន្តដើរតួនាទីយ៉ាងសំខាន់ និងសកម្មក្នុងការជំរុញកំណើនសេដ្ឋកិច្ច និងកាត់បន្ថយភាពក្រីក្រ និងវិសមភាព។ ការផ្តល់ជូនសេវាកម្មហិរញ្ញវត្ថុបន្តពង្រីកនៅក្នុងប្រទេស បង្កើតឱកាសកាន់តែច្រើនសម្រាប់ប្រជាជននៅទីក្រុង និងជនបទ និងលើកកម្ពស់ជីវភាពរស់នៅរបស់ពួកគេ។

ឯកឧត្តមមានប្រសាសន៍ថា៖“ ដោយសារកំណើននេះ បទប្បញ្ញត្តិនៃវិស័យនេះចាំបាច់ត្រូវពង្រឹងរួមជាមួយចំណេះដឹងផ្នែកហិរញ្ញវត្ថុ។ កត្តាម៉ាក្រូ និងមីក្រូសេដ្ឋកិច្ចទាំងអស់ត្រូវតែមាន ដើម្បីកាត់បន្ថយហានិភ័យចំពោះស្ថិរភាពហិរញ្ញវត្ថុ”។

វិស័យធនាគារបានចូលរួមចំណែក និងគាំទ្រដល់ការពង្រឹងបណ្តាញសុវត្ថិភាពហិរញ្ញវត្ថុក៏ដូចជាកិច្ចសហប្រតិបត្តិការក្នុងតំបន់។ ឧទាហរណ៍នេះគឺជាក្របខ័ណ្ឌអាស៊ាន និងអាស៊ានបូក3 (ចិន កូរ៉េខាងត្បូង និងជប៉ុន) ដែលមានគោលបំណងជំរុញការអភិវឌ្ឍវិស័យហិរញ្ញវត្ថុ និងលើកកម្ពស់ការដាក់បញ្ចូលហិរញ្ញវត្ថុ និងស្ថិរភាពហិរញ្ញវត្ថុនៅក្នុងតំបន់។

លោកបណ្ឌិត អុិន ចាន់នី នាយកប្រតិបត្តិធនាគារអេស៊ីលីដា បានឱ្យដឹងថា អេស៊ីលីដាកំពុងផ្តោតលើការជួយសហគ្រាសធុនតូច និងមធ្យមឱ្យរីកចម្រើន។

“ធនាគារអេស៊ីលីដាបាន និងកំពុងរីកចម្រើនដោយសារសកម្មភាពផ្តល់ប្រាក់កម្ចី ដើម្បីគាំទ្រសហគ្រាសធុនតូច និងមធ្យមនៅកម្ពុជា។ យើងមិនខ្វល់អំពីប្រាក់កម្ចីធំទេ។ យើងចង់ជួយអតិថិជនសហគ្រាសធុនតូច និងមធ្យមរបស់យើងឱ្យរីកចម្រើន។ ឥឡូវនេះយើងកំពុងផ្តល់ប្រាក់កម្ចីប្រហែល 6ពាន់លានដុល្លារដល់សហគ្រាសធុនតូច និងមធ្យម ហើយយើងនឹងបន្តដើរលើផ្លូវនេះ”។

ចាប់ពីខែមករា ដល់ខែមិថុនា ប្រាក់បញ្ញើនៅអេស៊ីលីដាឈានដល់ជាង4 ពាន់លានដុល្លារ ខណៈប្រាក់កម្ចីមានចំនួនលើសពី 3,5ពាន់លានដុល្លារ។ ប្រាក់ចំណេញរបស់ធនាគារបន្ទាប់ពីបង់ពន្ធប្រហែល60លានដុល្លារ។

លោកបណ្ឌិត អុិន ចាន់នី បានកត់សម្គាល់ថា ការរីកចម្រើននេះគឺជាលទ្ធផលនៃការសង្កត់ធ្ងន់ថ្មីរបស់ធនាគារទៅលើឌីជីថល និងការប្តេជ្ញាចិត្ត ក្នុងការ-អភិវឌ្ឍបច្ចេកវិទ្យាហិរញ្ញវត្ថុ ឬហិរញ្ញវត្ថុ ដែលមានសមត្ថភាពក្នុងការកែលម្អសេវាកម្ម។

លោកបានមានប្រសាសន៍ថា៖“ធនាគារ ពិតជាទទួលបានអត្ថប្រយោជន៍ពីស្ថានភាពម៉ាក្រូសេដ្ឋកិច្ចមានស្ថិរភាព ដែលអាចជួយឱ្យមានកំណើននៅក្នុងវិស័យហិរញ្ញវត្ថុ។ កាលពីឆ្នាំមុន សេដ្ឋកិច្ចប្រទេសកម្ពុជាបានកើនឡើង7.5 % ហើយនៅឆ្នាំនេះរដ្ឋាភិបាលបានព្យាករថា នឹងមានអត្រាកំណើន 7.1% ដូច្នេះវិស័យហិរញ្ញវត្ថុ និងសេដ្ឋកិច្ចនឹងបន្តកើនឡើងក្នុងល្បឿនមួយយ៉ាងលឿន”។

យោងតាមធនាគារជាតិនៃកម្ពុជា វិស័យធនាគារនិងហិរញ្ញវត្ថុបន្តរីកចម្រើនទាំងទំហំ និងវិសាលភាពដោយបច្ចុប្បន្នវិស័យធនាគារ និងស្ថាប័នមីក្រូហិរញ្ញវត្ថុរួមមាន៖ធនាគារពាណិជ្ជ44 ធនាគារឯកទេស15 គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជន7 គ្រឹះស្ថានមីក្រូហិរញ្ញវត្ថុ មិនទទួលប្រាក់បញ្ញើ74 ប្រតិបត្តិករឥណទានជនបទចំនួន254 ក្រុមហ៊ុនភតិសន្យាហិរញ្ញវត្ថុ15 អ្នកដំណើរការតតិយភាគី4 និងគ្រឹះស្ថានសេវាទូទាត់16។

ចំណែកទ្រព្យសកម្មសរុបនៅក្នុងវិស័យធនាគារ និងមីក្រូហិរញ្ញវត្ថុបានកើនឡើង19.2% ឈានដល់ 180ទ្រីលានរៀល ឬស្មើ 44.8ពាន់លានដុល្លារអាមេរិក ដែលគាំទ្រដោយកំណើនដើម ទុន20% កំណើនមូលនិធិកម្ចី17% និងកំណើនប្រាក់បញ្ញើអតិថិជន22%។ បច្ចុប្បន្នមានការិយាល័យធនាគារ និងមីក្រូហិរញ្ញវត្ថុចំនួន 2,367 នៅក្នុងប្រទេសកម្ពុជា និងម៉ាស៊ីនអេធីអឹមចំនួន 2,228 គ្រឿង។

លោក ចូវ សោភ័ណ្ឌ នាយកប្រតិបត្តិសមាគមមីក្រូហិរញ្ញវត្ថុមានប្រសាសន៍ថា គិតត្រឹមឆមាសទី1 ដើមឆ្នាំ2019 នេះការផ្តល់ឥណទាននៅក្នុងវិស័យមីក្រូហិរញ្ញវត្ថុជារួម មានទឹកប្រាក់ជាង 6ពាន់លានដុល្លារអាមេរិក មានកំណើនប្រមាណ16%។ អ្នកប្រើប្រាស់សេវាឥណទានមានជាង 2,1 លាននាក់ហើយប្រាក់បញ្ញើសន្សំទទួលពីអតិថិជនមានប្រមាណ2,543លានដុល្លារ មានកំណើនជាង 20%, អ្នកប្រើប្រាស់សេវាប្រាក់បញ្ញើសន្សំមានជាង 2,5លាននាក់។

កាលពីឆ្នាំ2018 ឆមាសទី1 ដូចគ្នាការផ្តល់ឥណទានមានកំណើនប្រមាណ 12% ហើយប្រាក់បញ្ញើសន្សំមានកំណើនប្រមាណ 12.83%។ ឥណទានមិនដំណើរការជាមធ្យមមានអត្រាប្រមាណជា 1% មានន័យថា អតិថិជនមានលទ្ធភាពសងត្រឡប់បានល្អ និងទៀងទាត់៕

August 14, 2019

មកស្ដាប់អ្នកនាង ភីម ប្រាប់ពីអារម្មណ៍ពិតនិងរឿងរ៉ាវនាយតាក់ស៊ី

មានមហាជនជាច្រើន បានបង្ហាញការអាណិតអាសូរខ្លាំងដល់តារាកំប្លែងនាយ តាក់ស៊ី ក្រោយពេលដែលតារាកំប្លែងជាប់ឈ្មោះជាអន្ទិតរូបនេះ បានទម្លាយប្រាប់នូវរឿងរ៉ាវលំបាកមួយចំនួន ក្រោយពេលសម្រេចលាចាកសិក្ខាបទ ព្រោះស្ថានភាពជំងឺកាន់តែទ្រុឌទ្រោម។ មិនតែប៉ុណ្ណោះគឺរឿងដ៏រសើប នៃការបែកបាក់គ្រួសារជាមួយភរិយាអ្នកនាង ភីម។ នៅក្នុងម៉ោងនេះមានការលើកឡើងជាច្រើនថា តារាកំប្លែងអ្នកនាង ភីម បានបោះបង់នាយតាក់ស៊ី ដោយលែងអើពើទៀតហើយ ទើបក្នុងពេលនាយតាក់ស៊ីសឹកពីបួស ហើយចូលសម្រាកក្នយងពេទ្យ អ្នកនាង និងកូនប្រុសទៅអើតតែបន្តិច មិនដូចប្ដីប្រពន្ធទូទៅ។ ពាក់ព័ន្ធនឹងការលើកឡើងនេះ អ្នកនាង ភីម សារភាព តែបានទម្លាយពីមូលហេតុដែលនាងសម្រេចចិត្តឈប់រវល់នឹងស្វាមី។

អ្នកនាង ភីម និយាយថា រវាងអ្នកនាង និង នាយតាក់ស៊ីបានលះលែងគ្នាហើយ ដោយមុនពេលទៅបួសអ្នកនាង និង អតីតស្វាមី បានផ្ដិតមេដៃដឹងឮពីគ្រួសារ និងមន្ត្រីអាជ្ញាធម៌រួចរាល់អស់ហើយ ដោយសារតែចំណងអាពាហ៍ពិពាហ៍អត់មានអេតាស៊ីវិល។ អ្នកនាងថា ហេតុផលផ្ដិតមេដៃលែងគ្នាមិនមែនជាមូលហេតុដែលធ្វើឱ្យអ្នកនាង មិនអាចទទួលយកនាយតាក់ស៊ីវិញ ក្រោយពេលសឹកនោះទេ ប៉ុន្តែមកពីអ្នកនាងអស់សង្ឃឹមនឹងយកលោកមកធ្វើជាស្វាមីម្ដងទៀត ទើបអ្នកនាងចិត្តដាច់ ដោយសម្រេចថាបើជ្រុលជាផ្តិតមេដៃមានគេដឹងឮថាលែងគ្នាទៅហើយ ជីវិតរៀងខ្លួនតែម្ដងទៅ។ អ្នកនាងថា រយៈពេលនៃការរួមរស់ លោកនាយតាក់ស៊ីធ្វើឱ្យអ្នកនាង និងកូនប្រុសពិបាកផ្លូវចិត្តយ៉ាងខ្លាំង ជាពិសេសក្នុងពេលដែលលោកអោយតែមានសតិអារម្មណ៍ចង់ធ្វើអីគឺធ្វើតែម្ដង ដូចមនុស្សអត់មានប្រពន្ធមានកូន នៅក្នុងបន្ទុក។ អ្នកនាងទម្លាយថាលោករត់ចោលផ្ទអទៅបួសនៅនេះនៅនោះបាត់មុខបាត់មាត់ ធ្វើឱ្យអ្នកនាង និងកូនប្រុសពិបាកផ្លូវចិត្តជាច្រើនលើកជាច្រើនសារហើយ ខណៈដែលដ្បិតថាលោកមានជំងឺប្រចាំកាយប៉ុន្តែអ្នកនាងមិនដែលទុកចោល ប៉ុន្តែលោកនៅតែចង់បោះបង់គ្រួសារ។

អ្នកនាងថាខ្លួនមានរឿងច្រើនទៀតដែលពិបាកអត្ថាធិប្បាយ ប៉ុន្តែអ្នកនាងថា នាយតាក់ស៊ីបានដឹងខ្លួនឯងហើយថាខ្លួនបានធ្វើអ្វីខ្លះចំពោះគ្រួសារ ទើបលោកសូម្បីតែទៅលេងកូនដល់ផ្ទះក្រោយសឹកពីបួស ក៏មិនហ៊ានចូល។ អ្នកនាងនិយាយថា ”មនុស្សទាំងអស់គេថាហើយថាខ្ញុំ ឃើញគាត់ឈឺបោះបង់គាត់ ប៉ុន្តែគាត់ដឹងខ្លួនគាត់ហើយថា គាត់បានធ្វើអ្វីខ្លះមុនពេលផ្តិតមេដៃលែងខ្ញុំហើយទៅបួស ខ្ញុំអង្វរគាត់ណាស់ ថាឱ្យគាត់បួសតែមួយរយៈហើយវិលវិញទៅ តែគាត់នៅតែចង់លែងខ្ញុំ ហើយចង់បួសមួយជីវិត ដល់លូវគាត់បួសអត់កើត តើខ្ញុំត្រូវតាមគាត់បែបនឹងដល់អង្កាល់ទៀត”។ អ្នកនាងថារយៈពេលរួមរស់ជាមួយគ្នា អត់មានសល់ទ្រព្យក្រៅពីផ្ទះមួយខ្នងនៅស្រុកស្អាងទេ ប៉ុន្តែអ្នកនាងមិនដែលតូចចិត្ត សុំកុំឱ្យតែលោកបោះបង់គ្រួសារ ប៉ុន្តែលោកធ្វើមិនបាន។ អ្នកនាងថា មិនអាចទទួលយកនាយតាក់ស៊ីជាស្វាមីវិញទេ ប៉ុន្តែនឹងនៅរាប់អានគ្នា ដោយឡើងចុះទៅមើលលោក និងឱ្យលោកចេញចូលផ្ទះដូចបងប្រុសម្ដងម្កាលបាន។

ដោយឡែកនាយតាក់ស៊ីឯណោះវិញ បានអះអាងថា លោកបានសម្រេចចិត្តប្រគល់ផ្ទះ និងលះលែងជាមួយអ្នកនាងភីមរួចហើយ ដូច្នេះសម្រាប់ផ្លូវជីវិតបន្ទាប់ គឺលោកនឹងប្រឹងខ្លួនឯង ដោយទទួលកំប្លែងក្នុងក្រុមCTN ដូចដើម ហើយអាចរស់នៅផ្ទះជួល ឬ ផ្ទះបងធម៌តាមជាក់ស្ដែង៕

August 14, 2019

តោះ!! មកមើលសម្រស់បវកញ្ញាMiss Global2019 តំណាងប្រទេសកម្ពុជាគឺកញ្ញា អៃ សុគន្ធពិដោរ

នៅលើបណ្ដាញសង្គមហ្វេសប៊ុកព្រឹកថ្ងៃទី១៤ សីហា ឆ្នាំ២០១៩ តារាម៉ូដែល BN បានប្រកាសពីសមាជិក ក៏ដូចជាតារាចំណូលថ្មីនៃគ្រួសារតារាកម្ពុជា ត្រូវបានគណកម្មការ Miss Global International ជ្រើសជាតំណាងកម្ពុជាជា ដើម្បីឱ្យនាងទៅប្រកួតបវរកញ្ញាឯកពិភពលោក Miss Global នៅខែកញ្ញា ខាងមុខ។ ហេតុផលនៃការជ្រើសយក គឺដោយសារយុវតីវ័យ២២ឆ្នាំរូបនេះ មានរូបសម្រស់ស្រស់សោភា កម្ពស់ខ្ពស់ល្អ និងមានចំណេះដឹងផ្នែកភាសាបរទេសជ្រៅជ្រះ។ ម្យ៉ាងមកពីកញ្ញា គឺសិល្បការិនីពន្លកថ្មី ដែលទទួលបានការចាប់អារម្មណ៍ស្រាប់ក្នុងអាជីពបង្ហាញម៉ូដ និងសកម្មក្នុងកិច្ចការសង្គមនាពេលចុងក្រោយ ក្រោយពីសមាជិកគ្រួសារតារាកម្ពុជាផង។

លោក អឿន រតនៈ តំណាងគណកម្មការ Miss Global International បានអះអាងថាបន្ទាប់ពីបានដាក់សំណើរបេក្ខនារីខ្មែរជាច្រើនរូប ទៅកាន់គណកម្មការអន្តរជាតិ ដែលជាអ្នករៀបចំការប្រកួតនៅក្រៅប្រទេស កញ្ញា អៃ សុគន្ធពិដោរ ត្រូវបានឯកភាពជារួម ឲ្យតំណាងប្រទេសកម្ពុជា ដើម្បីទៅប្រកួតនៅក្នុងប្រទេស Jamica ខែ៩ខាងមុខ។ លោកនឹងដឹកនាំបេក្ខនារីរូបនេះ ទៅកាន់ប្រទេសចាម៉ៃកា នៅថ្ងៃទី២៣ ខែ៩ ដោយការប្រកួតនឹងចាប់ផ្ដើមពីថ្ងៃទី២៥ ដល់ថ្ងៃទី២៩ ខែ៩ ជាមួយនឹងវត្តមានបេក្ខនារីមកពីជាច្រើនប្រទេស។

កញ្ញា អៃ សុគន្ធពិដោរ នាងត្រូវបានជ្រើសបន្ទាប់ពីបានបង្ហាញខ្លួនក្នុងការប្រកួតឈុតបុរាណនៅប្រាសាទសំបូរព្រៃគុក ហើយត្រូវបានណែនាំឱ្យស្គាល់តំណាងគណកម្មការ Miss Global International ដែលជាគណអធិបតីក្នុងការប្រកួតនោះ និងបន្ទាប់ពីនាងបានក្លាយជាសមាជិកគ្រួសារតារាកម្ពុជា។ នាងបានអះអាងថា រំភើបចិត្តយ៉ាងខ្លាំង ដែលត្រូវបានលោក អឿន រតនៈ និង គណកម្មការ Miss Global International ជ្រើសជាតំណាងប្រទេសកម្ពុជា បន្ទាប់ពីកញ្ញាបានជួបលោក អឿន រតនៈ នៅក្នុងការប្រកួតឈុតបុរាណរបស់គ្រួសារតារាកម្ពុជា នៅសំបូរព្រៃគុក។ កញ្ញាថាខ្លួនមានកម្ពស់១ម៉ែត្រ៦៨ ជានិស្សិតផ្នែកគណនេយ្យឆ្នាំទី៣ ជាតារាម៉ូដែលប្រចាំក្រុមBN និងជាសមាជិកគ្រួសារតារាកម្ពុជា។ កញ្ញាបានត្រៀមរួចហើយក្នុងការយកឈុតអប្សរា-ស ទៅបង្អួតនៅព្រឹត្តិការណ៍នោះ ដោយកញ្ញាបញ្ជាក់ថា បើទោះក្ដីសង្ឃឹមក្នុងការដណ្ដើមមកុដនៅមិនទាន់មាន តែក៏បានបង្ហាញពីអត្តសញ្ញាណខ្មែរលើឆាកអន្តរជាតិនាឱកាសនោះ៕

August 14, 2019

ការបង្កើតភូតគាមអនាម័យអេឡិចត្រូនិក (E-Phyto Sysytem) កំពុងត្រូវបានធ្វើនៅកម្ពុជា

ក្រសួងកសិកម្ម រុក្ខាប្រមាញ់ និងនេសាទ បាននិងកំពុងយកចិត្តទុកដាក់ក្នុងរៀបចំបង្កើត ប្រព័ន្ធភូតគាមអនាម័យអេឡិចត្រូនិក (E-Phyto Sysytem)ដើម្បីជំរុញការធ្វើពាណិជ្ជកម្ម និងផ្តល់ភាពងាយស្រួលដល់អ្នកនាំចេញដែលត្រូវការនាំចេញផលិតផលកសិកម្ម។

វិញ្ញាបនបត្រអនាម័យ និងភូតគាមអនាម័យ (E-Phyto) ជាឯកសារចាំបាច់សម្រាប់ការនាំចេញផលិតផលកសិកម្ម ដូចជាផ្លែឈើស្រស់ បន្លែស្រស់ រុក្ខជាតិស្រស់ ត្រី សត្វរស់ និងផលិតផលកសិកម្មដទៃផ្សេងទៀតដែលតម្រូវដោយប្រទេសនាំចូល។

វិញ្ញាបនបត្រនេះបញ្ជាក់ថា ផលិតផលនាំចេញទាំងនោះគ្មានផ្ទុកសត្វល្អិតបង្កជំងឺ ឬសត្វល្អិតចង្រៃដែលអាចបំផ្លាញផលដំណាំ។ អ្នកនាំចូលត្រូវទទួលខុសត្រូវក្នុងការបំពេញទៅតាមលក្ខខណ្ឌអនាម័យនិងភូតគាមអនាម័យ។

ប្រធាននាយកដ្ឋានការពារដំណាំ អនាម័យ និងភូតគាមអនាម័យ នៃអគ្គនាយកដ្ឋានកសិកម្ម បានបញ្ជាក់ឱ្យដឹងថា៖“នៅពេលនេះសម្រាប់ការស្នើសុំការធ្វើវិញ្ញាបនបត្រអនាម័យ និងភូតគាមអនាម័យ អាចធ្វើតាមប្រព័ន្ធអនឡាញ តាមច្រកបញ្ជរជាតិតែមួយបាន។ កម្ពុជាពិតជាមានឆន្ទៈក្នុងការរៀបចំឱ្យមានប្រព័ន្ធភូតគាមអនាម័យ អេឡិចត្រូនិក(E-Phyto)នេះ ដោយអគ្គនាយកដ្ឋានកសិកម្ម ប្រឹងប្រែងសាកល្បងធ្វើការងារនេះ 2-3ឆ្នាំមកហើយដោយសម្រេចបានមួយជំហាន ស្ថិតក្នុងគម្រោងបញ្ជរជាតិតែមួយ ដែលដឹកនាំអនុវត្តន៍ដោយអគ្គនាយកដ្ឋានគយ និងរដ្ឋាករកម្ពុជា”។

លោកបណ្ឌិត កែ មុន្ធីវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យ បានបញ្ជាក់ទៀតថា៖ “ដើម្បីធ្វើឱ្យមានការប្រើប្រាស់ប្រព័ន្ធ E-Phyto ពេញលេញយើងត្រូវការរៀបប្រព័ន្ធការងារបច្ចេកទេសនិងធនធានមនុស្ស។ បច្ចុប្បន្ននេះយើងអាចធ្វើការងាររដ្ឋបាល ដោយដាក់ពាក្យស្នើសុំវិញ្ញាបនបត្រអនាម័យ និងភូតគាមអនាម័យតាមប្រព័ន្ធអនឡាញដូច្នេះយើងកំពុងតែស្វែងរកដៃគូ ដើម្បីប្រមូលធនធានបន្តធ្វើការងារនេះដែលចាំបាច់ត្រូវមានដៃគូ ហើយដៃគូដែលបានជួយយើងមានអង្គការ CAVAC និង FAO”។

លោកប្រធាននាយកដ្ឋានរូបនេះបានឱ្យដឹងទៀតថា៖ “យើងចង់ឱ្យមានការប្រើប្រាស់ប្រព័ន្ធE-Phyto នៅ 2ឆ្នាំទៀតយ៉ាងយូរ ដើម្បីឱ្យទាន់សភាពការណ៍ និងសម្រួលពាណិជ្ជកម្ម”។

យ៉ាងណាក៏ដោយលោក មុន្ធីវុធ បានលើកឡើងដែរថា បើទោះបីជាកម្ពុជាមាន E-Phyto ក៏មិនប្រាកដថា អាចសម្រួលដល់ការធ្វើពាណិជ្ជកម្ម ពេញលេញនោះបានដែរ ដរាបណាប្រទេសដែលកម្ពុជាធ្វើពា-ណិជ្ជកម្មជាមួយ បានប្រើប្រាស់ប្រព័ន្ធ E-Phyto នេះដូចគ្នា ហើយចំពោះប្រទេសដែលមិនទាន់មានប្រព័ន្ធនេះ គឺនៅតែប្រើប្រាស់ក្រដាសធម្មតាក្នុងការបំពេញទម្រង់នាំចេញនាំចូលនោះ។បើតាមលោក កែ មុន្ធីវុធ នៅក្នុងតំបន់អាស៊ាន មានតែ 2ប្រទេសប៉ុណ្ណោះ ដែលឈានមុខ មានប្រើប្រាស់នូវប្រព័ន្ធ E-Phyto គឺប្រទេសឥណ្ឌូនេស៊ី និងម៉ាឡេស៊ី។

លោក កែ មុន្ធីវុធ បានឱ្យដឹងថា ប្រព័ន្ធ E-Phyto នេះនឹងជួយរួមចំណែកដល់ការលុបបំបាត់នូវការបន្លំឯកសារដែលផ្តល់នូវទំនុកចិត្តក្នុងការធ្វើពាណិជ្ជកម្មកាន់តែខ្លាំង ក្នុងការកាត់បន្ថយពេលវេលារត់ឯកសារ និងកាត់បន្ថយបញ្ហាមួយចំនួន ដែលធ្វើឱ្យប៉ះពាល់ដល់ការប្រកួតប្រជែងក្នុងការធ្វើពាណិជ្ជកម្ម។

ដោយឡែកការត្រួតពិនិត្យសុវត្ថិភាពចំណីអាហារនេះ សម្រាប់ផលិតផលក្នុងស្រុកក៏មានការយកចិត្តទុកដាក់ខ្ពស់ដែរ ដោយមានមជ្ឈមណ្ឌលប្រមូលផ្តុំ ពិនិត្យគុណភាព និងចែកចាយបន្លែមួយថ្មីត្រូវបានដាក់សម្ពោធឱ្យប្រើប្រាស់នៅខេត្តកណ្តាល ដែលមជ្ឈមណ្ឌលនេះជាជំនួយឥតសំណងរបស់រដ្ឋាភិបាលជប៉ុនដែលមានតម្លៃជាង 10ម៉ឺនដុល្លារ។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងអំណរគុណ ចំពោះប្រជាជន និងរដ្ឋាភិបាលជប៉ុនដែលតែងតែគាំទ្រ និងជួយឧបត្ថម្ភទាំងធនធានថវិកា និងអ្នកបច្ចេកទេស ជាបន្តបន្ទាប់ចំពោះកម្ពុជា លើគ្រប់វិស័យជាប្រចាំ និងគ្រប់កាលៈទេសៈ ដែលសក្ខីភាពជាក់ស្តែង បានផ្តល់ឱកាស ដល់ប្រជាកសិករយើងកែប្រែទម្លាប់ពីការផលិតសម្រាប់បម្រើសេចក្ដីត្រូវការរបស់ខ្លួនជាការផលិតសម្រាប់ធ្វើពាណិជ្ជកម្ម និងបំពេញតម្រូវការនៃទីផ្សារ ពោលគឺពី“កសិករ ទៅជាកសិពាណិជ្ជករ”។

ឯកឧត្តមបានគូសបញ្ជាក់ថា ការប្រែប្រួលនេះក៏បានប្រែក្លាយសហគមន៍កសិកម្មទៅជាកម្លាំងចលករមួយយ៉ាងសំខាន់ ដែលនាំឱ្យមានការផ្លាស់ប្ដូរជាវិជ្ជមាននៅក្នុងសេដ្ឋកិច្ចសង្គមជនបទកម្ពុជាផងដែរ។ មួយវិញទៀតប្រជាជនកម្ពុជាក៏បានផ្លាស់ប្តូរឥរិយាបថមកបរិភោគចំណីអាហារ ដែលមានស្តង់ដាប្រកបដោយគុណភាព និងសុវត្ថិភាពខ្ពស់ ជាពិសេសផលិតផលបន្លែ និងផ្លែឈើជាដើម។

ឯកឧត្តម វេង សាខុន បានបញ្ជាក់ទៀតថា៖“មជ្ឈមណ្ឌលប្រមូលផ្តុំ ត្រួតពិនិត្យគុណភាព និងចែកចាយបន្លែនេះ គឺមានសារៈសំខាន់ និងចាំបាច់បំផុតទាំងពេលបច្ចុប្បន្ន ក៏ដូចជាសម្រាប់ពេលអនាគតសំដៅធានាបាននូវគុណភាព សុវត្ថិភាពផលិតផល ដែលអាចប្រកួតប្រជែងលើទីផ្សារ ធានាសុខុមាលភាពសាធារណៈ និងភាតរបរិស្ថាន និងពិតជាស្របតាមគោលនយោបាយអភិវឌ្ឍន៍វិស័យកសិកម្មរបស់ក្រសួងក្នុងការជំរុញផលិតភាព គុណភាព និងសុវត្ថិភាពសម្រាប់ផ្គត់ផ្គង់ទីផ្សារក្នុងស្រុក និងក្រៅស្រុក៕

August 14, 2019

រយៈពេល 5ខែ ដើមឆ្នាំ2019 កម្ពុជាទទួលបានទេសចរអន្តរជាតិជិត 3លាននាក់

យោងតាមរបាយការណ៍របស់ក្រសួងទេសចរណ៍បានឱ្យដឹងថា រយៈពេល 5ខែ ឆ្នាំ2019 កម្ពុជាទទួលបានភ្ញៀវទេសចរអន្តរជាតិចំនួន 2,888,461នាក់ កើនឡើង 11.4% បើធៀបនឹងរយៈពេលដូចគ្នានៅឆ្នាំ2018 ប៉ុន្តែភ្ញៀវទេសចរអន្តរជាតិដែលចូលតាមអាកាសយានដ្ឋានអន្តរជាតិសៀមរាប មានការធ្លាក់ចុះខ្លះ។

ក្នុងចំណោមភ្ញៀវទេសចរអន្តរជាតិដែលមកទស្សនាកម្ពុជាទាំងនោះ រួមមាន៖1- ចូលតាមផ្លូវអាកាសចំនួន 2,018,935នាក់កើនឡើង 16.9% ក្នុងនោះចូលតាមច្រកទ្វារអន្តរជាតិភ្នំពេញចំនួន 923,771នាក់ កើនឡើង17.6%។ តាមច្រកទ្វារអន្តរជាតិសៀមរាបចំនួន 846,267នាក់ ថយចុះ 4.5% និងតាមច្រកទ្វារអន្តរជាតិខេត្តព្រះសីហនុចំនួន 248,897នាក់ កើនឡើង 344.9%។2-ចូលតាមផ្លូវគោកចំនួន 785,774នាក់ ថយចុះ 1.1%។3-ចូលតាមផ្លូវទឹកចំនួន 83,752នាក់ កើនឡើង 15.4%។

គួរកត់សម្គាល់ថា ភ្ញៀវដែលចូលតាមច្រកទ្វារអន្តរជាតិខេត្តព្រះសីហនុមានចំនួនកើនឡើងរហូតដល់ 391.8% តាមរបាយការណ៍នោះបានបង្ហាញថា ភ្ញៀវទេសចរចិននៅតែឈរលំដាប់ថ្នាក់លេខ1 បន្ទាប់មកភ្ញៀវមកពីវៀតណាម ឡាវ ថៃ កូរ៉េ អាមេរិក ជប៉ុន អង់គ្លេស បារាំង និងម៉ាឡេស៊ី។ តាមតួលេខសម្រាប់ 5ខែដើមឆ្នាំ2019 នេះ ភ្ញៀវទេសចរចិនធ្វើដំណើរមកកាន់ប្រទេសកម្ពុជា មានចំនួន 1,103,570 នាក់ ស្មើនឹង 38.2% នៃចំនួនសរុប កើនឡើងប្រមាណ 40% និងឈរលំដាប់លេខ1។ ចំណែកភ្ញៀវទេសចរវៀតណាមមានចំនួន 322,756 នាក់ ស្មើនឹង 11.2% ថយចុះ០.4% ឈរលំដាប់ថ្នាក់លេខ2។

ទន្ទឹមនោះ ភ្ញៀវទេសចរមកពីប្រទេសឡាវដែលឈរលំដាប់ថ្នាក់លេខ3 មានចំនួន 187,954 នាក់ ស្មើនឹង6.5% នៃចំនួនសរុប កើនឡើង 5.8% ខណៈដែលភ្ញៀវមកពីប្រទេសថៃឈរលំដាប់ថ្នាក់លេខ4 មានចំនួន 150,396នាក់ ស្មើនឹង 5.2% នៃចំនួនសរុប កើនឡើង 10.8% ហើយភ្ញៀវមកពីកូរ៉េឈរលំដាប់ថ្នាក់លេខ5 មានចំនួន 150,396នាក់កើនឡើង 10.4%។

ចំពោះតំបន់ទេសចរណ៍អន្តរជាតិផ្ទៃក្នុងដែលជាតំបន់អាទិភាពសំខាន់ៗក្នុងរយៈពេល 5ខែ ដើមឆ្នាំ2019 នេះ គឺតំបន់ភ្នំពេញ ទទួលបានភ្ញៀវអន្តរជាតិចំនួន 1,770,620 នាក់កើន ឡើង 27.6% ធៀបនឹងឆ្នាំ2018។ តំបន់សៀមរាបអង្គរ ទទួលបានភ្ញៀវអន្តរជាតិចំនួន 1,117,841នាក់ ស្មើនឹង 32.6% ថយចុះ 7.3% ។

ដោយឡែកតំបន់ឆ្នេរសមុទ្រទទួលបានភ្ញៀវទេសចរអន្តរជាតិចំនួន 504,495នាក់ ស្មើនឹង14.7% កើនឡើង 22% ខណៈដែលតំបន់អេកូទេសចរណ៍ភូមិភាគឥឦសាន ទទួលបាន 38,432 នាក់ កើនឡើងជិត 11% ធៀបនឹងឆ្នាំ2018។ តំបន់ប្រាសាទព្រះវិហារ ទទួលបានភ្ញៀវទេសចរអន្តរជាតិចំនួន27,712នាក់ ថយចុះ 1.3% ធៀបនឹងឆ្នាំ2018។

របាយការណ៍ដដែលក៏បានបង្ហាញផងដែរនូវចំនួនអ្នកទេសចរកម្ពុជាដែលចេញទៅក្រៅប្រទេសក្នុងរយៈពេល 5ខែ ដើមឆ្នាំ2019 ផងដែរ គឺមានចំនួន 842,754នាក់ កើនឡើងជិត 4% ធៀបនឹងរយៈពេលដូចគ្នាកាលពីឆ្នាំ2018។ជាមួយគ្នានេះដែរ ឯកឧត្ដមបណ្ឌិត ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិលបានបញ្ជាក់ថា៖ “នៅឆ្នាំ2018 ព្រះរាជាណាចក្រកម្ពុជា បានដឹកជញ្ជូនអ្នកដំណើរ តាមផ្លូវអាកាសប្រមាណ 10លាននាក់ជាមួយនឹងអត្រាកំណើន 23% បានផ្តល់ការងារធ្វើដោយផ្ទាល់ និងប្រយោលបានជាង 1.7លាននាក់ និងបានចូលរួមចំណែកក្នុងចំណូលសេដ្ឋកិច្ចប្រមាណជា 2.7ពាន់លានដុល្លារសហរដ្ឋអាមេរិក។ ក្នុងនោះ ក្រុមហ៊ុនអាកាសចរណ៍អន្តរជាតិ អង្គរអ៊ែរ បានចូលរួមចំណែកប្រមាណ 10% នៃលទ្ធផលដ៏ល្អនេះ”។

រដ្ឋមន្ត្រីក្រសួងទេសចរណ៍ ឯកឧត្ដម ថោង ខុនបានមានប្រសាសន៍ថា យើងមានបញ្ហាជាច្រើនដែលត្រូវពិភាក្សា ប៉ុន្តែបញ្ហាសំខាន់មុនគេ គឺសៀមរាបត្រូវការការអភិវឌ្ឍផលិតផលទេសចរណ៍ថ្មីៗបន្ថែមទៀត ដើម្បីទាក់ទាញភ្ញៀវទេសចរ និងពន្យារការស្នាក់នៅរបស់ពួកគេ។ លោកបានបន្តទៀតថា កាលពីឆ្នាំ2018 កន្លងមក ដើម្បីទ្រទ្រង់កំណើនភ្ញៀវទេសចរមកកម្សាន្តនៅខេត្តសៀមរាប រាជរដ្ឋាភិបាលបានសម្រេចបង្កើតក្រុមការងារអន្តរក្រសួងមួយ ដើម្បីសិក្សារៀបចំផែនការមេអភិវឌ្ឍន៍ទេសចរណ៍ខេត្តសៀមរាបដែលមានក្រសួងទេសចរណ៍ជាប្រធាន ហើយបច្ចុប្បន្នក្រុមការងារជំនាញ បាននិងកំពុងសិក្សារៀបចំផែនការមេនេះយ៉ាងសកម្ម។

ផែនការមេ នឹងផ្តោតជាសំខាន់លើការអភិវឌ្ឍខេត្តសៀមរាប ជាពិសេសក្រុងសៀមរាបជាទីក្រុងទេសចរណ៍ ជាទីក្រុងបេតិកភណ្ឌ និងជាទីក្រុងដែលគិតគូរពីបរិស្ថាន (Eco-City) ដែលត្រូវធ្វើសមាហរណកម្មទាំងលើទិដ្ឋភាពសេដ្ឋកិច្ច សង្គម វប្បធម៌ បរិស្ថាន និងស្ថាបត្យកម្ម និងការធ្វើសមាហរណកម្មជាមួយផែនការគ្រប់គ្រងតំបន់អង្គរ (TMP) របស់អាជ្ញាធរជាតិអប្សរាផងដែរ៕

August 14, 2019

AFC U15 ឆ្នាំនេះ កម្ពុជាស្ថិតនៅក្នុងពូល J ជាមួយជប៉ុន

ការប្រកួតក្នុងពានរង្វាន់ AFC U16 Championship 2020 វគ្គជម្រុះដែលនឹងចាប់ផ្តើមពីថ្ងៃទី14 ខែកញ្ញា រហូតដល់ថ្ងៃទី22 ខែកញ្ញាដដែល ក្រុមជម្រើសជាតិកម្ពុជាអាយុក្រោម 15ឆ្នាំបានស្ថិតនៅក្នុងពូល J ខណៈដែលប្រទេសឡាវនឹងធ្វើជាម្ចាស់ផ្ទះប្រចាំពូលនេះ។

ក្រុមដែលត្រូវរួមពូលជាមួយនឹងកម្ពុជា មានប្រទេសចំនួន 3ផ្សេងទៀតដូចជា ក្រុមខ្លាំងជប៉ុន ម្ចាស់ផ្ទះឡាវ និងក្រុមជើងឯកតំបន់អាស៊ាន គឺម៉ាឡេស៊ី។

គួរបញ្ជាក់ផងដែរថា កាលពីឆ្នាំមុន កម្ពុជាបានធ្លាក់ត្រឹមវគ្គចែកពូលនៃវគ្គជម្រុះនេះ ដោយឈ្នះ1 និងចាញ់ 2ប្រកួត ឈរនៅលើលេខ3 នៃពូល ខណៈដែលក្រុមដែលបានឡើងទៅវគ្គបន្តមានវៀតណាម និងអូស្ត្រាលី៕

August 14, 2019

Category: សង្គម និងសេដ្ឋកិច្ច