សង្គម និងសេដ្ឋកិច្ច - La Reine Media

ជម្រើសជាតិកម្ពុជា U15 ស្ថិតក្នុងពូល B ក្នុងពាន Jinshan Cup

ក្រុមបាល់ទាត់ជម្រើសជាតិកម្ពុជាអាយុក្រោម 15ឆ្នាំ ស្ថិតនៅក្នុងពូល B នៃកម្មវិធីបាល់ទាត់មិត្តភាពបែបអន្តរជាតិក្រៅផ្លូវការ ដែលមានឈ្មោះថា «Jinshan Cup» International Youth Football Championship 2019 ធ្វើឡើងនៅទីក្រុងស៊ាងហៃ ប្រទេសចិន។

ចំពោះលទ្ធផលចាប់ពូល ក្រុមជម្រើសជាតិគោព្រៃកម្ពុជាស្ថិតនៅក្នុងពូល B ជាមួយនឹងក្រុមជម្រើសជាតិចិន ថៃ និងអូស្ត្រាលីខាងលិច ដែលការប្រកួតនេះនឹងចាប់ផ្តើមពីថ្ងៃទី21 ដល់ថ្ងៃទី26 ខែសីហា ឆ្នាំ2019 ក្រុម សរុបចំនួន 12ក្រុមចូលរួម ស្មើនឹង 8ប្រទេស រួមមាន Haubei FA U15 (ចិន), Standard de Liege U15 (បែលហ្ស៊ិក ), SK Slavia Praha U15 (ឆែក ), AJ Auxerre U15 (បារាំង ), SH Jinshan U14 (ចិន), ជម្រើសកោះហុងកុងអាយុក្រោម 14ឆ្នាំ, Shonan Bellmare U14 (ជប៉ុន) និងអូស្ត្រាលី អាយុក្រោម 14ឆ្នាំ៕

August 20, 2019

មិនថាត្រូវប្រឡងក្នុងឡានពេទ្យ ឬរបួសពេញខ្លួន បេក្ខជនឆ្នាំនេះនៅតែតស៊ូមិនបោះបង់

តាមការបង្ហាញពីក្រសួងអប់រំ យុវជន និងកីឡា នៅមុននេះបន្តិច បានឱ្យដឹងថា បេក្ខជនមួយចំនួននៅតាមមណ្ឌលប្រឡងទូទាំងប្រទេសមានបញ្ហាសុខភាព ដោយសារអាការៈវិលមុខ ខ្យល់គរ និងក្អួតជាដើម។

បើទោះជាយ៉ាងនេះក្តី ប្រភពពីមន្ត្រីអប់រំ បានបញ្ចាក់ថាបេក្ខជនខ្លះបានបន្តការប្រឡងឡើងវិញហើយបន្ទាប់ពីមានអាការៈធូរស្រាល ដោយការទទួលបានជំនួយសង្គ្រោះបឋមពីក្រុមគ្រូពេទ្យប្រចាំការនៅតាមមណ្ឌល និងបេក្ខជនម្នា់បានបញ្ចូនមកមន្ទីរពេទ្យ និងបានត្រឡប់ទៅមណ្ឌលប្រឡងវិញដើម្បីបន្តដំណើរសំណេរក្រោយទទួលបានការព្យាបាល។

ខាងក្រោមនេះជារូបភាពមួយចំនួននៃសិស្សប្រឡងមធ្យមសិក្សាទុតិយភូមិថ្ងៃទី 19 ខែសីហា ឆ្នាំ2019 ដែលបានបញ្ចូនទៅមន្ទីរពេទ្យ ប្រឡងក្នុងមណ្ឌលដោយមានគ្រូពេទ្យនៅចាំជួយជាប្រចាំ និងប្រឡងក្នុងឡានពេទ្យជាដើម៖

August 20, 2019

ធ្វើដំណើរលើកដំបូង ទីក្រុងតូក្យូ និង អូសាកាមួយណាទាក់ទាញជាង?

មានកន្លែងទេចរណ៍ជាច្រើននៅក្នុងប្រទេសជប៉ុនដែលពិបាកសម្រេចចិត្តថាត្រូវទៅកម្សាន្តនៅតំបន់ណាមួយណាស់ ជាពិសេសសម្រាប់អ្នកដែលមានបំណងទៅទស្សនាប្រទេសជប៉ុនជាលើកដំបូង។ មិនដឹងថា ត្រូវទៅកន្លែងណាមុនគេនោះទេ រវាងទីក្រុងតូក្យូ និងទីក្រុងអូសាកា ក៏ប៉ុន្ដែអ្នកអាចធ្វើដំណើររួមគ្នានៅក្នុងទីក្រុងទាំងពីរក៏បានដែរ។ ទីក្រុងទាំងពីរមានចំណុចទាក់ទាញខុសៗគ្នា ហើយប្លែកភ្នែកមែនទែន។ ថ្ងៃនេះទស្សនាវដ្តី ឡារ៉ែន នឹងនាំអារម្មណ៍លោកអ្នកមកធ្វើការប្រៀបធៀបពីភាពខុសគ្នានៃទីក្រុងទាំងពីរ ដើម្បីឱ្យបានដឹងកាន់តែច្បាស់ និងងាយស្រួលសម្រេចចិត្ត។

1. ដំណើរកម្សាន្ដក្នុងទីក្រុងទីក្រុងតូក្យូគឺជារាជធានីធំបំផុតនៅក្នុងប្រទេសជប៉ុន។ ទីក្រុងតូក្យូ គឺជាទីក្រុងមួយដែលមានតំបន់ទេសចរណ៍លំដាប់ពិភពលោកដ៏គួរឱ្យចាប់អារម្មណ៍ជាច្រើន មិនថាតែ Shinjuku, Ueno, Shibuya, Harajuku, Ginza, Roppongi និងមានជាច្រើនកន្លែងទៀត។ ម្យាងវិញទៀត តូក្យូក៏មានទីកន្លែងអស្ចារ្យប្រៀបដូចជានិមិត្តរូបតំណាងឱ្យប្រទេសជប៉ុនដូចជា Tokyo Tower, TokyoSkytree, Asakusa Temple, Tokyo Disneylandដែលសុទ្ធសឹងតែជាទីកន្លែងដ៏ពេញនិយម ហើយគ្រាន់តែធ្វើដំណើរកម្សាន្ដទៅកាន់តំបន់សំខាន់ៗទាំងអស់នោះត្រឹមតែរយៈពេលយ៉ាងយូរ 4-5ថ្ងៃ គឺគ្រប់គ្រាន់តែម្ដង។
ទីក្រុងអូសាកា
ទោះបីជាទីក្រុងអូសាកា គឺជាទីក្រុងធំលំដាប់ទីបីនៅក្នុងប្រទេសជប៉ុនក៏ពិតមែន (ទីក្រុងទីពីរគឺ ទីក្រុង Yokohama ដែលនៅជិតទីក្រុងតូក្យូ) ប៉ុន្តែទីក្រុងនេះមានលក្ខណៈពិសេសក្នុងវិស័យទេសចរណ៍ជាខ្លាំង ដែលគេអាចចាត់ទុកថា ជាទីក្រុងលេចធ្លោតិចជាងទីក្រុងតូក្យូតែបន្តិចប៉ុណ្ណោះ។ ជាមួយនឹងតំបន់ទេសចរណ៍ដែលអំណោយផលក្នុងរដូវក្តៅ ភ្ញៀវទេសចរតែងតែនិយមទៅកាន់ទីកន្លែងរមណីដ្ឋានដូចជា Umeda, Namba, Shinsaibashi និងតំបន់ជាច្រើនផ្សេងទៀតដូចជា Tennoji, Nippon, Bashi ដែលភាគច្រើនបានឮល្បីយូរមកហើយ តែមិនទាន់បានទៅទស្សនាកម្សាន្ដនៅឡើយទេ។ ចំណុចសំខាន់មួយទៀតគឺប្រាសាទអូសាកាសួនអនុសាវរីយ៍ Dotonbori និងឧទ្យានកម្សាន្តស្ទូឌីយោសកល។ ប្រសិនបើធ្វើដំណើរត្រឹមតែតំបន់ខាងលើដែលបានរៀបរាប់នេះ គឺត្រូវចំណាយពេល 2-3ថ្ងៃយ៉ាងតិច ហើយចាយពេលតិចជាងការដើរនៅទីក្រុងតូក្យូ។

2. ដំណើរកម្សាន្ដជុំវិញជាយទីក្រុងទីក្រុងតូក្យូ
ភ្នំហ្វូជី គឺជាគោលដៅលេខមួយនៅក្នុងតំបន់ជុំវិញទីក្រុងតូក្យូ។ គោលដៅទីពីរដែលពេញនិយមបំផុតសម្រាប់ភ្ញៀវទេសចរ គឺបឹង Kawaguchiko និង Hakone ដែលភាគច្រើនសម្រាប់ភ្ញៀវដែលចូលចិត្តទទួលយកបទពិសោធន៍ធម្មជាតិ និងទស្សនាប្រាសាទបុរាណ។គោលដៅទីបី គឺតំបន់ប្រាសាទបេតិកភណ្ឌពិភពលោកដ៏ចំណាស់នៅទីក្រុង Kamakura ឬ Nikkoដែលជាទីក្រុងដែលមានប្រជាប្រិយភាព ទាក់ទាញអ្នកទេសចរជាច្រើនឱ្យមកទស្សនាពីមួយឆ្នាំទៅមួយឆ្នាំ។ទីក្រុងអូសាកា
ដូចដែលបានរៀបរាប់ហើយនៅទីក្រុងអូសាកាមិនមានកន្លែងច្រើនសម្រាប់ការកម្សាន្ដដូចទីក្រុងដទៃនោះទេ។ ពិតណាស់យើងអាចចំណាយតិចជាងទីក្រុងតូក្យូ ហើយភ្ញៀវទេសចរភាគច្រើនតែងតែទៅលេងទីក្រុងផ្សេងៗបន្ថែមទៀត ជាពិសេសគេនឹងឈៀងទៅកាន់តំបន់ Kansai ផងដែរ ដែលជាទីក្រុងដ៏ពេញនិយមបំផុតទីពីរនៅក្បែរទីក្រុងអូសាកា។ បើចាកចេញពីទីក្រុងអូសាកា គេនឹងទៅកាន់ទីក្រុងមួយទៀតគឺ ទីក្រុងណារ៉ា នៅទីនោះមានហ្វូងសត្វក្តាន់ជាច្រើនក្បាល ងាយស្រួលប្រមាញ់រូបភាព ហើយពួកវាតែងតែមកធ្វើការស្វាគមន៍ចំពោះភ្ញៀវទេសចរផងដែរ។ មួយវិញទៀត នៅទីនោះភ្ញៀវទេសចរគ្រាន់តែចំណាយពេលធ្វើដំណើរទៅព្រឹក វិលល្ងាចក៏បានដែរ។

3. បរិយាកាសទូទៅទីក្រុងតូក្យូ
ត្រូវបានគេហៅថាជា ទីក្រុងបំពាក់ដោយបច្ចេកវិទ្យាយ៉ាងពេញលេញនៅគ្រប់ទីកន្លែងទាំងអស់។ ថ្វីបើវាជាទីក្រុងធំ ហើយទំនើបក៏ដោយ ក៏វានៅមានផ្កាឈើរីជាច្រើនដែរ គេឃើញមានដាំជាច្រើនកន្លែងណាស់។ ហើយសម្រាប់អ្នកដែលធ្វើដំណើរក្នុងរដូវរងា គេនៅតែមានឱកាសបានឃើញព្រិលធ្លាក់នៅក្នុងទីក្រុង ហើយអាចជិះស្គីបានយ៉ាងសប្បាយថែមទៀតផង។ ដើម្បីចំណេញថវិកា យើងត្រូវដើរដោយថ្មើជើង និងជិះរថភ្លើងនៅស្ថានីយ Shinkansen។ វាពិតងាយស្រួល និងសន្សំសំចៃពេលវេលាបានច្រើន។
ទីក្រុងអូសាកាមនុស្សជាច្រើនប្រហែលជាបានឮហើយថា ប្រជាជននៅក្នុងទីក្រុងអូសាកាមានទំនៀមទម្លាប់តឹងរឹងខ្លះក្នុងជីវិតរស់នៅប្រចាំថ្ងៃ ដែលខុសពីប្រជាជននៅទីក្រុងផ្សេងៗក្នុងប្រទេសជប៉ុន ដូចជា ការឈរនៅលើជណ្តើរយន្តដោយមានរបៀបរៀបរយ។ ប៉ុន្តែប្រជាជនអូសាកា គឺប្រកាន់យកនូវភាពត្រឹមត្រូវ ចិត្តទូលាយរុះរាយរាក់ទាក់ ចូលចិត្តរីករាយ និងអរសប្បាយជាងប្រជាជនជប៉ុននៅក្នុងទីក្រុងដទៃទៀត។ ទីក្រុងនេះ គឺមានបរិយាកាសស្ងប់ស្ងាត់ សូម្បីតែការធ្វើដំណើរក៏ស្ងប់ស្ងាត់ដែរ។ នៅរដូវក្ដៅនេះ ទីក្រុងអូសាកាមានកន្លែងឱ្យមើលស្លឹកឈើច្រើនពណ៌ ចម្រុះពណ៌គ្នាដុះនៅក្នុងទីក្រុង។ ប៉ុន្តែនៅក្នុងរដូវរងាវិញមិនមានធ្លាក់ព្រិលនោះទេ នៅទីក្រុងអូសាកា។

ដូច្នេះ លោកអ្នកអាចពិចារណាបានថា គួរសម្រេចចិត្តទៅកម្សាន្ដនៅទីក្រុងណាមួយដែរ?សូមឱ្យដំណើរកម្សាន្ដរបស់លោកអ្នកប្រកបដោយភាពសប្បាយរីករាយ និងមានសេចក្តីសុខសុវត្ថិភាពគ្រប់គ្នា៕

August 20, 2019

ខែថ្មីនេះ ប្តូរស្តាយល៍មកលេងម៉ូដពណ៌ក្រចកបែបភ្លឺចែងចាំងវិញម្តង

សម្រាប់ខែថ្មី ខែសីហានេះ ឡារ៉ែន សូមណែនាំនារីៗទាំងអស់ឱ្យប្តូរស្តាយល៍មកលេងម៉ូដពណ៌ក្រចកបែបពណ៌ភ្លឺផ្លេក ចាំងភ្នែកអ្នកនៅជុំវិញម្តងមើល៎! សូមក្រឡេកមើលពណ៌ក្រចកដៃដ៏ស្រស់ស្អាតទាំងនេះ ពិតជាស្អាត និងប្លែកមិនអន់នោះទេ មើលទៅគួរឱ្យចង់សាកខ្លាំងណាស់ មានលាយពណ៌ចម្រុះ មានពន្លឺភ្លឺផ្លេកប្រដេញពណ៌តែម្តង ហើយជាពិសេសនោះ គឺពណ៌ក្រចកបែបភ្លឺៗទាំងនេះ ថែមទាំងអាចជួយលើកសម្រស់ក្រចកដៃរបស់អ្នកឱ្យស្រស់ស្អាត និងមើលទៅរលោងស្អាតបែបមានសម្រស់ខ្លាំងថែមទៀតផង។ តោះចឹងចាំអង្កាលទៀត ប្តូរស្តាយល៍ពណ៌ក្រចករបស់អ្នកជាមួយនឹងពណ៌ក្រចកបែបភ្លឺចែងចាំងម្តងមើល៍ខែថ្មីនេះ ម៉េចដែរ!!

August 20, 2019

វេសឡាញ យកចិត្តទុកដាក់លើការបណ្តុះបណ្តាលសមត្ថភាពគ្រូ ដើម្បីធានាគុណភាពអប់រំកាន់តែប្រសើរ

គិតពីការអប់រំ ត្រូវគិតពីគ្រូបង្រៀន ព្រោះគ្រូបង្រៀន គឺជាផ្នែកដ៏សំខាន់មិនអាចខ្វះបានក្នុងការជំរុញឱ្យការសិក្សារបស់សិស្សទទួលបានជោគជ័យ ក្លាយជាមនុស្សដែលមានចំណេះដឹង និងមានផ្នត់គំនិតប្រកបដោយភាពវិជ្ជមាន។

ដោយមើលឃើញពីសារៈសំខាន់របស់គ្រូបង្រៀន ក្រុមហ៊ុន វេសឡាញ អេឌ្យូខេសិន គ្រុប បានយកចិត្តទុកដាក់ខ្លាំងលើការបណ្តុះបណ្តាលគ្រូបង្រៀនតាមគ្រប់រូបភាព ដើម្បីគ្រូបានបន្តចែករំលែកដល់សិស្សនូវគុណភាពអប់រំប្រកបដោយភាពច្បាស់លាស់ និងទាន់តម្រូវការក្នុងទីផ្សារការងារទាំងពេលបច្ចុប្បន្ន និងអនាគត។

លោក ប៉ិច ប៉ឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា គ្រូបង្រៀនជាផ្នែកសំខាន់បំផុតមួយដែលបណ្តាញសាលារៀនរបស់លោកយកចិត្តទុកដាក់ខ្លាំង ព្រោះដើម្បីឱ្យសិស្សក្លាយជាមនុស្សមានសក្តានុពល និងពូកែបាន លុះត្រាតែគ្រូដែលជាអ្នកចែករំលែកចំណេះដឹងនេះ មានគុណភាពខ្ពស់លើគ្រប់ផ្នែកទាំងអស់។ គ្រូបង្រៀនចាំបាច់ត្រូវតែជាអ្នកដែលមានការយល់ដឹងទូលំទូលាយទាំងសម្រាប់មុខវិជ្ជាបង្រៀន ចំណេះដឹងទូទៅ ភាពជាអ្នកដឹកនាំ ភាពជាគំរូ និងបច្ចេកទេសក្នុងការជំរុញឱ្យសិស្សក្លាយជាមនុស្សពូកែទាំងចំណេះដឹងគោល និងឥរិយាបថ។

លោក ប៉ិច ប៉ូឡែន បានមានប្រសាសន៍ថា៖ “គ្រូបង្រៀននៅក្នុងសម័យថ្មីនេះ ចាំបាច់ត្រូវតែខិតខំប្រឹងប្រែងអភិវឌ្ឍសមត្ថភាពឱ្យបានសកម្មខ្លាំង ព្រោះពិភពលោកបានប្រែប្រួលយ៉ាងឆាប់រហ័សពី 1ថ្ងៃ ទៅ 1ថ្ងៃ ដែលតម្រូវឱ្យអ្នកអប់រំ ក៏ចាំបាច់ត្រូវមានភាពបត់បែន និងព្យាយាមស្វែងយល់ជាប់ជាប្រចាំ ដើម្បីធានាថា ការបង្រៀនរបស់យើងអាចដើរទាន់ការវិវឌ្ឍរបស់ពិភពលោក ហើយធ្វើឱ្យសិស្សរបស់យើងរក្សាបាននូវភាពសំខាន់ បើទោះបីជាពិភពលោកមានការប្រែប្រួលក៏ដោយ”។

ស្ថាបនិកស្ថាប័នអប់រំខាងលើបានលើកឡើងផងដែរថា ក្រៅពីការបណ្តុះបណ្តាល គ្រូក៏ចាំបាច់ត្រូវមានភាពជាគំរូល្អផងដែរ ដើម្បីណែនាំផ្លូវរបស់សិស្សឱ្យដើរទៅក្នុងគន្លងវិជ្ជមានមួយសម្រាប់ចូលរួមចំណែកក្នុងការអភិវឌ្ឍសង្គមនៅថ្ងៃអនាគត។ ហេតុនេះហើយទើប ក្រុមហ៊ុន វេសឡាញ អេឌ្យូខេសិន គ្រុប ព្យាយាមគ្រប់លទ្ធភាពដើម្បីបណ្តុះបណ្តាល និងអភិវឌ្ឍសមត្ថភាពគ្រូបង្រៀនរបស់យើងនៅគ្រប់បណ្តាញសាលារៀនរបស់យើងទាំងអស់ឱ្យកាន់តែមានសមត្ថភាពខ្ពស់។

ដើម្បីពង្រឹងសមត្ថភាពគ្រូបង្រៀនឱ្យកាន់តែមានសក្តានុពល យើងបានរៀបចំកម្មវិធីជាច្រើន ជាពិសេសវេទិកាគ្រូបង្រៀនដែលយើងបានធ្វើជារៀងរាល់ឆ្នាំ ដើម្បីផ្តល់ឱកាសឱ្យលោកគ្រូ-អ្នកគ្រូ សាស្ត្រាចារ្យរបស់យើងទាំងខ្មែរ និងបរទេស ចែករំលែកចំណេះដឹងពីការសិក្សាស្រាវជ្រាវ និងការចូលរួមក្នុងកម្មវិធីធំៗជុំវិញពិភពលោកដល់គ្រូបង្រៀនទាំងអស់របស់យើង។ បន្ថែមពីលើនេះ យើងក៏បានធ្វើការជំរុញឱ្យមានការបណ្តុះបណ្តាលដោយអញ្ជើញអ្នកជំនាញសំខាន់ៗទាំងខ្មែរ និងបរទេសដើម្បីធ្វើបទបង្ហាញ ដើម្បីផ្តល់ឱ្យអ្នកអប់រំរបស់យើងទទួលបានព័ត៌មានថ្មីៗបំផុត សម្រាប់ពង្រីកការយល់ឃើញ ឬធ្វើបច្ចុប្បន្នភាពនៃប្រភពចំណេះដឹងឱ្យកាន់តែទូលំទូលាយ។ ប្រភពព័ត៌មានទាំងអស់នោះ នឹងក្លាយជាប្រភពចំណេះដឹងជាមូលដ្ឋានដើម្បីបន្តស្រាវជ្រាវ និងអភិវឌ្ឍសមត្ថភាពទាំងចំណេះដឹងជំនាញ និងចំណេះដឹងទូទៅឱ្យកាន់តែខ្លាំង ដែលវាជាកត្តាសំខាន់ក្នុងការរុញច្រានការបណ្តុះបណ្តាលដល់សិស្សឱ្យកាន់តែមានបញ្ញាមុតស្រួចដើម្បីសម្រេចគោលដៅអនាគតរបស់ពួកគេគ្រប់ៗគ្នា។

បន្ថែមពីលើនេះ ក្រុមហ៊ុនវេសឡាញ អេឌ្យូខេសិន គ្រុប ក៏មានបន្ថែមនូវវគ្គសិក្សាសំខាន់ៗដែលទទួលស្គាល់យ៉ាងទូលំទូលាយទូទាំងពិភពលោក ដូចជាកម្មវិធីទម្លាប់ល្អទាំង 7យ៉ាងសម្រាប់បុគ្គលមានប្រសិទ្ធភាពខ្ពស់ និងកម្មវិធីជាច្រើនផ្សេងទៀតដល់គ្រូបង្រៀន ដើម្បីឱ្យគាត់ប្រើប្រាស់ចំណេះដឹងទាំងអស់នេះសម្រាប់ការរស់នៅប្រចាំថ្ងៃផង អភិវឌ្ឍអាជីពផង និងសម្រាប់បន្តណែនាំដល់សិស្សឱ្យមានភាពជាអ្នកដឹកនាំខ្ពស់ផង។

សាលារៀន វេសឡាញ និងណត្សឡាញន៍ ចាប់ផ្តើមចុះឈ្មោះចូលរៀនពីថ្ងៃនេះតទៅ និងចូលរៀនកម្មវិធីមត្តេយ្យភាសាអង់គ្លេស និងភាសាចិន នៅថ្ងៃទី1 ខែសីហា ឆ្នាំ2019 និងថ្នាក់ចំណេះដឹងទូទៅខ្មែរចូលរៀននៅថ្ងៃទី2 ខែកញ្ញា ឆ្នាំ2019៕

August 19, 2019

Huawei កំពុងសម្ងំបង្កើត Maps ផ្ទាល់ខ្លួន ប្រជែងជាមួយ Google Maps

ក្រុមហ៊ុនបច្ចេកវិទ្យា Huawei ដ៏ធំជាងគេរបស់ចិន បាននិងកំពុងសម្ងំអភិវឌ្ឍបង្កើតសេវាកម្មផែនទីផ្ទាល់ខ្លួន ដោយប្រកាសជំហរប្រជែងជាមួយសេវាកម្មដ៏ពេញនិយមបំផុតក្នុងពិភពលោករបស់អាមេរិក គឺ Google Maps។

ចំពោះមុខងារដែលគ្រោងនឹងបំពាក់លើផែនទីថ្មីនោះគឺ ប្រព័ន្ធបង្ហាញផ្លូវស្ទះ ឬក៏មិនស្ទះដ៏ជាក់លាក់ដូចទិដ្ឋភាពជាក់ស្ដែងលើដងផ្លូវ ព្រមជាមួយនឹងការបន្ថែមមុខងារផែនទី AR ដែលជាមុខងារស្រដៀងនឹង AR walking direction របស់ Google ដូច្នោះដែរ។

Map Kit នឹងផ្តល់ជូនអ្នកប្រើប្រាស់នូវមុខងារសំខាន់ៗមិនខុសពី Maps របស់ក្រុមហ៊ុន Google នោះឡើយ ពោលគឺប្រព័ន្ធបង្ហាញទិសលើដងផ្លូវ ក៏ដូចការបង្ហាញនូវស្ថានភាពចរាចរណ៍លើដងវិថី គួបផ្សំការគាំទ្រផែនទី AR ដែលអាចបង្ហាញដល់ទៅ 40ភាសាដែលគ្រោងចេញផ្សាយនៅខែតុលាខាងមុខ។ នេះបើយោងតាមការបង្ហើបប្រាប់ពីនាយកជាន់ខ្ពស់ Huawei ជាមួយសារព័ត៌មាន TheVerge។

យ៉ាងណាមិញ សេវាកម្មនេះទើបនឹងស្ថិតក្នុងដំណាក់កាលអភិវឌ្ឍន៍នៅឡើយ ដោយប្រើប្រាស់ Huawei Mapping technology ដើម្បីបង្កើតឱ្យចេញជារូបរាង។

សូមបញ្ជាក់ថា កាលពីសប្តាហ៍មុន Huawei ក៏ទើបតែប្រកាសនូវប្រព័ន្ធប្រតិបត្តិការ Harmony OS ដែលជា OS ផ្ទាល់ខ្លួន ឈរលើគោលដៅកាត់បន្ថយការពឹងផ្អែកទៅលើសេវាកម្មរបស់ Google ដូចជាការប្រើប្រាស់ Android OS។ ប្រព័ន្ធប្រតិបត្តិការនេះអាចគាំទ្រគ្រប់ឧបករណ៍សំខាន់ៗដូចជារថយន្ត កុំព្យូទ័រ ស្មាតហ្វូន នាឡិកាឆ្លាតវៃ និងឧបករណ៍ឥតខ្សែមួយចំនួនទៀតផង។

ដូចនេះ សូមរង់ចាំមើលទាំងអស់គ្នាថា តើសេវាកម្មថ្មីសន្លាងនេះ អាចប្រកាសផ្លូវការ និងអាចជាគូប្រជែងជាមួយ Google Maps ដែរឬយ៉ាងណា?

August 19, 2019

រថយន្តរបស់ចិន 2ម៉ាក លក់ដាច់ខ្លាំងនៅប្រទេសអូស្រ្តាលី

ចំនួនលក់រថយន្តសរុបនៅប្រទេសអូស្ត្រាលីប្រចាំខែកក្កដា ឆ្នាំ2019 មានការធ្លាក់ចុះ 2.8% បើធៀបនឹងរយៈពេលដូចគ្នាកាលឆ្នាំមុន។ យ៉ាងណាក្ដី ម៉ាករថយន្តរបស់ចិន Haval និង MG មានការកើនឡើងនូវចំនួនលក់រហូតដល់ជាង 100% ឯណោះ។

Haval ដែលជំនាញខាងផលិតរថយន្ត SUV មានការកើនឡើងនូវចំនួនលក់ 164.2% ធៀបនឹងខែកក្កដា ឆ្នាំ2018 ដែលលក់រថយន្តបាន 140គ្រឿង។ សរុប 7ខែដំបូង Haval លក់រថយន្តបាន 783គ្រឿង កើនឡើង 155% ធៀបនឹងឆ្នាំមុន។

ចំណែករថយន្តម៉ាក MG វិញ បានកើនឡើងចំនួនលក់ដល់ 149.8% ប្រៀបធៀបនឹងឆ្នាំមុន ហើយមានការកើនឡើងដល់ 253% នៅរយៈពេល 7ខែចុងក្រោយដូចគ្នា។ ម៉ូដែលរថយន្តពេញនិយមជាងគេ គឺម៉ូដែល ZS (លក់បាន 284គ្រឿង) និង MG3 លក់បាន 392គ្រឿង។

Great Wall ដែលជាក្រុមហ៊ុនមេរបស់ Haval ក៏កើនឡើងនូវចំនួនលក់ដែរ ដោយនៅក្នុងខែកក្កដា លក់បាន 120គ្រឿង កើនឡើង 118.2%។ ចុងក្រោយគេ គឺក្រុមហ៊ុន LDV ដែលលក់រថយន្តបាន 590គ្រឿង កើនឡើង 15.5%៕

August 19, 2019

មិនធម្មតាមែន! Huawei ចេញ Nova 5 ភ្លាម លក់បាន 2លានគ្រឿងភ្លែត!

កាលពីខែមិថុនាកន្លងទៅ ក្រុមហ៊ុន Huawei បានប្រកាសបង្ហាញសេរ៊ី nova 5 ចំនួន 3ម៉ូដែល ជាមួយនឹងការបំពាក់បន្ទះឈីបជំនាន់ថ្មី Kirin 810 ដែលរំពឹងបន្តមកជាហូរហែលើស្មាតហ្វូនធុនកណ្តាលក្រោយៗទៀត។

ត្រឹមតែរយៈពេល 5សប្តាហ៍នៃការប្រកាសបង្ហាញខ្លួនប៉ុណ្នោះ ក្រុមហ៊ុនយក្សរបស់ប្រទេសចិន Huawei ក៏បង្ហើបឱ្យដឹងពីតួលេខនាំចេញស្មាតហ្វូន nova 5 ដែលបានកើនឡើងដល់ 2លានគ្រឿងហើយ។ នេះរាប់បញ្ចូលទាំងការលក់ nova 5i, nova 5 និង nova 5 Pro ផងដែរ ខណៈម៉ូដែលបំពាក់កាមេរ៉ាក្រោយ ៤ គ្រាប់ nova 5i Pro ទើបលេចមុខកាលពីថ្ងៃសុក្រសប្តាហ៍មុន។

ជោគជ័យដ៏ធំសម្បើមនេះ បានឆ្លងកាត់ការលក់នៅព្រឹត្តិការណ៍ Flash Sale ចំនួន 4 លើករួចមកហើយ និងជាតួលេខរាប់តែក្នុងទីផ្សារប្រទេសចិនមួយគត់។ ការលក់បន្ទាប់នឹងបូកចូលជាមួយម៉ូដែលទី4 គឺ nova 5i Pro ដែលចាប់ផ្តើមនៅថ្ងៃទី2 សីហា ទាំងការដាក់លក់ធម្មតា និងលក់លើគេហទំព័រយក្ស JD.com និង Vmall.com៕

August 19, 2019

អាណាព្យាបាលសូមកុំជឿ ឬចាញ់បោកមេខ្យល់រឿងបែកវិញ្ញាសា ព្រោះឆ្នាំនេះមានការរៀបចំហ្មត់ចត់ និងសុវត្ថិភាពខ្ពស់

ជារៀងរាល់ពេលប្រឡងមធ្យមសិក្សាទុតិយភូមិ នៅខាងក្រៅមណ្ឌលប្រឡងគេតែងតែគេមនុស្សជាច្រើនចម្រុះគ្នាឈរ និងអង្គុយត្រៀបត្រា ដែលខ្លះជាអាណាព្យាបាល អ្នកខ្លះជាបងប្អូន និងអ្នកខ្លះទៀតជាមិត្តិភក្តិបេក្ខជនជាដើម។ នៅក្នុងចំណោមនោះ ក៏អាចមានជនឆ្លៀតឱកាសមួយចំនួនដែលដើរបំផុសបំផុលព័ត៌មានក្នុងគោលបំណងកេងចំណេញយកប្រយោជន៍ពីអាណាព្យាបាល ឬសាច់ញាតិទាំងអស់នោះ។

បញ្ហាមួយ ក្នុងចំណោមបញ្ហាដែលអាចកើតមានឡើង គឺការបំផុសព័ត៌មានថាមានបែកធ្លាយវិញ្ញាសា។ កន្លងមកមានក្រុមឆ្លៀតឱកាសមួយចំនួនបានបំផុសបំផុល ផ្សព្វផ្សាយដល់អាណាព្យាបាល ឬសាច់ញាតិបេក្ខជនប្រឡងថាពួកគេមានឯកសារប្រឡងដែលបានបែកធ្លាយ។ ប្រសិនបើអាណាព្យាបាលចង់បាន គេអាចលក់ឱ្យក្នុងតម្លៃថ្លៃ ខណៈប្រភពឯកសារទាំងអស់នោះមិនមែនជាឯកសារប្រឡងពិតប្រាកដនោះទេ។ វាគ្រាន់តែជាក្រដាសឯកសារក្លែងក្លាយ ហើយត្រូវបានគេចម្លងតៗគ្នាតែប៉ុណ្ណោះ។

នៅឆ្នាំនេះ ក្រសួងអប់រំ យុវជន និងកីឡា បានបង្ហាញយ៉ាងច្បាស់នៅក្នុងទំព័របណ្តាញសង្គមរបស់ក្រសួងពីនីតិវិធីនៃការវិចខ្ចប់សន្លឹកកិច្ចការ ការដឹកជញ្ជូន និងការបើកហិបវិញ្ញសារ គឺធ្វើឡើងដោយហ្មត់ចត់ ត្រឹមត្រូវ និងច្បាស់លាស់ គ្មានការបែកធ្លាយសន្លឹកវិញ្ញាសារនោះទេ៕

August 19, 2019

WhatsApp អាចជាផ្លូវសម្រាប់ hackers ចូលលួចយកទិន្នន័យរបស់អ្នក

ក្រុមអ្នកស្រាវជ្រាវផ្នែកបច្ចេកវិទ្យាបានរកឃើញកំហុសបច្ចេកទេសនៅក្នុងកម្មវិធី WhatsApp ដែលអាចឱ្យជនអនាមិកចូលលួចយកទិន្នន័យរបស់អ្នកប្រើប្រាស់បាន។

ជនអនាមិក នឹងប្រើវិធីហៅទូរស័ព្ទចូលតាមកម្មវិធី WhatsApp របស់អ្នកប្រើប្រាស់ទូទៅ រួចក៏បញ្ចូលកម្មវិធីសម្រាប់លួចយកទិន្នន័យនោះ ដែលគេជឿថា ជាកម្មវិធីមកពីក្រុមហ៊ុន NSO Group។

ដូចនេះ ដើម្បីទប់ស្កាត់ពីការលួចយកទិន្នន័យនេះ លោកអ្នកត្រូវតែធ្វើការ update កម្មវិធី WhatsApp ទៅ version ចុងក្រោយបង្អស់ (v2.19.51 សម្រាប់ iPhone និង v2.19.134 សម្រាប់ Android) ដែលបានដាក់ឱ្យប្រើប្រាស់កាលពីសប្តាហ៍មុននេះ៕

August 19, 2019

Category: សង្គម និងសេដ្ឋកិច្ច