ក្រសួងកសិកម្ម រុក្ខាប្រមាញ់ និងនេសាទ បាននិងកំពុងខិតខំប្រឹងប្រែងធ្វើការកំណែទម្រង់ទាំងគោលនយោបាយ ទិសដៅ និងការអនុវត្តរបស់ខ្លួន ពោលគឺ ជំរុញការធ្វើទំនើបកម្មកសិកម្ម និងលើកកម្ពស់អភិក្រម“រដ្ឋ-ឯកជន-ដៃគូអភិវឌ្ឍន៍-សហគមន៍”។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងថា៖“វាជាកិច្ចការដ៏សំខាន់ក្នុងការជជែកដោយបើកចំហ រវាងការងាររបស់រាជរដ្ឋាភិបាល ដែលមានថ្នាក់ដឹកនាំក្រសួងស្ថាប័នពាក់ព័ន្ធ ជាមួយនឹងអ្នកធ្វើអាជីវកម្មនៅកម្ពុជាទៅលើបញ្ហាពាក់ព័ន្ធនឹងការវិនិយោគ ការធ្វើពាណិជ្ជកម្ម និងធ្វើធុរកិច្ច ដើម្បីធានាដល់ការធ្វើពាណិជ្ជកម្មនៅកម្ពុជា ក៏ដូចជាធានាដល់ការប្រកួតប្រជែងទំនិញកម្ពុជានៅលើទីផ្សារអន្តរជាតិផងដែរ”។
ឯកឧត្តមរដ្ឋមន្ត្រី ក៏បានគូសបញ្ជាក់អំពីការវិវឌ្ឍរីកចម្រើន ពីប្រទេសដែលអសន្តិសុខស្បៀង មកជាប្រទេសដែលមានអតិរេកស្បៀង និងធ្វើការនាំចេញផលិតផលកសិកម្មទៅទីផ្សារពិភពលោក។ ជាសមិទ្ធផលដ៏ធំធេងដែលសម្រេចបាន តែក៏នៅមានបញ្ហាប្រឈមមួយចំនួនទៀតដែលទាមទារឱ្យគ្រប់ភាគីពាក់ព័ន្ធរួមគ្នាដោះស្រាយ ដើម្បីបន្តការអភិវឌ្ឍវិស័យនេះ ប្រកបដោយប្រសិទ្ធភាព និងចីរភាព ធ្វើយ៉ាងណាជួយប្រជាកសិករយើងដើរឱ្យទាន់បរិបទសេដ្ឋកិច្ចជាតិ ជាពិសេសសម្រេចឱ្យបាននូវចក្ខុវិស័យរបស់រាជរដ្ឋាភិបាលក្នុងការប្រែក្លាយប្រទេសជាតិ ទៅជាប្រទេសដែលមានចំណូលមធ្យមកម្រិតខ្ពស់នាឆ្នាំ2030 និងចំណូលកម្រិតខ្ពស់នាឆ្នាំ2050។
ក្នុងន័យនេះ ក្រសួងកសិកម្ម រុក្ខាប្រមាញ់ និងនេសាទបាននិងកំពុងខិតខំប្រឹងប្រែងធ្វើការកំណែទម្រង់ទាំងគោលនយោបាយ ទិសដៅ និងការអនុវត្តរបស់ខ្លួន ពោលគឺជំរុញការធ្វើទំនើបកម្មកសិកម្មនិងលើកកម្ពស់អភិក្រម“រដ្ឋ-ឯកជន-ដៃគូអភិវឌ្ឍន៍សហគមន៍”ដោយផ្តោតជាសំខាន់លើយន្តការពាណិជ្ជកម្ម-កសិកម្ម ការកែច្នៃផលិតផលកសិកម្ម ការបំពេញខ្សែចង្វាក់ផលិតកម្មកសិកម្ម ការផលិតពូជសុទ្ធ និងការអនុវត្តផលិតកម្មកសិកម្មតាមកិច្ចសន្យា ដើម្បីបង្កើនការប្រកួតប្រជែងដល់ប្រជាកសិករ។ នេះបើតាមប្រសាសន៍ឯកឧត្តម វេង សាខុន។
ឯកឧត្តម ក៏បានកោតសរសើរវិស័យនេះ ចំពោះសមិទ្ធផលរបស់ខ្លួន ក្នុងរយៈពេលប៉ុន្មានឆ្នាំចុងក្រោយនេះដែរ ប៉ុន្តែបានអំពាវនាវឱ្យមានកិច្ចសហប្រតិបត្តិការកាន់តែខ្លាំងឡើង ក្នុងចំណោមតួអង្គទាំងអស់ដើម្បីបន្តអភិវឌ្ឍន៍ឧស្សាហកម្មនេះ។
ឯកឧត្តម វេង សាខុន បានមានប្រសាសន៍ទៀតថា៖“ក្រសួងកសិកម្មបាននិងកំពុងធ្វើការកែទម្រង់គោលនយោបាយ ធ្វើទំនើបកម្មវិស័យនេះ និងលើកកម្ពស់ភាពជាដៃគូផលិតករសាធារណៈ-ឯកជនដែលផ្តោតលើការបង្កើនគុណ ភាព និងការប្រកួតប្រជែង តាមរយៈគម្រោងកសិកម្មតាមកិច្ចសន្យា”។
ទាក់ទិននឹងភាពជាដៃគូឯកជន លោក សុង សារ៉ននាយកប្រតិបត្តិក្រុមហ៊ុន Amru Rice និងបច្ចុប្បន្នទើបជាប់ឆ្នោតជាប្រធានសហព័ន្ធស្រូវអង្ករកម្ពុជា (CRF) បានមានប្រសាសន៍ថា លោកមានបំណងប្រែក្លាយវិស័យស្រូវ-អង្ករឱ្យទៅជាឧស្សាហកម្មប្រកបដោយចីរភាព និងការប្រកួតប្រជែង ដែលធ្វើឱ្យប្រសើរឡើងនូវការរស់នៅរបស់អ្នកចូលរួមទាំងអស់។
លោក សារ៉ន បានមានប្រសាសន៍ថា៖“ សហព័ន្ធគួរតែដំណើរការក្នុងភាពជាដៃគូផលិតសាធារណៈ និងឯកជន ហើយការធ្វើទំនើបកម្មឧស្សាហកម្មនេះ ការធ្វើពិពិធកម្មទីផ្សារ និងការបង្កើនលទ្ធភាពទទួលបានហិរញ្ញវត្ថុ នឹងត្រូវបានផ្តល់អាទិភាព។ ក្នុងទសវត្សរ៍ខាងមុខ ខ្ញុំជឿជាក់ថា បញ្ហាប្រឈមសំខាន់បំផុតសម្រាប់វិស័យនេះ គឺការធ្វើសាកលភាវូបនីយកម្មឌីជីថលប្រជានិយម និងការគាំពារនិយម។ ទាំងនេះមានសក្តានុពលក្នុងការជះឥទ្ធិពលអវិជ្ជមានដល់អ្នកផលិត និងកសិករដែលមានប្រាក់ចំណូលទាប ក៏ដូចជាការប្រកួតប្រជែងក្នុងវិស័យនេះផងដែរ”។
លោកប្រធាន CRF បានបន្ថែមថា ៖“ដើម្បីជម្នះបញ្ហាប្រឈមទាំងនេះ យើងត្រូវធ្វើការយ៉ាងជិតស្និទ្ធជាមួយអ្នកពាក់ព័ន្ធទាំងអស់ រួមទាំងភ្នាក់ងាររដ្ឋាភិបាល ទីភ្នាក់ងារមិនមែនរដ្ឋាភិបាល ស្ថាប័នក្នុងស្រុក និងអន្តរជាតិ សហករណ៍កសិកម្ម និងវិស័យឯកជន ជាពិសេសរោងម៉ាស៊ីនកិនស្រូវ ដើម្បីលើក-កម្ពស់ការប្រកួតប្រជែងនៃខ្សែចង្វាក់តម្លៃ។ ពីកសិដ្ឋានរហូតដល់ទីផ្សារ និងបង្កើតការច្នៃប្រឌិតតម្លៃបន្ថែម និងផលិតផលថ្មី”។
លោក សុង សារ៉ន បានបញ្ជាក់ថា សហព័ន្ធត្រូវខិតខំលុបបំបាត់ប្រព័ន្ធដែលធ្វើអាជីវកម្មកសិករ និងផលិតទំនិញមានជាតិគីមី ដែលអាចបង្កគ្រោះថ្នាក់ដល់សុខភាពអ្នកប្រើប្រាស់។ យើងនឹងលើកកម្ពស់ភាពជាដៃគូ រវាងតួអង្គឯកជន និងអ្នកផលិតដែលមានប្រាក់ចំណូលទាប ដែលដោះស្រាយនូវប្រសិទ្ធភាពនៃផលិតកម្មស្រូវ និងពាណិជ្ជកម្ម និងការបង្កើតថ្មី ការបង្កើតនិរន្តរភាពពាណិជ្ជកម្មយុត្តិធម៌ និងការប្រកួតប្រជែង។ គំនិតផ្តួចផ្តើមនៃអាជីវកម្មទាំងនេះ ជាការលើកកម្ពស់ ការដាក់បញ្ចូល ក៏ដូចជាការបង្កើតថ្មី និងកំណើនទីផ្សារផងដែរ៕
