សង្គម និងសេដ្ឋកិច្ច - La Reine Media

ការប្រមូលចំណូលពន្ធដាររយៈពេល 7ខែ កើនជាង 28 %

ការប្រមូលពន្ធដារក្នុងរយៈពេល 7ខែ ឆ្នាំ2019 របស់អគ្គនាយកដ្ឋានពន្ធដារ សម្រេចបានតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ មានចំនួន 6,949.22 ប៊ីលានរៀល (ប្រមាណ 1,737.31 លានដុល្លារអាមេរិក) ស្មើនឹង75.92% នៃផែនការប្រចាំឆ្នាំ។ ពោលគឺទឹកប្រាក់ 1.7ពាន់លានដុល្លារនេះ កើនជាង 28% បើធៀបនឹងរយៈពេលដូចគ្នាក្នុងឆ្នាំ2018។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ។

របាយការណ៍ក្នុងកិច្ចប្រជុំបូកសរុបលទ្ធផលការងារប្រមូលចំណូលពន្ធ ប្រចាំខែកក្កដា របស់អគ្គនាយកដ្ឋានពន្ធដារបានឱ្យដឹងថា ក្នុងរយៈពេល 7ខែ ចំណូលពន្ធអាករដែលប្រមូលបានមានចំនួន 1.73ពាន់លានដុល្លារ មានការកើនឡើងចំនួន 1,523.66ប៊ីលានរៀល (ប្រមាណជា 380,92 លានដុល្លារអាមេរិក) ស្មើនឹង28.08% បើធៀបនឹងរយៈពេលដូចគ្នាកាលពីឆ្នាំ2018 ដែលមាន 1.52 ពាន់លានដុល្លារ។

ដោយឡែកក្នុងខែកក្កដា ឆ្នាំ2019 អគ្គនាយកដ្ឋានពន្ធដារប្រមូលចំណូលពន្ធអាករបានចំនួន 212,99លានដុល្លារ កើនឡើង 23.52% បើធៀបនឹងខែកក្កដា ឆ្នាំ2018។

ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ បានមានប្រសាសន៍ថា ចំណូលពន្ធដារក្នុងឆ្នាំ2019នេះ នឹងអាចមានកំណើន 2ខ្ទង់ ហើយការប្រមូលចំណូលពន្ធបានកើនឡើងជាបន្តបន្ទាប់ ពិសេសបន្ទាប់ពីអគ្គនាយកដ្ឋានពន្ធដារបានធ្វើទំនើបកម្មប្រព័ន្ធបច្ចេកវិទ្យាព័ត៌មានវិទ្យា និងការផ្សព្វផ្សាយពីកាតព្វកិច្ចបង់ពន្ធដារទៅដល់អ្នកជាប់ពន្ធគ្រប់ប្រភេទ។

ឯកឧត្តម គង់ វិបុល បានថ្លែងថា៖ «កំណែទម្រង់ពន្ធដារ បានចូលរួមចំណែកយ៉ាងសកម្មក្នុងការប្រមូលចំណូលពន្ធ ពិសេសកាត់បន្ថយអំពើពុករលួយតាមរយៈការពង្រឹងការអនុវត្តលើមុខងារស្នូល និងមុខងារគាំទ្រទាំងនេះ។ វាក៏ជាផែនការយុទ្ធសាស្រ្តសម្រាប់អនុវត្តបន្តរបស់អគ្គនាយកដ្ឋានពន្ធដារក្នុងការរៀបចំយុទ្ធសាស្រ្តកៀរគរចំណូលឆ្នាំ2019-2023 ផងដែរ»។ ចំណូលពន្ធដារដែលប្រមូលបាន ភាគច្រើនបានមកពីពន្ធលើប្រាក់ចំណូល ពន្ធលើតម្លៃបន្ថែម ពន្ធលើអាករពិសេស និងពន្ធលើប្រាក់បៀវត្សរ៍ជាដើម។

ឯកឧត្តម អគ្គនាយកពន្ធដារ បានណែនាំដល់គ្រប់អង្គភាពឱ្យបន្តខិតខំ ប្រឹងប្រែង ពង្រឹងការអនុវត្តច្បាប់ វិន័យការងារ និងត្រូវមានភាពទន់ភ្លន់ តែម៉ឺងម៉ាត់ ដោយផ្អែកទៅលើផ្នែកទិដ្ឋភាពច្បាប់ ក្នុងការផ្តល់សេវាជូនដល់អ្នកជាប់ពន្ធ និងការគ្រប់គ្រងប្រមូលចំណូលពន្ធ។

ជាមួយគ្នានេះដែរដើម្បីធានាឱ្យបាននូវប្រសិទ្ធភាពក្នុងការគ្រប់គ្រងប្រមូលចំណូលពន្ធ និងឈានទៅសម្រេចផែនការឱ្យបានជាអតិបរិមានោះ អគ្គនាយកដ្ឋានពន្ធដារនឹងបន្តអនុវត្តយ៉ាងម៉ឺងម៉ាត់ប្រកបដោយប្រសិទ្ធភាពខ្ពស់ថែមទៀតនូវគោលនយោបាយកែទម្រង់ស៊ីជម្រៅរបស់រាជរដ្ឋាភិបាល ព្រមទាំងដាក់ចេញនូវវិធានការមួយចំនួនដូចជា៖ បន្តពង្រឹងការអនុវត្តតាមប្រព័ន្ធ (E-VAT System) បន្ថែមទៀត បន្តជំរុញការផ្តល់សេវាល្អជូនអ្នកជាប់ពន្ធ និងពន្លឿននីតិវិធីនៃការធ្វើបច្ចុប្បន្នភាពព័ត៌មានចុះបញ្ជីពន្ធដារ។

ឯកឧត្តម គង់ វិបុល បានថ្លែងបន្តថា៖ «ត្រូវបន្តធ្វើទំនើបកម្មរដ្ឋបាលសារពើពន្ធ បន្តជំរុញការប្រើប្រាស់ប្រព័ន្ធដាក់លិខិតប្រកាសពន្ធអនឡាញ (E-Filing) បន្តខិតខំកែលម្អ និងជំរុញការគ្រប់គ្រងប្រមូលបំណុលពន្ធ ជំរុញ និងពន្លឿនការរៀបចំសេចក្តីព្រាងបទដ្ឋានគតិយុត្តនានា ជំរុញការផ្សព្វផ្សាយ និងណែនាំបន្ថែមដល់ប្រជាពលរដ្ឋ ពន្លឿន និងជំរុញការផ្តល់សេវាបង់ពន្ធប្រថាប់ត្រា បន្តលើកកម្ពស់ និងបញ្រ្ជាបវប្បធម៌បង់ពន្ធ និងការពង្រឹងការអនុវត្តច្បាប់ស្តីពីសារពើពន្ធ៕

August 27, 2019

ពណ៌ទឹកសំបោរ ប្រាប់អ្វីខ្លះពាក់ព័ន្ធជាមួយសុខភាព?

កើតអាការផ្ដាសាយនៅពេលណា ក៏មានទឹកសំបោរគ្រប់ពេលវេលា ទាំងមានលក្ខណៈទឹកថ្លាៗ ឬទឹកសំបោរខាប់ៗ ខ្លះមានពណ៌ខៀវលាយលឿង ទាំងខ្លះទៀតមានពណ៌ផ្សេងៗគ្នា។ តើលក្ខណៈពណ៌ទាំងនោះ បានប្រាប់អ្វីខ្លះអំពីសភាពជំងឺរបស់មនុស្សយើង? ដូច្នេះទស្សនាវដ្តី ឡារ៉ែន សូមជម្រាបជូននូវចំណេះដឹងថ្មីមួយ ដែលជួយឱ្យលោកអ្នកអាចពិចារណា និងធ្វើកំណត់សម្គាល់សុខភាពដោយខ្លួនឯងបាន ងាយៗក្នុងការតាមដានអាការជំងឺដូចខាងក្រោម។

ហេតុអ្វីបានពណ៌ទឹកសំបោរអាចប្រាប់អំពីសុខភាពរបស់យើងបាន?
ពណ៌ទឹកសំបោរពិតជាអាចប្រាប់អំពីសភាពសុខភាពរបស់យើងបាន ព្រោះពណ៌ទឹកសំបោរអាចប្រាប់អាការបានថា តើប្រព័ន្ធគ្រប់គ្រងសីតុណ្ហភាពនៅក្នុងរាងកាយរបស់មនុស្សយើងកំពុងតែប្រយុទ្ធប្រឆាំងជាមួយជំងឺដល់កម្រិតណា? អាការជំងឺនោះកើតឡើងធ្ងន់ធ្ងរកម្រិតណា? តើមានអាការឆ្លងមេរោគដែរឬទេ? ឬមានការប្រតិកម្មចាញ់ដែរឬទេ? ឬក៏តើរាងកាយរបស់យើងកំពុងជួបប្រទះនឹងជំងឺអ្វីខ្លះ?

ចុះហេតុអ្វីមនុស្សយើងមានទឹកសំបោរ?
ដូចយើងបានជ្រាបដឹងហើយថា ទឹកសំបោរជាធម្មតាគឺមានសភាពដូចទឹករអិលថ្លាៗ មិនមានពណ៌ មិនមានក្លិន អាចមានសភាពណឺតបន្ដិតបន្ដួច ដែលមានធាតុបន្សំដូចជា ទឹក ប្រូទីនសារធាតុប្រព័ន្ធភាពស៊ាំ (សារធាតុដែលត្រូវបានបង្កើតនៅក្នុងឈាម ដើម្បីទប់ទល់នឹងរោគផ្សេងៗ) និងអំបិលរលាយ (ខណៈដែលជួបនៅក្នុងទឹកភ្នែក នៅពេលមនុស្សយើងហូរទឹកភ្នែក ហើយហូរចូលមាត់មានរសជាតិប្រៃ)។ ទឹកសំបោរហូរចេញមក ដើម្បីការពារមិនឱ្យច្រមុះស្ងួតខ្លាំងពេក និងត្រូវបានការពារប្រព័ន្ធផ្លូវដង្ហើមស្រូវយកខ្យល់លាយជាមួយធូលី ឬវត្ថុតូចល្អិតដែលមិនអាចមើលឃើញដោយភ្នែកចូលទៅក្នុងរាងកាយ។

លក្ខណៈទឹកសំបោរប្រាប់អំពីជំងឺ
1. ទឹកសំបោរថ្លាទឹកសំបោរថ្លា គឺមិនមានពណ៌ និងប្រហាក់ប្រហែលទឹករលោង ដែលកើតមានក្រោយពេលទឹកភ្នែកហូរចេញមកក្រៅ ឬបណ្ដាលមកពីមានជំងឺគ្រុនផ្ដាសាយ។ ដោយសាតែទឹកច្រមុះ ឬទឹកសំបោរដែលចេញមកនោះ វាអាចជួយព្យាបាលដំបៅច្រមុះខាងក្នុងឱ្យមានសំណើម និងមិនស្ងួតខ្លាំងពេក។ ទឹកសំបោរគឺមានលក្ខណៈបែបនេះ គឺវាអាចជាសះស្បើយដោយឯកឯងបាន ដោយមិនចាំបាច់លេបថ្នាំព្យាបាល។
2. ទឹកសំបោរពណ៌ខៀវចាស់ប្រសិនទឹកសំបោរមានលក្ខណៈខៀវចាស់ ឬមានសភាពណឺតច្រើនជាងទឹកសំបោរថ្លា គឺអាចចាប់ផ្ដើមប្រាប់អំពីសញ្ញានៃរាងកាយរបស់យើងថា យើងកំពុងចាប់ផ្ដើមមានអាការចាញ់អ្វីម្យ៉ាងដូចជា អាការចាញ់លំអងផ្កា ឬអាការក្ដៅក្នុង ឬរលាកក្នុងរាងកាយ។
3. ទឹកសំបោរស្អិត មានពណ៌ខៀវ ឬលឿងប្រសិនបើទឹកសំបោរស្អិតខ្លាំងឡើងលើសពីធម្មតា និងនៅមានសភាពពណ៌ខៀវ ឬលឿងនោះវាបានប្រាប់ថា សភាពទូទៅនៃប្រព័ន្ធភាពស៊ាំកំពុងតែទៅការងារ ឬប្រឆាំជាមួយរោគជំងឺនៅក្នុងរាងកាយ។ ការបើកដំណើរការនៃប្រព័ន្ធភាពស៊ាំ គឺជាការចាប់ផ្តើមប្រមូលថាមពលពីកោសិកាឈាមស ហើយនៅក្នុងកោសិកាឈាមសមានអង់ស៊ីម ដែលបណ្តាលឱ្យទឹករំអិលក្លាយទៅជាពណ៌ខៀវ ឬពណ៌លឿង។

រយៈពេលហូរទឹកសំបោរ
ទោះជាយ៉ាងណាក៏ដោយ ប្រសិនបើអ្នកមានទឹកសំបោរពណ៌ខៀវ ឬលឿងរាវ រយៈពេល2ទៅ3ថ្ងៃឡើងទៅ នោះបានសេចក្ដីថា អ្នកកំពុងតែមានជំងឺគ្រុនផ្ដាសាយធំ (ប្រភេទឆ្លងតាមវីវ៉ុស)។ តែបើអាការជាសះស្បើយហើយ ទឹកសំបោរនឹងបាត់ទៅវិញនៅក្នុងរយៈពេលពី 10 ទៅ 14ថ្ងៃ ដោយលោកអ្នកចាំបាត់ត្រូវព្យាបាល ដោយការលេបថ្នាំ ឬទទួលទានទឹកឱ្យបានច្រើនដង ដើម្បីជួយដល់ប្រព័ន្ធភាពស៊ាំក្នុងការប្រឆាំងជាមួយវីរ៉ុស។

បើសិនជាទឹកសំបោរនៅក្នុងច្រមុះមិនទាន់បាត់ក្នុងរយៈពេល2 ទៅ3សប្ដាហ៍ នោះវាបានបញ្ជាក់ប្រាប់យើងថា អ្នកកំពុងមានអាការគ្រុន ដូចជា អាការរលាក ឈឺហើមសាច់ ឬប្រតិកម្មចាញ់ខ្លាំង។ ដូច្នេះ អ្នកគប្បីគួរតែទៅរកគ្រូពេទ្យដើម្បីព្យាបាលឱ្យបានត្រឹមត្រូវ។

ការបញ្ឈប់សំបោរមិនឱ្យហូរ
ហៀរសំបោរអាចបណ្តាលមកពីមូលហេតុមួយចំនួន ដូចជា ផ្តាសាយ និងការប្រតិកម្មនឹងអ្វីមួយ ដែលបញ្ហានេះ អ្នកមិនចាំបាច់ប្រើថ្នាំពេទ្យក៏បាន ដោយអាចអនុវត្តវិធីធម្មជាតិខាងក្រោម៖
– ញ៉ាំទឹកឱ្យបានគ្រប់គ្រាន់
- ញ៉ាំទឹកក្រូចឆ្មារលាយជាមួយទឹកឃ្មុំក្តៅឧណ្ហៗ ឬតែក្តៅក៏បាន
– ងូតទឹកក្តៅឧណ្ហៗ និងយកទឹកក្តៅឧណ្ហៗនោះ ស្រោចលើផ្ទៃមុខរបស់អ្នកក្នុងរយៈពេល2នាទី
– ស្ពង់ចំហាយទឹក
– ញ៉ាំអាហារដែលមានរសជាតិហិរ ដូចជា ម្ទេស ដំបូងវាអាចធ្វើឱ្យច្រមុះរបស់អ្នកកាន់តែយ៉ាប់យ៉ឺន ប៉ុន្តែវាមានប្រសិទ្ធភាព ក្នុងការច្រាលចេញនូវទឹករំអិល ដែលចលនានេះជួយកាត់បន្ថយការតានតឹងច្រមុះបានយ៉ាងរហ័ស។
– យកក្រដាសអនាម័យផ្តិតសារធាតុរាវដែលហូរចេញពីច្រមុះ ជាជាងខំប្រឹងញីសឱ្យវាចេញមក ដែលអាចធ្វើឱ្យរលាកច្រមុះកាន់តែខ្លាំងឡើង៕

August 27, 2019

អ្នកជំនាញ៖ ការវិនិយោគលើអចលនទ្រព្យ នៅតែពុំទាន់អស់ឱកាសទេ

អ្នកជំនាញក្នុងវិស័យអចលនទ្រព្យ តែងបានធ្វើការព្យាករអំពីស្ថានភាពអចលនទ្រព្យនាពេលបច្ចុប្បន្ននេះថា គឺស្ទើរតែជុំវិញក្រុងទៅហើយដែលជាតំបន់កំពុងអភិវឌ្ឍន៍មានចម្ងាយប្រមាណជាង 20-30គីឡូម៉ែត្រពីទីក្រុងភ្នំពេញ គឺជាទីតាំងដែលកំពុងមានសក្ដានុពលទាំងបច្ចុប្បន្ន និងអនាគត ព្រោះថា នៅទីនោះមានទីប្រជុំជនធំៗ និងគម្រោងអភិវឌ្ឍន៍ធំៗ ដែលបាននិងកំពុងកកើតឡើង។

ជាមួយនឹងការលើកឡើងខាងលើនេះ លោក សួស ចិន្តា អគ្គលេខាធិការសមាគមវាយតម្លៃ និងភ្នាក់ងារអចលនវត្ថុកម្ពុជាបានផ្តល់បទសម្ភាសប្រាប់ ឡារ៉ែន ពាណិជ្ជ តាមទូរស័ព្ទថា៖“វិស័យអចលនទ្រព្យ និងសំណង់កំពុងដើរតួនាទីយ៉ាងសំខាន់ក្នុងការជួយជំរុញកំណើនសេដ្ឋកិច្ចរបស់ប្រទេសកម្ពុជា ហើយភាពរីកចម្រើននៅក្នុងវិស័យនេះនឹងបន្តលើសពី 5ឆ្នាំទៅមុខទៀត”។

លោកបានបន្តថា បើនិយាយជារួម គឺវដ្តរបស់វិស័យអចលនទ្រព្យត្រូវបានគេព្យាករថានៅតំបន់អាស៊ី 25-35ឆ្នាំ ចំណែកនៅតំបន់អឺរ៉ុបគឺ 30ឆ្នាំទើបអាចជួបនឹងភាពប្រឈម ឬផលប៉ះពាល់របស់វា។ បើយើងវាស់ស្ទង់អំពីវិបត្តិសេដ្ឋកិច្ចនៅឆ្នាំ2008 មកទល់ឆ្នាំទើបតែជិតឆ្នាំគឺវាអាចនៅដំណើរការជាងឆ្នាំទៅមុខទៀត ដែលអាចនៅដំណើរការល្អមិនមានភាពប្រឈម ឬផលប៉ះពាល់អ្វីនៅក្នុងវិស័យអចលនវត្ថុនេះទេ។ នេះបើយើងនិយាយពីវដ្តរបស់វិស័យនេះ។

លោកបានបញ្ជាក់ទៀតថា បើយើងនិយាយពីទីផ្សារក្នុងវិស័យធនាគារ ឬអ្នកវិនិយោគវិញ យើងយោងទៅដល់វិស័យធនាគារ គេបានឱ្យកម្ចីដល់ទៅ 15 ទៅ 25ឆ្នាំ គឺនៅមានរយៈពេលវែងទម្រាំដល់ពេលដែលអាចមានភាពប្រឈម ឬមានផលប៉ះពាល់។ ដូច្នេះបានន័យថា គេបានសិក្សាវារួចទៅហើយអំពីភាពប្រឈមរបស់អចលនទ្រព្យ។ នេះបើយើងសំអាងទៅលើវដ្ត និងទីផ្សារអចលនទ្រព្យ។បើតាមការសិក្សារបស់អ្នកជំនាញវិស័យអចលនទ្រព្យ ការព្យាករឆ្នាំនៃភាពប្រឈមនៃវិស័យអចលនទ្រព្យ យើងឃើញថា វិស័យនេះ វាអាចនៅមានបន្តការកើនឡើង ដោយអ្នកវិនិយោគធំៗ អ្នកខ្លះគាត់ពុំទាន់បញ្ចប់គម្រោងរបស់គាត់ផង។ គាត់ពុំមានការភ័យខ្លាចទេ ហើយគាត់នៅតែបន្តវិនិយោគពី 10ឆ្នាំ ឬជាង 10ឆ្នាំទៅមុខទៀត។

លោកអគ្គលេខាធិការសមាគមក៏បានបញ្ជាក់ទៀតដែរថា៖“បើគិតទៅដល់អ្វីដែលអាចថាវាកើនឡើងទៅមុខទៀតនោះ គឺយើងសំអាងទៅលើការព្យាករអំពីវដ្ត និងទីផ្សារតែសម្រាប់ការរីកចម្រើនក្នុងវិស័យនេះទាំងមូល គេអាចចែកវាចេញជា3 គឺ៖ទី1-លំនៅឋានៈ អ្នករកស៊ី គេមើលទៅលើ ការវិនិយោគលំនៅឋាន (មានលំនៅឋានបែបបុរី បែបផ្ទះល្វែង បែបវីឡាកូនកាត់ ដែលគេអាចបែងចែកជា 3ទៀតគឺ៖លំដាប់ខ្ពស់ (Hight Class) លំដាប់មធ្យម (Midle Class) និងលំដាប់ទាប (Low Class)។ តែLow Classពិបាករកអ្នកវិនិយោគ ព្រោះធ្វើលក់ពុំទាន់តម្រូវការទេ។ បានន័យថា តម្រូវការខ្ពស់ជាងការផ្គត់ផ្គង់ ការសាងសង់កម្រិតទាបក្នុងតម្លៃក្រោម 3ម៉ឺនដុល្លារជាង រកអ្នកធ្វើលក់ឱ្យអត់មានទេ ទោះបីរដ្ឋាភិបាលមានគោលនយោបាយលើកទឹកចិត្តក៏ដោយ និងទោះជានៅក្នុងតំបន់ប៉ូលសំខាន់ ឬតំបន់អភិវឌ្ឍន៍ បណ្តាខេត្តក្រុងដែលមានសក្តានុពលក៏ដោយ ក៏ពុំមានតម្លៃទាបនេះដែរ គឺមានតែតម្លៃខ្ពស់ និងលក់ដាច់អស់ក្នុងគម្រោងតែម្តង។

ទី2-សម្រាប់ Comercial Buillding, ServiceAparment, Office Space, យើងអាចនិយាយថាក្នុងចន្លោះពី 5 ទៅ 7 ឆ្នាំទៀតវាអាចនឹងពេញ(ឆ្អែត)។ដូចជា Service Aparment នៅបឹងកេងកង1 -2និង3 វាចង់ឆ្អែតហើយ តែនៅតំបន់ទួលគោកវិញនៅច្រើនទៀតពុំទាន់ឆ្អែតទេ។ បើនិយាយពី Office Space នៅមានតម្រូវការក្នុងកម្រិតA និងB នៅមានតម្រូវការ ឯកម្រិតC អស់ហើយ ដោយសារវាមានតម្លៃថោក។

ទី3-ទាក់ទងទៅនឹងដីធ្លីៈ ការវិនិយោគមានច្រើនខ្លះទិញទៅធ្វើជាកសិដ្ឋាន ខ្លះទិញទៅពុះឡូត៍ អ្នកខ្លះទិញយកទៅសាងសង់។ ចលនានេះនៅមានច្រើន បើគិតទៅដល់ Master Plan របស់ក្រសួងដែនដីនគរូបនីយកម្ម គឺនៅមានទំហំធំណាស់។ ឯប៉ូលវិញ មានកំពង់សោម សៀមរាប កែប តំបន់ជុំវិញបឹងទន្លេសាប បាត់ដំបង ប៉ោយប៉ែត និងបាវិត ជាដើម”។

លោកបានបញ្ជាក់បន្ថែមថា៖ “ចំណុចទាំង 3នេះវានៅតែដើរទៅតាមវដ្តរបស់វា និងការរីកដុះដាលដូចការអភិវឌ្ឍសព្វថ្ងៃ ដោយសារកម្ពុជាមានស្ថិរភាពនយោបាយល្អ មានកំណើនសេដ្ឋកិច្ច7% មានគោលនយោបាយលើកទឹកចិត្តដល់អ្នកវិនិយោគ និងច្បាប់មានភាពអនុគ្រោះច្រើនសម្រាប់វិនិយោគិនបរទេសនោះ ដូច្នេះនឹងអាចជួយទាក់ទាញជនបរទេសឱ្យចូលមកវិនិយោគ និងបណ្តាក់ទុននៅកម្ពុជាទៀតផង។ ចំពោះប្រទេសដែលមកវិនិយោគ គឺមានមិនតិចទេ ជាង 20ប្រទេស ហើយប្រទេសចិនមកវិនិយោគច្រើនជាងគេ”។

លោកសួស ចិន្តា បានបញ្ជាក់ថា៖ ;“ដូច្នេះការ-វិនិយោគលើវិស័យអចលនទ្រព្យនេះ យើងនៅមានឱកាសក្នុងការរកប្រាក់ចំណេញ យើងនៅមានឱកាសក្នុងការអភិវឌ្ឍ រហូតទៅដល់ 7 ទៅ 10 ឆ្នាំទៅមុខទៀត ហើយបើទោះបីការព្យាករមិនត្រូវចំ 100%ក្ដី តែក៏ត្រូវភាគច្រើន និងក៏ជាត្រីវិស័យរបស់យើងនៅក្នុងវិស័យអចលនទ្រព្យដែរ”៕

August 26, 2019

ចូលរួមទាំងអស់គ្នា!! គាំទ្របេក្ខភាពតំណាងប្រទេសកម្ពុជា ហ៊ី ប៊ុន្ថា បោះឆ្នោតឱ្យជាប់ក្នុងកម្មវិធី Mister Tourism and Culture Universe 2019

តាមរយៈបណ្ដាញសង្គមហ្វេសប៊ុក បានឱ្យដឹងថា លក្ខណ្ឌនៃការបោះឆ្នោតនេះ Mister Tourism and Culture Universe 2019 គឺតម្រូវឲ្យចូលផេក ដោយជ្រើសរើសរករូបរបស់លោក ហ៊ី ប៊ុន្ថា បេក្ខភាពពីកម្ពុជា ហើយធ្វើការ Like និង Share ដើម្បីយកពិន្ទុ។ រាល់ការ Like មួយទទួលបាន១ពិន្ទុ និងការ Share មួយទទួលបាន១ពិន្ទុ តែលុះតែអ្នក Share ដោយភ្ជាប់ពាក្យថា #MMTCU ទើបទទួលបានពិន្ទុ។ កម្មវិធីប្រកាសថា៖
សូមធ្វើការ like and share
1 Like = 1 ពិន្ទុ
1 Share = 1 ពិន្ទុ
សូម like sticker :+1: កុំប្រើ stickers :hearts: ហើយកុំភ្លេចដាក់ #MMTCU រាល់ពេល Share

សូមជម្រាបថានៅក្នុងពេលនេះ គណកម្មការ ព្រឹត្តិការណ៍ Mister Tourism and Culture Universe 2019 បានប្រកាសពីការបោះឆ្នោតលើផេករបស់ខ្លួនជាផ្លូវការតាមរយៈតំណរភ្ជាប់លីងខាងលើ ដើម្បីស្វែងរកបេក្ខជនមួយរូបឲ្យគ្រងតំណែងតារាប្រជាប្រិយភាព។ លោក ហ៊ី ប៊ុន្ថា គឺតំណាងពីប្រទេសកម្ពុជាក៏ស្ថិតក្នុងបញ្ជីឲ្យបោះឆ្នោតនោះ ដោយលោក និងអ្នកគាំទ្រទទូចឲ្យមានការចូលរួម Like និង Share ឲ្យបានស្រុះដៃ ដើម្បីកុំផ្ដល់ឱកាសឲ្យលោកទទួលបានពានមួយត្រលប់មកវិញជាមុខមាត់របស់កម្ពុជា។ ការប្រកួតនេះ ធ្វើឡើងតាំងពីថ្ងៃទី ២២ ដោយនឹងបញ្ចប់នៅថ្ងៃទី៣១ ខែសីហា នេះ ខណៈដែលបេក្ខជនរបស់កម្ពុជា គឺលោក ហ៊ី ប៊ុន្ថា បានយកឈុតរាជបុត្រនាគរាជដែលច្នៃយ៉ាងផ្ចិតផ្ចង់ពីអ្នកច្នៃម៉ូដខ្មែរអស់ទឹកប្រាក់ប្រមាណ ៦ពាន់ដុល្លារ យកទៅប្រកួត។ ការប្រកួតនេះ ក៏មានការប្រកួតជ្រើសរើសកញ្ញាឯកផងដែរ ដោយមានបេក្ខជន និងបេក្ខនារី មកពីប្រទេសផ្សេងគ្នារហូតដល់ជាង៣០។

August 26, 2019

ត្រៀមខ្លួនហើយឬនៅ?? ទៅទស្សនាការប្រកួតបាល់មិត្តភាពរវាងតារាខ្មែរនិងតារាថៃ ដើម្បីជួយគន្ធបុប្ផា

សិល្បករល្បីៗ រួមមានលោក ខេម កូម៉ា កញ្ញា អេដា លោក ភឹម តារាវិបុល និងតារាល្បីជាច្រើនទៀត បានអំពាវឱ្យមានការចូលរួមទស្សនាការប្រកួតបាល់ទាត់មិត្តភាពរវាងតារាខ្មែរនិងតារាថៃ នៅថ្ងៃទី២៩ សីហា ក្នុងឆ្នាំ២០១៩ ឲ្យច្រើនកុះករ ដើម្បីទទួលបានមូលនិធិជួយដល់មូនិធិគន្ធបុប្ផា ឲ្យបានច្រើនក្រោយប្រកួតចប់។

កម្មវិធីប្រកួតបាល់ទាត់មិត្តភាពសប្បុរសធម៌ដែលផ្តួចផ្តើមឡើងដោយ សម្តេចព្រះអគ្គ មហាសង្ឃរាជាធិបតី កិតិ្តឧទ្ទេសបណ្ឌិត ទេព វង្ស ព្រះមហាសង្ឃរាជនៃព្រះរាជាណាចក្រ កម្ពុជា គណៈមហានិកាយ ក្រោមការសហការរៀបចំដោយក្រុមហ៊ុនចំនួន៣ គឺ ក្រុមហ៊ុន អអេហ្វ៣ វើលដ៏ កម្ពុជា (RF3 World Cambodia Co.,Ltd) ក្រុមហ៊ុន មហាហង្ស (Phalitakam Mohahang Co.,Ltd and Mohahang Production) និងក្រុមហ៊ុនអលដេតវ័ន ខូអិលធីឌី (All That Once Co.Ltd)។

ការប្រកួតបាល់ទាត់មិត្តភាពរវាងតារាខ្មែរនិងតារាថៃនេះសម្រាប់ថវិកា ដែលរកបានពីការលក់សំបុត្រ និង ការឧបត្ថម្ភ បន្ទាប់ពីកាត់ចំណាយកម្មវិធីរួច នឹង ប្រគល់ជូន មូលនិធិគន្ធបុប្ផាកម្ពុជា។ កម្មវិធីនេះនឹងប្រព្រឹត្តទៅនៅថ្ងៃ២៩ ខែសីហា ឆ្នាំ ២០១៩ សប្ដាហ៍នេះ នៅពហុកីឡដ្ឋានជាតិអូឡាំពិកចាប់ពីម៉ោង២៖៣០នាទីរសៀលដល់ ម៉ោង ៩៖០០យប់។

កម្មវិធីនេះមានការប្រកួតបាល់ទាត់មិត្តភាពចំនួន២ប្រកួតគឺ ការប្រកួតទី១ ក្លឹបបឹងកេត ជាមួយ ក្រុមបាល់ទាត់តារាមហាហង្ស និងការប្រកួតទី២ ក្រុមបាល់ទាត់តារាកម្ពុជាជាមួយ ក្រុមបាល់ទាត់ តារាថៃ។ បន្ថែមលើការប្រកួតបាល់ទាត់កម្មវិធីនេះក៏មានការប្រគុំតន្ត្រីពីតារា ល្បីៗប្រចាំប្រទេសកម្ពុជា និង ថៃដូចជាលោក ភឹម តារាវិបុល កញ្ញា អេដា ក្រុម Mustache Band លោក Pramote Wilepana និង លោក Utain Prommin។

សូមជម្រាបថា ចំពោះការលក់សំបុត្រចូលរួមទស្សនាមាន២ប្រភេទគឺ សំបុត្រ VIP តម្លៃ ១០០០០រៀល និងសំបុត្រធម្មតាតម្លៃ ៥០០០រៀល។ បងប្អូនអាចរកទិញសំបុត្របាននៅស្តង់លក់សំបុត្រមុខពហុកីឡដ្ឋានជាតិអូឡាំពិក ឬ អាចទំនាក់ទំនងតាមរយៈលេខទូរស័ព្ទ ០១១ ៧៦ ៥៨ ២៧ ចាប់ពីថ្ងៃនេះតទៅ៕

August 26, 2019

សហគ្រាសធុនតូច និងមធ្យមកំពុង ជំរុញអាជីវកម្មជំនាញរបស់សហគ្រិនស្ត្រីទៅជាពាណិជ្ជកម្មឌីជីថល

កម្មវិធី“ឌីជីថល និងពាណិជ្ជកម្មអេឡិចត្រូនិក” បានចាប់ផ្តើមនៅក្នុងព្រឹត្តិការណ៍មួយ ដែល រៀបចំឡើងដោយសភាពាណិជ្ជកម្មអង់គ្លេស ជាគំនិតផ្តួចផ្តើមដ៏មានជោគជ័យបំផុតមួយចំនួនក្នុងគោលបំណងដើម្បីទទួលយកបច្ចេកវិទ្យា និងការលើកកម្ពស់នៃសហគ្រិនស្ត្រី ក៏ត្រូវបានពិភាក្សានាឱកាសនោះដែរ។

នៅក្នុងកម្មវិធី “ឌីជីថល និងពាណិជ្ជកម្មអេឡិចត្រូនិកនៅកម្ពុជា”ដែលជាគំនិតផ្តួចផ្តើម និងផ្តល់មូលនិធិដោយទីភ្នាក់ងារ USAID ដើម្បីពង្រឹងជំនាញរបស់សហគ្រិនស្ត្រី បានចាប់ផ្តើមកាលពីខែសីហា ឆ្នាំ2018 ដោយមានអាយុកាល 5ឆ្នាំនិងមានថវិកា15លានដុល្លារ និងអនុវត្តដោយអង្គការផេកខេមបូឌាដែលជាអង្គការមានមូលដ្ឋាននៅសហរដ្ឋអាមេរិកជាអ្នកគ្រប់គ្រងឱកាសសេដ្ឋកិច្ចនៃគម្រោងនេះ។

អង្គការ ផេកខេមបូឌា បានបង្ហាញនូវគម្រោង “យើងធ្វើគម្រោង”ក្នុងការជួយម្ចាស់អាជីវកម្មដែលជាស្ត្រីឱ្យបំពេញ “ការផ្លាស់ប្តូរឌីជីថល” ដែលជាផ្នែកសំខាន់មួយនៃកម្មវិធី។ សហគ្រាសធុនតូច និងមធ្យមប្រមាណ2,500ស្ថាប័នបានចូលរួមក្នុងកម្មវិធីនេះ ភាគច្រើនជាអាជីវកម្មដែលគ្រប់គ្រងជាលក្ខណៈគ្រួសារ។

អង្គការផេកខេមបូឌាបានឱ្យដឹងថា៖“ម្ចាស់សហគ្រាសខ្នាតតូចនិងមធ្យមនៅកម្ពុជា កំពុងដំណើរការឌីជីថលយ៉ាង យឺតៗក្នុងដំណើរការអាជីវកម្មរបស់ពួកគេ ប៉ុន្តែយើងបានកត់សម្គាល់ថា ភាគច្រើននៅខ្វះចំណេះដឹងចាំបាច់ ដើម្បីបញ្ចប់ការផ្លាស់ប្តូរឌីជីថល ជាពិសេសទាក់ទងនឹងទីផ្សារ នៅលើប្រព័ន្ធផ្សព្វផ្សាយសង្គម។ យើងកំពុងតែជួយបង្កើតយុទ្ធសាស្ត្រឌីជីថលរបស់ពួកគេ ហើយថែមទាំងទទួលយកប្រព័ន្ធទូទាត់តាមប្រព័ន្ធអេឡិចត្រូនិកទៀតផង។ យើងក៏ជួយដល់ពួកគេក្នុងការកសាងភាពជាដៃគូ ដើម្បីពង្រីកអាជីវកម្មរបស់ពួកគេផងដែរ”។

ធនាគារ កាណាឌីយ៉ា និងសមាគមសហគ្រិនស្ត្រីកម្ពុជា (CWEA) ថ្មីៗនេះបានចុះអនុស្សរណៈយោគយល់គ្នាដោយបានផ្តល់ប្រាក់ចំនួន 20លានដុល្លារដល់មូលនិធិប្រាក់កម្ចីដែលមានអត្រា ការប្រាក់ប្រកួតប្រជែង។ គោលដៅ គឺដើម្បីបង្កើនលទ្ធភាពទទួលបានហិរញ្ញវត្ថុសម្រាប់សហគ្រិនស្ត្រី។

យោងតាមក្រសួងឧស្សាហកម្ម និងសិប្បកម្មនៅកម្ពុជាបានឱ្យដឹងថា មានសហគ្រាសធុនតូច និងមធ្យម ប្រមាណ 53ម៉ឺនសហគ្រាសដែល 97%មាននិយោជិតតិចជាង 10នាក់ ដូច្នេះត្រូវបានចាត់ថ្នាក់ជាសហគ្រាសខ្នាតតូច។

លោកជំទាវ អេង លីគង់ ប្រធាន CWEA និងអង្គការផេកខេមបូឌាបានយល់ស្របថា សហគ្រាសខ្នាតតូច និងមធ្យម ដែលគ្រប់គ្រងដោយស្ត្រី តែងតែតស៊ូដើម្បីទទួលបានហិរញ្ញវត្ថុ។ លោកជំទាវ បានមានប្រសាសន៍ថា៖“65%នៃសហគ្រាសធុនតូច និងមធ្យមនៅកម្ពុជា ត្រូវបានកាន់កាប់ដោយស្ត្រី និងជាការពិត សហគ្រិនស្ត្រីប្រឈមនឹងបញ្ហាប្រឈមជាច្រើន រួមមានការទទួលបានប្រាក់កម្ចី ពីព្រោះពួកគេខ្វះខាតវត្ថុបញ្ចាំ”។

នៅឆ្នាំ2017 រដ្ឋាភិបាលបានប្រកាសផែនការបង្កើតធនាគារសហគ្រាសធុនតូច និងមធ្យមមួយ (SME’S Bank) ជាគម្រោងដែលនឹងមានថវិកាដើមទុនប្រមាណ 100លានដុល្លារ។ យោងតាមរាជរដ្ឋាភិបាល ធនាគារដែលត្រូវបានគេរំពឹងថានឹងបើកដំណើរការនៅឆ្នាំនេះនឹងព្យាយាមជួយលើសហគ្រាសធុនតូច និងមធ្យម ដើម្បីពង្រីកប្រតិបត្តិការរបស់ពួកគេ ដោយសម្រួលដល់ការទទួលបានឥណទានសម្រាប់សហគ្រិនស្ត្រីនៅកម្ពុជាជាពិសេស។

លោកស្រីឧកញ៉ា កែវ មុំ អគ្គនាយិកាក្រុមហ៊ុនផលិតនំស្រួយ លីលី ធ្លាប់បានប្រាប់ថា៖“អាជីវកម្មរបស់សហគ្រិនស្ត្រីមួយចំនួនបានដំណើរការល្អទៅមុខ ហើយចង់ពង្រីកឱ្យធំធាត់បន្ថែមទៀត ប៉ុន្តែការរារាំងមិនអាចឱ្យពង្រីកបាននោះ គឺហិរញ្ញវត្ថុតែម្ដង អុីចឹងហើយពួកគាត់ក៏បានងាកមក ពង្រីកបន្តិចម្ដងៗតាមធនធានដែលខ្លួនមាន”។

លោកស្រីឧកញ៉ាបានបន្តថា៖ “បញ្ហាសម្រាប់សហគ្រិនស្ត្រីលើការពង្រីកអាជីវកម្ម អាចនឹងកាត់បន្ថយបាន បើសិនជាដំណើរការធនាគារ SME របស់រាជរដ្ឋាភិបាលចេញជាផ្លែផ្កាលឿន ហើយសហគ្រិនដែលខ្វះទុន តែចង់ពង្រីកអាជីវកម្មបន្ថែម អាចសរសេរសំណើទៅកាន់ធនាគារ ដើម្បីយកហិរញ្ញវត្ថុមកពង្រីកអាជីវកម្មរបស់ខ្លួនបាន”។

ឯកឧត្តម កិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មបានមានប្រសាសន៍ថា៖“សហគ្រាសធុនតូច និងមធ្យម គឺជាចលករយ៉ាងសំខាន់ក្នុងការជំរុញ ដល់កំណើនសេដ្ឋកិច្ច និងការបង្កើតការងារ។ សហគ្រាសធុនតូច និងមធ្យមមានអាជីវកម្មគ្របដណ្តប់ច្រើនជាង 95%ក្នុងពិភពលោក ដែលក្នុងនោះបានបង្កើតការងារបានចំនួន 2/3នៃទីផ្សារពលកម្មសរុប”។

ម្យ៉ាងទៀត តាមការសិក្សាបានបង្ហាញថា ការប្រើប្រាស់បច្ចេកវិទ្យានៅក្នុងអាជីវកម្មអាចនាំមកនូវចំណូលប្រមាណ 625ប៊ីលានដុល្លារអាមេរិកក្នុង 1ឆ្នាំដល់វិស័យសេដ្ឋកិច្ចក្នុងតំបន់អាស៊ាននៅឆ្នាំ2030។ ដូច្នេះសហគ្រាសធុនតូច និងមធ្យមមានសក្តានុពលដើម្បីទាញយកផលប្រយោជន៍ពីការប្រើប្រាស់បច្ចេកវិទ្យា ដែលសហគ្រាសខ្លួនឯងតែងមានបញ្ហាប្រឈម ;ហើយអាចដោះស្រាយបញ្ហាទាំងនេះ ដូចជាការបង្កើតបណ្តាញអាជីវកម្មរបស់ខ្លួនចូលទៅក្នុងពិភពលោក ;ឬជំរុញផលិតផលក្នុងទីផ្សារបរទេសជាដើម។

គួរបញ្ជាក់ថា បើតាមស្ថិតិរបស់ក្រសួងឧស្សាហកម្ម និងសិប្បកម្មបានបង្ហាញថា នៅក្នុង ចំណោមសហគ្រាសជាង 53ម៉ឺនសហគ្រាសនៅក្នុងប្រទេសកម្ពុជា មានសហគ្រាសធុនតូច និងមធ្យមមានប្រមាណ 99.8% ដែលបានផ្ដល់ការងារសរុបប្រមាណ 70% នៃការងារក្នុងវិស័យឧស្សាហកម្មសរុប៕

August 26, 2019

អ្វីៗគ្រប់យ៉ាង គឺដោយសារតែខ្ញុំ ហើយខ្ញុំ គឺជាប្រភពនៃអ្វីៗគ្រប់យ៉ាង

យើងទាំងអស់គ្នាធ្លាប់ឮហើយថា អ្វីៗគ្រប់យ៉ាងគឺដោយសារតែអ្នកដឹកនាំ ហើយអ្នកដឹកនាំគឺជាប្រភពនៃអ្វីៗគ្រប់យ៉ាង មានន័យថា អ្នកដឹកនាំគឺមានតួនាទីជាអ្នកដោះស្រាយបញ្ហា និងជាអ្នកបង្កើតភាពរុងរឿង។ អ្វីៗគឺដោយសារតែអ្នកដឹកនាំ និងផ្ញើវាសនាលើអ្នកដឹកនាំ ហើយបើមានបញ្ហាអ្វី គឺបន្ទោសតែអ្នកដឹកនាំ។ តែគំនិតឬគតិបណ្ឌិតដែលថា អ្វីៗគ្រប់យ៉ាងគឺដោយសារតែខ្ញុំ ហើយខ្ញុំគឺជាប្រភពនៃអ្វីៗគ្រប់យ៉ាង វាគឺជាគំនិតឬគតិបណ្ឌិតទទួលខុសត្រូវខ្លួនឯង ខ្លួនទីពឹងខ្លួន និងផ្ញើវាសនាលើខ្លួនឯង ហើយបើមានបញ្ហាអ្វី គឺបន្ទោសតែខ្លួនឯង។ គំនិតឬគតិបណ្ឌិតនេះ គឺអាចជួយឱ្យមនុស្សគ្រប់គ្នាអាចក្លាយជាអ្នកដឹកនាំ មានន័យថា មនុស្សម្នាក់ៗគឺសុទ្ធតែទទួលខុសត្រូវជាអ្នកដោះស្រាយបញ្ហា និងជាអ្នកបង្កើតភាពរុងរឿងដោយខ្លួនឯង។ ដូចទ្រឹស្តីព្រះពុទ្ធបានត្រាស់ថា អ្នកជាអ្វីថ្ងៃនេះ គឺជាអ្វីដែលអ្នកបានធ្វើពីមុនមក ហើយអ្នកនឹងក្លាយជាអ្វីនៅថ្ងៃអនាគត គឺជាអ្វីដែលអ្នកបានធ្វើថ្ងៃនេះ។

អ្វីៗគ្រប់យ៉ាង គឺដោយសារតែខ្ញុំ តើមានន័យយ៉ាងដូចម្តេច? អ្វីៗគ្រប់យ៉ាង ក្នុងន័យអ្នកដឹកនាំ គឺផ្តោតលើបញ្ហា។ បញ្ហាអ្វីក៏ដោយ គឺដោយសារតែខ្ញុំហើយខ្ញុំត្រូវតែជាអ្នកដោះស្រាយបញ្ហា ដោយមិនទុកឱ្យបញ្ហាទាំងនោះរស់ និងដកដង្ហើមនៅជាមួយនឹងខ្ញុំឡើយ។ បញ្ហា គឺស្មើនឹងជំងឺ មានន័យថា បើមនុស្សមានបញ្ហា គឺស្មើនឹងមនុស្សមានជំងឺ។ បើខ្ញុំមានបញ្ហាគឺស្មើនឹងខ្ញុំមានជំងឺ ហើយបើខ្ញុំមិនដោះស្រាយ តើឱ្យនរណាមកដោះស្រាយជំនួសខ្ញុំបាន? ជាងនេះទៅទៀត បើបងប្អូនខ្ញុំមានបញ្ហា គឺស្មើនឹងបងប្អូនខ្ញុំមានជំងឺ។ បើឪពុកម្តាយខ្ញុំមានបញ្ហា គឺស្មើនឹងឪពុកម្តាយខ្ញុំមានជំងឺ។ បើប្តីប្រពន្ធខ្ញុំមានបញ្ហា គឺស្មើនឹងប្តីប្រពន្ធខ្ញុំមានជំងឺ។ បើកូនចៅខ្ញុំមានបញ្ហា គឺស្មើនឹងកូនចៅខ្ញុំមានជំងឺ។ បើស្ថាប័នខ្ញុំមានបញ្ហា គឺស្មើនឹងស្ថាប័នខ្ញុំមានជំងឺ។ បើប្រជាពលរដ្ឋខ្ញុំមានបញ្ហា គឺស្មើនឹងប្រជាពលរដ្ឋខ្ញុំមានជំងឺ។ បើប្រទេសជាតិខ្ញុំមានបញ្ហា គឺស្មើនឹងប្រទេសជាតិខ្ញុំមានជំងឺ។ល។ តើខ្ញុំអាចរស់នៅ និងមានសេចក្តីសុខតែម្នាក់ឯងបានទេ បើអ្នកនៅជុំវិញខ្ញុំ មនុស្សជាទីស្រាឡាញ់របស់ខ្ញុំ គឺសុទ្ធតែមានជំងឺ? តើខ្ញុំអាចរស់ដោយគ្មានសីលធម៌ គុណធម៌ និងបើកភ្នែកមើលទុក្ខវេទនានៃការឈឺចាប់ទាំងនេះបានទេ? បើអ្វីៗគ្រប់យ៉ាង ខ្ញុំគិតតែទម្លាក់កំហុសឱ្យអ្នកដទៃ ហើយខ្ញុំសុខចិត្តរស់ និងដកដង្ហើមជាមួយនឹងបញ្ហា ដោយគ្មានសេចក្តីខ្មាសអៀនបន្តិចសោះឡើយឬយ៉ាងណា?

ខ្ញុំ គឺជាប្រភពនៃអ្វីៗគ្រប់យ៉ាង តើមានន័យដូចម្តេច? ក្នុងន័យអ្នកដឹកនាំ គឺផ្តោតលើភាពរុងរឿង។ អ្វីៗគ្រប់យ៉ាង គឺវាមិនបង្កើតឡើងដោយខ្លួនឯងទេ គឺបង្កើតឡើងដោយមានអ្នកបង្កើត។ បើខ្ញុំចង់បានល្អ គឺខ្ញុំត្រូវតែធ្វើល្អ។ បើខ្ញុំចង់បានប្រពន្ធល្អ គឺខ្ញុំត្រូវតែធ្វើជាប្តីល្អ។ បើខ្ញុំចង់បានកូនល្អ គឺខ្ញុំត្រូវតែធ្វើជាឪពុកម្តាយល្អ។ បើខ្ញុំចង់បានកូនចៅល្អ គឺខ្ញុំត្រូវតែធ្វើជាមេដឹកនាំល្អ។ បើខ្ញុំចង់បានសង្គមល្អ គឺខ្ញុំត្រូវតែធ្វើជាពលរដ្ឋល្អ។ ដូចគ្នានេះដែរ បើខ្ញុំចង់ឱ្យគេរាប់អានខ្ញុំ គឺខ្ញុំត្រូវតែទៅរាប់អានគេ។ បើខ្ញុំចង់ឱ្យគេស្រឡាញ់ខ្ញុំ គឺខ្ញុំត្រូវតែស្រឡាញ់គេ។ បើខ្ញុំចង់ឱ្យគេធ្វើល្អដាក់កូនខ្ញុំ គឺខ្ញុំត្រូវតែធ្វើអំពើល្អដាក់កូនគេ។បើខ្ញុំចង់ឱ្យគេគោរពឪពុកម្តាយខ្ញុំ គឺខ្ញុំត្រូវតែគោរពឪពុកម្តាយគេ។ បើខ្ញុំចង់រៀនពូកែ គឺខ្ញុំត្រូវតែពូកែរៀន។ បើខ្ញុំចង់ចេះ គឺខ្ញុំត្រូវតែខំរៀន បើខ្ញុំចង់មាន គឺខ្ញុំត្រូវតែខំរក។ ពោលគឺ បុគ្គលសាបព្រោះពូជណានឹងទទួលបានផលហ្នឹង។ បើខ្ញុំមិនធ្វើនូវអ្វីដែលខ្ញុំចង់ តើធ្វើម៉េចឱ្យខ្ញុំទទទួលបាននូវអ្វីដែលខ្ញុំប្រាថ្នា? ខ្ញុំ គឺជាប្រភពនៃអ្វីៗគ្រប់យ៉ាង៕

ដោយលោក ហោ ចាន់រដ្ឋា អ្នកស្រាវជ្រាវភាពជាអ្នកដឹកនាំ និងជាអ្នកនិពន្ធសៀវភៅ ភាពជាអ្នកមានកំពូល។

August 26, 2019

បករោម និងកោររោម មួយណាល្អជាង?

បញ្ហារឿងរោម មិនថាយុគសម័យណា ក៏វានៅតែជាបញ្ហាជានិច្ច ភាគច្រើនការកម្ចាត់រោមចោល យើងច្រើនតែប្រើការកោរ ព្រោះវាងាយស្រួល ឆាប់រហ័ស និងអាចធ្វើបានរាល់ថ្ងៃ តែនៅពេលបានសាកល្បងបករោមម្តងរួចមក ទើបបានដឹងថា តើហេតុអីបានជាការបករោមល្អជាងការកោររោម? ដូច្នេះបើចង់ដឹងកាន់តែច្បាស់សូមតាមដានជាបន្ត៖

1. រោមដុះឡើងវិញយឺតជាង
ការបករោម គឺជាការទាញយកសរសៃរោមចេញ រួមទាំងឬសរោមមកជាមួយផង ហើយលទ្ធផលដែលតាមមកនោះគឺ យើងនឹងលែងមានរោមអស់ជាច្រើនសប្តាហ៍ ចំណែកឯការកោររោមវិញយើងឃើញថា បើកោរនៅពេលព្រឹកដល់ពេលល្ងាចយើងនឹងមានអារម្មណ៍ដឹងថា វាដុះគល់ឡើងវិញស្រេចទៅហើយ ឬយ៉ាងយឺតបំផុតអាច2ថ្ងៃសម្រាប់អ្នកខ្លះ។ នេះហើយជាហេតុផលចម្បងរបស់ការបករោម។

2. ផ្សាក្រហាយតិចជាង
ថាៗទៅការកោររោមអាចមិនផ្សាក្រហាយណាស់ណាទេ បើធ្វើត្រឹមត្រូវតាមវិធី តែភាគច្រើន យើងច្រើនតែប្រញាប់ ទើបធ្វើឱ្យយើងកោរដោយមិនប្រើគ្រីមសម្រាប់កោររោម ឬប្រើសាប៊ូជួយ។ ទោះយ៉ាងណាក៏ដោយ ក៏ការកោររោមនៅតែផ្សាក្រហាយដែរ ព្រោះវាជាការកោសស្រទាប់ស្បែកខាងលើដែលអាចនឹងធ្វើស្បែកនៅកន្លែងនោះឡើងស្ងួត និងប្រថុយប្រថាននឹងមុខកាំបិតកោរទៀតផង ឯការបករោមវិញ ទោះជាកើតមានស្នាមអុចៗដែលបណ្តាលមកពីការទាញដោយទាំងឫសរោមចេញមកមែន តែត្រឹមតែមួយស្របក់ ឬអាចប្រហែលជា2ម៉ោង ស្នាមក្រហមៗទាំងនោះនឹងរលុបបាត់វិញហើយ។

3. គ្មាននៅសល់គល់រោម
គល់រោមក៏ជាបញ្ហាមួយដែរ ព្រោះនៅពេលយើងស្ទាបលើស្បែកកន្លែងដែលយើងកោរ ជាពិសេសម្តុំស្មងជើង យើងនឹងដឹងថា ស្បែកយើងមិនរាបរលោងសោះ កើតមានគល់រោមដុះឡើងដែលធ្វើឱ្យយើងដឹងបានជាមួយនឹងខោ ឬសំពត់ខ្លះ ធ្វើឱ្យអ្នកត្រូវកោររោមញឹកញាប់ ឬអាចនឹងរាល់ថ្ងៃទៀតផង ក្នុងខណៈដែលការបកវិញនោះគ្មានគល់រោមដុះឡើងឡើយ តែនៅពេលយើងបក អាចនឹងមានសរសៃរោមខ្លះមិនព្រមរបូតមកជាមួយឡើយ ដូច្នេះទាល់តែប្រើដង្កៀបដកចេញ។

4. រោមដុះឡើងស្តើងជាងមុន
នេះក៏ជាចំណុចល្អរបស់ការបករោមមួយដែរ នៅពេលដែលយើងប្រើវិធីបករោម យើងនឹងមានអារម្មណ៍ដឹងថា ពេលដែលវាដុះឡើងថ្មី សរសៃរោមនោះមិនសូវរឹង និងអាចស្តើងជាងមុនទៀតផង ខណៈដែលការកោររោមវិញ ក្រៅពីគល់ដុះឡើងហើយ សរសៃរោមថែមទាំងរឹងទៀតផង អ្នកណាដែលធ្លាប់កោរញឹកញាប់ ប្រហែលជាដឹងហើយថា វាមានអារម្មណ៍យ៉ាងណាជាមួយសរសៃរោមដែលដុះថ្មីមកនោះ។

5. មិនបាច់ជួបនឹងបញ្ហាស្លាកស្នាម
បើយើងកោរមិនប្រយ័ត្ន អាចនឹងមុតបណ្តាលឱ្យមានស្នាមរបួសបាន ទោះជាកាំបិតកោរមិនមុតក៏ដោយ ក៏ត្រូវតែប្រយ័ត្នដែរ ព្រោះបើមានស្នាមរបូសហើយនោះ នឹងអាចធ្វើឱ្យយើងមានស្លាកស្នាមនៅលើខ្លួនប្រាណបានយ៉ាងអចេតនា។

6. ប្រដាប់បករោមជាផលិតផលធម្មជាតិ
ប្រដាប់បករោមដែលយើងតែងប្រើនោះគឺជាចំណែកផ្សំពីធម្មជាតិ ពេលយើងបិទប្រដាប់បករោមនៅលើស្បែក ហើយទាញចេញនោះ ក្រៅពីសរសៃរោមដែលជាប់មកជាមួយហើយនោះ នៅមានស្រទាប់ស្បែកផ្នែកខាងលើដែលងាប់ហើយ និងរង់ចាំការផ្លាស់កោសិកាថ្មីនោះក៏របូតមកជាមួយដែរ ធ្វើឱ្យស្បែកយើងស្អាតឡើង តែការកោរវិញមិនមែនដូច្នោះទេ វាជាការកោសបំផ្លាញស្បែកទៅវិញ។

7. ជាការកម្ចាត់រោមជានិរន្តរ៍
នៅពេលយើងបកស្បែកញឹកញាប់ សរសៃរោមនឹងក្រដុះឡើង និងថែមទាំងដុះមកស្តើងទៀតផង បើអ្នកណាមានសរសៃរោមតូចៗ និងស្តើងស្រាប់ផងនោះ អាចនឹងមើលឃើញថា ស្ទើរតែគ្មាននៅសល់រោមតែម្តង ដែលអាចជាការកម្ចាត់រោមបែបនិរន្តរ៍តែម្តងសម្រាប់អ្នកខ្លះ៕

August 26, 2019

កម្ពុជា-ចិនរួមគ្នាបណ្ដុះបណ្ដាល ការគ្រប់គ្រងឧស្សាហកម្មទេសចរណ៍ផ្តោតលើបច្ចេកវិទ្យាឌីជីថល

ដើម្បីរួមចំណែកបំពេញតម្រូវការធនធានមនុស្សក្នុងវិស័យទេសចរណ៍ ធ្វើយ៉ាងណាឱ្យពួកគេទទួលបាននូវចំណេះដឹងពាក់ព័ន្ធនឹងការរីកចម្រើននៃបច្ចេកវិទ្យាឌីជីថលក្រសួងទេសចរណ៍ សហការជាមួយមន្ទីរពាណិជ្ជកម្មខេត្តហៃណានប្រទេសចិនបានបើកវគ្គបណ្ដុះបណ្ដាលស្តីពីការអភិវឌ្ឍ និងការគ្រប់គ្រងឧស្សាហកម្មទេសចរណ៍កម្ពុជា ឆ្ពោះទៅឧស្សាហកម្ម 4.0 ដែលកម្មវិធីបើកវគ្គបណ្ដុះបណ្ដាលនេះ មានរយៈពេល 15ថ្ងៃ និងមានការអញ្ជើញចូលរួមពីរដ្ឋលេខាធិការក្រសួងទេសចរណ៍ និងទីប្រឹក្សាមន្ទីរពាណិជ្ជកម្មខេត្តហៃណាន។

លោក ហ័ង ឆាងស៊ាង (HUANGChangxiong) ទីប្រឹក្សាមន្ទីរពាណិជ្ជកម្មខេត្តហៃណាន បានបញ្ជាក់ថា ការពង្រឹង និងអភិវឌ្ឍន៍សាមគ្គីភាព និងកិច្ចសហប្រតិបត្តិការជាមួយប្រទេសកំពុងអភិវឌ្ឍន៍ គឺជាទស្សនៈមូលដ្ឋាននៃគោលនយោបាយការបរទេសរបស់រដ្ឋាភិបាលចិន ក្នុងនោះការផ្ដល់ជំនួយលើការបណ្តុះបណ្តាល ក៏ជាខ្លឹមសារសំខាន់របស់មន្ទីរពាណិជ្ជកម្មខេត្តហៃណានផងដែរ ដែលជាសេដ្ឋកិច្ច នយោបាយ ស្របទៅនឹងយុទ្ធសាស្ត្រនៃការអភិវឌ្ឍន៍ “ខ្សែក្រវាត់ និងផ្លូវ” របស់រដ្ឋាភិបាលនៃសាធារណរដ្ឋប្រជាមានិតចិន។

លោកបានលើកឡើងដែរថា “លក្ខណៈនៃការអភិវឌ្ឍឧស្សាហកម្មទេសចរណ៍ក្នុងបរិបទឧស្សាហកម្ម 4.0 នឹងត្រូវយកមកបង្រៀនដល់សិក្ខាកាមកម្ពុជា ដោយផ្អែកលើមូលដ្ឋាននៃបណ្តាញទិន្នន័យធំៗ និងការប្រើប្រាស់បច្ចេកវិទ្យាបញ្ញាសិប្បនិម្មិត និងពាណិជ្ជកម្មអេឡិចត្រូនិក ដែលជាបច្ចេក វិទ្យាស្នូលក្នុងការគ្រប់គ្រងសេវាកម្មទេសចរណ៍”។

ឯកឧត្តម ហោ មុនីរ័ត្ន រដ្ឋលេខាធិការក្រសួងទេសចរណ៍ បានរំឭកថា កាលពីឆ្នាំ2018 ភាគីកម្ពុជា-ចិនបានសហការរៀបចំវគ្គបណ្តុះបណ្តាល សម្រាប់ការអភិវឌ្ឍឧស្សាហកម្មទេសចរណ៍កម្ពុជានៅខេត្តព្រះសីហនុម្ដងហើយ ដោយពេលនោះមានសិក្ខាកាមចូលរួមចំនួន 50នាក់ មកពីស្ថាប័នរដ្ឋ និងឯកជន។ ទន្ទឹមនេះ ក្នុងឆ្នាំ2018 កន្លងទៅ កម្ពុជាក៏ទទួលបានទេសចរអន្តរជាតិជាង 6,2លាននាក់ កើនឡើង 10.7% និងនាំមកនូវប្រាក់ចំណូលប្រមាណ 4,356លានដុល្លារអាមេរិក។

ឯកឧត្តម បានឱ្យដឹងថា បច្ចុប្បន្ននេះ ជើងហោះហើរត្រង់ពីប្រទេសចិនមកកម្ពុជាមានចំនួន 636ជើងក្នុង 1សប្តាហ៍ មកពីទីក្រុងចំនួន38 ក្នុងប្រទេសចិន តាមរយៈក្រុមហ៊ុនអាកាសចរណ៍ចំនួន25ក្រុមហ៊ុន។ លោកបន្តថា កម្ពុជាត្រូវការវិនិយោគិន និងដៃគូអភិវឌ្ឍន៍បន្ថែមទៀត ដើម្បីបង្កើតផលិតផល និងហេដ្ឋារចនាសម្ព័ន្ធ ទ្រទ្រង់ទេសចរណ៍ថ្មីៗ ព្រមទាំងពង្រីកការតភ្ជាប់ជើងហោះហើរ ពីទីក្រុងនានាៗ របស់ប្រទេសចិនបន្ថែមទៀត។

សម្រាប់ឆ្នាំ2019 កម្ពុជាក៏រំពឹងថា នឹងទទួលបានភ្ញៀវទេសចរអន្តរជាតិប្រមាណ 6,7លាននាក់ ហើយនៅឆ្នាំ 2020 ប្រមាណជាង 7លាននាក់។ ឯកឧត្ដមបានបញ្ជាក់ថា “ភ្ញៀវទេសចរចិន គឺជាទីផ្សារដែលធំជាងគេលេខ1 របស់កម្ពុជាក្នុងរយៈពេលប៉ុន្មានឆ្នាំកន្លងមកនេះ”។

ឯកឧត្ដមបានបញ្ជាក់ថា នៅឆ្នាំ2018 កន្លងទៅ កម្ពុជាទទួលបានទេសចរចិនចំនួន 2លាននាក់ មានការកើនឡើង 33% ហើយនៅឆ្នាំ2019 នេះ យើងរំពឹងថា ទេសចរចិន នឹងកើនឡើងដល់ 2.6លាននាក់និង 3លាននាក់នៅឆ្នាំ2020។

ឯកឧត្តមរដ្ឋលេខាធិការក៏បានបញ្ជាក់ទៀតដែរថា៖“ដើម្បីឆ្លើយតបនឹងកំណើនភ្ញៀវទេសចរ នៅឆ្នាំ2020 កម្ពុជាត្រូវការកម្លាំងពលកម្មថ្មីចំនួនប្រមាណ 20ម៉ឺននាក់បន្ថែមទៀត ដូចនេះក្រសួងទេសចរណ៍កំពុងដោះស្រាយបញ្ហាប្រឈមខាងលើ ពោលគឺត្រូវជំរុញការបណ្តុះបណ្តាលកម្លាំងពលកម្មថ្មី និងបំពាក់បំប៉នជំនាញបន្ថែមទៀត ដល់អ្នកកំពុងបម្រើការងារក្នុងវិស័យទេសចរណ៍។ ដោយហេតុថា នាពេលបច្ចុប្បន្ន អ្នកកំពុងបម្រើការងារក្នុងវិស័យទេសចរណ៍មានចំនួនប្រមាណតែ 20% ប៉ុណ្ណោះដែលបានឆ្លងកាត់ការសិក្សាជំនាញទេសចរណ៍តាមសាលាបណ្ដុះបណ្ដាលវិជ្ជាជីវៈទេសចរណ៍ សាកលវិទ្យាល័យទេសចរណ៍ និងវគ្គបណ្ដុះបណ្ដាលខ្លី”។

ពាក់ព័ន្ធនឹងបញ្ហាខាងលើ ក្រសួងទេសចរណ៍បាននិងកំពុងដាក់ឱ្យអនុវត្តនូវយុទ្ធសាស្ត្រស្ដីពី ការអភិវឌ្ឍវិស័យទេសចរណ៍ឌីជីថល ដូចជាការចុះបញ្ជីអាជ្ញាប័ណ្ណទេសចរណ៍តាមប្រព័ន្ធ Online ប្រព័ន្ធចំណាត់ថ្នាក់សណ្ឋាគារ និងភោជនីយដ្ឋានOnline ប្រព័ន្ធគ្រប់គ្រងមគ្គុទេ្ទសក៍ទេសចរណ៍ Online ប្រព័ន្ធវាយតម្លៃចលនាប្រឡងប្រណាំង“ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ” តាមប្រព័ន្ធ QR-Code និងប្រព័ន្ធទូរស័ព្ទវៃឆ្លាត ព្រមជាមួយការរីកចម្រើននៃមធ្យោបាយទូទាត់សម្រាប់ទេសចរណ៍តាមប្រព័ន្ធ QR-Code មធ្យោបាយដឹកជញ្ជូនវៃឆ្លាត (Pass App ឬ Grab) ជាដើម។

លើសពីនេះ ក្រសួងទេសចរណ៍ក៏បាននិងកំពុងរៀបចំឯកសារ យុទ្ធសាស្ត្រអភិវឌ្ឍន៍ទេសចរណ៍ឌីជីថល ឆ្នាំ2020-2023 ដែលជាឯកសារគោលសម្រាប់ជំរុញការប្រើប្រាស់ និងអភិវឌ្ឍន៍បច្ចេកវិទ្យាឌីជីថល សម្រាប់ឧស្សាហកម្មទេសចរណ៍កម្ពុជា ឆ្ពោះទៅរកបដិវត្តន៍ឧស្សាហកម្មទី4 ដែលកំពុងបង្ហាញពីការរីកចម្រើននៃបច្ចេកវិទ្យាពិភពលោក ដែលជះឥទ្ធិពលយ៉ាងខ្លាំងលើការកំណត់ឡើងវិញនូវកត្តាផលិតកម្ម ការគ្រប់គ្រង ឥរិយាបថនៃការប្រើប្រាស់ និងរចនាសម្ព័នសេដ្ឋកិច្ច។

លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ប្រាប់ឡារ៉ែន ពាណិជ្ជថា៖“វគ្គបណ្តុះបណ្តាលនេះមានប្រយោជន៍ខ្លាំងណាស់សម្រាប់កម្ពុជាយើងព្រោះទេសចរបានស្វែងយល់តាម App &; Digital ដែលវិស័យទេសចរណ៍កម្ពុជា បាននិងកំពុងដាក់ឱ្យអនុវត្តនូវយុទ្ធសាស្ត្រនេះ។ វាក៏មានភាពចាំបាច់ណាស់ដែរក្នុងការជំរុញ និងអភិវឌ្ឍន៍វិស័យទេសចរណ៍ ដែលវគ្គបណ្តុះបណ្តាលសម្រាប់ការអភិវឌ្ឍឧស្សាហកម្មទេសចរណ៍ឌីជីថលនេះ ជាការផ្តល់កិច្ចសហការដោយខេត្តហៃណានប្រទេសចិននេះ”។

លោកជំទាវ បានមានប្រសាសន៍បន្ថែមទៀតថា៖“លំហូរទេសចរនៃបណ្តាប្រទេសជាច្រើនជាពិសេសជនជាតិចិនមកក្នុងតំបន់អាស៊ាន មានចំនួនកាន់តែច្រើនឡើង ធ្វើឱ្យការជំរុញវិស័យទេសចរណ៍របស់កម្ពុជាយើងកាន់តែមានសម្ទុះ ដោយសារតែការធ្វើទេសចរណ៍ក្រៅស្រុករបស់អ្នកទេសចរចិនគ្រប់វ័យ មានតួលេខឈានមុខនៅស្ទើរគ្រប់ប្រទេស រួមទាំងទេសចរដែលមកកាន់ប្រទេសកម្ពុជាផងដែរ”។

លោកជំទាវ ឆាយ ស៊ីវលីន ក៏បានបញ្ជាក់ផងដែរថា៖“វគ្គបណ្ដុះបណ្ដាលស្តីពីការអភិវឌ្ឍ និងការគ្រប់គ្រងឧស្សាហកម្មទេសចរណ៍កម្ពុជា ឆ្ពោះទៅឧស្សាហកម្ម 4.0 នេះ មានសកម្មភាពស្របទៅនឹងយុទ្ធសាស្ត្រស្ដីពីការអភិវឌ្ឍវិស័យទេសចរណ៍ឌីជីថលរបស់ក្រសួងទេសចរណ៍ដែលបានកំពុងដាក់ឱ្យអនុវត្តដែរ”៕

August 26, 2019

ពិតជាភ្ញាក់ផ្អើល!! កូនខ្មែរមួយរូប បង្ហាញសម្ថភាពអច្ឆរិយៈនៃការចងចាំនៅក្នុងកម្មវិធី Super100 ប្រទេសថៃ

នៅលើបណ្ដាញសង្គមហ្វេសប៊ុកតាមរយៈវីដេអូកម្មវិធី អច្ឆរិយៈលើស១០០ ឬ Super100 ស្ថានីយទូរទស្សន៍ Workpoint Entertainment បានឱ្យឃើញថា កូនខ្មែរមួយរូបដែលមានឈ្មោះថា ហុង ភារិន មានអាយុ ២៤ ឆ្នាំ កំពុងបន្ដការសិក្សានៅសាកលវិទ្យាល័យ ជ័យភូមិ ក្នុងប្រទេសថៃ បានចូលរួមបង្ហាញសមត្ថភាពពិសេសនៃការតេស្ដសមត្ថភាពចងចាំ។ ក្រុមការងារកម្មវិធីខាងលើនេះ បានបញ្ជាក់ប្រាប់ថា លោក ហុង ភារិន មានសមត្ថភាពចងចាំពិសេសគឺ ការចាំប្រតិទិនដល់ទៅ 700 ឆ្នាំ និងសមត្ថភាពចងចាំរូបភាពយ៉ាងអច្ឆរិយៈមិនគួរឱ្យជឿ។

នៅក្នុងនោះ គណៈកម្មការទាំងបីបានធ្វើការសាកល្បងសមត្ថភាពរបស់ ភារិន ជាបីដំណាក់កាល ទី១គឺ លេខនពន្ធរត់មិនលំដាប់ ទី២ សម្លឹកបៀសាប់ដែលមិនតម្រៀបគ្នា ទី៣គឺ ថ្ងៃខែឆ្នាំ សប្ដាហ៍នៅលើប្រតិទិន។ ឆ្លងកាត់វិញ្ញាសារទាំងបីដំណាក់កាលបានធ្វើឱ្យមហាជនអ្នកទស្សនាភ័យបុកពោះមិនស្ទើតាមរយៈពីមួយសំនួរទៅមួយសំនួរ។ ទីបំផុត បេក្ខភាពរូបនេះធ្វើបានយ៉ាងជោគជ័យដោយគ្មានការភ្លាំងភ្លាត់។ លោក ភារិន បានបញ្ជាក់ថា ដោយសារលោកបានទស្សនាកម្មវិធីនេះតាំងពីដំបូង ហើយឃើញមានបេក្ខភាពមួយរូប ដែលមានឈ្មោះ អេ បានបញ្ចេញសមត្ថភាពនៃការចងចាំបានយ៉ាងរហ័ស ហើយនៅគ្រានោះលោកក៏តាំងក្ដីស្រម៉ៃរបស់ខ្លួនថា លោកនឹងធ្វើឱ្យបានដូចជាអាយដលរបស់លោកដែរ។ ភារិន បានបន្ដថា ដោយសារខ្លួនបានឆ្លងកាត់ស្ថានភាពគ្រួសារលំបាក មានតែម្ដាយទទួលបន្តុកចិញ្ចឹមកូន ហើយគ្រួសារទាស់ទែងគ្នារាល់តែថ្ងៃទៀតនោះ ទើបបានជាលោកខិតខំប្រឹងប្រែងរៀនសូត្រ ដើម្បីរត់គេចពីបញ្ហារបស់គ្រួសារ និងការបាក់ទឹកចិត្ត។ លោកថា លោកអរគុណចំពោះបងប្រុសរបស់លោក ដែលបានផ្ដល់សារជាកម្លាំងបណ្ដាលចិត្តឱ្យលោកប្រឺងប្រែងដល់សព្វគឺ « បើចង់ដកខ្លួនចេញពីបញ្ហាគ្រួសារ គឺត្រូវតស៊ូអានសៀវភៅឱ្យបានច្រើនបំផុត»។

ជោគជ័យនិងក្ដីសម្រេចរបស់ ហុង ភារិន បានធ្វើឱ្យមហាជនកម្ពុជានិងថៃ មានមោទនភាពចំពោះអច្ឆរិយភាពរបស់លោកយ៉ាងខ្លាំង។ បន្ទាប់ពីឈ្នះនៅក្នុងកម្មវិធីទូរទស្សន៍ខាងលើហើយ ខាងអ្នករៀបចំកម្មវិធីបានប្រគល់រង្វាន់ដែលជាការតបស្នងក្ដីស្រម៉ៃរបស់ភារិន រួមមាន សៀវភៅ ខ្មៅដៃ និងសម្ភារៈសិក្សាជាច្រើនទៀត យកទៅប្រគល់ជូនសិស្សសាលាបឋមសិក្សាក្នុងខេត្តជ័យភូមិ។ ហើយក្រុមការងារក៏បានប្រគល់ទឹកប្រាក់ចំនួន ១០០០០ បាតបន្ថែមទៀតឱ្យទៅ ភារិន ជាប្រាក់រង្វាន់លើកទឹកចិត្ត និងជួយដោះស្រាយជីវភាពជូនម្ដាយ។ សរុបមក អច្ឆរិយៈបុគ្គលរបស់កម្ពុជា ហុង ភារិន បានធ្វើឱ្យប្រជាជនថៃ និងកម្ពុជា បានមើលឃើញពីទឹកចិត្ត និងការតបស្នងចំពោះប្រទេស និងជាតិរបស់ខ្លួន។ ហុង ភារិន ត្រូវបានចាត់ទុកជាជនគំរូនៃការសិក្សារៀនសូត្រ អានសៀវភៅឱ្យបានច្រើន ដើម្បីអនាគតភ្លឺស្វាង៕

August 26, 2019

Category: សង្គម និងសេដ្ឋកិច្ច