សង្គម និងសេដ្ឋកិច្ច - La Reine Media

និយាយជាមួយកូន ពេលកូនបៅទឹកដោះ ធ្វើឱ្យកូនស្រឡាញ់យើងខ្លាំងឡើងមែនឬ?

ធ្លាប់សង្កេតដែរឬទេថា ពេលកូនរបស់យើងបៅទឹកដោះ មិនថាតែបៅពីដោះម្ដាយ ឬពីដកទឹកដោះគោនោះទេ តែងមានពេលមួយដែលកូនឈប់បៅភ្លាមៗដោយមិនដឹងមូលហេតុជានិច្ច ធ្វើឱ្យអ្នកម្ដាយជាច្រើននឹកកង្វល់ក្នុងចិត្តថា កូនលែងចង់បៅទឹកដោះហើយ ទើបត្រូវមានការអង្រួនខ្លួនកូនថ្នមៗដើម្បីឱ្យកូនបៅទឹកដោះឡើងវិញ។ តើអ្នកម្ដាយដឹងឬទេថា ក្នុងពេលដែលអ្នកម្ដាយកំពុងអង្រួនខ្លួនកូននោះ គឺជាអំឡុងពេលសំខាន់ដែលអ្នក និងកូនកំពុងសាងចំណងសម្ពន្ធភាពគ្នាខ្លាំងឡើងបានយ៉ាងឆាប់រហ័ស។

ចង្វាក់ការបៅទឹកដោះរបស់ទារកយ៉ាងដូចម្ដេច?
ជាប្រក្រតីតាមធម្មជាតិ ទារកដែលបៅទឹកដោះ(មិនថាពីដោះម្ដាយ ឬពីដបទឹកដោះគោនោះទេ) តែងមានចង្វាក់នៃការបៅ(ក្នុងអំឡុងពេលដំបូង) មានលក្ខណៈដូចខាងក្រោមនេះ ៖
បៅៗ… បន្ទាប់ពីនោះ ពេលកូនបានបៅទឹកដោះអស់មួយស្របក់មក កូននឹងចាប់ផ្ដើមកែសម្រួលចង្វាក់ការបៅទៅជាលក្ខណៈបែបនេះ ៖
បៅៗ ឈប់(ហើយនឹងធ្វើដដែលៗបែបនេះទៅជារឿយៗ)
ក្នុងអំឡុងចង្វាក់ដែលកូនឈប់បៅនេះឯង អ្នកម្ដាយជាច្រើននាក់នឹងនឹកកង្វល់ថា កូននឹងឈប់បៅតទៀតហើយ(ខ្លាចកូនបៅមិនឆ្អែត) ទើបធ្វើការអង្រួនខ្លួនកូនថ្នមៗ ឬនិយាយព្រមជាមួយការសម្លឹងមើលមុខកូន ហើយអ្វីដែលកើតឡើងនោះក៏គឺ កូននឹងឈប់បៅមួយខណៈពេល ដើម្បីទទួលដឹងនូវអ្វីដែលម្ដាយកំពុងធ្វើចំពោះគេ នោះគឺ ការស្ដាប់នូវអ្វីដែលម្ដាយកំពុងនិយាយ និងសម្លឹងមើលមុខម្ដាយ រួចបន្ទាប់ពីនោះ ទារកក៏នឹងត្រឡប់ទៅរកចង្វាក់ការបៅ 3ដង និងឈប់ 1ដងដូចមុនទៀត។

ហេតុអីបានកូនបៅៗឈប់?
អាចរាប់បានថា ជារឿងប្លែកខ្លាំងណាស់ ដោយសារតែមានការសាកល្បងខាងវេជ្ជសាស្រ្តរួចមកហើយ និងទទួលបានលទ្ធផលដ៏គួរឱ្យស្ងើចអស្ចារ្យ ដោយក្រុមគ្រូពេទ្យបានសាកល្បងចាប់រយៈពេលរវាងការបំបៅទឹកដោះកូន ដោយបណ្ដោយឱ្យទារកបានបៅទឹកដោះតាមចង្វាក់ប្រក្រតីរបស់គេ ហើយនៅពេលទារកឈប់បៅ ក៏មិនបាច់អង្រួន ឬនិយាយជាមួយទេ និងមួយក្រុមទៀត ពេលទារកឈប់បៅ ក៏ឱ្យម្ដាយអង្រួនខ្លួនកូនថ្នមៗ ព្រមជាមួយការញញឹម សម្លឹងមើលមុខ និងនិយាយដាក់កូន។

លទ្ធផលការសាកល្បងដែលទទួលបាន អាចសរុបបានដូចតទៅ ៖
1. តឱ្យយើងមិនអង្រួនខ្លួនកូន(ចង្វាក់ដែលកូនឈប់បៅ)ក៏កូននឹងត្រឡប់មកបៅវិញបានដោយខ្លួនឯងតាមចង្វាក់វេលាដែលទៀងទាត់។
2. រឹតតែយើងនិយាយរក សម្លឹងមើលមុខ និងអង្រួនខ្លួនកូន កូននឹងពន្យារចង្វាក់ការឈប់បៅនោះកាន់តែយូរទៅ ព្រោះគេកំពុងទទួលដឹង និងព្យាយាមទំនាក់ទំនងជាមួយអ្វីដែលគេបានដឹងមក(គឺការនិយាយ ការអង្រួនពីម្ដាយ)។
3. បរិមាណការបៅទឹកដោះរបស់ទារកទាំង 2ក្រុម ស្មើគ្នា(ចង់អង្រួន ឬមិនអង្រួន ក៏មិនបានបៅទឹកដោះច្រើនជាងគ្នាប៉ុន្មានដែរ)។
4. ការនិយាយជាមួយកូនខណៈពេលកូនកំពុងបៅទឹកដោះផង(ជាពិសេសបៅដោះម្ដាយ)នឹងធ្វើឱ្យកូនមិនគេងលក់លើទ្រូងម្ដាយច្រើនជាងបណ្ដោយឱ្យបៅទឹកដោះស្ងាត់ៗ។
5. កូននឹងអាចចងចាំក្លិន និងសំឡេងរបស់ម្ដាយខ្លួនឯងបានក្នុងរយៈពេល 4-7ថ្ងៃ រាប់ចាប់ពីថ្ងៃកើតមកដំបូង។
6. រឹតតែលោកអ្នកនិយាយជាមួយកូនច្រើនប៉ុនណាពេលកូនកំពុងបៅទឹកដោះ កូននឹងរឹតតែសម្លឹងមើលមុខលោកអ្នកច្រើនឡើង និងយូរឡើង។ កូននឹងទទួលដឹង និងជ្រួតជ្រាបពីសេចក្ដីស្រឡាញ់ ចំណងសម្ពន្ធភាពដែលអ្នកមានដល់កូនខ្លាំងឡើង។ ពេលកើតដំបូង ទារកនឹងមើលឃើញតែពណ៌ស ខ្មៅ ប្រផេះ និងអាចសម្រួលហ្វូខាស់បានត្រឹមតែ 25សង់ទីម៉ែត្រប៉ុណ្ណោះ ហ្នឹងហើយទើបធ្វើឱ្យគេចងចាំ និងទទួលដឹងថា គេមានអ្នកដែលនៅចាំមើលថែទាំ និងស្រឡាញ់គេខ្លាំងប៉ុនណា ទើបមិនមែនជារឿងប្លែកឡើយដែលកូននឹងជាប់ចិត្តលើម្ដាយខ្លាំងជាង និងឆាប់ចងចាំមុខឪពុកម្ដាយបានលឿន។

ក្រៅពីនោះ នៅក្នុងលទ្ធផលនៃការសាកល្បងនោះបានធ្វើឱ្យយើងដឹងទៀតថា ការនិយាយជាមួយកូន ការអង្រួនខ្លួនកូនថ្នមៗខ្លះៗខណៈពេលគេកំពុងបៅទឹកដោះនោះ ឪពុកម្ដាយខ្លួនឯងក៏បានទទួលនូវអារម្មណ៍ឆ្អែតពេញចិត្ត សុខ និងរំភើបចិត្តដែលមិនអាចរកពីទីណាបានទៀតឡើយ ដូច្នេះហើយ ពេលដែលកូនបៅទឹកដោះលើកក្រោយទៀត កុំភ្លេចនិយាយលេងជាមួយកូនឱ្យបានច្រើនៗណា៎…៕

August 28, 2019

បាក់ឌុបឆ្នាំនេះធ្វើឡើងដោយរលូន ដោយចំណាយថវិកាប្រមាណ 5លានដុល្លារ

ការប្រឡងមធ្យមសិក្សាទុតិយភូមិ ត្រូវបានរដ្ឋមន្ត្រីក្រសួងអប់រំ ឯកឧត្តម ហង់ជួន ណារ៉ុន បញ្ជាក់ថាបានបញ្ចប់ដោយរលូនដោយសារតែមានការចូលរួមពីគ្រប់ភាគីទាំងអស់ មានដូចជាមន្ត្រីអប់រំ ភាគីពាក់ព័ន្ធ មន្ត្រីសុខាភិបាល និងជំនួយការអប្បមាទជាដើម។

ប្រភពពីក្រសួងអប់រំ យុវជន និងកីឡា បានបញ្ជាក់ថា ការប្រឡងមធ្យមសិក្សាទុតិយភូមិសម័យប្រឡង ថ្ងៃទី19 ខែសីហា ឆ្នាំ2019 នេះដំណើរការបានល្អ និងរលូន ហើយគ្មានបាតុភាពមិនប្រក្រតីធំដុំនោះទេ ដោយសារតែបេក្ខជនគោរពតាមបទប្បញ្ញត្តិនៃការប្រឡងបានល្អ។ ក្នុងចំណោមបេក្ខជនប្រឡងរាប់ម៉ឺននាក់ មន្ត្រីអប់រំរកឃើញថា ស្ទើរតែពុំមានអ្នកនាំមកជាប់ខ្លួននូវសំណៅឯកសារ និងឧបករណ៍ហាមឃាត់នានា ដូចជាម៉ាស៊ីនគិតលេខជាដើមនេាះទេ។

ទោះជាយ៉ាងនេះក្តី ក្រសួងអប់រំ បញ្ជាក់ថា ក្នុងការប្រឡងនេះ មានបេក្ខជនមានកំហុសឆ្គងធ្ងន់ធ្ងរចំនួន 2ករណី គឺករណីទី1 ដកហូតទូរស័ព្ទដៃ និងករណីទី2យកសំណៅឯកសារចូលក្នុងបន្ទប់ប្រឡង។ ចំពោះបញ្ហាសុខភាព មានបេក្ខជនចំនួន 152នាក់មានបញ្ហា តែក្រោយពេលសង្គ្រោះមានបេក្ខជន 141នាក់ អាចបន្តដំណើរការប្រឡងបាន ចំណែកឯបេក្ខជនចំនួន 11នាក់ផ្សេងទៀតត្រូវបញ្ចូនទៅមន្ទីរពេទ្យមិនអាចត្រឡប់មកបន្តការប្រឡងបានទេ។

ចំពោះការចំណាយលើការប្រឡងឆ្នាំនេះ ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា បានលើកឡើងថា ក្រសួងបានរៀបចំគ្រោងចំណាយប្រមាណ 5លានដុល្លារ សម្រាប់ដំណើរការងារប្រឡងទាំងមូលក្នុងឆ្នាំ 2019នេះ។ ខ្ទង់ចំណាយដែលក្រសួងនឹងចំណាយ គឺសម្រាប់ឧបត្ថម្ភដល់មន្ត្រីអប់រំដែលមានចំនួនប្រមាណ 20,000នាក់នៅទូទាំងប្រទេស។

តាមលទ្ធផលផ្លូវការចុងក្រោយបំផុត បានបញ្ជាក់ថានៅឆ្នាំ 2019នេះ មានបេក្ខជនប្រឡងសរុបចំនួន 117,043នាក់ ក្នុងនោះមានបេក្ខជនស្រីចំនួន 60,427នាក់។ ក្នុងនោះក្រសួងអប់រំ យុវជន និងកីឡា បានបែងចែកជា 202មណ្ឌល ដែលមានថ្នាក់វិទ្យាសាស្ត្រពិតចំនួន 44,690មណ្ឌល ស្មើនឹង 75មណ្ឌល និងថ្នាក់វិទ្យាសាស្ត្រសង្គម មានបេក្ខជនចំនួន 72,353នាក់ ស្មើនឹង 127មណ្ឌល។

ចំពោះបុគ្គលិកអប់រំ និងភាគីពាក់ព័ន្ធ ក្រសួងអប់រំ បានបញ្ជាក់ថា សម្រាប់ការត្រួតពិនិត្យមណ្ឌលប្រឡង និងបន្ទប់ប្រឡង រួមទាំងការគ្រប់គ្រងទូទៅ មានការចូលរួមពីបុគ្គលិកអប់រំ 17,430នាក់ មានដូចជាគណៈកម្មការកណ្តាលចំនួន 2,405នាក់ គណៈកម្មការត្រួតពិនិត្យតាមអគារចំនួន 1,181នាក់ ប្រធានមណ្ឌលចំនួន 202នាក់ អនុរក្សប្រមាណ 10,631នាក់ អប្បមាទចំនួន 606នាក់ និងជំនួយការអប្បមាទចំនួន 2,405នាក់៕

August 27, 2019

រដ្ឋមន្ត្រីក្រសួងការងារចង់ឱ្យប្រជាជនបន្តរៀនដើម្បីអភិវឌ្ឍសមត្ថភាពការងារ

នៅកម្ពុជា សម្បូរទៅដោយធនធានយុវជនច្រើន ដែលនេះជាសក្តានុពល និងចំណុចទាក់ទាញ សម្រាប់ការវិនិយោគ ក៏ដូចជាសម្រាប់ផ្នែកការងារជាដើម តែអ្វីដែលជាឧបសគ្គគឺរបាយធនធានមនុស្សទៅតាមជំនាញមិនទាន់មានភាពស៊ីគ្នាទាំងស្រុងជាមួយនឹងទីផ្សារការងារនោះទេ។ មានជំនាញខ្លះមានទីផ្សារចង្អៀតតែមានមនុស្សរៀនច្រើន ខណៈជំនាញមួយចំនួនទៀតមានទីផ្សារខ្ពស់តែបែរជាមិនសូវសម្បូរអ្នកជំនាញបច្ចេកទេស និងវិជ្ជាជីវៈជាដើម។

ថ្មីៗនេះក្រសួងការងារ និងបណ្តុះបណ្តាលវិជ្ជាជីវៈ និងក្រសួងអប់រំ បានចាប់ផ្តើមជំរុញ និងផ្តល់ឱកាសឱ្យប្រជាជនគ្រប់គ្នា ចាប់ផ្តើមចូលសិក្សាបច្ចេកទេស និងវិជ្ជាជីវៈឡើងវិញ ដើម្បីចាប់ជាអាជីពីចិញ្ចឹមជីវិត និងអភិវឌ្ឍអាជីពការងារជាដើម។

ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវីជ្ជាជីវៈ បានមានប្រសាសន៍ថា តម្រូវការធនធានមនុស្សផ្នែកបណ្តុះបណ្តាល និងវិជ្ជាជីវៈមានតម្រូវការកាន់តែខ្ពស់ជារៀងរាល់ឆ្នាំ ហេតុនេះក្រសួង ព្យាយាមក្នុងការពង្រាយគ្រឹះស្ថានបណ្តុះបណ្តាលនៅតាមរាជធានីខេត្ត ដែលរហូតមកដល់ពេលនេះមានចំនួន 38គ្រឹះស្ថាន និងដៃគូជាង 100គ្រឹះស្ថានបន្ថែមទៀតដែលអនុវត្តផ្នែកបណ្តុះបណ្តាល ទាំងអង្គការ និងផ្នែកឯកជន។ ហេតុនេះយុវជន ឬប្រជាជនគួរចាប់អារម្មណ៍ក្នុងការបន្តអភិវឌ្ឍសមត្ថភាពលើជំនាញទាំងអស់នេះដើម្បីចាប់យកឱកាសការងារលើវិស័យសំខាន់ៗជាច្រើនដែលកំពុងមានតម្រូវការ ស្របពេលដែលស្ថាប័នអប់រំកាន់តែខិតទៅជិតកន្លែងរស់នៅ។

ក្រៅពីការបង្កើនការអប់រំបច្ចេកទេស និងវិជ្ជាជីវៈ ក្រសួងការងារ ក៏បានសហការជាមួយក្រសួងអប់រំ ក្នុងការផ្តល់ជូននូវការបណ្តុះបណ្តាលកម្រិតមូលដ្ឋានដល់ប្រជាជនទូទៅតាមរយៈបច្ចេកវិទ្យាដើម្បីផ្តល់ឱកាសឱ្យអ្នកដែលបានបោះបង់ការសិក្សាបានចូលសិក្សាឡើងវិញនូវចំណេះដឹងជាមូលដ្ឋាន។ ការសិក្សាតាមកម្មវិធីអប់រំកម្រិតមូលដ្ឋាន (BEEP) អាចផ្តល់ឱកាសឱ្យប្រជាជនសិក្សាបានយ៉ាងទូលំទូលាយ ព្រោះមិនតម្រូវឱ្យបង់ប្រាក់នោះទេ ហើយមនុស្សគ្រប់គ្នាអាចសិក្សាបានតាមរយៈបច្ចេកវិទ្យាគ្រប់ទីកន្លែងបាន ឬអាចសិក្សានៅទីតាំងមជ្ឈមណ្ឌលនៅតាមខេត្តមួយចំនួននៅក្នុងរាជធានីភ្នំពេញ ដើម្បីទទួលបានសញ្ញាបត្រសមមូល ឬស្មើនឹងសញ្ញាបត្រមធ្យមសិក្សាបឋមភូមិ ដែលជាច្រកយ៉ាងសំខាន់ក្នុងការបន្តសិក្សាជំនាញសំខាន់ៗជាច្រើនផ្សេងទៀត៕

August 27, 2019

ស្ពានអាកាសថ្មើរជើង 2ទៀត នឹងលេចរូបរាងឡើងនៅកណ្តាលក្រុងភ្នំពេញក្នុងពេលឆាប់ៗនេះ

យោងតាមការបញ្ជាក់របស់អាជ្ញាធររាជធានីភ្នំពេញបានឱ្យដឹងថា រដ្ឋបាលរាជធានីភ្នំពេញគ្រោងនឹងរៀបចំឱ្យមានការស្ថាបនាស្ពានអាកាសថ្មើរជើងចំនួន 2កន្លែងបន្ថែមទៀត ដោយស្ពានទី1ស្ថិតនៅលើមហាវិថីម៉ៅសេទុងខាងកើតសាលាបឋមសិក្សាសន្ធរម៉ុក និងគម្រោងទី2 ស្ថិតនៅតាមមហាវិថីនេះដូចគ្នា តែស្ថិតនៅខាងលិចផ្សារដើមគ។

គម្រោងស្ពានអាកាសនេះត្រូវបានសាលារាជធានីភ្នំពេញបញ្ជាក់ឱ្យដឹងថា រៀបចំធ្វើឡើងដើម្បីជួយសម្រួលដល់ការធ្វើដំណើររបស់ប្រជាពលរដ្ឋឆ្លងកាត់ផ្លូវប្រកបដោយសុវត្ថិភាព មិនប្រឈមនឹងបញ្ហាគ្រោះថ្នាក់ចរាចរណ៍។ ម្យ៉ាងវិញទៀត វាក៏ជាការរៀបចំដើម្បីឆ្លើយតបជាមួយនឹងកំណើនប្រជាជន រួមទាំងយានយន្តដែលឆ្លងកាត់ដងផ្លូវនេះកុំឱ្យមានការកកស្ទះ និងបញ្ហាប្រឈមនានានៅតាមដងផ្លូវផងដែរ។

គួរបញ្ជាក់ថា កន្លងមកនៅក្នុងរាជធានីភ្នំពេញ មានស្ពានអាកាសថ្មើរជើង 3កន្លែងរួចមកហើយ គឺ2កន្លែងនៅតំបន់វត្តជម្ពូវ័ន្ត ខណ្ឌពោធិសែនជ័យ និង 1កន្លែងទៀតនៅតំបន់ភ្លើងស្តុបនាងគង្ហីង ខណ្ឌ7មករា៕

August 27, 2019

បើគ្មានការប្រែប្រួល លទ្ធផលបាក់ឌុបនឹងចេញនៅថ្ងៃទី10 ខែ9 ខណៈការកែវិញ្ញាសាកំពុងធ្វើឡើងយ៉ាងតឹងរ៉ឹងនិងច្បាស់លាស់

បើគ្មានការប្រែប្រួលទេ ថ្ងៃប្រកាសលទ្ធផលនៃការប្រឡងមធ្យមសិក្សាទុតិយភូមិ នៅឆ្នាំ2019 នេះនឹងចេញជាផ្លូវការនៅថ្ងៃទី10 ខែកញ្ញា ឆ្នាំ2019 សម្រាប់មណ្ឌលនៅរាជធានីភ្នំពេញ និងខេត្តកណ្តាល និងថ្ងៃទី 11 ខែកញ្ញា សម្រាប់គ្រប់មណ្ឌលប្រឡងនៅទូទាំងប្រទេស។ នេះជាការបញ្ជាក់របស់ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលបានលើកឡើងក្រោយពេលបញ្ចប់ការប្រឡងមធ្យមសិក្សាទុតិយភូមិ។

ចំពោះការកែវិញ្ញាសាវិញ នៅគ្រប់មណ្ឌលកំណែទាំងអស់នាថ្ងៃទី26 ខែសីហា ឆ្នាំ2019 នេះក្រសួងអប់រំ បានបញ្ជាក់ថា នៅគ្រប់មណ្ឌលកំណែ មានការអនុវត្តតាមវិន័យយ៉ាងតឹងរ៉ឹងដើម្បីធានាពីសុក្រឹតភាពនៃការធ្វើកំណែ។ សមាជិកកំណែនៅតាមមណ្ឌលទាំង10 កំពុងបំពេញភារកិច្ចដោយមានការពង្រឹងវិន័យតាមម៉ោងកំណត់ ទ្វារត្រូវបិទដោយមិនអនុញ្ញាតឱ្យចូល និងចេញក្នុងម៉ោងធ្វើការនោះទេ។ សម្រាប់មន្ត្រីកំណែទាំងអស់ មិនអនុញ្ញាតឱ្យយកទូរស័ព្ទ និងឧបករណ៍អេឡិចត្រូនិកចូលឡើយ។ ហេតុនេះការកែវិញ្ញាសានៅឆ្នាំនេះធ្វើឡើងដោយរលូន និងមិនមានភាពមិនប្រក្រតីណាមួយកើតឡើងឡើយ៕

August 27, 2019

កីឡាករបាល់ទាត់ 3រូប ចំណាយធនធានផ្ទាល់ខ្លួនជាង 100លានដុល្លារ ព្រោះហួសចិត្តរឿងឆេះព្រៃអាម៉ាហ្សូន គ្មានអ្នកអើពើ

គឺជាសោកនាដកម្មដ៏ធំមួយសម្រាប់ភពផែនដី មនុស្សលោក និងសព្វសត្វទាំងឡាយ ដោយសារតែហេតុការណ៍នៃភ្លើងឆេះព្រៃអាម៉ាហ្សូននេះ ពានកើតមានរៀងរាល់ឆ្នាំ ហើយវាកាន់តែរីកធំឡើងៗពី 1ឆ្នាំទៅ 1ឆ្នាំ ចំណែកឯការកាប់ព្រៃឈើវិញ ក៏មានចំនួនច្រើនឡើងៗដូចគ្នាដែរ។

ដោយហេតុនេះហើយ ទើបកីឡាករបាល់ទាត់ល្បីៗចំនួន 3រូប រួមមាន Ronaldo, Messi និង Ozil បានបរិច្ចាគលុយផ្ទាល់ខ្លួន សម្រាប់យុទ្ធនាការពន្លត់ភ្លើងឆេះព្រៃអាម៉ាហ្សូននេះ ដោយកីឡាករទាំង 3រូបនេះ បានរួមគ្នាចំណាយថរិកាសរុប 108លានដុល្លា ដោយក្នុងនោះ Ronaldo ឧបត្ថម្ភ 44លានដុល្លា Messi ឧបត្ថម្ភ 44លានដុល្លា និង Ozil ឧបត្ថម្ភ 30លានដុល្លា៕

August 27, 2019

ផលិតផលគ្រាប់ស្វាយចន្ទីកម្ពុជា កំពុងផ្គត់ផ្គង់គ្រប់ទីផ្សារក្នុងស្រុក និងជំរុញការនាំចេញ

ដំណាំស្វាយចន្ទី ជាប្រភេទដំណាំសក្ដានុពល ដែលអាចរស់បានប្រមាណជាជាង 30ឆ្នាំ និងចាប់ផ្ដើមផ្ដល់ផលចាប់ពីអាយុបាន 3ឆ្នាំ។ ម្យ៉ាងវិញទៀត តម្រូវការលើទីផ្សារអន្តរជាតិមានការកើនឡើងយ៉ាងខ្លាំង និងទទួលទិញក្នុងតម្លៃខ្ពស់ពីប្រទេសកែច្នៃផលិតផលគ្រាប់ស្វាយចន្ទីទៀតផង ដែលនេះជាមូលហេតុសំខាន់សម្រាប់កសិករដែលមានដីមិនសូវមានជីវជាតិ ដែលទុកទំនេរចោល គឺអាចបង្វែរមកដាំដំណាំស្វាយចន្ទី សម្រាប់បង្កើនចំណូលក្នុងគ្រួសារបាន។

ស្វាយចន្ទី គឺជាប្រភេទដំណាំងាយស្រួលដាំ និងថែទាំ ឆ្នាំនេះស្វាយចន្ទីហាក់បានថ្លៃឡើងវិញបន្តិច ធ្វើឱ្យប្រជាកសិករពេញចិត្តចំពោះតម្លៃទីផ្សារនេះ ក៏ប៉ុន្តែ កសិករដែលនិយមដាំដំណាំប្រភេទនេះភាគច្រើនក្នុងខេត្តកំពង់ចាម ដោយដាំមិនទាន់បានទទួលទិន្នផលខ្ពស់ ស្របតាមតម្រូវការនាំចេញទៅក្រៅប្រទេសនៅឡើយ។

លោក ឆេង ថុង ប្រធានសហគមន៍កសិកម្មសំបូរមានជ័យ ស្រុកស្ទឹងត្រង់ ខេត្តកំពង់ចាម បាន ប្រាប់ ឡារ៉ែន ពាណិជ្ជ ឱ្យដឹងថា៖ “សហគមន៍ក៏មានដាំដើមស្វាយចន្ទីច្រើនហិកតាដែរសម្រាប់ឈ្មួញនាំចេញ និងសម្រាប់លក់ក្នុងស្រុក។ ដោយតម្លៃទីផ្សារគ្រាប់ស្វាយចន្ទីនៅដើមរដូវឆ្នាំនេះ បានឡើងថ្លៃជាងពីពេលមុនៗបន្តិច សម្រាប់សហគមន៍ខ្ញុំ យើងបានផ្គត់ផ្គង់គ្រាប់ស្វាយចន្ទីក្នុងទីផ្សារបានច្រើនគួរសមដែរ។ សព្វថ្ងៃ សហគមន៍យើងមានផ្ទៃដីប្រមាណ 270ហិកតា ដែលក្នុងចំនួននេះយើងប្រមូលផលបានប្រមាណ 70%នៃផ្ទៃដីដាំដុះទាំងអស់”។

លោកបានឱ្យដឹងផងដែរថា៖ “នៅខេត្តកំពង់ចាម យើងខ្ញុំសង្កេតឃើញថា ដំណាំស្វាយចន្ទីដែលប្រជាពលរដ្ឋយើងដាំ មានពូជ 2ប្រភេទ គឺពូជគ្រាប់ក្នុងស្រុកធម្មតា និងពូជតត្រួយ ហៅថា M23។ ពូជថ្មីM23 នេះ គេនាំចូលមកពីប្រទេសម៉ាឡេស៊ី។ ពូជM23នេះ មានគ្រាប់ធំៗណាស់”។ លោកបន្ថែមថា លោកបានកត់សម្គាល់ឃើញថា ចន្ទីពូជ M23នេះ គ្រាប់វាស្ងួតៗតែ 120គ្រាប់ប៉ុណ្ណោះ គឺមានទម្ងន់ 1Kgទៅហើយ ឯចន្ទីពូជធម្មតាក្នុងស្រុកវិញ គឺប្រហែលជា 200គ្រាប់ឯណោះ ទើបបានទម្ងន់ 1Kg”។

បើតាមប្រសាសន៍របស់លោក ឆេង ថុង បានឱ្យដឹងថា៖ “នៅលើផ្ទៃដីដែលសហគមន៍ខ្ញុំបានដាំដុះសព្វថ្ងៃនេះ ខ្ញុំអាចប្រមូលផលស្វាយចន្ទីបានប្រមាណ283.5តោន ឬក្នុងដីដាំដុះ 270ហិកតានេះ យើងទទួលបានចំណូលសរុបប្រមាណជា 1,415,000,000រៀល(1,415ប៊ីលានរៀល)សម្រាប់ការប្រមូលផល 1ឆ្នាំ។ បើគិតជាមធ្យមក្នុង 1ហិកតា យើងទទួលបានផលប្រមាណជា 1.5តោន”។

ដោយឡែកតម្លៃនៅលើទីផ្សារ លោកថុង បានប្រាប់ កាសែតឡារ៉ែន ពាណិជ្ជ ថា៖“គ្រាប់ស្វាយចន្ទី នៅមានតម្លៃខ្ពស់ តែក៏មានការឡើងចុះខ្លាំងដែរ ដោយសារតែមានការប្រកួតប្រជែងច្រើន យើងអាចលក់បានតែក្នុងតម្លៃជាង 5,000រៀលប៉ុណ្នោះក្នុង 1គីឡូក្រាម។ បច្ចុប្បន្នស្វាយចន្ទីរបស់សហគមន៍ត្រូវបានផ្គត់ផ្គង់ក្នុងទីផ្សារក្នុងស្រុក និងលក់ទៅឱ្យឈ្មួញក្នុងស្រុក និងឈ្មួញវៀតណាម ដោយសារសហគមន៍មិនទាន់រកបានដៃគូក្នុងការបោះដុំនៅឡើយ”។

បញ្ហាតម្លៃគ្រាប់ស្វាយចន្ទីកាលពីដើមឆ្នាំនេះ បានងើបតម្លៃឡើងបានបន្តិច តែបើបៀបនឹងឆ្នាំមុនគឺសម្រាប់តម្លៃនៅក្នុងខែកុម្ភៈកន្លងមក គឺ1Kgគ្រាប់ស្វាយចន្ទីទើបបេះហើយថ្មីៗ តម្លៃ 5,800រៀល ហើយគ្រាប់ដែលហាលថ្ងៃស្ងួតហើយតម្លៃ 6,800រៀល។ តម្លៃនេះបើប្រៀបធៀបទៅកាលពីឆ្នាំមុន ក្នុងការប្រមូលផលលើកដំបូងដូចគ្នា គឺខុសគ្នាពី 3,000-4,000រៀល។

ម្យ៉ាងវិញទៀតនៅកម្ពុជា ដោយសារខ្វះបច្ចេកទេសដើម្បីបកយកគ្រាប់ស្វាយចន្ទី និងរោងចក្រសម្រាប់កែច្នៃរបស់យើងនៅមានកម្រិត ទើបធ្វើឱ្យយើងមិនអាចស្រូបយកទិន្នផលស្វាយចន្ទីទាំងអស់នោះបាន។ ទន្ទឹមនឹងកម្ពុជាខ្វះរោងចក្រកែច្នៃ និងខ្វះបច្ចេកទេសនេះ ប្រទេសវៀតណាមគឺជាអ្នកដែលមានតម្រូវការខ្ពស់ បានបំពេញកិច្ចសន្យាបញ្ជាទិញជាមួយអន្តរជាតិដែលបានចូលមកទិញ ដើម្បីកែច្នៃនាំចេញទៅទីផ្សារអន្តរជាតិ។ នេះបើតាមការបញ្ជាក់របស់លោក ឆេង ថុង។

លោកឧកញ៉ា លឹម ហេង អនុប្រធានសភាពាណិជ្ជកម្មបានប្រាប់ឡារ៉ែន ពាណិជ្ជ ថា៖“គ្រាប់ស្វាយចន្ទីយើងបច្ចុប្បន្ននេះ ផលិតបានច្រើន ដោយសារតែកន្លងមក មិនត្រឹមតែទីផ្សារអាមេរិក អឺរ៉ុប ឬប្រទេសចិនទេ ដែលទិញពីយើង ពិសេសគឺប្រទេសវៀតណាមតែម្តង ជាទីផ្សារមួយធំសម្រាប់កសិករកម្ពុជា ព្រោះពីដើមវៀតណាមគាត់ច្រើនទិញគ្រាប់ស្វាយចន្ទីពីឥណ្ឌា និងពីប្រេស៊ីល តែវាមានតម្លៃខ្ពស់ ទើបគាត់សហការជាមួយកម្ពុជា ឱ្យយើងដាំឱ្យគាត់”។

លោកឧកញ៉ាបញ្ជាក់ថា៖“ស្វាយចន្ទីដែលមិនទាន់បកសម្បក គឺនាំចេញទៅប្រទេសវៀតណាម ហើយក៏មានក្រុមហ៊ុនចិន និងក្រុមហ៊ុនខ្មែរយើងក្នុងស្រុកបានបង្កើតរោងចក្រដើម្បីកែច្នៃទៅជាផលិតផលសម្រេចដែលយើងអាចបរិភោគបាន និងនាំចេញទៅប្រទេសកូរ៉េ និងចិន ដែលគាត់ចាប់អារម្មណ៍ខ្លាំង ឱ្យតែមានប៉ុន្មាន គឺគាត់ទទួលយកទាំងអស់ដែរ”។

លោកឧកញ៉ាបានបញ្ជាក់ទៀតថា បច្ចុប្បន្នយើងមិនពិបាករកទីផ្សារទេ តែកាលពីប៉ុន្មានឆ្នាំមុន គឺ4-5ឆ្នាំជាប់គ្នា តម្លៃមានការធ្លាក់ចុះខ្លាំង ងើបមិនរួចទេធ្វើឱ្យពិបាកចំណេញ ហើយថ្លៃកម្មករជំនាញក៏ថ្លៃទៀត។ លោកឧកញ៉ាបានថ្លែងថា “ខ្ញុំមើលឃើញថា ទាំងវិស័យឯកជន និងរដ្ឋាភិបាលបានខំជំរុញឱ្យមានការដាំស្វាយចន្ទីឱ្យបានច្រើន ព្រោះទីផ្សារក៏ល្អ តម្លៃក៏បានខ្ពស់ ហើយយើងមិនចាំបាច់កម្មករជំនាញទេ និងត្រូវការកម្មករតិច ហើយការចំណាយដើមទុនដាំស្វាយចន្ទី ក៏មិនច្រើនដូចការដាំកៅស៊ូ ហើយដំណាំស្វាយចន្ទីនេះ ក៏វាងាយស្រួលក្នុងការថែទាំដែរ”។

យោងតាមតួលេខរបស់ក្រសួងកសិកម្ម ចម្ការស្វាយចន្ទី ក្នុងឆ្នាំ2019 ទាំងកំពុងប្រមូលផល និងទើបបានដាំដុះ មានចំនួនសរុប 24,364ហិកតា។ ក្នុងនោះស្រុកដែលមានដំណាំស្វាយចន្ទីច្រើនជាងគេ គឺស្រុកស្ទឹងត្រង់ ស្រុកចំការលើ ស្រុកជើងព្រៃ ស្រុកកំពង់សៀម និងស្រុកបាធាយ។ ដោយឡែកការនាំចេញគ្រាប់ស្វាយចន្ទីទៅក្រៅប្រទេសក្នុងអំឡុងឆមាសទី1 ឆ្នាំ2019នេះ មានចំនួន 167,285.26 តោន ដោយប្រទេសដែលនាំចូល រួមមានប្រទេសវៀតណាម រុស្ស៊ី កូរ៉េ ចិន ប៉េរូ អារ៉ាប៊ីសាអូ៊ឌីត និងមីយ៉ាន់ម៉ា។

លោក ឆេង ថុង បានប្រាប់ ឡារ៉ែន ពាណិជ្ជឱ្យដឹងថា៖ “សហគមន៍របស់ខ្ញុំបាននិងកំពុងគិត និងសិក្សាថា នឹងពង្រីកការងារនេះនាពេលខាងមុខទៀត ដោយចង់រៀបចំជាសិប្បកម្មកែច្នៃ ដោយប្រមូលទិញគ្រាប់ស្វាយចន្ទីបន្ថែមពីសហគមន៍ដទៃទៀតមកធ្វើជាផលិតផលសម្រេច(បក លីង វេចខ្ចប់)សម្រាប់ផ្គត់ផ្គង់ទីផ្សារក្នុងស្រុកដែលកំពុងមានតម្រូវការច្រើន និងនាំចេញទៅប្រទេសកូរ៉េ។ ការគ្រោងទុកនេះ សហគមន៍ខ្ញុំនឹងធ្វើនៅឆ្នាំ2020 ខាងមុខនេះ”៕

August 27, 2019

សត្វទន្សាយ នឹងតំណាងឱ្យស៊ីហ្គេម2023 នៅកម្ពុជា

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ SEA Games លើកទី32 ឆ្នាំ2023 ”CAMSOC” បានប្រកាសជាផ្លូវការជ្រើសរើសយក «សុភាទន្សាយ» ដែលតំណាងឱ្យភាពវាងវៃឆ្លាត ត្រឹមត្រូវ យុត្តិធម៌ ជាពិសេសនៅក្នុងរឿងព្រេងខ្មែរ។ សុភាទន្សាយ នឹងត្រូវបានជ្រើសរើសជាតុក្កតានិមិត្តរូប (Mascot» ប្រចាំព្រឹត្តិការណ៍កីឡាស៊ីហ្គេម (SEA Games) ឆ្នាំ2023 នៅពេលដែលកម្ពុជាត្រូវធ្វើជាម្ចាស់ផ្ទះជាលើកដំបូងរបស់ខ្លួន។

ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាទទួលបន្ទុកនាយបេសកកម្មស៊ីហ្គេមបានបញ្ជាក់ប្រាប់ពីមូលហេតុដែល CAMSOC សម្រេចយករូបសត្វទន្សាយធ្វើជានិមិត្តរូប ”Mascot” SEA Games 2023 នោះ គឺគោរពតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីដែលមានប្រសាសន៍ថា ធ្វើយ៉ាងណាឱ្យស៊ីហ្គេម2023 នេះមានយុត្តិធម៌ និងមានកិត្តិយសថ្លៃថ្នូរ។ សត្វទន្សាយនៅក្នុងអក្សរសិល្បិ៍ខ្មែរ និងក្នុងរឿងនិទានខ្មែរ គឺជាសត្វមួយដែលតំណាងក្នុងតួអង្គយុត្តិធម៌ និងជាតំណាងឲ្យសភាវល្អ។

គួរបញ្ជាក់ផងដែរថា កម្ពុជាកំពុងតែត្រៀមខ្លួនយ៉ាងល្អក្នុងការធ្វើជាម្ចាស់ផ្ទះស៊ីហ្គេមឆ្នាំ2023 ដោយបានអភិវឌ្ឍហេដ្ឋារចនាសម្ព័ន្ធ និងគុណភាពកីឡាបានយ៉ាងល្អ ដោយបានប្តេជ្ញាចិត្តថា ធ្វើយ៉ាងណាឱ្យស៊ីហ្គេម2023 នេះ មានយុត្តិធម៌ និងមានកិត្តិយសថ្លៃថ្នូរ៕

August 27, 2019

ដាំកូនឈើ ដើម្បីអនាគតមនុស្សជំនាន់ក្រោយរបស់យើង

បម្រែបម្រួលអាកាសធាតុ គឺជាបញ្ហាប្រឈមមួយដែលត្រូវបានយកចិត្តទុកដាក់ខ្ពស់ ទាំងក្នុងប្រទេសកម្ពុជា ក៏ដូចជាសាកលលោកទាំងមូលនាអំឡុងពេលប៉ុន្មានឆ្នាំចុងក្រោយនេះ។ ជាការពិតណាស់ ព្រៃឈើ គឺជាចលករទប់ស្កាត់បញ្ហាបម្រែបម្រួលអាកាសធាតុ និងថែរក្សាភពផែនដីបានយ៉ាងល្អប្រសើរ ព្រមទាំងផ្តល់នូវភាពស្រស់បំព្រងដល់ជីវិតក្នុងលោកយើងទាំងអស់ផងដែរ។ ហេតុនេះហើយទើបធនាគារ ស៊ីអាយអិមប៊ី ភីអិលស៊ី (ធនាគារ CIMB) បានសម្រេចរួមចំណែកដល់កម្មវិធីដាំកូនឈើ នៅវិទ្យាល័យ ឧដុង្គ ដោយមានការចូលរួមពីគណៈគ្រប់គ្រង រួមមានប្រធាននាយកប្រតិបត្តិ និងបុគ្គលិកធនាគារទាំងមូល កាលពីថ្ងៃទី20 ខែកក្កដា ឆ្នាំ2019 កន្លងទៅនេះ។

ថ្លែងក្នុងឱកាសដាំកូនឈើនេះ លោកប៊ុន យីនប្រធាននាយកប្រតិបត្តិរបស់ធនាគារ CIMB បានមានប្រសាសន៍ថា៖ “កម្មវិធីនៃការទទួលខុសត្រូវចំពោះសង្គម របស់ធនាគារ CIMB រួមមានសកម្មភាពចូលរួមចំណែកការកសាងជាមួយមូលដ្ឋាននូវវិស័យនានា ដូចជាការសិក្សាអប់រំ សុខុមាលភាព សង្គមកិច្ច និងបរិស្ថាន ហើយថ្ងៃនេះ ធនាគារយើងខ្ញុំបានចូលរួមការងារបរិស្ថានដោយការដាំកូនឈើ។ យើងខ្ញុំជ្រើសយកវិទ្យាល័យ ឧដុង្គ សម្រាប់សកម្មភាពដាំកូនឈើនេះ ដោយយើងចង់បានកូនឈើទាំងនេះនឹងបានការបីបាច់ថែរក្សាពីលោកគ្រូ អ្នកគ្រូ និងសិស្សានុសិស្សទាំងឡាយ ដើម្បីធានាឱ្យដើមឈើទាំងនេះនឹងគង់វង្សស្ថិតស្ថេរចីរកាល”។

ស្ថិតក្នុងទឹកមុខរីករាយស្រស់ស្រាយ លោកឡៃ គួង នាយកវិទ្យាល័យ ឧដុង្គ បានមានប្រសាសន៍ថា៖ “សកម្មភាពសប្បុរធម៌របស់ធនាគារ CIMB នាពេលនេះ ពិតជាបានរួមចំណែកដល់ការអភិវឌ្ឍសាលាមួយកម្រិតទៀត។ ដោយសារសាលារបស់ខ្ញុំផ្តោតលើការថែរក្សាបរិស្ថាន ដូច្នេះសកម្មភាពដាំកូនឈើរបស់ធនាគារ CIMB បានជួយឱ្យសាលារបស់យើងកាន់តែមានភាពស្រស់បំព្រងបន្ថែមទៀត និងជំរុញឱ្យសិស្សានុសិស្សរបស់យើងបានស្គាល់ និងយល់ដឹងពីដើមឈើប្រណីតដែលបានដាំនាថ្ងៃនេះ។ ហើយការបរិច្ចាគសម្ភារកសិកម្មទៀតសោតក៏បានផ្តល់នូវមធ្យោបាយកាន់តែប្រសើរ ឱ្យពួកយើងអាចប្រើប្រាស់ ដែលជាប្រយោជន៍នៅក្នុងវិទ្យាល័យ ឧដុង្គទាំងមូល។ តាងនាមឱ្យលោកគ្រូ-អ្នកគ្រូ និងសិស្សានុសិស្សទាំងអស់ ខ្ញុំសូមថ្លែងអំណរគុណដល់គណៈគ្រប់គ្រង និងបុគ្គលិករបស់ធនាគារ CIMB ដែលបានដំណើរមកដោយផ្ទាល់ និងឧបត្ថម្ភ ដល់សាលាយើងខ្ញុំ”។

សូមបញ្ជាក់ផងដែរថា ធនាគារ CIMB បានចាប់ផ្តើមប្រតិបត្តិការអាជីវកម្មរបស់ខ្លួនក្នុងប្រទេសកម្ពុជានៅចុងឆ្នាំ2010 ហើយបច្ចុប្បន្នធនាគារមានសាខាចំនួន13 តាមបណ្តារាជធានី និងខេត្តសំខាន់ៗនៅក្នុងប្រទេស៕

August 27, 2019

Kubo ត្រូវ Real ដាក់ឱ្យក្លិប Mallorca ខ្ចីជើង ដើម្បីឱ្យបានលេងយកបទពិសោធនៅ La Liga

កាលពីដើមរដូវកាលកន្លងទៅ Real Madrid បានចុះកុងត្រាទិញយកខ្សែប្រយុទ្ធយុវជនជប៉ុនវ័យ 18ឆ្នាំម្នាក់ក្នុងខែមិថុនាពីក្លិប FC Tokyo ដោយមានគោលបំណងចង់ឱ្យគេលេងក្នុងឈុតក្រុមបម្រុង។

តែនាពេលថ្មីៗនេះ ក្លិបដែលទើបឡើងមកដល់លីកកំពូលអេស្ប៉ាញ La Liga មួយនេះបានចរចាសុំខ្ចីជើងកីឡាករខ្សែប្រយុទ្ធជម្រើសជាតិជប៉ុនរូបនោះ ដោយសារតែមានតម្លៃសមរម្យ ហើយគុណភាពក៏ល្អស្ទើរតែស្មើនឹងខ្សែប្រយុទ្ធខ្លាំងៗនៅអេស្ប៉ាញទៅហើយ។

កីឡាករខ្សែប្រយុទ្ធវ័យ 18ឆ្នាំរបស់ជប៉ុនរូបនោះគឺ Takefusa Kubo អាចនឹងមានសង្ឃឹមច្រើនក្នុងការបានបង្ហាញខ្លួននៅលីកកំពូលអេស្ប៉ាញ La Liga ក្រោយពេលដែលក្លិប Mallorca ខ្ចីជើងទៅក្នុងរដូវកាលថ្មីនេះ។

August 27, 2019

Category: សង្គម និងសេដ្ឋកិច្ច