រដ្ឋមន្ត្រីក្រសួងទេសចរណ៍បានជំរុញឱ្យបង្កើតផលិតផលទេសចរណ៍ថ្មីៗ និងការពង្រីកតំបន់ទេសចរណ៍ដែលមានស្រាប់នៅក្នុងខេត្តសៀមរាប ដើម្បីទាក់ទាញភ្ញៀវទេសចរមកពីប្រទេសចិន និងកូរ៉េខាងត្បូង ដែលការលើកឡើងនេះត្រូវបានធ្វើឡើងបន្ទាប់ពីមានការធ្លាក់ចុះចំនួន 20% នៃចំនួនភ្ញៀវទេសចរជនជាតិកូរ៉េ ដែលធ្វើដំណើរមកខេត្តសៀមរាបក្នុងឆមាសទី1 នៃឆ្នាំនេះ។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានចង្អុលបង្ហាញថា ចំនួនភ្ញៀវទេសចរមកពីប្រទេសកូរ៉េខាងត្បូងទៅកាន់ខេត្តសៀមរាបកំពុងថយចុះ ហើយ ឯកឧត្តមបានអំពាវនាវឱ្យអ្នកនៅក្នុងឧស្សាហកម្មទេសចរណ៍ទាំងអស់ធ្វើការរួមគ្នាបង្កើតផលិតផលទេសចរណ៍ថ្មីៗបន្ថែមទៀតដើម្បីទាក់ទាញភ្ញៀវទេសចរចិន និងកូរ៉េ និងធ្វើយ៉ាងណាឱ្យពួកគេស្នាក់នៅបានយូរជាងនេះ។
ឯកឧត្តម ថោង ខុន បានមានប្រសាសន៍ថា យើងត្រូវបង្កើតផលិតផលទេសចរណ៍ថ្មី។ រដ្ឋាភិបាលកំពុងសិក្សាផែនការមេទេសចរណ៍សម្រាប់ខេត្តសៀមរាប យើងបានកំណត់អត្តសញ្ញាណផលិតផលទេសចរណ៍ថ្មីៗ ជាពិសេសនៅលើភ្នំគូលែន តំបន់ទន្លេសាប និងនៅជុំវិញប្រាសាទអង្គរ។
ឯកឧត្តម បានមានប្រសាសន៍ថា៖“ឥឡូវនេះក្រសួងកំពុងជំរុញអាជ្ញាធរខេត្តសៀមរាបឱ្យតុបតែងផ្លូវ និងបង្កើតហាងលក់វត្ថុអនុស្សាវរីយ៍ ដែលបម្រើភ្ញៀវទេសចរចិន និងកូរ៉េ”។ លោកក៏បានស្នើឱ្យអាជីវករចៀសវាងការលក់ផលិតផលក្លែងក្លាយឱ្យទៅភ្ញៀវទេសចរនៅពេលដែលពួកគេមកទស្សនាប្រទេសយើងនាពេលបច្ចុប្បន្ន។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានមានប្រសាសន៍ថា៖“ការអត្ថាធិប្បាយរបស់លោករដ្ឋមន្ត្រី គឺចំពេលហើយ។ យើងក៏លើកទឹកចិត្តផងដែរដល់ការបង្កើតផលិតផលទេសចរណ៍ថ្មីៗនៅក្នុងគោលដៅទេស-ចរណ៍សំខាន់ៗ ដូចជាខេត្តសៀមរាបនេះ”។
លោកជំទាវ បានបន្ថែមថា៖“យើងចង់ឱ្យអ្នកទេសចរ ស្នាក់នៅបានយូរ ហើយមធ្យោបាយល្អបំផុតដើម្បីទទួលបានជោគជ័យ គឺតាមរយៈផលិតផល និងទិសដៅទេសចរណ៍ថ្មី។ ភ្ញៀវទេសចរ អាចទស្សនាប្រាសាទបុរាណនៅពេលថ្ងៃ ហើយបន្ទាប់មកពួកគេអាចរីករាយជាមួយកន្លែងទេសចរណ៍ដទៃទៀត ដូចជាគ្រឹះស្ថានទេសចរណ៍ធម្មជាតិ និងនៅពេលយប់ ពួកគេអាចទស្សនាផ្សាររាត្រី ឬកន្លែងថ្មីៗផ្សេងទៀត”។
ក្នុងឆមាសទី1 នៃឆ្នាំនេះ ប្រទេសកម្ពុជាបានស្វាគមន៍អ្នកធ្វើវិស្សមកាលចំនួន 3.3លាននាក់ កើនឡើង 11% បើប្រៀបធៀបនឹងរយៈពេលដូចគ្នាកាលពីឆ្នាំមុន។ ទេសចរចិនបានបន្តឈរនៅលើលំដាប់ទី1 នៃទីផ្សារទេសចរណ៍នៅកម្ពុជា។ ប្រជា-ជនចិនចំនួន 1.2លាននាក់បានមកធ្វើទស្សនកិច្ចប្រទេសកម្ពុជាចាប់ពីខែមករា ដល់ខែមិថុនា។ កាលពីឆ្នាំមុនមានជនបរទេសចំនួន 6.2លាននាក់បានមកទស្សនាប្រទេសកម្ពុជា គឺកើនឡើង 10.7%ពីមួយឆ្នាំទៅមួយឆ្នាំ។
ជាមួយនឹងការឆ្លើយតប និងមានវិធានការដើម្បីលើកកម្ពស់វិស័យទេសចរណ៍ឱ្យមានភាពល្អប្រសើរឡើងវិញ ខណៈដែលតួលេខបានបង្ហាញពីឱនភាពនៃចំនួនទេសចរនៅតំបន់អង្គរនៅដើមឆ្នាំ 2019នេះ ក្រសួងទេសចរណ៍បានជំរុញ និងបង្កើនផលិតផលទេសចរណ៍ថ្មីៗទៀត ដោយបានសហការជាមួយប្រទេសជប៉ុនផងដែរ។
ដើម្បីបង្កើនភាពទាក់ទាញជាមួយនឹងការដាក់វិធានការថ្មីៗលើវិស័យទេសចរណ៍នៅកម្ពុជា រដ្ឋមន្ត្រីក្រសួងទេសចរណ៍ ឯកឧត្តម ថោង ខុន បានស្នើដល់ភាគីជប៉ុនជួយអភិវឌ្ឍវិស័យមួយនេះបន្ថែមទៀត ពិសេសតាមរយៈការវិនិយោគលើការបង្កើតផលិតផលទេសចរណ៍ថ្មីៗ លើការបង្កើតតំបន់ទេសចរណ៍សម្រាប់ទេសចរចូលនិវត្តន៍ ក៏ដូចជាការជួយកសាងផ្លូវមួយចំនួនចូលទៅកាន់សហគមន៍ទេសចរណ៍សំខាន់។
ក្នុងឱកាសជួបពិភាក្សាការងារជាមួយលោក លោក Hidehisa HORINOUCHI ឯកអគ្គរាជ ទូតជប៉ុន ឯកឧត្តម ថោង ខុនរដ្ឋមន្ត្រីក្រសួងទេសចរណ៍បានលើកឡើងពីការរីកចម្រើនមួយចំនួនលើវិស័យទេសចរណ៍ ក្រោមកិច្ចសហប្រតិបត្តិការល្អជាមួយស្ថានទូតជប៉ុនប្រចាំកម្ពុជា ក៏ដូចជាជាមួយរដ្ឋាភិបាល និងប្រជាជនជប៉ុនដែរ។ ក្នុងនោះ កាលពីឆ្នាំ2018 ក្នុងចំណោម 6គម្រោងវិនិយោគរបស់ជប៉ុនគឺមាន 2គម្រោង បានវិនិយោគលើវិស័យទេសចរណ៍ ដែលមានទុនវិនិយោគដល់ជាង 800 លានដុល្លារអាមេរិក។
នៅឆ្នាំ2018 ទេសចរជប៉ុនមកកាន់កម្ពុជាមានចំនួនជាង 21ម៉ឺននាក់ ក្នុងកំណើនជាង 3.5% ហើយក្នុងរយៈពេល 6ខែ ដើមឆ្នាំ2019 កម្ពុជាទទួលបានទេសចរជប៉ុនជាង 10ម៉ឺននាក់ ក្នុងកំណើន 3%។ ព្រមជាមួយនោះកាលឆ្នាំ2018 កន្លងមក ក៏មានទេសចរកម្ពុជាជាង 22,000នាក់ បានទៅទស្សនាប្រទេសជប៉ុនផងដែរ។ បច្ចប្បន្ននៅភ្នំពេញ មានសណ្ឋាគារដែលវិនិយោគដោយជនជាតិជប៉ុនចំនួន9 ដែលមានសរុបជិត 1,000បន្ទប់ មានភោជនីយ-ដ្ឋានចំនួន 56 ដែលមានជាង 3,300កៅអីផងដែរ។
ដោយឡែកនៅក្នុងសន្និសីទអន្ដរជាតិលើកទី1 ក្រោមប្រធានបទ“លើកកម្ពស់គុណតម្លៃប្រពៃណី និងបេតិកភណ្ឌ ដើម្បីការអភិវឌ្ឍទេសចរណ៍ ប្រកបដោយចីរភាព” បានបង្ហាញថា ក្នុងចំណោមចំនួនទេសចរសរុប ដែលចេញទស្សនានៅជុំវិញពិភពលោក មាន 40%ជាប្រភេទទេសចរណ៍វប្បធម៌ និងម្ហូបអាហារ មានន័យថា ម្ហូបអាហារក៏ជាកត្តាដ៏សំខាន់ផងដែរក្នុងការសម្រេចចិត្តជ្រើសរើសគោលដៅទស្សនារបស់ភ្ញៀវទេសចរ។
លោក Xu Jing នាយក UNWTO ប្រចាំតំបន់អាស៊ីប៉ាស៊ីហ្វិក បានលើកឡើងពីតួនាទីរបស់ ផ្នែកអាហារវិទ្យា ក្នុងការជំរុញវិស័យទេសចរណ៍នៅជុំវិញពិភពលោក ទន្ទឹមនឹងនេះលោកក៏បានកត់សម្គាល់ពីសារៈសំខាន់របស់ទេសចរណ៍ក្នុងការពង្រឹងកំណើនសេដ្ឋកិច្ចផងដែរ។ លោកបានលើកទឹកចិត្តឱ្យកម្ពុជាបង្កើតផលិតផលទេសចរណ៍ថ្មីៗឱ្យបានច្រើន ដើម្បីរួមចំណែកជំរុញចរន្តលំហូរទេសចរពិភពលោកឱ្យកាន់តែសកម្ម ឧទាហរណ៍ទេសចរណ៍ម្ហូបអាហារដែលកំពុងធ្វើសន្និសីទនៅពេលនេះ ក៏ជាផលិតផលទេសចរណ៍ដ៏ចាំបាច់មួយ ក្នុងការទាក់ទាញភ្ញៀវទេសចរជាតិ-អន្តរជាតិផងដែរ”។
លោក XU បានមានប្រសាសន៍ថា៖“ វិស័យទេសចរណ៍ គឺជាកត្តាជំរុញដ៏សំខាន់នៃកំណើនសេដ្ឋកិច្ចដែលជួយក្នុងការប្រយុទ្ធប្រឆាំងនឹងភាពក្រីក្រ។ ការបង្កើតការផ្តល់ជូនអាហារតាមបែបបទពិសោធដោយផ្អែកលើទំនៀមទម្លាប់ម្ហូបអាហារក្នុងស្រុក និងការបញ្ចូលពួកវាទៅក្នុងទេសភាពទេសចរណ៍ជាតិក៏ជំរុញការអភិវឌ្ឍសេដ្ឋកិច្ចដែរ។
លោក Gavin Bell ប្រធានក្រុមកម្មវិធីពង្រឹងសមត្ថភាពទេសចរណ៍ក្នុងប្រទេសកម្ពុជា បានមានប្រសាសន៍ថា ទេសចរណ៍ស្បៀង គឺជាឧស្សាហកម្មដែលកំពុងរីកចម្រើននៅជុំវិញពិភពលោក។ ពិភពលោកកំពុងបើកចំហកាន់តែខ្លាំងឡើង ហើយបានក្លាយជាសកលភាវូបនីយកម្ម។ អ្នកទេសចរស្វែងរកបទពិសោធ ដោយផ្អែកលើអត្តសញ្ញាណ និងវប្បធម៌ក្នុងតំបន់។ វាជាផ្នែកមួយដែលមាន ភាពស្វាហាប់បំផុតនៅក្នុងទីផ្សារទេសចរណ៍។
លោកបានកត់សម្គាល់ថា ការស្ទង់មតិថ្មីៗនេះ ក្រុមហ៊ុនផ្សងព្រេងទេសចរណ៍ត្រេឌីង បានរកឃើញថា ថវិកាប្រមាណ 25% នៃថវិការបស់ភ្ញៀវទេសចរត្រូវបានចំណាយទៅលើម្ហូបអាហារ។ ការស្ទង់មតិដដែលរកឃើញថា 81%នៃភ្ញៀវទេសចរបានរៀនយល់ដឹងអំពីប្រពៃណីធ្វើម្ហូបក្នុងស្រុក នៅពេលពួកគេទៅលេងគោលដៅ ខណៈ 81%នៃភ្ញៀវទេសចរទាំងអស់ជឿថា ម្ហូបអាហារ និងភេសជ្ជៈបានជួយក្នុងការស្វែងយល់អំពីវប្បធម៌ក្នុងតំបន់៕
