សង្គម និងសេដ្ឋកិច្ច - La Reine Media

បច្ចេកវិទ្យាឌីជីថលវិស័យទេសចរណ៍ ក៏ជាកត្តាសំខាន់ក្នុងការជំរុញកំណើនភ្ញៀវទេសចរឆ្នាំ2020

មន្ត្រីក្រសួងទេសចរណ៍បានចាត់ទុកថា ការប្រើប្រាស់ប្រព័ន្ធបច្ចេកវិទ្យាឌីជីថលបាននិងកំពុងរួមចំណែកក្នុងវិស័យទេសចរណ៍យ៉ាងខ្លាំងក្នុងការជំរុញកំណើនភ្ញៀវទេសចរ ប៉ុន្តែវាទាមទារជាចាំបាច់នូវការបណ្ដុះបណ្ដាលបំប៉នសមត្ថភាពបន្ថែមដល់មន្ត្រី និងអ្នកពាក់ព័ន្ធក្នុងវិស័យទេសចរណ៍។ នេះបើតាមប្រសាសន៍របស់ឯកឧត្ដមរដ្ឋលេខាធិការក្រសួងទេសចរណ៍។

ឯកឧត្តម ហោ មុនីរ័ត្ន រដ្ឋលេខាធិការក្រសួងទេសចរណ៍ បានថ្លែងយ៉ាងដូច្នេះនៅក្នុងពិធីបិទវគ្គបណ្តុះបណ្តាលស្តីពី “ការអភិវឌ្ឍ និងការគ្រប់គ្រងឧស្សាហកម្មទេសចរណ៍កម្ពុជា ឆ្ពោះទៅឧស្សាហកម្ម 4.0” ដែលបានប្រព្រឹត្តទៅរយៈពេល 10ថ្ងៃដោយមានប្រធានបទសំខាន់ៗមួយចំនួន ដូចជា៖ 1- ការស្វែងយល់អំពីការប្រើប្រាស់បច្ចេកវិទ្យាឌីជីថលក្នុងការបង្កើតអាជីវកម្ម Online,ECommerce។ 2- របៀបនៃការសិក្សា និងវិភាគទីផ្សារ ជំរុញការ-ផ្សព្វផ្សាយផលិតផល និងពង្រឹងគុណភាពសេវាកម្មទេសចរណ៍ដោយប្រើបច្ចេកវិទ្យាឌីជីថល។ 3- ការកែទម្រង់នៃការធ្វើធុរកិច្ចពី Offline to Online ដែលកំពុងមាននិន្នាការកើនឡើង ដូចករណីOnline Travel Agent (OTA)។ 4- ការប្រើប្រាស់បច្ចេកវិទ្យាក្នុងការគ្រប់គ្រងគោលដៅទេសចរណ៍ដោយប្រើបច្ចេកវិទ្យា Internet of Things,V Rand AR, GPS Technology។ 5- ការស្វែងយល់ពីអនាគតនៃវិស័យទេសចរណ៍ តាមរយៈការវិវឌ្ឍនៃឧស្សាហកម្ម 4.0 ជាដើម។

ឯកឧត្តម រដ្ឋលេខាធិការបានឱ្យដឹងថា ទាំងអស់នេះសុទ្ធតែជាបច្ចេកវិទ្យាថ្មីៗ ដែលពិភពលោកកំពុងប្រើប្រាស់នាពេលបច្ចុប្បន្ន និងទៅអនាគត ហើយបានក្លាយទៅជាកត្តាចម្បង ចូលរួមក្នុងការអភិវឌ្ឍឧស្សាហកម្មទេសចរណ៍ ប្រកបដោយការប្រកួតប្រជែងខ្ពស់។ ការបណ្ដុះបណ្ដាលធនធានមនុស្សជាភារកិច្ចចម្បង ដែលមិនអាចមើលរំលងបាន ក្នុងការឆ្លើយតបនឹងកំណើន 2ខ្ទង់ នៃទេសចរអន្តរជាតិដែលមកកម្ពុជាជារៀងរាល់ឆ្នាំ។

មន្ត្រីជាន់ខ្ពស់ក្រសួងទេសចរណ៍រូបនេះក៏បានបញ្ជាក់ដែរថា នៅឆ្នាំ2020 កម្ពុជានឹងទទួលបានភ្ញៀវទេសចរជាង 7លាននាក់ ដែលនឹងនាំមកនូវចំណូលប្រមាណ 5ប៊ីលានដុល្លារ បង្កើតឱកាសការងារបានប្រមាណជិត 1លាននាក់ និងនៅឆ្នាំ2030 អាចនឹងទទួលបានទេសចរអន្តរជាតិប្រមាណ 15លាននាក់ហើយនឹងនាំមកនូវចំណូលប្រមាណ 10ប៊ីលានដុល្លារបង្កើតឱកាសការងារប្រមាណជិត 2លាននាក់។

ឯកឧត្តមក៏បានណែនាំឱ្យមន្ត្រីរាជការ និងប្រតិបត្តិករទេសចរណ៍ទាំងអស់ត្រូវយកចិត្តទុកដាក់លើការប្រើប្រាស់បច្ចេកវិទ្យាឌីជីថលនេះឱ្យបានល្អប្រសើរ ធ្វើយ៉ាងណាដើរឱ្យទាន់ការរីកចម្រើនរបស់ពិភពលោកនាសម័យទំនើបនេះ។

ស្របតាមចក្ខុវិស័យ នៃផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ 2017-2025 នៅឆ្នាំ2020 ក្រសួងទេសចរណ៍ ត្រូវជំរុញឱ្យអ្នកជំនាញយ៉ាងតិច 50% ត្រូវមានវិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដាជាតិ និងអាស៊ាន តាមរយៈការបណ្តុះ បណ្តាល ឬការវាយតម្លៃសមត្ថភាព ហើយនៅឆ្នាំ2025 ត្រូវសម្រេចឱ្យបានយុទ្ធនាការ “បុគ្គលិក ម្នាក់ជំនាញមួយ”ពោលគឺជំរុញឱ្យអ្នកជំនាញទេសចរណ៍ទាំងអស់ត្រូវមានវិញ្ញាបនបត្រ ឬសញ្ញាបត្រ បញ្ជាក់សមត្ថភាព។

ឯកឧត្តម ហោ មុនីរ័ត្ន បានលើកឡើងថា វិស័យទេសចរណ៍កម្ពុជា បាននាំចំណូលចូលសេដ្ឋកិច្ចជាតិ ប្រមាណ 4,375លានដុល្លារ ស្មើនឹង 12.7% នៃផលិតផលក្នុងស្រុកសរុប (GDP) និងបានបង្កើតការងារផ្ទាល់ជាង 62ម៉ឺននាក់ ស្មើនឹង 13% នៃការងារសរុប។

ឯកឧត្ដមក៏បានលើកឡើងដែរអំពីសារៈសំខាន់នៃទីផ្សារប្រទេសចិនដែលចាំបាច់ត្រូវបំពេញតាមតម្រូវការដ៏ធំធេងនៃផ្នែកផ្សព្វផ្សាយ ទីផ្សារ រចនាសម្ព័ន្ធ និងធនធានមនុស្សប្រកបដោយសមត្ថភាពក្នុងវិស័យទេសចរណ៍។

កាលពីខែកក្កដាកន្លងទៅ កម្ពុជាក៏បានប្រកាសដាក់ឱ្យប្រើប្រាស់ App “Kingdom of Wonder” ជាផ្លូវការនៅលើទូរស័ព្ទដៃ ឬ Mobile Application ផងដែរ ដើម្បីផ្សព្វផ្សាយគោលដៅទេសចរណ៍របស់កម្ពុជាតាមប្រព័ន្ធឌីជីថលទៅកាន់ទីផ្សារទេសចរណ៍ពិភពលោក ឱ្យកាន់តែមានសក្កានុពលបន្ថែមទៀត។

App “Kingdom of Wonder”ដែលអាចប្រើនៅលើទូរស័ព្ទដៃនេះ គឺអាចឱ្យពលរដ្ឋ ពិសេសទេសចរជាតិ-អន្តរជាតិទាញយក (Download ) ដោយឥតគិតថ្លៃ នៅក្នុងប្រព័ន្ធប្រតិបត្តិការ IOS (App Store) និងក្នុងប្រព័ន្ធប្រតិបត្តិការ Android (Play Store) ដែលពិធីប្រកាសឱ្យប្រើប្រាស់App នេះ បានប្រព្រឹត្តទៅកាលពីថ្ងៃទី16 កក្កដា ឆ្នាំ2019 នៅសណ្ឋាគារសុខា ខេត្តសៀមរាប ក្រោមអធិបតីភាព លោក គុជ បញ្ញាសាអនុរដ្ឋលេខាធិការក្រសួងទេសចរណ៍។

បើតាមលោក គុជ បញ្ញាសា App “Kingdom ofWonder” គឺជាបណ្តុំព័ត៌មានទេសចរណ៍សំខាន់ៗរបស់កម្ពុជា រួមមានគោលដៅទេសចរណ៍ ព្រឹត្តិការណ៍ទេសចរណ៍ ផែនទីទេសចរណ៍ ជើងហោះហើរ អាកាសធាតុ ភោជនីយដ្ឋាន កន្លែងស្នាក់នៅ មធ្យោបាយធ្វើដំណើរក្នុងស្រុក និងព័ត៌មានសំខាន់ៗដទៃទៀត ដែលផ្តល់ភាពងាយស្រួលក្នុងការស្វែងរកព័ត៌មាន និងគ្រប់ជ្រុងជ្រោយសម្រាប់ភ្ញៀវទេសចរ ដែលមានបំណងមកកម្សាន្តនៅកម្ពុជា ទាំងពេលបច្ចុប្បន្ន និងអនាគត។

លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ប្រាប់ឡារ៉ែន ពាណិជ្ជថា៖“វិស័យទេសចរណ៍យើងដើរមកដល់យុគសម័យនេះហើយ យើងត្រូវការ បច្ចេកវិទ្យា Digital ជាចាំបាច់ បើយើងក្រឡេកមើលទៅការវិវឌ្ឍរបស់ពិភពលោក ឬប្រទេសអាស៊ានជាដើម គេដើរមុនយើងបាត់ទៅហើយ គឺគេងាកទៅរកបច្ចេកវិទ្យា Digital គ្រប់កន្លែងហើយ។

លោកជំទាវ បានមានប្រសាសន៍បន្ថែមទៀតថា៖“ដូច្នេះយើងត្រូវបត់បែនខ្លួនទៅតាមគេ នេះគឺជារឿងសំខាន់នៅក្នុងវិស័យទេសចរណ៍យើង ដើម្បីឱ្យភ្ញៀវទេសចរបានឆែកមើលព័ត៌មានឱ្យបានទូលំទូលាយអំពីកម្ពុជា ថាតើគេអាចទៅលេងបាននៅឯណាខ្លះ? គេអាចមើលឃើញថា មានអ្វីខ្លះ? គេអាចធ្វើផែនការទុកមុន គេមិនចាំបាច់មកដល់ទើបបានធ្វើការស្រាវជ្រាវនោះទេ គេរៀបផែនការទុកមុនបាន ប្រសិនបើមានការជួយពីបច្ចេកវិទ្យាឌីជីថលនេះ គេក៏អាចក្តាប់ព័ត៌មានសំខាន់ៗពីកន្លែងទេសចរណ៍ដែលយើងមានបានយ៉ាងងាយ។

លោកជំទាវ ឆាយ ស៊ីវលីន ក៏បានបញ្ជាក់ផងដែរថា៖“ដូច្នេះយើងពិតជាត្រូវការនូវបច្ចេកវិទ្យា Digital ដែលពិតជាសំខាន់នៅក្នុងវិស័យទេសចរណ៍ ហើយបាននិងកំពុងដាក់ឱ្យអនុវត្តនូវយុទ្ធសាស្ត្រនេះ។ វាក៏មានភាពចាំបាច់ណាស់ដែរក្នុងការជំរុញកំណើន និងអភិវឌ្ឍន៍វិស័យទេសចរណ៍”៕

September 6, 2019

ទទួលទានម្សៅទឹកដោះគោស្រស់ Australian Dairies ដើម្បីសុខភាពល្អ អស់កង្វល់ចំពោះបញ្ហាឆ្អឹង

ម្សៅទឹកដោះគោស្រស់ Australian Dairies គឺជាម្សៅទឹកដោះគោដ៏មានគុណតម្លៃខ្ពស់ចំពោះសុខភាព ដែលជាផលិតផលរបស់ប្រទេសអូស្ត្រាលី អាចញ៉ាំបានគ្រប់វ័យ មិនថា កុមារមនុស្សពេញវ័យ អ្នកវ័យកណ្តាល ឬមនុស្សចាស់នោះទេ ដោយផលិតផលម្សៅទឹកដោះគោស្រស់ Australian Dairies មាន 4ជម្រើសសម្រាប់មនុស្សគ្រប់វ័យ។ ម្សៅទឹកដោះគោស្រស់ Australian Dairies នាំចូលផ្តាច់មុខដោយក្រុមហ៊ុន CNE Wellness ដែលជាក្រុមហ៊ុននាំចូលផលិត-ផលថែរក្សាសុខភាព ហើយនាពេលបច្ចុប្បន្ននេះ ក្រុមហ៊ុន CNE Wellness បានធ្វើការចែកចាយផលិតផលម្សៅទឹកដោះគោស្រស់ Australian Dairies នៅស្ទើរតែគ្រប់25ខេត្តក្រុងក្នុងព្រះរាជាណាចក្រកម្ពុជា ដោយទទួលបានការគាំទ្រពីសំណាក់ប្រជាជនខ្មែរគ្រប់ស្រទាប់វណ្ណៈគួរជាទីមោទនៈផងដែរ។

ម្សៅទឹកដោះគោស្រស់ Australian Dairies មាន4ជម្រើសដូចជា ៖

1. High Calcium + Vitamin Dមានសារធាតុកាល់ស្យូម និងវីតាមីន D ខ្ពស់ ល្អបំផុតសម្រាប់ការទ្រទ្រង់ឆ្អឹងឱ្យមានការលូតលាស់ល្អ ជំនួយកម្លាំង ជួយដល់ការចងចាំបានល្អ និងមានប្រូតេអុីនច្រើន ការពារជំងឺពុកឆ្អឹងនៅពេលឈានចូលវ័យចំណាស់ ជួយជម្រុញការលូតកម្ពស់បានល្អ ជួយឱ្យឆ្អឹង និងធ្មេញរឹងមាំល្អ។ ម្សៅទឹកដោះគោស្រស់ Australian Dairies ប្រភេទទី1នេះ ល្អបំផុតសម្រាប់មនុស្សចាស់។

2. Whole Milkម្សៅទឹកដោះគោស្រស់ Australian Dairies ប្រភេទទី2នេះ ល្អបំផុតសម្រាប់កុមារ ដែលកំពុងស្ថិតនៅក្នុងវ័យកំពុងលូតលាស់ ជួយឱ្យញ៉ាំបាយបាន ជួយបង្កើនការចង់ញ៉ាំអាហារដល់កុមារ ជួយឱ្យឡើងគីឡូ ជួយឆ្អឹងឱ្យរឹងមាំ និងជួយជម្រុញការលូតកម្ពស់ ជួយឆ្អឹង សាច់ដុំ និងធ្មេញរឹងមាំល្អ។

3. Skin Milkម្សៅទឹកដោះគោស្រស់ Australian Dairies ប្រភេទទី3នេះ ល្អបំផុតសម្រាប់យុវវ័យ និងវ័យកណ្តាល ជាពិសេសនារីៗ ដែលចង់ថែរក្សារូបរាងឱ្យស្រឡូនស្អាត និងសម្រាប់អ្នកសម្រកទម្ងន់។ ម្សៅទឹកដោះគោស្រស់ Australian Dairies ប្រភេទ Skin Milk មានជាតិខ្លាញ់ទាប ល្អសម្រាប់អ្នកដែលចង់រក្សាទម្ងន់ ជំនួយដល់ឆ្អឹង ផ្តល់នូវថាមពលខ្ពស់ បង្កើនការចងចាំ និងជួយដល់ការរំលាយអាហារបានយ៉ាងល្អប្រសើរ។

4. High Proteinម្សៅទឹកដោះគោស្រស់ Australian Dairies ប្រភេទទី4នេះ ល្អបំផុតសម្រាប់បុរសៗ និងសម្រាប់មនុស្សពេញវ័យ ដែលរវល់ច្រើន មិនមានពេលហាត់ប្រាណ និងមិនសូវចូលចិត្តញ៉ាំសាច់។ ម្សៅទឹកដោះគោស្រស់ Australian Dairies ប្រភេទ High Protein នេះ ជាប្រភេទម្សៅទឹកដោះគោស្រស់ ដែលសម្បូរដោយជាតិកាល់ស្យូម និងមានប្រូតេអុីនខ្ពស់ ជួយទ្រទ្រង់ដល់សរីរាង្គកាយ ដ្តល់នូវកម្លាំងថាមពល ជួយដល់ការលូតលាស់នៃឆ្អឹង មានតួនាទីសំខាន់ក្នុងការជួយសម្រួលដល់សាច់ដុំ រាងកាយ និងសាច់ដុំខួរក្បាល។

ម្សៅទឹកដោះគោស្រស់ Australian Dairies មានលក្ខណៈពិសេស ត្រូវបានធ្វើការវិចខ្ចប់ដោយកញ្ចប់ផ្លាស្ទីកដ៏ស្រស់ស្អាត តាមស្តង់ដារអូស្ត្រាលី ដែលធានាដល់គុណភាព និងរសជាតិនៃម្សៅទឹកដោះគោស្រស់មួយប្រភេទនេះយ៉ាងល្អបំផុត ដែលលោកអ្នកអាចកាត់កញ្ចប់ម្សៅទឹកដោះគោស្រស់ Australian Dairies នេះ ចាក់ដាក់ចូលទៅក្នុងកំប៉ុងរបស់វា ហើយលោកអ្នកអាចបំពេញម្សៅទឹកដោះគោបន្ថែមនៅពេលលោកអ្នកប្រើអស់ ដែលនេះគឺជាការច្នៃប្រឌិតថ្មី ដោយគិតពីការការពារបរិស្ថាន និងការសន្សំសំចៃខ្ពស់។

ចំណែករបៀបឆុងម្សៅទឹកដោះគោស្រស់ Australian Dairies ក៏មានភាពងាយស្រួល ហើយមានរសជតិឆ្ងាញ់ជាទីពេញចិត្តសម្រាប់មនុស្សគ្រប់វ័យ។ ហើយចំពោះស្ត្រីមានផ្ទៃពោះ និងអ្នកម្តាយកំពុងបំបៅដោះកូនតូចក៏អាចញ៉ាំបានដែរ ជាពិសេសសម្រាប់អ្នកដែលទើបជាសះស្បើយពីជំងឺ និងអ្នកដែលមិនសូវមានកម្លាំងកំហែង។

ញ៉ាំម្សៅទឹកដោះគោស្រស់ Australian Dairies ដើម្បីសុខភាពល្អទាំងអស់គ្នា!សម្រាប់ព័ត៌មានបន្ថែម សូមទំនាក់ទំនងមកកាន់លេខទូរស័ព្ទ 096 888 99 11 / 077 88 99 11 / 066 88 99 11៕

September 6, 2019

វិធីងាយៗបញ្ចៀសការឈឺកដៃ ពេលវាយកុំព្យូទ័រច្រើនម៉ោងរាល់ថ្ងៃ

សព្វថ្ងៃនេះ ការប្រើប្រាស់កុំព្យូទ័រមិនអាចចៀសបានឡើយ មិនថាអ្នកធ្វើការ ឬអ្នករៀនផ្នែក IT ដែលត្រូវនៅជាប់ស្និទ្ធនឹង Keyboard ជារៀងរាល់ថ្ងៃឡើយ។ ការវាយកុំព្យូទ័ររៀងរាល់ថ្ងៃជាច្រើនម៉ោងមិនបានត្រឹមត្រូវ អាចបណ្ដាលឱ្យឈឺកដៃ ស្ពឹកម្រាមដៃ ហើយអាការនេះនឹងកាន់តែធ្ងន់ធ្ងរ រហូតដល់វះកាត់ព្យាបាលក៏មាន។

*ដើម្បីបញ្ចៀសការឈឺចាប់កដៃ 
-រក្សាដងខ្លួនឱ្យបានសមស្រប
-រៀបចំកន្លែងអង្គុយ រួមទាំងម៉ាស៊ីនកុំព្យូទ័រឱ្យបានត្រឹមត្រូវ
-យកចិត្តទុកដាក់ចំពោះទីតាំងដៃ
-ត្រួតពិនិត្យបច្ចេកទេសរបស់អ្នក (វាយអក្សរ)
-ធ្វើម៉ាស្សាសាច់ដុំ មុនពេលវាយអក្សរ

*ឥរិយាបថគួរមានការកែសម្រួល
កែសម្រួលកៅអីអង្គុយ ដោយជើងគួរដាក់រាបស្មើលើផ្ទៃ ជាមួយជង្គង់បត់ 90ដឺក្រេ ដើម្បីបញ្ចៀសការឈឺខ្នង។ អេក្រង់គួរកែសម្រួលឱ្យស្ថិតនៅកម្រិតកម្ពស់ភ្នែក។ បើធ្វើការច្រើនម៉ោងជាមួយ Laptop គួរពិចារណាទិញ Wireless Keyboard។ ហើយពេលវាយបញ្ចូលអក្សរ មិនគួរទម្លាក់កដៃឱ្យផ្អិបនឹងផ្ទៃតុឡើយ។ គួរដាក់ Keyboard លើផ្ទៃរាបស្មើស្ថិតនៅកម្រិតដូចគ្នានឹងកែងដៃ ឬក្រោមកែងដៃបន្តិច។ ម្យ៉ាងវិញទៀត មិនគួរពាក់គ្រឿងអលង្ការពេលកំពុងវាយអក្សរនោះឡើយ ព្រោះវាបានត្រឹមតែបង្កើនទម្ងន់ឱ្យសាច់ដុំខំប្រឹងឡើងប៉ុណ្ណោះ។

*ធ្វើយ៉ាងណាបើមានការឈឺចាប់
ភាពឈឺចាប់ ស្ពឹក រួយ បរិវេណកដៃ អាចកើតមានមួយរយៈពេលខ្លីក្រោយធ្វើការជាមួយកុំព្យូទ័រ ឬពេញ1ថ្ងៃតែម្តង។ បើមានអារម្មណ៍ស្ពឹក រួយកដៃ គួរពាក់ស្រោមកដៃ ឬសម្រាកពីការវាយអក្សរជាបណ្ដោះអាសន្ន ឬអាចប្រើបច្ចេកវិទ្យាបំប្លែងសំឡេងទៅជាអក្សរ អាចជួយបានច្រើន បើបានស្និទ្ធប្រើ។ គួរដឹងផងដែរថា ការសរសេរ ដោយដៃ ក៏អាចបណ្តាលឱ្យសាច់ដុំមានសម្ពាធដល់កដៃ ឬបាតដៃផងដែរ។ បើនៅតែមិនធូរស្រាល គួរទៅជួបគ្រូពេទ្យ ពិគ្រោះយោបល់ និងទទួលការព្យាបាលតាមស្ថានភាពជាក់ស្តែង។ អ្នកដែលប្រើកុំព្យូទ័រពេញ 1ថ្ងៃ សម្រាប់ការងារ ឬការសិក្សា អាចទាញអត្ថប្រយោជន៍ពីជំនាញវាយអក្សរបានស្ទាត់នេះបាន ប៉ុន្តែគួរព្យាយាមទម្លាប់ប្រើបច្ចេកទេសឱ្យបានសមស្របទាក់ទងនឹងល្បឿន និងភាពត្រឹមត្រូវលើ Key៕

September 6, 2019

ស្មាតហ្វូន Galaxy Fold នឹងប្រកាសចេញលក់នៅកូរ៉េខាងត្បូងក្នុងសប្តាហ៍នេះ

កាលពីដើមឆ្នាំនេះ Samsung បានប្រកាសបង្ហាញទូរស័ព្ទបត់អេក្រង់បានដំបូងបង្អស់របស់ខ្លួនជាមួយនឹង Galaxy S10 ប៉ុន្តែគេពុំឃើញមានការដាក់បង្ហាញលក់នៅលើទីផ្សារឡើយ ដោយសារតែអ្នកធ្វើតេស្ដមួយចំនួនបានរកឃើញថា មានបញ្ហាលើអេក្រង់។

តែនៅពេលថ្មីៗនេះ ក្រុមហ៊ុន Samsung នៅកូរ៉េខាងត្បូង បានបង្ហើបឱ្យដឹងពីដំណឹងរបស់ស្មាតហ្វូន Galaxy Fold ដែលអាចនឹងត្រឡប់មកវិញ ព្រមទាំងបានប្រកាសថានឹងបង្ហាញផលិតផលថ្មីនេះនៅថ្ងៃសុក្រទី11 ខែកញ្ញាខាងមុខនេះទៀតផង។

ទូរសព្ទបត់អេក្រង់បាននេះ អាចនឹងបើកឱ្យអតិថិជនកម្ម៉ង់ទុកមុនបាន( Pre-order) ជាប្រភេទ unlocked phoneនៅថ្ងៃនោះតែម្ដង។ ចំពោះចំនួនដែលក្រុមហ៊ុនបើកឆាកដំបូង មានប្រមាណជា 2,500គ្រឿង។ សម្រាប់ទីផ្សារនៅកូរ៉េខាងត្បូងមានត្រឹមតែ 300 ទៅ 400គ្រឿងប៉ុណ្ណោះ ខណៈដែលទូរស័ព្ទស៊េរីនេះកំពុងត្រៀមនឹងចេញលក់ទូទាំងប្រទេសចំនួនពី 20,000 ទៅ 30,000គ្រឿង។ Galaxy Fold នឹងមានតម្លៃចាប់ពី 1,965ដុល្លារ ជាមួយនឹងជម្រើស 4ពណ៍គឺ ខ្មៅ ប្រាក់ បៃតង និងពណ៍ខៀវ។

September 6, 2019

ទុកទូរស័ព្ទក្បែរខ្លួន ពេលគេងអាចបណ្ដាលឱ្យកើតជំងឺមហារីក និងមេជីវិតថយចុះ

ផ្អែកតាមការណែនាំថ្មីមួយដែលចេញផ្សាយដោយមន្ទីរសុខភាពនៃរដ្ឋ California បានឱ្យដឹងថា ការទុកទូរស័ព្ទស្មាតហ្វូននៅក្បែរខ្លួនពេលគេង អាចបណ្ដាលឱ្យកើតមានជំងឺមហារីក និងមេជីវិតថយចុះ។

មន្ទីរសុខភាពនោះបានណែនាំថា គួរដាក់នៅឱ្យឆ្ងាយពីខ្លួនគ្រប់ពេល ហើយពេលគេងគួរដាក់វានៅចម្ងាយឈោងដៃផុត។ ការធ្វើដូចនេះអាចកាត់បន្ថយការសាយភាយនៃសារធាតុវិទ្យុសកម្មពីសេវាទូរស័ព្ទបាន។ ទូរស័ព្ទបានបញ្ចេញរលកវិទ្យុសកម្មដែលមានកម្រិតហ្រេ្វកង់ទាប ជាសារធាតុវិទ្យុសកម្មអេឡិចត្រូម៉ាញេទិកមួយប្រភេទដែលកន្លងមកគេសិក្សាឃើញថា មិនមានប៉ះពាល់ដល់សុខភាពឡើយ។ ប៉ុន្តែមន្ទីរសុខភាពនៃរដ្ឋ California បាននិយាយថា ពេលនេះមានការសិក្សាគ្រប់គ្រាន់ ដែលបង្ហាញថាសេវាទូរស័ព្ទ ផ្ដល់ផលប៉ះពាល់អវិជ្ជមានដល់សុខភាព ដែលគ្រប់គ្នាគួរប្រុងប្រយ័ត្ន។

គ្មានការឯកភាពទូលំទូលាយក្នុងសហគមន៍វេជ្ជសាស្ត្រ ឬវិទ្យាសាស្ត្រអំពីចំណុចដែលថា សេវារបស់ទូរស័ព្ទអាចប៉ះពាល់ដល់សុខភាព ឬមិនប៉ះពាល់នោះឡើយ។ យ៉ាងណាក្ដី នៅទីក្រុងមួយចំនួនក្នុងរដ្ឋ California ចាប់ផ្ដើមចេញការព្រមានជាសាធារណៈ មិនឱ្យកាន់ទូរស័ព្ទជាប់នឹងខ្លួនរយៈពេលយូរនោះទេ។ ជាពិសេសការទុកទូរស័ព្ទនៅជាប់ខ្លួន ពេលកំពុងដោនឡូដឯកសារធំៗ ឬពេលទស្សនាវីដេអូ ដោយសារវាជាពេលដែលទូរស័ព្ទជះវិទ្យុសកម្មខ្លាំងជាងធម្មតា។

វេជ្ជបណ្ឌិត Devra Davis នៃ Environmental Health Trust បាននិយាយថា៖ ”ការទុកទូរស័ព្ទជាប់ខ្លួនមិនមែនជាគំនិតល្អនោះទេ”។ ថ្មីៗនេះរដ្ឋាភិបាលប្រទេសបារាំង បានចេញការហាមឃាត់មិនឱ្យប្រើទូរស័ព្ទចាប់ពីថ្នាក់បឋមសិក្សា ដល់ថ្នាក់មធ្យមសិក្សា ដោយសារតែលទ្ធផលនៃការស្រាវជ្រាវថ្មីបានរកឃើញពីផលប៉ះពាល់នៃទូរស័ព្ទនេះ ប៉ុន្តែវេជ្ជបណ្ឌិត Devra និយាយថា យុវវ័យក៏គួរតែបារម្ភពីរឿងនេះដែរ៕

September 6, 2019

សូមចូលរួមរំលែកទុក្ខក្រៀមក្រំចំពោះតារាស្រី ឡេង មុន្នីរចនា ដែលបានបាត់បង់អ្នកម្ដាយជាទីស្រឡាញ់

នៅលើទំព័រផេក «សិល្បករកម្ពុជា» បានឲ្យដឹងមុននេះបន្តិចថា ម្តាយតារាចម្រៀងញាក់កន្ទ្រាក់អារម្មណ៍ ឡេង មុន្នីរចនា បានស្លាប់ចាកឋានទៅកាន់លោកខាងមុខហើយ ។

តាមផេកខាងលើបានប្រកាសថា សពម្ដាយ ឡេង មុន្នីរចនា តម្កល់នៅវត្តស្វាយផ្អែម ផ្លូវជាតិលេខ៤ ហើយនឹងត្រូវបូជានៅព្រឹកថ្ងៃទី៦ ខែកញ្ញា។ ឡេង មុន្នីរចនា បានប្រកាសឱ្យមិត្តរួមអាជីពចូលរួមពិធីបុណ្យសពម្ដាយរបស់នាងផងដែរ។

ឡេង មុន្នីរចនា ថ្លែងសារទាំងក្រៀមក្រំថា ”នាងខ្ញុំ រចនា ព្រមទាំងក្រុមគ្រួសារ សូមគោរពអញ្ជើញបងប្អូនសិល្បករ សិល្បការិនីទាំងអស់ដោយក្ដីអនុគ្រោះ សូមអញ្ជើញចូលរួមបុណ្យសពម្ដាយនាងខ្ញុំដែលតម្កល់នៅវត្តស្វាយផ្អែម ផ្លូវជាតិលេខ៤ ដោយអនុគ្រោះផង សពបូជានៅថ្ងៃសៅរិ៍ ម៉ោង៦ព្រឹក”៕

September 6, 2019

អ្នកជំនាញថាមិនស្រួលទេក្នុងការថែរក្សាសម្លៀកបំពាក់សម្អាងការខ្មែរឱ្យត្រូវទម្រង់

អ្នកភ្នួងការត្រូវទម្រង់ម្នាក់ប្រកាសផ្ទេរជំនាញដល់អ្នកចង់សម្អាងឱ្យត្រូវទម្រង់ខ្មែរ និងចង់ឱ្យអ្នកជំនាញសម្អាងខ្មែរស្លៀកឈុតត្រូវទម្រង់។

បរិបទចុងក្រោយ គេកត់សម្គាល់ថា សម្អាងការនៅក្នុងប្រទេសកម្ពុជាកាន់តែប្រកួតប្រជែងម៉ូដគ្នា រំលេចឈុតប្លែកៗចម្លងតាមប្រទេសក្បែរខាង ដោយឈុតមួយចំនួនជាឈុតទិញស្រាប់របស់ប្រទេសជិតខាង ដោយធ្វើឱ្យគេបារម្ភពីការចុះខ្សោយនៃទម្រង់ខ្មែរក្នុងវិស័យសម្អាងផង។ អ៊ីចឹងហើយ ទើបអ្នកឯកទេសខាងផ្នែកតែងសម្អាងឱ្យត្រូវទម្រង់ខ្មែរមួយរូប ប្រកាសជាសាធារណៈថា ខ្លួននឹងផ្ទេរចំណេះជំនាញពីការតែងសម្អាងឱ្យត្រូវទម្រង់នោះទៅឲ្យអ្នកជំនាន់ក្រោយដោយគ្មានលក្ខណ្ឌ ដើម្បីកុំឱ្យបាត់បង់ការយល់ដឹង។

លោក ហេងឡុង ម្ចាស់សម្អាងការហេងឡុងហ្គោល នៅបណ្ដោយផ្លូវជាតិលេខ៦A ទល់មុខផ្សារព្រែកលាភ ដែលត្រូវគេស្គាល់ថាជាអ្នកឯកទេសផ្នែកតែងសម្អាងត្រូវទម្រង់បែបខ្មែរបានល្អ បានអះអាងកាលពីថ្ងៃទី៥ កញ្ញា ឆ្នាំ២០១៩ ក្នុងពិធីសម្ពោធហាងថ្មី អមជាមួយការផ្លាស់ឈ្មោះពីសម្អាងការហេងឡុង មកជាហេងឡុងហ្គោលថា ឯកទេសតែងសម្អាងរបស់លោកស្ទាត់ជំនាញប្រមាណ២០ឆ្នាំមកហើយ ដោយជំនាញដែលយល់ដឹង មិនមែនចេះតាមគ្នានោះទេ ពោលគឺទទួលការហាត់រៀនច្បាស់លាស់ពីគ្រូៗនៅក្រសួងវប្បធម៌ និងការសិក្សាស្រាវជ្រាវ។ លោកថា ខ្លួនស្គាល់សំលៀកបំពាក់ទម្រង់ខ្មែរ ស្គាល់ក្បាច់ខ្មែរ តាំងពីក្លាយជាម្ចាស់សម្អាង ខណៈដែលលោកក៏បានប្រើជំនាញឌីហ្សាញជាសំលៀកបំពាក់កូនក្រមុំ កុម្ម៉ង់ជាក្បិន ជាឈៀង ជាខ្សែក្រវាត់ បានជាច្រើនម៉ូដ ក្នុងរចនាបទខ្មែរ ដោយមិនខ្វល់ពីការចំណាយដើមទុនខ្ពស់ ដើម្បីបន្សល់ទុកស្នាដៃ។ យ៉ាងណាមិញលោកថាខ្លួនមិនអាចប្រើតែទម្រង់ខ្មែរសុទ្ធ ដើម្បីឈរជើងក្នុងអាជីពសម្អាងការបានទេ គឺត្រូវតែមានឈុតបែបប្រទេសជិតខាង និងឈុតច្នៃបំពេញតម្រូវការផងដែរ។ លោកថាខ្លួនស្នាដៃគ្រប់ម៉ូដទាំងបែបប្រពៃណីសុទ្ធ និងបែបសម័យ ដោយគ្រាន់តែលោករមែងប្រាប់ភ្ញៀវជាប្រចាំ ថានោះមិនមែនជាឈុតទម្រង់ខ្មែរ មិនមែនជារចនាបទខ្មែរ ដើម្បីឱ្យអតិថិជនធ្វើការជ្រើសរើស។

លោក ហេង ឡុង ប្រកាសថា ខ្លួនមិនយកចំណេះជំនាញដែលខ្លួនចេះចាំទៅកប់ចោលទេ គឺត្រូវតែចែករំលែក ហើយក៏មិនគិតកម្រៃដែរ ឱ្យតែអ្នកទាំងនោះចំណាយពេលមកសួរនាំ ឬ ស្មើឲ្យលោកបង្ហាត់បង្ហាញ។ លោកថាក្នុងវិស័យសម្អាង លោកចង់តែភ្នួងក្នុងឈុតដែលជាទម្រង់ខ្មែរប៉ុណ្ណោះ ដើម្បីអភិរក្ស ប៉ុន្តែដោយសារតែការប្រកួតប្រជែងទើបឈុតក្លាយត្រូវតែធ្វើឲ្យខ្លាំងស្របគ្នា។ ក្នុងអាជីព២០ឆ្នាំ លោកថាយល់ដឹងស៊ីជម្រៅពីទម្រង់ខ្មែរ ទាំងរបៀបស្លៀកសំឡុយ ចងក្បិន រចនាបទគ្រឿង និងពិធីកិច្ចនីមួយៗជាដើម ដោយលោកបន្តថា គឺជារឿងលំបាកមួយសម្រាប់ម្ចាស់សម្អាងការ ដោយសារតែសំលៀកបំពាក់ និងគ្រឿងទម្រង់ខ្មែរ ត្រូវចំណាយខ្ពស់ ព្រោះត្រូវផលិតថ្មីទាំងអស់ មិនដូចឈុតស្រាប់ៗរបស់ប្រទេសក្បែរខាងឡើយ។

សូមជម្រាបបន្ថែមថា ក្នុងពិធីសម្ពោធសម្អាងការហេងឡុងហ្គោលនៅក្នុងថ្ងៃនោះ គេឃើញមានសុទ្ធតែវត្តមានអ្នកផាត់មុខអាជីព តារាចម្រៀងបុរាណ ម្ចាស់សម្អាងការល្បីៗ និងតារាមួយចំនួនផងដែរ៕

September 6, 2019

តារាពីរដួងបង្ហាញសាច់សិចស៊ីនៅបណ្ដាញសង្គមដ៏គួរឱ្យភ្ញាក់ផ្អើល

គេពិតជាស្មានមិនដល់ដោយសារតែតារាប្រុសស្រីទាំងពីរដួងនេះកំពុងទទួលបានការគាំទ្រតាមរយៈការបង្ហាញដងខ្លួនចេញសាច់សិចស៊ីបង្ហោះនៅលើបណ្ដាញសង្គមហ្វេសប៊ុក។ ភាពទាក់ទាញនេះកំពុងតែល្បី ព្រោះមិនមែនជារូបភាពបែបសិចស៊ីរោលរាលនោះទេ តែជាការត្រៀមខ្លួនរបស់តារាទាំងពីរដួងនេះក្នុងជោគជ័យលើវិថីសិល្បៈ។

តាមពិតលោក ទ្រី តារាវុទ្ធ បានសម្រេចចិត្តទៅប្រកួតកម្មវិធីលំដាប់ពិភពលោកមួយនាប្រទេសភូមា ក្រោមការចូលរួមពីបុរសៗរូបសង្ហាជាច្រើនមកពីប្រទសនានាជុំវិញពិភពលោកដោយខាងកម្ពុជាមានលោក តារាវុទ្ធ តំណាងរំពឹងថា អាចលេចធ្លោមិនចាញ់គេឡើយយោងលើសមត្ថភាព។ តារាប្រុស ទ្រី តារាវុទ្ធ បានឱ្យដឹងថា លោក នឹងតំណាងប្រទេសកម្ពុជា ដើម្បីចូលរួមប្រកួត ក្នុងកម្មវិធីលំដាប់អន្តរជាតិ Man Of The Year ដែលប្រទេសមីយ៉ាន់ម៉ា គឺជាម្ចាស់ផ្ទះ ក្នុងឆ្នាំ ២០១៩នេះ ។ ជាមួយគ្នានោះ កម្លោះសង្ហារូបនេះ ក៏បានបន្ថែមទៀតថា សម្រាប់កម្មវិធី Man Of The Year នេះ នឹងចាប់ផ្តើមប្រកួតនៅថ្ងៃទី ១២ ដល់ ២១ ខែកញ្ញា ឆ្នាំ២០១៩ ខាងមុននេះ ដោយលោក សង្ឃឹមថា នឹងមានការគាំទ្រ និងលើកទឹកចិត្តពីសំណាក់បងប្អូនទាំងអស់ផងដែរ។

រូបភាពសិចស៊ីមួយទៀតដូចដែលបានឃើញក្រោមនេះបានបង្ហាញឱ្យដឹងថា សំណាង អាលីណា ពិតជាអាចធ្វើបានជាមួយការដើរកាច់រាងនៅលើឆាកធំខ្នាតអន្តរជាតិពេលប្រឡងបវរកញ្ញាចក្រវាឡលំដាប់ពិភពលោក ។ សិស្សប្អូន រឿន ណាត រូបនេះ ប្រាកដជាអាចធ្វើឱ្យមានភាពការរំជើបរំជួលដូចរៀមច្បងស្រីស្អាត រឿន ណាត ជាមិនខាន ។ សំណាង អាលីណា បវរកញ្ញាដែលមានកម្ពស់១,៧០ ម៉ែត្ររូបនេះបន្តថា ពេលនេះនាងខំប្រឹងរៀនភាសាអង់គ្លេសបានច្រើន ហើយអាចស្តាប់ និងនិយាយបានច្រើនជឿជាក់លើខ្លួនឯងច្រើន ព្រោះពេលធ្វើពិធីការិនីប៉ះចំតារាបរទេសមកនាងឆ្លងឆ្លើយគ្នាបានរលូន ។ គោលដៅនាងផ្តោតការនិយាយភាសាអង់គ្លេសឲ្យល្អ ព្រោះមានវិញ្ញាសាប្រឡងបវរកញ្ញាក៏ដាក់វិញ្ញាសាសួរឆ្លើយជាភាសាអង់គ្លេសជាសំខាន់ផងដែរ ៕

September 6, 2019

មហោស្រពភាពយន្ដខ្លីចតុមុខឆ្នាំ២០១៩ ប្រកាសបើកនិងដាក់ឱ្យទស្សនានៅសាលសាលសន្និសីទចតុម្មុខតែមួយប៉ុនណោះ

នៅរាត្រីថ្ងៃទី៥ ខែកញ្ញា ឆ្នាំ២០១៩ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញជាអធិបតីក្នុងពិធីបើកមហោស្រពភាពយន្តខ្លីចតុមុខលើកទី៨ ឆ្នាំ២០១៩ នៅសាលសន្និសីទចតុម្មុខ ដោយមានការចូលរួមពីសំណាក់សិល្បករ សិល្បការិនី ព្រមទាំងយុវផលិតករវ័យក្មេងកម្ពុជា ជាច្រើនរូប។

មហោស្រពភាពយន្តខ្លីចតុមុខ(CSFF) ត្រូវបានចាប់បដិសន្ធិឡើងដើម្បីអបអរដល់ភាពយន្តខ្លី មកពីជុំវិញពិភពលោក។ ដើម្បីស្វាគមន៍រដូវកាលថ្មី CSFF បានបើកប្រកាសទទួលរឿងប្រកួតដល់ សមិទ្ធិកររឿងខ្លី ចាប់តាំងពី ដើមខែមីនា រហូតដល់ពាក់កណ្តាលខែកក្កដា។ មហោស្រពនៅតែរាប់បញ្ចូលភាពយន្តខ្លីកម្ពុជា ដើម្បីលើកទឹកចិត្តដល់ យុវសមិទ្ធិករ យើង ឱ្យបង្ហាញទេពកោសល្យរបស់ខ្លួន។ CSFF ឆ្នាំទី៨នេះនឹងត្រូវបានរៀបចំដោយ ក្រុម«ភាពយន្តឈូករ័ត្ន» ឬជាភាសា អង់គ្លេសហៅថា Sunflower Film Alliance (SFA)។

លោក ស៊ុំ ស៊ីថែន ប្រធានមហោស្រពឆ្នាំនេះបានប្រកាសឱ្យដឹងថា «ឆ្នាំនេះ មហោស្រពមានលក្ខណៈពិសេស៣ ដែលក្នុងនោះរួមមាន៖១. ការប្រកួតភាពយន្តឯកសារខ្លី ២. រង្វាន់ច្រើនមុខ ៣. កម្មវិធីពិសេសនៃការដាក់បញ្ចាំងរឿង«១លានឆ្នាំ» នាថ្ងៃប្រកាសបើកមហោស្រពតែម្ដង។ ហើយចាប់ពីថ្ងៃបើកនេះតទៅមហាជនទាំងអស់អាចមកទស្សនាភាពយន្ដខ្លីនៅសាលចតុមុខតែមួយគត់ និងធ្វើការបោះឆ្នោតគាំទ្រដល់រឿងដែលលោកអ្នកស្រឡាញ់ពេញចិត្តគិតថាល្អមើលជាងគេ»។

មហោស្រពភាពយន្តខ្នាតខ្លីចតុមុខ ក៏បានបោះជំហាន ទៅមុខប្រកបដោយក្តីសង្ឃឹម និង មោទកភាព ជាក់ស្តែងក្នុងឆ្នាំ២០១៩នេះ មានស្នាដៃ ភាពយន្តដែលនឹងត្រូវដាក់បញ្ចាំងចំនួន៥៣ស្នាដៃ ក្នុងនោះមាន១២ស្នាដៃ ជាភាពយន្តរបស់ យុវផលិតករវ័យក្មេងកម្ពុជាយើង។ នេះគឺជាជោគជ័យថ្មី មួយទៀតសម្រាប់ មហោស្រពភាពយន្ត ខ្នាតខ្លីចតុមុខ ដែលមានផលិតករភាពយន្តបរទេស ជាច្រើនចាប់អារម្មណ៍ និងបាន យកស្នាដៃភាពយន្ត របស់ពួកគេចូលរួមក្នុងមហោស្រពនេះ ហើយការចូលរួមនេះ គឺជាកាលានុវត្តន៍ភាពថ្មី មួយសម្រាប់យុវផលិតករភាពយន្តកម្ពុជា ដើម្បីសិក្សារៀនសូត្រពីគំរូល្អៗ ក្នុងការអភិវឌ្ឍស្នាដៃភាពយន្តរបស់ខ្លួនទៅថ្ងៃអនាគត់។

September 6, 2019

កម្ពុជាកំពុងរៀបចំផែនការបង្កើនធនធានមនុស្សផ្នែក TVET ឱ្យកាន់តែខ្លាំងនៅឆ្នាំនេះ

ជំនាញបច្ចេកទេស និងវិជ្ជាជីវៈ ជាផ្នែកសំខាន់មួយដែលកម្ពុជាកំពុងត្រូវការខ្លាំង ព្រោះក្នុងបរិបទថ្មីនេះ យើងត្រូវការជាចាំបាច់នូវអ្នកជំនាញដើម្បីបម្រើការងារនៅក្នុងវិស័យឧស្សាហកម្ម សេវាកម្ម និងជំរុញឱ្យមានអាជីវកម្មខ្នាតតូចកាន់តែច្រើន។

នៅឆ្នាំថ្មីនេះ រដ្ឋមន្ត្រីក្រសួងបណ្តុះបណ្តាលវិជ្ជាជីវៈ ឯកឧត្តម អុិត សំហេង បានប្រកាសថានឹងរៀបចំផែនការមេ (Master Plan) ដើម្បីរៀបចំគ្រឹះ ស្ថានបណ្តុះបណ្តាលបច្ចេកទេស និងវិជ្ជាជីវៈ ក្នុងគោលបំណងបណ្តុះបណ្តាលធនធានមនុស្សក្នុងវិស័យនេះឱ្យកាន់តែមានគុណភាពខ្ពស់ និងមានចំនួនកាន់តែច្រើនឡើង។

ឯកឧត្តម អុិត សំហេង បានលើកឡើងថា បច្ចុប្បន្ននេះបញ្ហាកង្វះធនធានមនុស្សក្នុងវិស័យបច្ចេកទេស និងវិជ្ជាជីវៈជាក្តីបារម្ភមួយសម្រាប់កម្ពុជាដែលកំពុងមានតម្រូវការខ្ពស់ក្នុងទីផ្សារការងារបច្ចុប្បន្ន។ ដើម្បីដោះស្រាយបញ្ហានេះ ក្រសួងការងារ និងបណ្តុះ បណ្តាលវិជ្ជាជីវៈ បានព្យាយាមគ្រប់លទ្ធភាពដើម្បីជំរុញឱ្យមានគ្រឹះស្ថានអប់រំ បណ្តុះបណ្តាលបច្ចេកទេស និងវិជ្ជាជីវៈនៅទូទាំងប្រទេស ស្របពេលដែលឯកឧត្តមផ្ទាល់ក៏កំពុងចុះជាប់ជាប្រចាំនៅតាមគ្រឹះស្ថានទាំងអស់នោះផងដែរ។

ឯកឧត្តម អុិត សំហេង មានប្រសាសន៍ថា៖“នៅចុងឆ្នាំ2019 នេះ ក្រសួងការងារនឹងព្យាយាមបង្កើតផែនការមេ (Master Plan) ឱ្យបាន និងរៀបចំហេដ្ឋារចនាសម្ព័ន្ធក្នុងគ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ (TVET) ទាំងអស់នៅទូទាំងប្រទេសដោយគិតគូរទៅលើអគារសិក្សា រោងជាង គ្រូបណ្តុះបណ្តាល ការបង្រៀនពីបច្ចេកវិទ្យាថ្មីសម្រាប់បណ្តុះបណ្តាលសិស្សជាដើម។ ការខិតខំប្រឹងប្រែងនេះ គឺក្នុងគោលបំណងសម្រេចឱ្យបាននូវធនធានមនុស្សក្នុងវិស័យនេះទាំងបរិមាណ និងគុណភាព”។

កន្លងមកវិស័យបណ្តុះបណ្តាលបច្ចេកទេស និងវិជ្ជាជីវៈ ជាវិស័យមួយដែលមិនទាន់ទទួលបានការចាប់អារម្មណ៍ខ្លាំងពីសិស្ស និស្សិតនៅឡើយនោះទេ បើទោះបីជាផ្នែកនេះជាផ្នែកដែលមានទីផ្សារការងារទូលំទូលាយ និងទទួលបានប្រាក់ខែច្រើនក៏ដោយ។

បើតាមការបញ្ជាក់របស់ឯកឧត្តម ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា សិស្ស និស្សិតខ្មែរ ភាគច្រើនចូលចិត្តសិក្សាជំនាញខ្ពស់ៗផុតពីកន្លែងដែលគេត្រូវការ។ ជាក់ស្តែងយើងមើលឃើញថា និស្សិតវិស្វករមានច្រើន ខណៈសិស្សដែលកំពុងសិក្សាផ្នែកជំនាញបច្ចេកទេសនៅមានចំនួនតិចតួចនៅឡើយ។ ឯកឧត្តមបានណែនាំថា សិស្ស-និស្សិតគួរចាប់អារម្មណ៍លើការអភិវឌ្ឍជំនាញដោយចាប់ផ្តើមពីតូចទៅធំ មានន័យថា ពួកគេគួរចាប់ផ្តើមសិក្សាពីជំនាញបច្ចេកទេសបន្ទាប់មកធ្វើការងារបណ្តើរដើម្បីទទួលបានបទពិសោធការងារ និងប្រាក់ចំណូលបណ្តើរ ស្របពេលដែលពួកគេអាចឈានជើងទៅចាប់អាជីពជាវិស្វករប្រកបដោយបទពិសោធ និងចំណេះដឹងច្បាស់លាស់។

តែទោះជាយ៉ាងនេះក្តី តាមរយៈការរៀបចំឱ្យមានផែនការមេនេះ ជាចំណុចវិជ្ជមានមួយក្នុងការជំរុញឱ្យមានការបណ្តុះបណ្តាលកាន់តែច្រើនជាងមុន ដោយសារតែស្ថាប័នបណ្តុះបណ្តាលលើជំនាញទាំងអស់នេះនឹងចាប់ផ្តើមពង្រឹងគុណភាពប្រកបដោយនិរន្តរភាព ក្នុងការបណ្តុះបណ្តាល តាមផែនការច្បាស់លាស់មួយ៕

September 5, 2019

Category: សង្គម និងសេដ្ឋកិច្ច