សង្គម និងសេដ្ឋកិច្ច - La Reine Media

តើបុគ្គលតំណាងឱ្យកម្ពុជា 2រូបបោះឆ្នោតឱ្យនរណានៅ FIFA Best Player 2019?

ពាន FIFA Best Player ដែលបង្កើតឡើងកាលពីឆ្នាំ2016 ក្នុងនោះមានកីឡាករតែ 2រូបប៉ុណ្ណោះគឺ Christiano Ronaldo និង Lucas Modric ដែលបានឈ្នះពាននេះ ដោយក្នុងនោះ Ronaldo បានឈ្នះជាប់គ្នា 2ឆ្នាំ គឺ2016 និង2017 ហើយ Mudric ឈ្នះនៅឆ្នាំ2018។

ក្នុងនោះដែរ គ្រូបង្វឹកជម្រើសជាតិកម្ពុជា Felix Dalmas បានបោះឆ្នោតឱ្យ Lionel Messi សម្រាប់ជម្រើសទី1 Ronaldo និង Van Dijk សម្រាប់ជម្រើសចុងក្រោយ។ ឯប្រធានក្រុមជម្រើសជាតិកម្ពុជា សឿយ វិសាល បានបោះឆ្នោតឱ្យ Ronaldo សម្រាប់ជម្រើសទី1 Lionel Messi សម្រាប់ជម្រើសទី2 និង Van Dijk សម្រាប់ជម្រើសទី3។

គួរបញ្ជាក់ថា ពានរង្វាន់ FIFA Best Player 2019នេះ ត្រូវបានឈ្នះដោយកីឡាករ Lionel Messi ក្រោយមានពិន្ទុនាំមុខ Christiano Ronaldo និង Van Dijk ក្នុងការប្រកាសលទ្ធផល៕

September 25, 2019

ភូកេត…ចង់ទៅដើរលេងតែឯង ឬទៅជាក្រុម ក៏សប្បាយដូចគ្នា

អ្នកណាដែលមានផែនការចង់ទៅដើរលេងនៅប្រទេសថៃ ទោះជាទៅតែម្នាក់ឯង ឬទៅជាមួយគូស្នេហ៍ ឬទៅជាក្រុមជាមួយមិត្តភក្តិ ឬក៏ទៅជាមួយក្រុមគ្រួសារនោះ ឡារ៉ែន សូមណែនាំមណ្ឌលទេសចរណ៍ដ៏ល្បីល្បាញមួយរបស់ប្រទេសថៃដែលសម្បូរបែប និងមានទីតាំងទេសចរណ៍ល្អៗដ៏គួរឱ្យជាប់ចិត្តដិតជាប់អារម្មណ៍ បានទៅលេងម្ដងហើយ ច្បាស់ជាចង់តែទៅលេងម្ដងទៀតមិនខាន… នោះគឺ កោះភូកេត…ហើយទីតាំងទេសចរណ៍ដ៏ល្បីល្បាញដែលឡារ៉ែនចង់ណែនាំជូនប្រិយមិត្តអ្នកអាននៅពេលនេះគឺ៖

1. Old Town ឬ ស៊ីណូប្រូទូហ្គីស តំបន់ទីក្រុងចាស់ភូកេត
គឺជាទីតាំង និងមណ្ឌលទេសចរណ៍មួយដែលអ្នកទេសចរទាំងឡាយហាមខកខាននៅពេលទៅលេងកោះភូកេត នោះគឺការដើរទស្សនាស្ថាបត្យកម្មចំណាស់ៗស្ទីលប្រូទូហ្គីស(ព័រទុយហ្គាល់)ដែលស្ថិតនៅក្នុងតំបន់ទីក្រុងចាស់ ឬ Old Town ហ្នឹងឯង ដោយអគារទាំងអស់នេះត្រូវបានសាងសង់ឡើងក្នុងសម័យដែលជនជាតិចិន និងជនជាតិលោកខាងលិចនាំគ្នាហៀរហូរចូលមកក្នុងកោះភូកេត ដើម្បីប្រកបអាជីវកម្មអណ្ដូងរ៉ែ ធ្វើឱ្យកើតចេញជាអគារដែលមានការរួមបញ្ចូលគ្នាទាំងផ្នែកលោកខាងលិច និងលោកខាងកើតយ៉ាងស័ក្តិសមល្អឥតខ្ចោះ។ អគារស្អាតៗដែលគួរទៅទស្សនាមានច្រើនណាស់ តែដែលហាមខកខាននោះគឺ ត្រូវទៅថតរូបជាមួយអគារនាឡិកាដែលតាំងនៅច្រងាងយ៉ាងស្រស់ស្អាតហ្នឹងឯង…។ តំបន់ទីក្រុងចាស់ ឬ Old Town នេះនឹងស្រស់ស្អាតទាំងពេលថ្ងៃ និងពេលយប់តែម្ដង តែបើសិនជាអ្នកណាបានសាកល្បងមកដើរទស្សនាបែបជិតៗនៅពេលរាត្រីផងនោះ ក៏អាចមកនៅថ្ងៃអាទិត្យដែលនឹងមានផ្សារណាត់ដ៏ធំអាចឱ្យលោកអ្នកដើរសបភីងយ៉ាងសប្បាយចិន្ដាបានដូចគ្នា។ សូមបញ្ជាក់ថា ផ្សារណាត់ដ៏ធំនេះ បើកតែក្នុងថ្ងៃអាទិត្យប៉ុណ្ណោះ ដោយលោកអ្នកអាចទៅដើរលេងកម្សាន្តទីនោះចាប់តាំងពីម៉ោង 4ល្ងាច រហូតដល់ម៉ោង 10យប់។

2. កោះ រ៉ាឆា
បន្ទាប់ពីដើរលេងទស្សនាទីក្រុងចាស់រួចហើយ យើងនាំគ្នាផ្លាស់ប្ដូរបរិយាកាសមកលេងសមុទ្រម្ដងវិញល្អជាង ជាមួយនឹងដំណើរធ្រីបកោះរ៉ាឆា ជាកោះមួយដែលល្បីល្បាញរឿងភាពស្រស់ស្អាត ដែលនៅតែមានឆ្នេរខ្សាច់ដែលសស្គុស ស៊ីគ្នានឹងពណ៌ផ្ទៃមេឃរបស់ទឹកសមុទ្រដ៏សែនស្អាតបរិសុទ្ធ។ កោះរ៉ាឆានេះត្រូវបានបែងចែកជា កោះរ៉ាឆាតូច និងកោះរ៉ាឆាធំ។ ចំណុចល្អរបស់កោះរ៉ាឆា គឺអ្នកទេសចរអាចទៅលេងកម្សាន្តបែបវិលល្ងាចបាន ឬចង់ទៅគេងយប់នៅទីនោះក៏បានដូចគ្នា ព្រោះបរិវេណកោះរ៉ាឆា ក៏ជាទីពេញនិយមសម្រាប់ក្រុមអ្នកដែលត្រូវការមុជទឹកមើលវត្ថុមានជីវិតនៅបាតសមុទ្រដែរ ដោយសារតែទីនេះនៅតែមានផ្កាថ្មដ៏សម្បូរបែបយ៉ាងច្រើន។

3. នាំគ្នាទៅមុជទឹកសមុទ្រជ្រៅនៅប្រជុំកោះ ភីភី
ពេលនិយាយពីទីតាំងមុជទឹកសមុទ្ររាក់ ឬទឹកសមុទ្រជ្រៅ គេត្រូវតែលើកមេដៃឱ្យប្រជុំកោះភីភី ដែលការពិតទៅ ប្រជុំកោះភីភី គឺជាប្រជុំកោះមួយដែលស្ថិតនៅក្នុងឧទ្យានជាតិ ហាតណុបផារ៉ាត់ថារ៉ា-ប្រជុំកោះភីភី ដែលទោះជាស្ថិតនៅក្នុងតំបន់គ្រប់គ្រងរបស់ខេត្តក្រាប៊ីមែន តែក៏អ្នកទេសចរអាចធ្វើដំណើរចេញពីកោះភូកេតទៅបានដែរ ដែលកោះភីភីខ្លួនឯងជាគោលៗនឹងបែងចែកជា ភីភីដន និងភីភីលេ។ សម្រាប់អ្នកណាដែលចង់សម្រាកនៅលើកោះភីភី ក៏អាចគេងលើកោះភីភីដនបានដែរ ព្រោះទីនោះនឹងមានទីកន្លែងស្នាក់នៅ និងភោជនីយដ្ឋានគ្រប់ ឬបើសិនជាអ្នកណាដែលចង់មុជទឹកសមុទ្រជ្រៅក្នុងបរិវេណកោះភីភីវិញ ក៏អាចទៅលេងដោយទៅពេលព្រឹក និងវិលវិញល្ងាចបានដូចគ្នា៕

September 25, 2019

កំហុសឆ្គងក្នុងការព្យាបាលបញ្ហាមុខមុន

មនុស្សស្រីយើងស្ទើរតែគ្រប់គ្នាសុទ្ធតែទទួលបានបទពិសោធនៃការកើតមុន ហើយពួកគេក៏តែងតែខិតខំរិះរកវិធីព្យាបាលតាមបែបផ្សេងៗគ្នា ដែលក្នុងនោះរួមមានទាំងការប្រើប្រាស់ផលិតផលកម្ចាត់មុន ឱសថវេជ្ជសាស្ត្រ ឬតាមវិធីបុរាណជាដើម។ បើទោះជាការព្យាបាលផ្ទៃមុខពីការកើតមុនហាក់ដូចជាមិនមែនជារឿងសាំញ៉ាំ ប៉ុន្តែវាក៏ងាយក្នុងការបង្កើតនូវកំហុសឆ្គងបំផុតដូចគ្នាដែរ។ កំហុសឆ្គងដែលអ្នកប្រហែលជាធ្លាប់បានធ្វើរួចមកហើយនោះមានដូចជា៖

មិនព្យាយាមព្យាបាលមុនឱ្យត្រូវតាមពេលកំណត់ : អ្នកជំនាញបានប្រាប់ថា មុនអាចកើតឡើងក្នុងរយៈពេលយ៉ាងលឿន ប៉ុន្តែ ស្បែកមានផលតបស្នងយឺតក្នុងការព្យាបាល ដូច្នេះវាត្រូវការពេលវេលាក្នុងចន្លោះពី6ដល់12សប្តាហ៍។ ក្នុងករណីខ្លះ ក្នុងអំឡុងពេលព្យាបាលអ្នកអាចនឹងមានអារម្មណ៍រមាស់តិចៗ ក្នុងរយៈពេល1-2សប្តាហ៍ដំបូង ប៉ុន្តែនេះគឺជាការព្យាបាលមិនមែនជាការឆ្លងបន្ថែមនោះទេ។ វាអាចអាក្រក់មុនហើយល្អមកតាមក្រោយ ដូច្នេះពេលខ្លះបើអ្នកប្រញាប់បញ្ឈប់ការព្យាបាលពេកនោះ វានឹងបង្កើតឱ្យក្លាយជាកំហុសមួយហើយ។

បញ្ឈប់ការព្យាបាលភ្លាមៗ : គ្រាន់តែមើលឃើញថាមុនដែលមាននៅលើផ្ទៃមុខរលាយបាត់អស់ហើយនោះ ក៏ស្រាប់តែបញ្ឈប់ការព្យាបាលតែម្តង។ធ្វើបែបនេះក៏ហៅថាខុសដែរ។ វិធីល្អបំផុតគឺ កុំអាលបញ្ឈប់ តែត្រូវកាត់បន្ថយឱ្យនៅសល់ម្តងបន្តិចៗរហូតដល់អស់។

ខំព្យាបាលដោយផលិតផលចម្រុះគ្នាក្នុងពេលតែមួយ : មនុស្សតែងតែដាក់កំហុសទៅឱ្យផលិតផលនៅពេលដែលពួកគេមិនទទួលបានប្រសិទ្ធភាពក្នុងរយៈពេល3-4ថ្ងៃបន្ទាប់ពីប្រើប្រាស់ ហើយក៏ចាប់ផ្តើមស្វែងរកផលិតផល ឬវិធីព្យាបាលថ្មីមួយទៀតជាបន្តបន្ទាប់។ ភាពច្របូកច្របល់នៃផលិតផលនេះមិនត្រឹមតែមិនអាចជួយព្យាបាលមុនប្រកបដោយប្រសិទ្ធភាពនោះទេ តែវាថែមទាំងនាំឱ្យស្បែកមុខរោលរមាស់ទៀតផង។

ដុសខាត់សម្អាតហួសកំណត់ : ការដុសខាត់ស្បែកមុខនៅក្នុងអំឡុងពេលកើតមុន ឬនៅត្រង់កន្លែងដែលកើតមុនអាចធ្វើឱ្យមុនកាន់តែអាក្រក់ឡើង ព្រោះថាទង្វើបែបនេះអាចបំផ្លាញរបាំងការពារស្បែក ដែលនាំឱ្យឱកាសនៃការរមាស់រោលកើតមានកាន់តែខ្ពស់។ អ្នកជំនាញបានបន្តទៀតថា ការសម្អាតស្បែកច្រើនដងពេកក៏ជាកំហុសឆ្គងមួយដែរ។ អ្នកជំនាញបានបញ្ជាក់ថា ធូលីមិនមែនជាមូលហេតុចម្បងដែលនាំឱ្យកើតមុននោះទេ ព្រោះបើមិនអីុចឹងទេ វាប្រាកដជាកើតពេញបាតជើងយើងបាត់ទៅហើយ។

ទ្រាំមិនបាន : ក្នុងពេលកំពុងព្យាបាល ចេះតែចង់កេះ និងចង់ញ៉ិច ព្រោះតែទ្រាំមិនបាន។ នេះជារឿងមួយទៀតដែលអ្នកកើតមុនមួយចំនួនអាចនឹងភ្លេចខ្លួន។ ការកេះ និងការញ៉ិចនេះហើយជាមូលហេតុនាំឱ្យមុនឡើងហើមធំជាងមុន ហើយស្បែកមុខក៏បន្សល់ទុកនូវស្លាកស្នាមនាពេលក្រោយថែមទៀតផង៕

September 23, 2019

4វិធីឆុងទឹកដោះគោឱ្យកូនមឹម ដែលត្រឹម- ត្រូវ គ្មានពពុះ ការពារទារកពីអាការហើមពោះ

ការឆុងទឹកដោះគោ ជាដំណាក់កាលគ្រឹះដំបូងក្នុងការចិញ្ចឹមកូនដែលអាចហៅបានថា ជាចំណេះដឹងមូលដ្ឋានសម្រាប់ស្ត្រីជាម្ដាយគ្រប់រូប ហើយអ្នកម្ដាយគ្រប់គ្នាក៏ប្រហែលជាដឹងពីវិធីការឆុងទឹកដោះគោស្រាប់ហើយ តែដឹងទេថា រឿងដែលយើងគិតថាងាយ និងធ្វើតាមបែបដែលនរណាៗក៏គេធ្វើដែរនោះ អាចជាវិធីឆុងទឹកដោះគោដែលស្ត្រីជាម្ដាយទាំងអស់យល់ច្រឡំមករហូត ជាពិសេសការឆុងទឹកដោះគោឱ្យទារកអាយុ 0-3ខែ ដែលប្រព័ន្ធរំលាយអាហារនៅមិនទាន់ល្អពេញលេញ។ ការឆុងទឹកដោះគោដែលមិនត្រឹមត្រូវ អាចធ្វើឱ្យកូនកើតអាការហើមពោះ មិនស្រួលពោះ បត់ខ្លួនចុះឡើងញឹកញាប់ និងយំរករឿងមិនឈប់ក៏មាន ដូច្នេះ មុននឹងឆុងទឹកដោះគោឱ្យកូន អ្នកម្ដាយនាំគ្នាមកពិនិត្យមើលសិនប្រសើរជាងថា តើបានធ្វើរឿងទាំងអស់នេះដែរឬទេ?

1.ដាក់ម្សៅទឹកដោះគោចូលទៅក្នុងដបមុនដាក់ទឹក… ការពិតវិញ ត្រូវដាក់ទឹកចូលសិនមុននឹងដួសម្សៅទឹកដោះគោដាក់ចូលទៅ អ្នកម្ដាយជាច្រើនតែងស៊ាំធ្លាប់ជាមួយការដួសម្សៅទឹកដោះគោដាក់ចូលដបទឹកដោះគោ រួចហើយទើបដាក់ទឹកចូលទៅ។ ការធ្វើបែបនេះ គឺជារឿងដែលមិនត្រឹមត្រូវសោះតែម្ដង ព្រោះការដែលអ្នកម្ដាយដាក់ម្សៅទឹកដោះគោចូលទៅមុន នឹងធ្វើឱ្យបរិមាណរបស់ទឹកតិចជាងការពិត ធ្វើឱ្យកូនតូចបានទទួលទឹកដោះគោក្នុងបរិមាណដែលខាប់ជ្រុល និងអាចធ្វើឱ្យកូនកើតអាការទល់លាមកបាន។

2.ប្រើទឹកក្ដៅឆុងទឹកដោះគោ… ការពិតទៅ ត្រូវ ប្រើទឹកដាំឆ្អិនដែលទុករហូតទាល់តែត្រជាក់ស្មើនឹងសីតុណ្ហភាពក្នុងបន្ទប់ការដែលអ្នកម្ដាយប្រើទឹកក្ដៅឆុងទឹកដោះគោឱ្យកូន គឺជារឿងដែលមិនត្រឹមត្រូវឡើយ ព្រោះទឹកក្ដៅនឹងធ្វើឱ្យទឹកដោះគោផ្ដុំគ្នាជាដុំៗ និងបំផ្លាញសារធាតុអាហារមួយចំនួនដែលមាននៅក្នុងម្សៅទឹកដោះគោ។ ទឹកដាំឆ្អិនដែលមានសុវត្ថិភាពសម្រាប់កូនគួរដាក់នៅក្នុងដបស្អាតដែលធ្វើពីកែវ មិនមែនប្លាស្ទិកដែលមានប្រតិកម្មជាមួយទឹកក្ដៅនោះទេ។

3.ក្រឡុកឡើង-ចុះខ្លាំងៗរហូតទឹកដោះបាញ់ចេញឆ្វាចពីក្បាលដប… គឺជាវិធីដែលខុស ព្រោះការពិតទៅ គ្រាន់តែលុញ ឬបង្វិលដបជុំវិញក៏គ្រប់គ្រាន់ហើយ ការក្រឡុកឡើង-ចុះបែបខ្លាំង គឺជាវិធីប្រក្រតីដែលអ្នកម្ដាយទាំងឡាយចូលចិត្តធ្វើ ប៉ុន្តែវាជាវិធីដែលធ្វើឱ្យកើតពពុះច្រើនបំផុត ហើយការដែលកូនជញ្ជក់ពពុះខ្យល់ចូលទៅ ក៏នឹងធ្វើឱ្យកើតហ្គាសនៅក្នុងក្រពះ ជាមូលហេតុមួយដែលធ្វើឱ្យកូនហើមពោះ និងមិនស្រួលក្នុងពោះ។ វិធីបន្ថយអាការហើមពោះរបស់កូន គឺលើកកូនឡើងឱ្យភើក្រោយពេលមឹមឆ្អែត និងមិនក្រឡុកដបទឹកដោះគោឡើង-ចុះខ្លាំងៗ តែចូរប្រើវិធីលុញដបឱ្យវិលជុំវិញដោយបាតដៃទាំងសងខាងវិញ នឹងធ្វើឱ្យម្សៅទឹកដោះគោ និងទឹកចូលគ្នាបានដោយមិនកើតមានពពុះ។

4.ឆុងទឹកដោះគោច្រើនជ្រុល រហូតកូនបៅ មិនអស់… ការពិត គួរឆុងល្មមតែកូនបៅអស់ទើបជាការប្រសើរឆុងទឹកដោះគោល្មមតែកូនបៅអស់ ឬបើកូនបៅមិនអស់ ទឹកដោះគោដែលសល់ អាចរក្សាទុកបានក្នុងសីតុណ្ហភាពប្រក្រតី តែមិនគួរលើសពី 1ម៉ោងឡើយ។ ក្រៅពីនេះ ការឆុងទឹកដោះគោឱ្យកូនបៅច្រើនជ្រុលពេក អាចធ្វើឱ្យកើតសភាវ Overfeeding ឬរាងកាយបានទទួលទឹកដោះគោលើសពីចាំបាច់ ដូច្នេះឆុងល្មមតែកូនអាចបៅអស់ ដោយអ្នកម្ដាយអាចគណនាបរិមាណទឹកដោះគោដែលកូនតូចត្រូវការក្នុង 1ពេលៗ វានឹងជួយបន្ថយអាការក្អែរទឹកដោះ ឬក្អួតចេញមកវិញចំពោះទារកអាយុ 0-3ខែបាន។ មានបច្ច័យជាច្រើនដែលធ្វើឱ្យអ្នកម្ដាយចាំបាច់ត្រូវតែឆុងទឹកដោះគោឱ្យកូនបៅ មិនថាតែអ្នកម្ដាយដែលប្រសូតដោយការវះកាត់ មិនសូវមានទឹកដោះ ឬទឹកដោះក្រចេញ ឬអ្នកម្ដាយដែលមានបញ្ហាខាងសុខភាពក្ដី តែសូមកុំភ្លេចថា “ទឹកដោះម្ដាយ” គឺជាអាហារដ៏ល្អបំផុតសម្រាប់កូនតូចវ័យ 0-6ខែ ហើយទឹកដោះម្ដាយ គឺជាអាហារចម្បងដែលល្អចំពោះកូនខ្លាំងបំផុត៕

September 23, 2019

ផ្លែដូងក្រអូបខ្មែរកំពុងមានទីផ្សារល្អ និងត្រៀមនាំចេញទៅទីផ្សារក្រៅប្រទេស

ដូងក្រអូបបានក្លាយជាផ្លែឈើពាណិជ្ជកម្មមួយក្នុងចំណោមផ្លែឈើចំនួន 6មុខដែលក្រសួងកសិកម្ម រុក្ខាប្រមាញ់ និងនេសាទបានប្រកាសឱ្យកសិករម្ចាស់ចម្ការ ម្ចាស់កសិដ្ឋាន ម្ចាស់សហគ្រាស និងសិប្បកម្មកែច្នៃផ្លែឈើដែលមានបំណងចង់នាំចេញផលិតផលរបស់ខ្លួនទៅក្រៅប្រទេស ជាពិសេសប្រទេសចិននោះ អាចទំនាក់ទំនងដាក់ពាក្យស្នើសុំចុះបញ្ជីនៅអគ្គនាយកដ្ឋានកសិកម្មបាន។

យោងតាមសេចក្តីប្រកាសរបស់ក្រសួងកសិកម្មរុក្ខាប្រមាញ់ និងនេសាទ កាលពីពេលថ្មីៗកន្លងទៅនេះ បានឱ្យដឹងថា ដំណាំកសិកម្មហូបផ្លែចំនួន6មុខ ដែលរួមមានផ្លែសា្វយស្រស់ ផ្លែមៀនប៉ៃលិនម្រេច ផ្លែស្រកានាគ ទឹកមាត់ត្រចៀកកាំ និងដូងក្រអូប ត្រូវបានជំរុញឱ្យមានការនាំចេញទៅកាន់ទីផ្សារប្រទេសចិននៅឆ្នាំ2020 ដែលនេះជាដំណឹងដ៏ល្អបំផុតមួយសម្រាប់ម្ចាស់រោងចក្រកែច្នៃ និងវេចខ្ចប់ផលិតផលកសិកម្ម និងកសិករដែលដាំដំណាំហូបផ្លែផ្សេង។នៅក្នុងសេចក្តីប្រកាសដដែលក៏បានបញ្ជាក់ផងដែរថា មុននឹងអាចធ្វើការនាំចេញបាន ប្រទេសចិនបានតម្រូវឱ្យប្រទេសកម្ពុជាធ្វើតាមលក្ខខណ្ឌអនាម័យផ្សេងៗឱ្យត្រឹមត្រូវ។ អាស្រ័យហេតុនេះ អគ្គនាយកដ្ឋានកសិកម្មបានអំពាវនាវដល់កសិករនិងម្ចាស់រោងចក្រកែច្នៃ និងវេចខ្ចប់ ដែលមានបំណងចង់នាំចេញផលិតផលខាងលើទៅប្រទេសចិននោះអាចទំនាក់ទំនងដាក់ពាក្យស្នើសុំចុះបញ្ជីនៅនាយកដ្ឋានការពារដំណាំអនាម័យនៃអគ្គនាយកដ្ឋានកសិកម្ម ចាប់ពីថ្ងែជូនដំណឹងនេះតទៅរៀងរាល់ម៉ោងធ្វើការ ដើម្បីឱ្យអគ្គនាយកដ្ឋានកសិកម្មចាត់មន្ត្រីជំនាញចុះត្រួតពិនិត្យ និងបណ្តុះបណ្តាលកែតម្រូវបច្ចេកទេសជូនតាមជាក់ស្តែង ដើម្បីធានានូវអនុលោមភាពតាមលក្ខខណ្ឌអនាម័យរបស់ប្រទេសចិន។ អាស្រ័យហេតុនេះហើយ ទើបកសិករអ្នកដាំដើមដូងក្រអូបមួយចំនួនបាននិងកំពុងពង្រីកការដាំដើមដូងក្រអូបរបស់ខ្លួនបន្ថែមដើម្បីនាំចេញទៅកាន់ប្រទេសចិន។

លោក ពៅ ប៊ុនថូ ជាម្ចាស់កសិដ្ឋានដូងក្រអូបនៅភូមិវាលធំ ឃុំជើងគោ ស្រុកព្រៃនប់ ខេត្ពព្រះសីហនុបានរៀបរាប់ប្រាប់កាសែត ឡារ៉ែន ពាណិជ្ជថា៖“មូលហេតុដែលខ្ញុំ និងកសិករខ្មែរយើងមួយចំនួនចាប់អារម្មណ៍ងាកមកដាំដើមដូងក្រអូបមួយរយៈកន្លងមកនេះ គឺដោយសារកត្តាតម្លៃទីផ្សារដូងក្រអូបពុំមានការធ្លាក់ថ្លៃខ្លាំងដូចកសិផលផ្សេងៗឡើយ ព្រោះផ្លែដូងក្រអូបនេះវាពេញនិយមសម្រាប់ការបរិភោគរបស់ពលរដ្ឋទូទៅ ហើយរសជាតិវាមានលក្ខណៈល្អប្រសើរសម្រាប់សុខភាពទៀតផង”។

ម្ចាស់កសិដ្ឋានមានបទពិសោធខាងកសិកម្មរូបនេះបានរៀបរាប់ថា៖“កាលពី 3-4ឆ្នាំមុន នៅស្រុកខ្មែរពុំទាន់មានការបណ្តុះពូជដូងក្រអូបទេ ព្រោះគ្រាប់ពូជបណ្តុះនៅស្រុកយើងធ្វើមិនបានល្អ ដូច្នោះហើយទើបយើងតែងនាំពូជពីថៃមកដាំ ដូចជាកសិដ្ឋានរបស់ខ្ញុំក៏ដាំដូងក្រអូបពូជពីថៃ និងម៉ាឡេស៊ីដែរ ដែលកសិដ្ឋានក្នុងស្រុកយើងគេនាំចូលមកលក់”។

លោក ប៊ុនថូ បានឱ្យដឹងទៀតថា៖“ដើមដូងក្រអូបនេះមិនពិបាកដាំ និងថែទាំដូចដើមឈើហូបផ្លែផ្សេងៗនោះទេ ពោលគឺវាត្រូវការតែទឹក និងជីបំប៉នគល់តែប៉ុណ្ណោះ ហើយចម្ការរបស់ខ្ញុំមានទីតាំងនៅជិតដៃព្រែកតែម្ដង រឹតតែផ្តល់ភាពងាយស្រួលដល់ការមើលថែទាំទៅទៀត”។

លោកបានឱ្យដឹងថា ចំពោះវិធីដាំវិញ គេត្រូវជីករណ្តៅទំហំ 1ម៉ែត្រ 4ជ្រុង ជម្រៅ 1ម៉ែត្រ បើបានធំ និងជ្រៅជាងនេះរឹតតែល្អ ហើយត្រូវលាយដីល្អជាមួយជីកំប៉ុស កម្ទេចស្លឹកឈើងាប់ដាក់ចូលឱ្យពេញរណ្តៅ។ ដីសម្រាប់ដាំដើមដូងក្រអូបនេះត្រូវមានដង្ហើមទឹករាក់ៗចាប់ពី 3ម៉ែត្រទៅ 8ម៉ែត្រ គិតពីនីវ៉ូទឹកមកដីខាងលើ ជាដីដែលមិនលិចទឹក តែត្រូវមានសំណើមទឹក និងជាតំបន់ដែលឧស្សាហ៍មានភ្លៀងធ្លាក់ទៀតផង។

លោកបានបញ្ជាក់ថា គេចាំបាច់ត្រូវរៀបប្រព័ន្ធបន្តក់ទឹក ឬប្រព័ន្ធទឹកសាច ឬធ្វើប្រឡាយទឹក ដែលត្រូវចំណាយដើមទុនច្រើនបន្តិច ដោយគេត្រូវបន្តក់ទឹកលើរណ្ដៅកូនដូងក្រអូបជារៀងរាល់ថ្ងៃ នៅរដូវក្តៅ ឬបើទឹកឱ្យសាចដាក់រៀងរាល់ 3ថ្ងៃម្តង ព្រោះប្រព័ន្ធបន្តក់ទឹកនេះវាជួយសម្លាប់សត្វល្អិត នៅខាងក្រោមឫសដូង និងជួយឱ្យដើមដូងលូតលាស់បានល្អ ឆាប់ចេញផ្លែ ផ្លែបានច្រើន ធំៗល្អ និងផ្លែមានទឹកច្រើន។

ការថែទាំ គេត្រូវថែមជីកំប៉ុស និងជី NPK ភ្ជួរជ្រោយដី និងកាត់ស្មៅរៀងរាល់ឆ្នាំ ដាក់អំបិលជុំវិញគល់ដើម្បីការពារពីសត្វល្អិតស៊ីឫសដួង និងបន្សាបជាតិអាស៊ីតរបស់ដី។ ជីកំប៉ុស្ត៍វានឹងជួយដល់ការលូតលាស់បានល្អ ធ្វើឱ្យទឹកដូងមានរសជាតិឆ្ងាញ់ក្រអូប សាច់ក្រាស់ និងផ្អែមឆ្ងាញ់ មានសារធាតុរ៉ែនិងវីតាមីនច្រើន ជាពិសេសធ្វើឱ្យដើមដូងមានសុខភាពរឹងមាំល្អ។

លោកបានប្រាប់ទៀតថា កាលពីពេលលោកយកដូងក្រអូបពីថៃមកដាំ ពេលនោះលោកមិនបានរៀនពីបច្ចេកទេសដាំដុះទេ តែលោកបានស្វែងរកបទពិសោធបច្ចេកទេសក្នុងការដាំ និងថែទាំពីចម្ការរបស់អ្នកស្រុកជិតខាង។ ចំពោះការដាំវិញ នៅខេត្តព្រះសីហនុ និងកោះកុង ក្នុង 1ហិកតាគេដាំបាន 100ដើម (គេដាំខុសគ្នាតាមតំបន់) បើនៅត្បូងឃ្មុំ និងកំពង់ចាមវិញ គេដាំ 1ហិកតាបាន 150ដើម ទៅតាមទម្លាប់របស់ពូកគេ។

ជាទូទៅដូងក្រអូបឱ្យផលបានពេញ 1ឆ្នាំ ប៉ុន្តែការទទួលបានផលពីដូងនេះ បានច្រើន ឬតិច វាក៏អាស្រ័យទៅលើការថែទាំ និងនៅតាមរដូវកាលផងដែរ។ រដូវវស្សាដូងឱ្យផលបានច្រើន និងល្អ តែទិន្នផលនឹងថយចុះនៅរដូវប្រាំង ដោយសារអាកាសធាតុក្តៅ និងមានទឹកមិនគ្រប់គ្រាន់។

លោក ប៊ុនថូប្រាប់ថា៖“ដូងក្រអូប 1ដើមនឹងហុចផលឱ្យក្រោយរយៈពេលថែទាំយ៉ាងយូរ 3 ទៅ 4ឆ្នាំ ដោយនឹងទទួលបានទិន្នផលពី 180 ទៅ 200ផ្លែ ឬលើសពីនេះក្នុង 1ឆ្នាំ”។លោក ប៊ុនថូ បានបញ្ជាក់ឱ្យដឹងទៀតថា៖“ដើមដូងក្រអូបគេអាចទទួលផលបានរយៈពេល 6-7ខែក្នុង 1ឆ្នាំ គឺចាប់ពីខែ12 ដល់ខែ6 ដល់ខែ7 ទិន្នផលនឹងចាប់ផ្តើមថយចុះ។ សម្រាប់ខ្ញុំ ការចែកចាយលក់មិនលំបាកទេ គឺមានម៉ូយស្រាប់ ព្រោះលក់ជាង 10ឆ្នាំមកហើយ និងមានម៉ូយនៅគ្រប់ខេត្ត ដូចជាខេត្តព្រះសីហនុ កោះកុង និងនៅភ្នំពេញក៏មាន”។

លោក ប៊ុនថូ បានបញ្ជាក់ឱ្យដឹងថា៖“ខ្ញុំមានផ្ទៃដីដាំដុះចំនួន 45ហិកតា ស្មើនឹង 4,500ដើម ខ្ញុំអាចរកចំណូលបានតាមរយៈចម្ការដូងក្រអូបនេះ ដោយមានបុគ្គលិក កម្មករ មើលការខុសត្រូវថែទាំចំនួន 30នាក់។ ខ្ញុំក៏មានបំណងចង់នាំផ្លែដូងក្រអូបរបស់ខ្ញុំទៅកាន់ទីផ្សារប្រទេសចិនដែរ ព្រោះថា អាចនឹងលក់បានថ្លៃជាងលក់ក្នុងស្រុក និងចង់ដឹងថា តើផលិតផលរបស់ខ្ញុំត្រូវនឹងស្តង់ដាអនាម័យដែលគេកំណត់ឬទេ? ម្យ៉ាងទៀតបច្ចុប្បន្ននេះខ្ញុំកំពុងពង្រីកការដាំដូងក្រអូបចំនួន 3,000ដើមថែមទៀត ព្រោះវាកំពុងតែមានតម្រូវការទីផ្សារល្អ និងចង់ជំរុញការនាំចេញទីផ្សារក្រៅផងដែរ”៕

September 23, 2019

7វិធីការពារខ្លួន ពីអាការ “រោគប្រតិកម្មចាញ់ អាកាសធាតុ”

រោគប្រតិកម្មចាញ់អាកាសធាតុនេះ អាចមានមនុស្សជាច្រើនគិតថា វាត្រឹមតែជារោគស្រាលៗ គ្រាន់តែចៀសវាងមិនឱ្យត្រូវលម្អងភ្លៀងក៏ប្រហែលជាមិនឈឺបាត់ទៅហើយ។ តើវាជាការងាយស្រួលដល់ថ្នាក់ហ្នឹងមែនទេ?ប្រសិនបើមានអាការក្អក ហូរទឹកសំបោរ រលាកច្រមុះ រមាស់បំពង់ក និងក្អកស្ងួតអស់រយៈពេលពី1-2ខែ នោះអ្នកត្រូវប្រញាប់ទៅជួបគ្រូពេទ្យជាបន្ទាន់ ដើម្បីរកមូលហេតុនៃជំងឺពិតប្រាកដ។

អាចដែលទេ អ្នកកំពុងតែកើតជំងឺប្រតិកម្មចាញ់អាកាសធាតុ ? ដើម្បីឱ្យជាក់ច្បាស់អ្នកត្រូវតែទៅពិនិត្យសុខភាពនៅមន្ទីរពេទ្យ មិនដូច្នេះទេវាអាចបណ្ដាលឱ្យសុខភាពអ្នកកាន់តែទ្រុតទ្រោម ហើយចំណាយថវិកាក្នុងការព្យាបាលកាន់តែច្រើនថែមទៀត។ “រោគប្រតិកម្មចាញ់អាកាសធាតុ” បើមិនព្យាបាល ឬព្យាបាលមិនបានត្រឹមត្រូវទេ ក៏បណ្ដាលឱ្យកើតរោគជំងឺផ្សេងទៀតដូចជា ជំងឺរលាកភ្នាសរន្ធច្រមុះរាំរ៉ៃ ឬកើតឫសដូងច្រមុះជាដើម។ ជំងឺទាំងអស់នេះចាំបាច់ត្រូវការវះកាត់ដើម្បីព្យាបាល និងអាចធ្វើឱ្យអ្នកឈឺចុកចាប់នៅពេលក្រោយផងដែរ។ អ្នកក៏កាន់តែខាតបង់ពេលវេលា និងប្រាក់កាសក្នុងការព្យាបាលជំងឺទាំងនោះ ប្រសិនបើអ្នកប្រកាន់ភ្ជាប់នូវទង្វើធ្វេសប្រហែសចំពោះសុខភាព។ ដូច្នេះហើយ នៅក្នុងថ្ងៃនេះ ទស្សនាវដ្តី ឡារ៉ែន សូមណែនាំអំពីវិធីទាំង7យ៉ាងក្នុងការការពារខ្លួនឱ្យរួចផុតពីជំងឺប្រតិកម្មចាញ់នេះ។

1. ចៀសវាងវត្ថុងាយប្រតិកម្មការប្រយ័ត្នមិនប៉ះពាល់វត្ថុដែលធ្វើឱ្យងាយប្រតិកម្ម គឺជាវិធីដែលល្អបំផុត និងជួយដាស់ស្មារតីអ្នកឱ្យប្រុងប្រៀបខ្លួនដូចគ្នា។ អ្វីដែលអ្នកត្រូវប្រយ័ត្នរួមមាន ធូលី វត្ថុកខ្វក់ លម្អងទឹកភ្លៀង និងវត្ថុនៅក្នុងផ្ទះដែលមានធូលីកាន់ជាប់មិនបានសម្អាត។ មួយវិញទៀត អ្នកត្រូវតែធ្វើការសម្អាតក្នុងផ្ទះឱ្យបានស្អាតដូចជា កន្លែងអង្គុយលេង បន្ទប់គេង កន្លែងទទួលទានអាហារ បន្ទប់ចម្អិនអាហារ ឬកន្លែងឃ្លាំងឥវ៉ាន់ និងសម្ភារមិនប្រើប្រាស់ជាដើម។ ចំពោះបន្ទប់គេង អ្នកត្រូវបើកបង្អួចឱ្យមានពន្លឺគ្រប់គ្រាន់ ជាពិសេសធ្វើការសម្អាតផ្លាស់ប្ដូរស្រោមខ្នើយ ភួយ និងពូក 2ដងក្នុងមួយសប្ដាហ៍យ៉ាងហោចណាស់។

2. ចៀសវាងពីសារធាតុឈួលទឹកអប់មានក្លិនខ្លាំង ស្រៃ្បយ៍បាញ់ខ្លួន ផ្សែងធូប ផ្សែងបារី និងផ្សែងរថយន្ដជាដើម ជាសារធាតុដែលមានក្លិនឈួលងាយធ្វើឱ្យរលាកភ្នាស់រន្ធច្រមុះ។ អ្នកគួរតែចៀសវាងយ៉ាងដាច់ខាតពីក្លិនផ្សែងទាំងអស់នេះ ហើយព្រមទាំងចៀសវាងពីកន្លែងណាដែលងាយផ្លាស់ប្ដូរសីតុណ្ហភាពដូចជា បន្ទប់ម៉ាស៊ីត្រជាក់ ឬបន្ទប់ស្ទីម ដែលកាន់តែធ្វើឱ្យរោគជំងឺកម្រើកខ្លាំងឡើង។ ប្រសិនបើអ្នកដើរកាត់កន្លែងដែលមានសីតុណ្ហភាពក្ដៅខ្លាំង នោះអ្នកគប្បីរកកន្លែងត្រជាក់ឈប់មួយសន្ទុះសិន ហើយត្រូវប្រើម៉ាសខ្ទប់ច្រមុះ ដើម្បីការពារការឈួលកម្ដៅ ជាហេតុធ្វើឱ្យជំងឺរបស់អ្នកកាន់តែធ្ងន់ធ្ងរ។

3. ហាត់ប្រាណការធ្វើលំហាត់ប្រាណ គឺដើម្បីបន្ថយការកម្រើករោគជំងឺប្រតិកម្មចាញ់អា-កាសធាតុ ព្រោះវាជាវិធីមួយដែលមានមុខងាររំញោចការលូតលាស់ប្រព័ន្ធភាពស៊ាំនៃសរីរាង្គកាយរបស់មនុស្សយើង។ មិនតែប៉ុណ្ណោះ វាបានជួយឱ្យរាងកាយមានសុខភាពរាងកាយល្អ បូករួមទាំងសុខភាពផ្លូវចិត្តល្អផងដែរ។ ការធ្វើលំហាត់ប្រាណត្រឹមត្រូវបានទៀងទាត់ និងមិនច្រើនពេក មិនតិចពេក គឺជាការបង្កើតភាពស៊ាំដល់រាងកាយបានយ៉ាងប្រសើរ។

4. បរិភោគអាហារដែលមានប្រយោជន៍អាហារដែលមានគុណប្រយោជន៍ ក្រៅពីល្អសម្រាប់រាងកាយហើយនោះ វាក៏បានជួយបំពេញបន្ថែមនូវប្រព័ន្ធស៊ាំការពារជំងឺប្រតិកម្មចាញ់នេះផងដែរ។ ជាពិសេសអាហារដូចជា ប្រូតេអុីន បន្លែ និងផ្លែឈើ គឺសុទ្ធតែធ្វើឱ្យសុខភាពកាន់តែរឹងមាំ។

5. ការគេងសម្រាកគ្រប់គ្រាន់ការគេងឱ្យបានគ្រប់គ្រាន់ គឺជាឱសថដែលមនុស្សតែងតែមើលរំលង។ មនុស្សក្នុងមួយថ្ងៃៗបានប្រើថាមពលក្នុងខ្លួនដើម្បីធ្វើការងារជាច្រើន ដូច្នេះរាងកាយរបស់អ្នកក៏ត្រូវការសម្រាកឱ្យបានគ្រប់គ្រាន់ផងដែរ។ប្រសិនបើរាងកាយហត់នឿយខ្លាំង ខ្វះការសម្រាកវាដូចជាការបើកឱកាសឱ្យជំងឺចូលមកវាយលុកក្នុងរាងកាយ និងខាតបង់ប្រាក់ចំណូល។ ដូច្នេះការគេងឱ្យបានគ្រប់គ្រាន់ មិនតិចជាង6-8 ម៉ោងក្នុងមួយថ្ងៃ គឺជាឱសថដ៏មានប្រសិទ្ធភាពសម្រាប់មនុស្សម្នាក់ៗ ដើម្បីប្រឆាំងទប់ទល់នឹងជំងឺ។

6. ប្រើថ្នាំតាមវេជ្ជបញ្ជាចំពោះអ្នកជំងឺប្រតិកម្មចាញ់អាកាសធាតុ សូមធ្វើការពិគ្រោះ និងពិនិត្យរោគជាមួយគ្រូពេទ្យជំនាញ ដើម្បីឱ្យគ្រូពេទ្យធ្វើរោគវិនិច្ឆ័យ និងផ្ដល់ការប្រើប្រាស់ថ្នាំបានយ៉ាងត្រឹមត្រូវ។ ចៀសវាងការទិញថ្នាំប្រើប្រាស់ដោយខ្លួនឯង ព្រោះវាអាចបង្កគ្រោះថ្នាក់ដល់ភ្នាសច្រមុះរបស់អ្នក។ អ្នកគួរតែតមដាច់ខាតពីការប្រើថ្នាំផ្សះ ឬប្រើថ្នាំបន្ថយការឈឺចាប់។

7. ត្រូវមកពិនិត្យ និងព្យាបាលតាមការណាត់ជួបរបស់គ្រូពេទ្យអ្នកជំងឺដែលត្រូវការការព្យាបាលដោយការចាក់ថ្នាំ ដើម្បីជំរុញភាពប្រព័ន្ធស៊ាំឡើងវិញ គឺតម្រូវឱ្យមានការយកចិត្តទុកដាក់ និងសហការជាមួយគ្រូពេទ្យ អ្នកជំងឺត្រូវមកទទួលការចាក់ថ្នាំឱ្យបានទៀងទាត់តាមការណាត់ជួបរបស់គ្រូពេទ្យ នោះទើបធ្វើឱ្យការព្យាបាលមានប្រសិទ្ធភាពពិតប្រាកដ៕

September 23, 2019

ត្រឹមឆ្នាំ2030 ការអភិវឌ្ឍលំនៅឋាននឹងកើនឡើងដល់ជិតកន្លះលានខ្នង

យោងតាមរបាយការណ៍របស់ក្រុមអ្នកជំនាញស្រាវជ្រាវរបស់ក្រុមហ៊ុនវាយតម្លៃអចលនទ្រព្យVTrust Appraisal ដែលចេញផ្សាយកាលពីពេលថ្មីៗនេះបានបង្ហាញថា នៅក្នុងចំណោមខណ្ឌទាំង14 នៅរាជធានីភ្នំពេញ មានខណ្ឌចំនួន7 បាននិងកំពុងមានសកម្មភាពមមាញឹកក្នុងការសាងសង់សំណង់លំនៅឋាន ដើម្បីផ្គត់ផ្គង់ទៅតាមតម្រូវការដែលនឹងធ្វើឱ្យកើនឡើងរហូតដល់ជិតកន្លះលានខ្នងនៅឆ្នាំ2030។

ឯកសារដែលមានចំណងជើងថា “ភ្នំពេញឆ្នាំ2030” បានបង្ហាញថា លំនៅឋានដែលបាន និងកំពុងសាងសង់នឹងកើនឡើង 3ដងក្នុងរយៈពេល 13ឆ្នាំខាងមុខ។ ក្រុមហ៊ុនវាយតម្លៃខាងលើបានអះអាងថាបច្ចុប្បន្នចំនួនលំនៅឋានសរុបមានចំនួន 150,000ខ្នង ប៉ុន្តែនឹងកើនឡើងដល់ 450,000 នៅឆ្នាំ2030។

របាយការណ៍ដដែលបានបង្ហាញទៀតថា ខណ្ឌទាំង7 ដែលបានជាប់ក្នុងកំណត់ត្រាក្នុងការផ្គត់ផ្គង់លំនៅឋានយ៉ាងសកម្ម ដែលជំរុញឱ្យមានកំណើនលំនៅឋានថ្មីៗនៅក្នុងរាជធានីភ្នំពេញនោះ រួមមាន ខណ្ឌពោធិ៍សែនជ័យ ខណ្ឌសែនសុខ ខណ្ឌដង្កោ ខណ្ឌឫស្សីកែវ ខណ្ឌច្បារអំពៅ ខណ្ឌមាន ជ័យ និងខណ្ឌជ្រោយចង្វារ។

ក្នុងចំណោមខណ្ឌទាំងនេះ ខណ្ឌពោធិ៍សែនជ័យ បច្ចុប្បន្នមានការផ្គត់ផ្គង់ធំជាងគេ ដែលមានផ្ទះជិត 50,000ខ្នង។ ខណ្ឌសែនសុខ និងខណ្ឌដង្កោ មានត្រឹមតែប្រមាណជាង 2ម៉ឺនខ្នងប៉ុណ្ណោះ តែទោះយ៉ាងណាក្ដី របាយការណ៍របស់ វីត្រាស់ បានព្យាករថា មានការរីកចម្រើនយ៉ាងខ្លាំងនៅខណ្ឌដង្កោ ដែលការព្យាករនេះបានអះអាងថា នឹងមានផ្ទះជិត 100,000ខ្នងនៅឆ្នាំ2030។

របាយការណ៍របស់ VTrust នេះបានរំពឹងថា ជាមធ្យម ការផ្គត់ផ្គង់លំនៅឋានបានកើនដល់25,000ខ្នងក្នុង 1ឆ្នាំ និងមានអត្រាកំណើន 9%នៃការផ្គត់ផ្គង់លំនៅឋាន ដោយសារកំណើនប្រជាសាស្ត្រ និងការកើនឡើងនូវប្រាក់ចំណូលរបស់ប្រជាពលរដ្ឋ ស្របពេលកំណើនសេដ្ឋកិច្ចកម្ពុជានៅតែរក្សាបានភាពល្អប្រសើរ។

លោក ហ៊ឹម សីហា នាយកផ្នែកស្រាវជ្រាវរបស់ V-Trust Appraisal ដែលជាអ្នកនិពន្ធរបាយការណ៍ “ភ្នំពេញឆ្នាំ2030” បានលើកឡើងថា រាជធានីភ្នំពេញបានមើលឃើញកំណើនប្រជាជនប្រមាណ 4%ពីមួយឆ្នាំទៅមួយឆ្នាំ នៅពេលដែលប្រជាជនកាន់តែស្វែងរកឱកាសនៅក្នុងទីក្រុង ហើយប្រជាជនទាំងអស់នេះជាអ្នកចំណូលថ្មីមកពីតាមបណ្តាខេត្តផ្សេងៗ

នៅក្នុងប្រទេស ជាពិសេសខេត្តនៅជាប់ភ្នំពេញ។លោកបានបន្ថែមទៀតថា៖“ការកើនឡើងយ៉ាងឆាប់រហ័សនៃចំនួនប្រជាជននៅក្នុងទីក្រុង និងការកើនឡើងនៃលំហូរជនអន្តោប្រវេសន៍ចូលមកថ្មីៗ ដែលមកពីតំបន់ផ្សេងៗនៃប្រទេស ដើម្បីមកតាំងទីលំនៅក្នុងទីក្រុង នឹងជំរុញតម្រូវការផ្ទះកាន់តែច្រើននៅទីក្រុងភ្នំពេញ”។

លោក សីហា បានមានប្រសាសន៍ថា៖“ដូច្នេះកំណើននៃចំនួនប្រជាសាស្ត្រទាំងនេះ គឺតម្រូវឱ្យមានការផ្គត់ផ្គង់លំនៅឋានជាចាំបាច់ ខណៈដែលការផ្តល់កម្ចីទិញផ្ទះពីធនាគារឯកជនក៏ កាន់តែមានលក្ខខណ្ឌងាយស្រួលដោយការបង់រំលស់ ផ្តល់ឱកាសដល់ប្រជាជនសម្រាប់វិស័យលំនៅឋានដែលបានជំរុញឱ្យមានលទ្ធភាពអាចទិញផ្ទះបាន ហើយកត្តានេះបានជំរុញកំណើនការសាងសង់ និងផ្គត់ផ្គង់បន្តទៀត”។

លោក ង៉ែត ជូ ទីប្រឹក្សាសេដ្ឋកិច្ចនៃក្រុមហ៊ុន Emerging Markets Consulting (EMC) ត្រូវបានគេស្រង់សម្តីថា៖“មានការព្រួយបារម្ភនៅក្នុងចំណែកទីផ្សារលំនៅឋានដែលមានតម្លៃសមរម្យ។ព្រោះតម្រូវការកាន់តែច្រើនឡើងៗសម្រាប់កម្មសិទ្ធិលើអចលនទ្រព្យ បានជំរុញឱ្យតម្លៃអចលនទ្រព្យកើនឡើងក្នុងរយៈពេលប៉ុន្មានឆ្នាំចុងក្រោយនេះ”។

លោកជូបានអះអាងថា បច្ចុប្បន្នតម្លៃដីធ្លីកំពុងកើនឡើងចន្លោះពី 7-10%ក្នុង 1ឆ្នាំអាស្រ័យលើទីតាំង។ ប្រទេសកម្ពុជាអាចនឹងប្រឈមនឹងវិបត្តិលំនៅឋាននាពេលអនាគត ជាពិសេសក្នុងចំណោមប្រជាជនដែលមានប្រាក់ចំណូលទាប។

លោក ង៉ែត ជូ បានថ្លែងថា ៖“ទោះជាយ៉ាងណា ការផ្គត់ផ្គង់លំនៅឋានដែលមានតម្លៃសមរម្យនាពេលបច្ចុប្បន្ននៅក្នុងប្រទេសកម្ពុជា មិនឆ្លើយតបនឹងកម្រិតជីវភាពរបស់កម្មករទេ ព្រោះផ្ទះមួយខ្នងត្រូវចំណាយប្រាក់យ៉ាងតិច 25,000ដុល្លារ។ វិបត្តិនេះបានកើតឡើងរួចហើយនៅក្រុងហុងកុង ដូច្នេះកម្ពុជាគួរតែរៀន និងត្រៀមខ្លួនជាមុន។ បើនិយាយពីអត្រាតម្លៃដីធ្លីនៅកម្ពុជា នៅតែទាបបើប្រៀបធៀបទៅនឹងតំបន់ផ្សេងទៀត”។

លោកបានលើកឡើងដោយយកទិន្នន័យរបស់Global Property Guide ដែលថា តម្លៃដីធ្លីជាមធ្យមនៅទីក្រុងក្នុងប្រទេសកម្ពុជា មានតម្លៃប្រមាណ 2,900ដុល្លារក្នុង 1ម៉ែត្រការ៉េ។ នៅប្រទេសថៃមានតម្លៃ 3,90០ដុល្លារ នៅប្រទេសឥណ្ឌាមានតម្លៃ 10,90០ដុល្លារ នៅប្រទេសចិនមានតម្លៃ 11,800ដុល្លារ នៅសិង្ហបុរីមានតម្លៃ 13,700ដុល្លារ និងនៅក្រុងហុងកុងមានតម្លៃ 28,500ដុល្លារក្នុង1ម៉ែត្រការ៉េ៕

September 23, 2019

ក្រសួងការងារ ប្រកាសព័ត៌មានការកំណត់ប្រាក់ឈ្នួលអប្បបរមាសម្រាប់កម្មករ ឆ្នាំ2020

ក្រសួងការងារ និងបណ្ដុះបណ្ដាលវិជ្ជាជីវៈបានចេញសេចក្ដីប្រកាសព័ត៌មាន ស្ដីពីការកំណត់ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើងសម្រាប់ឆ្នាំ2020 ហើយនៅថ្ងៃទី20 ខែកញ្ញា ឆ្នាំ2019 កន្លងទៅនេះ ទឹកប្រាក់បានកើនឡើងដល់ 190ដុល្លារក្នុង 1ខែ។ បើគិតទាំងប្រាក់អត្ថប្រយោជន៍ផ្សេងទៀតដែលកម្មករនិយោជិតធ្លាប់ទទួលបានកន្លងមក ដែលត្រូវបានរក្សាទុកនៅដដែលនោះ ឃើញថា ជាមធ្យមកម្មករនិយោជិតម្នាក់ៗនឹងទទួលបានប្រាក់បៀវត្សរ៍យ៉ាងតិចចំនួនពី 207ដុល្លារអាមេរិក ដល់ 218ដុល្លារអាមេរិកក្នុង 1ខែ។

ចំនួនទឹកប្រាក់ដែលបានកំណត់នេះបានមកពីក្រុមប្រឹក្សាជាតិប្រាក់ឈ្នួលអប្បបរមាបានអនុវត្តនូវនីតិវិធីបោះឆ្នោតជាសម្ងាត់ ដោយយោងមាត្រា12 នៃច្បាប់ស្តីពីប្រាក់ឈ្នួលអប្បបរមានាកិច្ចប្រជុំព្រឹកថ្ងៃទី20 ខែកញ្ញា ឆ្នាំ2019កន្លងទៅ ដើម្បីគាំទ្រតួលេខនីមួយៗដោយទទួលបានលទ្ធផលដូចខាងក្រោម៖
*តួលេខចំនួន 195ដុល្លារអាមេរិក ទទួលបានសំឡេងឆ្នោត 8សំឡេង លើ51សំឡេង
*តួលេខចំនួន 187ដុល្លារអាមេរិក ទទួលបានសំឡេងឆ្នោត 43សំឡេង លើ 51សំឡេង
*តួលេខចំនួន 186ដុល្លារអាមេរិក ទទួលបានសំឡេងឆ្នោត 0សំឡេង លើ 51សំឡេង។

ដូចនេះក្រុមប្រឹក្សាជាតិប្រាក់ឈ្នួលអប្បបរមាបានស្នើតួលេខចំនួន 187ដុល្លារអាមេរិកជូនរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីធ្វើការពិនិត្យសម្រេចលើប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ2020។

ក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ជូនថា ក្រុមប្រឹក្សាជាតិប្រាក់ឈ្នួលអប្បបរមាដែលជាយន្តការត្រីភាគី និងមានសមាជិកជាតំណាងភាគីកម្មករនិយោជិតចំនួន 17រូប តំណាងភាគីនិយោជកចំនួន 17រូប និងតំណាងភាគីរាជរដ្ឋាភិបាលចំនួន 17រូប បានបើកកិច្ចប្រជុំដំបូងនៅថ្ងៃទី29 ខែសីហា ឆ្នាំ2019 និងបានប្រជុំផ្ទៃក្នុងចំនួន 8លើក កិច្ចប្រជុំទ្វេភាគីចំនួន 6លើក និងកិច្ចប្រជុំត្រីភាគីចំនួន 6លើក។

កិច្ចប្រជុំជាច្រើនលើក ភាគីពាក់ព័ន្ធមិនបានឯកភាពគ្នាជាឯកច្ឆន្ទលើតួលេខណាមួយឡើយ ដោយភាគីតំណាងកម្មករនិយោជិតរក្សាតួលេខចុងក្រោយរបស់ខ្លួន 195ដុល្លារអាមេរិក ភាគីតំណាងនិយោជករក្សាតួលេខ 186ដុល្លារអាមេរិក និងភាគីរាជរដ្ឋាភិបាលដោយឈរលើលក្ខណៈបច្ចេកទេស និងវិទ្យាសាស្ត្រកំណត់យកតួលេខ 187ដុល្លារអាមេរិក។

យោងរបាយការណ៍របស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងយោងលើសក្តានុពលនៃកំណើនផលិតភាពតាមរយៈការប្រសើរឡើងនៃសុខដុមរមនានៃទំនាក់ទំនងវិជ្ជាជីវៈ និងសុខុមាលភាពរបស់បងប្អូនកម្មករនិយោជិត សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានសម្រេចបន្ថែមទឹកប្រាក់ចំនួន 3ដុល្លារអាមេរិកលើទឹកប្រាក់ចំនួន 187អាមេរិក។

ដូច្នេះចាប់ពីថ្ងៃទី1 ខែមករា ឆ្នាំ2020 តទៅ កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងនឹងទទួលបានប្រាក់ឈ្នួលអប្បបរមាចំនួន 190ដុល្លារអាមេរិក ក្នុង 1ខែ ចំពោះកម្មករនិយោជិតពេញសិទ្ធិ និងចំនួន 185ដុល្លារអាមេរិក ក្នុង 1ខែចំពោះកម្មករនិយោជិតសាកល្បង។

ទន្ទឹមនឹងនេះ ប្រាក់អត្ថប្រយោជន៍ផ្សេងទៀត ដែលកម្មករនិយោជិតធ្លាប់ទទួលបានកន្លងមក ត្រូវបានរក្សាទុកនៅដដែល មានដូចជា ប្រាក់សោហ៊ុយធ្វើដំណើរ និងស្នាក់នៅចំនួន 7ដុល្លារអាមេរិក ក្នុង 1ខែ ប្រាក់រង្វាន់ធ្វើការទៀងទាត់ចំនួន 10ដុល្លារអាមេរិកក្នុង 1ខែ ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន 2,000រៀលក្នុង 1ថ្ងៃ ឬការទទួលបានបាយមួយពេលដោយឥតគិតថ្លៃ និងប្រាក់រង្វាន់អតីតភាពការងារចំនួនពី 2ដុល្លារអាមេរិកដល់ 11ដុល្លារអាមេរិកក្នុង 1ខែ សម្រាប់កម្មករនិយោជិតដែលបានធ្វើការចាប់ពីឆ្នាំទី2 ដល់ឆ្នាំទី11។ ដូចនេះ ជាមធ្យមកម្មករនិយោជិតម្នាក់ៗនឹងទទួលបានប្រាក់បៀវត្សរ៍យ៉ាងតិចចំនួនពី 207ដុល្លារអាមេរិក ដល់ 218ដុល្លារអាមេរិកក្នុង 1ខែ។

ក្រសួងក៏សូមថ្លែងអំណរគុណដ៏ជ្រាលជ្រៅចំពោះសម្តេចតេជោ ហ៊ុន សែន នាយករដ្ឋមន្ត្រី ដែលបានសម្រេចផ្តល់ប្រាក់បន្ថែមចំនួន 3ដុល្លារអាមេរិកលើតួលេខដើមរបស់ក្រុមប្រឹក្សាជាតិប្រាក់ឈ្នួលអប្បបរមា ដែលការបន្ថែមនេះនឹងរួមចំណែកធ្វើឱ្យជីវភាពរស់នៅរបស់បងប្អូនកម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងក៏ដូចជាក្រុមគ្រួសារកាន់តែមានភាពល្អប្រសើរឡើងជាងមុន៕

September 23, 2019

ពាណិជ្ជកម្មឆ្លងកាត់ព្រំដែន នឹងធ្វើទំនើបកម្មបច្ចេកវិទ្យាឌីជីថលលែងប្រើក្រដាសស្នាម

រដ្ឋលេខាធិការក្រសួងពាណិជ្ជកម្ម បានឱ្យដឹងថា កម្ពុជាបានត្រៀមខ្លួនរួចជាស្រេច ដើម្បីអនុវត្តកិច្ចសម្រួលពាណិជ្ជកម្មឆ្លងកាត់ព្រំដែនដោយមិនបាច់ប្រើក្រដាសស្នាមដែលត្រូវបានចុះហត្ថ លេខាកាលពី2ឆ្នាំមុន តាមរយៈការចូលជាសមាជិកសន្ធិសញ្ញាអង្គការសហប្រជាជាតិ ស្តីពីប្រតិបត្តិការនេះនៅតំបន់អាស៊ីប៉ាស៊ីហ្វិក នៃការបង្កើតគណៈកម្មាធិការជាតិបញ្ជរតែមួយ និងការប្រើប្រាស់ច្បាប់ស្តីពីពាណិជ្ជកម្មអេឡិចត្រូនិក ដែលបច្ចុប្បន្នកំពុងរង់ចាំរដ្ឋសភាជាតិធ្វើការអនុម័តដើម្បីដាក់ឱ្យប្រើប្រាស់ជាផ្លូវការ។

លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានលើកឡើងថា៖“សក្តានុពល និងសារៈសំខាន់នៃកិច្ចសម្រួលពាណិជ្ជកម្មឆ្លងកាត់ព្រំដែនដោយមិនបាច់ប្រើក្រដាសស្នាម សម្រាប់បម្រើឱ្យការអភិវឌ្ឍសេដ្ឋកិច្ចឌីជីថលនៅកម្ពុជា និងការជំរុញប្រសិទ្ធភាព គណនេយ្យភាព និងតម្លាភាពនៃលំហូរពាណិជ្ជកម្មនៅតាមប្រទេសក្នុងតំបន់ដើម្បីបង្កើតភាពសុខដុមនីយកម្មសម្រាប់ពិភពលោកក្នុងរយៈពេលយូរអង្វែង និងដើម្បីអនុវត្តកិច្ចព្រមព្រៀងដែលរដ្ឋាភិបាលបានចាប់ផ្តើមគំនិតផ្តួចផ្តើមជាច្រើន ដែលមានគោលបំណងធ្វើឱ្យនីតិវិធីរដ្ឋបាលមានលក្ខណៈកាន់តែប្រសើរឡើង”។

លោកជំទាវ រដ្ឋលេខាធិការ បានជម្រាបជូនអំពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការជំរុញពាណិជ្ជកម្មឆ្លងកាត់ព្រំដែនដោយមិនបាច់ប្រើក្រដាសស្នាម តាមរយៈការកែសម្រួលនីតិវិធីរដ្ឋបាល ការធ្វើទំនើបកម្មប្រព័ន្ធស្វ័យប្រវត្តិកម្មទិន្នន័យគយ (ASYCUDA) ការដាក់ចេញនូវកំណែ ទម្រង់និងវិធានការសម្រួលពាណិជ្ជកម្ម ការធ្វើបច្ចុប្បន្នភាព និងការចងក្រងច្បាប់ស្តីពីពាណិជ្ជកម្មអេឡិចត្រូនិក ដោយដាក់ឱ្យដំណើរការយុទ្ធសាស្ត្រសមាហរណកម្មពាណិជ្ជកម្ម (CTIS) ឆ្នាំ2019-2023។

លោកជំទាវ បានមានប្រសាសន៍ថា “Asycuda គឺជាប្រព័ន្ធកំព្យូទ័រដែលត្រូវបានរចនាឡើង ដោយសន្និសីទអង្គការសហប្រជាជាតិ ស្តីពីពាណិជ្ជកម្ម និងការអភិវឌ្ឍ (UNCTAD) ដើម្បីគ្រប់គ្រង ទំនៀមទម្លាប់របស់ប្រទេស ដោយកម្ពុជានឹងបង្កើតគណៈកម្មាធិការជាតិមួយសម្រាប់ច្រកចេញ-ចូលតែមួយ និងច្បាប់ពាណិជ្ជកម្មអេឡិចត្រូនិកដែលឥឡូវនេះកំពុងរង់ចាំការអនុម័តនៅរដ្ឋសភា។ កិច្ចព្រមព្រៀងក្របខ័ណ្ឌនេះកំពុងជួយប្រទេសកម្ពុជាក្នុងការអភិវឌ្ឍសេដ្ឋកិច្ចឌីជីថលរបស់ខ្លួនទន្ទឹមនឹងការលើកកម្ពស់ប្រសិទ្ធភាពគណនេយ្យភាព និងតម្លាភាពក្នុងពាណិជ្ជកម្ម។

លោកជំទាវ តឹករ៉េត កំរង ក៏បានអំពាវនាវឱ្យដៃគូអភិវឌ្ឍន៍ វិស័យឯកជន និងមន្ត្រីអន្តរក្រសួងប្រើប្រាស់វេទិកានេះធ្វើការត្រួតពិនិត្យ និងពិភាក្សាឱ្យបានផុសផុលទៅលើរបាយការណ៍សិក្សាចងក្រងឡើងដោយអង្គការ UNESCAP ស្តីពីសេចក្តីព្រាងសកម្មភាពសម្រាប់ពាណិជ្ជកម្មឆ្លងព្រំដែនដោយមិនប្រើក្រដាសស្នាមនៅកម្ពុជា ដើម្បីបង្កើតជាផែនការអាទិភាពក្នុងរយៈពេលខ្លី សំដៅកៀរគរប្រភពធនធាន ជាពិសេសជំនួយសម្រាប់ពាណិជ្ជកម្ម (Aid-for-trade) សម្រាប់គាំទ្រការអនុវត្តនាពេលអនាគត។

សូមបញ្ជាក់ថា កិច្ចព្រមព្រៀងក្របខ័ណ្ឌស្តីពីការសម្របសម្រួលពាណិជ្ជកម្មឆ្លងព្រំដែនដោយមិនបាច់ប្រើក្រដាសស្នាមនៅតំបន់អាស៊ី និងប៉ាស៊ីហ្វិកត្រូវបានអនុម័តនៅខែឧសភា ឆ្នាំ2016 ដោយសមាជិក 25 ប្រទេសនៃសេដ្ឋកិច្ច អាស៊ី-ប៉ាស៊ីហ្វិក បន្ទាប់ពីមានការពិគ្រោះយោបល់ និងការចរចាយ៉ាងល្អិតល្អន់អស់រយៈពេល 4ឆ្នាំ។ ឥឡូវនេះសមាជិកកើនដល់ចំនួន 53ប្រទេសនៃគណៈកម្មការសេដ្ឋកិច្ច និងសង្គមរបស់អង្គការសហប្រជាជាតិសម្រាប់អាស៊ី និងប៉ាស៊ីហ្វិក (UNESCAP)។

នៅក្នុងសេចក្តីថ្លែងការណ៍នាពេលថ្មីៗនេះ UNESCAP បានបញ្ជាក់ថា ដើម្បីឈានទៅមុខ លើការធ្វើឌីជីថលពាណិជ្ជកម្មនៅទូទាំងតំបន់ វាចាំបាច់ត្រូវធ្វើឱ្យមានស្តង់ដាបច្ចេកទេស និងច្បាប់ ដែលត្រូវអនុវត្តចំពោះទិន្នន័យ និងឯកសារពាណិជ្ជកម្មអេឡិចត្រូនិកកាត់បន្ថយគម្លាតសមត្ថភាពក្នុងចំណោមប្រទេសនានាក្នុងតំបន់ និងបង្កើនកិច្ចសហការ រវាងវិស័យសាធារណៈ និងឯកជន និងបង្កើតវេទិកាអន្តររដ្ឋាភិបាលដ៏រឹងមាំមួយសម្រាប់យន្តការសម្របសម្រួលក្នុងចំណោមប្រទេសក្នុងតំបន់។

សេចក្តីថ្លែងការណ៍ បានបញ្ជាក់ទៀតថា កិច្ចព្រមព្រៀងក្របខ័ណ្ឌនេះ ត្រូវបានឧទ្ទិសយ៉ាងពេញលេញចំពោះការធ្វើឌីជីថលនៃដំណើរការពាណិជ្ជកម្មក្នុងគោលបំណង ដើម្បីធ្វើឱ្យការផ្លាស់ប្តូរ និងការទទួលស្គាល់គ្នាទៅវិញទៅមកនូវទិន្នន័យ និងឯកសារទាក់ទងនឹងពាណិជ្ជកម្ម ក្នុងទម្រង់អេឡិចត្រូនិកក្នុងចំណោមប្រព័ន្ធពាណិជ្ជកម្មគ្មានជាតិ និងថ្នាក់ក្រោមជាតិ។

UNESCAP បានបញ្ជាក់ឱ្យដឹងថា៖“ការផ្លាស់ប្តូរពីក្រដាសទៅជាទិន្នន័យអេឡិចត្រូនិក និងការផ្លាស់ប្តូរព័ត៌មាន ត្រូវបានគេរំពឹងថា នឹងធ្វើឱ្យពាណិជ្ជកម្មអន្តរជាតិមានភាពងាយស្រួល មានតម្លាភាព និងកាន់តែមានប្រសិទ្ធភាព ហើយការដាក់បញ្ចូលកាន់តែច្រើននូវការមិនយកពន្ធលើបរិស្ថាន”។

តាមរយៈការធ្វើពាណិជ្ជកម្មគ្មានក្រដាសស្នាម និងការផ្លាស់ប្តូរទិន្នន័យ និងឯកសារពាណិជ្ជកម្មអេឡិចត្រូនិកគ្មានថ្នេរ បណ្តាប្រទេសនានាអាចបង្កើនភាពប្រកួតប្រជែងរបស់ពួកគេនៅក្នុងទីផ្សារពិភពលោក និងបង្កើនការចូលរួមរបស់ពួកគេនៅក្នុងខ្សែចង្វាក់តម្លៃពិភពលោក។

យោងតាម UNESCAP ការធ្វើពាណិជ្ជកម្មគ្មានឆ្លងកាត់ព្រំដែន រួមជាមួយការអនុវត្តឌីជីថល ពេញលេញនៃកិច្ចព្រមព្រៀងសម្របសម្រួលពាណិជ្ជកម្ម របស់អង្គការពាណិជ្ជកម្មពិភពលោក អាច កាត់បន្ថយថ្លៃដើមពាណិជ្ជកម្មជាង 25% ដោយកាត់បន្ថយចំណាយប្រតិបត្តិការអន្តរជាតិនៅអាស៊ី និងប៉ាស៊ីហ្វិកប្រមាណ 0.6ពាន់ពាន់លានដុល្លារក្នុង 1ឆ្នាំ។ ការនាំចេញប្រចាំឆ្នាំរបស់តំបន់អាចកើនឡើងប្រហែល 250ពាន់លានដុល្លារ។

គួររំឭកដែរថា កាលពីថ្ងៃទី29 ខែសីហា ឆ្នាំ2017កម្ពុជាបានចុះហត្ថលេខាលើក្របខ័ណ្ឌកិច្ច ព្រមព្រៀង ស្តីពីកិច្ចសម្រួលពាណិជ្ជកម្មឆ្លងព្រំដែនដោយមិនបាច់ប្រើក្រដាសស្នាមនៅតំបន់អាស៊ី និងប៉ាស៊ីហ្វិក ដើម្បីពង្រឹងកិច្ចសហប្រតិបត្តិការពាណិជ្ជកម្មអន្តរជាតិប្រកបដោយប្រសិទ្ធភាព និងតម្លាភាព ព្រមទាំងធានាបាននូវការគោរពបទដ្ឋានគតិយុត្តដែលនឹងផ្តល់អត្ថប្រយោជន៍រយៈ ពេលវែងដល់ប្រទេសក្នុងតំបន់។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ឡារ៉ែនពាណិជ្ជថា៖“កិច្ចព្រមព្រៀងស្តីពីកិច្ចសម្រួលពាណិជ្ជកម្មឆ្លងព្រំដែនដោយមិនបាច់ប្រើក្រដាសស្នាម សំដៅទៅលើប្រទេសនៅតំបន់អាស៊ី និងប៉ាស៊ីហ្វិក ដែលមានប្រទេសជាច្រើនជាសមាជិក ហើយយើងក៏ជាសមាជិកនៃកិច្ចព្រមព្រៀងនេះមួយដែរ ហើយការដឹកទំនិញឆ្លងកាត់ពីប្រទេស1 ទៅប្រទេស1 ដោយមិនចាំបាច់ប្រើក្រដាសស្នាម ដោយបើប្រព័ន្ធឌីជីថលជំនួសវិញ”។

លោកឧកញ៉ាបានបញ្ជាក់ថា៖“ក្នុងប្រទេសយើងសព្វថ្ងៃនេះក៏មានការកាត់បន្ថយក្រដាសស្នាមខ្លះៗដែរ ដូចជាការនាំចេញតាមអនឡាញ និង CO តាមអនឡាញជាដើម ដូចនេះរាល់ឯកសារទាំងអស់ដែលគយច្រកព្រំដែនគាត់ទទួលពីអ្នកនាំចេញនៅក្នុងស្រុកតាមរយៈប្រព័ន្ធបច្ចេកវិទ្យាពេលគាត់ឃើញហើយថា ក្រុមហ៊ុននាំចេញនេះបានបំពេញសំណុំបែបបទគ្រប់គ្រាន់ហើយ គេអាចអនុញ្ញាតឱ្យនាំចេញបាន មិនចាំបាច់បំពេញក្រដាសស្នាមទៀតទេ ហើយឯកសារនេះក៏ត្រូវបញ្ជូនទៅកាន់ប្រទេសដែលទទួលទំនិញដែរ ដោយមានប្រទេសមួយចំនួនដែលយើងកំពុងតែធ្វើការជាមួយ មានតែប៉ុន្មានប្រទេសប៉ុណ្ណោះគឺនៅមានចំនួនតិចតួច មិនទាន់ច្រើននៅឡើយទេ”។

លោកឧកញ៉ាបានបញ្ជាក់ទៀតថា៖“ដូចនេះកិច្ចព្រមព្រៀងនេះបានអនុវត្តនៅថ្នាក់តំបន់ពុំទាន់បានទូលំទូលាយនៅកម្រិតអន្តរជាតិទេ តែដោយមានជំនួយឧបត្ថម្ភគម្រោងនេះពី UNESCAP នៅតំបន់អាស៊ី និងប៉ាស៊ីហ្វិក រួមទាំងកម្ពុជាយើងដែរ នឹងសម្រេចឱ្យបាននូវកិច្ចព្រមព្រៀងនេះនៅក្នុងឆ្នាំ2019នេះ”។

លោកឧកញ៉ា លឹម ហេង បានបញ្ជាក់ដែរថា៖“ស្របនឹងគោលដៅរបស់រាជរដ្ឋាភិបាលដែល បានលើកឡើងនៅវេទិកាជាមួយវិស័យឯកជន ដោយប្រមុខរដ្ឋាភិបាលបានធ្វើកំណែទម្រង់ផ្ទៃក្នុង និងបានកាត់បន្ថយនូវក្រដាសស្នាម ការដកកាំកុងត្រូល កាំសាប ដើម្បីសម្រួលការនាំចេញ ដែលវិស័យឯកជន អ្នករកស៊ី និងរដ្ឋាភិបាលចង់បានក្នុងការសម្រួលការនាំចេញឱ្យបានលឿន។ ព្រោះថា វាជាកត្តាមួយសម្រួលបែបបទផ្ទៃក្នុងបានលឿន ដោយអនុវត្តនូវច្រកចេញចូលតែមួយដែលជាចំណែកមួយជួយជំរុញវិស័យសេដ្ឋកិច្ចឱ្យមានកំណើន”៕

September 23, 2019

អ៊ិន សុភិន រំភើបខណៈក្រុមបាល់ទាត់មហាហង្សលើពាន

នៅលើបណ្ដាញសង្គមហ្វេសប៊ុក លោក អ៊ិន សុភិន បានបង្ហោះរូបភាពពីការហោះហើរទៅកាន់ប្រទេសរុស្ស៊ី ខណៈដែលក្រុមបាល់ទាត់មហាហង្ស All Stars របស់លោកក៏ត្រូវគេឃើញថាបានក្លាយជាអ្នកលើកពាន នៅក្នុងការប្រកួតដណ្ដើមពានរង្វាន់ឯកឧត្តម សុខ សុវណ្ណវឌ្ឍនាសាប៊ុង ដែលមានរហូតដល់ ៣២ក្រុមចូលរួម។

ព្រឹត្តិការណ៍នេះ ត្រូវបានបែងចែកជា៨ពូលហើយមានការប្រកួតចាញ់ធ្លាក់ៗ និងប្រកួតខ្វែងពូលជាច្រើនដំណាក់កាល ប៉ុន្តែក្រុមមហាហង្សនៅតែមានសំណាងឡើងប្រកួតក្នុងវគ្គផ្ដាច់ព្រ័ត្រ និងក្លាយជាម្ចាស់មេដាយមាស និងពានជើងឯក។ ម្នាក់ៗ មានការចាប់អារម្មណ៍យ៉ាងខ្លាំង ដែលប្តធានក្រុមស្ថិតក្នុងដំណើរចាកចេញទៅក្រៅប្រទេស ចំណែកកូនក្រុមទទួលបានជោគជ័យក្នុងការលើកពានក្នុងពេលវេលាស្របគ្នា។ លោក អ៊ីន សុភិន បានថ្លែងក្នុងពេលយន្តហោះចុះចតនៅម៉ាឡេស៊ី មុនបន្តទៅប្រទេសរុស្ស៊ីថា លោកពិតជាសប្បាយចិត្តយ៉ាងខ្លាំង ដែលត្រូវដឹកនាំក្រុមការងារទៅប្រជុំពីមុខជំនួញផ្គត់ផ្គង់សេវាដឹកជញ្ជូន ប៉ុន្តែកូនក្រុមរបស់លោក ស្រាប់តែបានលើកពាន។

ចាងហ្វាងផលិតកម្មមហាហង្សរូបនេះបានបញ្ជាក់បន្ថែមថា មុនឡើងយន្តហោះមួយថ្ងៃ លោកបានទៅគាំទ្រកូនក្រុមទាំងភ្លៀង ហើយលោកមិននឹកស្មានថាក្រុមបាល់ទាត់មហាហង្សក្លាយជាលើកពាននៅក្នុងការប្រកួតនេះទេ ដោយសារតែការប្រកួតទាំងមូលមានច្រើនក្រុម ហើយសុទ្ធតែក្រុមល្អ។ លោកកាន់តែសប្បាយចិត្ត នៅពេលអ្នកចាំទីក្នុងក្រុមរបស់លោក ត្រូវបានអ្នករៀបរាប់ចាត់ទុកជាអ្នកចាំទីឆ្នើម។ លោកថាខ្លួនទៅរុស្ស៊ីប្រជុំបន្ទាន់ បើកុំដូច្នេះលោកពិតជាបានអបអរដោយផ្ទាល់ដល់កូនក្រុមដែលខំប្រឹងប្រែងរហូតលើកពាន។ យ៉ាងណាមិញលោកថា ក្រោយត្រលប់មកវិញនៅថ្ងៃទី២៨ កញ្ញា លោកនឹងរកឱកាសជប់លៀងអោយកីឡាករបាល់ទាត់ទាំងអស់ ដើម្បីលើកទឹកចិត្តដល់បុគ្គលិករបស់ផលិតកម្មទាំងនោះផង៕

September 23, 2019

Category: សង្គម និងសេដ្ឋកិច្ច