សង្គម និងសេដ្ឋកិច្ច - La Reine Media

កីឡាករឆ្នើម 2រូប វិលមកកាន់ជម្រើសជាតិកម្ពុជាវិញ

កាលពីពេលថ្មីៗនេះ សហព័ន្ធកីឡាបាល់ទាត់ជាតិកម្ពុជាបានបញ្ចេញបញ្ជីឈ្មោះកីឡាករដែលត្រូវកោះហៅមកហ្វឹកហាត់ក្នុងក្រុមជម្រើសជាតិកម្ពុជា ដោយក្នុងនោះមានកីឡាករចំនួន 26រូបមកពីក្លិបចំនួន8 នៅក្នុងលីកកំពូលកម្ពុជា និងមានម្នាក់មកពីក្លិបនៃលីកកំពូលរបស់ម៉ាឡេស៊ី។

ហើយអ្វីដែលគូរឱ្យចាប់អារម្មណ៍នោះគឺ កីឡាករឆ្នើមរបស់កម្ពុជាចំនួន 2រូបគឺ ប្រាក់ មុន្នីឧត្តម និងធារី ចន្ថាប៊ីន បានជាប់ឈ្មោះសាជាថ្មី ក្រោយពេលជាពីរបួសកាលពីការប្រមូលផ្តុំលើកមុន។ ចំណែកកីឡាករ ចាន់ វឌ្ឍនាកា នៅតែមិនមានឈ្មោះក្នុងបញ្ជីឈ្មោះខាងលើដដែល ទោះបីជាសាមីខ្លួនរកគ្រាប់បាល់បានច្រើនគ្រាប់ក្នុងការប្រកួតដណ្ដើមពានរង្វាន់សម្តេច ហ៊ុន សែន ក៏ដោយ។

គួរបញ្ជាក់ផងដែរថា កីឡាករ ប្រាក់ មុន្នីឧត្តម បានអវត្តមានពីក្រុមជម្រើសជាតិកាលពីដើមខែកញ្ញាកន្លងទៅ ដោយសារមានបញ្ហារបួសជង្គង់ ចំណែកឯកីឡាករ ប្រាក់ មុន្នីឧត្តម បានរងរបួសក្នុងការប្រកួតលីកកំពូលកម្ពុជា៕

September 26, 2019

កុំហាមក្មេងមិនឱ្យលេង តែត្រូវបញ្ចៀសកុំឱ្យលេងអ្វីផ្សេងក្រៅពីបច្ចេកវិទ្យា

ក្មេងតូចៗជាវ័យរពឹសបំផុត ព្រោះវ័យនេះជាវ័យដែលកំពុងមានការវិវឌ្ឍយ៉ាងឆាប់រហ័សទាំងផ្នែករាងកាយ និងប្រាជ្ញាស្មារតី។ ជាធម្មតា ប្រសិនបើយើងទម្លាប់ក្មេងឱ្យចូលចិត្តអ្វី នោះផ្នត់គំនិត រួមទាំងឥរិយាបថរបស់ក្មេងតូចៗនឹងបត់ទៅតាមនោះដែរ។

កន្លងមក បញ្ហាប្រឈមដែលកំពុងកើតឡើងលើពិភពលោក ជាពិសេសអាណាព្យាបាលនៅកម្ពុជា គឺអាណាព្យាបាលបានបណ្តោយឱ្យក្មេងតូចៗប្រើប្រាស់ឧបករណ៍អេឡិចត្រូនិកដើម្បីបញ្ឈប់ភាពគួរឱ្យរំខានរបស់ពួកគេនៅក្នុងផ្ទះ ឬនៅកន្លែងប្រកបអាជីវកម្មជាដើម។ ការធ្វើបែបនេះ ត្រូវបានគេមើលឃើញថា បានបង្កើតផលប៉ះពាល់អវិជ្ជមានជាច្រើន ដែលមកដល់ពេលនេះ វាបានបង្ហាញផលប៉ះពាល់ជាបណ្តើរៗហើយចំពោះគ្រួសារមួយចំនួន ដូចជាកូនមិនសូវនិយាយស្តី ឆាប់ខឹង មួម៉ៅច្រើន ឬក្លាយជាមនុស្សញៀនជាមួយនឹងបច្ចេកវិទ្យាជាដើម។ ក្រៅពីនេះ ផលប៉ះពាល់ចំពោះរាងកាយក៏កើតមានច្រើនផងដែរ ដូចជាបញ្ហាភ្នែក និងបញ្ហាប្រព័ន្ធភាពស៊ាំនឹងជំងឺក៏ថយចុះ ដោយសារពួកគេមិនសូវបញ្ចេញសកម្មភាពច្រើន ព្រោះពួកគេចំណាយពេលច្រើនពេកនៅមុខអេក្រង់ទូរស័ព្ទ។

ព្រះតេជគុណ គូ សុភាព សាស្រ្តាចារ្យនៃសាកលវិទ្យាល័យបញ្ញាសាស្រ្តបានមានសង្ឃដីកាថា កុំឃាត់ក្មេងមិនឱ្យលេង ទៅមិនរួចទេ! ព្រោះក្មេងជាវ័យដែលត្រូវលេង តែអ្វីដែលយើងអាចធ្វើបានគឺបញ្ចៀសក្មេងកុំឱ្យលេងឧបករណ៍អេឡិចត្រូនិក តាមរយៈការកំណត់វិន័យ រួមទាំងការបង្វែរក្មេងឱ្យមានសកម្មភាពជាវិជ្ជមានផ្សេងៗទៀត។ មិនថាតែក្មេងទេដែលអាចរងផលប៉ះពាល់ តាមពិតទៅទូរស័ព្ទ ឬឧបករណ៍អេឡិចត្រូនិកក៏ប៉ះពាល់ខ្លាំងផងដែរដល់មនុស្សធំតាមរយៈ Notification ដែលតែងតែលោត និងធ្វើឱ្យយើងចង់តាមដានជាប់ជានិច្ច។ ចំណុចនេះអាចធ្វើឱ្យយើងទាំងអស់គ្នាមានបញ្ហាផ្លូវចិត្ត ដោយសារតែហត់នឿយ និងជក់ខ្លាំងពេកជាមួយនឹងកម្មវិធីដែលកំពុងទាក់-ទាញឱ្យយើងប្រើប្រាស់ដោយគ្មានពេលទំនេរនេះ។ ព្រះតេជគុណ គូ សុភាព បានមានសង្ឃដីកាថា៖“គ្រួសារនីមួយៗគួរមានទម្លាប់ និងវិន័យមួយចំនួនចំពោះការរឹតត្បិតការលេងឧបករណ៍អេឡិចត្រូនិក ជាពិសេសទូរស័ព្ទ នៅក្នុងពេលវេលាសំខាន់ៗ ដូចជានៅតុបាយជុំគ្នាហាមដាច់ខាតមិនឱ្យលេងទូរស័ព្ទ”។

សម្រាប់ក្មេងតូចៗ ព្រះតេជគុណបានបញ្ជាក់ថា ព្រះតេជគុណមានក្មួយតូចដែលជក់ខ្លាំងជាមួយទូរស័ព្ទ ហើយមិនខ្លាចអ្នកណាទាំងអស់។ ក្រោយមកជីដូនរបស់គាត់បានដកឧបករណ៍អេឡិចត្រូនិកទាំងអស់មិនឱ្យលេង។ ជាលទ្ធផល ដំបូងឡើយគាត់មិនសប្បាយចិត្តខ្លាំង តែក្រោយពេលស្ងាត់មួយរយៈគាត់ចាប់ផ្តើមលេង និងសកម្មដូចក្មេងទូទៅ ព្រោះធម្មជាតិរបស់ក្មេងទាំងអស់ចូលចិត្តលេងច្រើន។ ចំពោះអាណាព្យាបាល គួរព្យាយាមផ្តាច់កូនពីឧបករណ៍អេឡិចត្រូនិក ហើយស្វែងរកវិធីសាស្រ្តក្នុងការបង្កើតសកម្មភាពបែបណាដែលមានភាពទាក់ទាញ និងសប្បាយជាងការលេងទូរស័ព្ទ ដើម្បីឱ្យក្មេងរីករាយជាមួយនឹងអ្វីដែលជារឿងវិជ្ជមានសម្រាប់ជីវិតរបស់ពួកគេ។

បច្ចុប្បន្ននេះ ដោយមើលឃើញពីគុណវិបត្តិកាន់តែច្រើនលើឧបករណ៍អេឡិចត្រូនិក អាណាព្យាបាលបានផ្លាស់ប្តូរផ្នត់គំនិតដែលគិតថា ក្មេងតូចៗចេះលេងទូរស័ព្ទជាក្មេងឆ្លាតវៃ និងដឹងរឿងច្រើន មកគិតថា វាអាចជាឧបករណ៍ដ៏គ្រោះថ្នាក់ ប្រសិនបើពួកគាត់គ្រប់គ្រងការលេងរបស់កូនមិនបានល្អ។ ហើយផលប៉ះពាល់អវិជ្ជមាននៃការលេងទូរស័ព្ទនេះ នឹងធ្វើឱ្យអាណាព្យាបាលស្តាយក្រោយនៅថ្ងៃខាងមុខ។ ហេតុនេះហើយ ទើបអាណាព្យាបាលមួយចំនួនចាប់ផ្តើមភ្ញាក់ខ្លួន និងព្យាយាមចំណាយពេលកាន់តែច្រើនដោយការដកខ្លួនពីការលេងឧបករណ៍អេឡិចត្រូនិកមកនៅជាមួយកូនៗដើម្បីជាគំរូ និងដើម្បីបង្ហាញពីការគិតគូរដល់អនាគតរបស់កូនតូចៗ៕

September 26, 2019

WHO ផ្តល់កញ្ចប់ថវិកាអភិវឌ្ឍន៍ដើម្បីផ្តល់ការងារដល់ធនធានមនុស្សផ្នែកសុខាភិបាលនៅកម្ពុជា

ស្របពេលដែលកំណើនប្រជាជនលើពិភពលោកមានការកើនឡើងយ៉ាងលឿន តម្រូវការផ្នែកសុខាភិបាលក៏កាន់តែមានតម្រូវការច្រើនឡើងផងដែរនៅតាមប្រទេសនានា ជាពិសេសប្រទេសកំពុងអភិវឌ្ឍន៍។

ថ្មីៗនេះដើម្បីឆ្លើយតបទៅនឹងតម្រូវការផ្នែកសេ-វាសុខភិបាល និងការងារនៅប្រទេសកម្ពុជា គីហ្គីស្ថាន នេប៉ាល់ និងស្រីលង្ការ អង្គការសុខភាពពិភពលោក ឬ WHO បានផ្តល់កញ្ចប់ថវិកាប្រមាណ 3លានដុល្លារ ដើម្បីអនុវត្តគម្រោងមួយឈ្មោះថា «The Working for Health Program» ដែលមានរយៈពេល 3ឆ្នាំ។ គម្រោងនេះបានផ្តើមចាប់ពីខែមិថុនា ឆ្នាំ2018 និងបញ្ចប់ទៅវិញនៅខែឧសភា ឆ្នាំ2021។

លោក John Ritchotte មន្ត្រីទទួលបន្ទុកទំនាក់-ទំនងអន្តរជាតិប្រចាំទីក្រុងបាងកកនៃអង្គការសុខភាពពិភពលោកបានលើកឡើងថា គម្រោង «The Working for Health Program» នេះនឹងជួយអភិវឌ្ឍវិស័យសុខាភិបាលនៅកម្ពុជា តាមរយៈការពង្រីកសេវាសុខាភិបាលទៅដល់ប្រជាជនដែលកំពុងត្រូវការសេវាសុខភិបាលកាន់តែច្រើនឡើងពី 1ថ្ងៃទៅ 1ថ្ងៃនៅកម្ពុជា។ តាមរយៈការពង្រីកសេវាសុខាភិបាលនៃគម្រោងនេះ កម្ពុជានឹងទទួលបានឱកាសការងារយ៉ាងច្រើនសម្រាប់ធនធានមនុស្សដែលកំពុងសិក្សាផ្នែកសុកភិបាល និងវេជ្ជសាស្ត្រ ព្រោះគម្រោងនឹងត្រូវការបុគ្គលិកជាច្រើនដើម្បីបម្រើការក្នុងការផ្តល់សេវាសុខាភិបាលនៅគ្រប់ទីកន្លែងក្នុងប្រទេស។ វាជាការចូលរួមចំណែកយ៉ាងសំខាន់ក្នុងការជួយដល់វិស័យការងារកម្ពុជា និងក៏ដូចជាជួយដល់ការអនុវត្តគោលនយោបាយរបស់រដ្ឋាភិបាលកម្ពុជា ក្នុងការអភិវឌ្ឍប្រទេសឱ្យទៅតាមគោលដៅ និងឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ2030 និងក្លាយជាប្រទេសដែលមានចំ-ណូលខ្ពស់នៅឆ្នាំ2050។

លោក John Richotte បាននិយាយថា៖ “សម្រាប់កម្ពុជា ដៃគូសំខាន់ក្នុងការអនុវត្តគម្រោង The Working for Health Program នេះ គឺអង្គការសុខភាពពិភពលោក ក្រសួងសុខាភិបាល និងក្រសួងការងារ និងបណ្តុះបណ្តាលវិជ្ជាជីវៈ។ បន្ថែមពីលើនេះ ក៏មានការចូលរួមផងដែរពីអង្គការអន្តរជាតិខាងការងារ (ILO) និងអង្គការ OECD រួមទាំងដៃគូនិយោជក និងសហជីពមួយចំនួនទៀតដែរ”។

គួរបញ្ជាក់ផងដែរថា បច្ចុប្បន្ននេះ កម្ពុជាកំពុងត្រូវការធនធានមនុស្សជាច្រើនផ្នែកសុខាភិបាល ដើម្បីជួយជំរុញឱ្យវិស័យសុខាភិបាលអភិវឌ្ឍទៅបានកាន់តែទូលំទូលាយនៅគ្រប់តំបន់ទាំងអស់នៅទូទាំងប្រទេស ជាពិសេសតំបន់ជនបទ៕

September 26, 2019

អនុវត្តតាមវិធីទាំងនេះអាចម៍រុយថ្មីៗនឹងកម្ចាត់បានយ៉ាងងាយ

ប្រទាលកន្ទុយក្រពើ : អាចម៍រុយថ្មីៗអាចព្យាបាលបានយ៉ាងងាយ ព្រមទាំងប្រកបដោយប្រសិទ្ធភាពតាមរយៈការប្រើប្រាស់ជាតិជែលដែលមាននៅក្នុងប្រទាលកន្ទុយក្រពើ។ លោកអ្នកក៏អាចប្រើក្រែម ឬជែលដែលផលិតពីប្រទាលកន្ទុយក្រពើបានដែរ ប៉ុន្តែត្រូវប្រាកដក្នុងចិត្តថាវាជាក្រែម ឬជែលដែលមានជាតិជែលពីប្រទាលកន្ទុយក្រពើយ៉ាងតិច50%។

ដំឡូងបារាំងឆៅ : ទឹកដែលមាននៅក្នុងដំឡូងបារាំងឆៅគឺជាឱសថធម្មជាតិដ៏ប្រសើរមួយក្នុងការកម្ចាត់ចោលរាល់អាចម៍រុយទាំងឡាយដែលមានវត្តមាននៅលើស្បែក។ ទឹកដំឡូងបារាំងឆៅនឹងដើរតួជាភ្នាក់ងារកម្ចាត់ជាតិពណ៌ត្នោត ឬក្រម៉ៅដែលមាននៅលើស្បែកចេញ។ លទ្ធផលអាចមើលឃើញក្នុងរយៈពេលប្រហែលជាមួយសប្តាហ៍ក្រោយមក (សម្រាប់អាចម៍រុយដែលកើតថ្មី)។ទឹកខ្មេះ : អាចរាប់ទុកថាជាឱសថកំពូលមួយប្រភេទដែរ ដែលត្រូវបានរើសយកមកប្រើប្រាស់ ដើម្បីកម្ចាត់ភាពមិនស្មើគ្នានៃពណ៌នៅលើស្បែក។

ទឹកខ្មេះ : មានជាតិអាស៊ីតអាសេទិច ដែលដើរតួជាភ្នាក់ងារជួយកម្ចាត់ជាតិពណ៌ខ្មៅបន្ថែមភាពសដល់ស្បែក។ ភាគច្រើនទឹកខ្មេះទឹកត្នោតជាជម្រើសដ៏ល្អបំផុត (លាយទឹកខ្មេះជាមួយទឹកធម្មតាក្នុងបរិមាណស្មើគ្នា រួចសឹមយកល្បាយនោះទៅលាងសម្អាតផ្ទៃមុខ)។

ការពារស្បែករាល់ថ្ងៃដោយឡេការពារកម្តៅថ្ងៃ : ដោយសារតែមួយផ្នែកនៃការកើតអាចម៍រុយបានមកពីការទទួលរងឥទ្ធិពលពីពន្លឺព្រះអាទិត្យនោះ អ្នកមានបទពិសោធភាគច្រើនណែនាំឱ្យអ្នកការពារស្បែកជារៀងរាល់ថ្ងៃ ដោយការប្រើឡេការពារកម្តៅថ្ងៃ។ ពួកគេបានរៀបរាប់ថា បើទោះជាវាមិនអាចការពារស្បែកបាន100%ក្តី តែយ៉ាងហោចណាស់ក៏វាអាចជួយបានខ្លះដែរ។

ការព្យាបាលដោយឡាស៊ែរ : នេះគឺជាវិធីព្យាបាលថ្មីមួយតាមបច្ចេកទេសទំនើប ឆាប់ទទួលបានប្រសិទ្ធភាព ទាំងចំពោះអាចម៍រុយថ្មី និងអាចម៍រុយចាស់។បន្ទាត់ខាងលើបានជម្រាបមិត្តអ្នកអានរួចហើយថា អាចម៍រុយកាន់តែនៅថ្មី កាន់តែងាយក្នុងការព្យាបាល ដូច្នេះសូមរួសរាន់ឡើង ចាប់ផ្តើមព្យាបាលបញ្ហាអាចម៍រុយនេះភ្លាមទៅ៕

September 26, 2019

ពិនិត្យសុខភាពរាងកាយភាពរឹងប៉ឹង

សុខភាពគឺជារឿងសំខាន់ ដូច្នេះយើងគួរឧស្សាហ៍មើលថែទាំ ពិនិត្យសុខភាព ពិនិត្យរាងកាយ និងពិនិត្យភាពរឹងប៉ឹងជាប្រចាំរៀងរាល់ឆ្នាំថា តើរាងកាយរបស់យើងនៅតែមាំមួន និងមានសុខភាពល្អដូចមុនដែរឬទេ? ដូច្នេះយើងមិនគួរបង្អែរបង្អង់យូរឡើយ…។

ពិនិត្យមើលសុខភាព និងរាងកាយដូច 7ចំណុចខាងក្រោមនេះ យើងនឹងបានដឹងថា តើអវយវ: និងប្រព័ន្ធការធ្វើការងារខាងក្នុងរាងកាយជាអ្វី និងប្រក្រតីយ៉ាងណាខ្លះ?

1. ការគិត – ការចងចាំ
អវយវ:ដែលហៅថា ខួរក្បាលរបស់មនុស្សយើងមានកោសិកាប្រសាទដែលមានមែកខ្នែងបែកសាខាកើតឡើងថ្មីគ្រប់វិនាទី ដោយកោសិកានីមួយៗនឹងតភ្ជាប់ពាក់ព័ន្ធជាមួយកោសិកាប្រសាទផ្សេងទៀត និងថ្ពក់យកដំណឹងព័ត៌មានដែលចូលមកក្នុងខួរក្បាលជាខ្សែបណ្តាញ។

2. ដើមទ្រូង
គឺជាផ្នែកដែលផ្គុំឡើងមកដោយសាច់ដុំ ខ្លាញ់ និងក្រពេញផ្សេងៗ។ ដើមទ្រូងដែលតូច ឬធំ ការពិតទៅអាស្រ័យលើការប្រមូលផ្តុំរបស់កោសិកាខ្លាញ់។

3. បេះដូង
អវយវ:ដែលជាចំណុចកណ្តាលរបស់ប្រព័ន្ធឈាមរត់ ដែលមានខ្នាតមិនធំជាងកណ្តាប់ដៃរបស់ម្ចាស់វាឡើយ ហើយបើយកទៅថ្លឹងវិញ ;យើងនឹងដឹងថា វាមានទម្ងន់ប្រមាណជា 300ក្រាម(3ខាំ) តែមិនគួរឱ្យជឿឡើយថា អវយវ:មួយដុំតូចនេះអាចលោតបានដោយគ្មានការឈប់សម្រាកបានដល់ទៅ 90,000ដងក្នុង 1ថ្ងៃ។

4. ទឹកនោមផ្អែម
ភាពខុសប្រក្រតីរបស់ប្រព័ន្ធដុតបំផ្លាញជាតិស្ករដែលនឹងនាំទៅរកការឈឺថ្កាត់ដោយជំងឺទឹកនោមផ្អែម ; ច្រើនតែកើតឡើងដោយសារអ័រម៉ូន អុីនស៊ូលីនខាងក្នុងរាងកាយមិនអាចគ្រប់គ្រងជាតិស្ករនៅក្នុងឈាមឱ្យស្ថិតក្នុងកម្រិតប្រក្រតីបាន។

5. តុល្យភាពរបស់អាស៊ីត-ក្បុង
ស្ទើរតែគ្រប់កម្មវិធីរបស់ប្រព័ន្ធជីវិតសុទ្ធតែស្ថិតនៅលើតុល្យភាពនៃភាពជាអាស៊ីត-ក្បុងខាងក្នុងរាងកាយ តែតុល្យភាពនេះច្រើនតែប្រែប្រួល និងត្រូវបំផ្លាញដោយសារតែភាពតានតឹងធុញថប់ និងភោជនាហារដែលគ្មានកំណត់ ដែលវានឹងហុចផលឱ្យជាតិអាស៊ីតនៅក្នុងរាងកាយកើនឡើងខ្ពស់ និងធ្វើឱ្យកើតផលអាក្រក់ដល់សុខភាពដែលយើងអាចមើលឃើញច្បាស់នោះគឺ ការឈឺចុកចាប់តាមសាច់ដុំ និងហើមតាមសន្លាក់ដៃ-ជើងជាដើម។

6. ប្រព័ន្ធការពារជំងឺ
ខ្សែបណ្តាញរបស់កោសិកា និងអវយវ:ដែលពាក់ព័ន្ធនឹងប្រព័ន្ធការពារជំងឺនេះមានទម្ងន់ប្រមាណជា 2គីឡូក្រាម គឺជាផ្នែកមួយដែលត្រៀមខ្លួនជាស្រេច និងឆាប់រហ័សជានិច្ចក្នុងការវាយប្រហារនូវអ្វីចម្លែកដែលចូលមកក្នុងខ្លួនប្រាណរបស់យើង។

7. លំហូរវិលរបស់លោហិត
បើសរសៃឈាមរឹតតែមានភាពយឹតយារខ្លាំងប៉ុនណា នឹងរឹតតែធ្វើឱ្យជាតិខ្លាញ់មកតោង និងញ៉ុកណែននៅខាងក្នុងសរសៃឈាម នឹងកាន់តែពិបាកប៉ុននោះដែរ ហើយនៅពេលសរសៃឈាមគ្មានជាតិខ្លាញ់មកតោងជាប់ញ៉ុកណែនរាំងស្ទះការហូររបស់ឈាមនោះ ឈាមនឹងអាចហូរទៅដល់គ្រប់ទីកន្លែងរបស់រាងកាយបាន ហុចផលឱ្យរាងកាយមានសុខភាពល្អ សាច់ស្បែកស្អាតស្រស់ថ្លាជានិច្ច៕

September 26, 2019

គន្លឹះនៃការចម្អិនអាហារ “បន្លែ” ឱ្យរក្សា បានសារធាតុអាហារបានច្រើនបំផុត

ការចម្អិនបន្លែជាអាហារនេះ រឿងសំខាន់បំផុតគឺ គួរប្រើភ្លើងខ្លាំង និងចម្អិនយ៉ាងឆាប់រហ័ស ព្រោះវានឹងធ្វើឱ្យមិនបាត់បង់គុណតម្លៃខាងសារធាតុអាហារច្រើន។ ការបន្ថែម “ទឹកខ្មេះ” ចូលទៅបន្តិចបន្តួចមិនត្រឹមតែជាការបង្កើនរសជាតិរបស់ម្ហូបអាហារប៉ុណ្ណោះទេ តែថែមទាំងជាការថែរក្សាវីតាមីន C បានទៀតផង ហើយការប្រើប្រាស់ឧបករណ៍ផ្ទះបាយសម្រាប់ឆា ឬស្ងោរបន្លែវិញ ក៏គួរប្រើឧបករណ៍ពពួកដែក ដូចជាខ្ទះដែកជាដើម ដែលវានឹងជួយឱ្យបាត់បង់វីតាមីនអស់តិចបំផុត។

ការស្ងោរ
1. ព្យាយាមប្រើទឹកឱ្យតិចបំផុតតាមដែលអាចធ្វើទៅបានសម្រាប់ការស្ងោរបន្លែ។
2. រង់ចាំឱ្យទឹកពុះខ្លាំង សឹមដាក់បន្លែចូលទៅ និងមិនគួរទុកឱ្យទឹកពុះ ឬរម្ងាស់យូរឡើយ។
3. បិទគម្របឆ្នាំងគ្រប់ពេល ដើម្បីឱ្យទឹកឆាប់ពុះ និងបន្លែឆាប់ឆ្អិន។
4. បន្លែពណ៌បៃតង ចូរស្រុស ឬដាក់ចូលនៅពេលទឹកពុះ រួចរង់ចាំឱ្យទឹកពុះម្ដងទៀត ទើបដួសឡើងតែម្ដង។
5. បើជាបន្លែមើមវិញ គួរដាំទឹកឱ្យពុះ រួចបន្ថយភ្លើងបន្តិច ហើយយកបន្លែដែលត្រៀមរួចជាស្រេចដាក់ចូលទៅទាំងមូល ឬហាន់ជាដុំៗក៏បាន។
6. បើបន្លែដែលយើងត្រូវការស្ងោរ ឬស្រុសមានបរិមាណច្រើន ចូរបែងជាចំណែកៗ មិនគួរយកទៅដាក់ស្ងោរ ឬស្រុសដំណាលគ្នាច្រើនៗទេ ព្រោះបើមានបរិមាណច្រើនជ្រុលពេក នឹងត្រូវប្រើពេលវេលាយូរ ហើយនឹងធ្វើឱ្យបាត់បង់គុណតម្លៃនៃសារធាតុអាហារអស់ច្រើនទៀតផង។

ការឆា
1. ត្រៀមគ្រឿងផ្សំគ្រប់យ៉ាងឱ្យរួចជាស្រេច ដោយសារតែបន្លែដែលដាក់ឆានៅក្នុងខ្ទះរឹតតែយូរ រឹតតែបាត់បង់គុណតម្លៃនៃសារធាតុអាហារ និងភាពស្រួយឆ្ងាញ់ប៉ុននោះដែរ។
2. ធ្វើឱ្យបន្លែស្ងួត ឬស្រស់ទឹកឱ្យបានច្រើនបំផុត ព្រោះបើនៅមានទឹកនៅជាប់លើបន្លែច្រើន(ជាពិសេសបន្លែស្លឹក)រឹតតែធ្វើឱ្យប្រើរយៈពេលនៃការឆាយូរឡើង ថែមទាំងបាត់បង់គុណតម្លៃនៃសារធាតុអាហារ និងភាពឆ្ងាញ់អស់ទៀតផង។
3. មុនចាប់ផ្ដើមឆា គួរដាក់ខ្ទះនៅលើភ្លើងឱ្យក្ដៅសព្វជាមុនសិន។
4. ធ្វើការញែកបំបែក ឬដាក់ផ្នែកណារបស់បន្លែដែលក្រឆ្អិនចូលឆាមុនគេ ដូចជា មែកបន្លែ និងដើម រួចសឹមដាក់ស្លឹកចូលទៅ ដាក់គ្រឿងឆាប់ៗ និងឆ្អិនហើយប្រញាប់ដួសឡើងពីខ្ទះ ហើយប្រញាប់ទទួលទានភ្លាម។

ការរម្ងាស់ឱ្យផុយ
1. ហាន់បន្លែទំហំធំល្មម មិនធំជ្រុលពេក ព្រោះអាចនឹងធ្វើឱ្យក្រឆ្អិន។
2. ដាក់បន្លែស្លឹកចូលទៅក្រោយគេ ព្រោះវាឆាប់ផុយ។
3. បិទគម្របឆ្នាំងឱ្យជិត។

ការចំហុយ
1. ត្រូវដាំទឹកឱ្យពុះជាមុនសិន រួចសឹមដាក់បន្លែដែលត្រូវការចំហុយចូលទៅ ដើម្បីកុំឱ្យបន្លែប៉ះនឹងកម្ដៅយូរជ្រុលពេក។
2. បិទគម្របឆ្នាំងឱ្យជិត ការពារកុំឱ្យចំហាយទឹកភាយចេញមកក្រៅ ព្រោះនឹងធ្វើឱ្យបាត់បង់កម្ដៅនៅខាងក្នុង និងធ្វើឱ្យអាហារក្រឆ្អិន៕

September 26, 2019

ប្រយោជន៍របស់បន្លែតាមពណ៌នីមួយៗ

តើបន្លែទាំ 4ពណ៌ខាងក្រោមនេះមានគុណប្រយោជន៍អ្វីខ្លះ? បន្លែជាអាហារប្រកបដោយគុណប្រយោជន៍ និងសម្បូរ ទៅដោយសារធាតុប្រឆាំងរ៉ាឌីកាល់សេរីច្រើនប្រភេទ ជួយការពារយើងពីជំងឺដង្កាត់ផ្សេងៗ ។ បន្លែដែលយើងញ៉ាំរាល់ថ្ងៃនេះចែកចេញជា 4ក្រុមធំៗទៅតាមពណ៌ ដែលផ្តល់នូវគុណប្រយោជន៍ខុសប្លែកពីគ្នាដូច្នេះយើងគួរញ៉ាំបន្លែឱ្យបានច្រើនពណ៌ក្នុង1ថ្ងៃៗ ដើម្បីឱ្យរាងកាយបានទទួលគុណប្រយោជន៍ និងសារធាតុអាហារយ៉ាងបរិបូរណ៍ និងពេញលេញ។

1. បន្លែពណ៌ក្រហម មានដូចជា ម្ទេសក្រហម ប៉េងប៉ោះទុំ-ល- កើតចេញពីគ្រាប់ពណ៌ក្នុងក្រុម ឡៃខូហ្វ៊ីន ជួយពន្យារភាពចុះខ្សោយរបស់កោសិកាក្នុងរាងកាយកាត់បន្ថយភាពប្រថុយប្រថាននឹងការកើតរោគបេះដូង និងសរសៃឈាមកកស្ទះក្នុងខួរក្បាល។

2. បន្លែពណ៌លឿងទុំ + ពណ៌លឿង មកពីគ្រាប់ពណ៌ក្រុមឃែរ៉ូធីណយដ៍ វីតាមីន A វីតាមីន C ជួយថែបំប៉នកែវភ្នែក ធ្វើឱ្យអាចមើលឃើញបានច្បាស់ ទោះជាក្នុងពេលយប់ក៏ដោយ។ ការពារជំងឺឡើងបាយភ្នែក បំប៉នបេះដូង និងសរសៃឈាម។ បន្លែពណ៌នេះមានដូចជា ល្ពៅ និងមើមការ៉ុត ជាដើម។ល ។

3. បន្លែពណ៌បៃតង មានដូចជា បន្លែដែលមានស្លឹកពណ៌បៃតងផ្សេងៗ មកពីក្រុមគ្រាប់ពណ៌ដែលមានឈ្មោះថា ខ្លូរ៉ូហ្វៀល និងសារធាតុប្រភេទផ្សេងទៀត ដែលជួយការពារ DNA មិនឱ្យត្រូវបំផ្លាញរហូតក្លាយទៅជាដុំសាច់អាក្រក់។ ព្យាបាលសរសៃឈាមឱ្យរឹងមាំ ជួយបង្កើនសមត្ថភាពការធ្វើការងាររបស់រាងកាយ និងជួយកម្ទេចមេរោគអតិសុខុមប្រាណ ដែលបង្កផលអាក្រក់ដល់សុខភាព បំប៉នខួរក្បាល និងការចងចាំ ហើយនិងបំប៉នសុខភាពមនុស្សដែលមានអាយុច្រើន(មនុស្សចាស់)។

4. បន្លែពណ៌ស ពណ៌ស្ករខ្ចី មកពីគ្រាប់ពណ៌ក្រុម អ៊ែនថូស៊ែនធីន បន្លែក្នុងក្រុមនេះមានដូចជា មើមខ្ទឹមស មើមខ្ទឹម បារាំង ផ្សឹត សេលើរី មានគុណសម្បត្តិជួយកាត់បន្ថយសម្ពាធឈាម បញ្ចុះកូលេស្តេរ៉ូល ប្រឆាំងនឹងការកើតសាច់ដុះ ការពារមហារីក រោគបេះដូង ប្រឆាំងការឆ្លងចូលនៃមេរោគ ជួយរក្សាកម្រិតជាតិស្ករនៅក្នុងឈាម និងបង្កើនភាពស៊ាំនឹងជំងឺ៕

September 26, 2019

កើតមានអាការផ្សេងៗនៅលើបាតដៃ តើប្រាប់ពីសញ្ញាសុខភាពអ្វីខ្លះ?

រោគសញ្ញា និងប្រតិកម្មលើរាងកាយ ក៏អាចជាសញ្ញាបញ្ជាក់ឱ្យដឹងអំពីបញ្ហាសុខភាពរបស់មនុស្សយើងបានផងដែរ។ រោគសញ្ញាទាំងនោះអាចលេចចេញឡើងបានគ្រប់ពេលវេលា ប្រសិនបើមានអ្វីខុសប្រក្រតីចំពោះសុខភាពរាងកាយរបស់អ្នក។ ដូច្នេះការឧស្សាហ៍សង្កេតមើលប្រតិកម្មលើស្បែក អាចជួយយើងឱ្យដឹងមុនពីជំងឺ និងរកវិធីព្យាបាលបានទាន់ពេលវេលា។ តាមពិតទៅរាល់ជំងឺផ្សេងៗដែលកើតមានឡើងនៅលើរាងកាយ សុទ្ធតែបង្ហាញរោគសញ្ញា មុននឹងវាវិវត្តទៅដល់ដំណាក់កាលធ្ងន់ធ្ងរ គ្រាន់តែអ្នកមិនបានចាប់អារម្មណ៍តែប៉ុណ្ណោះ។ សូម្បីតែសញ្ញាមួយចំនួននៅលើស្បែក បាតដៃ ក៏អាចបង្ហាញពីបញ្ហាសុខភាពរបស់អ្នកដែរ ហេតុនេះអ្នកគួរតែយកចិត្តទុកដាក់ឱ្យបានខ្លាំងបំផុត។ ថ្ងៃនេះទស្សនាវដ្តី ឡារ៉ែន ចង់ឱ្យប្រិយមិត្តអ្នកអានបានយកចិត្តទុកដាក់ចំពោះរោគសញ្ញាទាំងប៉ុន្មានដែលកំពុងប្រាប់អ្នកអំពីស្ថានភាពសុខភាពរបស់អ្នក។

បាតដៃក្រហម
គ្រូពេទ្យបានពន្យល់ថា បាតដៃមានពណ៌ក្រហម គឺជាសញ្ញានៃបញ្ហាថ្លើម។ ជាធម្មតាពណ៌ក្រហមនេះ លេចឡើងនៅតាមគែមៗនៃបាតដៃដោយសារតែកើតមានអតុល្យភាពនៃអ័រម៉ូនក្នុងរាងកាយ។ ចំណែកឯជំងឺរលាកទងសួត រលាកសន្លាក់រ៉ាំរ៉ៃ ក៏អាចបណ្តាលឱ្យបាតដៃឡើងពណ៌ក្រហមផងដែរ។ ដូច្នេះការកំណត់រោគសញ្ញាត្រូវបានពិនិត្យបន្ថែមទៀតទៅតាមអាការរបស់អ្នកជំងឺ។

បាតដៃស្ពឹកស្រពន់ ឬឈឺចាប់
តើអ្នកធ្លាប់ចាប់អារម្មណ៍ថា តែងតែមានការឈឺចាប់ ឬស្ពឹកស្រពន់នៅលើបាតដៃ ពេលភ្ញាក់ពីគេងមែនទេ? ក្នុងករណីមួយចំនួនរោគសញ្ញានេះ អាចបណ្តាលមកពីបញ្ហាសរសៃឈាមវែន ឆ្អឹងប្រអប់ដៃមានរបួស កើតជំងឺខ្វះឈាម ឬជំងឺទឹកនោមផ្អែម។

បាតដៃស្ងួតរបកស្បែក
មូលហេតុទូទៅបំផុតដែលបណ្តាលឱ្យស្បែកស្ងួត គឺខ្វះជាតិទឹក ជាធម្មតាចំពោះស្ត្រីកើតឡើងក្នុងអំឡុងពេលរាំងរដូវ។ ដើម្បីចៀសវាងការបាត់បង់ជាតិទឹក អ្នកគួរតែទទួលទានទឹកឱ្យបានច្រើន និងប្រើឡេលាបផ្តល់សំណើមដល់បាតដៃរបស់អ្នកផងដែរ។ ប្រតិកម្មអាឡែហ្ស៊ីជំងឺ Exfoliative Keratolysis ក៏អ្នកអាចសម្គាល់ដឹងថា មានអាការរបកស្បែកលើបាតដៃ និងពេលខ្លះកើតឡើងនៅបាតជើងទៀតផង។

ក្រចករបក
ក្រចកដៃរបក គឺជាសញ្ញានៃបញ្ហាខ្វះជាតិស័ង្កសីក្នុងរាងកាយ។ សារធាតុស័ង្កសី ពិតជាមានសារ:សំខាន់ខ្លាំងណាស់ចំពោះសុខភាព វាជួយព្យាបាលមុខរបួស ជួសជុលកោសិកាខូចខាត និងបង្កើនប្រព័ន្ធភាពស៊ាំនៅក្នុងរាងកាយ។

ហើមសន្លាក់តាមម្រាមដៃ និងម្រាមដៃមិនមានកម្លាំង
នេះគឺជាសញ្ញាមួយទៀត ដែលបង្ហាញពីជំងឺធ្ងន់ធ្ងរ ដូចជា មហារីកសួត ឬជំងឺបេះដូង។ ដូច្នេះអ្នកគួរតែមានការប្រុងប្រយ័ត្នឱ្យបានខ្លាំងបំផុតប្រសិនបើអ្នកសង្កេតឃើញរោគសញ្ហាព្រមាននៅលើបាតដៃបែបនេះ៕

September 26, 2019

វិធីបំបាត់មុន និងស្នាមលើផ្ទៃមុខ

មុន និងស្នាម ដែលបន្សល់ទុកក្រោយកើតមុន គឺជាក្តីកង្វល់របស់ស្ត្រីមួយភាគធំ ប៉ុន្តែយើងចង់ធ្វើឱ្យមានការផ្លាស់ប្តូរពីកង្វល់របស់មនុស្សភាគច្រើនឱ្យនៅត្រឹមមនុស្សមួយចំនួនតូច ពីមនុស្សមួយចំនួនតូច ឱ្យមកជាលែងមានការបារម្ភចំពោះបញ្ហានេះវិញម្តង។ ដូច្នេះទស្សនាវដ្តីយើងចង់សុំឱ្យលោកអ្នកសាកល្បងវិធីសាស្ត្រនៃការបំបាត់ស្នាមមួយចំនួនដូចខាងក្រោម៖

ប៉េងប៉ោះ : សម្បូរទៅដោយវីតាមីន A និង C ដែលអាចជួយចិញ្ចឹម និងកម្ចាត់មុន ព្រមទាំងស្លាកស្នាមចោលយ៉ាងមានប្រសិទ្ធភាព។ ដោយគ្រាន់តែយកចំណិតប៉េងប៉ោះមកបិទពីលើទីតាំងដែលមានមុន ឬស្នាមរយៈពេល20-30នាទី រួចសឹមសម្អាតចេញដោយទឹកស្អាតជាការស្រេច។

ពោត : វាហាក់ខុសប្លែកពីវិធីមុនៗ ប៉ុន្តែអ្នកដឹងទេថា ពោតសម្បូរទៅដោយវីតាមីនA ដែលស្បែកត្រូវការ ដើម្បីរក្សាសំណើម ការពារភាពយារធ្លាក់ និងការកើតមុន។ ដំបូងអ្នកត្រូវសម្អាតផ្ទៃមុខរបស់អ្នកឱ្យស្អាត រួចជ្រើសរើសយកផ្លែពោត ខ្ចីណាដែលនៅស្រស់ យកមកត្រដុសលើផ្ទៃមុខ រយៈពេល15-20នាទី ទើបជម្រះចេញឱ្យស្អាតដោយទឹកស្អាត។

ផ្នែកសនៃស៊ុត : វាជាសារធាតុផ្សំដ៏សំខាន់ក្នុងការថែរក្សា និងបន្ថែមភាពភ្លឺថ្លាដល់ស្បែកមុខ។ ផ្នែកសនៃស៊ុតក៏អាចកម្ចាត់មុន និងស្លាកស្នាមចេញពីផ្ទៃមុខផងដែរ។ ម៉ាសបិទមុខផលិតពីផ្នែកពណ៌សនៃស៊ុតគឺជាម៉ាសប្រភេទងាយៗ តែអាចសម្រួលដល់បញ្ហាផ្ទៃមុខយ៉ាងមានប្រសិទ្ធភាព។

តែ : ប្រសិនបើអ្នកចូលចិត្តទទួលទានទឹកតែ (តែខ្មៅ) សូមកុំបោះចោលកាកតែឱ្យសោះ ព្រោះថាកាកតែនៅអាចផ្តល់នូវគុណសម្បត្តិមួយទៀតគឺជួយថែរក្សាសម្រស់ស្បែកមុខរបស់អ្នក។ដោយគ្រាន់តែសម្អាតផ្ទៃមុខរបស់អ្នកឱ្យស្អាត រួចយកកាកតែមកបំពោកលើផ្ទៃមុខ ឬកន្លែងដែលមានមុន ឬស្នាមមុន ទុកចោលប្រហែលជា15នាទី រួចសម្អាតចេញឱ្យស្អាតជាការស្រេច។

អនុវត្តតាមវិធីណាមួយខាងលើឱ្យបាន2-3ដងក្នុងមួយសប្តាហ៍ ហើយមិនយូរនោះទេ អ្នកពិតជាបានឃើញពីលទ្ធផលជាមិនខាន។ សូមចាំថា ការព្យាបាលដោយវិធីនេះគឺត្រូវចំណាយពេលវេលាយូរបន្តិច ប៉ុន្តែប្រសិនបើអ្នកចង់ប្រញាប់ទទួលបានលទ្ធផលនោះ លោកអ្នកក៏អាចជ្រើសប្រើផលិតផលជំនួយក៏បាន ដូចជាប្រភេទថ្នាំបំបាត់ស្លាកស្នាមជាដើម៕

September 25, 2019

សោកស្ដាយផង! Facebook នឹងបិទដំណើរការមុខងារ Group Stories

ក្រុមហ៊ុនហ្វេសប៊ុក (Facebook) នឹងបិទដំណើរការមុខងារ Group Stories យោងតាមការផ្សព្វផ្សាយព័ត៌មានរបស់ Engadget បានឱ្យដឹងថា ក្រុមហ៊ុនហ្វេសប៊ុក នឹងបញ្ចប់ការប្រើប្រាស់មុខងារ Group Stories នៅថ្ងៃទី26 ខែកញ្ញាស្អែកនេះ។

មុខងារ Group Stories ត្រូវបានដាក់ឱ្យប្រើប្រាស់ទូទាំងពិភពលោក កាលពីខែធ្នូ ឆ្នាំកន្លងទៅ ដែលអាចឱ្យលោកអ្នកចែកចាយរូបភាព និងវីដេអូជាក្រុមបាន ក្នុងរយៈពេល 24ម៉ោង (ទិន្នន័យនឹងត្រូវបានលុបចោលបន្ទាប់ពី 24ម៉ោង)។
នាវេលាម៉ោង 11យប់ ថ្ងៃទី26 ខែកញ្ញា (ម៉ោងនៅកម្ពុជា) Group Stories ទាំងអស់នឹងត្រូវបានលុបចោល ហើយលោកអ្នកក៏លែងអាចប្រើប្រាស់បានទៀតដែរ៕

September 25, 2019

Category: សង្គម និងសេដ្ឋកិច្ច