Category: សង្គម និងសេដ្ឋកិច្ច
តារាថៃ កញ្ញា Pancake បង្ហាញវត្តមានយ៉ាងភ្ញាក់ផ្អើលក្នុងថ្ងៃបើក BE EMPIRE
តារាសម្តែងថៃល្បីឈ្មោះកញ្ញា Pancake Khemanit ជាញឹកញាប់បានធ្វើដំណើរមកកាន់ប្រទេសកម្ពុជាយើង ដើម្បីបំពេញការងារផ្ទាល់ខ្លួន ដូចជាការចូលរួមថតផ្សព្វផ្សាយពាណិជ្ជកម្មឱ្យបណ្តាក្រុមហ៊ុនធំៗមួយចំនួនជាដើម។
នៅថ្ងៃទី 6 ខែតុលា ម្សិលមិញនេះ គេបានឃើញតារាស្រីថៃរូបនេះបានត្រលប់មកកម្ពុជាជាថ្មីម្តងទៀយ៉ាងស្ងាត់ៗ ដើម្បីជួបជាមួយអ្នកគាំទ្រ និងក្រុមអ្នកតំណាងចែកចាយផលិតផលគ្រឿងសម្អាង ផេនស៊ី ដែលគេដឹងថា ជាម្សៅផាត់មុខប៊្រេនរបស់តារាស្រីនេះផ្ទាល់តែម្ដង ។ កញ្ញា Pancake បានប្រាប់ឡារ៉ែនឱ្យដឹងថា ដំណើរមកកម្ពុជាម្ដងនេះ គឺនាងចង់ឱ្យអ្នកគាំទ្ររបស់នាង ដែលជាអ្នកតំណាងចែកចាយម្សៅផាត់មុខ ផេនស៊ី បានជួប និងធ្វើការថតរូបដោយផ្ទាល់ជាមួយនាង។ ជំនួបម្ដងនេះ នាងចាត់ទុកថា ជាការលើកទឹកចិត្តនិងផ្ដល់ក្ដីស្រឡាញ់តដល់គ្រួសារផេនស៊ីប្រចាំកម្ពុជាតែម្ដង។
យ៉ាងណាមិញ អតីតតារាសម្ដែងស្រី និងពិធីការិនីកញ្ញា យៀក លី ក៏បានអះអាងប្រាប់ឡារ៉ែនដែរថា នាងនិងគូដណ្ដឹង បានបង្កើតក្រុមហ៊ុនលក់អនឡានញ៍មួយដែលមានឈ្មោះថា BE EMPIRE មានអាយុជាងមួយឆ្នាំតែប៉ុនណោះ ក៏ប៉ុន្ដែបាននាំផលិតផលរបស់តារាស្រី Pancake គឺម្សៅផាត់ផេនស៊ី មកចែកចាយនិងលក់យ៉ាងស្របច្បាប់ និងឥតមានរបស់ក្លែងបន្លំ ដោយមានបាកូដជាសញ្ញាសម្គាល់។ កញ្ញា យៀក លី បានបន្ដថា ក្រៅពីនោះក៏មានផលិតផលដែលដាក់លក់នៅក្នុង BE EMPIRE នេះយ៉ាងច្រើនសន្ធឹកសន្ធាប់ សុទ្ធតែផលិតផលល្អៗ និងទទួលស្គាល់ពីក្រសួងពាក់ព័ន្ធ ដែលអាចផ្ដល់ទំនុកចិត្តយ៉ាងមុតមាំដល់អតិថិជន។ រហូតមកទល់ពេលនេះ BE EMPIRE បានកើបប្រាប់ចំណូលច្រើនសមល្មម ក៏ដោយសារតែមានអ្នកតំណាងចែកចាយលក់គ្រប់ ខេត្ត ក្រុង និងរាជធានី ចំនួនពាន់ៗនាក់ដុតដៃដុតជើងក្នុងការលក់។ កញ្ញា យៀក លី បានប្រកាសថា ដោយសារតែមានការសហការធ្វើការងារយ៉ាងហ្មត់ចត់ជាមួយ តារាស្រីថៃ Pancake ទើបថ្ងៃបើក BE EMPIRE នេះ ក៏ក្លាយជាពិធីបើកប្រាស់លក់ ម្សៅផាត់ផេនស៊ី ដ៏ធំអធឹកអធមតែម្ដង៕
ប្លែកមួយទំហឹង ខួបកូនស្រី ភិន សុដាលីស លេងឱ្យភ្ញៀវកិត្តិយសស្លៀករបៀប Super Hero ក្នុងហ្គេមទាំងអស់
កាលពីល្ងាចម្សិលមិញ ក្រុមតារាជាច្រើនបាននាំគ្នាចូលរួមកម្មវិធីខួបកំណើតកូនស្រីរបស់តារាស្រី ភិន សុដាលីស។ អ្វីដែលគេចាប់អារម្មណ៍ គឺគេឃើញមិត្តភ័ក្ត្រ និងតារាសិល្បៈមួយចំនួន តែងខ្លួនតាមលំនាំតួអង្គក្នុងហ្គេមអនឡាញ ដោយក្នុងពិធីនោះ ក៏មានការប្រកួតរកអ្នកត្រាប់តាម Hero ក្នុងហ្គេម ដែលដូចជាងគេទាំងសំលៀកបំពាក់ និងកាយវិការនោះផង។
លោក អុិន សុភិន បានថ្លែងបញ្ជាក់ថា ដោយសារតែ ដំណក់ឈាមរបស់អ្នកនាង ភិន សុដាលីស គឺជាចៅដំបូងប្រចាំត្រកូល ទើបនាងតូចរូបនេះ ស្ទើរតែក្លាយជាគ្រាប់ពេជ្រក្នុងគ្រួសារ ដែលតម្រូវឱ្យលោក សម្រេចថាត្រូវតែចំណាយធ្វើខួបធំឱ្យមួយឆ្នាំម្ដង ដើម្បីបានជួបជុំមិត្តភ័ក្ត្រ និងអ្នកសិល្បៈផង។ ដើម្បីឱ្យកាន់តែសប្បាយថែមទៀត កូនស្រីរបស់លោក ក៏បបួលមិត្តភ័ក្ត្រតែងខ្លួនតាមតួអង្គហ្គេម ហើយលេងហ្គេមប្លែកៗ ដើម្បីទុកជាការជួបជុំប្រចាំឆ្នាំ។ លោកបានទាំងចាត់ទុកថា អោយតែដល់ថ្ងៃខួបចៅស្រី ខេតធឺរីណា (Katherina) ដែលគេស្គាល់ថាជាកូនស្រីរបស់ អ្នកនាង ភិន សុដាលីស និង លោក ប៉ែន ចំរ៉ុង គឺជាថ្ងៃជួបជុំប្រចាំឆ្នាំដែលទោះជាត្រូវចំណាយប៉ុន្មានក៏ត្រូវតែរៀបពិធីជួបជុំធំដុំនោះផង។ អុីចឹងហើយទើបក្នុងពិធីនោះ ក្រៅពីតារាសិល្បៈ ក៏មានភ្ញៀវអ្នកមុខអ្នកការចូលរួមកុះករ។
អ្នកនាង ភិន សុដាលីស បានអះអាងថា ដ្បិតតែរាល់ថ្ងៃ៦ តុលា គឺជាខួបរបស់កូនស្រី ប៉ុន្តែនាងក៏ចាត់ទុកថាជាថ្ងៃពិសេសរបស់ខ្លួន និងរបស់គ្រួសារទាំងមូលផងដែរ ទើបអ្នកនាងនៅក្នុងឆ្នាំនេះ បានប្រមូលមិត្តភ័ក្ត្រ និងតារាសិល្បៈ អោយកាត់ឈុតត្រាប់តាមតួអង្គក្នុងហ្គេម ហើយមានហ្គេមប្រកួតត្រាប់រកអ្នកដូចតួអង្គក្នុងហ្គេមជាងគេ។ ក្នុងនោះតារាចម្រៀង កញ្ញា អេដា ក៏ក្លាយជាអ្នកឈ្នះនៅក្នុងយប់នោះដែរ។
សូមទស្សនា នួវរូបភាពខាងក្រោម ទាំងអស់គ្នា៖
តារាចម្រៀង ពេជ្រ សូលីកា បំផុសឱ្យមហាជនចូលរួមបរិច្ចាគជូនមន្ទីរពេទ្យកុមារអង្គរក្នុងពិធីប្រគល់50លានរៀល
តារាចម្រៀងល្បីល្បាញសម្រស់ផូរផង់ កញ្ញា ពេជ្រ សូលីកា បានបង្ហាញខ្លួនយ៉ាងកាលីប ក្នុងពិធីតាំងពិព័រណ៌គ្រឿងពេញ Chateau Des Gems យ៉ាងកក្រើកនៅខេត្តសៀមរាប ក្នុងបរិវេណសណ្ឋាគារ Memoire Palace Resort and Spa។ ជាមួយនឹងការប្រគល់ជូនមន្ទីរពេទ្យកុមារអង្គរខេត្តសៀមរាប ចំនួន50លានរៀល ពីពិព័រណ៍មួយនេះ កញ្ញាបានប្រកាសអំពាវនាវ។
ជាមួយនឹងការបកស្រាយបទចម្រៀងច្រើនបទ អមដោយឈុតគ្រឿងពេជ្រលើដងខ្លួនតម្លៃរាប់ម៉ឺនដុល្លារ កញ្ញា ពេជ្រ សូលីកា បានបង្ហាញអារម្មណ៍សប្បាយរីករាយ ដែលកញ្ញាត្រូវបានជ្រើសជាតារាកិត្តិយសក្នុងពិព័រណ៌ដ៏ធំនេះ ក្រោមអធិបតីភាពលោកជំទាវ ទៀង អេង ទៀ សីហា ភរិយាអភិបាលខេត្តសៀមរាប។ កញ្ញាថា ជាលើកទីមួយហើយ ដែលនាងបានច្រៀងក្នុងគម្រោងបំផុសឱ្យមហាជនបានដឹងពីការចូលរួមជួយដល់មន្ទីរពេទ្យកុមារអង្គរ ខណៈដែលការងារសប្បុរសធម៌កន្លងមក កញ្ញាបានចូលរួមច្រើនមកហើយ លើកលែងតែសកម្មភាពបំផុសឱ្យជួយដល់មន្ទីរពេទ្យកុមារអង្គរនេះ។
តារាស្រីរូបនេះទទូចឱ្យមានការចូលរួមបរិច្ចាគជួយដល់មន្ទីរពេទ្យនេះឱ្យបានកាន់តែច្រើន បន្ទាប់ពីបានដឹងថា មន្ទីរពេទ្យកុមារអង្គរប្រឈមនឹងខ្វះខាតច្រើនមិនខុសពីមន្ទីរពេទ្យគន្ធបុប្ផា។ នាងថាពិតជាសប្បាយចិត្តណាស់ ដែលបានរួមចំណែកជួយបំផុសឱ្យមានការយកចិត្តទុកដាក់ជួយដល់មន្ទីរពេទ្យកុមារអង្គរ។ កញ្ញា ក៏នឹងត្រៀមខ្លួនបន្តបន្ទាប់ដើម្បីជួយបំផុសជួយដល់មន្ទីរពេទ្យនេះផងដែរ។
សូមជម្រាបបញ្ជាក់ថា លោកស្រី ម៉ៅ ពោរពេញ អគ្គនាយិកាហាងពេជ្រ Chateau Des Gems បានប្រគល់អំណោយចំនួន50លានរៀលជូនដល់មន្ទីរពេទ្យកុមារអង្គរខេត្តសៀមរាប បន្ទាប់ពីកត់សម្គាល់ថាមន្ទីរពេទ្យនេះ ប្រឈមនឹងការខ្វះខាត។ នៅក្នុងពិធីនោះ លោកស្រីក៏ទទូចឱ្យសប្បុរសជនបន្តធ្វើសប្បុរសធម៌ជួយដល់មន្ទីរពេទ្យកុមារអង្គរឱ្យបានកាន់តែច្រើនបន្ថែមទៀតផងដែរ។ លោកស្រីបន្ដថា កម្មវិធីនេះធ្វើឡើង2ថ្ងៃនៅខេត្តសៀមរាប ដោយនៅថ្ងៃទី5 តុលា ដែលមានការគ្រងឈុតពេជ្រដោយតារាចម្រៀងស្រស់ស្អាត កញ្ញា ពេជ្រ សូលីកា តារាចម្រៀងរបស់ហង្សមាស និងនៅថ្ងៃទី6 តុលា ដោយមានវត្តមានតារាថៃល្បីល្បាញគឺលោក Dome Pakorn Lam។ នៅថ្ងៃទី12 និងទី13 តុលា ខាងមុខ Chateau Des Gems ក៏នឹងមានការរៀបចំពិព័រណ៌ និងការជួបជុំអតិថិជនទ្រង់ទ្រាយធំបែបនេះ នៅរាជធានីភ្នំពេញ នៅភោជនីយដ្ឋាន Topaz ផងដែរ៕
រឿងភាគទូរទស្សន៍ « កំណត់ត្រាស្នេហ៍ » កំពុងវាយលុកដួងចិត្តអ្នកទស្សនា
“កំណត់ត្រាស្នេហ៍” ជាវណ្ណកម្មភាពយន្តភាគបែបថ្មីមួយដែលបង្ហាញអំពី ជិវិតស្នេហានឹងគ្រួសារ ទំនាស់រវាង ផ្នត់គំនិតសម័យមុន និង សម័យបច្ចុប្បន្ន ការស្រឡាញ់ដ៏ជ្រាវជ្រៅ និង គំនាប់របស់ម្តាយចំពោះស្នេហារបស់កូន តាមរយៈតំណើរដើមទងរឿងរាវស្នេហារបស់យុវវ័យបួននាក់ដែលជំពាក់វាក់វិនជាមួយគ្នា។ ដើម្បីរំលេចនូវសាច់រឿងនេះ លោក ជំុ សុភា ដែលជាផលិតករ និង អ្នកដឹងនាំរឿង បានប្រាប់អោយដឹងថា ផលិតករក៏ដូចជាក្រុមអ្នកនិពន្ធ បានសំរេចយកផ្នត់គំនិតសាច់រឿងប្រលោមលោកអក្សសិល្បិ៏ “ផ្កាស្រពោន” មកធ្វើការប្រៀបធៀប នឹងផ្តត់គំនិតសម័យបច្ចុប្បន្ន ដើម្បីបង្ហាញពីផ្ទៃរឿងទាំងមូល ។
លោកបានបន្ថែមយ៉ាងដូច្នេះថា «សម្រាប់រឿងភាគ “កំណត់ត្រាស្នេហ៍” នេះ ពិតជា ពិសេសដោយសារ សាច់រឿងប្រទាក់ក្រឡាគ្នា គួរឲ្យចាប់អារម្មណ៍ រវាងជិវិតបែបយុវវ័យ នាពេលបច្ចុប្បន្ន និង អតីតកាល ។ តួអង្គនិមួយៗ មានបុគ្គលិកលក្ខណៈ ទំនើបនិយម ចូលចិត្តសេរីភាព មានគំនិតម្តាស់ការព្រមទាំងមានសេចក្តីតស៊ូរព្យាយាមស្វាសស្វែងយកអ្វីដែលខ្លូនចង់បាន ខុសពីរឿងផ្កាស្រពោន ដែលមាន គនំិតអភិរក្ខនិយម សុខចិត្តធ្វើអ្វីៗតាមចាស់ទំុទំនៀមទំលាប់ មិនសូវហ៊ានពុះពារដើម្បីអ្វីដែលខ្លួនចង់បានឡើយ »។
រឿងភាគ“កំណត់ត្រាស្នេហ៍”នេះមានចំនូន ៦០ភាគ ដែលត្រូវបាន រៀបចំផលិតអស់រយៈពេលជាងមួយឆ្នាំមកហើយ មានការចូលរួមនិពន្ធអត្ថបទភាពយន្តពីអ្នកនិពន្ធចំនួន បីនាក់ និងការចូលរួមពិភាក្សា ពីសំណាក់ ផលិតករ និង អ្នកដឹកនាំរឿង យ៉ាងស្វិតស្វាញ ក្នុងដំណាក់កាលនិពន្ធ នីមួយៗផងដែរ ដើម្បីធានាពីភាពរលូននៃសាច់រឿង ។
សូមបញ្ចាក់ថា រឿងភាគ“កំណត់ត្រាស្នេហ៍”នេះ ត្រូវបានដាក់បញ្ចាំង នៅម៉ោងមាស លើកញ្ចក់ទូរទស្សន៍ CTN នៅអំឡុងខែ តុលា ២០១៩ នេះ ដែលការចូលរួមសម្តែងពីតារាល្បីៗមួយចំនួនដូចជា លោក ប៉ែន ភក្រ័សុធារិទ្ធ កញ្ញា សិុន សក្តដា លោក សុខ សាន់នី កញ្ញា យ៉ានិច កញ្ញា ជិន ជិន កញ្ញា ម៉េប៊ី អ្នកស្រីចាន់ តារាទី លោក ជា សំណាង កញ្ញា ជាតិ សច្ចកា ព្រមទាំងតារាល្បីៗជាច្រើនរូបទៀត !។ សូមទស្សនិកជនរងចាំតាមដានទាំងអស់គ្នា ថាតើមានភាពល្អមើលឬយ៉ាងណា !៕
តារាសម្ដែង ស្រេង ឈាងឡេង បង្ហាញភាពយន្ដជីវិតចំណង« មើលងាយ »
នៅលើបណ្ដាញសង្គមហ្វេសប៊ុក គេមើលឃើញថា ភាពយន្តខ្លីរឿងអប់រំជីវិតមានចំណងជើង « មើលងាយ » ត្រូវបានសម្ដែងដោយលោក ស្រេង ឈាងឡេង ជាតួឯក ដែលរឿងនេះមានសាច់រឿងឆ្លុះបញ្ចាំងពីអតីតកាលដែលតារារូបនេះធ្លាប់ឆ្លងកាត់។
ក្នុងភាពយន្តនេះ ខណៈដែលការសម្ដែងជាតួឯកលើកដំបូងរបស់លោក ក្រៅពីត្រូវសាច់រឿងអប់រំជីវិតហើយនោះ ក៏ត្រូវគេមើលឃើញពីទេពកោសល្យមិនចាញ់អ្នកមានបទពិសោធន៍ច្រើនឆ្នាំនោះទេ។ នេះជាស្នាដៃថ្មីដែលអ្នកជំនួញដីធ្លីវ័យក្មេង និងជានិស្សិតពេទ្យរូបនេះ រំលេចឡើង នៅក្នុងវិស័យសម្ដែង។ លោក ស្រេង ឈាងឡេង បញ្ជាក់ថា ប្រភពដែលនាំអោយមានភាពយន្តរឿង«មើលងាយ» ហើយលោកបានសម្ដែងតួឯក គឺដោយសារក្រុមផលិតករមកសិក្សាជីវិតជោគជ័យរបស់លោក ហើយដោយចាប់អារម្មណ៍ពីការតស៊ូ ផលិតករក៏ស្នើសុំចងក្រងជាសាច់រឿង ដោយជ្រើសឱ្យលោកសម្ដែងជាតួឯកដោយផ្ទាល់។
ក្នុងសាច់រឿងនេះ លោកថាខ្លួនសម្ដែងចូលតួ ដោយសារតែនោះជាអតីតកាលរបស់ខ្លួន ជាពិសេសនៅពេលរំលឹកដល់ការមាក់ងាយរបស់មនុស្សមួយចំនួន។ ភាពយន្តនេះ ជារឿងពិតរបស់ខ្លួន ប៉ុន្តែសាច់រឿងក៏ឆ្លុះបញ្ចាំងពីសង្គមទាំងមូលដែលធ្លាប់រងការមាក់ងាយផងដែរ ទើបលោកយល់ថាសាច់រឿងដែលខ្លួនសម្ដែង ជាការផ្ដល់កម្លាំងចិត្តដល់អ្នកមិនទាន់ជោគជ័យ។ ភាពយន្តខ្លីនេះ នឹងដាក់បង្ហោះឆាប់ៗ។
វ័យ 24 ឆ្នាំ!! តារាសម្ដែង សាណាផាត់ ប្រកាសលូកដៃក្នុងសិល្បៈឱ្យកាន់តែខ្លាំង
ចូលវ័យ 24 ឆ្នាំ តារាសម្ដែងលោក សាណាផាត់ ដែលអះអាងថា ខ្លួនមានគម្រោងនឹងប្ដូរការងារដែលមានពេលវេលាជាងនេះ ឬអាចឈប់ការងារដែលប៉ះពាល់តែម្ដង ដើម្បីអាចប្រឡូកសិល្បៈ ឱ្យបានស៊ប់ជាង ព្រោះថា អស់រយៈពល ៣ ឆ្នាំមកហើយដែលបានចូលសិល្បៈ លោកមានស្នាដៃច្រើន តែមិនសូវទទួលបានប្រជាប្រិយភាពដូចក្ដីរំពឹងទុកសោះ។
តារាសម្ដែងប្រុសរូបនេះ បានប្រាប់អ្នកសារព័ត៌មានឡារ៉ែននៅថ្ងៃទី 4 ខែតុលា ឆ្នាំ 2019 នេះថា លោកទើបតែហ៑ានចំណាយធនធានធ្វើខួបលើកដំបូង ក្រោយប្រឡូកសិល្បៈ ហើយរយៈពេល៣ឆ្នាំជាងដែលលោកចូលសម្ដែង លោកទទួលបានឱកាសថតបានរឿងខ្លី និង MV ជាច្រើន ខណៈដែលភាពយន្តខ្នាតធំ និង ភាពយន្តភាគទូរទស្សន៍ក៏មានគេហៅថតច្រើន។
យ៉ាងណាមិញលោកថា ខ្លួនមិនដែលបានទទួលថតភាពយន្តភាគ ឬ ភាពយន្តខ្នាតធំនោះ ដោយសារតែលោកមានការងារពេញម៉ោងមួយ ដែលពិបាកសុំច្បាប់ច្រើនថ្ងៃ។ លោកទទួលថតតែការសម្ដែងណា ដែលប្រើពេលមួយថ្ងៃ ឬ តិចថ្ងៃប៉ុណ្ណោះ ខណៈដែលការងារត្រូវថតខេត្តឆ្ងាយ ក៏លោកមិនសូវបានទទួល។ លោកថានេះជាហេតុផលប្រឡូកសិល្បៈមិនសូវល្បី ប៉ុន្តែក៏មានស្នាដៃសម្ដែងច្រើននាពេលចុងក្រោយផងដែរ ទើបមានទំនាក់ទំនងច្រើនជាមួយតារាសិល្បៈ ជាពិសេសតារាៗរៀមច្បង។
លោក សា ណាផាត់ បន្តថា បើលោកកុំចូលសិល្បៈលេងៗ និងលិបល គឺសន្ទុះទីផ្សារនឹងមានច្រើនណាស់ ស្របគ្នាដែលលោកក៏ស្គាល់ផលិតករ ហើយត្រូវបានផលិតករទាក់ទងអោយថតរឿងជាហូរហែរ តែទទួលមិនបានដោយសារជាប់ការងារ៕
WHO ផ្តល់កញ្ចប់ថវិកាអភិវឌ្ឍន៍ដើម្បីផ្តល់ការងារដល់ធនធានមនុស្សផ្នែកសុខាភិបាលនៅកម្ពុជា
ស្របពេលដែលកំណើនប្រជាជនលើពិភពលោកមានការកើនឡើងយ៉ាងលឿន តម្រូវការផ្នែកសុខាភិបាលក៏កាន់តែមានតម្រូវការច្រើនឡើងផងដែរនៅតាមប្រទេសនានា ជាពិសេសប្រទេសកំពុងអភិវឌ្ឍន៍។
ថ្មីៗនេះដើម្បីឆ្លើយតបទៅនឹងតម្រូវការផ្នែកសេវាសុខភិបាល និងការងារនៅប្រទេសកម្ពុជា គីហ្គីស្ថាន នេប៉ាល់ និងស្រីលង្ការ អង្គការសុខភាពពិភពលោក ឬ WHO បានផ្តល់កញ្ចប់ថវិកាប្រមាណ 3លានដុល្លារ ដើម្បីអនុវត្តគម្រោងមួយឈ្មោះថា «The Working for Health Program» ដែលមានរយៈពេល 3ឆ្នាំ។ គម្រោងនេះបានផ្តើមចាប់ពីខែមិថុនា ឆ្នាំ2018 និងបញ្ចប់ទៅវិញនៅខែឧសភា ឆ្នាំ2021។
លោក John Ritchotte មន្ត្រីទទួលបន្ទុកទំនាក់ទំនងអន្តរជាតិប្រចាំទីក្រុងបាងកកនៃអង្គការសុខភាពពិភពលោកបានលើកឡើងថា គម្រោង «The Working for Health Program» នេះនឹងជួយអភិវឌ្ឍវិស័យសុខាភិបាលនៅកម្ពុជា តាមរយៈការពង្រីកសេវាសុខាភិបាលទៅដល់ប្រជាជនដែលកំពុងត្រូវការសេវាសុខភិបាលកាន់តែច្រើនឡើងពី 1ថ្ងៃទៅ 1ថ្ងៃនៅកម្ពុជា។ តាមរយៈការពង្រីកសេវាសុខាភិបាលនៃគម្រោងនេះ កម្ពុជានឹងទទួលបានឱកាសការងារយ៉ាងច្រើនសម្រាប់ធនធានមនុស្សដែលកំពុងសិក្សាផ្នែកសុកភិបាល និងវេជ្ជសាស្ត្រ ព្រោះគម្រោងនឹងត្រូវការបុគ្គលិកជាច្រើនដើម្បីបម្រើការក្នុងការផ្តល់សេវាសុខាភិបាលនៅគ្រប់ទីកន្លែងក្នុងប្រទេស។ វាជាការចូលរួមចំណែកយ៉ាងសំខាន់ក្នុងការជួយដល់វិស័យការងារកម្ពុជា និងក៏ដូចជាជួយដល់ការអនុវត្តគោលនយោបាយរបស់រដ្ឋាភិបាលកម្ពុជា ក្នុងការអភិវឌ្ឍប្រទេសឱ្យទៅតាមគោលដៅ និងឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ2030 និងក្លាយជាប្រទេសដែលមានចំណូលខ្ពស់នៅឆ្នាំ2050។
លោក John Richotte បាននិយាយថា៖ “សម្រាប់កម្ពុជា ដៃគូសំខាន់ក្នុងការអនុវត្តគម្រោង The Working for Health Program នេះ គឺអង្គការសុខភាពពិភពលោក ក្រសួងសុខាភិបាល និងក្រសួងការងារ និងបណ្តុះបណ្តាលវិជ្ជាជីវៈ។ បន្ថែមពីលើនេះ ក៏មានការចូលរួមផងដែរពីអង្គការអន្តរជាតិខាងការងារ (ILO) និងអង្គការ OECD រួមទាំងដៃគូនិយោជក និងសហជីពមួយចំនួនទៀតដែរ”។
គួរបញ្ជាក់ផងដែរថា បច្ចុប្បន្ននេះ កម្ពុជាកំពុងត្រូវការធនធានមនុស្សជាច្រើនផ្នែកសុខាភិបាល ដើម្បីជួយជំរុញឱ្យវិស័យសុខាភិបាលអភិវឌ្ឍទៅបានកាន់តែទូលំទូលាយនៅគ្រប់តំបន់ទាំងអស់នៅទូទាំងប្រទេស ជាពិសេសតំបន់ជនបទ៕
អ្នកជំនាញៈ តម្លៃដីធ្លី ផ្ទះសំបែង វីឡា ខុនដូ នៅតែមានទីផ្សារខ្ពស់
ក្នុងវេទិការៀបចំដោយក្លិបអ្នកកាសែតកម្ពុជាស្តីពីស្ថានភាពអចលនវត្ថុនៅកម្ពុជាក្នុងពេលបច្ចុប្បន្ននិងទៅថ្ងៃអនាគត កាលពីថ្ងៃទី19 ខែកញ្ញា ឆ្នាំ2019 អ្នកជំនាញខាងអចលនទ្រព្យបានព្យាករថា តម្លៃដីធ្លីផ្ទះសំបែង វីឡា ខុនដូ នៅតែមានទីផ្សារខ្ពស់ក្នុងរយៈពេល 3ទៅ 5ឆ្នាំខាងមុខទៀត ទោះបីមានភាពរអាក់រអួល និងការរំខានមួយចំនួនតូចក៏ដោយ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានអះអាងថា“ដោយឈរលើកត្តាជាច្រើន ក្នុងនោះមានដូចជាប្រទេសមានសន្តិភាព ហើយតម្រូវការរស់នៅតាមខុនដូកាន់តែច្រើន និន្នាការនៃការរស់នៅបែកគ្រួសារមានសមាជិកច្រើននៃមនុស្សសម័យថ្មី ការកើនឡើងនៃចំណូលក្នុងស្រុកសរុប ឥទ្ធិពលនៃការចូលរួមវិនិយោគរបស់ក្រុមហ៊ុនធំៗមកពីក្រៅប្រទេសនោះ បានធ្វើឱ្យវិស័យអចលនទ្រព្យនៅក្នុងប្រទេសកម្ពុជានៅតែមានភាពរឹងមាំ”។
លោកបានបន្តថា បច្ចុប្បន្ននៅក្នុងខេត្តចំនួន5 មានខេត្តព្រះសីហនុ ខេត្តសៀមរាប ខេត្តបាត់ដំបង ខេត្តកោះកុង និងខេត្តកំពត បានចូលរួមយ៉ាងសកម្មជាទិសដៅក្នុងការអភិវឌ្ឍលើវិស័យអចលនទ្រព្យនៅកម្ពុជា។ លោកក៏បានបង្ហាញគោលការណ៍ 2ចំណុចដើម្បីវិនិយោគដីឡូត៍ឱ្យបានជោគជ័យដោយ ទី1-ត្រូវមើលពីចំនួនប្រជាជនតិច ឬច្រើននៅតំបន់ដែលត្រូវវិនិយោគ។ ទី2-មើលតំបន់នោះ តើមានការអភិវឌ្ឍ ដូចជាមានផ្សារ រោងចក្រសហគ្រាស និងអគារពាណិជ្ជកម្មផ្សេងៗឬទេ?។
លោកបានបន្ដថា កាលពីជំនាន់មុនឱ្យតែពេលបោះឆ្នោតម្ដងៗ ប្រជាជនចាប់ផ្ដើមលក់ដីធ្លីរបស់ខ្លួន ដោយសារពួកគាត់មានការភ័យបារម្ភច្រើន នេះបើជាទស្សនៈរបស់ប្រជាជនកាលពី 15ឆ្នាំមុន។ ប៉ុន្ដែឥឡូវកម្រិតយល់ដឹងរបស់ប្រជាជន នៅពេលបច្ចុប្បន្ននេះ មានការចេះដឹងច្រើន ដូច្នេះពួកគាត់មានការគិតពិចារណាច្រើនដោយមិនសូវជាជឿលើពាក្យឃោសនាប៉ុន្មានឡើយ។ បើតាមលោកច្រឹក សុខនីម សម្រាប់ជំហានទី2 នៅថ្ងៃអនាគត អចលនទ្រព្យនឹងមានទីផ្សារខ្ពស់សម្រាប់ខេត្តជុំវិញបឹងទន្លេសាប។បន្ទាប់ពីបង្ហាញពីភាពរីកចម្រើននៃវិស័យអចលនទ្រព្យនៅរយៈពេល5ឆ្នាំខាងមុខហើយ លោក ច្រឹក សុខនីម ក៏បានបង្ហាញពីវិស័យដីឡូត៍ ដែលបច្ចុប្បន្ននេះកំពុងមានសម្ទុះខ្លាំង ដោយមានការពុះដីលក់យ៉ាងសស្រោកសស្រាំផងដែរ។
លោក ម៉ាន់ ច័ន្ទឌី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញពីប្រធានបទ “ស្ថានភាពវិស័យដីឡូត៍” ដោយលោកបានបង្ហាញពីសញ្ញាវិជ្ជាមានថា វិស័យដីឡូត៍នៅតែមានលក្ខណៈល្អប្រសើរដែលអ្នកមានចំណូលទាប និងមធ្យមអាចវិនិយោគទៅលើដីឡូត៍តូចៗនេះបាន។ ជាមួយគ្នានេះ លោកបានបញ្ជាក់ថា សន្សំលុយនៅក្នុងដីឡូត៍ ប្រសើរជាងសន្សំលុយនៅក្នុងធនាគារ។ ការទិញដីធ្លីត្រឹមត្រូវដោយមានការដឹងឮពិតប្រាកដពីអាជ្ញាធរពាក់ព័ន្ធគ្រប់លំដាប់ថ្នាក់ថា ជាដីស្របច្បាប់សម្រាប់ទុកលក់បន្ត នៅតែមានសក្តានុពលខ្ពស់នាពេលបច្ចុប្បន្ននេះ។លោកច័ន្ទឌី ក៏បានក្រើនរំឭកដល់អ្នកចង់រកស៊ីវិស័យដីធ្លីនេះថា“មុនវិនិយោគត្រូវពិនិត្យមើលការិយាល័យរបស់គេឱ្យបានច្បាស់លាស់ ប្លង់ដីឱ្យបានច្បាស់លាស់ កិច្ចសន្យាគួរឱ្យជឿជាក់បានកម្រិតណា? មិនមែនកិច្ចសន្យាគ្រាន់តែក្រដាសបន្តិចក៏ជឿជាក់ដែរនោះទេ”។
លោក ហ៊ឹម សីហា នាយកផ្នែកស្រាវជ្រាវរបស់ក្រុមហ៊ុន VTRUST APPRAISAL បានឱ្យដឹងថា តម្រូវការផ្ទះសំបែងរស់នៅក្នុងរាជធានីភ្នំពេញសព្វថ្ងៃនេះ គឺស្ថិតក្នុងកម្រិតខ្ពស់ ដោយក្នុង 1ឆ្នាំមានចំនួន 2ម៉ឺនខ្នង(ផ្ទះផ្ទាល់ដី និងផ្ទះក្នុងបុរីជាដើម)។ ដោយឡែកខុនដូមានចំនួន 1ម៉ឺនខ្នង ចំពោះចំនួនអគារដែលបានសាងសង់ចប់ និងកំពុងសាងសង់មានចំនួន 6ម៉ឺនខ្នង ហើយចំនួននេះមានការកើនឡើងជាបន្តបន្ទាប់ បើបូកសរុបនឹងអគារគ្រប់ប្រភេទទាំងអស់ផង អាចឈានដល់ 5សែនខ្នងក្នុងឆ្នាំ2030 ប៉ុន្តែតម្រូវការនៅពេលនោះអាចឈានដល់ 81ម៉ឺនខ្នង។នាយកផ្នែកស្រាវជ្រាវរូបនេះបានបញ្ជាក់ថា៖“ការផ្គត់ផ្គងនេះមិនទាន់គ្រប់គ្រាន់ទេ យើងផ្គត់ផ្គង់បានតែជាង 5សែនខ្នងទេនៅឆ្នាំ2030 មានន័យថា កម្លាំងនៃការស្រូបទាញខ្លាំងមែនទែន នេះផ្នែកមួយនៃការទស្សន៍ទាយរបស់យើង”។
សូមបញ្ជាក់ផងដែរថា វេទិកាស្តីពីអចលនវត្ថុនៅកម្ពុជា ក្នុងពេលបច្ចុប្បន្ន និងនៅថ្ងៃអនាគតរៀបចំឡើងដោយក្លិបអ្នកកាសែតកម្ពុជា និងមានការចូលរួមពីលោក ពុយគា អគ្គលេខាធិការក្លិបអ្នកកាសែតកម្ពុជា លោក ហ៊ឹម សីហា នាយកផ្នែកស្រាវជ្រាវ VTRUST លោក ពឹង សេរី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងលោក ម៉ាន់ ច័ន្ទឌីអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា៕
សៀង ចន្ធា ត្រូវបានសហព័ន្ធបញ្ចូលជាបេក្ខភាពប្រជែងពាន AFC Annual Award 2019
សហព័ន្ធកីឡាបាល់ទាត់កម្ពុជាបានបញ្ជាក់ថា កីឡាករ សៀង ចន្ធា ដែលតំណាងឱ្យកម្ពុជា ត្រូវបានដាក់បញ្ចូលជាបេក្ខភាពមួយរូបដើម្បីប្រកួតប្រជែងយកពានរង្វាន់កីឡាករយុវជនល្អបំផុតប្រចាំទ្វីបអាស៊ីប្រចាំឆ្នាំ2019 ក្នុងកម្មវិធី AFC Annual Award 2019។
គួរបញ្ជាក់ដែរថា ពានរង្វាន់មួយនេះបានចម្រាញ់យកយុវជនល្អៗបំផុតប្រចាំប្រទេសនីមួយៗមកជ្រើសរើស ដោយក្នុង 1ឆ្នាំៗមានកីឡាករមិនដល់ 10រូបឡើយត្រូវបានសហព័ន្ធកីឡាបាល់ទាត់ទ្វីបអាស៊ីដាក់ចូលក្នុងបញ្ចីឈ្មោះសម្រាប់ប្រជែងចុងក្រោយ ហើយនេះគឺជាលើកទី1 ហើយដែលកម្ពុជាបានជាប់ក្នុងបញ្ជីឈ្មោះចុងក្រោយនៃការប្រកួតប្រជែងពានរង្វាន់មួយនេះ។
កម្មវិធី AFC Annual Award 2019 នេះ មានពានរង្វាន់ជាច្រើនដូចជា កីឡាករល្អ កីឡាការិនីល្អ កីឡាករយុវជនល្អ ក្រុមជម្រើសជាតិល្អ ក្លិបល្អ គ្រូបង្វឹកល្អ និងសហព័ន្ធល្អជាដើម ដើម្បីលើកទឹកចិត្ដ និងជំរុញការអភិវឌ្ឍវិស័យកីឡាបាល់ទាត់ក្នុងតំបន់អាស៊ីឱ្យកាន់តែរីកចម្រើន៕