សង្គម និងសេដ្ឋកិច្ច - La Reine Media

ហេតុអីត្រូវទៅពិនិត្យគភ៌? បើមិនទៅពិនិត្យគភ៌ តើមានគ្រោះថ្នាក់ដល់កូនក្នុងផ្ទៃយ៉ាងណា?

អនាគតអ្នកម្ដាយថ្មីថ្មោងតែងមានការនឹកសង្ស័យថា ពេលមានផ្ទៃពោះ តើចាំបាច់ប៉ុនណាត្រូវទៅពិនិត្យផ្ទៃពោះ និងបើមិនទៅពិនិត្យផ្ទៃពោះបានឬទេ? ទិញថ្នាំបំប៉នមកញ៉ាំដោយខ្លួនឯងបានទេ? ព្រោះពេលខ្លះមិនងាយស្រួលក្នុងការធ្វើដំណើរទៅពិនិត្យផ្ទៃពោះតាមការណាត់របស់គ្រូពេទ្យ និងស្ត្រីមានគភ៌ខ្លះអាងហេតុផលថា ពិបាកក្នុងការសុំច្បាប់ឈប់ពីការងារជាដើម។ល។ តែស្ត្រីមានគភ៌ទាំងឡាយដឹងទេថា បើមិនបានទៅពិនិត្យគភ៌ នឹងមានគ្រោះថ្នាក់ដល់ខ្លួនឯង និងកូនក្នុងផ្ទៃខ្លាំងណាស់… សេចក្ដីលម្អិតមានដូចខាងក្រោមនេះ៖

4ហេតុផលល្អៗថា ហេតុអីត្រូវទៅពិនិត្យគភ៌?
1. ពេលអនាគតអ្នកម្ដាយទៅពិនិត្យគភ៌អ្នកម្ដាយនឹងបានដឹងពីព័ត៌មាន និងការណែនាំក្នុងការប្រតិបត្តិខ្លួនក្នុងអំឡុងពេលមានគភ៌ រហូតដល់រយៈពេលក្រោយការប្រសូត ដោយសារតែក្នុងអំឡុងពេលតាំងគភ៌ សរីរៈ និងរាងកាយរបស់ស្ត្រីមានគភ៌មានការប្រែប្រួលច្រើន។ ស្ត្រីមានគភ៌លើកដំបូងមួយចំនួនអាចនឹងមិនយល់ និងកើតក្ដីកង្វល់ជាមួយនឹងការប្រែប្រួលទាំងនោះ ដូច្នេះគ្រូពេទ្យអ្នកពិនិត្យគភ៌នឹងផ្ដល់ការណែនាំក្នុងរឿងផ្សេងៗទាំងនោះបានយ៉ាងល្អ។

2. នៅក្នុងការពិនិត្យគភ៌ ស្ត្រីមានផ្ទៃពោះនឹងបានទទួលការវាយតម្លៃយ៉ាងលម្អិតអំពីឱកាសកើតសភាវជ្រៀតជ្រែកពីជំងឺផ្សេងក្នុងខណៈតាំងគភ៌ ហើយក្នុងករណីដែលស្ត្រីមានគភ៌មានភាពប្រថុយប្រថានខ្ពស់ក្នុងការកើតមានសភាវជ្រៀតជ្រែកនេះ គ្រូពេទ្យអ្នកពិនិត្យគភ៌នឹងអធិប្បាយ និងណែនាំវិធីក្នុងការការពារសភាវផ្សេងៗទាំងនោះទៀតផង។

3. សម្រាប់ស្ត្រីដែលមានរោគ ឬសភាវជ្រៀតជ្រែកពីជំងឺផ្សេងៗកើតឡើងក្នុងខណៈមានផ្ទៃពោះ ការពិនិត្យគភ៌គឺជារឿងសំខាន់ និងចាំបាច់បំផុត។ តើស្ត្រីទាំងឡាយជ្រាបដែរឬទេថា មានជំងឺមួយចំនួនដែលភាពធ្ងន់ធ្ងររបស់វានឹងកើនខ្លាំងឡើងក្នុងខណៈដែលអ្នកមានផ្ទៃពោះ ដែលវានឹងហុចផលប៉ះពាល់ដល់សុខភាពរបស់ម្ដាយ និងកូនតូចក្នុងផ្ទៃ ដូច្នេះក្នុងការពិនិត្យគភ៌ គ្រូពេទ្យនឹងមើលថែទាំ និងផ្ដល់ការរក្សាព្យាបាលផ្សេងៗដែលកើតឡើងពេញមួយរយៈពេលនៃការមានផ្ទៃពោះរបស់អ្នក។

4. ហេតុផលចុងក្រោយដែលស្ត្រីមានផ្ទៃពោះគួរតែទៅពិនិត្យគភ៌នោះគឺ ដើម្បីឱ្យទាំងម្ដាយ(ខ្លួនឯង) និងកូនតូចក្នុងផ្ទៃមានសុខភាពរឹងមាំឥតខ្ចោះ ប្រាសចាករោគភ័យ និងសភាវជ្រៀតជ្រែកអ្វីៗទាំងអស់ហ្នឹងឯង។

អនាគតស្ត្រីជាម្ដាយមួយចំនួនអាចនឹងមានអារម្មណ៍កង្វល់អំពីរឿងការពិនិត្យផ្ទៃពោះនេះ មិនដឹងថានឹងទៅពិនិត្យនៅទីណា? ទៅហើយ ត្រូវធ្វើអ្វីខ្លះ? គ្រូពេទ្យ និងអ្នកជំនួយការគ្រូពេទ្យនឹងស្ដីបន្ទោសឬអត់? ត្រូវជោះឈាមយកទៅពិនិត្យច្រើនដងអត់?-ល- ដូច្នេះពេលនេះ ឡារ៉ែនសូមប្រាប់ទៅចុះថា កុំទៅព្រួយកង្វល់ធ្វើអី ចូរទៅពិនិត្យផ្ទៃពោះឱ្យបានទៀងទាត់តាមការណាត់របស់គ្រូពេទ្យ ដើម្បីកូនជាទីស្រឡាញ់របស់អ្នក…៕

October 11, 2019

ការតាំងចិត្ត និងការគ្រប់គ្រងខ្លួនឯងបានល្អ ជាបច្ច័យដែលធ្វើឱ្យសិស្សភាគច្រើនបាននិទ្ទេស A

ទទួលបាននិទ្ទេស A គឺជាមោទកភាពដ៏ធំមួយសម្រាប់សិស្សានុសិស្សដែលបានខិតខំសិក្សាអស់រយៈពេលជាច្រើនឆ្នាំនៅកម្រិតមធ្យមសិក្សា។ ហើយវាជាចំណុចដ៏សំខាន់ដែលបង្ហាញពីចំណុចចាប់ផ្តើមដ៏វិជ្ជមានសម្រាប់ការអភិវឌ្ឍសមត្ថភាពជាមួយនឹងឱកាសយ៉ាងច្រើនសម្រាប់អនាគត។

ដើម្បីទទួលបាននិទ្ទេស A សិស្សឆ្នើមជាច្រើនបានបង្ហាញវិធីសាស្ត្រប្លែកៗពីគ្នាទៅតាមស្ថានភាពជាក់ស្តែងនៃការរស់នៅ ទេពកោសល្យផ្ទាល់ខ្លួន និងបរិស្ថាននៃការអប់រំ។ នៅក្នុងចំណោមវិធីសាស្ត្រល្អៗជាច្រើនដែលសិស្សនិទ្ទេសA បានលើកឡើង មានចំណុចរួមមួយដែលពួកគេសុទ្ធតែមាននៅក្នុងខ្លួន គឺការតាំងចិត្ត និងការគ្រប់គ្រងខ្លួនឯងបាន។

យុវសិស្ស ហុង រស្មីមរកត សិស្សឆ្នើមនិទ្ទេស A ឆ្នាំសិក្សា 2018-2019 មកពីសាលារៀនវេស្ទឡាញន៍ បានលើកឡើងថា ប្រសិនបើចង់ទទួលបាននិទ្ទេសល្អប្រសើរក្នុងការប្រឡងមធ្យមសិក្សាទុតិយភូមិ បេក្ខជនទាំងអស់ចាំបាច់ត្រូវដឹងខ្លួនឯងឱ្យច្បាស់ថា និទ្ទេសអ្វីដែលយើងចង់ឃើញនៅក្នុងពេលប្រកាសលទ្ធផល។ គ្រាន់តែចាប់ផ្តើមឆ្នាំសិក្សាចូលថ្នាក់ទី12 ភ្លាម យើងត្រូវតាំងចិត្តឱ្យបានមុតមាំភ្លាមថា យើងត្រូវតែយកនិទ្ទេសល្អឱ្យបាន។ កន្លងមកមានសិស្សជាច្រើនមិនហ៊ានដាក់គោលដៅយកនិទ្ទេស A នោះទេ ព្រោះពួកគេយល់ឃើញថា វាជារឿងធំខ្លាំងពេកសម្រាប់ទៅឱ្យដល់ តែតាមពិតទៅ ប្រសិនបើយើងខិតខំប្រឹងប្រែងពេញ 1ឆ្នាំ យើងអាចយកបាន…។

យុវតី ហុង រស្មីមរកត បាននិយាយថា៖ “ការតាំងចិត្តជារឿងសំខាន់បំផុតដែលយើងត្រូវមាននៅក្នុងជីវិត។ ប្រសិនបើចង់បាននិទ្ទេស A វាមិនមែនជារឿងងាយស្រួលពេកនោះទេ តែវាក៏មិនលំបាកខ្លាំងរហូតដល់យកមិនបានដែរ ឱ្យតែមានការតស៊ូ និងមានវិន័យច្បាស់លាស់ នោះយើងនឹងអាចជម្នះឧបសគ្គនានាដើម្បីសម្រេចបាននូវនិទ្ទេសដែលយើងប្រាថ្នាមិនខាន”។

សិស្សឆ្នើមនិទ្ទេស A ខាងលើបានលើកឡើងផងដែរថា នៅពេលដែលយើងមានការតាំងចិត្តខ្ពស់ នោះយើងនឹងមានឆន្ទៈធំក្នុងការខិតខំប្រឹងប្រែង។

ឆន្ទៈ និងក្តីស្រមៃនេះហើយដែលជំរុញទឹកចិត្តយើងឱ្យឈ្នះការអូសទាញនៃភាពខ្ជីខ្ជា និងភាពខ្ជិលច្រអូស ដែលនេះជាបច្ច័យដ៏សំខាន់នាំឱ្យទទួលបានជោគជ័យក្នុងការសិក្សា។ យុវតី រស្មីមរកត បានបន្ថែមទៀតថា ដើម្បីរក្សាឱ្យគំនិតស្រឡះល្អ និងទទួលបានជោគជ័យដោយភាពរីករាយ សិស្សានុសិស្សគួរកុំដាក់សម្ពាធខ្លាំងពេកក្នុងការសិក្សា។ សិស្សគួរកុំផ្តោតតែលើការប្រឡងបាក់ឌុប ហើយគិតថា វាលំបាកខ្លាំង និងងប់ងុលជាមួយនឹងការបង្ខំខ្លួនឯងឱ្យខំរៀនជ្រុលហួសហេតុពេក។ អ្វីដែលយើងអាចធ្វើបាន គឺព្យយាមកាត់បន្ថយស្ត្រេស និងតាមដានអារម្មណ៍របស់ខ្លួនឯងផងដែរ។ នៅពេលយើងធ្វើលំហាត់លំបាកខ្លាំង ឬនៅពេលស្ត្រេសពេក យើងមិនគួរបង្ខំខ្លួនឯងឱ្យខំហួសពីសមត្ថភាពនោះទេ អ្វីដែលគួរធ្វើ គឺកត់លំហាត់ដែលពិបាកនោះទុកយកទៅសួរគ្រូ ឬស្រាវជ្រាវនៅពេលក្រោយ ហើយអាចបង្វែរអារម្មណ៍ទៅធ្វើអ្វីផ្សេងដែលចិត្តយើងចង់ធ្វើវិញប្រសើរជាង។ ប្រសិនបើយើងចង់មើលកុន ឬចង់ចេញទៅក្រៅ យើងអាចបណ្តោយឱ្យអារម្មណ៍រីករាយខ្លះបាន ព្រោះជោគជ័យដែលកើតចេញពីសម្ពាធខ្លាំងពេកមិនល្អប៉ុន្មាននោះទេសម្រាប់ជីវិត តែត្រូវចាំផងដែរថា យើងក៏មិនអាចបណ្តែតបណ្តោយខ្លាំងពេកបានដែរ ព្រោះបើយើងធូររលុងខ្លាំងពេក យើងអាចនឹងបរាជ័យក្នុងការសិក្សាក៏អាចថាបានដែរ។

យុវជន តៅ វិល្លៀម សិស្សពូកែនិទ្ទេស A ក្នុងឆ្នាំសិក្សាដូចគ្នានេះដែរបានលើកឡើងថា គាត់ធ្លាប់ជាសិស្សខ្ជិល ហើយញៀនជាមួយការលេងទូរស័ព្ទ និងហ្គេមម្នាក់ មុននឹងក្លាយជាសិស្សនិទ្ទេស A។ ដោយសារតែការតាំងចិត្ត និងមហិច្ឆតាដែលបានកំណត់សម្រាប់ខ្លួនឯង យុវសិស្សរូបនេះអាចអូសទាញខ្លួនឯងបន្តិចម្តងៗពីភាពញៀនលេងទូរស័ព្ទ មកសម្រេចក្តីស្រមៃបាន ព្រោះខ្លួនបានដាក់គោលដៅថា ចង់បាននិទ្ទេសA ឬ B។ ដំបូងឡើយ ការកំណត់គោលដៅយកនិទ្ទេសA នេះ បានបង្កើតជាសម្ពាធដ៏ច្រើន ព្រោះគ្រប់គ្នាគិតថា វាជារឿងធំពេក តែទោះជាយ៉ាងណាក្តី សិស្សឆ្នើមរូបនេះនៅតែគិតថា គាត់អាចទៅរួច!។

សិស្សឆ្នើម តៅ វិល្លៀម និយាយថា៖ “មនុស្សខ្លះគិតថា និទ្ទេស A មិនសំខាន់ពេកទេសម្រាប់ថ្នាក់សាកលវិទ្យាល័យ តែសម្រាប់ខ្ញុំ ខ្ញុំមើលឃើញថា វាមានសារៈសំខាន់ខ្លាំងណាស់ ព្រោះខ្ញុំចាត់ទុកថា វាជាសមិទ្ធផលដែលកើតចេញពីការខិតខំប្រឹងប្រែងតាំងពីតូចរបស់ខ្ញុំ ហើយការទទួលបាននិទ្ទេស A ក៏ជាមោទកភាពមួយផងដែរចំពោះខ្លួនខ្ញុំផ្ទាល់ គ្រួសារ សាលា និងសង្គម”។

សិស្សឆ្នើមខាងលើបានបន្ថែមទៀតថា ក្រោយពេលកំណត់គោលដៅច្បាស់លាស់ហើយ រូបគេបានប្រើប្រាស់ឆន្ទៈនៃគោលដៅនោះធ្វើជាវិធីដើម្បីជម្នះខ្លួនឯង។ គាត់ដឹងច្បាស់ថា ប្រសិនបើនៅតែជក់ជាមួយនឹងទូរស័ព្ទខ្លាំងទៀត ក្តីស្រមៃរបស់គេនឹងមិនអាចក្លាយជាការពិតបានឡើយ ហេតុនេះរូបគេក៏បង្កើតវិន័យលើខ្លួនឯងឡើង ដោយនឹងមិនប៉ះទូរស័ព្ទឡើយ រហូតទាល់តែធ្វើលំហាត់ ឬមើលមេរៀនចប់គ្រប់ចំនួនតាមដែលខ្លួនគេបានកំណត់។ ម្យ៉ាងវិញទៀត នៅពេលខ្ជិលម្តងៗ យុវសិស្សខាងលើបានប្រើប្រាស់អារម្មណ៍នឹកដល់ទឹកចិត្តគ្រូដែលខំចំណាយកម្លាំងងើបមកបង្រៀនតាំងពីព្រលឹម ដើម្បីដុសខាត់សមត្ថភាពសិស្សមុនពេលប្រឡង ហេតុនេះខ្លួនគេត្រូវតែខំដើម្បីឱ្យស្មើនឹងអ្វីដែលជាតម្លៃនៃការលះបង់ និងខិតខំរបស់គ្រូរបស់ខ្លួនដែរ។ បន្ថែមពីលើនេះ យុវសិស្សខាងលើបានបន្ថែមទៀតថា បន្ទាប់ពីអភិវឌ្ឍសមត្ថភាពបានហើយ អ្វីដែលត្រូវគ្រប់គ្រងខ្លួនឯងឱ្យបាន គឺកុំក្អេងក្អាង និងមើលងាយស្ថានការណ៍ឱ្យសោះ។ ហើយអ្វីដែលគួរពិចារណាផងដែរនោះគឺ មុនប្រឡង1ថ្ងៃ ចូរកុំឱ្យមានអ្វីជ្រុះ កុំឱ្យមានអ្វីបាក់ ឬកុំឱ្យមានបែករបស់របរអ្វីឱ្យសោះ ព្រោះពេលខ្លះជំនឿក៏អាចនាំឱ្យយើងមានជំនឿចិត្ត និងសំណាងល្អបានដូចគ្នាដែរ៕

October 11, 2019

ខ្លាំងមែន! ត្រឹម 2ថ្ងៃប៉ុណ្ណោះ សំបុត្រប្រភេទ1 ទស្សនាការប្រកួតវគ្គជម្រុះ WORLD CUP ថ្ងៃទី15 លក់អស់គ្មានសល់

សហព័ន្ធកីឡាបាល់ទាត់កម្ពុជាបានប្រកាសតាមបណ្តាញសង្គមថា សំបុត្រសម្រាប់ទស្សនាការប្រកួតដោយផ្ទាល់រវាងកម្ពុជា ជាមួយក្រុមខ្លាំងអ៊ីរ៉ាក់ ដែលនឹងត្រូវធ្វើឡើងនៅពហុកីឡាដ្ឋានជាតិចាប់ពីម៉ោង 6 និង30នាទីល្ងាចតទៅនៅថ្ងៃទី15 ខែតុលា ឆ្នាំ2019 ខាងមុខនេះ បានលក់អស់ហើយសម្រាប់សំបុត្រប្រភេទ1 ដែលជាតំបន់មានដំបូល។

គួររំឭកផងដែរថា សហព័ន្ធកីឡាបាល់ទាត់កម្ពុជាទើបតែបានប្រកាសដាក់លក់សំបុត្រទស្សនាការប្រកួត FIFA WORLD CUP Qatar 2022 វគ្គជម្រុះ Preliminary Qualification Round 2 កម្ពុជា-អ៊ឺរ៉ាក់ កាលពីថ្ងៃទី7 ខែតុលាប៉ុណ្ណោះ ដោយសំបុត្របានចាប់ផ្តើមបើកលក់ចាប់ពីម៉ោង 9ព្រឹកតទៅ បើគិតមកទល់នឹងពេលលក់អស់នេះ គឺមិនទាន់បាន 3ថ្ងៃស្រួលបួលផង។

សម្រាប់ថ្ងៃទី10 ខែតុលា ឆ្នាំ2019នេះ ក្រុមជម្រើសជាតិគោព្រៃកម្ពុជាកំពុងតែស្ថិតនៅក្នុងប្រទេសអ៊ីរ៉ង់ ដើម្បីត្រៀមប្រកួតជាមួយនឹងក្រុមខ្លាំងលេខ1 ប្រចាំទ្វីបអាស៊ី អ៊ឺរ៉ង់ នៅវេលាម៉ោង 8 និង20នាទីនៅកម្ពុជា មុននឹងហោះត្រឡប់មកកម្ពុជាវិញដើម្បីធ្វើការប្រកួតជាមួយប្រទេសអ៊ីរ៉ាក់នៅថ្ងៃទី15 ខាងមុខនេះ៕

October 10, 2019

វគ្គផ្តាច់ព្រ័ត្រ HUN SEN CUP ត្រូវប្តូរពីពហុកីឡដ្ឋានជាតិ មកធ្វើនៅ RSN វិញ

កាលពីពេលកន្លងទៅនេះ គណៈកម្មការរៀបចំការប្រកួតបាល់ទាត់ជាតិកម្ពុជា បានប្រកាសជូនដំណឹងអំពីដល់មហាជន ថាការប្រកួតវគ្គផ្តាច់ព្រ័ត្រពានរង្វាន់សម្តេចនាយករដ្ឋមន្ត្រី ហ៊ុន សែន លើកទី13 ប្រចាំឆ្នាំ2019 នឹងមិនធ្វើឡើងនៅពហុកីឡដ្ឋានជាតិដូចសព្វដងឡើយ។ មូលហេតុដែលលើកការប្រកួតទៅធ្វើនៅឯកីឡដ្ឋាន RSN ជំនួសឱ្យពហុកីឡដ្ឋានជាតិវិញនោះ គឺដោយសារតែពហុកីឡដ្ឋានជាតិត្រូវរៀបចំការប្រកួតវគ្គជម្រុះពាន AFC U19 ពីថ្ងៃទី2 ដល់ទី 10 ខែតុលា។

ការប្រកួតវគ្គផ្តាច់ព្រ័ត្រពានរង្វាន់សម្តេចនាយករដ្ឋមន្ត្រី ហ៊ុន សែន លើកទី13 ប្រចាំឆ្នាំ2019 នឹងត្រូវធ្វើឡើងនៅថ្ងៃទី6 ខែតុលា ឆ្នាំ2019 វេលាម៉ាង 6ល្ងាច នៅកីឡដ្ឋាន RSN ដោយមិនមានការប្រកួតដណ្តើមយកចំណាត់ថ្នាក់លេខ3ឡើយ ដោយសារតែក្រុមដែលធ្លាក់ទាំង2 ចង់ទុកពេលឱ្យកីឡាកររបស់ក្រុមខ្លួនទាំងអស់មានពេលច្រើនក្នុងការហ្វឹកហាត់ត្រៀមពានយុវជន AFC U19 ដែលកម្ពុជាធ្វើជាម្ចាស់ផ្ទះប្រចាំពូល៕

October 10, 2019

U-18 សាលាបាល់ទាត់ជាតិបាទី ទទួលបានសិទ្ធិចូលរួមលីកកំពូលឆ្នាំក្រោយ

កាលពីពេលថ្មីៗនេះ សហព័ន្ធកីឡាបាល់ទាត់កម្ពុជាបានប្រកាសថា សាលាបាល់ទាត់ជាតិបាទីនឹងទទួលបានសិទ្ធិចូលរួមលីកកំពូលកម្ពុជានៅរដូវកាល2020 ខាងមុខនេះ។

ចំពោះគម្រោងមួយនេះ ត្រូវបានសហព័ន្ធបញ្ជាក់ថា គឺដើម្បីឱ្យកីឡាករជាយុវជនមានឱកាសលេងបានច្រើនជាមួយនឹងការប្រកួត ក៏ដូចជាការផ្ស៊ាំនឹងការប្រកួតជាមួយនឹងកីឡាករបរទេសដែលលេងនៅលីកកំពូលកម្ពុជាដែរ។

គួររំឭកដែរថា ក្រុមបាល់ទាត់យុវជនអាយុក្រោម 18ឆ្នាំរបស់សាលាបាល់ទាត់ជាតិបាទីត្រូវបានដាក់បញ្ចូលឱ្យចូលរួមប្រកួតជាមួយនឹងក្រុមអាជីពនៅក្នុងលីកកំពូលកម្ពុជាក្នុងឆ្នាំ2019 កន្លងទៅនេះ ដោយឈរនៅបាតតារាង ព្រោះធ្លាប់ឈ្នះតែ 1ប្រកួត មានតែ 3ពិន្ទុតែប៉ុណ្ណោះ ក្នុងចំំំណោម 26ប្រកួត៕

October 10, 2019

ជប៉ុនផ្តល់ជំនួយជាង 40ម៉ឺនដុល្លារសម្រាប់គម្រោងបោសសម្អាតមីន

មជ្ឈមណ្ឌលសកម្មភាពកំចាត់មីនកម្ពុជា(ស៊ីម៉ាក់)បានចុះហត្ថលេខាលើកិច្ចព្រមព្រៀង សហប្រតិបត្តិការជាដៃគូជាមួយអង្គការ ជេម៉ាស់(JMAS)របស់ជប៉ុនលើគម្រោងលើកកម្ពស់ការអភិវឌ្ឍសហគមន៍ តាមរយៈការបោសសម្អាតមីនដែលមានថវិកាគាំទ្រគម្រោងជាង 40ម៉ឺនដុល្លារអាមេរិកសម្រាប់រយៈពេល1ឆ្នាំ។

នៅក្នុងពិធីចុះហត្ថលេខាលើកិច្ចព្រមព្រៀងខាងលើនេះ មានការចូលរួមពីលោក ហេង រតនា អគ្គនាយកស៊ីម៉ាក់ និងលោក SUENAGA Noriyoshi ប្រធានអង្គការជេម៉ាស់ ប្រចាំប្រទេសកម្ពុជា នៅទីបញ្ជាការស៊ីម៉ាក់ភ្នំពេញ នារសៀលថ្ងៃទី7 ខែតុលា ឆ្នាំ2019នេះ។

លោក ហេង រតនា អគ្គនាយកស៊ីម៉ាក់បានបញ្ជាក់ថា គម្រោងលើកកម្ពស់ការអភិវឌ្ឍសហគមន៍តាមរយៈការបោសសម្អាតមីនដែលមានថវិកាគាំទ្រគម្រោងចំនួន 401,650.27ដុល្លារសម្រាប់រយៈពេល1ឆ្នាំ គិតពីថ្ងៃទី8 ខែតុលា ឆ្នាំ2019 ដល់ថ្ងៃទី7 ខែតុលា ឆ្នាំ2020។

លោកអគ្គនាយកស៊ីម៉ាក់បានបញ្ជាក់ទៀតថា គម្រោងនេះស៊ីម៉ាក់ផ្តោតសំខាន់ទៅលើស្រុកគោលដៅចំនួន2 គឺស្រុកម៉ាឡៃ និងស្រុកអូរជ្រៅ ដែលជាទីតាំងប្រតិបត្តិការរបស់គម្រោង។

ជំនួយឥតសំណងដែលរាជរដ្ឋាភិបាលជប៉ុនផ្ដល់ជូនដល់អង្គការក្រៅរដ្ឋាភិបាលជប៉ុននៅកម្ពុជា គឺត្រូវបានផ្ដល់ឱ្យអង្គការសកម្មភាពកម្ចាត់មីនជប៉ុន អង្គការ JMAS សម្រាប់ «គម្រោងលើកកម្ពស់ការអភិវឌ្ឍសហគមន៍ តាមរយៈការបោសសម្អាតមីន ក្នុងខេត្តបន្ទាយមានជ័យ» (ឆ្នាំទី3)។

នៅក្នុងគម្រោងនេះ JMAS នឹងធ្វើការអភិវឌ្ឍលើបច្ចេកទេសបោសសម្អាតមីនដោយប្រើម៉ាស៊ីនដោះមីននៅតំបន់ដែលពោរពេញទៅដោយគ្រាប់មីន និងយុទ្ធភណ្ឌមិនទាន់ផ្ទុះ (UXOs) នៅលាយឡំគ្នា។

អង្គការនេះក៏នឹងផ្ទេរវិធីសាស្រ្តបោសសម្អាតមីនប្រកបដោយប្រសិទ្ធភាព និងសុវត្ថិភាពទៅមជ្ឈមណ្ឌលសកម្មភាពកំចាត់មីនកម្ពុជា(CMAC) ក្នុងគោលបំណងបង្កើនសមត្ថភាព និងពន្លឿនកិច្ចខិតខំប្រឹងប្រែងរបស់ខ្លួនក្នុងការធ្វើឱ្យដីប្រទេសជាតិមានសុវត្ថិភាព៕

October 10, 2019

ប្រទេសហូឡង់ ចូលរួមជំរុញកម្មវិធីផលិតកម្មស្រូវសរីរាង្គ RiceTechCambodia

គម្រោងឈ្មោះថា“រ៉ៃស៍ថេកខេមបូឌា” (RiceTechCambodia) ជាគម្រោងដែលមានរយៈពេល5ឆ្នាំ ដែលផ្ដួចផ្ដើមឡើងក្នុងគោលបំណងលើកកម្ពស់ការចិញ្ចឹមជីវិតរបស់កសិករខ្នាតតូច ដោយជួយពួកគេឱ្យទទួលបានវិញ្ញាបនបត្រស្រូវសរីរាង្គបង្កើនផលិតភាព ពង្រឹងទិន្នផលស្រូវ និងធានាឱ្យបានតម្លៃស្រូវខ្ពស់លក់ក្នុងទីផ្សារអឺរ៉ុប។

លោក កាន់ គន្ធី អគ្គនាយករងក្រុមហ៊ុន AmruRice បានឱ្យដឹងថា គម្រោងនេះត្រូវបានរដ្ឋាភិបាលប្រទេសហូឡង់ផ្ដល់មូលនិធិប្រមាណ 5លានដុល្លារនិងត្រូវវិនិយោគទឹកប្រាក់មួយចំនួនទៀតពី AmruRice តាមភាពជាក់ស្ដែង។ គម្រោងនេះនឹងផ្ដោតទៅលើការបណ្ដុះបណ្ដាលពង្រឹងបច្ចេកទេសដល់កសិករនិងកសាងហេដ្ឋារចនាសម្ព័ន្ធ ឃ្លាំងស្តុកឡសម្ងួត ម៉ាស៊ីនកិនស្រូវនៅស្រុកកោះញែក ខេត្តមណ្ឌលគិរី ជាគោលដៅសម្រាប់អនុវត្តគម្រោង។ ក្រៅពីសហគមន៍កសិករ ដៃគូគម្រោងផ្សេងទៀតរួមមាន ក្រុមហ៊ុនបញ្ជាទិញ Sanorice ក្រុមហ៊ុននាំចេញអង្ករ AmruRice អង្គការ Oxfam អង្គការ Larive International អង្គការអភិវឌ្ឍន៍ និងភាពជាដៃគូក្នុងសង្គហភាព។

លោក កាន់ គន្ធី បានបញ្ជាក់ថា៖“គម្រោងនេះមានគោលដៅគ្របដណ្ដប់កសិករខ្នាតតូច ដោយក្នុងនោះ រំពឹងថាស្រូវសរីរាង្គប្រមាណ 2ម៉ឺនតោន នឹងត្រូវបានផលិតក្នុង 1ឆ្នាំចេញពីតំបន់នៃគម្រោងនេះ។

ទាក់ទិននឹងស្រូវសរីរាង្គនេះ លោកបញ្ជាក់ថា កន្លងមកក្រុមហ៊ុន AmruRice អាចប្រមូលបានស្រូវសរីរាង្គប្រមាណ 2ម៉ឺនតោនពីខេត្តព្រះវិហារ ដោយក្នុង 1ឆ្នាំក្រុមហ៊ុននាំចេញបានជិត 1ម៉ឺនតោនអង្ករ ដែលស្មើនឹងជាង80%នៃការនាំចេញអង្ករសរីរាង្គសរុបរបស់កម្ពុជា ហើយការផលិតស្រូវទាំងនេះ គឺធ្វើជាម៉ូដែលកសិកម្មតាមកិច្ចសន្យា”។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលចូលរួមជាអធិបតីក្នុងពិធីសម្ពោធគម្រោង រ៉ៃស៍ថេក នេះ បានថ្លែងថា នេះជាការបោះជំហានមួយកម្រិតទៀតក្នុងការជំរុញផលិតកម្មស្រូវសរីរាង្គ និងការកែច្នៃផលិតផលស្រូវសរីរាង្គ ជាផលិតផលសម្រេចសម្រាប់នាំចេញទៅទីផ្សារអន្តរជាតិ។

ឯកឧត្តម វេង សាខុន រដ្ឋមន្ត្រីក្រសួងកសិកម្មក៏បានឱ្យដឹងថា៖“គម្រោងដែលនឹងត្រូវអនុវត្តនៅស្រុកកោះញែក គោលបំណងគឺដើម្បីឈានដល់កសិករធ្វើស្រូវខ្នាតតូចចំនួន 2,400គ្រួសារ។ កសិករចំនួន 1,300នាក់នឹងទទួលបានការបណ្តុះបណ្តាលយ៉ាងទូលំទូលាយលើកសិកម្មសរីរាង្គ និងការអនុវត្តកសិកម្មល្អ ខណៈពេលដែលទទួលបានកន្លែងសម្ងួតស្តុក និងរោងម៉ាស៊ីនកិនដើម្បីបង្កើនគុណភាពផលិតផលស្រូវ។ គម្រោង RiceTechCambodia នឹងជំរុញផលិតកម្មស្រូវសរីរាង្គ និងធ្វើឱ្យព្រះរាជាណាចក្រកម្ពុជាមានកេរ្តិ៍ឈ្មោះនៅបរទេសក្នុងនាមជាអ្នកផលិតអង្ករសរីរាង្គ”។

ជាមួយគ្នានេះដែរ ឯកឧត្តម វេង សាខុន បានបញ្ជាក់អំពីស្ថានភាពនៃការប្រកួតប្រជែងក្នុងវិស័យស្រូវអង្ករយ៉ាងដូច្នេះថា៖“បច្ចុប្បន្ន ការប្រកួតប្រជែងអង្ករសធម្មតានៅលើទីផ្សារអន្តរជាតិមានភាពតឹងតែង ពោលគឺកម្ពុជាពិបាកដណ្ដើមទីផ្សារជាមួយវៀតណាម ព្រោះថ្លៃដើមផលិត និងនាំចេញរបស់យើងថ្លៃជាងគេ ដូច្នេះមានតែការផលិតស្រូវអង្ករក្រអូប និងអង្ករគុណភាពខ្ពស់ដូចជា អង្ករសរីរាង្គ និងអង្ករស្ដង់ដា Standard Rice Product SRP ប៉ុណ្ណោះដែលជួយឱ្យអង្ករកម្ពុជាល្បីឈ្មោះលើទីផ្សារអន្តរជាតិ”។

លោក Robert Vreeman ប្រធានក្រុមហ៊ុន SanoRice មានប្រសាសន៍ដូច្នេះថា៖“យើងជំរុញខ្សែចង្វាក់ផ្គត់ផ្គង់ឱ្យកាន់តែប្រសើរឡើង ដោយអនុវត្តវិញ្ញាបនបត្រស្រូវសរីរាង្គ និងវិធីសាស្ត្រតាមដានត្រួតពិនិត្យតាមបែបទំនើបដោយប្រើប្រាស់បច្ចេកវិទ្យាថ្មីដូចជា ប្លុកឆេនជាដើម។ ការចូលរួមពីSanoRice ក្នុងគម្រោងនេះ គឺការធានាទំហំស្រូវនាំចេញ និងតម្លៃខ្ពស់ដល់កសិករ”។

លោកស្រី លឹម សូលីន នាយិកាអង្គការអុកស្វាម ដែលជាដៃគូក្នុងគម្រោងនេះដែរនោះ បានជឿជាក់ថា គម្រោងនេះនឹងផ្ដល់ផលប្រយោជន៍ដល់កសិករ។ លោកស្រីថ្លែងបែបនេះថា៖“អង្គការអុកស្វាមជឿជាក់ថា កសិករខ្នាតតូចសមនឹងទទួលបានផលចំណេញសមរម្យទៅនឹងតម្លៃបន្ថែមក្នុងខ្សែចង្វាក់ផលិតកម្មស្រូវ ហើយទាំងនេះអាចសម្រេចបានតាមរយៈខ្សែសង្វាក់ផលិតកម្មប្រកបដោយបរិយាប័ន្នដែលជំរុញដោយដៃគូទាំងអស់”។

សូមបញ្ជាក់ថា RiceTechCambodia ដែលជាគំនិតផ្តួចផ្តើម និងទុន 5លានដុល្លារដែលឧបត្ថម្ភថវិកាដោយប្រទេសហូឡង់នេះត្រូវបានអនុម័តតាំងពីខែមិថុនាដោយភាពជាដៃគូគោលដៅអភិវឌ្ឍន៍ប្រកបដោយចីរភាព Sustainable Development Goals (SDG) ដែលចាត់ចែងដោយក្រសួងការបរទេសហូឡង់។

លោក Thomas van Leeuwen ឯកអគ្គរដ្ឋទូតរងនៃប្រទេសហូឡង់ប្រចាំនៅកម្ពុជាបានអំពាវនាវដល់ស្ថាប័នទាំងអស់ដែលចូលរួមក្នុងគម្រោងនេះឱ្យបញ្ចូលគ្នានូវបច្ចេកវិទ្យា និងការខិតខំដើម្បីបន្ថែមតម្លៃដល់អង្ករសរីរាង្គរបស់ប្រទេស។ “តាមរយៈការធ្វើដូច្នេះវានឹងធ្វើឱ្យប្រទេសកម្ពុជាអាចធានាបាននូវទីផ្សារអង្ករអន្តរជាតិ។ យើងរំពឹងថា គំនិតផ្តួចផ្តើមនេះនឹងធ្វើឱ្យប្រសើរឡើងនូវជីវភាពរស់នៅរបស់កសិករខ្នាតតូច”។

ប្រទេសកម្ពុជាធ្លាប់ជាប្រទេសនាំចេញអង្ករសរីរាង្គធំជាងគេទី 5 ទៅកាន់សហភាពអឺរ៉ុបកាលពីឆ្នាំមុន។ យោងតាមតួលេខពីសហគមន៍អឺរ៉ុបដែលបានចែករំលែកជាមួយសហព័ន្ធស្រូវអង្ករកម្ពុជាបាននាំចេញអង្ករសរីរាង្គចំនួន 8,467តោនទៅប្លុកមួយនេះកាលពីឆ្នាំមុនដែលតំណាងឱ្យ 3.9%នៃការនាំចូលអង្ករសរីរាង្គរបស់សហភាពអឺរ៉ុប។

លោកឧកញ៉ា សុង សារ៉ន នាយកប្រតិបត្តិ និងជាប្រធានក្រុមហ៊ុន AmruRice បានលើកឡើងថា៖“តួនាទីរបស់កម្មវិធីក្នុងការលើកកម្ពស់អង្ករកម្ពុជានៅបរទេស និងក្នុងការជួយសហគមន៍កសិកម្មក្នុងស្រុក។ វាក៏នឹងជះឥទិ្ធពលខ្លាំងដល់ជីវិតកសិករដែលនេះគឺជាជំហានដ៏សំខាន់មួយឆ្ពោះទៅការប្រែក្លាយកសិករទៅជាអ្នកដាំដុះដ៏មានបទពិសោធក្នុងដំណាំអង្ករសរីរាង្គ។ គោលបំណងគឺអនុវត្តខ្សែចង្វាក់តម្លៃស្រូវប្រកបដោយការទទួលខុសត្រូវប្រកបដោយចីរភាព និងភ្ជាប់ទំនាក់ទំនងជាមួយតម្រូវការផ្គត់ផ្គង់ជាមួយកសិករតូចតាចដែលជាអ្នកពាក់ព័ន្ធស្នូល”៕

October 10, 2019

CVEA បង្ហាញកំណត់សម្គាល់ និងបទពិសោធដែលបានពីសន្និសីទអចលនទ្រព្យអន្តរជាតិ

ចំណុចសំខាន់ៗមួយចំនួនដែលជាប្រធានបទទាក់ទិននឹងអចលនទ្រព្យ ត្រូវបានក្លាយជា បទបង្ហាញរបស់ប្រតិភូនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA)ដែលបានលើកយកមកដើម្បីផ្សព្វផ្សាយអំពីសក្ដានុពលក្នុងប្រទេសកម្ពុជាក្នុងការអញ្ជើញចូលរួមនៅក្នុងព្រឹត្តិការណ៍សន្និសីទអចលនទ្រព្យអន្តរជាតិប្រចាំឆ្នាំ2019 នៅប្រទេសជប៉ុន ដើម្បីបង្កើនសក្តានុពលលើការវិនិយោគក្នុងវិស័យអចលនទ្រព្យ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)បានប្រាប់ឡារ៉ែន ពាណិជ្ជថា៖“ខ្ញុំបានត្រៀមធ្វើបទបង្ហាញផ្ដោតលើប្រទេសកម្ពុជាឱ្យអ្នកវិនិយោគបរទេសបានយល់ថា ហេតុអ្វីកម្ពុជាត្រូវការការវិនិយោគ និងក៏ដើម្បីបានចាត់ទុកថា ការចូលរួមនេះ គឺជាឱកាសដ៏ល្អសម្រាប់អ្នករកស៊ីក្នុងវិស័យអចលនទ្រព្យកម្ពុជា ដែលត្រូវរៀនសូត្រពីបណ្ដាប្រទេសរីកចម្រើនលើពិភពលោក ពិសេសម្ចាស់ផ្ទះជប៉ុន។ នេះគឺជាឱកាសដ៏ល្អ ដើម្បីទាក់ទាញការវិនិយោគបរទេសមកកាន់កម្ពុជា និងពីកម្ពុជាទៅប្រទេសក្នុងតំបន់អាស៊ាន”។

លោកបានបន្តទៀតថា តាមការចូលរួមនៅក្នុងសន្និសីទអចលនទ្រព្យអន្តរជាតិនៅក្នុងប្រទេសជប៉ុននោះ អ្វីដែលយើងទទួលបានមកវិញគឺ៖ ទី1-បទពិសោធនៃបណ្តាប្រទេសទាំង8 នៃបណ្តាប្រទេសជាសមាជិកអាស៊ាន និងការចែករំលែកនូវអ្វីដែលពាក់ព័ន្ធនឹងការវិនិយោគ ជាពិសេសការវិនិយោគវិស័យអចលនទ្រព្យ និងបណ្តាប្រទេសនៅក្នុងតំបន់ផ្សេងៗទៀត។ ទី2-បរិបទ និងបែបផែននៅក្នុងការវិនិយោគពីប្រទេសយើងទៅកាន់ប្រទេសគេ និងពីប្រទេសគេមកកាន់ប្រទេសកម្ពុជាយើងវិញដែរ ដើម្បីណែនាំការវិនិយោគ ដែលនេះ គឺជាសក្តានុពលទាក់ទងនឹងការអភិវឌ្ឍ។ ទី3-ពាក់ព័ន្ធនឹងទំនាក់-ទំនងជាមួយអ្នកិវិនិយោគថា តើអ្នកវិនិយោគនាំមកនូវម៉ូដែល និងបច្ចេកវិទ្យាសំខាន់ៗមកក្នុងប្រទេសយើងជាមួយនឹងសក្តានុពលនៃការអភិវឌ្ឍបែបណានៅក្នុងប្រទេសរបស់យើង។

តាមការបញ្ជាក់របស់លោកសុខនីម បានឱ្យដឹងថា ៖“ការចូលរួមក្នុងសន្និសីទអន្តរជាតិនេះ ក្រុមប្រតិភូ CVEA បានទទួលនូវអ្វីជាសំខាន់នោះ គឺការរៀនពីម៉ូដែល នៃវិស័យអចលនទ្រព្យនៅក្នុង ប្រទេសនីមួយៗដែលបានចូលរួម។ តាមរយៈការធ្វើទស្សនកិច្ចតំបន់អចលនទ្រព្យប្រទេសជប៉ុន ដែលមានអគារកម្ពស់ 70-80ជាន់ដែលបំពាក់ឧបករណ៍ការពារការរញ្ជួយផែនដីផង តែក៏គេនៅតែអាចដឹកនាំការកសាងបាន”។

លោកប្រធានសមាគមបានមានប្រសាសន៍ឱ្យដឹងដែរថា៖“បើយើងប្រៀបធៀបសេដ្ឋកិច្ចក្នុងការវិនិយោគវិស័យអចលនទ្រព្យក្នុងពេលបច្ចុប្បន្ននេះ គឺយើងដើរនៅក្រោយគេឆ្ងាយណាស់ បើប្រៀបធៀបជាឆ្នាំ ប្រហែលជាក្រោយប្រទេសជប៉ុនប្រមាណ 25ឆ្នាំមុន។ គឺយើងនៅឆ្ងាយពីគេនៅឡើយ ព្រោះគេមានការអភិវឌ្ឍច្រើនជាងយើង មានបទពិសោធខ្លាំង និងល្អជាងយើង។ វិស័យអចលនទ្រព្យគេមានការ-គិតគូរបានល្អ និងការរៀបចំបានល្អ”។

ប៉ុន្តែលោកប្រធានសមាគម CVEA ក៏បានបញ្ជាក់ដែរថា៖“ប៉ុន្តែប្រទេសកម្ពុជាយើងមិនអន់នោះទេ យើងដើរលឿន ទោះជាយើងអភិវឌ្ឍក្រោយគេមែនតែយើងដើរលឿនសម្រាប់ការវិនិយោគវិស័យអចលនទ្រព្យនេះ។ ព្រោះបើតាមការព្យាករ ក្នុងរយៈពេលប្រហែលជា 15ឆ្នាំ ទៅមុខទៀត កម្ពុជាអាចនឹងឈានបានប្រហាក់ប្រហែលនឹងប្រទេសគេបានហើយ ទោះបីមិនដល់គេ ព្រោះពេលនោះគេអាចកែប្រែបន្ថែម តែក្នុងចន្លោះ15ឆ្នាំ យើងនឹងឃើញអគារខ្ពស់ៗច្រើននៅក្នុងរាជធានីភ្នំពេញ និងតំបន់ប៉ូលអភិវឌ្ឍន៍សំខាន់ៗមួយចំនួន”។

សូមបញ្ជាក់ថា ការចូលរួមសន្និសីទអចលនទ្រព្យអន្តរជាតិប្រចាំឆ្នាំ2019 (International Real EstateConference 2019) IREC នៅប្រទេសជប៉ុន គឺក្នុងគោលបំណងបង្កើនទំនាក់ទំនង កិច្ចសហប្រតិបត្តិការអន្តរជាតិ ជាពិសេសពង្រីកការវិនិយោគលើវិស័យឧស្សាហកម្មអចលនទ្រព្យ ឱ្យកាន់តែរីកចម្រើនថែមទៀត និងដើម្បីស្វែងយល់ ក៏ដូចជាផ្សព្វផ្សាយពីសក្ដានុពលទីផ្សារអចលនទ្រព្យ និងកៀងគរក្រុមអ្នកវិនិយោគអន្តរជាតិឱ្យចូលមកធ្វើការវិនិយោគនៅកម្ពុជា។

លោកស្រី តាំង ហួរ នាយិកាក្រុមហ៊ុនអចលនទ្រព្យ AMATAK Property Service ដែលបានចូលរួមក្នុងសន្និសីទអចលនទ្រព្យអន្តរជាតិនៅប្រទេសជប៉ុននេះដែរ បានមានប្រសាសន៍ប្រាប់ឡារ៉ែនថា៖“ការចូលរួមក្នុងសន្និសីទនេះយើងបានទទួលបទពិសោធច្រើនដែរសម្រាប់យកមកអនុវត្តក្នុងវិស័យអចលនទ្រព្យនៅប្រទេសយើង។ ពោលគឺយើងបានរៀនសូត្រនូវអ្វីល្អៗពីគេ យើងមានណេតវើក (Network) និងការផ្លាស់ប្តូរយោបល់ គំនិតក្នុងវិស័យអចលនទ្រព្យក្នុងកម្រិតពិភពលោក”។

លោកស្រីនាយិកាបានបញ្ជាក់ដែរថា យើងក៏បានពិភាក្សាដេញដោលគ្នាពីបញ្ហាភ្នាក់ងារលក់ទិញអចលនទ្រព្យ ដោយលើកហេតុផលពីប្រទេសនីមួយៗថា យើងជួបប្រទះបញ្ហាអ្វីខ្លះ? កង្វះខាតអ្វីខ្លះដែលយើងមាន? ព្រោះគោលការណ៍ និងច្បាប់លក់ដូរ វាខុសៗគ្នាទៅតាមប្រទេសនីមួយៗ ហើយយើងអាចយកចំណុចសំខាន់ៗមកអនុវត្តដោយព្យាយាមកែប្រែ និងបំពេញនូវចំណុចខ្វះខាតដែលយើងមាន ដើម្បីធ្វើឱ្យមានការរីកចម្រើនវិស័យអចលនទ្រព្យក្នុងប្រទេសយើងឱ្យជឿនលឿនដូចគេដែរ។

លោកស្រី តាំង ហួរ ក៏បានបញ្ជាក់ទៀតថា៖“យើងក៏ទទួលបាននូវការធ្វើ Network យើងអាចដឹងពីព័ត៌មាននៃការលក់ដូរ។ ដូចជានៅប្រទេសមួយចំនួនដោយសារដីថ្លៃ គេច្រើនតែលក់ខុនដូវិញ ព្រោះវាមិនសូវស្មុគស្មាញ តែសម្រាប់យើងតម្លៃដីនៅថោក បើប្រៀបនឹងប្រទេសគេ ដូច្នេះយើងអាចលក់ទាំងដី ទាំងលំនៅឋាន ខុនដូ និងសំណង់អគារផ្សេង។ល។ ហើយសម្រាប់ប្រទេសយើង អចលនទ្រព្យស្រុកយើង មានអ្នកវិនិយោគបរទេសគេល្បីណាស់ ដោយសារយើងមានសក្តានុពលវិស័យនេះ។ តែទោះបីយើងមានសក្តានុពលវិស័យអចលនទ្រព្យនេះក៏ដោយ ក៏យើងត្រូវតែខំប្រឹងរៀនសូត្រពីគេ ដើម្បីការវិវឌ្ឍទៅមុខ បើយើងមិនរៀនសូត្រ យើងមិនអាចមានការរីកចម្រើនបានទេ”៕

October 10, 2019

សាលារៀនជំនាន់ថ្មីជាសាលារដ្ឋដែលមានសិស្សជាប់និទ្ទេស A ច្រើនជាងគេបំផុត

ក្រោយការធ្វើកំណែទម្រង់ប្រព័ន្ធអប់រំ ជាពិសេសការរឹតបន្តឹងការប្រឡងមធ្យមសិក្សាទុតិយភូមិ គំនិតផ្តួចផ្តើមបង្កើតសាលាជំនាន់ថ្មីបានក្លាយជាគំនិតប្រកបដោយប្រសិទ្ធភាពមួយក្នុងការបណ្តុះបណ្តាលសិស្សានុសិស្សឱ្យមានសមត្ថភាពខ្ពស់ និងមានបរិក្ខារគ្រប់យ៉ាងមិនចាញ់សាលាឯកជននោះទេ។

នៅឆ្នាំសិក្សា 2018-2019 នេះ សាលារៀនជំនាន់ថ្មី ដែលជាគ្រឹះស្ថានសិក្សារដ្ឋ ចាប់ផ្តើមបើកសាកល្បងកាលពីឆ្នាំ2016 ត្រូវបានគេមើលឃើញថា ជាសាលាដែលទទួលបានលទ្ធផលល្អជាងគេបំផុតក្នុងចំណោមគ្រឹះស្ថានបណ្តុះបណ្តាលចំណេះដឹងទូទៅរដ្ឋ និងឯកជន។ បើតាមការបញ្ជាក់របស់ លោក សម្យ កំសាន្ត នាយករងវិទ្យាល័យស៊ីសុវត្ថិ ទទួលបន្ទុកសាលាជំនាន់ថ្មី បានបញ្ជាក់ថា សិស្សដែលចេញពីសាលាជំនាន់ថ្មីនៅឆ្នាំនេះ ទទួលបានជោគជ័យក្នុងការប្រឡងរហូតដល់ទៅ 94ភាគរយ ខណៈអ្នកដែលទទួលបាននិទ្ទេស A ក៏មានចំនួនច្រើនជាងគេផងដែរនៅទូទាំងប្រទេស។

លោក សម្យ កំសាន្ត បានលើកឡើងថា នេះជាឆ្នាំទី5 ហើយដែលគម្រោងសាលារៀនជំនាន់ថ្មីបានអនុវត្តនៅក្នុងប្រទេសកម្ពុជា។ គោលដៅសំខាន់នៃការបង្កើតសាលារៀនជំនាន់ថ្មីនេះ ធ្វើឡើងក្នុងគោលបំណងពង្រឹងគុណភាពអប់រំ ដើម្បីឆ្លើយតបជាមួយនឹងតម្រូវការទីផ្សារទាំងក្នុងប្រទេស និងក្នុងតំបន់។

សាលារៀនជំនាន់ថ្មីជាសាលាដែលបានបន្ថែមនូវកម្មវិធីសិក្សាថ្មីដោយសិក្សាយ៉ាងល្អិតល្អន់ពីវិធីសាស្ត្របង្រៀនដែលមានលក្ខណៈស្តង់ដាខ្ពស់មិនចាញ់ប្រទេសអភិវឌ្ឍន៍ធំៗនោះទេ ព្រោះយើងចង់ឱ្យសិស្សានុសិស្សរបស់យើងមានគុណភាពខ្លាំងសម្រាប់ការប្រកួតប្រជែង។ ជាលទ្ធផល សិស្សនៃសាលាជំនាន់ថ្មីបានចូលរួមប្រកួតប្រជែងទាំងកម្រិតថ្នាក់ជាតិ និងថ្នាក់អន្តរជាតិ ដោយពួកគេអាចយកជ័យជម្នះលើការប្រឡងប្រជែងជាច្រើន ដោយក្នុងនោះមានទាំងមេដាយមាស មេដាយប្រាក់ និងមេដាយសំរិទ្ធជារៀងរាល់ឆ្នាំ។

លោក សម្យ កំសាន្ត បាននិយាយថា៖ “សាលារៀនជំនាន់ថ្មី គឺជាសាលារដ្ឋ តែនៅក្នុងការអនុវត្តគម្រោងនេះ ក្រសួងបានដាក់បញ្ចូលនូវកម្មវិធីបង្រៀនស៊ីជម្រៅជាងសាលារដ្ឋធម្មតា មានន័យថា បើការបង្រៀនត្រូវពិសោធ សិស្សត្រូវតែទៅធ្វើការពិសោធជាក់ស្តែងតែម្តង។ សិស្សនៃសាលាជំនាន់ថ្មីមានការសិក្សាផង អនុវត្តផ្ទាល់ផង និងមានកិច្ចការស្រាវជ្រាវច្រើនជាងសិស្សទូទៅ”។

សាលារៀនជំនាន់ថ្មី ជាសាលាដែលបំពាក់នូវបរិក្ខារពិសោធន៍ និងបច្ចេកវិទ្យាគ្រប់យ៉ាង ដោយក្នុងនោះបានដាក់បញ្ចូលនូវកម្មវិធីសំខាន់ៗជាច្រើនដូចជាកម្មវិធីបណ្តុះបណ្តាល វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) កម្មវិធីបច្ចេកវិទ្យាព័ត៌មានវិទ្យា ដូចជាការសរសេរកូដ និងកម្មវិធីឌីហ្សាញជាដើម។ បន្ថែមពីលើនេះ សាលារៀនជំនាន់ថ្មីក៏ជាសាលាដែលបញ្ចូលនូវគំនិតសហគ្រិនភាព និងជំនាញសំខាន់ៗជាច្រើនផ្សេងទៀតផងដែរដល់សិស្សានុសិស្សគ្រប់គ្នាឱ្យបានសិក្សាកាន់តែស៊ីជម្រៅ។ គំរូនៃសាលាជំនាន់ថ្មីនេះ ត្រូវបានគេរំពឹងទុកថានឹងដាក់ឱ្យអនុវត្តនៅទូទាំងប្រទេសនៅថ្ងៃអនាគត។

គួរបញ្ជាក់ថា មកដល់បច្ចុប្បន្ននេះ សាលារៀនជំនាន់ថ្មីមានកម្រិតបឋមសិក្សាចំនួន 4សាលា និងកម្រិតមធ្យមសិក្សាចំនួន 6សាលា។ ក្នុងនោះកម្រិតមធ្យមសិក្សាមានដូចជាវិទ្យាល័យស៊ីសុវត្ថិ វិទ្យាល័យហ៊ុនសែនកំពង់ចាម វិទ្យាល័យព្រែកលៀប វិទ្យាល័យសម្តេចជាស៊ីមព្រែកអញ្ចាញ វិទ្យាល័យហ៊ុនសែនពាមជីកង និងអនុវិទ្យាល័យគោកព្រីង៕

October 10, 2019

ទង្វើមិនល្អ 5យ៉ាង ប៉ះពាល់ដល់សុខភាព ដែលបុរសជាច្រើនអាចមិនទាន់ដឹង…

មនុស្សជាច្រើនដែលស្រឡាញ់សុខភាព និងមើលថែទាំខ្លួនឯងជាប់ជានិច្ចនោះ អាចគិតថា បើបានហាត់ប្រាណជាប្រចាំរៀងរាល់ថ្ងៃ និងជ្រើសរើសទទួលទានតែអាហារដែលមានប្រយោជន៍ ប្រហែលជាមានសុខភាពល្អមិនខាន។ មេរោគផ្សេងៗដែលជាមូលហេតុធំរបស់ជំងឺទាំងឡាយ ច្បាស់ជាគ្មានផ្លូវអាចធ្វើអ្វីរូបគេបានឡើយ។តែការពិតទៅ ទង្វើមួយចំនួនដែលយើងនាំគ្នាធ្វើជាប្រក្រតីរៀងរាល់ថ្ងៃនេះឯង ដែលជាតួឯកសំខាន់អាចធ្វើឱ្យសុខភាពរបស់យើងរងការប៉ះពាល់ និងធ្លាក់ចុះដុនដាបយ៉ាប់យ៉ឺននោះ។ ថ្ងៃនេះទស្សនាវដ្តី ឡារ៉ែន បានទៅស្រាវជ្រាវរករឿងរ៉ាវដ៏គួរឱ្យចាប់អារម្មណ៍មួយចំនួនដែលពាក់ព័ន្ធនឹងទង្វើប្រចាំថ្ងៃ មកជម្រាបជូនមិត្តអ្នកអានដែលជាសុភាពបុរសឱ្យបានជ្រាបដូចខាងក្រោម…។

1. ប្រើសាប៊ូជេលលាងសម្អាតដៃញឹកញាប់ជ្រុលពេក
បើអ្នក គឺជាមនុស្សម្នាក់ដែលស្ថិតក្នុងប្រភេទដែលត្រូវតែលាងដៃ ឬប្រើក្រដាសអនាម័យជូតសម្អាតដៃយ៉ាងហ្មត់ចត់រៀងរាល់ក្រោយពេលចាប់ឃីបតកុំព្យូទ័រ ចាប់បង្កាន់ដៃជណ្តើរ ចាប់ដៃទ្វារបន្ទប់បង្គន់ហើយ ប្រភេទមិនទុកឱកាសឱ្យមេរោគកខ្វក់ណាមកតោងជាប់ដៃបានយូរនោះ វាគឺជារឿងល្អមួយហើយដែលអ្នកស្រឡាញ់ភាពស្អាតបាតមានអនាម័យបែបនោះ តែការពិតវិញ សាប៊ូជេល និងក្រដាសជូតដៃប្រភេទសើមនេះហើយដែលជាមេក្លោងធ្វើឱ្យស្បែករបស់អ្នកទៅជាស្ងួតខ្លាំងនោះ ព្រោះឧបករណ៍លាងសម្អាតដៃទាំងអស់នោះ មានចំណែកផ្សំរបស់ត្រៃខ្លូសាន (Triclosan)ជាសារធាតុមួយមានគុណសម្បត្តិក្នុងការទប់ស្កាត់មេរោគបាក់តេរីរួមជាមួយដែរ ដោយស្បែកនឹងបឺតយកសារធាតុនេះចូលទៅបានយ៉ាងងាយស្រួល ហើយលទ្ធផលដែលតាមមក គឺស្បែកនឹងឡើងស្ងួតក្រៀមហ្នឹងឯង។ វិធីដែលល្អបំផុត គឺចូលបន្ទប់ទឹកលាងសម្អាតដៃជាមួយនឹងសាប៊ូ និងទឹកស្អាតធម្មតាប្រសើរជាង។

2. ញ៉ាំទឹកបរិសុទ្ធពីក្នុងដប (មិនដែលចាក់ចូលកែវញ៉ាំ)
យើងជឿថា បុរសភាគច្រើនសុទ្ធតែជ្រើសរើសញ៉ាំទឹកដោយវិធីនេះទាំងអស់ ព្រោះវាងាយស្រួល រហ័ស ហើយថែមទាំងមិនបាច់ខាតពេលលាងសម្អាតកែវទៀតផង តែអ្នកដឹងទេថា កម្មវិធីផលិតទឹកពិសានៅក្នុងដបប្លាស្ទិកផ្សេងៗនេះធ្វើឱ្យសារធាតុរ៉ែសំខាន់ៗនៅក្នុងទឹកបាត់បង់អស់ ហើយវានឹងចូលទៅរាំងស្ទះប្រព័ន្ធការធ្វើការងារក្នុងផ្នែកសាងកម្លាំងថាមពល និងប្រព័ន្ធការជួសជុលសាច់ដុំឱ្យធ្វើការមិនបានពេញសមត្ថភាពទៀតផង។

3. ឈប់ហាត់ប្រាណបែបការ៍ឌីយោ ហើយបែរទៅហាត់ប្រាណលើកទម្ងន់វិញ
អ្នកណាដែលប្រាប់ថា វិធីហាត់ប្រាណបែបការ៍ឌីយោ មិនបានជួយបញ្ចុះទម្ងន់ស្មើនឹងការបញ្ចេញកម្លាំងលើកទម្ងន់(ដុំដែក)នោះ ប្រហែលជាត្រូវគិតឡើងវិញជាថ្មីហើយ ព្រោះទោះជាការលើកទម្ងន់វាជួយផ្លាស់ប្តូរដុំខ្លាញ់ជ្រាយៗឱ្យក្លាយទៅជាសាច់ដុំបានមែន តែបើមិនធ្វើលំហាត់ប្រាណបែបការ៍ឌីយោរួមជាមួយផងទេនោះ លទ្ធផលដែលទទួលបាន ប្រហែលជាមិនសូវមើលឃើញច្បាស់លាស់ប៉ុន្មានទេ។ ដូច្នេះចូរសាកល្បងបែងចែកពេលវេលាមករត់ មកហែលទឹក ឬក៏ធាក់កង់រួមជាមួយផង ធានាថា ទម្ងន់ខ្លួនដែលលើសនោះ នឹងរលាយបាត់ជាសន្សឹមៗនៅទីបំផុត។

4. ដុសសម្អាតធ្មេញភ្លាមៗក្រោយពេលបាយរួច
មនុស្សភាគច្រើន ច្រើនតែធ្វើតាមការណែនាំក្នុងរឿងការសម្អាតធ្មេញថា ត្រូវតែដុសសម្អាតធ្មេញ 2ដង គឺពេលព្រឹក និងមុនចូលគេងរៀងរាល់ថ្ងៃ ក្នុងខណ:ដែលអ្នកខ្លះខ្លាចធុំក្លិនមាត់ ឬខ្លាចមានកម្ទេចអាហារនៅជាប់តាមជើងធ្មេញនោះ ក៏សម្រេចចិត្តដុសសម្អាតធ្មេញ និងមាត់ភ្លាមៗតែម្តងក្រោយពេលញ៉ាំបាយហើយរួចរាល់។ តែអ្នកដឹងទេថា ទង្វើនេះវាហុចនូវផលអាក្រក់ដល់សុខភាពធ្មេញរបស់អ្នកលើសមុនទៅទៀត ដោយសារតែអាស៊ីតខ្លាញ់ដែលនៅសេសសល់ជាប់នៅលើធ្មេញ និងក្នុងប្រអប់មាត់ វានឹងទៅបំផ្លាញស្រទាប់ស្រោបខាងក្រៅរបស់ធ្មេញ ហើយបើសិនជាធ្វើបែបនោះញឹកញាប់ទៅ ស្រទាប់ក្រៅរបស់ធ្មេញនឹងត្រូវបំផ្លាញជានិរន្តរ៍បានយ៉ាងងាយ ក្រៅពីនេះនៅមានអាការស្រៀវធ្មេញតាមមកទៀតផង។ តែបើសិនជាទ្រាំមិនបាន ចង់តែដុសសម្អាតធ្មេញមែននោះ ឡារ៉ែន សុំណែនាំឱ្យរង់ចាំយ៉ាងតិចណាស់ 1ម៉ោងក្រោយ សឹមធ្វើការដុសសម្អាតធ្មេញចុះ។

5. ពាក់ស្បែកជើងផ្ទាត់ដើរពេញ 1ថ្ងៃ
សូមទទួលស្គាល់ថា ស្បែកជើងផ្ទាត់ គឺជាស្បែកជើងដែលពាក់ស្រួលនិងសប្បាយស្រួលជើងជាទីបំផុតតែមាននរណាដឹងខ្លះទេថា ការពាក់ស្បែកជើងផ្ទាត់ចេញពីផ្ទះ ដើរទៅនេះ ដើរទៅនោះពេញ 1ថ្ងៃនោះ បែរជាហុចផលអាក្រក់ដល់សុខភាពជើងយ៉ាងខ្លាំងទៅវិញ(ជាពិសេសបរិវេណបាតជើង) ដូច្នេះបើសិនជាអាចទៅរួច ឡារ៉ែន ចង់ណែនាំឱ្យងាកទៅពាក់ស្បែកជើងបែបផ្សេងខ្លះ ដូចជាស្បែកជើងបាតាជាដើម ទោះជាវាមិនសូវសប្បាយជើងដូចស្បែកជើងផ្ទាត់មែន តែយ៉ាងហោចណាស់ក៏វាមិនបំផ្លាញសុខភាពជើងខ្លាំងពេកដែរ៕

October 10, 2019

Category: សង្គម និងសេដ្ឋកិច្ច