សង្គម និងសេដ្ឋកិច្ច - La Reine Media

រកឃើញកំហុសធំមួយ អនុញ្ញាតឱ្យ Hacker គ្រប់គ្រងទាំងស្រុងលើបណ្តាញទូរស័ព្ទ Android

កំហុសដ៏ធំមួយក្នុងប្រព័ន្ធប្រតិបត្តិការ Android របស់ក្រុមហ៊ុន Google អាចអនុញ្ញាតឱ្យពួក Hacker គ្រប់គ្រងទាំងស្រុងទៅលើបណ្តាញទូរស័ព្ទមួយចំនួន តាមរយៈការវាយប្រហារ Zero-Day។

អ្នកស្រាវជ្រាវបានព្រមានថា ស្មាតហ្វូនដែលមានប្រជាប្រិយនៅលើពិភពលោកមួយចំនួនងាយនឹងខាតបង់ពីភាពងាយរងគ្រោះផ្នែកសុវត្ថិភាពដ៏ធំមួយ ដែលអាចឱ្យអ្នកវាយប្រហារគ្រប់គ្រងទាំងស្រុងទៅលើទូរស័ព្ទលោកអ្នក។ គុណវិបត្តិដែលភ័ស្តុតាងបង្ហាញថា នៅតែកំពុងត្រូវបានគេធ្វើការវាយប្រហារយ៉ាងសកម្មនោះ រួមមានទូរស័ព្ទមកពីក្រុមហ៊ុន Samgsung ក្រុមហ៊ុន Huawei និងក្រុមហ៊ុន Motorola។ ការវាយប្រហារនេះត្រូវបានរកឃើញថាមានទាក់ទងទៅនឹងក្រុមហ៊ុន Spyware របស់ប្រទេសអ៊ីស្រាអែលដែលត្រូវបានគេស្គាល់ថា ជា NSO Group ដែលលក់កម្មវិធីវាយប្រហារដើម្បីលួចតាមដានទូរស័ព្ទដោយសម្ងាត់។

ការស្រាវជ្រាវបង្ហាញថា ទូរស័ព្ទដែលរងផលប៉ះពាល់ រួមមានស៊េរី Pixel 1 និង 2, Huawei P20, Xiaomi Redmi 5A, Xiaomi Redmi Note 5, Xiaomi A1, Oppo A3, Moto Z3, Oreo LG និង Samsung S7, S8, S9 ហើយវាត្រូវបានគេដឹងថា ទូរស័ព្ទ ភិកសែល 3 និង 3A របស់ក្រុមហ៊ុន Google ផ្ទាល់ មិនរងគ្រោះទេ។

ក្នុងករណីភាគច្រើន ប្រតិបត្ដិការជ្រៀតចូល ត្រូវបានគេកំណត់គោលដៅខ្ពស់ ដូច្នេះវានៅតែមានអ្នកប្រើភាគច្រើន ទំនងជានឹងមិនទទួលបាននូវបញ្ហាដូចជា ពពួកមេរោគ Malware ទេ ប៉ុន្តែលោកអ្នកគួរតែធ្វើបច្ចុប្បន្នភាពជាបន្ទាន់ប្រសិនបើ ក្រុមហ៊ុនទូរស័ព្ទរបស់លោកអ្នកដាក់ឱ្យប្រើប្រាស់កម្មវិធីថ្មីនោះ៕

October 17, 2019

ត្រឡាចជាដំណាំងាយដាំ បានផលច្រើន និងមានតម្រូវការខ្ពស់រាល់ថ្ងៃ

ដំណាំត្រឡាច គឺជាប្រភេទដំណាំវារលើដីក៏បាន ឡើងទ្រើងក៏បាន ដែលកសិករខ្មែរនិយមចូលចិត្តដាំ និងយកទៅធ្វើជាបន្លែស្លស្លុក។ នៅក្នុងប្រទេសកម្ពុជាយើង ដោយសារតែត្រឡាច វាមានភាពងាយស្រួលក្នុងការដាំដុះ លូតលាស់លឿន ធន់ទ្រាំនឹងសីតុណ្ហភាព ព្រមទាំងងាយស្រួលក្នុងថែទាំ ហុចផលក្នុងរយៈពេលខ្លីតែពី 30ទៅ 45ថ្ងៃប៉ុណ្ណោះដែលបច្ចុប្បន្ន ដំណាំនេះមានតម្រូវការនៅលើទីផ្សារជាប្រចាំ និងអាចលក់បានដោយងាយស្រួល។

សហគមន៍កសិករនៅភូមិក្រសាំងពុល ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង អ្នកស្រី ស៊ុន ស្រីពៅ ជាប្រធានសហគមន៍ បានផ្តល់បទសម្ភាសដល់កាសែត ឡារ៉ែន ពាណិជ្ជ អំពីការដាំដំណាំត្រឡាចថា៖ “គ្រួសារខ្ញុំ និងកសិករក្នុងសហគមន៍បានចាប់ផ្តើមប្រកបរបរដាំត្រឡាចរយៈពេល 10ឆ្នាំមកហើយ ដែលមានទាំងអស់ 18ក្រុម ស្មើនឹង 93គ្រួសារ ដាំដុះលើផ្ទៃដីប្រមាណ 8ហិកតាដែលមានដំណាំរួមផ្សំផ្សេងទៀត ដូចជាត្រសក់ សណ្តែកកួរ។ល។ ដោយឡែកសម្រាប់ដំណាំត្រឡាច យើងមានផ្ទៃដីដាំដុះចំនួន 3ហិកតា”។

អ្នកស្រីបញ្ជាក់ថា សម្រាប់បចេ្ចកទេសដាំដុះ គេអាចដាំត្រឡាចបានគ្រប់រដូវ តែការជ្រើសរើសរដូវដាំដុះ មានសារៈសំខាន់ខ្លាំងណាស់។ ដោយសារតែការដាំដុះនៅរដូវក្តៅ វាមានបញ្ហាច្រើន ដែលប្រឈម ដូចជាកត្តាសត្វល្អិត បាក់តេរី វីរុស និងពពួកផ្សិត ជាដើម។ រដូវកាលសមស្រប សម្រាប់ដំណាំត្រឡាច គឺរដូវប្រាំង ចាប់ពីខែវិច្ឆិកា ដល់ខែមករា និងកុម្ភៈ នៅតំបន់ទំនាប។ រដូវវស្សា ចាប់ពីខែឧសភា ដល់ខែតុលា នៅតំបន់ខ្ពង់រាប។

អ្នកស្រីបន្តថា សម្រាប់ការដាំដំណាំត្រឡាចនេះមុននឹងដាំគែត្រូវភ្ជួរដីជាមុន ដោយត្រូវធ្វើ 2 ទៅ 3ដង ហើយការភ្ជួរលើកទី1 មុននឹងភ្ជួរ គេត្រូវបាញ់ថ្នាំកម្ចាត់ស្មៅ និងបន្ទាប់ពីភ្ជួរហើយ គេទុកដីចោលហាលថ្ងៃរយៈពេលពី 3 ទៅ 7ថ្ងៃ ដើម្បីឱ្យស្មៅងាប់។

ឯការភ្ជួរលើកទី2 បន្ទាប់ពីភ្ជួររួច គេត្រូវរាស់ដីឱ្យរាបស្មើ បន្ទាប់មកកាប់រណ្ដៅ ទំហំ 4តឹក 4ជ្រុង និងជម្រៅពី 2តឹកទៅ 3តឹក គម្លាតពី 1គុម្ព ទៅ 1គុម្ពប្រវែង1ម៉ែត្រ។ បើយើងដាំនៅខែប្រាំង ត្រូវយកកម្ទេចកម្ទីសំរាមដុតដាក់ក្នុងរណ្តៅ តែបើ នៅខែវស្សាត្រូវបាចកំបោរសក្នុងរណ្តៅមុនពេលដាំ។

ចំពោះការរៀបចំគ្រាប់ពូជសម្រាប់ដាំ គឺគេត្រូវជ្រើសរើសពូជណាល្អ ដែលគ្មានជំងឺដើម្បីធ្វើការដាំដុះដោយត្រូវយកគ្រាប់ត្រឡាចទៅត្រាំក្នុងទឹក ពី6 ទៅ 12ម៉ោង បន្ទាប់មកយកគ្រាប់ដែលត្រាំទឹកហើយនោះទៅដាក់ដាំ ក្នុងកន្ទោងបណ្ដុះកូនជាមុនសិន ចាំដល់ពេលវាលាស់ចេញស្លឹកខ្លះ ទើបគេយកវាទៅដាក់ដាំក្នុងរណ្ដៅ។ ក្រោយពីដាំរួច យើងត្រូវអនុវត្តដំណាក់កាល 3ជំហាន៖+ ជំហានទី 1 ពេលកូនត្រឡាចដុះលូតលាស់បាន 7សន្លឹក យើងត្រូវក្ដិចត្រួយវាចេញម្តង ក្រោយមកយើងនឹងបានទទួលបានពន្លកត្រួយថ្មីចំនួន 3បន្ថែមទៀត។

+ជំហានទី 2 ត្រួយដែលបែកចេញនោះ នៅពេលវាលូតលាស់បានស្លឹក 7សន្លឹកយើងបន្តអនុវត្តដូចជំហានទី1 ទៀត ពេលនោះយើងនឹងបានពន្លកត្រួយថ្មីចំនួន 7បន្ថែមទៀត។

+ជំហានទី 3 យើងនៅតែបន្តអនុវត្តដូចជំហានទី1និងទី2 ដដែល ហើយពេលនោះ យើងនឹងបាន ពន្លកត្រួយថ្មីដល់ទៅ 30 ទៅ 35ខ្នែង។ ដូច្នេះ ពេលនេះវាជាដំណាក់កាល ដែលយើងត្រូវបន្ថែមជីធម្មជាតិ ដើម្បីជួយទ្រទ្រង់ការលូតលាស់របស់វា។

ការដាក់ជីនេះ យើងត្រូវដាក់នៅសងខាងចេញពីរណ្តៅត្រឡាចចម្ងាយប្រមាណ 30 ទៅ 50 សង់ទីម៉ែត្រ មានដូចជាជីកំប៉ុស លាមកសត្វ និងកម្ទេចស្លឹកឈើ និងស្រោចទឹកជាប្រចាំ ធ្វើបែបនេះត្រឡាចនឹងលូតលាស់បានល្អ មានរយៈពេលយូររហូតដល់ជាង 2ខែ ដែលអាចឱ្យវាផ្លែបានច្រើន និងយូរ និងច្រើន។ ក្រោយពីដាំបានរយៈពេល 30ទៅ 45ថ្ងៃ អាចប្រមូលផលបានហើយ។

អ្នកស្រី ពៅ បានឱ្យដឹងទៀតថា៖“ចម្ការត្រឡាច ដែលសហគមន៍ខ្ញុំមាននៅលើផ្ទៃដី 3ហិកតានេះ គឺដាំក្នុងលក្ខណៈវិលជុំ ធ្វើឱ្យទទួលបានផលជាប្រចាំជាមធ្យមពី 500-800គីឡូក្រាម ក្នុង1ថ្ងៃដែលពេលខ្លះអាចដល់ជាង 1តោនក៏មាន។ពីព្រោះបើគិតតាមបច្ចេកទេសដំណាំត្រឡាចដែលដាំក្នុង1ហិកតានឹងទទួលផលពី 10ទៅ15តោន។ ប៉ុន្តែត្រឡាចរបស់សហគមន៍ខ្ញុំដាំក្នុងលក្ខណៈជាបន្លែសុវត្ថិភាពកំណត់ទម្ងន់ត្រឹមតែ 6ខាំប៉ុណ្ណោះក្នុង 1ផ្លែ”។

អ្នកស្រីបញ្ជាក់ថា សម្រាប់ការរកទីផ្សារលក់ចេញ គឺផ្លែត្រឡាចរបស់សហគមន៍អ្នកស្រីមិនមានការលំបាកនោះទេ ដោយបច្ចុប្បន្នសហគមន៍អ្នកស្រីបានធ្វើកិច្ចសន្យាជាមួយវិស័យឯកជនមួយចំនួនដូចជាក្រុមហ៊ុន KOC និង REMIX ដែលបានប្រមូលទិញ និងចែកចាយទៅទីផ្សារ។ដោយឡែករឿងតម្លៃនៅលើទីផ្សារវិញ អ្នកស្រីប្រធាន បានប្រាប់កាសែត ឡារ៉ែន ពាណិជ្ជថា៖“ ត្រឡាចរបស់ខ្ញុំ អាចលក់បានតម្លៃ 1,700រៀល ទៅ2,000រៀលក្នុង 1គីឡូក្រាម(បើគិតតម្លៃសរុប2000X500=1,000,000រៀល)។

អ្នកស្រី ពៅ បានបញ្ជាក់ទៀតថា៖“បច្ចុប្បន្នត្រឡាចរបស់សហគមន៍ខ្ញុំ ត្រូវបានផ្គត់ផ្គង់ទៅឱ្យ KOC ស៊ីដាក ទីផ្សារនៅភ្នំពេញ និងទីផ្សារឧដុង្គ និងដោយសារតែវាមានតម្រូវការច្រើន ទើបយើងត្រូវការផលិតបន្ថែម ព្រោះយើងក៏មានអ្នកទទួលស្គាល់គុណភាពច្រើនដែរ ហើយផ្លែត្រឡាចរបស់យើងមានលក្ខណៈពិសេស ត្រង់មានទម្ងន់មិនលើសពី 6ខាំឡើយក្នុង 1ផ្លែ។ ជាបន្លែសុវត្ថិភាព ធ្វើឱ្យមានការបញ្ជាទិញបន្ថែមច្រើន តែសហគមន៍ខ្ញុំមិនទាន់អាចផលិតទាន់ការផ្គត់ផ្គង់ទីផ្សារក្នុងស្រុកនៅឡើយ”។

អ្នកស្រីបានប្រាប់កាសែត ឡារ៉ែន ពាណិជ្ជ ទៀតថា៖“ខ្ញុំក៏មានគោលបំណងពង្រីកការដាំដុះបន្ថែមទៀតដែរ ដើម្បីផ្គត់ផ្គង់តាមរយៈនៃការអនុវត្តកិច្ចសន្យាជាមួយដៃគូ ព្រោះសហគមន៍ទទួលបានព័ត៌មានអំពីតម្រូវការទីផ្សារជាក់លាក់ និងបានរៀបចំផែនការដាំដុះច្បាស់លាស់តាមការបញ្ជាទិញ។

សហគមន៍គ្រោងនឹងពង្រីកសក្តានុពលដាំដុះបន្ថែមទៀត ព្រោះយើងអាចផ្ទេរផ្ទៃដីដំណាំផ្សេងមកបង្កើនការដាំដំណាំត្រឡាចនេះវិញ ព្រោះសមាជិកសហគមន៍ កំពុងទទួលបានផលប្រយោជន៍ពិត ពីការដាំបន្លែ ធ្វើឱ្យជីវភាពយើងមានភាពប្រសើរឡើង”៕

October 16, 2019

ការតុបតែងមុខសម្រាប់កូនក្រមុំក្នុងថ្ងៃរៀបអាពាហ៍ពិពាហ៍

ការតុបតែងមុខសម្រាប់ថ្ងៃរៀបការមិនដូចគ្នាទៅនឹងការតុបតែងសម្រាប់ថ្ងៃធម្មតានោះទេ មានលក្ខណៈខុសគ្នាខ្លះដែលអ្នកគួរតែដឹង។ ដោយហេតុថាវាជាថ្ងៃពិសេស ដូច្នេះអ្វីៗក៏ត្រូវតែពិសេសជាងពេលធម្មតាដែរ ហើយបើចង់ជ្រាបកាន់តែច្បាស់ថា ភាពខុសប្លែកគ្នានោះគឺជាអ្វីនោះសូមតាមដានអត្ថបទខាងក្រោម៖

– ពេលព្រឹកគួរប្រើក្រែមលាបមាត់ដែលមានពណ៌ស្រាល ហើយមុខក៏មិនគួរផាត់ក្រាស់ពេកដែរ។ គួរធ្វើឱ្យមានលក្ខណៈធម្មជាតិច្រើនជាង ហើយអ្នកអាចជ្រើសរើសម៉ូដសក់ផ្សេងៗតាមការពេញចិត្ត។
– បើអ្នកធ្លាប់លាបមុខដោយពណ៌ទី2ក្នុងថ្ងៃធម្មតា អ្នកគួរតែប្តូរមកប្រើពណ៌លេខ1វិញ ព្រោះសម្រាប់ថ្ងៃនេះ ផ្ទៃមុខត្រូវតែសជាងមុន។– ភ្នែកជាទីតាំងសំខាន់បំផុតក្នុងការតែងមុខ ព្រោះវាអាចជួយបន្ថែមពន្លឺនៃភាពទាក់ទាញឱ្យកូនក្រមុំបាន ដូច្នេះត្រូវយកចិត្តទុកដាក់ត្រង់កន្លែងនេះជាពិសេស។
– នៅពេលរាត្រីចូលមកដល់ កូនក្រមុំត្រូវបន្ថែមពណ៌ក្រែមលាបមាត់ឱ្យច្បាស់ជាងមុន រោមភ្នែកទាំងខាងលើ ទាំងខាងក្រោម ក៏ត្រូវឱ្យកាន់តែច្បាស់ដូចគ្នាដែរ។ គួរប្រើពណ៌មាស ឬពណ៌ទឹកក្រូច ដើម្បីផាត់ថ្ពាល់ ព្រោះវាជួយធ្វើឱ្យផ្ទៃមុខរបស់កូនក្រមុំមើលទៅស្រស់ស្អាត សមរម្យ ព្រមទាំងបង្ហាញពីភាពទាន់សម័យថែមទៀតផង។– គ្រឿងអលង្ការ ឬត្បូងផ្សេងៗមានសារសំខាន់ណាស់សម្រាប់ការតុបតែងក្នុងពេលរាត្រីព្រោះវាអាចជួយបញ្ចេញនូវភាពចែងចាំងភ្លឺផ្លេកដែលជាប្រភពនៃភាពទាក់ទាញជាខ្លាំង។
– សម្រាប់កូនក្រមុំដែលមានទម្រង់មុខតូច គួរស្វែងរកម៉ូដសក់ណាដែលស្រដៀងគ្នាទៅនឹងផ្ទៃមុខរបស់អ្នកទើបស័ក្តិសម។ ម៉ូដសក់ធំៗមិនសមជាមួយអ្នកដែលមានទម្រង់មុខតូចនោះទេ ;ព្រោះវានឹងធ្វើឱ្យមើលឃើញសក់កាន់តែច្រើន ហើយផ្ទៃមុខកាន់តែតូចជាងមុនទៅទៀត។– ចំពោះកូនក្រមុំដែលមានផ្ទៃមុខតូចបែបនេះ គឺប្រើក្រវិលរាងវែងបន្តិចទើបជាការល្អបំផុត។
– ការធ្វើម៉ូដសក់បួងឡើងគួរធ្វើនាពេលរាត្រី ពីព្រោះវាអាចជួយឱ្យមើលឃើញផ្ទៃមុខកូនក្រមុំកាន់តែច្បាស់ និងស្រឡះល្អ គួរជាទីទាក់ទាញក្រសែភ្នែកអ្នកដែលចូលរួមនៅក្នុងកម្មវិធីឱ្យសម្លឹងមើលមកកូនក្រមុំជាពិសេស៕

October 16, 2019

រឿងដែលត្រូវគិត មុនរៀបការ សម្រាប់កំលោះក្រមុំសម័យថ្មី

សម្រាប់ការរៀបការ ឬការរួមរស់នៅជាមួយគ្នារវាងមនុស្សពីរនាក់ដែលធ្វើដំណើរទៅជាមួយគ្នាក្រោយពីបានសេពគប់មើលចិត្តថ្លើមគ្នាអស់មួយរយៈហើយនោះ អាចហៅបានថា មិនមែនជារឿងងាយដូចដែលមនុស្សជាច្រើនគិតនោះទេ តែដូចពាក្យដែលគេនិយាយថា “ការរៀបការមិនមែនជាចំណុចបញ្ចប់របស់ជីវិតនោះទេ តែវាជាចំណុចចាប់ផ្តើមរបស់ជីវិត” ទៅវិញទេ ព្រោះអំឡុងជីវិតក្រោយពេលរៀបការនោះ គឺជាការពិតដែលយើងត្រូវប្រឈម ថ្ងៃនេះយើងនាំគ្នាមកមើលពីភាពត្រៀមខ្លួនរួចជាស្រេចមុនពេលរៀបការ ដើម្បីជាគន្លងផ្លូវដែលលោកអ្នកត្រូវតែត្រៀមខ្លួនជាស្រេចក្នុងការជួបប្រទះ និងប្រឈមមុខជាមួយភាពប្រែប្រួលទាំងអស់នោះ។

ទស្សនៈ និងផ្នត់គំនិតត្រូវគ្នាឬទេ?
សម្លឹងមើលពីសេចក្តីនឹកសង្ឃឹមរបស់អ្នកនិងគូស្នេហ៍ថា តើមានផ្នត់គំនិតទៅក្នុងទិសដៅដូចគ្នាដែរឬទេ? តើម្នាក់ៗទទួលស្គាល់ភាពមិនត្រូវគ្នានោះបានច្រើនតិចប៉ុនណា? ដែលរឿងនេះអាចរាប់បានថា ជារឿងមួយសំខាន់ខ្លាំងណាស់ ដែលអ្នកចាំបាច់ត្រូវប្រឹក្សាគ្នាជាមួយគូស្នេហ៍របស់អ្នកថា តើមានគំនិតដូច ឬខុសគ្នាច្រើនតិចប៉ុនណា? ព្រោះបើខុសគ្នាច្រើន និងទទួលយកមិនបាននោះ នឹងច្រើនតែកើតមានបញ្ហាក្រោយរៀបការជានិច្ច។

ព្រមទទួលយកការផ្លាស់ប្តូរច្រើនតិចប៉ុនណា?
រឭកដឹងថា តើអ្នកត្រៀមជាស្រេចក្នុងការប្រឈមជាមួយការផ្លាស់ប្តូរបានច្រើនតិចប៉ុនណា? មិនថាតែការផ្លាស់ប្តូរទីលំនៅ ឬអាចត្រូវប្តូរកន្លែងធ្វើការ ហើយបើមានកូន តើនឹងត្រូវរស់នៅបែបណាទៀត?

ទទួលយក និងយល់ពីសម្ពន្ធភាពជាមួយក្រុមគ្រួសារ ឬគូស្នេហ៍បានឬទេ?
នឹកដល់ពីសម្ពន្ធភាពរបស់ក្រុមគ្រួសារ ឬគូស្នេហ៍ ប្រសិនជាក្រុមគ្រួសារគេមិនចូលចិត្តអ្នកផងនោះ អាចនឹងក្លាយជាសង្គ្រាមក្តៅគគុក ឬសភាវបង្ខំចិត្តបាន ដែលអ្នកនឹងត្រូវស្គាល់ពីវិធីក្នុងការសម្រុះសម្រួល និងទប់ទល់យ៉ាងមានសតិបញ្ញា ចេះគ្រប់គ្រងអារម្មណ៍ខឹងសម្បារឱ្យល្អ ព្រោះមិនដូច្នោះទេនឹងកើតការឈ្លោះតតាំង និងសាងក្តីលំបាកចិត្តដល់គូស្នេហ៍របស់អ្នកបាន។

ស្គាល់ និងយល់ពីអារម្មណ៍គូស្នេហ៍យ៉ាងស៊ីជម្រៅច្បាស់ហើយឬនៅ?
ត្រូវស្គាល់ពីអារម្មណ៍របស់គូស្នេហ៍ឱ្យច្បាស់មុននឹងសម្រេចចិត្តរៀបការ ព្រោះបើឈ្លោះគ្នា ;ហើយដល់ថ្នាក់ប្រើកម្លាំងបាយវាយតប់ផងនោះ ;អ្នកគួរតែវិលត្រឡប់មករិះគិតឡើងវិញឱ្យបានច្បាស់ មុននឹងយល់ព្រមសម្រេចចិត្ត។

រៀបផែនការទប់ទល់ជាមួយបញ្ហាហិរញ្ញវត្ថុដែលអាចកើតឡើងក្រោយពេលរៀបការច្បាស់លាស់ហើយឬនៅ?
ពិនិត្យមើលស្ថានភាពខាងហិរញ្ញវត្ថុរបស់គូស្នេហ៍ រឿងនេះក៏អាចរាប់បានថាជាបច្ច័យមួយដែលត្រូវតែរឭកនឹកដល់យ៉ាងខ្លាំងមួយដែរ ព្រោះពាក្យថា សុខចិត្តហូបអំបិលជាមួយគ្នានោះ វាប្រើលែងបានហើយនៅក្នុងសង្គមបច្ចុប្បន្ននេះ។ ក្រោយរៀបការ បើកើតមានបញ្ហាផ្នែកហិរញ្ញវត្ថុនៅពេលណាមួយហើយនោះ បញ្ហាផ្សេងៗក៏នឹងតាមមកជាច្រើន ដូច្នេះទើបត្រូវមានការពិភាក្សាគ្នា ឬរៀបផែនការផ្នែកហិរញ្ញវត្ថុនេះឱ្យបានច្បាស់លាស់ជាមុនសិន។

សង្កេតឃើញថា រឿងរបស់ការរៀបការនេះគឺជារឿងសំខាន់ ដែលយើងម្នាក់ៗចាំបាច់ត្រូវតែគិតសម្រេចចិត្តឱ្យច្បាស់ជាមុនសិន មុននឹងសម្រេចចិត្តយល់ព្រម ព្រោះជីវិតគូមិនមែនប្រើប្រាស់ត្រឹមតែសេចក្តីស្រឡាញ់រវាងគូស្នេហ៍តែម្យ៉ាងប៉ុណ្ណោះទេ តែនៅត្រូវនឹកដល់បច្ច័យជុំវិញខ្លួនផ្សេងៗទៀតជាច្រើន ហើយបើសិនជាមិនរិះគិតឱ្យបានល្អិតល្អន់មុនសម្រេចចិត្តទេនោះ អាចនឹងត្រូវបញ្ចប់ជីវិតអាពាហ៍ពិពាហ៍ដោយការលែងលះ ឬខូចចិត្តសោកស្តាយនៅពេលក្រោយបាន។ ហើយប្រសិនជាអាចទទួលស្គាល់នូវភាពផ្លាស់ប្តូរដែលនឹងកើតឡើងតាមក្រោយបាននោះ នឹងអាចរួមរស់នៅជាមួយគ្នាយ៉ាងមានសេចក្តីទុក្ខតិចៗ តែមានសេចក្តីសុខយូរអង្វែងបាន៕

October 16, 2019

ADB-IMF៖ សេដ្ឋកិច្ចកម្ពុជានៅតែរីកចម្រើន និងចំណូលជាតិនៅតែរឹងមាំ

ធនាគារអភិវឌ្ឍន៍អាស៊ី Asian Development Bank (ADB) ថ្មីៗនេះបានចេញរបាយការណ៍ មួយដែលឱ្យដឹងថា សេដ្ឋកិច្ចរបស់កម្ពុជានឹងនៅតែបន្តសម្រេចបានកំណើនរឹងមាំក្នុងឆ្នាំនេះ បើ ទោះបីជាផលិតកម្មកសិកម្មមានការកើនឡើងយឺតជាងការរំពឹងទុកក៏ដោយ។

ការធ្វើបច្ចុប្បន្នភាព របាយការណ៍ប្រចាំឆ្នាំរបស់ខ្លួន អំពីសេដ្ឋកិច្ចដែលមានឈ្មោះថា ទស្សនវិស័យអភិវឌ្ឍន៍អាស៊ី Asian Development Outlook(ADO) ឆ្នាំ2019 ADB បានរក្សាការព្យាករ របស់ខ្លួនអំពីកំណើនផលិតផលក្នុងស្រុកសរុប(ផ.ស.ស)សម្រាប់ប្រទេសកម្ពុជាកម្រិត7.0% សម្រាប់ឆ្នាំនេះ និង 6.8% សម្រាប់ឆ្នាំ2020។

លោកស្រី Sunniya Durrani-Jamal នាយិកាប្រចាំប្រទេសរបស់ធនាគារ ADB ទទួលបន្ទុកប្រទេសកម្ពុជាថ្លែងថា៖ “សេដ្ឋកិច្ចកម្ពុជាបន្តកើនឡើងក្នុងល្បឿនដ៏រឹងមាំដោយសារតែភាពខ្លាំងជាបន្តនៅក្នុងវិស័យទូទៅជាច្រើន ដូចជាវិស័យកាត់ដេរ ទេសចរណ៍ ពាណិជ្ជកម្ម និងសំណង់នៅតែបន្តមានភាពរឹងមាំ។ ទោះបីយ៉ាងនេះក្តី ADB បានឱ្យដឹងថា កម្ពុជាចាំបាច់ត្រូវធ្វើពិពិធកម្ម ផលិតផលនាំចេញរបស់ខ្លួនក្រៅពីវិស័យដែលមានស្រាប់បច្ចុប្បន្ន”។

លោកស្រីបន្តថា៖“ជាមួយនឹងការកើនឡើងភាពមិនច្បាស់លាស់នៅក្នុងបរិយាកាសពាណិជ្ជកម្មពិភពលោក ព្រមទាំងផលប៉ះពាល់របស់វាមកលើវិស័យសេវាកម្ម ដូចជា ទេសចរណ៍កម្ពុជាត្រូវការយុទ្ធសាស្ត្រពិពិធកម្មមួយជាបន្ទាន់ ដែលផ្តោតលើអ្វីដែលមានភាពសមស្របសម្រាប់ខ្លួនឯង ព្រមទាំងផ្តោតលើផលិតផល និងសេវាកម្មដែលមានតម្លៃបន្ថែមខ្ពស់ជាងមុន”។

លោកស្រីបន្តថា ការធ្វើបែបនេះតម្រូវឱ្យកាត់បន្ថយហានិភ័យ ដែលកើតឡើងពីការផ្តល់ឥណទានដល់វិស័យអចលនទ្រព្យ ដែលកំពុងតែមានការកើនឡើង ការអភិវឌ្ឍកម្លាំងពលកម្មប្រកបដោយជំនាញនិងមានផលិតភាពខ្ពស់ជាងមុន ដើម្បីរក្សាតុល្យភាពនឹងប្រាក់ឈ្នួល ដែលកំពុងកើនឡើង និងទាក់ទាញការវិនិយោគមូលធនប្រកបដោយគុណភាពខ្ពស់ ដែលទាំងអស់នេះត្រូវការឱ្យមានផងដែរនូវអភិបាលកិច្ចល្អ និងស្ថាប័នដែលរឹងមាំ។

របាយការណ៍នេះ បានកត់សម្គាល់អំពីហានិភ័យចំពោះផលិតកម្មដែលអាចរងផលប៉ះពាល់ ពីការប្រែប្រួលអាកាសធាតុ។ គ្រោះរាំងស្ងួតដែលបានកើតឡើង នៅអំឡុងពាក់កណ្តាលឆ្នាំដំបូង បានធ្វើឱ្យផលិតកម្មកសិផល និងជលផលមានការធ្លាក់ចុះ ដោយបានកាត់បន្ថយកំណើនសេដ្ឋកិច្ច នៅក្នុងវិស័យកសិកម្ម មកត្រឹមប្រមាណ 1.1% សម្រាប់ឆ្នាំនេះ។ កំណើនវិស័យឧស្សាហកម្ម មាន ភាពរឹងមាំដោយសារកំណើនដ៏ឆាប់រហ័សនៃផលិតកម្មកាត់-ដេរសម្លៀកបំពាក់ ស្បែកជើង ជាពិសេសទំនិញសម្រាប់ការធ្វើដំណើរដែលបាននាំឱ្យមានការដំឡើងការព្យាកររបស់ ADB ពី 10.1% កាល ពីខែមេសា ទៅជា 10.6% សម្រាប់វិស័យនេះ។

ដោយសារប្រេងឥន្ធនៈមានតម្លៃទាបជាងមុននិងតម្លៃស្បៀងអាហារមានការកើនឡើងតិចអតិផរណាមានកម្រិតទាបត្រឹម 1.4% នៅចុងខែមិថុនា បើធៀបនឹងរយៈពេលដូចគ្នាកាលឆ្នាំ2018 និងរំពឹងថា នឹងមានកម្រិត 2.2% ជាមធ្យម សម្រាប់ឆ្នាំ2019។

កំណើននៃការនាំចូលលឿនជាងការរំពឹងទុក បើទោះបីការនាំចេញទំនិញ និងការមកដល់នៃភ្ញៀវទេសចរមានការកើនឡើងយ៉ាងរឹងមាំក៏ដោយ។ ដូច្នេះឱនភាពគណនីចរន្ត (ដោយមិនរាប់បញ្ចូលជំនួយឥតសំណង) ត្រូវបានរំពឹងថា នឹងកើនឡើងនៅក្នុងរយៈពេលនៃការព្យាករនេះ។ ឱនភាពនេះទទួលបានហិរញ្ញប្បទានពីលំហូរចូលនៃការវិនិយោគផ្ទាល់ពីបរទេស ដែលនឹងបន្តគរពូនទុនបម្រុងដុលអន្តរជាតិឱ្យឡើងដល់ប្រមាណ 12.3ពាន់លានដុល្លារត្រឹមដំណាច់ឆ្នាំនេះ ដែលអាចរ៉ាប់រងចំណាយសម្រាប់ការនាំចូលបានរយៈពេល 6ខែ។

ដោយឡែកមន្ត្រីជាន់ខ្ពស់មូលនិធិរូបិយវត្ថុអន្តរជាតិ (International Monetary Fund ឬIMF) ក៏បានកោតសសើរចំពោះការរីកចម្រើនសេដ្ឋកិច្ចរបស់កម្ពុជា និងចំណូលជាតិរឹងមាំខណៈមន្ត្រីរូបនេះចុះបំពេញបេសកកម្ម សម្រាប់រយៈពេល 2សប្តាហ៍នៅកម្ពុជា ដើម្បីសិក្សា និងវាយតម្លៃក្របខ័ណ្ឌម៉ាក្រូសេដ្ឋកិច្ចកម្ពុជា ។

លោក Jarkko Turunen ក្រុមការងារបេសកកម្ម Article IV របស់មូលនិធិរូបិយវត្ថុអន្តរជាតិ (IMF) បានឱ្យដឹងយ៉ាងដូច្នេះនៅក្នុងជំនួបពិភាក្សាការងារជាមួយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយលោកបានមានប្រសាសន៍ថា បេសកកម្មរបស់ក្រុមការងារ Article IV មានគោលបំណង៖ 1-វាយតម្លៃអំពីស្ថានភាពសេដ្ឋកិច្ចសកល តំបន់ និងនយោបាយភូមិសាស្ត្រមកលើក្របខ័ណ្ឌម៉ាក្រូសេដ្ឋកិច្ចកម្ពុជា។ 2- វាយតម្លៃ និងផ្តល់អនុសាសន៍គន្លឹះ សម្រាប់ពិចារណាលើវិធានការ គោលនយោបាយជាយុទ្ធសាស្ត្រ និងអាទិភាពដែលរាជរដ្ឋាភិបាលកម្ពុជាបានកំពុងអនុវត្ត និងត្រៀមនឹងដាក់ចេញសម្រាប់ជំហានបន្ទាប់។ 3-ការប៉ាន់ស្មានតម្រូវការ និងប្រភពហិរញ្ញប្បទានក្នុងការគាំទ្រក្របខ័ណ្ឌគោលដៅអភិវឌ្ឍន៍ ប្រកបដោយចីរភាពរបស់កម្ពុជា (CSDGs) និង4-យុទ្ធសាស្ត្រអភិវឌ្ឍន៍សមត្ថភាពមន្ត្រីជំនាញកម្ពុជា ដែលរួមមានជំនាញវិភាគ និងស្តង់ដារគ្រប់គ្រង និងផ្សព្វផ្សាយទិន្នន័យ ។

លោក Jarkko Turunen ប្រធានបេសកកម្ម បានវាយតម្លៃចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលសម្រេចបាននូវសមិទ្ធផលកំណើនសេដ្ឋកិច្ចខ្ពស់ និងចំណូលជាតិប្រកប ដោយភាពរឹងមាំ និងផ្លែផ្កា។

លោកបានថ្លែងអំណរគុណ ដល់ក្រសួងសេដ្ឋកិច្ច និងហិរញ្ញវត្ថុ ដែលបន្តរៀបចំផ្តល់កិច្ចសហការយ៉ាងសកម្ម សម្រាប់ក្រុមការងារបេសកកម្ម Article IV ក្នុងការវាយតម្លៃក្របខ័ណ្ឌម៉ាក្រូសេដ្ឋកិច្ចកម្ពុជា និងពិភាក្សាដោយផ្ទាល់ជាមួយអគ្គនាយកដ្ឋាន / ស្ថាប័នពាក់ព័ន្ធក្នុងឱកាសបំពេញការងារបេសកកម្មនេះ។

ក្នុងឱកាសនោះដែរ លោក Jarkko Turunen ប្រធានក្រុមបេសកកម្មសម្រាប់កម្ពុជា បានចូលជួបសម្តែងការគួរសមជាមួយឯកឧត្តម ជា ចាន់តូ អគ្គទេសាភិបាលធនាគារជាតិនៃកម្ពុជាដោយឯកឧត្តមអគ្គទេសាភិបាលបានថ្លែងឱ្យដឹងថា គ្រឹះស្ថានធនាគារ និងហិរញ្ញវត្ថុនៅក្នុងប្រទេសកម្ពុជា មានសុខភាពល្អប្រសើរ និងបានរួមចំណែកគាំទ្រការអភិវឌ្ឍសេដ្ឋកិច្ចជាតិ និងបានពង្រឹងការត្រួតពិនិត្យ និងបទប្បញ្ញត្តិជាមួយនឹងការដាក់ចេញបន្តបន្ទាប់នូវគោលនយោបាយម៉ាក្រូប្រុងប្រយ័ត្ន ការបោះផ្សាយរបាយការណ៍ ស្ថិរភាពហិរញ្ញវត្ថុ និងពង្រឹងបណ្តាញការពារស្ថិរភាពធនាគារឱ្យបានរឹងមាំស្របតាមស្តង់ដាអន្តរជាតិ។

សូមជម្រាបថា បេសកកម្ម Article IV ត្រូវបានមូលនិធិរូបិយវត្ថុអន្ដរជាតិធ្វើឡើងជារៀងរាល់ឆ្នាំ សម្រាប់ប្រទេសជាសមាជិក ដើម្បីពិនិត្យតាមដានស្ថានភាពសេដ្ឋកិច្ចកម្ពុជា និងផ្តល់អនុសាសន៍ សម្រាប់ការអនុវត្តគោលនយោបាយសេដ្ឋកិច្ច។

ឯកឧត្តមអគ្គទេសាភិបាលក៏បានជម្រាបជូនគណៈប្រតិភូពីការរីកចម្រើននៃសេដ្ឋកិច្ចនាពេលកន្លងមក ពិសេសនៅឆ្នាំ2018 ដែលកម្ពុជាសម្រេចបានក្នុងអត្រា7.5%។ ឆ្នាំ2019 រាជរដ្ឋាភិបាល រំពឹងថា កំណើននឹងបន្តកើនក្នុងរង្វង់ 7.1% ដែលជាកម្រិតខ្ពស់ក្នុងតំបន់។ ទន្ទឹមនេះស្ថានភាពម៉ាក្រូសេដ្ឋកិច្ចមានស្ថិរភាពល្អប្រសើរ ដោយអតិផរណានៅឆមាសទី1 មានអត្រា1.9% ហើយរំពឹងថា មានកម្រិត2.2% សម្រាប់ឆ្នាំ2019៕

October 14, 2019

ការវិវឌ្ឍរបស់ទារកនៅក្នុងគភ៌

9 ខែពេញដែលស្ត្រីមានគភ៌ និងកូនតូចក្នុងផ្ទៃជាផ្នែកមួយនៃគ្នាទៅវិញទៅមក ឥឡូវយើងនាំគ្នាមកមើលពីការចម្រើនធំធាត់ និងការវិវឌ្ឍដ៏អស្ចារ្យរបស់ទារកនៅក្នុងគភ៌ដូចតទៅ៖

• មានគភ៌ខែទី1: ចាប់ផ្តើមកកំណើតខែដំបូងនៅក្នុងគភ៌ម្តាយ កូនគ្រាន់តែជាតួកំណើតតូចមួយ មើលទៅដូចជាកូនបង្គាតូចមួយច្រើនជាងរូបទារកពេញរូបរាង។ មានប្រវែងត្រឹមតែ 4មីល្លីម៉ែត្រ មានតែក្បាល ចំណែកដងខ្លួនមានលក្ខណ:ស្រដៀងកូនក្អុក ដែលក្រោយមកនឹងក្លាយទៅជាឆ្អឹងកងខ្នង តែក្នុងអំឡុងពេលនេះ កូនចាប់ផ្តើមកកើតអវយវ:សំខាន់ៗហើយ រួមទាំងបេះដូងផង… ជាសញ្ញាបញ្ជាក់ពីការចាប់កំណើតនៃជីវិតមួយនៅលើផែនដីនេះហើយ។

• គភ៌ខែទី2: ទារកនៅក្នុងគភ៌ចាប់ផ្តើមកម្រើកកូននឹងធំធាត់ជាងពីខែដំបូង ឆ្អឹងមុខនីមួយៗចាប់ផ្តើមលេចចេញជារូបរាង។ ចំណុចខ្មៅៗដែលមើលឃើញនៅចំកណ្តាល គឺប្រស្រីភ្នែករបស់កូន ចំណែកឯផ្ទៃមុខចាប់ផ្តើមមើលឃើញជារាងរៅរបស់ច្រមុះ បបូរមាត់ និងត្រចៀក។ កូនចាប់ផ្តើមមានអវយវ:សំខាន់ៗគ្រប់អស់ហើយ ដៃជើងក៏ចាប់ផ្តើមដុះ ហើយដោយសារទំហំដែលនៅតូចល្អិត ទើបធ្វើឱ្យអ្នកម្តាយអាចនៅមិនទាន់មានអារម្មណ៍ដឹងថា កូនរើ ឬកម្រើកនៅឡើយ តែការពិតវិញ កូនកម្រើកខ្លួនបានហើយ និងបេះដូងរបស់កូនចាប់ផ្តើមលោតទៀតផង។

• គភ៌ខែទី3: ពីតួកំណើត ក្លាយជាទារក នៅក្នុងគភ៌ពីតួកំណើតដ៏តូចល្អិត កូនក្លាយមកជាទារកនៅក្នុងគភ៌ដែលកាន់តែដូចមនុស្សខ្លាំងឡើង។ មានអវយវ:គ្រប់32មុខហើយ តែនៅមិនទាន់ពេញរូបរាងនៅឡើយ និងចាប់ផ្តើមតបស្នងនឹងអ្វីដែលជំរុញពីខាងក្រៅបានហើយ ដូចជាបើមានអ្វីមកប៉ះពោះម្តាយ ទារកនឹងងាកខ្លួនគេច ជាដើម។ ផ្ទៃមុខចាប់ផ្តើមមើលឃើញកាន់តែច្បាស់ឡើង រហូតអាចមើលឃើញថា មានចង្កា ថ្ងាស់លាតធំឡើង ក្បាល និងកបញ្ឈរឡើងត្រង់ ច្រមុះចាប់ផ្តើមមានក្តោងរហូតមើលឃើញបានយ៉ាងច្បាស់ ត្របកភ្នែកមានរូបរាងច្បាស់លាស់ ហើយកូនថែមទាំងចាប់ផ្តើមចេះជញ្ជក់មាត់ និងពេលខ្លះបូញមាត់បានទៀតផង។

• គភ៌ខែទី4: មុខមាត់ដូចអ្នកណាគេហ្ន៎?ទារកនឹងរីកធំធាត់លម្អិតតាមផ្នែកផ្សេងៗរបស់រាងកាយរហូតស្រដៀងឪពុកម្តាយ និង ថែមទាំងចេះសម្តែងទឹកមុខបានទៀតផង។ កូនចាប់ផ្តើមដុះចិញ្ចើម និងរោមភ្នែក សរសៃសក់ក៏ចាប់ផ្តើមដុះច្រើនដែរ និងមានពណ៌។ ប្រព័ន្ធប្រសាទក៏វិវឌ្ឍច្រើនឡើងដែរ។ កូនតូចចាប់ផ្តើមស្តាប់ឮសំឡេងខាងក្នុងពោះម្តាយ ទាំងសំឡេងបេះដូងរបស់ម្តាយ និងសំលេងគ្រូកគ្រាក់ ឬក្រចៗនៃប្រព័ន្ធរំលាយអាហាររបស់ម្តាយជាដើម ខណ:ពេលជាមួយគ្នា ភ្នែកក៏ចាប់ផ្តើមដឹងពីពន្លឺដែរ។ អវយវ:ខាងក្រៅនឹងបញ្ជាក់ពីភេទបានកាន់តែច្បាស់ឡើង ធ្វើឱ្យដឹងច្បាស់ហើយថាពេលនេះកូនជាកូនប្រុស ឬកូនស្រី។

• គភ៌ខែទី5: កូនចាប់ផ្តើមស្តាប់ឮសំឡេងកូនចេះប៉ះម្តាយហើយ ព្រោះប្រព័ន្ធប្រសាទវិវឌ្ឍឡើងយ៉ាងល្អ រហូតអាចគ្រប់គ្រងការធ្វើការងាររបស់សាច់ដុំ រហ័សនឹងការប៉ះពាល់ និងរំកឹលខ្លួនគេចកាន់តែច្រើនឡើងពេលមានអ្វីមកប៉ះពោះម្តាយ។ ធ្មេញទឹកដោះចាប់ផ្តើមកខ្លួនឡើងនៅក្នុងអញ្ចាញ និងតាមដងខ្លួនមានដុះរោមខ្ចីៗ(រោមត្រឡាច)។ បើអ្នកម្តាយចង់ចង់និយាយជាមួយកូន ឬច្រៀងឱ្យកូនស្តាប់នោះ អំឡុងពេលនេះ គឺស័ក្តិសមល្អជាទីបំផុត ព្រោះកូនចាប់ផ្តើមបានឮសំឡេងពីខាងក្រៅ និងអាចតបស្នងបានហើយ។

• គភ៌ខែទី6: រូបភាពដំបូងនៅក្នុងពោះម្តាយរូបរាងមុខមាត់របស់កូនពេលនេះរាងដូចជាពេញបរិបូរណ៍ប្រហាក់ប្រហែលនឹងពេលជិតកើតហើយ ឯខួរក្បាលក៏វិវឌ្ឍឡើងរហូតចាប់ផ្តើមចេះចងចាំ និងរៀនយល់ដឹងអ្វីផ្សេងៗបានហើយ ព្រោះកោសិកាខួរក្បាលផ្នែកដែលមាននាទីក្នុងការដឹង ចាប់ផ្តើមធ្វើការហើយ។ ការរើរបស់កូនក្នុងអំឡុងពេលនេះក៏កើតឡើងយ៉ាងមានចេតនាច្រើនឡើងដែរ ដូចជា នៅពេលមានអារម្មណ៍ខឹង ឬមានតម្រូវការអ្វីមួយជាដើម។ ប្រព័ន្ធប្រសាទខាងការឮក៏វិវឌ្ឍឡើងច្រើន រហូតចាំសំឡេងរបស់ឪពុកម្តាយបានដែរ។

• គភ៌ខែទី7: ទារកចាប់ផ្តើមចេះបញ្ចេញអារម្មណ៍កូននៅក្នុងផ្ទៃចាប់ផ្តើមបង្ហាញពីតម្រូវការ និងអារម្មណ៍ឆ្លើយតបនឹងម្តាយបានហើយ ដូចជាបើម្តាយញ៉ាំបាយខុសពេលវេលា ឬឮសូរសំឡេងខ្លាំងៗជុំវិញខ្លួនច្រើនពេកនោះ គេនឹងធាក់ពោះម្ដាយ ហើយរើខ្លាំងដើម្បីតវ៉ាម្តាយ។ កូនចាប់ផ្តើមចេះប្រិចភ្នែក និងមើលឃើញហើយ តែបានត្រឹមតែចម្ងាយ 20 – 25សង់ទីម៉ែត្រប៉ុណ្ណោះ(ស្មើនឹងពេលកើតមកភ្លាមៗដែរ)។ អំឡុងពេលនេះ កូនចាប់ផ្តើមចេះនោមហើយ ដោយនោមនៅក្នុងទឹកភ្លោះក្នុងពោះម្ដាយហ្នឹងឯង។

• គភ៌ខែទី8: ទារកចាប់ផ្តើមត្រឡប់ខ្លួនមិនយូរប៉ុន្មានទៀតទេ កូននឹងបើកភ្នែកមើលពិភពលោកហើយ ក្នុងអំឡុងពេលនេះរូបរាងរបស់កូនមានទំហំប៉ុននឹងទារកដែលគ្រប់កំណត់កើតហើយ តែនៅត្រូវការពេលវេលាដើម្បីវិវឌ្ឍថែមបន្តិចទៀត។ រយ:ពេលនេះកូននឹងរំកឹលខ្លួន សណ្តូកដៃ និងជើងទៅប៉ះនឹងសាច់ស្បែកពោះរបស់អ្នកម្តាយ ធ្វើឱ្យមើលឃើញស្នាមទល់ឡើងយ៉ាងច្បាស់។ ស្បែកកូនចាប់ផ្តើមឡើងពណ៌ផ្កាឈូក សក់ក្បាលចាប់ផ្តើមដុះក្រាស់ឡើង ប្រិចភ្នែកកាន់តែញាប់ឡើង និងដល់ពេលត្រឡប់ក្បាលចុះទៅរកមាត់ស្បូនហើយ។

• គភ៌ខែទី9: ទារកត្រៀមខ្លួនចេញមកពិភពខាងក្រៅកូនមានរូបរាងកាយពេញបរិបូរណ៍ហើយ អវយវ:ផ្សេងៗត្រៀមខ្លួននឹងធ្វើការក្រោយពេលប្រសូតរួចជាស្រេច។ កូននឹងជម្រុះរោមខ្ចីៗនៅតាមរាងកាយចេញស្ទើរតែអស់ នៅសល់តែម្តុំស្មា ដៃ ជើង និងស្នាមផ្នត់តាមដងខ្លួនប៉ុណ្ណោះ។ ខែចុងក្រោយនៅក្នុងពិភពដ៏តូចមួយនេះ កូនមានមាឌធាត់មូលក្នុងឥរិយាបថចំកោងខ្លួននៅក្នុងស្បូន ក្បាលត្រឡប់ចុះក្រោមតម្រង់មកមាត់ស្បូន ដើម្បីត្រៀមខ្លួនចេញមកពិភពខាងក្រៅហើយ៕

October 14, 2019

ពិតជាគួរឱ្យសរសើរ !! ក្រោយផ្ទុះប្រតិកម្ម តារាចម្រៀង សោភា ទេពី ព្រមទទួលកំហុស

កាលពីពេលថ្មីៗនេះ បទមរតកដើម “ស្ពានអូតាគី”ជាស្នាដៃនិពន្ធរបស់កវីគង្គ ប៊ុនឈឿន និងបកស្រាយដោយអធិរាជសម្លេងមាស ស៊ិន ស៊ីសាមុត ត្រូវបានយកមកបកស្រាយឡើងវិញ(Cover) ដោយតារាចម្រៀង ញឹមសួន សោភា ទេពី ក្នុងនោះផងដែរបទនេះ ត្រូវបានកែប៉ារ៉ូលខ្លះ និងចង្វាក់ ជាVersionមនុស្សស្រី ដោយបានដាក់ថាបទ “ស្ពានអូតាគី (អូនជាកម្មកររោងចក្រកំសត់)” ហើយបានបង្ហោះចូលក្នុងយូធូបកាលពីថ្ងៃទី០៤ ខែតុលា ឆ្នាំ២០១៩នេះ។

ទាក់ទងនឹងបទនេះដែរ ក្រុមគ្រួសាររបស់កវីស្ទឹងសង្កែ គង្គ ប៊ុនឈឿន តាមរយៈទំព័រហ្វេសបុកឈ្មោះថា “គង្គ ប៊ុនឈឿន Kong Bunchhoeun”កាលពីថ្ងៃទី១៣ ខែតុលានេះ បានបញ្ចេញប្រតិកម្មចំពោះការយកបទនេះកែឡើងវិញយ៉ាងដូច្នេះថា ៖ “បទ ស្ពានអូតាគីស្រីយកមកច្រៀង កែលំនាំខ្លះ បំណងប្រាថ្នារបស់អ្នកនិពន្ធ ដែលខិតខំបញ្ចេញពាក្យពេចន៍ ទំរាំបានទទួលស្នាដៃជិតកន្លះជិវិត ហេតុអីក៏បច្ចុបន្យនេះត្រូវគេរំលាយ ប្ដូរ យកទៅធ្វើទុន យ៉ាងចំអក ដែលបកមកឱ្យម្ចាស់ស្នាដៃវិញ ពួកអ្នកមើលងាយចុះ ព្រោះយាយខ្ញុំគ្មានសម្ថភាពថែររក្សា បទនេះសិទ្ធក៏មានហើយ ៗនឹងគឹតយ៉ាងណា លើកមុនគ្រាន់បានម៉ាផ្លើល រួចក៏ស្ងាត់ហួសទៅដោយមិនបានជួបមុខពួកគាត់ផង តើត្រង់ណា ជាក្តីសង្ឃឹម ? ចង់អង្វរថាជួយផងកុំឲ្យចាស់នេះមិនបានផលហើយអស់លុយចុះឡើងព្រោះតែរក្សាសិទ្ធនេះ សង្ឃឹមលើបងប្អូនគាំទ្រនឹងជួយរក្សា អរគុណរួមទាំងអស់គ្នា ”។ សូមជម្រាបថា ក្រសួងវប្បធម៌ និងវិចិត្រសិល្បៈ កាលពីថ្ងៃទី២៣ កក្កដា បានប្រគល់សិទ្ធគ្រប់គ្រងចម្រៀង ចំនួន១៣បទ ដែលជាស្នាដៃនិពន្ធបទភ្លេង និងទំនុកច្រៀង ដោយកវី គង្គ ប៊ុនឈឿន ទៅឲ្យភរិយារបស់គាត់ គឺលោកស្រី គាត គឹមលន តាមការស្នើសុំ ។

បន្ទាប់ពីឃើញការប្រតិកម្មនៅខាងលើហើយ តារាចម្រៀង សោភា ទេព ម្ចាស់បទ”តើអ្នកណាកែប្រែចិត្តបង” បានចេញបទចម្រៀង”ស្ពានអូតាគី” ជា Version ស្រី ក៏បានឆ្លើយតបនិងសុំទោសថា និងសុំកុំឱ្យគ្រួសារម្ចាស់បទចាប់ទោសអូដដំំណើរ។

កញ្ញា សោភា ទេពី បានថ្លែងបញ្ជាក់ថា ផ្អែកតាមប្រតិកម្មរបស់គ្រួសារលោក គង្គា ប៊ុនឈឿន អត់សប្បាយចិត្តតែការកែពាក្យពាក្យពី” កម្មកររថភ្លើងកម្សត់” ទៅជា”កម្មកររោងចក្រកម្សត់ប៉ុណ្ណោះ ចំណែកការកែប៉ារ៉ូលពីបងមកអូន ក្នុងការ Cover បទ”ស្ពានអូតាគី”នោះ។ កញ្ញាថាហេតុផលនៃការកែប៉ារ៉ូលពីពាក្យរថភ្លើង មកជាពាក្យរោងចក្រនោះ ទងនាង និងអ្នកផលិតបទថ្មី មិនមានបំណងអាក្រក់ទេ គឺគ្រាន់តែចង់អោយបទនោះ មានន័យឆ្លើយតបនឹងបទប្រុស ហើយមកពីនារីកម្រប្រឡូកជាកម្មកររថភ្លើង ទើបប្ដូរជាកម្មកររោងចក្រវិញ ដើម្បីអោយត្រូវនឹងបរិបទបទស្រី។ កញ្ញាថា ការបកស្រាយបទនេះ ជាបទស្រី មានហេតុផលតែមួយគត់ គឺចង់អោយបទនេះ ស្រីអាចច្រៀងបាន ហើយ ក៏ចង់ពញាក់អារម្មណ៍ អោយបន្តគាំទ្របទនេះ កុំអោយបាត់បង់។ កញ្ញាថា នាង និងក្រុមផលិត មិនមានបំណងមាក់ងាយដល់ស្នាដៃរបស់លោក គង្គា ប៊ុនឈឿន ទេ ផ្ទុយទៅវិញ គឺបណ្ដាលមកពីនាងស្រលាញ់បទនេះ ហើយចង់ Cover អោយមានន័យជាបទស្រី ទើបប្ដូរពីពាក្យថា”កម្មកររថភ្លើង” មកជាកម្មកររោងចក្រ”។

សោភា ទេពី ទទូចសុំការយោគយល់ និងសុំទោសដល់គ្រួសារម្ចាស់ស្នាដៃ ដោយនាងបញ្ជាក់ថា ការផ្លាស់ប្ដូរប៉ារ៉ូល ក៏ដើម្បីអោយក្លាយជាបទស្រីអាចបកស្រាយបានប៉ុណ្ណោះ។ ការឆ្លើយតបរបស់នាង គឺបន្ទាប់ពីម្ចាស់អាក់ខោមហ្វេសប៊ុកឈ្មោះថា គង្គ ប៊ុនឈឿន Kong Bunchhoeun បានសរសេរបង្ហោះ កាលពីថ្ងៃទី១៣ ខែតុលានេះថា“បទ បទ ស្ពានអូតាគីស្រីយកមកច្រៀង កែលុំនាុំខ្លះ បំណងប្រាថ្នារបស់អ្នកនិពន្ធ ដែលខិតខំបញ្ចេញពាក្យពេចន៍ ទំរាំបានទទួលស្នាដៃជិតកន្លះជិវិត ហេតុអីក៏បច្ចុបន្យនេះត្រូវគេរំលាយ ប្ដូរ យកទៅធ្វើទុន យ៉ាងចំអក ដែលបកមកឲយម្ចាស់ស្នាដៃវិញ ពួកអ្នកមើលងាយចុះ ព្រោះយាយខ្ញុំគ្មានសម្ថភាពថែររក្សា បទនេះសិទ្ធក៏មានហើយ ៗនឹងគឹតយ៉ាងណា លើកមុនគ្រាន់បានម៉ាផ្លើល រួចក៏ស្ងាត់ហួសទៅដោយមិនបានជួបមុខពួកគាត់ផង តើត្រង់ណាជាក្តីសង្ឃឹម ? ចង់អង្វរថាជួយផងកុំឲយចាស់នេះមិនបានផលហើយអស់លុយចុះឡើងព្រោះតែរក្សាសិទ្ធនេះ សង្ឃឹមលើបងប្អូនគាំទ្រនឹងជួយរក្សា អរគុណ:pray:រួមទាំងអស់គ្នា ”។

https://youtu.be/TXpCipt5tP4

October 14, 2019

8ខែ ដើមឆ្នាំ2019 ទុនវិនិយោគនៅកម្ពុជាមានជាង 6ពាន់លានដុល្លារ

ក្នុងរយៈពេល 8ខែ ដើមឆ្នាំ2019 គម្រោងវិនិយោគនៅកម្ពុជាមានចំនួន 222គម្រោងដែលមានទុនវិនិយោគប្រមាណ 6ពាន់លានដុល្លារ ពោលគឺមានការកើនឡើងចំនួន 81គម្រោង និងមានទុនវិនិយោគប្រមាណ 1.88ពាន់លានដុល្លារ បើប្រៀបធៀបរយៈពេលដូចគ្នានៅឆ្នាំ2018។ នេះបើតាមការលើកឡើងនៅក្នុងសន្និសីទសារព័ត៌មានស្ដីពីសក្តានុពលនៃការវិនិយោគនៅកម្ពុជាដោយលោកអគ្គលេខាធិការងក្រុមប្រឹក្សាអភិវឌ្ឍន៍កម្ពុជានៅទីស្តីការគណៈរដ្ឋមន្ត្រី។

លោក ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជាបានបញ្ជាក់ថា ទន្ទឹមនឹងកំណើនសកម្មភាពវិនិយោគជារួមដែលមានការកើនឡើងជាបន្តបន្ទាប់នេះ គិតចាប់តាំងពីឆ្នាំ2016 រហូតមកដល់ខែសីហា ឆ្នាំ2019 នេះ សកម្មភាពវិនិយោគតាមវិស័យ ដែលលេចធ្លោជាងគេ គឺវិស័យទេសចរណ៍មានប្រមាណជា47% វិស័យហេដ្ឋារចនាសម្ព័ន្ធមាន24% វិស័យឧស្សាហកម្ម និងកម្មន្តសាល មាន23% និងវិស័យកសិ-ឧស្សាហកម្មមានប្រមាណ 6% នៃទំហំវិនិយោគសរុប។

ពោលគឺ ពី1ឆ្នាំទៅ1ឆ្នាំ សកម្មភាពវិនិយោគមានការកើនឡើងជាលំដាប់ រៀងគ្នាទាំងចំនួនគម្រោង ទាំងទុនវិនិយោគ។ ជាក់ស្តែងនៅឆ្នាំ2016 លើគម្រោងវិនិយោគចំនួន 171គម្រោងដែលមានទុនវិនិយោគប្រមាណ 3.6ពាន់លានដុល្លារអាមេរិក។ 183គម្រោងដែលមានទុនវិនិយោគ 6.3 ពាន់លានដុល្លារអាមេរិកនៅឆ្នាំ2017 និង 255គម្រោងដែលមានទុនវិនិយោគ 6.4ពាន់លានដុល្លារអាមេរិកនៅក្នុងឆ្នាំ2018។

លោក ជា វុទ្ធី បានបន្ថែមថា នៅក្នុងរយៈពេលដូចគ្នានេះដែរ សកម្មភាពវិនិយោគនៅតំបន់សេដ្ឋកិច្ចពិសេស ក៏មានការកើនឡើងជាបន្តបន្ទាប់ផងដែរ ដោយក្នុងឆ្នាំ2016 គម្រោងវិនិយោគនៅក្នុងតំបន់សេដ្ឋកិច្ចពិសេសមានចំនួន 42គម្រោង ដែលមានទុនវិនិយោគប្រមាណ 283លានដុល្លារអាមេរិក។ នៅក្នុងឆ្នាំ2017 មាន 47គម្រោង ដែលមានទុនវិនិយោគ 444លានដុល្លារអាមេរិក និងនៅឆ្នាំ2018 មាន 79គម្រោង ដែលមានទុនវិយោគ 552លានដុល្លារអាមេរិក។

គិតត្រឹមខែសីហា ឆ្នាំ2019 នេះ តំបន់សេដ្ឋកិច្ចពិសេស ដែលកំពុងមានប្រតិបត្តិការមានចំនួន23តំបន់ ក្នុងនោះមានគម្រោងវិនិយោគចំនួន 482គម្រោង ដែលមានទុនវិនិយោគប្រមាណ 3.6ពាន់លានដុល្លារអាមេរិក ហើយទំហំនៃការនាំចេញដែលមានប្រភពចេញពីតំបន់សេដ្ឋកិច្ចពិសេសមានប្រមាណ15% នៃទំហំនៃការនាំចេញសរុបរបស់កម្ពុជានៅក្នុងឆ្នាំ2018។

ជាមួយគ្នានេះ ក្នុងរយៈពេល 8ខែ ដើមឆ្នាំ2019 ចំនួនគម្រោងវិនិយោគក្នុងវិស័យឧស្សាហកម្ម និងកម្មន្តសាលមានការកើនឡើងខ្លាំង ខណៈទុនវិនិយោគក្នុងវិស័យទេសចរណ៍មានការកើនឡើងយ៉ាងគំហុក ប្រមាណជាង94% បើធៀបនឹងរយៈពេលដូចគ្នាក្នុងឆ្នាំ2018។ ដោយឡែក តួលេខវិនិយោគក្នុងវិស័យកសិកម្ម និងកសិ-ឧស្សាហកម្ម និងវិស័យហេដ្ឋារចនាសម្ព័ន្ធ និងផ្សេងៗ មានការថយចុះ។

រាជរដ្ឋាភិបាលស្វាគមន៍ចំពោះអ្នកវិនិយោគគ្រប់ជាតិសាសន៍ទាំងអស់ រួមទាំងអ្នកវិនិយោគក្នុងស្រុកផងដែរ។ ច្បាប់វិនិយោគរបស់កម្ពុជា ពុំមានការរើសអើងសម្រាប់ការវិនិយោគនៅកម្ពុជា និងផ្តល់នូវប្រព្រឹត្តកម្មដូចគ្នាទាំងអស់។ កត្តាទាំងនេះហើយដែលបណ្តាលឱ្យកម្ពុជាមានភាពទាក់ទាញ ទទួលបានគម្រោងវិនិយោគមកពីបណ្តាប្រទេសជាច្រើន ក្នុងនោះការវិនិយោគចិនមានភាពលេចធ្លោជាងគេនៅក្នុងរយៈពេល 5ឆ្នាំចុងក្រោយនេះ ជាពិសេសចាប់ពីឆ្នាំ2016 រហូតមកដល់ខែសីហា ឆ្នាំ2019 ដែលការវិនិយោគទាំងនេះពុំផ្តោតតែលើឧស្សាហកម្មកាត់ដេរ ស្បែកជើង និងកាបូបនោះទេ។ នេះបើតាមលោក ជា វុទ្ធី បានបញ្ជាក់។

លោក ជា វុទ្ធី អគ្គលេខាធិការរង CDC បានបញ្ជាក់បន្ថែមថា៖«បើពិនិត្យទៅលើសកម្មភាពវិនិយោគបរទេសតាមប្រទេសនីមួយៗ ចាប់ពីឆ្នាំ2016 ដល់ខែសីហា ឆ្នាំ2019 សកម្មភាពវិនិយោគរបស់អ្នកវិនិយោគផ្ទាល់ពីបរទេស មានការកើនឡើងគួរឱ្យកត់សម្គាល់ ដោយបានចូលរួមចំណែកប្រមាណ 56% នៃទុនវិនិយោគសរុប ក្នុងនោះប្រទេសចិនឈរនៅលំដាប់ទី1 ដែលមានទុនវិនិយោគប្រមាណ 7.9ពាន់លានដុល្លារ ស្មើនឹង 35%នៃទុនវិនិយោគសរុប បន្ទាប់មកគឺប្រទេសជប៉ុន ដែលមានប្រមាណ 8%។ ដោយឡែកទុនវិនិយោគក្នុងស្រុក បានបន្តឈរនៅលំដាប់លេខ1 ដែលមានទុនវិនិយោគប្រមាណ 10ពាន់លានដុល្លារអាមេរិក ស្មើនឹងប្រមាណ 44,7% នៃទុនវិនិយោគសរុប៕

October 14, 2019

រដ្ឋមន្ត្រីៈ ពិព័រណ៍ផលិតផលអាហារជប៉ុន2019 ជាការជំរុញពាណិជ្ជកម្មកម្ពុជា-ជប៉ុន

នៅក្នុងកម្មវិធី បើកពិព័រណ៍ផលិតផលអាហារជប៉ុន2019 កាលពីថ្ងៃទី11 ខែតុលា ឆ្នាំ2019 នៅរាជធានីភ្នំពេញ ឯកឧត្ដមរដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា ពិព័រណ៍ផលិតផលអាហារជប៉ុន គឺជាការជំរុញសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំង2 ហើយការរីកចម្រើនរបស់កម្ពុជាកន្លងទៅ និងនាពេលបច្ចុប្បន្ន មិនអាចកាត់ផ្តាច់ពីការចូលរួមរបស់មិត្តជប៉ុនបានឡើយ។

ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានថ្លែងថា ក្នុងកិច្ចសហប្រតិបត្តិការសេដ្ឋកិច្ចរវាងប្រទេសទាំង2 ទំហំពាណិជ្ជកម្មទ្វេភាគីរវាងកម្ពុជា និងជប៉ុននៅឆ្នាំ2018 មានទំហំទឹកប្រាក់ប្រមាណជាង 1,588លានដុល្លារអាមេរិក ក្នុងនោះការនាំចេញពីកម្ពុជាទៅជប៉ុន មានទំហំទឹកប្រាក់ប្រមាណ 1,079លានដុល្លារអាមេរិក និងការនាំចូលពីជប៉ុនមកកម្ពុជា គិតជាទំហំទឹកប្រាក់មានប្រមាណ 509លានដុល្លារ អាមេរិក។

ឯកឧត្ដមរដ្ឋមន្ត្រីបានថ្លែងអំណរគុណចំពោះរដ្ឋាភិបាល និងប្រជាជនជប៉ុន ដែលបានចូលរួមចំណែកយ៉ាងសំខាន់ ក្នុងដំណើរស្វែងរកសន្តិភាព ឯកភាពជាតិ ព្រមទាំងការស្តារ និងអភិវឌ្ឍន៍សេដ្ឋកិច្ចកម្ពុជាឱ្យរីកចម្រើនរហូតមកដល់សព្វថ្ងៃនេះតាមរយៈការផ្តល់ហិរញ្ញប្បទានសហប្រតិបត្តិការ ការកសាងហេដ្ឋារចនាសម្ព័ន្ធ ជំនួយបច្ចេកទេសនានា និងការអភិវឌ្ឍធនធានមនុស្ស ព្រមទាំងការវិនិយោគរបស់វិស័យឯកជនជប៉ុននៅកម្ពុជាផងដែរ។

ឯកឧត្ដមរដ្ឋមន្ត្រី បន្តទៀតថា ដើម្បីដោះស្រាយបញ្ហាជូនអ្នកវិនិយោគនៅកម្ពុជា កាលពីថ្ងៃទី5 ខែកញ្ញា 2019 ក្រសួងពាណិជ្ជកម្មកម្ពុជាបានចុះអនុស្សរណៈយោគយល់គ្នាជាមួយអង្គការពាណិជ្ជកម្មក្រៅស្រុកជប៉ុន (JETRO) ក្នុងគោលបំណងបង្កើតក្របខ័ណ្ឌនៃកិច្ចសហប្រតិបត្តិការ ក្នុងការជំរុញពាណិជ្ជកម្មរវាងភាគីទាំង2 (កម្ពុជា-ជប៉ុន) ដូចជាៈ 1- ពង្រឹងទំនាក់ទំនងសេដ្ឋកិច្ចរវាងកម្ពុជា និងជប៉ុនក្នុងវិស័យពាណិជ្ជកម្មឱ្យកាន់តែរីកចម្រើនបន្ថែមទៀត និង2- លើកកម្ពស់បរិយាកាសវិនិយោគ ដើម្បីលើកទឹកចិត្តក្រុមហ៊ុនឯកជនជប៉ុនឱ្យធ្វើអាជីវកម្មនៅកម្ពុជា។

ឯកឧត្ដមរដ្ឋមន្ត្រី បានកត់សម្គាល់ថា វិនិយោគដោយផ្ទាល់ពីប្រទេសជប៉ុនក៏មានការរីកចម្រើនផងដែរ ដោយគិតពីឆ្នាំ1994 រហូតដល់ត្រីមាសទី1 ឆ្នាំ2019 មានគម្រោងវិនិយោគរបស់ក្រុមហ៊ុនជប៉ុនចំនួន 137គម្រោង ក្នុងទុនវិនិយោគសរុបចំនួនប្រមាណ 2.5ពាន់លានដុល្លារអាមេរិក ដែលផ្ដោតសំខាន់លើផ្នែកផលិតគ្រឿងផ្គុំ អគ្គិសនី និងអេឡិចត្រូនិក គ្រឿងផ្គុំរថយន្ត និងសម្ភារបរិក្ខារបច្ចេកទេស កសិ-ឧស្សាហកម្ម ការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។

ជាមួយនោះដែរ ឯកឧត្ដមក៏បានលើកទឹកចិត្តឱ្យក្រុមហ៊ុនជប៉ុន វិនិយោគបន្ថែមកាន់តែច្រើនទៀតលើគ្រប់វិស័យ ជាពិសេសការកែច្នៃម្ហូបអាហារដែលប្រើប្រាស់វត្ថុធាតុដើមក្នុងស្រុក អេកូទេស ចរណ៍ ឧស្សាហកម្ម តភ្ជាប់ខ្សែចង្វាក់ផលិតកម្មក្នុងស្រុក និងក្នុងតំបន់ និងមជ្ឈមណ្ឌលបណ្ដុះបណ្ដាលធនធានមនុស្សសម្រាប់វិស័យឧស្សាហកម្ម ជាដើម។

ក្រោមកិច្ចសហប្រតិបត្តិការនេះ ឯកឧត្ដមសង្ឃឹមថា សកម្មភាពធុរកិច្ច និងវិនិយោគរបស់ក្រុមហ៊ុនជប៉ុននៅកម្ពុជានឹងបន្តរីកចម្រើនបន្ថែមទៀត ដើម្បីផ្ដល់តម្លៃបន្ថែម និងផ្ដល់បរិស្ថានការងារ និងបរិស្ថានរស់នៅល្អប្រសើរជូនដល់កម្មករ និយោជិតកម្ពុជា ដែលស្របទៅនឹងចក្ខុវិស័យរបស់រាជរដ្ឋាភិបាលក្នុងការផ្ដល់ឱកាសការងារសមរម្យ ការរក្សាកំណើនសេដ្ឋកិច្ច និងការធ្វើពិពិធកម្មមូលដ្ឋានឧស្សាហកម្មកម្ពុជា៕

October 14, 2019

តម្លៃភាគហ៊ុនក្រុមហ៊ុន Apple ឡើងខ្ពស់ វ៉ាដាច់ឆ្នាំមុនៗ ក្រោយប្រកាសចេញ iPhone 11

តម្លៃភាគហ៊ុនរបស់ក្រុមហ៊ុន Apple ថ្មីៗនេះបានហក់ដល់ចំណុចខ្ពស់បំផុតមួយដែលមិនធ្លាប់មានក្នុងប្រវត្តិសាស្ត្រ។

បើធៀបនឹងតម្លៃភាគហ៊ុននៃខែចាស់ គឺមានការកើនឡើងប្រមាណ 10ភាគរយ ដោយនេះទទួលបានពីការលក់ចេញ iPhone 11 និង iPhone 11 Pro ដែលទទួលបានផ្លែផ្កាហួសពីការរំពឹងទុកនៅក្នុងទីផ្សារយក្សធំៗចំនួន 3 មានសហរដ្ឋអាមេរិក ចិន និងឥណ្ឌា។

ភាគហ៊ុន Apple ឡើងថ្លៃដល់ 237.33ដុល្លារ បើធៀបនឹងកំណត់ត្រាចាស់កាលពីខែតុលា ឆ្នាំ2018 ធ្លាប់ឡើងត្រឹម 233.47ដុល្លារតែប៉ុណ្ណោះ។ នេះបើតាមរបាយការណ៍ពី CNBC បានធ្វើការកត់សម្គាល់។ ក្រុមហ៊ុន Apple ក៏ត្រៀមនឹងប្រកាសរបាយការណ៍ចំណូលប្រចាំត្រីមាសទី4 របស់ខ្លួននៅថ្ងៃទី30តុលា ខាងមុខនេះផងដែរ៕

October 14, 2019

Category: សង្គម និងសេដ្ឋកិច្ច