សង្គម និងសេដ្ឋកិច្ច - La Reine Media

តារាសម្ដែងប្រុសស្រីក្នុងរឿង « ណូលីណូឡា » មានមោទនភាពក្រោយត្រឡប់មកពីប្រទេសចិន

គេបានឃើញថា តារាប្រុសសម្ដែងនៅក្នុងរឿង « ណូលីណូឡា » របស់ផលិតកម្មមហាហង្សមានដូចជា អ្នកនាង ភិន សុដាលីស លោក ភឹម តារាវិបុល និងចាងហ្វាងផលិតកម្មផ្ទាល់ លោក អ៊ិន សុភិន ទើបត្រឡប់មកពីមហោស្រពភាពយន្ដ Silk Road Film Festival នៅខេត្តសៀងមិញ ប្រទេសចិន ក្នុងរាត្រីថ្ងៃទី ២១ ខែតុលា ឆ្នាំ ២០១៩ ។

ជំនួបជាមួយអ្នកសារព័ត៌មានឡារ៉ែន តារាឯកប្រុស ភឹម តារាវិបុល បានប្រាប់ពីបទពិសោធន៍ទៅកាន់ប្រទេសចិនជាលើកដំបូងក្នុងការចូលរួមមហោស្រពថា គណៈរៀបចំកម្មមហោស្រពនៅប្រទេសចិន មានការយកចិត្តទុកដាក់ខ្លាំងចំពោះគណៈប្រតិភូដែលអញ្ចើញទៅពីគ្រប់បណ្ដាលប្រទេស។ ជាក់ស្ដែងខាងចិនមានអ្នកបកប្រែភាសាចិន ដើរតាមយើងជាប់ជានិច្ច ព្រោះដោយហេតុតែ នៅប្រទេសចិនមិននិយមនិយាយភាសាបរទេសក្រៅពីភាសាជាតិ។ លោកបន្តថា ពេលទៅដល់ទីនោះភ្លាមគឺពិបាកក្នុងការទំនាក់ទំនាក់មកបងប្អូននៅកម្ពុជាណាស់ ព្រោះការប្រើប្រាស់អ៊ិនធើណេតដោយសេរីត្រូវបានបិទ លុះត្រាតែប្រើស៊ីមកាតរបស់ចិន ទើបធ្វើឱ្យលោកមិនសូវបានប្រើងហ្វេសប៊ុកក្នុងការទាក់ទង។

លោក ភឹម តារាវិបុល ពោលថា នៅចិនប្រតិភូពីកម្ពុជា ទទួលបានការស្វាគមន៍ដូចថ្នាក់ដឹកនាំប្រទេសមួយរូប ហើយលោកសប្បាយចិត្តយ៉ាងខ្លាំង បើទោះជាមិនមានសេរីភាពក្នុងការដើរកម្សាន្ត។ ក្នុងនោះលោកក៏មិនអន់ចិត្តដែរ ដែលភាពយន្តរឿង”ណូលីណូឡា” មិនទទួលបានពាន ឬ រង្វាន់ណាមួយ ដោយលោកមានតែមោទនភាព ដែលភាពយន្តនេះ ត្រូវបានពិភពលោកដាក់បង្ហាញក្នុងចំណោមភាពយន្តល្បីៗមកពីទូទាំងពិភពលោក។ លោកបញ្ជាក់ថា ថ្វីបើមិនជាប់លេខ តែភាពយន្តរបស់កម្ពុជាមួយនេះ ក៍មានផលិតករច្រើនប្រទេសចាប់អារម្មណ៍ និងទទួលស្គាល់ ជាពិសេសផលិតករចិន ដោយក្នុងមួយថ្ងៃ លោក និងប្រតិភូមហាហង្ស ត្រូវសារព័ត៌មានចិនសុំសម្ភាសន៍ហើយផ្សាយក្នុងស្ថាប័នព័ត៌មានចិនធំៗគួរជាទីមោទនៈ៕

October 22, 2019

ADB ផ្តល់ហិរញ្ញប្បទានជួយកម្ពុជាពង្រីកការផ្គត់ផ្គង់ទឹកស្អាត និងអនាម័យ

ធនាគារអភិវឌ្ឍន៍អាស៊ី (ADB) បានយល់ព្រមផ្តល់ហិរញ្ញប្បទានចំនួន 49លានដុល្លារដើម្បី ជួយរដ្ឋាភិបាលកម្ពុជាឱ្យសម្រេចបាននូវគោលដៅឆ្នាំ2025 របស់ខ្លួនក្នុងការផ្តល់ការផ្គត់ផ្គង់ជាសកលនូវសេវាទឹកស្អាត និងអនាម័យនៅតាមតំបន់ជនបទនៃប្រទេសកម្ពុជា។

កម្មវិធីអភិវឌ្ឍន៍វិស័យផ្គត់ផ្គង់ទឹកស្អាត និងអនាម័យជនបទទី3 នឹងផ្តល់អត្ថប្រយោជន៍ដល់ ប្រជាជនជាង 400,000នាក់ ដោយសាងសង់ ឬស្តារកន្លែងផ្គត់ផ្គង់ទឹកជនបទចំនួន 2500កន្លែងនៅក្នុងភូមិយ៉ាងតិច 400ភូមិនៅទូទាំងខេត្តចំនួន10 របស់ប្រទេសកម្ពុជា។ វាក៏នឹងគាំទ្រដល់ការសាងសង់បង្គន់ថ្មីសម្រាប់គ្រួសារនីមួយៗ និងសាងសង់បង្គន់សាធារណៈនៅតាមសាលារៀន និងមណ្ឌលសុខភាព ព្រមទាំងធ្វើយុទ្ធនាការផ្សព្វផ្សាយអំពីអនាម័យផងដែរ។

សេវាផ្គត់ផ្គង់ទឹកស្អាត និងអនាម័យប្រកបដោយចីរភាព និងគួរឱ្យទុកចិត្តនៅតែមានតិចតួចនៅឡើយនៅតំបន់ជនបទនៃប្រទេសកម្ពុជាដែលមានប្រមាណ77% នៃប្រជាជនសរុប 16.4លាននាក់រស់នៅក្នុងប្រទេស។ ក្នុងឆ្នាំ2017 ខណៈដែល73% នៃគ្រួសារនៅតាមទីជនបទទទួលបានការផ្គត់ផ្គង់ទឹកមានភាពប្រសើរឡើងមានតែ 11% ប៉ុណ្ណោះដែលបានផ្គត់ផ្គង់ទឹកស្អាតតាមបំពង់។

ទន្ទឹមនឹងនេះដែរប្រជាជននៅតាមជនបទ 56%បានទទួលបានអនាម័យល្អប្រសើរ ហើយ ប្រហែល 41%នៃប្រជាជននៅតាមជនបទ នៅតែអនុវត្តការបន្ទោបង់ចំហដែលអាចបណ្តាលឱ្យកើតជំងឺរាក និងបញ្ហាសុខភាពសាធារណៈផ្សេងទៀត។

អ្នកជំនាញការអភិវឌ្ឍន៍ទីក្រុងរបស់ ADB ប្រចាំតំបន់អាស៊ីអាគ្នេយ៍លោកស្រី ស៊ីទី ហាសាណា (Siti Hasanah) មានប្រសាសន៍ថា៖“ការទទួលបានសេវាកម្មមូលដ្ឋាន ដូចជាការផ្គត់ផ្គង់ទឹកស្អាត និងអនាម័យ គឺជាសិទ្ធិជាមូលដ្ឋានរបស់មនុស្ស និងជាកត្តាសំខាន់សម្រាប់ការអភិវឌ្ឍដែលមានបរិយាប័ន្ន និងនិរន្តរភាពនៅក្នុងប្រទេសណាមួយ”។

លោកស្រីបានបន្តថា៖“ធនាគារអភិវឌ្ឍន៍អាស៊ី គាំទ្រគោលដៅរបស់រដ្ឋាភិបាលកម្ពុជាក្នុងការផ្តល់នូវការផ្គត់ផ្គង់ទឹកស្អាត និងអនាម័យដែលអាចទុកចិត្តបានសម្រាប់ប្រជាជនកម្ពុជាទាំងអស់ ក្នុងរយៈពេល 5ឆ្នាំខាងមុខ ជាពិសេសប្រជាជនដែលរស់នៅតាមទីជនបទ រួមជាមួយការខិតខំរបស់រដ្ឋាភិបាលក្នុងការលើកកម្ពស់ការយល់ដឹងអំពីអនាម័យ”។

ធនាគារអភិវឌ្ឍន៍អាស៊ី គឺជាអ្នកចូលរួមធំជាងគេក្នុងការអភិវឌ្ឍហេដ្ឋារចនាសម្ព័ន្ធក្នុងវិស័យផ្គត់ផ្គង់ទឹកស្អាត និងអនាម័យនៅកម្ពុជា ដោយផ្តល់ប្រហែល25%នៃជំនួយខាងក្រៅសរុបសម្រាប់សេវាផ្គត់ផ្គង់ទឹកស្អាត និងអនាម័យរបស់ប្រទេសរួមមានទាំងទីក្រុង និងជនបទ។

ចាប់តាំងពីឆ្នាំ2005 ប្រជាជនចំនួន 1លាននាក់បានទទួលអត្ថប្រយោជន៍ពីការទទួលបាន ការផ្គត់ផ្គង់ទឹកស្អាត និងប្រជាជនចំនួន 500,000នាក់បានទទួលសេវាអនាម័យប្រសើរជាងមុនក្រោមគម្រោងផ្គត់ផ្គង់ទឹកស្អាត និងអនាម័យដែលគាំទ្រគម្រោងចំនួន3 ដោយធនាគារអភិវឌ្ឍន៍អាស៊ី នៅក្នុងតំបន់បឹងទន្លេសាប។

កម្មវិធីអភិវឌ្ឍន៍របស់ ADB ដែលត្រូវបានអនុម័តថ្មី រួមមានប្រាក់កម្ចីផ្អែកលើគោលនយោបាយ 15លានដុល្លារ កម្ចីឥណទានគម្រោង 29.61លានដុល្លារនិងជំនួយ 4.39លានដុល្លារពីមូលនិធិអភិវឌ្ឍន៍អាស៊ី។

ប្រាក់កម្ចីផ្អែកលើគោលការណ៍នេះនឹងផ្តល់ការគាំទ្រផ្នែកគោលនយោបាយដើម្បីកែលម្អ ប្រព័ន្ធផ្គត់ផ្គង់ទឹកស្អាត និងប្រព័ន្ធរៀបចំផែនការអនាម័យតាមជនបទ ព្រមជាមួយនឹងការផ្តល់សេវាកម្ម ឃ្លាំងស្តុក និងប្រព័ន្ធគ្រប់គ្រង និងការចូលរួមរបស់វិស័យឯកជន។

ADB ក៏នឹងផ្តល់ហិរញ្ញប្បទានចំនួន 1លានដុល្លារពីមូលនិធិបច្ចេកវិទ្យាកម្រិតខ្ពស់ The High Level Technology Fund (HLTF) ដែលហិរញ្ញប្បទាននេះផ្តល់ដោយរដ្ឋាភិបាលជប៉ុន ដែលនឹងជួយសាកល្បងគម្រោងដំឡើងអង្គភាពផលិតទឹកពីខ្យល់ទៅក្នុងទីតាំងចំនួន 7 ដោយមានកម្រិតទទួលបានទឹកស្អាតដែលមានសុវត្ថិភាព ជាពិសេសក្នុងរដូវប្រាំង។

សូមបញ្ជាក់ថា ប្រទេសកម្ពុជាបានអភិវឌ្ឍពីប្រទេសក្រីក្រមួយក្នុងចំណោមប្រទេសក្រីក្របំផុតនៅអាស៊ី ទៅជាប្រទេសដែលមានសេដ្ឋកិច្ចលូតលាស់លឿនបំផុត ហើយប្រទេសនេះមានការរីកចម្រើនគួរឱ្យកត់សម្គាល់នៅក្នុងវិស័យអភិវឌ្ឍន៍ធនធានមនុស្ស ហើយធនាគារអភិវឌ្ឍន៍អាស៊ីក៏បានស្ថិតនៅជាមួយគ្រប់ជំហាន។

នេះគឺកិច្ចការងារបានសម្រេចមួយផ្នែកធំ ដោយសារតែរដ្ឋាករទឹកស្វយ័តក្រុងភ្នំពេញដែលត្រូវបានពង្រឹងជាផ្នែកមួយនៃគម្រោងផ្គត់ផ្គង់ទឹកស្អាត និងប្រព័ន្ធបង្ហូរទឹកស្អាតនៅភ្នំពេញដែលឧបត្ថម្ភដោយធនាគារអភិវឌ្ឍន៍អាស៊ី។ នៅពេលបញ្ចប់គម្រោងក្នុងឆ្នាំ2003 គម្រោងនេះមានចំនួនប្រជាជនដែលមានទឹកស្អាតប្រើប្រាស់ក្នុងទីក្រុងបានកើនឡើងទ្វេដងដល់ជិត 1លាននាក់ ដែលស្ទើរតែទាំងអស់នៃប្រជាជនភាគច្រើននៃទីក្រុងទាំងមូល។

ការជួយសម្អាតអនាម័យ ការផ្គត់ផ្គង់ទឹកស្អាតនៅរាជធានីភ្នំពេញ គឺជាផ្នែកមួយនៃគំនូសពណ៌នៃប្រវត្តិសាស្ត្រភាពជាដៃគូរវាងធនាគារអភិវឌ្ឍន៍អាស៊ី និងប្រទេសកម្ពុជា។

ធនាគារអភិវឌ្ឍន៍អាស៊ីប្តេជ្ញាថា នឹងសម្រេចឱ្យបាននូវវិបុលភាព រាប់បញ្ចូលទាំងភាពធន់ និងនិរន្តរភាពតំបន់អាស៊ី និងប៉ាស៊ីហ្វិក ស្របពេលដែលការខិតខំប្រឹងប្រែងរបស់ខ្លួនដើម្បីលុបបំបាត់ភាពក្រីក្រត្រូវបានធ្វើឡើង។ នៅឆ្នាំ2018 ធនាគារនេះបានប្តេជ្ញាចិត្តលើប្រាក់កម្ចីថ្មី និងជំនួយឥតសំណងមានចំនួន 21.6ពាន់លានដុល្លារ។

គួររំឭកដែរថា ធនាគារ ADBបង្កើតឡើងក្នុងឆ្នាំ1966 ធនាគារនេះគ្រប់គ្រងដោយសមាជិកចំនួន 68ប្រទេស ពោលគឺមាន 49ប្រទេសមកពីតំបន់អាស៊ី និងប៉ាស៊ីហ្វិក ហើយប្រទេសកម្ពុជាបានក្លាយជាសមាជិកស្ថាបនិករបស់ធនាគារអភិវឌ្ឍន៍អាស៊ីនៅឆ្នាំដដែលនោះដែរ៕

October 21, 2019

អ្នកធ្វើការងារ ឬអ្នកសិក្សាគួរផ្តោតលើគុណភាពជាជាងបរិមាណ…

មិនថាការសិក្សា ការធ្វើការងារ ឬការប្រកបអាជីវកម្មនោះទេ អ្វីដែលគ្រប់គ្នាគួរផ្តោតនោះគឺ គុណភាពនៃចំណេះដឹងដើម្បីសម្រួច ឬបង្កើតភាពផ្តោតជំរុញឱ្យអ្វីដែលខ្លួនកំពុងធ្វើនោះទទួលបានជោគជ័យ។ មានតែបរិមាណ ហើយគ្មានគុណភាព មិនត្រឹមតែមិនធ្វើឱ្យមនុស្សទទួលបានលទ្ធផលវិជ្ជមាននោះទេ តែពេលខ្លះវាក៏អាចធ្វើឱ្យយើងខាតបង់ពេលវេលាជាមួយនឹងភាពមិនច្បាស់លាស់ ឬខំច្រើន តែបានផលប្រយោជន៍តិច។

លោក គីម ដារ៉ា ស្ថាបនិកគ្រឹះស្ថានអប់រំ Start Up Cambodia បានលើកឡើងថា ដើម្បីរៀនឱ្យចេះ ត្រូវរៀនឱ្យបានច្រើន តែបើចង់ចេះច្បាស់ កុំគ្រាន់តែរៀនច្រើនពេក តែត្រូវអនុវត្តឱ្យបានច្រើន។ បុគ្គលដែលជោគជ័យភាគច្រើន មិនមែនជាអ្នកចេះច្រើននោះទេ តែជាអ្នកចេះច្បាស់។ មនុស្សមិនតិចទេដែលខំរៀនឱ្យបានតែបរិមាណ តែគ្មានគុណភាព ហើយនឹកឆ្ងល់ថា ហេតុអ្វីបានខ្លួនមិនអាចសម្រេចកិច្ចការងារធំៗបាន?។ ខណៈអ្នកខ្លះទៀតឆាប់ធុញទ្រាន់នឹងការងារដដែលៗ ទោះបីជាខ្លួននៅមិនទាន់ចេះច្បាស់ក៏ដោយ ដែលជាហេតុធ្វើឱ្យគាត់មិនអាចមានជំនាញណាមួយច្បាស់លាស់។

លោក គីម ដារ៉ា បាននិយាយថា៖ “អ្នកចេះច្បាស់ គេច្រើនតែហៅថា ជាបុគ្គលដែលមានវិជ្ជាវៈច្បាស់ លាស់ មិនមែនជាអ្នកដែលមានវិជ្ជាជីវៈច្រើននោះទេ”។

បើតាមស្ថាបនិកស្ថាប័នអប់រំខាងលើ ការចេះច្រើនជារឿងល្អ ប្រសិនបើអ្វីដែលយើងចេះនោះសុទ្ធតែចេះស្ទាត់ និងអាចក្លាយជាជំនាញច្បាស់លាស់មួយ មិនមែនចេះច្បោលៗគ្រប់មុខនោះទេ។ ការគ្រាន់តែចេះច្រើនច្បោលៗ នឹងធ្វើឱ្យយើងបាត់បង់អត្តសញ្ញាណដែលជាចំណុចគោលក្នុងការអភិវឌ្ឍសមត្ថភាពឆ្ពោះទៅរកចំណុចសំខាន់នៃភាពរីកចម្រើនក្នុងជីវិត។ អ្វីដែលជាចំណុចប្រឈម ឬចន្លោះប្រហោងរបស់យុវវ័យបច្ចុប្បន្ន គឺខំច្រើន តែមិនផ្តោត។

ទាំងការធ្វើការងារ ឬការសិក្សាក៏ដោយ គាត់ចូលចិត្តស្វែងយល់ក្នុងរយៈពេលខ្លី បន្ទាប់មកក៏លោតទៅរកអ្វីដែលថ្មី ទាំងគាត់មិនទាន់មានគ្រឹះរឹងមាំលើមុខវិជ្ជាចាស់របស់គាត់នៅឡើយ។ ការធ្វើបែបនេះ នឹងធ្វើឱ្យយើងខាតបង់ពេលវេលាច្រើនក្នុងការអភិវឌ្ឍខ្លួនឯង ព្រោះការបង្កើតជំនាញច្បាស់លាស់មួយត្រូវការការធ្វើដដែលៗ និងស្វែងយល់ឱ្យបានច្បាស់លាស់ ស៊ីជម្រៅទើបអាចធ្វើទៅបាន។ ហេតុនេះវាត្រូវការការផ្តោត និងអំណត់ក្នុងពេលវេលាសមរម្យមួយ មុននឹងឈានជើងទៅចាប់អ្វីថ្មីៗសម្រាប់បន្តអភិវឌ្ឍន៍ ឬគាំទ្រដល់ការអភិវឌ្ឍជំនាញគ្រឹះដែលយើងមាននេះ។

យុវសិស្ស ឌួង សុនីតា សិស្សពូកែនិទ្ទេស A ឆ្នាំសិក្សា 2018-2019 នេះបានលើកឡើងថា ការកំណត់គោលដៅច្បាស់លាស់ និងផ្តោតសំខាន់លើអ្វីដែលយើងកំពុងធ្វើដ៏មុតស្រួច ជាវិធីសាស្ត្រសំខាន់ក្នុងការទទួលបានជោគជ័យលើការសិក្សា។ ដើម្បីទទួលបាននិទ្ទេសល្អ និងជោគជ័យកាន់តែខ្លាំង អ្នកសិក្សាគួរប្រឹងប្រែងអភិវឌ្ឍខ្លួនឱ្យបានល្អ ដោយភាពច្បាស់លាស់។ ការបែងចែកពីចំណុចសំខាន់នៃមេរៀន និងចំណុចអាទិភាពឱ្យបានច្បាស់លាស់ ជាគន្លឹះយ៉ាងសំខាន់មួយដែលអាចធ្វើឱ្យយើងទទួលបាននូវនិទ្ទេសល្អ។ មានសិស្សជាច្រើនមិនចេះបែងចែកចំណុចដែលត្រូវផ្តោត បន្ទាប់មកធ្វើឱ្យខ្លួនឯងច្របូកច្របល់ ដែលធ្វើឱ្យពួកគេខិតខំប្រឹងប្រែងច្រើនប៉ុនណាក៏មិនអាចទទួលបានលទ្ធផលល្អដែរ។

យុវសិស្ស ឌួង សុនីតា បាននិយាយថា៖ “ដើម្បីធ្វើឱ្យការរៀនមុខវិជ្ជានីមួយៗទទួលបានលទ្ធផលល្អ អ្វីដែលយើងត្រូវធ្វើគឺ អនុវត្តវាឱ្យបានជាប់ជាប្រចាំ។

ដើម្បីរៀនឱ្យទទួលបានលទ្ធផលល្អ មិនបាច់បង្ខំពេកនោះទេ តែត្រូវការការផ្តោត និងការធ្វើឱ្យបានយូរអង្វែងបន្តិចម្តងៗដោយភាពច្បាស់លាស់”។

សិស្សពូកែនិទ្ទេស A ខាងលើបានបញ្ជាក់ផងដែរថា ការសិក្សាដោយមិនមានចំណុចផ្តោតច្បាស់លាស់ នឹងធ្វើឱ្យគេមើលទៅចេះគ្រប់មុខ តែស្ថានភាពជាក់ស្តែង គេមានចំណុចខ្វះខាតគ្រប់មុខវិជ្ជាទាំងអស់។ ពេលខ្លះដោយសារតែភាពច្របូកច្របល់ ពេលប្រឡងជាក់ស្តែង គេអាចរកនឹកមិនឃើញពីចំណុចដែលខ្លួនឯងធ្លាប់ចេះក៏មានដែរ។ ហេតុនេះ អ្វីដែលអាចធ្វើបាន គឺកុំមើលងាយស្ថានការណ៍ ប្រសិនបើដាក់ចិត្តថាខិតខំប្រឹងប្រែង គឺធ្វើដោយយកចិត្តទុកដាក់ ហើយកុំមើលងាយផ្នែកណាមួយក្នុងមុខវិជ្ជានោះ បើទោះបីវាជាចំណុចតូចមួយក៏ដោយ ព្រោះមនុស្សច្រើនណាស់ដែលជួបការសោកស្តាយដោយសារតែមិនអាចធ្វើលំហាត់តូចៗទាំងអស់នោះបាន ដោយសារតែគិតថាខ្លួនចេះហើយមុនពេលប្រឡង៕

October 21, 2019

វិធីការពារកូនតូចឱ្យចៀសឆ្ងាយពីរោគគ្រុនផ្ដាសាយ រោគល្បីល្បាញប្រចាំរដូវភ្លៀង

នៅពេលនេះគឺជាចុងរដូវភ្លៀង ធាតុអាកាសក៏នៅតែបន្តប្រែប្រួលមិនទៀង ធ្វើឱ្យលោកឪពុកអ្នកម្ដាយចាប់ផ្ដើមមានកង្វល់ពាក់ព័ន្ធនឹងសុខភាពរបស់កូនតូច រួមទាំងជំងឺផ្សេងទៀតផង ហើយជំងឺដ៏ល្បីល្បាញប្រចាំរដូវភ្លៀង ក៏ប្រហែលជាគេចមិនផុតពី “ជំងឺគ្រុនផ្ដាសាយ” យ៉ាងពិតប្រាកដ។ លោកឪពុកអ្នកម្ដាយទាំងឡាយធ្លាប់នឹកឆ្ងល់ខ្លះទេថា ហេតុអីបានជាកូនក្មេងតូចៗងាយកើតជំងឺគ្រុនផ្ដាសាយម្លេ៉ះ?ហើយបើកើតហើយ តើត្រូវធ្វើយ៉ាងណាស្រួល?…កុំអាលភ័យបារម្ភអី… មុនអ្វីទាំងអស់ យើងនាំគ្នាមកមើលពីមូលហេតុទាំងអស់គ្នាសិនថា ហេតុអីបានកូនតូចងាយកើតជំងឺគ្រុនផ្ដាសាយក្នុងរដូវភ្លៀងម្ល៉េះ?

មូលហេតុចម្បងៗដែលធ្វើឱ្យកូនតូចកើតរោគគ្រុនផ្ដាសាយក្នុងអំឡុងរដូវភ្លៀងជំងឺគ្រុនផ្ដាសាយ ភាគច្រើនមានមូលហេតុមកពីការឆ្លងមេរោគវីរុស ដែលអាចសាយភាយ និងចម្លងទៅមនុស្សជុំវិញខ្លួនដោយឆ្លងកាត់ប្រព័ន្ធដកដង្ហើម ការកណ្ដាស់ ការក្អក សំបោរ ទឹកមាត់ ការប៉ះពាល់វត្ថុដែលមានមេរោគគ្រុនផ្ដាសាយ។ ច្រើនប្រទះឃើញនៅលើក្មេងដែលមានប្រព័ន្ធប្រឆាំងជំងឺខ្សោយ ជាពិសេសក្មេងអាយុតិចជាង6ឆ្នាំ ហើយរឹតតែជាទារកផង រឹតតែកើតការឆ្លងបានងាយទៅទៀត ហើយថែមទាំងក្នុងអំឡុងរដូវភ្លៀង អាកាសធាតុប្រែប្រួលញឹកញាប់ បន្តិចក្ដៅ បន្តិចត្រជាក់ផងនោះ រឹតតែធ្វើឱ្យក្មេងៗកើតជំងឺគ្រុនផ្ដាសាយបានយ៉ាងងាយទៅតាមហ្នឹងដែរ..តែលោកឪពុកអ្នកម្ដាយកុំអាលទៅកង្វល់ព្រួយធ្វើអ្វី ព្រោះថា យើងអាចការពារជំងឺគ្រុនផ្ដាសាយឱ្យកូនៗបាន តាមចំណុចៗដូចខាងក្រោមនេះ :

វិធីការពារកូនតូចឱ្យចៀសឆ្ងាយពីជំងឺគ្រុនផ្ដាសាយក្នុងអំឡុងរដូវភ្លៀង មិនពិបាកឡើយ ចូរធ្វើតាមដូចតទៅនេះ ៖
– នាំកូនៗហាត់ប្រាណ ឬកម្រើកដៃជើង ធ្វើចលនារាងកាយឱ្យបានជាប់ជាប្រចាំ ដើម្បីសាងភាពកក់ក្ដៅដល់រាងកាយ ធ្វើឱ្យមានប្រព័ន្ធប្រឆាំងជំងឺដែលរឹតតែល្អឡើង។
– ទទួលទានអាហារឱ្យបានគ្រប់5ប្រភេទក្រុម ដោយសង្កត់ធ្ងន់លើការញ៉ាំបន្លែ និងផ្លែឈើឱ្យបានច្រើន ជាពិសេសផ្លែឈើដែលមានវីតាមីន C ខ្ពស់ ដើម្បីឱ្យកូនមានប្រព័ន្ធប្រឆាំងជំងឺខ្លាំងក្នុងការតតាំងនឹងជំងឺគ្រុនផ្ដាសាយ។– ចំពោះទារក គួរឱ្យបៅទឹកដោះម្ដាយ ព្រោះទឹកដោះម្ដាយមានប្រព័ន្ធប្រឆាំងជំងឺដ៏ល្អ។
– សម្រាកឱ្យបានគ្រប់គ្រាន់។ លោកឪពុកអ្នកម្ដាយត្រូវនាំកូនចូលគេងឱ្យបានទៀងពេល និងគេងឱ្យបានគ្រប់គ្រាន់តាមវ័យ។
– អំឡុងពេលដែលអាកាសធាតុប្រែប្រួលញឹកញាប់ មានភ្លៀងធ្លាក់ស្ទើរតែរាល់ថ្ងៃ គួរចៀសវាងការនាំកូនចេញទៅក្រៅផ្ទះ ព្រោះបើកូនត្រូវលម្អងទឹកភ្លៀង ក៏អាចធ្វើឱ្យកូនកើតជំងឺគ្រុនផ្ដាសាយបានដូចគ្នាដែរ និងកុំភ្លេចត្រៀមឆ័ត្រ និងអាវភ្លៀងផង បើចាំបាច់ត្រូវនាំកូនចេញទៅក្រៅដោយខានមិនបាន។
– បើកូនទទឹកទឹកភ្លៀង សម្លៀកបំពាក់ទទឹក ឬសើម ចូរប្រញាប់ផ្លាស់ចេញ និងប្រញាប់នាំទៅងូតទឹក ព្រោះខណៈពេលនៅហាលភ្លៀង រាងកាយនឹងផ្លាស់ប្ដូរសីតុណ្ហភាពយ៉ាងឆាប់រហ័ស ទើបចាំបាច់ត្រូវងូតទឹកដើម្បីសម្រួលសីតុណ្ហភាពដល់រាងកាយ។
– ចៀសវាងការនាំកូនទៅជិតអ្នកដែលកើតជំងឺគ្រុនផ្ដាសាយ រួមទាំងត្រូវលាងដៃឱ្យកូនគ្រប់ពេលមុនទទួលទានអាហារដើម្បីការពារមេរោគ។បើលោកឪពុកអ្នកម្ដាយការពារហើយ ធ្វើគ្រប់យ៉ាងហើយ តែកូននៅតែកើតជំងឺគ្រុនផ្ដាសាយ ក៏មិនបាច់ទៅកង្វល់អ្វីដែរ ព្រោះទោះជាកូនគ្រុនក្ដៅខ្លួន មានហៀរសំបោរ កណ្ដាស់ញឹកញាប់ ដកដង្ហើមមិនស្រួលក៏ដោយ ក៏លោកឪពុកអ្នកម្ដាយនៅតែអាចមើលថែទាំកូន ជួយសម្រាលអាការទាំងនោះបានដោយការប្រើវត្ថុជំនួយការល្អដូចខាងក្រោមនេះបានដែរ :
-ឱ្យកូនគេងសម្រាកឱ្យបានច្រើន កុំរំខាន ឬបញ្ចេញសំឡេងខ្លាំងៗខណៈកូនកំពុងគេងសម្រាក។
-ឱ្យកូនញ៉ាំទឹកដោះគោ ញ៉ាំអាហារទន់ៗ ដូចជា បបរ ឬទឹកស៊ុបជាដើម ព្រោះអំឡុងពេលហ្នឹង កូនអាចមានអាការឈឺករួមជាមួយផង ទើបធ្វើឱ្យពិបាកក្នុងការលេបអាហាររឹងៗ ក្រៅពីនេះ គួរឱ្យកូនញ៉ាំទឹកឱ្យបានញឹកញាប់ ដើម្បីកុំឱ្យមានស្លេស្ម៍ស្អិត។-បើកូនក្ដៅខ្លួន 37.5 – 38អង្សា ចូរសម្រាលអាការនេះដោយការយកក្រណាត់សើមមកជូតខ្លួនកូន តែបើកូនក្ដៅខ្លួនខ្លាំងចាប់ពី38អង្សាឡើង ចូរឱ្យកូនញ៉ាំថ្នាំបញ្ចុះកម្ដៅ(ប៉ារ៉ាសេតាម៉ុល)រៀងរាល់4ម៉ោងម្ដង។
-បើកូនមានអាការក្អក កណ្ដាស់ តឹងច្រមុះ ចូរឱ្យកូនញ៉ាំថ្នាំបំបាត់សំបោរ និងថ្នាំបំបាត់ក្អកសម្រាប់ក្មេងតូច។ហើយបើកូននៅតែក្ដៅខ្លួនមិនបាត់ ដាក់ថ្នាំ និងមើលថែទាំ ហើយនៅតែមិនបានធូរស្រាលនោះ ចូរប្រញាប់នាំកូនទៅជួបគ្រូពេទ្យ ឬទៅមន្ទីរពេទ្យ ដើម្បីពិនិត្យរកមូលហេតុពិតប្រាកដរបស់ជំងឺ និងសភាវជ្រៀតជ្រែកពីជំងឺផ្សេងទៀត៕

October 21, 2019

ពិភពលោកចាប់ផ្តើមភ្ជាប់ក្មេងៗទៅនឹងធម្មជាតិ ដើម្បីដោះស្រាយបញ្ហាប្រឈមនានាក្នុងសម័យថ្មីនេះ

នៅក្នុងពិភពលោកនាសម័យបច្ចេកវិទ្យានេះ ប្រទេសធំៗដែលចាប់ផ្តើមបង្កើតឡើងនូវបច្ចេកវិទ្យាទំនើប ដោយចាប់ផ្តើមផ្លាស់ប្តូរក្មេងៗពីការនៅជិតបច្ចេកវិទ្យា ទៅភ្ជាប់ទំនាក់ទំនងឱ្យកាន់តែជិតស្និទ្ធជាមួយនឹងធម្មជាតិ ខណៈប្រទេសកំពុងអភិវឌ្ឍន៍នានាហាក់កំពុងបណ្តែតបណ្តោយឱ្យកុមារតូចៗនៅជាមួយបច្ចេកវិទ្យាកាន់តែច្រើនឡើង។

ចរន្តនៃការបណ្តែតបណ្តោយឱ្យកុមារនៅជាមួយនឹងបច្ចេកវិទ្យានេះ ត្រូវបានគេមើលឃើញថា វាបានផ្តល់ផលប៉ះពាល់ជាច្រើនដល់សុខភាពទាំងសុខភាពផ្លូវកាយ និងសុខភាពផ្លូវចិត្ត ហើយវាក៏បង្កជាគ្រោះថ្នាក់យូរអង្វែងផងដែរសម្រាប់អនាគតរបស់កុមារ។ ធនធានមនុស្សដែលជក់ខ្លាំងពេកជាមួយនឹងបច្ចេកវិទ្យា នឹងត្រូវរស់នៅក្នុងផ្នត់គំនិតដែលមិនសូវខ្វាយខ្វល់ពីធម្មជាតិ ហើយសកម្មភាពនៃការរស់នៅរបស់ពួកគេត្រូវបានគេមើលឃើញថា អាចបង្កគ្រោះថ្នាក់ខ្លាំងឡើងៗដល់ពិភពលោកនាពេលអនាគត។

ម្យ៉ាងវិញទៀត នៅពេលដែលមនុស្សទូទៅកាន់តែច្រើនឡើងមិនអាចគ្រប់គ្រងខ្លួនឯងពីការញៀនជាមួយនឹងម៉ាស៊ីនបាន ខណៈពេលដែលម៉ាស៊ីនកាន់តែឆ្លាតវៃទៅៗជារៀងរាល់ថ្ងៃនោះ ពួកគេអាចនឹងប្រឈមជាមួយបញ្ហាម៉ាស៊ីនគ្រប់គ្រងមនុស្សនៅថ្ងៃអនាគត។

ហេតុនេះហើយ ទើបនៅប្រទេសអភិវឌ្ឍន៍ធំៗ ជាពិសេសប្រទេសដែលមានការរីកចម្រើនខ្លាំងផ្នែកសេដ្ឋកិច្ច និងបច្ចេកវិទ្យា ដូចជាអង់គ្លេស អាមេរិក និងប្រទេសមួយចំនួនទៀតចាប់ផ្តើមយកចិត្តទុកដាក់ក្នុងការទាញកុមារឱ្យចេញឆ្ងាយពីបច្ចេកវិទ្យា ដោយការបង្វែងចំណាប់អារម្មណ៍មករកបរិស្ថានវិញម្ដង។

ថ្មីៗនេះចក្រភពអង់គ្លេសដែលជាប្រទេសមានភាពល្បីល្បាញផ្នែកអប់រំលើពិភពលោកបានណែនាំឱ្យអាណាព្យាបាលកុមារគ្រប់រូបសាកល្បងជំរុញឱ្យកុមារលេងកម្សាន្ត 1យប់នៅក្រោមពន្លឺផ្កាយ និងប្រើប្រាស់ភ្លើងធម្មជាតិដើម្បីឱ្យពួកគេភ្ជាប់ទំនាក់ទំនងល្អជាមួយធម្មជាតិ។ ការធ្វើបែបនេះ ត្រូវបានស្ថាប័ន Landscapes Review បញ្ជាក់ថា វាជាវិធីសាស្ត្រក្នុងការភ្ជាប់ទំនាក់ទំនងក្មេងៗជាមួយនឹងផែនដី ឬជាមួយនឹងធម្មជាតិ។ នៅពេលនោះ ក្មេងៗនឹងស្គាល់ភាពរីករាយជាមួយនឹងជីវិតបែបធម្មជាតិដ៏ស្រស់បំព្រង ជាមួយនឹងខ្យល់ត្រជាក់ និងភាពស្និទ្ធស្នាល។ ចាប់ពីពេលនោះ ពួកគេនឹងអាចផ្លាស់ប្តូរគំនិតពីការរស់នៅក្នុងជីវិតបែបបច្ចេកវិទ្យា ឬជីវិតស្រមើស្រមៃ (virtual life) ទៅស្រឡាញ់សកម្មភាពជាក់ស្តែងនៃការរស់នៅ ដូចជាចូលរួមចំណែករក្សាភាពបៃតងនៃធម្មជាតិ ឬការមើលថែទាំបរិស្ថានជុំវិញខ្លួនជាដើម។ អាណាព្យាបាលអាចនឹងលែងបារម្ភថា មានវាលស្មៅ ឬមានសួនច្បារ តែខ្វះអ្នករត់លេងទៀតហើយ ព្រោះក្មេងនឹងចាប់ផ្តើមបង្វែរភាពរីករាយក្នុងជីវិតរបស់ពួកគេជាមួយធម្មជាតិដូចកាលពីអតីតកាលវិញ។

អាណាព្យាបាល ក៏អាចសាកល្បងណែនាំដល់កូននូវដំណើរកម្សាន្តបែបធម្មជាតិ ដូចជាការបោះតង់នៅក្នុងឧទ្យានកម្សាន្ត ឬនាំពួកគេឱ្យមើលឃើញពីភាពអស្ចារ្យដ៏ជក់ចិត្តនៃជីវិតក្នុងធម្មជាតិ ដើម្បីឱ្យពួកគេមានការងឿងឆ្ងល់ ហើយចាប់ផ្តើមរវល់ជាមួយនឹងការស្វែងរកចម្លើយពីធម្មជាតិ ច្រើនជាងការលេងឧបករណ៍អេឡិចត្រូនិក។ ការធ្វើបែបនេះត្រូវបានគេវាយតម្លៃថា វាអាចនឹងទទួលផលវិជ្ជមានផងដែរសម្រាប់ថ្ងៃអនាគត ព្រោះក្មេងៗទាំងអស់នេះអាចនឹងមានចិត្តស្រឡាញ់បរិស្ថានដោយស្វ័យប្រវត្តិនៅថ្ងៃអនាគត។ រាល់ការធ្វើអាជីវកម្ម ឬការរស់នៅ ពួកគេនឹងចាប់ផ្តើមគិតគូរពីបរិស្ថាន ដើម្បីរក្សានិរន្តរភាពនៃភាពស្រស់បំព្រងដែលពួកគេជួបតាំងពីតូចរហូតដល់ធំ។

ស្ថាប័នដដែលបានបញ្ជាក់ទៀតថា នៅក្នុងសម័យឌីជីថលនេះ មនុស្សនឹងនៅជាមួយធម្មជាតិកាន់តែតិចទៅៗ ព្រោះពួកគេបានឃុំខ្លួនឯងនៅក្នុងចង្កោមអគារ និងបន្ទប់ 4ជ្រុងដែលមានអេក្រង់សម្រាប់បង្កើតភាពរីករាយ និងធ្វើអ្វីៗគ្រប់យ៉ាងរហូតធ្វើឱ្យពួកគេភ្លេចគិតពីរូបភាពពិតប្រាកដនៃធម្មជាតិ។

ហេតុនេះហើយទើបនៅអង់គ្លេស គេបានបង្កើតជាសួនធម្មជាតិជាច្រើនដើម្បីជំរុញឱ្យុមនុស្សជំនាន់ក្រោយមានឱកាសស្គាល់ និងរស់នៅជាមួយធម្មជាតិបានកាន់តែច្រើនដោយសុវត្ថិភាពខ្ពស់។

ស្របជាមួយគ្នានេះដែរ អ្នកវិទ្យាសាស្ត្របានបង្ហាញថា ការចំណាយពេលវេលាជាមួយធម្មជាតិកាន់ច្រើន នឹងនាំឱ្យកុមារក្លាយជាមនុស្សរីករាយច្រើនជាងមុន មានសុខភាពកាន់តែល្អ និងមានភាពច្នៃប្រឌិតកាន់តែខ្ពស់ ព្រោះពួកគេនឹងមានជីវិតដ៏រស់រវើក។ ហេតុនេះហើយទើបប្រទេសជាច្រើននាពេលបច្ចុប្បន្ននេះ ចាប់ផ្តើមជំរុញឱ្យអាណាព្យាបាលណែនាំកុមារឱ្យត្រឡប់ទៅរកធម្មជាតិ។

តាមការបញ្ជាក់ពីស្ថាប័ន National Wildlife Federation បញ្ជាក់ថា នៅសហរដ្ឋអាមេរិក គេបានបង្កើតឡើងនូវកម្មវិធី ម៉ោងបៃតង (Green Hour) ដែលកម្មវិធីនេះជំរុញឱ្យកុមារត្រូវចេញទៅលេងនៅខាងក្រៅយ៉ាងហោចណាស់ 1ម៉ោងក្នុង 1ថ្ងៃ ដើម្បីឱ្យកុមារមានភាពស្និទ្ធស្នាលជាមួយនឹងធម្មជាតិ។

ខណៈដែលនៅទីក្រុងហុងកុងវិញ កុមារត្រូវបានគេណែនាំឱ្យចូលរួមក្នុងសកម្មភាពដាំដើមឈើនៅជិតតំបន់ដែលគេរស់នៅ ឬនៅក្នុងផ្ទះ ហើយលើកទឹកចិត្តឱ្យពួកគេចំណាយការយកចិត្តទុកដាក់ក្នុងការថែទាំ ដើម្បីឱ្យពួកគេយល់កាន់តែច្បាស់ពីតម្លៃនៃខិតខំប្រឹងប្រែងរក្សាបរិស្ថាន៕

October 21, 2019

របៀបរៀបចំពិធីអាពាហ៍ពិពាហ៍ទៅតាមលំដាប់អក្សរពី A ដល់ Z

គ្រាន់តែដឹងថា នឹងត្រូវមានពិធីរៀបអាពាហ៍ពិពាហ៍សម្រាប់សមាជិកក្នុងគ្រួសារ ឬសម្រាប់ខ្លួនឯងផ្ទាល់ ភាពច្របូកច្របល់ខ្វាយខ្វល់ក៏ឈានចូលមកនៅក្នុងខួរក្បាលរបស់អ្នកភ្លាមតែម្តង ព្រោះមិនដឹងថានឹងមានរឿងអ្វីដែលត្រូវធ្វើមុន ឬធ្វើក្រោយនោះទេ។ កុំខ្វាយខ្វល់ខ្លាំងរហូតធ្វើឱ្យភាពរំភើបរីករាយត្រូវបាត់បង់អី សាកល្បងអានអត្ថបទខាងក្រោម នោះប្រហែលជាអាចជួយសម្រួលដល់អ្នកបាន បើទោះជាមិនទាំងស្រុងក៏គង់តែមានខ្លះៗដែរ។

A. Announcement: ប្រកាសឱ្យមនុស្សគ្រប់គ្នាបានដឹងផងថា អ្នកទាំងពីរនឹងក្លាយជាប្តីប្រពន្ធនឹងគ្នាហើយ ការប្រកាសឱ្យមិត្ត ឬសាច់ញាតិបានដឹងនេះ គឺជារឿងដែលអ្នកអាចសម្រេចចិត្តដោយខ្លួនឯង ប៉ុន្តែចំពោះសេចក្តីប្រកាសស្តីពីច្បាប់រៀបការដែលចេញពីរដ្ឋអំណាចគឺជាអ្វីដែលអ្នកចាំបាច់ត្រូវតែធ្វើ។
B. Best Escorts: សំដៅដល់អ្នកកំដរនឹងឯង។ បើនៅមិនទាន់រកឃើញអ្នកកំដរទេនោះ សូមប្រញាប់គិតទុកឱ្យហើយទៅថា នឹងរើសយកអ្នកណាមកធ្វើជាអ្នកកំដរ នឹងជាអ្នកជួយការងារផ្សេងៗក្នុងពិធីរបស់អ្នក។C. Contracts: កិច្ចសន្យា ត្រូវធ្វើឱ្យបានត្រឹមត្រូវជាមួយនឹងអ្នកដែលពាក់ព័ន្ធ ដូចជា ភ្នួង ជាងថត ទីតាំង ភ្លេង និងអាហារ។ល។ ការធ្វើបែបនេះគឺដើម្បីចៀសវាងការកើតមាននូវបញ្ហានានាដែលអាចកើតឡើងដោយប្រការណាមួយ។
D. Decoration: នៅក្នុងផ្ទះមានកន្លែងច្រើនណាស់ដែលអ្នកគួរតែធ្វើការតុបតែងឱ្យបានស្អាតបាត ព្រោះវាជាទីតាំងដែលត្រូវរៀបចំពិធី។ បន្ទប់ផ្សំដំណេកកូនកំលោះកូនក្រមុំគឺជាកន្លែងដ៏សំខាន់ដែលអ្នកមិនត្រូវមើលរំលង។E. Entertainment: ថ្ងៃរៀបការជាពេលវេលាដ៏ល្អបំផុត ហើយភាពសប្បាយរីករាយតាមរយៈការច្រៀងរាំ ឬការកម្សាន្តនានាគឺជាបរិយាកាសដ៏ពិសេសដែលមិនអាចខ្វះបាន។ ពិភាក្សាព្រមទាំងសម្រេចចិត្តជាមួយនឹងអ្នកដែលពាក់ព័ន្ធថាតើអ្នកចង់បានការកម្សាន្តបែបណាក្នុងថ្ងៃនោះ។
F. Family Members: សមាជិកគ្រួសារ ឬមិត្តស្និទ្ធស្នាលមួយចំនួនដែលអ្នកទុកចិត្តគឺជាជំនួយការដ៏ល្អដែលអ្នកមិនអាចខ្វះបាន ហេតុនេះអ្នកគួរតែចេះរៀបចំចាត់ចែងការងារផ្សេងៗឱ្យពួកគេជួយគ្រប់គ្រងមើលការខុសត្រូវ។G. Gift: អ្នកអាចនឹងគិតថា អំណោយផ្សេងៗដែលត្រូវប្រគល់ឱ្យភ្ញៀវជារឿងតូចតាច ប៉ុន្តែបើអ្នកគិតឱ្យបានច្បាស់បន្តិចទៀតអ្នកប្រហែលជាអាចដឹងបានថា អំណោយគឺជាការលើកកិត្តិយសមួយផ្នែកដែរ បើជាវត្ថុដែលយកមកប្រើប្រាស់បានទៀតគឺកាន់តែប្រសើរ។
H. Honeymoon: រាត្រីទឹកឃ្មុំ មិនគួរគិតថាចាំរកនឹកក្រោយពេលរៀបការរួចនោះទេ គិតទុកឱ្យហើយមុនថ្ងៃនោះមកដល់ នោះអ្នកនឹងមានជម្រើសកាន់តែច្រើន។IInvitations: អ្នកអាចជ្រើសរើសម៉ូដ ពណ៌ ទំហំណាមួយ តាមដែលអ្នកចូលចិត្ត ប៉ុន្តែចំណុចដែលសំខាន់នោះគឺអ្នកត្រូវពិនិត្យឱ្យបានច្បាស់ ចៀសវាងការកើតមាននូវកំហុសអចេតនាផ្សេងៗ ជាពិសេសគឺ ពេលវេលា ទីកន្លែង និងឈ្មោះភ្ញៀវដែលត្រូវអញ្ចើញ។
J. Jewelry: ឈុតគ្រឿងអលង្ការដែលរួមមានដូចជា ខ្សែក ខ្សែដៃ ក្រវិល គឺជាអំណោយដ៏មានអត្ថន័យបំផុតសម្រាប់កូនក្រមុំរបស់អ្នក។ ស្វែងរកឈុតគ្រឿងអលង្ការណាដែលអ្នកគិតថាសមសម្រាប់កូនក្រមុំ ដើម្បីឱ្យនាងពាក់ទាំងក្នុងថ្ងៃរៀបការ និងទៅថ្ងៃក្រោយទៀត។ ភរិយារបស់អ្នកពិតជាពេញចិត្តរាល់ពេលដែលនាងយកវាមកប្រើប្រាស់។K. Kind Advice: សួរអ្នកដែលដឹង ឬធ្លាប់រៀបការរួចពីរឿងផ្សេងៗដែលអ្នកមិនទាន់ដឹង នោះគ្រប់យ៉ាងនឹងបានគ្រប់ជ្រុងជ្រោយ។
L. Location: ស្វែងរកទីតាំងដែលអ្នកគិតថាល្អ និងសមរម្យ។ បច្ចុប្បន្ននេះទីកន្លែងសម្រាប់រៀបចំពិធីអាពាហ៍ពិពាហ៍មានច្រើនណាស់ ដូច្នេះជម្រើសក៏សម្បូរបែបដែរ។
M. Money: ថវិកាគឺជាចំណុចសំខាន់មួយទៀតដែលអ្នកត្រូវដឹង និងត្រូវត្រៀមទុកសម្រាប់តម្រូវការផ្សេងៗជាចាំបាច់។ អ្វីៗគ្រប់យ៉ាងមិនអាចដំណើរការទៅបាននោះទេ ប្រសិនបើមិនមានប្រាក់ទេនោះ ដូច្នេះមុនពេលសម្រេចចិត្តរៀបការអ្នកត្រូវតែមានប្រាក់គ្រប់គ្រាន់សម្រាប់ចាត់ចែងក្នុងកម្មវិធី ហើយក៏ត្រូវតែមានច្រើនជាងការដែលបានគិតទុកដែរ។N. Note Book: មានកិច្ចការច្រើនណាស់ដែលអ្នកត្រូវធ្វើ ហើយដើម្បីចៀសវាងការភ្លេចភ្លាំងអ្នកត្រូវមានសៀវភៅមួយក្បាល ដើម្បីកត់ត្រាទុកនូវអ្វីដែលអ្នកត្រូវធ្វើ។
O. Organization: ការរៀបចំគ្រប់បែបយ៉ាងត្រូវតែប្រព្រឹត្តទៅយ៉ាងរលូត និងល្អឥតខ្ចោះ។ សម្រេចចិត្តឱ្យបានស្រេចថា តើអ្នកនឹងជ្រើសរើសការតុបតែងបែបណា សម្លៀកបំពាក់ រថយន្ត និងរឿងផ្សេងៗទៀតបែបណា នឹងធ្វើឱ្យពិធីកាន់តែងមានភាពងាយស្រួលឡើង។
P. Photography: រូបថតគឺជាការរក្សាទុកនូវអនុស្សាវរីយ៍ក្នុងថ្ងៃដ៏ពិសេសរបស់អ្នក។ ជ្រើសរើសអ្នកថតរូបដែលមានជំនាញច្បាស់លាស់ នោះអ្នកនឹងទទួលបាននូវអនុស្សាវរីយ៍ផ្អែមល្ហែមមួយដែលមិនអាចបំភ្លេចបានជាមិនខាន។
Q. Question: ដាក់សំណួរសម្រាប់គ្រប់កិច្ចការដែលអ្នកបានធ្វើថា តើអ្វីៗគ្រប់យ៉ាងពិតជាបានរៀបរយហើយមែនទេ? ប្រសិនបើអ្នកទទួលបានចំម្លើយមួយជាទីពេញចិត្តហើយនោះមានន័យថា គ្រប់យ៉ាងគឺ Ok ហើយ។
R. Ring: ចិញ្ចៀនជាវត្ថុបញ្ចាំស្នេហ៍ដែលអ្នកត្រូវរក្សាទុកពេញមួយជីវិត ហេតុនេះអ្នកគួរតែជ្រើសរើសវាដោយសម្រិតសម្រាំងបំផុត ព្រោះវាជាគ្រឿងបញ្ជាក់ពីតម្លៃនៃសេចក្តីស្រឡាញ់រវាងគូស្វាមីភរិយា។ ចិញ្ចៀនរៀបការជាវត្ថុដែលអ្នកគប្បីពាក់ជាប់ជានិច្ច ដូច្នេះនៅពេលកុម្ម៉ង់ម៉ូដអ្នកគួរគិតទៅដល់ភាពស្រស់ស្អាត ព្រមជាមួយនឹងភាពងាយស្រួលក្នុងការពាក់ផងដែរ។
S. Speech: មានអ្វីត្រូវនិយាយនាថ្ងៃរៀបការដែរទេ? បើមានគួរសរសេរព្រៀងទុកឱ្យហើយទៅ ដើម្បីការពារភាពរអាក់រអួល ឬកំហុសឆ្គងពេលឡើងនិយាយនៅលើវេទិកានាកម្មវិធីចុងក្រោយនៃពិធីរៀបអាពាហ៍ពិពាហ៍។T. Transport: រៀបការជាពេលរវល់បំផុតសម្រាប់ម្ចាស់កម្មវិធី ហេតុនេះគ្រប់ប្រភេទនៃមធ្យោបាយធ្វើដំណើរក៏ពិតជារវល់ដូចគ្នាដែរ។ បើទោះជាយ៉ាងនេះក្តីអ្នកត្រូវត្រៀមរថយន្តមួយគ្រឿងទុកសម្រាប់កូនកំលោះកូនក្រមុំផ្ទាល់ផង។
U. Underwear: ស្តាប់ទៅដូចជាមិនសូវពីរោះ ប៉ុន្តែវាក៏សំខាន់ណាស់ដែរដឹងទេ? សូមជ្រើសរើសឈុតក្នុងឱ្យបានត្រឹមត្រូវ នោះវានឹងផ្តល់នូវភាពងាយស្រួលក្នុងការស្លៀកពាក់ និងជួយលើកសម្រស់ដល់កូនកំលោះកូនក្រមុំផងដែរ ជាពិសេសកូនក្រមុំតែម្តង។
V. Video: ក្រៅពីរូបថតសន្លឹក អ្នកក៏ត្រូវតែមានវីដេអូដើម្បីថតពីសកម្មភាពរស់រវើកនៅក្នុងកម្មវិធីទាំងមូលផងដែរ។ បើទោះជារយៈពេលកន្លងទៅយូរយ៉ាងណាក្តី ប៉ុន្តែវាហាក់ដូចជានៅថ្មីៗនៅពេលដែលអ្នកបានចាក់វីដេអូនៃថ្ងៃពិធីរបស់អ្នកមើលឡើងវិញម្តងទៀតនោះ។
W. Wedding Planners: បច្ចុប្បន្ននេះមានសេវាកម្មរៀបចំពិធីរៀបអាពាហ៍ពិពាហ៍ជាច្រើនបានបង្កើតឡើង ដូច្នេះប្រសិនបើអ្នកចង់ឱ្យពិធីដ៏សំខាន់របស់អ្នកមានភាពងាយស្រួល និងកាន់តែច្បាស់លាស់នោះ អ្នកកាន់ការងារ Wedding Planners អាចជួយអ្នកបានយ៉ាងពេញទំហឹងតែម្តងនៅក្នុងថ្ងៃមង្គលរបស់អ្នក។X. X-tra Things: របស់របរមួយចំនួនគួរតែធ្វើត្រៀមឱ្យបានច្រើនជាងចំនួនដែលបានកំណត់ទុក។ សំបុត្រអញ្ចើញ(គួរបោះឱ្យលើសប្រហែលជា20សន្លឹក) ម្ហូប(គួរកុម្ម៉ង់ឱ្យលើសពី3-5តុ ចៀសវាងមានការខ្វះខាត) ស្រា ភេសជ្ជៈ ព្រមទាំងវត្ថុអនុស្សាវរីយ៍ជាដើមផងដែរ ត្រូវតែត្រៀមឱ្យលើសជាស្រេច។
Y. Young Attendants: ថ្ងៃចូលរោងការជិតមកដល់អ្នកគួរតែជ្រើសរើស និងសុំការអនុញ្ញាតពីឪពុកម្តាយក្មេងប្រុសស្រីដែលនឹងត្រូវធ្វើជាកូនមហាក្នុងពិធីរបស់អ្នកឱ្យហើយជាមុនផង។
Z. Zero Regrets: កូនក្រមុំកូនកំលោះមួយចំនួនធ្លាប់មានការស្តាយក្រោយ ដោយហេតុថាពួកគេមិនដឹងថាតើពួកគេត្រូវធ្វើអ្វីខ្លះ ដែលជាសកម្មភាពដែលពួកគេចង់ធ្វើបំផុតនៅក្នុងថ្ងៃរៀបការរបស់ពួកគេ។ ដូច្នេះ អ្នកគួរតែធ្វើយ៉ាងណាចៀសវាងកុំឱ្យវាកើតមានលើរូបអ្នកឱ្យសោះ៕

October 21, 2019

ជំរុញការប្រកួតប្រជែងផ្នែកទេសចរណ៍នៅកម្ពុជា គឺលើកកម្ពស់ទីផ្សារទេសចរណ៍

ប្រទេសកម្ពុជាកំពុងធ្វើឱ្យមានការប្រកួតប្រជែងលើវិស័យទេសចរណ៍ក្នុងក្របខ័ណ្ឌពិភពលោក ដោយនៅក្នុងរបាយការណ៍ចេញផ្សាយចុងក្រោយស្ដីពីសន្ទស្សន៍នៃការប្រកួតប្រជែងផ្នែកទេសចរណ៍(TCCI) ដែលធ្វើឡើងដោយវេទិកាសេដ្ឋកិច្ចពិភពលោក(WEF) (ចេញផ្សាយរៀងរាល់ 2ឆ្នាំម្តង) បានឱ្យដឹងថា ក្នុងខែនេះ ប្រទេសកម្ពុជាបានកើនឡើងនូវមណ្ឌលទេសចរណ៍ថ្មីចំនួន 3កន្លែងធ្វើឱ្យបច្ចុប្បន្នព្រះរាជាណាចក្រកម្ពុជាស្ថិតនៅលំដាប់ទី 98 ក្នុងពិភពលោក។

របាយការណ៍នេះរាប់បញ្ចូលទាំងប្រទេសចំនួន140 ដែលត្រូវបានចាត់ចំណាត់ថ្នាក់យោងទៅតាមបរិយាកាសធុរកិច្ច សុវត្ថិភាព និងសន្តិសុខ ហេដ្ឋារចនាសម្ព័ន្ធ ការដឹកជញ្ជូនតាមផ្លូវអាកាស ធនធានធម្មជាតិ គោលនយោបាយទេសចរណ៍ និងការប្រកួតប្រជែងតម្លៃ និងកត្តាផ្សេងៗទៀត។ ប្រទេសអេស្បាញ បានជាប់ចំណាត់ថ្នាក់លេខ1 នៅទូទាំងពិភពលោក។ ប្រទេសបារាំង អាល្លឺម៉ង់ ប្រទេសជប៉ុន និងសហរដ្ឋអាមេរិក ឈរនៅទី5 តាមលំដាប។

នៅអាស៊ីអាគ្នេយ៍ ប្រទេសសិង្ហបុរីត្រូវបានគេចាត់ទុកថា មានឧស្សាហកម្មទេសចរណ៍ដែល មានការប្រកួតប្រជែងច្រើនជាងគេ បន្ទាប់មកគឺ ប្រទេសម៉ាឡេស៊ី ថៃ ឥណ្ឌូនេស៊ី និងប្រទេសវៀតណាម។

ប្រទេសកម្ពុជាបានកាន់កាប់កន្លែងចុងក្រោយនៅក្នុងតំបន់ដែលជាកន្លែងមួយស្ថិតនៅពីក្រោយប្រទេសជិតខាងគឺ ប្រទេសឡាវ ដែលមានចំណាត់ថ្នាក់លេខ97 នៅទូទាំងពិភពលោក។ ប្រទេសចំនួន7 ក្នុងចំណោមប្រទេសចំនួន9 មកពីអាស៊ីអាគ្នេយ៍បានធ្វើឱ្យចំណាត់ថ្នាក់របស់ពួកគេប្រសើរឡើង។

យោងតាមរបាយការណ៍ឆ្នាំ2019 លទ្ធផលល្អបំផុតរបស់កម្ពុជាស្ថិតក្នុងការផ្តល់អាទិភាព ដល់ការធ្វើដំណើរ និងទេសចរណ៍ដែលប្រទេសកម្ពុជាជាប់ចំណាត់ថ្នាក់លេខ44 នៅលើពិភពលោក បន្ទាប់មកគឺការប្រកួតប្រជែងតម្លៃ (លេខ49) ការបើកចំហអន្តរជាតិ (លេខ66) ធនធានធម្មជាតិ (លេខ66) ធនធានវប្បធម៌ និងការធ្វើដំណើរអាជីវកម្ម (លេខ76 ) ហេដ្ឋារចនាសម្ព័ន្ធដឹកជញ្ជូនតាមផ្លូវអាកាស (លេខ91) ហេដ្ឋារចនាសម្ព័ន្ធសេវាកម្មទេសចរណ៍ (លេខ93) និងធនធានមនុស្ស និងទីផ្សារការងារ (លេខ95)។

ព្រះរាជាណាចក្រកម្ពុជាបានដំណើរការហេដ្ឋា-រចនាសម្ព័ន្ធផ្លូវគោក និងកំពង់ផែយ៉ាងលំបាក (ជាប់លេខ111) បរិស្ថានអាជីវកម្ម (លេខ122) និងនិរន្តរភាពបរិស្ថាន (លេខ139)។

របាយការណ៍នេះក៏បានឆ្លុះបញ្ចាំងយ៉ាងល្អផងដែរពីការខិតខំរបស់ភាគីពាក់ព័ន្ធនានាដើម្បីកែលម្អឧស្សាហកម្មទេសចរណ៍នៅកម្ពុជា ដែលត្រូវបានគេមើលឃើញថា មានសារសំខាន់ចំពោះការអភិវឌ្ឍសេដ្ឋកិច្ចរបស់ប្រទេស។ រដ្ឋាភិបាលបាន និងកំពុងផ្តោតលើកំណើនទេសចរណ៍ហើយគ្រោងនឹងចេញផែនការយុទ្ធសាស្ត្រសម្រាប់ការអភិវឌ្ឍវិស័យទេសចរណ៍។

សម្តេចនាយករដ្ឋមន្ត្រី ហ៊ុន សែន បានប្រាប់ប្រព័ន្ធផ្សព្វផ្សាយកាលពីដើមឆ្នាំនេះថា៖ “ឥឡូវនេះប្រទេសកម្ពុជាបានក្លាយជាទិសដៅទេសចរណ៍ដ៏មានប្រជាប្រិយមួយសម្រាប់ពិភពលោកហើយ រដ្ឋាភិបាលមើលឃើញវិស័យទេសចរណ៍ជាមាសបៃតង”។ វាក៏មានការខិតខំផងដែរក្នុងការធ្វើពិពិធកម្មការផ្តល់ជូនទេសចរនៅកម្ពុជាដែលផ្តោតជាយូរមកហើយនៅលើប្រាសាទអង្គរវត្ត។

ក្នុងរយៈពេលប៉ុន្មានខែថ្មីៗនេះមានការជំរុញក្នុងការកសាង និងបង្កើតតំបន់ទេសចរណ៍ធម្មជាតិថ្មីបន្ថែមទៀតនៅក្នុងខេត្តពោធិ៍សាត់ កោះកុង កំពតនិងខេត្តដទៃទៀតដើម្បីបំពេញបន្ថែមប្រាសាទអង្គរវត្ត និងគោលដៅទេសចរណ៍ដែលមានស្រាប់។

យោងតាមក្រសួងទេសចរណ៍ព្រះរាជាណាចក្រកម្ពុជាស្ថិតនៅលំដាប់លេខ3 ក្នុងអាស៊ាន សម្រាប់កំណើនទេសចរណ៍។ កាលពីឆ្នាំមុនប្រទេសកម្ពុជាបានចុះបញ្ជិកាមកដល់ចំនួន 11% នៃចំនួនភ្ញៀវទេសចរ ដែលតួលេខនេះមានតែប្រទេសឥណ្ឌូនេស៊ី និងវៀតណាមប៉ុណ្ណោះ។

ឯកឧត្តម ថោង ខុន បានថ្លែងថា៖“សម្រាប់អភិវឌ្ឍន៍វិស័យទេសចរណ៍កម្ពុជាឡើងវិញឱ្យបានល្អប្រសើរ ខណៈដែលពិភពលោកកំពុងជួបប្រទះវិបត្តិសង្គ្រាមពាណិជ្ជកម្មដែលបង្កឡើងដោយសហរដ្ឋអាមេរិក និងមហាយក្សចិន ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជានឹងត្រូវបានបង្កើតឡើង ហើយត្រូវអនុម័តលើលក្ខន្តិកៈ និងបទបញ្ជាផ្ទៃក្នុង ដើម្បីបន្តពិភាក្សាគ្នាលើការរៀបចំយុទ្ធសាស្ត្រទីផ្សារថ្មី”។

ឯកឧត្តមរដ្ឋមន្ត្រីបានបន្តថា វិបត្តិសង្គ្រាមពាណិជ្ជកម្មនេះបានបណ្ដាលឱ្យគោលដៅទីផ្សារទេសចរណ៍មួយចំនួនមានការប្រែប្រួល ហើយកម្ពុជាត្រូវខិតខំតោងស្រវាចាប់យកទីផ្សារ ឬគោលដៅទេសចរណ៍ណាដែលមានសក្តានុពល ពោលគឺត្រូវរៀបចំទាំងយុទ្ធសាស្ត្រ មធ្យោបាយ និងថវិកា ដើម្បីធ្វើការផ្សព្វផ្សាយទៅកាន់គោលដៅសំខាន់ៗ សំដៅទាក់ទាញភ្ញៀវទេសចរមកកម្ពុជាឱ្យបានច្រើន។

សម្រាប់ទីផ្សារទេសចរណ៍ចិន កម្ពុជាកាន់តែត្រូវពង្រឹងថែមទៀត ព្រោះថា ចិនជាទីផ្សារទេសចរណ៍ដ៏ធំមួយលើសកលលោក តែត្រូវតែចូលជ្រៅទៅរកគោលដៅសំខាន់ណាដែលមានសក្តានុពល ហើយដែលកម្ពុជាត្រូវរៀបចំការផ្សព្វផ្សាយឱ្យបានល្អនៅទីនោះ ក៏ដូចគ្នាទៅនឹងទីផ្សារក្នុងអាស៊ាន អាស៊ី អឺរ៉ុប និងអាមេរិកផងដែរ ដោយត្រូវធ្វើឱ្យចំគោលដៅ និងត្រូវប្រើគ្រប់មធ្យោបាយ រូបភាព និងថវិកាឱ្យមានប្រសិទ្ធភាព។

នៅក្នុងទិវាទេសចរណ៍ពិភលោក សម្ដេចតេជោនាយករដ្ឋមន្ត្រី បានថ្លែងថា រាជរដ្ឋាភិបាលកម្ពុជាសូមអបអរសារទជាថ្មីដែលឆ្នាំ2018 កន្លងទៅ ពិភពលោកបានទទួលភ្ញៀវទេសចររហូតដល់ 1,400លាននាក់ ក្នុងអត្រាកំណើន 5% ចូលរួមបង្កើតការងារ 10%នៃការងារសរុប បង្កើតចំណូលចូលសេដ្ឋកិច្ចប្រមាណ10% នៃផលិតផលក្នុងស្រុកសរុបរបស់ពិភពលោក (World GDP) តំណាងឱ្យ 7% នៃការនាំចេញសរុបរបស់ពិភពលោក និងប្រមាណ 29% នៃការនាំចេញសរុបផ្នែកសេវាកម្ម។ នេះបង្ហាញថា វិស័យទេសចរណ៍នៅតែបន្តស្ថិតក្នុងលំដាប់លេខ3 នៃការនាំចេញរបស់ពិភពលោក បន្ទាប់ពីការនាំចេញប្រេងឥន្ធនៈ និងផលិតផលគីមីនាំមុខការនាំចេញរថយន្ត និងផលិតផល ចំណី អាហារ។

ដោយឡែក រយៈពេល20ឆ្នាំចុងក្រោយនេះ កម្ពុជាបន្ទាប់ពីបានទទួលសុខសន្តិភាព ស្ថិរភាព នយោបាយ សុវត្ថិភាពពេញផ្ទៃប្រទេស និងការរួបរួម-ជាតិពីគ្រប់ភាគី វិស័យទេសចរណ៍កម្ពុជាមាន កំណើនគួរជាទីមោទនៈ ដោយកើនពីការទទួលទេសចរអន្តរជាតិចំនួនតែជាង 28ម៉ឺននាក់នៅឆ្នាំ1998 រហូតដល់ 6,2លាននាក់នៅឆ្នាំ2018 និងបានបង្កើតការងារដោយផ្ទាល់ជូនប្រជាពលរដ្ឋជាង 62ម៉ឺននាក់ និងការងារមិនផ្ទាល់រាប់សិបម៉ឺននាក់ថែមទៀត៕

October 20, 2019

សាលារៀនវ៉េស្ទឡាញន៍អភិវឌ្ឍខ្លួនជាសាលារៀនសតវត្សរ៍ទី21

នៅក្នុងសតវត្សរ៍ទី21 នេះ ស្ថាប័នអប់រំទាំងអស់លើពិភពលោកចាំបាច់ត្រូវធ្វើបច្ចុប្បន្នភាពកម្មវិធីសិក្សា និងរបៀបនៃការអប់រំរបស់ខ្លួន ដើម្បីឆ្លើយតបជាមួយនឹងទីផ្សារការងារជាក់ស្តែង និងលក្ខណសម្បត្តិដែលពិភពលោកត្រូវការ។

នៅកម្ពុជា ដើម្បីឆ្លើយតបជាមួយនឹងរបត់ថ្មីរបស់ពិភពលោកនេះ ក្រសួងអប់រំ យុវជន និងកីឡា បានបង្កើតឡើងនូវកម្មវិធីដ៏មានសារៈសំខាន់មួយដើម្បីផ្តល់ជូននូវការអប់រំឱ្យស្របតាមតម្រូវការរបស់ពិភពលោកក្នុងសតវត្សរ៍ទី21 ឬក្នុងបដិវត្តន៍ឧស្សាហកម្ម 4.0 តាមរយៈការបង្កើតសាលាជំនាន់ថ្មីដោយបញ្ចូលនូវប្រព័ន្ធអប់រំ និងវិធីសាស្ត្របង្រៀនថ្មីៗជាច្រើន។ ងាកមកវិស័យឯកជនវិញ សាលារៀនដែលជាបណ្តាញនៃក្រុមហ៊ុនវេសឡាញ អេឌ្យូខេសិន គ្រុប ក៏បានផ្តល់នូវជម្រើសប្លែកថ្មីមួយទៀតដែលឆ្លើយតបផងដែរជាមួយនឹងបរិបទពិភពលោកនាយុគសម័យថ្មីនេះ ដោយបញ្ចូលកម្មវិធីសំខាន់ៗជាច្រើនលើកម្មវិធីគោលរបស់ក្រសួងអប់រំ។

លោក ប៉ិច បូឡែន អគ្គនាយកក្រុមហ៊ុនវេសឡាញ អេឌ្យូខេសិន គ្រុប បានលើកឡើងថា បណ្តាញសាលារៀនរបស់យើងព្យាយាមគ្រប់លទ្ធភាពក្នុងការធ្វើបច្ចុប្បន្នភាពលើការបណ្តុះបណ្តាល ដើម្បីអភិវឌ្ឍសិស្សានុសិស្សទាំងអស់ឱ្យមានសមត្ថភាពឆ្លើយតបជាមួយនឹងរបត់ចំណេះដឹងរបស់ពិភពលោកបច្ចុប្បន្ន។

ក្រៅពីការបណ្តុះបណ្តាលដោយយកចិត្តទុកដាក់លើកម្មវិធីសិក្សាគោលស្របតាមក្រសួងអប់រំ យុវជន និងកីឡា យើងបានបញ្ចូលនូវកម្មវិធី វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ជាមួយគ្រូប្រកបដោយសមត្ថភាព និងមានបន្ទប់ពិសោធន៍សម្បូរបែបដើម្បីផ្តល់ឱកាសឱ្យសិស្សានុសិស្សរបស់យើងបានពិសោធ និងយល់កាន់តែស៊ីជម្រៅពីមេរៀននីមួយៗ សំដៅជំរុញនវានុវត្តន៍ និងភាពច្បាស់លាស់លើផ្នែកវិទ្យាសាស្ត្រ។ បន្ថែមពីលើនេះ យើងក៏បានដាក់ឱ្យដំណើរការកម្មវិធីបច្ចេកវិទ្យាសំខាន់ៗដើម្បីជំរុញឱ្យសិស្សរបស់យើងទទួលបាននូវចំណេះដឹងជាមូលដ្ឋានគ្រឹះសំខាន់ៗដើម្បីអភិវឌ្ឍសមត្ថភាពឱ្យកាន់តែមានសក្តានុពលនៅថ្ងៃអនាគត។ ក្រៅពីការបង្រៀនពីកម្មវិធីកុំព្យូទូ័រជាមូលដ្ឋានសម្រាប់ចំណេះដឹងទូទៅ យើងបានបង្កើតនូវក្លិបអ្នកវិទ្យាសាស្ត្រវ័យក្មេង ដែលផ្តល់នូវមជ្ឈមណ្ឌលសិក្សាកុំព្យូទ័រ ដោយផ្តោតសំខាន់លើការបណ្តុះបណ្តាលឱ្យសិស្សចេះសរសេរកូដជាមួយនឹងអ្នកជំនាញ។ បន្ថែមពីលើនេះ យើងក៏ទំនុកបម្រុងសិស្សរបស់យើងផងដែរ ប្រសិនបើពួកគេបង្កើតបាននូវសមិទ្ធផលវិទ្យាសាស្ត្រ ឬបច្ចេកវិទ្យាថ្មីៗសម្រាប់ជាប្រយោជន៍ដល់សង្គម។

លោក ប៉ិច បូឡែន បានមានប្រសាសន៍ថា៖ “លើសពីវិទ្យាសាស្ត្រ និងបច្ចេកវិទ្យា បណ្តាញសាលារៀនរបស់យើង បានដាក់បញ្ចូលនូវកម្មវិធីអប់រំហិរញ្ញវត្ថុពីប្រទេសសិង្ហបុរី ដែលមានឈ្មោះថា Money Tree ដើម្បីឱ្យសិស្សានុសិស្សបានយល់ពីការគ្រប់គ្រងហិរញ្ញវត្ថុ និងសហគ្រិនភាព ស្របជាមួយនឹងគោលដៅសំខាន់ដែលក្រសួងអប់រំ និងធនាគារជាតិ ដែលខិតខំប្រឹងប្រែងបណ្តុះបណ្តាលសិស្សឱ្យមានគំនិតសន្សំ និងគ្រប់គ្រងហិរញ្ញវត្ថុដូច្នោះដែរ។ កម្មវិធីដែលយើងទិញយកមកនេះ ជាកម្មវិធីដែលត្រូវបានគេប្រើប្រើប្រាស់នៅសាលារៀនជាច្រើននៅបរទេស”។

ស្ថាបនិកគ្រឹះស្ថានអប់រំខាងលើបានបញ្ជាក់ទៀតថា បច្ចុប្បន្ននេះ ដោយសារតែពិភពលោកមានការវិវឌ្ឍលឿន យើងបានបន្ថែមនូវកម្មវិធីល្អៗជាច្រើនផ្សេងទៀតដើម្បីផ្តល់ឱ្យសិស្សរបស់យើងនូវជម្រើសប្លែកថ្មីមួយក្នុងការអប់រំ ដូចជាសេវាប្រឹក្សាយោបល់អប់រំ រួមទាំងកម្មវិធីទម្លាប់ល្អទាំង 7 យ៉ាងរបស់បុគ្គលមានប្រសិទ្ធភាពខ្ពស់ដែលយើងបានទិញសិទ្ធពីអាមេរិកដើម្បីបណ្តុះបណ្តាលអត្តចរិត និងផ្នត់គំនិតសិស្សរបស់យើងឱ្យមានជំនាញសម្រាប់សតវត្សរ៍ទី21 ដែលសង្គមកំពុងត្រូវការនៅក្នុងបដិវត្តន៍ឧស្សាហកម្ម 4.0នេះ។ ជាមួយគ្នានេះដែរ ថ្មីៗនេះយើងបានដាក់ឱ្យប្រើប្រាស់កម្មវិធី VR (virtual reality) និងកម្មវិធី AR (argument reality) ដើម្បីឱ្យសិស្សានុសិស្សរបស់យើងទទួលបានបទពិសោធបច្ចេកវិទ្យាចុងក្រោយបំផុតដូចស្ថាប័នអប់រំធំៗលើពិភពលោក។

យើងខិតខំប្រឹងប្រែងគ្រប់លទ្ធភាពដើម្បីផ្តល់នូវជម្រើសថ្មីមួយក្នុងការអប់រំសម្រាប់អាណាព្យាបាល និងសិស្សានុសិស្សដែលជាអនាគតធនធានមនុស្សដ៏សំខាន់ក្នុងសង្គមឱ្យក្លាយជាមនុស្សខ្លាំង និងមានសមត្ថភាពសម្រាប់ប្រកួតប្រជែងទាំងក្នុងទីផ្សារការងារជាតិ និងអន្តរជាតិ៕

October 20, 2019

អ្នកជំនាញអចលនទ្រព្យ ប្រាប់ពីបច្ចុប្បន្នភាព និងអនាគតនៃវិស័យអចលនទ្រព្យកម្ពុជា

ការតាំងពិព័រណ៍អចលនទ្រព្យធំជាងគេបង្អស់នៅកម្ពុជា នៅណាហ្គាវើលកាលពីថ្ងៃទី4-5 ខែតុលាឆ្នាំ2019 កន្លងទៅបានប្រមូលផ្តុំមនុស្សរាប់ពាន់នាក់ ទាំងអ្នកចូលរួមទស្សនា អ្នកទិញអចលនទ្រព្យ អ្នកវិនិយោគ ភ្នាក់ងារអចលនទ្រព្យ អ្នកអភិវឌ្ឍន៍ និងក៏ជាវេទិកាមួយដែលបានរៀបចំឡើងជារៀងរាល់ឆ្នាំក្នុងគោលដៅសំខាន់បំផុត គឺការនាំយកអ្នកទិញមកជួបផ្ទាល់ជាមួយអ្នកលក់ និងការទទួលយកចំណេះដឹងព័ត៌មានវិស័យអចលនទ្រព្យពីអ្នកជំនាញអចលនទ្រព្យ និងអ្នកច្បាប់ជាង 20នាក់ដែលមានបទពិសោធក្នុងវិស័យនេះដែលធ្វើបទបង្ហាញអំពីប្រធានបទនានាជុំវិញទីផ្សារ និងនិន្នាការបច្ចុប្បន្ននិងអនាគតនៃវិស័យអចលនទ្រព្យ។

លោក Andrew Chong វិនិយោគិនហុងកុង និងជានាយកប្រតិបត្តិក្រុមហ៊ុន Prestige Homes បានបង្ហាញពីសក្ដានុពល និងភាពរីកចម្រើនលើវិស័យអចលនវត្ថុនៅកម្ពុជាទាំងពេលបច្ចុប្បន្ន និងអនាគត។នៅក្នុងប្រទេសកម្ពុជានាពេលបច្ចុប្បន្ននេះ វិស័យអចលនទ្រព្យកំពុងតែមាន ការរីកចម្រើនយ៉ាងខ្លាំង ដូច្នេះបានជាក្រុមហ៊ុនរបស់យើងសម្រេចចិត្តចូលមកវិនិយោគនៅកម្ពុជា។

កត្តាដែលនាំឱ្យក្រុមហ៊ុនទាក់ទាញអតិថិជនបានច្រើន គឺដោយសារអតិថិជនបានផ្ដល់នូវភាពជឿជាក់ខ្លាំងជាមួយក្រុមហ៊ុនដែលមានចំណេះជំនាញជាក់លាក់ ច្បាស់លាស់លើវិស័យអចលនវត្ថុនេះ ដូចជាសេវា៖ ទិញ លក់ ជួលអចលនទ្រព្យ រួមមានជួលខុនដូ Apartment ដី បុរី ផ្ទះល្វែង អគារពាណិជ្ជកម្ម សណ្ឋាគារ ភោជនីយដ្ឋាន និងមានបម្រើសេវាកម្មគ្រប់គ្រងអចលនទ្រព្យ និងសេវាកម្មវាយតម្លៃអចលនទ្រព្យជាដើម។ នេះបើតាមលោក Andrew Chong បានបញ្ជាក់។

លោក Andrew Chong ថ្លែងឱ្យដឹងថា៖ “ដើម្បីវិនិយោគការលក់គម្រោងអចលនទ្រព្យនៅកម្ពុជានេះ ក្រុមហ៊ុន Prestige Homes បានពាំនាំនូវបទពិសោធជាយូរឆ្នាំមកពង្រីក និងធ្វើឱ្យវិស័យនេះកាន់តែល្អប្រសើរ និងវិវឌ្ឍន៍ឥតឈប់ឈរ។ បើវិស័យអចលនទ្រព្យមិនល្អនោះ ក៏គ្មានក្រុមហ៊ុនផ្សេងៗណាចូលរួមច្រើនបែបនេះដែរ”។

លោក Marc Townsend ប្រធានក្រុមហ៊ុន CBREកម្ពុជា ដែលជាវាគ្មិនម្នាក់នៅក្នុងសិក្ខាសាលាដែរនោះបានមានប្រសាសន៍ថា៖ “ព្រឹត្តិការណ៍នេះត្រូវបានរៀបចំយ៉ាងល្អ និងមានអ្នកចូលរួមច្រើន ហើយក្រុមហ៊ុន CBRE កម្ពុជានឹងវិលត្រឡប់មកវិញនៅឆ្នាំក្រោយហើយគម្រោងអចលនទ្រព្យជាច្រើនរបស់យើងត្រូវបានលក់ដាច់ភ្លាមៗនៅក្នុងពិព័រណ៍ផ្ទាល់”។

លោក Tom O’Sullivan នាយកប្រតិបត្តិក្រុមហ៊ុន Realestate.com.kh បានមានប្រសាសន៍ថា ព្រឹត្តិការណ៍អចលនទ្រព្យមួយនេះជាការតាំងបង្ហាញដ៏ធំបំផុតប្រចាំឆ្នាំសម្រាប់កម្ពុជានៅឆ្នាំនេះ។ ព្រឹត្តិការណ៍ដ៏សំខាន់មួយនេះ យើងពិតជាទទួលបានជោគជ័យបំផុតក្នុងការលក់អចលនទ្រព្យ។

លោកបន្តថា៖“ខណៈនេះយើងកំពុងធ្វើការបូកសរុបលទ្ធផលចុងក្រោយ យើងបានប្រាកដច្បាស់ថា ចំនួនអ្នកចូលរួម គឺមានការកើនឡើងទ្វេដង បើប្រៀបធៀបជាមួយព្រឹត្តិការណ៍កាលពីឆ្នាំមុន ហើយវាបានបំបែកកំណត់ត្រានៃការលក់អចលនទ្រព្យដែលមានចំនួន 30លានដុល្លារកាលពីពិព័រណ៍ឆ្នាំ2018 និងតាមរយៈព័ត៌មានបឋមរបស់យើងបានបង្ហាញថា ចំនួននៃការលក់អចលនទ្រព្យ ក្នុងអំឡុងពេលពិព័រណ៍នោះ គឺមានចំនួនលើសពី 40លានដុល្លារហើយ”។

លោក Li Yan Jin អ្នកគ្រប់គ្រងផែនការរបស់ក្រុមហ៊ុន Prince Huan Yu Real បានឱ្យដឹងថា ក្រុមហ៊ុន Prince Huan Yu Real Estate (Cambodia) Group បានលក់អចលនទ្រព្យរបស់ខ្លួនមានចំនួនច្រើនជាង 70យូនីតដែលមានតម្លៃសរុបជាង 15លានដុល្លារ។

លោក Li បានបញ្ជាក់ថា ក្រុមហ៊ុនរបស់លោកបានលក់ការិយាល័យសរុបចំនួន 48យូនីតនៃគម្រោងPrince Huan Yu Center នៅឯទីក្រុងភ្នំពេញ និងខុនដូចំនួន 24យូនីតនៃគម្រោង Prince Golden Bay នៅខេត្តព្រះសីហនុ។ លើសពីនេះទៅទៀតក្រុមហ៊ុនក៏ទទួលបានអ្នកចាប់អារម្មណ៍ទិញគម្រោងរបស់ខ្លួនចំនួន 168នាក់ ដែលក្នុងនោះមាន 68នាក់ជាប្រជាជនកម្ពុជា។ចំណែកក្រុមហ៊ុន Morgan Group វិញបានលក់ខុនដូចំនួន 50យូនីតនៃគម្រោង Morgan EnMaisonដែលការលក់នេះមានតម្លៃសរុបប្រហែល 7.5លានដុល្លារ ក្នុងនោះខុនដូ 17យូនីតត្រូវបានទិញដោយប្រជាជនកម្ពុជា។ ឯគម្រោង Toul Kork Lane ក៏យើងបានលក់ចំនួន2 ដែរ ដែលមានតម្លៃជិត 13ម៉ឺនដុល្លារ។នេះបើតាមការបញ្ជាក់ដោយលោក Yao Chao អ្នកគ្រប់គ្រងផែនការរបស់ Morgan Group។

ទាក់ទិននឹងការអភិវឌ្ឍវិញ លោកឧកញ៉ា ចេង ខេង អគ្គនាយកក្រុមហ៊ុនវាយតម្លៃអចលនទ្រព្យ CPL បានបញ្ជាក់បន្ថែមថា ចំពោះការវិនិយោគខាងអចលនទ្រព្យនៅខេត្តព្រះសីហនុវិញ ការចាកចេញរបស់ចិន ក្រោយរដ្ឋាភិបាលប្រកាសបិទហ្គេមអនឡាញ វានឹងមិនធ្វើឱ្យប៉ះពាល់ដល់វិស័យអចលនទ្រព្យនៅក្នុងខេត្តនេះទេ តែផ្ទុយទៅវិញ អ្នកវិនិយោគគួរតែបង្កើនការវិនិយោគវិស័យអចលនទ្រព្យបន្ថែមទៀត តែផ្ដោតទៅលើវិស័យទេសចរណ៍ជំនួសវិញ ដោយសារតែខេត្តនេះជាខេត្តដែលមានសក្ដានុពលខ្ពស់លើវិស័យទេសចរណ៍។

លោក សន សៀប នាយកប្រតិបត្តិក្រុមហ៊ុន Key Real Estate បានធ្វើបទបង្ហាញចែករំលែកអំពីការវិវឌ្ឍនៃទីផ្សារអចលនទ្រព្យ និន្នាការ ទិសដៅវិនិយោគ និងការព្យាករពីតំបន់វិនិយោគសក្តានុពលនៅជុំវិញទីក្រុងភ្នំពេញនាពេលអនាគត។ ត្រូវស្វែង-យល់ពីគម្រោងអភិវឌ្ឍន៍របស់រដ្ឋាភិបាលថា តើនឹងឆ្ពោះទៅទិសណា និងមានលំហូរប្រជាជនរស់នៅឬទេ? មានគម្រោងអភិវឌ្ឍន៍ធំៗដូចជា គម្រោងបុរីគម្រោងសំណង់អគារពាណិជ្ជកម្ម ឬគម្រោងក្លាយជាតំបន់ឧស្សាហកម្មជាដើម។

លោកបានឱ្យដឹងថា អចលនទ្រព្យនៅតាមបណ្តោយផ្លូវជាតិលេខ41 និងផ្លូវជាតិលេខ51 ស្ថិតនៅក្នុងខេត្តកំពង់ស្ពឺនៃភាគខាងលិចទីក្រុងភ្នំពេញមានសក្តានុពល និងមានសម្ទុះរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំកន្លងមកនេះ ដោយសារកំណើនរោងចក្រសហគ្រាស ឃ្លាំង និងប្រជាពលរដ្ឋទៅសម្រុកទៅរស់នៅទីនោះច្រើន និងហេដ្ឋារចនាសម្ព័ន្ធល្អប្រសើរ។

លោកបញ្ជាក់ថា៖“ផ្លូវជាតិលេខ51 មានតម្លៃថ្លៃជាង ដោយសារតែមានរោងចក្រឧស្សាហកម្មច្រើន មានប្រជាជនរស់នៅច្រើន និងជាផ្លូវសេដ្ឋកិច្ចចន្លោះផ្លូវជាតិលេខ4 និងលេខ5។ សម្រាប់ផ្លូវជាតិ41 វិញ ចេញពីផ្លូវជាតិលេខ4 ទៅកាន់ខេត្តកំពតគឺមានប្រវែងវែងដែលធ្វើឱ្យតម្លៃដីនៅចន្លោះនោះមានទីផ្សារ មានតម្លៃខ្ពស់ ឬមានតម្លៃទាបទៅតាមប្រភេទនិងទំហំដី”។

លោក សន សៀប ក៏បានឱ្យដឹងដែរថា៖“ អចលនទ្រព្យនៅតាមបណ្តោយផ្លូវទាំងពីរនេះ នៅតែមានសម្ទុះរីកចម្រើនខ្លាំង និងមានសក្តានុពលខ្ពស់ ដោយសារនៅតាមបណ្តោយផ្លូវ51 នេះ គោរពបាននូវគោលការណ៍អភិវឌ្ឍន៍របស់រាជរដ្ឋាភិបាល ដោយបានជំរុញរោងចក្រសហគ្រាសធំៗជាច្រើន មកបោះទីតាំងតាមបណ្តោយផ្លូវ 1នេះ។ សម្រាប់ផ្លូវជាតិលេខ41វិញ ជាផ្លូវសេដ្ឋកិច្ចដ៏សំខាន់ សម្រាប់ដឹក-ជញ្ជូនទំនិញផ្សេងៗទៅកាន់កំពង់ផែខេត្តកំពត ដែលធ្វើឱ្យទីផ្សារអចលនទ្រព្យកាន់តែមានសម្ទុះ និងមានតម្លៃខ្ពស់”។

វិនិយោគិនបរទេសលោក Raymond Chio ប្រធានក្រុមហ៊ុន Prestrige Homes Cambodia ក៏បានអះអាងដែរថា ទីផ្សារអចលនទ្រព្យនៅភាគខាងត្បូងនៃទីក្រុងភ្នំពេញកំពុងមានការីកចម្រើនយ៉ាងខ្លាំងនាពេលបច្ចុប្បន្ន ដោយសារតែមានគម្រោងវិនិយោគធំៗជាច្រើនបាននិងកំពុងអភិវឌ្ឍន៍នៅតំបន់នេះ។

លោក Raymond បន្តថា៖“អចលនទ្រព្យនៅទីក្រុងភ្នំពេញ គឺជាចំណុចកណ្តាល និងសក្តានុពលខ្ពស់ដែលអ្នកវិនិយោគមកពីគ្រប់ទិសទីបាន និងកំពុងចាប់អារម្មណ៍យ៉ាងខ្លាំង”។ លោកបន្តថា “វិស័យអចលនទ្រព្យនៅទិសទាំង4 នៃទីក្រុងភ្នំពេញ មានទិសខាងលិច ខាងកើត ខាងជើង និងខាងត្បូងបាននិងកំពុងរីកចម្រើន តែសម្រាប់វិស័យអចលនទ្រព្យនៅទិសខាងត្បូងបាននឹងកំពុងមានការរីកចម្រើនខ្លាំងជាបណ្តាទិសទាំងនោះ”៕

October 20, 2019

រដ្ឋមន្ត្រីអប់រំ៖“ដើម្បីឱ្យមានសេដ្ឋកិច្ចបែបឌីជីថល លុះត្រាតែមានការអប់រំបែបឌីជីថល”

ថ្មីៗនេះ រាជរដ្ឋាភិបាលកម្ពុជាបានយកចិត្តទុកដាក់ខ្លាំងក្នុងការជំរុញឱ្យមានគោលនយោបាយសេដ្ឋកិច្ចឌីជីថល និងការរៀបចំរដ្ឋាភិបាលឌីជីថល ស្របពេលដែលបម្រែបម្រូលបច្ចេកវិទ្យា និងរបត់បដិវត្តន៍ឧស្សាហកម្មទី4 បានបង្កើនឥទ្ធិពលយ៉ាងឆាប់រហ័សនៅលើពិភពលោក។

សេដ្ឋកិច្ចឌីជីថល ជាផ្នែកយ៉ាងសំខាន់ក្នុងការជំរុញឱ្យប្រទេសនីមួយៗដើរទាន់របត់បច្ចេកវិទ្យាដែលកំពុងមានការប្រែប្រួលយ៉ាងឆាប់រហ័សផ្នែកពាណិជ្ជកម្ម និងចង្វាក់ផលិតកម្ម។ វិធីសាស្ត្រធ្វើពាណិជ្ជកម្មកាន់តែមានលក្ខណៈប្រកួតប្រជែងខ្លាំង ព្រោះមនុស្សលើពិភពលោកកាន់តែខិតជិតគ្នាឡើងពី 1ថ្ងៃទៅ 1ថ្ងៃ តាមរយៈការទំនាក់ទំនងលើបណ្តាញឌីជីថលដែលទាមទារឱ្យសហគ្រិនទាំងអស់ចាំបាច់ត្រូវបញ្ចូលប្រព័ន្ធឌីជីថលក្នុងចង្វាក់ផលិតកម្ម។ ប្រសិនបើមិនប្រើប្រាស់ប្រព័ន្ធឌីជីថលទេនោះ អាជីវកម្មនឹងប្រឈមជាមួយបញ្ហា ជាពិសេស គឺតម្លៃនៃការផលិតខ្ពស់ ហើយរយៈពេលផលិតក៏យូរ ដែលលំបាកក្នុងការប្រកួតប្រជែងជាមួយបណ្តាសហគ្រាសដទៃដែលប្រើប្រាស់បច្ចេកវិទ្យា។

ស្របពេលជាមួយគ្នាដែរ ងាកមកខាងរដ្ឋាភិបាលវិញ គឺចាំបាច់ត្រូវរៀបចំលក្ខណសម្បត្តិផងដែរដើម្បីសម្រួលដល់នីតិវិធី និងតម្លាភាពនៃការអនុវត្តលើគ្រប់ទម្រង់ និងសេវាដើម្បីជួយសម្រួលដល់ភាគីពាក់ព័ន្ធនឹងសេដ្ឋកិច្ច ដើម្បីធានាថា ការអនុវត្តនូវចង្វាក់ផលិតកម្មរបស់ពួកគេអាចមានលទ្ធភាពប្រកួតប្រជែងជាមួយបណ្តាប្រទេសនានាក្នុងតំបន់។

ចំពោះការបម្រើសេវាសាធារណៈ និងហេដ្ឋារចនាសម្ព័ន្ធនៅក្នុងទីក្រុង និងតំបន់នានាវិញក៏ទាមទារឱ្យមានការសម្រួលដល់ការរស់នៅ និងការទំនាក់ទំនងដោយប្រព័ន្ធឌីជីថល ព្រោះប្រទេសមួយចំនួនលើពិភពលោកចាប់ផ្តើមដើរដល់ដំណាក់កាលនៃការប្រើប្រាស់ប្រព័ន្ធ IOT (Internet Of Things) គ្រប់យ៉ាងក្លាយជាប្រព័ន្ធស្វ័យប្រវត្តិ។

ដំណាក់កាលនេះ ត្រូវបានគេមើលឃើញថា នឹងអាចផ្លាស់ប្តូរចរន្តនៃការរស់នៅ និងការធ្វើអាជីវកម្មកាន់តែប្រសើរឡើង។ តែទោះជាយ៉ាងនេះក្តី កត្តាប្រឈមក៏មានច្រើនផងដែរចំពោះប្រទេសនានាលើពិភពលោក ព្រោះឧបករណ៍កាន់តែទំនើប ក៏ត្រូវការមនុស្សកាន់តែខ្លាំងដើម្បីគ្រប់គ្រង និងប្រើប្រាស់ផងដែរ។ ប្រសិនបើប្រជាជន ឬអ្នកជំនាញមិនទាន់ទទួលបាននូវចំណេះដឹងច្បាស់លាស់ពីការប្រើប្រាស់បច្ចេកវិទ្យាទេនោះ ទោះបីជាបច្ចេកវិទ្យាទំនើបប៉ុណ្ណា ក៏មិនអាចធ្វើឱ្យសង្គមទទួលជោគជ័យបានដែរ ហើយអ្នកទទួលផល គឺអ្នកជំនាញមកពីខាងក្រៅដែលមានសមត្ថភាពក្នុងការច្នៃប្រឌិត និងប្រើប្រាស់បច្ចេកវិទ្យាទាំងអស់នោះ។

ពាក់ព័ន្ធនឹងបញ្ហានេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានមានប្រសាសន៍ថា៖ “ដើម្បីឱ្យមានសេដ្ឋកិច្ចបែបឌីជីថល លុះត្រាតែមានការអប់រំបែបឌីជីថល”។

ឯកឧត្តមបានបញ្ជាក់ថា ការអប់រំបែបឌីជីថល ឬអក្ខរកម្មឌីជីថលក្នុងបរិបទកម្ពុជាឧស្សាហកម្ម4.0 មានសារៈសំខាន់ខ្លាំងណាស់សម្រាប់ប្រទេសកម្ពុជាក្នុងការកែប្រែខ្លួនឱ្យក្លាយជាប្រទេសដែលមានសេដ្ឋកិច្ចបែបឌីជីថល និងរដ្ឋាភិបាលឌីជីថល ព្រោះផ្នែកទាំងអស់នេះត្រូវការអ្នកជំនាញជាច្រើនដើម្បីបំពេញការងារ និងគ្រប់គ្រងប្រព័ន្ធឆ្លាតវៃទាំងអស់នោះ។ ដើម្បីធ្វើឱ្យការអប់រំបែបឌីជីថល ធ្វើឡើងបានកាន់តែប្រសើរ ក្រសួងអប់រំបានធ្វើការងារជាច្រើនដើម្បីបញ្ជ្រាបការបណ្តុះបណ្តាលនៅគ្រប់កម្រិត និងនៅតំបន់នានានៅក្នុងប្រទេសកម្ពុជា។ ក្រសួងអប់រំយុវជន និងកីឡាបានបង្កើតឱ្យមានសាលាជំនាន់ថ្មីដែលបញ្ចូលនូវកម្មវិធីសិក្សាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) និងការបណ្តុះបណ្តាលការសរសេរកូដ រួមទាំងកម្មវិធីសិក្សាដែលជាជំនាញទន់ជាច្រើនទៀតដើម្បីឆ្លើយតបនឹងតម្រូវការជាក់ស្តែងក្នុងសតវត្សរ៍ទី21។ បន្ថែមពីលើនេះ ក្រសួងក៏បានរៀបចំរៀបចំមូលដ្ឋានគ្រឹះសម្រាប់ការអប់រំ ដោយឆ្លើយតបជាមួយយុគសម័យបច្ចេកវិទ្យា ដោយការធ្វើកំណែទម្រង់សាលារៀន និងកំណែទម្រង់ការបណ្តុះបណ្តាលគ្រូ ដោយធ្វើយ៉ាងណាឱ្យភាគីពាក់ព័ន្ធទាំងអស់មានសមត្ថភាពខ្ពស់ផ្នែកបច្ចេកវិទ្យា មុននឹងចែករំលែកបន្តទៅដល់សិស្សានុសិស្សដែលជាធនធានមនុស្សជំនាន់ថ្មីរបស់យើង។

ទោះជាយ៉ាងនេះក្តី ឯកឧត្តមរដ្ឋមន្ត្រីបានណែនាំឱ្យយុវជនជំនាន់ថ្មី ក្រៅពីការប្រឹងប្រែងរៀនសូត្រផ្នែកបច្ចេកវិទ្យា ក៏បានជំរុញឱ្យពួកគេសិក្សាផ្នែកដោះស្រាយបញ្ហា ភាពជាអ្នកដឹកនាំ និងជំនាញទន់ សំដៅធ្វើយ៉ាងណាឱ្យប្រជាពលរដ្ឋកម្ពុជា ពិសេសយុវជនបានត្រៀមខ្លួន ដើម្បីទាញយកផលប្រយោជន៍ពីបច្ចេកវិទ្យាឌីជីថល។

គួរបញ្ជាក់ផងដែរថា ស្ថាប័នអប់រំនានានៅកម្ពុជា បច្ចុប្បន្ននេះទាំងកម្រិតមធ្យមសិក្សា និងឧត្តមសិក្សាបានបញ្ចូលនូវរបៀបអប់រំ និងបច្ចេកវិទ្យាជាច្រើន ដើម្បីធ្វើការឆ្លើយតបបន្តិចម្តងៗទៅនឹងបរិបទនៃការអប់រំ4.0 ដោយរំពឹងទុករយៈពេល 5ទៅ 10ឆ្នាំទៀត យើងអាចមានធនធានមនុស្សកាន់តែច្រើនដែលចេះប្រើប្រាស់បច្ចេកវិទ្យាសម្រាប់ការធ្វើការងារ ឬចូលរួមប្រកួតប្រជែងក្នុងទីផ្សារការងារសកល។ ឆ្លើយតបជាមួយនឹងបញ្ហានេះ សិស្សានុសិស្ស ឬនិស្សិតដែលជាយុវជន ក៏មានឱកាសច្រើនផងដែរក្នុងការសិក្សាឱ្យបានទូលំទូលាយពីបច្ចេកវិទ្យា ព្រោះយើងសុទ្ធតែមានធនធានគ្រប់គ្រាន់ផ្នែកបច្ចេកវិទ្យា ដោយស្ទើរគ្រប់គ្នាមានទូរស័ព្ទដៃស្មាតហ្វូន ព្រមទាំងមានប្រើប្រាស់ប្រព័ន្ធអុីនធើណិតនៅគ្រប់ទីកន្លែង។ ហេតុនេះវាជាឱកាសក្នុងការទាញយកចំណេះដឹងដែលមានជុំវិញពិភពលោកដើម្បីអភិវឌ្ឍសមត្ថភាពខ្លួនឯងប្រសិនបើពួកគេចេះបង្វែរពេលវេលាពីការប្រើប្រាស់បណ្តាញសង្គមច្រើនហួសហេតុ មកស្វែងរកប្រភពចំណេះដឹងជាមូលដ្ឋានសម្រាប់បន្តអភិវឌ្ឍន៍សមត្ថភាពក្នុងយុគសម័យឌីជីថលនេះ៕

October 19, 2019

Category: សង្គម និងសេដ្ឋកិច្ច