សង្គម និងសេដ្ឋកិច្ច - La Reine Media

CMA ៖ គ្រឹះស្ថានមីក្រូហិរញ្ញវត្ថនៅកម្ពុជាកំពុងវិវឌ្ឍខ្លួនដោយភាពរីកចម្រើន និងជោគជ័យ

ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា (CMA)បានបញ្ជាក់ថា បច្ចុប្បន្ននេះគ្រឹះស្ថានមីក្រូហិរញ្ញវត្ថុបាននិងកំពុងវិវឌ្ឍខ្លួនយ៉ាងរីកចម្រើនឥតឈប់ឈរ ដែលការរីកចម្រើនទាំងនេះបានមកពីភាពជោគជ័យរបស់អតិថិជន មានន័យថា ប្រសិនបើគ្មានភាពជោគជ័យរបស់អតិថិជនទេនោះ គ្រឹះស្ថានមីក្រូហិរញ្ញវត្ថុក៏មិនអាចជោគជ័យបានឡើយ។

លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា (CMA)បានថ្លែងឱ្យដឹងថា ដើម្បីជំរុញវិស័យនេះឱ្យកាន់តែប្រសើរឡើងទៀតនោះ សមាគមមីក្រូហិរញ្ញវត្ថុកម្ពុជាបានដាក់ចេញគោលដៅ 2ចំណុច រួមមាន៖1-ការផ្ដល់ឥណទានដល់ប្រជាជនដែលមិនទាន់ទទួលបានសេវាហិរញ្ញវត្ថុនេះពីគ្រឹះស្ថានផ្លូវការ។

2-ធ្វើយ៉ាងណាឱ្យអតិថិជនទទួលបានការរីកចម្រើន ដើម្បីជួយឱ្យវិស័យគ្រឹះស្ថានមីក្រូហិរញ្ញវត្ថុទទួលបានភាពល្អប្រសើរ ព្រោះគ្រឹះស្ថានមីក្រូហិរញ្ញវត្ថុអាចជោគជ័យទៅបាន លុះត្រាតែអតិថិជនទទួលបានជោគជ័យដូចគ្នា។

លោកបានបន្ថែមថា ការរីកចម្រើននេះអាចនិយាយបានថា ជាកត្តាជោគជ័យមួយសម្រាប់យើងទាំងអស់គ្នា និងទទួលស្គាល់ថា ជាការជោគជ័យរបស់អតិថិជន ដោយសារអតិថិជនទទួលបានឥណទានយកទៅប្រើប្រាស់ដើម្បីបង្កើនមុខរបរនិងទទួលបានផលចំណេញដល់ក្រុមគ្រួសាររបស់ពួកគាត់។ ការលើកឡើងបែបនេះរបស់លោក គាបូរាណ ធ្វើឡើងក្នុងឱកាសដែលលោកអញ្ជើញចូលរួមក្នុងកម្មវិធី “ការអភិវឌ្ឍន៍សេដ្ឋកិច្ចជនបទតាមរយៈវិស័យមីក្រូហិរញ្ញវត្ថុ” ដែលរៀបចំឡើងដោយមានការចូលរួមពីលោក ហេង បូមករា អគ្គនាយករងត្រួតពិនិត្យ នៃធនាគារជាតិនៃកម្ពុជា កាលពីថ្ងៃទី21 ខែតុលា ឆ្នាំ2019។

លោកបញ្ជាក់ថា គ្រឹះស្ថានមីក្រូហិរញ្ញវត្ថុ ចាប់ផ្ដើមរីកចម្រើនខ្លាំងនៅអំឡុងឆ្នាំ2006 ប៉ុន្ដែនៅក្នុងឆ្នាំ2009-2010 កម្ពុជាបានជួបវិបត្តិសេដ្ឋកិច្ចពិភពលោក ធ្វើឱ្យថមថយមួយរយៈពេល តែបានរីកលូតលាស់មកវិញនៅចុងឆ្នាំ2010។

លោក គា បូរាណ បានបញ្ជាក់បន្ថែមថា ដំណាក់កាលសព្វថ្ងៃនេះជាដំណាក់កាលទី3 និងជាដំណាក់កាលដែលវិស័យនេះកំពុងតែរីកលូតលាស់ខ្លាំង ហើយរហូតមកដល់ពេលនេះមានប្រជាពលរដ្ឋជាង 2.1លានគ្រួសារទទួលបានសេវាប្រាក់កម្ចីពីវិស័យមីក្រូហិរញ្ញវត្ថុកម្ពុជា (សូមបញ្ជាក់ថា គ្រឹះស្ថានមីក្រូហិរញ្ញវត្ថុស្ថិតក្រោម CMA) ដែលមានអាជ្ញាប័ណ្ណពីធនាគារជាតិនៃកម្ពុជាក្នុងការផ្ដល់ឥណទានដល់ជនបទ។

ចំណែកលោក ហេង បូមករា អគ្គនាយករងត្រួតពិនិត្យ នៃធនាគារជាតិនៃកម្ពុជាក៏បានឱ្យដឹងផងដែរថា ការរួមចំណែករបស់គ្រឹះស្ថានមីក្រូហិរញ្ញវត្ថុ ពិតជាមានសារៈសំខាន់ក្នុងការលើកកម្ពស់ជីវភាពរបស់ប្រជាជនកម្ពុជា និងបានរួមចំណែកយ៉ាងសំខាន់ ក្នុងការជំរុញផ្នែកហិរញ្ញវត្ថុនៅកម្ពុជា ដើម្បីឈានទៅរកការអភិវឌ្ឍសេដ្ឋកិច្ច។

លោកបានបន្ដថា ជាមួយនឹងការរីកចម្រើននេះ ក៏មានបញ្ហាប្រឈមមួយចំនួនផងដែរ ដែលរួមមាន៖ ការផ្ដល់សេវាមិនបានឆ្លើយតបនឹងតម្រូវការរបស់អតិថិជន ការផ្ដល់សេវាដោយគ្មានវិជ្ជាជីវៈ ការបោកប្រាស់អតិថិជន ហើយសម្រាប់គ្រឹះស្ថានខ្លះ មិនបានបង្ហាញតម្លៃសេវា និងលក្ខខណ្ឌទាំងអស់ដល់អតិថិជនឡើយ។

លោកអគ្គនាយករង បានបញ្ជាក់ថា ដើម្បីដោះស្រាយបញ្ហាទាំងនេះ ធនាគារជាតិនៃកម្ពុជា បានដាក់ចេញវិធានការជាច្រើនតាមរយៈឞទប្បញ្ញតិ្តក្នុងគោលបំណងផ្ដល់ព័ត៌មាន ការពារសិទ្ធិ និងផលប្រយោជន៍របស់អតិថិជន ព្រមទាំងលើកទឹកចិត្តដល់សាធារណជនលើប្រព័ន្ធធនាគារថែមទៀតផង៕

November 10, 2019

អតីតសិល្បករ គឹម ចាន់រតនា បញ្ចេញបទថ្មី «អូនកូនអ្នកណា?» មិនរំពឹងបានចំណូលពីសិល្បៈវិញ

ក្រោយពីអន្ទងចិត្តមហាជន ឱ្យឃើញពីការប្រឹងប្រែងក្នុងសិល្បៈតាមរយៈបទ«ទំនួញអកឈ្មោល»លោក គឹម ចាន់រតនា ក៏បញ្ចេញបទថ្មីមួយទៀត «អូនកូនអ្នកណា?» ដោយជ្រើសយកភរិយាលោកជាតួសម្ដែងផងដែរ។ ស្របពេលប្រឡូកក្មុងអាជីពជាតន្ត្រីករ និង ជាតារាចម្រៀង ក្នុងវង់អកកេស លោក គឹម ចាន់រតនា និង អ្នកស្រី ជិន វណ្ណារី មិនមានឱកាសដណ្ដើមបានកេរ្តិ៍ឈ្មោះបោះសំឡេងនោះទេ តែអ្នកសិល្បៈមួយគូនេះបានប្រែខ្លួនជាអ្នកជំនួញ។

ទន្ទឹមការចេញបទចម្រៀងថ្មី តន្ត្រីកររូបនេះ បានបញ្ជាក់ថា លោកបញ្ចេញបទចម្រៀង មិនមែនចង់ល្បី និងចង់ឱ្យមានការទាក់ទងលោកឡើងឆាក ដើម្បីបានលុយនោះទេ។ ពោលគឺលោកផលិតបទចម្រៀងដោយបកស្រាយសំនៀងខ្លួនឯង ដោយសារតែស្រលាញ់អាជីពចម្រៀង និងចង់ផលិតបទដែលលោកស្រឡាញ់ ទុកជាអនុស្សាវរីយ៍ប៉ុណ្ណោះ។ អ៊ីចឹងហើយ ទើបខណៈម្ចាស់សំនៀងភាគច្រើន ជ្រើសយកតារាល្បីៗ ឱ្យជួយសម្ដែង ដើម្បីលើកមុខ MV សម្រាប់លោកគឺរើសភរិយាខ្លួនឯងតែម្ដង ដើម្បីសម្ដែងក្នុងបទរបស់លោក ទុកគ្រាន់ចែកកូនមើលលេង និងទុកជាអនុស្សាវរីយ៍ ដើម្បីបង្ហាញថាទំនាក់ទំនងប្ដីប្រពន្ធរបស់លោក បើទោះជាពេលនេះម្នាក់ៗរវល់ច្តើន ហើយប្រេក្លាយជីវភាពលូយឆាយខុសពីមុន ក៏ស្នេហានៅតែរឹងមាំ។

លោកបន្ដថា កាលពីនៅប្រឡូកសិល្បៈលោកគ្រាន់តែជាអ្នកលេងភ្លេងប៉ុណ្ណោះ ចំណែកភរិយាទើបជាអ្នកចម្រៀងអាជីព។ លោក និងភរិយា គម្រោងចេញបទបកស្រាយរួមគ្នា ក្រោយពីចេញបទ”អូនកូនអ្នកណា” ដែលជាបទសារ៉ាវ៉ាន់ សម្រាប់អបអរបុណ្យអុំទូកនេះផង។ គួរបញ្ជាក់ថា លោក គឹម ចាន់រតនា គឺជាអតីតតន្ត្រីករ ខណៈភរិយាគឺជាអ្នកចម្រៀងក្នុងវង់អកកេសមួយ កាលពីប្រមាណ១០ឆ្នាំ ដោយសូម្បីតែឈ្នួលបង់ផ្ទះ ក៏ស៊ឹងមិនចង់មាន។ បច្ចុប្បន្នលោក និងភរិយា គឺជាម្ចាស់ក្រុមហ៊ុន LYK គឹមចាន់រតនា ហ្សាណា ដែលមានគម្រោងដីពុះឡូតិ៍ធំៗជាច្រើនគម្រោងន្រកាស លក់នៅស្រុកគងពិសី ក្នុងខេត្តកំពង់ស្ពឺ៕

November 10, 2019

កម្ពុជាពិភាក្សាតុមូលជាមួយ WB អំពីការអភិវឌ្ឍក្របខ័ណ្ឌសេដ្ឋកិច្ចឌីជីថលនៅកម្ពុជា

ឯកឧត្ដមអនុប្រធានឧត្តមក្រុមប្រឹក្សាសេដ្ឋកិច្ចជាតិ និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងាររៀបចំក្របខ័ណ្ឌគោលនយោបាយសេដ្ឋកិច្ចឌីជីថលនៅកម្ពុជា បានដឹកនាំក្រុមការងារទៅធ្វើទស្សន-កិច្ចសិក្សាអំពីបច្ចេកវិទ្យាឌីជីថល និងការរៀបចំសេដ្ឋកិច្ចឌីជីថលនៅតំបន់ Silicon Valley ស្ថិតនៅក្នុងរដ្ឋកាលីហ្វ័រនីញ៉ាសហរដ្ឋអាមេរិក។

ឯកឧត្តម វង្សី វិស្សុត បានឱ្យដឹងថា៖“ដំណើរទស្សនកិច្ចសិក្សានេះមានគោលបំណងឈ្វេងយល់អំពីភាពជោគជ័យ ក៏ដូចជាភាពនាំមុខរបស់តំបន់ Silicon Valley នៅលើពិភពលោកពាក់ព័ន្ធនឹងការអភិវឌ្ឍបច្ចេកវិទ្យាឌីជីថលក៏ដូចជាការរៀបចំលក្ខខណ្ឌអំណោយផលទាំងឡាយ សម្រាប់គាំទ្រដល់ការបណ្តុះគំនិតនវានុវត្តន៍ ការបង្កើតធុរកិច្ចថ្មី ការរៀបចំថ្នាល និងប្រព័ន្ធអេកូ សម្រាប់ការអភិវឌ្ឍសហគ្រិនភាព បរិយាប័ន្នហិរញ្ញវត្ថុ អំពីតម្រូវការ និងការអភិវឌ្ឍជំនាញឌីជីថល ការរៀបចំគោលនយោបាយពាក់ព័ន្ធនឹងបញ្ញាសិប្បនិមិត្ត ការប្រើប្រាស់ប្រព័ន្ធសង្គម និងនិន្នាការនៃការវិវឌ្ឍ វិស័យបច្ចេកវិទ្យាទៅថ្ងៃអនាគត”។

ពិសេសទៅទៀតនោះតួនាទីរបស់សេដ្ឋកិច្ចឌីជីថល ក្នុងការជួយជំរុញកំណើនសេដ្ឋកិច្ចជាតិ ព្រមទាំងការបណ្តាក់ទុនរួមគ្នា និងការបង្កើតការងារ សំដៅប្រមូលធាតុចូល និងដកស្រង់បទពិសោធន៍ល្អៗពីសហរដ្ឋអាមេរិក សម្រាប់ជាមូល-ដ្ឋានក្នុងរៀបចំក្របខ័ណ្ឌគោលនយោបាយសេដ្ឋកិច្ចឌីជីថលនៅកម្ពុជាឱ្យមានលក្ខណៈកាន់តែគ្រប់ជ្រុងជ្រោយ។

ក្នុងដំណើរទស្សនកិច្ចនេះ គណៈប្រតិភូកម្ពុជាផ្តោតលើធាតុគន្លឹះសំខាន់ៗក្នុងការអភិវឌ្ឍក្រប-ខ័ណ្ឌសេដ្ឋកិច្ចឌីជីថលឱ្យក្លាយជាចន្ទល់សេដ្ឋកិច្ចជាតិ ដោយបានធ្វើទស្សនកិច្ចទៅកាន់ក្រុមហ៊ុនបច្ចេកវិទ្យាធនាគារ គ្រឹះស្ថានអប់រំ និងបណ្តុះបណ្តាល ព្រមទាំងស្ថាប័នសិក្សាស្រាវជ្រាវទាំងឯកជន និងសាធារណៈក្នុងការបណ្តុះគោលគំនិតនវានុវត្តន៍ និងក្រុមហ៊ុន Intel ដើម្បីឈ្វេងយល់ពីបញ្ញាសិប្បនិម្មិតធនាគារ និងពីការបង្កើតឱ្យមានអេកូឡូស៊ីហិរញ្ញប្បទានដល់សហគ្រិនភាព។

គួរបញ្ជាក់ដែរថា តំបន់ Silicon Valley គឺស្ថិតនៅភាគខាងត្បូងនៃទីក្រុងសានហ្វ្រានស៊ីស្កូ នៃរដ្ឋកាលី-ហ្វ័រនីញ៉ា ជាមជ្ឈមណ្ឌលដែលប្រមូលផ្តុំនវានុវត្តន៍ដ៏វិសេសវិសាល និងសម្បូរបែប ជាពិសេសធុរកិច្ចថ្មីៗដែលផ្អែកលើបច្ចេកវិទ្យាទំនើប និងមានក្រុមហ៊ុនបច្ចេកវិទ្យាខ្នាតយក្សសកលលោកជាច្រើន រួមមាន៖ ក្រុមហ៊ុន Apple, Google, Facebook ជាដើម។

ជាមួយគ្នានេះដែរ កម្ពុជា និងធនាគារពិពភលោក(WB)បានរៀបចំកិច្ចពិភាក្សាតុមូលពិសេសមួយស្ពីពីការរៀបចំក្របខណ្ឌសេដ្ឋកិច្ចឌីជីថលកម្ពុជា នៅទីស្នាក់ការកណ្តាលរបស់ធនាគារពិភពលោកនៅក្នុងអំឡុងពេលនៃកិច្ចប្រជុំប្រចាំឆ្នាំរបស់ធនាគារពិភពលោក និងមូលធិនិរូបិយវត្ថុអន្តរជាតិ (WB-IMF Annual Meeting) ឆ្នាំ2019នេះ នៅរដ្ឋធានីវ៉ាស៊ីនតោន សហរដ្ឋអាមេរិក។

កិច្ចពិភាក្សាតុមូលពិសេសនេះ ខាងភាគីកម្ពុជាដឹកនាំដោយឯកឧត្តម វង្សី វិស្សុត ជាប្រធានក្រុមការងាររៀបចំក្របខ័ណ្ឌគោលនយោបាយសេដ្ឋកិច្ចឌីជីថលនៅកម្ពុជា ឯខាងភាគីធនាគារពិភពលោក ដឹកនាំដោយលោកស្រី អនុប្រធានរបស់ធនាគារពិភពលោកចំនួន 2រូប គឺលោកស្រី Vicotria Kwa-kwa អនុប្រធានទទួលបន្ទុកកិច្ចការតំបន់អាស៊ីបូព៌ា និងប៉ាស៊ីហ្វិក និងលោកស្រី Ceylay Pazarba sioglu អនុប្រធានទទួលបន្ទុកផ្នែកកំណើនសមធម៌ ហិរញ្ញវត្ថុ និងស្ថាប័ន ព្រមទាំងមន្ត្រីជាន់ខ្ពស់ និងអ្នកជំនាញការរបស់ធនាគារពិភពលោក និងគណៈប្រតិភូមកពីប្រទេសឡាវ មីយ៉ាន់ម៉ា និងវៀតណាមផងដែរ។ គោលបំណងនៃការរៀបចំកិច្ចប្រជុំតុមូលនេះគឺដើម្បី៖

*ទី1- ធ្វើការពិភាក្សា និងពិគ្រោះយោបល់លើឯកសារទស្សនាទានរួម (Concept Note) នៃការរៀប ចំក្របខ័ណ្ឌគោលនយោបាយអភិវឌ្ឍន៍សេដ្ឋកិច្ចឌីជីថលកម្ពុជា ដែលបានរៀបចំដោយផ្ទាល់ ដោយ ក្រុមការងារនៃឧត្តមក្រុមប្រឹក្សាសេដ្ឋកិច្ចជាតិ។

*ទី2- ស្វែងយល់ពីនិន្នាការនៃសេដ្ឋកិច្ចឌីជីថលនៅក្នុងតំបន់ និងពិភពលោកដែលរួមមានទាំងកាលានុវត្តភាព បញ្ហាប្រឈម និងហានិភ័យ ពិសេសការ-ផ្លាស់ប្តូរទស្សនវិស័យ មេរៀន និងបទពិសោធន៍របស់បណ្តាប្រទេសមួយចំនួន នៅក្នុងតំបន់អាស៊ី និងប៉ាស៊ីហ្វិក ពាក់ព័ន្ធនឹងការរៀបចំ និងការអនុវត្តគោលនយោបាយអភិវឌ្ឍន៍សេដ្ឋកិច្ចឌីជីថល។

ឯកឧត្តម វង្សី វិស្សុត បានថ្លែងថា៖ “ក្នុងបរិបទនៃបដិវត្តន៍ឧស្សាហកម្មទី4 និងដើម្បីអាចសម្រេចបាននូវចក្ខុវិស័យ ក្លាយជាប្រទេសចំណូលមធ្យមកម្រិតខ្ពស់នៅឆ្នាំ2030 ប្រទេសកម្ពុជាពិត ជាមានភាពចាំបាច់ណាស់ក្នុងពេលនេះជាងពេលណាៗទាំងអស់ ក្នុងការចាប់យកនូវកាលានុវត្តភាព និងសក្តានុពលទាំងឡាយពីវិស័យបច្ចេកវិទ្យាឌីជីថលសំដៅធ្វើយ៉ាងណាឱ្យវិស័យឌីជីថលអាចក្លាយទៅជាក្បាលម៉ាស៊ីនអូសកំណើនសេដ្ឋកិច្ចថ្មី និងដើម្បីប្រើប្រាស់វិស័យបច្ចេកវិទ្យាសម្រាប់ធ្វើការពង្រួញផ្លូវ និងពន្លឿនការអភិវឌ្ឍប្រទេស ការបង្តើនផលិត-ភាព ប្រសិទ្ធភាព និងភាពប្រកួតប្រជែង ព្រមទាំងការ-ដោះស្រាយបញ្ហាប្រឈមនានាដែលកំពុងមានស្រាប់ ក៏ដូចជាបញ្ហាប្រឈមនានាដែលអាចកើតមានឡើងជាយថាហេតុ ដោយសារឥទ្ធិពលនៃការ-ប្រើប្រាស់បច្ចេកវិទ្យា ។

ឯកឧត្តមបានបន្តថា៖ “ក្នុងស្មារតីនេះ កាលពីដើមឆ្នាំ2019 កន្លងទៅនេះ ឧត្តមក្រុមប្រឹក្សា សេដ្ឋកិច្ចជាតិបានបង្កើតនូវក្រុមការងារបច្ចេកទេសដើម្បីរៀបចំក្របខ័ណ្ឌគោលនយោបាយអភិវឌ្ឍន៍សេដ្ឋកិច្ចឌីជីថលកម្ពុជា នៅក្នុងរយៈពេលវែង ដែលគិតមកទល់នឹងពេលនេះ ក្រុមការងារបានរៀបចំនូវឯកសារទស្សនាទានរួម សម្រាប់ជាមូលដ្ឋានក្នុងការ-ផ្តោតលើអាទិភាព និងយុទ្ធសាស្ត្ររួមមាន៖

*ទី1- ការរៀបចំ និងបង្តើតរដ្ឋាភិបាលឌីជីថលគ្រប់ជ្រុងជ្រោយ ដើម្បីម្យ៉ាងពង្រឹងការផ្តល់សេវាសាធារណៈប្រកបដោយគុណភាព ប្រសិទ្ធភាព តម្លាភាព និងជាគំនាស់សម្រាប់ជំរុញសេដ្ឋកិច្ចឌីជី-ថល និងនវានុវត្តន៍ផងដែរ។

*ទី2- ការជំរុញវិនិយោគលើវិស័យហេដ្ឋារចនា-សម្ព័ន្ធឌីជីថល ដូចជាខ្សែកាប្លិ៍អុបទិក ខ្សែកាប្លិ៍អុប-ទិកតាមបាតសមុទ្រ មជ្ឈមណ្ឌលទិន្នន័យ និងការ-តភ្ជាប់បណ្តាញសេវាដល់អ្នកប្រើប្រាស់ និងធុរកិច្ច ដើម្បីធ្វើឱ្យសេវាអុិនធើណិត កាន់តែមានល្បឿនលឿន ហើយមានតម្លៃកាន់តែថោកជាងមុន និងមានវិសាលភាពអាចគ្របដណ្តប់ទូទាំងប្រទេស។

*ទី3- ការទាញយកប្រយោជន៍ជាអតិបរិមាពីវិស័យឌីជីថល តាមរយៈការបង្កើនអក្ខរកម្ម និងសមត្ថភាពឌីជីថល ពិសេសការអភិវឌ្ឍជំនាញឌីជីថល និងការស្រាវជ្រាវ និងអភិវឌ្ឍន៍ (R&D)។

*ទី4- ការបង្កើតក្របខ័ណ្ឌច្បាប់ និងបទប្បញ្ញតិ្តពាក់ព័ន្ធផ្សេងៗ ពិសេសបទដ្ឋានស្តង់ដាមួយចំនួន ក្នុងគោលដៅពង្រឹងការគ្រប់គ្រងទិន្នន័យ ការការពារទិន្នន័យឯកជន និងការទប់ស្តាត់បទល្មើសក្នុងវិស័យបច្ចេកវិទ្យាព័ត៌មានជាដើម ។

*ទី5- ការបង្កើតនូវថ្នាល និងប្រព័ន្ធអេកូឡូស៊ីសម្រាប់លើកស្ទួយសហគ្រិនភាព និងការបង្កើតធុរកិច្ចថ្មី (Startup) ក្នុងវិស័យឌីជីថល។

ឯកឧត្តម វង្សី វិស្សុត បានគូសបញ្ជាក់ថា៖ “ រាជរដ្ឋាភិបាលបាននិងកំពុងដាក់ចេញនូវវិធានការមួយចំនួនជាបន្តបន្ទាប់រួចហើយក្នុងគោលដៅបង្កើតនូវប្រព័ន្ធអេកូឡូស៊ីខាងលើនេះ ដូចជា៖

*ទី1- ការបង្កើត និងដាក់ឱ្យដំណើរការមូលនិធិអភិវឌ្ឍន៍ជំនាញ (SDF)

*ទី2- ការបង្កើត និងដាក់ឱ្យដំណើរការមជ្ឈ-មណ្ឌលបណ្តុះធុរកិច្ចថ្មីតេជោ

*ទី3- ការបង្កើត និងដាក់ឱ្យដំណើរការមូលនិធិ-អភិវឌ្ឍន៍សហគ្រិនភាព (EDF) និងមជ្ឈមណ្ឌលលើកកម្ពស់សហគ្រិនភាព (EPC)

*ទី4- ការរៀបចំបង្កើតធនាគារសហគ្រាសធុនតូច និងមធ្យម (SMEs Bank) ជាដើម។

នៅក្នុងកិច្ចប្រជុំតុមូលនេះ ក្រៅពីការពិភាក្សាលើឯកសារទស្សនាទានរួមនៃការរៀបចំក្របខ័ណ្ឌគោលនយោបាយអភិវឌ្ឍន៍សេដ្ឋកិច្ចឌីជីថលកម្ពុជាដែលធ្វើបទបង្ហាញដោយក្រុមការងារភាគីកម្ពុជាហើយ នៅមានការផ្លាស់ប្តូរទស្សនៈ និងមតិយោបល់ផងដែរលើបទបង្ហាញរបស់ជំនាញការជាន់ខ្ពស់របស់ធនាគារពិភពលោកលើប្រធានបទសំខាន់ៗដូចជា៖ការអភិវឌ្ឍហេដ្ឋារចនាសម្ព័ន្ធឌីជីថលការ-រៀបចំថ្នាល និងប្រព័ន្ធអេកូឡូស៊ីសម្រាប់សហគ្រិន-ភាពឌីជីថល ពិសេសពាណិជ្ជកម្មអេឡិចត្រូនិក (E-Commerce) ការរៀបចំក្របខ័ណ្ឌច្បាប់ និងការទូទាត់តាមប្រព័ន្ធបច្ចេកវិទ្យាហិរញ្ញវត្ថុ (Fintech) និងការអភិវឌ្ឍប្រកបដោយបរិយាប័ន្នក្នុងយុគសម័យឌីជីថល ព្រមទាំងអន្តរាគមន៍ និងអាទិភាពគោលនយោបាយរបស់ធនាគារពិភពលោកក្នុងការគាំទ្រដល់ការអភិវឌ្ឍសេដ្ឋកិច្ចឌីជីថលនៅក្នុងតំបន់ ។

សូមបញ្ជាក់ផងដែរថា ការរៀបចំក្របខ័ណ្ឌគោលនយោបាយរយៈពេលវែងនៃសេដ្ឋកិច្ចឌីជីថលកម្ពុជា ត្រូវបានធ្វើឡើងទាំងស្រុងដោយក្រុមការងារនៃឧត្តមក្រុមប្រឹក្សាសេដ្ឋកិច្ចជាតិ ដោយមានការ-ចូលរួមពីដៃគូសំខាន់ៗមួយចំនួន ជាពិសេសស្ថាប័នធនាគារពិភពលោក៕

November 10, 2019

សមាជិកក្រុម Cambodia Super Model ធ្វើឱ្យកក្រើកព្រឹត្តិការណ៍ Successful CEO Award 2019

ព្រឹត្តិការណ៍ Successful CEO Award 2019 ទទួលបានការចាប់អារម្មណ៍យ៉ាងខ្លាំង ខណៈដែលមានសមាសភាពតារាល្បីៗជាច្រើនចូលរួមពីក្រុមបង្ហាញម៉ូដ Cambodia Super Model រួមមាន អ្នកនាង ចន ច័ន្ទលក្ខិណា អ្នកនាង កែវ ពេជ្រ ពិសី អ្នកនាង លី ម៉ារីណា អ្នកនាងនៅ សូនីតា និង កញ្ញា សូដា នីតា ជាដើម។

តារាល្បីៗដែលធ្លាប់ជួយអោយក្រុម Cambodia Super Model មួយនេះ ល្បីកក្រើក ប៉ុន្តែក្រោយពេលអ្នកទាំង៤ល្បីរៀងខ្លួន ក៏កម្រឃើញប៉ះគ្នា ក្នុងសកម្មភាពដើរម៉ូដ អស់មួយរយៈធំ។ នៅក្នុងថ្ងៃនោះ ក៏មានតារាល្បីស៊េរីក្រោយ ដែលកំពុងឡើងកូដបង្ហាញខ្លួនផងដែរ ដូចជា កញ្ញា អ៊ឹង និមល កញ្ញា សុផា លីនដា កញ្ញា សោម ស្រីនាថ Miss Grand កញ្ញា ហេង ចន្ថា និង កញ្ញា ឌី លីកា ផងដែរ ទើបធ្វើអោយវេទិកាបង្ហាញផលិតផលថែរក្សាសម្រស់មុទិតា របស់កញ្ញា ឌួង ហ្សូរីដា កាន់តែកក្រើក នៅក្នុងពិធី Successful CEO Award 2019 ដែលជាវេទិកាប្រកួតប្រជែង និងប្រគល់រង្វាន់ឆ្នើមចំនួន២០ ដល់ស្រីជាម្ចាស់ក្រុមហ៊ុន ដែលជោគជ័យក្នុងមុខជំនួញ។

កញ្ញា ឌួង ហ្សូរីដា និយាយនៅពីថ្ងៃទី៨ វិច្ឆិកា ឆ្នាំ២០១៩ ថា កញ្ញា រំភើបចិត្តយ៉ាងខ្លាំង ដែលសមាជិកចាស់ៗក្នុងក្រុម Cambodia Super Model ដូចជាអ្នកនាង ចន ច័ន្ទលក្ខណៈ អ្នកនាង លី ម៉ារីណា អ្នកនាង កែវ ពេជ្រពិសី អ្នកនាង សូដា នីតា និង កញ្ញា សូដា នីតា ដែលសុទ្ធតែជាសមាជិកដំបូងៗប្រចាំក្រុម មកដើរម៉ូដជុំគ្នា។ កញ្ញាថាអ្នកទាំង៥ ខកខានជួបគ្នាក្ន៧ងវេទិកាបែបនេះជាយូរមកហើយ ទើបកញ្ញា ចាត់ទុកថា គឺជាវេទិកាសំខាន់មួយ ដែលអ្នកទាំង៥ បានធ្វើអោយចាប់អារម្មណ៍ជាថ្មី។ កញ្ញាចាត់ទុកថាតារាល្បីៗទាំង៥ និង តារាថ្មីៗទាំង៥ មិនខុសពីបង្កើតវេទិកាប៉ះគ្នាផង និងមកអបអរកញ្ញាផង ដែលទទួលបានពានឆ្នើមក្នុងចំណោម CEO ឆ្នើម២០រូប ពីកម្មវិធីនាថ្ងៃនោះទេ។

November 10, 2019

មិនធម្មតា!! ឌួង ហ្សូរីដា លើកពានឆ្នើមប្រចាំឆ្នាំក្នុងកម្មវិធី « Successful CEO Award 2019 »

តារាសម្ដែង និងជាពិធីការិនីល្បីឈ្មោះ ឌួង ហ្សូរីដា ដែលត្រូវគេដឹងថា កំពុងជោគជ័យក្នុងមុខជំនួញ នាំចូលផលិតផលថែរក្សាសម្រស់នោះ ទទួលបានពានឆ្នើមមួយផ្សេងទៀតហើយ ដែលពានលើកនេះ រឹតតែជាពានកិត្តិយសថែមទៀត ដ្បិតតែប្រគល់ជូនដោយអ្នករៀបចំក្នុងស្រុក បន្ទាប់ពីបានទទួលពានទាំងបង និងប្អូន ក្នុងចំណោម អ្នកជំនួញស្រ្តីឆ្នើមៗ មកពីបណ្ដាប្រទេសផ្សេងៗក្នុងប្រទេសថៃ។ នេះជាជំហានកាន់ តែជោគជ័យខ្លាំង បន្ទាប់ពីកញ្ញា សម្រេចចិត្តបើកក្រុមហ៊ុន មុទិតា ដែលមានផលិតផលថែរក្សាសម្រស់ ស្ដង់ដារច្រើនប្រភេទចរាចរ នៅកម្ពុជា។

យោងតាមកម្មវិធី Successful CEO Award 2019 ដែលមានវត្តមានលោកស្រី វេជ្ជបណ្ឌិត ឱ វណ្ណឌីន រដ្ឋលេខាធិកាក្រសួងសុខាភិបាល និង លោកឧកញ៉ា ចិត្រ សេរីសុភ័ក្ត្រ អ្នករៀបចំកម្មវិធី ដែលធ្វើឡើងនៅផ្សារទំនើបអ៊ីអន២ កាលពីល្ងាចថ្ងៃទី៨ វិច្ឆិកា ឆ្នាំ២០១៩ ប្រកាសថា កញ្ញា ឌួង ហ្សូរីដា ម្ចាស់ប្រេន MUDHITA GS-2113 ប្រេន SSO/SHO និង Brand N27 និងជាអគ្គនាយិកាក្រុមហ៊ុន MUDHITA Trading Co.LTD ទទួលបានពានឆ្នើមប្រចាំឆ្នាំ ក្នុងចំណោមម្ចាស់មុខជំនួញ២០រូប ដែលត្រូវបានកម្មវិធីសម្រេចប្រគល់ជូន។ ម្ចាស់ផលិតផលដែលទទួលបានពានឆ្នើម នៅក្នុងថ្ងៃនោះ គឺសំដៅលើម្ចាស់ក្រុមហ៊ុនផលិតផលដែលបានចុះបញ្ជីត្រឹមត្រូវក្នុងក្រសួងសុខាភិបាល ក្រសួងពាណិជ្ជកម្ម និងត្រូវបានចុះបញ្ជីផលិតផលគ្រប់ប្រភេទជាមួយក្រសួងសុខាភិបាល ព្រមជាមួយនឹងលក្ខណ្ឌជោគជ័យលើទីផ្សារនាំមុខ ទើបត្រូវបានកម្មវិធីអនុញ្ញាតិអោយចូលប្រកួត។ អ៊ីចឹងហើយ ទើប កញ្ញា ឌួង ហ្សូរីដា ទទួលបានកិត្តិយសយ៉ាងខ្លាំងបន្ទាប់ពីត្រូវបានប្រកាសថាឈ្នះពាន Top 20 ក្នុងចំណោម CEO ដែលមានឈ្មោះប្រកួតជាច្រើនមកពីគហរប់ទិសទី។

នៅក្នុងពិធីនោះ បណ្ដាក្រុមហ៊ុនចូលរួម ក៏បានរៀបចំតារាម៉ូដែលស្អាត អោយដើរបង្អួតផលិតផលរបស់ខ្លួននោះផង ខណៈដែល កញ្ញា ឌួង ហ្សូរីដា បានសម្ញ៉ែងតារា Cambodia Super Model ដែលសុទ្ធតែជាសមាសភាពល្បីៗ ដូចជា អ្នកនាង ចន ច័ន្ទលក្ខិណា, អ្នកនាង កែវ ពេជ្រ ពិសី, អ្នកនាង លី ម៉ារីណា, អ្នកនាងនៅ សូនីតា, កញ្ញា សូដា នីតា, កញ្ញា អ៊ឹង និមល, កញ្ញា សុផា លីនដា, កញ្ញា សោម ស្រីនាថ, Miss Grand កញ្ញា ហេង ចន្ថា និង កញ្ញា ឌី លីកា ជាដើម។

November 10, 2019

ព្រះកាយច័ន្ទ ប៉ះគ្នាដំបូងជាមួយប្រុសសង្ហា សន ពិសិដ្ឋ ក្នុងរឿង « សម្បថដងស្ទឹង »

ភាពយន្តភាគទី២៣របស់ស្ថានីយទូរទស្សន៍ប៉ុស្ដិ៍លេខ៥មានចំណងជើងថា « សម្បថដងស្ទឹង » មានសរុបចំនួនដល់ទៅ៣០ភាគនេះ គ្រោងនឹងបញ្ចប់នៅចុងឆ្នាំ២០១៩ ដើម្បីដាក់ផ្សាយផ្លូវការនៅពាក់កណ្ដាលឆ្នាំក្រោយខាងមុខ ដែលមានតារាឯកស្រី កញ្ញា ព្រះកាយច័ន្ទ និងតួឯកប្រុស លោក សន ពិសិដ្ឋ។

រឿងភាគមួយនេះ គេបានដឹងថាតួឯកប្រុសស្រីខាងលើដែលមិនធ្លាប់ជួបសម្ដែងជាមួយគ្នាសោះនោះ តែឥឡូវស្រាប់តែជួបគ្នាក្នុងខ្សែភាពយន្តបែបស្រុកស្រែចម្ការ។ ដោយសារមានទេពកោសល្យសិល្បៈពហុជំនាញទើបតារាស្រី ព្រះកាយច័ន្ទដែលនាង រមែងគ្រប់គ្រងតំណែងតួឯកគ្រប់រឿង។ បើទោះជាការជួបគ្នាលើកដំបូង ប៉ុន្តែពួកគេទាំងពីរមានជំនឿថា អាចនឹងសម្ដែងចូលគ្នាបានល្អ ដោយសំអាងថា ម្នាក់ៗក៏សុទ្ធតែមានបទពិសោធន៍ច្រើនរៀងៗខ្លួនហើយ។ ពួកគេទាំងពីរ ទើបតែប៉ះគ្នាលើកដំបូងបំផុតក្នុងការសម្ដែង។ កុំថាឡើយថា ការសម្ដែង សូម្បីតែនៅខាងក្រៅ ក៏មិនដែលបានជួបគ្នាផងដែរ។ ដោយឡែក ខាងប្រុស ក៏អះអាងដូចគ្នាថា ជាបទពិសោធន៍លើកដំបូងរបស់លោកជាមួយ ព្រះកាយច័ន្ទ។ មិនត្រឹមប៉ុណ្ណឹង នេះគឺជាតួឯកលើកដំបូងថែមទៀតក្នុងការសម្ដែងភាពយន្តប្រភេទភាគសម្រាប់ទូរទស្សន៍។

គួរបញ្ជាក់ដែរថា នេះគឺជាសម្មិទ្ធិផលរឿងភាគទី ២៣ របស់ទូរទស្សន៍ប៉ុស្ត៍លេខ៥ ដោយក្នុងនោះក៏មានការរៀបចំ និង ដឹងនាំសម្ដែង ពីសំណាក់ក្រុមផលិតករថៃផងដែរ។ ភាពយន្តថ្មីនេះមានវត្តមានចូលរួមសម្ដែងពីសំណាក់តារាល្បីៗប្រុសស្រីចាស់ក្មេងជាច្រើនរូប ពោរពេញដោយទេពកោសល្យ ដើម្បីរួមគ្នាអង្រួនផ្ទៃរឿងទាំងមូលឱ្យកាន់តែមានភាពទាក់ទាញ។ យ៉ាងណាមិញពិធីក្រុងពាលីភាពយន្តភាគថ្មីមួយនេះបានធ្វើឡើងនៅបរិវេនសណ្ឋាគាសូហ្វីតែលភ្នំពេញ ដែលមានតារាចាស់ក្មេងជាច្រើនត្រូវបានគេឃើញបង្ហាញខ្លួនដូចជា ៖ កញ្ញា ព្រះកាយច័ន្ទ លោក សន ពិសិដ្ឋ កញ្ញា ដាឡែន លោក ខេន លោក វរៈ ថន លោក ឧត្តម លោក សុភ័ក្ត និងតារាកិត្តិយសជាច្រើនរូបទៀត។

ចង់ដឹងថាភាពយន្តភាគថ្មីនេះមានអ្វីថ្មីៗ និងសាច់រឿងបែបណាខ្លះ សូមប្រិយមិត្តរង់ចាំតាមដានទស្សនាទាំងអស់គ្នា៕

November 9, 2019

ភ្ញាក់ផ្អើល!! តារាសម្ដែង ភិន សុដាលីស បង្ហាញវត្តមានកិត្តយសក្នុងថ្ងៃសម្ពោធផ្សារទំនើប The Bridge

គេឃើញតារាសម្ដែងស្រី ភិន សុដាលីស បង្ហាញវត្តមានយ៉ាងលេចធ្លោក្នុងថ្ងៃកាត់ខ្សែបូផ្សារទំនើប The Bridge Lifestyle Mall នៅទល់មុខអតីតផ្សារកុងតឺណឺកោះពេជ្រ ដោយបានប្រកាសបើកដំណើរការសាកល្បង។ នៅរសៀលថ្ងៃទី8 ខែវិច្ឆិកា ឆ្នាំ2019 ក្នុងពិធីនោះ គេឃើញតារាហ្វេសប៊ុកស្រស់ស្អាតជាច្រើនរូប ដោយតារាសិល្បៈគឺមានតែអ្នកនាង ភិន សុដាលីស ម្នាក់ប៉ុណ្ណោះត្រូវបានគេអញ្ជើញជាតារាកិត្តិយស ដើម្បីធ្វើទស្សនកិច្ច និងបង្ហាញលក្ខណៈក្នុងផ្សារទាំង៥ជាន់ ដែលនឹងបើកសម្ពោធជាទ្រង់ទ្រាយធំក្នុងពេលខាងមុខ។ អ្វីដែលគេកត់សម្គាល់ គឺអ្នកនាងលេងខ្លួនស្រស់ស្អាតដូចក្រមុំ ខណៈដែលគ្រាន់តែចូលរួមជាកិត្តិយសប៉ុណ្ណឹងសោះ ក៏ទទួលបានតម្លៃខ្លួនលើសការសម្ដែងដប់ម្ភៃដងផងដែរ។

ភិន សុដាលីស បានប្រាប់អ្នកសារព័ត៌មានឡារ៉ែនថា មូលហេតុដែលនាងបង្ហាញខ្លួនក្នុងពិធីដំណើរការបណ្ដោះអាសន្នផ្សារទំនើបស្ដង់ដាររបស់ប្រទេសសិង្ហបុរីរូបនេះ គឺមិនមែនមកចូលរួមជាកិត្តិយសដូចភ្ញៀវទូទៅនោះទេ ដោយអ្នកនាងទទួលបានតម្លៃខ្លួនមួយតាមការព្រមព្រៀង ជាថ្នូរនឹងការបង្ហាញខ្លួន និង ធ្វើជាភ្ញៀវដើរទស្សនកិច្ចក្នុងផ្សារ ដែលបានតំណើរការនូវហាងមួយចំនួន។ អ្នកនាងថា ហេតុផលនៃការទាក់ទងគឺអ្នកនាងមិនបានដឹងខ្លួនមុននោះទេ ដោយត្រូវខាងអ្នករៀបចំកម្មវិធី ទាក់ទងអោយមកបង្ហាញខ្លួន ក្នុងនាមជាតារាកិត្តិយស។

អ្នកនាងថា បរិយាកាសក្នុងផ្សារ The Bridge Lifestyle Mall ប្រសិនបើគ្រាន់តែថតបង្ហោះមិនបញ្ជាក់ទីតាំង គឺប្រៀបដូចជាផ្សារនៅក្រៅប្រទេសតែម្ដង។ អ្វីដែលអ្នកនាងជាប់ចិត្ត គឺរចនាបទក្នុងផ្សារ ខណៈដែលហាងទំនិញ ភោជនីយដ្ឋាន និង ហាងភេសជ្ជៈ ក្នុងផ្សារដែលកំពុងដំណើរការស្រាប់ សុទ្ធស៊ឹងតែជាហាងល្បីៗនៅក្រៅប្រទេស ដែលអ្នកនាងបញ្ជាក់ថា អ្នកចង់ទទួលបានបរិយាកាសថ្មី ដូចនៅក្រៅប្រទេស គឺមកតែផ្សារស្ដង់ដារសិង្ហបុរីមួយនេះ គឺមិនខុសគ្នា។ ម្យ៉ាងមកទីផ្សារផ្សារនេះ ស្ថិតនៅក្នុងអាញារទំនើប នៅក្បែរកោះពេជ្រ ដែលជាប្រជុំជនកណ្ដាលរាជធានីផង ទើបអ្នកនាងកាន់តែជាប់ចិត្តខ្លាំង ពេលបានមកឃើញ។

អ្នកនាងបញ្ជាក់ដែរថា ផ្សារអាគារផ្សារទំនើប The Bridge Lifestyle Mall ក្រៅពីមានផ្សារ៥ជាន់ដែលសុទ្ធតែជាសំលៀកបំពាក់ ហាងភេសជ្ជៈ និង ភោជនីយ៍ដ្ឋានល្បីៗរបស់ពិភពលោកសរុបប្រមាណ៨០ហាង ក៏មាន កន្លែងស្នាក់នៅ សណ្ឋាគារ ការិយាល័យកម្រិតVIP និង ក្រុមហ៊ុនអចលនទ្រព្យ នៅផ្នែកខាងលើផងដែរ៕

November 9, 2019

និយមន័យរបស់ពាក្យថា “គូព្រេង” សម័យថ្មីនេះ ការពិតទៅ គឺបែបណាហ្ន៎?

ក្នុងយុគសម័យដ៏ទំនើបនាពេលបច្ចុប្បន្ននេះ និយមន័យរបស់ពាក្យថាគូព្រេងរបស់អ្នកអាចនឹងធំទូលាយខ្លាំងណាស់ ឧទាហរណ៍ដូចជា មនុស្សដែលអ្នកកំពុងមានសម្ពន្ធភាពយ៉ាងស៊ីជម្រៅជាមួយ មនុស្សដែលធ្វើឱ្យអ្នកមានអារម្មណ៍កក់ក្ដៅក្នុងចិត្ត និងរីកធំឡើង ជាមនុស្សដែលល្អបំផុត ជាពិសេសបើអ្នកកំពុងមានឧបសគ្គផ្សេងៗដ៏ច្រើនចូលមកក្នុងជីវិតផងនោះ តែខណៈពេលជាមួយគ្នា ខាងក្រោមនេះ គឺនិយមន័យរបស់ពាក្យថា “គូព្រេង” របស់បណ្ដាអ្នកជំនាញខាងផ្នែកសម្ពន្ធភាពមនុស្សនិងមនុស្ស។

សាម៉ុនថា រ៉ុដមែន អ្នកចិត្តវិទ្យា
គូព្រេង គឺមនុស្សដែលអ្នកអាចតភ្ជាប់ទំនាក់ទំនងបានយ៉ាងងាយស្រួល និងភ្លាមៗ តែក៏មិនមែនមានន័យថា មិនចាំបាច់ប្រើការព្យាយាមអ្វីសោះនោះដែរ… “នាងខ្ញុំជឿលើរឿងគូព្រេង នៅពេលអ្នកជួបនរណាម្នាក់ដែលគិតថាត្រូវចិត្ត និងមានអារម្មណ៍ថាមានសេចក្ដីសុខខ្លាំង វាអាចថាជាអារម្មណ៍របស់គូព្រេងក៏បាន តែយ៉ាងណាក៏ដោយមានមនុស្សជាច្រើននៅលើពិភពលោកនេះដែលអាចនឹងត្រូវចិត្តសម្រាប់អ្នក នៅពេលបានជួបគ្នា។ ការពិតគឺ មិនថាអ្នកនឹងមានសេចក្ដីសុខខ្លាំងប៉ុនណា ឬមនុស្សម្នាក់នោះចូលចុះជាមួយអ្នកបានខ្លាំងប៉ុនណានោះទេ តែអ្នកត្រូវតែប្រយ័ត្នប្រយែងទង្វើរបស់ខ្លួនឯង និងកុំបង្ខំចិត្តគេជាដាច់ខាត”។

មិឆេល វ៉ៃនើរ-ដេវីស អ្នកនិពន្ធរឿង Divorce Busting
ផ្នត់គំនិតរឿងគូព្រេង អាចនឹងធ្វើឱ្យមនុស្សយើងនឹករំពឹងទុកបែបខុសៗពាក់ព័ន្ធនឹងស្នេហា…“មនុស្សយើងនឹងព្រមលះបង់សម្ពន្ធភាពដទៃទៀតដើម្បីតាមរកមនុស្ស “ដែលពួកគេចង់រស់នៅជាមួយ” ដែលនេះគឺជាការនឹកស្រមើស្រមៃម្យ៉ាង។ អ្នកអាចសម្លឹងរកមើលមនុស្សថ្មីៗបានជាប់ជានិច្ច តែនៅពេលវេលាកន្លងទៅ អ្នកក៏ត្រូវតែត្រឡប់ទៅរាប់ពីលេខ1 មកជាថ្មី ដើម្បីរៀនយល់ដឹងក្នុងការធ្វើឱ្យសេចក្ដីស្នេហាគង់វង្សយូរអង្វែងដដែល”។

សាស្ត្រាចារ្យ ឡូរី ស៊ូ ប្រ៊ក់វេយ៍ អ្នកនិពន្ធរឿង Your Interfaith Wedding
គូព្រេង គឺជាមនុស្សដែលរស់នៅជាមួយគ្នា បើទោះជាមានឧបសគ្គ ឬក្ដីទុក្ខលំបាកដែលត្រូវប្រឈមក៏ដោយ… “ជាគំនិតផ្ទាល់ខ្លួន ខ្ញុំជឿលើរឿងគូព្រេង… គូអាពាហ៍ពិពាហ៍ភាគច្រើនអាចឈានរំលងរឿងការរើសអើងជាតិសាសន៍ វប្បធម៌ និងសាសនាបាន ពួកគេដឹងថា ពួកគេគួរតែរស់នៅជាមួយគ្នា។ សម្ពន្ធភាពរបស់ពួកគេស៊ីជម្រៅខ្លាំង ទោះជាមកពីពិភពដែលខុសប្លែកគ្នាក្ដី”។“គូព្រេងថែមទាំងត្រូវជម្រះបំណុល និងណាត់ជួបគ្រូពេទ្យរួមគ្នាទៀតផង។ ពួកគេត្រូវចិញ្ចឹមកូន និងជួបនឹងភាពរញ៉េរញ៉ៃផ្សេងៗក្នុងជីវិត រួមទាំងធំធាត់រហូតដល់ចាស់ទៅជាមួយគ្នា ព្រោះពួកគេមានខ្សែសម្ពន្ធដែលកាត់ចេញពីគ្នាមិនបាន”។

ចេសស៍ ខាន អ្នកអប់រំ និងជាអគ្គនាយកអង្គការ The Gender & Sexuality Therapy Collective
គូព្រេង គឺនិមិត្តសញ្ញានៃសេចក្ដីសង្ឃឹមថា មនុស្សម្នាក់នឹងស្រឡាញ់អ្នកដោយគ្មានលក្ខខណ្ឌ ទោះជាអ្នកមានរឿងមិនល្អ និងចំណុចអន់ក៏ដោយ… “ខ្ញុំមើលឃើញថា គូព្រេង គឺជានិមិត្តសញ្ញានៃក្ដីសង្ឃឹម ការចងភ្ជាប់សម្ពន្ធ និងការមើលថែ ដែលមនុស្សយើងប្រាថ្នា និងត្រូវការ… យើងនឹង “ត្រូវចិត្ត” មនុស្សដែលគួរនឹងតភ្ជាប់សម្ពន្ធភាពឱ្យសម្រេចបាន។ គូព្រេងនឹងសាងបន្ថែមក្ដីសង្ឃឹម និងក្ដីប្រាថ្នាក្នុងការក្លាយជាគូស្នេហ៍ និងប្រគល់ឱ្យនូវការយល់ចិត្ត ព្រមជាមួយអារម្មណ៍ដ៏មានតម្លៃ ទោះជាយើងមានចំណុចមិនល្អក៏ដោយ”។

អេរិកា ឃែបលែន អ្នកប្រឹក្សាបញ្ហារើសគូស្រករនៃស្ថាប័ន Three Days Rule
“ពាក្យថា គូព្រេង អាចឱ្យនូវអារម្មណ៍ថាដូចការរៀបចំផែនការបន្តិចដែរ តែក៏ជាផ្នត់គំនិតដែលស្រស់ស្អាត និងជាលេសក្នុងការបដិសេធសម្ពន្ធភាពដែលមិន “ល្អឥតខ្ចោះ” បាន ដោយសារតែសព្វថ្ងៃនេះ វិវឌ្ឍនភាពធ្វើឱ្យយើងគិតថា មានជម្រើសដែលល្អជាងជានិច្ចហ្នឹងឯង ដូច្នេះហើយទើបផ្នត់គំនិតរឿងគូព្រេងក្លាយជាបច្ច័យដែលមានកម្រិតដែលធ្វើឱ្យពួកគេគិតថា ពួកគេនឹងបានអ្វីគ្រប់យ៉ាងពីមនុស្សម្នាក់ទៀត”។ “ការពិតគឺ មនុស្សដែលត្រូវចិត្តសម្រាប់អ្នក នឹងជាមនុស្សឥតខ្ចោះដែលមិនឥតខ្ចោះ ខ្ញុំជឿថា មនុស្សយើងអាចមានគូព្រេងបានច្រើននាក់ សុំត្រឹមតែមានការយល់ចិត្តដូចគ្នា ក៏គ្រប់គ្រាន់ហើយ”។

ធីណា ថេសស៊ីណា អ្នកចិត្តវិទ្យា និងជាអ្នកនិពន្ធរឿង Dr. Romance’s Guide to Finding Love Today
ជួនកាលមនុស្សយើងក៏យល់ខុសរវាងភាពរំភើបញាប់ញ័រពេលមានស្នេហាថ្មី ជាមួយនឹងអារម្មណ៍ដែលបានចងសម្ពន្ធជាមួយគូព្រេង… “មនុស្សភាគច្រើនគិតថា សារធាតុគីមីដែលនៅក្នុងខ្លួនមនុស្សយើងត្រូវគ្នា គឺជាស្នេហាពិត ចំណែកសារធាតុគីមីដែលមិនត្រូវគ្នា មិនមែនសេចក្ដីស្នេហាទេ តែយើងមិនដឹងថា បែបណាគឺបែបណាឱ្យប្រាកដទេ។ ញឹកញាប់ណាស់ដែលអ្នកភ្លាត់ភ្លាំង គ្រាន់តែដោយសារបណ្ដោយឱ្យសារធាតុគីមីនាំផ្លូវទៅដោយមិនរិះគិតឱ្យបានល្អិតល្អន់ ផ្ទុយទៅវិញសម្ពន្ធភាពអស់មួយជីវិត ក៏អាចចាប់ផ្ដើមបានដោយគ្មានរឿងសារធាតុគីមីចូលមកពាក់ព័ន្ធដែរ”។“បើអ្នករវល់តែ Focus ថា ខ្លួនឯងរំភើប ឬមិនរំភើបជាមួយមនុស្សម្នាក់នោះខ្លាំងជ្រុលពេក អ្នកក៏អាចអស់ឱកាសក្នុងការអភិវឌ្ឍសម្ពន្ធភាពដែលថានោះតទៅទៀតបានដែរ”។

ហួន អូលមីដូ អ្នកចិត្តវិទ្យា
ការចងសម្ពន្ធជាមួយគូព្រេង គឺការតាមរកមនុស្សដែលមើលឃើញអ្នក និងស្រឡាញ់អ្នកក្នុងបែបដែលជារូបអ្នកពិតៗ… “អ្នកគួរដឹងថា “ចិត្តគំនិត” គឺការចែករំលែកខ្លួនឯងជាមួយមនុស្សម្នាក់ទៀត ដែលរួមទាំង “រូបកាយដែលពិតប្រាកដ និងល្អបំផុតរបស់អ្នក” ផងដែរ។ ឧទាហរណ៍ដូចជា អ្វីដែលអ្នកត្រូវការពីមនុស្សម្ខាងទៀតគឺ គុណសម្បត្តិផ្សេងៗ ដូចជាចងសម្ពន្ធភាព សុវត្ថិភាព និងការជឿចិត្តជាដើម”៕

November 8, 2019

ជម្រើសដ៏ល្អ ដើម្បីមានសុខភាពល្អពេលមានគភ៌

ការមានសុខភាពល្អ ពិតជារឿងមួយចាំបាច់ណាស់សម្រាប់ស្ត្រីមានគភ៌ទាំងឡាយ ព្រោះវាមានន័យថា នៅពេលដែលអ្នកមានសុខភាពល្អ រឹងមាំ ពេញលេញហើយនោះ ជីវិតដ៏តូចមួយដែលនៅក្នុងពោះរបស់អ្នក ក៏នឹងមានវិវឌ្ឍនាការ រីកចម្រើនធំធាត់តាមអាយុគភ៌ដ៏ល្អតាមនោះដែរ ដូច្នេះអាចមើលឃើញបានថា គ្រូពេទ្យនឹងណែនាំអនាគតអ្នកម្តាយដែលកំពុងមានគភ៌ទាំងឡាយឱ្យឧស្សាហ៍មើលថែទាំខ្លួន ទាំងរឿងសុខភាព រួមទាំងជីវិតផ្លូវចិត្តផងដែរ។ ឥឡូវយើងមកមើលថា តើជម្រើសឆ្ពោះទៅរកសុខភាពដ៏ល្អនោះ យើងអាចធ្វើយ៉ាងដូចម្តេចបានខ្លះជាមួយនឹងអត្ថបទខាងក្រោមនេះ។

ជម្រើសទី1 : អ្នកម្តាយគួរទទួលទានបន្លែ ផ្លែឈើ អាហារ Cereal បាយអង្ករស្រូវសាលី គ្រាប់ធញ្ញជាតិ និងអាហារដែលមានកាកសរសៃឱ្យបានច្រើន ដើម្បីចៀសវាងអាការទល់លាមក ព្រោះអ័រម៉ូនដែលប្រែប្រួលនឹងមានផលប៉ះពាល់ដល់ពោះវៀនធំរបស់អ្នកម្តាយ ហើយអាហារដែលមានកាកសរសៃអាចជួយបានច្រើនណាស់។

ជម្រើសទី2 : អ្នកម្តាយត្រូវបានទទួលសារធាតុដែកពីសាច់សត្វ យ៉ាងហោចណាស់មួយសប្តាហ៍3ដង ដែលមិនចាំបាច់ទទួលទានច្រើនពេកនោះទេ តែត្រូវទទួលទានឱ្យបានគ្រប់គ្រាន់ទៅនឹងតម្រូវការរបស់រាងកាយ ហើយនិងសារធាតុដែកដែលមាននៅក្នុងបន្លែ ជាប្រភេទដែលមិនមែន ហេម៉ូគ្លោប៊ីន ធ្វើឱ្យរាងកាយពិបាកក្នុងការបឺតជ្រាប។

ជម្រើសទី3 : ដើម្បីជួយបង្កើន និងពង្រឹងខួរក្បាលដល់កូនតូច អ្នកម្តាយត្រូវទទួលទានអាស៊ីតខ្លាញ់អូមេហ្កា 3 តែចូរចៀសវាងទទួលទានសត្វក្នុងទឹកដែលមានសម្បករឹង ដូចជា ប្រភេទគ្រំ ងាវជាដើម ព្រោះវាអាចបង្កឱ្យមានគ្រោះថ្នាក់ដល់អ្នកម្តាយ និងទារក ដែលអាចឆ្លងមេរោគបាក់តេរីលិស្តេរីបាន។

ជម្រើសទី4 : បើអ្នកម្តាយពិបាកជាមួយនឹងអាការៈក្អួតចង្អោ ចូរទទួលទានខ្ញី ព្រោះអាចព្យាបាលអាការក្អួតចង្អោបានយ៉ាងល្អ។ អ្នកអាចទទួលទានខ្ញី ដោយហាន់មើមខ្ញីស្រស់ដាក់ក្នុងទឹកក្តៅឧណ្ហៗ ហើយក្រេបទឹកខ្ញីនោះម្តងបន្តិចៗឱ្យបានញឹកញាប់។