សង្គម និងសេដ្ឋកិច្ច - La Reine Media

យានអវកាស NASA អាមេរិក រកឃើញផ្កាយរណបចិនធ្លាក់លើភពព្រះចន្ទ

កាមេរ៉ានៃយានអវកាស NASA បានថតជាប់រូបផ្កាយរណបរបស់ចិន ដែលបានធ្លាក់នៅផ្នែកម្ខាងទៀត ឬផ្នែកងងឹតនៃភពព្រះចន្ទ (ផ្នែកដែលមើលមិនឃើញពីផែនដី)។

តាមការចុះផ្សាយរបស់វេបសាយ Space បានឱ្យដឹងថា ផ្កាយរណបចិនឈ្មោះ Longjiang-2 បានធ្លាក់លើទីតាំងផ្ទៃដីភពព្រះចន្ទនោះ កាលពីថ្ងៃទី31 ខែកក្កដា ឆ្នាំ2019 បន្ទាប់ពីបញ្ចប់បេសកកម្មរបស់វា។

នៅថ្ងៃទី14 ខែវិច្ឆិកា អ្នកវិទ្យាសាស្រ្ត NASA ដែលតាមដានបេសកកម្ម Lunar Reconnaissance Orbiter បានប្រកាសពីការរកឃើញទីតាំងធ្លាក់របស់ Longiang-2។

រដ្ឋបាលអវកាសជាតិចិន បានបាញ់បង្ហោះផ្កាយរណប Longjiang-2 ដែលមានទម្ងន់ត្រឹម 45គីឡូក្រាម ទៅគន្លងភពព្រះចន្ទ កាលពីថ្ងៃទី20 ខែឧសភា ឆ្នាំ2018 វាត្រូវបានរចនាឡើងដើម្បីធ្វើការជាមួយបងប្អូនរបស់វាគឺ Longjiang-1 ពាក់ព័ន្ធនឹងការអង្កេតតារាសាស្រ្ត៕

November 28, 2019

ចិន ត្រៀមទៅភពផ្កាយព្រះអង្គារ ក្រោយពេលធ្វើតេស្តយានចុះចតលើដីភពព្រះចន្ទរួច

កាលពីថ្ងៃទី14 ខែវិច្ឆិកា ឆ្នាំ 2019 ចិនបានធ្វើតេស្តចុះចតយានអាវកាសមួយនៅខេត្ត Hebei ក្នុងគោលបំណងបញ្ជូនយានអវកាសនោះទៅកាន់ភពផ្កាយព្រះអង្គារនៅឆ្នាំ 2020 ដោយអង្គការអវកាសចិនអះអាងថា ចិនកំពុងស្ថិតនៅលើផ្លូវឆ្ពោះទៅរកបេសកកម្មពិភពផ្កាយព្រះអង្គារនេះហើយ។

ការសាកល្បងចុះចតនេះ ធ្វើឡើងនៅតំបន់ដែលមានលក្ខណៈស្រដៀងនឹងផ្ទៃដីលើភពផ្កាយព្រះអង្គារ ពោលគឺមានភ្នំតូចៗ ឬទីទួលដែលពោរពេញដោយថ្ម ដែលធ្វើឱ្យយាននោះអាចយល់ដឹងពីការធ្វើដំណើរឡើងចុះទួលនៅលើភពក្រហមនោះដោយខ្លួនវាបាន។

លោក Zhang Kejian ប្រធានអង្គការអវកាសជាតិចិន បានថ្លែងនៅមុនការធ្វើតេស្តនេះថា៖ ក្នុងឆ្នាំ2016 ចិនបានចាប់ផ្តើមជាផ្លូវការនូវការងារបេសកកម្មរុករកភពផ្កាយព្រះអង្គារ ហើយឥឡូវនេះគ្រប់ការងារអភិវឌ្ឍន៍ទាំងអស់កំពុងដំណើរការយ៉ាងរលូនហើយ។ ជាមួយគ្នានេះ ចិនបានអភិវឌ្ឍគ្រាប់រ៉ុក្កែត Long March 5 ដែលមានកម្លាំងខ្លាំងដើម្បីបាញ់បង្ហោះនាំយកយានអវកាសទៅកាន់ភពផ្កាយព្រះអង្គារ។

បើតាមលោក Zhang Rongqiao ប្រធានស្ថាបត្យករនៃកម្មវិធីរុករកភពផ្កាយព្រះអង្គារ បានឱ្យដឹងថា ការបាញ់បង្ហោះពីផែនដីទៅភពផ្កាយព្រះអង្គារ ត្រូវប្រើពេល 7 ខែ ចំណែកឯការចុះចតលើផ្ទៃដីភពផ្កាយព្រះអង្គារ ប្រើពេលត្រឹមតែ 7នាទីប៉ុណ្ណោះ។

ដោយឡែកកាលពីខែមករា ឆ្នាំ 2019 ចិនបានសម្រេចជោគជ័យលើកដំបូងជាប្រវត្តិសាស្រ្ត ក្នុងការចុះចតយានអវកាសមួយឈ្មោះ Chang’e-4 នៅលើផ្នែកម្ខាងទៀតនៃភពព្រះចន្ទ (តំបន់ងងឹតដែលមនុស្សលើផែនដីមិនអាចមើលឃើញ និងជាតំបន់ដែលមិនទាន់មានប្រទេសណាបញ្ជូនយានអវកាសទៅដល់)៕

November 28, 2019

កីឡាករស្នូល 2នាក់របស់កម្ពុជា រងរបួសមុនពេលជួបទីម័រខាងកើត

កីឡាករសំខាន់ៗ 2រូបរបស់កម្ពុជា គឺខ្សែបម្រើ យើ មូស្លីម និងកីឡាករខ្សែការពារ ឆេង ម៉េង បានរងរបួសបន្ទាប់ពីប៉ះទង្គិចគ្នាកាលពីយប់ថ្ងៃទី25 វិច្ឆិកា 2019 វេលាម៉ោង 7:០០ យប់ នៅឯកីឡដ្ឋាន Rizal Memorial ក្នុងការប្រកួតកីឡាស៊ីហ្គេមលើកទី30 នៅប្រទេសហ្វីលីពីន ដែលហ្វីលីពីនធ្វើបានត្រឹមស្មើកម្ពុជាក្នុងលទ្ធផល 1ទល់នឹង 1។

គួរបញ្ជាក់ផងដែរថា កីឡាករជម្រើសជាតិយុវជនអាយុក្រោម 22ឆ្នាំរបស់កម្ពុជា បានរងរបួសជាច្រើននាក់ក្នុងការប្រកួតលើកដំបូងជាមួយនឹងម្ចាស់ផ្ទះហ្វីលីពីន។

ការប្រកួតបន្ទាប់កម្ពុជា នឹងត្រូវជួបជាមួយនឹងក្រុមបាល់ទាត់ជម្រើសជាតិទីម័រខាងកើត នៅល្ងាចថ្ងៃនេះ វេលាម៉ោង 7ល្ងាច ខណៈដែលគូទី គឺក្រុមម្ចាស់ផ្ទះហ្វីលីពីន ត្រូវជួបជាមួយនឹងក្រុមមីយ៉ាន់ម៉ា នៅម៉ោង 4រសៀល៕

November 28, 2019

តើធ្វើដូចម្តេច ដើម្បីឱ្យស្កប់ស្កល់ចំពោះរូបរាងរបស់អ្នក?

សព្វថ្ងៃនេះ គឺជាសម័យនៃការរស់នៅក្នុងពិភពលោកដ៏ទំនើប ហើយប្រហែលមិនខុសទេ បើយើងនិយាយថា វាជាសម័យកាលមួយដែលមនុស្សជាច្រើនចង់សម្តែង និងបង្អួតភាពស្រស់ស្អាតដែលខ្លួនមានឱ្យទៅអ្នកដទៃបានឃើញ។ ទោះយ៉ាងណា ពាក្យចាស់បានពោលថា “មនុស្សយើងមិនអាចមានអ្នកណាល្អគ្រប់ទាំង10នោះទេ”។ បើទោះជាយ៉ាងណាក៏យើងគ្រប់គ្នា ជាពិសេសនារីៗទាំងឡាយតែងតែប្រាថ្នាចង់បាននូវរូបសម្រស់ដែលជាទីទាក់ទាញបំផុត។ ប្រាថា្នក៏ប្រាថា្នចុះ ហើយចង់ផ្លាស់ប្តូរក៏ផ្លាស់ប្តូរចុះ ប៉ុន្តែសូមធ្វើយ៉ាងណាកុំឱ្យជ្រុលពេក ត្រូវចេះស្កប់ស្កល់នូវអ្វីដែលអ្នកមានខ្លះផង កុំវង្វេងនឹងភាពចង់ស្អាតចង់ល្អជ្រុលរហូតក្លាយជាទុក្ខដល់ខ្លួនវិញឱ្យសោះ។ ដូច្នេះត្រូវធ្វើដូចម្តេចទៅ? សូមតាមដានអត្ថបទបន្ត។

ឈប់! ប្រៀបធៀបខ្លួនអ្នកជាមួយអ្នកដទៃ : អ្នកកាន់តែប្រៀបធៀបខ្លួនអ្នកជាមួយអ្នកផ្សេងច្រើនប៉ុណ្ណា គឺវានឹងធ្វើឱ្យអ្នកមានអារម្មណ៍ថាខ្លួនឯងអាក្រក់ច្រើនដូច្នេះដែរ។ ត្រូវប្រាប់ខ្លួនឯងថា មនុស្សយើងវាមិនដូចគ្នានោះទេ ហើយការយកខ្លួនទៅប្រៀបជាមួយអ្នកដទៃគឺជារឿងដែលគ្មានប្រយោជន៍បំផុត។ កុំរវល់តែតូចចិត្តនឹងសុដន់របស់ខ្លួនដែលមើលទៅមានទំហំតូចពេលនៅជិតអ្នកមានសុដន់ធំទ្រលុកទ្រលន់នោះទៀតអី សូមក្រឡេកភ្នែករបស់អ្នកមើលនារីផ្សេងទៀតដែលមានទំហំប្រហាក់ប្រហែលអ្នក នោះអ្នកនឹងស្ងប់ចិត្តវិញជាមិនខាន។

បញ្ឈប់គំនិតអវិជ្ជមានអំពីរាងកាយរបស់អ្នក :អ្នកស្រាវជ្រាវបានធ្វើការអះអាងថា ប្រសិនបើអ្នកនៅតែគិតអំពីអ្វីមួយថាជារឿងអាក្រក់គ្រប់ពេលវេលានោះ វានឹងនៅចាក់ឫសក្នុងគំនិតរបស់អ្នកយ៉ាងជាប់ ហើយជាលទ្ធផលដែលអ្នកទទួលបានគឺគ្មានអ្វីក្រៅពីការដែលធ្វើឱ្យខ្លួនឯងមានអារម្មណ៍មានភាពខ្វះខាតមិនចេះចប់មិនចេះហើយតែប៉ុណ្ណឹង។ ដូច្នេះដើម្បីឱ្យខ្លួនអ្នកមានអារម្មណ៍ពេញចិត្តចំពោះខ្លួនឯងនោះ អ្នកត្រូវឈប់មានគំនិតអវិជ្ជមានចំពោះខ្លួនឯង។ ការគិតវិជ្ជមាន ធ្វើឱ្យអ្នកចេះស្គាល់ពាក្យថា ស្កប់ស្កល់ ហើយក៏ជួយឱ្យមានភាពរីករាយខាងផ្លូវចិត្តផងដែរ។ ប្រសិនបើអ្នកអាចវាយដណ្តើមយកជ័យជម្នះលើគំនិតអវិជ្ជមានបាន នោះអ្នកនឹងមានការរីកចម្រើនឡើង។

រំឭកខ្លួនឯងពីចំណុចល្អដែលអ្នកមាន : ពេលនិយាយដល់ការបំបាត់ចោលគំនិតអវិជ្ជមានចំពោះខ្លួនឯង គឺត្រូវគិតដល់ចំណុចល្អដែលអ្នកមាន។ មិនចូលចិត្តទ្រង់ទ្រាយច្រមុះមែនទេ? ចឹងមើលស្បែកភ្លឺថ្លា រាងដែលស្រឡូនស្អាត សក់ភ្លឺរលោងដែលអ្នកមានវិញល្អជាង។ អន់ច្រមុះ បានស្បែក បានសក់ និងបានរាងយោងដែរ មានអីត្រូវបារម្ភ!!!

កុំភ្លេចអ្វីដែលមាននៅខាងក្នុង : កុំភ្លេចឱ្យសោះថា ភាពល្អស្អាតពិតប្រាកដរបស់មនុស្សម្នាក់ៗគឺស្ថិតនៅផ្នែកខាងក្នុងនៃចិត្តគំនិត ចរិយាមាយាទហើយភាពរីករាយរបស់មនុស្សម្នាក់ក៏មិនអាចបញ្ជាក់បានដោយគ្រាន់តែបានឃើញស្នាមញញឹមតែមួយមុខនោះដែរ។

ទទួលស្គាល់ខ្លួនឯង : កុំព្យាយាមផ្លាស់ប្តូរនូវអ្វីដែលមិនអាចផ្លាស់ប្តូរបានទៀតអី និយាយរួមព្រមទទួលយកនូវអ្វីដែលអ្នកមាន។ អ្នកខ្លះបានចំណាយពេលវេលា និងទ្រព្យសម្បត្តិអស់យ៉ាងច្រើន ដើម្បីកែខៃនូវអ្វីដែលមនុស្សភាគច្រើនតែងនិយាយថា មិនស្អាត ឬមិនសមអុីចេះមិនសមអុីចុះ ប៉ុន្តែទីបំផុត មិនថាអ្នកខំកែខៃយ៉ាងណានោះទេ អ្នកនៅតែមិនអាចបំពេញចិត្តអ្នកទាំងនោះបានគ្រប់ជ្រុងជ្រោយនោះទេ៕

November 28, 2019

ដើម្បីឱ្យដឹងច្បាស់ សូមនាំគ្នាមកមើលគំរូកីឡដ្ឋានក្នុងប្លង់ នឹងស្ថានភាពកីឡដ្ឋានជាក់ស្តែងរបស់ហ្វីលីពីនសម្រាប់ស៊ីហ្គេមលើកនេះ

ចំពោះកីឡដ្ឋានធំសម្រាប់រៀបចំការប្រកួតបាល់ទាត់វិញ ត្រូវបានប្រទេសហ្វីលីពីនចេញរូបគំរូកីឡដ្ឋានយ៉ាងឡូយ សម្រាប់ស្នើធ្វើជាម្ចាស់ផ្ទះស៊ីហ្គេមលើកនេះ តែអ្វីៗគ្រាន់ជាការបំភ័ន្តភ្នែកតែប៉ុណ្ណោះ ដោយសារតែកីឡដ្ឋានទាំងនោះមិនទាន់បញ្ចប់ការសាងសង់រួចរាល់នៅឡើយ។

គួរបញ្ជាក់ផងដែរថា ការរៀបចំការប្រកួតកីឡាដ៏ធំជាងគេបង្អស់ប្រចាំតំបន់អាស៊ីអាគ្នេយ៍ ត្រូវហ្វីលីពីនទទួលបានសិទ្ធិក្នុងការរៀបចំព្រឹត្តិការណ៍កីឡាមួយនេះ តែមើលទៅ អ្វីៗហាក់ដូចជាមានបញ្ហាជាបន្តបន្ទាប់ ទាំងមិនទាន់ដល់ថ្ងៃបើកការប្រកួតជាផ្លូវការមែនទែនផង៕

November 28, 2019

កម្ពុជាកក់កំពូលតារាងពូល A ទោះបីជាធ្វើបានត្រឹមស្មើម្ចាស់ផ្ទះហ្វីលីពីនក៏ដោយ

ក្រុមបាល់ទាត់ជម្រើសជាតិអាយុក្រោម 22ឆ្នាំរបស់កម្ពុជា បានប្រកួតស្មើនឹងក្រុមម្ចាស់ផ្ទះហ្វីលីពីន ក្នុងការប្រកួតកាលពីម្សិលមិញនេះដោយលទ្ធផល 1ទល់នឹង1 និងមួយគូទៀត ម៉ាឡេស៊ី និងមីយ៉ាន់ម៉ា បានត្រឹមស្មើដូចគ្នាក្នុងលទ្ធផល 1ទល់នឹង1 ដែរ។

ជាការពិតណាស់ក្រុមក្នុងពូល A មាន 4ក្រុមដែលមានពិន្ទុគ្រាប់បាល់ចំណេញស្មើគ្នា និងគ្រាប់ស៊ុតចូលគេចំនួន 1គ្រាប់ដូចគ្នា និងគេស៊ុតចូល១គ្រាប់ដូចគ្នាទៀត។ ដូចនេះបន្ទាប់ពីចំណុចទាំងនេះ គឺគេគិតទៅលើលំដាប់តួអក្សរជាភាសាអង់គ្លេសដែលនឹងធ្វើឱ្យកម្ពុជាត្រូវឡើងទៅឈរលើគេក្នុងកំពូលតារាងពិន្ទុនេះជាបណ្ដោះអាសន្ន។

ក្រុមបាល់ទាត់ជម្រើសជាតិកម្ពុជាអាយុក្រោម 22ឆ្នាំ កំពុងតែឈរនៅលើគេក្នុងតារាងពិន្ទុប្រចាំពូល A ដោយឆ្លងកាត់ 1ប្រកួត មាន1ពិន្ទុ ដោយស៊ុតចូលគេ 1គ្រាប់ និងគេស៊ុតចូលវិញ 1គ្រាប់៕

November 28, 2019

ហ្វីលីពីនបានត្រឹមស្មើកម្ពុជា ទោះបីប្រើគ្រប់វិធីដើម្បីយកប្រៀបក៏ដោយ

ការប្រកួតកីឡាបាល់ទាត់បុរសក្នុងព្រឹត្តិការណ៍ស៊ីហ្គេមនៅក្នុងថ្ងៃដំបូងនេះ បានបញ្ចប់ទៅហើយ ជាលទ្ធផល កម្ពុជាបានស្មើជាមួយនឹងក្រុមម្ចាស់ផ្ទះ នៅក្នុងប្រកួតលើកដំបូងរបស់ខ្លួនទល់នឹងក្រុមម្ចាស់ផ្ទះ ក្នុងលទ្ធផល 1ទល់នឹង1 ដែលរកបានដោយកីឡាករ កែវ សុផេង នៅនាទីទី41 មុននឹងរបូត 1គ្រាប់វិញនៅចុងតង់ទី2 នៅនាទីទី94។

គួរបញ្ជាក់ដែរថា ម្ចាស់ផ្ទះហ្វីលីពីន បានប្រើគ្រប់វិធីដើម្បីបំបាក់ក្រុមដែលត្រូវជួបជាមួយនឹងខ្លួន ដោយក្នុងនោះក្រុមកម្ពុជា ត្រូវបានម្ចាស់ផ្ទះដាក់ឱ្យឈររង់ចាំនៅព្រលានយន្តហោះអស់រយៈពេល 12ម៉ោង មុននឹងបន្តឱ្យទៅគេងនៅលើកម្រាលព្រំសណ្ឋាគាររហូតដល់អធ្រាត្រទើបបានបន្ទប់សម្រាក ដោយ 1បន្ទប់ដាក់កីឡាករដល់ទៅ 3នាក់។

ការប្រកួតក្នុងពូលជាមួយគ្នានេះដែរ ក្រុមមីយ៉ាន់ម៉ាបានត្រឹមស្មើជាមួយនឹងក្រុមម៉ាឡេស៊ីក្នុងលទ្ធផល 1ទល់នឹង1។ ចំណែកឯពូល B ឯណោះវិញក៏មាន 1ប្រកួតដែរក្នុងថ្ងៃបើកឆាកនេះ ដោយវៀតណាមបានលត់ក្រុមប្រ៊ុយណេ ក្នុងលទ្ធផលទក់សាច់ 8ទល់នឹង០៕

November 28, 2019

ម្ចាស់ផ្ទះហ្វីលីពីនរងការរិះគន់កាន់តែខ្លាំងក្នុងជំនួបបាល់ទាត់ជាមួយកម្ពុជា កាលពីយប់មិញ

ស៊ីហ្គេមលើកទី30 ឆ្នាំ2019 នៅប្រទេសហ្វីលីពីនលើកនេះ ក្រៅពីបញ្ហាកីឡដ្ឋានដែលត្រូវរៀបចំការប្រកួត ស្ថិតនៅក្នុងស្ថានភាពកំពុងសាងសង់ស្ទើរតែទាំងស្រុង លើកលែងតែទីលានបាល់ទាត់ និងកន្លែងទស្សនាហើយនោះ ក្នុងនោះដែរគេសង្កេតឃើញផ្នែកបន្ទប់ទឹកនារីនៅក្នុងកីឡដ្ឋាន Rizal Memorial Stadium ដែលកម្ពុជាត្រូវប្រកួតទល់នឹងម្ចាស់ផ្ទះហ្វីលីពីនកាលពីយប់មិញនេះ ក៏នៅមិនទាន់បានសាងសង់រួចរាល់ហើយដែរ និងថែមទាំងមិនមានទ្វារ ឬអ្វីសម្រាប់ឃាំងឱ្យដាច់ដោយឡែកពីគ្នាទៀតផង។

គួរបញ្ជាក់ផងដែរថា ការប្រកួតបាល់ទាត់បុរសកាលពីយបមិញ បានបង្កឱ្យមានការភ្ញាក់ផ្អើលយ៉ាងខ្លាំងនៅពេលដែលក្រុមយុវជនអាយុក្រោម 22ឆ្នាំកម្ពុជា ធ្វើបានត្រឹមស្មើនឹងក្រុមអន់បំផុតប្រចាំតំបន់អាស៊ានមួយនេះក្នុងលទ្ធផល 1ទល់នឹង1 ទោះបីជាកម្ពុជាបាននាំមុខក្រុមម្ចាស់ផ្ទះតាំងពីតង់ទី1 ហើយក្តី៕

November 28, 2019

រយៈពេល 10ខែ ឆ្នាំនេះ កម្ពុជានាំចេញជ័រកៅស៊ូបានជិត 20ម៉ឺនតោន

ទោះបីជាមានការធ្លាក់ចុះនៃតម្លៃ និងឧបសគ្គមួយចំនួនបានកើតឡើងក្នុងវិស័យជ័រកៅស៊ូយ៉ាងណាក៏ដោយ តែផលិតកម្មជ័រកៅស៊ូកម្ពុជាក៏នៅតែបន្តដំណើរទៅមុខ និងមានកំណើនបន្តិចបន្តួចផងដែរ បើប្រៀបធៀបនឹងឆ្នាំកន្លងមក។

យោងតាមរបាយការណ៍ របស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងរយៈពេល 10ខែ ឆ្នាំ2019 កម្ពុជាបាននាំចេញកៅស៊ូចំនួន 199,975តោន កើនឡើង 24% បើធៀបនឹងរយៈពេលដូចគ្នាក្នុងឆ្នាំ2018 ដោយទទួលបានចំណូលប្រមាណជាង266លានដុល្លារអាមេរិក។

របាយការណ៍បានបញ្ជាក់ថា តម្លៃជាមធ្យមរបស់ជ័រកៅស៊ូក្នុង10ខែ ឆ្នាំ2019 នេះ មានតម្លៃ1,332ដុល្លារក្នុង 1តោន ធ្លាក់ចុះ2%។ ដូច្នេះបើគិតជាចំណូលដែលកម្ពុជាទទួលបានពីការនាំចេញជ័រកៅស៊ូរយៈពេល 10ខែនេះ មានចំនួនប្រមាណជា 266,366,700ដុល្លារអាមេរិក។

សម្រាប់ការនាំចេញជ័រកៅស៊ូ ក្នុងខែតុលា មានចំនួនប្រមាណជាជាង 26,904តោន ខណៈតម្លៃជ័រកៅស៊ូ ជាមធ្យមក្នុងខែតុលានេះមានតម្លៃ 1,308ដុល្លារក្នុង 1តោន បានកើនឡើង 0.41% បើធៀបនិងខែកន្លងមក។

សូមបញ្ជាក់ថា សមាគមអ្នកអភិវឌ្ឍន៍កៅស៊ូកម្ពុជា ធ្លាប់បានព្រមានពីហានិភ័យនៃវិស័យកៅស៊ូរបស់កម្ពុជា (ក្រុមហ៊ុនចម្ការកៅស៊ូ និងរោងចក្រកែច្នៃកៅស៊ូ) ក៏ព្រោះតែពិបាកបន្តដំណើរទៅមុខទៀតបាន និងស្នើសុំឱ្យមានអន្តរាគមន៍ពីរាជរដ្ឋាភិបាល។

ដោយហេតុថា ដើម្បីឱ្យវិស័យនេះមានលទ្ធភាពរស់បានសមាគម សូមស្នើរាជរដ្ឋាភិបាលជួយអន្តរាគមន៍ដោះស្រាយបញ្ហាធំៗចំនួន 4 គឺ៖1-ស្នើសុំព្យួរអាករនាំចេញ ដែលកំពុងអនុវត្តបច្ចុប្បន្ន (តម្លៃលក់ជ័រកៅស៊ូពី 1,000 ដល់ 2,000ដុល្លារ កំណត់ឱ្យបង់ 50ដុល្លារក្នុង 1តោន)។ ទី2- ស្នើសុំរួចពន្ធកាត់ទុក ឬពន្ធផ្សេងៗលើការជួលកម្មករម៉ៅការ។ 3-ស្នើសុំឱ្យអគ្គនាយកដ្ឋានពន្ធដារ ចុះបិទបញ្ជី 1ឆ្នាំម្តង និង4-សុំឱ្យជួយពង្រឹងការទប់ស្កាត់ការរត់ពន្ធឆ្លងដែនខុសច្បាប់ជ័រកៅស៊ូ ដែលមិនទាន់កែច្នៃ។

ប្រធានសមាគមអ្នកអភិវឌ្ឍន៍កៅស៊ូកម្ពុជា លោក ម៉ែន សុភ័ក្រ ត្រូវបានគេស្រង់សម្តីថា បច្ចុប្បន្នតម្លៃជ័រកៅស៊ូនៅលើទីផ្សារអន្តរជាតិចុះថ្លៃខ្លាំង មកនៅត្រឹមតែជាង1,300ដុល្លារក្នុង 1តោន ខណៈថ្លៃដើមនៃការដាំដុះ និងការកែច្នៃកៅស៊ូក្រែបកម្ពុជា (CSR) ត្រូវចំណាយរហូតដល់ជិត 1,600ដុល្លារក្នុង 1តោន ដូច្នេះធ្វើឱ្យអ្នករកស៊ីលើការដាំដុះ និងកែច្នៃកៅស៊ូនាំចេញ មិនទទួលបានផលចំណេញឡើយ តែកន្លងមកក្រុមហ៊ុនបានបោះទុនវិនិយោគដ៏ច្រើនសន្ធឹកសន្ធាប់រួចមកហើយ ក៏ដូចជាដើម្បីមុខមាត់ក្រុមហ៊ុន ជាពិសេសដើម្បីបន្តលើកស្ទួយវិស័យកសិឧស្សាហកម្មរបស់ជាតិ អ្នកវិនិយោគនៅតែបន្តការខិតខំប្រឹងប្រែងទាំងខាតបង់។

ប្រធានសមាគមរូបនេះបានបញ្ជាក់ថា៖«បន្ថែមលើការលំបាកពីការធ្លាក់ចុះនៃតម្លៃកៅស៊ូ លើទីផ្សារអន្តរជាតិ ការរត់ពន្ធជ័រកៅស៊ូដែលមិនទាន់កែច្នៃពីសំណាក់ឈ្មួញកណ្តាល បានចូលរួមចំណែករុញច្រានឱ្យវិស័យកៅស៊ូកម្ពុជា ប្រឈមនូវហានិភ័យយ៉ាងធ្ងន់ធ្ងរ»។

សូមបញ្ជាក់ថា រយៈពេលពេញ 1ឆ្នាំ 2018 កន្លងទៅ កម្ពុជាបាននាំចេញជ័រកៅស៊ូជាង 21ម៉ឺនតោន ទទួលបានចំណូលជិត 300លានដុល្លារអាមេរិក ដោយជ័រកៅស៊ូកម្ពុជាបាននាំចេញទៅកាន់បណ្តាប្រទេសមួយចំនួន រួមមានប្រទេសចិន វៀតណាម ម៉ាឡេស៊ី និងសិង្ហបុរី៕

November 28, 2019

ផលិតកម្ម B&S Good Day ក្រុងពាលីរឿងភាគថ្មីមួយទៀតហើយមានចំណងជើងថា « ចំណាប់ខ្នាំងកំបាំងស្នេហ៍»

បន្ទាប់ពីក្រុងពាលីរឿង « បេះដូងខ្វះកំដៅ » មិនទាន់បានប៉ុន្មានថ្ងៃផង ខណៈនៅព្រឹកថ្ងៃទី ២៧ ខែវិច្ឆិកា នេះ ផលិតកម្ម B&S Good Day បានរៀបចំពិធីក្រុងពាលីរឿងភាគថ្មីមួយទៀតមានចំណងជើងថា « ចំណាប់ខ្នាំងកំបាំងស្នេហ៍» ដែលជាការផលិតសហការជាមួយស្ថានីយ៍ទូរទស្សន៍ប៉ុស្ដិ៍លេខ៥។ រឿងភាគទូរទស្សន៍មួយនេះត្រូវបានគ្រោងចំណាយអស់ជាង ១ សែនដុល្លារ ដែលចុះទៅផ្ដិចយកទេសភាពធម្មជាតិពិតៗនៅខេត្តមណ្ឌលគិរី និងចូលរួមសម្ដែងដោយតារាល្បីៗចាស់ថ្មីជាច្រើនដូចជា លោក ចន សាក់ ជាតួឯកប្រុស និង កញ្ញា ខ្លឹម ស្រីគា ។

លោក ប៊ុន ស៊ា ម្ចាស់ផលិតកម្ម B&S Good Day បានប្រាប់អ្នកសារព័ត៌មានថា នេះជាភាពយន្តភាគថ្មី ដែលលោកបានចាប់ដៃជាមួយផលិតកម្មចក្រវាឡពេជ្រ ផលិតឱ្យប៉ុស្តិ៍លេខ៥។ ភាពយន្តនេះជាង៧០ភាគរយនៃសាច់រឿង គឺថតនៅខេត្តមណ្ឌលគីរី ដោយសារសាច់រឿងនិយាយពាក់ព័ន្ធនឹងជនជាតិព្នង និងដើម្បីរំលេចទេសភាពស្អាតៗ ផ្សព្វផ្សាយពីតំបន់ទេសចរណ៍នៅទីនោះផង។ គម្រោងចំណាយទាំងស្រុង អាចឈានដល់១០ម៉ឺនដុល្លារ ដើម្បីឱ្យសាច់រឿងទាំងមូលមានគុណភាពគ្រប់គ្រាន់។ នេះក៏ជារឿងដែលនិយាយពីការសងសឹក ចាប់ខ្លួនមនុស្សដែលខ្លួនចងគំនុំ ប៉ុន្តែចុងក្រោយ បែរជាក្លាយជាស្នេហា។ លោកនឹងសម្រុកថតភាពយន្តនេះ អោយចប់នៅអំឡុងខែ៣ឆ្នាំ២០២០ ហើយនឹងចាក់បណ្ដើរៗនៅអំឡុងខែ៤ លើប៉ុស្តិ៍លេខ៥៕

November 27, 2019

Category: សង្គម និងសេដ្ឋកិច្ច