សង្គម និងសេដ្ឋកិច្ច - La Reine Media

កម្ពុជាបញ្ចេញបញ្ជីឈ្មោះកីឡាករទៅប្រកួតពាន BTV CUP នៅវៀតណាម

កាលពីពេលថ្មីៗនេះ ក្រុមបាល់ទាត់យុវជនគោព្រៃកម្ពុជា អាយុក្រោម 20ឆ្នាំ បានបញ្ចេញបញ្ជីឈ្មោះកីឡាករចំនួន 20រូបចុងក្រោយមកហើយ ដែលកីឡាករទាំងអស់នោះសុទ្ធសឹងជាកីឡាករអាយុក្រោម 19ឆ្នាំទាំងអស់ ដើម្បីត្រៀមចូលរួមប្រកួតក្នុងពានរង្វាន់ BTV International Football Tournament Cup នៅប្រទេសវៀតណាមហើយ។

គួរបញ្ជាក់ផងដែរថា ពានរង្វាន់ខាងលើនេះ គឺជាពានរង្វាន់ក្រៅផ្លូវការមួយ ដែលរៀបចំជារៀងរាល់ឆ្នាំដោយក្លិប Becamex Binh Doung ហើយក្រុមដែលចូលរួមប្រកួតក្នុងពាននេះ មានក្រុមយុវជនជម្រើសជាតិអាយុក្រោម 20ឆ្នាំ មកពីប្រទេសចំនួន3 គឺមីយ៉ាន់ម៉ា វៀតណាម កម្ពុជា និងក្រុមបាល់ទាត់ឈុតធំ គឺក្លិប Becamex Binh Doung ដែលជាក្លិបលេងនៅលីកកំពូលរបស់វៀតណាម។

ការប្រកួតនឹងចាប់ផ្តើមចន្លោះពីថ្ងៃទី14 ដល់ថ្ងៃទី18 ខែធ្នូ ឆ្នាំ2019 ក្នុងនោះ U20 វៀតណាមនឹងប៉ះជាមួយក្រុមបាល់ទាត់យុវជនអាយុក្រោម 19ឆ្នាំ កម្ពុជា នៅថ្ងៃទី15 ខែធ្នូ ឆ្នាំ2019 វេលាម៉ោង 6ល្ងាចនៅកីឡដ្ឋាន Binh Duong ខេត្តប៊ិនដុង ប្រទេសវៀតណាម ហើយក្រុមឈ្នះនឹងឡើងទៅជួបគ្នានៅវគ្គផ្តាច់ព្រ័ត្រដណ្តើមពានរង្វាន់មួយនេះតែម្ដង ខណៈដែលក្រុមចាញ់ត្រូវប្រកួតដណ្តើមចំណាត់ថ្នាក់លេខ3៕

December 13, 2019

ក្រុមបាល់ទាត់ជម្រើសជាតិវៀតណាម ឈុតស៊ីហ្គេម ទទួលបានការឧបត្ថម្ភយ៉ាងច្រើនកប់ក្តោង ក្រោយទៅដល់មាតុភូមិវិញ

ក្រុមបាល់ទាត់ជម្រើសជាតិយុវជនអាយុក្រោម 22ឆ្នាំវៀតណាម ដែលទើបតែឈ្នះបានមេដាយមាស ក្រោយពីលត់ឥណ្ឌូនេស៊ី ដោយលទ្ធផល 3ទល់នឹង0 នៅវគ្គផ្តាច់ព្រ័ត្រក្នុងព្រឹត្តិការណ៍ស៊ីហ្គេមលើកទី30 នៅប្រទេសហ្វីលីពីននោះ បានត្រឡប់ទៅដល់មាតុភូមិវិញហើយ ក្រោមការទទួលស្វាគមន៍យ៉ាងអឹកធឹកពីប្រជាជនវៀតណាម។

រង្វាន់ដែលក្រុមបាល់ទាត់យុវជនអាយុក្រោម 22ឆ្នាំវៀតណាមទទួលបាន រួមមាន ប្រាក់រង្វាន់់លើកទឹកចិត្តពីរដ្ឋាភិបាលក្នុងការឈ្នះមេដាយមាស, ម៉ូតូ Winner X ម្នាក់ 1គ្រឿង, ម៉ូតូអគ្គិសនីម្នាក់ 1គ្រឿង រួមជាមួយនឹងសេវាហោះហើរមិនគិតប្រាក់ពេញ 1ឆ្នាំ ថែមទាំងមានការផ្ដល់រង្វាន់ដំណើរកម្សាន្តទៅ Resort លំដាប់ផ្កាយ5 ទៀតផង។

គួរបញ្ជាក់ផងដែរថា នេះគឺជាលើកទី 2ហើយ ដែលក្រុមបាល់ទាត់ជម្រើសជាតិយុវជនអាយុក្រោម 22ឆ្នាំរបស់វៀតណាម ទទួលបានមេដាយមាស ក្រោយពីខកខានអស់រយៈពេលជាង 60ឆ្នាំរួមមក ដោយកាលពីលើកដំបូងនោះក្រុមបាល់ទាត់ជម្រើសជាតិវៀតណាមបានទទួលមេដាយមាសនៅក្នុងព្រឹត្តិការណ៍ស៊ីហ្គេមលើកដំបូងក្នុងឆ្នាំ1959៕

December 13, 2019

ចង់ជោគជ័យក្នុងការបណ្តុះបណ្តាលបុគ្គលិក លុះត្រាតែបង្ហាញឱ្យពួកគាត់ឃើញលទ្ធផលជាក់ស្តែង

ថ្វីដ្បិតតែគ្រប់គ្នាសុទ្ធតែដឹងហើយថា សមត្ថភាពរបស់បុគ្គលិកក្នុងការធ្វើការងារ គឺជារឿងសំខាន់សម្រាប់ក្រុមហ៊ុន តែការបណ្តុះបណ្តាលបុគ្គលិករឹតតែមិនមែនជារឿងងាយស្រួលទៅទៀត។ បុគ្គលិកទាំងអស់មិនប្រាកដថាសុទ្ធតែចង់ទទួលបានការបណ្តុះបណ្តាលនោះទេ ហើយគ្រប់ការបណ្តុះបណ្តាលក៏មិនសុទ្ធតែទទួលបានការចាប់អារម្មណ៍ទាំងអស់ដែរ។

លោកបណ្ឌិត គា បូរ៉ា អ្នកជំនាញគណនេយ្យ និងទីផ្សារ បានលើកឡើងថា បញ្ហាដែលធ្វើឱ្យបុគ្គលិកមិនចង់ទទួលយកការបណ្តុះបណ្តាល ភាគច្រើនបណ្តាលមកពីពួកគេមិនបានឃើញពីលទ្ធផល ឬមើលមិនដឹងពីផលប្រយោជន៍សំខាន់នៃការបណ្តុះបណ្តាលនោះចំពោះការងារ។ ដើម្បីទាក់ទាញឱ្យបុគ្គលិកខិតខំប្រឹងប្រែងអភិវឌ្ឍសមត្ថភាព ឬចូលរួមវគ្គបណ្តុះបណ្តាល ស្ថាប័នមួយចំនួនគេបង្កើតកម្មវិធីលើកទឹកចិត្តបុគ្គលិកដោយឧបត្ថម្ភប្រាក់លើកទឹកចិត្តបន្ថែមតាមសមត្ថភាពការងារជាក់ស្តែង (KPI-Key Performance Indicator)។

ដើម្បីទទួលបានការឧបត្ថម្ភបន្ថែមច្រើន ឬដើម្បីទទួលបានពិន្ទុ KPI ខ្ពស់ បុគ្គលិកត្រូវតែបំពេញលក្ខខណ្ឌនានាដែលកំណត់ដោយផ្នែកធនធានមនុស្ស។ ហេតុនេះប្រសិនបើបុគ្គលិកណាម្នាក់មិនទទួលយកការបណ្តុះបណ្តាល ឬមិនខិតខំប្រឹងប្រែងរៀនសូត្រ គាត់នឹងមិនអាចបំពេញលក្ខខណ្ឌរបស់ស្ថាប័ននោះបានទេ ដែលធ្វើឱ្យការលើកទឹកចិត្តរបស់គាត់ក៏មានកម្រិតទៅតាមនោះដែរ។

លោកបណ្ឌិត គា បូរ៉ា បាននិយាយថា៖ “កាលណាយើងបង្ហាញឱ្យបុគ្គលិកឃើញច្បាស់លាស់ពីលទ្ធផលចុងក្រោយនៃការបណ្តុះបណ្តាល នោះបុគ្គលិកនឹងមានកម្លាំងជំរុញខ្លាំង ព្រោះគាត់ដឹងច្បាស់ថា ក្រោយបំពេញគ្រប់លក្ខខណ្ឌនៃការបណ្តុះបណ្តាល ហើយអភិវឌ្ឍការងារបានល្អ គាត់នឹងទទួលបានទាំងសមត្ថភាពការងារខ្ពស់ និងការលើកទឹកចិត្តពីស្ថាប័នជាដើម”។

អ្នកជំនាញខាងលើបានបញ្ជាក់ផងដែរថា ចំណុចនេះអាចជាចំណុចល្អមួយដើម្បីអភិវឌ្ឍធនធានមនុស្សឱ្យខ្លាំងសម្រាប់ត្រៀមធ្វើការងារ និងអភិវឌ្ឍក្រុមហ៊ុន។ ក្រៅពីនេះ ក្រុមហ៊ុនខ្លះក៏គេបង្កើតជាក្រុម Talent group ឬអាចហៅបានថា ជាក្រុមអ្នកមានទេពកោសល្យខ្ពស់ៗ ដើម្បីត្រៀមខ្លួនចូលទៅជំនួស ឬបំពេញផ្នែកសំខាន់ៗនៅថ្ងៃអនាគត។ ក្រុមនេះក៏អាចជាក្រុមគោលដៅសំខាន់ផងដែរ ដើម្បីធ្វើឱ្យស្ថាប័នពោរពេញទៅដោយមនុស្សពូកែ ហើយភាគច្រើនក្រុម Talent Group ជាក្រុមដែលមានការអភិវឌ្ឍលឿនជាងគេ ព្រោគាត់មានទឹកចិត្តខ្លាំងក្នុងការទទួលយកការអប់រំ។ កត្តាដែលធ្វើឱ្យគាត់មានសម្ទុះខ្លាំងលើផ្នែកផ្សេងៗនោះ ដោយសារតែគាត់ដឹងច្បាស់ថា អនាគតទៅគាត់នឹងស្ថិតក្នុងផ្នែកល្អណាមួយនៅក្នុងស្ថាប័ន។

លោក ស៊ូ សាវឿន អ្នកនិពន្ធ និងជាអ្នកជំនាញបណ្តុះបណ្តាល បានលើកឡើងថា បញ្ហាសំខាន់ដែលធ្វើឱ្យបុគ្គលិកមិនចង់ទទួលយកការអប់រំដើម្បីអភិវឌ្ឍសមត្ថភាព ដោយសារតែពួកគាត់មិនដឹងច្បាស់ពីកម្មវិធី និងគោលបំណងលម្អិតនៃកម្មវិធីទាំងអស់នោះ។ បញ្ហាខ្លះកើតឡើងដោយសារតែអ្នកគ្រប់គ្រងរបស់គាត់មិនមានវិធីក្នុងការបង្ហាញពីចំណុចខ្វះខាត រួមទាំងចំណុចដែលបុគ្គលិកត្រូវអភិវឌ្ឍ។ ម្យ៉ាងវិញទៀត អ្នកគ្រប់គ្រងដែលបញ្ជូនបុគ្គលិកទៅសិក្សានោះចាំបាច់ត្រូវតែដឹងឱ្យច្បាស់ និងលម្អិតពីវគ្គសិក្សានីមួយៗដើម្បីធានាថា វគ្គទាំងអស់នោះនឹងឆ្លើយតបជាមួយនឹងចំណុចចាំបាច់របស់បុគ្គលិករបស់ខ្លួនកម្រិតណា។ ក្រោយពេលដឹងច្បាស់ហើយ គាត់ក៏ត្រូវមានវិធីក្នុងការពន្យល់ណែនាំ និងបញ្ចុះបញ្ចូលបុគ្គលិកម្នាក់ៗឱ្យដឹងច្បាស់ថា ក្រោយពេលបណ្តុះបណ្តាលពួកគេនឹងអាចអភិវឌ្ឍលើផ្នែកណាខ្លះ ហើយអនាគតទៅសមត្ថភាពទាំងអស់នោះនឹងជួយបុគ្គលិកឱ្យទៅដល់ផ្នែកណាខ្លះនៃក្រុមហ៊ុន ឬអភិវឌ្ឍបានល្អដូចម្តេចខ្លះក្នុងទីផ្សារការងារទូទៅ។

លោក ស៊ូ សាវឿន បាននិយាយថា៖ “នៅពេលក្រុមហ៊ុនបញ្ជូនបុគ្គលិកទៅសិក្សា ឬបង្កើតវគ្គបណ្តុះបណ្តាលនៅក្នុងក្រុមហ៊ុន ចាំបាច់ត្រូវតែសិក្សាឱ្យបានច្បាស់ថា អ្វីជាតម្រូវការពិតប្រាកដរបស់បុគ្គលិក មិនមែនចេះតែបញ្ជូនឱ្យទៅរៀននោះទេ។ ម្យ៉ាងវិញទៀត គួរបញ្ជាក់ឱ្យបានច្បាស់នូវរយៈពេលនៃមុខវិជ្ជានីមួយៗ និងអត្ថន័យមួយចំនួននៃការបណ្តុះបណ្តាលដើម្បីឱ្យបុគ្គលិកបានដឹង និងចាប់អារម្មណ៍ទុកជាមុនសិន”។

លោកសាវឿន បានបញ្ជាក់ផងដែរថា សមត្ថភាពរបស់អ្នកបង្រៀនក៏ជាផ្នែកមួយផងដែរចំពោះការទាក់ទាញបុគ្គលិកឱ្យចូលសិក្សាវគ្គនីមួយៗ ព្រោះកាលណាអ្នកបណ្តុះបណ្តាលមិនមានភាពទាក់ទាញ ឬការបណ្តុះបណ្តាលមិនឆ្លើយតបជាមួយនឹងតម្រូវការជាក់ស្តែងរបស់បុគ្គលិក នោះពួកគេនឹងកាន់តែរារែក ហើយមិនចង់បន្តវគ្គផ្សេងៗទៀតនៅថ្ងៃក្រោយ។

ហេតុនេះប្រសិនបើស្ថាប័នគិតគូរលើចំណុចល្អិតៗទាំងអស់នេះ ស្ថាប័នទាំងមូលនឹងអាចទទួលបានធនធានមនុស្សល្អៗបន្ថែមជាលំដាប់ ព្រោះបុគ្គលិកចាស់ក៏ចាប់ផ្តើមខ្លាំង ហើយបុគ្គលិកថ្មីៗក៏អាចនឹងចាប់អារម្មណ៍ក្នុងការចូលរួមអភិវឌ្ឍខ្លួនក្នុងស្ថាប័នរបស់យើងដែរ៕

December 12, 2019

សំណួរ-ចម្លើយ ពាក់ព័ន្ធនឹងសុខភាពពេលមានគភ៌ ដែលស្ត្រីទាំងអស់គួរដឹង…

ឡារ៉ែនជឿថា នារីៗយើងទាំងអស់ អ្នកណាៗក៏ត្រូវតែមានគ្រួសារ(ស្វាមី) និងត្រៀមខ្លួនសម្រាប់ការមានផ្ទៃពោះដូចគ្នា ដូច្នេះដើម្បីជាចំណេះដឹងសម្រាប់ត្រៀមខ្លួនក្នុងការមានគភ៌ និងដើម្បីថែរក្សាសុខភាពរបស់ខ្លួនឯង និងកូនក្នុងផ្ទៃក្នុងអំឡុងពេលតាំងគភ៌នោះ ខាងក្រោមនេះគឺជាសំណួររបស់ស្ត្រីមានគភ៌ និងចម្លើយរបស់គ្រូពេទ្យជំនាញ ដែលឡារ៉ែនសូមលើកយកមកជម្រាបជូនសម្រាប់ស្ត្រីដែលកំពុងត្រៀមខ្លួនធ្វើជាម្ដាយថ្មោងថ្មីទុកជាចំណេះដឹង…។

តើកុំព្យូទ័រ មានផលប៉ះពាល់ដល់កូននៅក្នុងផ្ទៃឬទេ?Q . មុនពេលមានផ្ទៃពោះ នាងខ្ញុំតែងអង្គុយលេងកុំព្យូទ័រជាច្រើនម៉ោងរៀងរាល់យប់ ដោយដាក់(កុំព្យូទ័រ លែបថប់)នៅចំពីមុខក្បាលពោះ ឥលូវនេះ នាងខ្ញុំមានផ្ទៃពោះហើយ តែក៏នៅតែធ្វើបែបហ្នឹងរហូត… នាងខ្ញុំចង់សួរថា តើវាអាចមានបញ្ហា ឬគ្រោះថ្នាក់អ្វីដល់កូននៅក្នុងផ្ទៃឬក៏អត់?
A . នៅមិនទាន់មានរបាយការណ៍ ឬលទ្ធផលនៃការស្រាវជ្រាវណាមួយនិយាយថា រលកកាំរស្មីពីកុំព្យូទ័រធ្វើឱ្យមានផលប៉ះពាល់ដល់ទារកដែលនៅក្នុងផ្ទៃនៅឡើយទេ តែជាប្រក្រតីសម្រាប់ស្ត្រីមានគភ៌ លោកគ្រូពេទ្យតែងណែនាំមិនឱ្យដាក់វត្ថុអ្វីនៅលើក្បាលពោះ លើករបស់របរធ្ងន់ៗ ឬធ្វើលំហាត់ប្រាណក្នុងក្បាច់ដែលនាំឱ្យប៉ះពាល់ខ្លាំងដល់បរិវេណក្បាលពោះឡើយ។

ស្ត្រីមានគភ៌ចូលចិត្តញ៉ាំអាហារហឹរៗQ . ជាធម្មតា នាងខ្ញុំមិនញ៉ាំហឹរពេកទេ តែមានចម្ងល់ថា តើពិតមែនឬ បើអ្នកម្តាយញ៉ាំអាហារហឹរៗ នឹងធ្វើឱ្យទឹកភ្លោះឡើងក្តៅ និងធ្វើឱ្យកូនក្រហាយខ្លួន ពិបាកទ្រាំ?
A . រសជាតិរបស់អាហារដែលស្ត្រីមានគភ៌ទទួលទាន គ្មានផលប៉ះពាល់ដល់ទឹកភ្លោះទេ។

មានផ្ទៃពោះ ហើយចង់ញ៉ាំផ្លែទុរេនQ . ក្នុងពេលមានផ្ទៃពោះ ស្រាប់តែចង់ញ៉ាំទុរេន មិនដឹងថាមកពីហេតុអ្វី? ចង់ញ៉ាំមែនទែន! នាងខ្ញុំចង់សួរគ្រូពេទ្យថា តើស្ត្រីមានគភ៌អាចញ៉ាំទុរេនបានទេ?
A . ក្នុងខណៈពេលមានផ្ទៃពោះ បើស្ត្រីមានគភ៌គ្មានសភាវជ្រៀតជ្រែករបស់រោគផ្សេងៗដែលត្រូវមានចំណុចហាមឃាត់រឿងការទទួលទានអាហារទេនោះ ស្ត្រីមានផ្ទៃពោះអាចបរិភោគបាន តែគួរទទួលទានក្នុងបរិមាណដែលសមល្មម មិនត្រូវទទួលទានច្រើនជ្រុលហួសហេតុពេកទេ។

ភេស្ជជៈកំប៉ុង និងស្ត្រីមានគភ៌Q . តើការញុាំទឹកភេស្ជជៈកំប៉ុងមានផលប៉ះពាល់ដល់កូននៅក្នុងផ្ទៃយ៉ាងណាដែរ? ព្រោះនាងខ្ញុំទើបតែមានគភ៌លើកដំបូង ពេលរាងនឿយៗ ល្វើយៗ មានអារម្មណ៍ថា ចង់ញ៉ាំទឹកក្រូចកំប៉ុងមែនទែន។
A. ទឹកភេស្ជជៈកំប៉ុង គឺជាទឹកផ្អែមៗ ដែលមានបញ្ចូលជាតិហ្គាស ខាបន់ដៃអុកសៃដ៍ សម្រាប់ស្ត្រីមានគភ៌ បើគ្មានសភាវជ្រៀតជ្រែកពីរោគផ្សេងៗដែលត្រូវមានចំណុចហាមឃាត់ក្នុងរឿងទទួលទានអាហារ ដូចជា សភាវនៃរោគទឹកនោមផ្អែម ក្នុងអំឡុងពេលមានគភ៌ ឬមានប្រវត្តិធ្លាប់កើតជំងឺក្រពះតាំងពីពេលមុនមានគភ៌ទេនោះ ក៏នៅតែអាចញ៉ាំបាន ព្រោះចំណែកផ្សំរបស់ហ្គាស ខាបន់ដៃអុកសៃដ៍ មិនមានបញ្ហាអ្វីទេ។ តែបើស្ត្រីមានគភ៌ណាដែលមានខ្យល់នៅក្នុងក្រពះច្រើន អាចធ្វើឱ្យមានអារម្មណ៍ណែនក្រពះ តឹងពោះ នៅមិនសុខ ឬអាចធ្វើឱ្យក្អួតបានទៀតផង ដូច្នេះគួរញ៉ាំឱ្យល្មមៗ កុំច្រើនជ្រុលពេក។

ស្ត្រីមានគភ៌ត្រូវឆ្កែខាំ តើគួរចាក់វ៉ាក់សាំងការពារឬក៏អត់?Q . នាងខ្ញុំត្រូវឆ្កែដែលខ្លួនឯងចិញ្ចឹម ខាំ តើត្រូវទៅចាក់វ៉ាក់សាំងការពារឬក៏អត់ ព្រោះពេលនេះកំពុងមានផ្ទៃពោះផង?
A. សូមណែនាំឱ្យទៅជួបលោកគ្រូពេទ្យជំនាញជាបន្ទាន់ ដើម្បីពិនិត្យមើលស្នាមរបួស និងទទួលការចាក់វ៉ាក់សាំងការពារភ្លាម។ (នៅមានត)

December 12, 2019

ឌួង ហ្សូរីដា និងប្អូន នៅតែបន្ដកាន់ពាននាំមុខគេពីប្រទេសថៃ

នៅលើបណ្ដាញសង្គមហ្វេសប៊ុករបស់តារាស្រី ឌួង ហ្សូរីដា បានបង្ហោះរូបភាពជាច្រើនសន្លឹក និងសារមួយចំនួនស្ដែងឱ្យដឹងថា នាងនិងប្អួនកំពុងតែលើកពានឆ្នើមជាថ្មីម្ដងទៀតហើយពីប្រទេសថៃ។ ម្ដងនេះនាងថា នាងឈ្នះពានដល់ទៅ 3 នៅតំបន់អាស៊ាន។

កញ្ញា ឌួង ហ្សូរីដា សរសេរបង្ហោះថា ”យេីងខ្ញុំមានឱកាសទទួលបានពានរង្វាន់កិត្តិយសសារជាថ្មី លើកទី២នៅប្រទេសថៃ ដល់ទៅ៣ពានរង្វាន់ថែមទៀត សំរាប់ក្រមហ៊ុននៅប្រទេសថៃនាម្សិលមិញ។ នេះជាការផ្តល់ពានរង្វាន់សំរាប់ប្រទេសក្នុងតំបន់អាសុីអាគ្នេយ៏សំរាប់ក្រុមហ៊ុនដែលមានអាជីវកម្មទាក់ទងនិងគ្រឿងសំអាង សាលាបង្រៀនកែសម្ជស្ស គ្លីនីក ហាងSpa ។ល។ ដែលមានការចូលរួមពីសំណាក់ម្ចាស់អាជីវកម្មជាច្រើនពីប្រទេស កូរ៉េ ថៃ កម្ពុជា វៀតណាម ស្វិសដេន...។

ពានរង្វាន់ដែលយេីងខ្ញុំទទួលបានមាន :trophy:The Best Ceo Of Asian Star Award 2019 សំរាប់ផលឹតផល SSO/SHO ទទួលដោយ Ceo DUONG ZORIDA :trophy:The Best Health & Beauty Products Of Asian Award 2019 សំរាប់ផលឹតផល MUDHITA GS-2113 Snail Serum (សេរ៉ូមសាំញុំ) ដោយ Miss.DUONG KOZONA :trophy:The Best Health & Beauty Business Of Asian Star Award 2019 សំរាប់ផលឹតផល N27 ដោយ Miss DUONG ZORIMA :information_desk_person:មានអារម្មណ៍ថារំភេីប និង មោទនភាពដែលក្រុមហ៊ុនយេីងខ្ញុំទទួលបានជោគជ័យបន្ថែមនាពេលនេះ ហេីយសន្យាថាយេីងនឹងបន្តការផលឹតបន្ថែមនូវផលឹតផលគុណភាពខ្ពស់ជាច្រេីនទៀតដេីម្បីបំពេញតម្រូវការរបស់អតិថិជនបន្ថែមទៀត។ :pray:ជាចុងក្រោយសូមអរគុណដល់ការជូនពរ និង សម្តែងការអបអរសាទររបស់អ្នកទាំងអស់គ្នា ហេីយក៍សុំអភ័យទោសដែលធ្វេីការឆ្លេីុតបមិនទាន់អស់:pray: ដោយក្តីគោរព និង ស្រឡាញ់ ឌួង ហ្សូរីដា
Ceo MUDHITA Trading Co.LTD”។

December 12, 2019

វីជេ រតនា និងភរិយា រីកមុខដូចគ្រាប់ជីខណៈលើកពាននៅឆាកអន្ដរជាតិ

វីជេ រតនា ដែលជាអតីតពិធីករនៅស្ថានីយ៍ទូរទស្សន៍ My TV ថ្មីៗនេះត្រូវបានគេឃើញលោក និងភរិយាលើកពានឆ្នើមដំបូងនៅឆាកអន្ដរជាតិ ក្នុងប្រទេសថៃ កាលពីថ្ងៃទី១១ ធ្នូ ឆ្នាំ២០១៩ មុននេះ។

លោកនិងភរិយា បានចាប់ដៃគ្នាតាំងក្រុមហ៊ុនអស់រយៈពេលជាង២ឆ្នាំ មានឈ្មោះថា ZZana Cosmictic Co.,LTD ដែលទទួលបានពានឆ្នើមជាលើកទី១ ពីកម្មវិធី The Best Healthy and Beauty products ដល់អ្នកឆ្នើមទាំង 36 ប្រទេស មកពីតំបន់អាស៊ី និងពិភពលោក។ លោកថា ការខិតខំប្រឹងប្រែងរបស់លោកនិងភរិយា គឺជាមាគានាំលោកទៅកាន់ភាពជោគជ័យនិងបានផ្ដាច់មុខផលិតផលក្រៅប្រទេសមកចរាចរណ៍ទីផ្សារស្រុកខ្មែរ។

វីជេរូបនេះបានបញ្ជាក់ផងដែរថា ក្រោយបញ្ចប់ការទទួលពាន លោក និងភរិយា នៅចាំពិភាក្សាពីរឿងផលិតផលជាមួយអ្នកឯកទេសថៃនិងបន្តដំណើរកម្សាន្តនៅក្នុងប្រទេសថៃខ្លះៗផងដែរ៕

December 12, 2019

អ្នកផលិតកម្មទូរទស្សន៍ គង់ វិសាល ជោគជ័យសិល្បៈក្ដោបចំណូលរាប់ម៉ឺនដុល្លារក្នុងមួយឆ្នាំៗ

អស់រយៈពេល ២១ឆ្នាំមកហើយ អ្នកដឹកនាំរៀបចំនិងផលិតកម្មវិធីទូរទស្សន៍ គង់ វិសាល ត្រូវបានមហាជនជាច្រើនស្គាល់តាមរយៈកម្មវិធីធំៗដូចជា ”ផ្ទះសំណើច” និង ”មេក្រូដោះបំណុល” ដែលកម្មវិធីទាំងនេះបានលើកមុខលើកមាត់លោកឱ្យមានឈ្មោះល្បី និងឈ្នះពានអាណាចក្រតារាកាលពីឆ្នាំ២០១២។

បច្ចុប្បន្នភាពនេះ អ្នកដឹកនាំកម្មវិធីល្បីរូបនេះ ត្រូវបានគេឃើញថា លោកជោគជ័យទាំងអាជីពសិល្បៈ និងជីវិតក្រៅសិល្បៈ លោកមានតួនាទីជាមន្ត្រី PM និងឃើញប្រើរថយន្ត Range Rover ស៊េរីទំនើបតម្លៃជាង១២ម៉ឺនដុល្លារ យ៉ាងកាលីបនាពេលចុងក្រោយ។ លោកនិងភរិយាបានចាប់ដៃគ្នាសាងគ្រួសារតាំងពីឆ្នាំ ២០១២ហើយទទួលបានចំណងដៃកូន២នាក់ ប្រុស១ស្រី១។ យ៉ាងណាមិញលោកជោគជ័យជាមួយការរៀបចំការប្រគំតន្ត្រីធំៗក្រៅឆាក ដែលជួយឱ្យលោកក្ដោបចំណូលបានរាប់ម៉ឺនដុល្លារក្នុងមួយឆ្នាំៗ។

លោក គង់ វិសាល ត្រូវបានមហាជនសរសើរថា ជាផលិតករជោគជ័យនៅប៉ុស្តិ៍បាយ័នក្នុងចំណោមអ្នករៀបចំកម្មវិធីដែលមានកេរ្តិ៍ឈ្មោះបោះសំឡេង។ គួររំឭកដែរថា អ្នកដឹកនាំកម្មវិធីរូបនេះ ពីមុនក៏ធ្លាប់ជាជំនួយការផលិតរបស់លោក ហ្វៃ សំអាង ហើយថ្មីៗនេះលោកមានគម្រោងផលិតកម្មវិធីថ្មីៗ និងបើកជំនួញក្រៅសិល្បៈផងដែរ តែសុំលាក់សិន៕

December 12, 2019

ផ្សារមូលបត្រទូទាំងពិភពលោក អាចនឹងបាត់បង់ទឹកប្រាក់ 2សែន 3ម៉ឺនកោដិដុល្លារ ព្រោះតែបម្រែបម្រួលអាកាសធាតុ

បណ្ដាគោលនយោបាយដែលបានដាក់ចេញដើម្បីទប់ទល់នឹងបម្រែបម្រួលអាកាសធាតុ អាចនឹងបំផ្លាញទឹកប្រាក់ចំនួន 2សែន 3ម៉ឺនកោដិដុល្លារ របស់ក្រុមហ៊ុនសាជីវកម្មនានានៅទូទាំងពិភពលោក។

នេះគឺជាខ្លឹមសារក្នុងរបាយការណ៍ថ្មីមួយរបស់ Principles for Responsible Investment (PRI) ដែលជាបណ្ដាញនៃក្រុមវិនិយោគិន ធ្វើសកម្មភាពដើម្បីនាំយកគោលករណ៍វិនិយោគមានការទទួលខុសត្រូវទៅក្នុងការអនុវត្តជាក់ស្ដែង ដែលគាំទ្រដោយអង្គការសហប្រជាជាតិ។ របាយករណ៍របស់ PRI ក៏បានវិភាគអំពីផលប៉ះពាល់ដែលនឹងកើតឡើងដោយសារគោលនយោបាយ ’’មិនអាចគេចបាន’’ ដូចជា ការហាមផលិតម៉ាស៊ីនចំហេះក្នុង ជាដើម ទៅលើតម្លៃមូលបត្រ។
ការវិភាគនេះបានបង្ហាញឱ្យឃើញថា គោលនយោបាយបម្រែបម្រួលអាកាសធាតុ អាចបណ្ដាលឱ្យតម្លៃនៃបណ្ដាក្រុមហ៊ុនសាជីវកម្មក្នុងសន្ទស្សន៍មូលបត្រទូទាំងពិភពលោក MSCI ថយចុះដល់ទៅ 2,3០០,០០០,០០០,០០០ ដុល្លារ ស្មើនឹង 4.5%។

PRI គឺជាបណ្ដាញមួយដែលមានវិនិយោគិន និងម្ចាស់ទ្រព្យ ប្រមាណ 2,600 ដែលគ្រប់គ្រងទ្រព្យសរុប 86,០០០,០០០,០០០,០០០ដុល្លារ។ ក្រុមវិនិយោគិននៅទូទាំងពិភពលោក កំពុងដាក់សម្ពាធលើបណ្ដាក្រុមហ៊ុនទាក់ទិននឹងបញ្ហាបម្រែបម្រួលអាកាសធាតុ ដោយស្នើឱ្យពួកគេធ្វើឱ្យមានតម្លាភាពជាងមុនចំពោះហានិភ័យសម្រាប់សកម្មភាពជំនួញដោយសារអាកាសធាតុមិនអំណោយផល។

ភាគហ៊ុនរបស់បណ្ដាក្រុមហ៊ុនថាមពល ត្រូវបានគេព្យាករថា នឹងត្រូវរងផលប៉ះពាល់ធ្ងន់ធ្ងរបំផុត ដោយសារការកែប្រែគោលនយោបាយស្ដីពីអាកាសធាតុ ហើយអ្នកដែលនឹងរងផលប៉ះពាល់បន្ទាប់នោះ គឺភាគហ៊ុនរបស់បណ្ដាក្រុមហ៊ុនផលិតរថយន្ត និងឧបករណ៍ប្រើប្រាស់។

បរិបទនៃគោលនយោបាយស្ដីពីអាកាសធាតុ នឹងត្រូវបានជំរុញដោយបទបញ្ជាហាមប្រាមចំពោះម៉ាស៊ីនចំហេះក្នុង ដែលគ្រោងនឹងធ្វើឡើងនៅឆ្នាំ2035 ក៏ដូចជាការគិតចំពោះការបំភាយឧស្ម័នកាបូន និងការលុបបំបាត់បន្តិចម្ដងៗនូវធ្យូងថ្ម។
របាយការណ៍នេះក៏បានបញ្ជាក់ថា បណ្ដាក្រុមហ៊ុនថាមពល ត្រូវបានគេព្យាករថា នឹងបាត់បង់ជិត 33% នៃតម្លៃទុនសរុប ព្រោះតែការកែប្រែគោលនយោបាយអាកាសធាតុ ក្នុងនោះក្រុមហ៊ុនផលិតប្រេងធំបំផុតចំនួន 10របស់ពិភពលោក នឹងត្រូវបាត់បង់ទុន 500ពាន់លានដុល្លារ។

ក្នុងវិស័យថាមពល បណ្ដាក្រុមហ៊ុនដែលផ្ដោតលើការស្វែងរក និងចម្រាញ់យកឥន្ធនៈហ្វូស៊ីល នឹងទទួលរងផលប៉ះពាល់យ៉ាងធ្ងន់ធ្ងរ។ តម្លៃទុនរបស់បណ្ដាក្រុមហ៊ុនរ៉ែធ្យូងថ្ម អាចនឹងបាត់បង់ជិតពាក់កណ្ដាល។

ប៉ុន្តែ ទោះយ៉ាងនេះក្ដី ក្នុងបរិបទនោះក៏នៅមានឱកាសសម្រាប់ក្រុមហ៊ុនដែលចេះបត់បែនតាមកាលៈទេសៈផងដែរ។ យោងតាមលោក Fiona Reynolds ដែលជាអគ្គនាយកប្រតិបត្តិរបស់ PRI បានឱ្យដឹងថា បណ្ដាក្រុមហ៊ុនផលិតរថយន្តប្រើសាំង និងម៉ាស៊ូត ដែលងាកមកផលិតរថយន្តប្រើថាមពលអគ្គិសនី នឹងអាចទទួលបានទុនទ្វេដង។ ដូចគ្នានេះដែរ ទុនរបស់ក្រុមហ៊ុនផលិតឧបករណ៍ប្រើថាមពលខ្យល់ និងថាមពលព្រះអាទិត្យក៏នឹងកើនឡើង ដោយសារតម្រូវការប្រើប្រាស់កើនឡើង។

របាយការណ៍នេះបានផ្ដល់អនុសាសន៍ដល់អ្នកវិនិយោគឱ្យមានការវាយតម្លៃឱ្យបានច្បាស់លាស់ទៅលើប្រភេទមុខជំនួញរបស់ខ្លួន ដើម្បីឱ្យដឹងថា តើអាចប្រតិកម្មទៅនឹងការកែប្រែគោលនយោបាយដ៏ស៊ីជម្រៅនេះឬទេ? ហើយទន្ទឹមនឹងនេះ វិនិយោគិនទាំងឡាយគួរតែងាកទៅវិនិយោគលើវិស័យ “បៃតង” វិញ៕

December 12, 2019

ខ្លាំងមែន! ចិន ចាយលុយវាល់លានដុល្លារលើ Biotech ក្នុងវិស័យវេជ្ជសាស្រ្ត

របាយការណ៍ថ្មីមួយ បានបង្ហាញថា ចិនកំពុងយកចិត្តទុកដាក់ខ្លាំងលើវិស័យវេជ្ជសាស្រ្តដែលផ្តោតជាសំខាន់លើផ្នែកស្រាវជ្រាវជាក់ស្តែង ដូចជាបច្ចេកវិទ្យា Biotech ជាដើម។ នេះបើយោងតាមការចុះផ្សាយរបស់ Techcrunh នាដើមសប្ដាហ៍កន្លងទៅ៖

ក្រុមហ៊ុនចិន ដែលមានម្ចាស់ជាជនជាតិដើម ដែលពាក់ព័ន្ធនឹងវិស័យនេះ(science និង biotech) បាននិងកំពុងធ្វើការវិនិយោគទឹកប្រាក់រាប់សិបកោដិលានដុល្លារ( សរុប 4ប៊ីលានដុល្លារ=4ពាន់ពាន់លានដុល្លារ) នារយៈពេលប៉ុន្មានឆ្នាំចុងក្រោយ(2015-2018) ។ បើមើលតាមក្រាហ្វិកស្ថិតិ មកទល់ពេលនេះ តួលេខក្នុងវិស័យនេះ បានហក់ឡើងគួរឱ្យកត់សម្គាល់ រហូតដល់អាចឈរពីលើសហរដ្ឋអាមេរិកទៀតផង។ បើគិតលើទឹកប្រាក់ដ៏សម្បើមបែបនេះ ចិនកំពុងតែកាន់កាប់តំណែងជាអ្នកកាច់ចង្កូតដ៏សំខាន់នាពេលអនាគត ឬ World’s future major health institutions។

បន្ថែមពីលើនេះ ក្រុមហ៊ុនដែលមានថៅកែជាជនជាតិចិនទាំងនោះ មានលទ្ធភាពរហូតអាចផ្តល់ជាជំនួយដល់ក្រុមហ៊ុនអាមេរិកច្រើនជាង 300ក្រុមហ៊ុន ដែលពាក់ព័ន្ធនឹងវិស័យនេះទៀតផង៕

The scientist experimented in the laboratory

December 12, 2019

Google ទិញយកក្រុមហ៊ុនផលិត Smart Watch ល្បីមួយមកពង្រឹងខាង Helth Tech ឱ្យកាន់តែធំ

ក្រុមហ៊ុន Alphabet ដែលបង្កើតឡើងដោយស្ថាបនិក និងជាអាណាព្យាបាលរបស់ Google ត្រូវគេដឹងថា នៅពេលថ្មីៗនេះបានចុះកិច្ចព្រមព្រៀងទិញយកក្រុមហ៊ុនផលិតនាឡិកាឆ្លាតវៃ Fitbit ជាផ្លូវការក្នុងតម្លៃដល់ទៅ 2,1ប៊ីលានដុល្លារ(ពាន់លានដុល្លារ)។

យោងតាមប្រភពពី Google បានបង្ហើបឱ្យដឹងថា ក្រុមហ៊ុននឹងផ្តល់អ្វីថ្មីៗទៀតជូនអ្នកគាំទ្រនៅលើឧបករណ៍បត់បានដែលកំពុងពេញនិយមសម្រាប់អ្នកចូលចិត្តហាត់ប្រាណ ដោយបូកបញ្ចូលទាំងភាពងាយស្រួលលើ Fitbit និងបច្ចេកវិទ្យាទំនើបពី Wear OS។ ផលិតផលនាឡិកាឆ្លាតវៃ Fitbit Fitness មានភាពជោគជ័យគួរឱ្យកត់សម្គាល់ក្នុងស្រឡាយនាឡិកាឆ្លាតវៃ បើធៀបទៅនឹងក្រុមហ៊ុនផ្សេងៗដូចជា Xiaomi និង Google ជាដើម។

យ៉ាងណាមិញ ក្រោយពីការប្រកាសជាផ្លូវការបែបនេះ ត្រូវបានគេដឹងថា វាជាគម្រោងដែលជំរុញការលក់ Wear OS របស់ Google ឱ្យកាន់តែចូលជ្រៅដល់អ្នកប្រើប្រាស់ផ្ទាល់កាន់តែច្រើន។ ចំពោះផលិតផលចុងក្រោយនៅក្រោមស្លាករបស់ Fitbit គឺ Fitbit Versa និង Fitbit Versa 2 ដែលមានសមត្ថភាពតាមដានចង្វាក់បេះដូង មានតួនាទីស្រដៀងនៅនឹង Wear OS របស់ Google ដូច្នោះដែរ៕

សូមទស្សនាវីដេអូបង្ហាញពីសមត្ថភាព Wear OS៖

វីដេអូបង្ហាញសមត្ថភាព Fitbit Versa 2៖

December 12, 2019

Category: សង្គម និងសេដ្ឋកិច្ច