ប្រទេសអៀរឡង់ (Ireland) ជាប្រទេសដែលល្បីល្បាញផ្នែកប្រជាជនមានសេចក្តីសុខខ្លាំងជាងគេលើពិភពលោកនាពេលបច្ចុប្បន្ននេះ ជាអតីតប្រទេសដែលពោរពេញដោយយុវជនប្រមឹកធ្ងន់ធ្ងរកាលពីជាង 20ឆ្នាំមុន តែទោះជាយ៉ាងនេះក្តី ប្រទេសមួយនេះបានខិតខំប្រឹងប្រែងគ្រប់លទ្ធភាពដើម្បីផ្លាស់ប្តូរវប្បធម៌ស្រវឹងខួប ឱ្យក្លាយជាប្រទេសដែលមានប្រជាជនគំរូក្នុងក្រសែរភ្នែករបស់ពិភពលោក។
វេទិកាសេដ្ឋកិច្ចពិភពលោកបានបញ្ជាក់ថា កាលពីជាង 20ឆ្នាំមុន អៀរឡង់ ជាប្រទេសដែលមានប្រជាជនផឹកគ្រឿងស្រវឹងធ្ងន់ធ្ងរជាងគេបំផុតនៅទ្វីបអឺរ៉ុប។ បើតាមទិន្នន័យពីស្ថាប័ន Mosaic Science បានបញ្ជាក់ថា យុវជននៃប្រទេសនេះរហូតដល់ទី 42% ប្រើប្រាស់គ្រឿងស្រវឹងយ៉ាងច្រើនកាលពីមុន ហើយជារៀងរាល់ថ្ងៃមានយុវជនប្រមាណ 23% បានជក់បារី។
នៅពេលនោះ អ្វីដែលជាបញ្ហាលំបាក គឺយុវជនជក់ជាមួយនឹងភាពរីករាយ ជាមួយនឹងគ្រឿងស្រវឹង រួមទាំងទម្លាប់ជាច្រើនផ្សេងទៀតដែលប៉ះពាល់ដល់សុខភាព រហូតធ្វើឱ្យការអប់រំលើបញ្ហាគ្រឿងស្រវឹង និងគ្រឿងញៀនក្លាយជារឿងគ្មានប្រសិទ្ធភាព។ ក្រៅពីនេះ អ្វីដែលជាកត្តាប្រឈមធំជាងគេនោះគឺ ទោះបីជាយុវជនបានយល់ដឹងច្បាស់ពីការផលវិបាកនៃការប្រើប្រាស់គ្រឿងស្រវឹង និងផលប៉ះពាល់នៃបញ្ហាទាំងអស់នោះរួចហើយក្ដី ក៏ពួកគេនៅតែព្យាយាមអនុវត្តដដែល។
ដោយមើលឃើញពីបញ្ហាដ៏ស្មុគស្មាញនេះ អ្នកចិត្តសាស្រ្តនៅក្នុងប្រទេសនោះបានចាប់ផ្តើមស្វែងរកពីមូលហេតុដែលនឹងធ្វើឱ្យយុវវ័យកាត់បន្ថយការប្រើប្រាស់គ្រឿងស្រវឹង ឬសេពគ្រឿងស្រវឹងក្នុងកម្រិតត្រឹមត្រូវ ដែលមិនប៉ះពាល់ខ្លាំងដល់ការរស់នៅ។
ជាលទ្ធផល ក្រោយការសិក្សាស្រាវជ្រាវគេរកឃើញថា បញ្ហាដែលធ្វើឱ្យយុវវ័យទទួលទានគ្រឿងស្រវឹងច្រើនគឺ បណ្ដាលមកពីការខ្វះភាពស្និទ្ធស្នាលពីក្រុមគ្រួសារ បញ្ហាកង្វះសកម្មភាពកម្សាន្តនៅក្នុងការអប់រំ និងអាការធុញទ្រាន់នៅក្នុងផ្ទះនាពេលយប់។
ជាដំណោះស្រាយ អ្នកជំនាញបានណែនាំឱ្យអាណាព្យាបាលទូទាំងប្រទេសចាប់ផ្តើមចាប់អារម្មណ៍ និងងាកមកចំណាយពេលវេលានៅជាមួយនឹងកូន ជាពិសេសក្មេងវ័យជំទង់ឱ្យបានច្រើនជាងមុន។
ចំណុចនេះបានធ្វើឱ្យយុវជនវ័យក្មេងមួយចំនួនចាប់ផ្តើមកាត់បន្ថយពេលវេលានៅជាមួយមិត្តភក្តិខាងក្រៅ ហើយចំណាយពេលរីករាយជាមួយនឹងក្រុមគ្រួសារ ដែលធ្វើឱ្យពួកគេកាត់បន្ថយការទទួលទានគ្រឿងស្រវឹងបានមួយផ្នែកធំ។
បន្ថែមពីលើការអប់រំក្នុងគ្រួសារហើយ នៅគ្រឹះស្ថានអប់រំ ប្រទេសអៀរឡង់ ក៏បានបន្ថែមម៉ោងសម្រាប់សកម្មភាពកម្សាន្ត និងកីឡាយ៉ាងទៀងទាត់នៅក្នុងសាលា ដែលធ្វើឱ្យយុវវ័យចាប់ផ្តើមចំណាយពេលវេលា និងមើលឃើញពីសារៈសំខាន់នៃការលើកទឹកចិត្តឱ្យមានការប្រកួតប្រជែងកីឡានៅក្នុងសាលា។ កត្តាទាំងអស់នេះ បានធ្វើឱ្យយុវជនចាប់ផ្តើមផ្តោតអារម្មណ៍សំខាន់លើការធ្វើការងារជាក្រុម ការដោះស្រាយបញ្ហារួមគ្នា និងការប្រឹងប្រែងរក្សាសុខភាពដើម្បីទទួលបានលទ្ធផលល្អក្នុងការប្រកួតប្រជែងទាំងក្នុងសាលា ក្នុងសហគមន៍ និងសម្រាប់ការប្រកួតប្រជែងនានាបន្ថែមទៀត។
ចំណុចបន្ថែមមួយទៀតនោះ គឺអ្នកចិត្តសាស្ត្របានណែនាំឱ្យគ្រួសារ និងយុវជនមានសកម្មភាពរួមគ្នានៅពេលយប់ នៅក្នុងពេលវេលាសមស្របណាមួយ ដើម្បីកាត់បន្ថយស្រ្តេសដែលកើតចេញពីភាពស្មុគស្មាញក្នុងការសិក្សា ឬការងារជាដើម។
បន្ថែមពីលើនេះ សកម្មភាពយុវជនក៏អាចធ្វើដោយខ្លួនឯងបាន តាមរយៈការបែរចំណាប់អារម្មណ៍មកលម្ហែអារម្មណ៍ជាមួយនឹងសិល្បៈដ៏សម្បូបែបដូចជាការលេងតន្ត្រី ការច្រៀង រាំ ការលេងកីឡា និងចូលរួមក្នុងក្លិបសិល្បៈក្នុងទម្រង់ផ្សេងៗទៀត ដែលអាចធ្វើឱ្យយុវវ័យទទួលបានអារម្មណ៍រីករាយ និងផ្តោតភាពរីករាយលើសិល្បៈឱ្យបានច្រើន។
ក្រោយពេលទទួលបានលទ្ធផលជាវិជ្ជមានពីការចាប់ផ្តើមបន្តិចម្តងៗហើយ ក្រុមគ្រួសារនីមួយៗចាប់ផ្តើមបង្វែរគំនិតដោយឱ្យពួកគេគិតថា ការចំណាយពេលលើសកម្មភាពត្រឹមត្រូវទាំងអស់នោះ មិនមែនជារឿងឥតប្រយោជន៍នោះទេ តែវាក៏ជាផ្នែកមួយនៃការវិនិយោគលើការអប់រំចិត្តគំនិត និងកសាងទម្លាប់ល្អរបស់យុវវ័យផងដែរ។ ជាលទ្ធផលនៅឆ្នាំ2012 មានយុវជន 42% ចន្លោះអាយុចាប់ពី 15 ដល់16ឆ្នាំ ចាប់ផ្តើមលេងកីឡា 4ដងក្នុង 1សប្តាហ៍ ហើយសាលារៀនក៏ចាប់ផ្តើមបើកវគ្គបង្រៀនអាណាព្យាបាលពីវិធីសាស្រ្តក្នុងការជួយកូនឱ្យចេញឆ្ងាយពីគ្រឿងស្រវឹងច្រើនជ្រុល។
បន្ថែមពីលើនេះ សាលាក៏ណែនាំឱ្យអាណាព្យាបាលចំណាយពេលវេលាឱ្យមានប្រសិទ្ធភាពកាន់តែខ្លាំងសម្រាប់កូនៗរបស់ពួកគេ ដែលធ្វើឱ្យទិន្នន័យនៃយុវជនដែលចំណាយពេលជាមួយគ្រួសារបានកើនឡើងទ្វេដងជារៀងរាល់ឆ្នាំ។
ជាដំណោះស្រាយប្រកបដោយប្រសិទ្ធភាពបន្ថែមទៀតនោះ គឺអាជ្ញាធរបានកំណត់អាយុត្រឹមត្រូវមិនឱ្យយុវវ័យអាយុក្រោម 18ឆ្នាំទិញផលិតផលទាក់ទងនឹងថ្នាំជក់ និងមិនអនុញ្ញាតឱ្យលក់ស្រាឱ្យក្រុមយុវជនដែលមានអាយុក្រោម 20ឆ្នាំឡើយ។ ហើយសម្រាប់ការកម្សាន្តដល់យប់ជ្រៅសម្រាប់យុវជនវ័យ 16ឆ្នាំដោយគ្មានវត្តមានក្រុមគ្រួសារនៅជាមួយ នឹងក្លាយជារឿងខុសច្បាប់។
ចាប់ផ្តើមពីសកម្មភាពទាំងអស់នេះ នៅប៉ុន្មានឆ្នាំចុងក្រោយនេះ គេសង្កេតឃើញថា ចំនួនយុវជនដែលទទួលទានគ្រឿងស្រវឹងញឹកញាប់ក្នុង 1ខែៗ បានធ្លាក់ចុះរហូតដល់ 90% មកដល់បច្ចុប្បន្ន ហើយពេលនេះចំនួនយុវវ័យអាយុចាប់ពី 15 ដល់ 16ឆ្នាំ ដែលសេពគ្រឿងស្រវឹងមានត្រឹមតែ 3% ប៉ុណ្ណោះនៅទូទាំងប្រទេស។
គំរូនៃសកម្មភាពទាំងអស់នេះ បានធ្វើឱ្យយុវជនរាប់លាននាក់នៅក្នុងប្រទេសចាប់ផ្តើមក្លាយជាមនុស្សដែលមានភាពកក់ក្តៅ មានការយល់ដឹងខ្ពស់ រួមទាំងមានទម្លាប់ល្អទៀតផង៕
