សង្គម និងសេដ្ឋកិច្ច - La Reine Media

មហាសេដ្ឋីអាមេរិកម្នាក់ចំណាយទុន 1,000លានដុល្លារអាមេរិក ទិញភាគហ៊ុន Tesla ពេលនេះចំណេញកប់ក្ដោង

ជំនឿចិត្តដែលមហាសេដ្ឋី Larry Ellison (CEO របស់ក្រុមហ៊ុនផលិតគ្រឿងបន្លាស់អេឡិចត្រូនិក Oracle) ទៅលើមហាសេដ្ឋី Elon Musk CEO នៃក្រុមហ៊ុនផលិតរថយន្តអគ្គិសនី Tesla ដែលជាមិត្តម្នាក់របស់ខ្លួន បាននាំមកនូវ “ផ្លែផ្កាដ៏ផ្អែមត្រជាក់”។

យោងតាមសារព័ត៌មាន Bloomberg នៅមុនពេលក្លាយជាសមាជិកម្នាក់ក្នុងក្រុមប្រឹក្សាភិបាល Tesla កាលពីខែធ្នូ ឆ្នាំ2018 លោក Ellison បានទិញភាគហ៊ុន Tesla ដល់ទៅ 3លានហ៊ុន ដែលមានតម្លៃប្រមាណជា 1,000លានដុល្លារអាមេរិក ប៉ុន្តែបច្ចុប្បន្ន ភាគហ៊ុននេះបានកើនតម្លៃដល់ទៅ 1,600លានដុល្លារអាមេរិកឯណោះ។

តម្លៃភាគហ៊ុន Tesla បានកើនឡើងថែម 25% ដោយប្រើរយៈពេលត្រឹមតែ 2សប្ដាហ៍ដំបូងនៃឆ្នាំ2020 ប៉ុណ្ណោះ ដោយសារការប្រគល់ទំនិញរបស់ Tesla បានលោតផុតការគ្រោងទុក ហើយក្រុមហ៊ុននេះ ក៏បានចាប់ផ្ដើមប្រគល់រថយន្តម៉ាក Tesla ដែលផលិតនៅប្រទេសចិន ទៅឱ្យអតិថិជននៅក្នុងប្រទេសមួយនេះផងដែរ។

ការជួញដូរមូលបត្រកាលពីថ្ងៃទី14 មករាកន្លងទៅ តម្លៃភាគហ៊ុនរបស់ Tesla បានកើនថែម 2.5% បង្កើតបានកំណត់ត្រាថ្មី ជិតស្មើនឹង 538ដុល្លារក្នុង 1ហ៊ុន។

មហាសេដ្ឋីអាមេរិក Elon Musk ក៏ទទួលបានផលចំណេញយ៉ាងធំធេងពីការកើនឡើងនៃតម្លៃមូលបត្ររបស់ក្រុមហ៊ុន Tesla នេះផងដែរ៕

ប្រភព៖ សារព័ត៌មានបរទេស

January 16, 2020

រកឃើញភ័ស្ដុតាងបង្ហាញថា មនុស្សលោក មានដើមកំណើតពីប្ដីប្រពន្ធតែមួយគូគត់ កាលពីរាប់សែនឆ្នាំមុន

រកឃើញភ័ស្ដុតាងថ្មីដែលបង្ហាញថា មនុស្សលោកមានដើមកំណើតពីប្ដីប្រពន្ធតែ 1គូគត់ កាលពីរាប់សែនឆ្នាំមុន

លទ្ធផលនៃការវិភាគទៅលើតំណពូជ បានបង្ហាញឱ្យឃើញថា មនុស្សលោកយើងសព្វថ្ងៃសុទ្ធតែជាកូនចៅរបស់ឪពុកម្ដាយ 1គូគត់ កាលពី 2សែនឆ្នាំមុន។

អ្នកវិទ្យាសាស្ត្រ 2រូប គឺលោក Mark Stoeckle នៅសាកលវិទ្យាល័យ Rockefeller និង លោក David Thaler នៅសាកលវិទ្យាល័យ Basel បានបង្ហាញភ័ស្តុតាងថ្មីសន្លាងមួយទៀតស្ដីអំពីបុព្វបុរសរបស់មនុស្សជាតិ បន្ទាប់ពីអ្នកវិទ្យាសាស្ត្រទាំង 2រូបនេះបានធ្វើការពិនិត្យទៅលើ Mitochondrial DNA របស់ម្ដាយដែលចម្លងមកឱ្យកូន។ នេះបើតាម Fox News។

អ្នកវិទ្យាសាស្ដ្រខាងលើក៏បានអះអាងដែរថា ប្រការនេះ គឺដូចទៅនឹងសត្វ 90% នៅលើភពផែនដី។

អ្នកវិទ្យាសាស្ដ្រទាំង 2នាក់បានវិភាគទៅលើកូដហ្ស៊ែនចំនួន 5លាននៅលើសត្វផ្សេងៗចំនួន 1សែនក្បាល ដែលក្នុងនោះក៏មានមនុស្សផងដែរ។ កូដហ្ស៊ែនទាំងនោះស្ថិតនៅខាងក្រៅកោសិការស់ ដែលហៅថា Mitochondrial DNA ហើយវាត្រូវបានចម្លងតកូន តចៅ ពីជំនាន់មួយ ទៅជំនាន់មួយ។

អ្នកប្រាជ្ញ Mark Stoeckle និង David Thaler សន្និដ្ឋានថា មនុស្សលោក សុទ្ធតែមានប្រភពកំណើតមកពីប្ដីប្រពន្ធតែ 1គូគត់ ដែលរស់នៅកាលពីប្រមាណជា 100.000 ទៅ 200.000ឆ្នាំមុន បន្ទាប់ពីផែនដីបានជួបនឹងគ្រោះមហន្តរាយដែលបានសម្លាប់សត្វស្ទើរតែទាំងអស់នៅលើផែនដី៕

ប្រភព៖ សារព័ត៌មានបរទេស

January 16, 2020

«Train To Busan 2 » បញ្ចេញថ្ងៃដាក់បញ្ចាំងជាផ្លូវការ

អ្នកដឹកនាំរឿង Yeon Sang Ho បានប្រកាសពីកាលបរិច្ឆេទចាក់បញ្ចាំងដំបូងនៃកំពូលភាពយន្ដល្បីរឿង រថភ្លើងទៅប៊ូសាន វគ្គ២ ( Train To Busan 2)។

ដោយយោងតាមសារព័ត៌មានកម្សាន្ដបរទេស Soompi បានចេញផ្សាយអំពីកាលបរិច្ឆេទចេញបញ្ចាំងភាពយន្ដដ៏ល្អឯករបស់ប្រទេសកូរ៉េខាងត្បួងជាផ្លូវការ។ អ្នកដឹកនាំរឿង Yeon Sang Ho ថា គ្រោងចាក់បញ្ចាំងជាលើកដំបូងយ៉ាងពិសេសបំផុតនៅថ្ងៃទី ១២ ខែសីហាឆ្នាំ ២០២០ ។

ខ្សែភាពយន្តភ័យរន្ធត់ដើម Train To Busan បានបំបែកកំណត់ត្រាខ្សែភាពយន្តកូរ៉េខាងត្បូងជាច្រើននៅក្នុងឆ្នាំ ២០១៦ រួមទាំងជាខ្សែភាពយន្តដំបូងដែលទទួលបានប្រាក់ចំណូលសរុបខ្ពស់បំផុតក្នុងមួយថ្ងៃ។ Train To Busan ក៏ជាខ្សែភាពយន្តដំបូងប្រចាំឆ្នាំនៅប្រទេសកូរ៉េដែលទាក់ទាញបាន 10,000,000 នៅក្នុងតារាង box office។ កុំឱ្យខកខានក្នុងការរង់ចាំទស្សនាភាពយន្ដនេះឱ្យសោះ។

January 16, 2020

ចិនបង្ហើបពីមហិច្ឆតាគ្រប់គ្រងទីអវកាសដែលមានទំហំទឹកប្រាក់ 10លានលានដុល្លារអាមេរិក

ក្រុងប៉េកាំងកាន់តែបង្ហាញឱ្យឃើញអំពីមហិច្ឆតាគ្រប់គ្រងឋានព្រះចន្ទ និងភពផែនដី ដោយគ្រោងបង្កើតតំបន់សេដ្ឋកិច្ចក្នុងទីអវកាស នៅឆ្នាំ2050។

ថ្មីៗនេះ ក្រុងប៉េកាំង បានបង្ហើបឱ្យដឹងអំពីគម្រោងមួយប្រកបដោយមហិច្ឆតា ក្នុងការបើកតំបន់សេដ្ឋកិច្ចអវកាស ដែលនឹងធ្វើឱ្យមហិច្ឆតាគ្រប់គ្រងឋានព្រះចន្ទរបស់ប្រទេសមួយនេះ ក្លាយជាការពិត។

ប្រធានគណៈកម្មាធិការវិទ្យាសាស្ដ្រ និងបច្ចេកវិទ្យានៃក្រុមហ៊ុនវិទ្យាសាស្ដ្របច្ចេកវិទ្យាអវកាសចិន (CAST) លោក Bao Weimin បានប្រាប់ឱ្យដឹងអំពីមហិច្ឆតាដ៏ធំមួយនេះ។

CAST បច្ចុប្បន្ន គឺជាម្ចាស់ទុនសំខាន់បំផុតក្នុងកម្មវិធីអវកាសជាតិរបស់ចិន គ្រប់គ្រងគម្រោងឬង្កើតតំបន់សេដ្ឋកិច្ចអវកាស រវាងភពផែនដី និងឋានព្រះចន្ទ។ តំបន់សេដ្ឋកិច្ចនេះ បូករួមទាំងតំបន់ដែលនៅក្បែរផែនដី ក្បែរព្រះចន្ទ និងតំបន់ចន្លោះនៃភពទាំងនេះទៀតផង។

សារព័ត៌មានវិទ្យាសាស្ដ្រ និងបច្ចេកវិទ្យារបស់រដ្ឋចិន បានដកស្រង់សម្ដីរបស់ក្រុមអ្នកសេដ្ឋកិច្ច ឱ្យដឹងថា គម្រោងនេះនឹងអាចបង្កើតតំបន់សេដ្ឋកិច្ចមួយដ៏ធំ ដែលមានតម្លៃ 10.000.000.000.000.00 (ដប់លានលាន)ដុល្លារអាមេរិករៀងរាល់ឆ្នាំសម្រាប់ប្រទេសចិន។ គម្រោងយក្សនេះនឹងផ្ដោតទៅលើវិស័យធំៗចំនួន3 គឺដឹកជញ្ជូនក្នុងទីអវកាស រុករករ៉ែអវកាស និងហេដ្ឋារចនាសម្ព័ន្ធផ្អែកទៅលើអវកាស។

បច្ចេកវិទ្យាជាមូលដ្ឋានសម្រាប់បម្រើឱ្យគ្រោងការខាងលើនេះ នឹងបញ្ចប់ជាស្ថាពរនៅឆ្នាំ2030 ខណៈដែលបច្ចេកវិទ្យាដឹកជញ្ជូនគ្រោងនឹងបង្កើតឡើងនៅឆ្នាំ2040។ ដល់ពាក់កណ្ដាលសតវត្សរ៍នេះ ប្រទេសចិនអាចបង្កើតបានដោយជោគជ័យនូវតំបន់សេដ្ឋកិច្ចអវកាស។

ការសិក្សាស្រាវជ្រាវឋានព្រះចន្ទ បានក្លាយជាវិស័យមួយដែលត្រូវបានចិនយកចិត្តទុកដាក់បំផុត។ កាលពីខែកក្កដា ឆ្នាំកន្លងទៅ ប្រទេសនេះបានបាញ់បង្ហោះរ៉ុក្កែត 1គ្រាប់ទៅទីអវកាស ដោយនាំយកទៅជាមួយនូវភារកិច្ចសំខាន់ទាក់ទិននឹងពាណិជ្ជកម្ម ដែលនេះជាជោគជ័យដំបូងមួយក្នុងវិស័យឧស្សហកម្មអវកាសចិន។

ចិនធ្លាប់បានបាញ់បង្ហោះយានអវកាសស៊ើបការណ៍ Chang’e-4 ទៅកាន់ឋានព្រះចន្ទ ដោយបានចុះចតនៅផ្នែកម្ខាងទៀតដែលជាទីឋានងងឹតអចិន្ត្រៃយ៍នៅលើឋានព្រះចន្ទ ដែលគេហៅថា Far side of the Moon។ នេះគឺជាបេសកកម្មប្រវត្តិសាស្ដ្រ ព្រោះថា កន្លងមក ពុំទាន់មានប្រទេសណាអាចទៅដល់ទីនោះទេ។

នៅចុងឆ្នាំនេះ ចិននឹងបាញ់បង្ហោះយានអវកាស Chang’e-5 ដើម្បីនាំយកគំរូតាងពីព្រះចន្ទមកកាន់ផែនដី។ បន្ទាប់មក យានអវកាស Chang’e-6 នឹងនាំយកដីពីប៉ូលខាងត្បូងរបស់ព្រះចន្ទមកផែនដី ហើយ Chang’e-7 នឹងបំពេញបេសកកម្មនៅប៉ូលខាងត្បូងនៃឋានព្រះចន្ទ ដើម្បីសិក្សាស្រាវជ្រាវពីតំបន់នេះ។ ចំណែក Chang’e-8 នឹងធ្វើការសាកល្បងបច្ចេកវិទ្យាសំខាន់ៗ ដូចជាបច្ចេកវិទ្យាបោះពុម្ព 3D ជាដើម ដើម្បីសាងសង់ស្ថានីយស្រាវជ្រាវនៅលើពិភពលោកខែ៕

ប្រភព៖ សារព័ត៌មានបរទេស

January 15, 2020

តម្លៃនាំចូលសម្ភារសំណង់បានកើនឡើង 50% នៅឆ្នាំ2019

ការរីកចម្រើនវិស័យអចលនទ្រព្យបាននិងកំពុងជំរុញឱ្យមានកំណើនតម្រូវការសម្ភារសំណង់ ស្របពេលវិស័យសំណង់នៅបន្តសកម្មភាពគគ្រឹកគគ្រេង ដែលឆ្លុះបញ្ចាំងឱ្យឃើញថា មិនទាន់មានភាពនឿយណាយ នៃការវិនិយោគលើវិស័យនេះនៅឡើយ។

របាយការណ៍អំពីតម្លៃសម្ភារសំណង់ដែលនាំចូលមកកម្ពុជា ដើម្បីផ្គត់ផ្គង់ដល់វិស័យសំណង់បានឱ្យដឹងថា បានកើនឡើង 50%ក្នុងឆ្នាំ 2019 បើប្រៀបធៀបនឹងឆ្នាំ2018។ នេះបើតាមធនាគារជាតិនៃកម្ពុជា។

តួលេខពីធនាគារជាតិនៃកម្ពុជាបានបង្ហាញថាតម្លៃសរុបនៃសម្ភារសំណង់ រួមមានសម្ភារសំណង់ស៊ីម៉ងត៍ និងផលិតផលដែកថែប ត្រូវបានប៉ាន់ប្រមាណថា មានចំនួន 1.5ពាន់លានដុល្លារ ក្នុងឆ្នាំ2019 រីឯតម្លៃនៃការនាំចូលសម្ភារសំណង់កាលពីឆ្នាំ2018 មានប្រមាណ 1ពាន់លានដុល្លារ។

ធនាគារជាតិនៃកម្ពុជា ឬ NBC បាននិយាយថា វិស័យសំណង់ គឺជាផ្នែកមួយនៃកត្តាជំរុញសេដ្ឋកិច្ចសម្រាប់កំណើនសេដ្ឋកិច្ចឆ្នាំ2019 ដែលត្រូវបានគេប៉ាន់ប្រមាណថា នឹងឈានដល់ 7.1%។

ធនាគារជាតិនៃកម្ពុជា បានសរសេរនៅក្នុងរបាយការណ៍ថា៖“វិស័យសំណង់ និងអចលនទ្រព្យបន្តកើនឡើង ដែលឆ្លុះបញ្ចាំងដោយនិន្នាការកើនឡើងនៃការនាំចូលសម្ភារសំណង់ និងគម្រោងសាងសង់ដែលទទួលបានការអនុម័ត”។

បើតាមរបាយការណ៍ដដែលនេះ នៅក្នុងឆ្នាំ2019 ការនាំចូលសម្ភារសំណង់ មានតម្លៃប៉ាន់ស្មានប្រមាណ 1,500លានដុល្លារ អាមេរិក ដែលកើនឡើងពីជិត 600លានដុល្លារក្នុងឆ្នាំ2018។ ក្នុងនោះ ការនាំចូលគ្រឿងបរិក្ខារសំណង់ផ្សេងៗ មានតម្លៃជាង 900លានដុល្លារ ការនាំចូលស៊ីម៉ងត៍មានតម្លៃជាង 100លានដុល្លារ ពោលគឺកើនឡើងពីប្រមាណ 90លានដុល្លារកាលពីឆ្នាំ2018 និងការនាំចូលដែកមានតម្លៃ 500លានដុល្លារ កើនពីចំនួន 300លានដុល្លារក្នុងឆ្នាំ2018។

របាយការណ៍របស់ NBC ក៏បានបង្ហាញដែរថាវិស័យសំណង់ និងអចលនទ្រព្យនៅតែបន្តកើនឡើង ដែលត្រូវបានឆ្លុះបញ្ចាំងពីនិន្នាការនៃការកើនឡើងការនាំចូលសម្ភារសំណង់ និងគម្រោងសាងសង់ដែលបានអនុម័ត។

សម្រាប់ឆ្នាំ2020 នេះ ការនាំចូលគ្រឿសម្ភារសម្រាប់ផ្គត់ផ្គង់ដល់វិស័យសំណង់ ត្រូវបានព្យាករថា នឹងមានតម្លៃប្រមាណជាង 2,300លានដុល្លារ។ ការនាំចូលសម្ភារសំណង់ រួមមានបរិក្ខាសំណង់ផ្សេងៗ ស៊ីម៉ងត៍ និងដែក ត្រូវបានព្យាករថា នឹងនៅតែបន្តកើនឡើងនៅឆ្នាំ2020 ដែលឆ្លុះបញ្ជាំងពីកំណើននៃវិស័យសំណង់នៅកម្ពុជា ខណៈគម្រោងសាងសង់ក្នុងឆ្នាំ2019 មានសម្ទុះកើនឡើងខ្ពស់។

យោងតាមរបាយការណ៍ស្តីពី “វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ2019 និងទស្សនវិស័យឆ្នាំ2020” របស់ធនាគារជាតិនៃកម្ពុជា បានបញ្ជាក់ថា វិស័យសំណង់នឹងនៅតែជាសសរស្តម្ភមួយនៃការជំរុញកំណើនសេដ្ឋកិច្ចកម្ពុជាសម្រាប់ឆ្នាំ2020។

ធនាគារជាតិនៃកម្ពុជា បានបង្ហាញនៅក្នុងរបាយការណ៍ទស្សនវិស័យឆ្នាំ2020 នេះថា ការនាំចូលបរិក្ខារសំណង់ផ្សេងៗ តំណាងជិត 50% ឬមានទំហំទឹកប្រាក់នាំចូលប្រមាណជិត 1,400លានដុល្លារ។ ចំណែកការនាំចូលស៊ីម៉ងត៍ តំណាងជិត 10% ឬស្មើប្រមាណជិត 200លានដុល្លារ។ ការនាំចូលដែកតំណាងជិត 40% ឬស្មើនឹងតម្លៃសម្រាប់នាំចូលប្រមាណជិត 800លានដុល្លារ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថាគម្រោងសាងសង់មានចំនួនសរុប 4,446គម្រោងនៅក្នុងឆ្នាំ2019 ដែលជាការកើនឡើង 55% បើប្រៀបធៀបទៅនឹងឆ្នាំមុន ខណៈពេលដែលទុនវិនិយោគមានចំនួន 9,3 ពាន់លានដុល្លារ ពោលគឺកើនឡើង 78%។

ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់មានប្រសាសន៍ថា “វិស័យសំណង់រីកចម្រើន គឺដោយសារតែកំណើនសេដ្ឋកិច្ចល្អ។ ការវិនិយោគភាគច្រើន ចូលមកខេត្តព្រះសីហនុ គឺមកពីប្រទេសចិន។ ការកើនឡើងនៅក្នុងវិស័យសំណង់ គឺផ្តើមចេញពីកំណើនសេដ្ឋកិច្ច និងស្ថិរភាពនយោបាយ”។

គួរជម្រាបដែរថា បច្ចុប្បន្ននេះប្រទេសកម្ពុជាមានរោងចក្រផលិតស៊ីម៉ងត៍ចំនួន5 ដែលអាចផលិតស៊ីម៉ងត៍ បាន8លានតោនក្នុង 1ឆ្នាំ៕

January 15, 2020

ពិធីបុណ្យចូលឆ្នាំចិន

បុណ្យចូលឆ្នាំចិនដែលត្រូវបានគេស្គាល់ថាជាពិធីបុណ្យនិទាឃរដូវនៅក្នុងប្រទេសចិនសម័យទំនើប ឫក៏ជាពិធីបុណ្យចូលឆ្នាំថ្មីរបស់ជនជាតិចិន ដែលជាពិធីបុណ្យដ៏សំខាន់មួយរបស់ជនជាតិចិនទូទាំងពិភពលោក។ នៅក្នុងឆ្នាំ2020នេះ ថ្ងៃបុណ្យចូលឆ្នាំចិន ត្រូវនឹងថ្ងៃទី25-27 ខែមករា និងថ្ងៃសែនចូលឆ្នាំចិន នៅថ្ងៃទី24 ខែមករា។ ពិធីបុណ្យចូលឆ្នាំថ្មីមានអាយុកាលរាប់សតវត្សមកហើយ ដោយសារតែជំនឿ និងប្រពៃណីរបស់ជនជាតិចិនដែលមានតាំងពីយូរលង់ណាស់មកហើយ។ ជាប្រពៃណីពិធីបុណ្យចូលឆ្នាំចិន គឺជាពេលវេលានៃការគោរពបូជាព្រះ និងបុព្វបុរស។ បុណ្យចូលឆ្នាំចិនត្រូវបានប្រារព្ធនៅក្នុងប្រទេសចិន និងតាមបណ្តាប្រទេសដែលមានប្រជាជនចិនរស់នៅ មានដូចជានៅចិនដីគោក តៃវ៉ាន់ ហុងកុង ម៉ាកាវ សិង្ហបុរី ឥណ្ឌូណេស៊ី ម៉ាឡេស៊ី ថៃ វៀតណាម ម៉ូរីស អូស្ត្រាលី ហ្វីលីពីន រួមទាំងប្រទេសកម្ពុជាយើងផងដែរ។ បុណ្យចូលឆ្នាំចិនត្រូវបានគេចាត់ទុកថាជាថ្ងៃឈប់សម្រាកដ៏សំខាន់សម្រាប់ជនជាតិចិន និងអ្នកជាប់សែស្រឡាយចិនទូទាំងពិភពលោក។

នៅក្នុងប្រទេសចិនប្រពៃណីនិងប្រពៃណីក្នុងតំបន់ទាក់ទងនឹងការប្រារព្ធពិធីចូលឆ្នាំចិនមានភាពខុសគ្នាយ៉ាងខ្លាំង។ ជាញឹកញាប់ល្ងាចមុនទិវាចូលឆ្នាំចិនគឺជាឱកាសមួយសម្រាប់ក្រុមគ្រួសារចិនប្រមូលផ្តុំគ្នាសម្រាប់អាហារពេលល្ងាចជួបជុំគ្នាប្រចាំឆ្នាំ។ វាក៏ជាប្រពៃណីសម្រាប់គ្រួសារទាំងអស់ ដូចជាសម្អាតផ្ទះយ៉ាងហ្មត់ចត់ ដើម្បីលុបបំបាត់រាល់សំណាងអាក្រក់ និងដើម្បីបង្កើតឱ្យមានសំណាងល្អ។ បង្អួច និងទ្វារត្រូវបានតុបតែងដោយក្រដាសពណ៌ក្រហម និងបិទអក្សរ “សំណាងល្អ” ឬ “សុភមង្គល” “ទ្រព្យសម្បត្តិ” និង “អាយុយឺនយូរ”។ មានការតុបតែងលម្អផ្ទះបន្ថែមរួមមានភ្លើងបំភ្លឺ ភ្លើងគោម និងអាំងប៉ាវក្រហមជាដើម។ បុណ្យចូលឆ្នាំចិនគឺជាពិធីបុណ្យសំខាន់បំផុតសម្រាប់ជនជាតិចិន ហើយជាទូទៅជនជាតិចិនតែងប្រារព្ធពិធិបុណ្យចូលឆ្នាំចិនរយៈពេល15ថ្ងៃ។ ថ្ងៃចូលឆ្នាំចិនត្រូវបានគេកំណត់ថា ជាថ្ងៃដំបូងនៃខែដំបូងក្នុងប្រតិទិនចិនបុរាណ។ បុណ្យចូលឆ្នាំចិន គឺផ្អែកលើប្រតិទិនភាសាចិនឡាតាំង ដែលកាលបរិច្ឆេទបង្ហាញទាំងដំណាក់កាលព្រះចន្ទ និងពេលវេលានៃឆ្នាំព្រះអាទិត្យ។ ពិធីបុណ្យចូលឆ្នាំចិននេះគឺជាពេលវេលាសម្រាប់ការជួបជុំគ្រួសារ ជាទូទៅមនុស្សម្នានឹងទៅលេងសាច់ញាតិ និងក្រុមគ្រួសារ ហើយក៏ជាការជួបជុំជាមួយនឹងមិត្តភក្តិ ដើម្បីដើរទិញទំនិញមើលកម្មវិធីប្រពៃណីចិន បាញ់កាំជ្រួច និងរៀបចំគម្រោងសម្រាប់ធ្វើនៅឆ្នាំក្រោយជាដើម។

អាហារពេលល្ងាចនៅថ្ងៃចូលឆ្នាំថ្មី គឺជាអាហារពេលល្ងាចដ៏សំខាន់បំផុតសម្រាប់ជនជាតិចិន ជាធម្មតាអាហារពេលល្ងាចជួបជុំគ្រួសារជាពិសេសសម្រាប់អ្នកដែលមានសមាជិកគ្រួសារនៅឆ្ងាយពីផ្ទះ។ ក្នុងអំឡុងពេលអាហារពេលល្ងាច ត្រី និងនំប៉ាវគឺជាអាហារដ៏សំខាន់បំផុតនៅភាគខាងជើងនៃប្រទេសចិន។ អាហារទាំងពីរនេះបង្ហាញពីភាពរុងរឿង ហើយចំណែកអាហារផ្សេងទៀតគឺអាស្រ័យលើចំណង់ចំណូលចិត្តផ្ទាល់ខ្លួន៕

January 15, 2020

3ប្រកួតនៅម៉ាឡេស៊ី ព្រះខ័នរាជស្វាយរៀង ទទួលបានជ័យជម្នះ 100%

ក្រុមបាល់ទាត់ព្រះខ័នរាជស្វាយរៀង បានបន្តកំណត់ត្រាមិនដែលចាញ់របស់ខ្លួន នៅក្នុងដំណើរកម្សាន្តការប្រកួតមិត្តភាព នៅឯប្រទេសម៉ាឡេស៊ី។

ក្នុងនោះក្រុមមកពីកម្ពុជាមួយនេះ បានយកឈ្នះក្រុមនៅក្នុងលីកកំពូលរបស់ម៉ាឡេស៊ីទាំង 4ប្រកួត ក្នុងនោះបានយកជ័យជម្នះដោយពិន្ទុ 4-០ លើក្រុមលេខ3 នៃលីកកំពូលម៉ាឡេស៊ី Selangor FA។ លើកទី2 បានបន្តយកឈ្នះក្រុម Felda United FC ដោយលទ្ធផល 2ទល់នឹង1។

កាលពីម្សិលមិញនេះ ក្នុងជំនួបចុងក្រោយជាមួយនឹងអតីតក្លិបរបស់កីឡាករ ធារី ចន្ថាប៊ីន ព្រះខ័នរាជស្វាយរៀង បានយកជ័យជម្នះម្តងទៀត ក្នុងលទ្ធផល 4ទល់នឹង3។

គួរបញ្ជាក់ដែរថា ម្ចាស់ជើងឯកលីកកំពូលរបស់កម្ពុជា ព្រះខ័នរាជស្វាយរៀង បានចេញទៅបោះជំរំហ្វឹកហាត់នៅប្រទេសម៉ាឡេស៊ី កាលពីព្រឹកថ្ងៃទី7 មករា ដើម្បីត្រៀមការប្រកួតវគ្គជម្រុះពានរង្វាន់ក្លិបបាល់ទាត់ប្រចាំទ្វីបអាស៊ី លំដាប់ទី2 (AFC Cup 2020)៕

January 15, 2020

ក្លិបលីកកំពូលកម្ពុជា 4 ប្រជែងគ្នាដណ្តើមពាន Pre-Season

ក្លិបបាល់ទាត់ ក្រសួងការពារជាតិបានផ្តួចផ្តើមបង្កើតពានរង្វាន់សម្រាប់ត្រៀមរដូវកាលថ្មី TV5 Pre Season Championship 2020 ដែលមានក្រុមចំនួន 4 ចូលរួមប្រកួត។

ក្លិបទាំង4 នោះមាន ណាហ្គាវើល, អាស៊ីអឺរ៉ុប យូណាយធីត, សូលទីឡូអង្គរ និងម្ចាស់ផ្ទះក្រសួងការពារជាតិ ដែលការប្រកួតនឹងចាប់ផ្តើមពីថ្ងៃទី16 ដល់ 18 ខែមករា ឆ្នាំ2020 នៅកីឡដ្ឋានស្តាតចាស់។

សន្និសិទកាសែតនៃការប្រកួត នឹងធ្វើឡើងនៅថ្ងៃទី15 មករា 2020 ដោយមានការចាប់ឆ្នោតសម្រាប់ការប្រកួតថ្ងៃទី16 មករា 2020 សម្រាប់ក្រុមដែលឈ្នះនឹងឈានទៅដណ្តើមពាននៅថ្ងៃទី18 មករា ឆ្នាំ2020 ហើយក្រុមចាញ់នឹងប្រកួតយកលេខ3 នៅថ្ងៃជាមួយគ្នា។

គួរបញ្ជាក់ផងដែរថា ពានរង្វាន់ TV5 Pre Season Championship 2020 នឹងបើកឱ្យទស្សនិកជនចូលរួមទស្សនាដោយសេរី៕

January 15, 2020

Xiaomi បង្ហើបដំណឹងចេញស្មាតហ្វូនអេក្រង់បត់បាន ចុចបានទាំងមុខ និងក្រោយ

ថ្មីៗនេះក្រុមហ៊ុនផលិតស្មាតហ្វូន Xiaomi បានចេញផ្សាយនូវដំណឹងចុះប៉ាតង់សុំសិទ្ធិផលិតស្មាតហ្វូន 2ប្រភេទគឺ 1 អាចបត់បាន និង 1ទៀតកាមេរ៉ាលោតឡើង (pop-up camera) នៅការិយាល័យចុះបញ្ជីកម្មសិទ្ធិ WIPO (World Intellectual Property Office)។

សម្រាប់ចង្វាក់ផលិតកម្មស្មាតហ្វូនអេក្រង់បត់ នេះគឺជាលើកដំបូងហើយដែល Xiaomi ប្រឡូកចូលទីផ្សារអេក្រង់ប្រភេទនេះ បន្ទាប់ពី Huawei, TCL និង Samsung បានប្រកាសចេញលក់ស្មាតហ្វូនទម្រង់ដូចគ្នាលើទីផ្សាររួចមកហើយកាលពីឆ្នាំ2018-2019 កន្លងទៅ។

ចំពោះលក្ខណៈពិសេសរបស់អេក្រង់បត់នេះ អាចចុចបានទាំងខាងមុខ និងខាងក្រោយ អ្នកអាចសម្គាល់វាបានថា ខាងមុខ គឺដោយសារអេក្រង់លាតពេញ ឯខាងក្រោយមាននៅសល់គែមខ្មៅបន្តិច។ ស្មាតហ្វូននេះគ្មានកាមេរ៉ាមុខទេ។ ចំណែកកាលបរិច្ឆេទប្រកាសជាផ្លូវការ នៅមិនទាន់ដឹងនៅឡើយទេ៕

January 15, 2020

Microsoft ប្រកាស ឈប់អាប់ឌែតប្រព័ន្ធការពារសុវត្ថិភាព សម្រាប់អ្នកប្រើ Windows 7

ក្រុមហ៊ុន Microsoft នឹងលែងធ្វើការអាប់ឌែតប្រព័ន្ធការពារសុវត្ថិភាពសម្រាប់ប្រព័ន្ធប្រតិបត្តិ Windows 7 សម្រាប់កុំព្យូទ័រទៀតហើយ ចាប់ពីថ្ងៃទី14 មករា ឆ្នាំ2020 នេះតទៅ។

ប្រសិនបើមានការបង្កប់មេរោគ Malware ឬ Virus ថ្មីណាមួយនោះ ម្ចាស់ Windows 7 ទាំងអស់ អាចនឹងប្រឈមហានិភ័យខ្ពស់បំផុត មិនថាតែការបាត់បង់ឯកសារ ឬគាំង PC ដោយប្រការណាមួយឡើយ។

ប្រសិនបើលោកអ្នកមានឯកសារចាំបាច់ សូមធ្វើការចម្លងទុកទៅកាន់ម៉ាស៊ីនដទៃ ផ្សេងទៀត ឬចាំបាច់ត្រូវដំឡើងទៅកាន់ Windows 10 ជាបន្ទាន់។ ចំពោះ Windows XP ក្រុមហ៊ុនប្រកាសបញ្ឈប់ការគាំទ្រតាំងពីឆ្នាំ2014 មកម្ល៉េះ ខណៈដែល Windows 8 ប្រកាសនៅឆ្នាំ2016។

គួររំឭកផងដែរថា បច្ចុប្បន្នមានអ្នកប្រើ 1ភាគ3 ទូទាំងសកលលោកដែលនៅបន្តឈរជើងលើ Windows 7 ដែលជា OS ចេញផ្សាយកាលពីជាង 11ឆ្នាំមុនដដែល ខណៈដែលអ្នកប្រើប្រាស់ Windows 10 មានប្រមាណ 900លានឧបករណ៍ហើយ៕

January 15, 2020

Category: សង្គម និងសេដ្ឋកិច្ច