សង្គម និងសេដ្ឋកិច្ច - La Reine Media

Hee-Chan Hwang កំពុងត្រូវប៉ាន់នៅ Premier League

ក្រុម Leicester City កំពុងតែចាប់អារម្មណ៍ខ្លាំងទៅលើកីទ្បាករ Hee-Chan Hwang សញ្ជាតិកូរ៉េខាងត្បូង មានវ័យ 23ឆ្នាំ ដែលសព្វថ្ងៃកំពុងតែលេងអាជីពនៅក្នុងក្លិប RB Salzburg របស់ប្រទេសអូទ្រីស។

កីទ្បាករសញ្ជាតិកូរ៉េខាងត្បូងនេះបានបង្ហាញខ្លួនឱ្យក្រុម RB Salzburg បានចំនួន 73ដង និងស៊ុតបញ្ចូលទីបាន 23គ្រាប់ ចាប់តាំងពីរូបគេចូលរួមជាមួយនឹងក្រុមនេះនៅឆ្នាំ2015 ហើយទម្រង់លេងរបស់កីទ្បាករម្នាក់នេះក៏មិនមែនធម្មតាដែរ ដោយថ្មីៗនេះគេបានប្រើទេពកោសល្យ និងជំនាញផ្ទាល់ខ្លួន កិបបាល់ញាក់ដាច់ខ្សែការពារលំដាប់ពិភពលោក Van Dijk ហើយក៏ស៊ុតបញ្ចូលទីបានសម្រេចទៀតផង។

កីទ្បាករសញ្ជាតិកូរ៉េរូបនេះ ក៏មានក្លិបអាជីពនៅក្នុងក្របខ័ណ្ឌ English Premier League ជាច្រើនទៀតចាប់អារម្មណ៍ ដែលមានដូចជា Everton និង Wolves ជាដើម ខណៈដែលមិត្តរួមក្រុមរបស់គេម្នាក់ទៀតគឺ Takumi Minamino ក៏ទើបតែបានផ្លាស់ទៅលេងនៅប្រទេសអង់គ្លេស និងកំពុងតែលេងឱ្យក្រុម Liverpool ផងដែរ៕

ប្រភព៖ 90min

January 17, 2020

បាត់មុខយូរ!! លោក ទី អន អតីតបេក្ខភាពយុវតារាស្រាសាច់ដុំប្រកាសត្រៀមចេញចម្រៀងថ្មី

បាត់មុខពីសិល្បៈអស់មួយរយៈ លោក ទី អន ត្រូវបានគេស្គាល់ថាជាអតីតបេក្ខភាពយុវតារាស្រាសាច់ដុំបានសម្ងំរស់នៅអាមេរិកប្រមាណ៧ឆ្នាំ តែពេលថ្មីៗនេះលោកស្រាប់តែប្រកាសថា គ្រោងបញ្ចេញបទចម្រៀង Original Song ផ្ទាល់ខ្លួនក្នុងពេលដ៏ខ្លី ទាំងដែលលោកកំពុងរស់នៅសហរដ្ឋអាមេរិក។

លោក ទី អន បានថ្លែងពីសហរដ្ឋអាមេរិកថា នៅលើទឹកដីថ្មី លោកនៅតែបន្តអាជីពចម្រៀងដូចកាលលោកស្រុកខ្មែរដដែលទេ ដោយរាល់កម្មវិធីបុណ្យទាន និងកម្មវិធីលក់សំបុត្រម្ដងៗ គឺលោកត្រូវបានគេអញ្ជើញមិនដែលខាន។ យ៉ាងណាមិញលោកទទួលតែការងារសំខាន់ៗប៉ុណ្ណោះ ដោយសារតែនៅអាមេរិក លោកក៏មានការងារពិបាកសុំច្បាប់។ លោកនិយាយថា មុនទៅអាមេរិក លោកគឺជាតារាចម្រៀងផង និង ជាតារាសម្ដែងផង ដោយមុនចេញពីស្រុកកំណើត លោកធ្លាប់ចេញបទ Original ២បទ ដោយក្នុងបទ”បុប្ផារីកក្នុងចិត្ត”ទទួលបានការគាំទ្រច្រើន។ អុីចឹងហើយទើបលោកនៅតែមិនចោលអាជីពចម្រៀង។

នៅក្នុងពេលនេះ លោកបានផលិតសាច់ភ្លេងបទថ្មី បានចំនួន១៥បទហើយ ដោយមានទាំងបទមនោសញ្ចេតនា បទញាក់ និងបទរាំវង់ កន្ទ្រឹម សម្រាប់ឱកាសចូលឆ្នាំផងដែរ។ លោកនឹងចុះមកថតបទចម្រៀងទាំងនោះនៅថ្ងៃទី១៧ ខែកុម្ភៈ ឆ្នាំ២០២០នេះ ដើម្បីឱ្យឆាប់បានបទទាំងនោះ ដាក់បង្ហោះឱ្យទាន់មុនចូលឆ្នាំ។ យ៉ាងណាមិញ លោកមិនទាន់សម្រេចចិត្តមករស់នៅស្រុកខ្មែរនៅឡើយទេ តែលោកនឹងសំលឹងមើលឱកាសមករស់នៅស្រុកវិញ នៅពេលលោកចុះមកថត MV ទាំង១៥បទរបស់លោក ប្រសិនបើការងារសិល្បៈនៅទីនេះល្អជាងនៅអាមេរិក។ បទចម្រៀងដែលត្រៀមថតនោះ លោកនឹងច្រៀងបង្ហាញនៅលើទឹកដីអាមេរិក ដោយសារតែខាងអ្នករៀបចំកម្មវិធីប្រគំតន្ត្រីអបអរចូលឆ្នាំនៅអាមេរិក បានកុងត្រាយកលោកឱ្យច្រៀងរាំរួចហើយ៕

January 17, 2020

បើកទំព័រឆ្នាំ ២០២០ ភ្លាម ប៉ុស្ដិ៍លេខ៥ក្រុងពាលីរឿងភាគចំនួន២ប្រមូលផ្ដុំតារាល្បីៗ

ដើមទំព័រឆ្នាំ២០២០នេះ រឿងភាគទូរទស្សន៍ប៉ុស្ដិ៍លេខ៥ បានបន្ដផលិតដល់លំដាប់លេខរឿងទី ២៣ និង ២៤ ហើយ ដែលមានចំណងជើងទាក់ទាញមែនទែនគឺរឿង « មរតកកម្ម » និងរឿង « ទាសករលុយ » ដែលសុទ្ធសឹងជារឿងផ្ដល់តម្លអប់រំដល់មហាជនបានទស្សនារឿងនេះហើយ និងយកទៅប្រើប្រាស់ក្នុងជីវិតប្រចាំថ្ងៃដោយពិចារណា។

លោក ហួង តារាមុន្នី អ្នកគ្រប់គ្រងការផលិតប្រចាំស្ថានីយ៍នេះបានប្រាប់ឡារ៉ែនឱ្យដឹងថា ប៉ុស្ដិ៍លេខ៥បានបើកយ៉ាងតួទូលាយចំពោះតួអង្គថ្មីចាស់ដែលមានសមត្ថភាពក្នុងការសម្ដែងភាពយន្ដ ដោយមិនប្រកាន់យកតែតួប្រចាំប៉ុស្ដិ៍នោះទេ។ ជាក់ស្ដែងដូចរឿងភាគថ្មីដែលដាក់ក្រុងពាលីព្រមគ្នាទាំងពីរនៅព្រឹកថ្ងៃទី 17 នេះ សុទ្ធតែប្រមូលម្ដុំតារាថ្មីចាស់ តារានាំមុខ និងតារាប្រកបរឿង ដែលពោពេញទៅដោយទេពកោសល្យសម្ដែងពិត ដោយមិនប្រើខ្សែក្នុងការចូលសិល្បៈ។ លោកក៏បានអះអាងថា ប៉ុស្ដិ៍លេខ៥គ្មានការប្រកាន់យកតែតួដដែលៗមកសម្ដែងនោះទេ ជាការពិតប៉ុស្ដិ៍លេខ៥គឺបើកឱកាសឱ្យតារាសិល្បៈគ្រប់រូបបានចូលរួមកិច្ចការងារជាមួយស្ថានីយ៍យ៉ាងទូលំលាយ និងសហការគ្នាធ្វើការបានយ៉ាងប្រសើរ។

សូមជម្របថា ក្នុងពិធីក្រុងពាលីព្រឹកមិញនេះ ក៏មានតារាសិល្បៈជាច្រើនដួងចូលរួមដូចជា លោក បញ្ញាសិទ្ធ លោក ណាឃុន លោក លាងឆេ កញ្ញា ណាក់ស្រីណា កញ្ញា ប៉ប់ រចនា អ្នកនាង ញឹម ចាន់ថន និងតារាសម្ដែងប្រុសស្រីជាច្រើនដួង បានបង្ហាញវត្តមានបង្កបរិយាកាសសប្បាយនាបរិវេណសណ្ឋាគារសូហ្វីតែល ភូគីត្រាភ្នំពេញ៕

January 17, 2020

សំណួរ-ចម្លើយ ពាក់ព័ន្ធនឹងសុខភាពពេលមានគភ៌ ដែល ស្ត្រីទាំងអស់គួរដឹង… (តចប់)

ឡារ៉ែនជឿថា នារីៗយើងទាំងអស់ អ្នកណាៗក៏ត្រូវតែមានគ្រួសារ(ស្វាមី) និងត្រៀមខ្លួនសម្រាប់ការមានផ្ទៃពោះដូចគ្នា ដូច្នេះដើម្បីជាចំណេះដឹងសម្រាប់ត្រៀមខ្លួនក្នុងការមានគភ៌ និងដើម្បីថែរក្សាសុខភាពរបស់ខ្លួនឯង និងកូនក្នុងផ្ទៃក្នុងអំឡុងពេលតាំងគភ៌នោះ ខាងក្រោមនេះគឺជាសំណួររបស់ស្ត្រីមានគភ៌ និងចម្លើយរបស់គ្រូពេទ្យជំនាញ ដែលឡារ៉ែនសូមលើកយកមកជម្រាបជូនសម្រាប់ស្ត្រីដែលកំពុងត្រៀមខ្លួនធ្វើជាម្ដាយថ្មោងថ្មីទុកជាចំណេះដឹង…។

បារម្ភ កូនមិនសូវរើ
Q. មានផ្ទៃពោះបាន 20សប្តាហ៍ហើយ តែមិនមានទទួលអារម្មណ៍ថា កូនរើបន្តិចសោះ។ ពេលខ្លះមានអារម្មណ៍រាងទុលៗ តែក៏មិនប្រាកដក្នុងចិត្តថាកូនកំពុងរើដែរ ព្រោះស្រាលៗមែនទែន។ ខំព្យាយាមសង្កេតមើលក្រោយពេលញ៉ាំបាយហើយ តែក៏ស្ងាត់ឈឹង ចង់សួរថា តើបែបហ្នឹងខុសប្រក្រតី ឬក៏អត់?
A. ជាប្រក្រតីស្ត្រីមានគភ៌ នឹងមានអារម្មណ៍ដឹងថា កូនរើលើកដំបូងបង្អស់ នៅក្នុងអំឡុងពេលដែលផ្ទៃពោះមានអាយុពី 16 – 20សប្តាហ៍ តែអារម្មណ៍របស់ស្ត្រីមានផ្ទៃពោះម្នាក់ៗ តែងខុសប្លែកពីគ្នា ដូច្នេះមិនចាំបាច់ថា ត្រូវតែមានអារម្មណ៍ដឹងពីអាការកូនរើឱ្យត្រឹមត្រូវតាមពេលវេលា និងម៉ោងពេលនៃការធ្វើចលនារបស់ទារកនៅក្នុងផ្ទៃរបស់អ្នកនោះទេ។

មានកង្វល់រឿងថ្នាំហ្វូលេត សម្រាប់អ្នកមានផ្ទៃពោះ

Q. ពេលមានគភ៌កូនដំបូង លោកគ្រូពេទ្យចែកថ្នាំហ្វូលេតឱ្យញ៉ាំរៀងរាល់ខែ(គ្រាប់ពណ៌លឿង)ហើយជាប្រក្រតីនឹងទទួលបាន កាល់ស្យូម វីតាមីនរួម និងហ្វូលេត តែខែកន្លងទៅនេះ បានទទួលតែកាល់ស្យូម និងវីតាមីនរួម អត់មានហ្វូលេតទៀតទេ ធ្វើឱ្យខ្ញុំមានកង្វល់ក្នុងចិត្តជាខ្លាំង ខ្លាចកូនក្នុងពោះមានសុខភាពមិនល្អ ព្រោះតែខ្វះខាតជាតិហ្វូលេត។
A. ហ្វូលេតសម្រាប់អ្នកមានផ្ទៃពោះ មានតួនាទីក្នុងការផលិតគ្រាប់ឈាមក្រហម និងមានប្រយោជន៍ក្នុងការការពារភាពខុសប្រក្រតីនៃការសាងប្រព័ន្ធសរសៃប្រសាទខួរក្បាល និងសសៃប្រសាទឆ្អឹងកងខ្នងរបស់ទារកនៅក្នុងគភ៌ ដែលមានដូចជា សភាវបំពង់ប្រសាទបើក (Neural Tube Defect ឬ NTD) សភាវគ្មានខួរក្បាល (Anencephaly) ឆ្អឹងកងខ្នងបិទមិនជិតល្អ (Spina Bifida)ជាដើម ហើយបរិមាណហ្វូលេតដែលត្រូវទទួលទាននោះ ចែកចេញជា៖
1. ករណីដែលស្ត្រីមានគភ៌លើកដំបូង ឬគ្មានប្រវត្តិធ្លាប់ប្រសូតបុត្រដែលមានរោគបំពង់ប្រសាទបើក សភាវគ្មានខួរក្បាល ឬឆ្អឹងកងខ្នងបិទមិនជិតល្អទេនោះ សូមណែនាំឱ្យទទួលទានមុនពេលមានគភ៌រយៈពេល 3ខែ រហូតដល់គភ៌មានអាយុ 12 សប្តាហ៍ ក្នុង 1ថ្ងៃ 400មីល្លីក្រាម។
2. ក្នុងករណីដែលស្រ្តីមានគភ៌ ធ្លាប់មានប្រវត្តិប្រសូតបុត្រមកមានរោគបំពង់ប្រសាទបើក ឬសភាវគ្មានខួរក្បាល ឬឆ្អឹងកងខ្នងបិទមិនជិតល្អនោះ សូមណែនាំឱ្យទទួលទានមុនពេលមានគភ៌រយៈពេល 3ខែ រហូតដល់គភ៌មានអាយុ 12សប្តាហ៍ ក្នុង1ថ្ងៃ 400មីល្លីក្រាម។
3. ក្នុងករណីស្រ្តីមានគភ៌មានភាពខុសប្រក្រតីរបស់រោគមិនសូវមានឈាមក្រហម ថាឡាស់ស៊ិមៀ អាចទទួលទានបានក្នុង1ថ្ងៃ 400មីល្លីក្រាម រហូតក្នុងរយៈពេលនៃការមានគភ៌ ក្រៅពីនេះនៅអាចជ្រើសរើសបរិភោគអាហារដែលមានបរិមាណហ្វូលេតខ្ពស់ ដែលមានដូចជា បន្លែស្លឹកបៃតង ឈីស ថ្លើម សាច់សត្វ ទឹកដោះ សណ្តែក ទំពាំង ផ្សឹត និងដំឡូងបារាំង ។

ធ្វើលំហាត់ប្រាណដង្ហើម ដើម្បីឱ្យប្រសូតបុត្របានងាយស្រួលQ. ចង់ឱ្យមាត់ស្បូនងាយបើកក្នុងថ្ងៃឆ្លងទន្លេ គួរធ្វើយ៉ាងណា?
A. ជាប្រក្រតី អ្នកម្តាយមានផ្ទៃពោះគ្រប់រូប រយៈដំបូងបំផុតនៃការប្រសូតបុត្រ គឺជារយៈពេលដែលមានការបើកធំឡើងរបស់មាត់ស្បូន ចាប់ផ្តើមតាំងពីការឈឺពោះប្រសូតមែនទែន មាត់ស្បូននឹងចាប់ផ្តើមបើក និងបើករហូតដល់អាចប្រសូតបុត្របាន។ រយៈពេលនេះ នឹងត្រូវបញ្ចប់ដោយប្រើពេលវេលាប្រមាណជា 8–12ម៉ោង ក្នុងការឆ្លងទន្លេលើកដំបូង និង 6–8ម៉ោងក្នុងការឆ្លងទន្លេកូនបន្ទាប់(កូនទី2)។ ការហ្វឹកហាត់បញ្ជាខ្យល់ដង្ហើមយ៉ាងទៀងទាត់ តាំងពីស្រ្តីចាប់ផ្តើមតាំងគភ៌ នឹងជួយឱ្យស្ត្រីមានគភ៌មានអារម្មណ៍ធូរស្រាល ហើយពេលដល់ពេលប្រសូត នឹងជួយឱ្យប្រសូតបានងាយស្រួល។ វិធីហ្វឹកហាត់ដោយការគេងផ្ងាររាបស្មើនឹងដី យកខ្នើយទ្រក្បាលឱ្យខ្ពស់បន្តិច បិទភ្នែក និងកំណត់ខ្យល់ដង្ហើមចូលចេញឱ្យវែងៗយ៉ាងទៀងទាត់ រួមទាំងការបន្ធូរសម្រួលសាច់ដុំ ក្បាល ក ផ្ទៃមុខ និងថ្ងាស ដោយយកដៃអង្អែលស្រាលៗ ដើម្បីបណ្តេញភាពធុញថប់តានតឹង។

ហាត់ប្រាណក្រោយពេលប្រសូតបុត្ររួចQ. ប្រសូតបុត្រដោយការវះ តើអាចធ្វើលំហាត់ប្រាណបានឡើងវិញនៅពេលណាទៅ? ហើយខ្សែឆ្នូតពណ៌ក្រហមៗនៅលើក្បាលពោះ និងក្លៀកឡើងខ្មៅនោះ តើពេលណាទើបរលុបបាត់ទៅវិញ? តើត្រូវធ្វើយ៉ាងណាខ្លះទៅ?
A. ស្ត្រីដែលឆ្លងទន្លេតាមបែបធម្មតា ក្រោយពេលប្រសូតរួចអាចធ្វើលំហាត់ប្រាណបានភ្លាមនៅពេលបាត់ឈឺមុខរបួសហើយ តែបើស្ត្រីដែលឆ្លងទន្លេដោយការវះកាត់វិញ គួររង់ចាំយ៉ាងតិចពី4 – 6សប្តាហ៍ ក្រោយពេលប្រសូតរួច បន្ទាប់មកសឹមចាប់ផ្តើមធ្វើលំហាត់ប្រាណសន្សឹមៗ ដោយសារតែបញ្ហាស្នាមរបួសវះហ្នឹងឯង។ ចំណែកឯស្នាមខ្សែពណ៌ក្រហមៗនៅចំកណ្តាលពោះ ស្នាមខ្មៅនៅក្រោមក្លៀក និងជុំវិញក្បាលសុដន់នោះ កើតឡើងដោយសារអ័រម៉ូននៅក្នុងរាងកាយមានការប្រែប្រួលក្នុងអំឡុងពេលមានគភ៌ តែក្រោយពេលប្រសូតបុត្ររួច ស្នាមជាំខ្មៅផ្សេងៗ នឹងរលុបបាត់អស់ទៅវិញជាបណ្តើរៗមិនខាន ៕

January 17, 2020

កំពូលមហាសេដ្ឋី10រូប ដែលរកប្រាក់បានច្រើនបំផុតក្នុងពិភពលោកប្រចាំទសវត្សរ៍ ៖ Jack Ma នៅក្រោមគេបង្អស់

យោងតាមទស្សនាវដ្ដី Forbes បានឱ្យដឹងថា មហាសេដ្ឋី10រូប ដែលរកប្រាក់បានច្រើនបំផុតប្រចាំទសវត្សរ៍កន្លងទៅ គឺសុទ្ធតែរកបានបន្ថែមយ៉ាងតិច 40ពាន់លានដុល្លារ បើធៀបនឹងឆ្នាំ2010។ ទ្រព្យសម្បត្តិសរុបដែលមហាសេដ្ឋីទាំងនេះរកបាន មានទំហំទឹកប្រាក់កើនឡើងដល់ 555ពាន់លានដុល្លារ។

ក្នុងបញ្ជីខាងក្រោមនេះ មានមហាសេដ្ឋីដល់ទៅ 8រូប មានប្រាក់ចំណូលប្រមាណ 80% បានមកពីភាគហ៊ុនក្នុងក្រុមហ៊ុនដែលពួកគេបង្កើត ឬធ្លាប់ដឹកនាំដោយផ្ទាល់ដៃ មានដូចជា លោក Steve Ballmer, Warren Buffett, Mark Zuckerberg ជាដើម។

ខាងក្រោមនេះគឺជាមហាសេដ្ឋី 10រូបដែលរកប្រាក់បានច្រើនបំផុតក្នុងទសវត្សរ៍កន្លងទៅ៖

10. Jack Ma (ចិន)

-ទ្រព្យកើនបន្ថែមក្នុងអំឡុង10ឆ្នាំមុន៖ 40.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 42ពាន់លានដុល្លារ
-ទ្រព្យក្នុងឆ្នាំ2010 ៖ 1.2ពាន់លានដុល្លារ
-ប្រភពចំណូល ៖ Alibaba

9. Sergey Brin (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.3ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 58.8ពាន់លានដុល្លារ
-ទ្រព្យក្នុងឆ្នាំ2010 ៖ 17.5ពាន់លានដុល្លារ
-ប្រភពចំណូល ៖ Alphabet (ក្រុមហ៊ុនមេរបស់ Google)

8. Steve Ballmer (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 56.3ពាន់លានដុល្លារ
-ទ្រព្យក្នុងឆ្នាំ2010 ៖ 14.5ពាន់លានដុល្លារ
-ប្រភពចំណូល ៖ Microsoft

7. Warren Buffett (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 88.8ពាន់លានដុល្លារ
-ទ្រព្យក្នុងឆ្នាំ2010 ៖ 147ពាន់លានដុល្លារ
-ប្រភពចំណូល ៖ Berkshire Hathaway

6. Larry Page (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 43.5ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 61ពាន់លានដុល្លារ
-ទ្រព្យក្នុងឆ្នាំ2010 ៖ 17.5ពាន់លានដុល្លារ
-ប្រភពចំណូល ៖ Alphabet

5. Amancio Ortega (អេស្ប៉ាញ)

-ទ្រព្យកើនបន្ថែមក្នុងអំឡុង10ឆ្នាំមុន៖ 49.9ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 74.9ពាន់លានដុល្លារ
-ទ្រព្យក្នុងឆ្នាំ2010 ៖ 25ពាន់លានដុល្លារ
-ប្រភពចំណូល ៖ Inditex (ក្រុមហ៊ុនមេរបស់ Zara)

4. Bill Gates (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 54.6ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 107.6ពាន់លានដុល្លារ
-ទ្រព្យក្នុងឆ្នាំ2010 ៖ 53ពាន់លានដុល្លារ
-ប្រភពចំណូល ៖ Microsoft

3. Mark Zuckerberg (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 68ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 72ពាន់លានដុល្លារ
-ទ្រព្យក្នុងឆ្នាំ2010 ៖ 4ពាន់លានដុល្លារ
-ប្រភពចំណូល ៖ Facebook

2. Bernard Arnault (បារាំង)

-ទ្រព្យកើនបន្ថែមក្នុងអំឡុង10ឆ្នាំមុន៖ 80.2ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 107.7ពាន់លានដុល្លារ
-ទ្រព្យក្នុងឆ្នាំ2010 ៖ 27.5ពាន់លានដុល្លារ
-ប្រភពចំណូល ៖ LVMH (ក្រុមហ៊ុនផលិតសម្ភារប្រណីតពហុជាតិសាសន៍)

1. Jeff Bezos (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 97.4ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 109.7ពាន់លានដុល្លារ
-ទ្រព្យក្នុងឆ្នាំ2010 ៖ 12.3ពាន់លានដុល្លារ
-ប្រភពចំណូល ៖ Amazon

ប្រភព៖ សារព័ត៌មានបរទេស

January 17, 2020

ការពិតទាំង 9យ៉ាងទាក់ទិននឹងភាពមានបានរបស់ CEO របស់ Amazon

រៀងរាល់ 1វិនាទី មហាសេដ្ឋី Jeff Bezos ដែលជា CEO របស់ផ្សារអនឡាញ Amazon រកបាន 2,489ដុល្លារអាមេរិក ច្រើនជាង 2ដងបើធៀបនឹងប្រាក់ចំណូលរបស់បុគ្គលិកបម្រើការងារនៅសហរដ្ឋអាមេរិកដែលរកបានជាមធ្យមក្នុង 1សប្ដាហ៍។

លោក Jeff Bezos ថ្មីៗនេះ ទទួលរងការរិះគន់យ៉ាងខ្លាំងក្លា បន្ទាប់ពីប្រកាសថា Amazon ផ្ដល់ជំនួយមនុស្សធម៌ត្រឹមតែ 690,000ដុល្លារសម្រាប់មហន្តរាយភ្លើងឆេះព្រៃនៅប្រទេសអូស្ត្រាលី ដែលទំហំទឹកប្រាក់នេះវាតូចជាងឆ្ងាយណាស់ បើធៀបនឹងចំនួនទឹកប្រាក់ដែលលោករកបានក្នុងរយៈពេល 5នាទី។

CEO (អគ្គនាយកប្រតិបត្តិ) របស់ Amazon គឺជាអ្នកមានបំផុតលំដាប់លេខ1 ក្នុងពិភពលោក ដោយមានទ្រព្យសម្បត្តិសរុបប្រមាណជា 117ពាន់លានដុល្លារ។ ខាងក្រោមនេះគឺជាការពិតស្ដីអំពីទ្រព្យសម្បត្តិរបស់គាត់៖

ទី1- Jeff Bezos មានទ្រព្យសរុប 117ពាន់លានដុល្លារអាមេរិក បើទោះជាប្រាក់បៀវត្សរ៍ប្រចាំឆ្នាំរបស់គាត់បានត្រឹម 81,840ដុល្លារ(តិចជាងបណ្ដាបុគ្គលិកល្បីៗនៅអាមេរិកទៀតផង)មែន ប៉ុន្តែទ្រព្យសម្បត្តិភាគច្រើនរបស់ Bezos គឺផ្សារភ្ជាប់ទៅនឹងភាគហ៊ុន Amazon។ ទំព័រ Business Insider កាលពីឆ្នាំទៅ បានស្រាវជ្រាវឃើញថា ទឹកប្រាក់ដែលមហាសេដ្ឋីរូបនេះរកបានក្នុង 1ឆ្នាំៗ មានប្រមាណជា 8.9លានដុល្លារអាមេរិក។

ទី2- Bezos រកបាន 2,489ដុល្លាររៀងរាល់ 1វិនាទី គឺច្រើនជាងទ្វេដងធៀបនឹងបុគ្គលិកបម្រើការងារនៅសហរដ្ឋអាមេរិករកបានក្នុង 1សប្ដាហ៍។ 1នាទី លោក Bezos រកបាន 149,353ដុល្លារអាមេរិក។

ប្រការនេះមានន័យថា គ្រាន់តែ 1នាទី CEO របស់ Amazon រកបានប្រាក់ច្រើនជាងដល់ទៅ 3ដង បើធៀបនឹងមធ្យមភាគដែលបុគ្គលិកបម្រើការនៅអាមេរិក រកបានក្នុង 1ឆ្នាំ (ប្រហែល47,000ដុល្លារ) នេះបើតាមនាយកដ្ឋានស្ថិតិពលកម្មសហរដ្ឋអាមេរិក។

ទី3- ក្រោយពីលែងលះភរិយាឈ្មោះ MacKenzie Bezos និងលះបង់ភាគហ៊ុន 25% ដែល 2នាក់ប្ដីប្រពន្ធលោកកាន់កាប់នោះ លោក Jeff Bezos នៅតែរក្សាបានតំណែងជាអ្នកមានបំផុតក្នុងពិភពលោកដដែល។

បច្ចុប្បន្ន អតីតភរិយារបស់លោក Bezos អ្នកស្រី MacKenzie Bezos គឺជាស្ត្រីដែលមានទ្រព្យច្រើនបំផុតក្នុងពិភពលោកលំដាប់ទី5។ បន្ទាប់ពីបានលែងលះ ទ្រព្យសម្បត្តិដែលអ្នកស្រីមាន គឺប្រមាណជា 37.8ពាន់លានដុល្លារ។

ទី4- Bezos មានដល់ថ្នាក់គេប្រៀបធៀបថា បើអ្នកមានជីវភាពមធ្យមនៅអាមេរិកចាយ1ដុល្លារ គឺមហាសេដ្ឋីរូបនេះត្រូវចាយ 1.2លានដុល្លារទើបស្មើគ្នា។

ទី5- CEO របស់ Amazon រូបនេះ មានទ្រព្យសម្បត្តិច្រើនជាង 28% បើធៀបនឹងទ្រព្យសរុបរបស់រាជវង្សអង់គ្លេស។ បើយោងតាមគេហទំព័រ Forbes ទ្រព្យដែលរាជវង្សអង់

គ្លេសមានក្នុងដៃ គឺប្រហែល 88ពាន់លានដុល្លារ(ក្នុងឆ្នាំ2017)។

ទី6- ទ្រព្យសម្បត្តិដែល Bezos មាន គឺប្រហាក់ប្រហែលនឹងទំហំផលិតផលក្នុងស្រុកសរុប(ផសស ឬGDP) របស់ប្រទេសម៉ារ៉ុក។

ទី7- តម្លៃទ្រព្យសម្បត្តិសុទ្ធរបស់លោក Bezos មានច្រើនជាង GDP របស់ប្រទេសអ៊ីស្លង់ អាហ្វហ្គានីស្ថាន និងកូស្ដារីកា បូកបញ្ចូលគ្នាទៅទៀត។

ទី8- យោងតាមទីភ្នាក់ងារសន្តិសុខសង្គមអាមេរិកបានឱ្យដឹងថា បុរសអាមេរិកម្នាក់ដែលមានសញ្ញាបត្របរិញ្ញាអាចរកបានប្រាក់ប្រហែល 2.2លានដុល្លារក្នុង 1ជីវិត។ ចំណែកលោក Bezos វិញ គាត់អាចរកបានប្រាក់ចំនួនប៉ុណ្ណឹងដោយចំណាយពេលត្រឹមតែ 15នាទីប៉ុណ្ណោះ។

ទី9- កម្មករ កម្មការីរោងចក្រនៅស្រុកខ្មែរ ត្រូវប្រើពេល 51លានឆ្នាំ ទើបអាចរកបានប្រាក់ជិតស្មើនឹងទ្រព្យបច្ចុប្បន្នរបស់ Bezos ។ ឆ្នាំ2020 ប្រាក់ខែគោលរបស់កម្មកររោងចក្រកាត់ដេរកម្ពុជា គឺ 190ដុល្លារអាមេរិក។ ដូច្នេះក្នុង1ឆ្នាំ ពួកគេរកបាន 2,280ដុល្លារ ហើយបើចង់រកឱ្យបានប្រាក់ប្រហែលនឹងលោក Bezos បច្ចុប្បន្ន ពួកគេនឹងត្រូវប្រើពេលដល់ទៅជាង 51លានឆ្នាំឯណោះ ($2.280 x 51លានឆ្នាំ ស្មើនឹងប្រហែល 116ពាន់លានដុល្លារ)។ ទ្រព្យបច្ចុប្បន្នរបស់ Bezos គឺ 117ពាន់លានដុល្លារ៕

ប្រភព៖ សារព័ត៌មានបរទេស

January 17, 2020

តារាសម្ដែង ឡោម លក្ខិណា នៅអាឡោះអាឡៃក្ដុកក្តួលចិត្តខណៈស្វាមីមរណភាពបិទភ្នែកមិនជិត

នេះជាដំណឹងមរណទុក្ខដ៏ក្រៀមក្រំ និងសោកសៅបំផុតសម្រាប់តារាចម្រៀងស្រីអ្នកនាង ឡោម លក្ខិណា និងក្រុមគ្រួសារ ខណៈដែលស្វាមីជាទីស្រលាញ់របស់នាង បានជួបគ្រោះថ្នាក់ចរាចរណ៍បណ្ដាលឱ្យស្លាប់បាត់បង់ជីវិតភ្លាមៗនៅនឹងកន្លែងកើតហេតុ។

បើតាមការបញ្ជាក់ ឱ្យដឹងពីអ្នកនាង ឡោម លក្ខិណា បានរៀបរាប់ថា ស្វាមីរបស់អ្នកនាងមានឈ្មោះ ប៉ា ច័ន្ទពិសិដ្ឋ គ្រោះថ្នាក់ចរាចរណ៍នៅព្រឹកថ្ងៃសុក្រទី ១៦ ខែមករា ឆ្នាំ២០២០ បុកគ្នាយ៉ាងពេញទំហឹងជាមួយរថយន្តកូរ៉េ១តោនកន្លះ បណ្ដាលឱ្យស្លាប់ៗភ្លាមក្រោយបញ្ចូនទៅមន្ទីរពេទ្យ។ សពស្វាមីអ្នកនាងកំពុងតម្កល់រៀបចំពិធីបុណ្យសពស្ថិតនៅវត្តក្រាំងធ្នុង ដែលត្រៀមបូជានៅថ្ងៃទី ១៧ នេះហើយ។ អ្នកនាងក៏បានអះអាងបញ្ជាក់ប្រាប់អ្នកសារព័ត៌មានដែរថា ខាងសមត្ថកិច្ចនៅមិនទាន់អាចបញ្ជាក់អំពីភាពខុសត្រូវរវាងភាគីណាមួយនៅឡើយទេ មានតែការរង់ចាំការធ្វើការងារបន្ដរបស់សមត្ថកិច្ចតែប៉ុណ្ណោះ។

អ្នកនាងក៏បានបន្តទៀតថា ខណៈមុនពេលស្លាប់ ស្វាមីអ្នកនាងបានទាក់ទងមកអ្នកនាងក្នុងសភាពធម្មតា តែលុះទទួលបានដំណឹងដ៏រន្ធត់នេះ អ្នកនាងក៏នៅតែមានស្មារតីមិនស្លុតប៉ុន្មានទេ ព្រោះក្នុងចិត្តគិតថា ស្វាមីគ្រាន់តែជាគ្រោះថ្នាក់ចរាចរណ៍បន្ដិចបន្តួត មិននឹកស្មានថាទទួលរងយ៉ាងដំណំដូច្នោះឡើយ។ អ្នកនាងថា លុះសពស្វាមីអ្នកនាងបានដឹកទៅដល់មន្ទីរពេទ្យ ទើបខាងពេទ្យបញ្ជាក់ថា លោកបានបាត់បង់ជីវិតទៅហើយ។ ដំណឹងដែរទទួលបាននៅខណៈនោះ បានធ្វើឱ្យអ្នកនាងមានអារម្មណ៍ស្លុតស្មារតីជាខ្លាំងស្ទើតែទទួលយកមិនបានព្រោះភ្លាមៗខ្លាំងពេក។ តារាសម្ដែងស្រីរូបនេះថា ស្វាមីរបស់អ្នកនាងស្រឡាញ់កូនប្រុសខ្លាំងណាស់ អ្នកដឹងថា លោកបាត់បង់ជីវិតទាំងបិទភ្នែកមិនជិតទេ ព្រោះលោកនៅបារម្ភពីកូនប្រុសជាទីស្រលាញ់ មានឈ្មោះថា ខេង រិទ្ធីស័ក្តិ ដែលមានអាយុទើបតែ ១០ ខែប៉ុណ្ណោះ។

ប្រកបដោយទឹកមុខក្រៀមក្រំ តារាស្រីរូបនេះ ក៏បានពោលអញ្ជើញដល់ញាតិមិត្តជិតឆ្ងាយទាំងអស់ ចូលរួមពិធីបូជាសពនៅថ្ងៃទី ១៧ មករា នៅទីតាំងវត្តក្រាំងធ្នង់។ សូមជម្រាបជូនដំណឹងដល់ញាតិមិត្តជិតឆ្ងាយនៃសពដែលអ្នកនាងមិនបានទៅអញ្ជើញដោយផ្ទាល់ឱ្យបានជ្រាបថា អាស្រ័យហេតុនេះ សូមគោរពអញ្ជើញញាតិមិត្តជិតឆ្ងាយ និងមិត្តសិល្បករមេត្តាចូលរួមដោយមេត្រីភាព៕

January 16, 2020

អាមេរិកលែងជាមហាអំណាចលេខ1 ផ្នែកនាវាចម្បាំងទៀតហើយ តើប្រទេសណាមកជំនួស? ហើយតើហេតុអ្វី?

ជិត 1ខែ បន្ទាប់ពីអាមេរិកបានបញ្ជាក់ថា នឹងចំណាយថវិកា 738ពាន់លានដុល្លារសម្រាប់វិស័យការពារជាតិក្នុងឆ្នាំ2020 តែកងទ័ពជើងទឹករបស់ប្រទេសនេះ បែរជាត្អូញត្អែរថា ខ្វះលុយធ្វើការទៅវិញ?។

យោងតាមព័ត៌មានថ្មីបំផុតដែលបានចុះផ្សាយនៅសហរដ្ឋអាមេរិក កងទ័ពជើងទឹកប្រទេសនេះ បានអះអាងថា ថវិកាចំនួននេះមិនគ្រប់គ្រាន់ក្នុងការបំពេញការងារដែលបានគ្រោងទុកនោះឡើយ។

ជាក់ស្ដែង ថវិកាសម្រាប់វិស័យការពារជាតិរបស់អាមេរិកក្នុងឆ្នាំ2020 ត្រូវបានគេបញ្ជាក់ថា នឹងមានទំហំទឹកប្រាក់ប្រមាណជា 738ពាន់លានដុល្លារ គឺនៅតែជាប្រទេសដែលចំណាយច្រើនជាងគេក្នុងវិស័យការពារជាតិ ក៏ប៉ុន្តែ នៅពេលគេបែងចែកទៅឱ្យផ្នែកផ្សេងៗក្នុងវិស័យការពារជាតិ គេឃើញថា កងទ័ពជើងទឹកត្រូវខ្វះថវិកា ដែលការណ៍នេះ វានឹងនាំឱ្យទ័ពជើងទឹកមិនអាចបំពេញភារកិច្ចដូចដែលបានដាក់ចេញបាន។

កងទ័ពជើងទឹកអាមេរិកបានឱ្យដឹងថា រដ្ឋាភិបាលរបស់លោក Donald Trump បានស្នើឱ្យកងទ័ពជើងទឹកត្រូវមាននាវាចម្បាំងយ៉ាងតិច 355គ្រឿង និងត្រូវធ្វើសកម្មភាពជាប្រចាំដើម្បីអាចធានាសន្តិសុខជាតិបាន។

បើចំណាយតាមថវិកាដែលប្រគល់ឱ្យក្នុងឆ្នាំនេះ ទ័ពជើងទឹកអាមេរិកអាចចំណាយត្រឹមតែ 209លានដុល្លារប៉ុណ្ណោះ សម្រាប់អភិវឌ្ឍន៍នាវាចម្បាំងគ្មានមនុស្សបើកខ្នារធំចំនួន 2គ្រឿង និង 50លានដុល្លារទៀតសម្រាប់នាវាគ្មានមនុស្សបើកខ្នាតតូចដែលគ្មានបំពង់សម្រាប់ដាក់បាញ់គ្រាប់រ៉ុក្កែត។

គិតមកដល់ឆ្នាំ2019 អាមេរិកលែងជាប្រទេសដែលមានកងនាវាចម្បាំងខ្លាំងលំដាប់ទី1 ក្នុងពិភពលោកទៀតហើយ ព្រោះថា ចិនបានចូលមកជំនួសតំណែងនេះ។ ថ្វីបើអាមេរិកមាននាវាចម្បាំងច្រើនជាងចិនក៏ពិតមែន ប៉ុន្តែមានតែ 293គ្រឿងប៉ុណ្ណោះដែលអាចបំពេញបេសកកម្មជាប្រចាំបាន ចំណែកនាវាចម្បាំងក្រៅពីនេះ គឺបានឈានដល់អាយុកាលត្រូវចូលនិវត្តន៍ ឬត្រូវជួសជុលហើយ។

ចំណែកប្រទេសចិនវិញ ចំនួននាវាចម្បាំងបានកើនដល់ 300គ្រឿងកាលពីចុងឆ្នាំ2019 បន្ទាប់ពីបានដាក់ឱ្យប្រើប្រាស់បន្ថែមនូវនាវាចម្បាំងថ្មីៗមួយចំនួនទៀត។

ក្នុងការបកស្រាយអំពីបញ្ហាខាងលើ កងទ័ពជើងទឹកអាមេរិកបាននិយាយថា កាលពីអំឡុងទសវត្សរ៍ទី80 នៃសតវត្សរ៍មុន កងទ័ពជើងទឹកអាមេរិកបានប្រើថវិកាជាតិរហូតដល់ទៅ 38% នៃថវិកាសរុបសម្រាប់វិស័យការពារជាតិ។ ប៉ុន្តែ បច្ចុប្បន្ន ភាគរយនេះបានថយមកនៅត្រឹម 34%ប៉ុណ្ណោះ៕

ប្រភព៖ សារព័ត៌មានបរទេស

January 16, 2020

យុវវ័យសម័យថ្មី ត្រូវចេះមើលថែទាំខ្លួន ទាំងសុខភាពផ្លូវកាយ និងផ្លូវចិត្ត

យើងនាំគ្នាមកមើលថា តើក្រុមអ្នកស្រាវជ្រាវក្នុងសហរដ្ឋអាមេរិក គេរកឃើញអ្វីខ្លះ ពាក់ព័ន្ធនឹងការអភិវឌ្ឍសក្តានុពលរបស់យុវវ័យ ដើម្បីឱ្យយុវជន-យុវនារីទាំងអស់នោះ មានគុណភាពជីវិតដ៏ល្អប្រសើរនាពេលអនាគត…។ប្រហែលជាគ្មានយុវវ័យណាម្នាក់ដែលមិនចង់ស្អាតបាត និងមិនចង់ឱ្យអ្នកនៅជុំវិញស្រឡាញ់រាប់អានខ្លួននោះឡើយ តែគន្លឹះពិសេសទាំងអស់នេះ ការពិតទៅសុទ្ធតែអាចធ្វើបានដោយខ្លួនឯងទាំងអស់ ដូច្នេះយើងនាំគ្នាមកមើលថា តើការមើលថែទាំខ្លួនឯងទាំងខាងរាងកាយ និងចិត្តគំនិតរបស់យុវជនយុវនារីនាយុគបច្ចេកវិទ្យាទំនើបនេះ ត្រូវធ្វើយ៉ាងណាខ្លះ?

1. ហាត់ប្រាណ : ការដើរលេង ការដើរក្នុងផ្សារទំនើប ធាក់កង់ រត់ ហែលទឹក លេងស្កេតបត(ក្ដារបន្ទះរំអិល) ឬធ្វើកិច្ចការងារផ្សេងៗជាមួយមិត្តភក្តិដែលធ្វើឱ្យរាងកាយមិននៅស្ងៀមមួយកន្លែងនោះ គឺជាការធ្វើលំហាត់ប្រាណមួយល្អណាស់សម្រាប់យុវតី។ ដោយសារតែយុវវ័យជាវ័យដែលត្រូវការមិត្តភក្តិ និងការទទួលស្គាល់ពីអ្នកដែលនៅជុំវិញខ្លួននោះ ការបានធ្វើកិច្ចការងារផ្សេងៗជាមួយមិត្តភក្តិរបស់ពួកគេ នឹងជួយឱ្យទាំងរាងកាយ និងផ្លូវចិត្តល្អប្រសើរឡើងយ៉ាងគួរឱ្យចម្លែកចិត្ត។

2. ការទទួលទាន : ការញ៉ាំអាហាររបស់យុវវ័យ ជាទូទៅអាចញ៉ាំបានគ្រប់រូបបែប តែគួរញ៉ាំអាហារឱ្យគ្រប់ 5ប្រភេទក្រុម និងគួរចៀសវាង Junk food (Hamburger , sandwich-ល-) និងអាហារដែលមានជាតិខ្លាញ់ច្រើន។ ការជួបជុំគ្នាញ៉ាំអាហារជាមួយមិត្តភក្តិ និងក្រុមគ្រួសារ អាចរាប់បានថាជារឿងល្អមួយសម្រាប់យុវវ័យ និងគួរញ៉ាំបន្លែ និងផ្លែឈើស្រស់ជាប្រចាំផង។ការតមអាហារដើម្បីគ្រប់គ្រងទម្ងន់ខ្លួន គឺជារឿងដែលមិនគួរធ្វើសោះឡើយសម្រាប់យុវតីវ័យជំទង់ ព្រោះជាអំឡុងពេលដែលរាងកាយកំពុងចម្រើនធំធាត់។ ការសាងកោសិកាស្បែកដែលល្អ ក៏អាចជួយឱ្យក្រមុំៗមើលទៅឃើញស្រស់ស្អាតបានដូចគ្នាដែរ និងគួរជ្រើសរើសញ៉ាំអាហារដែលមានកាឡូរីទាប ព្រមទាំងហាត់ប្រាណឱ្យបានជាប់ជាប្រចាំផង។

3. ចេះចាត់ការចំពោះបញ្ហា : យុវវ័យ គឺជាវ័យដែលអ្វីៗក៏មើលទៅរាងរញ៉េរញ៉ៃច្របូកច្របល់ទាំងអស់ ការចាត់ការចំពោះបញ្ហាយ៉ាងត្រូវវិធី ក៏ជារឿងសំខាន់មួយដែរ។ ការមានអារម្មណ៍តានតឹងធុញថប់រហូតដល់គេងមិនលក់ ឬរហូតដល់ត្រូវពឹងលើគ្រឿងស្រវឹង និងថ្នាំញៀននោះគឺជារឿងមួយដែលខុសឆ្គងយ៉ាងធ្ងន់ធ្ងរជាទីបំផុត គួរតែចេះប្រឹក្សាបញ្ហាអ្វីមួយជាមួយនឹងមនុស្សច្រើនជាង1នាក់ឡើងទៅ និងត្រូវចេះបែងចែកមើលថា តើច្រកចេញណាមួយដែលស័ក្តិសមបំផុតនឹងខ្លួនអ្នក និងអនាគតរបស់ខ្លួនឯង។

4. ចេះគិត និងមានក្តីស្រមៃ : ការរិះគិតបែបចម្រើន និងការស្រមៃ គឺជារឿងមួយចាំបាច់ ការបំពេញកិច្ចការងារផ្សេងៗ គឺជាការជួយអភិវឌ្ឍវិធីការរិះគិតក្នុងផ្នែកនេះ មិនថាតែការលេងតន្ត្រី លេងកីឡា ច្រៀង ប្រកួតរាំ និពន្ធបទចម្រៀង រួមទាំងការចិញ្ចឹមសត្វដែលនាំមកនូវការសើចសប្បាយ និងការបានធ្វើកិច្ចការងារជាក្រុម រួមជាមួយមិត្តភក្តិជាដើម។ ទាំងអស់នេះ សុទ្ធតែជាការអភិវឌ្ឍខួរក្បាលប៉ែកខាងស្តាំទាំងអស់។

5. ហ្វឹកហាត់នូវអ្វីដែលខ្លួនចូលចិត្ត : ជីវិតយុវវ័យ គឺជាអំឡុងជីវិតដែលពោរពេញទៅដោយថាមពល ការហ្វឹកហាត់នូវអ្វីដែលខ្លួនស្រឡាញ់ចូលចិត្ត និងថ្នឹកនោះ គឺជារឿងល្អមួយ។ ការបណ្តោយទុកឱ្យជីវិតកន្លងផុតពី1ថ្ងៃទៅ1ថ្ងៃ ដោយក្តីខ្ជឹលច្រអូសស្ពឹកស្រពន់ គឺជារឿងដែលមិនត្រូវធ្វើជាដាច់ខាតសម្រាប់យុវវ័យ ហើយការដែលមិនដឹងថា តើខ្លួនឯងចូលចិត្តអ្វី ឬធ្វើអ្វីពូកែនោះ នឹងមានផលប៉ះពាល់ដល់ការជ្រើសរើសប្រកបមុខរបរនៅពេលអនាគត។

យើងអាចសង្កេតឃើញថា ការអភិវឌ្ឍគុណភាពជីវិតរបស់យុវវ័យនេះ គឺការធ្វើកិច្ចការងារផ្សេងៗ គួរធ្វើជាក្រុម ជាមួយមិត្តភក្តិខ្លះ ជាមួយក្រុមគ្រួសារខ្លះ។ ការធ្វើឱ្យស្គាល់ពីជីវិតនៅរួមគ្នាជាសង្គមមួយ នឹងហុចផលល្អចំពោះយុវវ័យខ្លួនឯង និងសង្គមរួមនាពេលអនាគត…៕

January 16, 2020

ច្រឹង ពលរដ្ធ សន្យានឹងខ្លួនឯងថា ត្រូវដណ្តើមយកកៅអី1 ក្នុងក្រុមជម្រើសជាតិមកវិញឱ្យបានក្នុងពេលឆាប់ៗនេះ

កីឡាករខ្សែបម្រើរបស់ក្លិបវិសាខា ច្រឹង ពលរដ្ឋ បានបង្ហើបប្រាប់ថា ក្នុងឆ្នាំ2020 ថ្មីនេះ រូបគេបានដាក់គោលដៅថា ធ្វើយ៉ាងណាត្រូវយកកៅអី1 ក្នុងចំណោម 11នាក់ដំបូងរបស់ក្រុមជម្រើសជាតិកម្ពុជាឱ្យខាងតែបានមកវិញ។កីឡាកររូបនេះធ្លាប់ខកខានឱកាសលេងឱ្យក្លិប Buriram United ដោយសារបញ្ហារបួស កាលពីដើមឆ្នាំ2019។ ពេលនេះរបួសចាស់របស់គេបានជាសះស្បើយ 100ភាគរយហើយ ដែលធ្វើឱ្យគេមានភាពពេញលេញក្នុងការហ្វឹកហាត់ និងលេងបានកាន់តែល្អជាងពីមុនទៅទៀត។គួរបញ្ជាក់ថា ច្រឹង ពលរដ្ឋ បានខកខានជាប់ជម្រើសជាតិប្រមាណ 2ឆ្នាំមកហើយ បន្ទាប់ពីរងរបួសដាច់សរសៃពួរជង្គង់។ បច្ចុប្បន្ន រូបគេកំពុងបោះជំរំហ្វឹកហាត់ជាមួយក្លិបវិសាខានៅប្រទេសថៃ ដើម្បីត្រៀមរដូវកាលថ្មីនៃលីកកំពូលកម្ពុជា និងពានរង្វាន់សម្ដេចតេជោ ហ៊ុន សែន ឆ្នាំ2020៕

January 16, 2020

Category: សង្គម និងសេដ្ឋកិច្ច