សង្គម និងសេដ្ឋកិច្ច - La Reine Media

តាក់ស៊ីហោះលើទឹកដំណើរការដោយអគ្គិសនី ចាប់ផ្ដើមដឹកភ្ញៀវជាផ្លូវការ

តាក់ស៊ីហោះលើទឹកដែលដំណើរការដោយអគ្គិសនី មានកៅអីចំនួនប្រាំ បំពាក់ស្លាបក្រោមទឹករបស់ SeaBubbles ចាប់ផ្ដើមដំណើរការដឹកភ្ញៀវនៅឯបឹង Annecy ប្រទេសបារាំង។

Bubble គឺជាទូកបំពាក់ស្លាបក្រោមទឹកដំណើរការដោយអគ្គិសនីដំបូងដែលទទួលបានសិទ្ធិដឹកជញ្ជូនភ្ញៀវនៅប្រទេសបារាំង។ Bubble បានបង្ហាញខ្លួនកាលពីឆ្នាំ 2017 ក្នុងទម្រង់តាក់ស៊ីហោះមានស្លាបក្រោមទឹកដំណើរការដោយអគ្គិសនី ដែលធ្វើការសាកល្បងបច្ចេកវិទ្យានៅទីក្រុងប៉ារីស និងដឹកភ្ញៀវសាកល្បងនៅឆ្នាំ 2018 ហើយបច្ចុប្បន្នបានចាប់ផ្ដើមផ្ដល់សេវាកម្មក្នុងទម្រង់ពាណិជ្ជកម្ម។ នេះបើតាម Design Boom។

តាក់ស៊ីហោះលើទឹកអគ្គិសនីនេះ ទទួលភ្ញៀវដំបូងនៅឯកំពង់ផែក្នុងតំបន់ Veyrier-du-Lac និងធ្វើដំណើរទៅកាន់ Annecy les Marquisats ចាប់ពីដើមខែកក្កដា 2023។ ចាប់ពីថ្ងៃទី 01 កក្កដា ដល់ 31 សីហា 2023 សមាគម Grand Annecy និង SeaBubbles Mobility Solutions សហការគ្នាដំណើរការទូកអគ្គិសនីនេះដូចទៅនឹងមធ្យោបាយធ្វើដំណើរសាធារណៈនៅក្នុងទីក្រុង។

ទូកហោះលើទឹក Bubbles នឹងជួយកាត់បន្ថយការបំភាយឧស្ម័នកាបូនបាន 100 តោន នៅលើបឹង Annecy ព្រមទាំងជួយកាត់បន្ថយការកកស្ទះចរាចរណ៍នៅតាមផ្លូវក្បែរមាត់បឹងនេះផងដែរ។

SeaBubbles មិនបានបង្ហើបឱ្យដឹងច្រើនអំពីទូកហោះនេះ ប៉ុន្តែគេដឹងថា វាប្រើប្រាស់ថ្មផ្ទុកអគ្គិសនីអាចធ្វើដំណើរក្នុងល្បឿន 22 គីឡូម៉ែត្រ/ម៉ោង។ ដោយសារតែប្រើប្រាស់ស្លាបក្រោមទឹក ទូកអគ្គិសនីនេះដែលមានទំហំ 5 x 2.5 ម៉ែត្រនេះ កាត់បន្ថយកម្លាំងកកិតនឹងផ្ទៃទឹកបានយ៉ាងច្រើន និងមានល្បើនលឿន ព្រមទាំងមានសំឡេងស្ងាត់ផងដែរ។

បន្ទាប់ពីបានបង្ហាញ Bubbles ក្រុមហ៊ុន SeaBubbles កំពុងតែអភិវឌ្ឍ SmartBubbles ដែលជាកំណែធំជាងមុន អាចដាក់មនុស្សបានពី 8 ទៅ 12 នាក់។ កំណែទីពីរដែលអាចបញ្ចូលថាមពលអគ្គិសនីមួយពេញចំណាយពេលតែ 4 នាទីនេះ ក៏កំពុងត្រូវបានធ្វើតេស្ត និងវាយតម្លៃនៅលើបឹង Annecy៕

July 12, 2023

តម្លៃរថយន្តអគ្គិសនីថ្មី ធ្លាក់ថ្លៃអស់ 20% ធៀបនឹងឆ្នាំមុន

យោងតាមក្រុមហ៊ុន Kelley Blue Book តម្លៃជាមធ្យមរបស់រថយន្តអគ្គិសនីថ្មីនៅសហរដ្ឋអាម៉េរិក បាន និងកំពុងបន្តធ្លាក់ចុះពីមួយខែទៅមួយខែ រហូតដល់ 20% ធៀបនឹងឆ្នាំ 2022។

កាលពីខែឧសភា 2023 តម្លៃជាមធ្យម (ATP) សម្រាប់រថយន្តអគ្គិសនីគឺ 54,528 ដុល្លារអាម៉េរិក ខណៈកាលពីខែមករា 2023 រថយន្តអគ្គិសនីមានតម្លៃជាង 61,000 ដុល្លារ។ កាលពីខែមិថុនា 2022 ATP សម្រាប់រថយន្តអគ្គិសនីថ្មីនៅសហរដ្ឋអាម៉េរិកគឺ 66,390 ដុល្លារ។ ដូច្នេះ តម្លៃជាមធ្យមរបស់រថយន្តអគ្គិសនីថ្មី បានថយចុះអស់ជិត 13,000 ដុល្លារក្នុងមួយឆ្នាំ។

Cox Automotive ដែលជាក្រុមហ៊ុននៅពីក្រុង Kelley Blue Book បញ្ជាក់ថា Tesla (ក្រុមហ៊ុនផលិតរថយន្តអគ្គិសនីដែលនាំមុខគេនៅសហរដ្ឋអាម៉េរិក) គឺជាដើមហេតុនៃការធ្លាក់ថ្លៃនេះ ដោយសារតែក្រុមហ៊ុននេះបានទម្លាក់តម្លៃរថយន្តរបស់ខ្លួនជាបន្តបន្ទាប់នាពេលកន្លង។

កត្តាមួយផ្សេងទៀតដែលត្រូវបាន Kelley Blue Book លើកឡើង នោះគឺ បរិមាណរថយន្តសល់នៅឃ្លាំងរបស់ក្រុមហ៊ុនមួយចំនួន បានកើនឡើងខ្ពស់នៅក្នុងឆ្នាំនេះ៕

July 12, 2023

ទំនៀមទម្លាប់ចម្លែក៖ កូនក្រមុំត្រូវយំមួយម៉ោង/ថ្ងៃ ពេញមួយខែ មុនពេលរៀបការ

កូនក្រមុំជនជាតិ Tujia នៅប្រទេសចិន ត្រូវយំយ៉ាងតិចមួយម៉ោងរៀងរាល់ថ្ងៃ ពេញមួយខែ ដើម្បីជាការបួងសួងសូមសេចក្ដីសុខ និងសុភមង្គលក្នុងគ្រួសារនៅថ្ងៃអនាគត។

ជាធម្មតា ថ្ងៃរៀបការតែងតែផ្សារភ្ជាប់ជាមួយនឹងភាពសប្បាយរីករាយ សំណើចក្អាកក្អាយ និងពេញដោយសុភមង្គល នៅពេលកូនកំលោះ កូនក្រមុំចាប់ផ្ដើមឈានជើងចូលក្នុងជីវិតគូ។ ក៏ប៉ុន្តែ សម្រាប់កូនក្រមុំជនជាតិ Tujia នៅក្នុងខេត្ត Sichuan ប្រទេសចិនវិញ ពួកគេត្រូវយំយ៉ាងតិចមួយម៉ោង/ថ្ងៃ នៅក្នុងរយៈពេលមួយខែពេញ មុនពេលត្រូវទៅរស់នៅក្នុងគ្រួសារខាងស្វាមី។

ទំនៀមទម្លាប់យំពេលរៀបការនេះ មានតាំងពីបុរាណ នៅក្នុងតំបន់ជាច្រើននៅភាគនិរតីរបស់ខេត្ត Sichuan ហើយមានការពេញនិយមខ្លាំងរហូតដល់សម័យរាជវង្ស Qing (1644 – 1911)។ បើទោះបច្ចុប្បន្នលែងមានការពេញនិយមដូចមុន ប៉ុន្តែទំនៀមទម្លាប់នេះនៅតែត្រូវបានប្រជាជនក្នុងតំបន់ជាច្រើនចាត់ទុកថាជាទំនៀមប្រពៃណីចាំបាច់នៅក្នុងពិធីរៀបមង្គលការកូនប្រុសស្រី។

ប្រជាជន Tujia ដែលមានវ័យចំណាស់បានរៀបរាប់ប្រាប់ថា កូនក្រមុំណាក៏ត្រូវតែយំនៅក្នុងពិធីរៀបការ។ បើសិនមិនយំ នឹងត្រូវអ្នកភូមិមើលងាយ និងចាត់ទុកការរៀបការនោះជារឿងអស់សំណើច។ ជាក់ស្ដែងមានករណីជាច្រើនដែលកូនក្រមុំត្រូវបានម្ដាយវាយព្រោះតែមិនយំក្នុងថ្ងៃរៀបការ។ តាមរយៈសំឡេងយំ ជនជាតិ Tujia នឹងអាចវាយតម្លៃបានទៅលើភាពថ្លៃថ្នូរ ភាពជាស្ត្រី និងភាពឆ្លាតវៃរបស់កូនក្រមុំ។

ទំនៀមទម្លាប់ខាងលើនេះត្រូវបានគេហៅថា «Zuo Tang (អង្គុយក្នុងរោងការ ឬរោងជំនុំ)»។ នេះបើតាម សារព័ត៌មានចិន China Daily។

តាមជំនឿបុរាណ កូនក្រមុំជនជាតិ Tujia នៅប្រទេសចិន មិនត្រឹមតែត្រូវយំយ៉ាងតិចមួយម៉ោងរៀងរាល់ថ្ងៃ ពេញមួយខែនោះទេ តែក៏ត្រូវជេរ «មេអណ្ដើក» ថែមទៀតផង ដោយសង្ឃឹមថា នឹងទទួលបានសុភមង្គលក្នុងគ្រួសារនៅថ្ងៃអនាគត។

July 12, 2023

ក្រុមបាល់ទាត់នារីវៀតណាមថា ការចាញ់នូវែលសេឡង់នៅមុន World Cup គឺមកពីអាកាសធាតុ

(នូវែលសេឡង់) – ក្រោយពីចាញ់នៅក្នុងការប្រកួតមិត្តភាពជាមួយក្រុមនូវែលសេឡង់ក្នុងលទ្ធផល 0-2 ប្រធានក្រុមបាល់ទាត់នារីជម្រើសជាតិវៀតណាមយល់ថា ព្រោះតែរងផលវិបាកដោយសារអាកាសធាតុ។

លើទីលាន McLean Park នៅទីក្រុង Napier ក្រុមកីឡាការិនីនូវែលសេឡង់បានដាក់សម្ពាធលើក្រុមវៀតណាមតាំងពីដើមទី ធ្វើឱ្យវៀតណាមត្រូវចាញ់ក្នុងលទ្ធផល 0-2។

«សីតុណ្ហភាពនៅទីនេះខុសគ្នាឆ្ងាយធៀបនឹងនៅវៀតណាម ធ្វើឱ្យប៉ះពាល់ដល់ពួកយើង» ប្រធានក្រុមកីឡាការិនីវៀតណាម Huynh Nhu និយាយដូច្នេះ និងបន្តថា «ការប្រកួតនេះគឺជាឱកាសដើម្បីឱ្យពួកយើងអាចសម្របខ្លួនជាមួយនឹងអាកាសធាតុនៅនូវែលសេឡង់»។

នៅវៀតណាម ក្រុមកីឡាការិនីត្រូវហ្វឹកហាត់ក្រោមកម្ដៅថ្ងៃពី 27 ទៅ 36 អង្សាសេ។ ចំណែកនៅនូវែលសេឡង់ អាកាសធាតុត្រជាក់ជាង ពោលគឺមានសីតុណ្ហភាពពី 7 ទៅ 14 អង្សាសេ។

នៅក្នុងការប្រកួត ក្រុមនារីនូវែលសេឡង់គ្រប់គ្រងបាល់បាន 60% និងស៊ុតផ្ដាច់ចំនួន 27 លើក។ នៅនាទីទី 17 ក្រុមនូវែលសេឡង់រកបានមួយគ្រាប់ បន្ទាប់ពីការទាត់ផ្ដាច់របស់ CJ Bott។ នាទីទី 44 Jaqquie Hand រកបានមួយគ្រាប់ជូននូវែលសេឡង់ ដោយងាយស្រួល ហើយក៏ឈ្នះ 2-0។

អ្នកចាំទីរបស់វៀតណាមឱ្យដឹងថា ក្រុមរបស់ខ្លួនអាចលេងបានល្អជាងនេះ។ ពួកគេចង់រក្សាកម្លាំងនៅពេល World Cup 2023 កាន់តែខិតមកដល់។

July 10, 2023

ម៉ូតូអគ្គិសនីថ្មីរបស់ BMW មានតម្លៃប្រហែល 31 លានរៀល/គ្រឿង

កាលពីជិតពីរឆ្នាំមុន BMW បានបង្ហាញម៉ូតូអគ្គិសនីធុនស្រាលដែលមានឈ្មោះថា CE 02 ហើយពេលនេះ BMW 02 បានបង្ហាញខ្លួនជាផ្លូវការក្នុងនាមជាម៉ូតូអគ្គិសនីថ្មីបំផុតរបស់យីហោនេះ។

BMW និយាយថា «នេះគឺជាម៉ូតូសម្រាប់ជិះក្នុងទីក្រុងដែលមមាញឹក និងផ្ដោតលើអតិថិជនជាយុវវ័យ»។ ម៉ូតូនេះមានល្បឿនអតិបរមា 95 គីឡូម៉ែត្រ/ម៉ោង គ្រប់គ្រាន់សម្រាប់ការបើកបរក្នុងទីក្រុង ប៉ុន្តែមិនអាចបើកបរលើផ្លូវល្បឿនលឿន។

នៅសហរដ្ឋអាម៉េរិក BMW CE 02 មានតម្លៃចាប់ពី 7,599 ដុល្លារ ប្រហែលនឹង 31,000,000 រៀលក្នុងមួយគ្រឿង។ នេះក៏ជាម៉ូតូអគ្គីសនីតម្លៃទាបបំផុតដំបូងបង្អស់របស់ BMW គិតមកដល់បច្ចុប្បន្ន។

ថ្មប្រភេទ lithium-ion ចំនួនពីរគ្រាប់ កម្លាំង 1.97 គីឡូវ៉ាត់ម៉ោង ដែលអាចដោះចេញបាន អាចផ្គត់ផ្គង់ថាមពលសម្រាប់ម៉ូទ័រអគ្គិសនីកម្លាំង 15 សេះ និងកម្លាំងបង្វិលកង់ 55Nm។ ប្រព័ន្ធទាំងនេះអនុញ្ញាតឱ្យម៉ូតូទម្ងន់ 132 គីឡូក្រាមបង្កើនល្បឿនពី 0 ទៅ 48 គីឡូម៉ែត្រ/ម៉ោងដោយប្រើពេល 3 វិនាទី មុនពេលមានល្បឿនដល់ 95 គីឡូម៉ែត្រ/ម៉ោង។

BMW CE 02 អាចធ្វើដំណើរបាន 90 គីឡូម៉ែត្រ បន្ទាប់ពីបញ្ចូលថាមពលមួយពេញ ស្របទៅតាមស្ដង់ដា WMTC។ ម៉ូតូនេះផ្ដល់ជម្រើសពីរក្នុងការបញ្ចូលថាមពលអគ្គិសនី រួមមានប្រភេទ 0.9 ឬ 1.5 គីឡូវ៉ាត់។ ប្រភេទ 0.9 គីឡូវ៉ាត់អាចបញ្ចូលអគ្គិសនីពី 20% ឡើងដល់ 80% ក្នុងរយៈពេល 170 នាទី ប៉ុន្តែការបញ្ចូលពី 0 ឱ្យឡើងដល់ 100% នឹងត្រូវចំណាយពេល 5.5 ម៉ោង។

ជម្រើសប្រភេទ Highline អាចកាត់បន្ថយពេលវេលានៃការបញ្ចូលអគ្គិសនីពី 20 ដល់ 80% មកនៅត្រឹម 140 នាទី។ ចំណែកការបញ្ចូលពី 0 ឱ្យដល់ 100% គឺត្រូវចំណាយពេល 290 នាទី លឿនជាង 40 នាទី ធៀបនឹងប្រភេទស្ដង់ដា៕

July 10, 2023

យន្តហោះលឿនជាងសំឡេងជំនាន់ថ្មីរបស់ណាសា ត្រៀមធ្វើតេស្តដំបូង

យន្តហោះល្បឿនលឿនជាងសំឡេងជំនាន់ថ្មីរបស់ទីភ្នាក់ងារអវកាសអាម៉េរិក (NASA) បានចាប់ផ្ដើមត្រៀមខ្លួនសម្រាប់ការហោះហើរលើកដំបូង។

តាំងពីឆ្នាំ 2018 គម្រោងយន្តហោះ X-59 របស់ណាសា ទទួលបានការចាប់អារម្មណ៍ច្រើនពីសហគមន៍អ្នកសារព័ត៌មាន ហើយវាក៏បាន និងកំពុងរុញច្រានវិស័យទេសចរណ៍ល្បឿនលឿនជាងសំឡេងឱ្យខិតចូលជិតដល់ភាពជាក់ស្ដែង។

ថ្មីៗនេះ ណាសាបានឱ្យដឹងថា កាលពីថ្ងៃទី 19 មិថុនា យន្តហោះ X-59 ត្រូវបាននាំពីរោងចក្រដំឡើងរបស់ Lockheed Martin ទៅកាន់ព្រលានយន្តហោះ។ ក្រោយមក យន្តហោះនេះនឹងត្រូវត្រួតពិនិត្យបច្ចេកទេសនៅលើដីដើម្បីធានាថា បានត្រៀមខ្លួនរួចរាល់សម្រាប់បេសកកម្មហោះហើរនាពេលខាងមុខ។

គោលដៅរបស់ណាសា គឺការបញ្ជាក់ថា យន្តហោះល្បឿនលឿនជាងសំឡេងរបស់ពួកគេអាចហោះបានលឿនជាងល្បឿនរបស់សំឡេង ប៉ុន្តែមិនលាន់ឮខ្លាំងដូចយន្តហោះល្បឿនលឿនជាងសំឡេងដទៃទៀត។

យន្តហោះ X-59 របស់ណាសា ដែលមានបណ្ដោយ 30 ម៉ែត្រ ទទឹង 9 ម៉ែត្រ និងបំពាក់ម៉ាស៊ីនប្រតិកម្មតែមួយគត់ ត្រូវបានរចនាឡើងដោយ General Electric Aviation ដែលជាក្រុមហ៊ុនបុត្រសម្ព័ន្ធរបស់ General Electric។

យន្តហោះនេះត្រូវបានផលិតឡើងដើម្បីអាចហោះក្នុងល្បឿន Mach 1.4 ឬ 1,488 គីឡូម៉ែត្រ/ម៉ោង និងអាចហោះដល់កម្ពស់ 16,764 ម៉ែត្រ។ នៅពេលបញ្ឆេះម៉ាស៊ីន X-59 នឹងបង្កើតជាសំឡេងមួយដ៏តូច ដែលប្រហាក់ប្រហែលនឹងសំឡេងបិទទ្វារឡាន ចំពោះអ្នកដែលស្ដាប់នៅលើដី។ ចំណែកយន្តហោះល្បឿនលឿនជាងសំឡេងដទៃអាចធ្វើឱ្យបែកកញ្ចក់បង្អួច នៅពេលវាហោះឆ្លងកាត់។

ណាសាសង្ឃឹមថា បច្ចេកវិទ្យាខាងលើនេះ អាចឱ្យពួកគេបញ្ចុះបញ្ចូលអាជ្ញាធរគ្រប់គ្រងអាកាសចរណ៍ អនុញ្ញាតឱ្យយន្តហោះល្បឿនលឿនជាងសំឡេង X-59 ហោះហើរពីលើតំបន់ដែលមានមនុស្សរស់នៅ។

បើសិនជាការធ្វើតេស្តនានាទទួលបានជោគជ័យ នោះ X-59 អាចក្លាយជាយន្តហោះល្បឿនលឿនជាងសំឡេងដំបូងគេដែលដឹកអ្នកដំណើរនៅទូទាំងពិភពលោក៕

July 10, 2023

BYD ចាប់ផ្ដើមលក់រថយន្តអគ្គិសនី Dolphin នៅសិង្ហបុរី

ក្រុមហ៊ុនផលិតរថយន្តអគ្គិសនីចិន BYD បានបង្ហាញវត្តមានរថយន្ត Dolphin នៅប្រទេសសិង្ហបុរី ក្នុងយុទ្ធនាការបញ្ជ្រាបផលិតផលទៅគ្រប់ទីផ្សារ។

BYD បានប្រារព្ធកម្មវិធីបង្ហាញរថយន្តអគ្គិសនី Dolphin ជាមួយនឹងតំណាងចែកចាយ Vantage Automotive របស់សិង្ហបុរី កាលពីថ្ងៃទី 03 កក្កដា។ Dolphin ដែលជារថយន្តអគ្គិសនីទីពីររបស់ក្រុមហ៊ុននេះដែលត្រូវបានដាក់លក់នៅប្រទេសសិង្ហបុរី បន្ទាប់ពី Atto 3។

BYD បានដាក់លក់ Atto 3 នៅសិង្ហបុរីតាំងពីឆ្នាំ 2022 ហើយវាគឺរថយន្តអគ្គិសនីដែលលក់ដាច់ជាងគេនៅក្នុងតំបន់ នៅក្នុង 5 ខែដើមឆ្នាំ។

BYD ឱ្យដឹងថា Dolphin នឹងក្លាយជារថយន្តអគ្គិសនីដែលទទួលបានការពេញនិយមខ្លាំងពីអតិថិជនគ្រប់វ័យនៅសិង្ហបុរី ហើយវានឹងត្រូវបានប្រជាជននៅទីនេះស្គាល់កាន់តែច្រើន។

BYD Dolphin ត្រូវបានដាក់លក់តាំងពីថ្ងៃទី 29 សីហា 2021។ វាគឺជារថយន្តខ្នាតតូចល្មម និងដំណើរការទាំងស្រុងដោយអគ្គិសនី ហើយបច្ចុប្បន្នមានតម្លៃចាប់ពី 16,120 ដុល្លារអាម៉េរិក នៅប្រទេសចិន។ នៅសិង្ហបុរី BYD Dolphin មានតម្លៃចាប់ពី 156,888 ដុល្លារសិង្ហបុរី (115,900 ដុល្លារអាម៉េរិក)។

BYD លក់រថយន្តអគ្គិសនីបាន 253,046 គ្រឿងក្នុងខែមិថុនា កើន 88.79% ធៀបនឹង 134,036 គ្រឿងក្នុងដំណាក់កាលដូចគ្នាកាលពីឆ្នាំ 2022។

July 7, 2023

កំពូលកីឡាការិនីបាល់ទាត់ 10 រូបនៅ World Cup នារី 2023

ទីភ្នាក់ងារសារព័ត៌មាន AP បានបង្ហាញបញ្ជីឈ្មោះកំពូលកីឡាការិនីបាល់ទាត់ចំនួន 10 រូបដែលត្រូវបានគេរំពឹងច្រើនជាងគេនៅ World Cup នារី 2023 ក្នុងនោះមានទាំង Alex Morgan និង Marta ផងដែរ។

Alex Morgan បានជួយឱ្យសហរដ្ឋអាម៉េរិកដណ្ដើមបានតំណែងជើងឯក World Cup នារីចំនួនពីរលើក ហើយឆ្នាំនេះគឺជាលើកទីបួនដែលនាងចូលរួមប្រកួត។ Alex Morgan ដណ្ដើមបានមេដាយមាសនៅអូឡាំពិកចំនួនមួយគ្រឿង និងជាកីឡាការិនីបាល់ទាត់ដែលឆ្នើមជាងគេគ្រប់សម័យកាល។ ការប្រកួតនៅអូស្ត្រាលី និងនូវែលសេឡង់នាពេលខាងមុខនឹងអាចជួយឱ្យកីឡាការិនីរូបនេះមានឱកាសបង្កើតកំណត់ត្រាដណ្ដើមបានជើងឯក World Cup ចំនួនបីជាបន្តបន្ទាប់ ដែលនេះមិនទាន់មានកីឡាកររូបណាអាចធ្វើបាន។ ខ្សែប្រយុទ្ធវ័យ 34 ឆ្នាំរូបនេះ ដណ្ដើមបានពានរង្វាន់អន្តរជាតិចំនួន 11 និងពានរង្វាន់ជើងឯក Champions League ជាមួយនឹងក្លឹប Lyon។

កំពូលកីឡាការិនីមួយរូបផ្សេងទៀតដែលនឹងត្រូវប្រកួតនៅ World Cup 2023 គឺខ្សែប្រយុទ្ធ Christine Sinclair តំណាងរបស់កាណាដា។ ពុំទាន់មានកីឡាករ កីឡាការិនីណាម្នាក់ដែលរកបានគ្រាប់បាល់ច្រើនដូច Sinclair សម្រាប់ក្រុមជម្រើសជាតិ។ Sinclair រកបាន 190 គ្រាប់ក្នុងចំណោម 319 ប្រកួត ជូនប្រទេសកាណាដា។ Sinclair នឹងចូលរួមទាត់នៅ World Cup លើកទី 6 ក្នុងអាជីព។ Sinclair ដណ្ដើមបានពានរង្វាន់អន្តរជាតិចំនួន 8 ជាមួយនឹងក្រុមជម្រើសជាតិកាណាដា ក្នុងនោះមានទាំងមេដាយមាសអូឡាពិក 2021 ផងដែរ។

នៅព្រឹត្តិការណ៍ប្រកួតកីឡាបាល់ទាត់ពិភពលោកផ្នែកនារីឆ្នាំ 2023 មានខ្សែប្រយុទ្ធខ្លាំងៗជាច្រើន ប៉ុន្តែ Sam Kerr ត្រូវបានសង្ឃឹមច្រើនថានឹងក្លាយជាម្ចាស់ពានរង្វាន់កីឡាការិនីដែលរកបានគ្រាប់បាល់ច្រើនជាងគេ។ ខ្សែប្រយុទ្ធវ័យ 30 រូបនេះគឺជាកីឡាការិនីអូស្ត្រាលីដំបូងគេដែលបង្កើតបាន hat-trick នៅ World Cup មិនថាកីឡាករ ឬកីឡាការិនី។ នាងគឺជាស្ដេចកម្ទេចសំណាញ់ទីនៅពានរង្វាន់បាល់ទាត់ទ្វីបអាស៊ីឆ្នាំ 2022 ដោយរកបាន 7 គ្រាប់ ក្លាយជាកីឡាការិនីដែលរកបានគ្រាប់បាល់ច្រើនជាងគេនៅអូស្ត្រាលី។ Sam Kerr គឺជាកីឡាការិនីរបស់ Chelsea ដែលឆ្នើមជាងគេនៅអង់គ្លេស ក្នុងពីររដូវកាលកន្លង ដោយធ្លាប់បានស៊ុតបញ្ចូលទីជួយឱ្យក្រុមនេះឈ្នះ Man Utd នៅវគ្គផ្ដាច់ព្រ័ត្រ FA Cup។ ដោយបានលេងលើទីលានរបស់ប្រទេសខ្លួន Sam Kerr នឹងមានឱកាសច្រើនដែលអាចជួយឱ្យអូស្ត្រាលីឡើងដល់វគ្គខ្ពស់។

ក្រៅពីកីឡាការិនីខាងលើ World Cup នារី 2023 ក៏នៅមានកំពូលជើងខ្លាំងជាច្រើនផ្សេងទៀត រួមមាន Wendie Renard របស់បារាំង, Ada Hegerberg របស់ន័រវែស, Alexia Putellas របស់អេស្ប៉ាញ, Marta Vieira da Silva របស់ប្រេស៊ីល, Debinha Miri របស់ប្រេស៊ីល, Alexandra Poppp របស់អាល្លឺម៉ង់ និង Lucy Bronze របស់អង់គ្លេស៕

July 6, 2023

អតីតភរិយារបស់ស្ថាបនិក Google និយាយពីរឿងសហាយស្មន់នឹងម្ចាស់ SpaceX

មួយឆ្នាំក្រោយពីមានពាក្យចចរាមអារ៉ាមដែលថា បានសហាយស្មន់នឹង Elon Musk អ្នកស្រី Nicole Shanahan អតីតភរិយារបស់ស្ថាបនិក Google បានចេញមុខបដិសេធ និងបកស្រាយ ហើយថា «បានធ្លាក់ទឹកចិត្តទាំងស្រុង»។

ឆ្លើយតបនឹងសំណួររបស់ People កាលពីថ្ងៃទី 05 កក្កដា អ្នកស្រី Nicole Shanahan និយាយថា មិនមានរឿងសហាយស្មន់ជាមួយនឹងមហាសេដ្ឋី Elon Musk ទាល់តែសោះ។ អ្នកស្រីឱ្យដឹងថា គ្រាន់តែជជែកជាមួយ CEO របស់ SpaceX និង Tesla ដូចទៅនឹងមិត្តរួមការងារ។

«ខ្ញុំជជែកជាមួយ Musk អំពីកូនស្រីដែលមានជំងឺអូទីស្សឹម ព្រោះគាត់គ្រប់គ្រង Neuralink ជាក្រុមហ៊ុនជំនាញខាងស្រាវជ្រាវប្រព័ន្ធប្រសាទ» អ្នកស្រី Shanahan រៀបរាប់ដូច្នេះ។ មុននោះ លោក Musk ធ្លាប់បាននិយាយថា ឈីបខួរក្បាលរបស់ Neuralink នៅថ្ងៃណាមួយប្រាកដជាអាចព្យាបាលជំងឺអូទីស្សឹម និងជំងឺវិកលចរិតមិនខាន។

អ្នកស្រី Shanahan បញ្ជាក់ថា «នោះគឺជាការជជែកប្រកបដោយអត្ថន័យ។ ក៏ប៉ុន្តែ វាបែរជាត្រូវបានលាបពណ៌ដោយវិធីមិនសមស្រប។ រឿងនោះមិនយុត្តិធម៌»។

កាលពីខែកក្កដាឆ្នាំមុន WSJ បានរាយការណ៍ថា លោក Musk មានទំនាក់ទំនងរយៈពេលខ្លីជាមួយនឹង Shanahan នៅក្នុងពិធីបុណ្យ Art Basel នៅ Miami កាលពីខែធ្នូ 2021។ ពេលនោះ Sergey Brin ដែលជាសហស្ថាបនិករបស់ Google និងភរិយា កំពុងតែស្ថិតក្នុងដំណាក់កាលមុនបែកគ្នា ប៉ុន្តែនៅតែរស់ជាមួយគ្នា។

ក្នុងពិធីជប់លៀងមួយកាលពីដើមឆ្នាំ 2022 Musk ត្រូវបានគេជឿថា បានលុតជង្គង់សូមទោសនៅចំពោះមុខ Brin អំពីទង្វើរបស់ខ្លួន។ Brin ទទួលយកការសូមអភ័យទោសនេះ ប៉ុន្តែទំនាក់ទំនងរបស់ពួកគេមិនបានល្អដូចមុន។ យោងតាមឯកសារដែលបានដាក់ឡើងតុលាការនៅខណ្ឌ Santa Clara កាលពីខែមករា 2022 លោក Brin បានដាក់ពាក្យសូមលែងលះ ដោយលើកមូលហេតុថា «មានបញ្ហាមិនចុះសម្រុងគ្នាដែលមិនអាចផ្សះផ្សារបាន»។

Shanahan ឱ្យដឹងថា អ្នកស្រី និង Brin ទើបតែបានលែងលះជាផ្លូវការកាលពីពេលថ្មីៗនេះ បន្ទាប់ពីបានដោះស្រាយបញ្ហាផ្លូវច្បាប់ដែលបានស៊ីពេលអស់ 17 ខែ។

Shanahan បច្ចុប្បន្នគឺជាមេធាវីធ្វើការនៅ California ហើយក៏ជាស្ថាបនិករបស់ក្រុមហ៊ុនច្បាប់ ClearAccessIP និងមូលនិធិ Bia-Echo។ Brin និង Shanahan បានស្គាល់គ្នាកាលពីឆ្នាំ 2015 ហើយបានរៀបការកាលពីឆ្នាំ 2019 និងមានកូនស្រីម្នាក់។ មុនការចាប់ដៃគ្នា ពួកគេសុទ្ធតែជាមនុស្សដែលធ្លាប់បានលែងលះប្ដីប្រពន្ធម្ដងរួចហើយ។

យោងតាម Business Insider មហាសេដ្ឋី Brin និង Larry Page បានបង្កើតក្រុមហ៊ុន Google កាលពីឆ្នាំ 1998 និងបានរួមចំណែកជួយឱ្យក្រុមហ៊ុនអ៊ីនធើណិតនេះក្លាយជាក្រុមហ៊ុនដែលមានតម្លៃមូលធនទីផ្សារខ្ពស់ជាងគេមួយនៅក្នុងពិភពលក៕

July 6, 2023

បើសិនយកទឹកទាំងអស់របស់ផែនដី ទៅជះលើព្រះអាទិត្យ តើនឹងមានរឿងអ្វីកើតឡើង?

ការពន្លត់ភ្លើងដោយប្រើប្រាស់ទឹកពិតជាមធ្យោបាយមួយសម្រាប់ករណីអគ្គិភ័យនៅលើផែនដី ប៉ុន្តែអណ្ដាតភ្លើងនៅលើព្រះអាទិត្យគឺជារឿងដោយឡែក ហើយការយកទឹកទាំងអស់របស់ផែនដី ទៅជះលើព្រះអាទិត្យនឹងកើតមានហេតុការណ៍ដែលស្ទើរគ្រប់គ្នានឹកស្មានមិនដល់។

យោងតាមអ្នកវិទ្យាសាស្ត្រ ចម្លើយគឺថា យើងមិនអាចយកទឹកទៅពន្លត់ភ្លើងព្រះអាទិត្យឱ្យថមថយកម្ដៅបានឡើយ។ ព្រោះថា ព្រះអាទិត្យមិនមែនជាអណ្ដាតភ្លើងដែលឆេះដោយសារអុកស៊ីសែនដូចនៅលើផែនដីនោះទេ។ នៅក្នុងលំហដែលពុំមានអុកស៊ីសែន ព្រះអាទិត្យរក្សាវត្តមានរបស់ខ្លួនបានគឺមកពីប្រតិកម្មនុយក្លេអែរដែលប្រែក្លាយអ៊ីដ្រូសែនទៅជាអេល្យូម។

ដូច្នោះហើយ បើសិនយើងជះទឹកទៅលើព្រះអាទិត្យគឺស្មើនឹងការបន្ថែមឥន្ធនៈឱ្យផ្កាយមួយដួងនេះកាន់តែឆេះខ្លាំងឡើង និងធ្វើឱ្យធ្ងន់ជាងមុនថែមមួយកម្រិតទៀត នាំឱ្យភពនានានៅក្បែរព្រះអាទិត្យប្រឈមនឹងការឆេះខ្លោចឆាប់ជាងធម្មតា។

បើទោះជាបន្ថែមទឹកឱ្យព្រះអាទិត្យយ៉ាងណាក៏ដោយ ផ្កាយនេះក៏នៅតែត្រូវអស់ថាមពល នៅប្រហែល 5 ពាន់លានឆ្នាំទៀត បន្ទាប់ពីឆេះអស់អ៊ីដ្រូសែនដែលមាន 73% និងអេល្យូមដែលមាន 25%។ ក៏ប៉ុន្តែ មុននឹងក្លាយជាកូនផ្កាយពណ៌ស ហើយបន្តចុះត្រជាក់រហូតក្លាយជាកូនផ្កាយពណ៌ប្រផេះ ព្រះអាទិត្យនឹងរីកមាឌ លេបយកភពពុធ និងភពសុក្រ។ ចំណែកភពអង្គារក៏ត្រូវខ្ទាតចេញពីតំបន់ទទួលឥទ្ធិពលពីព្រះអាទិត្យ ខណៈដែលជីវិតនៅលើផែនដីក៏ត្រូវសាបសូន្យសុង៕

July 5, 2023

Category: សង្គម និងសេដ្ឋកិច្ច