Category: សង្គម និងសេដ្ឋកិច្ច

ក្រុមបាល់ទាត់ព្រះខ័នរាជស្វាយរៀង ដណ្ដើមបានកៅអីវគ្គចែកពូលក្នុងពានរង្វាន់ ​AFC CUP 2020 ហើយ ក្រោយយកឈ្នះក្រុមលេខ2 ក្នុងលីកកំពូលរបស់ឡាវ Master7 ដោយលទ្ធផលទាំង 2ជើង 7ទល់នឹង 1។

​ការ​ធ្វើ​បាន​យ៉ាង​ល្អ​នេះ ​ធ្វើ​ឱ្យ​ក្លិបព្រះខ័នរាជស្វាយ​រៀង​មាន​ឱកាសបាន​ឡើង​ទៅ​វគ្គ​ចែក​ពូល។ ​ព្រះខ័នរាជស្វាយ​រៀង​នឹង​ចូលទៅ​នៅក្នុង​ពូល G ​ជាមួយ​ក្រុម​ខ្លាំង​ៗ​មកពីប្រទេសផ្សេងៗជា​ច្រើនទៀត ដូចជា  ​Ceres-Negros (ហ្វីលីពីន), Than Quang Ninh (វៀតណាម) និង Bali United (ឥណ្ឌូនេស៊ី) ហើយការប្រកួតជុំទី1 នឹង​ធ្វើឡើង​នៅថ្ងៃទី11 ខែកុម្ភៈ ឆ្នាំ​2020 ​ខាងមុខនេះ ដោយព្រះខ័នរាជ​ស្វាយរៀង នឹងត្រូវទៅជួប Ceres-Negros មុនគេ។

គួរបញ្ជាក់ដែរថា កាលពីជើងទី1 ព្រះខ័នរាជស្វាយរៀងបានយកឈ្នះ Master7 នៅលើទឹកដីកម្ពុជា ដោយលទ្ធផល 4ទល់នឹង1 មុននឹងបន្តយកឈ្នះនៅជើងទី2 ដោយលទ្ធផល 3ទល់នឹង0 នៅលើទឹកដីឡាវវិញម្តង។ នេះគឺជាលើកទី1 ហើយ ដែលក្រុមមួយនេះបានចូលលេងក្នុងពានរង្វាន់កម្រិតទ្វីបអាស៊ី AFC CUP៕

ជាទូទៅ ក្នុង 1ឆ្នាំៗ ផ្កាសាគូរ៉ានៅក្នុងប្រទេសជប៉ុននឹងចាប់ផ្ដើមរីកក្នុងអំឡុងរដូវស្លឹកឈើលាស់ ក្រោយអស់រដូវរងា និងធាតុអាកាសចាប់ផ្ដើមកក់ក្ដៅឡើង ឬប្រមាណចុងខែមីនា ដល់ដើមខែមេសា តែក៏មានសាគូរ៉ាមួយផ្នែកឆាប់រីកឡើងដែរ ដែលជនជាតិជប៉ុនហៅថា Hayazaki Sakura ឬសាគូរ៉ាឆាប់រីក ដែលសាគូរ៉ាប្រភេទនេះគឺជាសាគូរ៉ាពូជ ខាវ៉ាស៊ុ សាគូរ៉ា និងខូស៊ុសាគូរ៉ា ដែលនឹងចាប់ផ្ដើមរីកឡើងតាំងពីពាក់កណ្ដាលខែកុម្ភៈ ដល់ខែមីនា ដែលនៅប្រទេសជប៉ុនគឺជារដូវរងានៅឡើយ។ អាចហៅបានថា ជាសាគូរ៉ាខុសរដូវ ដែលរីកមុនរដូវកាល។ សម្រាប់អ្នកដែលចង់ទៅទស្សនា ផ្កាសាគូរ៉ារដូវរងានៅប្រទេសជប៉ុន ក៏អាចទៅទស្សនាបានច្រើនកន្លែងដែរ ថែមទាំងនៅមិនឆ្ងាយពីទីក្រុងតូក្យូទៀតផង…។

1. Kawazu Sakura Festival 2020 -ខេត្ត ស៊ិស៊ុអូកានាំគ្នាមកដើរលេងប្រទេសជប៉ុន ទស្សនាផ្កាសាគូរ៉ា នៅខេត្តស៊ិស៊ុអូកា ជាមួយពិធីបុណ្យទស្សនាផ្កាសាគូរ៉ារីកលើកដំបូងប្រចាំឆ្នាំដែលល្បីល្បាញបំផុត Kawazu Sakura Festival នៅតាមមាត់ទន្លេ ខាវ៉ាស៊ុ ដែលទីនេះ គឺជាដើមកំណើតរបស់ដើមផ្កា ខាវ៉ាស៊ុ សាគូរ៉ា ឬសាគូរ៉ាឆាប់រីក។ នៅតាមផ្លូវថ្មើរជើងតាមបណ្ដោយមាត់ទន្លេចម្ងាយ 3គីឡូម៉ែត្រ នឹងមានដើមផ្កាសាគូរ៉ាដុះរៀងគ្នាជាជួរជាង 8,000ដើម សម្លឹងមើលទៅខាងណា ក៏មានតែពណ៌ផ្កាឈូក ស័ក្តិសមសម្រាប់គូស្នេហ៍ដែលជុំវិញខ្លួនពោរពេញដោយពណ៌នៃសេចក្ដីស្នេហា។ ឡារ៉ែន សូមណែនាំថា គួរបបួលគូស្នេហ៍ បបួលលោកឪពុកអ្នកម្ដាយ មកទស្សនាផ្កាសាគូរ៉ានៅទីក្រុងនេះ ធានាថា ច្បាស់ជារំភើបចិត្តមិនខាន។

2. Minami Sakura and Nanohana Festival 2020-ខេត្ត ស៊ិស៊ុអូកាជាពិធីបុណ្យទស្សនាផ្កាសាគូរ៉ាឆាប់រីក ឬសាគូរ៉ាខុសរដូវមួយទៀតក្នុងខេត្តស៊ិស៊ុអូកាដដែល គឺពិធីបុណ្យ Minami Sakura and Nanohana Festival 2020 ព្រោះទីនេះមិនមែនមានតែផ្កាសាគូរ៉ាប៉ុណ្ណោះទេ តែយើងនៅអាចទស្សនាផ្កា ណាណូហាណា បានទៀតផង ដោយផ្កាណាណូហាណា ជាផ្កាដែលមានពណ៌លឿងស្រស់ស្រាយ ពេលដាំជិតៗដើមសាគូរ៉ា និងមានផ្ការីកដំណាលគ្នាផងនោះ វានឹងក្លាយជាទិដ្ឋភាពផ្កាដែលមានទាំងពណ៌ផ្កាឈូក និងពណ៌លឿងមើលទៅស៊ីគ្នាល្អឥតខ្ចោះ។ ទីនេះជាទីតាំងទស្សនាផ្កាសាគូរ៉ាខុសរដូវដែលស្រស់ស្អាត និងស្ងប់ស្ងាត់មួយទៀត ស័ក្តិសមក្នុងការដើរលេងកម្សាន្ត និងថតរូបខ្លាំងបំផុត។

3. Miura-kaigan Sakura Festival 2020-ខេត្ត ខាណាកាវ៉ាតមកទៀតគឺ Miura-kaigan Sakura Festival ពិធីបុណ្យទស្សនាផ្កាសាគូរ៉ារដូវរងា ដែលស្ថិតនៅក្នុងខេត្ត ខាណាកាវ៉ា។ ពិធីបុណ្យនេះរៀបចំឡើងនៅត្រង់បរិវេណផ្លូវដើរដែលពោរពេញទៅដោយដើមសាគូរ៉ានៅជិតស្ថានីយរថភ្លើង ព្រមជាមួយការតុបតែងលម្អដោយទង់ជាតិ និងគោមភ្លើង។ ពេលថតរូបចេញមក យើងនឹងបានរូបភាពផ្លូវថ្នល់ដែលកោងសណ្ដូកវែងពណ៌ផ្កាឈូក មើលទៅស្រស់ស្អាតបំផុត។

4. Ichi-no-srki Harane 2020-ខេត្តខាណាកាវ៉ាជាបរិវេណចង្កេះភ្នំ Nuda ក្នុងខេត្ត ខាណាកាវ៉ា ជាទីកន្លែងដែលដាំដើមសាគូរ៉ាពូជ ហារុមេគិ (Harumeki)ដែលជាផ្កាសាគូរ៉ាពូជថ្មី ទើបតែបានទទួលការចុះបញ្ជីកាលពីឆ្នាំ2000។ សាគូរ៉ានៅក្នុងតំបន់នេះបានទទួលការដាំដុះ និងស្ថិតនៅក្រោមការមើលថែទាំរបស់អង្គការក្នុងប្រទេសជប៉ុន ដែលពេលមកដល់អំឡុងពាក់កណ្ដាលខែមីនា ហារុមេគិ សាគូរ៉ា ជាង120ដើម ក៏នឹងចេញផ្កាពណ៌ផ្កាឈូករីកស្គុះស្គាយពេញទីនោះ។ ជាទីតាំងទស្សនាផ្កាសាគូរ៉ាមួយទៀតដែលអ្នកណាបានមកដល់ហើយត្រូវតែជញ្ជក់មាត់សរសើរគ្រប់គ្នា៕

កាលពីថ្ងៃម្សិលមិញនេះ កីឡាករកូនកាត់ខ្មែរ-បារាំង ធារី ចន្ថាប៊ីន បានបង្កឱ្យមានការភ្ញាក់ផ្អើលយ៉ាងខ្លាំងមួយ ក្រោយពីក្លិប Perak FA របស់ម៉ាឡេស៊ី បានប្រកាសកុងត្រាជាមួយនឹងកីឡាកររូបនេះសម្រាប់រដូវកាល2020 នេះ។

ការចុះកុងត្រានេះ បានបញ្ជាក់ថា កីឡាកររូបនេះ បានចប់សព្វគ្រប់ជាមួយនឹងក្លិប Sokhothai FC នៃលីកកំពូលរបស់ថៃហើយ ក្រោយពីផ្លាស់ទៅថៃ មិនទាន់បានស្រួលបួលផង។

ទោះជាបែបនេះក្តី ធារី ចន្ថាប៊ីន បានបង្ហាញអារម្មណ៍ពេញចិត្តនឹងក្លិបថ្មីរបស់ខ្លូន និងបាននិយាយថា ការបញ្ចប់កុងត្រាជាមួយនឹងក្លិបចាស់ គឺជាការព្រមព្រៀងគ្នាពីភាគីទាំងសងខាងរវាងក្លិប និងរូបគេ៕

អ្នកប្រដាល់គុនខ្មែរ 2រូប គឺកីឡាករ សុខ រិទ្ធ និង ឯម សុធី នឹងចេញទៅប្រកួតនៅក្នុងកម្មវិធី WLC – world lethwei championship នៅប្រទេស មីយ៉ាន់ម៉ា ជាលើកដំបូង នៅថ្ងៃទី31 ខែមករា ឆ្នាំ2020 ខាងមុខនេះ។

ដោយក្នុងនោះ សុខ រិទ្ធ នឹងប្រកួតក្នុងទម្ងន់52.5 ដោយត្រូវជួបកីឡាករម្ចាស់ផ្ទះ SOMIONG LUKTUPFAH ចំណែក ឯម សុធី ក៏ត្រូវប៉ះម្ចាស់ផ្ទះ HEIN TUN AUNG ដែរ ដោយនឹងប្រកួតក្នុងទម្ងន់  60គីឡូក្រាម។

គួរបញ្ជាក់ផងដែរថា លោក ហ៊ុន​ ចាន់រាជ គ្រូបង្វឹកគុនចម្រុះរបស់កីឡាករទាំង 2រូបនេះ បាននិយាយថា​ លោកទទួលស្គាល់អាចនឹងលំបាកខ្លះៗក្នុងការប្រកួតជាមួយកីឡាករម្ចាស់ផ្ទះលើកដំបូង​បែបនេះ តែលោក​ជឿជាក់លើសមត្ថភាពរបស់សុខ រិទ្ធ និង​ឯម សុធី ថា ពួកគេនឹងអាចធ្វើបានល្អ៕

ស្របពេលដែលអាណាព្យាបាលសិស្សជាច្រើនកំពុងមានការព្រួយបារម្ភពី​សុវត្ថិភាពសុខភាព​របស់កូនៗនៅក្នុងសាលារៀន​ ក្រុមហ៊ុនវេសឡាញអេឌ្យូខេសិនគ្រុប បានចាប់ផ្តើមចេញ​យុទ្ធនាការ​ទប់ស្កាត់ជំងឺ​សួតដោយវីរុស​កូរ៉ូណាថ្មី (2019-nCov) នៅក្នុងបណ្តាញសាលារៀនរបស់ខ្លួនដើម្បីជួយបញ្ជៀសសិស្សានុសិស្សរបស់ខ្លួនពីមេរោគថ្មីនេះ។

លោក គង់ សំនៀង  ប្រធាននាយក​ប្រតិបត្តិការនៃក្រុមហ៊ុន​វេសឡាញ អេឌ្យូខេសិន គ្រុប បានលើកឡើងថាបញ្ហាជំងឺរលាកសូតដែលកើតឡើងដោយវីរុសកូរ៉ូណាថ្មី (2019-nCov) នេះជាបញ្ហាមួយដែលអាណាព្យាបាលជាច្រើនមានការព្រួយបារម្ភ ជាពិសេស​គឺបារម្ភពីសុវត្ថិភាពរបស់កូនៗ តែស្ថានភាពជាក់ស្តែងបើតាមការបញ្ជាក់របស់អ្នកជំនាញដែលបណ្តាញព័ត៌មាន​ផ្លូវការនានាបានផ្សព្វផ្សាយថាមេរោគដែលនាំឱ្យកើតជំងឺនេះបានកើតឡើងច្រើនតែតំបន់ត្រជាក់ខ្លាំងតែប៉ុណ្ណោះ។ សម្រាប់កម្ពុជាដែលមានសីតុណ្ហភាពក្តៅ មេរោគនេះមិនសូវជាមានឥទ្ធិពលខ្លាំងប៉ុន្មាននោះទេ តែទោះជាយ៉ាងនេះក្តីយើងត្រូវតែប្រុងប្រយ័ត្នទាំងអស់គ្នា​ព្រោះសុខភាពជារឿងសំខាន់ខ្លាំងណាស់សម្រាប់មនុស្សម្នាក់ៗ។ ដោយមើលឃើញពីសារៈសំខាន់នៃការរក្សាសុខភាពសម្រាប់សិស្សានុសិស្ស និងកាន់តែពិសេស​ក្នុងស្ថានភាពដែល​មានការព្រួយបារម្ភពីការរីករាលដាលនៃមេរោគ​រលាកសួតដោយវីរ៉ុសកូរ៉ូណាថ្មីនេះ ទើបបណ្តាញសាលារៀនរបស់វេសឡាញទាំងអស់បានចាប់ផ្តើម​អនុវត្តនូវសកម្មភាពសំខាន់ៗជាច្រើន។

លោកថា ជាវិធានការបន្ទាន់សម្រាប់គ្រប់សាខាទាំងអស់គឺត្រូវតាមដាន​ការវាស់ស្ទង់កម្តៅសិស្សមុនចូលថ្នាក់រៀនគ្រប់កម្រិតដើម្បីធានាថាសិស្សដែលមានសីតុណ្ហភាពលើស 38អង្សារសេ​អាចនឹងថែរក្សាសុខភាពបានទាន់ពេលវេលា។ បន្ថែមពីលើនេះគឺត្រូវលៀងដៃសិស្សគ្រប់គ្នានឹងសាប៊ូកំចាត់មេរោគ ឬអាកុល គ្រប់គ្នាមុនពេលចូលសាលារៀន។ លើសពីនេះទៅទៀតនៅគ្រប់សាខាទាំងអស់គឺបានត្រៀមទិញម៉ាស់ សាប៊ូ និងសម្ភារៈបរិក្ខាជាច្រើនផ្សេងទៀតដើម្បីផ្តល់ដល់សិស្សានុសិស្សប្រើប្រាស់ក្នុងគោលបំណងការពារពីការឆ្លងមេរោគផ្សេងៗ។ ដោយឡែកសម្រាប់សិស្សដែលមានអាការៈមិនស្រួល សាលានឹងទំនាក់ទំនងទៅអាណាព្យាបាលដើម្បីជូនពួកគេទៅផ្ទះវិញ។ ហើយក្នុងនោះសាលាក៏បានណែនាំឱ្យអាណាព្យាបាលទាំងអស់ប្រញ៉ាប់ទៅជួបគ្រូពេទ្យប្រសិនបើរកឃើញថាកូនៗរបស់គាត់មានអាការៈមិនសូវស្រួលខ្លួនដូចជាឡើងកម្តៅខ្ពស់ ហៀរសំបោរ ឬមានអាការៈដូចទៅនឹងការប្រកាសរបស់ក្រសួងសុខាភិបាល។ ដោយឡែកចំពោះសិស្សដែលបានទៅលេងប្រទេសចិនថ្មីក្នុងអំឡុងពេលមួយសប្តាហ៍ យើងបានស្នើសុំឱ្យគាត់សម្រាកនៅផ្ទះ 1 ទៅ2សប្តាហ៍ដើម្បីតាមដានសុខភាពឱ្យបានល្អជាមុនសិន។

លោក គង់ សំនៀង បាននិយាយថា៖ «​សម្រាប់គ្រប់បន្ទប់រៀនទាំងអស់ដែលមានបង្អូច យើងនឹងឱ្យគាត់បិទម៉ាស៊ីនត្រជាក់ បើកបង្អួច​ឱ្យមានពន្លឺ និងកម្តៅចូលខ្លះ ដើម្បីឱ្យមានលំហូរខ្យល់​ចេញ-ចូលល្អ ព្រោះជាទូទៅជំងឺផ្តាសាយមិនសូវឆ្លង ឬងាប់មេរោគក្នុងសីតុណ្ហភាពក្តៅ»។

លោក គង់ សំនៀង បានបន្ថែមទៀតថា សូមអាណាព្យាបាល​សិស្សកុំមានការព្រួយបារម្ភខ្លាំងពេកពីបញ្ហាការរីករាលដាល​នៃជំងឺថ្មីនេះ ព្រោះដូចលោកបានបញ្ចាក់ហើយថា​តាមការបង្ហាញពីបណ្តាញព័ត៌មានផ្លូវការជាច្រើន រួមទាំង​ការណែនាំរបស់វិជ្ជបណ្ឌិតមួយចំនួនផងបានឱ្យដឹងថា ប្រភេទជំងឺរលាកសួតនេះកើតឡើងពីប្រភេទមេរោគផ្តាសាយទេ។ ចំពោះស្ថានភាពកម្ពុជាយើង គឺខុសគ្នាពីស្ថានភាពនៅប្រទេសចិន ដោយសីតុណ្ហភាពនៅកម្ពុជាមិនអាចធ្វើឱ្យ​មេរោគឆ្លងមកងាយៗនោះទេ តែយើងក៏មិនត្រូវធ្វេសប្រហែសដែរ ជាពិសេសគឺបញ្ហាអនាម័យ។ ហេតុនេះប្រសិនបើយើងបានចូលរួមរក្សាអនាម័យល្អហើយ និងព្រមទាំងមានការយកចិត្តទុកដាក់ពីសាលាផង សូមបញ្ជូនកូនទៅសាលារៀនជាធម្មតាដើម្បីកុំឱ្យមានការប៉ះពាល់ដល់ការសិក្សា។

គួរបញ្ជាក់ផងដែរថាមកដល់ពេលនេះ​នៅកម្ពុជាមានការរកឃើញអ្នកដែលឆ្លងមេរោគរលាកសួតថ្មី កើតពីវីរុសកូរ៉ូណា (2019-Ncov) តែម្នាក់ប៉ុណ្ណោះ ហើយតាមការបញ្ជាក់របស់ក្រសួងសុខាភិបាលក៏បានឱ្យដឹងផងដែរថា អ្នកដែលផ្ទុកមេរោគនេះ​ត្រូវបានដាក់ដាច់ដោយឡែក និងថែទាំដោយយកចិត្តទុកដាក់បំផុតពីមន្ត្រីជំនាញ។ ចំពោះស្ថានភាពសុខភាពវិញ គឺស្ថិតក្នុងស្ថានភាពនឹងនរនោះទេ ខណៈក្រសួង និងភាគីពាក់ព័ន្ធកំពុងចេញយុទ្ធនាការទប់ស្កាត់ ក៏ដូចជាព្យាយាមគ្រប់លទ្ធភាពដើម្បីកុំឱ្យមានការឆ្លង ឬរីករាលដាលនៅក្នុងប្រទេសកម្ពុជា៕

ភាពយន្តខ្មែរថ្មីរឿង «អន្ទាក់ស្នេហ៍» បានបង្ហាញវីដេអូខ្លី Trailer ផ្លូវការរបស់ខ្លួនហើយ ដោយភាពយន្តខ្មែរមួយនេះនឹងឆ្លុះបញ្ចាំងពីស្នេហាបែបស្រុកស្រែ ផ្សំនឹងការលើកឡើងនៃទីតាំងតំបន់ទេសចរណ៍ក្នុងប្រទេសកម្ពុជាដើម្បីបង្ហាញក្នុងរោងភាពយន្ត។

រឿង«អន្ទាក់ស្នេហ៍» និយាយពី បុរសចំណាស់ម្នាក់ដែលមានទ្រព្យសម្បត្តិ ស្តុកស្តម្ភ ហើយគាត់បានលង់ស្រលាញ់ឈ្លក់វង្វេង នឹងនារីដែលមានគូកំណាន់ចិត្តរួចទៅហើយ។ តាចាស់ចង់បានប្រពន្ធក្មេង មិនខ្លាចការរិះគន់ គាត់បានប្រើអំណាច ឥទ្ធិពលនៃទ្រព្យ និង ល្បិច កិច្ចកលសព្វយ៉ាង ដើម្បីយកនាងឱ្យខានតែបាន។

តើរក្សា ដែលសម្តែងដោយ តារាសម្តែង សុខ សុម៉ាវត្ដី និង ចៅពេជ្រ ដែលសម្ដែដោយ តារាសម្ដែង សន ពិសិដ្ឋ អាចឆ្លងកាត់ការបំបែកបំបាក់ ពីអន្ទាក់ស្នេហ៍ របស់បុរសចំណាស់នេះបានឬយ៉ាងណា? យើងនឹងដឹងចម្លើយគ្រប់គ្នាក្នុងរោងភាពយន្តខ្មែរ គ្រប់សាខានៅថ្ងៃទី20 ខែ កុម្ភៈ ឆ្នាំ 2020 ខាងមុខនេះហើយ៕

ទស្សនាវីដេអូ Trailer ខាងក្រោម៖