Category: សង្គម និងសេដ្ឋកិច្ច

កូរ៉េខាងត្បូងដាក់ពន្ធនាគារច្រើនឆ្នាំ ចំពោះជនដែលឆ្លៀតឱកាសដំឡើងថ្លៃម៉ាស់
រដ្ឋាភិបាលកូរ៉េខាងត្បូងបានប្រកាសថា ឈ្មួញទាំងឡាយណាដែលឆ្លៀតឱកាសដំឡើងថ្លៃម៉ាស់ និងផលិតផលជួយទប់ស្កាត់វីរុសកូរ៉ូណា នឹងត្រូវផ្ដន្ទាទោសដាក់ពន្ធនាគាររហូតដល់ពី 2ឆ្នាំ។
ក្រសួងសេដ្ឋកិច្ច និងហិរញ្ញវត្ថុកូរ៉េខាងត្បូង បានឱ្យដឹងកាលពីម្សិលម៉្ងៃ (3កុម្ភៈ) ថា តម្រូវការរបស់ពលរដ្ឋបានកើនឡើងច្រើន ធ្វើឱ្យមានសកម្មភាពឆ្លៀតឱកាសដំឡើងតម្លៃម៉ាស់ និងផលិតផលការពារមេរោគនៅប្រទេសនេះ ក៏បានកើនឡើងច្រើនផងដែរ។ ផលិតផលទាំង 2មុខនេះ ត្រូវបានចាត់ចូលក្នុងមុខទំនិញពិសេស។
នៅកូរ៉េខាងត្បូង អ្នកជូញដូរម៉ាសខុសច្បាប់ នឹងត្រូវប្រឈមមុខជាមួយការជាប់ពន្ធនាគាររយៈពេល 2ឆ្នាំ ឬត្រូវពិន័យជាប្រាក់ឡើងដល់ 50លានវ៉ុន (ជាង 42,000ដុល្លារអាមេរិក)។
ចាប់ពីថ្ងៃនេះ (5កុម្ភៈ) តទៅ ឈ្មួញទាំងឡាយណាដែលរក្សាទុកផលិតផលទាំង 2មុខខាងលើ ក្នុងបរិមាណច្រើនជាង1,5ដង បើធៀបនឹងបរិមាណមធ្យមប្រចាំខែរបស់ពួកគេ នឹងត្រូវប្រឈមមុខជាមួយការជាប់ពន្ធនាគាររយៈពេល 2ឆ្នាំ ឬត្រូវពិន័យជាប្រាក់ឡើងដល់ 50លានវ៉ុន (ជាង 42,000ដុល្លារអាមេរិក)។
នៅកន្លែងមួយក្នុងតំបន់ក្បែរព្រំដែនចិន-វៀតណាម ពលរដ្ឋចិននាំគ្នាមកទិញដូរម៉ាសយកទៅលក់បន្តដើម្បីបានចំណេញច្រើន
បទបញ្ញត្តិខាងលើនេះ ត្រូវបានធ្វើឡើងក្នុងស្ថានភាពអាសន្នរោគរលាកសួតពីវីរុសកូរ៉ូណាប្រភេទថ្មី (nCoV) បាន និងកំពុងឆ្លងរាលដាលយ៉ាងឆាប់រហ័ស ចេញពីក្រុង Wuhan ប្រទេសចិនទៅដល់ប្រទេស និងតំបន់ចំនួន 28 ក្នុងពិភពលោក ក្នុងនោះមានកម្ពុជាផងដែរ និងបណ្ដាលឱ្យមានអ្នកស្លាប់ 492នាក់ និងអ្នកឆ្លងមេរោគនេះមានចំនួន 24,469នាក់។
ប្រជាជនកូរ៉េខាងត្បូងមានការព្រួយបារម្ភយ៉ាងខ្លាំង ក្រោយពីប្រទេសនេះបានរកឃើញអ្នកផ្ទុកមេរោគកូរ៉ូណាចំនួន 16នាក់។ ពលរដ្ឋចំនួនជាងកន្លះលាននាក់ បានចុះហត្ថលេខាលើញត្តិមួយផ្ញើទៅកាន់វិមានខៀវ (The Blue House) ស្នើឱ្យរដ្ឋាភិបាលហាមជនជាតិចិនចូលស្រុកជាបណ្ដោះអាសន្ន។ កូរ៉េខាងត្បូងបានជម្លៀសពលរដ្ឋរបស់ខ្លួនចេញពីតំបន់ Wuhan ប្រទេសចិនរួចហើយ និងបានដាក់ពួកគេឱ្យនៅដាច់ដោយឡែក ដើម្បីតាមដានសុខភាព។
ការរត់ពន្ធម៉ាសឆ្លងដែន ត្រូវបានឈ្មួញធ្វើឡើងក្នុងរូបភាពផ្សេងៗគ្នា
ចំណែកឯរដ្ឋាភិបាលចិនវិញ បានប្រកាសថា ប្រទេសនេះកំពុងត្រូវការម៉ាស់ សម្លៀកបំពាក់ការពារ និងវ៉ែនតាការពារមេរោគក្នុងបរិមាណច្រើនជាបន្ទាន់ ដើម្បីទប់ទល់នឹងមេរោគកូរ៉ូណាប្រភេទ nCoV។ ជាការឆ្លើយតបនឹងតម្រូវការខាងលើ ប្រទេសជប៉ុន កូរ៉េខាងត្បូង និងកាហ្សាក់ស្ថាន ជាដើម បានផ្ដល់ជំនួយសម្ភារវេជ្ជសាស្ត្រទៅឱ្យប្រទេសចិនជាបន្តបន្ទាប់ហើយ។
ពាក់ព័ន្ធនឹងបញ្ហាខាងលើនេះដែរ កាលពីថ្ងៃទី 29មករាកន្លងទៅ គណៈកម្មការគ្រប់គ្រងទីផ្សារនៃក្រុងប៉េកាំង បានប្រកាសនៅលើគេហទំព័ររបស់ខ្លួនថា ខ្លួនបានផ្ញើលិខិតពិន័យទៅកាន់ឱសថស្ថាន Beijing Jimin Kangtai Pharmacy ព្រោះតែឱសថស្ថានមួយនេះបានដំឡើងតម្លៃហួសហេតុទៅលើម៉ាស់ប្រភេទ N95។ នេះបើតាមទីភ្នាក់ងារសារព័ត៌មាន Reuters។
ពលរដ្ឋវៀតណាម នាំគ្នាបង្កើតផ្សារមួយកន្លែងនៅក្បែរព្រំដែនវៀតណាម-ចិន ដើម្បីជួញដូរម៉ាស
ទូរទស្សន៍ជាតិរបស់ចិន បានរាយការណ៍ថា ឱសថស្ថាននេះបានដំឡើងថ្លៃម៉ាស់ដែលមានរូបសញ្ញា 3M ឡើងដល់ 850យន់ (121ដុល្លារអាមេរិក)ក្នុង 1ប្រអប់ ខណៈនៅក្នុងទីផ្សារអនឡាញមានតម្លៃតែ 143យន់។ ជាមធ្យម ម៉ាស់នៅតាមឱសថស្ថាននានា 1ប្រអប់មានម៉ាស់ចំនួន 50បន្ទះ។
អ្នករត់ពន្ធម៉ាសឆ្លងដែនទៅចិនម្នាក់ ត្រូវអាជ្ញាធរវៀតណាមចាប់ឃាត់ខ្លួន
ទន្ទឹមនឹងនេះដែរ នៅឯប្រទេសជិតខាងចិន ដូចជាវៀតណាមជាដើម តម្លៃម៉ាស់ និងទឹកសម្អាតមេរោគ ក៏បានឡើងថ្លៃខ្លាំងដែរ ព្រោះថា ឈ្មួញខ្លះបានប្រមូលទិញម៉ាស់ក្នុងស្រុកយកទៅលក់ឱ្យឈ្មួញនៅតាមព្រំដែនជាប់ជាមួយចិន។ ជាក់ស្ដែង កាលពីថ្ងៃទី3កុម្ភៈ អាជ្ញាធរខេត្ត Vinh Phuc នៅវៀតណាមខាងជើងបានឃាត់ខ្លួនឈ្មួញជាច្រើននាក់ ដែលនាំម៉ាស់ពីប្រទេសវៀតណាមទៅកាន់ប្រទេសចិនដោយខុសច្បាប់។ ម៉ាស់ដែលត្រូវបានរឹបអូសក្នុងថ្ងៃនោះ មានចំនួនសរុប 26,100បន្ទះ។ នេះបើតាមសារព័ត៌មាន Thanhnien៕
ប្រភព៖ សារព័ត៌មានបរទេស
February 5, 2020
ម៉ូដសក់ក្រងបែបគួរឱ្យស្រឡាញ់ សម្រាប់បុណ្យនៃក្តីស្រឡាញ់
ថ្ងៃបុណ្យនៃពណ៌សុីជំពូ ជាពណ៌នៃក្តីស្រឡាញ់ពេញបេះដូង ដូច្នេះម៉ូដសក់របស់អ្នកក៏ត្រូវឱ្យមានភាពផ្អែមល្ហែម និងមានរូបបេះដូង ដែលបង្ហាញពីភាពកក់ក្តៅ សេចក្តីស្រឡាញ់ និងគួរឱ្យស្រឡាញ់ទៅតាមនោះដែរ។ ម៉ូដសក់សម្រាប់យុវវ័យសម័យថ្មីនាឱកាសបុណ្យនៃក្តីស្រឡាញ់ត្រូវតែ Cute គួរឱ្យស្រឡាញ់បែបនេះ ទើបស័ក្តិសម។ នៅក្នុងរដូវបុណ្យនៃក្តីស្រឡាញ់ឆ្នាំនេះ ឡារ៉ែន សូមនាំចិត្តនារីៗទាំងអស់មកលេងម៉ូដសក់ក្រងបែបងាយៗ តែគួរឱ្យស្រឡាញ់ពេញបេះដូងតែម្តង ដែលអ្នកណាក្រឡេកមើលឃើញហើយ គឺចាប់អារម្មណ៍ និងលង់ស្នេហ៍តែម្តង ដែលមើលទៅមិនស៊ាំភ្នែក មិនឆើតឆាយពេក ហើយក៏មិនពិបាកធ្វើដែរ គឺអ្នកអាចធ្វើដោយខ្លួនឯងក៏បានដែរ។ ដូច្នេះនៅក្នុងថ្ងៃបុណ្យនៃក្តីស្រឡាញ់ សូមឱ្យយុវនារីយើង ដែលមិនទាន់មានគូស្នេហ៍បានជួបគូស្នេហ៍ដែលអ្នកប៉ងប្រាថ្នា និងបានជួបស្នេហ៍ពិតទាំងអស់គ្នាណា៎!
February 5, 2020
រកឃើញចម្លាក់សត្វតោរចនាបថសម័យបាយ័ន្តស.វ ទី១៣ មានអាយុរាប់ពាន់ឆ្នាំ
បើតាមនាយកដ្ឋានគាំពារនិងអភិរក្សសំណង់បុរាណ បានឱ្យដឹងថា ចម្លាក់សត្វតោមួយស្ថិតក្នុងរចនាបថសម័យបាយ័ន្តស.វ ទី១៣ ត្រូវបានប្រទះឃើញក្នុងកំឡុងពេលធ្វើកំណាយសិក្សាស្រាវជ្រាវរចនាសម្ព័ន្ធគ្រឹះកំពង់ទឹករបស់បារាយមេបុណ្យនៃប្រាសាទបន្ទាយ
កាលថ្ងៃទី៣ ខែ កុម្ភៈ ឆ្នាំ២០២០ ក្នុងកំឡុងពេលធ្វើកំណាយសិក្សាស្រាវ ជ្រាវរចនាសម្ព័ន្ធគ្រឹះកំពង់ទឹករបស់បារាយមេបុណ្យនៃប្រាសាទបន្ទាយឆ្មារ មុនពេលចាប់ផ្តើមជួសជុល ក្រុមការងារ បច្ចេកទេសនៃនាយកដ្ឋានគាំពារនិងអភិរក្សសំណង់បុរាណ បានរកឃើញចម្លាក់សត្វតោមួយស្ថិតក្នុងរចនាបថសម័យបាយ័ន្តស.វទី១៣ កប់ក្នុងដីជម្រៅប្រហែលជាងមួយម៉ែត្រ ។ ដើម្បីការពារសុវត្ថិភាពចម្លាក់តោដែលទើបនឹងរកឃើញនេះ នាយកដ្ឋានបានសហការយ៉ាងជិតស្និទជាមួយនគរបាលបេតិកភណ្ឌប្រចាំការប្រាសាទបន្ទាយឆ្មារ ដោយចាត់កម្លាំងយាមកាមជាប្រចាំ។
សូមបញ្ជាក់ជូនថា បន្ទាប់ពីពិនិត្យឃើញ កំពង់ទឹកនេះទទួលរងនូវការខូចខាតស្ទើតែបាត់រូបរាងអស់ទៅហើយនោះ ក្រសួង វប្បធម៌និងវិចិត្រសិល្បៈបានអនុញ្ញាតគោល ការណ៍ឲ្យមន្ត្រីបច្ចេកទេសនាយកដ្ឋានគាំពារនិងអភិរក្សសំណង់បុរាណ ចំណុះឲ្យអគ្គនាយកដ្ឋានបេតិកភណ្ឌនៃក្រសួងវប្បធម៌និងវិចិត្រសិល្បៈ ធ្វើការអភិរក្សនិងជួសជុល ដើម្បីលើកតម្លៃសោភ័ណភាពនៃសំណង់កំពង់ទឹកមួយនេះឲ្យរស់ឡើងវិញ។ ការអភិរក្ស និងជួសជុលកំពង់ទឹកនេះ ទទួលបានការឧបត្ថម្ភថវិកាដ៏ថ្លៃថ្លាពីលោកជំទាវឧកញ៉ា ម៉ៅ ម៉ាល័យ កែ គឹមយ៉ាន ៕

February 5, 2020
Huawei ជាប់លេខ2 ពិភពលោក ផ្នែកលក់ស្មាតហ្វូនដាច់បំផុតកាលឆ្នាំ2019
យោងតាមរបាយការណ៍ផ្លូវការពី Strategy Analytics និង Counterpoint Research បានបង្ហាញឱ្យដឹងថា ពេញ 1ឆ្នាំនៃឆ្នាំ2019 កន្លងទៅ ទីផ្សារលក់ស្មាតហ្វូនដែលលក់ដាច់បំផុតលំដាប់លេខ2 លើពិភពលោក បានទៅលើក្រុមហ៊ុន Huawei ។
ការប៉ាន់ស្មានថ្មីចុងក្រោយបំផុតពីប្រភពដដែលទាំង2 ខាងលើបានបង្ហាញថា Apple ឈរនៅលំដាប់ថ្នាក់លេខ1 ប្រចាំត្រីមាសទី4 ឆ្នាំ2019 ក្លាយជាក្រុមហ៊ុនលក់ស្មាតហ្វូនបានច្រើនជាងគេលើពិភពលោក។ Apple លក់ iPhone បាន 70.7លានគ្រឿងអំឡុងរយៈពេល 3ខែ(គិតត្រឹមចុងខែធ្នូ2019) ដែលអាចកាន់កាប់ទីផ្សារបាន 18.9%។ តួលេខនេះកើនឡើង 7% បើប្រៀបនឹងឆ្នាំ2018 ដែលលក់បាន 65.9លានគ្រឿងពេលដែល Apple ឈរលំដាប់លេខ2 នៅពីក្រោយ Samsung។
សូមជម្រាបជូនថា សរុបទៅពេញ 1ឆ្នាំ2019 ក្រុមហ៊ុន Apple លក់ iPhone បាន 197.4លានគ្រឿងដែលឈរនៅលំដាប់ថ្នាក់លេខ3 គិតជាប្រចាំឆ្នាំ។ លេខ1 ប្រចាំឆ្នាំ 2019 នៅតែជា Samsung ដែលលក់បាន 295.1លានគ្រឿង តាមពីក្រោយដោយ Huawei លក់បាន 240.5លានគ្រឿង។ លេខ 4 ប្រចាំឆ្នាំ គឺបានទៅលើក្រុមហ៊ុន Xiaomi ជាមួយចំនួនលក់សរុប 124.8 លានគ្រឿង និង OPPO ស្ថិតនៅលេខ5 ជាមួយចំនួនលក់សរុប 115.1លានគ្រឿង ក្នុងរយៈពេល 12ខែកន្លងទៅ៕
A man walks inside a Huawei’s customer service center in Hong Kong, Friday, March 29, 2019. Chinese tech giant Huawei’s deputy chairman defended its commitment to security Friday after a stinging British government report added to Western pressure on the company by accusing it of failing to repair dangerous flaws in its telecom technology. (AP Photo/Kin Cheung)

February 4, 2020
ស្មាតហ្វូន Huawei ប្រើបន្ទះឈីប Kirin 810 ដំបូងបំផុតដែលលក់នៅក្រៅប្រទេសចិន
ស្មាតហ្វូន Huewei ម៉ូដែល Nova 7i នឹងត្រូវលេចមុខនៅលើទីផ្សារនៅប្រទេសម៉ាឡេស៊ី នៅថ្ងៃទី14 ខែកុម្ភៈ ឆ្នាំ2020 ខាងមុខនេះ ដើម្បីឱ្យចំនឹងថ្ងៃនៃក្តីស្រឡាញ់តែម្ដង។ យោងតាមរបាយការណ៍ បានឱ្យដឹងថា ស្មាតហ្វូន Nova 7i បំពាក់បន្ទះឈីបល្បឿនលឿន Kirin 810 ស្ថិតក្នុងសែស្រឡាយផលិតផលដែលលក់នៅក្រៅប្រទេសចិនជាលើកដំបូងបំផុត។ បន្ទះឈីបនេះ កន្លងមកមានតែនៅក្នុងទីផ្សារប្រទេសចិនមួយគត់។
Nova 7i នឹងបំពាក់កាមេរ៉ា 4គ្រាប់ផ្នែកនៅខាងក្រោយ (48+8+2+2MP) ដាក់លេនស៍ដែលមាននាទីផ្សេងៗគ្នា និងផ្នែកខាងមុខមានកាមេរ៉ា 1គ្រាប់ រចនាប័ទ្មជាប្រឡោះក្រោមអេក្រង់ មើលទៅឃើញស្រដៀងនឹងប្រជ្រុយមនុស្សដូច្នោះដែរ។ ស្មាតហ្វូននេះនឹងនៅតែដំណើការដោយ Android 10 ស្រោបដោយស្បែក EMUI ជំនាន់10។ ក្នុងអំឡុងពេលជម្លោះពាណិជ្ជកម្មជាមួយអាមេរិក ស្មាតហ្វូននេះនឹងគ្មានសេវាកម្ម Google ឡើយ។
សម្រាប់ម៉ូដែល RAM តូចបំផុត (អាចនឹង RAM 4GB) និងមេម៉ូរីតូចបំផុត(អាចនឹង 128GB)នឹងមានតម្លៃប្រមាណជា 2,199យន់(ប្រមាណ 310ដុល្លារ)៕

February 4, 2020
ម៉ូដសម្លៀកបំពាក់ពណ៌ផ្កាឈូកពណ៌ក្រហមសម្រាប់ Valentine’s Day
រដូវបុណ្យនៃក្តីស្រឡាញ់ ជាពេលវេលាដ៏មានអត្ថន័យ និងជាពេលវេលាដ៏ល្អសម្រាប់នារីៗយើងបង្អួតពីភាពស្រស់ស្អាត ទាក់ទាញចិត្តបុរសជាគូស្នេហ៍ និងមនុស្សនៅជុំវិញខ្លួន។ ដូច្នេះមិនអាចខកខានបានទេ ក្នុងការជ្រើសរើសនូវម៉ូដសម្លៀកបំពាក់ស្អាតៗ Cuteៗ ដើម្បីបង្ហាញពីភាពស៊ីវីល័យ និងភាពទាន់សម័យរបស់អ្នកដល់មនុស្សទាំងអស់នៅក្នុងថ្ងបុណ្យនៃក្តីស្រឡាញ់ Valentine’s Day ឆ្នាំ2020នេះ៕
February 4, 2020
វេសឡាញ ចេញវិធានការទប់ស្កាត់ជំងឺរលាកសួតថ្មីក្នុងបណ្តាញសាលារៀនរបស់ខ្លួន
ស្របពេលដែលអាណាព្យាបាលសិស្សជាច្រើនកំពុងមានការព្រួយបារម្ភពីសុវត្ថិភាពសុខភាពរបស់កូនៗនៅក្នុងសាលារៀន ក្រុមហ៊ុនវេសឡាញ អេឌ្យូខេសិនគ្រុបបានចាប់ផ្តើមចេញយុទ្ធនាការទប់ស្កាត់ជំងឺរលាកសួតដោយវីរុសកូរ៉ូណាប្រភេទថ្មី (2019-nCov) នៅក្នុងបណ្តាញសាលារៀនរបស់ខ្លួនដើម្បីជួយបញ្ចៀសសិស្សានុសិស្សរបស់ខ្លួនពីមេរោគថ្មីនេះ។
លោក គង់ សំនៀង ប្រធាននាយកប្រតិបត្តិការនៃក្រុមហ៊ុនវេសឡាញ អេឌ្យូខេសិន គ្រុប បានលើកឡើងថា បញ្ហាជំងឺរលាកសូតដែលកើតឡើងដោយវីរុសកូរ៉ូណាថ្មី (2019-nCov) នេះជាបញ្ហាមួយដែលអាណាព្យាបាលជាច្រើនមានការព្រួយបារម្ភ ជាពិសេស គឺបារម្ភពីសុវត្ថិភាពរបស់កូនៗ តែស្ថានភាពជាក់ស្តែង បើតាមការបញ្ជាក់របស់អ្នកជំនាញដែលបណ្តាញព័ត៌មានផ្លូវការនានាបានផ្សព្វផ្សាយថា មេរោគដែលនាំឱ្យកើតជំងឺនេះ បានកើតឡើងច្រើនតែក្នុងតំបន់ដែលត្រជាក់ខ្លាំងតែប៉ុណ្ណោះ។
សម្រាប់កម្ពុជាដែលមានសីតុណ្ហភាពក្តៅ មេរោគនេះមិនសូវជាមានឥទ្ធិពលខ្លាំងប៉ុន្មានទេ តែទោះជាយ៉ាងនេះក្តី ក៏យើងត្រូវតែប្រុងប្រយ័ត្នទាំងអស់គ្នាដែរ ព្រោះសុខភាពជារឿងសំខាន់ខ្លាំងណាស់សម្រាប់មនុស្សម្នាក់ៗ និងដោយមើលឃើញពីសារៈសំខាន់នៃការរក្សាសុខភាពសម្រាប់សិស្សានុសិស្ស និងកាន់តែពិសេសក្នុងស្ថានភាពដែលមានការព្រួយបារម្ភពីការរីករាលដាលនៃជំងឺរលាកសួតដោយវីរុសកូរ៉ូណាថ្មីនេះ ទើបបណ្តាញសាលារៀនរបស់វេសឡាញទាំងអស់បានចាប់ផ្តើមអនុវត្តនូវសកម្មភាពសំខាន់ៗជាច្រើន។
លោកថ្លែងថា ជាវិធានការបន្ទាន់សម្រាប់គ្រប់សាខាទាំងអស់ គឺត្រូវតាមដានការវាស់ស្ទង់កម្តៅសិស្សមុនចូលថ្នាក់រៀនគ្រប់កម្រិត ដើម្បីធានាថា សិស្សដែលមានសីតុណ្ហភាពលើស 38អង្សារសេអាចនឹងថែរក្សាសុខភាពបានទាន់ពេលវេលា។ បន្ថែមពីលើនេះ គឺត្រូវលាងដៃសិស្សគ្រប់គ្នានឹងសាប៊ូកម្ចាត់មេរោគ ឬអាល់កុល គ្រប់គ្នាមុនពេលចូលបន្ទប់រៀន។
លើសពីនេះទៅទៀត នៅគ្រប់សាខាទាំងអស់ គឺបានទិញម៉ាស់ សាប៊ូ និងសម្ភារបរិក្ខារជាច្រើនផ្សេងទៀត ដើម្បីផ្តល់ដល់សិស្សានុសិស្សប្រើប្រាស់ក្នុងគោលបំណងការពារពីការឆ្លងមេរោគផ្សេងៗ។
ដោយឡែកសម្រាប់សិស្សដែលមានអាការមិនស្រួល សាលានឹងទំនាក់ទំនងទៅអាណាព្យាបាលដើម្បីជូនដំណឹង ហើយក្នុងនោះសាលាក៏បានណែនាំឱ្យអាណាព្យាបាលទាំងអស់ប្រញាប់នាំកូនទៅជួបគ្រូពេទ្យ ប្រសិនបើរកឃើញថា កូនៗរបស់គាត់មានអាការមិនសូវស្រួលខ្លួន ដូចជាឡើងកម្តៅខ្ពស់ ហៀរសំបោរ ឬមានអាការដូចទៅនឹងការប្រកាសរបស់ក្រសួងសុខាភិបាល។
ដោយឡែកចំពោះសិស្សដែលបានត្រឡប់មកពីដើរលេងនៅប្រទេសចិនថ្មី ៗ យើងបានស្នើសុំឱ្យគាត់សម្រាក
នៅផ្ទះ 1 ទៅ 2សប្តាហ៍សិន ដើម្បីតាមដានសុខភាពឱ្យបានល្អជាមុនសិន។
លោក គង់ សំនៀង បានមានប្រសាសន៍ថា៖ «សម្រាប់គ្រប់បន្ទប់រៀនទាំងអស់ដែលមានបង្អូចយើងនឹងឱ្យគាត់បិទម៉ាស៊ីនត្រជាក់ បើកបង្អួចឱ្យមានពន្លឺ និងកម្តៅថ្ងៃចូលខ្លះ ដើម្បីឱ្យមានរបាយខ្យល់ចេញចូលល្អព្រោះជាទូទៅមេរោគនៃជំងឺផ្តាសាយ នឹងមិនសូវឆ្លង ឬងាប់តែម្ដងក្នុងសីតុណ្ហភាពក្តៅ»។
លោក គង់ សំនៀង បានបន្ថែមទៀតថា សូមអាណាព្យាបាលសិស្សទាំងអស់ កុំមានការព្រួយបារម្ភខ្លាំងពេក ពីបញ្ហាការរីករាលដាលនៃជំងឺថ្មីនេះ ព្រោះដូចលោកបានបញ្ជាក់ហើយថា តាមការបង្ហាញពីបណ្តាញព័ត៌មានផ្លូវការជាច្រើន រួមទាំងការណែនាំរបស់វេជ្ជបណ្ឌិតមួយចំនួនផងនោះ បានឱ្យដឹងថា ប្រភេទជំងឺរលាកសួតថ្មីនេះ កើតឡើងពីប្រភេទមេរោគផ្តាសាយទេ។
ចំពោះស្ថានភាពកម្ពុជាយើង គឺខុសគ្នាពីស្ថានភាពនៅប្រទេសចិនដោយសីតុណ្ហភាពនៅកម្ពុជាមិនអាចធ្វើឱ្យមេរោគឆ្លងមកងាយៗនោះទេ តែយើងក៏មិនត្រូវធ្វេសប្រហែសដែរ ជាពិសេស គឺបញ្ហាអនាម័យ។
ហេតុនេះប្រសិនបើយើងបានចូលរួមរក្សាអនាម័យល្អហើយ និងព្រមទាំងមានការយកចិត្តទុកដាក់ពីសាលាផង សូមបញ្ជូនកូនទៅសាលារៀនជាធម្មតា ដើម្បីកុំឱ្យមានការប៉ះពាល់ដល់ការសិក្សា។
គួរបញ្ជាក់ផងដែរថា មកដល់ពេលនេះ នៅកម្ពុជាមានការរកឃើញអ្នកដែលឆ្លងមេរោគរលាកសួតថ្មី បណ្ដាលពីវីរុសកូរ៉ូណា (2019-Ncov) តែម្នាក់ប៉ុណ្ណោះ ហើយតាមការបញ្ជាក់របស់ក្រសួងសុខាភិបាល ក៏បានឱ្យដឹងផងដែរថា អ្នកដែលផ្ទុកមេរោគនេះត្រូវបានដាក់ឱ្យនៅដាច់ដោយឡែក និងថែទាំព្យាបាលយ៉ាងយកចិត្តទុកដាក់បំផុតពីមន្ត្រីជំនាញ។
ចំពោះស្ថានភាពសុខភាពវិញ គឺស្ថិតក្នុងស្ថានភាពនឹងនរជាធម្មតាទេ ខណៈក្រសួង និងភាគីពាក់ព័ន្ធកំពុងចេញយុទ្ធនាការទប់ស្កាត់ ក៏ដូចជាព្យាយាមគ្រប់លទ្ធភាពដើម្បីកុំឱ្យមានការឆ្លង ឬរីករាលដាលនៃមេរោគនេះនៅក្នុងប្រទេសកម្ពុជា៕
February 4, 2020
តើទីក្រុងតូក្យូនឹងទៅជាយ៉ាងណា ពេលភ្នំភ្លើង Fuji ផ្ទុះ?
រដ្ឋាភិបាលប្រទេសជប៉ុនបានធ្វើការវាយតម្លៃថា បើសិនជាភ្នំភ្លើង ហ្វូជិ កើតការផ្ទុះដ៏ធំមួយឡើង អាចធ្វើឱ្យមានកម្អែភ្នំភ្លើងគ្របដណ្ដប់ទូទាំងទីក្រុងតូក្យូ និងតំបន់ជុំវិញ និងអាចធ្វើឱ្យការចែកចាយចរន្តអគ្គិសនី និងការធ្វើចរាចរណ៍គាំងស្ទះដំណើរការមិនខាន។
អ្នកវិទ្យសាស្ត្រល្បីៗលំដាប់ជួរមុខ បាននាំគ្នាចេញមកដាស់តឿនថា សភាវផែនដីឡើងកម្ដៅ នឹងធ្វើឱ្យកើតការរញ្ជួយផែនដីកើនច្រើនឡើងទូទាំងពិភពលោក ហើយភ្នំភ្លើងនឹងផ្ទុះឡើង និងដោយសារតែសីតុណ្ហភាពពិភពលោកដែលកាន់តែក្ដៅឡើង ធ្វើឱ្យទឹកកកនៅកំពូលផែនដីរលាយ…នៅពេលទឹកកករលាយ ក៏នឹងគ្មានអ្វីទាញសង្កត់ផ្ទាំងសម្បកផែនដី…បន្ទះផែនដីនឹងកម្រើក ធ្វើឱ្យផែនដីកាន់តែរញ្ជួយខ្លាំងឡើង និងម៉េកម៉ាខាងក្រោមដីនឹងហូរមកផ្ដុំគ្នា រហូតរង់ចាំកម្លាំងរុញឱ្យផ្ទុះចេញមកនៅកន្លែងណាមួយលើផែនដី…។
ភ្នំហ្វូជិ និមិត្តសញ្ញារបស់ប្រទេសជប៉ុនដែលនៅស្ងៀមនឹងមកអស់រយៈពេលជាង 300ឆ្នាំហើយនោះ នឹងមិនមែននៅស្ងប់ស្ងៀមដូចដែលអ្នកណាៗមើលឃើញនោះទៀតទេ តែគឺជាភ្នំភ្លើងដែលមានថាមពលសកម្ម(Active Volcano) អ្នកជំនាញការជនជាតិជប៉ុនបញ្ជាក់ថា ភ្នំហ្វូជិ នឹងផ្ទុះឡើងម្ដងទៀតយ៉ាងពិតប្រាកដ គ្រាន់តែនៅមិនទាន់ដឹងថា នឹងកើតឡើងនៅពេលណាប៉ុណ្ណោះ។
ក្រុមការងារមួយរបស់រដ្ឋបាលជប៉ុន បានប៉ាន់ប្រមាណការណ៍ថា បើសិនភ្នំភ្លើងហ្វូជិកើតការផ្ទុះដ៏ធំឡើង អាចនឹងមានកម្អែភ្នំភ្លើងហូរធ្លាក់មកប្រមូលសន្សំក្នុង 1ម៉ោងកម្ពស់ប្រមាណ 1-2សង់ទីម៉ែត្រនៅក្នុងទីក្រុងកូតិមបាក់ របស់ខេត្តឈិស៊ូអូកាក់ ដែលនៅជិតជើងភ្នំ ហើយបើភ្នំភ្លើងបាក់ហូរធ្លាក់មកគ្របសង្កត់ទីនោះទាំងអស់ អាចនឹងមានកម្ពស់ដល់ទៅ 1.2ម៉ែត្រ។
ក្នុងតំបន់ស៊ិនជូកុ របស់ទីក្រុងតូក្យូ ដែលឆ្ងាយពីភ្នំហ្វូជិប្រមាណ 90គីឡូម៉ែត្រ ទោះជាមិនមានកម្អែភ្នំភ្លើងធ្លាក់មកគរភ្លាមៗមែន តែនឹងខ្ទាតមកដល់នៅថ្ងៃទី13 ក្រោយការផ្ទុះ និងអាចមានកម្អែភ្នំភ្លើងគ្រប់សង្កត់កម្ពស់ប្រមាណ 1.3សង់ទីម៉ែត្រ។
អ្នកជំនាញការបញ្ជាក់ថា បើកម្អែភ្នំភ្លើងធ្លាក់នៅក្នុងទីក្រុងតូក្យូ និងតំបន់ជុំវិញ មនុស្សម្នាចំនួនដ៏ច្រើនអាចនឹងមិនអាចត្រឡប់ទៅផ្ទះបាន ក្រៅពីនេះការដឹកជញ្ជូនអាហារ និងវត្ថុប្រើប្រាស់ចាំបាច់ផ្សេងៗក្នុងជីវិតប្រចាំថ្ងៃ អាចនឹងជាប់គាំងស្ទះនៅមួយកន្លែង ហើយបើសិនមានហេតុការណ៍រញ្ជួយផែនដីកើតឡើងផងនោះ អាចនឹងមានអ្នកស្លាប់រាប់ពាន់នាក់ ជា “មហាគ្រោះវិបត្តិ” ធំមួយក្នុងទីក្រុងនៃដែនដីកោះមួយនេះ។
កាលពីអតីតកាល បណ្ដាទីក្រុងនានាដែលស្ថិតនៅជុំវិញភ្នំហ្វូជិ តែងចៀសគេចពីការពិភាក្សារឿងផែនការការពារគ្រោះវិបត្តិ ព្រោះបារម្ភខ្លាចក្រែងថា នឹងបង្កឱ្យកើតមានការភិតភ័យភ្ញាក់ផ្អើលដល់ទីប្រជុំជនដែលស្ថិតនៅជុំវិញនោះ តែក្រោយពីភ្នំហ្វូជិបានចុះបញ្ជីជាបេតិកភណ្ឌពិភពលោករបស់អង្គការយូណេស្កូ កាលពីឆ្នាំ2012 មក អ្នកទេសចរ និងអ្នកឡើងភ្នំដែលបានមកដល់ភ្នំហ្វូជិ មានចំនួនកាន់តែច្រើនឡើងៗ ធ្វើឱ្យអង្គភាពផ្សេងៗនៅទីនោះត្រូវធ្វើសេចក្ដីព្រាងវិធានការផ្នែកសុវត្ថិភាពឡើង។
អ្នកជំនាញការជនជាតិជប៉ុនបានរៀបរាប់ថា ភ្នំភ្លើង អាចធ្វើឱ្យមានការខូចខាតយ៉ាងខ្លាំង បើសិនជាវាផ្ទុះឡើង តែបើសម្លឹងមើលក្នុងរយៈពេលវែងវិញ ភ្នំភ្លើងក៏សាងនូវគុណប្រយោជន៍ឱ្យច្រើនដែរ ដូចជា ទស្សនីយភាពដ៏ស្រស់ស្អាតប្លែកភ្នែក ទឹកនៅក្រោមដីដែលនឹងមានយ៉ាងបរិបូរណ៍ និងផ្ទៃដីជើងភ្នំដ៏ធំទូលាយ ដែលស័ក្តិសមបំផុតក្នុងការដំណើរការកិច្ចការងារខាងសេដ្ឋកិច្ចដ៏សម្បូរបែប។
អំឡុងពេលដែលភ្នំភ្លើងផ្ទុះនោះ ជាអំឡុងពេលដែលខ្លីបំផុត បើប្រៀបធៀបនឹងអំឡុងពេលដែលវានៅស្ងប់ស្ងៀម បើសិនមានការត្រៀមរួចជាស្រេច និងដំណើរការវិធានការទប់ទល់ដែលគ្រប់គ្រាន់ បណ្ដាភ្ញៀវទេសចរ និងអ្នករស់នៅក្នុងបរិវេណជុំវិញភ្នំ ក៏នឹងបានរំភើបរីករាយជាមួយនឹងភាពស្រស់ស្អាតរបស់ភ្នំភ្លើងបានយ៉ាងមានសុវត្ថិភាព។
ក្ដីព្រួយកង្វល់រឿងភ្នំភ្លើងហ្វូជិ ថានឹងផ្ទុះឡើងម្ដងទៀតនោះ អាចទប់ទល់បានដោយការត្រៀមរួចជាស្រេចនូវផែនការគ្រោះវិបត្តិ និងការធ្វើឱ្យមនុស្សម្នាទាំងឡាយយល់ដឹងពីគ្រោះអន្តរាយរបស់ភ្នំភ្លើង តែមិនភ័យឆ្លេឆ្លាភ្ញាក់ផ្អើល…ប្រជាជនគួរត្រៀមខ្លួនឱ្យរួចជាស្រេចចំពោះការផ្ទុះដែលអាចនឹងកើតឡើង តែក៏នឹងនៅតែបានស្ងើចសរសើរចំពោះទស្សនីយភាព និងប្រើប្រាស់ប្រយោជន៍ពីភ្នំភ្លើងបានដែរ៕
ប្រភព៖ សារព័ត៌មានបរទេស
February 4, 2020
ចុំយក្ស!?!? អ្នកចាត់ការក្រុមជម្រើសជាតិកម្ពុជា ទាមទារសុទ្ធតែអង្គរក្ស និងរថយន្តការពារគ្រាប់កាំភ្លើង
កាលពីពេលថ្មីៗនេះ អ្នកចាត់ការទូទៅនៃក្រុមជម្រើសជាតិកម្ពុជា បានប្រកាសអំពីការវិលចូលមកកាន់ពិភពបាល់ទាត់ក្នុងនាមជាកីឡាករសាជាថ្មី ក្រោយពីបានបរាជ័យជាច្រើនលើកក្នុងការបន្តអាជីពបាល់ទាត់របស់ខ្លួន ដោយនឹងផ្ទេរទៅកាន់ក្លិបប្រេស៊ីល Botafogo។
ដោយហេតុតែក្លិបនេះស្ថិតនៅក្នុងតំបន់ដែលគ្មានសន្តិសុខល្អ ហេតុផលនេះបានធ្វើឱ្យកីឡាកររូបនេះ ទាមទារនូវរថយន្តការពារគ្រាប់កាំភ្លើង រួមទាំងអង្គរក្សពីក្លិបថ្មីរបស់ខ្លួន Botafogo F.R ដើម្បីការពាររូបគេនៅក្នុងទីក្រុង Rio de Janeiro។
គួរបញ្ជាក់ផងដែរថា កីឡាករវ័យ 33ឆ្នាំរូបនេះត្រូវបានគេដឹងថា នឹងជាអ្នកជំនួសកន្លែងដ៏ល្អសម្រាប់កីឡាករ Joao Paulo ដែលជិតទៅចូលរួមជាមួយក្រុម Seattle Sounders នៃលីកកំពូលអាមេរិក ( Major League Soccer )៕

February 4, 2020
រកឃើញហើយកីឡាករដែលសង្ហាជាងគេ ក្នុងក្រុមជម្រើសជាតិកូរ៉េខាងត្បូង
កីឡាករ Jeong Seung Won នៃក្រុមជម្រើសជាតិកូរ៉េខាងត្បូង សព្វថ្ងៃលេងឱ្យក្រុម Daegu FC កំពស់ 1.85ម និងមានវ័យ 23ឆ្នាំ ត្រូវបានវេបសាយមួយនៃប្រទេសកូរ៉េខាងត្បូងចាត់លំដាប់ថ្នាក់ថា ជាកីឡាករដែលមានរូបរាងសង្ហាជាងគេបំផុតក្នុងក្រុមជម្រើសជាតិកូរ៉េខាងត្បូងនាពេលបច្ចុប្បន្ន។
កីឡាករបាល់ទាត់ជម្រើសជាតិកូរ៉េខាងត្បូងម្នាក់នេះ បានក្លាយជាផ្ទាំងស៊ីបរបស់អ្នកកាសែតនៅទូទាំងទ្វីបអាស៊ី បន្ទាប់ពីរូបគេបានជួយឱ្យក្រុមជម្រើសជាតិកូរ៉េខាងត្បូងរបស់គេឈ្នះពានរង្វាន់ យុវជនអាយុក្រោម 23ឆ្នាំ គួបផ្សំជាមួយនឹងរូបរាង និងមុខមាត់ដ៏សង្ហារបស់រូបគេ។
គួរបញ្ជាក់ផងដែរថា កាលពីយប់ថ្ងៃទី27 ខែមករាមុននេះ ក្រុមជម្រើសជាតិបាល់ទាត់កូរ៉េ បានប៉ះគ្នាជាមួយក្រុមមកពីប្រទេសអារ៉ាប់រួម ហើយលទ្ធផលបញ្ចប់នោះ គឺក្រុមកូរ៉េបានលើកពានសម្រាប់បណ្ដាប្រទេសអាស៊ីទាំងមូល៕

February 4, 2020