ការប្រកួតមិត្តភាពអន្តរជាតិ រវាងក្រុមព្រះខ័នរាជស្វាយរៀង នឹងក្រុមជើងឯកលីកកំពូលសិង្ហបុរី DPMM FC បានបញ្ចប់ទៅហើយកាលពីម្សិលមិញនេះ ដោយក្រុមព្រះខ័នរាជស្វាយរៀង បានយកឈ្នះ ដោយលទ្ធផល 5 ទល់នឹង1 នៅពហុកីឡដ្ឋានជាតិអូឡាំពិក។
គួរបញ្ជាក់ផងដែរថា ក្រុម DPMM FC ជាក្រុមរបស់ប្រទេសប្រ៊ុយណេ ក៏ប៉ុន្តែមកប្រកួតប្រជែងនៅក្នុងលីកកំពូលរបស់សិង្ហបូរី ដោយទទួលបានចំណាត់ថ្នាក់លេខ1 ក្នុងរដូវកាល2020កន្លងទៅនេះ៕
លោក ឈី កុលបុត្រា អនុប្រធានលេខាធិការរដ្ឋាន នៃគណៈកម្មការរៀបចំប្រកួតបាល់ទាត់ជាតិកម្ពុជា ( CNCC ) បានបញ្ជាក់ក្នុងសន្និសីទកាសែតបើករដូវកាលឆ្នាំ2020 ទាំងពានរង្វាន់សម្តេចនាយករដ្ឋមន្ត្រី ហ៊ុន សែន និងលីកកំពូលកម្ពុជាថា ប្រាក់រង្វាន់នៃពានលីកកំពូលកម្ពុជា រដូវកាល2020 នេះ នឹងត្រូវដំឡើងជាលើកដំបូងចាប់តាំងពីឆ្នាំនេះតទៅ។
ចំពោះចំនួនដែលត្រូវដំឡើងប៉ុនណា គឺមិនទាន់ត្រូវបានបញ្ជាក់ឱ្យបានច្បាស់ការនៅឡើយទេ ដោយសារតែមិនទាន់បញ្ចប់ការស្នើសុំនេះ ដោយលោកដឹងត្រឹមតែថា នឹងមានការដំឡើងតែប៉ុណ្នោះ។
តាមប្រភពស្និទ្ធនឹងសហព័ន្ធកីឡាបាល់ទាត់កម្ពុជា បានបង្ហើបឱ្យដឹងថាមានការស្នើសុំដំឡើងពី 60លានរៀល (កាលពីឆ្នាំចាស់) ទៅកាន់ 80លាន ក្នុងរដូវកាលឆ្នាំ2020 នេះ តែចំនួននេះទើបតែស្នើឡើងទៅ នៅមិនទាន់ទទួលបានការយល់ព្រមនៅឡើយទេ៕
កាលពីពេលថ្មីៗនេះ មានការប្រកាសចេញពីសហព័ន្ធកីឡាបាល់ទាត់ចិន ថា ការប្រកួតលីកកំពូលក្នុងប្រទេសចិន នឹងត្រូវពន្យារពេល ព្រោះតែការរាតត្បាតនៃមេរោគវីរុសថ្មីកូរ៉ូណា។
មកទល់នឹងពេលនេះ លីកកំពូលវៀតណាម ក៏ចាប់ផ្តើមប្រកាសអំពីការលើកពេលប្រកួតក្នុងលីករបស់ខ្លួនដូចគ្នាដែរ។
គួរបញ្ជាក់ផងដែរថា ក្រោយពីផ្ទុះវីរុសនេះឡើង នៅជុំវិញពិភពលោក ជាពិសេសប្រទេសវៀតណាម បានប្រកាសពន្យារពេលប្រកួតពានរង្វាន់កម្រិតជាតិរបស់ពួកគេគ្រប់កម្រិតទាំងអស់ ចន្លោះពី 2 ទៅ 3សប្តាហ៍៕
ភាពខុសគ្នារវាងអ្នកមាន និងអ្នកក្រគឺវាមានភាពជាក់ស្ដែង ជាមួយនឹងទម្លាប់មួយចំនួន។ ខាងក្រោមនេះគឺជាទម្លាប់ដ៏សំខាន់បំផុតដែលអ្នកអាចយកទៅអនុវត្តឱ្យឈានទៅដល់គោលដៅសេរីភាពផ្នែកហិរញ្ញវត្ថុរបស់អ្នក។
១) អ្នកមាន គេរស់នៅក្នុងរង្វង់ប្រាក់ចំណូលរបស់គេ
អ្នកមានតែងតែជៀសវាងការចំណាយដែលមិនចាំបាច់ និងឥតបានការ។ ពួកគេតែងតែសន្សំទុក ២០ភាពរយនៃប្រាក់ចំណូលរបស់ពួកគេ ហើយនឹងចំណាយ ៨០ភាពរយទៅលើការរស់នៅរបស់ពួកគេជាប្រចាំថ្ងៃ។
២) កុំលេងល្បែងស៊ីសង
ចូរនិយាយអំពីមនុស្ស ៧៧ភាពរយ ដែលជួបការលំបាក់ខាងផ្នែកហិរញ្ញវត្ថុ ដោយសារតែការលេងឆ្នោតផ្សងសំណាង ឬលេងល្បែងស៊ីសង។ មនុស្សដែលមានទ្រព្យសម្បត្តិពិតប្រាកដគេមិនដែលមានដោយសារតែការលេងល្បែងស៊ីសងនោះទេ ហើយអ្នកមានពិតប្រាកដមិនដែលពឹងទៅលើសំណាងនោះដែរ។ ពួកគេបង្កើតសំណាងដោយខ្លួនឯងផ្ទាល់ ហើយប្រសិនបើអ្នកចង់មានទ្រព្យសម្បត្តិច្រើន ចូរខិតខំប្រឹងប្រែងធ្វើវា កុំដេកចាំតែសំណាង។
៣) ចូរអានរាល់ថ្ងៃ
មហាសេដ្ឋីនៅលើពិភពលោកស្ទើរតែទាំងស្រុង គឺចូលចិត្តអានសៀវភៅ ព្រោះវាបានបង្កើតនូវចំណេះដឹង ហើយចំណេះដឹងទាំងនោះ គឺបានជួយគាត់ឱ្យដឹកនាំក្រុមហ៊ុនបានល្អ និងរីកចម្រើន រហូតមានមហាសេដ្ឋីមួយចំនួនបានឆ្លើយទៅកាន់អ្នកសារព័ត៌មានវិញថា «ខ្ញុំជោគជ័យ និងមានបានដោយសារតែសៀវភៅមួយគំនរនេះឯង»។ ក្នុងចំណោមមនុស្សដែលមានទ្រព្យសម្បត្តិច្រើន ៨៨ភាពរយ បានអានសៀវភៅ ៣០នាទី ឬក៏ច្រើនជាងនេះជារៀងរាល់ថ្ងៃ ដើម្បីបង្កើនចំណេះដឹងទៅលើអាជីវកម្ម ឬក៏អាជីបមុខរបរបស់ពួកគេ៕
ដោយគេមើលឃើញការលើកឡើងនៅលើបណ្ដាញសង្គមហ្វេសប៊ុកដែលបានឱ្យដឹងថា បទចម្រៀងរបស់ រាជិនីសំឡេងមាស រស់ សេរីសុទ្ធា « ចម្រៀងលាគ្នា » ត្រូវបានតារាចម្រៀងជំនាន់ក្រោយៗយកមកច្រៀងឡើងវិញយ៉ាងពីរោះរណ្ដំចិត្ត។ ក៏ប៉ុន្ដែក្នុងនោះក៏មានទង្វើធ្វេសប្រហែសមួយចំនួនដែលធ្វើឱ្យអ្នកច្រៀងប្រាសចាកឃ្លាដើមត្រង់ឃ្លា « គេងពីព្រលឹម ក្រោកពីព្រលប់ » ទាំងដែលស្ដាប់ទៅមិនទំនងន័យ។ ក្នុងនោះក៏មានការលើកឡើងរបស់អ្នកលេងបណ្ដាញសង្គម ដែលមានស្នើឱ្យការផលិតបទចម្រៀងមានការត្រួតពិនិត្យឱ្យបានល្អិតល្អន់ឡើងវិញ។ សំនួររបស់អ្នកលេងបណ្ដាញសង្គមក៏ចង់ដឹងដែលថា តើបទនេះត្រូវគេងពេលណាឱ្យប្រាកដទៅ??
យ៉ាងណាមិញ មានការលើកឡើងក្នុងហ្វេសប៊ុកថា «មកពីមិនសិក្សាប្រវត្តិបទចម្រៀងគេជាមុនសិន បានចេះតែច្រៀងមកខុសពេញទឹកពេញដី ពេលខ្លះ ខុសទាំងការដឹកនាំសម្ដែងកាយវិការ ឱ្យសមជាមួយនឹងសាច់រឿងដើមរបស់គេទៀត។ ជាក់ស្ដែងដូចជាបទចម្រៀងនេះអញ្ចឹង តួស្រីផ្ដាំតួប្រុសឱ្យ “គេងពីព្រលប់ ក្រោកពីព្រលឹម” មិនមែន “គេងពីព្រលឹម ក្រោកពីព្រលប់”នោះទេ។ សូមបញ្ជាក់ផងដែរថា បទ”ចម្រៀងលាគ្នា” របស់លោកយាយរស់សេរីសុទ្ធា គឺជាបទចំរៀងដែលប្រសូតចេញពីផលិតកម្មចិនមួយ ដើម្បីដាក់បញ្ចូលទៅក្នុងភាពយន្តចិន ដែលមានចំណងជើងថា “អូនឈឺចិត្តណាស់” ។ នៅក្នុងរឿងនេះ មានរយៈពេលបញ្ចាំងជាច្រើនម៉ោង និងសាច់រឿងដ៏កំសត់ អមជាមួយនឹងបទចម្រៀងជាច្រើនបទ។ ចម្រៀងលាគ្នា ត្រូវបានបកប្រែ និង រៀបចំទំនុកបទចម្រៀង ជាខេមរភាសា ដោយ លោកតា ម៉ក់ ឈួន។ បទដើម មានចំណងជើងថា “谁来爱我” ច្រៀងដោយអ្នកស្រី 邓丽君 ។»
ហើយក៏មានការអះអាងពីគណនីហ្វេសប៊ុកមួយទៀតដែរថា «កាលពីប៉ុន្មានថ្ងៃមុន ខ្ញុំបានបង្ហោះបទចម្រៀងដែលច្រៀងឡេីងវិញដោយអ្នកនាង ឪក សុគន្ធកញ្ញាគឺ ចម្រៀងលាគ្នា ដែលបទនេះដកស្រង់ពីខ្សែភាពយន្តភាគចិន “អូនឈឺចិត្តណាស់” រហូតដល់សារព័ត៌មានមួយចំនួនយកទៅផ្សាយ បង្កើតជាការងឿងឆ្ងល់ ប្រទាញប្រទង់គ្នា។ បេីយោងតាមបទម្ចាស់ដេីមគឺ “គេងពីព្រលប់ ក្រោកពីព្រលឹម” មិនមែនដូចអ្វីដែលអ្នកនាង កញ្ញា ច្រៀងនោះទេ ហេីយឃ្លានេះគឺវាសុីនិងបរិបទសង្គមសម្រាប់មនុស្សទូទៅផងដែរ។ វាមិនដែលមានគេងពីព្រលឹម ក្រោកពីព្រលប់ ទោះបីមនុស្សមួយចំនួនយកយប់ធ្វេីថ្ងៃ យកថ្ងៃធ្វេីយប់ក៏គេមិនដែលនិយាយដែរ»៕
មនុស្សជាង 8លាននាក់បានស្លាប់ដោយសារការប្រើប្រាស់ផលិតផលថ្នាំជក់ ជារៀងឆ្នាំ ដែលភាគច្រើននៃអ្នកស្លាប់ ស្ថិតនៅក្នុងប្រទេសដែលមានចំណូលមធ្យម និងទាប។ ចំណែកឯអ្នកស្រូបផ្សែងបារីពីគេ ក៏រងផលប៉ះពាល់ធ្ងន់ធ្ងរ បង្កឱ្យមានជំងឺផ្លូវដង្ហើម ជំងឺបេះដូង មហារីក និងជំងឺផ្សេងៗបណ្តាលឱ្យស្លាប់ប្រមាណ ១.២លាននាក់ក្នុង 1ឆ្នាំទូទាំងសកលលោក។ ដោយឡែកប្រជាជនកម្ពុជា ចំនួនប្រមាណ 15,000នាក់បានស្លាប់ជារៀងរាល់ឆ្នាំ ដោយសារការជក់បារី និងការស្រូបផ្សែងបារីពីគេ។ នេះបើយោងតាមរបាយការណ៍របស់អង្គការសុខភាពពិភពលោកឆ្នាំ2019 នៅក្នុងវគ្គបណ្តុះបណ្តាលស្តីពីផលប៉ះពាល់នៃការប្រើប្រាស់ផលិតផលថ្នាំជក់កាលពីថ្ងៃទី4 ខែកុម្ភៈ ឆ្នាំ2020 នេះ នៅសណ្ឋាគារលាភវិរៈសារ ក្រុងកំពង់ចាម ខេត្តកំពង់ចាម។
ប្រធានអង្គការចលនាដើម្បីសុខភាពកម្ពុជា លោកវេជ្ជបណ្ឌិត មុំ គង់ បានមានប្រសាសន៍ថា បច្ចុប្បន្ននេះថ្វីបើមិនមានការផ្សាយពាណិជ្ជកម្មផលិតផលបារី តាមរយៈទូរទស្សន៍ តាមរយៈផ្ទាំងប៉ាណូធំៗ ប៉ុន្តែការបិទផ្សាយពាណិជ្ជកម្មតូចៗតាមកន្លែងលក់កាហ្វេ តាមហាងលក់គ្រឿងទេសផ្សេងៗ ក៏ដូចជាការបញ្ជូនស្ត្រីស្អាតដើរផ្សាយពាណិជ្ជកម្មបារី នៅតែបន្តមាននៅឡើយ ខណៈដែលយើងកំពុងមានវិធានការតាមរយៈដំឡើងពន្ធផលិតផលថ្នាំជក់ឱ្យដល់កម្រិតមួយ ដែលធ្វើឱ្យចំណេញដល់សេដ្ឋកិច្ច និងកាត់បន្ថយអ្នកស្លាប់ដោយសារការប្រើប្រាស់ថ្នាំជក់។
លោកវេជ្ជបណ្ឌិតបានមានប្រសាសន៍បន្ដទៀតថា ទន្ទឹមនេះយើងបានជំរុញការអប់រំប្រជាពលរដ្ឋឱ្យយល់ដឹងពីគ្រោះថ្នាក់នៃការជក់បារី តាមរយៈការដាក់សារព្រមានសុខភាពជារូបភាពធំៗនៅលើកញ្ចប់បារី និងជំរុញការហាមឃាត់ការជក់បារីនៅកន្លែងធ្វើការ និងកន្លែងសាធារណៈ ដូចជាតាមភោជនីយដ្ឋាន តាមសណ្ឋាគារ អាហារដ្ឋាន និងតាមតៀមកាហ្វេជាដើម ដែលតម្រូវឱ្យម្ចាស់ភោជនីយដ្ឋាន សណ្ឋាគារត្រូវបិទសញ្ញាហាមជក់ ហើយត្រូវប្រាប់ដល់ភ្ញៀវដែលជក់បារីឱ្យចេញទៅជក់នៅខាងក្រៅកន្លែងគ្មានមនុស្ស ដើម្បីការពារអ្នកមិនចេះជក់បារី ជាពិសេសស្ត្រី និងកុមារ។ តែទោះបីមានអនុក្រឹត្យតម្រូវឱ្យបោះពុម្ពសារព្រមានសុខភាពជារូបភាពលើផលិតផលថ្នាំជក់តាំងពីឆ្នាំ2016 មកក្ដី ក៏បច្ចុប្បន្នយើងនៅតែសង្កេតឃើញថា ផលិតផលថ្នាំជក់មួយចំនួនពុំទាន់មានបោះពុម្ពផ្សាយសារព្រមានពីការប៉ះពាល់សុខភាព ដូចការកម្រិតរបស់រាជរដ្ឋាភិបាលនៅឡើយ៕
កូនកំលោះ និងកូនក្រមុំ រួមជាមួយឪពុកម្ដាយ ត្រូវបង្ខាំងខ្លួនឯងក្នុងផ្ទះ ខណៈដែលពិធីអាពាហ៍ពិពាហ៍របស់ពួកគេប្រារព្ធឡើងនៅឯសណ្ឋាគារតាមការគ្រោងទុក។
លោក Yu អាយុ 37ឆ្នាំ ធ្វើការផ្នែកសំណង់ បានត្រឡប់មកស្រុកកំណើតម្ដាយក្នុងខេត្ត Hunan ប្រទេសចិន មុនរដូវចូលឆ្នាំចិន ហើយបានត្រឡប់មកដល់សិង្ហបុរីវិញនៅថ្ងៃទី30 មករា។ ពិធីជប់លៀងអាពាហ៍ពិពាហ៍របស់គាត់ និងភរិយាបានត្រូវធ្វើឡើងនៅក្នុងសណ្ឋាគារមួយកាលពីថ្ងៃទី2 កុម្ភៈ ប៉ុន្តែ ដោយសារតែគេទើបត្រឡប់មកពីតំបន់មានអាសន្នរោគកូរ៉ូណា គម្រោងរបស់ពួកគេក៏ត្រូវបានផ្លាស់ប្ដូរ។
កូនកំលោះរូបនេះបាននិយាយថា ៖ “ភ្ញៀវដែលពួកខ្ញុំបានអញ្ជើញ មានការព្រួយបារម្ភនៅពេលដឹងថា ពួកខ្ញុំទើបត្រឡប់មកពីប្រទេសចិន ទើបយើងខ្ញុំសម្រេចចិត្តនៅដាច់ដោយឡែកពីមនុស្សម្នាក្នុងរយៈពេល 14ថ្ងៃ”។
ពិធីជប់លៀងអាពាហ៍ពិពាហ៍ នៅតែប្រារព្ធឡើងតាមការគ្រោងទុក ភ្ញៀវដែលបានអញ្ជើញ បានមកចូលរួមគ្រប់គ្នា។ កូនកំលោះ និងកូនក្រមុំត្រូវបង្ខាំងខ្លួនក្នុងផ្ទះ ហើយទទួលភ្ញៀវតាមរយៈអេក្រង់ទូរទស្សន៍ដោយការផ្សាយផ្ទាល់តាមអ៊ីនធើណិត។ កូនកំលោះនិយាយថា៖ “សូមអរគុណលោក លោកស្រី និងមិត្តទាំងអស់ដែលបានអញ្ជើញចូលរួមក្នុងពិធីមង្គលការរបស់យើងខ្ញុំ។ សូមមេត្តាអធ្យាស្រ័យផងដែលយើងខ្ញុំមិនអាចនិយាយពាក្យអរគុណដោយផ្ទាល់បាន”។ ភ្លាមនោះ សម្លេងទះដៃក៏លាន់កងរំពងឡើង។
ជាងនេះទៅទៀត ពួកគេថែមទាំងឆ្លៀតធ្វើពិធីមង្គលការបែបប្រពៃណីចិន និងអញ្ជើញភ្ញៀវកិត្តិយសឡើង លើ ឆាកដើម្បីជល់កែវជាមួយពួកគេទៀតផង។ ដោយសារតែឪពុកម្ដាយរស់នៅជាមួយកូន ដូច្នេះពួកគេក៏ត្រូវនៅដាច់ដោយឡែកពីមនុស្សម្នា។ ក្នុងពិធីជប់លៀងនេះ មានតែប្អូនស្រីរបស់កូនកំលោះប៉ុណ្ណោះ ជាអ្នកទទួលភ្ញៀវដោយផ្ទាល់។
ទីភ្នាក់ងារសារព័ត៌មានចិន Chinapress បានឱ្យដឹងថា បន្ទាប់ពីពិធីរៀបការនៅសិង្ហបុរីនេះ កូនកំលោះនិងកូនក្រមុំនឹងបន្តរស់នៅដាច់ដោយឡែកពីគេឯង ហើយពួកគេនឹងចូលធ្វើការវិញចាប់ពីថ្ងៃទី15កុម្ភៈខាងមុខ បើសិនជាពួកគេមិនមានផ្ទុកមេរោគវីរុសកូរ៉ូណា៕
ប្រភព៖ សារព័ត៌មានបរទេស
អ្នកជំនាញអចលនទ្រព្យនៅកម្ពុជា បានចាត់ទុកថា ការអភិរក្សអគារចាស់ៗ ដូចជា អគាររដ្ឋបាល លំនៅឋាន បុរី និងផ្សារ ពិសេសសំណង់ដែលបន្សល់ទុកពីសម័យអាណានិគមបារាំង ដែលស្ថិតនៅកណ្ដាលទីក្រុង គឺជាការកំណត់អត្តសញ្ញាណមួយដែលមិនគួរមើលរំលង។ ទន្ទឹមគ្នានេះ អ្នកជំនាញបានមើលឃើញថា ការថែរក្សាទុកនូវសំណង់អគារចាស់ៗបុរាណទាំងនោះ ក៏ជាចំណែកសំខាន់មួយក្នុងការជួយអភិវឌ្ឍសេដ្ឋកិច្ចជាតិផងដែរ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងថា សំណង់អគារចាស់ៗ ពិសេសសំណង់អគារដែលបន្សល់ទុកពីសម័យបារាំង គឺសុទ្ធតែអាចចាត់ទុកជាសំណង់ប្រវត្តិសាស្ត្រទាំងអស់។
ហេតុនេះ លោក ជំរុញឱ្យអាជ្ញាធររាជធានីភ្នំពេញ បន្ដយកចិត្តទុកដាក់អភិរក្សអគារចាស់ៗទាំងនោះ ដើម្បីរក្សាទុកជាកេរមរតកវប្បធម៌ និងទាក់ទាញភ្ញៀវទេសចរជាតិ និងអន្ដរជាតិ។ ទន្ទឹមនឹងអគារថ្មីៗ និងខ្ពស់ៗជាច្រើនដែលកំពុងរីកលូតលាស់នៅក្នុងរាជធានីភ្នំពេញ សំណង់អគារចាស់ៗមួយចំនួន ក៏នៅតែមានទីផ្សារដែរ។ជាក់ស្តែងមានអគារ និងផ្ទះចាស់ៗមួយចំនួន ត្រូវបានកែប្រែទៅជាហាងលក់ទំនិញ ជាទីស្នាក់ការក្រុមហ៊ុន និងជាកន្លែងស្នាក់នៅ ជាដើម។
កត្តានេះ គឺជាការរួមចំណែកសំខាន់ ជួយលើកស្ទួយវប្បធម៌ និងសេដ្ឋកិច្ចជាតិថែមទៀត។ នេះបើតាមការបញ្ជាក់បន្ថែមពីលោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។
ពាក់ព័ន្ធនឹងសំណង់អគារចាស់ៗនេះដែរ លោក ឡុង គីមសួរ ប្រធានក្រុមហ៊ុន Century 21 Advance Property និងជាអ្នកជំនាញផ្នែកអចលនទ្រព្យ បានថ្លែងថា ការអភិរក្សសំណង់អគារចាស់ៗ ជាផ្នែកមួយដែលបង្ហាញពីវប្បធម៌ ក៏ដូចជាស្នាដៃដ៏ពិសេសរបស់ស្ថាបត្យករជំនាន់ដើម ដល់ស្ថាបត្យករជំនាន់ក្រោយៗ ក៏ដូចជាក្មេងៗជំនាន់ក្រោយឱ្យបានស្គាល់ពីស្ថាបត្យកម្មពីសម័យកាលនីមួយៗផងដែរ។
ហេតុនេះ ការអភិរក្សនូវសំណង់អគារចាស់ទាំងនោះ មិនត្រឹមតែអាចបង្ហាញពីវប្បធម៌របស់ប្រទេសកម្ពុជានោះទេ តែវាថែមទាំងអាចទាក់ទាញចំណាប់អារម្មណ៍ពីសំណាក់ភ្ញៀវទេសចរបានមួយកម្រិតទៀតផង។
បើតាម អភិបាលរាជធានីភ្នំពេញ ឯកឧត្ដម ឃួង ស្រេង ដែលបានលើកឡើងកាលពីពេលថ្មីៗនេះថា អាជ្ញាធររាជធានីភ្នំពេញមានផែនការច្បាស់លាស់ ក្នុងការអភិរក្សអគារបេតិកភណ្ឌវប្បធម៌សល់ពីសម័យបារាំង ដើម្បីរក្សាបាននូវអត្តសញ្ញាណរបស់ទីក្រុងភ្នំពេញ ដោយហាមវាយកម្ទេចអគារទាំងនោះដោយគ្មានច្បាប់អនុញ្ញាត និងតម្រូវឱ្យសាងសង់ដោយគោរពតាមរចនាប័ទ្មដើម នៅពេលចង់សាងសង់ឡើងថ្មី។
ប៉ុន្តែឯកឧត្ដមអភិបាលរាជធានីភ្នំពេញបានបន្តថា ក្នុងករណីអគារទាំងឡាយណាដែលមានសភាពចាស់ទ្រុឌទ្រោម ត្រូវមានការប្រុងប្រយ័ត្នខ្ពស់ពីសុខសុវត្ថិភាព និងអាយុជីវិតមនុស្ស ព្រោះ ភាពចាស់ទ្រុឌទ្រោមរបស់អគារមួយចំនួន អាចនឹងបាក់ស្រុត បង្កហានិភ័យដល់ពលរដ្ឋ ដែលកំពុងរស់នៅក្នុងអគារទាំងនោះបាន។
លោកបន្តថា ក្នុងករណីនេះ រដ្ឋបាលរាជធានីភ្នំពេញ គឺបានតម្រូវឱ្យរដ្ឋបាលខណ្ឌទាំង14 និងអាជ្ញាធរពាក់ព័ន្ធទាំងអស់ ត្រូវចេញលិខិតជូនដំណឹងមួយជូនដល់ប្រជាពលរដ្ឋដែលរស់នៅ ឬស្នាក់នៅក្នុងសំណង់អគារទ្រុឌទ្រោមក្នុងរាជធានីភ្នំពេញទាំងនោះ។
ជាមួយគ្នានេះដែរ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានលើកឡើង ក្នុងពិធីសម្ពោធដាក់ឱ្យប្រើប្រាស់សៀវភៅ “Architectural Guide Phnom Penh” កាលពីពេលថ្មីៗនេះបានលើកឡើងថា ក្នុងនាមក្រសួងរៀបចំដែនដី គឺមានឱកាសបានរៀបចំតាក់តែងនូវច្បាប់ស្តីពីសំណង់ ហើយលោកអះអាងថា ច្បាប់នេះ គឺបានផ្តល់ឱកាសឱ្យមានការជួសជុលលើសំណង់អគារចាស់ៗ ពិសេសសំណង់ស្ថាបត្យកម្មបេតិកភណ្ឌនានា ប៉ុន្តែត្រូវរក្សាទម្រង់ដើម។
បើនិយាយពីសំណង់អគារសម័យអាណានិគមបារាំងសែស អ្នកជំនាញផ្នែកអរិយធម៌ខ្មែរ បានលើកឡើងថា យើងចាំបាច់ត្រូវតែអភិរក្ស ពីព្រោះស្ថាបត្យកម្មសំណង់អគារទាំងនេះ គឺជាផ្នែកមួយនៃមរតកប្រវត្ដិសាស្ដ្រ។ ដោយឡែកសំណង់អគារដែលបន្សល់ពីសម័យអាណានិគមនិយមបារាំងសែស មាននៅតាមបណ្ដាខេត្តមួយចំនួនដូចជា ខេត្ដបាត់ដំបង ក្រចេះ និងកំពត ត្រូវបានរាជរដ្ឋាភិបាលកំពុងធ្វើការរៀបចំដាក់ចូលក្នុងបញ្ជីបេតិកភណ្ឌពិភពលោករបស់អង្គការយូណេស្កូ។
សំណង់អគារសម័យបារាំងមួយចំនួនដែលនៅសល់ហូតដល់សព្វថ្ងៃ និងត្រូវបានចាត់ទុកថា ជារតនភណ្ឌនៃរាជធានី រួមមាន អគារក្រុមប្រឹក្សាអភិវឌ្ឍន៍កម្ពុជា (CDC) អគារតុលាការកំពូល វិមានឯករាជ្យ ក្រសួងប្រៃសណីយ៍ និងទូរគមនាគមន៍ បណ្ណាល័យជាតិ សារមន្ទីរជាតិ រតនាគារជាតិ សាលារាជធានីភ្នំពេញ ព្រះបរមរាជវាំង រមណីយដ្ឋានវត្តភ្នំ អគារអង្គការយូណេស្កូ ផ្សារធំថ្មី គេហដ្ឋានឯកជន និងអគារផ្សេងៗមួយចំនួនទៀត។
ដោយឡែក យោងតាមទីផ្សារអចលនទ្រព្យ បានឱ្យដឹងថា តំបន់ដែលមានការអភិវឌ្ឍហើយ និងមានតម្លៃដីខ្ពស់ស្ថិតក្នុងខណ្ឌចំនួន4 គឺខណ្ឌដូនពេញ ខណ្ឌ7មករា ខណ្ឌចំការមន និងខណ្ឌទួលគោក ដែលជាតំបន់ពាណិជ្ជកម្ម។ ក្នុងនោះដែរ អ្នកជំនាញផ្នែកទីផ្សារអចលនវត្ថុ ក៏បានឱ្យដឹងដែរថា បច្ចុប្បន្នសំណង់អគារចាស់ៗ មានតម្រូវការលើការជួលខ្លាំងជាងគេ គឺនៅក្នុងខណ្ឌចំនួន2 គឺខណ្ឌដូនពេញ និងខណ្ឌស្ទឹងមានជ័យ។ ខណ្ឌដូនពេញ ភាគច្រើនជាតម្រូវការជួលអគារប្រភេទនេះសម្រាប់ប្រកបអាជីវកម្ម ខណៈខណ្ឌស្ទឹងមានជ័យ ភាគច្រើនមានតម្រូវការជួលសម្រាប់ស្នាក់នៅរបស់ប្រជាជននៅក្នុងតំបន់។
ភាគច្រើន តម្រូវការជួលមានច្រើនតែនៅកណ្តាលក្រុង ដោយឡែកសម្រាប់ជាយក្រុងវិញ មិនសូវមានតម្រូវការជួលច្រើនប៉ុន្មានទេ ដោយសារតែទីតាំងនៅឆ្ងាយ បើទោះជាសំណង់អគារទើបតែសាងសង់ថ្មីក៏ដោយ។ ដោយឡែកចំពោះតម្លៃលើការជួលសំណង់អគារចាស់វិញ គឺមានចន្លោះចាប់ពី 1,700ដុល្លារទៅជាង 3,000ដុល្លារឯណោះ។
យ៉ាងណាក៏ដោយ អ្នកជំនាញផ្នែកអចលនទ្រព្យ នៅចង់ឃើញគ្រប់ស្ថាប័នពាក់ព័ន្ធយកចិត្តទុកដាក់អភិរក្សសំណង់អគារចាស់ៗ ព្រោះអគារទាំងនោះ គឺពិតបានផ្តល់ផលចំណេញទាំងវប្បធម៌ និងសេដ្ខកិច្ចដល់កម្ពុជា៕
កាលពីព្រឹកថ្ងៃទី៥ កុម្ភៈ ឆ្នាំ២០២០ ទូរទស្សន៍ PNN បានប្រកាសក្រុងពាលីចេញថតរឿងថ្មី យ៉ាងអាធឹកអធម ក្រោមការដឹកនាំរបស់អ្នកស្រី ពាន់ភួង បុប្ផា។ អ្វីដែលគេកត់សម្គាល់គឺភាពយន្តមួយរឿងនេះ ចម្រុះសុទ្ធតែតារាល្បីៗ ដែលគ្រាន់តែឃើញសមាសភាពតួ ក៏ចាប់អារម្មណ៍តែម្ដង។
រឿងថ្មីចំណងជើង «រសជាតិអ្នកមាន» នេះក៏មានការចូលរួមសម្ដែងដោយតារាសម្តែងល្បីៗថ្មីចាស់ដូចជា លោក ជា សំណាង, កញ្ញា កែវ យ៉ាវិញ កូនស្រីអ្នកនាង កែវ កល្យាណ, កញ្ញា ទឹម រដ្ឋា, កញ្ញា ខាត់ យ៉ាឡាង, កញ្ញា មុន្នី វិជ្ឋរា, លោក បញ្ញា សិទ្ឋិ, លោក អ៊ែត វីន, លោក ហង្ស សម្បើមស័ក្តិ, លោក ជន, កញ្ញា នីតា វរវង្ស, និងតារាផ្សេងៗទៀត។
យ៉ាងណាមិញ កញ្ញា មុន្នី វិជ្ឋរា បានឱ្យដឹងថា រឿងថ្មីនេះជាប្រភេទរឿងអប់រំបែបគ្រួសារដែលនិយាយពីសង្គមពិត និងការអប់រំពាក់ព័ន្ឋគម្លាតរវាងអ្នកមាន និងក្រ ក្នុងការរស់នៅ។ រឿងនេះចង់បង្ហាញនិងអប់រំដល់ បុរសទាំងឡាយ ពេលមានប្រពន្ឋនៅរួមសុខទុក្ខ មិនត្រូវបោះបង់គ្នានោះទេ ក្នុងពេលជីវិតនៅពេលខាងមុខប្រសើរ។ សេចក្តីសុខ មនុស្សមិនស្ថិតតែលើទ្រព្យសម្បត្តិនោះទេ ។ មានទ្រព្យ តែបាត់បង់គ្រួសារបាត់បង់ប្តីប្រពន្ឋ តើមានប្រយោជន៏អ្វី។ សេចក្តីសុខរបស់ មនុស្សពិតប្រាកដគឺ កើតចេញពីគ្រួសារ កូនប្រពន្ឋនាំគ្នាសាង តែបើប្រេះហើយ សួរថាមានប្រយោជន៏អ្វី យកលុយមកដូរសេចក្តីសុខពិតអត់បាននោះទេ។
យ៉ាងណាមិញ អ្នកស្រីពាន់ ភួងបុប្ឋា ជាអ្នកដឹកនាំរឿងក៏បានប្រមូលផ្តុំតារាថ្មីចាស់ មកសំពះពរជ័យ សុំសេចក្តីសុខ មុនចេញដំណើរការថតនេះ គឺរឿងដែលឆ្លុះបញ្ចាំងពីជីវិតអ្នកមាន។ ដោយអ្នកស្រីប្រាប់ថា រឿងនេះគឺជាការសន្សំទុនតាក់តែង និងខំសរសេរ ក្នុងពេលផ្អាកពីការថតភាពយន្តរយៈពេល២ឆ្នាំ ពេលទៅនៅអាមេរិក។ អ្នកស្រីសង្ឃឹមថាភាពយន្តនេះ នឹងបណ្តុះគំនិតឱ្យគ្រួសារនីមួយៗ ខំថែសេចក្តីសុខឱ្យល្អ នៅក្នុងសង្គម៕
មន្ត្រីក្រសួងទេសចរណ៍ និងស្ថាប័នទេសចរណ៍ឯកជន បានបង្ហាញការបារម្ភយ៉ាងខ្លាំងចំពោះការផ្ទុះឡើងនៃមរោគវីរុសកូរ៉ូណាប្រភេទថ្មីថា នឹងប៉ះពាល់ដល់ឧស្សាហកម្មទេសចរណ៍របស់កម្ពុជាដែលទាក់ទាញភាគច្រើនជនជាតិចិន បន្ទាប់ពីកម្ពុជាបានរកឃើញករណីឆ្លងវីរុសកូរ៉ូណាប្រភេទថ្មីលើកដំបូងនៅខេត្តព្រះសីហនុ ក៏ប៉ុន្តែរដ្ឋមន្ត្រីក្រសួងទេសចរណ៍ បានប្រកាសនៅក្នុងកិច្ចប្រជុំមួយប្រកបដោយភាពជឿជាក់ថា កម្ពុជានៅតែជាគោលដៅទេសចរណ៍ដ៏កក់ក្ដៅសម្រាប់ភ្ញៀវទេសចរគ្រប់គ្នា ដែលនៅតែមានការការពារសុវត្ថិភាព សន្តិសុខសណ្ដាប់ធ្នាប់ និងនៅតែត្រៀមទទួលស្វាគមន៍វត្តមានភ្ញៀវអន្តរជាតិជានិច្ច។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា៖ “ថ្វីដ្បិតកម្ពុជាមានការឆ្លងមេរោគវីរុសកូរ៉ូណាថ្មីនេះចំនួន 1ករណី កន្លងទៅក្ដី ប៉ុន្តែក្រសួងសុខាភិបាល និងក្រសួង-ស្ថាប័នពាក់ព័ន្ធបាននិងកំពុងរួមគ្នាទប់ស្កាត់យ៉ាងសស្រោកសស្រាំ ហើយក៏គ្មានការឆ្លងរីករាលដាល បន្តទៀតនោះដែរ”។
ឯកឧត្តម ថោង ខុនបានធ្វើការអះអាងយ៉ាងដូច្នេះ នៅក្នុងកិច្ចប្រជុំដែលធ្វើឡើងដើម្បីរកដំណោះស្រាយទប់លំនឹងឧស្សាហកម្មទេសចរណ៍ក្នុងប្រទេសស្របពេលដែលពិភពលោកកំពុងប្រឈមការរីករាលដាលជំងឺរលាកផ្លូវដង្ហើមប្រភេទថ្មីដែលបង្កដោយមេរោគវីរុសកូរ៉ូណា (2019-nCoV) រួមជាមួយនឹងវិស័យឯកជន សមាគមទីភ្នាក់ងារទេសចរណ៍កម្ពុជា (CATA) សមាគមសណ្ឋាគារកម្ពុជា សមាគមម្ហូបអាហារ និងចុងភៅកម្ពុជា និងដៃគូពាក់ព័ន្ធនានា នៅទីស្ដីការក្រសួងទេសចរណ៍ កាលពីចុងខែមករា ឆ្នាំ2020។
ឯកឧត្តម បានបន្តថា៖“ក្នុងនោះ ក្រសួងទេសចរណ៍បានមើលឃើញចលនាទេសចរណ៍ក្នុងប្រទេសមានភាពសកម្មយ៉ាងខ្លាំង ពោលគឺមិនមានអ្វីគួរឱ្យព្រួយបារម្ភដូចនៅប្រទេសមួយចំនួនឡើយ ពិសេសគឺធានាបានការគ្រប់គ្រងបញ្ហាជំងឺរលាកសួតប្រភេទថ្មីនេះ (Coronavirus) បានយ៉ាងជឿជាក់បំផុត។ ចំណែកឯភ្ញៀវទេសចរអន្តរជាតិដែលកំពុងស្ថិតក្នុងប្រទេសកម្ពុជា ក៏កំពុងរីករាយជាមួយដំណើរកម្សាន្តរបស់ខ្លួន នៅតាមគោលដៅទេសចរណ៍នានាជុំវិញប្រទេសកម្ពុជាដែរ”។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឱ្យដឹងថា ព័ត៌មាននៃការរកឃើញវត្តមាននៃមេរោគវីរុសកូរ៉ូណាប្រភេទថ្មីនៅខេត្តព្រះសីហនុលើជនជាតិចិន កំពុងធ្វើឱ្យប៉ះពាល់យ៉ាងខ្លាំងដល់វិស័យទេសចរណ៍កម្ពុជា ពិសេសកន្លែងដែលមានវត្តមានជនជាតិចិនច្រើន។
លោកជំទាវបានមានប្រសាសន៍ថា៖“ខ្ញុំពិតជាមានការព្រួយបារម្ភ ព្រោះវិស័យទេសចរណ៍មិនត្រឹមតែបង្កើតបានការងារជាច្រើនដល់ប្រជាជនខ្មែរយើងប៉ុណ្ណោះទេ តែវាក៏ជាចំណែកដ៏សំខាន់មួយក្នុងការជំរុញកំណើនសេដ្ឋកិច្ចកម្ពុជា។ យើងទទួលបានព័ត៌មានពីការលុបចោលដំណើរទេសចរណ៍ពីប្រទេសចិន និងប្រទេសផ្សេងៗទៀតជាច្រើន។ ករណីនេះក៏កំពុងធ្វើឱ្យការកក់ដំណើរទេសចរណ៍ និងសេវាកម្មទាក់ទងទេសចរណ៍នៅកម្ពុជាធ្លាក់ចុះ ហើយការធ្វើដំណើរទេសចរណ៍ក្នុងស្រុក ក៏អាចធ្លាក់ចុះផងដែរ”។
លោកតុប សុភ័ក អ្នកនាំពាក្យក្រសួងទេសចរណ៍បានមានប្រសាសន៍ថា៖“ខ្ញុំគិតថា ការរកឃើញវត្តមានជំងឺផ្តាសាយ បានក្លាយជាចំណែកមួយដែលអាចធ្វើឱ្យចំនួនភ្ញៀវទេសចរអន្តរជាតិមកទស្សនាកម្ពុជាថយចុះ តែទន្ទឹមនឹងនេះក្រសួងទេសចរណ៍ ក៏បានដាក់ចេញនូវយន្តការបន្ទាន់មួយចំនួនដើម្បីរក្សានិរន្តរភាព សម្រាប់អ្នកប្រកបរបរក្នុងវិស័យទេសចរណ៍ ក៏ដូចជាផ្ទះសំណាក់ និងសណ្ឋាគារជាដើមដែរ”។
លោក ថ្លែងថា៖ “យន្តការដំបូងដែលយើងត្រូវធ្វើនៅពេលនេះគឺជំរុញចរន្តទេសចរណ៍ក្នុងស្រុក ដើម្បីធ្វើយ៉ាងណាឱ្យមូលដ្ឋានអាជីវកម្មក្នុងវិស័យទេសចរណ៍ អាចដំណើរទៅមុខជាបន្តទៀតបាន។ ដូច្នេះទើបបច្ចុប្បន្នកម្ពុជាបានដាក់ម៉ាស៊ីនត្រួតពិនិត្យសុខភាពជាច្រើន នៅតាមព្រលានយន្តហោះ និងច្រកព្រំដែនអន្តរជាតិសំខាន់ៗ ដើម្បីទប់ស្កាត់ការរីករាលដាលជំងឺរលាកផ្លូវដង្ហើមនេះ”។
ក្រសួងទេសចរណ៍បានបង្ហាញទិន្នន័យថា ក្នុងរយៈពេល 11ខែនៃឆ្នាំ2019 កម្ពុជាទទួលបានភ្ញៀវទេសចរបរទេសសរុប 5.89លាននាក់ កើនឡើង 8.3% បើធៀបនឹងរយៈពេលដូចគ្នាកាលពីឆ្នាំ2018។ ភ្ញៀវទេសចរចិនបាននាំមុខគេ ដោយមានចំនួន 2.18លាននាក់ កើនឡើង 19.5% បើធៀបនឹងរយៈពេលដូចគ្នាកាលពីឆ្នាំ2018។ ខណៈភ្ញៀវជនជាតិវៀតណាមស្ថិតនៅលេខ2 មានចំនួន 809,170នាក់ ក្នុងកំណើន 15.2%។ បើតាមទិន្នន័យរបស់ក្រសួងទេសចរណ៍ដដែល បានឱ្យដឹងថា បច្ចុប្បន្នចលនាទេសចរណ៍ក្នុងប្រទេសកម្ពុជា មានភ្ញៀវទេសចរចាប់ពី 10លាននាក់ ដល់ 12លាននាក់ ក្នុងនោះមានទាំងភ្ញៀវទេសចរជាតិ និងអន្តរជាតិ។
ជាមួយគ្នានេះដែរអ្នកទេសចរ គឺជាធាតុសំខាន់នៃប្រាក់ចំណូល។ ការវិនិយោគក្នុងវិស័យទេសចរណ៍នៅកម្ពុជាមានតម្លៃ 4.3ពាន់លានដុល្លារក្នុងរយៈពេល 8ខែនៃឆ្នាំ2019 ដោយប្រទេសចិន គឺជាអ្នកផ្តល់ហិរញ្ញវត្ថុដ៏សំខាន់។ នេះបើយោងតាមតួលេខចុងក្រោយ ដែលចេញផ្សាយដោយក្រសួងទេសចរណ៍។
លោក យិន ណាត ប្រធានមន្ទីរវិនិយោគទេសចរណ៍នៃក្រសួងទេសចរណ៍ បានធ្វើការប្រកាសកាលពីថ្ងៃទី27 ខែមករាកន្លងទៅថា មានវិនិយោគិនជាច្រើនដែលវិនិយោគលើវិស័យទេសចរណ៍ ក្នុងនោះរួមទាំងកម្ពុជាផងដែរ។ បន្ទប់ស្នាក់នៅថ្មី សរុបចំនួន 1,000បន្ទប់ នឹងត្រូវបង្កើតឡើងដើម្បីផ្គត់ផ្គង់ដល់អ្នកទេសចរ។ ជាមួយនឹងគម្រោងថ្មីចំនួន14 ដែលត្រូវបានអនុម័តនៅចន្លោះខែមករា និងខែកញ្ញាកាលពីឆ្នាំកន្លងទៅ ទឹកប្រាក់នៃគម្រោងថ្មីទាំងនោះ នឹងត្រូវប្រើសម្រាប់ការសាងសង់អគារជាច្រើន រួមមានសណ្ឋាគារលំដាប់ផ្កាយ3 និងផ្កាយ5 ផ្សារទំនើប និងកន្លែងកម្សាន្ត។
នៅក្នុងតួលេខផ្សេងទៀត ដែលបានចេញផ្សាយដោយក្រសួងដដែល បច្ចុប្បន្នមានអាជីវកម្មពាក់ព័ន្ធនឹងទេសចរណ៍ចិនចំនួន262 នៅក្នុងប្រទេសកម្ពុជា។ទាំងនេះរួមមានភោជនីយដ្ឋាន សណ្ឋាគារ និងភ្នាក់ងារទេសចរណ៍។ កាលពីឆ្នាំមុន ការមកដល់នៃភ្ញៀវទេសចរក្នុងប្រទេសមានចំនួន 6.7លាននាក់ ដែលតំណាងឱ្យការកើនឡើង 8% ពី 1ឆ្នាំទៅ 1ឆ្នាំ។
ទោះជាមានការបារម្ភយ៉ាងណាក្តី អ្នកនាំពាក្យក្រសួងសុខាភិបាលកម្ពុជាបានអះអាងថា កម្ពុជានៅតែជាប្រទេសមានសុវត្ថិភាព និងសូមឱ្យភ្ញៀវទេសចរមកកម្សាន្តសប្បាយឱ្យបានច្រើនបន្តទៀត។
លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាលបានអះអាងនៅឯខេត្តសៀមរាបកាលពីថ្ងៃទី30 ខែមករា ឆ្នាំ2020ថា៖“ប្រទេសកម្ពុជាមិនមែនជាប្រទេសកំពុងរងការរាតត្បាតនៃជំងឺឆ្លងដែលបណ្ដាលមកពីមេរោគវីរុសកូរ៉ូណានោះទេ កម្ពុជានៅតែជាប្រទេសមានសុវត្ថិភាព ដូច្នេះសូមឱ្យភ្ញៀវទេសចរ បន្តមកកម្សាន្តនៅកម្ពុជាឱ្យបានកាន់តែច្រើនបន្ថែមទៀត ហើយសូមកុំមានការភ័យខ្លាច ជាពិសេស គឺនៅខេត្តសៀមរាបដែលជាខេត្តមានសក្តានុពលផ្នែកទេសចរណ៍”។
លោកវេជ្ជបណ្ឌិត លី សូវ៉ាន់ បានបញ្ជាក់ថា គិតត្រឹមម៉ោងនេះ ខេត្តសៀមរាបគ្មានអ្នកឆ្លងមេរោគវីរុសកូរ៉ូណាទេ ហើយអ្នកទេសចរជាតិ និងអន្តរជាតិ នៅតែអាចដើរលេងកម្សាន្តនៅតាមរមណីយដ្ឋាននានាដោយសេរីតាមធម្មតា ហើយស្ថានភាពជនជាតិចិនដែលមានជំងឺផ្លូវ ដង្ហើមថ្មីបង្កឡើងដោយវីរុសកូរ៉ូណា ដែលបានសម្រាកព្យាបាល នៅមន្ទីរពេទ្យបង្អែកក្នុងខេត្តព្រះសីហនុនោះ គឺមានសុខភាពល្អជាធម្មតា ដោយពុំមានបញ្ហាអ្វីគួរឱ្យកត់សម្គាល់ទេ។
យោងតាមគណៈកម្មការសុខាភិបាលក្នុងខេត្តហ៊ូពេយ ដែលមានវូហានជារដ្ឋធានីបានរាយការណ៍ឱ្យដឹងថា គិតពីត្រឹមថ្ងៃសុក្រទី31 ខែមករា ឆ្នាំ2020 អ្នកស្លាប់ដោយសារមេរោគវីរុសកូរ៉ូណា កើនដល់ 213នាក់ និងអ្នកឆ្លងមេរោគកើនដល់ 9,922នាក់ និងព្យាបាលសះស្បើយ181នាក់។ ប្រទេសជាង 20 បានសម្រេច និងកំពុងត្រៀមជម្លៀសពលរដ្ឋរបស់ខ្លួនចេញពីទីក្រុងវូហាន ប្រទេសចិន ជាទីដែល នូវែលកូរ៉ូណាវីរុសកំពុងរាតត្បាតខ្លាំង។
តាមប្រភពសារព័ត៌មាន New York Times បានចុះផ្សាយថា អាមេរិក ជប៉ុន អាល្លឺម៉ង់ បារាំង អុីតាលី កូរ៉េ ខាងត្បូង សិង្ហបុរី អេស្ប៉ាញ កាណាដា រុស្ស៊ី ម៉ូណាកូ តួរគី នូវែលហ្សេឡង់ និងហូឡង់ ជាដើម បានចាប់ផ្តើមជម្លៀសពលរដ្ឋរបស់ខ្លួនមុនគេ ហើយកំពុងរង់ចាំទទួលអ្នកនៅសេសសល់បន្ថែមទៀត រីឯប្រទេសអូស្ត្រាលី អង់គ្លេស ឥណ្ឌា មីយ៉ាន់ម៉ា ម៉ាឡេស៊ី ឥណ្ឌូនេស៊ី និងថៃ កំពុងចរចាជាមួយភាគីចិន និងត្រៀមខ្លួនធ្វើកិច្ចការនេះ៕