Category: សង្គម និងសេដ្ឋកិច្ច

តើអ្នកដឹងទេ សំឡេងកូរពោះកើតឡើងដោយសារអ្វី?
មនុស្សជាច្រើនប្រហែលជាឆ្លើយថា ដោយសារឃ្លាន និងលាន់ចេញមកពីក្រពះយ៉ាងពិតប្រាកដ តែការពិតវិញ មិនត្រឹមត្រូវទាំងអស់ទេ ព្រោះពេលមិនឃ្លានក៏កើតអាការកូរពោះបានដែរ ដូច្នេះតើមានយន្តការអ្វីនៅក្នុងរាងកាយទៅ ទើបធ្វើឱ្យកើតសំឡេងកូរពោះនេះឡើង ហើយសំឡេងកូរពោះនេះវាលាន់ចេញមកពីផ្នែកណាមួយរបស់រាងកាយ?។
មូលហេតុដែលធ្វើឱ្យកើតសំឡេងកូរពោះដោយសារតែ ៖
ក្រពះនឹងបំពេញតួនាទីរំលាយអាហារ និងបញ្ជូនចូលឆ្ពោះទៅរកពោះវៀនតូច ហើយសាច់ដុំរបស់ក្រពះ និងពោះវៀនតូច បើដឹងថា គ្មានអាហារវានឹងបង្រួញខ្លួន ធ្វើឱ្យកើតអាការញ័រ និងមានសំឡេងលាន់ឮឡើង។ ការរួញសាច់ដុំដែលបណ្តាលមកពីភាពឃ្លាន អាចនឹងយូរដល់ទៅ 10 – 20នាទីក្នុងអំឡុងពេលដំបូង និងបន្ទាប់ពីនោះមក វានឹងបង្រួញខ្លួនជាចង្វាក់ៗ រៀងរាល់ 1 – 2ម៉ោង រហូតទាល់តែមានអាហារចូលក្នុងរាងកាយ។
មូលហេតុដែលពោះច្រើនតែកូរនៅពេលឃ្លាននោះ ព្រោះតែ ៖
ខួរក្បាលដែលជាផ្នែកគ្រប់គ្រងអារម្មណ៍ឃ្លានរបស់យើង នឹងចាំចាត់លំដាប់ការធ្វើការងាររបស់ក្រពះ ដោយពិចារណាតាមរយៈសារជាតិអាហារនៅក្នុងឈាម ដូច្នេះពេលដែលយើងឃ្លាន សារជាតិអាហារនៅក្នុងឈាមមានតិច ប្រព័ន្ធរំលាយអាហារនឹងធ្វើការកាន់តែលឿនឡើង តែពេលឆ្អែត នៅក្នុងឈាមមានសារជាតិអាហារគ្រប់គ្រាន់ ខួរក្បាលក៏នឹងបញ្ជាឱ្យប្រព័ន្ធរំលាយអាហារធ្វើការយឺតវិញ ទើបមិនសូវកើតមានឮសំឡេង។
កើតឡើងតែពេលឃ្លានប៉ុណ្ណោះ ឬយ៉ាងណា?
ទោះជាប្រក្រតី យើងបានឮសំឡេងកូរពោះពេលដែលឃ្លាន និងពោះទទេមែន តែការពិត វាអាចកើតឡើងបានគ្រប់ពេលវេលា មិនថាតែពេលក្រពះទំនេរ ឬអត់ក៏ដោយ ដូចជាពេលញ៉ាំបាយហើយថ្មីៗ សាច់ដុំក្រពះ និងពោះវៀនតូចច្របាច់ខ្លួន ដើម្បីច្របល់អាហារ និងធ្វើការរំលាយ ក៏កើតមានសំឡេងឡើងបានដូចគ្នា។
ការញ៉ាំទឹកភេសជ្ជៈដែលមានហ្គាស់នៅក្នុងក្រពះក្នុងបរិមាណច្រើន មានអាស៊ីតនៅក្នុងក្រពះច្រើន ឬកើតភាពតានតឹងធុញថប់ខ្លាំង រហូតហុចផលដល់ការរំលាយអាហារ ឬកើតរោគរលាកពោះវៀន ក៏មានផលប៉ះពាល់ធ្វើឱ្យកើតមានសំឡេងកូរពោះ ក្រៅពីពេលឃ្លានបានដែរ៕

February 7, 2020
អ្នកចាំទីលេខ1 របស់ថៃ ផ្ទេរទៅលេងនៅលីកកំពូលជប៉ុន
កាលពីពេលថ្មីៗនេះ ក្លិបបាល់ទាត់លីកកំពូលរបស់ប្រទេសជប៉ុន Consadole Sapporo បានប្រកាសអំពីការផ្ទេរយកកីឡាករអ្នកចាំទីជម្រើសជាតិថៃម្នាក់ទៅកាន់ក្លិបរបស់ខ្លួន សម្រាប់រដូវកាល2020 ខាងមុខនេះ។
អ្នកចាំទីលេខ1 ជម្រើសជាតិថៃ Kawin Thamsatchanan សម្រេចទៅចូលរួមជាមួយក្លិប Consadole Sapporo ក្នុងក្របខ័ណ្ឌ J.League ក្នុងលក្ខខណ្ឌខ្ចីជើង 2ឆ្នាំពីក្លិបនៅលីកទី2 របស់បែលហ្ស៊ិក OH Leuven។
គួរបញ្ជាក់ផងដែរថា អ្នកចាំទី Kawin Thamsatchanan គឺជាអ្នកចាំទីដៃទី1 របស់ថៃអស់រយៈពេលជាង 15ឆ្នាំមកហើយ ដោយបានចូលលេងឱ្យក្រុមជម្រើសជាតិថៃ ចាប់តាំងពីឆ្នាំ2006 មកម្ល៉េះ៕

February 7, 2020
តោះតុបតែងមុខបែប Valentine’s Day ម្តង!
Valentin’s Day បែបនេះត្រូវតែតុបតែងមុនឱ្យត្រូវនឹងកាលៈទេសៈ បែប Cute Cute បែបយុវវ័យសម័យថ្មី មើលទៅបែបធម្មជាតិ តែបង្កប់ដោយមន្តស្នេហ៍នៃពណ៌ស៊ីជំពូ និងពណ៌ក្រហមគួរឱ្យខ្នាញ់ គួរឱ្យស្រឡាញ់។ ដូច្នេះ សម្រាប់រដូវបុណ្យនៃក្តីស្រឡាញ់នេះ សូមនារីៗទាំងអស់តុបតែងមុខបែបនារីដែលគួរឱ្យស្រឡាញ់ នារីដែលពេញដោយមន្តស្នេហ៍មិនចេះរីងស្ងួត ដោយប្រើពណ៌ត្រកបភ្នែកពណ៌ផ្កាកុលាប ពណ៌ថ្ពាល់ពណ៌ស៊ីជំពូ និងពណ៌បបូរមាត់ពណ៌ផ្កាឈូកដិត ឬពណ៌ក្រហមដិត ដើម្បីជួយបង្កើនភាពទាក់ទាញរបស់អ្នកទ្វេដងថែមទៀត៕
February 7, 2020
ផលិតផលកសិកម្មរបស់កម្ពុជា 5មុខ នឹងត្រូវបានចុះបញ្ជីសញ្ញាពាណិជ្ជកម្ម
ក្រសួងពាណិជ្ជកម្ម កំពុងរៀបចំស្នើសុំចុះបញ្ជីផលិតផលខ្មែរចំនួន 5មុខបន្ថែមទៀត ដើម្បីការពារម៉ាកសញ្ញាពាណិជកម្ម ។ នេះជាការបញ្ជាក់របស់មន្ត្រីជាន់ខ្ពស់នៃក្រសួងពាណិជ្ជកម្ម នៅក្នុងសន្និសីទសារព័ត៌មានស្តីពី«បច្ចុប្បន្នភាព និងវឌ្ឍនភាពរបស់ក្រសួងពាណិជ្ជកម្ម» នៅទីស្តីការគណៈរដ្ឋមន្ត្រី កាលពីព្រឹកថ្ងៃទី6 កុម្ភៈម្សិលមិញ។
អ្នកនាំពាក្យក្រសួងពាណិជ្ជកម្មបានបញ្ជាក់ថា ក្រសួងកំពុងសិក្សា និងប្រមូលព័ត៌មានបឋមពាក់ព័ន្ធនឹងការចុះបញ្ជីម៉ាកយីហោកសិផលទាំង 5មុខនោះ មាន ក្រូចពោធិ៍សាត់ ផ្កាអំបិលកំពត សូត្រមាស អង្ករសរីរាង្គ និងអំបុកខ្មែរ។ លោក ស៊ាង ថៃ អ្នកនាំពាក្យនៃក្រសួងពាណិជ្ជកម្មការបានថ្លងថា ចុះបញ្ជីការពារម៉ាកផលិតផលរបស់ខ្មែរ គឺដើម្បីបង្កើនទំនុកចិត្តដល់អ្នកបរិភោគ ជាពិសេសទប់ស្កាត់ការបន្លំផលិតផលរបស់ខ្មែរយើង នៅក្នុងទីផ្សារសេរីនេះ។អ្នកនាំពាក្យរូបនេះ បានបន្ថែមថា៖ «ធម្មតាយើងតាំងគោលដៅចុះបញ្ជីការពារម៉ាកសញ្ញា កសិផលចំនួន 5មុខនេះ បើគេទទួលស្គាល់ត្រឹមតែ3 ឬ4 ក៏វាជាជោគជ័យរបស់យើងដែរ ព្រោះវាអាស្រ័យលើទំហំការងារជាក់ស្ដែង»។
កាលពីពេលកន្លងមក ក្រសួងពាណិជ្ជកម្មបានដាក់ឱ្យប្រើប្រាស់ជាផ្លូវការនូវម៉ាកសញ្ញា «ម្លិះអង្គរ» ដែលជាម៉ាកវិញ្ញាតកម្មទី1 និងម៉ាកសញ្ញា «ក្រូចថ្លុងកោះទ្រង់» ដែលជាម៉ាកសម្គាល់ភូមិសាស្ត្រទំនិញទី3 របស់កម្ពុជា បន្ថែមពីលើម៉ាកសញ្ញា «ម្រេចកំពត» និង«ស្ករត្នោតកំពង់ស្ពឺ» ដែលកំពុងទទួលការពេញនិយមលើទីផ្សារក្រៅប្រទេស។ ក្រសួងពាណិជ្ជកម្មថែមទាំងបានតាក់តែងគោលនយោបាយ និងចងក្រងលិខិតបទដ្ឋានគតិយុត្ត ដើម្បីការពារម៉ាកសញ្ញាពាណិជ្ជកម្មនេះទៀតផង។
អ្នកនាំពាក្យខាងលើ បានបន្ថែមឱ្យដឹងទៀតថា កាលពីឆ្នាំ2019 កន្លងមក ក្រសួងពាណិជ្ជកម្មបានទទួលពាក្យស្នើសុំចុះបញ្ជីការពារម៉ាកសញ្ញាពាណិជ្ជកម្ម បានចំនួន 5, 278ច្បាប់ ដោយកើនឡើង 13ភាគរយ បើធៀបនឹងឆ្នាំ2018៕
February 7, 2020
Xiaomi ក្រៅពីលក់ស្មាតហ្វូនហើយ នៅមានជំនួញលក់រថយន្ត ដែលមានគេកុម្ម៉ង់មុន 140គ្រឿងហើយ
ថ្មីៗនេះ Xiaomi បានប្រកាសបង្ហាញរថយន្តប្រភេទ SUV គឺ Bestune T77 Xiaomi Edition ដែលមានបំពាក់ឱ្យប្រើប្រាស់នូវមុខងារឆ្លាតវៃ XiaoAI ជាពិសេសតែម្តង។ ក្រុមហ៊ុនបច្ចេកវិទ្យារបស់ប្រទេសចិន Xiaomi មួយនេះ ក្រៅពីប្រឡូកក្នុងវិស័យស្មាតហ្វូន កុំព្យូទ័រ និងគ្រឿងបរិក្ខារអេឡិចត្រូនិកប្រើប្រាស់នៅក្នុងគេហដ្ឋានហើយ ក្រុមហ៊ុននេះក៏បានចូលរួមក្នុងវិស័យផលិតយានយន្តផងដែរ។
ចំពោះបច្ចេកវិទ្យា XiaoAI វិញ នឹងជួយឱ្យអ្នកបើកបរអាចដាក់គោលដៅធ្វើដំណើរលើដងវិថី ឆ្លើយតបនឹងសំណួរផ្សេងៗទាក់ទិននឹងចរាចរណ៍ ក៏ដូចជាភ្ជាប់ទៅនឹងការបញ្ជាបិទបើកឧបករណ៍គ្រឿងបរិក្ខារផ្សេងៗនៅឯគេហដ្ឋានបានតាមរយៈមុខងារ Smart Home System ផងដែរ។
ឧទាហរណ៍៖ ប្រសិនអ្នកភ្លេចបិទម៉ាស៊ីនត្រជាក់នៅឯផ្ទះ ហើយប្រើប្រាស់ម៉ាស៊ីនត្រជាក់របស់ Xiaomi នោះអ្នកអាចបញ្ជាបិទពីចម្ងាយក្នុងពេលធ្វើដំណើរក្នុងរថយន្តបាន។ កម្លាំងម៉ាស៊ីនរថយន្ត Bestune T77 Xiaomi Edition មានបំពាក់នូវម៉ាស៊ីន Turbocharged ចំណុះ 1.2លីត្រ អាចផលិតកម្លាំងបាន 143សេះ មានប្រអប់លេខ 2ប្រភេទជា MT និង AMT។
បច្ចុប្បន្នរថយន្តនេះកំពុងស្ថិតក្នុងគម្រោងអភិវឌ្ឍន៍ និងផលិតបន្ថែម។ ចំពោះតម្លៃវិញ មិនទាន់មានការបញ្ជាក់ច្បាស់នៅឡើយ តែចំពោះការកុម្ម៉ង់ទិញ ឥឡូវមានដល់ទៅ 140គ្រឿងទុកជាមុនរួចជាស្រេចហើយ៕
February 7, 2020
Galaxy S20 លក់នៅកូរ៉េ RAM 12GB មានតម្លៃដល់ទៅ 1,000ដុល្លារ
សម្រាប់ទីផ្សារនៅប្រទេសកូរ៉េខាងត្បូង Samsung នឹងប្រកាសចេញ Galaxy S20 នៅសប្ដាហ៍ក្រោយនេះឯង។ ថ្មីៗនេះអ្នកគាំទ្រផលិតផលរបស់ Samsung បានដឹងពីតម្លៃ និងពេលវេលាចេញលក់របស់ស្មាតហ្វូនថ្មីនេះសឹងតែអស់ទៅហើយ។
Samsung នឹងបើកទទួលការកុម្ម៉ង់ទិញនៅថ្ងៃទី14 ខែកុម្ភៈខាងមុខ ជាមួយនឹងការចេញលក់នៅលើទីផ្សារនៅថ្ងៃទី6 ខែមីនា។ ទោះជាមិនទាន់បង្ហាញពីលក្ខណសម្បត្តិច្បាស់លាស់ក៏ដោយ ប៉ុន្តែគេអាចដឹងពីសមត្ថភាពនៃកាមេរ៉ាទាំង 4គ្រាប់របស់ស្មាតហ្វូននេះខ្លះៗហើយ គឺជាប្រភេទលេនស៍ល្អ។
Galaxy S20 មានតម្លៃចាប់ពី 1.25លានវ៉ុន(ប្រមាណ 1,052ដុល្លារ)។ ប្រភេទ Galaxy S20+ មានតម្លៃ 1.37លានវ៉ុន(ប្រមាណ 1,137ដុល្លារ)។
ចំណែក Galaxy S20 ម៉ូដែល Ultra វិញ គឺមានតម្លៃ 1.6លានវ៉ុន(ប្រមាណ 1,350ដុល្លារ) ប៉ុន្តែមិនមែនមានមេម៉ូរីត្រឹមតែ 128GB ដូច 2ប្រភេទខាងលើនោះទេ គឺមានទំហំដល់ទៅ 256GB ឯណោះ។ តម្លៃទាំងនេះ គឺសម្រាប់ប្រភេទដែលមាន RAM ទំហំ 12GB ដែលវាអាចជាជម្រើស RAM តែ 1គត់នៃត្រកូល S20 នេះ៕

February 7, 2020
ទាំងពូកែ..ទាំងស្រស់ស្អាត ជីមមី ចែករំលែកសារជីវិតទៅកាន់អ្នកគាំទ្របង្កប់អត្ថន័យល្អៗ
កន្លងមកតារាស្រីស្អាត ជីមមី ធ្លាប់បង្ហើបប្រាប់មហាជនថា ខ្លួនឆ្លងកាត់បទពិសោធន៍ជីវិតច្រើន រហូតមានពេលខ្លះបាក់ទឹកចិត្តដល់ថ្នាក់ចង់សម្លាប់ខ្លួន។ ជីម មី ថា អំឡុងពេលអាយុ១៨ឆ្នាំគឺជាវ័យមួយដែលនារីៗ មានរូបឆោមស្រស់ស្អាត និងពោពេញដោយមន្តស្នេហ៍ តែនាង ខុសគេព្រោះវ័យនេះផ្ទៃមុខទាំងមូលឡើងសុទ្ធតែមុនរកកន្លែងណាឃើញស្អាតពុំឃើញ ហើយកម្ពស់វិញមិនសមជានារីភេទ។ឯការរៀនសូត្រនាង ទៀតសោតរៀនមិនពូកែពិសេសគឺមុខវិជ្ជាគណិតវិទ្យាតែនេះតែម្ដងរហូតដល់ថ្នាក់ធ្វើឲ្យស្រីស្អាតរូបនេះបាក់ទឹកចិត្តគិតខ្លីចង់សម្លាប់ខ្លួន។
អស់មួយរយៈក្រោយពីសួរនាងខ្លួនឯងថា “តើខ្ញុំរស់នៅដើម្បីអ្នកណា?” ពេលនោះនាង ក៏បានឆ្លើយតបទៅខ្លួនឯងវិញថា រស់នៅដើម្បីខ្លួនឯងដូច្នេះត្រូវធ្វើអ្វីដែលខ្លួនពេញចិត្តកុំបណ្ដោយឱ្យពេលវេលាឱ្យកន្លងផុតទៅទាំងឥតប្រយោជន៍។ ការចែករំលែកនូវបទពីសោធន៍ក្នុងជីវិតរបស់ខ្លួននាង ព្រមទាំងផ្ដល់ជាគំនិតល្អៗទៅដល់អ្នកគាំទ្រនៅលើបណ្ដាញសង្គម ក៏កាន់តែធ្វើឱ្យតារាស្រី ជីមមី ទទួលបានការគាំទ្រស្រឡាញ់ពេញចិត្តពេញថ្លើម ជាពិសេសទាំងពូកែ ទាំងស្រស់ស្អាត ថែមទាំងមានអ្វីដែលល្អៗចែកជូនទៅអ្នកដទៃទៀត។ ថ្មីៗនេះ នាងបានចែករំលែកសារមួយដ៏មានន័យទៅកាន់អ្នកគាំទ្រថា ៖
កំណត់ស្តង់ដាស្នេហាដែលមានគុណភាពគឺជាការស្វែងរកបុរសម្នាក់ដែល:
– ខ្លាំងគ្រប់គ្រាន់នឹងដឹកនាំ
– មានសមត្ថភាពគ្រប់គ្រាន់នឹងផ្តល់ឱ្យ
– ក្លាហានគ្រប់គ្រាន់នឹងការពារ
– ចាស់ទុំគ្រប់គ្រាន់នឹងដឹកដៃយើងឆ្លងកាត់ឧបសគ្គ។
ស្រលាញ់ខ្លួនឯងឱ្យគ្រប់គ្រាន់នឹង:
– កាត់មនុស្សអត់បានការចេញពីជីវិត
– ដើរចេញពីកន្លែងដែលគេមិនឱ្យតំលៃ
– កំនត់ស្តង់ដាស្នេហាដែលមានគុណភាព
– ជ្រើសរើសទទួលតែអាកប្បកិរិយាល្អនិងការគោរពពីអ្នកដទៃ
– អត់ឱនឱ្យខ្លួនឯងនិងដើរទៅមុខបន្ត
– ជ្រើសរើសធ្វើតែការងារណាដែលខ្លួនស្រលាញ់
ត្រូវចាំថាលើកលោកនេះគ្មាននណារម្នាក់ត្រូវបានតែងតាំងអោយមានសិទ្ធិមើលងាយយើងនោះទេ។
នាងជាមនុស្សម្នាក់ដែលនាំយកពន្លឺចូលមកជីវិតអ្នកពេលអ្នកកំពុងជួបភាពងងឹតសូន្យសុង។
នាងមិនចូលចិត្តសាងបញ្ហា តែនាងចូលចិត្តដោះស្រាយ។
នាងចូលមកក្នុងជីវិតអ្នកហើយផ្តល់នូវភាពកក់ក្តៅពេលដែលអ្នកកំពុងរងារ។
នាងជំរុញអ្នកឱ្យក្លាយជាមនុសល្អជាងអ្នកពីម្សិលមិញ។
នាងប្រាប់អ្នកពីភាពអស្ចារ្យនិងតំលៃក្នុងខ្លួនអ្នកដែលអ្នកដទៃមើលមិនឃើញ។
ពេលដែលជីវិតអ្នកមានឧបសគ្គហើយមនុស្សគ្រប់គ្នាដើរចេញអស់អ្នកនឹងឃើញមានតែនាងម្នាក់ដែលមិនទៅណាហើយញញឹមមកកាន់អ្នករួចនិយាយថា: តិចទៀតគ្រប់យ៉ាងនឹងប្រសើរ បងពូកែយ៉ាងនេះគ្មានអ្វីបំបាក់បងបានទេ។
ជួបហើយនៅនារីប្រភេទនោះ? បើជួបហើយថែនាងអោយបានល្អណា។
ព្រោះនាងមានចំនុចអាក្រក់មួយ បើអ្នកបណ្តោយឱ្យនាងដើរចេញនាងនឹងមិនត្រលប់មកវិញទេ។

February 7, 2020
អាថ៌កំបាំងលើផ្ទៃមេឃ ក្នុងសម័យសង្រ្គាមលោកលើកទី 2
ក្នុងសម័យសង្រ្គាមលោកលើកទី 2 គឺជាអំឡុងពេលដែលយន្តហោះចម្បាំងមានតួនាទីសំខាន់ខ្លាំងណាស់ក្នុងការធ្វើសង្រ្គាម តែតើមិត្តអ្នកអានជឿដែរឬទេថា ក្នុងអំឡុងពេលទាំងនោះ បានកើតមានហេតុការណ៍ចម្លែកៗឡើងយ៉ាងអាថ៌កំបាំងនៅលើផ្ទៃមេឃជាច្រើនដង ដែលរហូតមកដល់សព្វថ្ងៃនេះហើយក៏នៅតែមិនអាចដឹងបានថា ម៉េចបានជាហេតុការណ៍ដ៍អាថ៌កំបាំងទាំងនោះកើតឡើងបាន?
ថ្ងៃនេះ ឡារ៉ែន សូមនាំរឿងរ៉ាវដ៏គួរឱ្យងឿងឆ្ងល់ និងចម្លែកចិត្តមួយចំនួនពាក់ព័ន្ធនឹងអាថ៌កំបាំងនៃយន្តហោះខ្មោចទាំងនោះមកជម្រាបជូនទុកគ្រាន់ធ្វើជាចំណេះដឹងដូចខាងក្រោម ៖
1. យន្តហោះខ្មោចឆ្លងអតីតកាល
ក្នុងអំឡុងសង្រ្គាមលោកលើកទី 2 នោះឯង ខាងកងទ័ពបានទទួលរបាយការណ៍មួយថា បានជួបយន្តហោះមួយគ្រឿងដែលត្រូវបានដាក់ឈ្មោះឱ្យថាជាយន្តហោះខ្មោច បង្ហាញខ្លួននៅលើដែនអាកាសជាច្រើនកន្លែង មុននឹងរលាយបាត់ទៅវិញយ៉ាងគ្មានតម្រុយ ដោយសូម្បីតែរ៉ាដាក៏មិនអាចចាប់បានដែរ។
និងដែលគួរចាប់អារម្មណ៍ជាងនោះទៅទៀតក៏គឺ ក្នុងអំឡុងពេល 30 – 40 ឆ្នាំតមកទៀត បានមានរបាយការណ៍ពីគូស្នេហ៍មួយគូដែលកំពុងដើរលេងតាមបណ្តោយថ្នល់ក្នុងតំបន់ជនបទមួយកន្លែង សុខៗ ក៏ស្រាប់តែពួកគេមើលឃើញយន្តហោះដែលមានលក្ខណៈចំណាស់ខុសពីយន្តហោះក្នុងយុគសម័យបច្ចុប្បន្នយ៉ាងស្រឡះកំពុងហោះនៅលើមេឃដូចយន្តហោះធម្មតាទូទៅ មុននឹងសុខៗ វាក៏រលាយបាត់ទៅវិញនៅនឹងមុខពួកគេទាំងពីរយ៉ាងគួរឱ្យភាន់ភាំងក្រៃលែង។ប្រាកដណាស់ រឿងរ៉ាវយន្តហោះខ្មោចនេះមិនមែនត្រូវបានមនុស្សប្រទះឃើញត្រឹមតែប៉ុណ្ណឹងនោះទេ តែនៅមានរបាយការណ៍ជាច្រើនទៀតពាក់ព័ន្ធនឹងការប្រទះឃើញយន្តហោះដ៏ចំណាស់មួយគ្រឿងនោះ និងក៏មានអ្នកលើកចំណុចសន្និដ្ឋានឡើងដែរថា វាអាចជាការធ្វើដំណើរឆ្លងអតីតកាល ឬអាចនឹងជាអំឡុងពេលដែលពិភពនៃពេលវេលាវឹលមកជាន់គ្នាម្តងទៀតដូចកាលពីអតីតកាល ធ្វើឱ្យយន្តហោះខ្មោចនោះបង្ហាញខ្លួនឡើងក៏អាចថាបានដែរ។
2 . យន្តហោះដែលទទេស្អាត
ក្រោយពីយុទ្ធជនទ័ពអាកាសមួយក្រុមបាននាំយន្តហោះ ហោះចេញទៅបំពេញភារកិច្ចដ៏សែនប្រថុយនឹងគ្រោះថ្នាក់ និងទាំងអស់បានត្រឡប់មកដល់មូលដ្ឋានវិញយ៉ាងសុវត្ថិភាព លើកលែងតែយន្តហោះមួយគ្រឿងប៉ុណ្ណោះដែលបាត់ដំណឹងទៅសូន្យឈឹងតាំងពីពេលណាក៏គ្មានអ្នកណាដឹងឡើយ ទើបធ្វើឱ្យក្រុមយុទ្ធជនអ្នកបើកបរយន្តហោះទាំងនោះប្រញាប់នាំគ្នាហោះត្រឡប់ទៅតាមរកយន្តហោះមួយគ្រឿងនោះវិញ។មិនយូរប៉ុន្មាន ទាំងអស់គ្នាក៏បានជួបនឹងយន្តហោះដែលបាត់នោះកំពុងតែហោះចុះចតនៅម្តុំបរិវេណឆ្នេរសមុទ្រមួយកន្លែងជិតនឹងខ្សែបន្ទាត់ជើងមេឃ។ ទិដ្ឋភាពដែលពួកគេទាំងអស់គ្នាមើលឃើញគឺ យន្តហោះមួយគ្រឿងនោះហាក់ដូចជាត្រូវខូចខាតយ៉ាងដំណំ តែវាក៏ទម្លាក់ខ្លួនចុះចតទៅលើដីបានយ៉ាងល្អ។
តែនៅពេលពួកគេទាំងអស់គ្នាប្រញាប់រត់ទៅដើម្បីជួយទាញអ្នកបើកចេញបន្ទប់អ្នកបើកបរនោះ ស្រាប់តែទាំងអស់គ្នាត្រូវស្រឡាំងកាំងជាខ្លាំង ព្រោះនៅក្នុងនោះគ្មានអ្នកបើកឡើយ ហើយប្រេងសាំងក៏អស់រលីងពីធុងបម្រុងទៀតផង។ មានការសន្និដ្ឋានថា យន្តហោះមួយគ្រឿងនេះអាចវង្វេងហោះចូលទៅក្នុងពិភពនៃពេលវេលាមួយទៀតរហូតដល់ប្រេងសាំងជិតអស់ទើបចេញមកវិញរួច ចំណែកអ្នកបើកប្រហែលជាបាត់ខ្លួននៅក្នុងពិភពមួយនោះ និងចាប់ពីពេលនោះមកគ្មាននរណាបានឃើញ ឬបានជួបគេទៀតឡើយ។
3 . ការបាត់ខ្លួនសូន្យឈឹងរបស់ក្រុមហោះហើរទី 19
គឺជារបាយការណ៍មួយក្នុងចំណោមរបាយការណ៍ដ៏អាថ៌កំបាំងបំផុតដែលពាក់ព័ន្ធការបាត់ខ្លួនទៅរបស់យន្តហោះ។ កើតឡើងនៅថ្ងៃទី 5 ខែ ធ្នូ ឆ្នាំ 1945 ជាអំឡុងពេល 3 ខែក្រោយពេលដែលសង្រ្គាមលោកលើកទី 2 បានបញ្ចប់។ ក្រុមហោះហើរទី 19 ដែលជាផ្នែកមួយរបស់ក្រុមហោះហើរធំ TBM Avenger របស់អាមេរិកបានចូលរួមហ្វឹកហាត់ការហោះហើរនៅក្នុងរដ្ឋ ហ្វ្លរីដា។រឿងរ៉ាវមានដូចតទៅ ៖ បន្ទាប់ពីយន្តហោះទាំងអស់ហោះឡើងម្តងមួយៗទៅលើផ្ទៃមេឃ អនុសេនីយទោ ឆាល ថេលើរ៍ អ្នកហោះដឹកនាំក្រុមហោះហើរទី 19 បានរាយការណ៍តាមរយៈវិទ្យុទាក់ទងថា ទ្រនិចត្រីវិស័យរបស់គេលែងធ្វើការ និងរូបគេក៏មិនដឹងដែរថា តើពេលនេះពួកគេកំពុងនៅទីណា។ ទាំងអស់គ្នាព្យាយាមរកផ្លូវចេញពីតំបន់ផ្ទៃអាកាសទីនោះ តែក៏មិនបានសម្រេច។
ទីបំផុត ប្រេងសាំងនៅក្នុងយន្តហោះរបស់ពួកគេក៏អស់ តែយន្តហោះទាំងអស់ក៏មិនត្រូវបានរកឃើញដែរ។ អ្នកបើកបរទាំង 14 នាក់របស់ក្រុមហោះហើរទី 19 ត្រូវបានសន្និដ្ឋានថា ស្លាប់ទាំងអស់ ចំណែកទីកន្លែងដែលពួកគេបាត់ការទាក់ទងនោះ គឺបរិវេណត្រីកោណ ប៊ើមីវដា កណ្តាលមហាសមុទ្រហ្នឹងឯង។

4 . សង្រ្គាម UFO ពីលើដែនអាកាសរបស់ទីក្រុង ឡូស អ៊ែនជេលេស
នៅរាត្រីថ្ងៃទី24 កុម្ភៈ ឆ្នាំ 1942 មានសាក្សីជាច្រើនរយនាក់បានរាយការណ៍ចូលមកមូលដ្ឋានកងទ័ពអាកាសឡូស អ៊ែនជេលេស ដោយអះអាងថា ពួកគេបានឃើញវត្ថុចម្លែកជាច្រើនគ្រឿងបង្ហាញខ្លួនឡើងនៅលើផ្ទៃមេឃ។ មនុស្សម្នាចាប់ផ្តើមភិតភ័យវិតក្ក ព្រោះខ្លាចថាមានការវាយប្រហាខាងអាកាសម្តងទៀត ព្រោះអំឡុងពេលនោះហេតុការណ៍ដែលកងទ័ពស្ម័គ្រស្លាប់ជប៉ុនទើបតែវាយប្រហារកោះ ភើល ហាប៊ើរហើយថ្មីៗ។
ម៉ោងប្រមាណជា 3 ទៀបភ្លឺ កងពលកាំភ្លើងធំខាងឆ្នេរទី 37 ចាប់ផ្តើមមានការបាញ់ភ្លើងហ្វ៉ាស្ពត់ឡៃថ៍ឡើងទៅលើផ្ទៃមេឃ និងមានការបាញកាំភ្លើងប្រឆាំងអាកាសយានវាយប្រហាយន្តហោះអាថ៌កំបាំងទាំងនោះអស់ជាច្រើនគ្រាប់និងអស់ពេលដ៏យូរ តែក៏មិនអាចធ្វើអ្វីបានឡើយ និងគ្មានការប្រកាសថា គ្រប់យ៉ាងត្រូវបានធ្វើឱ្យល្អប្រសើរឡើងវិញដែរ។
រហូតដល់ព្រឹកថ្ងៃបន្ទាប់មក គ្រាប់កាំភ្លើងជាង 1.400 គ្រាប់ដែលបានបាញ់ទៅលើមេឃកាលពីយប់មិញនោះបានសាងនូវភាពខូចខាតដល់អគារផ្ទះសម្បែងជាច្រើន មានប្រជាជន 5 នាក់ត្រូវស្លាប់ដោយសារការបាញ់កាំភ្លើងទៅលើមេឃនោះ និងវាថែមទាំងជាមូលហេតុធ្វើឱ្យកើតមានគ្រោះថ្នាក់ចរាចរណ៍នៅលើដងផ្លូវ ជំងឺបេះដូងកម្រើក និងមនុស្សម្នាជាច្រើនជ្រួលច្របល់ភ័យរន្ធត់ទូទាំងទីក្រុង តែគ្មានស្លាកស្នាម ឬតម្រុយណាមួយរបស់ UFO សូម្បីតែបន្តិច រហូតនៅពេលក្រោយមកខាងកងទ័ពត្រូវចេញមកប្រកាសថា វាបណ្តាលមកពីប្រព័ន្ធប្រកាសអាសន្នធ្វើការខុសឆ្គង តែប៉ុណ្ណឹងឯង៕
February 7, 2020
មេរោគគ្រោះថ្នាក់បំផុតទាំង៩ដែលមាននៅលើផែនដី
មេរោគ អេបូឡា អេដស៍ និងគ្រុនឈាម ឬគ្រុនផ្ដាសាយតាមរដូវជាដើម សុទ្ធតែបានសម្លាប់មនុស្សក្នុងអត្រាខ្ពស់ ហើយវាតែងតែគំរាមកំហែងដល់មនុស្សលោកជានិច្ច។
មេរោគ ម៉ារបឺក (Marburg Virus)
ក្រុមអ្នកវិទ្យាសាស្ត្របានរកឃើញវីរុសម៉ាបឺកនេះក្នុងឆ្នាំ 1967 នៅពេលអាសន្នរោគនេះបានឆ្លងរាលដាលលើបុគ្គលិកនៃមន្ទីរពិសោធន៍អាល្លឺម៉ង់ ដោយពួកគេបានប៉ះពាល់សត្វស្វាមានផ្ទុកមេរោគម៉ាបឺកដែលនាំមកពីប្រទេសអ៊ូហ្គង់ដា (Uganda)។ មេរោគម៉ាបឺក ដូចទៅនឹងមេរោគអេបូឡា (Ebola) ត្រង់ថា វាបង្កឱ្យអ្នកជំងឺមានអាការគ្រុនឈាម មានន័យថា អ្នកជំងឺនឹងត្រូវគ្រុនក្ដៅ ហើយចេញឈាមតាមសរសៃឈាមក្នុងខួរក្បាល និងក្រពះជាដើម បណ្ដាលឱ្យស្លាប់បាន។
អត្រាស្លាប់ក្នុងការផ្ទុះឆ្លងលើកដំបូង ត្រឹម20% ប៉ុន្តែ វាបានឡើងដល់80% ក្នុងការផ្ទុះឆ្លងរាលដាលចាប់ពីឆ្នាំ 1998-2000 នៅប្រទេសកុងហ្គោ (Congo) និងឆ្នាំ 2005 នៅអាងហ្គោឡា (Angola) នេះបើតាមអង្គការសុខភាពពិភពលោក WHO។
មេរោគអេបូឡា (Ebola Virus)
ការផ្ទុះឆ្លងរាលដាលនៃមេរោគអេបូឡាដំបូងនៅលើមនុស្ស បានកើតឡើងក្នុងអំឡុងពេលតែមួយនៅស៊ូដង់ និង កុងហ្គោ ក្នុងឆ្នាំ 1976។ អេបូឡា ឆ្លងតាមរយៈការប៉ះពាល់ឈាម ឬទឹករងៃនៃរាងកាយ ឬជាលិការបស់មនុស្ស ឬសត្វដែលមានផ្ទុកមេរោគនេះ។ ប្រភេទមេរោគអេបូឡាផ្សេងៗគ្នា បង្កគ្រោះថ្នាក់ក្នុងកម្រិតផ្សេងៗគ្នាដែរ។
អេបូឡាប្រភេទ Reston ភាគច្រើនមិនធ្វើឱ្យអ្នកជំងឺធ្លាក់ខ្លួនឈឺនោះទេ ប៉ុន្តែ ប្រភេទ Bundibugyo សម្លាប់មនុស្សក្នុងអត្រា 50% និងប្រភេទ Sundan គឺ 71%។ អាសន្នរោគនេះ បានរាតត្បាតខ្លាំងបំផុតគឺនៅដើមឆ្នាំ 2014 ហើយវាក៏មានភាពស្មុគស្មាញបំផុតគិតមកដល់បច្ចុប្បន្ន។
មេរោគឆ្កួត (Rabies Virus)
បើទោះជាថ្នាំវ៉ាក់សាំងការពារជំងឺឆ្កួតនៅលើសត្វចិញ្ចឹម ត្រូវបានប្រើប្រាស់តាំងពីឆ្នាំ 1920 ធ្វើឱ្យជំងឺនេះមិនសូវកើតមាននៅក្នុងបណ្ដាប្រទេសអភិវឌ្ឍ ប៉ុន្តែ វានៅតែជាបញ្ហាធំនៅប្រទេសឥណ្ឌា និងបណ្ដាប្រទេសនៅទ្វីបអាហ្វ្រិក។
សាស្ត្រាចារ្យឯកទេសខាងមីក្រូជីវសាស្ត្រនៃសកលវិទ្យាល័យ Boston លោក Elke Muhlberger បានឱ្យដឹងថា ៖ “មេរោគឆ្កួត បំផ្លាញខួរក្បាលរបស់មនុស្ស និងសត្វដែលបានឆ្លងមេរោគនេះ ហើយវាពិតជាអាសន្នរោគដ៏កាចសាហាវ។ បើសិនមានអ្នកណាម្នាក់ត្រូវសត្វដែលមានផ្ទុកមេរោគឆ្កួតនេះ យើងអាចព្យាបាលបាន ប៉ុន្តែ បើសិនព្យាបាលមិនទាន់ពេល នោះហានិភ័យនៃការស្លាប់គឺ 100%។
មេរោគអេដស៍ (HIV)
អេសដ៍អាចជាមេរោគដ៏គ្រោះថា្នក់ក្នុងពិភពលោកនាបច្ចុប្បន្ន ព្រោះវានៅតែជាមេរោគដែលសម្លាប់មនុស្សច្រើនបំផុត នៅទូទាំងពិភពលោក។ មេរោគនេះបានសម្លាប់មនុស្សប្រមាណជា 36លាននាក់ រាប់ចាប់ពីវាត្រូវបានគេរកឃើញកាលពីទសវត្សរ៍ឆ្នាំ 1980 នេះបើតាមការលើកឡើងរបស់បណ្ឌិត Amesh Adalja អ្នកឯកទេសផ្នែកជំងឺឆ្លង និងជាអ្នកនាំពាក្យនៃសមាគមជំងឺឆ្លងអាមេរិក។
យោងតាមអង្គការសុខភាពពិភពលោក (WHO) ថ្វីបើបច្ចុប្បន្ន យើងមានថ្នាំព្យាបាលជំងឺអេដស៍ ប៉ុន្តែ មេរោគនេះនៅតែឆ្លងរាលដាលខ្លាំងនៅតំបន់ដែលមានប្រជាជនក្រីក្រច្រើនរស់នៅ។ របាយការណ៍របស់ WHO បានឱ្យដឹងថា នៅក្បែរតំបន់សាហារ៉ានៃទ្វីបអាហ្វ្រិក ក្នុងចំណោមមនុស្សពេញវ័យ 20នាក់ គឺមានម្នាក់មានផ្ទុកមេរោគអេដស៍។
មេរោគអុតធំ (Smallpox)
ឆ្នាំ 1980 មហាសន្និបាតសុខភាពពិភពលោក បានប្រកាសថា ជំងឺអុតធំ ត្រូវបានកម្ចាត់ចោលទាំងស្រុង។ ប៉ុន្តែ មុននោះ មនុស្សជាតិត្រូវចំណាយពេលរាប់ពាន់ឆ្នាំក្នុងការប្រយុទ្ធប្រឆាំងជំងឺនេះ ដោយក្នុងចំណោមអ្នកជំងឺ3នាក់ គឺមានម្នាក់ស្លាប់។ ចំណែកអ្នកដែលបានជាសះស្បើយពីជំងឺនេះ ពួកគេខ្លះក៏ត្រូវពិការភ្នែក។
ក្រុមប្រវត្តិវិទូ បានឱ្យដឹងថា គិតត្រឹមសតវត្សរ៍ទី20 ជំងឺនេះបានសម្លាប់មនុស្សយ៉ាងតិច 300លាននាក់។
មេរោគស្ទះសួត ហានតា (Hantavirus)
មេរោគនេះត្រូវបានរកឃើញកាលពីឆ្នាំ 1993 នៅសហរដ្ឋអាមេរិក នៅពេលដែលប្ដីប្រពន្ធមួយគូបានស្លាប់ បន្ទាប់ពីមានអាការហត់ និងដង្ហក់តែប៉ុន្មានថ្ងៃប៉ុណ្ណោះ។ ពលរដ្ឋអាមេរិកាំងជាង 600នាក់បានឆ្លងមេរោគនេះ ក្នុងនោះ 36% បានបាត់បង់ជីវិត នេះបើតាមមជ្ឈមណ្ឌលគ្រប់គ្រង និងទប់ស្កាត់ជំងឺឆ្លងនៃសហរដ្ឋអាមេរិក។
មេរោគ Hanta មិនឆ្លងពីមនុស្សទៅមនុស្ស ប៉ុន្តែវាឆ្លងតាមរយៈការប៉ះពាល់លាមករបស់សត្វកណ្ដុរមួយប្រភេទដែលមានផ្ទុកមេរោគនេះ។ កាលពីជំនាន់សង្គ្រាមឧបទ្វីបកូរ៉េ មេរោគនេះ បានឆ្លងទៅទាហានប្រមាណជា 3,000នាក់ ក្នុងនោះមានទាហានប្រហែល 12% ដែលមានផ្ទុកមេរោគនេះ បានបាត់បង់ជីវិត នេះបើតាមការចុះផ្សាយនៅលើទស្សនាវដ្ដី Clinical Microbiology Reviews កាលពីឆ្នាំ 2010។
មេរោគផ្ដាសាយតាមរដូវ (flu season)
WHO បានឱ្យដឹងថា ក្នុងរដូវផ្ដាសាយ មនុស្សប្រហែល 500,000នាក់នៅក្នុងពិភពលោក អាចបាត់បង់ជីវិតដោយឆ្លងមេរោគផ្ដាសាយ។ អាសន្នរោគផ្ដាសាយដែលបានសម្លាប់មនុស្សច្រើនបំផុតគឺមេរោគផ្ដាសាយអេស្ប៉ាញ ដែលចាប់ផ្ដើមក្នុងឆ្នាំ 1918 និងបានឆ្លងទៅមនុស្ស 40% ក្នុងពិភពលោក ក្នុងនោះមានអ្នកស្លាប់ដល់ទៅ 50លាននាក់។
គ្រុនចាញ់
ជំងឺនេះបានកើតឡើងដំបូងនៅក្នុងអំឡុងទសវត្សរ៍ឆ្នាំ 1950 នៅប្រទេសហ្វីលីពីន និងប្រទេសថៃ។ ក្រោយមកវាបានឆ្លងរាលដាលពេញតំបន់ត្រូពិក។ អាសន្នរោគដែលកើតឡើងដោយសារមូសខាំនេះ នឹងរាតត្បាតកាន់តែខ្លាំងនៅពេលផែនដីកើនកំដៅជាងនេះ។
យោងតាម WHO មេរោគនេះបានឆ្លងទៅមនុស្សចាប់ពី 50-100លាននាក់ជារៀងរាល់ឆ្នាំ។ មកដល់បច្ចុប្បន្ន ពិភពលោកមិនទាន់មានថ្នាំវ៉ាក់សាំងការពារមេរោគនេះនៅឡើយ ប៉ុន្តែ ក្រុមហ៊ុនផលិតឱសថ Sanofi របស់បារាំង បាន និងកំពុងពិសោធថ្នាំវ៉ាក់សាំងមួយប្រភេទដែលបង្ហាញលទ្ធផលល្អបង្គួរ។
មេរោគរាកសូស (Rotavirus)
សារព័ត៌មាន Live Science បានចេញផ្សាយថា មេរោគ Rota ធ្វើឱ្យក្មេង និងទារកត្រូវរាករូសខ្លាំងពេលឆ្លងមេរោគនេះ។ មេរោគនេះអាចឆ្លងយ៉ាងឆាប់រហ័សតាមរយៈការប៉ះពាល់លាមកមនុស្ស។ ឆ្នាំ 2008 WHO បានរាយការណ៍ថា ក្មេងអាយុក្រោម 5ឆ្នាំ ប្រមាណជា 453,000នាក់បានស្លាប់ដោយសារឆ្លងមេរោគរាករូសនេះ។ បច្ចុប្បន្ន ពិភពលោកកំពុងប្រើថ្នាំវ៉ាក់សាំងពីរប្រភេទដើម្បីទប់ស្កាត់មេរោគនេះ៕
ប្រភព៖ សារព័ត៌មានបរទេស
February 6, 2020
ឆ្នាំ2019 អគ្គនាយកដ្ឋានពន្ធដារប្រមូលចំណូលបានជិត 3,000លានដុល្លារចូលក្នុងថវិកាជាតិ
អគ្គនាយកដ្ឋានពន្ធដារទទួលបានលទ្ធផលយ៉ាងល្អប្រសើរក្នុងការប្រមូលពន្ធ-អាករគ្រប់ប្រភេទក្នុងរយៈពេល12ខែ នៃឆ្នាំ2019 កន្លងទៅនេះ ដោយសម្រេចបានទឹកប្រាក់ប្រមាណជិត 3,000លានដុល្លារសហរដ្ឋអាមេរិក។ នេះបើផ្អែកតាមការប្រកាសនៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែធ្នូ និងប្រចាំឆ្នាំ2019 ព្រមទាំងដាក់ទិសដៅសម្រាប់អនុវត្តបន្ត របស់អគ្គនាយកដ្ឋានពន្ធដារ នៅថ្ងៃទី21 ខែមករា ឆ្នាំ2020 នៅសាលាជាតិពន្ធដារ។
តាមរយៈការចុះផ្សាយរបស់អគ្គនាយកដ្ឋានពន្ធដារ បានបង្ហាញថា សម្រាប់រយៈពេល 12ខែនៃឆ្នាំ2019 កន្លងមកនេះ អគ្គនាយកដ្ឋានពន្ធដារ ប្រមូលពន្ធ-អាករគ្រប់ប្រភេទ(តាមប្រព័ន្ធគ្រប់គ្រងទិន្នន័យចំណូលអនឡាញ) មានចំនួន 11,277.32ប៊ីលានរៀល (ប្រមាណ 2819,33 លានដុល្លារ) ធៀបនឹងផែនការប្រចាំឆ្នាំ2018 ឃើញថា ទទួលបានលទ្ធផលលើសផែនការប្រមាណ 23.20% ឬត្រូវជាប្រមាណ2,123.69ប៊ីលានរៀល ស្មើនឹងប្រមាណ 530,92លានដុល្លារអាមេរិក។
ទំហំទឹកប្រាក់ដែលទទួលបាននៅក្នុងឆ្នាំ2019 ខាងលើនេះ បើប្រៀបធៀបនឹងរយៈពេលដូចគ្នានៃឆ្នាំ2018 ឃើញថា ចំណូលពន្ធ-អាករសម្រាប់រយៈពេល 12ខែ នៃឆ្នាំ2019 កើនឡើងចំនួន 2,485.92ប៊ីលានរៀល (ប្រមាណជា 621.48លានដុល្លារអាមេរិក)ស្មើនឹង28.28%។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានបង្ហាញក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែធ្នូ និងប្រចាំឆ្នាំ2019 កាលពីថ្ងៃទី21 ខែមករា ឆ្នាំ2020 កន្លងមកថា៖“ដោយមានការខិតខំប្រឹងប្រែង និងយកចិត្តទុកដាក់ក្នុងការប្រមូលចំណូលពន្ធរបស់មន្ត្រីគ្រប់លំដាប់ថ្នាក់ និងការកែទម្រង់ប្រព័ន្ធគ្រប់គ្រងជាច្រើនរបស់អគ្គនាយកដ្ឋានពន្ធដារ ជាក់ស្តែងការប្រមូលពន្ធក្នុងរយៈពេល 12ខែក្នុងឆ្នាំ2019 កន្លងមកនេះ អគ្គនាយកដ្ឋានពន្ធដារប្រមូលចំណូលពន្ធបានប្រមាណជាង 11,277.32 ប៊ីលានរៀល ត្រូវជាប្រមាណជាង 2,819.33លានដុល្លារអាមេរិក”។
ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងនូវការកោតសរសើរ និងផ្តល់មូលវាចារណ៍ដ៏ថ្លៃថ្លា ចំពោះសមិទ្ធផលដែលសម្រេចបានរបស់អគ្គនាយកដ្ឋានពន្ធដារក្នុងនាមជាស្ថាប័នប្រមូលចំណូល សម្រេចបានលទ្ធផលជាប្រវត្តិសាស្ត្រជាបន្តបន្ទាប់ ហើយជាពិសេសសម្រាប់ឆ្នាំ2019 ដែលផ្តល់មោទនភាព ចំពោះរាជរដ្ឋាភិបាល និងចំពោះក្រសួងសេដ្ឋកិច្ច និងហិរញ្ញវត្ថុ។
ឯកឧត្តម គង់ វិបុល បានមានប្រសាសន៍ថា៖“ក្នុងឆ្នាំ2019 អគ្គនាយកដ្ឋានពន្ធដារ បានដាក់ឱ្យអនុវត្តនូវប្រព័ន្ធអនឡាញ សម្រាប់ការស្នើសុំការបង្វិលសង និងការប្រើប្រាស់ឥណទានអាករលើតម្លៃបន្ថែមតាមប្រព័ន្ធអនឡាញ សម្រាប់ការគ្រប់គ្រងអាករលើតម្លៃបន្ថែមរបស់អគ្គនាយកដ្ឋានពន្ធដារ (E-VAT Refund) ដោយបានបង្កើនប្រសិទ្ធភាពនៃការគ្រប់គ្រងប្រមូលអាករលើតម្លៃបន្ថែម និងបានទប់ស្កាត់ការគេចវេះកេងបន្លំប្រាក់ពន្ធផងដែរ”។
ឯកឧត្តម គង់ វិបុល បានបញ្ជាក់ថា “ជាលទ្ធផលក្នុងរយៈពេល 12ខែនៃឆ្នាំ2019 ចំណូលអាករលើតម្លៃបន្ថែមបានកើនឡើង 31.05% ប្រៀបធៀបនឹងរយៈពេលដូចគ្នានៅឆ្នាំ2018 ហើយតាមរយៈវិធានការ E-VAT រួមជាមួយវិធានការពន្ធដារសំខាន់ផ្សេងៗទៀត បានជំរុញកំណើនពន្ធលើប្រាក់ចំណូលប្រមាណ28.47%, អាករពិសេស 30.72%, ពន្ធប្រថាប់ត្រា43.73%, ពន្ធលើប្រាក់បៀវត្សរ៍ 18.21% និងពន្ធលើឈ្នួលដី និងផ្ទះ 68.20% ប្រៀបធៀបនឹងរយៈពេលដូចគ្នាក្នុងឆ្នាំ2018”។
ឯកឧត្តម គង់ វិបុល បានបញ្ជាក់ឱ្យដឹងថា លទ្ធផលនៃការគ្រប់គ្រងប្រមូលចំណូលសម្រាប់ឆ្នាំ2019 គឺបានឆ្លុះបញ្ចាំងនូវការវិនិយោគ និងកំណើនសេដ្ឋកិច្ចជាតិជាបន្តបន្ទាប់ ដែលជាសមិទ្ធផលមិនអាចកាត់ថ្លៃបាន និងបានអរគុណចំពោះសុខសន្តិភាព ស្ថិរភាពនយោបាយ ដែលជួយសម្រេចនូវសមិទ្ធផលដ៏ថ្លៃថ្លានេះ។ ក្នុងឆ្នាំ2019 គឺឆ្លុះបញ្ចាំងអំពីជោគជ័យនៃការអនុវត្តនូវយុទ្ធសាស្ត្រកៀរគរចំណូល2019-2020 ដែលជានវានុវត្តន៍ប្រកបដោយនិរន្តរភាពនៃការបន្តអនុវត្តប្រកបដោយភាពជោគជ័យនូវកិច្ចកំណែទម្រង់គោលនយោបាយរដ្ឋបាលសារពើពន្ធ និងទំនើបកម្មពន្ធដារ ស្របតាមយុទ្ធសាស្ត្រចតុកោណដំណាក់កាលទី4 កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ (PFMRP)៕
February 6, 2020