សង្គម និងសេដ្ឋកិច្ច - La Reine Media

សិក្សាជំនាញឱ្យជាក់លាក់ បើចង់អភិវឌ្ឍខ្លួនក្នុងសតវត្សរ៍ទី21

សតវត្សរ៍ទី21 ជាសតវត្សរ៍ថ្មីនៃការប្រែប្រួលទាំងរបៀបនៃការរស់នៅ ការធ្វើពាណិជ្ជកម្ម និងការអប់រំ ព្រោះមនុស្សកាន់តែមានសមត្ថភាពខ្លាំងឡើង ស្របពេលដែលការប្រកួតប្រជែងក៏កាន់តែមានឥទ្ធិពល ដែលទាមទារឱ្យប្រជាជនម្នាក់ៗក្នុងពិភពលោក ចាំ-បាច់ត្រូវតែពង្រឹងសមត្ថភាពឱ្យចំគោលដៅសំខាន់ៗសម្រាប់ចូលរួមក្នុងទីផ្សារការងារសកល។

អគ្គនាយកក្រុមហ៊ុនម៉េងលីជេគួច លោកឧកញ៉ា គួច ម៉េងលី បានលើកឡើងថា បច្ចុប្បន្ននេះ យុវជនជាច្រើនកំពុងប្រឈមជាមួយនឹងបញ្ហានៃការអប់រំ ដោយសារតែពួកគេមិនព្យាយាមចាប់ជំនាញឱ្យបានច្បាស់លាស់ តែបែរជាខិតខំស្វែងរកតែលុយកាក់ និងភាពមានបានទៅវិញ។ បញ្ហាទាំងអស់នេះ មិនខុសពីការយកស្វាយខ្ចីទៅបន្ទុំនោះទេ ព្រោះយុវជនជាច្រើនណាស់ដែលបណ្តែតបណ្តោយឱ្យខ្លួនឯងមានបញ្ហាតាមរយៈការហក់ចុះ ហក់ឡើង ហើយមិនព្រមផ្តល់តម្លៃលើការសិក្សាជំនាញគោលណាមួយឱ្យបានច្បាស់លាស់។ ទីបំផុត អ្វីដែលគាត់ទទួលបាន គឺចំណេះដឹងមិនច្បាស់លាស់ ប្រើការមិនបាន មិនកើតជាប្រយោជន៍ ហើយសោកស្តាយនៅពេលគាត់ចំណាយពេលវេលាកាន់តែច្រើន តែមិនទទួលបានលទ្ធផលល្អមកវិញ។ បន្ទាប់មកក៏បណ្តែតបណ្តោយឱ្យជីវិតត្រូវដើរក្រោយអ្នកជំនាញដែលគេអភិវឌ្ឍខ្លួនបន្តិចម្តងៗរហូតដល់ពេលវេលាច្បាស់លាស់មួយដើម្បីក្លាយជាអ្នកដឹកនាំ ឬម្ចាស់ស្ថាប័ននៅថ្ងៃណាមួយ។

លោកឧកញ៉ា គួច ម៉េងលី បាននិយាយថា៖ «នៅស្រុកយើងមិនសូវសម្បូរសហគ្រិនដែលមានភាពបង្កើតថ្មីច្បាស់លាស់លើផ្នែកណាមួយនោះទេ តែសង្គមយើងត្រូវការមនុស្សប្រភេទនេះច្រើន»។

ម្ចាស់គ្រឹះស្ថានអប់រំខាងលើបានលើកឡើងផងដែរថា ប្រសិនបើយើងចង់អភិវឌ្ឍខ្លួនបានល្អនាពេលបច្ចុប្បន្ននេះ យើងចាំបាច់ត្រូវសិក្សាឱ្យច្បាស់ពីជំនាញគោលណាមួយជាមុនសិន។ ជាឧទាហរណ៍ ប្រសិនបើយើងជាវិស្វករអគ្គិសនី យើងត្រូវចេះឱ្យច្បាស់ពីជំនាញអគ្គិសនី បន្ទាប់មកធ្វើការងារឱ្យបានយូរ ដើម្បីស្គាល់ពីបទពិសោធច្បាស់លាស់ក្នុងក្រុមហ៊ុនណាមួយឱ្យពិតប្រាកដ។ ក្រោយពេលទទួលបានចំណេះជំនាញ បទពិសោធ និងស្គាល់បញ្ហាអស់ហើយ ដល់ពេលមួយយើងនឹងអាចចេញមកបង្កើតអ្វីដែលថ្មីសម្រាប់ខ្លួនឯងបានហើយ។

កុំចង់ឆាប់រកស៊ីពេក ហើយលោតទៅរៀនវគ្គនេះបន្តិច វគ្គនោះបន្តិច ឬរៀនជំនាញណាដែលទូលំទូលាយខ្លាំងពេក តែត្រូវចាប់ជំនាញណាមួយឱ្យច្បាស់រហូតដល់យល់ដឹងស៊ីជម្រៅ និងអាចដោះស្រាយបញ្ហាបានស្ទើរគ្រប់យ៉ាង។ នៅពេលនោះយើងអាចចេញមកបង្កើតអាជីវកម្មប្រកបដោយភាពប្រាកដប្រជា និងធ្វើឱ្យយើងមានភាពខ្លាំងសម្រាប់ឈរជើងក្នុងការប្រកួតប្រជែង។ ម្យ៉ាងវិញទៀត ប្រសិនបើយើងជាអ្នកជំនាញ យើងក៏អាចអភិវឌ្ឍខ្លួនក្នុងពិភពការងារបានល្អដែលតំណែងខ្លះអាចរកចំណូល និងទទួលបានតម្លៃខ្ពស់ជាងអ្នករកស៊ីមួយចំនួនទៀតផង។

បច្ចុប្បន្ននេះ ជាសម័យដែលបច្ចេកវិទ្យា និងមានលំហូរអ្នកជំនាញយ៉ាងទូលំទូលាយលើពិភពលោកហេតុនេះ អ្វីដែលគេត្រូវការ គឺអ្នកជំនាញច្បាស់លាស់ពិតប្រាកដ ដើម្បីបម្រើការងារ ឬបង្កើតអាជីវកម្មណាមួយ ដើម្បីឆ្លើយតបជាមួយនឹងបញ្ហាជាក់ស្តែងនៅក្នុងសង្គមមួយ មិនមែនត្រូវការតែអ្នកមានត្រឹមគំនិតយោបល់ល្អ ហើយអនុវត្តមិនកើតនោះទេ។

ហេតុនេះអ្វីដែលយុវជនគួរយកចិត្តទុកដាក់ គឺពង្រឹងសមត្ថភាពជំនាញទាំងកម្រិតវិទ្យាសាស្ត្រពិត និងវិទ្យាសាស្រ្តសង្គម ដើម្បីធ្វើយ៉ាងណាទាញយកឱកាសល្អសម្រាប់អភិវឌ្ឍន៍ ព្រោះបើយើងមិនមានសមត្ថភាពខ្ពស់ទេ អ្នកជំនាញពីតំបន់ដទៃ ឬគំនិតអាជីវកម្មពីខាងក្រៅនឹងចាប់យកឱកាសទាំងអស់នោះមិនខាន។

ពាក់ព័ន្ធនឹងបញ្ហានេះដែរ លោក សាន្ត ច័ន្ទកុម្ភៈអ្នកជំនាញគណនេយ្យ និងសវនកម្ម និងជាអ្នកអប់រំផងដែរនោះបានលើកឡើងថា យុវជនបច្ចុប្បន្នចូលចិត្តសិក្សាជំនាញណាដែលមានភាពទូលាយដូចជាជំនាញគ្រប់គ្រង ឬជំនាញមួយចំនួនទៀតដោយពួកគេគិតថា គេអាចធ្វើការងារណាក៏បាន ហើយមានទីផ្សារធំទូលាយ។ ការគិតបែបនេះមិនប្រាកដថា ត្រឹមត្រូវនោះទេ ព្រោះជំនាញទាំងអស់នោះ ពេលខ្លះមានលក្ខណៈធំទូលាយពេក ដែលធ្វើឱ្យយើងចាប់បានត្រឹមតែឱកាសការងារតូចៗ និងមិនច្បាស់លាស់តែប៉ុណ្ណោះ។ ប្រសិនបើចង់អភិវឌ្ឍខ្លួនឱ្យក្លាយជាបុគ្គលសំខាន់ក្នុងក្រុមហ៊ុនយើងចាំបាច់ត្រូវសម្រួចជំនាញរបស់យើងឱ្យបានច្បាស់លាស់ ប្រសិនបើចង់គ្រប់គ្រង យើងអាចចាប់ផ្តើមពីផ្នែកគណនេយ្យ ឬសិក្សាលើជំនាញច្បាស់លាស់ណាមួយ ដែលអាចធ្វើឱ្យគាត់ឈានទៅដល់ចំណុចកំពូលនៃប្រភេទក្រុមហ៊ុនដែលគាត់ចង់ទៅ មិនមែនរៀនឱ្យតែបានការងារធ្វើ ឬចេញរកស៊ីដោយគ្មានចំណេះដឹងនោះទេ។

លោក ច័ន្ទកុម្ភៈ បានផ្តល់ជាឧទាហរណ៍ថា ប្រសិនយើងសិក្សាលើជំនាញណាមួយដែលធំទូលាយពេក យើងក៏ត្រូវតែចូលទៅក្នុងផ្នែកណាមួយដែលជាក់-លាក់ក្នុងក្រុមហ៊ុនមួយ ហើយត្រូវធ្វើការងារ និងចំណាយពេលយ៉ាងច្រើនដើម្បីសិក្សាពីអ្វីដែលយើងកំពុងធ្វើនោះ ទម្រាំតែយើងបានឡើងពី 1កន្លែងទៅ1កន្លែងផ្សេងទៀត។ តែប្រសិនបើយើងចាប់យកជំនាញណាមួយដែលជាផ្នែកសំខាន់របស់ក្រុមហ៊ុននោះតែម្តង យើងនឹងអាចអភិវឌ្ឍខ្លួនបានលឿន ឬមានចំណេះដឹងស្រួចជាងក្នុងការចាប់យកឱកាសឡើងទៅកាន់តែតំណែងខ្ពស់បន្ទាប់ទៀត។ ឧទាហរណ៍ប្រសិនបើនិស្សិតម្នាក់មានគោលដៅចង់ក្លាយជាផ្នែកសំខាន់មួយរបស់ក្រុមហ៊ុន គាត់ចាប់ផ្តើមពីគណនេយ្យករ បន្ទាប់មកគាត់អាចឡើងទៅជាប្រធានផ្នែកហិរញ្ញវត្ថុ ឬអាចឈានទៅដល់ជានាយកប្រតិបត្តិជាដើមក៏អាចថាបានដែរ តែប្រសិនបើគាត់រៀនធំទូលាយពេកហើយមិនច្បាស់លាស់ក្នុងជំនាញណាមួយនោះ នោះផ្លូវដែលគាត់នឹងអភិវឌ្ឍន៍ក៏មានមិនច្បាស់លាស់ដូចគ្នាដែរ៕

February 11, 2020

ផលិតផលផ្លែស្វាយកម្ពុជាកំពុងមានកំណើនល្អក្នុងការនាំចេញទៅបរទេស

យោងតាមរបាយការណ៍ការនាំចេញផ្លូវការនៅឆ្នាំ2019 កម្ពុជាបាននាំចេញអង្ករបាន 62ម៉ឺនតោនម្សៅដំឡូងមីជាង 5ម៉ឺនតោន គ្រាប់ស្វាយចន្ទីជាង20ម៉ឺនតោន គ្រាប់ពោតជិត 1ម៉ឺនតោន សណ្តែកសៀងជិត 6ម៉ឺនតោន ចេកជិត 16ម៉ឺនតោន ម្រេចជាង 3ពាន់តោន និងផលដំណាំផ្សេងៗទៀតជិត 30ម៉ឺនតោនដែលក្នុងនោះក៏មានផ្លែស្វាយជិត 6ម៉ឺនតោនដែរ។

ក្នុងរយៈពេលប៉ុន្មានឆ្នាំចុងក្រោយនេះ ផ្លែស្វាយបានក្លាយជាផ្លែឈើនាំចេញអាទិភាពមួយរបស់កម្ពុជា ដែលមានលទ្ធភាពអាចនាំចេញទៅកាន់ទីផ្សារអាស៊ី និងអឺរ៉ុប ដែលកំណើននេះចេះតែកើនឡើងជាបន្តបន្ទាប់ ដែលជាសញ្ញាមួយបង្ហាញថាទីផ្សារផ្លែស្វាយនៅក្នុងស្រុកខ្មែរអាចនឹងមានតម្រូវការកាន់តែខ្ពស់ជាងមុន ដោយសារតែកំណើននៃការនាំចេញឥតឈប់ឈរពី 1ឆ្នាំទៅ 1ឆ្នាំ។

យោងតាមមន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទបានថ្លែងបញ្ជាក់ថា ប្រទេសកម្ពុជាបាននាំចេញផ្លែស្វាយស្រស់ប្រមាណ 3តោនទៅកាន់ប្រទេសកូរ៉េខាងត្បូងជាលើកដំបូង ដែលការណ៍នេះនឹងជួយពង្រីកទីផ្សារកសិកម្មរបស់កម្ពុជានៅក្រៅប្រទេស។

ឯកឧត្តម ងិន ឆាយ អគ្គនាយកនៃអគ្គនាយកដ្ខានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានប្រាប់បណ្តាញព័ត៌មានក្នុងស្រុកថា នេះជាលើកទី1ហើយ ដែលប្រទេសកម្ពុជាបាននាំចេញផ្លែស្វាយស្រស់ទៅកាន់ប្រទេសកូរ៉េខាងត្បូង តាមរយៈក្រុមហ៊ុន Hyundai Mao Legacy Co., ដែលស្ថិតនៅក្នុងខេត្តកំពង់ស្ពឺ។

ក្រុមហ៊ុន Hyundai Mao Legacy Co., គឺជាក្រុមហ៊ុនវិនិយោគរួមគ្នាដោយក្រុមហ៊ុន Hyundai Corporation ដែលជាក្រុមហ៊ុនពហុផលិតផលរបស់ប្រទេសកូរ៉េខាងត្បូង និងក្រុមហ៊ុនដាំស្វាយនៅក្នុងស្រុក Mao Legacy Co Ltd ចាប់តាំងពីខែវិច្ឆិកា ឆ្នាំ2016 មក ដើម្បីបង្កើនសក្តានុពលផលិត និងកែច្នៃរួមគ្នាលើផ្ទៃដីចម្ការស្វាយប្រហែល 2,400ហិកតានៅខេត្តកំពង់ស្ពឺ។ ក្រុមហ៊ុន Hyundai Mao Legacy Co Ltd កាលពីថ្ងៃទី15 ខែមករា ឆ្នាំ2020 ក៏បានបើកដំណើរការរោងចក្រតម្លៃ 10លានដុល្លាររបស់ខ្លួនហើយដែរ ដើម្បីដំណើរការវេចខ្ចប់ផ្លែស្វាយស្រស់សម្រាប់នាំចេញទៅប្រទេសកូរ៉េខាងត្បូង។

គួររំឭកផងដែរថា ប្រទេសកម្ពុជាអាចនាំចេញផ្លែស្វាយទៅកាន់ប្រទេសកូរ៉េខាងត្បូងបានហើយនៅឆ្នាំ2020 នេះ កម្ពុជាក៏នឹងចុះកិច្ចព្រមព្រៀងនាំចេញផ្លែស្វាយជាផ្លូវការទៅកាន់ប្រទេសចិន ដែលជាទីផ្សារដ៏ធំមួយសម្រាប់កម្ពុជាផងដែរ។

អគ្គនាយក នៃអគ្គនាយកដ្ខានកសិកម្ម ក៏បានបញ្ជាក់ផងដែរថា ប្រទេសចិន គឺជាទីផ្សារសម្រាប់ការនាំចេញផ្លែស្វាយដ៏ធំរបស់កម្ពុជា ក្រោយពីមន្ដ្រីអនាម័យ និងភូតគាមសាស្ត្រនៃអគ្គរដ្ឋបាលរបស់ចិនបានចុះមកវាយតម្លៃកសិដ្ឋានស្វាយនៅប្រទសកម្ពុជាកាលពីពេលថ្មីៗនេះ ដោយបានជ្រើសរើសយក 5ខេត្តមកវាយតម្លៃ។ គេបានសន្និដ្ឋានថា កសិដ្ឋាន និងចម្ការស្វាយ ដែលបានធ្វើការដាំដុះនៅកម្ពុជា មានលក្ខណៈល្អប្រសើរ ស្របតាមស្ដង់ដា ដែលអាចនាំទៅប្រទេសចិនបាននៅដំណាក់កាលដំបូង។

លោកបានបញ្ជាក់ទៀតថា ភាពប្រឈមនៃបញ្ហាគឺ ដោយសារកសិដ្ឋានដំណាំស្វាយនៅកម្ពុជា ពុំទាន់មានអនាម័យគ្រប់គ្រាន់ មិនទាន់មានយន្ដការត្រួតពិនិត្យសមាសភាគសត្វចង្រៃតាមរដូវកាលច្បាស់លាស់ និងការប្រើប្រាស់ថ្នាំកសិកម្មមួយចំនួនមិនទាន់ត្រឹមត្រូវ។ ដូច្នេះ មុននឹងនាំផ្លែស្វាយស្រស់ទៅប្រទេសចិនបាន យើងត្រូវមានរោងចក្រ ឬមួយក៏ទីតាំងសម្រាប់វេចខ្ចប់ និងសម្លាប់មេរោគ ជាពិសេសគឺសម្លាប់ដង្កូវរុយ។ ប្រសិនបើយើងមិនបានសម្លាប់មេរោគនេះទេ គឺយើងមិនអាចនាំចេញផ្លែស្វាយស្រស់ទៅប្រទេសចិនបានទេ។

សព្វថ្ងៃនេះ បើយើងនិយាយពីការវិនិយោគលើការសាងសង់កន្លែងសម្រាប់សម្លាប់មេរោគនេះគឺទើបតែមួយគត់ ប៉ុន្តែសមត្ថភាពនៃការសម្អាតមេរោគសម្រាប់ការនាំចេញ គឺមានកម្រិតតូចទាបនៅឡើយ ដោយក្នុង 1ថ្ងៃបានតែ 25 ទៅ 30តោនប៉ុណ្ណោះទេ។

លោក ហេង ស្រេង តំណាងរោងចក្រផលិតតំណាប់ស្វាយបឹងកេត ដែលជារោងចក្រកែច្នៃផ្លែស្វាយ ធ្វើជាតំណាប់ សម្រាប់នាំចេញទៅកាន់ប្រទេសចិននោះ បានឱ្យដឹងថា ក្នុង 1ថ្ងៃក្រុមហ៊ុនរបស់លោកត្រូវការផ្លែស្វាយចន្លោះពី 150តោន ទៅ180តោនសម្រាប់ធ្វើតំណាប់។ ប៉ុន្តែបច្ចុប្បន្ន ការប្រមូលទិញបានត្រឹមតែចន្លោះពី 60តោន ទៅ 100តោនប៉ុណ្ណោះ ដូច្នេះមិនទាន់គ្រប់គ្រាន់សម្រាប់ផលិត និងនាំចេញទៅកាន់ទីផ្សារប្រទេសចិននៅឡើយទេ។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រទេសកម្ពុជាត្រូវការផ្លែស្វាយប្រហែល 300តោន ក្នុង 1ថ្ងៃ ដើម្បីកែច្នៃជាតំណាប់ស្វាយនាំចេញទៅទីផ្សារអន្តរជាតិ។របាយការណ៍នេះបានឱ្យដឹងថា ក្នុងចំណោមក្រុមហ៊ុនចំនួន5 ដែលកំពុងប្រតិបត្តិការនៅក្នុងប្រទេសកម្ពុជា មានតម្រូវការផ្លែស្វាយចន្លោះពី 250ទៅ300តោនក្នុង 1ថ្ងៃ។ ផ្លែស្វាយទាំងនោះនឹងត្រូវកែច្នៃធ្វើជាតំណាប់ស្វាយសម្រាប់ការនាំចេញទៅទីផ្សារអន្តរជាតិ។

ទិន្នន័យលម្អិតបានបង្ហាញថា ក្រុមហ៊ុន BoeungKet Planting & Industrial Co.,Ltd ត្រូវការស្វាយប្រហែលពី 100 ទៅ 140តោនក្នុង 1ថ្ងៃ។

ក្រុមហ៊ុន Kirirom Food Production Co., Ltd ត្រូវការចន្លោះពី 30 តោនទៅ 50តោន និងក្រុមហ៊ុន Long Wo Agriculture (Cambodia) Co., Ltd ត្រូវការចន្លោះពី 20តោន ទៅ 30តោន ក្នុង 1ថ្ងៃ ខណៈក្រុមហ៊ុន Fruitto Industrial Co., Ltd ត្រូវការចន្លោះពី 20 ទៅ 30 តោន និងក្រុមហ៊ុន Cam MJ Agriculture Co., Ltd ត្រូវការ 25តោន ក្នុង 1ថ្ងៃ។

មានការកត់សម្គាល់ឃើញថា គិតត្រឹមខែធ្នូ ឆ្នាំ2019 ក្រុមហ៊ុន Boeung Ket Planting & Indu strial Co., Ltd បាននាំចេញតំណាប់ស្វាយមានចំនួនចន្លោះប្រហែលពី 3,000 ទៅ 400តោន។

លោក ហេង ស្រេង អ្នកគ្រប់គ្រងទូទៅនៅក្រុមហ៊ុន Boeung Ket Planting & Industrial Co., Ltd បានឱ្យដឹងថា៖ “ក្រុមហ៊ុនបានទិញផ្លែស្វាយជាង 100តោនក្នុង 1ថ្ងៃ ក្នុងតម្លៃប្រមាណ 750រៀល ក្នុង 1គីឡូក្រាម សម្រាប់ការកែច្នៃជាផលិតផលតំណាប់ស្វាយ។ ក្រុមហ៊ុនយើងកំពុងនាំចេញតំណាប់ស្វាយទៅប្រទេសចិន។ តំណាប់ស្វាយរបស់យើងមានរសជាតិឆ្ងាញ់ និងគុណភាពល្អ”។

ឯកឧត្តម ងិន ឆាយ អគ្គនាយកនៃអគ្គនាយកដ្ឋានកសិកម្ម បានបញ្ជាក់ថា ប្រទេសកម្ពុជាផលិតផ្លែស្វាយបានប្រមាណជា 4លានតោនជារៀងរាល់ឆ្នាំ នៅលើផ្ទៃដីដាំដុះទំហំ 100,000ហិកតា ក្នុងនោះផ្ទៃដីប្រមូលផលមានចំនួន 8ម៉ឺនហិកតា និងទិន្នផលជាមធ្យម គឺទទួលបានជាង 15 តោនក្នុង 1ហិកតា បើគិតសរុបពេញ 1រដូវវិញ គឺមានជាង 1លាន 2សែនតោន ក្នុង 1រដូវ។

គួរជម្រាបឱ្យដឹងដែរថា ប្រទេសកម្ពុជាក៏ធ្លាប់បាននាំចេញផ្លែមង្ឃុតស្រស់ តំណាប់ផ្លែឈើ និងភេសជ្ជៈទៅកាន់ប្រទេសជាច្រើន ដូចជា វៀតណាម ថៃ បារាំង អេស្ប៉ាញ និងហុងកុងផងដែរ ហើយកាលពីឆ្នាំ2019 កន្លងទៅនេះ កម្ពុជាបាននាំចេញស្វាយស្រស់ 58,162តោន ទៅកាន់ទីផ្សារក្រៅប្រទេសចំនួន6 គឺប្រទេសវៀតណាម ថៃ សិង្ហបុរី បារាំង រុស្ស៊ី និងហុងកុង៕

February 11, 2020

បទដ្ឋាននៃការសាងសង់ត្រូវតែគិតពីភាពវិជ្ជមាននៃសុវត្ថិភាព

រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអំពាវនាវដល់ស្ថាបត្យករ និងវិស្វករ ព្រមទាំងអ្នកជំនាញផ្នែកពាណិជ្ជកម្មទាំងអស់ដែលធ្វើការក្នុងវិស័យសំណង់ ត្រូវមានការត្រួតពិនិត្យលើការរចនា និងការងារសំណង់ ដើម្បីជួយធ្វើឱ្យវិស័យនេះកាន់តែរឹងមាំ ទាំងផ្នែកគុណភាព និងការកសាងជំនឿទុកចិត្តពីសាធារណជន។ នេះបើតាមប្រសាសន៍រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ដែលបានថ្លែងក្នុងសិក្ខាសាលាផ្សព្វផ្សាយអំពីច្បាប់សាងសង់ដល់អ្នកជំនាញនៅក្នុងវិស័យនេះកាលពីពេលថ្មីៗនេះ។

ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា៖“ក្នុងឱកាសនេះ ខ្ញុំសូមអំពាវនាវដល់ក្រុមហ៊ុនដែលមានគុណវុឌ្ឍិទាំងនោះ ដែលចុះឈ្មោះនៅក្រសួង និងមានជំនាញក្នុងការរចនា និងការងារសាងសង់ ដើម្បីចេញវិញ្ញាបនបត្រនៅក្នុងតំបន់របស់ពួកគេ ព្រោះដល់ពេលហើយដែលក្រុមហ៊ុនត្រូវមានភារកិច្ចត្រួតពិនិត្យការសាងសង់សំណង់ និងគម្រោងដែលត្រូវបានបញ្ជាក់ មុនពេលគម្រោងទាំងនេះត្រូវបានបញ្ជូនមកដើម្បីទទួលបានការយល់ព្រម”។

យោងតាមរបាយការណ៍ប្រចាំឆ្នាំរបស់ក្រសួងគិតត្រឹមឆ្នាំ2019 មានក្រុមហ៊ុនសរុបចំនួន 1,132ក្រុមហ៊ុន ដែលមានសុពលភាពក្នុងវិស័យរចនានិងសំណង់។ ក្រុមហ៊ុនទាំងនេះត្រូវបានចេញវិញ្ញាបនបត្រដោយក្រសួង ដើម្បីដំណើរការនៅក្នុងវិស័យសំណង់របស់ព្រះរាជាណាចក្រកម្ពុជា។

លោក James Hodge នាយកក្រុមហ៊ុនប្រឹក្សាផ្នែកអចលនទ្រព្យ CBRE Cambodia បានថ្លែងថា តម្រូវការសម្រាប់អ្នកអង្កេតតាមលំដាប់ ទំនងជាមានការកើនឡើងដោយសារចំនួនអ្នកកាន់កាប់កាន់តែច្រើន ដែលត្រូវព្យាយាមពិនិត្យមើលភាពត្រឹមត្រូវនៃអគារមុនពេលប្រតិបត្តិការកើតឡើង ហើយយើងអាចនឹងឃើញសម្ពាធ សម្រាប់ការកែតម្រូវច្បាប់ដើម្បីធានាថា អ្នកកាន់កាប់ត្រូវបានការពារប្រសើរជាងមុនពីអ្នកអភិវឌ្ឍន៍ទាំងឡាយ។

លោកបានបញ្ជាក់ថា៖“វិនិយោគិន និងអ្នកទិញច្បាស់ជានឹងយកសុវត្ថិភាព និងគុណភាព សំណង់ទៅធ្វើជាការពិចារណាកាន់តែខ្លាំងឡើង ដែលជាលទ្ធផលនៃការដួលរលំនៃអគារថ្មីៗនេះ តែនៅទីបំផុត ទីផ្សារវាមិនមានផលប៉ះពាល់អ្វីទេ ពីព្រោះស្តង់ដានៃសំណង់អគារខ្ពស់ៗ ភាគច្រើនត្រូវនឹងស្តង់ដាអន្តរជាតិ”។

លោកឧកញ៉ា នួន រិទ្ធី អគ្គនាយកក្រុមហ៊ុន ខ្មែរហ្វោនដេសិន អឹព្រេហ្សល ខូអិលធីឌី (Khmer Foundation Appraisal Co.,Ltd.) បានមានប្រសាសន៍ប្រាប់ឡារ៉ែន ពាណិជ្ជថា៖“ដោយយោងទៅអ្វីដែលក្រសួងដែនដី នគរូបនីយកម្ម និងសំណង់បានពង្រឹងនាពេលថ្មីៗនេះ បើនិយាយទៅ គឺពាក់ព័ន្ធនឹងសំណង់ និងដីធ្លី វាមានភាពចែកដាច់ពីគ្នារវាងបច្ចេកទេស។ មានន័យថា ក្រសួងគាត់ពង្រឹងទៅលើបច្ចេកទេសសាងសង់ និងគុណភាព។ ដូច្នេះវាអត់ទាក់ទងគ្នា ឬជះឥទ្ធិពលអ្វីដល់វិស័យដីធ្លីយើងទេគឺវាមានផលប្រយោជន៍ដល់អ្នកប្រើប្រាស់ និងអ្នកទទួលយកសំណង់ទៅវិញទេ”។

លោកបានពន្យល់ថា កន្លងមកអ្នកសាងសង់ គាត់ទទួលសិទ្ធិពីគេជាអ្នកម៉ៅការ ឯអ្នកវិនិយោគិនគាត់ពឹងផ្អែកលើក្រុមហ៊ុនម៉ៅការសាងសង់នេះ។ នៅពេលគាត់(អ្នកមានគម្រោង)បង្ហាញគ្រឿងផ្គុំជាប្រភេទA ប៉ុន្តែអ្នកម៉ៅការសាងសង់ គាត់ធ្វើជាប្រភេទE នេះជាបញ្ហាដែលធ្វើឱ្យមានការបាក់រលំកន្លងមក ឬមានការបាក់ស្រុត ប្រេះស្រាំ ជាហេតុធ្វើឱ្យមានការខាតបង់ពីគម្រោងដែលគាត់វិនិយោគដែរនោះ។ នេះយើងនិយាយចំពោះមុខរឿងបច្ចេកទេស។ ប៉ុន្តែវាមិនមានជាសញ្ញាណាមួយពាក់ព័ន្ធ ដល់វិស័យអចលនទ្រព្យនោះទេ។

លោកឧកញ៉ា បានបញ្ជាក់ថា៖“ជាការពង្រឹងសុវត្ថិភាពនេះ វាដល់ពេលវេលាហើយ ពីព្រោះបច្ចុប្បន្នយើងកំពុងតែឈានដល់សកលភាវូបនីយកម្មនៅលើពិភពលោកនេះ យើងត្រូវតែកែតម្រូវនិងទទួលយកស្តង់ដា។ ព្រោះថា យើងធ្លាប់មានស្តង់ដាដែរ មុនសម័យសង្គ្រាម តែក្រោយមកពេលសម័យ ប៉ុល ពត យើងបានបាត់បង់អស់។ ដូច្នេះទម្រាំតែយើងកសាង និងរដ្ឋាភិបាលបានធ្វើការដឹកនាំកន្លងមក នៅមានការយល់យោគច្រើន។ ពេលដែលមានបញ្ហាកើតឡើង ការយល់ដឹងរបស់ប្រជាពលរដ្ឋមានកម្រិតទាបពីបញ្ហាច្បាប់ទម្លាប់ផង ធ្វើឱ្យងាយមានផលប៉ះពាល់កើតមានឡើង”។

ទោះយ៉ាងណាលោកឧកញ៉ាបានមានប្រសាសន៍ថា៖“ប្រសិនបើយើងមើលទៅលើតួលេខមិនមែនមានន័យថា នៅទូទាំងប្រទេសយើងសុទ្ធតែអត់មានគុណភាពនៃសំណង់នោះទេ គេបានសាងសង់អគាររាប់សិបជាន់ តើគេមានបញ្ហាអ្វីទេ? ព្រោះដោយសារតែគេបានគោរពបទដ្ឋានសំណង់បានត្រឹមត្រូវ”។

លោកឧកញ៉ា នួន រិទ្ធី បានបញ្ជាក់ថា៖“នៅក្នុងសង្គមហ្វេសប៊ុក ក៏បានបង្ហាញដែរថា មិនមែនមាននៅតែកម្ពុជាទេ នៅប្រទេសខ្លះក៏កើតមានដែររឿងគុណភាពនេះ គឺមានឆកល្វែងមួយ។ នៅកម្ពុជាយើងតំបន់ខ្លះការអភិវឌ្ឍមានការរីកលូតលាស់លឿនហួសពីការស្មានរបស់យើង ធ្វើឱ្យមានការឆកល្វែងនៅកន្លែងខ្លះ ខ្វះចន្លោះក្នុងការត្រួតពិនិត្យ ទើបយើងឃើញមានបញ្ហាកើតឡើងបាន ព្រោះយើងមានក្រុមត្រួតពិនិត្យ ខ្វះអ្នកជំនាញ និងមានចំនួនតិច មិនបានមើលអស់ តែពុំមាននរណាចង់ឱ្យរឿងអកុសលកើតមានឡើងនោះទេ ហើយសុំកុំគិតថា បញ្ហានេះជាបញ្ហាចោទធំ ជាចំណោទនៅក្នុងវិស័យរបស់យើងឱ្យសោះ”។

ក៏ប៉ុន្តែ ទោះយ៉ាងណាក៏ដោយបើយោងតាមច្បាប់ ជាធម្មតា ត្រូវចំណាយពេលប្រហែល 6ខែ ដើម្បីអនុវត្តឱ្យបានពេញលេញ។ បែបនេះសំដៅទៅលើករណីអគារដែលកំពុងសាងសង់ 7ជាន់ដែលបានដួលរលំនៅក្នុងក្រុងកែបកាលពីដើមខែនេះ ដែលបណ្តាលឱ្យមនុស្សស្លាប់ 36នាក់ និងរបួស 23នាក់ ដែលសោកនាដកម្មនេះបានកើតឡើងប្រហែល 7ខែ បន្ទាប់ពីអគារ 7ជាន់ដែលគ្មានអាជ្ញាប័ណ្ណរបស់ជនជាតិចិនបានដួលរលំនៅខេត្តព្រះសីហនុ និងបានធ្វើឱ្យមនុស្សស្លាប់ 28នាក់ និងរងរបួស 26នាក់។

ជាមួយនឹងច្បាប់ថ្មីដែលនឹងត្រូវបានអនុវត្តយ៉ាងពេញលេញ ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានប្តេជ្ញាថា នឹងមិនអនុញ្ញាតឱ្យមានសោកនាដកម្មបែបនេះកើតឡើងម្តងទៀតឡើយ។

ឯកឧត្តម ជា សុផារ៉ា បានមានប្រសាសន៍ថា៖“ការសាងសង់នៅតែបន្តកើនឡើង ហើយយើងត្រូវតែចាត់វិធានការធ្ងន់ធ្ងរ ដើម្បីចៀសវាងសោកនាដកម្មនេះ ពីព្រោះយើងមានអារម្មណ៍ឈឺចាប់នៅពេលដែលរឿងបែបនោះកើតឡើង”។

ឯកឧត្ដមបានបញ្ជាក់ថា កាលពីមុនយើងមិនមានច្បាប់ទេ ឥឡូវនេះយើងមានច្បាប់នេះ ពីព្រោះយើងចាំបាច់ត្រូវខិតខំធ្វើការប្រឆាំងនឹងសំណង់ខុសច្បាប់ ហើយច្បាប់នេះត្រូវបានរៀបចំឡើងដើម្បីធានាគុណភាពសំណង់ សន្តិសុខ និងសុវត្ថិភាពហើយនឹងបន្តលើកកម្ពស់វិស័យអចលនទ្រព្យនៅក្នុងព្រះរាជាណាចក្រកម្ពុជាតទៅទៀត៕

February 11, 2020

7កន្លែង រ៉ូម៉ែនទិកបំផុតសម្រាប់ដកពិសោធចិត្តគូស្នេហ៍

ចូលដល់ខែកុម្ភៈ ជាខែនៃក្ដីស្រឡាញ់ពោរពេញទៅដោយពណ៌ផ្កាឈូក។ អ្នកកំពុងតែមានផែនការ និងកំពុងស្វែងរកទីកន្លែងសម្រាក ស្វែងរកតំបន់ទេសចរណ៍នានាក្នុងថ្ងៃសំខាន់នោះហើយមែនទេ? អ្នកអាចពិចារណាទីកន្លែងស្អាតៗទាំង7កន្លែងជាមួយ ឡារ៉ែន ក្នុងទំព័រដំណើរកម្សាន្តនេះបាន។ ជឿជាក់ថា កន្លែងខ្លះលោកអ្នកប្រាកដជាធ្លាប់ស្គាល់ និងមានកន្លែងខ្លះក៏ថ្មីប្លែកសម្រាប់គូស្នេហ៍ ដែលចង់ផ្ដិតយករូបភាពស្រស់ត្រកាលជាមួយនឹងធម្មជាតិហើយ។ ដើម្បីកុំឱ្យខាតពេលយូរ តោះទៅស្គាល់ទីតាំងទាំងអស់នោះទាំងអស់គ្នា៖

1. Jimbaran, Bali ប្រទេសឥណ្ឌូនេស៊ី
Jimbaran ជាឆ្នេរមួយក្នុងចំណោមឆ្នេរខ្សាច់ដែលល្បីជាងគេនៅកោះបាលី។ ប្រទេសឥណ្ឌូនេស៊ី ក្រៅពីមានឆ្នេរខ្សាច់ពណ៌ស ជាមួយនឹងសមុទ្រថ្លាអាចមុជទឹកលេងយ៉ាងសប្បាយរីករាយហើយ ក៏មានភោជនីយដ្ឋានអាហារសមុទ្រជាច្រើនកន្លែងដែលមានរសជាតិឆ្ងាញ់ជាប់មាត់ទៀតផង ទាំងស្រស់ៗ និងថ្មីៗតែម្ដងយកមកពីសមុទ្រ ព្រោះនៅក្បែរឆ្នេរសុទ្ធតែផ្ទះអ្នកនេសាទសមុទ្រទាំងអស់។

2. Hallstatt, ប្រទេសអូទ្រីស
Hallstatt ជាទីក្រុងបឹងស្អាតមួយ ដែលត្រូវបានចុះបញ្ជីជាសម្បត្តិបេតិកភ័ណ្ឌពិភពលោក។ មានព្រះវិហារ និងផ្ទះអឺរ៉ុបបុរាណដែលត្រូវបានដាក់ដាំនៅលើភ្នំ។ ហើយកាន់តែប្លែកភ្នែកខ្លាំង Hallstatt ក៏ទីតាំងទេសចរណ៍ហ៊ុំព័ទ្ធជុំវិញដោយភ្នំខ្ពស់ៗ ធ្វើឱ្យលោកអ្នកមានអារម្មណ៍ថា កំពុងនៅចំកណ្តាលនៃលំហដែលពេញដោយបរិយាកាសស្នេហា ដូចផ្ដិតចេញពីក្នុងរឿងនិទានពិតៗអុីចឹងដែរ។

3. Imerovigli, ប្រទេសក្រិច
ទីនេះគឺជាភូមិ Santorini ប្រពៃណីដែលមានន័យថា បណ្តុំផ្ទះទាំងអស់ត្រូវបានលាបពណ៌ស តុបតែងជាមួយដំបូលសំយ៉ាបផ្ទះមានផ្ទៃពណ៌សមុទ្រពណ៌ខៀវស្រងាត។ ហើយផ្លូវនៅក្នុងភូមិហាក់បីដូចជាតូចចង្អៀតបន្ដិច និងអាចមើលឃើញពេលថ្ងៃលិចជាមួយនឹងទេសភាពដ៏ល្អបំផុតនៃកោះ Santorini។

4. Bruges, ប្រទេសបែលហ្ស៊ិកBruges
គឺជាទីក្រុងឆ្នេរដ៏ល្បីល្បាញមួយនៅប្រទេសបែលហ្ស៊ិក។ ជាមួយនឹងបរិយាកាសមិនធ្លាប់ស្រមៃឃើញពីមុនមក ជាមួយនឹងប្រឡាយទឹកតូចបែបស្ងប់ស្ងាត់ ផ្លូវក្រាលថ្ម និងស្ថាបត្យកម្មបែបមជ្ឈិមសម័យ ដែលអាចនិយាយបានថា វាដូចជាទីក្រុងក្នុងរឿងនិទានអឺរ៉ុប ធ្វើឱ្យគូស្នេហ៍បានទៅដល់ហើយមានអារម្មណ៍ថា ដូចជាខ្លួនជាព្រះនាង និងជាព្រះអង្គម្ចាស់នៅក្នុងរឿងព្រេងនិទានដូច្នោះដែរ។

5. Marrakech, ប្រទេសម៉ារ៉ុក
Marrakech គឺជារដ្ឋធានីទេសចរណ៍នៅប្រទេសម៉ារ៉ុក។ អ្វីដែលប្លែកគឺអគារនៅទីនោះត្រូវបានកសាងឡើងតាមបែបស្ថាបត្យកម្មប្លែកភ្លែក និងលាបដោយពណ៌ទឹកក្រូច ដែលជាការកំណត់របស់រដ្ឋាភិបាល។ អ្នកស្រុកហៅវាថា ទីក្រុងពណ៌ផ្កាឈូក ឬទីក្រុងពណ៌ទឹកក្រូច។ ខណៈបានទៅលេងនៅទីក្រុង Marrakech នោះអ្នកនឹងឃើញផ្លូវតូចៗ មានអ្នកលក់របស់របរ និងអាហារនៅលើទេះសេះ ហើយក៏មានតូបតូចៗដាក់លក់គ្រឿងអលង្ការនៅទីក្រុងណវផងដែរ។

6. Prague, ប្រទេសឆែក
ជម្រើសគួរឱ្យចាប់អារម្មណ៍មួយទៀតសម្រាប់កន្លែងដ៏រ៉ូមែនទិក គឺក្រុង Prague ប្រទេសឆែក។ ទីក្រុងនេះត្រូវបានគេហៅថា ជាបេះដូងនៃតំបន់ទេសចរណ៍ប៉ែកអឺរ៉ុប។ បរិយាកាសនៅជុំវិញទីក្រុងមួយនេះគឺ ស្រស់ស្អាតនៅចំកណ្តាលភ្នំ និងពិតជាស័ក្តិសមសម្រាប់គូស្នេហ៍ ប្តីប្រពន្ធ ឬក្រុមគ្រួសារ ទៅដើរកម្សាន្ដយ៉ាងរីករាយនារដូវបុណ្យនៃក្តីស្រឡាញ់។
7. Paris, ប្រទេសបារាំង
ទីក្រុង ប៉ារីស ដែលត្រូវបានគេហៅថាជាទីក្រុងនៃក្តីស្រឡាញ់ “Tower Eiffel” ដែលជានិមិត្តរូបរបស់ប្រទេសបារាំង។ ដូច្នេះត្រូវបានគេប្រសិទ្ធនាមឱ្យវាថាជា “កន្លែងវេទមន្ត ដើម្បីប្រាប់ពីសេចក្តីស្នេហា” និងសមបំណងសម្រាប់គូស្នេហ៍ទាំងឡាយ។ គូស្វាមីភរិយាភាគច្រើនដែលមកទទួលទានអាហារពេលល្ងាចនៅលើកំពូលប៉មអេហ្វែល ជាន់ទី58 ពិតជារ៉ូម៉ែនទិកបំផុត និងអាចគយគន់ទីក្រុងយ៉ាងស្រស់ត្រកាលចម្រុះភ្លើងពណ៌ថែមទៀតផង រ៉ូមែនទិកខ្លាំងណាស់៕

February 11, 2020

អាហារ និងថ្នាំ 5យ៉ាងដែលអ្នកម្តាយកំពុងបំបៅដោះកូន ហាមទទួលទាន

ក្នុងអំឡុងពេលដែលអ្នកម្តាយចិញ្ចឹមកូនដោយទឹកដោះរបស់ខ្លួននោះ ការទទួលទានអាហាររបស់អ្នកម្តាយ គឺជារឿងមួយដែលត្រូវប្រយ័ត្នខ្លាំងជាងពេលប្រក្រតី ព្រោះសារធាតុអាហារខ្លះអាចត្រូវបញ្ជូនបន្តទៅកូនតូចតាមរយៈទឹកដោះម្តាយ ធ្វើឱ្យទឹកដោះរបស់អ្នកម្តាយមានរសជាតិប្រែប្រួល ឬអាចធ្វើឱ្យមានសារធាតុគីមីប្រមូលសន្សំនៅក្នុងរាងកាយកូនបាន ដូច្នេះយើងនាំគ្នាមកមើលថា តើអាហារ និងថ្នាំទាំង 5យ៉ាងដែលអ្នកម្តាយកំពុងបំបៅដោះកូនត្រូវតម និងហាមញ៉ាំនោះ មានអ្វីខ្លះ?

1. ឱសថបុរាណមួយចំនួន ថ្នាំចិនសែប្រភេទខ្លះ ឬស្រាថ្នាំជាដើម មិនគួរទទួលទានទេ ព្រោះអាចធ្វើឱ្យកូនហើមពោះ រាក យំរករឿងច្រើន ឬបន្ទោបង់ខុសប្រក្រតីទៀតផង។
2. ហាមទទួលទានវត្ថុជ្រក់ ត្រាំ ឬភេសជ្ជៈដែលមានជាតិអាល់កុល(ជាតិស្រវឹង) ព្រោះជាតិអាល់កុលមានផលប៉ះពាល់ដល់ខួរក្បាលរបស់កូនតូចដោយត្រង់។
3. អាហារដែលមានរសជាតិហឹរខ្លាំង គួរតមសិន ព្រោះនឹងធ្វើឱ្យកូនបានទទួលរសជាតិហឹរពីទឹកដោះម្តាយដែរ និងអាចធ្វើឱ្យកូនតូចឈឺពោះបាន តែបើអាហារឱសថបុរាណមួយចំនួនដូចជា ស្លឹកម្រះព្រៅ ខ្ញី ម្រេច អាចទទួលទានបាន ព្រោះជាអាហារដែលមានរសជាតិក្តៅខុសពីម្ទេស។ អាហារឱសថបុរាណដែលមានរសជាតិក្តៅទាំងនោះ ថែមទាំងជួយបំប៉នទឹកដោះម្តាយទៀតផង។
4. បន្លែដែលមានជាតិហ្គាសច្រើន ដូចជា ស្ពៃក្តោប ផ្កាខាត់ណា ឬបន្លែស្រស់ប្រភេទខ្លះ គួរតមសិន ព្រោះអាចធ្វើឱ្យកូនហើមពោះបាន ឬបើចង់ញ៉ាំ គួរញ៉ាំបន្លែដែលឆ្អិនហើយប្រសើរជាង។5. ថ្នាំពេទ្យមួយចំនួនមានផលប៉ះពាល់ដល់កូនតាមរយៈទឹកដោះម្តាយ ដូច្នេះបើអ្នកម្តាយកើតមានអាការឈឺថ្កាត់អ្វីមួយ និងត្រូវការប្រើប្រាស់ថ្នាំ ត្រូវប្រឹក្សាជាមួយគ្រូពេទ្យជាមុនសិនគ្រប់ពេល៕

February 11, 2020

អ្នកជំនាញមើលឃើញថា អ្នកអភិវឌ្ឍន៍ចាប់ផ្តើមងាកមកវិនិយោគលើគម្រោងខុនដូតម្លៃសមរម្យ

នារយៈកាលប៉ុន្មានឆ្នាំចុងក្រោយនេះ ការអភិវឌ្ឍនិងសាងសង់ខុនដូនៅកម្ពុជា មានការរីកចម្រើនខ្លាំងគួរឱ្យកត់សម្គាល់ ស្របពេលដែលវិស័យអចលនទ្រព្យផ្សេងទៀត ក៏មានការរីកចម្រើនខ្លាំងផងដែរ។ជាមួយគ្នានេះ ការអភិវឌ្ឍខុនដូ ដែលត្រូវបានវិនិយោគដោយក្រុមហ៊ុនក្នុងស្រុក និងក្រៅស្រុក មួយរយៈពេលចុងក្រោយនេះបានចាប់ផ្តើមងាកមកវិនិយោគលើគម្រោងខុនដូដែលមានតម្លៃសមរម្យដើម្បីបំពេញតម្រូវការទីផ្សារកម្រិតមធ្យមវិញម្ដង។

ទន្ទឹមគ្នានេះ អ្នកជំនាញផ្នែកវាយតម្លៃអចលនទ្រព្យនៅកម្ពុជា បានលើកឡើងថា កាលពីក្នុងឆ្នាំ2019 ទីផ្សារខុនដូ នៅកម្ពុជាហាក់កំពុងកើនឡើងយ៉ាងសន្ធឹកសន្ធាប់ ដែលសុទ្ធសឹងតែជាគម្រោងយក្ស ប៉ុន្តែក្នុងនោះក៏មានការផ្លាស់ប្តូរផងដែរ ពីការផ្គត់ផ្គង់ខុនដូតម្លៃខ្ពស់ មកជាការផ្គត់ផ្គង់តម្លៃសមរម្យដូចបុរីតម្លៃខ្ពស់ មកជាបុរីតម្លៃសមរម្យដែរ។

អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានឱ្យដឹងថា ស្របទៅនឹងកំណើនប្រជាពលរដ្ឋនៅក្នុងរាជធានីភ្នំពេញដែលកំពុងមានតម្រូវការអគារស្នាក់នៅរួមប្រភេទខុនដូដែលបន្តកើនឡើងជារៀងរាល់ឆ្នាំនោះ ត្រូវបានអ្នកជំនាញចាត់ទុកថា ទីផ្សារខុនដូនឹងក្លាយជាទីផ្សារនាំមុខគេនៅក្នុងរយៈពេលដ៏ខ្លីខាងមុខ។ ជាមួយគ្នានោះអ្នកនាងបានឱ្យដឹងទៀតថា បច្ចុប្បន្នខុនដូដែលមានតម្លៃសមរម្យកំពុងទទួលបានការគាំទ្រពីទីផ្សាក្នុងស្រុកប្រមាណជាង 50% ជាពិសេសសំដៅដល់ខុនដូដែលសាងសង់លក់ក្នុងតម្លៃចន្លោះពី 50,000ទៅ 80,000ដុល្លារក្នុង 1យូនីត។

អ្នកនាងបន្តថា ការវិនិយោគលើទីផ្សារខុនដូ ដែលផ្តោតលើប្រជាជនមានជីវភាពមធ្យម ពួកគេអាចទទួលបានជោគជ័យ ដោយសារប្រជាជនក្នុងស្រុកអាចមានលទ្ធភាពទិញបាន ហើយនិន្នាការប្រជាជនក្នុងស្រុកដែលទិញខុនដូ ក៏មានការកើនឡើងផងដែរខណៈដែលប្រជាជនកម្ពុជាវ័យក្មេងភាគច្រើន ចាប់ផ្តើមចង់រស់នៅក្នុងជីវិតបែបឯករាជ្យ និងម្យ៉ាង បញ្ហាចម្ងាយផ្លូវ និងបញ្ហាកកស្ទះចរាចរណ៍ខ្លាំងនៅក្នុងទីក្រុង ក៏ជាមូលហេតុមួយផងដែរ។

ជាមួយគ្នានោះដែរ សម្រាប់អគ្គនាយកក្រុមហ៊ុន ខ្មែររៀល អុីស្ទេតលោកឧកញ៉ាបណ្ឌិត គីម ហ៊ាង បានលើកឡើងថាដោយសារតែប្រជាជនខ្មែរភាគច្រើនជាគ្រួសារដែលមានចំណូលមធ្យម លោកជឿថា វាដល់ពេលដែលអ្នកអភិវឌ្ឍន៍ត្រូវផ្ដោតលើគម្រោងខុនដូ និងលំនៅឋានតម្លៃសមរម្យហើយ។

ជាក់ស្តែងសម្រាប់ផ្នែកលំនៅឋាន បុរី ផ្ទះល្វែង លោកសង្កេតឃើញថា កាលពីឆ្នាំ2019 មានតម្រូវការខ្លាំង បើធៀបនឹងឆ្នាំ2018កន្លងទៅ ជាពិសេសសម្រាប់ខុនដូ និងលំនៅឋានតម្លៃសមរម្យ ដែលមានតម្លៃក្រោម 10ម៉ឺនដុល្លារកំពុងត្រូវប៉ាន់ខ្លាំងពីសំណាក់ទីផ្សារក្នុងស្រុក។

ពាក់ព័ន្ធនឹងការវិនិយោគលើគម្រោងខុនដូតម្លៃសមរម្យនេះដែរ លោក Chen Tai An ប្រធានក្រុមហ៊ុន Yunnan ShengMao Investment ជាក្រុមហ៊ុនដែលបានវិយោគលើគម្រោងខុនដូ TCC បានឱ្យដឹងថា គម្រោងខុនដូ TCC ដែលបើកលក់ជាផ្លូវការកាលពីថ្ងៃទី18 មករាកន្លងមកនេះ គឺផ្តោតទៅលើពលរដ្ឋខ្មែរដែលមានចំណូលទាប និងមធ្យម ដោយមានតម្លៃចាប់ពី 950ដុល្លារក្នុង 1ម៉ែត្រការ៉េ ដែលនេះជាតម្លៃទាបជាងទីផ្សារសម្រាប់តំបន់ក្នុងទីក្រុង។

លោកបន្តថា តាមរយៈការវិនិយោគនេះ យើងនឹងឈានទៅរួមចំណែកជួយជំរុញដល់ពលរដ្ឋកម្ពុជាឱ្យមានលំនៅឋានមួយសមរម្យ ពិសេសចង់ជួយពលរដ្ឋដែលមានប្រាក់ចំណូលទាប និងមធ្យម ឱ្យមានលទ្ធភាពទិញ ឬបង់រំលស់បាន។យោងតាមរបាយការណ៍ព្យាករទីផ្សារអចលន-ទ្រព្យឆ្នាំ2020 របស់

February 11, 2020

ទីផ្សារដំឡូងមីឆ្នាំទៅ ហាក់ផ្តល់ក្តីសង្ឃឹមច្រើនដល់កសិករ

ផលិតផលដំឡូងមី ត្រូវបានចាត់ទុកថាជាកសិផលសំខាន់ និងមានការដាំដុះច្រើនជាងគេលំដាប់ទី2 បន្ទាប់ពីស្រូវនៅកម្ពុជា ហើយទីផ្សារដំឡូងមីកាលពីឆ្នាំ2019 កន្លងទៅ បានបង្ហាញនូវសញ្ញាល្អសម្រាប់ប្រជាកសិករ ខណៈដែលតម្លៃមានភាពសមប្រកបជាងឆ្នាំទៅ(2018)។

ជាក់ស្តែង រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ឯកឧត្តម វេង សាខុន បានឱ្យដឹងតាមរយៈទំព័រហ្វេសប៊ុកផ្លូវការរបស់ឯកឧត្តមកាលពីពេលថ្មីៗថា សមាជិកសហគមន៍កសិកម្មផលិតដំឡូងមីចំនួន 8កន្លែងក្នុងខេត្តព្រះវិហារ កំពុងមមាញឹកយ៉ាងខ្លាំងក្នុងការប្រមូលផលដំណាំដំឡូងមី លក់ជូនក្រុមហ៊ុនតាមកិច្ចសន្យា ដោយភាពសប្បាយរីករាយ។

ឯកឧត្តម វេង សាខុន បានបញ្ជាក់បន្តថា តម្លៃទីផ្សារដំឡូងមីក្នុងខេត្តព្រះវិហារល្អប្រសើរជាងឆ្នាំកន្លងទៅ និងផ្តល់ក្តីសង្ឃឹមច្រើនដល់កសិករ។ ជាងនេះទៀត ឯកឧត្តមក៏បានបង្ហាញនូវទស្សនៈសុទិដ្ឋិនិយមចំពោះសារៈសំខាន់នៃវិស័យដំឡូងមីនៅកម្ពុជា ដោយការរីកចម្រើននៃវិស័យដំឡូងមីនឹងរួមចំណែកលើកកម្ពស់កំណើនប្រកបដោយបរិយាប័ន្ន ហើយប្រទេសកម្ពុជានឹងក្លាយជាប្រទេសនាំចេញដំឡូងមីដែលអាចទុកចិត្តបានទៅកាន់ទីផ្សារពិភពលោក។

ទាក់ទិននឹងការលើកឡើងនេះដែរ លោក លា ថេត ដែលជាកសិករដាំដំឡូងមី មកពីសហគមន៍កសិកម្មជាំក្សាន្តជាយដែន ខេត្តព្រះវិហារ បានរៀបរាប់ប្រាប់ថា ចំពោះទីផ្សារដំឡូងមីនៅក្នុងឆ្នាំកន្លងទៅ ឃើញថា មានតម្លៃកើនឡើងជាងឆ្នាំមុនៗ

ដោយដំឡូងមីស្រស់ មានតម្លៃថ្លៃ បើប្រៀបធៀបជាមួយឆ្នាំមុន។ លោកថា ឆ្នាំមុន ដំឡូងមីស្រស់ 1គីឡូក្រាម តម្លៃតែ 340រៀល រីឯឆ្នាំ2019 តម្លៃបានកើនដល់ 370រៀល។កសិកររូបនេះ បានឱ្យដឹងថា “ខ្ញុំមានការសប្បាយរីករាយយ៉ាងខ្លាំង ចំពោះតម្លៃដំឡូងមីស្រស់ នៅឆ្នាំ2019។

លទ្ធផលនេះ គឺដោយសារមានការយកចិត្តទុកដាក់ពីថ្នាក់ដឹកនាំ និងមន្ត្រីមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារគ្រប់ជាន់ថ្នាក់ ជាពិសេសលោកប្រធានមន្ទីរ ក្នុងការសហការ និងស្វះស្វែងរកទីផ្សារកសិផលជូនកសិករក្នុងខេត្តព្រះវិហារ ជាពិសេសបង្កើតកិច្ចសន្យាផលិតកម្មកសិកម្ម ជាមួយក្រុមហ៊ុន CACC និងក្រុមហ៊ុនដទៃទៀត និងដោយមានការខិតខំប្រឹងប្រែងរបស់កសិកររបស់យើងផងដែរ”។

យោងតាមរបាយការណ៍បូកសរុបលទ្ធផលនៅឆ្នាំ2019 របស់ក្រសួងកសិកម្ម រុក្ខាប្រមាញ់ និងនេសាទ ដែលបានផ្សព្វផ្សាយកាលពីពេលថ្មីៗនេះបានបង្ហាញឱ្យដឹងថា ដំឡូងមីដែលកម្ពុជាផលិតបានសម្រាប់នាំចេញនោះ មានចំនួនជាង 3លានតោន(3,310,092តោន) ដោយក្នុងនោះមានចំណិតដំឡូងមី 1,626,165តោន) ដំឡូងមីស្រស់ 1,608,450តោន ម្សៅដំឡូងមី 56,874តោន កាកសំណល់ដំឡូងមី 18,602តោន។របាយការណ៍ដដែលបានបន្តថា ផលិតផលដំឡូងមីនៅឆ្នាំ2019 កើនឡើង 26.66ភាគរយ បើធៀបនឹងឆ្នាំ2018 ដែលមានចំនួន 2,613,220តោន។

ចំណែកផ្ទៃដីដាំដុះដំឡូងមីនៅឆ្នាំ2019 វិញ មានចំនួន 648,476ហិកតា ថយចុះ0.57ភាគរយ បើធៀបនឹងឆ្នាំ2018 ដែលមានជាង 65ម៉ឺនហិកតា។ ចំណែកបរិមាណផលដំឡូងមី ដែលបានពីផ្ទៃដីទាំងនេះ មានចំនួន 14,590,710តោន កើនឡើង 6.11ភាគរយ បើធៀបនឹងឆ្នាំ2018 ដែលមាន13,750,076តោន។យ៉ាងណាក្ដី រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន ក៏បានបង្ហាញឱ្យដឹងដែរថា សម្រាប់ឆ្នាំ2019 កន្លងទៅ កម្ពុជាទទួលបានប្រាក់ចំណូលសរុបជាង 412លានដុល្លារអាមេរិក ពីការនាំចេញផលិតផលដំឡូងមីទៅកាន់ទីផ្សារអន្តជាតិ៕

February 11, 2020

អ្នកវិទ្យាសាស្រ្ត បង្កើតបានយានអវកាស ហោះទៅសិក្សាលម្អិតពីព្រះអាទិត្យ

ថ្មីៗនេះភ្នាក់ងារអវកាសអឺរ៉ុប សហការជាមួយអង្គការ NASA បានបាញ់បង្ហោះយានអវកាស Solar Orbiter រួចហើយកាលពីថ្ងៃទី10 ខែកុម្ភៈ ឆ្នាំ2020 ដើម្បីធ្វើដំណើរទៅសិក្សាលម្អិតអំពីព្រះអាទិត្យ។ យានអវកាសទម្ងន់ 1,900គីឡូក្រាមនេះ ត្រូវបានដាក់នៅលើគ្រាប់រ៉ុក្កែត Atlas V ហើយត្រូវបាញ់បង្ហោះចេញពីមជ្ឈមណ្ឌលអវកាស Cape Canaveral ក្នុងរដ្ឋ Florida។

យានអវកាស Solar orbiter បានបំបែកខ្លួនចេញពីគ្រាប់រ៉ុក្កែតក្នុងរយៈពេល 53នាទីបន្ទាប់ពីការបាញ់បង្ហោះតាមការគ្រោងទុកហើយប៉ុន្មាននាទី ក្រោយមកទៀតក្រុមបេសកកម្មបានបង្កើតការទាក់ទងជាមួយវាបានសម្រេច។ បេសកកម្មនេះ ត្រូវបានរំពឹងថា នឹងបញ្ជូនទិន្នន័យ និងរូបភាពនៅលើព្រះអាទិត្យបានលើសពីការរំពឹងទុកមកកាន់ផែនដីវិញ ក្នុងនោះរួមមានទាំងរូបភាពដំបូងនៃតំបន់ប៉ូលរបស់ព្រះអាទិត្យផងដែរ។

គម្រោងដែលមានតម្លៃ 1.7ពាន់លានដុល្លារនេះ ត្រូវបានធ្វើឡើងដើម្បីអាចឱ្យអ្នកវិទ្យាសាស្រ្តយល់បានកាន់តែច្បាស់ពីថាមពលរបស់ព្រះអាទិត្យ។ វានឹងត្រូវបានដាក់នៅលើគន្លងដែលមានចម្ងាយ 42លានគីឡូម៉ែត្រពីព្រះអាទិត្យដោយវានឹងអាចថតរូបភាពផ្ទៃនៃពិភពនេះក្នុងកម្រិតគុណភាពខ្ពស់៕

February 11, 2020

ក្រុមហ៊ុនចិន ZTE ចេញស្មាតហ្វូនប្រើឈីបខ្លាំងផុតលេខ Snapdragon 865 មុនគេឯកាមេរ៉ាវិញ 48MP

ស្មាតហ្វូនAxon 10s Pro គឺជាស្មាតហ្វូនរបស់ ZTE ដែលសម្រេចបញ្ចេញស្មាតហ្វូនមកលើទីផ្សារបានដំបូងគេ ចំពោះម៉ូដែលប្រើបន្ទះឈីបខ្លាំងផុតលេខ Snapdragon 865 ។

ZTE បានប្រកាសចេញស្មាតហ្វូន ZTE Axon 10s Pro នេះដែលការឌីហ្សាញ និងលក្ខណសម្បត្តិភាគច្រើនមិនខុសគ្នាពី Axon 10 Pro ដែលចេញកាលឆ្នាំមុនប៉ុន្មានឡើយ។ ប៉ុន្តែវានៅតែមានអេក្រង់កោង AMOLED ទំហំ 6.4 អ៊ីញ អាចស្គែនម្រាមដៃ ដែលបង្កប់លើអេក្រង់ និងមានរចនាប័ទ្មរាងឆកបន្តិចសម្រាប់ដាក់កាមេរ៉ាមុខ Selfie។

កាមេរ៉ាក៏មិនផ្លាស់ប្ដូរច្រើនដែរ តែវានៅតែមានកាមេរ៉ាមេកម្រិត 48MP, កាមេរ៉ា Wide-Angle ទំហំ 20MP (125ដឺក្រេ Wide) និងកាមេរ៉ា Telephoto ទំហំ 8MP។ ចំណែកកាមេរ៉ាមុខវិញ មានកម្រិត 20MP។

អ្វីដែលផ្លាស់ប្ដូរខ្លាំង គឺការប្ដូរមកប្រើបន្ទះឈីប Snapdragon 865 ដែលធ្វើឱ្យស្មាតហ្វូនមួយនេះមានដំណើរការល្អប្រសើរជាងមុន មានក្រាហ្វិកខ្លាំង និងបន្ថែមនូវការគាំទ្រសេវា 5G។ វាក៏មានប្រើបច្ចេកវិទ្យា Wi-Fi 6 និងមានមុខងារ Link-Booster ដែលអាចប្ដូរសេវារវាង Wi-Fi, LTE ឬ 5G បានយ៉ាងរហ័ស។

ស្មាតហ្វូនAxon 10s Pro មានជម្រើសមេម៉ូរី 128GB គួបផ្សំ RAM 6GB ដែលស៊េរីខ្លាំងបំផុត គឺមាន RAM ទំហំ 12GB ជាប្រភេទ LPDDR5 គួបផ្សំមេម៉ូរី 256GB ជា UFS 3.0។ ថាមពលថ្មគឺ 4000 mAh ដែលទ្រាំទ្រការសាកថ្មល្បឿនលឿន Qualcom Quick Charge 4.0។

ចំណែកតម្លៃ និងកាលបរិច្ឆេទចេញលក់វិញ មិនទាន់បានបង្ហាញឱ្យដឹងនៅឡើយទេ ប៉ុន្តែសម្រាប់ Axon 10 Pro ពេលចេញលក់ គឺនឹងមានតម្លៃចាប់ពីប្រមាណតែ 469 ដុល្លារប៉ុណ្ណោះ៕

February 11, 2020

មហាសេដ្ឋីពិភពលោក Bill Gate ទិញកប៉ាល់ដំណើការដោយថាមពលអ៊ីដ្រូហ្ស៊ែន

មហាសេដ្ឋី Bill Gates បានកុម្ម៉ង់ទិញនាវា 1គ្រឿងឈ្មោះ Aqua របស់ក្រុមហ៊ុន Sinot ជានាវាកម្សាន្តខ្នាតធំបំផុត និងដំបូងគេក្នុងពិភពលោក ដែលដំណើការដោយថាមពលអ៊ីដ្រូហ្ស៊ែន។ នាវានេះមានតម្លៃប្រមាណ 644លានដុល្លារ មានប្រវែង 112 ម៉ែត្រ មានកម្ពស់ 5ជាន់ មានកន្លែងសម្រាប់ភ្ញៀវស្នាក់នៅ 14នាក់ និងផ្ទុកអ្នកបម្រើការលើនាវាបាន 31នាក់ ហើយមានទាំងកន្លែងហាត់ប្រាណទៀតផង។

នាវាកម្សាន្តនេះប្រើប្រាស់ម៉ូទ័រម៉ាក 1MW ចំនួន2 ដែលដំណើរការដោយឧស្ម័នអ៊ីដ្រូហ្ស៊ែន ហើយវាអាចបើកបានដល់ល្បឿន 31.54 គ.ម/ម៉ ជាមួយរយៈចម្ងាយបើកបរ គឺ 6,035គីឡូម៉ែត្រ។ យ៉ាងណាក្ដី នាវានេះក៏មានម៉ាស៊ីនម៉ាស៊ូតមួយ សម្រាប់បម្រុងទុកផងដែរ។ នាវា Sinot Aqua នេះ ត្រូវបានគេរំពឹងថា នឹងអាចផលិតរួចរាល់នៅត្រឹមឆ្នាំ2024 ខាងមុខ។

គោលបំណងនៃការកុម្ម៉ង់ទិញនាវាខ្នាតយក្សបែបនេះ ត្រូវបានគេដឹងថា វានឹងកាត់បន្ថយការបំពុលបរិស្ថាន និងជារសជាតិជីវិតថ្មីមួយសម្រាប់មហាសេដ្ឋីរូបនេះផងដែរ៕

February 11, 2020

Category: សង្គម និងសេដ្ឋកិច្ច