សង្គម និងសេដ្ឋកិច្ច - La Reine Media

សាច់ចៀមដោតចង្កាក់

ធ្លាប់ឮ និងទទួលទានត្រឹមតែជាសាច់គោអាំង ឬសាច់គោដោតចង្កាក់អាំង តែពេលនេះអាចទំនងជាមានភាពខុសប្លែកគ្នាបន្តិចហើយ ដ្បិត ឡារ៉ែន បាននាំយកមកនូវមុខម្ហូបថ្មីមួយទៀតដែលបង្កើតឡើងដោយចុងភៅជំនាញមានបទពិសោធជាច្រើនឆ្នាំ ប្រចាំនៅភោជនីយដ្ឋាន Cowboy ដែលមានទីតាំងស្ថិតនៅផ្លូវប៉ាស្ទ័រ កែងផ្លូវលេខ242 ខណ្ឌដូនពេញ រាជធានីភ្នំពេញ បង្កើតចេញពីសាច់ចៀម រួមជាមួយនឹងបន្លែ នោះគឺមុខម្ហូបដែលមានឈ្មោះថា “សាច់ចៀមដោតចង្កាក់អាំងពិសេស”។

+ គ្រឿងផ្សំ
* សាច់ចៀម
* ម្ទេសប្លោកខៀវ
* ម្ទេសប្លោកក្រហម
* ខ្ទឹមបារាំង
* អំបិល
* ម្រេចម៉ដ្ឋ
* រ៉ូស្មែរី
* ប្រេងអូលីវ
* ទឹកជ្រលក់ម្រេចខ្មៅគ្រាប់

+ វិធីធ្វើ
មុនដំបូងអ្នកត្រូវយកសាច់ចៀមលាងសម្អាតឱ្យស្អាត រួចជូតឱ្យស្ងួតសឹមយកទៅប្រឡាក់ជាមួយអំបិល ម្រេចម៉ដ្ឋ ប្រេងអូលីវ បន្ទាប់មកយកបន្លែដូចជា ម្ទេសប្លោកខៀវ ម្ទេសប្លោកក្រហម ខ្ទឹមបារាំងដោយកាត់ជាដុំ (តាមចំណង់ចំណូលចិត្ត) ហើយយកចង្កាក់ដោតជាមួយសាច់ រួចយកទៅអាំងដោយប្រើកម្តៅភ្លើងក្ដៅល្មម។ ដោយឡែកសម្រាប់កម្រិតនៃការឆ្អិន លោកអ្នកកំណត់បានដោយខ្លួនឯងទៅតាមចិត្តដែលអ្នកចង់បាន៕

February 12, 2020

ដំណោះស្រាយដ៏ល្អសម្រាប់គ្រប់ប្រភេទសក់

សក់មិនស្អាតមានបញ្ហាច្រើន អ្នកណាៗក៏មានអារម្មណ៍ធុញថប់ដែរ ហើយបើដឹងថាវាមិនស្អាតហើយនោះ តើអ្នកណាគេនៅចង់ទុកឱ្យវាមិនស្អាតទៀតនោះ ម្នាក់ៗប្រាកដជាម្នីម្នារកដំណោះស្រាយជាមិនខាន។ ខាងក្រោមនេះគឺជាដំណោះស្រាយងាយៗសម្រាប់គ្រប់សុភាពនារី និងសុភាពបុរស ដែលមានបញ្ហាជាមួយនឹងសុខភាពសក់។ សូមស្វែងរកដំណោះស្រាយទៅតាមប្រភេទនៃបញ្ហាសក់ដែលអ្នកកំពុងជួបប្រទះ ជាមួយនឹងអត្ថបទខាងក្រោមដូចតទៅ។

– សម្រាប់គ្រប់ប្រភេទសក់ : ស៊ុតឆៅ គឺពិតជាជម្រើសដ៏ល្អបំផុតសម្រាប់គ្រប់ប្រភេទសក់។ ផ្នែកពណ៌ក្រហមនៃស៊ុត សម្បូរទៅដោយជាតិខ្លាញ់ និងប្រូតេអុីនដែលចាត់ទុកថា ជាគ្រឿងផ្តល់នូវសំណើមតាមបែបធម្មជាតិពិតៗ បន្ថែមពីលើនេះផ្នែកពណ៌សនៃស៊ុតក៏មានផ្ទុកនូវអង់ស៊ីម បេតាខារ៉ូទីន ព្រមទាំងជួយកម្ចាត់ចោលនូវជាតិប្រេងក្រៅតម្រូវការផងដែរ។

របៀបប្រើ : ការប្រើផ្នែកពណ៌សនៃស៊ុតអាចព្យាបាលតែចំពោះសក់ដែលមានជាតិប្រេងច្រើន ចំណែកផ្នែកពណ៌ក្រហមនៃស៊ុតសម្រាប់ផ្តល់សំណើមដល់សរសៃសក់ ឬសក់ដែលមានសភាពផុយស្រួយ។ ចូរយកស៊ុតពណ៌ស ឬក្រហមកន្លះពែង ឬច្រើនជាងនេះទៅតាមចំនួនសក់របស់អ្នក មកលាបនៅលើសក់របស់អ្នកឱ្យសព្វ។ ទុកចោលប្រមាណ20នាទី រួចលាងសម្អាតជាមួយនឹងទឹកត្រជាក់ រួចកក់សក់របស់អ្នកឱ្យបានស្អាតតាមធម្មតាជាការស្រេច។

របៀបប្រើប្រាស់ : ម៉ាស្សាសក់ និងស្បែកក្បាលដោយទឹកដោះគោជូរឬយ៉ាអួកន្លះពែង ហើយទុកវាចោល20នាទី សឹមលាងចេញដោយទឹកក្តៅតិចៗ រួចលាងបន្តជាមួយទឹកត្រជាក់ បន្ទាប់មកកក់សក់ជាធម្មតា។ វិធីព្យាបាលនេះអ្នកអាចធ្វើបានរៀងរាល់សប្តាហ៍។

– សក់មិនរឹងមាំ : ផលិតផលប្រើសម្រាប់លេងម៉ូដសក់ ក៏ដូចជាអាកាសធាតុកខ្វក់ អាចបន្សល់ទុកនូវមេរោគ ដែលធ្វើឱ្យសក់ទន់ខ្សោយ និងផុយស្រួយ ប៉ុន្តែទឹកដោះគោជូ ឬយ៉ាអួ អាចជួយរំសាយការបំផ្លាញនេះបាន។ អាស៊ីត Lacticនៅក្នុងទឹកដោះគោជូរ ឬយ៉ាអួ អាចជួយយកចេញនូវធូលីដីពីសក់របស់អ្នក ខណៈដែលទឹកដោះគោអាចជួយបន្ថែមប្រេង និងសំណើមដល់សរសៃសក់។

– អាការរមាស់ស្បែកក្បាល : ដើម្បីប្រឆាំងនឹងធាតុបង្កផ្សេងៗ (របបអាហារ ភាពតានតឹង និងអាកាសធាតុ) ដែលនាំឱ្យមានអាការរមាស់ស្បែកក្បាល។ សាកល្បងទឹកក្រូចឆ្មារលាយជាមួយនឹងប្រេងអូលីវ។ អាស៊ីតនៅក្នុងទឹក-ក្រូចឆ្មារ នឹងជួយព្យាបាលស្បែកក្បាល ចំណែកឯប្រេងអូលីវវិញនឹងជួយបន្ថែមសំណើមបង្កើតកោសិកាថ្មី។

របៀបប្រើ : ទឹកក្រូចឆ្មារ លាយជាមួយប្រេងអូលីវ និងទឹក (មួយមុខ2ស្លាបព្រា) រួចយកមកលាបនៅលើសរសៃសក់ឱ្យសព្វ។ ទុកចោល20នាទី រួចកក់សក់លាងសម្អាតវាចេញឱ្យបានស្អាតជាការស្រេច៕

February 12, 2020

រឿងគួរឱ្យអស់សំណើចក្នុងយុគសម័យរាជវង្សចិន វគ្គ «ចាប់ផោម»

ក្នុងពេលដែលលោកចៅហ្វាយស្រុកដ៏មានអំណាចកំពុងតែអង្គុយប្រជុំស្តាប់រឿងរ៉ាវតវ៉ាផ្សេងៗអំពីអ្នកស្រុកនោះ នៅសុខៗក្នុងក្រុមពួកអ្នកស្រុកក៏ស្រាប់តែមានមនុស្សម្នាក់ផោមឡើងលាន់ឮសំឡេងយ៉ាងខ្លាំង «ពូតតតតតត!»។

ចៅហ្វាយស្រុកដែលកំពុងតែវីវក់ជាមួយនឹងឯកសារតវ៉ាទាមទាររបស់ពួកអ្នកស្រុកនោះ ពេលបានឮ ក៏ងើបមុខឡើងដោយអារម្មណ៍មួម៉ៅ ព្រមទាំងស្រែកបញ្ជាខ្លាំងៗឡើងថា «សំឡេងស្អីគេហ្នឹងៗ នាំយកមកឱ្យយើងមើលភ្លាម!»។

ខាងអង្គរក្សដែលកំពុងឈរព័ទ្ធជុំវិញនៅក្នុងបន្ទប់ បានឮហើយក៏សម្លឹងមុខគ្នាឡឺនឡង់ៗ មុននឹងមានម្នាក់ឆ្លើយឡើងថា «ចាប់លែងទាន់ហើយ លោកម្ចាស់!»។

លោកចៅហ្វាយស្រុកបានឮចម្លើយបែបនោះ ក៏រឹតតែខឹងមួម៉ៅខ្លាំងឡើង ក៏ស្រែកគំហកខ្លាំងៗទៅទៀតថា «កុំមកកុហកយើង! ជួយលាក់បាំងជនប្រព្រឹត្តខុសពួកឯងនឹងទទួលទោស យកចេញមកឱ្យយើងមើលភ្លាម!»។

បណ្តាអង្គរក្សទាំងអស់មិនដឹងជាធ្វើយ៉ាងណា ក៏យកក្រដាសកើបអាចម៍មួយកំភ្លូសធំនោះ មកប្រគល់ជូនលោកចៅហ្វាយស្រុក ព្រមទាំងរាយការណ៍ថា «ជនល្មើសរត់បាត់ទៅហើយលោកម្ចាស់ ចាប់បានតែវត្ថុពាក់ព័ន្ធ ទើបនាំខ្លួនមកជូនលោកម្ចាស់ដើម្បីពិចារណាទោសនៅពេលនេះ»៕

February 12, 2020

តើអ្នកចង់ដឹងទេថា តើហេតុអ្វីបានជាបៀ 1ហ៊ូ មាន 52 សន្លឹក? និងតើសន្លឹកបៀនីមួយៗ មានអត្ថន័យយ៉ាងណា?

អ្នកណាៗក៏ស្គាល់បៀ និងចេះលេងបៀដែរ តែ…តើមានមនុស្សប៉ុន្មាននាក់ដែលស្គាល់ពីអត្ថន័យរបស់សន្លឹកបៀនីមួយៗនោះ?

ខាងក្រោមនេះ គឺជាចំណេះដឹងអំពីរឿងសន្លឹកបៀ ដែលនឹងធ្វើឱ្យយើងដឹងថា តើហេតុអីបានបៀ 1ហ៊ូមាន 52សន្លឹក និងថា តើអត្ថន័យនៅលើរូប(រូបអុង)របស់សន្លឹកបៀទាំងនោះមានន័យបញ្ជាក់ពីអ្វីខ្លះ? អ្នកដែលចង់ដឹងចម្លើយ សូមតាមដានបន្ត៖

– បៀ 1ហ៊ូមានន័យថា 1ឆ្នាំ ព្រោះចំនួនបៀ 52សន្លឹក គឺចំនួនសប្តាហ៍ក្នុង 1ឆ្នាំ(1ឆ្នាំ មាន 52សប្ដាហ៍ ឬអាទិត្យ)។-បៀ 52សន្លឹក ចែកចេញជា 4ឈុត៖ ក្នុង 1ឈុត មាន 13សន្លឹក មានន័យអំពី ខែរនោច និងខ្នើត។
-ផលបូករួមរបស់សន្លឹកបៀទាំង 52សន្លឹក គឺស្មើនឹង 364 ដោយ J (Jack ឬកំលោះ) = 11ពិន្ទុ។ Q (Queen ឬក្រមុំ) = 12ពិន្ទុ។ K (King ឬកញ្ចាស់) = 13ពិន្ទុ និងសន្លឹកបៀ Joker សន្លឹកដំបូង ជំនួសឱ្យ 1ពិន្ទុ សរុបទាំងអស់នឹងបានចំនួន 365ពិន្ទុ ដែលស្មើនឹងចំនួនថ្ងៃ ក្នុង 1ឆ្នាំ ចំណែក Joker(សន្លឹកបៀចោល) សន្លឹកទី2 នឹងជំនួសឱ្យឆ្នាំណាដែលខែកុម្ភៈ មាន 29ថ្ងៃ។
-ក្នុងបៀ 1ហ៊ូនឹងប្រកបទៅដោយ សន្លឹកបៀពណ៌ក្រហមចំនួន 26សន្លឹក និងសន្លឹកបៀពណ៌ខ្មៅចំនួន 26 សន្លឹកទៀត ដែលមានន័យថា ប្រៀបដូចជាផែនដីដែលត្រូវបានបែងចែកជា 2ផ្នែកគឺ ផ្នែកដែលបានទទួលពន្លឺពីដួងព្រះអាទិត្យ និងផ្នែកដែលមិនបានទទួលពន្លឺពីដួងព្រះអាទិត្យ ដែលសន្លឹកបៀពណ៌ក្រហម មានន័យពីផែនដីប៉ែកខាងកើត(ភ្លឺ) ចំណែកសន្លឹកបៀពណ៌ខ្មៅមានន័យពីផែនដីប៉ែកខាងលិច(ងងឹត)។

-សន្លឹកបៀ J , Q និង K នឹងជំនួសឱ្យធម្មជាតិរបស់មនុស្ស
ដោយ J មានន័យពី ប្រុសកំលោះ
Q នឹងមានន័យពី ស្រីក្រមុំ
និង K មានន័យពី បុរសចំណាស់
ទឹក ជួង ការ៉ូ កឺ និងប៊ិច នឹងជំនួសឱ្យ 4រឿងដែលសំខាន់ៗក្នុងជីវិតរបស់មនុស្សយើង៖
ជួង មានន័យពី ចំណេះដឹង
ការ៉ូ មានន័យពី មាសប្រាក់ ទ្រព្យសម្បត្តិ
កឺ មានន័យពី សេចក្តីស្នេហា
និងប៊ិច មានន័យពី សេចក្តីស្លាប់
សន្លឹកបៀ J ជួង៖ រូបកំលោះនឹងបែរខ្នងដាក់រូបទឹកជួង…
ចំណែកសន្លឹកបៀ K ជួង រូបកញ្ចាស់នឹងបែរមុខដាក់រូបទឹកជួង…

នោះគឺមានន័យថា ក្នុងមនុស្សក្នុងវ័យកំលោះ នឹងមិនសូវជាចូលចិត្តសិក្សាស្វែងរកចំណេះដឹងប៉ុន្មានទេ(បែរខ្នងដាក់រូបទឹកជួង) តែចូលចិត្តការដើរលេងច្រើនជាង តែដល់ពេលធំឡើង ក្លាយជាមនុស្សចាស់ ក៏ងាកមកផ្តល់ភាពសំខាន់លើការស្វែងរកចំណេះដឹងវិញម្តង(បែរមុខរករូបទឹកជួង)។
-សន្លឹកបៀ J ការ៉ូ រូបកំលោះនឹងបែរសម្លឹងទៅខាង មិនចំរូបទឹកការ៉ូទេ
ចំណែកសន្លឹកបៀ K ការ៉ូ វិញ រូបកញ្ចាស់នឹងសម្លឹងចំរូបទឹកការ៉ូតែម្តង

ដែលវាមានន័យថា មនុស្សយើងកាលស្ថិតក្នុងវ័យកំលោះនឹងមិនខ្វល់ខ្វាយពីរឿងសន្សំលុយកាក់ ទ្រព្យសម្បត្តិឡើយ គឺចាយវាយតាមចិត្តខ្លួនឯងចង់ រកមកបានច្រើន ក៏ចាយច្រើនដែរ តែដល់ពេលអាយុច្រើនឡើង ក៏ចាប់ផ្តើមចេះរៀបផែនការការចាយវាយលុយកាក់ ដោយសារតែមានភាពទទួលខុសត្រូវខ្ពស់ឡើងហ្នឹងឯង។

តែ…ដល់សន្លឹកបៀ J កឺ វិញ រូបកំលោះនឹងបែរមុខសម្លឹងចំរូបទឹកកឺតែម្តង។
ចំណែកសន្លឹកបៀ K វិញ នឹងសម្លឹងទៅខាងវិញម្តង(មិនចំរូបទឹកកឺទេ)។
នោះគឺមានន័យថា កាលពីនៅវ័យកំលោះ មនុស្សយើងនឹងចាប់អារម្មណ៍រឿងស្នេហាខ្លាំងជាពិសេសតែម្តងតែដល់ពេលមានអាយុច្រើនឡើង ការចាប់អារម្មណ៍ក្នុងរឿងនេះ ក៏នឹងថយចុះ តែទៅផ្តល់ការចាប់អារម្មណ៍លើរឿងផ្សេងទៀតវិញ ដូចជា មុខងារតូនាទី ឬលុយកាក់ប្រាក់កាស ទ្រព្យសម្បត្តិវិញម្តង។

និងមានតែសន្លឹកបៀទឹក ប៊ិច តែមួយគត់ ដែលទាំង J , Q និង K សុទ្ធតែបែរខ្នងដាក់រូបទឹកប៊ិចទាំងអស់ វាក៏ប្រៀបដូចនឹងមនុស្សយើង ដែលមិនថាប្រុស ឬក៏ស្រីនោះទេ សុទ្ធតែគ្មានអ្នកណាចង់ស្លាប់ឡើយ និងខ្លាចសេចក្តីស្លាប់ទាំងអស់គ្នា(បែរខ្នងដាក់រូបទឹកប៊ិចទាំងអស់)៕

February 12, 2020

តារាសម្ដែង មាស សៀវប៉ាយ ជួបគ្រោះថ្នាក់ចរាចរណ៍សន្លប់ស្ដូកស្ដឹង

នៅវេលាប្រមាណម៉ោងជា៣យប់ ត្រូវនឹងព្រឹកថ្ងៃទី១២ កុម្ភៈ ឆ្នាំ២០២០ តារាសម្ដែងលោក មាស សៀវប៉ាយ ដែលត្រូវគេដឹងធ្វើជាអ្នករត់តុនៅក្នុងក្លិបកម្សាន្ដមួយបន្ថែមពីលើការសម្ដែង ព្រោះតែជីវភាព ត្រូវបានគេបង្ហោះថា បានជួបគ្រោះថ្នាក់ចរាចរណ៍ ដោយត្រូវមូតូបុកពេលចេញពីធ្វើការ ហើយសន្លប់មិនដឹងខ្លួន។ មកទល់ម៉ោងនេះ លោកត្រូវបានអ្នកឃើញតាមផ្លូវបញ្ជូនទៅកាន់មន្ទីរពេទ្យរុស្ស៊ី ដោយទើបតែមានសាច់ញាតិមកជួយកំដរនៅក្រោយមកដល់មន្ទីរពេទ្យ។

អ្នកលើកទូរស័ព្ទដែលអះអាងថាជាបងស្រី បានឆ្លើយបញ្ជាក់ថា លោក មាស សៀវប៉ាយ ស្ថិតក្នុងសភាពសន្លប់មិនទាន់ដឹងខ្លួននៅឡើយ ដោយលោកមានការប៉ះទង្គិចផ្នែកក្បាលធ្ងន់ធ្ងរ ដោយមានខ្ទាំក្បាល និងមានឈាមកក។ បងស្រីរបស់លោកបញ្ជាក់ថា នៅមិនទាន់ដព្រឹកយប់ថ្ងៃទាន់ដឹងថា លោកគ្រោះថ្នាក់ចរាចរនៅទីតាំងណានៅឡើយ ខណៈដែលលោកត្រូវបានគេដឹងថា ក្រៅពីសម្ដែង គឺធ្វើជាអ្នករត់តុ និងទទួលភ្ញៀវ នៅក្នុងក្លិប QK ស្ថិតនៅម្ដុំក្ដាន់ពីរ ដោយសារតែការសម្ដែងទទួលបានចំណូលតិច និងមិនសូវមានទីផ្សារ។

បងស្រីរបស់លោកនិយាយថា ក្មុងពេលប៉ះគ្នាភ្លាមៗ ម៉ូតូបង្កហេតុម្ខាងទៀត ត្រូវបានគេឃាត់ទុក ប៉ុន្តែក្រោយពេលចលាចលរឿងបញ្ជូនលោក មាស សៀវប៉ាយ ទៅកាន់មន្ទីរពេទ្យ ក៏លួចរត់បាត់ ហើយម៉ូតូរបស់លោក ក៏ត្រូវបានប៉ូលីសយករក្សាទុក តែមិនទាន់ដឹងថារក្សាទុកនៅខ័ណ្ឌណានៅឡើយទេ ក្នុងពេលគ្រួសាររបស់លោក ស្ថិតក្នុងការបារម្ភពីលោកនៅឡើ៕

February 12, 2020

កូនញៀនជាមួយនឹងឧបករណ៍អេឡិចត្រូនិក គួរដោះស្រាយយ៉ាងណា?

នាពេលបច្ចុប្បន្ននេះ កុមារជាច្រើនបានញៀនជាមួយនឹងឧបករណ៍អេឡិចត្រូនិក ដែលធ្វើឱ្យអាណាព្យាបាលមានការព្រួយបារម្ភពីអនាគតកូនៗរបស់ពួកគាត់ ដែលមិនអាចដកខ្លួនរួចពីឧបករណ៍ទាំងអស់នោះ ធ្វើឱ្យភាពស្និទ្ធស្នាលរវាងឪពុកម្តាយ និងកូនៗកាន់តែថយចុះទៀតផង។

ដំណោះស្រាយទាំងអស់នេះត្រូវបានគេហទំព័រ Telegraph ដកស្រង់សម្តីអ្នកស្រាវជ្រាវឈ្មោះ Catherine Steiner Adair នៃមហាវិទ្យាល័យសុខាភិបាលនៃសាកលវិទ្យាល័យ Harvard ថា ក្មេងជាវ័យដែលចូលចិត្ត និងស្វែងយល់គ្រប់យ៉ាងតាមរយៈការលេង ហេតុនេះនៅពេលដែលអាណាព្យាបាលមិនមានពេលគ្រប់គ្រាន់ក្នុងការលេងជាមួយកូន ស្របពេលដែលបច្ចេកវិទ្យាកំពុងសម្បូរបែបអាចធ្វើឱ្យក្មេងងាកទៅប្រើប្រាស់បច្ចេកវិទ្យាច្រើនជាងនៅជាមួយគ្រួសារ។ ជាដំណោះស្រាយសម្រាប់បញ្ហានេះ អាណាព្យាបាលគួរចំណាយពេលវេលាឱ្យបានច្រើនដើម្បីនៅជាមួយកូនៗ ហើយចំណាយពេលឱ្យបានច្រើនដើម្បីនាំកូនទៅកម្សាន្តនៅកន្លែងទាំងឡាយណាដែលមិនមែនជាការលេងឧបករណ៍អេឡិចត្រូនិក ដូចជាការលេងកីឡា ការគូរគំនូរ ដើរទិញសៀវភៅ ឬការកម្សាន្តជាលក្ខណៈគ្រួសារជាដើម។

ចំណុចសំខាន់មួយទៀតផងដែរ អាណាព្យាបាលគួរសាកល្បងឧស្សាហ៍ផ្តល់រង្វាន់ឱ្យកូននៅពេលដែលកូនៗបានចំណាយពេលវេលាច្រើនបំផុតដើម្បីអានសៀវភៅ ឬបង្កើតអ្វីដែលថ្មីដោយខ្លួនឯងដើម្បីឱ្យគេសប្បាយរីករាយជាមួយនឹងការច្នៃប្រឌិត។

ទន្ទឹមនឹងនេះអាណាព្យាបាលអាចស្វែងរកពេលយ៉ាងហោចណាស់មួយម៉ោងដើម្បីសាកសួរពីអ្វីដែលកូនៗបានធ្វើ ឬចំណុចល្អដែលគេចង់អួតប្រាប់មនុស្សធំ ហើយចេះសរសើរ និងបញ្ចូលនូវរឿងកំប្លែងសប្បាយតែបង្កប់ដោយន័យអប់រំដល់ពូកគេ។ នៅពេលដែលក្មេងសប្បាយច្រើនជាមួយនឹងក្រុមគ្រួសារ ការញៀនល្បែងអ៊ីនធើណេត និងឧបករណ៍អេឡិចត្រូនិកក៏អាចកាត់បន្ថយបានដូចគ្នា។

សម្រាប់អ្នកដែលមានកូនញៀនជាមួយនឹងឧបករណ៍អេឡិចត្រូនិករួចទៅហើយ សូមអាណាព្យាបាលទាំងអស់កុំបង្អាក់កូនដោយការដាក់ពិន័យ ឬគំរាមកូនកុំឱ្យលេង ព្រោះការធ្វើបែបនេះអាចប៉ះពាល់ដល់ផ្លូវចិត្តក្មេងរហូតដល់ធ្វើឱ្យពួកគេស្អប់ឪពុកម្តាយ ឬក្លាយជាមនុស្សហិង្សាបាន។ ដំណោះស្រាយដែលល្អ អ្នកអាចសាកល្បងបង្វែនូវល្បែងដែលគេធ្លាប់លេងដោយគ្មានប្រយោជន៍ ហើយណែនាំនូវល្បែងជក់ចិត្តផ្សេងៗទៀតដែលមានប្រយោជន៍សម្រាប់ការអប់រំ។

ដំណាក់កាលនេះ ជាស្ថានភាពពិបាកបន្តិច ព្រោះក្មេងអាចនឹងងាកមកលេងល្បែងដែលគេពេញចិត្ត ហើយក៏អាចមិនងាយបញ្ឈប់សកម្មភាពបាននោះទេ តែទោះជាយ៉ាងណាក៏វាអាចជួយជំរុញក្មេងឱ្យដើរផ្លូវត្រូវមួយដំណាក់កាលផងដែរមុននឹងពត់ពួកគេឱ្យនៅកាន់តែឆ្ងាយពីឧបករណ៍អេឡិចត្រូនិក។

បន្ទាប់ពីអាចណែនាំក្មេងឱ្យងាកមកលេងល្បែងដែលមានប្រយោជន៍ហើយ អាណាព្យាបាលគួរព្យាយាមសង្កេតពីម៉ោងពេលដែលកូនៗចូលចិត្តលេងឧបករណ៍អេឡិចត្រូនិកជាងគេ ដែលភាគច្រើនជាពេលល្ងាច (ចន្លោះពីម៉ោង ៤ល្ងាច-ម៉ោង៦ល្ងាច) ក្រោយពេលបាយថ្ងៃហើយ និងពេលយប់។ អ្នកអាចរើសម៉ោងណាមួយដែលកូនចូលចិត្តលេងបំផុត ឬតែងតែនឹកឃើញពីឧបករណ៍អេឡិចត្រូនិក ដើម្បីបបួលពួកគេមើលរឿងដែលគេចូលចិត្តបំផុត។

ក្រៅពីនេះ អាណាព្យាបាលគួរស្វែងយល់ផងដែរពីចំណង់ចំណូលចិត្តរបស់កូន និងអ្វីដែលគេចង់បាន។ នៅពេលដែលបានដឹងច្បាស់ហើយ អ្នកអាចសាកល្បងនាំពួកគេទៅទិញរបស់ដែលគេចង់បាននៅក្នុងម៉ោងដែលគេតែងតែលេងឧបករណ៍អេឡិចត្រូនិកទាំងអស់នោះ ឬបង្រៀនកូនៗឱ្យចេះលេងនូវល្បែងកម្សាន្តដែលអាចធ្វើឱ្យក្មេងរីករាយ ហើយប្តូរម៉ោងប្រើប្រាស់ឧបករណ៍អេឡិចត្រូនិកដល់ពួកគេដើម្បីកាត់បន្ថយចំណង់បន្តិចម្តងៗរហូតដល់អ្នកអាចគ្រប់គ្រងបានទាំងស្រុងនៅទីបំផុត៕

February 12, 2020

7 រឿងគួរប្រតិបត្តិក្នុងជីវិត រួមគោលគំនិតពីព្រះធម៌

1 – សម្លឹងមើលពិភពលោកក្នុងន័យល្អ ជីវិតក៏មានតែរឿងរីករាយ
សម្លឹងមើលពិភពលោកក្នុងន័យអាក្រក់ ជីវិតកករល្អក់ និងទុក្ខសោក
“គំនិតល្អៗវិជ្ជមានជាប្រភពនៃសេចក្តីសុខ”

2 – មនុស្សមានបញ្ញា ច្បាស់ជាប្រើបញ្ញា ក្នុងការកែបញ្ហា
ចូររៀនយល់ដឹងក្នុងការប្តូរបញ្ហា ឱ្យក្លាយជាបញ្ញា
“បញ្ញាល្អច្បាស់ជាមានសេចក្តីសុខ”

3 – បុប្ផារីកស្គុសស្គាយ តែក៏ងាយនឹងរុះរោយ
ឯអំពើល្អរបស់មនុស្សវិញ គង់វង្សពាសពេញជានិរន្តរ៍
“ជីវិតរបស់មនុស្សល្អ គឺជីវិតដែលមានតែសេចក្តីសុខ”

4 – បាបមិត្ត គឺ មិត្តអាក្រក់ មិត្តដែលនាំទៅរកអំពើបាប
កល្យាណមិត្ត គឺ មិត្តល្អ ចូរសេពគប់ចុះ
សម្ព័ន្ធមិត្ត គឺ មិត្តដែលចងសម្ព័ន្ធនឹងគ្នាព្រោះផលប្រយោជន៍ មិត្តបែបហ្នឹង ចូរប្រយ័ត្ន!
“មានសម្ព័ន្ធភាពល្អ ជីវិតក៏មានសេចក្តីសុខ”

5 – ចូរមានសេចក្តីសុខខណៈធ្វើការ
ចូររីករាយចិន្តាខណៈដកដង្ហើម
“ធ្វើការងារល្អ ជីវិតក៏មានសេចក្តីសុខ”

6 – អ្វីគ្រប់យ៉ាងក្នុងលោកនេះ វាត្រឹមត្រូវស្រាប់ទៅហើយ
មានតែការយល់ឃើញរបស់មនុស្សយើងប៉ុណ្ណោះដែលខុស
“សម្លឹងមើលពិភពលោកក្នុងន័យល្អ ជីវិតក៏មានសេចក្តីសុខ”

7 – ក្រុមគ្រួសារគឺ មូលដ្ឋានសំខាន់របស់ជីវិត
មានក្រុមគ្រួសារល្អ ជីវិតក៏មានសេចក្តីសុខ
“មានក្រុមគ្រួសារល្អ ជីវិតក៏នឹងមានសេចក្តីសុខទ្វេគុណ”

រៀបរៀងដោយៈ តាវ៉ែនតា

February 12, 2020

ប្រាប់តគ្នា !! ទទួលទានសាច់អាំងញឹកញយ កើតជំងឺមហារីក

ជារៀងរាល់ថ្ងៃ ប្រសិនបើអ្នកទទួលទានសាច់អាំងជាញឹកញាប់ពេក ឬនិយមទទួលទានសាច់អាំងរាល់ថ្ងៃ នោះមិនបានសេចក្ដីថា អ្នកកំពុងទទួលទានអាហារប៉ូវថាមពលឡើយ ផ្ទុយទៅវិញអ្នកកំពុងប្រឈមមុខជាមួយការកើតជំងឺមហារីកហើយ។ បើតាមអ្នកជំនាញបានឲ្យដឹងថា ដើម្បីទទួលទានអាហារប្រភេទសាច់អាំងទាំងឡាយ ដែលជៀសផុតពីជំងឺមហារីកបាន គួរតែទទួលទានតាមវិធីបែបនេះ៖

១.គួរអាំងបន្លែ ផ្សិត ផ្លែឈើ ជាជាងអាំងសាច់គ្រប់ប្រភេទ
២.ប្រសិនបើចង់អាំងសាច់គោ ឬត្រី គួរតែជ្រើសសាច់ណាដែលមិនមានជាប់ខ្លាញ់
៣.មិនត្រូវអាំងសាច់ដែលកក ដោយការក្លាសេ ត្រូវទុកឲ្យរលាយទឹកកកជាមុនសិន
៤.អាំងសាច់ក្នុងម៉ាស៊ីនកំដៅអាហារ microwave ២ ទៅ ៥ នាទីជាមុនសិន ដើម្បីសម្លាប់មេរោគមហារីកជាប់នឹងសាច់ ៩០ភាគរយ
៥.រុំ ឬចងអាហារឲ្យជិតមុនយកទៅអាំង រយៈពេល ១នាទីមុនអាំង ព្រោះវាជួយការពារមេរោគមិនឲ្យទុំជាប់អាហារ
៦.ហាមប្រើកំដៅភ្លើងក្ដៅខ្លាំង ក្នុងការអាំងសាច់ ព្រោះវាបណ្ដាល់ឲ្យខ្លោច ដែលជាសារធាតុបង្ករមេរោគមហារីក
៧.បើអាំងដោយចង្រ្កានហ្គាស់ ត្រូវបន្ថយសីតុណ្ហភាពឲ្យទាបបំផុត យកល្អគួរប្រើចង្រ្កានធ្យូង
៨.បើអាំងចង្រ្កានធ្យូង គួរប្រើចង្ក្រានឡួវ ជាជាងចង្ក្រានប្រើអុស
៩.ជៀសវាងអាំងសាច់កុំឲ្យខ្លោច
ជាចុងក្រោយ ប្រសិនបើអ្នកនិយមទទួលទានអាហារអាំង សូមជៀសវាងការអាំងរហូតដល់ខ្លោច ឬគ្រាមពេក ព្រោះអ្នកអាចនឹងប្រឈមមុខជាមួយជំងឺមហារីកបានគ្រប់ពេលវេលា ៕

February 12, 2020

បើសិនយើងពង្រីងទឹកសមុទ្រឱ្យអស់ តើផែនដីនឹងមានរូបរាងយ៉ាងណា?

សមុទ្រកំពុងគ្របដណ្ដប់ផ្ទៃដីភាគច្រើននៃភពផែនដី រួមទាំងជួរភ្នំវែងបំផុតក្នុងលោក និងតំបន់ “ស្ពាន” បុរាណដែលមនុស្សប្រើប្រាស់ដើម្បីធ្វើដំណើរឆ្លងទ្វីប។

នៅក្នុងឃ្លីបវីដេអូមួយដែលត្រូវបានបង្កើតឡើងដោយទីភ្នាក់ងារអវកាស NASA កាលពីឆ្នាំ 2008 អ្នកវិទ្យាសាស្ត្រខាងភព គឺលោកបណ្ឌិត James O’Donoghue បានបង្ហាញឱ្យយើងឃើញអំពីរូបរាងដ៏សោះកក្រោះនៃភពផែនដី បន្ទាប់ពីទឹកក្នុងមហាសមុទ្រ ត្រូវបានធ្វើឱ្យរីងហួតអស់។

លោកបណ្ឌិត James O’Donoghue បច្ចុប្បន្ន ធ្វើការឱ្យទីភ្នាក់ងារអវកាសជប៉ុន JAXA ដែលដើមឡើយ គាត់ធ្លាប់បានធ្វើការឱ្យអង្គការ NASA របស់សហរដ្ឋអាមេរិក។ លោកបណ្ឌិត James O’Donoghue បានប្រើប្រាស់ឃ្លីបវីដេអូរបស់អ្នករូបវិទ្យា និងជាផលិតករភាពយន្តតុក្កតា Horace Mitchell ដែលបានបង្កើតឡើងកាលពីឆ្នាំ 2008។ បណ្ឌិតរូបនេះ បានបន្ថយល្បឿននៃវីដេអូ និងបានបន្ថែមសញ្ញា ឬរូបភាពនៃកម្រិតទឹកក្នុងសមុទ្រដែលហួតបន្តិចម្ដងៗ ទាល់តែអស់ពីផែនដី។

បន្ទាប់ពីទឹកសមុទ្រត្រូវរីង ផ្នែកដំបូងនៃផ្ទៃដីដែលលេចចេញ គឺជាខ្ពង់រាបបាត់សមុទ្រ និងបណ្ដាចង្កេះទ្វីប ឬតំបន់ខណ្ឌចែកព្រំដែននៃបណ្ដាទ្វីប។

លោកបណ្ឌិត James O’Donoghue បានមានប្រសាសន៍ថា ៖ “ខ្ញុំបានពន្យឺតផ្នែកដំបូងនៃវីដេអូ ហើយពិតជាគួរឱ្យភ្ញាក់់ផ្អើលណាស់ ព្រោះមានទេសភាពដ៏ស្រស់ស្អាតនៅក្នុងសមុទ្រដែលលេចចេញក្នុងជម្រៅ10ម៉ែត្រដំបូង”។

បណ្ដាខ្ពង់រាបបាតសមុទ្ររួមមានតំបន់ខ្ពស់ៗដែលមនុស្សយើងសម័យដើម បានប្រើប្រាស់ដើម្បីធ្វើការផ្លាស់ទីពីទ្វីបនេះ ទៅកាន់ទ្វីបនោះ។ កាលពីប៉ុន្មានម៉ឺនឆ្នាំមុន បុព្វបុរសរបស់យើងអាចធ្វើដំណើរពីទ្វីបអឺរ៉ុបទៅកាន់ចក្រភពអង់គ្លេស ពីរុស្ស៊ីទៅកាន់អាមេរិក និងពីអូស្ត្រាលីទៅកាន់បណ្ដាកោះផ្សេងៗដែលនៅជុំវិញនោះ។

បណ្ឌិត O’Donoghue បន្ថែមថា ៖ “នៅពេលដែលយុគសម័យទឹកកកចុងក្រោយបានកើតឡើង ទឹកសមុទ្រត្រូវកកជាទឹកកក ដូចទៅនឹងផ្ទាំងទឹកកកធំៗនៅប៉ូលទាំងពីរនៃផែនដី។ នោះគឺជាមូលហេតុដែលនាំឱ្យបណ្ដា “ស្ពាន” នៃទ្វីបកើតឡើង។ “ស្ពាន” ទាំងនេះ អនុញ្ញាតឱ្យមនុស្សលោកអាចធ្វើដំណើរពីតំបន់មួយទៅតំបន់មួយ។ នៅពេលយុគសម័យទឹកកកបានកន្លងផុតទៅ ទឹកសមុទ្រក៏បានលុបផ្លូវទាំងនេះ”។

ដោយការបំបាត់ទឹកសមុទ្រ ឃ្លីបវីដេអូនេះ បាននាំយើងទៅទស្សនាពិភពលោកក្នុងយុគសម័យដើមរបស់មនុស្ស។

វាក៏បានបង្ហាញឱ្យឃើញជួរភ្នំដែលវែងបំផុតរបស់ផែនដី នៅពេលទឹកសមុទ្រស្រកចុះចាប់ពី 2,000ម៉ែត្រ ទៅ 3,000ម៉ែត្រ។ នោះគឺជាជួរភ្នំដែលស្ថិតនៅកណ្ដាលមហាសមុទ្រ ប្រវែងជាង 60,000គីឡូម៉ែត្រ និងអូសបន្លាយពេញផែនដី។ 90% នៃជួរភ្នំនេះ ស្ថិតក្រោមទឹកសមុទ្រ។

នៅពេលទឹកសមុទ្របានស្រកចុះជាង 6,000ម៉ែត្រ ផ្ទៃក្រឡានៃសមុទ្រភាគច្រើនបានបាត់បង់។ ប៉ុន្តែ គេត្រូវសម្រកទឹកសមុទ្រ 5,000ម៉ែត្របន្ថែមទៀត ទើបតំបន់ជ្រៅបំផុតនៃជ្រលង Mariana ត្រូវរីងអស់។

លោកបណ្ឌិត James O’Donoghue បញ្ជាក់ថា ៖ “ការធ្វើឱ្យទឹកសមុទ្ររីង មិនត្រឹមតែឱ្យយើងមើលឃើញជម្រៅបាតសមុទ្រនោះទេ តែវាក៏ជួយឱ្យមើលឃើញប្រវត្តិសាស្ត្រនាយុគសម័យដើមនៃមនុស្សជាតិផងដែរ”៕

ប្រភព៖ សារព័ត៌មានបរទេស

February 11, 2020

ស្វែងយល់ពីចំណុចខ្វះខាត និងចេះកំណត់ចំណុចអាទិភាព នេះជាគន្លឹះសំខាន់ក្នុងការរៀនឱ្យពូកែ

ការសិក្សាជាចំណុចមូលដ្ឋានដ៏សំខាន់មួយដែលមិនអាចខ្វះបានសម្រាប់ការរីកចម្រើននៅក្នុងជីវិត ព្រោះមុននឹងក្លាយជាអ្នកជំនាញ ឬក្លាយជាម្ចាស់អាជីវកម្មល្អម្នាក់នៅថ្ងៃអនាគត យើងត្រូវដុសខាត់សមត្ថភាពជាមួយនឹងការសិក្សារៀនសូត្រនៅក្នុងសាលាជាមុនសិន។ ថ្វីដ្បិតតែមនុស្សគ្រប់គ្នាត្រូវការសិក្សា តែមិនមែនគ្រប់គ្នាសុទ្ធតែអាចរៀនបានពូកែ និងទទួលបានលទ្ធលផលល្អក្នុងជីវិតដូចគ្នានោះទេ។ វាទាមទារឱ្យមានវិធីសាស្រ្តក្នុងការគ្រប់គ្រង ឬវិធីក្នុងការដោះស្រាយបញ្ហានានាដើម្បីឱ្យក្លាយជាអ្នករៀនពូកែបាន។

ពាក់ព័ន្ធនឹងបញ្ហានេះ យុវជន តៅ វីល្លៀម អតីតសិស្សពូកែនិទ្ទេស A បានលើកឡើងថាដើម្បីក្លាយជាសិស្សពូកែ អ្នកសិក្សាទាំងអស់ចាំបាច់ត្រូវតែចេះគ្រប់គ្រងខ្លួនឯងឱ្យបានល្អ ជាពិសេសយុវវ័យដែលកំពុងសិក្សានៅកម្រិតមធ្យមសិក្សា។ នៅក្នុងវ័យនេះ ជាវ័យដែលមានការអូសទាញច្រើន ព្រោះជាវ័យដែលងាយជក់ជាមួយនឹងបច្ចេកវិទ្យា ងាយអូសទាញដោយការកម្សាន្តខាងក្រៅ និងជាពេលដែលលំបាកគ្រប់គ្រងខ្លួនឯងបំផុត។ ហេតុនេះ ប្រសិនបើយើងចេះគ្រប់គ្រងខ្លួនឯងបានល្អដោយការកំណត់ចំណុចអាទិភាពសម្រាប់មេរៀននីមួយៗ នោះយើងនឹងអាចគ្រប់គ្រងការសិក្សាបានដោយមិនលំបាកខ្លាំងពេកនោះទេ។ ជាធម្មតានៅពេលដែលទុកមេរៀនឱ្យនៅគរ ឬច្របូកច្របល់ជាមួយគ្នានោះ យើងនឹងមានភាពស្មុគស្មាញខ្លាំង ហើយលំបាកដោះស្រាយ តែប្រសិនបើយើងព្យាយាមស្វែងយល់ពីខ្លួនឯងច្បាស់ យើងនឹងអាចរៀបចំផែនការសិក្សាបានល្អ។

យុវជន តៅ វីល្លៀម បាននិយាយថា៖ «ដើម្បីចាប់ផ្តើមអភិវឌ្ឍសមត្ថភាពខ្លួនឯងឱ្យបានកាន់តែខ្លាំង យើងចាំបាច់ត្រូវដឹងពីចំណុចខ្លាំង និងចំណុចខ្សោយរបស់ខ្លួនឯងឱ្យបានច្បាស់លាស់ជាមុនសិន។ ក្រោយពេលយើងដឹងច្បាស់ហើយថា យើងខ្សោយត្រង់ចំណុចណាខ្លះ ឬមានចន្លោះប្រហោងច្រើនលើចំណុចណាខ្លះ យើងនឹងមានភាពងាយស្រួលក្នុងស្វែងរកដំណោះស្រាយក្នុងការកែលម្អចំណុចខ្វះខាតទាំងអស់នោះ»។

សិស្សពូកែខាងលើបានលើកឡើងផងដែរថា ការផ្លាស់ប្តូរចំណុចខ្សោយ ឬទម្លាប់មិនល្អដែលជាមេរោគសម្រាប់អភិវឌ្ឍន៍សមត្ថភាពក្នុងការរៀនសូត្រមិនមែនជារឿងងាយនោះទេ ព្រោះជាធម្មតានៅពេលដែលយើងរៀន អារម្មណ៍អូសទាញក៏ចាប់ផ្តើមកើតមានដំណាលគ្នានេះដែរ។ ហេតុនេះចាំបាច់ត្រូវមានវិធីសាស្រ្តក្នុងការយកឈ្នះអារម្មណ៍អូសទាញអវិជ្ជមានដោយការកំណត់គោលដៅសិក្សាឱ្យបានច្បាស់លាស់ និងយកក្តីស្រមៃដើម្បីទប់ស្កាត់ភាពអសកម្ម។

យុវជនរូបនេះលើកឡើងផងដែរថា ជាឧទាហរណ៍ជាក់ស្តែង គាត់ជាមនុស្សដែលចូលចិត្តលេងទូរស័ព្ទដៃ ហើយបញ្ហានេះបានរំខានខ្លាំងដល់ការរៀនសូត្រដែលធ្វើឱ្យគាត់មិនអាចអភិវឌ្ឍសមត្ថភាពបានល្អកាលពីប៉ុន្មានឆ្នាំមុន តែដោយសារតែគាត់រកឃើញចំណុចខ្សោយនេះហើយទើបធ្វើឱ្យគាត់ចាប់ផ្តើមកំណត់គោលដៅ ថានឹងក្លាយជាសិស្សពូកែឱ្យបាន ជាពិសេសទទួលបាននិទ្ទេសល្អឱ្យបាន។ រូបភាពនៃគោលដៅទាំងអស់នេះហើយជាចំណុចដែលគាត់ចាប់ផ្តើមយកមកទប់ចំណង់មិនល្អ ដែលចេះតែអូសទាញឱ្យគាត់ទៅលេងទូស័ព្ទនៅពេលរៀន។ រាល់ពេលរៀនសូត្រ គាត់បាននឹកឃើញដល់គោលដៅធំបំផុតនោះ ហើយកំណត់ថាការខិតខំរៀនជាចំណុចអាទិភាពដំបូងបំផុត ប្រសិនបើមិនបានរៀនចប់តាមការកំណត់នោះទេ គាត់មិនអាចប៉ះបច្ចេកវិទ្យាបានទេ។

ទន្ទឹមនឹងគ្នានេះដែរ លោក ចេង បូរិទ្ធ អតីតសិស្សពូកែ និងជាគ្រូបង្រៀនផ្នែកគណិតវិទ្យាក៏បានលើកឡើងដែរថា ការខំប្រឹងរៀនតែមួយមុខមិនទាន់គ្រប់គ្រាន់នោះទេសម្រាប់អ្នកចង់រៀនពូកែព្រោះមានអ្នកខ្លះគាត់ខំប្រឹងប្រែងរៀនដែរ តែមិនសូវទទួលបានលទ្ធផលល្អ។ បញ្ហានេះមកពីគាត់មិនបានគ្រប់គ្រងផែនការសិក្សាឱ្យបានល្អ គឺគិតតែខំរៀនក្នុងស្ថានភាពច្របូកច្របល់។ លោកថា សម្រាប់អ្នកសិក្សាភាគច្រើន គឺខិតខំដោយពេលជាពិសេសពេលជិតប្រឡងម្តងៗ ទើបពួកគាត់ខំរៀន ដែលបញ្ហានេះធ្វើឱ្យគាត់ខំខ្លាំង និងគំហុកខ្លាំងពេក តែមិនទទួលបានផលល្អ។ ចំណែកឯអ្នកខ្លះទៀតខំរៀនមុខវិជ្ជាជាច្រើនក្នុងពេលតែមួយឬរៀនតាមអារម្មណ៍ដោយគ្មានផែនការ និងគ្មានកាលវិភាគច្បាស់លាស់ ដែលធ្វើឱ្យគាត់ពូកែដោយមុខវិជ្ជា ហើយធ្វើឱ្យមុខវិជ្ជាមួយចំនួនទៀតមានបញ្ហា ដែលបញ្ហានេះធ្វើឱ្យលទ្ធផលប្រឡងរបស់គាត់មិនទទួលបានលទ្ធផលល្អ។

លោក ចេង បូរិទ្ធ បាននិយាយថា៖ «ដើម្បីឱ្យការសិក្សាមានភាពរលូន និងងាយគ្រប់គ្រង អ្នកសិក្សាទាំងអស់គួរកំណត់ផែនការឱ្យបានច្បាស់ និងស្វែងយល់ពីចំណុចដែលត្រូវអភិវឌ្ឍឱ្យបានច្រើនដើម្បីងាយស្រួលបំពេញបន្ថែម»។

លោកបូរិទ្ធ បានបន្ថែមផងដែរថា អ្នកសិក្សាមិនអាចរៀនតែមុខវិជ្ជាដែលខ្លួនចូលចិត្តខ្លាំង ហើយបោះបង់ចោលមុខវិជ្ជាដែលមិនសូវចូលចិត្តនោះទេ។

ពួកគេចាំបាច់ត្រូវតែខិតខំឱ្យមានតុល្យភាពទើបអាចទទួលបានជោគជ័យ ព្រោះនៅពេលប្រឡងគេមិនប្រឡងតែ 1មុខវិជ្ជានោះទេ។ ហេតុនេះ ប្រសិនបើគាត់ដឹងច្បាស់ថា គាត់ខ្សោយចំណុចណា គាត់អាចធ្វើចិត្តឱ្យស្ងប់ ហើយរៀបចំផែនការដោយកំណត់ម៉ោងឱ្យច្រើនលើមុខវិជ្ជាដែលខ្សោយនោះនិងទុកពេលសមល្មមដើម្បីរំឭក ឬអភិវឌ្ឍបន្ថែមនូវមុខវិជ្ជាដែលខ្លួនខ្លាំងរួចទៅហើយ។ ការធ្វើបែបនេះជាវិធីដែលសិស្សពូកែភាគច្រើនធ្វើ ហើយវាក៏ជាចំណុចដែលកាត់បន្ថយភាពភ័យខ្លាចនៅក្នុងពេលប្រឡងបានផងដែរ ព្រោះនៅពេលយើងយល់ដឹងបានច្រើនគួរសមពីគ្រប់ផ្នែកហើយ យើងនឹងអាចមានជំនឿចិត្តថា លទ្ធផលរបស់យើងនឹងអាចចេញមកល្អ បើទោះបីជាមិនឥតខ្ចោះក៏ដោយ៕

February 11, 2020

Category: សង្គម និងសេដ្ឋកិច្ច