សង្គម និងសេដ្ឋកិច្ច - La Reine Media

គ្រឿងផ្តត់ផ្គង់ពីចិន មិនគ្រប់គ្រាន់ ព្រោះកំពុងផ្ទុះវីរុសកូរ៉ូណា ក្រុមហ៊ុនផលិតរថយន្តជាច្រើននឹងបិទទ្វាររោងចក្របណ្តោះអាសន្ន

ក្រុមហ៊ុនផលិតរថយន្តជប៉ុន Nissan នឹងផ្អាកចង្វាក់ផលិតកម្មរបស់ខ្លួនចំនួន 2ថ្ងៃ ក្នុងប្រទេសជប៉ុន ដែលបច្ចុប្បន្នកំពុងផលិតរថយន្ត Nissan Serena និង X-Trail។ ជាមួយគ្នានេះ ក្រុមហ៊ុនផលិតរថយន្តជាច្រើននៅទូទាំងពិភពលោក ក៏កំពុងជួបបញ្ហាស្រដៀងគ្នានេះដែរ ហើយបានបិទទ្វាររោងចក្ររបស់ខ្លួនផងដែរ ដោយសារតែមេរោគវីរុសកូរ៉ូណានៅក្នុងប្រទេសចិន ដែលកំពុងបង្កឱ្យមានអ្នកឆ្លង និងមនុស្សស្លាប់រាប់ពាន់នាក់។

ជាក់ស្តែង ក្រុមហ៊ុន Hyundai ក៏បានបិទទ្វាររោងចក្ររបស់ខ្លួននៅក្នុងប្រទេសកូរ៉េខាងត្បូងជាបណ្តោះអាសន្នដែរ ដោយសារតែខ្វះគ្រឿងបន្លាស់ពីប្រទេសចិន។

ក្រុមហ៊ុនផលិតរថយន្តធំៗជាច្រើននៅទូទាំងពិភពលោក កំពុងជួបបញ្ហាខ្វះគ្រឿងផ្គុំ រថយន្ត ស្របពេលដែលរោងចក្រផលិតគ្រឿងផ្គុំរថយន្តនៅប្រទេសចិន បាននិងកំពុងបិទទ្វារជាបន្តបន្ទាប់ដោយសារវិបត្តិមេរោគវីរុសកូរ៉ូណា ក្នុងនោះ Nissan គឺជាក្រុមហ៊ុនផលិតរថយន្តចុងក្រោយបង្អស់មួយ ដែលនឹងបិទទ្វាររោងចក្ររបស់ខ្លួនបណ្តោះអាសន្ន និងដោយសារតែបញ្ហានេះ បានធ្វើឱ្យអាជីវកម្មធំៗដែលពឹងពាក់លើខ្សែចង្វាក់ផលិតកម្មរបស់ប្រទេសចិន ត្រូវបានផ្អាកដំណើរការជាបណ្ដោះអាសន្ន៕

February 13, 2020

យុវជនចង់ឃើញប្រជាជនយល់ដឹងពីទិវានៃក្តីស្រឡាញ់ និងអនុវត្តឱ្យបានត្រឹមត្រូវ

កម្ពុជាជាប្រទេសដែលមានវប្បធម៌ដ៏ល្បីល្បាញនិងចំណាស់មួយនៅលើពិភពលោក តែអ្វីដែលជាលក្ខណៈពិសេសផងដែរនោះ គឺប្រជាជនខ្មែរអាចទទួលយកបាននូវផ្នត់គំនិតដ៏ទូលំទូលាយពីគ្រប់ទិសទី និងអាចរស់នៅដោយគ្មានជម្លោះសាសនានៅក្នុងប្រទេស។ ទោះជាយ៉ាងនេះក្តី ជាទូទៅវប្បធម៌ខាងក្រៅមួយចំនួនឥទ្ធិពលវិជ្ជមានផងនិងអវិជ្ជមានផងសម្រាប់ស្រទាប់យុវជន។ ផលវិជ្ជមាន គឺប្រជាជនអាចនឹងទទួលបាននូវផ្នត់គំនិតថ្មីៗក្នុងការរស់នៅក្នុងសង្គមពហុវប្បធម៌ តែផលអវិជ្ជមានអាចនឹងកើតមានឡើង នៅពេលយើងយល់មិនច្បាស់ពីអត្ថន័យដើមប្រកបដោយភាពត្រឹមត្រូវ ហើយអនុវត្តឱ្យក្លាយទៅជារឿងមិនល្អ។

ពាក់ព័ន្ធនឹងបញ្ហានេះ យុវជន ហម សុខនីប្រធានក្រុមយុវជន Inspired to read បានលើកឡើងថាទិវានៃក្តីស្រឡាញ់ កាលពីមុនត្រូវបានគេយល់ច្រឡំថា ជាថ្ងៃបុណ្យសង្សារ ដែលវាបានផ្តល់ផលប៉ះពាល់យ៉ាងច្រើនដល់សង្គមកម្ពុជា ជាពិសេសក្នុងស្រទាប់យុវជន។ កាលពីប៉ុន្មានឆ្នាំមុន ដោយសារតែប្រជាជនមិនទាន់យល់ដឹងច្រើន យើងឃើញថាមានការព្រួយបារម្ភជាច្រើននៅក្នុងអំឡុងថ្ងៃនោះដូចជាការដឹកដៃគ្នាចូលផ្ទះសំណាក់ ការធ្វើរឿងមិនគួរគប្បី ឬការធ្វើរឿងរ៉ាវទាំងឡាយណាដែលប៉ះពាល់ដល់កិត្តិយស និងសេចក្តីថ្លៃថ្នូររបស់យុវវ័យ ជាដើម។ ក្រោយមក ដោយសារតែមានការអប់រំច្រើនពីគ្រប់ភាគីពាក់ព័ន្ធទាំងអស់ និងដោយសារតែមានការយល់ដឹងច្រើនក្នុងស្រទាប់យុវវ័យ យើងឃើញថា យុវជនចាប់ផ្តើមមានការយល់ដឹង ហើយកាត់បន្ថយផលប៉ះពាល់បានច្រើន និងងាកមកធ្វើអ្វីដែលត្រឹមត្រូវវិញម្តង។

យុវជន ហម សុខនី បាននិយាយថា៖ «តាមពិតទៅ ទិវានៃសេចក្តីស្រឡាញ់ ទោះបីជាមិនមែនជាវប្បធម៌របស់ខ្មែរក៏ដោយ តែវាក៏មិនមែនជារឿងអាក្រក់អ្វីដែរសម្រាប់ការអនុវត្ត។ គ្រប់ជនជាតិទាំងអស់លើពិភពលោកសុទ្ធតែត្រូវការក្តីស្រឡាញ់ហើយចែករំលែកក្តីស្រឡាញ់ចំពោះគ្នានឹងគ្នា ជារឿងល្អ គ្រាន់តែយើងចាំបាច់ត្រូវយល់ឱ្យបានច្បាស់ពីអត្ថន័យ ទើបយើងមិនអនុវត្តខុសទិសដៅ»។

យុវជនខាងលើបានបន្ថែមទៀតថា ទិវានៃក្តីស្រឡាញ់ គ្រាន់តែជាថ្ងៃមួយ ដើម្បីរំឭកពីក្តីស្រឡាញ់តែប៉ុណ្ណោះ តែក្តីស្រឡាញ់ពិតប្រាកដយើងអាចចែករំលែកបានគ្រប់ពេលវេលា និងរាល់ថ្ងៃចំពោះមនុស្សជុំវិញខ្លួន ហេតុនេះកុំចាត់ទុកថា ថ្ងៃដែលគួរចែករំលែកក្តីស្រឡាញ់មានតែ 1ថ្ងៃនេះ។ ម្យ៉ាងវិញទៀត ទិវានេះនៅលើពិភពលោកគេមិនមែនប្រារព្ធ ឬគិតថាជាថ្ងៃពិសេសសម្រាប់តែគូស្នេហ៍នោះទេ តែជាថ្ងៃដែលគួរចែករំលែកក្តីស្រឡាញ់ពិតប្រាកដចំពោះមនុស្សគ្រប់គ្នា ដូចជាការចែករំលែកក្តីស្រឡាញ់ពីប្តី-ប្រពន្ធ ក្តីស្រឡាញ់ចំពោះបងប្អូន ក្តីស្រឡាញ់ចំពោះមិត្តភក្តិ ក្តីស្រឡាញ់លោកគ្រូអ្នកគ្រូ ឬសាស្ត្រាចារ្យដែលបានបង្ហាត់បង្រៀនយើង និងក្តីស្រឡាញ់ចំពោះឪពុក-ម្តាយ ជាដើម។

មានអ្នកខ្លះទៀត គេឆ្លៀតយកថ្ងៃនេះ ធ្វើជាថ្ងៃល្អដើម្បីធ្វើទានដល់អ្នកក្រីក្រ ឬអ្នកដែលកំពុងត្រូវការជំនួយ ដើម្បីចែករំលែកក្តីស្រឡាញ់ក៏មានដែរ។ ហេតុនេះសូមកុំយល់ច្រឡំ ហើយកុំឆ្លៀតឱកាសយកទិវានៃក្តីស្រឡាញ់នេះ ទៅធ្វើជាថ្ងៃដែលត្រូវលះបង់ខ្លួនប្រាណឱ្យគូស្នេហ៍ ឬជាថ្ងៃធ្វើអ្វីមួយដែលមិនត្រឹមត្រូវឱ្យសោះ។

បន្ថែមពីលើនេះ ប្រសិនបើយើងចេះច្នៃឱ្យល្អ យើងអាចប្រើទិវានៃក្តីស្រឡាញ់នេះ ឱ្យក្លាយជាថ្ងៃដ៏មានប្រយោជន៍ជាច្រើនសម្រាប់ការរស់នៅក្នុងសង្គមរបស់យើង តាមរយៈការជូនកាដូដែលមានតម្លៃសម្រាប់មនុស្សជាទីស្រឡាញ់របស់យើងគ្រប់ៗគ្នា។ ជាក់ស្តែង នៅក្នុងព័ត៌មានអន្តរជាតិមួយចំនួនគេណែនាំឱ្យទិញសៀវភៅជូនគ្នា ដើម្បីជាកាដូដល់មនុស្សជាទីស្រឡាញ់។ ការធ្វើបែបនេះ អាចធ្វើឱ្យយើងជំរុញការអានបានល្អប្រសើរផង បង្ហាញពីទឹកចិត្តស្រឡាញ់ប្រកបដោយចេតនាវិជ្ជមានផង និងជួយឱ្យអ្នកដែលយើងជូនកាដូនោះ ទទួលបានការអភិវឌ្ឍចំណេះដឹងបានសម្រាប់អភិវឌ្ឍជីវិតបានយ៉ាងល្អប្រសើរផងដែរ។

គួរបញ្ជាក់ផងដែរថា ជារៀងរាល់ឆ្នាំក្រសួងអប់រំយុវជន និងកីឡា និងក្រសួងពាក់ព័ន្ធជាច្រើនផ្សេងទៀត បានចេញសេចក្តីណែនាំដើម្បីកុំឱ្យសិស្សឆ្លៀតពេលនេះឈប់សម្រាក ឬធ្វើអ្វីដែលមិនត្រឹមត្រូវ។ ក្រសួងតែងតែជំរុញឱ្យលោកគ្រូ-អ្នកគ្រូ អាណាព្យាបាល និងអ្នកដទៃទៀតពន្យល់ណែនាំឱ្យយុវជនបានយល់ដឹងឱ្យច្បាស់ពីអត្ថន័យនៃទិវានៃក្តីស្រឡាញ់នេះ ដើម្បីកាត់បន្ថយផលប៉ះពាល់ជាអវិជ្ជមាន។ ហេតុនេះអាណាព្យាបាលឬក្រុមគ្រួសារនីមួយៗ គួរឆ្លៀតពេលស្វែងយល់និងបញ្ជ្រាបការអប់រំចំពោះកូនៗឱ្យចេះចែករំលែកក្តីស្រឡាញ់ និងភាពកក់ក្តៅដោយផ្លូវត្រឹមត្រូវទាំងសម្រាប់ជីវិតក្នុងគ្រួសារ ក៏ដូចជាការប្រាស្រ័យទាក់ទងនៅខាងក្រៅជាដើម៕

February 13, 2020

គំនិតបង្កើតថ្មី ចាប់ផ្តើមពីភាពមិនល្អ តែអាចទទួលបានលទ្ធផលឥតខ្ចោះនៅថ្ងៃណាមួយ

ការធ្វើនវានុវត្តន៍ ឬការបង្កើតផលិតផលថ្មី ជារឿងសំខាន់ខ្លាំងណាស់សម្រាប់ការរស់នៅរបស់មនុស្សម្នាក់ៗ តែអ្វីដែលជាឧបសគ្គសំខាន់ក្នុងការធ្វើឱ្យមនុស្សជាច្រើនមិនអាចបង្កើតគំនិតថ្មីៗបាន គឺការមិនហ៊ានចាប់ផ្តើម។

ពាក់ព័ន្ធនឹងបញ្ហានេះ លោក ស៊ូ សាវឿន អ្នកបណ្តុះបណ្តាលធនធានមនុស្សបានលើកឡើងថា ការបង្កើតគំនិតថ្មីជារឿងសំខាន់ខ្លាំងណាស់សម្រាប់មនុស្សនាពេលបច្ចុប្បន្ន ព្រោះមិនថាការធ្វើអាជីវកម្ម ឬការធ្វើការងារនោះទេ អ្នកដែលមានសមត្ថភាពបង្កើតគំនិតថ្មី ឬអ្នកដែលអាចបង្កើតសមិទ្ធផលថ្មីៗ ភាគច្រើនជាអ្នកដែលមានប្រៀប និងសំខាន់លើគ្រប់បញ្ហាទាំងអស់។

គំនិតបង្កើតថ្មីអាចធ្វើឱ្យមនុស្សទាក់ទាញបាននូវដំណោះស្រាយបញ្ហាថ្មីៗ រួមទាំងបង្កើតបានភាពទាក់ទាញក្នុងចំណោមមនុស្សជាច្រើន ដែលធ្វើឱ្យគាត់ងាយប្រកួតប្រជែងនៅក្នុងពិភពដែលគាត់កំពុងធ្វើថែមទៀតផង។ ប្រសិនបើគាត់ជាអ្នកធ្វើការងារ ឬជាអ្នកលក់ដូរ គាត់នឹងទទួលបានចំណាប់អារម្មណ៍កាន់តែខ្លាំងពីអតិថិជន តែប្រសិនបើគាត់ជាម្ចាស់អាជីវកម្មវិញ អាជីវកម្មរបស់គាត់នឹងមានភាពល្អប្លែកគេ (Unique)។ ទោះជាយ៉ាងនេះក្តី បើទោះបីជាមនុស្សគ្រប់គ្នាដឹងថា ការបង្កើតថ្មី ជារឿងសំខាន់យ៉ាងណាក៏ដោយ ក៏មានមនុស្សមិនច្រើនទេ ដែលហ៊ានចាប់ផ្តើមធ្វើ។

លោក ស៊ូ សាវឿន បាននិយាយថា៖ «បញ្ហាដែលធ្វើឱ្យមនុស្សជាច្រើនមិនហ៊ានបង្កើតអ្វីដែលថ្មីគឺមកពីពួកគេមិនហ៊ានចាប់ផ្តើម ឬរង់ចាំគំនិតឥតខ្ចោះសិន ទើបចាប់ផ្តើម»។

លោកបន្តថា គ្មានការចាប់ផ្តើមណាសុទ្ធតែល្អឥតខ្ចោះនោះទេ ព្រោះការបង្កើតថ្មីភាគច្រើនកើតឡើងពីការមើលឃើញពីបញ្ហាមួយចំនួននៅក្នុងការរស់នៅ ហើយបន្ទាប់ពីមើលឃើញបញ្ហាទាំងអស់នោះ ដំណោះស្រាយក៏នឹងលេចឡើងដោយផ្អែកលើចំណេះដឹង និងបទពិសោធផ្ទាល់ខ្លួន។ ជាធម្មតាទេ នៅក្នុងដំណាក់កាលការចាប់ផ្តើមនេះ គំនិតរបស់យើងតែងតែមិនសូវល្អឥតខ្ចោះប៉ុន្មានទេព្រោះបទពិសោធ និងចំណេះដឹងរបស់យើងអាចនៅមានកម្រិត តែប្រសិនបើយើងបន្តព្យាយាមស្វែងយល់ ហើយបន្តអភិវឌ្ឍវាម្តងបន្តិចៗនោះ យើងនឹងអាចទទួលបានលទ្ធផលល្អនៅថ្ងៃណាមួយមិនខាន។ ជាឧទាហរណ៍ជាក់ស្តែង ប្រសិនបើយើងមើលទៅលើគំនូរជីវចល (Cartoon) របស់ផលិតកម្មល្បីៗលើពិភពលោកមួយចំនួន ដូចជារូបកណ្តុរ មីគីយ៍ (Mickey Mouse) កាលពីដំបូងឡើយ យើងនឹងឃើញថា វាគ្រាន់តែជារូបគំនូរសាមញ្ញ និងពិបាកមើល 1សន្លឹកតែប៉ុណ្ណោះ តែបន្តិចម្តងៗ វាត្រូវបានអភិវឌ្ឍរហូតក្លាយជាតួតុក្កតាដ៏គួរឱ្យស្រឡាញ់។ ហេតុនេះសម្រាប់អ្នកចង់បង្កើតគំនិតថ្មី ឬបង្កើតសមិទ្ធផលថ្មីៗ ក៏ដូចគ្នាដែរ យើងអាចនឹងចាប់ផ្តើមពីគំនិតធម្មតាៗ បន្ទាប់មកក៏អភិវឌ្ឍវា រហូតឱ្យក្លាយជាផលិតផល ឬគំនិតប្រកបដោយគុណតម្លៃខ្ពស់នាពេលអនាគតបាន។

ស្របជាមួយគ្នានេះដែរ លោក អ៊ុន មាសសម្បត្តិ សហស្ថាបនិកគម្រោង Wechould ដែលជាគម្រោងបច្ចេកវិទ្យាសម្រាប់ជួយអ្នកទេសចរឱ្យជួលម៉ូតូបានជិះយ៉ាងងាយស្រួលនោះ ក៏បានលើកឡើងដែរថា គ្រប់គំនិតបង្កើតថ្មី សុទ្ធតែមានប្រយោជន៍សម្រាប់មនុស្សគ្រប់គ្នា គ្រាន់តែភាពជោគជ័យរបស់វាអាស្រ័យលើសេចក្តីក្លាហានរបស់យើងក្នុងការបង្កើតវាឡើង ឬមិនហ៊ានបង្កើតវាឡើងតែប៉ុណ្ណោះ។

ប្រសិនបើយើងហ៊ានបង្កើតគំនិតថ្មីៗទាំងអស់នោះឡើង យើងអាចនឹងប្រឈមនឹងឧបសគ្គខ្លះៗ តែក្រោយពេលឆ្លងកាត់ឧបសគ្គមួយចំនួននោះបានហើយ យើងនឹងមើលឃើញថា ស្នាដៃ ឬគំនិតរបស់យើងនឹងកាន់តែមានតម្លៃសម្រាប់មនុស្សគ្រប់គ្នា។ មុននឹងបង្កើតសមិទ្ធផលថ្មី ឬគំនិតនវានុវត្តន៍នីមួយៗឡើង សុទ្ធតែមានបញ្ហាប្រឈមដែលធ្វើឱ្យយើងមានគំនិតរារែកចិត្ត ដូចជាការមិនសូវឱ្យតម្លៃពីមនុស្សជុំវិញខ្លួន អ្នកដទៃមិនទាន់មើលឃើញពីប្រយោជន៍នៃអ្វីដែលយើងកំពុងធ្វើព្រមជាមួយការរិះគន់ ជាដើម។ តែទោះជាយ៉ាងនេះក្តី ប្រសិនបើយើងជម្នះវា ដើម្បីអភិវឌ្ឍជាប់ជាប្រចាំ នោះយើងនឹងឃើញថា ថ្ងៃណាមួយអ្វីដែលយើងបង្កើតនោះនឹងត្រូវទទួលស្គាល់ដោយមនុស្សជាច្រើន។

លោក អ៊ុន មាសសម្បត្តិ បាននិយាយថា៖ «ពីមុនក្រុមរបស់ខ្ញុំក៏មិនទាន់មានគំនិតបង្កើតកម្មវិធីដូចបច្ចុប្បន្ននេះដែរ តែអ្វីដែលយើងចង់ធ្វើ គឺបង្កើតកម្មវិធីអ្វីម្យ៉ាង ដើម្បីដោះស្រាយបញ្ហាមួយចំនួនដែលមនុស្សទូទៅកំពុងជួបប្រទះ»។

លោកបានបន្ថែមថា បន្តិចម្តងៗយើងចាប់ផ្តើមស្វែងយល់ពីបញ្ហាប្រឈមនានានៅជុំវិញខ្លួនរហូតបង្កើតបានគំនិតថា យើងគួរតែបង្កើតគម្រោងដើម្បីជួលរបស់ តែគំនិតដំបូងនោះលំបាកអនុវត្តសម្រាប់ស្ថានភាពជាទូទៅនៅក្នុងប្រទេសរបស់យើង។

ហេតុនេះយើងក៏បន្តអភិវឌ្ឍវាបន្ថែមទៀតឱ្យក្លាយជាកម្មវិធីភ្ជាប់ទំនាក់ទំនងរវាងប្រតិបត្តិករទេសចរណ៍ ឬអ្នករកស៊ីជួលម៉ូតូក្នុងតំបន់ទេសចរណ៍ និងអ្នកទេសចរដែលត្រូវការសេវាកម្មនេះ។ លោកថា តាមពិតទៅគំនិតដំបូងក៏មិនទាន់ល្អដែរ ហើយក៏មានមនុស្សជាច្រើនយល់ថា មិនគួរធ្វើ តែអ្វីដែលយើងអាចធ្វើបាន គឺបន្តសកម្មភាព និងការគិត ដើម្បីសម្រួចអ្វីដែលយើងចង់ធ្វើនោះឱ្យក្លាយជាកម្មវិធីដ៏មានប្រយោជន៍មួយ៕

February 13, 2020

ពិធីករ សន សុវណ្ណារ៉ា ប្រកាសមិនចោលសិល្បៈបើទោះមុខជំនួញខ្លួនកំពុងជោគជ័យខ្លាំង

ពិធីករ និងជាតារាសម្តែងសាច់ទ្រលុកទ្រលុន លោក សន សុវណ្ណារ៉ា ប្រកាសថា ខ្លួននឹងមិនបោះបង់ចោលវិស័យសិល្បៈឡើយ បើទោះបីពេលនេះកំពុងមមាញឹកខ្លាំងជាមួយក្រុមហ៊ុនផ្ទាល់ខ្លួនយ៉ាងណាក៏ដោយ។

មិនខុសពីតារាសម្តែងទូទៅដែលតែងមានអាជីវកម្មផ្ទាល់ខ្លួន ក្រៅពីអាជីពក្នុងរង្វង់សិល្បៈ លោក សន សុវណ្ណារ៉ា ដែលគ្រប់គ្នាស្គាល់ថាជា ពិធីករ និងជាតារាសម្តែងសាច់ទ្រលុកទ្រលុន ក៏កំពុងមមាញឹកខ្លាំងនិងក្រុមហ៊ុនដែលជាអាជីវកម្មផ្ទាល់របស់លោកដូចគ្នា។ ដោយក្រុមហ៊ុនរបស់ពីធីកររូបនេះ ឈ្មោះថា RA Group ជាក្រុមហ៊ុនពិធីការ ទទួលរៀបចំគ្រប់កម្មវិធី ពិសេសពិធីផ្លូវការ ដែលមានរៀបចំជាប្រភេទបដិសណ្ឋារកិច្ច។ ត្បិតកំពុងរវល់ហើយមមាញឹកខ្លាំងជាមួយអាជីវកម្មយ៉ាងណាក្តី ក៏ពិធីកររូបនេះគ្មានបំណងបោះបង់អាជីពសិល្បៈនោះឡើយ ព្រោះតែវិថីសិល្បៈទើបធ្វើឱ្យលោកមានថ្ងៃនេះ។ ដូច្នេះ ទោះយ៉ាងណាក៏លោកមិនបោះបង់ឡើយ។

នេះបើតាមការបញ្ជាក់អះអាងរបស់លោក លោក សន សុវណ្ណារ៉ា ខណៈលោកកំពុងធ្វើជាពិធីករ ក្នុងព្រឹត្តិការណ៍តាំងពិព័រណ៍ពាណិជ្ជកម្មថៃឆ្នាំ២០២០ ដែលទើបប្រារព្ធចប់សព្វគ្រប់កាលពីពេលថ្មីៗនេះ។ លោកថា សម្រាប់ការងារសិល្បៈ សព្វថ្ងៃខ្លួនកំពុងមានទីផ្សារខ្ពស់លើអាជីពជាពិធីករ ឯកម្មវិធីតាមប៉ុស្តនានាគឺមួយៗប៉ុណ្ណោះ ចំណែកសម្រាប់ទីផ្សារការសម្តែងវិញមិនស្ងាត់នោះទេ គឺលោកតែងមានផលិតករទាក់ទងមកដើម្បីរួមសម្តែងជាមួយគ្នា ប៉ុន្តែលោកពុំសូវបានទទួលនោះឡើយ ព្រោះរាល់ភាពយន្តដែលទទួលថតត្រូវចំណាយពេលយូរ ហើយលោកមិនមានពេលវលាគ្រប់គ្រាន់។ បង្ហើបបន្ថែមប្រាប់អ្នកសារពត៌មាន សុវណ្ណារ៉ា ថា ថ្មីៗទើបមានផលិតករទំនាក់ទំនងមកលោក ហើយក៏កំពុងស្ថិតក្នុងការចរចារ តែសម្រាប់ជាក់ស្តែងអាចទទួលការងារនោះបានឬយ៉ាងណាលោកនៅពុំទាន់អាចបញ្ជាក់បាននៅឡើយ៕

February 13, 2020

ទស្សនាកម្សាន្តតំបន់ពិសេសចំនួន 2 របស់ក្រុងកូឡាឡាំពួរ

កូឡាឡាំពួរ គឺជាទីក្រុងដ៏ស្រស់ស្អាតមួយដែលស្ថិតនៅក្នុងក្រសែភ្នែកបណ្តាភ្ញៀវទេសចរចម្រុះជាតិសាសន៍នៅលើសាកលលោក ហើយក៏ជាក្រុងដែលធំជាងគេបំផុតប្រៀបបានទៅនឹងបេះដូងរបស់ប្រទេសម៉ាឡេស៊ី។ ជាមួយគ្នានេះ ទីក្រុងកូឡាឡាំពួរ ដែលពោរពេញទៅដោយរូបសម្រស់ឆើតឆាយលម្អទៅដោយផ្លូវកាត់ខ្វាត់ខ្វែង និងតួអគារខ្ពស់ៗស្គឹមស្កៃឈរបង្ហាញរាងក្នុងនាមជាមជ្ឈមណ្ឌលពាណិជ្ជកម្មលំដាប់កំពូលរបស់ពិភពលោកនោះ បានផ្ដល់នូវរសជាតិជីវិតថ្មីដល់បណ្តាភ្ញៀវទេសចរ តាមរយៈនៃការបង្ហាញពីវប្បធម៌ដ៏យូរឡុង រួមផ្សំនឹងភាពរួសារាយរាក់ទាក់របស់ប្រជាពលរដ្ឋ ក៏ដូចជាបានភ្លក្សអាហារបែបប្រពៃណីនៃជនជាតិភាគតិចប្រចាំតំបន់ ជាពិសេស សម្បូរទៅដោយតំបន់កម្សាន្តជាច្រើនកន្លែងតែម្ដង។

ប៉មអគារភ្លោះ ប៉េត្រូណាស់
ប៉េត្រូណាស់ គឺជាអគារភ្លោះដ៏ធំ ខ្ពស់ស្គឹមស្កៃដែលមានកម្ពស់រហូតដល់170 ម៉ែត្រ និងមានស្ពានឆ្លងពីតួអគារមួយទៅកាន់តួអគារមួយទៀត ហើយក៏ជាប់ចំណាត់ថ្នាក់ជាស្ពាន2ជាន់ ដែលខ្ពស់ជាងគេបំផុតក្នុងពិភពលោក។ នៅទីនេះ ត្រូវបានគេដាក់បម្រាមយ៉ាងម៉ត់ចត់ចំពោះអ្នកខ្លាចទីខ្ពស់ មិនអនុញ្ញាតឱ្យ ឡើងនោះឡើយ ប៉ុន្តែបើចំពោះអ្នកមានភាពក្លាហានមិនញញើតជាមួយអគារដ៏ខ្ពស់សន្លឹមមួយនេះ នឹងបានទស្សនាពីទិដ្ឋភាពដ៏ស្រស់ស្អាតនៃទីក្រុង កូឡាឡាំពួរទាំងមូល ជាពិសេសសម្រស់នាពេលរាត្រី ដែលពោរពេញទៅដោយពន្លឺភ្លើងពណ៌ចម្រុះនៅតាមអគារនានាក្នុងតំបន់។
រូងភ្នំបាទូ
រូងភ្នំបាទូ គឺជាទីសក្ការៈដ៏ពិសិដ្ឋសម្រាប់ពលរដ្ឋដែលកាន់សាសនាហិណ្ឌូដែលរស់នៅក្នុងប្រទេសម៉ាឡេស៊ី មានចម្ងាយប្រមាណជាង12គីឡូម៉ែត្រ ខណៈដែលអ្នកទាំងនោះសុទ្ធតែមានជំនឿជឿជាក់ថា រូងភ្នំបាទូ ជាកន្លែងដែលមានឫទ្ធិបារមីពូកែស័ក្តិសិទ្ធិបំផុត ហើយជារៀងរាល់ឆ្នាំ នៅពេលចូលដល់វេលាកំណត់អ្នកមានជំនឿរាប់ម៉ឺននាក់ តែងនាំគ្នាមកប្រារព្ធពិធីតាមទំនៀបទម្លាប់នៅទីនេះមិនដែលខាន។ ដោយឡែកសម្រាប់លោកអ្នកដែលចង់ឡើងទៅទស្សនារូងភ្នំបែបអច្ឆរិយមួយនេះ ត្រូវធ្វើដំណើរដោយថ្មើរជើងតាមជណ្ដើរថ្មចំនួន272កាំ។ លុះក្រោយពេលឡើងទៅដល់គោលដៅនឹងបានឃើញពីភាពអស្ចារ្យជាច្រើន ដែលក្រៅពីមានរូងភ្នំធំៗចំនួន3 រូងភ្នំតូចៗរាប់សិបកន្លែង ថែមទាំងបានទស្សនារូបចម្លាក់យ៉ាងស្អាកស្កះក្នុងលក្ខណៈបែបសាសនាហិណ្ឌូ ជាពិសេសរូបសំណាកព្រះទេវៈយ៉ាងធំចង្រឹងឈនៅចំពីមុខច្រកចូលដែលមានកម្ពស់ប្រមាណ 42 ម៉ែត្រ៕

February 13, 2020

ឡូយអស់ទាស់!! នីកូ យកក្រមាខ្មែរច្នៃម៉ូដរំលេចស្ទាយ៍ថ្មីក្នុងMVចម្រៀង «ទៅត្រង់ »

តារាចម្រៀង នីកូ បានបញ្ចេញបទចម្រៀងថ្មីមានចំណងជើងថា «ទៅត្រង់ » ជាប្រភេទបទញាក់រាំកន្ទ្រាក់អារម្មណ៍ត្រៀមសម្រាប់ទេសកាលបុណ្យចូលឆ្នាំថ្មីប្រពៃណីខ្មែរ ដែលកៀកមកដល់ខាងមុខនេះហើយ។ កាន់តែប្លែកអារម្មណ៍ក្រៅពីសាច់ភ្លេង MVបទចម្រៀងក៏ប្រមូលផ្ដុំដោយតារាស្រីស្អាតជាច្រើនដួងមកសម្ដែងរួមគ្នាទៀតផង។

មិនខុសពីបទ « Like មួយ » មួយបទថ្មីនេះគេជឿថាពិតជាធ្វើហ្វេនៗបានស្ដាប់ហើយពិតជាទប់អារម្មណ៍មិនរាំ មិនបាន ទាំងអត្ថន័យបទចម្រៀង បូករួមសាច់ភ្លេងស្ដាប់ហើយពិតជាពីរោះខ្លាំង។ តែអ្វីដែលកាន់តែចាប់អារម្មណ៍ក្នុងបទចម្រៀងមួយបទនេះ គឺ លោកយកភ្លេងខ្មែរមក ច្នៃជាមួយភ្លេងសម័យ និងក្បាច់រាំពិតជាកប់ខ្លាំង ហើយការតុបតែងខ្លួនវិញ លោកយក ក្រមាខ្មែរ មកច្នៃជាសម្លៀកបំពាក់ មើលទៅពិតជាស្រស់សង្ហាខ្លាំង៕

កុំឱ្យខាតពេលយូរ សូមទស្សនាវីដេអូខាងក្រោមនេះ៖

February 13, 2020

ទឹកគ្រឿងអន្លក់ស្រស់បែបស្រុកស្រែ

ស្ទើរតែគ្រប់លេខនៃការចេញផ្សាយសម្រាប់ទំព័រមុខម្ហូបប្រចាំខែ លោកអ្នកធ្លាប់តែបានស្វែងយល់ពីរបៀបនៃការចម្អិនម្ហូបបែបអឺរ៉ុប បែបថៃឬចិនជាដើម។ ដោយឡែកសម្រាប់ខែនេះ ឡារ៉ែន សូមណែនាំប្រិយមិត្តអ្នកអាននូវមុខម្ហូបបែបខ្មែរ ដែលទទួលបានការពេញនិយមជាខ្លាំងស្ទើរគ្រប់ក្រុមគ្រួសារ នោះគឺ ទឹកគ្រឿងអន្លក់ស្រស់ ដ្បិតមុខម្ហូបមួយនេះ មានភាពងាយស្រួលក្នុងការចម្អិន ប៉ុន្តែមានរសជាតិឆ្ងាញ់ ជាមួយនឹងបន្លែស្រស់ៗច្រើនប្រភេទធ្វើជាអន្លក់បន្ថែមភាពទាក់ទាញ។

+ គ្រឿងផ្សំ
– ត្រីផ្ទក់
– ប្រហុក
– សណ្ដែកដីលីង
– ទឹកក្រូចឆ្មារ
– ខ្ទឹមស
– ខ្ទឹមក្រហម
– ម្ទេស
– ទឹកត្រី
– គ្រឿងផ្សំរសជាតិ
– បន្លែស្រស់គ្រប់មុខ

+ វិធីចម្អិន
យកត្រីផ្ទក់ទៅចម្អិនដោយការចំហ៊ុយ ហើយបេះយកសាច់ រួចទុកមួយអន្លើ។ យកគ្រឿងផ្សំដូចជាខ្ទឹមស ខ្ទឹមក្រហម ម្ទេស ទឹកត្រី និងគ្រឿងផ្សំរសជាតិ បុកលាយបញ្ចូលគ្នា ដោយយកសាច់ត្រីដែលបានបេះរួចជ្រុំលាយឱ្យចូលសាច់តែមួយ។ យកប្រហុកជ្រុំទឹកក្ដៅដាំពុះ ច្រោះយកទឹកសម្រាប់លាយយកក្លិន។ ជាចុងក្រោយយកសាច់ត្រីដែលបានច្របល់ជាមួយគ្រឿង ជ្រុំលាយជាមួយទឹកប្រហុក ដោយបន្ថែមទឹកក្រូចឆ្មារ សណ្ដែកដីលីង ហើយបើចាកទឹកក្ដៅដាំពុះចូលបន្តិច ល្មមទឹក ល្មមគោក ភ្លក្សរសជាតិតាមចំណូលចិត្តជាការស្រេច។ ដោយឡែកសម្រាប់បន្លែ ឬអន្លក់ស្រស់ លោកអ្នកអាចមានជម្រើសទៅតាមចិត្តដែលចង់ទទួលទាន ហើយបានផ្កាស្តៅ ឬត្រួយស្តៅកាន់តែមានរសជាតិទ្វេដង៕

February 13, 2020

តារាចម្រៀងកូនខ្មែរកម្ពុជាក្រោមលោក ខាន់ ស៊ីអឿន ក្លាយជាតារាប្រចាំផលិតកម្មសាន់ដេ

ដូចប្រិយមិត្តអ្នកលេងបណ្ដាញសង្គមជាច្រើនបានស្គាល់ម្ចាស់បទ «ស្រលាញគ្នាយូរម៉េចស្ទាវ» គឺលោក ខាន់ ស៊ីអឿន ជាតារាចម្រៀងកូនខ្មែរកម្ពុជាក្រោម។ ថ្មីៗនេះ ស្រាប់តែគេមើលឃើញលោកបង្ហាញវត្តមាននៅក្នុងផលិតកម្មសាន់ដេ ជាតារាចម្រៀងផ្លូវការហើយ ថែមទាំងបញ្ចេញបទចម្រៀងថ្មីត្រៀមរដូវកាលបុណ្យចូលឆ្នាំថ្មីប្រពៃណីខ្មែរថែមទៀតផង។

តារាចម្រៀងសម្បុរស្រអែម ស៊ីអឿន មិនត្រឹមតែអាចបកស្រាយចម្រៀងបានពីរោះហើយ នៅមានសមត្ថភាពនិពន្ធបទភ្លេងដោយខ្លួនឯងថែមទៀត។ ក្រៅពីបង្ហាញខ្លួនជាសមាជិកថ្មីនៅទ្រនំផលិតកម្មសាន់ដេ ស៊ីអឿន ក៏មានបទថ្មីបញ្ចេញទៅព្រមៗគ្នា នឹងការបង្ហាញវត្តមានដល់ទស្សនិកជនឱ្យបានដឹងដូចគ្នា ដោយបទនោះមានចំណងជើងថា «ស៊ី Brand ចុះអូន» ជាបទភ្លេងបែបចូលឆ្នាំញាក់ៗតិចៗគួរឱ្យចាប់អារម្មណ៍មែនទែន ម៉្យាងជាស្នាដៃនិពន្ធបទភ្លេង Mrr Thea Ra Zony និពន្ធទំនុកច្រៀងដោយ ហ៊ាង ម៉េងហួរ ព្រមទាំងមានក្រុមការងារមួយចំនួនទៀត។

ចង់ដឹងថាទឹកដមសំឡេងតារាប្រុសមកពីទឹកដីកម្ពុជាក្រោមរូបនេះ ក្រអួនក្រអៅដល់កម្រិតណានោះ សូមទស្សនាវីដេអូខាងក្រោម៖

February 13, 2020

USD កំពុង “សោយរាជ្យ” ខណៈអាសន្នរោគកូរ៉ូណា Corvid-19 កំពុងរាតត្បាតពិភពលោក

រូបិយបណ្ណដុល្លារអាមេរិកាំងត្រូវបានគេនិយមប្រើប្រាស់ច្រើន ក៏ដោយសារតែសេដ្ឋកិច្ចអាមេរិកមានស្ថេរភាពល្អ ហើយអ្នកវិនិយោគបានស្វែងរក “កន្លែងជ្រោក” នៅក្នុងអំឡុងពេលអាសន្នរោគកូរ៉ូណាកំពុង “វាយលុក” ពិភពលោក។

Dollar Index (គឺជារង្វាស់មួយសម្រាប់ប្រៀបធៀបអំណាចរបស់រូបិយបណ្ណដុល្លារអាមេរិក ជាមួយនឹងរូបិយបណ្ណធំៗនៃប្រទេសចំនួន6ផ្សេងទៀត) បានកើនតម្លៃ 2,5% ក្នុងឆ្នាំនេះ ដែលនាំឱ្យវាមានតម្លៃខ្ពស់បំផុតចាប់ពីខែតុលា ឆ្នាំ2019។ នេះគឺជាការកើនឡើងដ៏គួរឱ្យចាប់អារម្មណ៍នៃតម្លៃប្រាក់ដុល្លារអាមេរិក បើធៀបនឹង 0,2% កាលពីឆ្នាំ2019។

Win Thin អគ្គនាយកផ្នែកយុទ្ធសាស្ត្ររូបិយវត្ថុ ប្រចាំធនាគារ Brown Brothers Harriman នៃសហរដ្ឋអាមេរិក បានឱ្យដឹងថា “មានកត្តាជាច្រើនដែលបានជួយដល់រូបិយបណ្ណអាមេរិកក្នុងអំឡុងពេលនេះ។ ក្នុងនោះមានកត្តា សុទិដ្ឋិនិយមចំពោះភាគហ៊ុនអាមេរិក ព្រមទាំងមានការជឿជាក់ថា អាសន្នរោគកូរ៉ូណា Corvid-19 នឹងមិនប៉ះពាល់ខ្លាំងទៅលើសេដ្ឋកិច្ចអាមេរិក”។

“ការពឹងផ្អែកទៅលើពាណិជ្ជកម្មសកលរបស់អាមេរិក មានកម្រិតទាប មានន័យថា ពួកគេមិនទទួលឥទ្ធិពលច្រើននៅពេលកំណើនសេដ្ឋកិច្ចទូទាំងពិភពលោក ត្រូវថយចុះ ដោយសារបញ្ហាអាសន្នរោគ Corvid-19។ ការដែលអាសន្នរោគនេះផ្ទុះរាលដាលខ្លាំង ក៏កំពុងតែធ្វើឱ្យវិនិយោគិន បង្កើនការវិនិយោគទៅលើទ្រព្យសុវត្ថិភាព ដូចជារូបិយបណ្ណដុល្លារអាមេរិក មាស និងមូលបត្ររដ្ឋាភិបាលអាមេរិកាំងជាដើម។

របាយការណ៍ដែលថា កំណើនសេដ្ឋកិច្ចល្អក្នុងត្រីមាសទី IV ឆ្នាំ2019 ស៊ីសង្វាក់គ្នាជាមួយនឹងការព្យាករដែលថា សេដ្ឋកិច្ចអាមេរិក នៅដើមឆ្នាំនេះ មានអំណោយផល។ ទីផ្សារអាមេរិក ក៏សង្ឃឹមថា ប្រធានាធិបតី Donald Trump ជាប់ឆ្នោតម្ដងទៀតក្នុងខែវិច្ឆិកា ហើយធនាគារកណ្ដាលនៃសហរដ្ឋអាមេរិក (Fed/Federal Reserve System) ក៏មិនបានបញ្ចុះការប្រាក់ក្នុងរយៈពេលខ្លីនោះដែរ។

ការដែលរូបិយបណ្ណអឺរ៉ូ (Euro) របស់អឺរ៉ុប ដែលជាគូប្រជែងសំខាន់បំផុតរបស់អាមេរិក បាន និងកំពុងដាំក្បាលចុះជាបន្តបន្ទាប់ ក៏បានរួមចំណែកធ្វើឱ្យតម្លៃ USD កើនឡើងមួយកម្រិត។ ខុសពីអាមេរិក សេដ្ឋកិច្ចនៅបណ្ដាប្រទេសក្នុងតំបន់អឺរ៉ុប នៅតែបន្តជួបការលំបាកខ្លាំង។

ទោះជាយ៉ាងនេះក្ដី ការដែលប្រាក់ដុល្លារអាមេរិកឡើងថ្លៃ ក៏មានចំណុចអវិជ្ជមានផងដែរ។ ជាមួយនឹងបណ្ដាក្រុមហ៊ុនអន្តរជាតិ នៅពេលប្ដូរពីរូបិយបណ្ណនៃប្រទេសផ្សេងៗ ទៅជាប្រាក់ដុល្លារអាមេរិកនោះ ប្រាក់ចំណេញរបស់ពួកគេ អាចនឹងថយចុះមួយកម្រិត។ ដូច្នេះ របាយការណ៍ប្រាក់ចំណេញក្នុងត្រីមាសខាងមុខ អាចនឹងមិនល្អប្រសើរប៉ុន្មាន ចំពោះក្រុមហ៊ុនអន្តរជាតិមួយចំនួន។

ក្រុមហ៊ុនដែលទទួលរងផលអាក្រក់បំផុតពីការកើនឡើងនៃតម្លៃប្រាក់ដុល្លារអាមេរិក គឺជាបណ្ដាក្រុមហ៊ុនបច្ចេកវិទ្យា។ កាលពីឆ្នាំកន្លងទៅ ក្រុមហ៊ុន Apple របស់អាមេរិក បានបន្ទោសទៅលើការកើនតម្លៃនៃរូបិយបណ្ណដុល្លារអាមេរិកថា បានធ្វើឱ្យប្រាក់ចំណេញរបស់ពួកគេថយចុះ។

យ៉ាងណាក៏ដោយ គេនៅតែជឿថា តម្លៃនៃប្រាក់ដុល្លារអាមេរិក នឹងនៅតែកើនឡើងដោយរលូន ខណៈដែលឥទ្ធិពលពីអាសន្នរោគកូរ៉ូណា នៅតែបន្តសង្កត់ទៅលើសេដ្ឋកិច្ចចិន និងពិភពលោក ដែលមកដល់ពេលនេះ មិនទាន់មានការវាយតម្លៃឱ្យគ្រប់ជ្រុងជ្រោយនៅឡើយ ចំពោះការខាតបង់ដោយសារអាសន្នរោគនេះ៕

ប្រភព៖ សារព័ត៌មានបរទេស

February 12, 2020

ចង់មានសុខភាពល្អ ត្រូវតែអាន “រឿង 6 យ៉ាងដែលគួរដឹង ពាក់ព័ន្ធនឹងសុខភាព”

បច្ចុប្បន្ននេះរោគាទាំងឡាយក្លាយជារឿងក្បែរៗខ្លួន ដែលចាំតែសួររកមុខយើងជានិច្ច ដូច្នេះហើយទើបយើងត្រូវតែមើលថែទាំសុខភាពឱ្យបានល្អជាពិសេស អ្នកខ្លះអាចនឹងស្វែងរកអាហារបន្ថែម ឬអាហារបំប៉នផ្សេងៗដើម្បីបំប៉នរាងកាយឱ្យមានសុខភាពល្អ ទាំងការពិតទៅ ការមានសុខភាពល្អអាចជារឿងងាយជាងលោកអ្នកគិតទៅទៀត ដូចដែលថ្ងៃនេះជាដើម ឡារ៉ែន សូមនាំយករឿងដែលគួរឱ្យយល់ដឹងពាក់ព័ន្ធនឹងសុខភាពដ៏ល្អ មកជម្រាបមិត្តអ្នកអានដូចខាងក្រោម “ចង់មានសុខភាពល្អ ត្រូវតែអាន”។

1. ចេកទុំ ជួយកាត់បន្ថយអាការឆ្អល់ពោះបានមុននឹងទៅមើលថា តើយ៉ាងម៉េចបានផ្លែចេកជួយកាត់បន្ថយអាការឆ្អល់ពោះបាននោះ យើងមកស្គាល់ពីអាការឆ្អល់ពោះជាមុនសិន…ឆ្អល់ពោះ គឺជាអាការដែលកើតមានហ្កាសច្រើននៅក្នុងក្រពះ ជួនកាលកើត-ឡើងដោយសារការទទួលទានជាតិសូដ្យូមច្រើនជ្រុលពេក ហើយផ្លែចេកនេះឯងដែលនឹងជួយធ្វើឱ្យអាការឆ្អល់ពោះធូរស្រាលបាន ព្រោះចេកមានបរិមាណប៉ូតាស្យូមខ្ពស់ ដែលនឹងទៅចាត់ការផលប៉ះពាល់ដែលកើតឡើងដោយសារសូដ្យូមដែលលើសនោះ ធ្វើឱ្យអាការឆ្អល់ពោះថយចុះបាន។

2. ទឹកនៅក្នុងរាងកាយនឹងធ្វើឱ្យទម្ងន់ខ្លួនរបស់អ្នកឡើង-ចុះយ៉ាងតិច ក្នុង 1ថ្ងៃ 1-2គីឡូក្រាម
តើលោកអ្នកធ្លាប់នឹកឆ្ងល់ខ្លះទេថា ហេតុអីបានយើងថ្លឹងទម្ងន់នៅពេលព្រឹក និងនៅពេលល្ងាច ទម្ងន់ចេញមកខុសគ្នា ទាំងយើងមិនទាន់បានញ៉ាំអីច្រើនផងនោះ? នេះគឺដោយសារតែទម្ងន់របស់ទឹកនៅក្នុងរាងកាយដែលចេញមកពីអាហារដែលមានរសជាតិប្រៃ ឬសភាវមានវដ្តរដូវប្រចាំខែរបស់អ្នកដែលធ្វើឱ្យទម្ងន់ខ្លួនឡើង ឬចុះគ្រប់ពេលវេលា។ បើអ្នកចង់ចាត់ការរឿងទឹកដែលនៅក្នុងរាងកាយនេះ អ្នកគួរតែទៅប្រឹក្សាជាមួយគ្រូពេទ្យ ដើម្បីប្រើថ្នាំបញ្ចុះទឹកនោមក៏បាន។

3. ការអង្គុយនៅមួយកន្លែងក្នុង 1ថ្ងៃៗ យូរជាង11ម៉ោង នឹងធ្វើឱ្យអាយុខ្លី
ការអង្គុយធ្វើការនៅនឹងតុរហូត ដោយមិនក្រោកទៅណាពេញមួយថ្ងៃ អាចនឹងធ្វើឱ្យអ្នកអាយុខ្លីដោយមិនដឹងខ្លួន នោះគឺដោយសារតែ នៅពេលដែលរាងកាយរបស់យើងមិនបានកម្រើក ឬធ្វើចលនាទៅណា វាអាចបង្កឱ្យកើតមានបញ្ហាសុខភាពបាន មិនថាតែបញ្ហាពាក់ព័ន្ធនឹងប្រព័ន្ធដុតបំផ្លាញក្នុងរាងកាយ ប្រព័ន្ធរំលាយអាហារ ប្រព័ន្ធបន្ទោបង់ ឬសូម្បីតែប្រព័ន្ធឈាមរត់ក៏ដោយ ដូច្នេះបើចង់មានអាយុវែង គួរឧស្សាហ៍ក្រោកចេញពីតុធ្វើការខ្លះផង គ្រាន់តែក្រោកទៅចូលបន្ទប់ទឹកក៏ជួយបានច្រើនដែរ។

4. តែបៃតងជួយបង្កើនការធ្វើការរបស់ខួរក្បាលបាន
យើងដឹងច្បាស់ហើយថា តែបៃតងមានប្រយោជន៍ច្រើនណាស់ ជាពិសេសតែបៃតងនេះ មានសារធាតុប្រឆាំងអនុមូលឥស្សរៈខ្ពស់ ទើបវាជួយការពារការកើតជំងឺមហារីកបាន តែប្រយោជន៍មួយទៀតដែលសំខាន់នោះគឺ តែបៃតងជួយបង្កើនការធ្វើការងាររបស់ខួរក្បាលបានទៀតផង ដោយមានការសិក្សាស្រាវជ្រាវមួយបានរកឃើញថា អ្នកដែលញ៉ាំតែបៃតងជាប់ជាប្រចាំ នឹងធ្វើឱ្យមានការចងចាំល្អជាងអ្នកដែលមិនធ្លាប់ញ៉ាំសោះ។

5. ស្ករ ធ្វើឱ្យអាការក្នុងអំឡុងពេលមានវដ្តរដូវកាន់តែអាក្រក់
ស្ត្រីជាច្រើន ច្រើនតែគិតថា ការទទួលទានបង្អែមនៅក្នុងអំឡុងពេលមានរដូវប្រចាំខែ នឹងជួយឱ្យអាការផ្សេងៗដែលកើតឡើងក្នុងអំឡុងពេលនោះថយចុះ តែការពិតវិញ ជាតិស្ករហ្នឹងឯងដែលជាបច្ច័យអាក្រក់ធ្វើឱ្យអាការទាំងនោះកាន់តែអាក្រក់ឡើង ព្រោះការទទួលទានស្ករ(ជាតិផ្អែម)ច្រើនពេកនឹងធ្វើឱ្យជាតិម៉ាញេស្យូមក្នុងរាងកាយថយចុះ ធ្វើឱ្យឆ្អល់ពោះ ដែលអាការឆ្អល់ពោះនេះ គឺជាអាការមួយដែលស្ត្រីមិនចង់ឱ្យកើតមានក្នុងអំឡុងពេលមានរដូវឡើយ ដូច្នេះបើពេលមានរដូវប្រចាំខែ គួរប្តូរពីបង្អែមមកទទួលទានផ្លែឈើវិញប្រសើរជាងបាយអង្ករស្រូវសាលីជួយឱ្យអារម្មណ៍ល្អជឿថា អ្នកណាៗក៏ចង់មានពេលព្រឹក និងថ្ងៃធ្វើការដ៏ស្រស់ថ្លាដែរ ដូច្នេះ ឡារ៉ែន ចង់ប្រាប់ថា បាយអង្ករស្រូវសាលីអាចជួយបាន ព្រោះអង្ករស្រូវសាលីនឹងទៅជួយបង្កើនកម្រិតរបស់អ័រម៉ូនសេរ៉ូថូនិន(Serotonin)នៅក្នុងខួក្បាល ដោយសារធាតុមួយនេះគឺជាសារធាតុដែលជួយធ្វើឱ្យមនុស្សមានអារម្មណ៍ល្អ។ ដូច្នេះពេលព្រឹកថ្ងៃស្អែកនេះ សាកល្បងរកបាយអង្ករស្រូវសាលីមកញ៉ាំធ្វើជាអាហារពេលព្រឹកម្តងមើល៍…។

6. ការហាត់ប្រាណ គួរប្តូរពីបង្អែមមកទទួលទានផ្លែឈើវិញប្រសើរជាងពេលខ្លួនចាស់ទៅ
ការចាប់ផ្តើមហាត់ប្រាណតាំងពីវ័យកំលោះក្រមុំ ក្រៅពីនឹងធ្វើឱ្យសុខភាពរឹងមាំល្អជាបន្តរហូតទៅដល់អនាគតហើយនោះ នៅមានផលវិជ្ជមានដល់ខួរក្បាលទៀត ព្រោះមានការសិក្សាស្រាវជ្រាវមួយបានការហាត់ប្រាណជាប្រចាំក្នុងអំឡុងអាយុងអំឡុងអាយុ 20ឆ្នាំរហូតមក នឹងជួយឱ្យមានការចងចាំល្អ ទោះជាវ័យហួសទៅដល់ 40 ឬ 50ឆ្នាំហើយក៏ដោយសុខភាពរាងកាយងកាយរបស់យគឺជារឿងសំខាន់ បើយើងចេះមើលថែទាំវាឱ្យបានល្អ នឹងជួយឱ្យសុខភាពផ្លូវចិត្តរបស់យើងល្អទៅតាមនោះដែរ តែបើអ្នកព្រងើយកន្តើយ វាអាចនឹងធ្វើឱ្យទាំងរាងកាយ និងផ្លូវចិត្តរបស់អ្នកកាន់តែយ៉ាប់យ៉ឺនទៅ បន្ទាប់ពីនោះរោគាផ្សេងៗនឹងតាមមក ដូច្នេះគួរនាំគ្នាថែរក្សាសុខភាពឱ្យបានល្អប្រសើរជាង៕

February 12, 2020

Category: សង្គម និងសេដ្ឋកិច្ច