សង្គម និងសេដ្ឋកិច្ច - La Reine Media

ក្រុមហ៊ុន Apple បិទហាងនៅចិនកាលពីថ្ងៃមុន ឥឡូវបើកវិញហើយ តែឱ្យបុគ្គលិកធ្វើការតែ 7ម៉ោង/ថ្ងៃ

បន្ទាប់ពីផ្អាកដំណើរការមួយរយៈកន្លងមក ដែលជាការឆ្លើយតបទៅនឹងការព្រួយបារម្ភពាក់ព័ន្ធនឹងការផ្ទុះវីរុសកូរ៉ូណា ពេលនេះហាងរបស់ក្រុមហ៊ុន Apple ចំនួន5 នៅទីក្រុងប៉េកាំង បានសម្រេចបើកធ្វើអាជីវកម្មឡើងវិញ តែកាត់បន្ថយម៉ោងធ្វើការ ពី 12ម៉ោងមកនៅត្រឹមតែ 7ម៉ោងប៉ុណ្ណោះក្នុង 1ថ្ងៃ។

ជាទូទៅ ម៉ោងបម្រើការ គឺចាប់បើកពីម៉ោង 10ព្រឹកដល់ម៉ោង 10យប់ តែឥឡូវមកចាប់ផ្តើមពីម៉ោង 11ព្រឹកដល់ម៉ោង 6ល្ងាចវិញ។ ក្រុមហ៊ុន Apple បានសម្រេចបើកដំណើរការហាងលក់ Apple Store មួយចំនួនធំនៅឯប្រទេសចិនតាំងពីថ្ងៃទី14 កុម្ភៈ ឆ្នាំ2020 នេះវិញហើយ។

ក្រុមហ៊ុន Apple ក៏នៅតែទទូចឱ្យមានការចូលរួមសហការពីអតិថិជន ដោយបានអំពាវនាវឱ្យប្រើប្រាស់ម៉ាស់នៅពេលពួកគេមកកាន់ហាងលក់ និងយល់ព្រមឱ្យបុគ្គលិកធ្វើការវាស់សីតុណ្ហភាពរាងកាយ។ គិតត្រឹមល្ងាចថ្ងៃទី18កុម្ភៈ ឆ្នាំ2020 ករណីអ្នកឆ្លងវីរុសកូរ៉ូណានៅទូទាំងពិភពលោក បានកើនឡើងដល់ 73,335នាក់ និងតួលេខអ្នកស្លាប់បានកើនដល់ 1,873នាក់ហើយ៕

ប្រភព៖ សារព័ត៌មានបរទេស

February 18, 2020

អាសន្នរោគកូរ៉ូណា COVID-19 កំពុងជួយដល់វិស័យហិរញ្ញវត្ថុអនឡាញ

ការដែលប្រជាជនមិនហ៊ានចេញទៅក្រៅនៅពេលកើតមានវិបត្តិសុខភាព និងការដែលសាខាធនាគារជាច្រើនបានបិទទ្វារ ឬផ្អាកដំណើរការ បានជំរុញឱ្យសកម្មភាពប្រតិបត្តិការហិរញ្ញវត្ថុតាមអ៊ីនធើណិត មានការកើនឡើងគួរឱ្យកត់សម្គាល់។

ក្រោយដំណើរការរអាក់រអួលជាច្រើនខែព្រោះតែបាតុកម្ម ក្រុមហ៊ុនទាំងឡាយនៅហុងកុងក៏ត្រូវជាប់គាំងក្នុងការ “ឡោមព័ទ្ធ” នៃអាសន្នរោគកូរ៉ូណា COVID-19។ អាជ្ញាធរទីក្រុងហុងកុងបានព្រមានថា សេដ្ឋកិច្ចនឹងធ្លាក់ចូលជ្រៅទៅក្នុងឱនភាព។ ឆ្នាំ2019 ទីក្រុងហុងកុងបានជួបវិបត្តិសេដ្ឋកិច្ចលើកដំបូងចាប់តាំងពីវិបត្តិហិរញ្ញវត្ថុសកលនាឆ្នាំ2008។

បើទោះជាយ៉ាងនេះក្ដី សេវាកម្មអនឡាញនៅទីក្រុងហុងកុង បែរជាឡើង “គ្រងរាជ” ទៅវិញ។ ធនាគារ Bank of China សាខាក្រុងហុងកុង ថ្មីៗនេះ បានកត់សម្គាល់ឃើញថា ចំនួនអតិថិជនដែលបានចូលប្រើកម្មវិធី App របស់ខ្លួន មានការកើនឡើងច្រើន។ AIA ក៏ទទួលបានសំណួរជាច្រើនទាក់ទិននឹងសេវាកម្ម។ ចំណែក Bank of East Asia ក៏បានកត់សម្គាល់ឃើញថា សេវាទូទាត់តាមអ៊ីនធើណិតរបស់អតិថិជន មានការកើនឡើងខ្ពស់ផងដែរ។

“អាសន្នរោគ កំពុងតែពិសោធទៅលើប្រព័ន្ធហិរញ្ញវត្ថុរបស់ទីក្រុងហុងកុង។ អតិថិជនកំពុងតែងាកមកប្រើសេវាកម្មហិរញ្ញវត្ថុតាមអ៊ីនធើណិត ជំនួសឱ្យការឈររង់ចាំនៅមុខធនាគារ។ មកដល់ពេលនេះ បណ្ដាក្រុមហ៊ុនហិរញ្ញវត្ថុ នៅតែអាចដោះស្រាយស្ថានការណ៍បានយ៉ាងល្អប្រសើរ”។ នេះបើតាមការបកស្រាយរបស់ Kenny Ng Lai-yin អ្នកឯកទេសផ្នែកយុទ្ធសាស្ត្រមូលបត្រនៃក្រុមហ៊ុន Everbright Sun Hung Kai។

សាខានៃធនាគារក្នុងទីក្រុងហុងកុងចំនួនពី 20-30% បានបិទទ្វារ និងឱ្យបុគ្គលិកធ្វើការនៅឯផ្ទះរៀងៗខ្លួន ដើម្បីកាត់បន្ថយ និងទប់ស្កាត់ការឆ្លងរាលដាលនៃមេរោគកូរ៉ូណា។ ប្រព័ន្ធទូទាត់រហ័ស (Faster Payment System) ដែលត្រូវបានបង្កើតឡើងកាលពីខែកញ្ញា ឆ្នាំ2018 របស់ហុងកុង នៅតែរីកចម្រើនយ៉ាងរលូន។ ប្រព័ន្ធទូទាត់រហ័ស គឺជាប្រព័ន្ធដែលតភ្ជាប់បណ្ដាធនាគារជាមួយនឹងបណ្ដាក្រុមហ៊ុនគ្រប់គ្រងកាបូបអេឡិចត្រូនិក និងក្រុមចំនហ៊ុនផ្ដល់សេវាទូទាត់តាមអ៊ីនធើណិត (digital wallet ឬ e-Wallet) ក្នុងបំណងបង្កើនចំនួននៃប្រតិបត្តិការ។

គិតមកដល់ខែមករា ឆ្នាំ2020 មានអតិថិជនប្រមាណជា4,2លាននាក់ បានចុះឈ្មោះប្រើប្រាស់សេវាខាងលើនេះ ពោលគឺប្រហែលជាងពាក់កណ្ដាលនៃប្រជាជនសរុបនៅហុងកុង។ កាលពីខែមុន ប្រតិបត្តិការហិរញ្ញវត្ថុចំនួន192,000លើក ដែលមានតម្លៃ2,5ពាន់លានដុល្លារហុងកុង (322លានដុល្លារអាមេរិក) ត្រូវបានធ្វើឡើង។ ប្រតិបត្តិការនេះបានកើនឡើង3ដង បើធៀបនឹងខែដំបូងនៃការដាក់ឱ្យប្រើប្រាស់ប្រព័ន្ធទូទាត់រហ័សនេះ។

នៅឯធនាគារ Bank of China វិញ ប្រតិបត្តិការនៅលើទូរស័ព្ទភាគច្រើនគឺការផ្ទេរប្រាក់ ទូទាត់វិក្កយបត្រ ផ្ញើប្រាក់សន្សំ ឬប្ដូររូបិយប័ណ្ណអន្តរជាតិ។ អ្នកនាំពាក្យរបស់ធនាគារ Bank of East Asia វិញ ថ្លែងថា៖ “យើងសូមលើកទឹកចិត្តឱ្យអតិថិជន ប្រើប្រាស់កម្មវិធីអនឡាញ ឬ App គ្រប់ពេល ដើម្បីកាត់បន្ថយចំនួនអតិថិជនទៅកាន់សាខាផ្ទាល់ និងទៅទីសាធារណៈ ដើម្បីជួយទប់ស្កាត់ការឆ្លងរាលដាលនៃមេរោគកូរ៉ូណា”។

Simon Loon សហស្ថានិក និងជា CEO នៃក្រុមហ៊ុនសេវាផ្ដល់ប្រាក់កម្ចីតាមអ៊ីនធើណិត WeLab និង WeLend បានឱ្យដឹងថា ខ្ទង់ប្រាក់កម្ចីបានកើនឡើងគួរឱ្យកត់សម្គាល់ ក្រោយពីអាសន្នរោគបានឆ្លងរាលដាល។ ខ្ទង់ប្រាក់កម្ចីនៅលើWeLend បានកើនឡើង24% កាលពីត្រីមាសកន្លង បើធៀបនឹងរយៈពេលដូចគ្នាកាលពីឆ្នាំមុននោះ។ ចំណែកអំឡុងពេលក្រោយចូលឆ្នាំចិន កំណើននៃខ្ទង់ប្រាក់កម្ចី បានកើនឡើង14% បើធៀបនឹងឆ្នាំមុន។

នេះគឺជាប្រតិកម្មដែលត្រូវបានគេព្យាករមុនរួចមមកហើយ។ ចំណែកឯបណ្ដាក្រុមហ៊ុនធានារ៉ាប់រង ឬក្រុមហ៊ុនទូទាត់តាមអនឡាញជាដើម ក៏បានស្គាល់កំណើននៃការប្រើប្រាស់សេវាកម្មរបស់ខ្លួននេះដែរ។

“ដំណាក់កាលចាប់ពីថ្ងៃទី26មករា -9កុម្ភៈ អតិថិជននៃក្រុមហ៊ុន AIA ប្រមាណជា60% បានប្រើប្រាស់សេវាកម្មតាមអ៊ីនធើណិត ដូចជា AIA Connect និងគេហទំព័រ AIA Hong Kong ជាដើម។ ចំនួននេះ កើន20% បើធៀបនឹងរយៈពេលដូចគ្នាកាលពីឆ្នាំ2019″។ នេះបើតាមការឱ្យដឹងពី Peter Crewe អគ្គនាយកប្រតិបត្តិនៃក្រុងហ៊ុន AIA Hong Kong និង Macau។

សារព័ត៌មាន SCMP រាយការណ៍ថា Fred Ngan Yiu-fai សហស្ថានិក និងជា CEO នៃក្រុមហ៊ុនធានារ៉ាប់រងអនឡាញ Bowtie Inserance បានប្រាប់ថា “យើងបានកត់សម្គាល់ឃើញថា ប្រាក់ចំណូលបានកើនឡើង3ដងក្នុងរយៈពេល2សប្ដាហ៍ដំបូងនៃខែកុម្ភៈ បើធៀបនឹងខែមុននោះ។ នៅពេលគេដឹងច្បាស់អំពីផលប្រយោជន៍នៃការទិញដូរតាមអ៊ីនធើណិត ពួកគេនឹងបន្តធ្វើបែបនេះតទៅទៀត”។

Blue ដែលជាក្រុមហ៊ុនធានារ៉ាប់រងតាមអនឡាញមួយផ្សេងទៀត ក៏ទទួលបានប្រយោជន៍ច្រើនពីការដែលប្រជាជនបង្កើនការការពារសុខភាព។ អគ្គនាយកប្រតិបត្តិ Charles Hung ថ្លែងថា ចំនួនឯកសារចុះឈ្មោះ បានកើនឡើងទ្វេដង។ ចំណែកក្រុមហ៊ុន Prudential វិញ ឱ្យដឹងថា 90% នៃឯកសារស្នើសុំសំណងកាលពីអាទិត្យមុន ត្រូវបានបញ្ជូនមកក្រុមហ៊ុនតាមរយៈអនឡាញ។

ប៉ុន្តែ បើទោះជាយ៉ាងណាក៏ដោយ បណ្ដាក្រុមហ៊ុនឈ្មួញជើងសាមូលបត្រនៅទីក្រុងហុងកុងវិញ បែរជាមិនបានទទួលផលប្រយោជន៍ពីនិន្នាការថ្មីនេះ។ Gordon Tsui ដែលជាប្រធានសមាគមនៃក្រុមហ៊ុនមូលបត្រហុងកុង បានឱ្យដឹងថា “អ្នកវិនិយោគភាគច្រើន បានងាកទៅប្រើប្រាស់សេវាទូទាត់តាមអនឡាញ និងតាមទូរស័ព្ទជាច្រើនឆ្នាំមកហើយ”៕

ប្រភព៖ សារព័ត៌មានបរទេស

February 18, 2020

ឥណទានក្នុងវិស័យមីក្រូហិរញ្ញវត្ថុកម្ពុជាកាលឆ្នាំ2019 កើនដល់ចំនួនប្រមាណជាង 7ពាន់លានដុល្លារ

ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ស៊ីអឹមអេ ឬស.ម.ក (Cambodia Microfinance Association ឬ CMA) បានឱ្យដឹងថា វិស័យមីក្រូហិរញ្ញវត្ថុនឹងបន្តមានសុខភាពល្អ ខណៈ ដែលផលបត្រកម្ចី មានដល់ទៅជាង 7ពាន់លានដុល្លារ។ ផលបត្រឥណទាននេះបានបន្តជាមួយនឹងលទ្ធផលប្រសើរជាងមុន ជាមួយនឹងការកើនឡើងជិត 30%។

លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា (ស៊ីអឹមអេ) បានមានប្រសាសន៍ថា៖“បើយើងក្រឡេកមើលសមិទ្ធផលមីក្រូហិរញ្ញវត្ថុជាទូទៅ វាល្អកាលពីឆ្នាំមុន។ ប្រជាជនកម្ពុជាចំនួន 2.1លាននាក់បានប្រើប្រាស់សេវាកម្មរបស់អ្នកផ្តល់ប្រាក់កម្ចីខ្នាតតូច ដោយខ្ចីប្រាក់សរុបចំនួន 7.5ប៊ីលានដុល្លារក្នុងឆ្នាំ2019 ពោលគឺកើនឡើងជិត 30% បើធៀបនឹងឆ្នាំមុន។ ខណៈពេលដែលប្រាក់បញ្ញើ ក៏កំពុងកើនឡើងជាលំដាប់ផងដែរ និងអ្នកសន្សំមានចំនួនជិត 3លាននាក់ ដោយមានទឹកប្រាក់ជិត4ពាន់លានដុល្លារនៅតាមការិយាល័យចំនួន 1,400កន្លែងដែលមានបុគ្គលិកចំនួន 34,000នាក់នៅទូទាំងប្រទេស”។

លោកបានធ្វើការកត់សម្គាល់ថា ការបំពេញការងារប្រកបដោយសុខភាពល្អ ក៏ឆ្លុះបញ្ចាំងពីសមាមាត្រនៃប្រាក់កម្ចីមិនដំណើរការដែរ (NPL) ដែលក្នុងនោះលោកបានមានប្រសាសន៍ថា ប្រាក់កម្ចីដែលការទូទាត់លើសពី 30ថ្ងៃ គឺមានទាបជាង 1% នៅចុងឆ្នាំ2019 ដែលជាអត្រាទាបជាងឆ្នាំមុន។

សមាគមមីក្រូហិរញ្ញវត្ថុកម្ពុជា (ស.ម.ក) Cambodia Microfinance Association ឬ CMA បានដាក់ចេញនូវគម្រោងបរិយាប័ន្នហិរញ្ញវត្ថុ ប្រកបដោយការទទួលខុសត្រូវ ខណៈការផ្តល់ឥណទានក្នុងវិស័យមីក្រូហិរញ្ញវត្ថុកម្ពុជា បានកើនដល់ចំនួនប្រហែល 7ពាន់លានដុល្លារ។

គម្រោងបរិយាប័ន្នហិរញ្ញវត្ថុប្រកបដោយការទទួលខុសត្រូវនេះ ត្រូវបានធ្វើឡើងដើម្បីឆ្លើយតបនឹងការព្រួយបារម្ភនានា និងរួមចំណែកក្នុងកំណើនសេដ្ឋកិច្ច តាមរយៈការធ្វើឱ្យប្រជាជនកម្ពុជាមានលទ្ធភាពទទួលបានសេវាកម្មហិរញ្ញវត្ថុផ្លូវការប្រកបដោយការទទួលខុសត្រូវ។ គម្រោង 3ឆ្នាំដែលទទួលបានវិភាគទានពីសមាជិករបស់ ស.ម.ក នេះ នឹងរួមចំណែកដល់យុទ្ធសាស្ត្រស្តីពីបរិយាប័ន្នហិរញ្ញវត្ថុឆ្នាំ2019-2025 របស់ធនាគារជាតិនៃកម្ពុជា។

លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានមានប្រសាសន៍ថា៖“គម្រោងបរិយាប័ន្នហិរញ្ញវត្ថុប្រកបដោយការទទួលខុសត្រូវ ឆ្លើយតបបន្ថែមទៀតទៅនឹងការព្រួយបារម្ភនានា ព្រមទាំងចូលរួមចំណែកក្នុងកំណើនសេដ្ឋកិច្ច ដែលធ្វើឱ្យប្រជាជនកម្ពុជា មានសិទ្ធិទទួលសេវាហិរញ្ញវត្ថុផ្លូវការបន្ថែម ក្នុងពេលដែល ស.ម.ក ឬ CMA បាននិងកំពុងធ្វើការងារនេះ ជាមួយសមាជិករបស់ខ្លួនផងដែរចាប់តាំងពីឆ្នាំ2017 មក”។

ជាមួយគ្នានេះដែរ អតិថិជនដែលបានប្រើប្រាស់ប្រាក់កម្ចីពីវិស័យមីក្រូហិរញ្ញវត្ថុ ភាគច្រើនប្រើប្រាស់នៅក្នុងវិស័យកសិកម្ម ពាណិជ្ជកម្ម និងផលិតកម្ម រីឯវិស័យសេវាកម្មវិញ ក៏មានការកើនឡើងគួរឱ្យកត់សម្គាល់ផងដែរ។ យើងបានប្រឈមនឹងបញ្ហាមួយចំនួន ដែលបញ្ហាមួយគឺការគំរាមកំហែងនៃស្ថានភាពគ្រោះរាំងស្ងួតក្នុងឆ្នាំ2018 ពីព្រោះកសិកម្ម គឺជាវិស័យអាទិភាពមួយក្នុងវិស័យមីក្រូហិរញ្ញវត្ថុដែលកំណើនឥណទានថយចុះបន្តិចនៅដើមឆ្នាំ2019។ ទោះយ៉ាងណា កំណើនឥណទានចាប់ផ្តើមមានអត្រាកំណើនល្អ ចាប់ពីត្រីមាសទី3 នៃឆ្នាំនោះ។

សមាគមមីក្រូហិរញ្ញវត្ថុកម្ពុជា គឺជាស្ថាប័នតែមួយគត់ តំណាងឱ្យស្ថាប័នមីក្រូហិរញ្ញវត្ថុទាំងអស់ដែលបានចុះបញ្ជីស្របច្បាប់ និងអនុវត្តនូវគម្រោងតម្លៃជិត 1លានដុល្លារ ដោយសហការយ៉ាងជិតស្និទ្ធជាមួយសមាជិករបស់ខ្លួន ព្រមទាំងដៃគូសំខាន់ៗ ដូចជាធនាគារជាតិនៃកម្ពុជា សមាគមធនាគារជាតិនៅកម្ពុជា ការិយាល័យឥណទានកម្ពុជា និងដៃគូអភិវឌ្ឍន៍នានា។

វិស័យហិរញ្ញវត្ថុ មានការផ្លាស់ប្តូរគួរឱ្យកត់សម្គាល់ក្នុងរយៈពេល 10ឆ្នាំចុងក្រោយនេះ។ ជាបឋម ផលបត្រឥណទានបានកើនជាងមុន 18ដង នៅពេលដែលចំនួនអតិថិជនកើនជាងមុន 2ដង។ ជាងនេះទៀត វិស័យនេះបានប្រែប្រួលខ្លាំង ពីវិស័យអង្គការអភិវឌ្ឍន៍ ទៅជាស្ថាប័នហិរញ្ញវត្ថុដែលគ្រប់គ្រងដោយម្ចាស់ទុនឯកជន។

ថ្មីៗនេះក្រសួងសេដ្ឋកិច្ច និងហិរញ្ញវត្ថុបានព្យាករថា កំណើនសេដ្ឋកិច្ចពិតរបស់កម្ពុជា នឹងមានជាមធ្យម 6.1%នៅឆ្នាំ(2020)នេះ ពោលគឺធ្លាក់ចុះ កាលពីឆ្នាំមុន(2019)។ បញ្ហានេះភាគច្រើនដោយសារតែកត្តាខាងក្រៅ ដោយរដ្ឋាភិបាលបានលើកឡើងពីមូលហេតុនៃសង្គ្រាមពាណិជ្ជកម្មរវាងចិន និងអាមេរិក និងមេរោគវីរុសកូរ៉ូណាប្រល័យលោកដែលអាចបង្កគ្រោះថ្នាក់ធំដល់ពិភពលោកទាំងមូល ការប្រែប្រួលអាកាសធាតុ និងការកាត់បន្ថយសន្តិសុខភូមិសាស្ត្រនយោបាយ និងសន្តិសុខសកលលោក បន្ទាប់ពីមានការវាយប្រហាររបស់អុីរ៉ង់ទៅលើផលប្រយោជន៍អាមេរិកដែលការគាំពារនិយមរីករាលដាល។

លោក គា បូរាណ ជឿជាក់ថា ប្រសិនបើកំណើនផ.ស.ស របស់ប្រទេសជាតិថយចុះ វានឹងប៉ះពាល់ដល់វិស័យមីក្រូហិរញ្ញវត្ថុ។ យើងត្រូវរង់ចាំមើលថា តើអ្វីៗនឹងវិវឌ្ឍយ៉ាងដូចម្តេចនៅក្នុងរយៈពេលខ្លីខាងមុខ។

លោកបានមានប្រសាសន៍ថា៖“ប្រសិនបើសេដ្ឋកិច្ចធ្លាក់ចុះ ការស្នើសុំប្រាក់កម្ចីក៏នឹងធ្លាក់ចុះដែរ ហើយការផ្តល់ប្រាក់កម្ចី ក៏ត្រូវយកមកពិចារណាផងដែរ។ នោះជាមូលហេតុ ដែលយើងរំពឹងថា ផលបត្រប្រាក់កម្ចីនៅឆ្នាំនេះ នឹងមិនកើនឡើងខ្ពស់ជាងឆ្នាំ2019 ទេ។ ប៉ុន្តែកិច្ចព្រមព្រៀងពាណិជ្ជកម្ម EBA ប្រសិនបើវាត្រូវបានដក នឹងមិនប៉ះពាល់ដល់ឧស្សាហកម្មមីក្រូហិរញ្ញវត្ថុទេ ពីព្រោះដូចដែលបានលើកឡើងហើយថា វិស័យនេះផ្តោតសំខាន់ទៅលើវិស័យកសិកម្ម”។

វិស័យមីក្រូហិរញ្ញវត្ថុ ក៏បានធ្វើការផ្តោតខ្លាំងទៅលើសហគ្រាសធុនតូច និងមធ្យម ទន្ទឹមនឹងធនាគារមួយចំនួនតូចក៏បានហក់ចូលក្នុងទីផ្សារនេះដែរ។ ការដាក់ពិតានអត្រាការប្រាក់របស់រដ្ឋកាលពីខែមេសា ឆ្នាំ2017 បានធ្វើឱ្យចំនួនអតិថិជននៅតែថេរ តែទំហំឥណទានមធ្យមកាន់តែកើនឡើងគួរឱ្យកត់សម្គាល់។ កំណើននេះ បានជំរុញឱ្យមានការកោតសរសើរ ក៏ដូចជាក្តីបារម្ភដែរថា អាចនឹងមានបញ្ហាប្រឈម ដូចជាបំណុលវ័ណ្ឌក ដោយសារតែមានការប្រកួតប្រជែងខ្លាំងក្នុងវិស័យនេះ។

គេរំពឹងថា គម្រោងនេះនឹងចូលរួមចំណែកយ៉ាងច្រើនដល់សេដ្ឋកិច្ចជាតិ ទី1-ជួយលើកម្ពស់បរិយាប័ន្នមីក្រូហិរញ្ញវត្ថុ ដោយប្រើប្រាស់ស្ដង់ដាអន្តរជាតិប្រកបដោយក្រមសីលធម៌ មានដូចជា គោលការណ៍ការពារអតិថិជន ឥណទានភ្ជាប់ជាមួយកិច្ចការសង្គមគោលការណ៍ផ្តល់ប្រាក់កម្ចី ព្រមទាំងយន្តការដោះស្រាយបណ្តឹងអតិថិជន។ ទី2-លើកកម្ពស់វិស័យអប់រំហិរញ្ញវត្ថុដល់អតិថិជន និងសាធារណជន ដោយសហការជាមួយធនាគារជាតិនៃកម្ពុជា និងដៃគូផ្សេង។ ទី3-លើកកម្ពស់ដល់ការយល់ដឹងពីតួនាទីមីក្រូហិរញ្ញវត្ថុក្នុងការកាត់បន្ថយភាពក្រីក្រ និងជួយកំណើនសេដ្ឋកិច្ចតាមទីជនបទ និងទី4-ស្រាវជ្រាវ និងអភិវឌ្ឍបន្ថែមពីវិស័យមីក្រូហិរញ្ញវត្ថុ។

សូមបញ្ជាក់ថា សមាគមមីក្រូហិរញ្ញវត្ថុ គឺជាសមាគមវិជ្ជាជីវៈមួយដែលជួយធ្វើឱ្យមានវិបុលភាព និងនិរន្តរភាពក្នុងវិស័យមីក្រូហិរញ្ញវត្ថុនៅក្នុងប្រទេសកម្ពុជា ដោយបានជំរុញឱ្យមានកំណើនសេដ្ឋកិច្ចព្រមទាំងការអភិវឌ្ឍ។ ស.ម.ក មានសមាជិកចំនួន101ស្ថាប័ន សុទ្ធសឹងជាគ្រឹះស្ថានមីក្រូហិរញ្ញវត្ថុគ្រឹះស្ថានឥណទានជនបទ ព្រមទាំងក្រុមហ៊ុនភតិសន្យា(បង់រំលស់)។

លោក កាំង តុងងី ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជាបានប្រាប់ឡារ៉ែនពាណិជ្ជឱ្យដឹងថា៖“ទិន្នន័យនៃកម្ចីដែលសមាគមមាន គេមិនគិតជាឆ្នាំទេ គឹគេគិតថា មកដល់ចំណុចពេលហ្នឹង មានប្រជាជនប៉ុន្មាននាក់ដែលកំពុងតែទទួលបានកម្ចី ហើយចំនួនលុយប៉ុន្មានដែលកំពុងតែជំពាក់? ពីព្រោះអ្នកខ្លះខ្ចីត្រឹម 2-3ឆ្នាំ ឯអ្នកខ្លះខ្ចីដល់ 10ឆ្នាំ។ ដូច្នេះយើងមិនអាចគិតថា 1ឆ្នាំប៉ុន្មានបានទេ។ ដូច្នេះតួលេខពិតប្រាកដដែលយើងមាន គិតត្រឹមខែកញ្ញា ឆ្នាំ2019 គឺមានមនុស្សប្រមាណជា 2.1លាននាក់កំពុងតែខ្ចីបំណុលដែលមានទំហំប្រមាណជាង 7.5ប៊ីលានដុល្លារ”។

លោក កាំង តុងងី ក៏បានបញ្ជាក់ដែរថា៖“ចំពោះតួលេខដែលបញ្ជាក់អំពីការអនុវត្តឱ្យបាននូវការប្រើប្រាស់ប្រាស់រៀលឱ្យបាន 10%ក្នុងឆ្នាំ2019នោះ សមាគមបានទាក់ទងទៅសមាជិកអ្នកពាក់ព័ន្ធ ដើម្បីប្រមូលទិន្នន័យហើយ តែបើគិតពីការប្រើប្រាស់ គឺអាចលើសពី 10%ហើយ ព្រោះវិស័យមីក្រូហិរញ្ញវត្ថុមានអតិថិជនប្រមាណ 80%ជាអ្នកខ្ចី ក្នុងមុខរបរទាក់ទងនឹងកសិកម្ម និងសហគ្រាសធុនតូច និងមធ្យម ដូច្នេះការប្រើប្រាស់ប្រាក់រៀល វាច្រើនជាងខាងធនាគារពាណិជ្ជ”៕

February 18, 2020

ឆ្នាំ2019 កម្ពុជានាំចេញជ័រកៅស៊ូជិត 30ម៉ឺនតោន ខណៈក្រុមហ៊ុនកៅស៊ូវៀតណាម គ្រោងមកពង្រីកផលិតកម្មនៅកម្ពុជា

រយៈពេលពេញ 1ឆ្នាំ2019 កម្ពុជាបាននាំចេញជ័រកៅស៊ូជិត 30ម៉ឺនតោន ដែលចំនួននេះកើនឡើង30% បើធៀបនឹងរយៈពេលដូចគ្នាកាលពីឆ្នាំ2018។នេះបើតាមរបាយការណ៍ផ្លូវការ របស់ក្រសួងកសិកម្មរុក្ខាប្រមាញ់ និងនេសាទ។

របាយការណ៍ក្រសួងកសិកម្ម បានបញ្ជាក់ថា រយៈពេលពេញ 1ឆ្នាំ2019 កន្លងទៅ កម្ពុជាផលិតជ័រកៅស៊ូសម្រេចបាន 287,638តោន កើនឡើងចំនួន67,538តោន ស្មើនឹង 30% ធៀបនឹងឆ្នាំ2018។ បរិមាណជ័រកៅស៊ូនាំចេញនៅឆ្នាំ2019 សម្រេចបានចំនួន 282,071តោន កើនឡើង 64,570តោន ស្មើនឹង 30% ធៀបនឹងឆ្នាំ2018។

គួរកត់សម្គាល់ដែរថា ក្នុងឆ្នាំ2019 តម្លៃជ័រកៅស៊ូជាមធ្យមគឺ 1,336ដុល្លារក្នុង 1តោន តម្លៃនេះកើនឡើង 19ដុល្លារក្នុង1 តោន កាលពីឆ្នាំមុន ធៀបនឹងឆ្នាំ2018 ខណៈកាលពីខែធ្នូកន្លងទៅ តម្លៃជាមធ្យម1,371ដុល្លារក្នុង 1តោនកើនឡើង 44ដុល្លារធៀបនឹងខែវិច្ឆិកា ឆ្នាំ2018។

ក្នុងរបាយការណ៍បានបញ្ជាក់ថា គិតមកដល់បច្ចុប្បន្ននេះ កម្ពុជាមានផ្ទៃដីដាំកៅស៊ូសរុបមានចំនួន 406,142ហិកតា ក្នុងនោះផ្ទៃដីចៀរជ័រមានចំនួន 247,113ហិកតា ស្មើនឹង 61%។ ចិនគឺជាទីផ្សារធំជាងគេរបស់កៅស៊ូកម្ពុជានៅពេលនេះ។

សូមបញ្ជាក់ថា រយៈពេលពេញមួយឆ្នាំ2018 កម្ពុជាបាននាំចេញជ័រកៅស៊ូជាង 21ម៉ឺនតោន ទទួលបានចំណូលជិត 300លានដុល្លារអាមេរិក។ ជ័រកៅស៊ូកម្ពុជា បាននាំចេញទៅកាន់ប្រទេសចិន វៀតណាម សិង្ហបុរី និងម៉ាឡេស៊ី។

នៅខណៈពេលដែលកៅស៊ូកម្ពុជាកំពុងតែមានបញ្ហា និងស្វែងរកការពង្រីកវិស័យកៅស៊ូនេះ ក្រុមហ៊ុន VRG ដែលជាសហគ្រាសគ្រប់គ្រងដោយរដ្ឋ នៅប្រទេសវៀតណាម បានវិនិយោគលើចម្ការកៅស៊ូខ្នាតធំនៅខេត្តចំនួន7 នៃប្រទេសកម្ពុជា។ ផែនការពង្រីកវិស័យកៅស៊ូ ត្រូវបានលើកឡើងក្នុងជំនួបនៅក្នុងកិច្ចប្រជុំជាមួយឯកឧត្តម វេង សាខុន រដ្ឋមន្ត្រីក្រសួងកសិកម្ម ដែលមានតំណាងក្រុមហ៊ុនកៅស៊ូវៀតណាម គឺលោក ជិន ង៉ុកធួក ។

លោក ជិន បានកត់សម្គាល់ថា ក្រុមហ៊ុនបានប្រមូលជ័រកៅស៊ូចំនួន 5ម៉ឺនតោនពីផ្ទៃដី 47,000ហិកតារបស់ខ្លួនកាលពីឆ្នាំមុន។ លោកបានអរគុណចំពោះក្រសួងកសិកម្មដែលតែងតែគាំទ្រការវិនិយោគរបស់យើងនៅកម្ពុជា។ ក្នុងន័យនេះយើងគ្រោងនឹងពង្រីកផ្ទៃដីដាំដំណាំចម្ការកៅស៊ូរបស់យើងដើម្បីបង្កើនផលិតកម្មកៅស៊ូសម្រាប់កែច្នៃនៅក្នុងប្រទេស ។

សូមបញ្ជាក់ថា ក្រុមហ៊ុនកៅស៊ូវៀតណាម ប្រតិបត្តិការតាមរយៈក្រុមហ៊ុនបុត្រសម្ព័ន្ធចំនួន19 នៅក្នុងព្រះរាជាណាចក្រកម្ពុជា។ ការវិនិយោគមួយនេះ ត្រូវបានគេរាយការណ៍ថា មានតម្លៃប្រហែល 800លានដុល្លារ។ នៅឆ្នាំ2019 ក្រុមហ៊ុនបានទទួលកម្រៃកើនលើស23%នៃគោលដៅប្រចាំឆ្នាំរបស់ខ្លួនដែលធ្វើឱ្យមានចំណូលប្រមាណ 1.28ពាន់លានដុល្លារអាមេរិក។

ទោះយ៉ាងណា ប្រភពក្នុងស្រុកមួយចំនួនបានកត់សម្គាល់ថា ប្រាក់ចំណេញមុនពន្ធរបស់ខ្លួនមានចំនួន 220.82លានដុល្លារពោល គឺ 98%នៃគោលដៅរបស់ខ្លួន។

ផលិតផលកៅស៊ូដែលប្រមូលបានពីប្រជាកសិករ(កៅស៊ូគ្រួសារ)ក្នុងខេត្តចំនួន8 រួមមានកំពង់ចាម ត្បូងឃ្មុំ ក្រចេះ រតនគិរី និងមណ្ឌលគីរីមានតម្លៃជាមធ្យម 1.18ដុល្លារក្នុង 1គីឡូក្រាម សម្រាប់ជ័រកៅស៊ូស្រស់ ខណៈកៅស៊ូស្ងួត ជាមធ្យមលក់ក្នុងតម្លៃ 0.61ដុល្លារក្នុង 1គីឡូក្រាម។ នេះបើយោងតាមទិន្នន័យផ្លូវការពីអគ្គនាយកដ្ឋានកៅស៊ូ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ឡារ៉ែនពាណិជ្ជថា៖“ការដែលក្រុមហ៊ុនវៀតណាមគ្រោងនឹងពង្រីកការវិនិយោគផលិតកៅស៊ូរបស់ខ្លួននៅកម្ពុជានោះ គឺដោយសារតែខាងវៀតណាមគេមានដីសម្បទានដំណាំកៅស៊ូស្រាប់ទៅហើយនៅកម្ពុជា។ ម្យ៉ាងវិញទៀត ក្រុមហ៊ុនវិនិយោគក្នុងស្រុកបានបញ្ឈប់ការវិនិយោគរបស់ខ្លួនដោយមិនអាចបន្តការងារនេះបាន ទើបស្ទុះទៅមុខមិនរួច”។

លោកឧកញ៉ា បានបញ្ជាក់ថា៖“ដោយខាងក្រសួងចង់លុបចោលការវិនិយោគមួយចំនួនរបស់ម្ចាស់ដីសម្បទានក្នុងស្រុក ដែលពុំមានលទ្ធភាព និងពុំមានសកម្មភាពបន្ត ទើបក្រុមហ៊ុនវៀតណាមបានស្វែងរកដៃគូវិនិយោគក្នុងស្រុក បន្តការវិនិយោគលើវិស័យកៅស៊ូនេះ ដោយអាចជួយពង្រីកវិស័យកសិកម្មរបស់យើងបន្ថែមផងដែរ។ តែបើការវិនិយោគលើការផ្តល់ដីសម្បទានថ្មី ពុំមានដីសម្បទានថ្មីផ្តល់ជូនទេ គឺក្រសួងបានបញ្ចប់ការផ្តល់យូរហើយ”។

លោកឧកញ៉ាក៏បានបញ្ជាក់ដែរថា៖“ការវិនិយោគដែលក្រុមហ៊ុនវៀតណាមនឹងធ្វើ គឺតាមរយៈកិច្ចសហការតាមកិច្ចព្រមព្រៀងរបស់ក្រសួងកសិកម្មដែលមានស្រាប់ ហើយវាគឺជាការល្អ ដែលយើងអាចរក្សាស្ថិរភាព នៃវិស័យកៅស៊ូរបស់យើងសម្រាប់ការអភិវឌ្ឍទៅថ្ងៃមុខ”។

លោកឧកញ៉ា លឹម ហេង ក៏បានបញ្ជាក់ទៀតដែរថា៖“ការវិនិយោគបែបនេះ វាមិនមានផលប៉ះពាល់ទេ តែវាជាការជួយគ្នាទៅវិញទេ ពីព្រោះវិស័យកសិកម្មយើងវាមានបញ្ហាច្រើន បើយើងមានដៃគូពីក្រៅសម្រាប់សហការ ជាការល្អ ហើយក្នុងការផ្តល់ដីសម្បទាន រដ្ឋក៏ផ្តល់សិទ្ធិក្នុងការរកដៃគូក្នុងការវិនិយោគរួមដែរ”៕

February 18, 2020

វីដេអូឃ្លីប៖ ផ្សារលក់ប្រចៀវនៅឥណ្ឌូនេស៊ី

ទោះជាមេរោគវីរុសកូរ៉ូណាប្រភេទថ្មីកំពុងសម្លាប់មនុស្សយ៉ាងគួរឱ្យភ័យខ្លាច និងកំពុងឆ្លងរាលដាលខ្លាំងស្ទើរតែទូទាំងពិភពលោកយ៉ាងណាក៏ដោយ តែនៅក្នុងប្រទេសឥណ្ឌូនេស៊ី ក៏នៅតែមានអ្នកបរិភោគសាច់សត្វព្រៃដូចជា ពស់ថ្លាន់ ប្រចៀវ ដែលត្រូវបានគេសង្ស័យថា ជាប្រភពនៃមេរោគវីរុសនោះដោយមិនមានការភ័យខ្លាចអ្វីទាំងអស់ និងហូបតាមទម្លាប់ដូចកាលពីមុនដដែល…។

ខាងក្រោមនេះ គឺជាឃ្លីបវីដេអូដែលបង្ហាញពីទិដ្ឋភាពនៃការទិញលក់ និងហូបសាច់សត្វព្រៃនៅក្នុងផ្សារមួយនៅក្នុងប្រទេសឥណ្ឌូនេស៊ី។

February 18, 2020

ខែមករា ឆ្នាំ2020 ពន្ធដារប្រមូលចំណូលសម្រាប់ថវិកាជាតិ បានជិត 240លានដុល្លារ

សម្រាប់ខែមករា ឆ្នាំ2020 អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ប្រមូល ចំណូលពន្ធអាករគ្រប់ប្រភេទបានមានចំនួន 956,76ប៊ីលានរៀល ឬស្មើនឹងប្រមាណជា 239,19 លានដុល្លារអាមេរិក កើនឡើង 14.74% បើធៀបនឹងរយៈពេលដូចគ្នាឆ្នាំ2019។ នេះបើតាមសេចក្តីប្រកាសព័ត៌មានរបស់ពន្ធដារ។

ក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែមករា ឆ្នាំ2020 ព្រមទាំងទិសដៅ សម្រាប់អនុវត្តបន្តរបស់អគ្គនាយកដ្ឋានពន្ធដារ ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធ ដារ បានបញ្ជាក់ថា ចំណូលកត់ត្រាតាមប្រភេទអ្នកជាប់ពន្ធក្នុងខែមករា ឆ្នាំ2020នេះ មានការកើន ឡើងគួរឱ្យកត់សម្គាល់ផងដែរ ក្នុងនោះអ្នកជាប់ពន្ធធំកើនឡើង 12.98%, អ្នកជាប់ពន្ធមធ្យមកើន ឡើង 39.12%, និងជាពិសេសអ្នកជាប់ពន្ធតូចកើនឡើង 607.97%។

ឯកឧត្តម ក៏បានណែនាំបន្ថែមដល់គ្រប់អង្គភាពឱ្យបន្តខិតខំពង្រឹងការអនុវត្តច្បាប់វិន័យការងារ និងត្រូវមានភាពទន់ភ្លន់ តែម៉ឺងម៉ាត់ ដោយផ្អែកលើទិដ្ឋភាពច្បាប់ ក្នុងការផ្តល់សេវាជូនអ្នកជាប់ពន្ធ និងការគ្រប់គ្រងប្រមូលចំណូល។ ក្នុងស្មារតីបុរេសកម្ម និងអនុវត្តតាមអនុសាសន៍ណែនាំរបស់អគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារនឹងបន្តតាមដាន និងយកចិត្តទុកដាក់ខ្ពស់ចំពោះហានិភ័យនៃម៉ាក្រូសេដ្ឋកិច្ចសកល និងក្នុងតំបន់។

ក្នុងកាលៈទេសៈដែលស្ថានភាពនៃការប្រកួតប្រជែងនៃពាណិជ្ជកម្មអន្តរជាតិ និងបម្រែបម្រួលនៃភូមិសាស្ត្រនយោបាយផងដែរ ព្រមទាំងត្រូវគិតគូរទាំងទិដ្ឋភាព៖ 1-ការបង្កើនប្រសិទ្ធភាពនៃការគ្រប់គ្រងប្រមូលចំណូលពន្ធ។ 2-វិធានការជំរុញកំណើនសេដ្ឋកិច្ច និងលើកកម្ពស់សកម្មភាពសេដ្ឋកិច្ចក្នុងស្រុក ដែលផ្តល់នូវស្ថានភាពអំណោយផល និងទាក់ទាញការវិនិយោគ។

ជាមួយគ្នានេះ ឯកឧត្តម គង់ វិបុល បានក្រើនរំឭក និងលើកទឹកចិត្តដល់ថ្នាក់ដឹកនាំ និងមន្ត្រីពន្ធដារគ្រប់ជាន់ថ្នាក់ ត្រូវយកចិត្តទុកដាក់ថែទាំសុខភាព និងបង្ការទប់ស្កាត់ចំពោះជំងឺផ្លូវដង្ហើមប្រភេទថ្មី Covid-19 ហើយសិក្សាអំពីផលប៉ះពាល់ចំពោះសកម្មភាពសេដ្ឋកិច្ចដែលបណ្តាលមកពីការរីករាលដាលនៃវីរុសកូរ៉ូណាប្រភេទថ្មីនេះ។

សម្រាប់ឆ្នាំ2020 នេះ ដើម្បីធានាបាននូវប្រសិទ្ធភាពក្នុងការអនុវត្តការប្រមូលចំណូលពន្ធ បានគ្រប់តាមផែនការច្បាប់ចំនួនប្រមាណ 11,543.31ប៊ីលានរៀល (ប្រមាណ 2,885.83លានដុល្លារ អាមេរិក) អគ្គនាយកដ្ឋានពន្ធដារ នឹងបន្តអនុវត្តយ៉ាងម៉ឺងម៉ាត់ និងប្រកបដោយប្រសិទ្ធភាពខ្ពស់ថែមទៀតនូវគោលនយោបាយកែទម្រង់ស៊ីជម្រៅរបស់រាជរដ្ឋាភិបាល៕

February 18, 2020

ប្លែកខុសគេ!! ផលិតករភាពយន្ដ « អន្ទាក់ស្នេហ៍ » រំលេចរបាំហោមរោងបែបយីកេក្នុងថ្ងៃសម្ពោធ

វណ្ណថ្មីរបស់ផលិតកម្ម Space SP ភាពយន្ដខ្នាតធំមានចំណងជើងថា « អន្ទាក់ស្នេហ៍ » បានដាក់ប្រកាសសម្ពោធថ្ងៃចាក់បញ្ចាំងហើយ ដែលពិធីក្រុងពាលីមុនថ្ងៃបញ្ចាំងធ្វើនៅបរិវេណរោងភាពយន្ដ Major Cineplex អ៊ីអន២ នៅរាត្រីថ្ងៃទី ១៧ ខែកុម្ភៈ ឆ្នាំ 2020 នេះ។ ភាពយន្ដនេះរួមសម្ដែងដោយ បុរសសាច់ដុំខ្ពស់សង្ហាលោក សន ពិសិដ្ឋ និងតួឯកស្រីអ្នកនាង សុខ សោម៉ាវត្តី ដែលត្រៀមបញ្ចាំងនៅថ្ងៃទី ២០ ខែកុម្ភៈ នេះហើយ។

ភាពយន្ដមនោសញ្ចេតនាស្រុកស្រែមួយនេះ ត្រូវបានតំណាលពី បុរសចំណាស់ម្នាក់ដែលមានទ្រព្យស្តុកស្តម្ភបានឈ្លក់វង្វេងជាមួយនារីស្រស់ស្អាតវ័យក្មេងម្នាក់ដែលមានគូស្នេហ៍រួចទៅហើយ ដោយមិនខ្លាចការរិះគន់គាត់ប្រើអំណាចល្បិចនិងយុទ្ធសាស្ត្រគ្រប់យ៉ាងដើម្បីបំបែកពួកគេទាំង២នាក់។ តែសម្បថសច្ចាររបស់គូស្នេហ៍មួយគូនេះ អាចបំបែកឧបសគ្គបានឬយ៉ាងណា? បើតាមសម្ដីរបស់លោក សន ពិសិដ្ឋ តួឯកប្រុសបានអះអាងថា លោកមានអារម្មណ៍រំភើបយ៉ាងខ្លាំង ដែលភាពយន្តមួយនេះ ត្រូវបានប្រកាសដាក់លក់សំបុត្រ ខណៈដែលលោកប្រាប់ថា នៅគឺជាស្នាដៃថ្មីដែលខ្លួនសម្ដែង ជាមួយអ្នកនាង សុខ សោមាវត្តី ហើយបង្ហាញពីរ៉ូមេទិកនៃស្នេហាយុវវ័យ។ លោកថាក្នុងរឿងទាំងមូលមានបង្កប់ឈប់អប់រំ ច្រើនជាងបង្ហាញពីស្នេហារោលរាល ទើបលោករំពឹងយ៉ាងខ្លាំងថានឹងកន្ត្រាក់អ្នកទស្សនា ជាពិសេសគឺយុវវ័យបានច្រើន។

ពីសម្ដីលោក វ៉ន ប៊ុនស៊ីម ដែលជាផលិតករ និងអ្នកដឹកនាំរឿង “អន្ទាក់ស្នេហ៍” ក៏បានអះអាងថា នេះជារឿងស្នាដៃកូនខ្មែរសុទ្ធសាធ ដោយពុំមានការចម្លងពីសាច់រឿងមកពីណានោះទេ។ នេះក៏ជាស្នាដៃរបស់ផលិតកម្ម Space SP របស់លោក ដែលបានសម្រិតសម្រាំង និងចំណាយច្រើនគួរសម ដើម្បីឱ្យរឿងទាំងមូលមានប្លង់ល្អៗ បង្ហាញពីទេសភាពស្អាតៗនៅក្នុងប្រទេសកម្ពុជា។ លោករំពឹងពីភាពជោគជ័យ ថ្វីដ្បិតតែភាពយន្តនេះ មិនផ្ដោតលើឈុតភ័យរន្ធត់ និងកំប្លែងទាំងស្រុង។ នៅក្នុងពិធីសម្ពោធ លោកក៏សប្បាយចិត្តផងដែរ ដែលមានផលិតករ និងតួសម្ដែង ចូលរួមអបអរ ខណៈដែលលោកក៏បានរំលេចរបាំហោមរោងបែបយីកេ ឱ្យភ្ញៀវកិត្តិយសចាប់អារម្មណ៍។

សូមទស្សនារូបភាពសកម្មភាពថ្ងៃសម្ពោធភាពយន្ដ« អន្ទាក់ស្នេហ៍ »ខាងក្រោមនេះ៖

February 18, 2020

នៅតែលេចធ្លោ! ធារី ចន្ថាប៊ីន បង្ហាញទម្រង់លេងល្អ ជួយក្រុមថ្មីឱ្យឈ្នះពាន1

កីឡាករជម្រើសជាតិកម្ពុជា ធារី ចន្ថាប៊ីន បានជួយឱ្យក្លិបថ្មីរបស់ខ្លួន គឺក្លឹប Perak FA ឈ្នះពានរង្វាន់ Community Shield នៅប្រទេសម៉ាឡេស៊ី។

កីឡាករខ្សែបម្រើការពារកូនកាត់ខ្មែរ-បារាំងរូបនេះ បានធ្វើឱ្យគ្រូបង្វឹកចាប់អារម្មណ៍ និងបានដាក់រូបគេឱ្យចូលលេងជាជម្រើសដំបូងស្ទើរតែគ្រប់ការប្រកួតក្នុងពានរង្វាន់មួយនេះ។

គួរបញ្ជាក់ផងដែរថា ពានរង្វាន់ខាងលើនេះ ជាពានរង្វាន់មុនរដូវកាលមួយដែលធ្វើឡើងដោយក្លិប Kedah FC នឹងមានក្លិបមកពីលីកកំពូលម៉ាឡេស៊ីចំនួន6 ចូលរួមប្រកួតប្រជែង៕

February 18, 2020

ព្រះខ័នរាជស្វាយរៀង និងភ្នំពេញក្រោន បង្ហាញភាពលេចធ្លោ នាសប្តាហ៍បើកឆាកលីកកំពូលកម្ពុជា

បាល់ទាត់ក្របខ័ណ្ឌលីកកំពូលកម្ពុជារដូវកាលឆ្នាំ2020 សប្តាហ៍ទី1 បានចាប់ផ្តើមហើយ ហើយបើយើងក្រឡេក មកមើលលទ្ធផលវិញ មានស្មើ 2គូ ខណៈដែល 2ក្រុមទៀត ឈ្នះចាញ់គ្នាត្រឹមតែ 1គ្រាប់ប៉ុណ្ណោះ។

ចំពោះលទ្ធផលវិញ ក្រុមទាំងអស់មិនសូវជានាំមុខគ្នាដាច់ឡើយ លើកលែងតែក្រុមព្រះខ័នរាជស្វាយរៀង ដែលលត់សូលទីឡូអង្គរ ដោយលទ្ធផល 5ទល់នឹង1 និងភ្នំពេញក្រោនយកឈ្នះក្រុមអគ្គិសនីកម្ពុជា ដោយលទ្ធផល 3ទល់នឹង1។

គួរបញ្ជាក់ផងដែរថា បាល់ទាត់លីកកំពូលកម្ពុជា រដូវកាល2020 នេះ មានក្រុមចូលរួមចំនួន 13ក្រុម ហើយក្នុងសប្តាហ៍ទី1 នេះ ក្រុមចំនួន12 បានប្រកួតគ្នាចំនួន 6គូហើយ ខណៈដែលណាហ្គាវើលដ៍នឹងចាប់ផ្តើមប្រកួតពីសប្តាហ៍ក្រោយទៅ៕

February 18, 2020

ទស្សនាទិដ្ឋភាពខាងក្នុងនាវាទេសចរណ៍ ដែលត្រូវគេដាក់ឱ្យនៅដាច់ដោយឡែកដោយសារតែ…

ក្នុងអំឡុងពេលនៃការដាក់ឱ្យនៅដាច់ដោយឡែក សកម្មភាពកម្សាន្តនៅកន្លែងរួមទាំងអស់លើនាវា ទេសចរណ៍ Diamond Princess ក៏ត្រូវបានលុបចោល។

នាវាទេសចរណ៍យក្ស ឈ្មោះ Diamond Princess ត្រូវបានដាក់ឱ្យនៅដាច់ដោយឡែកនៅលើផ្ទៃសមុទ្រនៃទីក្រុង Yokohama ក្បែររាជធានី Tokyo ប្រទេសជប៉ុន ចាប់ពីថ្ងៃទី4កុម្ភៈ បន្ទាប់ពីមានមនុស្សម្នាក់ក្នុងចំណោមអ្នកនៅលើនាវា ត្រូវបានគេរកឃើញថា មានផ្ទុកមេរោគកូរ៉ូណា COVID-19។ មកដល់ថ្ងៃទី17កុម្ភៈ មានអ្នកផ្ទុកមេរោគនេះ យ៉ាងតិច454នាក់ ក្នុងចំណោមអ្នកទេសចរ 3,700នាក់ រួមទាំងបុគ្គលិកនាវា។ មុននោះ នាវាទេសចរណ៍នេះ ទើបតែបានបញ្ចប់ដំណើរទេសចរណ៍តាមសមុទ្រចំនួន14ថ្ងៃ ក្នុងអំឡុងរដូវបុណ្យចូលឆ្នាំចិន។
នៅពេលនាវា Diamond Princess នេះ ត្រូវបានដាក់ឱ្យនៅដាច់ដោយឡែក អ្នកទេសចរចំណាយពេលស្ទើរតែទាំងអស់របស់ខ្លួន សម្ងំនៅក្នុងបន្ទប់។ ប៉ុន្តែ មិនមែនបន្ទប់ណាក៏មានបង្អួចនោះដែរ។ បន្ទប់ធំបំផុតមានទំហំ86ម៉ែត្រក្រឡា និងបន្ទប់តូចបំផុតមានទំហំប្រហែល14ម៉ែត្រក្រឡា និងបំពាក់ដោយសម្ភារគ្រប់ប្រភេទ រួមទាំងបន្ទប់ទឹកធំទូលាយ។ល។

អ្នកទេសចរអាចមើលភាពយន្តដោយមិនគិតថ្លៃនៅលើ TV ក្នុងបន្ទប់របស់ពួកគេផ្ទាល់…មេចុងភៅទាំងអស់នៅតែធ្វើការក្នុងអំឡុងពេលនាវាត្រូវបានដាក់ឱ្យនៅដាច់ដោយឡែក ដើម្បីបម្រើដល់ភ្ញៀវនៅតាមបន្ទប់នីមួយៗ ជាមួយនឹងបញ្ជីមុខម្ហូបប្ដូរផ្លាស់រាល់ថ្ងៃ។

ក្នុងអំឡុងពេលទប់ស្កាត់ការឆ្លងរាលដាលនៃមេរោគកូរ៉ូណា ភ្ញៀវទាំងអស់មិនអាចប្រើប្រាស់កន្លែងកម្សាន្តរួមនៅលើនាវានោះទេ។ ប៉ុន្តែ ពួកគេអាចដើរនៅលើដំបូលនាវាដើម្បីលំហែកាយ ទៅតាមការចាត់ចែងរបស់ភាគីនាវា ដោយផ្ដល់អាទិភាពឱ្យអ្នកទេសចរដែលស្នាក់នៅក្នុងបន្ទប់ដែលមិនមានបង្អួច។

នាវានេះ មាន18ជាន់ ហើយជាន់នីមួយៗ ត្រូវបានតុបតែងទៅតាមប្រធានបទនៃមហាសមុទ្រនីមួយៗ។

ចាប់ពីជាន់ទី5 ដល់ទី7 គឺជាកន្លែងដែលមានសកម្មភាពរស់រវើកបំផុត។ Grand Plaza ស្ថិតនៅលើជាន់ទី6 និងទី7 ជាកន្លែងដែលប្រធាននាវាបង្ហាញខ្លួនក្នុងពិធីជប់លៀងធំៗ។ សកម្មភាពទាំងនេះ ត្រូវបានផ្អាកបណ្ដោះអាសន្នក្នុងពេលមានវិបត្តិសុខភាពកូរ៉ូណា។

ស្នាដៃសិល្បៈទាំងឡាយត្រូវបានដាក់បង្ហាញក្នុងបន្ទប់ធំមួយនៅលើនាវា ដើម្បីឱ្យភ្ញៀវទស្សនា ឬទិញដោយការលក់ដេញថ្លៃ។

នាវានេះ មានភោជនីយដ្ឋាន ហាងកាហ្វេ និងបូហ្វេចំនួន14កន្លែង ដោយមានអាហារច្រើនប្រភេទ និងសម្បុរបែប។ ប៉ុន្តែ ពេលនេះ ភ្ញៀវទេសចរបានត្រឹមតែហូបអាហារនៅក្នុងបន្ទប់របស់ខ្លួនតែប៉ុណ្ណោះ។

នាវាប្រវែង290ម៉ែត្រនេះ ត្រូវបានសាងសង់ឡើងដូចទៅនឹងទីក្រុងអណ្ដែតដូច្នោះដែរ។ ជាន់ខាងលើបង្អស់ គឺជាកន្លែងដែលភ្ញៀវលំហែកាយ នៅក្បែរអាងហែលទឹក បារ និងរោងភាពយន្តនៅខាងក្រៅ។

នាវាយក្សផ្កាយ5នេះ ក៏មានអាងទឹកក្ដៅបែបជប៉ុនផងដែរ។ បន្ទប់ងួតទឹក Izumi ដ៏ធំ នៅផ្នែកខាងក្រោយនៃនាវា និងស្ថិតនៅជាន់ទី15 ដែលមានបន្ទប់ដាច់ដោយឡែកជាច្រើន និងអាចគយគន់ទេសភាពនៃសមុទ្រដ៏ធំល្វឹងល្វើយ៕

ប្រភព៖ សារព័ត៌មានបរទេស

February 18, 2020

Category: សង្គម និងសេដ្ឋកិច្ច