Category: សង្គម និងសេដ្ឋកិច្ច

មេរោគវីរុសកូរ៉ូណា ផ្ទុះមួយប្រាវ ក្រុមហ៊ុនApple លក់បានតិចជាងមុន និងប្រឈមនឹងចំណូលដែលចាប់ផ្តើមធ្លាក់…
Apple បានព្យាករថា ប្រាក់ចំណូលរបស់ខ្លួននឹងកើនឡើងដល់ 67ពាន់លានដុល្លារ។ Apple ក៏បានបន្ថែមទៀតដែរថា ដោយសារតែហាងភាគច្រើននៅក្នុងប្រទេសចិន ត្រូវបានបិទទ្វារ ឬធ្វើការតិចម៉ោងជាងមុន ដូច្នេះផលិតផលរបស់ Apple នឹងលក់បានតិចជាងមុន។
ក្រុមហ៊ុនបច្ចេកវិទ្យាយក្សមួយនេះបាននិយាយថា ការផលិត និងការលក់ត្រូវបានទទួលរងផលប៉ះពាល់ ហើយការផ្គត់ផ្គង់ទូរស័ព្ទ iPhone ទូទាំងពិភពលោក នឹងត្រូវបានរារាំងជាបណ្តោះអាសន្ន។
សូមជម្រាបជូនថា Apple គឺជាក្រុមហ៊ុនធំដំបូងគេបង្អស់របស់សហរដ្ឋអាមេរិក ដែលបាននិយាយថា ការឆ្លងរាលដាលរបស់មេរោគកំណាចនេះ នឹងប៉ះពាល់ដល់ហិរញ្ញវត្ថុរបស់ខ្លួន៕
February 19, 2020
Facebook ចូលរួមជួយជាពិសេស ដោយការរឹតត្បិតការផ្សព្វផ្សាយដំណឹងមិនពិតអំពីវីរុសកូរ៉ូណា
ក្រុមហ៊ុន Facebook បានប្រកាសក្នុងវេបសាយរបស់ខ្លួនថា អ្នកជំនាញត្រួតពិនិត្យព័ត៌មានពិត ឬមិនពិត ដែលមានបណ្ដាញនៅទូទាំងពិភពលោករបស់ខ្លួន កំពុងបន្តកិច្ចការរបស់ពួកគេ ដោយនឹងត្រួតពិនិត្យ លើ មាតិកា និងការបង្ហោះព័ត៌មានមិនពិត ដែលបានចែកចាយលើបណ្ដាញសង្គមរបស់ខ្លួនទាក់ទងនឹងមេរោគវីរុសកូរ៉ូណា។
ក្រោយពីការប្រកាសអាសន្នទូទាំងពិភពលោកចំពោះមេរោគវីរុសកូរ៉ូណា ពីសំណាក់អង្គការសុខភាពពិភពលោក (WHO) បណ្ដាញសង្គម Facebook ក៏បានចាប់ផ្ដើមចូលរួមជួយជាពិសេស ដោយនឹងធ្វើការរឹតត្បិតចំពោះការផ្សព្វផ្សាយព័ត៌មាន និងដំណឹងមិនពិតអំពីមេរោគកំណាចនេះ និងភ្ជាប់អ្នកប្រើប្រាស់ទៅកាន់ដំណឹងមានប្រយោជន៍វិញ។
នៅពេលដែលអ្នកលជំនាញកំណត់បានមាតិកាណាមួយថា ក្លែងក្លាយ Facebook នឹងធ្វើការរឹតត្បិតលើ មាតិកានោះមិនឱ្យ Reach ច្រើននៅលើ Facebook និង Instagram ហើយបង្ហាញព័ត៌មានពិតជំនួសវិញ។
Facebook ក៏នឹងផ្ដល់ Notification ដល់អ្នកដែលបាន Share មាតិកាក្លែងក្លាយ ឬអ្នកដែលចង់ Share ដោយប្រាប់ថា មាតិកានោះបានឆ្លងកាត់ការត្រួតពិនិត្យរបស់អ្នកជំនាញហើយ និងត្រូវបានពួកគេកំណត់ថា ជាមាតិកាក្លែងក្លាយ។
Facebook ក៏នឹងចាប់ផ្ដើមលុបចេញនូវមាតិកាក្លែងក្លាយ (Fake Content) ដែលត្រូវបានពិនិត្យដោយអង្គភាពសុខភាពពិភពលោក និងមន្ត្រីសុខភាពក្នុងស្រុក ដែលវាអាចប៉ះពាល់ដល់អ្នកប្រើ Facebook ដែលជឿលើមាតិកាទាំងនោះ៕
ប្រភព៖ សារព័ត៌មានបរទេស
February 19, 2020
ប្រធាន CVEA ដាក់ចេញយុទ្ធសាស្ត្រអាទិភាព 3ចំណុច ដើម្បីដឹកនាំវិស័យអចលនទ្រព្យនៅកម្ពុជាឆ្នាំ2020
ប្រធានសមាគមអ្នកវាយតម្លៃ និងភ្នាក់ងារអចលនវត្ថុនៅកម្ពុជា ឬCVEA លោក ច្រឹក សុខនីម បានដាក់ចេញយុទ្ធសាស្ត្រចំនួន 3ចំណុច ក្នុងការដឹកនាំសមាគម ក៏ដូចជាការគូសវាស និងតម្រង់ទិស ដើម្បីអភិវឌ្ឍវិស័យអចលនទ្រព្យនៅកម្ពុជា ក្រោមការដឹកនាំរបស់លោកក្នុងអាណត្តិទី6 ដែលបានចាប់ផ្តើមនៅឆ្នាំ2019 មកដល់ឆ្នាំ2020នេះ។ លោក ច្រឹក សុខនីម បានបង្ហាញគោលការណ៍ និងយុទ្ធសាស្ត្រសំខាន់ចំនួន 3ចំណុច ដែលនឹងត្រូវយកមកអនុវត្តបន្ថែមលើផែនការយុទ្ធសាស្ត្ររបស់សមាគមដែលមានកន្លងមក។
ក្នុងអាណត្តិទី6 ឆ្នាំ2019-2020 នេះ លោក ច្រឹក សុខនីម ប្រធានសមាគម CVEA បានដាក់ចេញនូវគោលយុទ្ធសាស្ត្រ 3 ជាអាទិភាព សម្រាប់ប្រើប្រាស់ជាផែនការមេ និងជាផែនទីបង្ហាញផ្លូវ ដែលតម្រង់ទិសប្រតិបត្តិការ ដើម្បីឈានទៅសម្រេចឱ្យបាននូវទិសដៅ និងគោលបំណងរបស់សមាគម។ ក៏ដូចជាជួយធានា និងបណ្តុះបណ្តាលធនធានមនុស្សផ្នែកភ្នាក់ងារអចលនវត្ថុកម្ពុជា។
ប្រធានសមាគម CVEA បានឱ្យដឹងថា គោលការណ៍ និងផែនការយុទ្ធសាស្ត្រអាទិភាពទាំង 3ចំណុចនោះមានដូចជា៖
យុទ្ធសាស្ត្រទី1 ការធានាឱ្យបានដំណោះស្រាយជាអាទិភាព ចំពោះការលើកកម្ពស់ការអភិវឌ្ឍរបស់សមាជិក៖ នៅត្រង់ចំណុចនេះ លោកផ្តោតទៅលើការផ្តល់ចំណេះដឹងដល់សមាជិក តាមរយៈការផ្តល់ជាវគ្គបណ្តុះបណ្តាលនានា ដល់សមាជិក 3ប្រភេទ ដែលរួមមាន៖ អ្នកវាយតម្លៃអចលនទ្រព្យ ភ្នាក់ងារអចលនទ្រព្យ និងអ្នកគ្រប់គ្រងអចលនវត្ថុ។ លោកជឿជាក់ នៅពេលដែលសមាជិកទាំងអស់ទទួលបានចំណេះដឹងពីអចលនវត្ថុបានជ្រៅជ្រះហើយ នឹងធ្វើឱ្យសមាជិកទាំងអស់មានទុន ដើម្បីប្រកបរបរអចលនទ្រព្យ ក៏ដូចជាគ្រប់គ្រងអចលនទ្រព្យបានត្រឹមត្រូវ ដើម្បីឈានទៅរកភាពជោគជ័យទាំងអស់គ្នា។
ជាងនេះទៅទៀត លោកបន្ថែមថា យុទ្ធសាស្ត្រនេះ ក៏ចង់ពង្រឹងការទំនាក់ទំនងរបស់សមាគមលើឆាកអន្តរជាតិ ដើម្បីបង្កើនចំណេះដឹងតាមរយៈវគ្គបណ្តុះបណ្តាលវគ្គសិក្សាថ្មីៗបន្ថែម ដែលមិនធ្លាប់មានពីមុនមក ដើម្បីបង្កើនប្រសិទ្ធភាពការងារដល់សមាជិកថែមទៀត។
យុទ្ធសាស្ត្រទី2 ការបង្កើតនូវភាពងាយស្រួល និងគុណតម្លៃសម្រាប់ការចូលរួមរបស់សមាជិកភាព៖ លោក ច្រឹក សុខនីម បានបញ្ជាក់ដែរថា កាលពីមុន ដើម្បីចូលជាសមាជិកសមាគម អាចមានតម្លៃថ្លៃ តែមកដល់បច្ចុប្បន្ន សមាគមនឹងកាត់បន្ថយបញ្ហានេះ ហើយព្យាយាមជំរុញសមាជិកឱ្យពួកគាត់អាចចូលរួមជាមួយសមាគមឱ្យបានកាន់តែច្រើន តាមលទ្ធភាពរបស់ពួកគាត់។ លោកបន្តថា សមាគមក៏ព្យាយាមបណ្តុះបណ្តាល និងជួយសម្រួលផលលំបាករបស់គាត់ក្នុងវិស័យអចលនទ្រព្យឱ្យកាន់តែផុលផុស។ ជាងនេះទៀត ការបង្កើតក្រុមប្រឹក្សាយោបល់ទៅលើផ្នែកច្បាប់ ដែលនឹងត្រូវលើកយកមកសិក្សាដើម្បីឱ្យការធ្វើអាជីវកម្មក្នុងវិស័យអចលនទ្រព្យកាន់តែមានភាពល្អប្រសើរ ដែលមានការធានាដោយច្បាប់។
និងយុទ្ធសាស្ត្រទី3 ពង្រីកវប្បធម៌នៃការឱ្យតម្លៃការងារជាក្រុម ប្រកបដោយសមធម៌៖ យុទ្ធសាស្ត្រនេះ គឺសមាគមសំដៅដល់ការពង្រឹងគុណភាពការធ្វើការងារជាក្រុមរបស់សមាជិកសមាគម ដោយមិនមានផ្នត់គំនិតរើសអើស ឬមិនឱ្យតម្លៃគ្នានោះឡើយ តាមរយៈការផ្តោតលើជំនួយបច្ចេកទេស និងប្រឹក្សាយោបល់ទៅលើការធ្វើអាជីវកម្មដល់សមាជិក ក្នុងន័យពង្រឹងកិច្ចការផ្ទៃការក្នុងរបស់សមាគម ហើយសមាជិកទាំងអស់របស់សមាគម ត្រូវបានចាត់ទុកជាដៃគូ ដើម្បីធ្វើការរួមគ្នា ផ្តល់ឱកាសឱ្យគ្នាព្រមទាំងឱ្យតម្លៃគ្នាទៅវិញទៅមក ដើម្បីសម្រេចយុទ្ធសាស្ត្ររបស់សមាគម និងឈានទៅឆ្លើយតបតម្រូវការវិស័យអចលនទ្រព្យកម្ពុជា។
យ៉ាងណាក្ដី ដើម្បីសម្រេចគោលដៅយុទ្ធសាស្ត្រដែលបានដាក់ចេញនេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោក ច្រឹក សុខនីម ក៏បានអំពាវនាវ និងជំរុញឱ្យសមាជិកសមាគមទាំងអស់ បង្កើនការសហការ កំណត់បញ្ហាព្រមទាំងលើកយកបញ្ហាមកពិភាក្សារួមគ្នា សម្រាប់ប្រើប្រាស់ជាផែនការមេ និងជាផែនទីបង្ហាញផ្លូវដែលតម្រង់ទិសប្រតិបត្តិការ ដើម្បីឈានទៅសម្រេចឱ្យបាននូវទិសដៅ និងគោលបំណងរបស់សមាគមក៏ដូចជាជួយធានា និងបណ្តុះបណ្តាលធនធានមនុស្សផ្នែកភ្នាក់ងារអចលនវត្ថុកម្ពុជាឱ្យកាន់តែច្រើន។
ក្រៅពីដាក់ចេញយុទ្ធសាស្ត្រអាទិភាពចំនួន 3ចំណុច ដើម្បីដឹកនាំនាវាវិស័យអចលនទ្រព្យនៅកម្ពុជាឆ្នាំ2020 នេះដែរ។ តំណាងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជារូបនេះ ក៏បានបង្ហាញការយល់ឃើញចំពោះការវិនិយោគលើវិស័យអចលនទ្រព្យនៅកម្ពុជាដែរថា នឹងនៅតែបន្តមានការរីកចម្រើនជាវិជ្ជមាន។ ជាមួយគ្នានោះ លោកក៏បានអះអាងទៀតដែរថា វិស័យអចលនទ្រព្យក្នុងឆ្នាំ2020 នឹងនៅតែល្អប្រសើរ មិនខុសគ្នាពីឆ្នាំ2019 ប៉ុន្មានឡើយ។
យ៉ាងណាក្ដី ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជារូបនេះបានអះអាងថា ដើម្បីឱ្យិវិស័យនេះកាន់តែមានការរីកចម្រើននោះ គឺទាមទារឱ្យមានការចូលរួមរវាងភាគីពាក់ព័ន្ធនឹងរដ្ឋាភិបាល ខណៈដែលបច្ចុប្បន្នលោកមើលឃើញនូវភាពខ្វះចន្លោះចំពោះទិន្ន័យទីផ្សារអចលនទ្រព្យ ដោយមិនទាន់រួមគ្នាធ្វើរវាងរដ្ឋ និងឯកជននៅឡើយ៕
February 19, 2020
កូរ៉េខាងត្បូងនឹងបង្កើនការវិនិយោគ ខណៈទំហំពាណិជ្ជកម្មកម្ពុជា-កូរ៉េ កើនដល់ជាង 1ពាន់លានដុល្លារ
ប្រធានាធិបតីនៃប្រទេសកូរ៉េខាងត្បូងលោក មូនជេអុីន (Moon Jae-In) បានសន្យាជាមួយសម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាថា នឹងជំរុញអ្នកវិនិយោគកូរ៉េខាងត្បូងមកបណ្តាក់ទុននៅកម្ពុជាឱ្យបានកាន់តែច្រើនថែមទៀត។ ជាពិសេសចាប់ឱកាសវិនិយោគលើវិស័យហេដ្ឋារចនាសម្ព័ន្ធ។
លោក Moon Jae-In ប្រធានាធិបតីនៃប្រទេសកូរ៉េខាងត្បូង បានមានប្រសាសន៍បែបនេះនៅក្នុងជំនួបស្វាគមន៍ និងពិភាក្សាការងារជាមួយសម្តេចតេជោ ហ៊ុន សែន កាលពីថ្ងៃទី4 ខែកុម្ភៈ ឆ្នាំ2020 នៅទីក្រុងសេអ៊ូល ជាទីដែលសម្តេចនាយករដ្ឋមន្ត្រី អញ្ជើញចូលរួមកិច្ចប្រជុំកំពូលពិភពលោក ឆ្នាំ2020 របស់អង្គការសហព័ន្ធសន្តិភាពសកល។
ក្នុងជំនួបពិភាក្សាការងាររវាងសម្តេចតេជោ ហ៊ុន សែន និងលោកប្រធានាធិបតីកូរ៉េ បានកត់សម្គាល់ពីការរីកចម្រើននូវទំនាក់ទំនង និងកិច្ចសហប្រតិបត្តិការរវាងប្រទេសទាំង2 ដែលបានឈានដល់ដំណាក់កាលដ៏ល្អប្រសើរមួយនាពេលបច្ចុប្បន្ន។ សម្តេចតេជោនាយករដ្ឋមន្ត្រី បានលើកឡើងថា ទំហំពាណិជ្ជកម្មរវាងកម្ពុជា និងកូរ៉េខាងត្បូងកាលពីឆ្នាំមុនបានកើនឡើងដល់ជាង 1ពាន់លានដុល្លារអាមេរិក ដោយសម្ដេចបានលើកឡើងពីលទ្ធផលផ្លែផ្កា ដែលជាលទ្ធផលនៃចំណងទាក់ទងដ៏រឹងមាំរវាងប្រទេសទាំង2។
សម្តេចតេជោនាយករដ្ឋមន្ត្រី បានប្រកាសព័ត៌មាននេះ នៅក្នុងជំនួបជាមួយប្រជាជនកម្ពុជាជាង 1,000នាក់ កាលពីថ្ងៃទី3 ខែកុម្ភៈ ឆ្នាំ2020 នៅទីក្រុងសេអ៊ូល ប្រទេសកូរ៉េ ក្នុងអំឡុងកិច្ចប្រជុំកំពូលសហព័ន្ធសន្តិភាពពិភពលោក (the Universal Peace Federation ឬ UPF) កិច្ចប្រជុំកំពូលពិភពលោកឆ្នាំ2020 ដែលព្រឹត្តិការណ៍នេះបានបញ្ចប់នៅថ្ងៃទី5 ខែកុម្ភៈ ឆ្នាំ2020។
សូមបញ្ជាក់ថា ទំហំពាណិជ្ជកម្មទ្វេភាគី(កម្ពុជា-កូរ៉េ) មានតម្លៃសរុប 1,032ពាន់លានដុល្លារក្នុងឆ្នាំ
2019។ ក្នុងនោះការនាំចេញរបស់កម្ពុជាទៅកាន់ប្រទេសកូរ៉េខាងត្បូង មានចំនួន 335លានដុល្លារ ខណៈកម្ពុជាបាននាំចូលទំនិញពីប្រទេសកូរ៉េវិញ មានតម្លៃ 696លានដុល្លារ។ កម្ពុជាបាននាំចូលក្រណាត់កូតុង ភេសជ្ជៈ គ្រឿងអេឡិចត្រូនិក រួមទាំងឧបករណ៍ប្រើប្រាស់ក្នុងស្រុក ឱសថ និងផលិតផលប្លាស្ទិក មកពីប្រទេសកូរ៉េខាងត្បូង។
សម្តេចនាយករដ្ឋមន្ត្រី ហ៊ុន សែន បានបន្ថែមថា៖“នេះគឺជាអតុល្យភាពក្នុងពាណិជ្ជកម្ម ហើយនេះដោយសារតែតម្រូវការរបស់យើងមានខ្ពស់ សម្រាប់ទំនិញរបស់កូរ៉េខាងត្បូង ដែលភាគច្រើនជារថយន្ត និងទូរទស្សន៍ ហើយទំហំពាណិជ្ជកម្មនឹងមិនកើនឡើងទេ បើគ្មានទំនាក់ទំនងការទូតល្អ រវាងប្រទេសទាំង2”។
គិតចាប់ពីឆ្នាំ1994 ដល់ឆ្នាំ2019 គម្រោងវិនិយោគរបស់កូរ៉េខាងត្បូង ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា (CDC) មានចំនួន 215គម្រោង ក្នុងទំហំទឹកប្រាក់ជិត 5ពាន់លានដុល្លារអាមេរិក។ ក្នុងនោះមាន 123គម្រោង បានវិនិយោគទៅលើរោងចក្រ ជាមួយទុនវិនិយោគ 486លានដុល្លារ បង្កើតការងារជូនប្រជាជនបានប្រមាណ 8ម៉ឺនកន្លែង។ កូរ៉េខាងត្បូងក៏ជាប្រទេសទី2 ផងដែរ ជាអ្នកវិនិយោគបរទេសផ្ទាល់ ធំជាងគេនៅកម្ពុជាបន្ទាប់ពីចិន។ នេះជាការកត់សម្គាល់របស់សម្តេចតេជោនាយករដ្ឋមន្ត្រី ក្នុងឱកាសជួបសំណេះសំណាលជាមួយបងប្អូនប្រជាពលរដ្ឋខ្មែរដែលរស់នៅក្នុងកូរ៉េខាងត្បូង។
សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា “ទំហំពាណិជ្ជកម្មរវាងកម្ពុជា-កូរ៉េ បានកើនឡើងជាលំដាប់ ហើយការកើនឡើងនេះមិនអាចកាត់ផ្តាច់ចេញបានទេពីទំនាក់ទំនងការទូតដ៏ល្អរវាងរាជរដ្ឋាភិបាលកម្ពុជា និងរដ្ឋាភិបាលកូរ៉េ”។
សម្តេចក៏បានលើកឡើងអំពីផ្លែផ្កានៃទំនាក់ទំនងការទូតយ៉ាងល្អនេះ ដែលធ្វើឱ្យកម្ពុជា អាចនាំចេញផ្លែស្វាយដោយផ្ទាល់មកកាន់ប្រទេសកូរ៉េ ចាប់តាំងពីខែមករា ឆ្នាំ2020 មក។ ការនាំចេញផ្លែស្វាយទៅកាន់ប្រទេសកូរ៉េនេះ គឺជាការរីកចម្រើនថ្មីរបស់កម្ពុជា ដែលអាចតម្រូវបានតាមស្តង់ដាទីផ្សារក្នុងប្រទេសជឿនលឿន ដូចជាប្រទេសកូរ៉េខាងត្បូងនេះជាដើម។
ការនាំចេញផ្លែស្វាយទៅទីផ្សារប្រទេសកូរ៉េដ៏ធំនេះ ផ្តល់ឱកាសដល់អ្នកដាំស្វាយនៅកម្ពុជា ពង្រីកអាជីវកម្មរបស់ខ្លួនកាន់តែធំជាងមុន ព្រោះថា ផ្លែស្វាយទាំងនោះមិនមែនត្រឹមតែផ្គត់ផ្គង់សម្រាប់តែប្រជាជនកូរ៉េជាង 50លាននាក់នោះទេ គឺអាចផ្គត់ផ្គង់ដល់ភ្ញៀវទេសចរដែលមកលេងប្រទេសកូរ៉េផងដែរ។
សម្តេចតេជោ ហ៊ុន សែន បានថ្លែងថា៖“ប្រភពទីផ្សារដែលយើងនាំមកកូរ៉េ វាក៏ជាផ្នែកមួយនៃការជំរុញការដាំដុះនៅប្រទេសកម្ពុជា ហើយយើងកំពុងតែស្វែងរកឱកាសក្នុងការនាំចេញនូវមុខទំនិញផ្សេងៗបន្ថែមទៀត អ៊ីចឹងផ្លែស្វាយកម្ពុជា មិនអន់ជាងផ្លែស្វាយរបស់បណ្ដាប្រទេសអាស៊ានប៉ុន្មានទេ”។
សម្តេចតេជោនាយករដ្ឋមន្ត្រី ក៏បានណែនាំដល់អ្នកនាំចេញស្វាយមកកាន់ប្រទេសកូរ៉េទាំងអស់ដែរថា សូមគោរពតាមស្តង់ដាអនាម័យឱ្យបានត្រឹមត្រូវ ធ្វើយ៉ាងណាកុំរកស៊ីលក់ផ្លូវ ដែលនាំឱ្យប៉ះពាល់ដល់ការធ្វើពាណិជ្ជកម្មរបស់ខ្លួនផង និងប៉ះពាល់ដល់កេរ្តិ៍ឈ្មោះ ប្រទេសជាតិផងដែរ។
សម្តេចតេជោនាយករដ្ឋមន្ត្រី ក៏បានបញ្ជាក់ទៀតដែរថា៖“តាំងពីឆ្នាំ1996 ដល់ឆ្នាំ2018 កូរ៉េខាងត្បូងបានផ្តល់ជំនួយឥតសំណងជាង 300លានដុល្លារអាមេរិក ហើយឆ្នាំ2019 កន្លងទៅជំនួយឥតសំណង មាន 17លានដុល្លារ និងឆ្នាំ2020 កូរ៉េគ្រោងនឹងផ្តល់ឱ្យកម្ពុជា 24លានដុល្លារថែមទៀត។ គិតត្រឹមខែវិច្ឆិកា ឆ្នាំ2019 កូរ៉េខាងត្បូងផ្តល់កម្ចីសម្រាប់ការអភិវឌ្ឍប្រមាណ 889 លានដុល្លារ បើកប្រើប្រាស់អស់ 442លានដុល្លារ ហើយការត្រៀមផ្តល់នៅឆ្នាំ2019 ដល់ឆ្នាំ 2023 ប្រមាណ 700លានដុល្លារបន្ថែមទៀតសម្រាប់ការអភិវឌ្ឍន៍គម្រោងចំនួន10”។
ជាមួយគ្នានេះ រដ្ឋាភិបាលទាំង2 បានផ្លាស់ប្តូរយោបល់គ្នា ដើម្បីជំរុញការវិនិយោគពាណិជ្ជកម្ម និងទេសចរណ៍ រួមទាំងការហោះហើរត្រង់រវាងប្រទេសទាំង2 ទៀតផង។ បច្ចុប្បន្ននេះ មានជើងហោះហើរចំនួន 50ជើងក្នុង 1សប្តាហ៍ រវាងប្រទេសកម្ពុជា និងប្រទេសកូរ៉េខាងត្បូង ដែលស្ថិតក្នុងចំណោមចំណាត់ថ្នាក់ទាំង10 សម្រាប់ការមកដល់នៃទីផ្សារទេសចរណ៍កម្ពុជា។ កាលពីឆ្នាំមុន ព្រះរាជាណាចក្រកម្ពុជាបានស្វាគមន៍ភ្ញៀវទេសចរសរុប ចំនួន 254,874នាក់ មកពីប្រទេសកូរ៉េ ដែលនេះជាការថយចុះ 15% បើប្រៀបធៀបទៅនឹងឆ្នាំមុន(2018)។
លើសពីនេះទៀត ទំនាក់ទំនងរវាងប្រទេសទាំង2 ក៏ត្រូវបានឆ្លុះបញ្ចាំងនៅក្នុងកិច្ចជំនួបនេះផងដែរថា មាននិស្សិតកម្ពុជាជាង 400នាក់ កំពុងបន្តការសិក្សានៅសាកលវិទ្យាល័យ និងមានពលករខ្មែរជាង 65,000នាក់កំពុងធ្វើការនៅក្នុងប្រទេសកូរ៉េ។ បើតាមប្រសាសន៍របស់សម្តេចតេជោនាយករដ្ឋមន្ត្រីនៃកម្ពុជា ហើយពលករទាំងនោះបានផ្ញើប្រាក់ប្រមាណ 400លានដុល្លារទៅឪពុកម្តាយរបស់ពួកគេជារៀងរាល់ឆ្នាំ។
សម្តេចតេជោនាយករដ្ឋមន្ត្រី បានបន្ថែមថា រាជរដ្ឋាភិបាលកម្ពុជា និងរដ្ឋាភិបាលកូរ៉េ បានចាប់ផ្តើមបង្កើតឱ្យមានការចរចា ការធ្វើពាណិជ្ជកម្មសេរីរវាងកម្ពុជា-កូរ៉េ ដែលជាឱកាសឱ្យកម្ពុជា ពង្រីកអាចទីផ្សារនៅប្រទេសកូរ៉េកាន់តែធំឡើង។
សម្តេចតេជោ បានមានប្រសាសន៍ថា៖“រដ្ឋាភិបាលទាំង2 បានចាប់ផ្តើមធ្វើការសិក្សាលើកិច្ចព្រមព្រៀងតំបន់ពាណិជ្ជកម្មសេរី នៅពេលវាក្លាយជាការពិត វានឹងអនុញ្ញាតឱ្យប្រទេសកម្ពុជាមានឱកាសមួយទៀត ដើម្បីពង្រីកទីផ្សាររបស់ខ្លួននៅក្នុងប្រទេសកូរ៉េខាងត្បូង”។
កាលពីចុងខែវិច្ឆិកា ឆ្នាំមុន កិច្ចព្រមព្រៀងដើម្បីធ្វើការសិក្សាលើកិច្ចព្រមព្រៀងតំបន់ពាណិជ្ជកម្មសេរី ត្រូវបានចុះហត្ថលេខារវាងរដ្ឋមន្ត្រីក្រសួងពាណិជ្ជកម្មកូរ៉េខាងត្បូង លោក Yoo Myung-hee ជាមួយឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៅក្នុងទីក្រុងប៊ូសានប្រទេសកូរ៉េខាងត្បូង ដែលអាចត្រូវចំណាយពេល 1ឆ្នាំក្នុងការសិក្សា។
កិច្ចព្រមព្រៀងពាណិជ្ជកម្មសេរីនេះ ត្រូវបានគេចាត់ទុកថា ជាយន្តការពាណិជ្ជកម្មដ៏សំខាន់មួយ ដែលនឹងជួយក្រុមហ៊ុនកូរ៉េខាងត្បូង ឱ្យជ្រាបចូលកាន់តែជ្រៅមកក្នុងប្រទេសអាស៊ីអាគ្នេយ៍មួយនេះជាមួយនឹងសក្តានុពលនៃកំណើនដ៏លេចធ្លោ ខណៈដែលវាក៏អនុញ្ញាតឱ្យព្រះរាជាណាចក្រកម្ពុជា ក្លាយជាទីផ្សារសក្តានុពលថ្មីសម្រាប់ការនាំចេញរបស់ខ្លួនផងដែរ។
សូមជម្រាបថា ប្រទេសកូរ៉េខាងត្បូង មានកិច្ចព្រមព្រៀងពាណិជ្ជកម្មសេរី ដែលបានចូលជាធរមានជាមួយប្រទេសសិង្ហបុរី ក្នុងឆ្នាំ2006 និងជាមួយប្រទេសវៀតណាមក្នុងឆ្នាំ2015។
ដោយឡែកសម្តេចតេជោនាយករដ្ឋមន្ត្រី ហ៊ុន សែន បានថ្លែងក្នុងកិច្ចប្រជុំកំពូលសហព័ន្ធសន្តិភាពពិភពលោក (UPF) ថា ប្រធានបទនៃវេទិកានេះ គឺពិតជាមានសារៈសំខាន់ និងចាំបាច់ ស្របពេលដែលប្រជាជាតិទាំងអស់ក្នុងពិភពលោក កំពុងប្រឈមនឹងបញ្ហាជាច្រើន ដែលបង្កផលប៉ះពាល់ និងគំរាមដល់សន្តិភាព កំណើនសេដ្ឋកិច្ច វិបុលភាព និងភាពសុខដុមរមនារបស់ប្រជាជនក្នុងសកលលោក។
សម្ដេចតេជោនាយករដ្ឋមន្ត្រីនៃកម្ពុជា បានលើកឡើងថា រាជរដ្ឋាភិបាលបានយល់ច្បាស់ថា ការបន្តរក្សាបាននូវសន្តិភាព គឺមិនអាចកាត់ផ្ដាច់បានពីការផ្ដល់ឱកាសស្មើគ្នាជូនប្រជាជន គ្រប់រូបនូវផ្លែផ្កានៃការអភិវឌ្ឍសេដ្ឋកិច្ច ក៏ដូចជាអភិវឌ្ឍន៍ធនធានមនុស្សឱ្យក្លាយជាធនធានដែលមានសក្តានុពលមិនចេះរីងស្ងួតផងដែរ។
សម្តេចតេជោនាយករដ្ឋមន្ត្រី ក៏បានមានប្រសាសន៍ផងដែរថា ប្រទេសកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុបលើកទី1 ក្រោមប្រធានបទ“ការពង្រឹងពហុភាគីនិយមដើម្បីកំណើនរួម”នៅខែវិច្ឆិកា ឆ្នាំ2020 ខាងមុខ ក្នុងគោលបំណងបង្កើតការមូលមតិគ្នាជាអន្តរជាតិ ប្រកបដោយថាមពលស្ដីពីសារៈសំខាន់នៃក្របខ័ណ្ឌពហុភាគីក្នុងការដោះស្រាយបញ្ហា និងការប្រឈមរបស់ពិភពលោក៕
February 19, 2020
ក្រុមហ៊ុនផលិតបច្ចេកវិទ្យាការពាររបស់អ៊ីស្រាអែល បង្កើតបានប្រព័ន្ធកម្ទេច Drone ពីចម្ងាយដោយប្រើឡាស៊ែរ (វីដេអូ)
យោងតាមប្រភពពី Popular Mechanics បានឱ្យដឹងថា ប្រព័ន្ធ “Drone Dome” អាចចាប់សញ្ញាវត្ថុដែលមានទំហំតូចដល់ 0,002ម៉ែត្រការ៉េ ក្នុងរយៈចម្ងាយពី 3.5 គីឡូម៉ែត្របាន។
Rafael Advanced Defense Systems Ltd គឺជាក្រុមហ៊ុនផលិតបច្ចេកវិទ្យាការពាររបស់អ៊ីស្រាអែល កាលពីថ្មីៗនេះបានបង្ហាញវីដេអូពិសេសនៃ “Drone Dome” ដែលជាប្រព័ន្ធកម្ទេច Drone ពីចម្ងាយ ដោយប្រើប្រាស់ឡាស៊ែរថាមពលខ្ពស់។
បើមើលតាមឃ្លីបវីដេអូ បានបង្ហាញថា Drone ដែលគេដាក់ឈ្មោះឱ្យថា “សត្រូវ” ត្រូវបានចាប់សញ្ញា ចាប់ទីតាំង និងដាក់ជាគោលដៅ ក្រោយមកប្រព័ន្ធ “Drone Dome” បានចាប់ផ្ដើមបាញ់ឡាស៊ែរធ្វើឱ្យ “សត្រូវ” ឆេះធ្លាក់តែម្ដង៕
ប្រភព៖ សារព័ត៌មានបរទេស
February 19, 2020
One Championship ប្រកាសផ្លាស់ប្តូរទីកន្លែងប្រកួតពីចិនទៅឥណ្ឌូនេស៊ីវិញ
ការប្រកួតប្រដាល់ក្បាច់គុនចម្រុះ One Championship បានប្រកាសលើកការប្រកួតដោយធ្វើការផ្លាស់ប្តូរទឹកដីប្រកួតឱ្យឆ្ងាយពីប្រទេសចិន ព្រោះតែវីរុសកំណាចកូរ៉ូណា។
ព្រឹត្តិការណ៍ ONE Championship ដែលគ្រោងរៀបចំនៅក្រុង Chongqing ប្រទេសចិននាថ្ងៃទី11 ខែមេសា ឆ្នាំ2020 ត្រូវប្ដូរមកថ្ងៃទី10 ខែមេសា ឆ្នាំ2020 នៅទីក្រុងហ្សាការតា ប្រទេសឥណ្ឌូនេស៊ី វិញ។
គួរបញ្ជាក់ផងដែរថា នៅថ្ងៃទី11 មេសាខាងមុខ ក្រៅពីកម្មវិធីប្រកួតនៅឯទីក្រុង ឆុងជីង ប្រទេសចិនសម្រាប់ឆ្នាំ2020 របស់ One Championship នេះហើយ ក៏មាននៅទីក្រុង2 ទៀតរបស់ប្រទេសចិន ក៏មានកម្មវិធីប្រកួតផងដែរ គឺស៊ាងហៃ នៅថ្ងៃសៅរ៍ ទី20 មិថុនា និងប៉េកាំង នៅថ្ងៃសៅរ៍ ទី31 តុលា៕
ប្រភព៖ សារព័ត៌មានបរទេស
February 19, 2020
អតីតអ្នកចាំទី Real Madrid ប្រជែងតំណែងប្រធានសហព័ន្ធបាល់ទាត់អេស្ប៉ាញ
Iker Casillas អតីតកីឡាករចាំទី Real Madrid បានប្រកាសថា ខ្លួនកំពុងតែឈរឈ្មោះជាប្រធានសហព័ន្ធកីឡាបាល់ទាត់អេស្ប៉ាញសម្រាប់អាណត្តិថ្មីខាងមុខនេះ។
មកទល់ពេលនេះ អស់រយៈពេល 10ខែមកហើយ ដែល Iker Casillas ពុំដែលបានបង្ហាញខ្លួនក្នុងទីលានម្តងឡើយ ហើយសម្រាប់អាណត្តិប្រធានសហព័ន្ធបាល់ទាត់ថ្មីខាងមុខ គ្រោងនឹងធ្វើការបោះឆ្នោតនាចុងឆ្នាំ2020 នេះ។ បេក្ខភាពដែលអតីតអ្នកចាំទីរូបនេះត្រូវប្រជែងនោះ គឺលោក Luis Rubiales ដែលជាប្រធានសហព័ន្ធបាល់ទាត់អេស្ប៉ាញបច្ចុប្បន្ន។
គួរបញ្ជាក់ផងដែរថា កាលពីពេលថ្មីៗកន្លងទៅនេះ អតីតកំពូលអ្នកចាំទីអេស្ប៉ាញ Iker Casillas បានប្រកាសព្យួរស្រោមដៃអ្នកចាំទីរបស់ខ្លួន ក្រោយពីមានបញ្ហាបេះដូងកាលពីពេលកន្លងទៅ៕
February 19, 2020
ផ្ទុះអាវុធនៅថៃទៀតហើយ! ខ្មាន់កាំភ្លើងម្នាក់ បាញ់សម្លាប់មនុស្សនៅកណ្ដាលទីក្រុងបាងកក
បុរសម្នាក់បានបាញ់សម្លាប់អតីតភរិយារបស់ខ្លួន ហើយក៏បានបណ្ដាលឱ្យមនុស្សម្នាក់ផ្សេងទៀតរងរបួសធ្ងន់ដែលករណីនេះ បានកើតឡើងនៅក្នុងមជ្ឈមណ្ឌលពាណិជ្ជកម្មមួយនៅទីក្រុងបាងកក ប្រទេសថៃ កាលពីល្ងាចថ្ងៃទី18កុម្ភៈ តែប៉ុន្មានថ្ងៃប៉ុណ្ណោះ ក្រោយអំពើបាញ់រះសម្លាប់មនុស្ស29នាក់ នៅភាគឦសានប្រទេសនេះ។
សារព័ត៌មាន AFP បានរាយការណ៍ថា ករណីផ្ទុះអាវុធនេះ កើតឡើងនៅឯមជ្ឈមណ្ឌលពាណិជ្ជកម្ម Century The Movie Plaza នៅក្បែរវិមានជ័យជំនះ ក្នុងទីក្រុងបាងកក នៃប្រទេសថៃ កាលពីវេលាម៉ោង15និង22នាទីល្ងាច ថ្ងៃទី18កុម្ភៈ (ម៉ោងក្នុងស្រុក)។
“មនុស្សម្នាក់បានស្លាប់ និងម្នាក់ទៀតរងរបួស”។ នេះបើតាមការឱ្យដឹងពីមន្ត្រីនគរបាលម្នាក់ ឈ្មោះ Kissana Pattanacharoen។
ខ្មាន់កាំភ្លើងបានគេចខ្លួនបាត់ស្រមោលពីមជ្ឈមណ្ឌលពាណិជ្ជកម្ម ក្រោយពីបានបង្កហេតុ។ នគរបាលឱ្យដឹងថា ពួកគេកំណត់បានអត្តសញ្ញាណជនសង្ស័យរួចហើយ និងកំពុងតាមចាប់ជននេះ។
ខ្មាន់កាំភ្លើងបានចូលទៅក្នុងហាងថែរក្សាសម្ផស្សមួយនៅក្នុងមជ្ឈមណ្ឌលពាណិជ្ជកម្ម Century The Movie Plaza ជាកន្លែងដែលអតីតភរិយារបស់ខ្លួនកំពុងធ្វើការ។ ខ្មាន់កាំភ្លើងបានបាញ់សម្លាប់ស្ត្រីជាអតីតភរិយា និងធ្វើឱ្យមនុស្សម្នាក់នៅក្បែរនោះ រងរបួស។
អាជ្ញាធរទីក្រុងបាងកក បានអះអាងថា ករណីនេះ កើតឡើងដោយសារបញ្ហាផ្ទាល់ខ្លួន និងថា វាមិនមែនជាករណីបាញ់រះដែលដូចទៅនឹងករណីដែលបានកើតឡើងនៅទីក្រុង Nakhon Ratchasima កាលពី10ថ្ងៃមុននោះទេ។
កងកម្លាំងមានសមត្ថកិច្ច បានឡោមព័ទ្ធតំបន់កើតហេតុ និងបានរកឃើញសម្បកគ្រាប់ចំនួន7 នៅកន្លែងកើតហេតុ។ មន្ត្រីជំនាញ បានសង្ស័យថា ករណីនេះ កើតឡើងដោយសារការប្រចណ្ឌ។ ស្ត្រីរងគ្រោះបានបាត់បង់ជីវិតភ្លាមៗ ដោយសារត្រូវគ្រាប់ចំនួនពី 3-4គ្រាប់ នៅត្រង់ក្បាល និងដងខ្លួន។
នៅដើមខែនេះ ក៏មានករណីផ្ទុះអាវុធសម្លាប់មនុស្សនៅប្រទេសថៃផងដែរ។ ករណីបាញ់រះនោះ បង្កឡើងដោយមន្ត្រីយោធាម្នាក់ បណ្ដាលឱ្យមានអ្នកស្លាប់ដល់ទៅ29នាក់ នៅឯមជ្ឈមណ្ឌលពាណិជ្ជកម្ម Termiinal 21 ក្នុងទីក្រុង Nakhon Ratchasima ភាគឦសានប្រទេសនេះ។
កាលពីដើមឆ្នាំនេះ ក៏មានករណីបាញ់សម្លាប់មនុស្សនៅឯមជ្ឈមណ្ឌលពាណិជ្ជកម្មមួយក្នុងទីក្រុង Lopburi ភាគកណ្ដាលប្រទេសថៃ។ ខ្មាន់កាំភ្លើងម្នាក់ បានបាញ់សម្លាប់មនុស្សចំនួន3នាក់ ក្នុងនោះមានកុមារអាយុ2ឆ្នាំម្នាក់។ ករណីនេះ ក៏បានបណ្ដាលឱ្យមានអ្នករងរបួស4នាក់ នៅពេលខ្មាន់កាំភ្លើងបានចូលប្លន់ហាងលក់គ្រឿងអលង្ការមួយកន្លែង៕
ប្រភព៖ សារព័ត៌មានបរទេស
February 19, 2020
ទូរស័ព្ទអេក្រង់បត់ Samsung Galaxy Flip តម្លៃប៉ុណ្ណឹង ចង់បានអត់? (មានវីដេអូ)
តាំងពីថ្ងៃទី14 ខែកុម្ភៈ 2020 កន្លងមក ក្រុមហ៊ុន Samsung បានប្រកាសបើកលក់ Galaxy Z Flip ដែលប្រកាសចេញមុនគេក្នុងកម្មវិធី Unpacked ។ វាពិតជាបានបង្ហាញថា Samsung មានការខ្វល់ខ្វាយខ្លាំងលើ ការអភិវឌ្ឍស្មាតហ្វូនអេក្រង់បត់ បន្ទាប់ពី Galaxy Fold ដែលបានប្រកាសចេញលក់កាលពីឆ្នាំមុន មានបញ្ហាអេក្រង់ខ្លះៗ។
Galaxy Z Flip ដែលកំពុងលក់នៅលើទីផ្សារបរទេសជាមួយតម្លៃ 1,380ដុល្លារ មានជម្រើសពណ៌ខ្មៅលាយផ្កាឈូកស្រាល ឬ ស្វាយ និងខ្មៅសុទ្ធ។
Galaxy Z Flip មានបំពាក់ដោយអេក្រង់បត់ប្រភេទ AMOLED ទំហំ 6.7អ៊ីញ អាចបង្ហាញរូបភាពក្នុងកម្រិត 1080×2636 ភិកសែល។ អេក្រង់ទី2 ទំហំ 1.1អ៊ីញ ប្រភេទ Super AMOLED បន្ទះឈីប Snapdragon 855+ មាន RAM ទំហំ 8GB និងអង្គផ្ទុកទិន្នន័យ 128GB កាមេរ៉ាមេមានកម្រិត 12MP និងកាមេរ៉ាទី2 ប្រភេទ Ultra-Wide កម្រិត 12MP កាមេរ៉ា Selfie កម្រិត10MP ទ្រនាប់ស្គែនម្រាមដៃនៅផ្នែកចំហៀងផង និងថ្មទំហំ 3300mAh ដែលអាចសាកបានលឿន 15វ៉ាត់ និងសាកដោយមិនប្រើខ្សែក៏បានផងដែរ។
សូមទស្សនាវីដេអូខាងក្រោម៖
February 18, 2020
ចប់ហើយ! ព្រោះតែវីរុសកូរ៉ូណា ពិព័រណ៍ស្មាតហ្វូនធំប្រចាំឆ្នាំ MWC ប្រកាសមិនធ្វើទេនៅឆ្នាំនេះ
MWC តែងត្រូវបានប្រារព្ធឡើងចាប់ពីថ្ងៃទី24 ដល់ 27 ខែកុម្ភៈ នៅទីក្រុង Barcelona ប្រទេសអេស្ប៉ាញ ប៉ុន្តែអ្នករៀបចំកម្មវិធីបានសម្រេចរំសាយកម្មវិធីទាំងមូលចោល ដោយសារតែភ័យខ្លាចការឆ្លងរីករាលដាលនៃវីរុសកូរ៉ូណា។ កម្មវិធីតាំងបង្ហាញស្មាតហ្វូនធំប្រចាំឆ្នាំ MWC (Mobile World Congress) នឹងមិនមានការរៀបចំឡើងទេក្នុងឆ្នាំ2020 នេះ។
មុនការរំសាយ MWC ចោល មានក្រុមហ៊ុនជាច្រើនបានប្រកាសមិនចូលរួមក្នុងកម្មវិធីនេះ និងមានខ្លះបានរំសាយចោលកម្មវិធីនេះ មុន MWC (Pre-MWC)ប្រកាសជូនដំណឹងទៅទៀត ដូច្នេះ ទើបដំណឹងនេះមិនមានអ្វីគួរឱ្យភ្ញាក់ផ្អើលខ្លាំងប៉ុន្មានឡើយ។
ទោះជាយ៉ាងនេះក្ដី ក៏នៅមានក្រុមហ៊ុនមួយចំនួនទៀតមិនទាន់បានប្រកាសពីដំណឹងចុងក្រោយជុំវិញព្រឹត្តិការណ៍ Pre-MWC ដែលនឹងកើតមាននៅថ្ងៃទី22 និង 23 ខែកុម្ភៈនេះដែរ មានដូចជា Huawei, OPPO, Xiaomi និង Motorola ជាដើម។
តែយ៉ាងណាក្ដី GSMA ដែលជាអ្នករៀបចំកម្មវិធីនេះ នៅតែទន្ទឹងរង់ចាំការប្រារព្ធកម្មវីធី MWC នេះ នៅឆ្នាំមុខ 2021 នាទីក្រុង Barcelona បន្តទៀត៕
ប្រភព៖ សារព័ត៌មានបរទេស
February 18, 2020