Category: សង្គម និងសេដ្ឋកិច្ច

អាន់នេលីស មីឆេល ស្រីក្រមុំដែលត្រូវខ្មោចចូល ជិត 70ដង រហូតដល់ស្លាប់យ៉ាងអាណោចអាធម្មបំផុត
គេនាំគ្នានិយាយថា មនុស្សដែលត្រូវខ្មោចចូល គឺមនុស្សដែលមានអាការរោគខាងផ្លូវចិត្ត តែនៅពេលខ្លះ អាការរោគខាងផ្លូវចិត្តរបស់ពួកគេទាំងនោះ ក៏ធ្វើឱ្យយើងលួចមិនគិតមិនបានដែរថា ឬក៏ការពិតទៅ ពួកគេទាំងនោះត្រូវខ្មោចចូលមែនទែន? ដោយសារតែអ្វីដែលបានកើតឡើងនោះ វាគួរឱ្យភ័យរន្ធត់ខ្លាំងណាស់។
ចំណែករឿងរ៉ាវដ៏គួរឱ្យព្រឺក្បាលនេះ បានកើតឡើងនៅឆ្នាំ1968 នៅលើស្រីក្រមុំវ័យ 16ឆ្នាំម្នាក់ ដែលមានឈ្មោះថា អាន់នេលីស មីឆេល នៅពេលដែលនាងចាប់ផ្តើមមានអាការចម្លែកៗឡើង គឺមានអាការញ័រខ្លួនយ៉ាងខ្លាំងក្លាម្តងម្កាល។ ឪពុកម្តាយរបស់នាងក៏ប្រញាប់នាំនាងទៅមន្ទីពេទ្យ ដែលបន្ទាប់មកនាងត្រូវបានពេទ្យរកឃើញថា កើតជំងឺប្រកាច់ឆ្កួតជ្រូក(ស្កន់ជាន់) និងបានទទួលការព្យាបាលតាមប្រក្រតី។
បន្ទាប់ពីចូលទទួលការព្យាបាលដ៏យូរអស់រយៈពេល 5ឆ្នាំមក អាការរបស់អាន់នេលីសមិនបានធូរស្រាលឡើងឡើយ ហើយនាងថែមទាំងចាប់ផ្តើមមើលឃើញវិញ្ញាណខ្មោចព្រាយបិសាចទៀតផង រហូតដល់គ្រប់គ្នាជឿថា នាងត្រូវខ្មោចចូល និងត្រូវតែប្រញាប់ធ្វើពិធីបណ្តេញខ្មោចជាបន្ទាន់។
អាការរបស់នាងចាប់ផ្តើមធ្ងន់ធ្ងរឡើងៗជាលំដាប់ រហូតដល់ថ្នាក់វាយតប់គេឯង និងមនុស្សនៅក្នុងគ្រួសារ មិនព្រមញ៉ាំអាហារ តែបែរជាទៅញ៉ាំសត្វរុយ ពីងពាង ចាប ដុំធ្យូង ខ្មោចសត្វផ្សេង ឬសម្បីតែផឹកទឹកនោមខ្លួនឯងទៀតផង។ ទោះជាមានបព្វជិត ឬអ្នកបួសជាច្រើនមកធ្វើពិធីបណ្តេញខ្មោចឱ្យនាងហើយក៏ដោយ តែក៏មិនអាចជួយនាងឱ្យជា ឬធូរស្រាលឡើងវិញបានឡើយ។
គ្រប់ពេលដែលធ្វើពិធីបណ្តេញខ្មោច អ្នកនៅជុំវិញនោះ នឹងត្រូវជួបនឹងទិដ្ឋភាពដ៏គួរឱ្យភ័យរន្ធត់របស់អាន់ នេលីស ។ នាងអាចស្រែករោទ៍យ៉ាងគ្រលួច បានយូរជាច្រើនម៉ោង និងមានកម្លាំងយ៉ាងខ្លាំងមហាសាល ខ្លាំងជាងមនុស្សប្រុសមាឌធំៗ 3នាក់រួមគ្នាទៅទៀត។ រហូតទីបំផុត ពួកគេត្រូវបង្ខំចិត្តដាក់ច្រវាក់នាងតែម្តង…។
រាងកាយរបស់នាងក៏ត្រូវស្គមស្គាំងស្លេកស្លាំងចុះជារឿយៗ រហូតដល់ទម្ងន់ខ្លួនរបស់នាងនៅសល់ត្រឹមតែ 30 គីឡូក្រាមប៉ុណ្ណោះ និងទោះជាអាការរបស់នាងបានធូរស្រាលឡើងម្តងម្កាលក៏ដោយ តែមិនយូរប៉ុន្មាននាងក៏កើតអាការនោះឡើងវិញដដែលទៀត។
រហូតដល់ក្នុងរយៈពេលត្រឹមតែ 8ខែ នាងត្រូវគេធ្វើពិធីបណ្តេញខ្មោចឱ្យជាច្រើនដង រហូតដល់ទៅ 67ដងឯណោះ។ ទីបំផុត រាងកាយរបស់នាង ក៏មិនអាចទ្រាំទ្រនឹងភាពចុកចាប់គ្រាំគ្រាបានតទៅទៀត នាងបានស្លាប់បាត់បង់ជីវិតដោយមានវ័យត្រឹមតែ 24ឆ្នាំប៉ុណ្ណោះ ហើយប្រយោគចុងក្រោយបំផុតដែលនាងបាននិយាយជាមួយម្តាយរបស់នាងនោះគឺ “ម៉ាក់អ៊ើយ…កូនខ្លាចណាស់”៕
ប្រភព៖ សារព័ត៌មានបរទេស
February 20, 2020
ក្រុមហ៊ុន General Motors ប្រកាសថា នឹងឈប់លក់រថយន្តម៉ាក Chevrolet នៅថៃ ខណៈប្រជាជនសម្រុកទៅទិញគរជើងគ្នា
ក្រុមហ៊ុន General Motors (GM) បានប្រកាសថា ខ្លួននឹងឈប់លក់រថយន្តម៉ាក Chevrolet នៅក្នុងប្រទេសថៃ ហើយនឹងលក់រោងចក្រនៅក្នុងខេត្តរ៉ាក់យ៉ងរបស់ខ្លួនទៅឱ្យក្រុមហ៊ុនរថយន្តចិន Great Wall Motors (GWM) នៅចុងឆ្នាំ2020 នេះ។
លោក Andy Dunstan ប្រធានផ្នែកយុទ្ធសាស្រ្តទីផ្សារក្រុមហ៊ុន GM បាននិយាយថា “ការប្រើប្រាស់រោងចក្រតិចតួច និងតម្រូវការក្នុងស្រុក ព្រមទាំងការនាំចេញទាប បានជះឥទ្ធិពលយ៉ាងខ្លាំងដល់អាជីវកម្មនេះ” ។
ទោះជាយ៉ាងណា GM នឹងនៅតែបន្តគាំទ្រដល់អតិថិជន Chevrolet បច្ចុប្បន្នសម្រាប់សេវាកម្មលក់ ធានារ៉ាប់រង និងការជួសជុល។
ក្រោយការប្រកាសនេះប៉ុន្មានថ្ងៃ មានដំណឹងថា ប្រជាពលរដ្ឋថៃជាច្រើន បាននាំគ្នាទៅក្រុមហ៊ុនលក់រថយន្ត Chevrolet ដើម្បីទិញយករថយន្តដែលខ្លួនស្រឡាញ់ ក្នុងតម្លៃទាបដ៏នឹកស្មានមិនដល់ បន្ទាប់ពីក្រុមហ៊ុន General Motors សម្រេចចិត្តដកខ្លួនចេញពីប្រទេសថៃ នៅចុងឆ្នាំនេះ៕
ប្រភព៖ សារព័ត៌មានបរទេស
February 20, 2020
មហាសេដ្ឋី Bloomberg នឹងលក់ក្រុមហ៊ុនរបស់ខ្លួន បើសិនជាឈ្នះក្នុងការបោះឆ្នោតនៅចុងឆ្នាំនេះ
សហរដ្ឋអាមេរិក៖ ក្រុមហ៊ុនទូរគមនាគមន៍ និងទិន្នន័យហិរញ្ញវត្ថុ Bloomberg LP ដែលត្រូវបានបង្កើតឡើងដោយមហាសេដ្ឋី Michael Bloombeerg និងសហស្ថាបនិករបស់គាត់ពី40ឆ្នាំមុន ពេលនេះអាចនឹងត្រូវបានដាក់លក់ក្នុងតម្លៃ60ពាន់លានដុល្លារអាមេរិក។
Tim O’Brien ដែលជាទីប្រឹក្សាផ្នែកយុទ្ធនាការឃោសនារកសំឡេងឆ្នោតរបស់មហាសេដ្ឋី Michael Bloomberg បាននិយាយប្រាប់ទូរទស្សន៍ CNN កាលពីពេលថ្មីៗនេះថា អតីតអភិបាលក្រុង New York លោក Michael Bloomberg មានបំណងលក់ក្រុមហ៊ុនរបស់គាត់។ បើសិនជាយកឈ្នះលើលោក Trump នៅខែវិច្ឆិកាខាងមុខ លោក Bloomberg នឹងផ្ទេរក្រុមហ៊ុន Bloomberg LP នេះ ទៅឱ្យក្រុមហ៊ុនផ្សេងមួយទៀត ហើយជំហានបន្ទាប់គឺលក់វាចោលតែម្ដង។ អ្នកស្រី Galia Slayen ដែលជាអ្នកនាំពាក្យរបស់ក្រុមយុទ្ធនាការឃោសនារកសំឡេងឆ្នោតក៏បានទទួលស្គាល់អំពីដំណឹងនេះ។
ទស្សនាវដ្ដី Forbes បានចេញផ្សាយថា ទ្រព្យសកម្មសុទ្ធរបស់មហាសេដ្ឋី Bloomberg មានប្រហែល54ពាន់លានដុល្លារអាមេរិក។
មហាសេដ្ឋីអាមេរិកាំង លោក Bloomberg កាន់កាប់ជិត90% នៃភាគហ៊ុនក្នុងក្រុមហ៊ុនទូរគមនាគមន៍ និងទិន្នន័យ Bloomberg LP ដែលមានគាត់ជាសហស្ថាបនិក កាលពីឆ្នាំ1981។ យោងតាម Burton-Taylor International Consulting ដែលជាក្រុមហ៊ុនស្រាវជ្រាវ និងតាមដានទៅលើបណ្ដាក្រុមហ៊ុនគ្រប់គ្រងទិន្នន័យហិរញ្ញវត្ថុ បានឱ្យដឹងថា ក្រុមហ៊ុន Bloomberg LP រកបានប្រាក់ចំណូលប្រមាណជា10,5ពាន់លានដុល្លារក្នុងឆ្នាំ2019 គឺកើនឡើង5,7% បើធៀបនឹងឆ្នាំ2018។
ក្រុមហ៊ុន Bloomberg LP ផ្គត់ផ្គង់ព័ត៌មាន និងទិន្នន័យទៅឱ្យអតិថិជនប្រមាណជា 325,000នាកក់ ដោយក្នុងអតិថិជនម្នាក់ត្រូវបង់ប្រាក់ចំនួន24,000ដុល្លារក្នុងមួយឆ្នាំៗ។ ស្ថាប័នព័ត៌មាន Bloomberg News រកបានប្រាក់ចំណូលប្រហែល3%ប៉ុណ្ណោះ បើធៀបនឹងប្រាក់ចំណូលសរុបរបស់ក្រុមហ៊ុន ប៉ុន្តែ ស្ថាប័ននេះ ត្រូវបានគេមើលឃើញថា ចំណាយច្រើនក្នុងយុទ្ធនាការឃោសនារកសំឡេងឆ្នោតរបស់ថៅកែខ្លួន។ នេះបើតាមទីភ្នាក់ងារសារព័ត៌មាន Wall Street Journal។
យោងទៅលើឯកសារស្ដីអំពីការទិញដូររបស់ក្រុមហ៊ុន Thomson-Reuters ដែលលក់ក្រុមហ៊ុនគ្រប់គ្រងទិន្នន័យ ឈ្មោះRefinitiv Holdings ទៅឱ្យក្រុមហ៊ុន London Stock Exchange Group កាលពីរដូវក្ដៅឆ្នាំទៅក្នុងតម្លៃ27ពាន់លានដុល្លារអាមេរិក Burton-Taylor International Consulting ជឿថា ក្រុមហ៊ុន Bloomberg LP អាចលក់បានក្នុងតម្លៃរហូតដល់60ពាន់លានដុល្លារអាមេរិក។
មហាសេដ្ឋី Bloomberg ឆ្នាំនេះ មានអាយុ78ឆ្នាំ។ យោងតាម CMAG/Kantar មហាសេដ្ឋីរូបនេះ បានចំណាយប្រាក់ជាង385លានដុល្លារទៅលើទូរទស្សន៍ វិទ្យុ និងបណ្ដាញសារព័ត៌មាននានា នៅក្នុងយុទ្ធនាការឃោសនារកសំឡេងឆ្នោតរបស់ខ្លួន។ លទ្ធផលនៃការស្ទង់មតិ ចាប់ពីថ្ងៃទី14 ដល់ថ្ងៃទី17កុម្ភៈ ដែលត្រូវបានធ្វើឡើងដោយ NBC និង Wall Street Journal បានបង្ហាញថា លោក Bloomberg កំពុងឈរលំដាប់លេខរៀងទី3 ក្នុងចំណោមបេក្ខជនប្រធានាធិបតីមកពីបក្សប្រជាធិបតេយ្យ បើគិតអំពីចំនួននៃអ្នកគាំទ្រ៕
ប្រភព៖ សារព័ត៌មានបរទេស
February 20, 2020
5G ដើរតួនាទីយ៉ាងសំខាន់ នៅក្នុងគំនិតផ្តួចផ្តើម លើវិស័យឌីជីថលនៅកម្ពុជា
រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងថា នៅទូទាំងពិភពលោកមានប្រតិបត្តិករទូរ គមនាគមន៍ 5G មកពី 31ប្រទេស ដែលបានដាក់ពង្រាយឱ្យប្រើប្រាស់បច្ចេកវិទ្យាថ្មីនេះ ប្រកបដោយជោគជ័យ ហើយបច្ចេកវិទ្យា5G នេះបានដើរតួនាទីយ៉ាងសំខាន់នៅក្នុងគំនិតផ្តួចផ្តើមលើវិស័យឌីជីថលនៅកម្ពុជា ក៏ដូចជានៅក្នុងបដិវត្ដន៍ឧស្សាហកម្ម4.0 ដែរ។
ឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា៖«ចក្ខុវិស័យរបស់ផែនការមេបច្ចេកវិទ្យាគមនាគមន៍ និងព័ត៌មានអាស៊ានឆ្នាំ2020 នឹងជំរុញអាស៊ានឆ្ពោះទៅកាន់ការប្រកាន់ យកសេដ្ឋកិច្ចឌីជីថល ដែលមានសុវត្ថិភាពខ្ពស់ ចីរភាព និងមានភាពរីកលូតលាស់ ហើយនឹងធ្វើឱ្យ សហគមន៍អាស៊ាន ក្លាយជាសហគមន៍មួយមាននវានុវត្តន៍ភាពពេញលេញ និងរួមបញ្ចូលគ្នាតែមួយ»។
ឯកឧត្តមរដ្ឋមន្ត្រី បានលើកឡើងយ៉ាងដូច្នេះកាលពីថ្ងៃទី19 ខែកុម្ភៈ ឆ្នាំ2020 ក្នុងឱកាស ដែលឯកឧត្តមបានអញ្ជើញជាអធិបតីក្នុងពិធីដំណើរការសាកល្បងបច្ចេកវិទ្យាទូរគមនាគមន៍ជំនាន់ ទី5 (5G) របស់ក្រុមហ៊ុន Yes Seatel (Yes 018)។
ឯកឧត្តមបន្តថា៖«ដើម្បីឆ្លើយតបនឹងចក្ខុវិស័យនេះ ក្រសួងកំពុងដំណើរការទៅមុខយ៉ាងល្អក្នុងការចេញអាជ្ញាប័ណ្ណវិសាលគមន៍5G ដល់ប្រតិបត្តិករ ហើយក្រសួងនឹងបន្តផ្តល់ការគាំទ្រដល់ ប្រតិបត្តិករទូរគមនាគមន៍នៅកម្ពុជា ដើម្បីឱ្យបណ្តាខេត្ត-ក្រុងទាំងអស់បានទទួលប្រព័ន្ធសេវា5G យ៉ាងឆាប់រហ័សផងដែរ»។
នៅក្នុងឱកាសនោះដែរ ឯកឧត្តម ត្រាំ អ៊ីវតឹក បានសម្តែងនូវអំណរសាទរចំពោះក្រុមហ៊ុន Yes Seatel ដែលបានខិតខំប្រឹងប្រែងរៀបចំពិធីសាកល្បងបច្ចេកវិទ្យា5G នេះបានដោយជោគជ័យ។ ឯកឧត្ដមក៏បានកោតសរសើរចំពោះការវិនិយោគជាបន្តបន្ទាប់លើផ្នែកហេដ្ឋារចនាសម្ព័ន្ធ ទូរគមនាគមន៍នៅក្នុងប្រទេសកម្ពុជា ដែលបានជួយឱ្យប្រជាជនកម្ពុជាទទួលបាននូវបទពិសោធ និងអត្ថប្រយោជន៍ជាច្រើនពីបច្ចេកវិទ្យាទំនើបៗចុងក្រោយផងដែរ។
លោក យ៉ាវ យៀកជីន អគ្គនាយកក្រុមហ៊ុន Yes 018 បានឱ្យដឹងដែរថា ការពង្រីកបច្ចេកវិទ្យា5G មុនគេនេះ គឺដើម្បីជាផ្នែកមួយចូលរួមចំណែកក្នុងការរីកចម្រើនរបស់ប្រទេសកម្ពុជា ដោយលោកបានកត់សម្គាល់ថា នឹងមានចំនួនការតភ្ជាប់ការប្រើប្រាស់ប្រព័ន្ធអ៊ីនធើណិត តាមរយៈឧបករណ៍អេឡិចត្រូនិកគ្រប់ប្រភេទកាន់តែច្រើន ដែលនឹងផ្តល់នូវភាពងាយស្រួល និងភាពទំនើបទាន់សម័យដល់ការរស់នៅបែបសម័យថ្មី។
លោកបានបញ្ជាក់ថា នៅពេលដែលប្រព័ន្ធសេវា Yes 5G ត្រូវបានដាក់ឱ្យដំណើរការជាផ្លូវការ វានឹងជាការបើកឱកាសថ្មីសម្រាប់ការកែលម្អវិស័យអប់រំ កសិកម្ម និងឧស្សាហកម្ម ដែលជាសសរគ្រឹះសំខាន់ទាំង3 សម្រាប់ប្រទេសកម្ពុជា។
ប្រព័ន្ធសេវា5G ផ្តល់នូវភាពងាយស្រួល និងផ្តល់ល្បឿនលឿនជាងប្រព័ន្ធសេវា4G ដល់ទៅ10ដង និងមានប្រព័ន្ធតភ្ជាប់សេវាអ៊ីនធើណិតជាទីទុកចិត្តជាមួយទូរស័ព្ទស្មាតហ្វូន និងឧបករណ៍អេឡិចត្រូនិកផ្សេងៗ ជាមួយនឹងល្បឿនលឿនក្នុងការទាញយកទិន្នន័យជាមធ្យម 1GB។
តាម GSMA: The GSM Association (Global System for Mobile Communications, originally Groupe Spécial Mobile) បច្ចេកវិទ្យា5G នឹងជំរុញកំណើនផលិតផលក្នុងស្រុកសរុប 4.8% សម្រាប់ប្រទេស។ បច្ចេកវិទ្យានេះនឹងផ្លាស់ប្តូរពិភពលោក តាមរយៈបច្ចេកវិទ្យា AI Robotics, Dronas, IoT, និងបច្ចេកវិទ្យា Smart Cities។ Yes 018 មានបណ្តាញ4G 100% ដែលបានគ្រប់ដណ្តប់ចំនួនប្រជាជនជាង 90% នៅក្នុងប្រទេសកម្ពុជា។ ស្ថានីយ៍4G ទាំងអស់ត្រូវបានបំពាក់បណ្តាញខ្សែកាប្លិ៍អុបទិកក្រោមដីជាង 12,000គីឡូម៉ែត្រ នៅទូទាំងប្រទេស៕
February 20, 2020
តួប្រុសក្នុងរឿង « The Blue Hour » ទម្លាយអារម្មណ៍ភ័យខ្លាចក្រោយត្រូវគំរាមសម្លាប់
តួប្រុសល្បីឈ្មោះក្នុងភាពយន្ដខ្នាតធំរឿង « The Blue Hour » លោក កាន់ អាន់ថៈផាន់ បានផ្ដល់បទសម្ភាសន៍ពីអារម្មណ៍រន្ធត់ភ័យខ្លាចបំផុត នៅពេលដែលលោកត្រូវគេគំរាមសម្លាប់ ដោយមានមនុស្សមិនស្គាល់មុខពិតបង្ហោះរូបកាំភ្លើងហើយថេកមកឱ្យលោក។ សារដែលថេកនោះបានសរសេរគំរាមសម្លាប់ទាំងយប់ថា នឹងបាញ់ឱ្យស្លាប់តៃហោងតែម្ដង រហូតដល់លោកសម្រេចចិត្តទៅដាក់ពាក្យបណ្ដឹងនៅពេលព្រឹកឡើង។
សារថេកទាំងស្រុងនៅលើបណ្ដាញសង្គមធ្វីតតឺបានរៀបរាប់ថា «ប្រសិនបើយើងបានជួប យើងនឹងយកកាំភ្លើងបាញ់ឯងឱ្យស្លាប់តៃហោងទាំងអស់ » ។ តារាសម្ដែងរូបស្រស់វ័យ ២៦ឆ្នាំរូបនេះបានអះអាងថា លោកតក់ស្លុតក្នុងចិត្តយ៉ាងខ្លាំង ខណៈដែលជួបស្ថានការណ៍នៅក្នុងពេលនោះ កំពុងតែមានព័ត៌មានផ្ទុះពីការបាញ់ប្រហារមកប្រជាជន ទើបបណ្ដាលឱ្យលោកភ័យរន្ធត់អស់ពេញមួយយប់ នឹងបានសម្រេចចិត្តដាក់ពាក្យបណ្ដឹងនៅពេលព្រឹកឡើង បន្ទាប់ពីលោកបានប្រាប់អ្នកកាន់អ្នកគ្រប់គ្រងរបស់លោក។
លោកបន្ដថា ក្រោយពីបានឃើញសារនោះហើយ លោកក៏មិនបានឆ្លើយតប ឬលេងសារជាមួយអ្នកណាទាំងអស់ ។ ហេតុការណ៍បែបនេះគឺជាលោកដំបូងហើយដែលលោកបានជួបប្រទះក្នុងជិវិត។ លោកថា លោកទទួលស្គាល់ថាខ្លួនភ័យខ្លាចបំផុត ទើបសម្រេចចិត្តប្ដឹងប៉ូលីសភ្លាម ។ លោកថា នេះមិនមែនជាសាររបស់អ្នកមហាជនអ្នកគាំទ្រនោះទេ គឺជាសារជនអណាមិកដែលមិនស្គាល់មុខ ហើយគំរាមសម្លាប់លោកពិតៗ។ ក៏ប៉ុន្ដែ លោកក៏បានទទួលសារលើកទឹកចិត្តជាច្រើនពីអ្នកគាំទ្រផងដែរ ទើបលោកមានកម្លាំងចិត្តបន្ដការងាររបស់ដល់ថ្ងៃទទួលពានរង្វាន់ក្នុងកម្មវិធី LineTv Award 2020 នេះ៕

February 20, 2020
តារាសម្ដែងចិនហុងកុង Koo Tin Lok ប្រកាសបរិច្ចាគម៉ាសអនាម័យ ២ ម៉ឺនម៉ាស
តាមរយៈសារព័ត៌មានចិនបានចេញផ្សាយនៅពេលមុននេះបន្ដិចឱ្យដឹងថា បន្ទាប់ពីម៉ាសអនាម័យចាប់ផ្ដើមខ្វះខាតនៅលើទីផ្សារ ភ្លាមៗស្រាប់តែតារាសម្ដែងចិនហុងកុងមានឈ្មោះល្បីល្បាញ លោក Koo Tin Lok បានប្រកាសលូកដៃជួយសង្គមតាមរយៈការបវិច្ចាគម៉ាសអនាម័យចំនួន ២ ម៉ឺនម៉ាស។
លោក Koo Tin Lok ដែលជាតារាសម្ដែងចិនហុងកុងវ័យ ៤៩ ឆ្នាំ បានធ្វើការបវិច្ចាគម៉ាសអនាម័យដល់ប្រជាជនហុងកុង ដើម្បីការពារការឆ្លងរីករាលដាលនៃវីរ៉ុស Covid-19។ ទង្វើសប្បុរសធម៌របស់លោក បានធ្វើបន្ទាប់ពីលោកទទួលបានដំណឹងថា ម៉ាសអនាម័យនៅលើទីផ្សារកំពុងខ្វះខាត រហូតដល់មានមនុស្សជាច្រើននាក់ចាប់ផ្តើមប្រើម៉ាសដដែលៗដោយមិនផ្លាស់ប្ដូរ។ ជាក់ស្ដែងដូចជា តារាសម្ដែងចិនហុងកុងវ័យ ៦៦ ឆ្នាំ អ្នកស្រី អេនជីលីណា លូ បានប្រើក្រដាស់ជូតមាត់ ២ សន្លឹកទ្រាប់បន្ថែមពីក្នុងម៉ាសអនាម័យ ដើម្បីការពារកុំឱ្យប្រឡាក់ម៉ាសនិងខ្ជះខ្ជាយម៉ាសកាន់តែច្រើន និងតម្លៃម៉ាសក៏កំពុងតែឡើងថ្លៃផងដែរ។
ក្រៅពីប្រកាសបរិច្ចាគម៉ាសអនាម័យ ២ ម៉ឺនម៉ាសហើយនោះ តារាសម្ដែងប្រុសរូបនេះ ក៏បានបរិច្ចាគប្រាក់ចំនួន ១០ លានយ័នបន្ថែមទៀត ទៅកាន់រោងចក្រផលិតម៉ាសនៅក្នុងទីក្រុង វូហាន ដើម្បីរួមចំណែកការប្រយុទ្ធប្រឆាំងវីរ៉ុស Covid-19 ដែលកំពុងរាតត្បាលពិភពលោក៕

February 20, 2020
បាញ់រះនៅអាល្លឺម៉ង់ សម្លាប់មនុស្សយ៉ាងតិច8នាក់
ក្រុមខ្មាន់កាំភ្លើងជាច្រើននាក់ បានបាញ់រះទៅលើបារ2កន្លែងនៅក្នុងទីរួមស្រុក Hanau នាព្រឹកនេះ បណ្ដាលឱ្យមានអ្នកស្លាប់យ៉ាងតិច8នាក់។ សមត្ថកិច្ចកំពុងតាមចាប់ជនដៃដល់ទាំងនោះ។
ករណីបាញ់រះទៅលើបារ2កន្លែងខាងលើនេះ បានកើតឡើងនៅឯទីរួមស្រុក Hanau ភាគខាងលិចប្រទេសអាល្លឺម៉ង់ កាលពីវេលាម៉ោង22 ថ្ងៃទី19កុម្ភៈ (ម៉ោង4ភ្លឺ ថ្ងៃទី 20កុម្ភៈ ម៉ោងនៅភ្នំពេញ) ក្រោយមកពួកគេបានបើកឡានគេចខ្លួនបាត់ពីកន្លែងកើតហេតុ។
សារព័ត៌មានក្នុងស្រុកបានរាយការណ៍ថា មានអ្នកស្លាប់នៅក្នុងបារទីមួយចំនួន3នាក់ ហើយជនរងគ្រោះក្រៅពីនេះ បានស្លាប់នៅក្នុងបារមួយផ្សេងទៀត។
សមត្ថកិច្ច និងកងកម្លាំងពិសេសកំពុងឡោមព័ទ្ធតំបន់កើតហេតុ និងតំបន់ក្បែរខាងកន្លែងកើតហេតុ ខណៈឧទ្ធម្ភាគចក្រកំពុងហោះឆ្វែលនៅពីលើតំបន់កើតហេតុនោះដែរ។ មូលហេតុនៃការបាញ់ប្រហារនេះ មិនទាន់ត្រូវបានគេដឹងនៅឡើយ។
Hanau គឺជាទីរួមស្រុកធំមួយដែលមានប្រជាជនជិត100,000នាក់ ស្ថិតនៅក្នុងរដ្ឋ Hesse ភាគខាងលិចប្រទេសអាល្លឺម៉ង់ និងមានចម្ងាយពីទីក្រុង Frankfurt ទៅទិសខាងត្បូង ប្រហែល25គីឡូម៉ែត្រ ។
ពលរដ្ឋអាល្លឺម៉ង់ អាចប្រើប្រាស់កាំភ្លើងបានគ្រប់គ្នា ប៉ុន្តែប្រទេសអាល្លឺម៉ង់ កន្លងមកមានការគ្រប់គ្រងអាវុធបានយ៉ាងល្អ។ អ្នកដែលមានសិទ្ធិកាន់កាប់កាំភ្លើង ត្រូវតែមានលិខិតអនុញ្ញាតត្រឹមត្រូវ។ អាល្លឺម៉ង់ កន្លងមកក៏ធ្លាប់មានអំពើបាញ់ប្រហារជាច្រើនករណីផងដែរ ក្នុងនោះក៏មានករណីវាយប្រហារទៅលើផ្សារណូអែលមួយនៅកណ្ដាលទីក្រុង Berlin កាលពីខែធ្នូ ឆ្នាំ2016 បណ្ដាលឱ្យមានអ្នកសា្លប់12នាក់៕
ប្រភព៖ សារព័ត៌មានបរទេស
February 20, 2020
នាវាទេសចរណ៍ដឹកភ្ញៀវ900នាក់ នឹងចូលចតនៅឯកំពង់ផែខេត្តព្រះសីហនុ ក្នុងសប្ដាហ៍ក្រោយ បន្ទាប់ពីចាកចេញពីវៀតណាម
នាវាទេសចរណ៍ Crystal Symphony កាលពីព្រឹកមិញ (19កុម្ភៈ) បានចូលចតនៅឯកំពង់ផែ ចឹន ម៉ៃ (Chan May) ខេត្ត ធឿ ធាន-ហ្វេ (Thua Thien-Hue) ប្រទេសវៀតណាម ដើម្បីឡើងគោក ធ្វើទស្សនាចរណ៍ក្នុងប្រទេសនេះ។
អគ្គនាយកនៃក្រុមហ៊ុនទេសចរណ៍ យូ ង្វាន វៀត (Du Ngoan Viet) ដែលជាអ្នកទទួលដំណើររបស់កប៉ាល់ Crystal Symphony បានឱ្យដឹងថា ក្រោយពីចូលចតនៅឯកំពង់ផែ ចឹន ម៉ៃ ក្រុមអ្នកទេសចរចំនួន900នាក់ រួមនឹងបុគ្គលិកនាវានេះនឹងឡើងគោក ហើយចាប់ផ្ដើមធ្វើទស្សនាចរណ៍នៅទីក្រុង ហ្វេ (Hue) និងទីក្រុង ហូយ អាន (Hoi An) ដែលស្ថិតនៅក្នុងភាគកណ្ដាលប្រទេសវៀតណាម។
ក្រោយពីចាកចេញពីកំពង់ផែ ចឹន ម៉ៃ នាវា Crystal Symphony នឹងធ្វើដំណើរទៅកាន់ក្រុងហូជីមិញ (ព្រៃនគរ)។ ថ្ងៃទី24 ខែកុម្ភៈ នាវានេះនឹងចាកចេញពីវៀតណាម។
បន្ទាប់ពីចាកចេញពីវៀតណាម នាវា Crystal Symphony នេះនឹងធ្វើដំណើរទៅកាន់កោះ កូ សាមុយ (Ko Samui) ដែលជាកោះធំបំផុតលំដាប់ទី2របស់ប្រទេសថៃ នាថ្ងៃទី 26 ខែកុម្ភៈ ឆ្នាំ2020។
បើមិនមានអ្វីប្រែប្រួល នាវា Crystal Symphony នេះ នឹងចូលចតនៅឯកំពង់ផែខេត្តព្រះសីហនុ នៅព្រឹកព្រលឹម ថ្ងៃទី27 ខែកុម្ភៈ ឆ្នាំ2020។ អ្នកទេសចរនឹងចំណាយពេលមួយថ្ងៃដើម្បីធ្វើទស្សនាចរណ៍នៅទីក្រុងព្រះសីហនុ មុននឹងចាកចេញពីកំពង់ផែខេត្តព្រះសីហនុ នៅវេលាម៉ោង9យប់នៃថ្ងៃដដែល ដើម្បីទៅកាន់សិង្ហបុរី។ នេះបើតាមគេហទំព័រ Cruiseweb។
កាលពីថ្ងៃទី1 ខែឧសភា ឆ្នាំ2019 នាវា Crystal Symphony នេះ ក៏ធ្លាប់បានចូលចតនៅឯកំំពង់ផែខេត្តព្រះសីហនុ និងធ្វើទស្សនាចរណ៍រយៈពេលមួយថ្ងៃផងដែរ។
Crystal Symphony គឺជានាវាទេសចរណ៍របស់ក្រុមហ៊ុនអាមេរិក Crystal Cruises។ នេះគឺជានាវាប្រណិតបំផុតមួយក្នុងចំណោមនាវាទេសចរណ៍ប្រណិតបំផុតទាំង10របស់ពិភពលោក៕
ប្រភព៖ សារព័ត៌មានបរទេស
February 19, 2020
ទិដ្ឋភាពខាងក្នុងនាវាទេសចរណ៍ MS Westerdam ដែលកំពុងចតនៅកំពង់ផែខេត្តព្រះសីហនុ
MS Westerdam នៅតែចតនៅក្នុងកំពង់ផែខេត្តព្រះសីហនុ ដោយមិនទាន់ដឹងថា នឹងចាកចេញពីទីនេះនៅពេលណាឱ្យប្រាកដនោះទេ ខណៈដែលសមាជិកក្រុមនាវិកជាច្រើននាក់ បានចាកចេញពីនាវា ត្រឡប់ទៅផ្ទះរៀងៗខ្លួន។
នាវាទេសចរណ៍លំដាប់កំពូល MS Westerdam ដឹកអ្នកទេសចរចំនួន1,455នាក់ និងបុគ្គលិកនាវាចំនួន802នាក់ បានធ្វើដំណើរដោយគ្មានគោលដៅច្បាស់លាស់ បន្ទាប់ពីត្រូវបានបដិសេធមិនឱ្យចូលចតក្នុងកំពង់ផែនៅ ហ្វីលីពីន តៃវ៉ាន់ កូរ៉េខាងត្បូង និងប្រទេសថៃ ដោយសារបារម្ភអំពីការឆ្លងមេរោគកូរ៉ូណា COVID-19។
ថ្ងៃទី13កុម្ភៈ ឆ្នាំ2020 នាវានេះ ត្រូវបានអនុញ្ញាតឱ្យចូលចតក្នុងកំពង់ផែខេត្តព្រះសីហនុ ហើយមកដល់ពេលនេះ នាវានេះនៅតែចតនៅទីនោះ ដោយមិនទាន់ដឹងអំពីថ្ងៃដែលត្រូវចាកចេញ។ អ្នកទេសចរជាង600នាក់បានធ្វើដំណើរចេញពីនាវា ត្រឡប់ទៅផ្ទះពួកគេវិញ ក្នុងនោះមានអ្នកទេសចរម្នាក់អាយុ82ឆ្នាំ មានផ្ទុកមេរោគកូរ៉ូណា COVID-19 ដែលបច្ចុប្បន្នទទួលការព្យាបាលនៅប្រទេសម៉ាឡេស៊ី។ ចំណែកអ្នកទេសចរមួយចំនួនធំ កំពុងដាក់ឱ្យនៅដោយឡែកលើនាវា MS Westerdam នៅកំពង់ផែខេត្តព្រះសីហនុ។
MS Westerdam គឺជាកម្មសិទ្ធិរបស់ក្រុមហ៊ុនកប៉ាល់ទេសចរណ៍ Holland America ។ នាវានេះមានប្រវែងប្រហែល290ម៉ែត្រ និងមាន11ជាន់ អាចផ្ទុកអ្នកទេសចរបានជិត2,000នាក់។ នៅលើនាវានេះ មានសាលសម្រាករង់ចាំធំៗចំនួន14 អាងហែលទឹក3 អាងទឹកក្ដៅ5 និងជណ្ដើរប្រអប់ចំនួន14។
អាងទឹកក្ដៅលើនាវាមានប្រព័ន្ធដំបូលកញ្ចក់ស្វ័យវត្ត អាចបិទបើកតាមចិត្ត និងអាចងូតទឹកគ្រប់ពេល មិនថាអាកាសធាតុបែបណានោះទេ។
MS Westerdam មានបន្ទប់កាប៊ីនចំនួន959 ក្នុងនោះបន្ទប់ប្រភេទធម្មតាមានទំហំមធ្យមពី14-21ម៉ែត្រក្រឡា បន្ទប់លំដាប់ប្រណិតទំហំប្រហែលចាប់ពី33-66ម៉ែត្រក្រឡា។ បន្ទប់នីមួយៗសុទ្ធតែត្រូវបានបំពាក់សម្ភារទំនើបៗគ្រប់ប្រភេទ ក្នុងនោះមានគ្រែឆ្លាតវៃដែលអាចបំបែក ឬភ្ជាប់តាមចិត្តចង់ រួមទាំងកម្រាលព្រំប្រភេទប្រណិត។ល។
បន្ទប់លំដាប់ប្រណិតបំផុតគឺ Pinnacle Suite ដែលមានទំហំ106ម៉ែត្រក្រឡា និងមានរានហាលដ៏ធំទូលាយ មានដាក់អាងសម្រាប់ងូតទឹកផងដែរ។
កន្លែងកម្សាន្តរួមនៅលើនាវានេះ មានច្រើនប្រភេទ ចាប់ពីឆាកប្រគំតន្ត្រី ផ្សារទំនើប កន្លែងស្ប៉ាដែលអាចគយគន់ទិដ្ឋភាពសមុទ្រ រហូតដល់មានកន្លែងរៀនធ្វើម្ហូបបែបកម្សាន្ត កន្លែងឧទ្ទេសនាមតំបន់ដែលត្រូវទៅកម្សាន្តបន្ទាប់ និងសាលសម្រាប់ពិធីជប់លៀង។ល។
ក្នុងអំឡុងពេលដាក់ពាក្យសុំការអនុញ្ញាតចូលចតក្នុងកំពង់ផែ នាវាទេសចរណ៍នៅតែមានសកម្មភាពដូចធម្មតា ប៉ុន្តែ ភាគីខាងនាវាតែងតែក្រើនរំឭកភ្ញៀវឱ្យតាមដានសុខភាពរបស់ខ្លួនជាប្រចាំ។ នៅក្នុងរូបថតនេះ គឺជាហាងបារមួយដែលត្រូវបានថតដោយភ្ញៀវម្នាក់ក្នុងអំឡុងមិនទាន់ចូលចតក្នុងកំពង់ផែ។
អ្នកទេសចរមានជម្រើសច្រើនពេលទទួលទានអាហារនៅលើនាវានេះ ដោយវាមានបន្ទប់អាហារធំជាងគេនៅលើជាន់ទី2 និងទី3 ដែលមានបម្រើអាហារប៊ូហ្វេត៍ពេលព្រឹក ពេលថ្ងៃត្រង់ និងពេលល្ងាច ផ្គង់ផ្គង់ដោយបណ្ដាភោជនីយដ្ឋានអាស៊ី Lido ភោជនីយដ្ឋានអ៊ីតាលី Slice និង Canaletto រួមនឹងភោជនីយដ្ឋានគ្មានអ្នកបម្រើ Terrace Grill នៅជាន់ទៅ9 និងហាងកាហ្វេ Explorations នៅជាន់ទី10។
លេចធ្លោជាងគេ គឺភោជនីយដ្ឋាន Pinnacle Grill ដែលយកតាមស្ទីល fine dining នៅជាន់ទី2 តម្លៃចាប់ពី39ដុល្លារក្នុងមនុស្សម្នាក់ សម្រាប់អាហារពេលយប់មួយពេល។
សេវាកម្មស្ប៉ានៅលើនាវានេះ ក៏សម្បូរបែប ក្នុងនោះមានកញ្ចប់ម៉ាស្សា ឬកាត់សក់ជាច្រើនប្រភេទ។ ដើម្បីជួយឱ្យអ្នកទេសចរមានសុខភាពល្អ នាវាក៏មានបន្ទប់ហាត់ប្រាណដែលមានការបង្រៀនលំហាត់ប្រាណបែប aerobic និង pilates ឬ yoga ជាដើម។ នេះបើតាម Sea Scanner។
អំពីតម្លៃវិញ សម្រាប់ដំណើរទេសចរណ៍ទៅកាន់កូរ៉េខាងត្បូង-ជប៉ុន តាមរយៈនាវានេះ មានតម្លៃចាប់ពី1,600ដុល្លារអាមេរិករយៈពេល14យប់ ក្នុងមនុស្សម្នាក់ និងសម្រាប់បន្ទប់គ្រែពីរមួយបន្ទប់។ ដំណើរទៅកាន់ជប៉ុន-រុស្ស៊ី អាចមានតម្លៃដល់7,500ដុល្លារអាមេរិក៕
ប្រភព៖ សារព័ត៌មានបរទេស
February 19, 2020
បង្ហាញជីវិតស្ត្រីដែលមានប្ដី 5នាក់ និងវប្បធម៌ដែលមនុស្សជាច្រើនមិនដែលដឹងថា ពិតជាមានមែន…
រ៉ាចូ វើរម៉ា គឺជាភរិយារបស់ស្វាមី 5នាក់ដែលជាបងប្អូនបង្កើតនឹងគ្នា ដោយពួកគេរស់នៅដូចជាក្រុមគ្រួសារដ៏ធំមួយនៅក្នុងតំបន់តូចមួយភាគខាងជើងរបស់ប្រទេសឥណ្ឌា។ ពួកគេចិញ្ចឹមថែទាំកូនប្រុសម្នាក់ដែលមិនដឹងច្បាស់ថា កើតចេញពីឪពុកមួយណា។
នេះគឺជាគំរូមួយរបស់គ្រួសារបែបមានប្ដីច្រើននាក់ ដែលមិនមែនស្ថិតក្នុងសម័យអតីតកាលច្រើនរយឆ្នាំមុននោះទេ តែក្នុងសម័យបច្ចុប្បន្នកាលដែលកើតឡើងពិតៗ ដែលវប្បធម៌ប្រពៃណីបែបនេះនៅមាននៅឡើយនៅក្នុង ចិន និងឥណ្ឌា…ថ្ងៃនេះឡារ៉ែនសូមបើកបង្ហាញនូវអាថ៌កំបាំងរបស់គ្រួសារបែបមានស្វាមីច្រើននាក់ ដែលមនុស្សជាច្រើនមិនដែលធ្លាប់ដឹងទាល់តែសោះ។
1-នរណាមានតួនាទីជាមេគ្រួសារ?
លោកអ្នកអាចនឹងធ្លាប់បានឮរឿងរ៉ាវនៃការមានភរិយាច្រើននាក់ខ្លះៗមកហើយ តែមានធ្លាប់នឹកសង្ស័យដែរទេថា ចុះបើវាបញ្ច្រាស់គ្នាវិញ?។ មានស្ត្រីជាភរិយាម្នាក់ រៀបការជាមួយបុរសច្រើននាក់ និងស្វាមីទាំងអស់ដែលជាបងប្អូនបង្កើតនឹងគ្នានោះ ស្វាមីដែលមានអាយុច្រើនជាងគេ នឹងក្លាយជាមេគ្រួសារ ដោយខ្លួនគេនឹងធ្វើជាអ្នកជ្រើសរើសប្ដីផ្សេងទៀតឱ្យប្រពន្ធរបស់ខ្លួន។ មិនត្រឹមតែប៉ុណ្ណឹងទេ មេគ្រួសារថែមទាំងអាចជ្រើសរើសប្រពន្ធទី2 ឬទី3 ឱ្យខ្លួនឯងបានទៀតផង ហើយរូបគេនឹងបានទទួលឈ្មោះថា ជាឪពុករបស់ក្មេងទាំងអស់ដែលកើតនៅក្នុងគ្រួសារ ចំណែកប្ដីផ្សេងទៀត នឹងត្រូវបានហៅថា “ពូ” ទោះជាម្នាក់ណាជាឪពុកបង្កើតរបស់ក្មេងក៏ដោយ។
2-អ្នកណាជាអ្នកចាប់ផ្ដើមវប្បធម៌គ្រួសារបែបមានប្ដីច្រើននាក់?
គ្មានអ្នកណាដឹងពីប្រវត្តិចាប់ផ្ដើមរបស់វប្បធម៌នេះឡើយ តែអ្នកវិទ្យាសាស្ត្រជឿថា មានហេតុផលក្នុងរឿងនេះ ព្រោះការសាងគ្រួសារតែមួយ នឹងធ្វើឱ្យបងប្អូនមិនចាំបាច់ត្រូវដណ្ដើមកេរមរតក(ដីធ្លី)គ្នា ដែលនេះគឺជារឿងសំខាន់បំផុតសម្រាប់អ្នករស់នៅក្នុងតំបន់ទីបេត៍ និងតំបន់លើភ្នំហិមាល័យ ដោយសារតែដីធ្លីរបស់ពួកគេគឺជាវត្ថុស័ក្តិសិទ្ធិ រួមទាំងជនជាតិឥណ្ឌាដែលកំពុងជួបនឹងបញ្ហាប្រជាជនពេញហៀរប្រទេសរហូតគ្មានកន្លែងស្នាក់នៅផងដែរ។
3-យើងនឹកឆ្ងល់ថា តើវាខុសច្បាប់ដែរឬទេ?
ទោះជាសម្ព័ន្ធភាពបែបនេះ នឹងងាយស្រួលសម្រាប់ក្រុមគ្រួសារជាច្រើនមែន តែការរៀបការបែបមានស្វាមីច្រើននាក់ ក៏ជារឿងខុសច្បាប់នៅក្នុងប្រទេសជាច្រើនទៀតដែរ ក៏ប៉ុន្តែពួកគេមិនត្រូវបានរងទោសទណ្ឌអ្វីទាំងអស់ ដោយសារតែភាគច្រើនរស់នៅក្នុងតំបន់ឆ្ងាយដាច់ស្រយាលខ្លាំង។
4-ប្រពន្ធ1 ប្ដី 5នាក់ ជារឿងដែលទទួលយកបានក្នុងគ្រួសារ1
វប្បធម៌ស្វាមីច្រើននាក់ មានជាច្រើនសតវត្សរ៍មកហើយ វាមានន័យថា ពួកគេឆ្លងកាត់វិថីជីវិតបែបនេះមកតាំងពីជំនាន់តាទួតយាយទួត រហូតមកដល់ជំនាន់បច្ចុប្បន្ន និងក៏នៅតែបន្តកេរដំណែលនេះរហូតតទៅ ទៀត។ មនុស្សស្រីតែងតែមានស្វាមី តាំងពី2 រហូតដល់ 5នាក់ និងទាំងអស់ត្រូវតែមានអាយុមិនតិចជាង18ឆ្នាំ។
បើបងប្អូនក្នុងត្រកូលនោះ អាយុមិនទាន់ដល់ 18ឆ្នាំ នៅពេលដែលពួកគេមានអាយុដល់កំណត់ភ្លាម ពួកគេនឹងបានរៀបការជាមួយប្រពន្ធរបស់បងប្រុសខ្លួនឯងភ្លាមតែម្ដង។ ភាគច្រើន គ្រប់គ្នានៅក្នុងគ្រួសារនឹងរស់នៅក្នុងបន្ទប់ជាមួយគ្នា ហើយភូមិករជាច្រើននៅក្នុងតំបន់ទីបេត៍ នឹងគ្មានគ្រែសម្រាប់គេងទេ ពួកគេគ្រាន់តែក្រាលក្រណាត់ និងគេងនៅលើដីប៉ុណ្ណោះ។
ក្នុងខណៈដែលមនុស្សជាច្រើនអាចនឹងយល់ថា មនុស្សគួរមានគូត្រឹមតែម្នាក់ ដើម្បីការពារមិនឱ្យកើតបញ្ហានោះ នៅក្នុងវប្បធម៌ និងទំនៀមទម្លាប់ខ្លះ ស្វាមី ឬភរិយាដែលមានគូស្នេហ៍ច្រើនជាងម្នាក់ ក៏អាចរួមរស់នៅជាមួយគ្នាបានយ៉ាងសុខសាន្តប្រក្រតីដែរ។ សរុបទៅ តើអ្នកគិតយ៉ាងណាដែរចំពោះរឿងនេះ?
ប្រភព៖ សារព័ត៌មានបរទេស
February 19, 2020