Category: សង្គម និងសេដ្ឋកិច្ច

តើចាំបាច់ត្រូវពិនិត្យសុខភាពប្រចាំឆ្នាំដែរឬទេ?
ដោយសារការបំពុលកាន់តែច្រើននៅក្នុងចំណីអាហារដែលយើងទទួលទាន និងខ្យល់បរិយាកាសដែលអ្នកដកដង្ហើម អ្នកចាំបាច់ត្រូវតែការពារខ្លួនអ្នកពីជំងឺមហារីក។ ជំងឺមហារីកសួត ជំងឺមហារីកពោះវៀនធំ ជំងឺមហារីកក្រពេញប្រូស្ដាត ជំងឺមហារីកសុដន់ និងជំងឺមហារីកមាត់ស្បូន កំពុងកើតមានកាន់តែច្រើនឡើងៗពីឆ្នាំទៅមួយឆ្នាំ។
ទង្វើធ្វេសប្រហែលព្រងើយកន្ដើយជាមួយការត្រួតពិនិត្យសុខភាព គឺមានគ្រោះថ្នាក់ខ្លាំង តែប្រសិនបើអ្នកបានពិនិត្យឃើញឆាប់រហ័សគ្រប់គ្រាន់ ជំងឺទាំងនេះអាចព្យាបាលឱ្យជាសះស្បើយបានវិញ។ ជំងឺមហារីកដែលត្រូវបានពិនិត្យឃើញយឺតពេលជាញឹកញាប់ មិនអាចព្យាបាលបានឡើយ ឬអាចទាមទារការព្យាបាលដោយគីមី និងការវះកាត់ធំ ដែលមានការឈឺចាប់ និងការចំណាយខ្ពស់។
នៅពេលដែលអ្នកមានអាយុកាន់តែច្រើន អ្នកចាប់ផ្ដើមមានជំងឺរ៉ាំរ៉ៃ ដូចជា ជំងឺទឹកនោមផ្អែម សម្ពាធឈាមខ្ពស់ និងជាតិកូឡេស្ដេរ៉ូលខ្ពស់ ដែលប្រសិនបើទុកចោលមិនព្យាបាលនឹងបណ្ដាលឱ្យខូចផ្នែកផ្សេងទៀតជាច្រើននៃរាងកាយរបស់អ្នក។ ឧទាហរណ៍ ជំងឺទឹកនោមផ្អែមអាចបណ្ដាលឱ្យពិការភ្នែក ខូចតម្រងនោម គាំងបេះដូង ដាច់សរសៃឈាមក្នុងខួរក្បាល ស្ពឹកដៃជើង និងឆ្លងរោគជាដើម។
អ្នកអាចចាប់ផ្ដើមថែទាំសុខភាពរបស់អ្នកបានតាមរយៈការយកចិត្តទុកដាក់ ការកែប្រែរបៀបដែលអ្នករស់នៅ និងការទទួលទានអាហារ។ តួយ៉ាងហានិភ័យនៃការកើតជំងឺបេះដូង ក៏ដូចជាជំងឺផ្សេងទៀតជាច្រើន អាចត្រូវបានកាត់បន្ថយតាមរយៈការទទួលទានអាហារត្រឹមត្រូវ បន្ថែមលើការហាត់ប្រាណគ្រប់គ្រាន់។ ត្រូវទទួលទានបន្លែ ផ្លែឈើ និងត្រី ឱ្យបានច្រើនជាងមុន។ ចៀសវាងការទទួលទានសាច់ក្រហម អាហារខ្លាញ់ និងអាហារចៀន បំពង។ ត្រូវកាត់បន្ថយទម្លាប់ជក់បារីរបស់អ្នក។ ជំហានទាំងនេះ ក៏នឹងជួយអ្នកក្នុងការកាត់បន្ថយហានិភ័យនៃការកើតជំងឺមហារីកផងដែរ។
ពិនិត្យសុខភាពដើម្បីអ្វី?
រាងកាយមនុស្សម្នាក់ៗប្រៀបដូចជារថយន្តដែលចាំបាច់ត្រូវពិនិត្យពិច័យ ថែរក្សា និងកែតម្រូវឱ្យទាន់ពេលវេលាមុននឹងជំងឺរាតត្បាត ឬធ្ងន់ធ្ងរ ដូច្នេះការពិនិត្យសុខភាពជារឿងសំខាន់ដែលអាចធ្វើឱ្យអ្នក៖
1. ដឹងពីស្ថានភាពសុខភាពរបស់ខ្លួនឯង ថាតើខ្លួនឯងមានសភាពលក្ខណៈធម្មតា ឬខ្វះខាតនូវជីវជាតិ ឬមានឱកាសកើតជំងឺផ្សេងៗ បើធៀបទៅនឹងភេទ អាយុវ័យ និងអាជីព។
2. ជាការថែរក្សាសុខភាពដោយវិធីការពារជាមុន ដឹងលឿនព្យាបាលទាន់ពេល ឬការពារទុកជាមុន អាចជួយកាត់បន្ថយការបាត់បង់មនុស្សជាទីស្រឡាញ់ ការប៉ះទង្គិចសុខភាពផ្លូវចិត្ត ការខាតបង់ពេលវេលា និងទ្រព្យធន។
3. ជាដំណើរនៃការធ្វើឱ្យជីវិតប្រសើរឡើងផ្នែកសុខភាព ថាតើត្រូវបំពេញ និងកាត់បន្ថយអ្វីខ្លះ ដើម្បីឱ្យមានតុល្យភាព និងមានសុខភាពល្អ មានអាយុវែង កាត់បន្ថយបញ្ហាក្នុងក្រុមគ្រួសារ បញ្ហាសេដ្ឋកិច្ច និងជីវភាពគ្រួសារ ទាំងខ្លួនឯង និងគ្រួសារផងដែរ។
ការណែនាំដើម្បីភាពងាយស្រួលមុនពេលពិនិត្យសុខភាព
របៀបគួរដឹង និងត្រៀមខ្លួនមុនពិនិត្យ៖
1. មិនត្រូវបរិភោគទឹក អាហារ និងភេសជ្ជៈគ្រប់ប្រភេទ មុនទទួលការពិនិត្យសុខភាពយ៉ាងតិច 8-10 ម៉ោង។
2. សូមពន្យារការទទួលទានថ្នាំនៅពេលព្រឹករបស់អ្នក រហូតដល់ការបូមឈាមត្រូវបានបពា្ចប់រួចរាល់។
3. មុននឹងទទួលការថតអេកូសាស្ដ្រពិនិត្យ អ្នកចាំបាច់ត្រូវទទួលទានទឹកបីទៅបួនកែវជាមុនសិន។ ចូរកុំបត់ជើងតូចសម្រាប់រយៈពេលប្រហែលមួយម៉ោងមុនពេលថត។
4. សូមកុំលាបឡេបំបាត់ក្លិន ទឹកអប់ ម្សៅ ឬក្រែម នៅក្រោមដៃ ឬទ្រូងរបស់អ្នក ព្រោះវាអាចប៉ះពាល់ទៅដល់គុណភាព នៃការថតឆ្លុះមើលសុដន់។
5. ប្រសិនបើលោកអ្នកត្រូវការធ្វើតេស្ដដោយរត់លើម៉ាស៊ីន សូមយកតាមខ្លួននូវសម្លៀកបំពាក់ និងស្បែកជើងសម្រាប់ផ្លាស់៕
February 25, 2020
“Password វែង” និង “Password ខ្លីតែស្មុគស្មាញ” មួយណាមានសុវត្ថិភាពជាង?
អ្នកប្រើប្រាស់ឧបករណ៍បច្ចេកវិទ្យាភាគច្រើនយល់ថា ការដាក់ពាក្យសម្ងាត់(Password) កាន់តែស្មុគស្មាញ កាន់តែមានសុវត្ថិភាព ប៉ុន្តែ FBI វិញ បែរជាឱ្យតម្លៃខ្ពស់ទៅលើពាក្យសម្ងាត់វែងដោយមានអក្សរច្រើន ជាជាងពាក្យសម្ងាត់ដែលមានភាពស្មុគស្មាញខ្លាំង តែមានអក្សរតិច។
“ជំនួសឱ្យការប្រើប្រាស់ពាក្យសម្ងាត់ខ្លី ស្មុគស្មាញ ពិបាកចាំ ចូរងាកទៅប្រើពាក្យសម្ងាត់វែង។ ប្រការនេះ ទាក់ទិននឹងការបូកបញ្ចូលគ្នារវាងពាក្យនិងពាក្យឱ្យទៅជាឃ្លាមួយ ដែលមានអក្សរយ៉ាងតិច15តួ។ ពាក្យសម្ងាត់កាន់តែវែង កាន់តែពិបាកកាច់ ឬហែក(Hack)ដោយចោរអ៊ីនធើណិត ប៉ុន្តែ វានៅតែងាយស្រួលក្នុងការចងចាំសម្រាប់អ្នកប្រើប្រាស់”។
ក្នុងរយៈពេល1ទសវត្សរ៍កន្លងទៅ នៅក្នុងសង្គមបច្ចេកវិទ្យា មានការមិនយល់ស្របគ្នាចំពោះសំណួរដែលថា “តើពាក្យសម្ងាត់កាន់តែវែង នឹងកាន់តែមានសុវត្ថិភាពជាងពាក្យសម្ងាត់ខ្លីតែមានអក្សរតូចផង ធំផង និងសញ្ញាពិសេសៗផងដែរ ឬយ៉ាងណា?”។
មកដល់បច្ចុប្បន្ន ទីភ្នាក់ងារស៊ើបការណ៍អាមេរិកាំង (FBI) បានគាំទ្រចំពោះយោបល់ដំបូង ដែលថា “ពាក្យសម្ងាត់កាន់តែវែង កាន់តែមានសុវត្ថិភាព។ អ្នកជំនាញមកពី FBI ឱ្យដឹងថា នៅពេលពាក្យសម្ងាត់កាន់តែវែង ប្រព័ន្ធបំបែកលេខសម្ងាត់របស់ចោរអ៊ីនធើណិត នឹងត្រូវប្រើពេលកាន់តែយូរ និងចំណាយធនធានកាន់តែច្រើនដើម្បីគណនារកពាក្យសម្ងាត់នោះ។ ចំណែកពាក្យសម្ងាត់កាន់តែខ្លី ទោះជាមានផ្ទុកអក្សរផង លេខផង ដែលនាំឱ្យពិបាកក្នុងការចងចាំ តែវាមានភាពងាយស្រួលក្នុងការគណនា។
ការសិក្សាស្រាវជ្រាវមួយដែលបានចុះផ្សាយនៅលើទំព័រ arXiv កាលពីឆ្នាំ2015 ក៏ធ្លាប់បានគាំទ្រការយល់ឃើញខាងលើរបស់ FBI។ របាយការណ៍បានបកស្រាយថា “ការបង្កើនប្រវែង ឬចំនួននៃពាក្យសម្ងាត់ គឺមានប្រសិទ្ធភាពក្នុងការបន្ថែមកម្រិតនៃភាពស្មុគស្មានសម្រាប់ Password”។
ក៏ប៉ុន្តែ ទីភ្នាក់ងារ FBI ក៏យល់ថា មិនគួរដាក់ពាក្យសម្ងាត់សាមញ្ញពេកនោះដែរ។ អ្នកប្រើប្រាស់អ៊ីនធើណិត អាចងាកមកប្រើពាក្យសម្ងាត់មួយប្រភេទដែលគេហៅថា XKCD។ ពាក្យសម្ងាត់ XKCD នេះ សំដៅទៅលើឃ្លាទាំងមូលដែលមានមួយពាក្យ ឬច្រើនពាក្យ តែវាគ្មានអត្ថន័យច្បាស់លាស់ ហើយនៅតែងាយស្រួលក្នុងការចងចាំ។
កាលពីខែវិច្ឆិកា ឆ្នាំ2019 វិទ្យាស្ថានស្ដង់ដា និងបច្ចេកវិទ្យាជាតិរបស់អាមេរិក NIST (National Institute of Standards and Technology) បានណែនាំឱ្យអ្នកលេងអ៊ីនធើណិត ប្រើប្រាស់កន្សោមពាក្យសម្ងាត់ ជំនួសឱ្យពាក្យសម្ងាត់ដែលមានតែ1 ឬ2ពាក្យ៕
ប្រភព៖ សារព័ត៌មានបរទេស

February 24, 2020
វិធីដោះស្រាយបញ្ហាស្បែកក្រោយត្រូវដុតបំផ្លាញដោយកម្ដៅថ្ងៃ
បន្ទាប់ការដើរលេងកម្សាន្តនាចុងឆ្នាំ និងដើមឆ្នាំថ្មីនៅតាមឆ្នេរសមុទ្ររួច ទាំងលេងទឹកសមុទ្រ គេងហាលខ្យល់អានសៀវភៅបែបសប្បាយៗ តែបែរជាបានមកវិញនូវអាការក្រហាយស្បែក រមាស់ និងរបកស្បែកនោះ តើត្រូវរិះរកវិធីណាកុំឱ្យកើតអាការទាំងនេះ?វិធីខាងក្រោមនេះនឹងជួយអ្នកក្នុងការសម្រាលអាការរលាកស្បែកដោយសារកម្តៅថ្ងៃ ដើម្បីត្រៀមស្តារសភាពស្បែករបស់អ្នកឡើងវិញ ៖
1. ធ្វើឱ្យស្បែកត្រជាក់
នៅពេលចាប់ផ្តើមមានអារម្មណ៍ថា ស្បែករបស់អ្នកចាប់ផ្តើមរបក ចូរព្យាយាមធ្វើឱ្យស្បែកត្រជាក់ឡើងវិញ ការងូតទឹកត្រជាក់ ហើយជូតផ្តិតដោយកន្សែងពោះគោទន់ៗនឹងជួយឱ្យស្បែករបស់អ្នកស្រស់ស្រាយឡើងវិញ តែកុំប្រើការជូត ឬដុសលើស្បែកឱ្យស្ងួតឱ្យសោះ ព្រោះនឹងរឹតតែធ្វើឱ្យស្រទាប់ស្បែករបកចេញកាន់តែខ្លាំងឡើង។
2. លាបគ្រីមបំប៉នស្បែក
រកគ្រីមលាបស្បែកដែលមានចំណែកផ្សំរបស់ធាងប្រទាលកន្ទុយក្រពើលាប ដើម្បីឱ្យមានសំណើម និងមានភាពស្រស់បស់នៅជាប់លើស្បែកឱ្យបានយូរបំផុត ព្រោះសារធាតុដែលចម្រាញ់ចេញពីធាងប្រទាលកន្ទុយក្រពើជាឱសថបុរាណធម្មជាតិ ដែលមានគុណសម្បត្តិជួយក្នុងការព្យាបាលស្លាកស្នាម និងជួយបំប៉នស្រទាប់ស្បែក។
3. ទទួលទានទឹកឱ្យបានច្រើន
នៅពេលស្បែករបស់អ្នកចាប់ផ្តើមខូចខាត ការព្យាបាលឱ្យត្រឡប់មកល្អជាថ្មីឡើងវិញត្រូវចាប់ផ្តើមពីរាងកាយរបស់អ្នក ចូរទទួលទានទឹកឱ្យបានច្រើន ដើម្បីកុំឱ្យរាងកាយខ្វះជាតិទឹក ដើម្បីបង្កើនសំណើមរបស់ស្បែក។ ការទទួលទានទឹកប្រមាណជា8-10កែវក្នុងមួយថ្ងៃនៅក្នុងអំឡុងពេលនេះ នឹងល្អចំពោះសាច់ និងស្បែករបស់អ្នក។
4. ឈប់អេះ
រឿងមួយនេះអាចនឹងពិបាកសម្រាប់អ្នកខ្លះ តែការអេះ ឬកេះស្រទាប់ស្បែកដែលរបកនោះចេញ អាចនឹងធ្វើឱ្យស្បែកកន្លែងល្អនៅជិតនោះរបូតជាប់មកជាមួយដែរ និងអាចធ្វើឱ្យកើតស្លាកស្នាមឡើងបាន វិធីជួយសម្រាលអាការរមាស់នេះអាចធ្វើបានដោយប្រើទឹកកកស្អំ។
5. ការពារស្បែកយ៉ាងជាប់លាប់
ចំណុចចុងក្រោយនេះ លើកក្រោយបើចង់សប្បាយតាមឆ្នេរសមុទ្រ ឬកន្លែងដែលមានកម្តៅថ្ងៃខ្លាំង សូមកុំភ្លេចការពារស្បែករបស់អ្នកជាមុន ដោយគ្រីមការពារកម្តៅថ្ងៃ ហើយបើចុះលេងទឹកក៏កុំភ្លេចលាបគ្រីមបន្ថែមរាល់ពេលឡើងមកពីទឹក ហើយនៅមិនទាន់បានចូលទៅក្រោមម្លប់។ ចូរលាបគ្រីមឱ្យសព្វនៅលើស្បែក ទាំងផ្ទៃមុខ និងកន្លែងខ្លះទៀតដូចជា ខាងក្រោយត្រចៀកដែលតែងតែត្រូវបានភ្លេចជាញឹកញាប់សម្រាប់នារីដែលទើបចេះលាបគ្រីមថ្មីៗ៕
February 24, 2020
ចម្ការបន្លែគ្រួសារជុំវិញផ្ទះ (តពីលេខមុន)
បន្លែដែលគួរដាំនាចុងរដូវរងា ៖ មានដូចជា ខាត់ណា ផ្កាខាត់ណា ប្រូខូលី សាលាដ ប៉េងប៉ោះ និងការ៉ុតជាដើម។
បន្លែដែលអាចដាំបានពេញ 1ឆ្នាំ ៖ មានដូចជា បន្លែដែលធន់នឹងធាតុអាកាសបាន ដាំតែម្តងទទួលទានបានពេញ 1ឆ្នាំ ដូចជា ជីអង្កាម ជីរណា(ខ្លះហៅជីបារាំង) ជីនាងវង ម្រះព្រៅ ស្លឹកបាស់ ត្រកួនស្រែ ខ្ជាយ ម្តេង ស្លឹកគ្រៃ ស្លឹកត្រចៀកក្រាញ់ ត្រប់ពុតលំញង ម្ទេសដៃនាង និងត្រប់ផ្សេងៗ។

រូបបែបផ្សេងៗនៃការធ្វើចម្ការបន្លែគ្រួសារជុំវិញផ្ទះ
ទោះជាក្រុមគ្រួសារជាច្រើន បានដឹងអំពីប្រយោជន៍របស់ការដាំបន្លែគ្រួសារជុំវិញផ្ទះថា ជាការងារបន្ទាប់បន្សំយ៉ាងល្អ អាចជួយកាត់បន្ថយប្រាក់ចំណាយ សាងសេចក្តីសុខ និងមានប្រយោជន៍ដល់មនុស្សក្នុងក្រុមគ្រួសារបានយ៉ាងច្រើនហើយក៏ដោយ តែក៏នៅក្នុងផ្លូវប្រតិបត្តិវិញ អ្នកដាំដុះអាចនឹងត្រូវជួបនឹងបញ្ហារឿងទីកន្លែងក្នុងការដាំដុះ ជាពិសេសអ្នកដែលរស់នៅក្នុងទីក្រុង ដូចជា នៅក្នុងខុនដូ ផ្ទះល្វែង ឬក្នុងបុរី ដែលមិនសូវមានទីធ្លាច្រើនប៉ុន្មាន តែយ៉ាងណាក៏ដោយ ក៏យើងអាចជ្រើសរើសរូបបែបនៃការដាំដុះបន្លែគ្រួសារនេះ ឱ្យស័ក្តិសមនឹងទីកន្លែង និងចំណង់ចំណូលចិត្តរបស់យើងបានដោយមិនពិបាកឡើយ ដោយភាគច្រើនអាចបែងចែកទៅតាមរូបបែបដូចតទៅនេះ ៖

–ចម្ការបន្លែខាងក្រោយផ្ទះ
ការដាំដុះដោយវិធីនេះ ស័ក្តិសមសម្រាប់អ្នកដែលស្នាក់នៅក្នុងតំបន់ជនបទ ជាយក្រុង ឬផ្ទះដីភូមិ ដែលមានទីកន្លែងគ្រប់គ្រាន់ ព្រោះអាចធ្វើរងបន្លែដែលដាំនៅនឹងដីផ្ទាល់បានតែម្តង ធ្វើឱ្យអាចដាំបន្លែបានគ្រប់ប្រភេទ តាមចំណង់ចំណូលចិត្តរបស់មនុស្សក្នុងក្រុមគ្រួសារ ដែលភាគច្រើនទៅ ទំហំរងដំណាំដែលស័ក្តិសមក្នុងការដាំដុះបន្លែ ដើម្បីទទួលទានក្នុងគ្រួសារគឺ ទំហំរងទទឹងមិនលើសពី 1ម៉ែត្រ X បណ្តោយ 4ម៉ែត្រ (ឬតាមទំហំទីកន្លែង) X កម្ពស់ 20-30សង់ទីម៉ែត្រ ដើម្បីជួយក្នុងការបង្ហូរទឹក និងខ្យល់អាកាសបានល្អ។
សម្រាប់ការត្រៀមរងដំណាំ អាចធ្វើបានងាយៗ ដោយចាប់ផ្តើមពី ៖ កាប់ដីតាមទំហំរបស់ទីកន្លែងដែលត្រូវដាំដុះ ឱ្យជ្រៅចុះទៅប្រមាណជា 30 – 50សង់ទីម៉ែត្រ(3តឹក-កន្លះម៉ែត្រ) ឬប្រមាណជា 1-2មុខចបកាប់ បន្ទាប់ពីនោះត្រូវហាលដីចោលយ៉ាងតិច 7 ថ្ងៃ រួចទើបជ្រួយដីឡើងវិញម្តងទៀត។ បន្ទាប់ពីនោះដាក់ជីគ្រាប់ ឬជីធម្មជាតិក្នុង 1ម៉ែត្រការ៉េ 1-3ក្តាប់ដៃ ជ្រួយឱ្យលាយចូលគ្នាជាមួយដីក្លាយជាសាច់មួយ មុននឹងតុបតែងរងឱ្យមានកម្ពស់ប្រមាណជា 20-30សង់ទីម៉ែត្រ បន្ទាប់ពីនោះក៏ព្រោះ ឬដាក់ដាំគ្រាប់ពូជបន្លែចូលទៅ រួចបាញ់ទឹកផ្សំទឹកថ្នាំបណ្តុះ ត្រៃខូឌើម៉ា (អាចរកទិញបាននៅកន្លែងលក់គ្រឿងជីកសិកម្ម) ក្នុងអត្រា 10-20លិត្រក្នុងផ្ទៃដី 100 ម៉ែត្រការ៉េ លើរងដាំដុះដំណាំបន្ទាប់ពីដាក់ដាំគ្រាប់ពូជរួច និងគ្របពីលើរងដោយចំបើង បន្ទាប់ពីនោះចូរស្រោចទឹកដំណាំភ្លាមតែម្តង។

–ចម្ការបន្លែធំល្មម
ផ្ទះដែលមានបរិមាណទីធ្លាសម្រាប់ដាំដុះមិនធំប៉ុន្មាន អាចស័ក្តិសមជាមួយវិធីដាំដុះខាងក្រោមនេះ ព្រោះយ៉ាងហោចណាស់ក៏យើងអាចធ្វើជាចម្ការបានធំល្មមមួយ ទុកគ្រាន់មើលលេងកម្សាន្តសប្បាយៗ ដែលអាចប្រើបន្លែប្រភេទខ្លះ ធ្វើជារុក្ខជាតិគួបផ្សំនៅក្នុងចម្ការធំល្មមនោះបាន ដូច្នេះរុក្ខជាតិបន្លែដែលស័ក្តិសមក្នុងការយកមកដាំ គួរតែជារុក្ខជាតិដែលមានអាយុវែងបន្តិច មានទ្រង់ទ្រាយជាមែក ជាគុម្ពធំ និងមានស្លឹកត្រួយស្រស់ស្អាត រឹតតែមានផ្កា-ផ្លែពណ៌ល្អស្រស់ លេចធ្លោផងនោះ រឹតតែជាការល្អ ដូចជា ម្ទេសដៃនាង ម្ទេសគុយទាវ ប៉េងប៉ោះ ឬត្រប់ផ្សេងៗ ជាដើម។
ចំណែកវិធីការដាំដុះវិញ សំខាន់នៅត្រង់ការចាត់ចែងបែងចែកទីកន្លែងឱ្យស័ក្តិសមដើម្បីកុំឱ្យចង្អៀតស្មុគ តាមរយៈការបែងចែកទីកន្លែងដោយអាចប្រើ ផើង ឥដ្ឋប្រហោង ឥដ្ឋប្លុក បន្ទះឫស្សី ឬវត្ថុផ្សេងៗយកមកធ្វើជារបងឃាំងបែងចែកទីកន្លែងឱ្យក្លាយជាចំណែកមួយដោយឡែកបាន ឯការមើលថែទាំ ក៏ធ្វើបែបដូចគ្នានឹងការដាំដុះបន្លែនៅលើដី ឬក្នុងផើងទូទៅដែរ។

(នៅមានត)
February 24, 2020
៤ ថ្ងៃប៉ុណ្ណោះ! ភាពយន្ដ « អន្ទាក់ស្នេហ៍ » ទទួលបានអ្នកគាំទ្រពេញៗរោង
ក្រោមពាក្យស្លោក « ខ្ញុំគាំទ្រភាពយន្ដខ្មែរ » បានធ្វើឱ្យភាពយន្ដខ្មែរខ្នាតធំរឿង « អន្ទាក់ស្នេហ៍ » ទទួលបានការគាំទ្រយ៉ាងពេញទំហឹងពីមហាជន លក់សំបុត្របានពេញៗរោង។
ទើបតែដាក់បញ្ចាំងបានរយៈពេល ៤ ថ្ងៃប៉ុណ្ណោះ ភាពយន្ដខ្មែរមួយនេះ ហាក់មានសន្ទុះខ្លាំង ស្របពេលដែលភាពយន្ដបរទេសល្បីៗកំពុងតែដាក់បញ្ចាំងទន្ទឹមថ្ងៃគ្នា។ រឿង « អន្ទាក់ស្នេហ៍ » ត្រូវបានអ្នកគាំទ្រជាច្រើនលើកសរសើរថា ប្លង់ទេសភាពស្រស់ស្អាត ជារឿងមនោសញ្ចេតនាទេ តែហួសពីការរំពឹងទុក ពោលគឺ ផ្ទុះសំណើចតាំងពីដើមរឿងរហូតដល់ចប់ បើទោះបីជាយើងមកមើលរឿងច្រើនដងក្ដី។ មានអ្នកខ្លះទៀតលើកសរសើរពីតារាសម្ដែង ជីវ័ន្ដ ដែលជាតួអង្គថ្លុកនៅក្នុងរឿងនេះទាំងមូល។
ក្រោយពីទទួលបានស្ដាប់ចំណាប់អារម្មណ៍របស់អ្នកគាំទ្រភាពយន្ដខ្មែររួចមក យុវជន ព្រីកា តំណាងផលិតកម្ម Space Sp Production ក៏បានថ្លែងអំណរគុណដល់អ្នកគាំទ្រទាំងអស់ ដែលបានចំណាយពេលវេលា និងថវិកាទិញសំបុត្រ ដើម្បីគាំទ្រភាពយន្ដខ្មែរ។ សូមជម្រាបថា លោក ព្រីកា គឺផលិតករដឹកនាំផលិតរឿងមួយនេះ ហើយលោកក៏ជាអតីតក្មេងរើសសំរាមនៅតំបន់ស្ទឹងមានជ័យ តែលោកត្រូវបានលោក Scott ទទួលយកមកចិញ្ចឹមជាកូនធម៌ហើយបានបណ្ដុះបណ្ដាលរហូតទទួលបានសមិទ្ធផលជាច្រើន ចំណែកឯភាពយន្តរឿង «អន្ទាក់ស្នេហ៍» នេះដែរ លោកក៏អ្នកគ្រប់គ្រងការផលិតក្នុងរឿងទាំងស្រុងផងដែរ។
ជាការពិតណាស់ នៅរាត្រីថ្ងៃទី ២៣ ខែកុម្ភៈនេះ តារាសម្ដែងក្នុងរឿង អន្ទាក់ស្នេហ៍ ក៏បានបង្កភាពភ្ញាក់ដល់ទស្សនិកជនផងដែរ រួមមានលោក ជីវ័ន្ដ និងលោក សន ពិសិដ្ឋ ព្រមទាំងតារាសម្ដែង និងផលិតករជាច្រើនទៀត បានស្កាត់អ្នកគាំទ្រថតរូបភាពអនុសាវរីយ៍រួមគ្នា នៅក្នុងរោងកុន។ សូមទស្សនាសកម្មភាពទាំងស្រុងខាងក្រោមនេះ៖

February 24, 2020
ទោះខកខានដណ្ដើមពាននៅម៉ាឡេស៊ី លោក សូ ស្រណោះ រៀបចំកម្មវិធីសម្ដែងតន្រ្តីបញ្ចេញសមត្ថភាពនៅក្នុងស្រុកជំនួសវិញ
តាមការលើកឡើងរបស់ លោក សូ ស្រណោះ ជាគ្រូបង្វឹកនៅសាលាស្រណោះតន្ត្រី បានប្រាប់សារព័ត៌មានឡារ៉ែនថា ដោយសារការផ្ទុះឡើងនៃជម្ងឺកូរ៉ូណាកំពុងរាតត្បាលពិភពលោក លោក និង អាណាព្យាបាលសិស្ស ត្រូវបានខកខានមិនបានចេញបញ្ចេញសមត្ថភាពប្រកួតប្រជែងផ្នែកតន្ត្រីលើជំនាញឧបករណ៍វីយូឡុង ហ្គីតា ព្យាណូ និង ចម្រៀង នៅក្នុងប្រទេសម៉ាឡេស៊ី។
ថ្លែងប្រាប់អ្នកសារព័ត៌មានឡារ៉ែន នៅថ្ងៃទី២៣ ខែកុម្ភៈ ឆ្នាំ ២០២ នេះលោក សូ ស្រណោះ រៀបរាប់ថា ដោយសារតែលោក និង អាណាព្យាបាលសិស្ស សុទ្ធតែមិនចង់ប្រថុយប្រថាននឹងការផ្ទុះឡើងនៃជម្ងឺកូរ៉ូណាដែលកំពុងវាយលុក និង ចង់លើកទឹកចិត្តអោយកូនសិស្សទាំង៤២នាក់ ដែលខំប្រឹងហ្វឹកហាត់ចម្រៀង និង តន្ត្រីរហូតដល់៥ខែ តែបែរជាមិនបានចេញទៅដណ្ដើមពាននោះ ទើបលោករៀបចំជាការសម្ដែងទ្រង់ទ្រាយធំនៅក្នុងស្រុកវិញ ដើម្បីបង្ហាញថាបេក្ខភាពរបស់កម្ពុជាទាំង៤២រូបដ្បិតថាមិនបានចេញប្រកួត តែក៏មានសមត្ថភាពខ្លាំងៗតាមជំនាញរៀងខ្លួន ក្រោយការបង្វឹកផងដែរ។
លោកថាក្មេងៗដែលមានឈ្មោះត្រូវទៅប្រកួតនៅក្នុងប្រទេសម៉ាឡេស៊ីតែខកខានទាំងនោះ សុទ្ធសឹងតែបានឆ្លងកាត់ការបង្ហាត់បង្រៀនជាច្រើនឆ្នាំនៅក្នុងសាលាស្រណោះតន្ត្រី និងត្រូវបានប្រលងជ្រើសរើសដោយគណកម្មការជំនាញ ទើបលោកក៏សម្ដែងអារម្មណ៍សោកស្ដាយដូចគ្នា ដែលបេក្ខភាពទាំងនោះ ខកខានក្នុងការប្រកួតយកពានអន្តរជាតិ។ លោមបានទាំងបង្ហាញក្ដីសង្ឃឹមថា ប្រសិនបើបេក្ខភាពទាំងនេះ មានឱកាសចេញទៅម៉ាឡេ គឺនឹងឈ្នះពានមាស និង ពានផ្សេងៗមកកាន់កម្ពុជាវិញ មិនតិចជាងពាក់កណ្ដាលនោះផង ដោយសារតែពេលកន្លងមក លោកធ្លាប់បានដឹកនាំក្មេងៗទាំងនេះ ទៅប្រលងចម្រៀង និងតន្ត្រី លើឆាកអន្តរជាតិ គឺឈ្នះបានពានមាសជារឿយៗ។
ងាកមកការសម្ដែងជាជំនួសនៅក្នុងស្រុកនេះវិញ លោក សូ ស្រណោះ បញ្ជាក់ថា លោកពិតជាមានមោទនភាពដែលក្មេងៗទាំងនោះបង្ហាញសមត្ថភាពបានល្អ ខណៈដែលភ្ញៀវកិត្តិយស ដែលបានចូលរួម ជាពិសេសគឺអាណាព្យាបាល ដែលឃើញការបង្ហាញទេពកោសល្យរបស់កូនខ្លួនបានល្អ គឺសប្បាយចិត្ត បើមិនមែនជាការបង្ហាញសមត្ថភាពលើឆាកអន្តរជាតិ។ លោកថាឆ្នាំក្រោយ បេក្ខភាពទាំងនេះ នឹងនៅតែត្រៀមទៅប្រកួតដណ្ដើមពាននៅក្រៅប្រទេសដដែល ដើម្បីបង្ហាញថាវិស័យតន្ត្រី និងចម្រៀងរបស់កម្ពុជា មានការរីកចំរើន៕

February 24, 2020
តួប្រុសនៅក្នុងរឿង « Jail Break » ទុក្ខធំបាត់បង់ម្ដាយជាទីស្រឡាញ់
តារាសម្ដែងប្រុសមានឈ្មោះល្បីលោក អ៊ូ តារា តាមរយៈភាពយន្ដខ្នាតធំរឿង « Jail Break » និងរឿង « The Prey » បានបង្ហោះសារនៅលើបណ្ដាញសង្គមហ្វេសប៊ុកយ៉ាងក្រៀមក្រំ។
ខណៈដំណឹងដ៏ក្រៀមក្រំ គេបានដឹថា ម្តាយបង្កើតតារាសម្ដែងប្រុសរូបនេះបានទទួលមរណៈភាព។ លោក អ៊ូ តារា បានបង្ហោះសារតាមបណ្តាញសង្គមយ៉ាងក្តុកក្តួលថា «ការបាត់បង់មួយ ដែលពិបាកទទួលយក។សូមអោយអ្នកម្តាយ ចាកចេញទៅឱ្យសុខ ពេលកូនប្រុសចាប់កំណើតម្តាយបីកូនក្នុងដៃក្តីរីករាយ ពេលម្តាយចាកចេញទៅ ម្តាយដេកលើដៃកូនដោយក្តីសោកសង្រេង។ ម្តាយមិនមែនបណ្ឌិត តែម្តាយមានគតិបណ្ឌិតបង្រៀនឱ្យកូនចេះអនុវត្តក្តីស្រលាញ៉ដល់មនុស្សជុំវិញខ្លួនបណ្តុះបណ្តាល ផ្គត់ផ្ទង់ ទំនុងបម្រុង»។
អ្នកគាំទ្រលោកជាច្រើនបានផ្ញើរចូលរួមរំលែកទុក្ខដ៏ក្រៀមក្រំ ចំពោះការបាត់បង់ម្តាយជាទីស្រលាញ់របស់លោក សូមឱ្យដួងព្រលឹងវិញ្ញាណក្ខន្ធរបស់អ្នកម្ដាយលោក បានទៅកាន់ឋានសុគតិភពកុំបីឃ្លៀងឃ្លាតឡើយ៕

February 24, 2020
សរសើរទឹកចិត្តសិល្បករ នូ សុភេន ស្វែងរកជំនួយសប្បុរធម៌ជួយដល់ក្មេងៗខ្វះសម្ភារសិក្សា
នៅថ្ងៃទី ២៣ ខែកុម្ភៈ ឆ្នាំ ២០២០ នៅលើបណ្ដាញសង្គមហ្វេសប៊ុករបស់សិល្បករ និងជាផលិតករកម្មវិធីទូរទស្សន៍គឺលោក នូ សុភេន បានឱ្យឃើញថា លោកបានគៀរគររកជំនួយពីសប្បុរសជន ជួយដល់ក្មេងៗនៅក្នុងសាលាមួយក្នុងទឹកដីខេត្តខេត្តព្រះវិហារ ដែលមិនឆ្ងាយប៉ុន្មានពីស្រុកកំណើតរបស់លោក។
លោក នូ សុភេន បានរៀបរាប់ថា ក្មេងៗសិស្សសាលានៅខេត្តព្រះវិហារភាគច្រើននៅមានជីវភាពខ្វះខាតនោះទេ ទើបលោករមែងគៀរគរដល់សប្បុរសជន ដើម្បីប្រមូលជាមូនិធិជួយដល់អ្នកស្រុកនៅស្រុកកំណើតរបស់លោកតាមតែលើកធ្វើទៅបាន។លោកថា ដោយយោងទៅលើភាពខ្វះខាតរបស់បងប្អូនដែលមានកូនកំពុងសិក្សាហើយកំពុងត្រូវការសម្ភារសិក្សា ដើម្បីបន្តការសិក្សាឱ្យបានចប់ជោគជ័យទៅថ្ងៃអនាគត នៅក្នុងសហគមនៃសាលាបឋមសិក្សានៅខេត្តព្រះវិហារ ទើបលោកគៀរគរជំនួយយកទៅចែករំលែក។
នេះមិនមែនជាលើកទី១នោះទេ ដោយពេលកន្លងមកលោកបានគៀរគរជំនួយបែបនេះជួយតាមលទ្ធភាពច្រើនដងមកហើយ ពីសប្បុរសជនដែលលោកបានស្គាល់ ដល់សហគមន៍ និងសិស្សខ្វះខាតនៅខេត្តព្រះវិហារ។ អំណោយដែលលោកនាំយកទៅចែកជូននេះ គឺជាជំនួយឧបត្ថម្ភរបស់លោកឧកញ៉ា សួរ វិរៈ អគ្គនាយកក្រុមហ៊ុនវីរៈប៊ុនថាំ និងលោកជំទាវ ប៊ុន ចន្ធូ ជូនដល់សិស្សានុសិស្សសិស្សសរុបចំនួន 100 នាក់ ដែលកំពុងសិក្សានៅសាលាបឋមសិក្សាភូមិទំនប់ ដែលសាលានេះស្ថិតនៅក្នុង ភូមិទំនប់ សង្កាត់ប៉ាល់ហាល ក្រុងព្រះវិហារខេត្តព្រះវិហារ៕

February 24, 2020
អុិន សុភិន និង ភិន សុដាលីស ប្រកាសបើកក្រុមហ៊ុនថ្មីចាប់ដៃជាមួយអាមេរិក
បើតាមការបង្ហើបរបស់លោក អុិន សុភិន ជាចាងហ្វាងផលិតកម្មមហាហង្សបានឱ្យដឹងថា សព្វថ្ងៃលោកមានក្រុមហ៊ុនធំៗចំនួន ៧ នៅក្នុងដៃ រួមទាំងផលិតកម្មភាពយន្ដដ៏ធំមួយនេះផងដែរ ដែលជាផ្នែកមួយជំរុញការផ្សព្វផ្សាយពាណិជ្ជកម្មរបស់ក្រុមហ៊ុនលោក។ ដោយឡែកថ្មីៗនេះ នៅថ្ងៃទី២២ ខែកុម្ភៈ ឆ្នាំ២០២០ លោក និងកូនស្រីលោក គឺកញ្ញា ភិន សុដាលីស បានចាប់ដៃគូជាមួយក្រុមហ៊ុនអាមេរិកធំមួយ ទាំងប្រកាសតំណែងកូនឲជាប្រធានទីផ្សារយ៉ាងកាលីបថែមទៀត។ នៅក្នុងពិធីកាត់ខ្សែបូរប្រកាសក្រុមហ៊ុនថ្មីនិងប្រកាសតំណែងថ្មី នៅក្នុងថ្ងៃនោះ ក៏មានវត្តមានសិល្បករ និងក្រុមកីឡាករបាល់ទាត់ស្នូលរបស់ក្រុមមហាហង្សចូលរួមផងដែរ។
ជួបសម្ភាសន៍ជាមួយសារព័ត៌មានឡារ៉ែន លោក អុិន សុភិន ម្ចាស់ផលិតកម្មមហាហង្ស បានថ្លែងបញ្ជាក់ថា លោកមានក្រុមហ៊ុនដឹកជញ្ជូនបញ្ញើឈ្មោះ Linex Neutral Express Solution ដែលទទួលសេវាដាក់បញ្ញើទៅក្រៅប្រទេសជាយូរមកហើយ ហើយបណ្ដាលមកពីក្រុុមហ៊ុននេះទទួលជោគជ័យ ទើបក្រុមហ៊ុន Kango Express ដែលជាក្រុមហ៊ុនកុម្មង់ទំនិញដោយផ្ទាល់នៅក្នុងសហរដ្ឋអាមេរិកប្រកាសចាប់ដៃ ដោយផ្ដល់សិទ្ធិឱ្យលោកបង្កើតក្រុមហ៊ុនមួយឈ្មោះ Kango Express Cambodia ជាតំណាងនៅកម្ពុជា។ លោកថាក្រុមហ៊ុនដែលលោកទើបទទួល នឹងមានសិទ្ធិកុម្ម៉ង់គ្រប់មុខទំនិញទាំងអស់ពីសហរដ្ឋអាមេរិក ក្នុងតម្លៃមិនចាំបាច់បង់ពន្ធ ដោយភាគីខាងអាមេរិក គឺជាចាត់ចែង និង វិចខ្ចប់របស់ដែលមានគុណភាព និងដូចរូបភាពបង្ហោះលក់ មកកាន់ក្រុមហ៊ុនរបស់លោក។ លោកថាតាមរយៈកិច្ចព្រមព្រៀង មិនថាទំនិញអ្វី ផលិតផលអ្វី គឺសូម្បីតែរថយន្ត អោយតែបងប្អូនចង់ទិញដោយផ្ទាល់នៅអាមេរិក គឺអាចកុម្ម៉ង់ទិញតាមរយៈក្រុមហ៊ុន Kango Express Cambodia របស់លោកបាន ដោយរាល់ទំនិញទាំងអស់ គឺនៅលើអនឡាញអាមេរិកប្រកាសលក់តម្លៃណា ទិញបានតម្លៃនឹង អត់ចាំបាច់បង់ពន្ធបន្ថែមដូចនៅទីផ្សារអាមេរិកនោះទេ ដោយសារតែកិច្ចសហការ។
លោកបន្ដថាទំនិញដែលមានលក់ជាសាធារណៈនៅក្នុងទីផ្សារអាមេរិក គឺអាចកុម្ម៉ង់ទិញបានទាំងអស់ លើកលែងទឹកអប់ដែលរយន្តហោះមិនអាចដឹកមកច្រើន និងលើកលែងអាវុធ ឬ ផលិតផលខ្លះដែលហាមឃាត់។ ក្នុងនោះការធានាលើការយឺតយ៉ាវ ការបាត់បង់ ឬ ភាពមិនច្បាស់លាស់ ក៏លែងកើតមានទៀតហើយ ដោយសារមានក្រុមហ៊ុនលោកជាតំណាងនៅកម្ពុជាទទួលខុសត្រូវ។ លោកថាខ្លួនត្រូវបានដៃគូសហរដ្ឋអាមេរិក ផ្ដល់តំណាងឱ្យក្លាយជាអគ្គនាយក ហើយកូនស្រីរបស់លោក គឺ ភិន សុដាលីស គឺជាប្រធានទីផ្សារធំប្រចាំក្រុមហ៊ុន។ លោកថាជំហានជោគជ័យកើតមានរួចទៅហើយ ដោយសារតែមុនប្រកាសកាត់ខ្សែបូរដែលបានធ្វើឡើងនេះ គឺក្រុមហ៊ុនរបស់លោកក៏បានដំណើរសាកល្បងបាន៦ខែដែរ ហើយឃើញថាមានតម្រូវការកុម្ម៉ង់ច្រើន ដោយសារតែសេវានេះពេញនិយម ហើយមិនភ័យរឿងខាតបង់ ឬ បានរបស់មិនដូចក្នុងរូប ឬ របស់កន្លែងក្លាយ។
អ្នកនាង ភិន សុដាលីស បានអះអាងថា តួនាទីដែលអ្នកនាងទើបទទួល គឺត្រូវចំណូលចិត្តមួយ ដោយសារតែផ្នែកគ្រប់គ្រង និងផ្នែកពង្រីកទីផ្សារ អ្នកនាងមានបទពិសោធន៍តាំងពីលក់រោមភ្នែកធម្មតាៗ នៅតាមហ្វេសប៊ុកដំបូងៗ។ អ្នកនាងនឹងមាននាទីឡើងចុះអាមេរិកញឹកញាប់ ប៉ុន្តែមិនចោលការសម្ដែងនោះទេ គឺអ្នកនាងនៅតែទទួលនៅពេលមានរឿងត្រូវសម្ដែង ដែលទម្លាក់ដោយផលិតកម្មមហាហង្ស។ លោក អុិន សុភិន ក៏ប្រកាសជំហរមិនកាត់បន្ថយការផលិតភាពយន្តក្នុងមួយឆ្នាំយ៉ាងតិច៤រឿង តាមផែនការដែលធ្លាប់បានធ្វើនោះផងដែរ៕

February 24, 2020
រឿងដែលអ្នកត្រូវធ្វើក្នុងអាជីវកម្មរបស់អ្នក ដើម្បីក្លាយជាសេដ្ឋី
នៅពេលដែលលោកអ្នកមានអាជីវកម្មខ្នាតតូចមួយ ដែលបានផ្ដល់ផលចំណេញដល់លោកអ្នកល្អគួរសម តែលោកអ្នកមានអារម្មណ៍ថា ដូចជាមិនសូវសប្បាយចិត្តជាមួយនឹងវានោះ ចូរ… ៖
-កុំឆាប់ងាកទៅក្រឡេកមើលគម្រោងអាជីវកម្មផ្សេងទៀតអី។
-ផ្ដោតទៅលើភាពជោគជ័យ ដែលអ្នកកំពុងតែជួបនៅក្នុងអាជីវកម្មដែលកំពុងធ្វើ និងស្វែងរកវិធីសាស្រ្តផ្សេងទៀត ដើម្បីធ្វើឲ្យអាជីវកម្មខ្នាតតូចដដែលរបស់អ្នកនោះ រីកចម្រើនទៅមុខទៀតដោយការស្វែងរកអតិថិជនថ្មីៗ ឬក៏ពង្រីកការលក់ផលិតផលរបស់អ្នកទៅដល់អតិថិជនថ្មីៗបន្ថែមទៀត។
-កុំធុញទ្រាន់នឹងភាពជោគជ័យដែលសមល្មមនោះ និងកុំព្យាយាមជួសជុលនូវអ្វីដែលបានខូចខាតទៅហើយ។ មានតែការផ្ដោតទៅលើលទ្ធភាពដ៏សំខាន់នៃការធ្វើអាជីវកម្មរបស់អ្នកតែប៉ុណ្ណោះ ដែលធ្វើឲ្យអ្នកអាចបង្កើតទ្រព្យសម្បតិ្តបានយ៉ាងពិតប្រាកដ។ ការផ្ដោតទៅលើលទ្ធភាព គឺជាគន្លឹះក្នុងការទទួលបានភាពជោគជ័យក្នុងការចាប់ផ្ដើមធ្វើអាជីវកម្ម។ ការធ្វើអ្វីមួយដែលអ្នកស្រឡាញ់ជាមួយនឹងមនុស្សដែលអ្នកស្រឡាញ់ចូលចិត្ត គឺជាអាថ៌កំបាំងក្នុងការធ្វើឲ្យក្ដីស្រមៃរបស់អ្នកក្លាយជាការពិត និងទទួលបានជោគជ័យ។ ទោះជាមានសម្ពាធខ្លាំងយ៉ាងណាក៏ដោយ ការផ្ដោតទៅលើអ្វីដែលអ្នកកំពុងតែធ្វើគឺជាគន្លឹះក្នុងការទទួលបានភាពជោគជ័យនៅក្នុងជីវិត និងក្នុងការធ្វើអាជីវកម្មរបស់អ្នក។
-កុំធ្វើការងារនេះបន្តិច ការងារនោះបន្តិច ចូរផ្ដោតទៅលើការងារដែលអ្នកកំពុងធ្វើ ទោះជាអ្នកជួបនឹងក្តីបរាជ័យច្រើនដងក៏ដោយ។
-ចូរបន្ដផ្ដោតទៅលើអ្វីដែលអ្នកកំពុងតែធ្វើរហូតដល់វាទទួលបានជោគជ័យ។
-ដរាបណាអ្នកមិនទាន់បោះបង់វាចោល អ្នកនឹងទទួលបានជោគជ័យ ព្រោះការផ្ដោតបញ្ញា គំនិត ស្មារតី និងការច្នៃប្រឌិត គឺជាគន្លឹះនាំទៅរកភាពជោគជ័យ៕
February 22, 2020