Category: សង្គម និងសេដ្ឋកិច្ច

នាព្រឹកថ្ងៃពុធ ទី26 ខែកុម្ភៈ ឆ្នាំ2020 នេះ ក្រុមបាល់ទាត់យុវជនកម្ពុជាអាយុក្រោម 19ឆ្នាំ បានប្រកួតចាញ់ក្រុមជម្រើសជាតិយុវជនទីម័រអាយុក្រោម 19ឆ្នាំ ដោយលទ្ធផល 3ទល់នឹង7។

ជាលទ្ធផលក្នុងវគ្គទី1 ក្រុមទីម័រខាងកើតបាននាំមុខក្រុមយុវជនកម្ពុជា ដោយលទ្ធផល 3ទល់នឹង0។ ឈានចូលមកដល់វគ្គទី2 ក្រុមទីម័របានបន្ថែម 4គ្រាប់ទៀត ខណៈដែលយុវជនកម្ពុជាបានព្យាយាមវាយបកវិញបាន 3គ្រាប់។
វាជាការប្រកួតដំបូងរបស់កម្ពុជាក្នុងពានរង្វាន់ JENESYS 2019 Japan-ASEAN U19 Men’s Football Tournament នៅក្នុងប្រទេសជប៉ុន ខណៈដែលការប្រកួតលោកក្រោយ កម្ពុជាត្រូវជួបក្រុមយុវជនរបស់ក្លិបជប៉ុន និងក្រុមជម្រើសជាតិអាយុក្រោម 19ឆ្នាំនៃប្រទេសមីយ៉ាន់ម៉ា។
គួរបញ្ជាក់ផងដែរថា  ក្រុមជម្រើសជាតិកម្ពុជាអាយុក្រោម 19ឆ្នាំ កំពុងតែចូលរួមព្រឹត្តិការណ៍ JENESYS 2019 Japan-ASEAN U19 Men’s Football Tournament នៅប្រទេសជប៉ុន ចាប់ពីថ្ងៃទី24 កុម្ភៈ ដល់ 4 មីនា ឆ្នាំ2020៕

ក្នុងពានរង្វាន់ AFC CUP 2020 ក្នុងពូល G បានឈ្នះ​ក្រុមជើងឯកលីកកំពូលឥណ្ឌូនេស៊ី Bali United ក្នុងលទ្ធផល 2ទល់នឹង1។ក្នុងវគ្គទី1 ក្រុមព្រះខ័នរាជស្វាយរៀងបានឆក់ឱកាសល្អៗបាន 2លើក និងស៊ុតបញ្ចូលទីបានសម្រេច បំប៉ោងសំណាញ់ទីក្រុមជើងខ្លាំងឥណ្ឌូនេស៊ី ឱ្យបាក់ស្បាតមិនអាចតដៃរួច ដោយកីឡាករ ហួយ ផល្លីន (បញ្ចូនបាល់កាត់ដោយ Privat) និង Jean Marie Privat។
ចូលដល់វគ្គទី2 ក្រុមភ្ញៀវហាក់ដាក់សម្ពាធច្រើន ដោយរកបាន 1គ្រាប់វិញ ដោយសារបាល់ផ្លាត និងស៊ុតបញ្ចូលទីបានសម្រេច។​ ទោះជាខំប្រឹងប្រែងយ៉ាងណាក្តី ក្រុម Bali United នៅតែចាញ់ក្រុមព្រះខ័នរាជស្វាយរៀងដដែល ដោយបានរក្សាលទ្ធផលត្រឹម 2ទល់នឹង1 នេះរហូតដល់ចប់ការប្រកួត។
លទ្ធផលឈ្នះនេះផងដែរ បានធ្វើឱ្យព្រះខ័នរាជស្វាយរៀង ឡើងមកឈរនៅលេខ2 ក្នុងពូល G បណ្ដោះអាសន្ន ដោយគិតលើរូបមន្ត Head to Head និងបន្ទាប់ពី 1គូទៀតដែលជាក្រុមរួមពូលជាមួយគ្នា គឺការប្រកួតរវាង Ceres Negros ជាមួយ Than Quang Ninh បានបញ្ចប់ទៅដោយពិន្ទុស្មើគ្នា 2ទល់2៕

ស្ពានអាកាសក្បាលថ្នល់ ដែលបានបើកការដ្ឋានស្ថាបនា (ស្ពានអាកាសបត់ឆ្វេង 1ខ្សែថ្មីទី1 )ដែលនៅជាប់នឹងស្ពានចាស់ គ្រោងនឹងបញ្ចប់ការសាងសង់នៅអំឡុងដើមខែមីនា ឆ្នាំ2020 ខាងមុខ ដែលស្ពានអាកាសបត់ឆ្វេង 1ខ្សែថ្មីនេះ អាចជួយសម្រួលដល់ការធ្វើចរាចរណ៍ និងកាត់បន្ថយការកកស្ទះបានយ៉ាងច្រើន នៅត្រង់ចំណុចដែលមានចរាចរណ៍ដ៏ចង្អៀតនេះ។

តាមព័ត៌មានដែលបានបង្ហោះលើបណ្តាញទំនាក់ទំនងសង្គមរបស់រដ្ឋបាលរាជធានីភ្នំពេញ​បានឱ្យដឹងថា ក្រុមការងារជំនាញបាន និងកំពុងធ្វើការងារយ៉ាងសកម្មទាំងថ្ងៃទាំងយប់ ដោយជាលទ្ធផល រហូតមកដល់ថ្ងៃទី24 ខែកុម្ភៈ ឆ្នាំ2020 នេះ ក្រុមការងារជំនាញបាននិងកំពុងធ្វើការយ៉ាងសកម្ម លើការងារអ៊ុតកៅស៊ូលើស្ពាន និងគូសគំនូសចរាចរណ៍ដែលភ្ជាប់ពីមហាវិថីព្រះមុនីវង្ស បត់មកមហាវិថីព្រះនរោត្តម ។    សូមបញ្ជាក់ថា ស្ពានអាកាសក្បាលថ្នល់ ចាប់ពីមហាវិថីព្រះមុនីវង្ស ទៅមហាវិថីព្រះនរោត្តម មានប្រវែង 77ម៉ែត្រ ពីផ្លូវដីដល់គល់ស្ពានក្បាលថ្នល់ និងពីគល់ស្ពានដល់ស្ពានអាកាសចាស់មានប្រវែង 123ម៉ែត្រ សរុប 200​ម៉ែត្រ​។ ស្ពាននេះ​មានទទឹង 7ម៉ែត្រកន្លះ ពីមហាវិថីព្រះមុនីវង្ស បត់ឆ្វេងឡើងស្ពានឆ្ពោះទៅមហាវិថីព្រះនរោត្តម។

រដ្ឋបាលរាជធានីភ្នំពេញបានឱ្យដឹងដែរថា គម្រោងសាងសង់ស្ពានអាកាសបត់ឆ្វេងនេះ បានធ្វើឡើងដោយសារតែបច្ចុប្បន្ននេះ នៅរាជធានីភ្នំពេញមានកំណើនយានយន្តរបស់ប្រជាពលរដ្ឋ កើនឡើងយ៉ាងខ្លាំង ធ្វើឱ្យផ្លូវមួយចំនួនក្នុងរាជធានីមានការកកស្ទះចរា​ចរណ៍ ដែលជាបញ្ហាប្រឈម បានកើតឡើងជារៀងរាល់ថ្ងៃ ពិសេសនៅត្រង់ចំណុចផ្លូវបំបែកក្បាលថ្នល់នេះតែម្ដង។

បច្ចុប្បន្នរាជធានីភ្នំពេញ មានស្ពានអាកាសចំនួន 6កន្លែង រួមមានស្ពានអាកាសក្បាលថ្នល់ ស្ពាន​អាកាសស្ទឹងមានជ័យ ស្ពានអាកាស 7មករា ស្ពានអាកាស 5មករា ស្ពានអាកាសស្តុបផ្សារដីហុយ និងស្ពានអាកាសចោមចៅ ដែលស្ពាននេះក្រុមការងារបាន និងកំពុងសម្រុកដំណើរការសាងសង់យ៉ាងសកម្ម ដូចគ្នាទៅនឹងស្ពានអាកាសក្បាលថ្នល់នេះដែរ៕

ផែនទីឌីជីថលមួយឈ្មោះថា Coronamap Live ឬចុចពាក្យ https://coronamap.live/ ជាផ្ទាំងផ្សព្វផ្សាយអំពីដំណឹងនៃទីតាំងកើតឡើងនៃចំនួនអ្នកឆ្លងជំងឺ COVID-19 ត្រូវបានបង្កើត​យ៉ាងរហ័ស បន្ទាប់ពីតួលេខកាន់តែកើនឡើងច្រើននៅកណ្ដាលក្រុងសេអ៊ូល ប្រទេសកូរ៉េខាងត្បូង។
ពលរដ្ឋ​មាន​ការ​ភ័យ​ខ្លាច​យ៉ាង​ខ្លាំង​ ដោយ​សារ​ពេល​នេះកូរ៉េខាងត្បូងបានក្លាយ​ជា​ប្រទេស​ទី​2 ​បន្ទាប់​ពី​ចិន​ដែល​មាន​ការ​ឆ្លង​រាលដាល​ខ្លាំង​បំផុត។ គិត​មក​ត្រឹម​ពេល​នេះ រដ្ឋាភិបាល​បាន​ប្រកាស​ថា​ មាន​មនុស្ស 8នាក់បាន​ស្លាប់​ដោយ​សារ​កូរ៉ូណាវីរុស ខណៈ​ដែល 830នាក់​ផ្សេង​ទៀតបាន​ឆ្លង​ជំងឺ​នេះ។
ផែនទីឌីជីថលមួយនេះ មានតួនាទីអាចអាប់ឌែតបានរហ័ស 24ម៉ោង/7ថ្ងៃ។ គោលបំណងដើម្បីបង្ការកុំឱ្យឆ្លងរាលដាលដល់អ្នកដទៃទៀត ហើយវាត្រូវបានរដ្ឋាភិបាលអនុញ្ញាតឱ្យប្រើបាននៅលើឧបករណ៍អេឡិចត្រូនិកគ្រប់ប្រភេទ និងបាននៅដំឡើងនៅទីតាមសាធារណៈផ្សេងៗផងដែរ ដូចជា អាកាសយានដ្ឋានអន្តរជាតិ មន្ទីរពេទ្យ និងផ្សារទំនើបនានា។ វាមាន 3ពណ៌ មានសញ្ញាបង្ហាញផ្សេងគ្នា គឺក្រហម មានន័យថា ឆ្លងបាន 1ថ្ងៃហើយ។ លឿង និងបៃតង ជាសញ្ញាប្រាប់ថា មានអ្នកឈឺតិចៗ អំឡុង 8 ឬ 9ថ្ងៃហើយ។ ចំណែកភាសា​មាន អង់គ្លេស ចិន និងកូរ៉េ។
លើសពីនេះក៏មានវេបសាយក្នុងស្រុកមួយ បានបង្កើតមុនរួចទៅហើយ គឺ https://wuhanvirus.kr/ ជាភាសាកូរ៉េសុទ្ធ ដែលមានតួនាទីស្រដៀងគ្នានេះដែរ ដែលស្រង់ពីទិន្នន័យពីអង្គការសុខភាពពិភពលោក (WHO)៕

ខុង ជឺ​ កំពូលអ្នកប្រាជ្ញាចិននិយាយថា៖ រើស​មន្ត្រីយក​មក​ប្រើ ត្រូវ​មើលលើ​ចរិត ឫកពារ និងការប្រព្រឹត្ត​ជាមុនសិន ចាំមើល​សមត្ថភាព​តាម​ក្រោយ…

​នៅពេលស្ដេច​អាយ​កុង​ ទ្រង់​មានបន្ទូល​សួរ ​ខុង ជឺ អំពី​វិធី​ប្រើ​មនុស្ស​…​
ខុង ជឺ ក្រាបទូល​ថ្វាយយោបល់ថា​៖ «​សូម​ឱ្យ​តែងតាំង និង​ដំឡើង​បុណ្យស័ក្តិ​ឱ្យ​សមរម្យ​ទៅតាម​សមត្ថភាព ចូរប្រយ័ត្ន​មនុស្ស​អន់​ចរិត  ​ពូកែតែមាត់ ​ចូលចិត្ត​អួតអាង ពូកែ​និយាយ​បំប៉ោង បំផ្លើស និយាយ​ប៉ប៉ាច់ប៉ប៉ោច លោភលន់ មិនចេះ​ស្កប់ស្កល់…​។ ពួក​មនុស្ស​ទាំងនោះ និយាយបាន​ពិ​រោះ​ស្តាប់​ណាស់ ប៉ុន្តែ​ចរិត​ពិត​របស់គេ ​គឺជា​មនុស្ស​ធុន​អន់ អា​ត្មា​និយម ចូលចិត្ត​បង្ក​ឱ្យ​មានការ​បែកបាក់​ចលាចល​ក្នុងក្រុមការងារ​។ មនុស្ស​និយាយ​ច្រើន ​ចូលចិត្ត​អួតអាង គឺជា​មនុស្ស​កម្រិត​ទាប មានគំនិត​កេងប្រវ័ញ្ច បន្លែបន្លំ​ឥត​រើសមុខ​»​។​

ខុង ជឺ បន្តទៀតថា​៖ «​ប្រៀបដូចការជ្រើសរើសឈើមកធ្វើដង​ធ្នូដូច្នោះដែរ ​គេត្រូវ​មើល​ពីក្រយៅ​សាច់​ឈើ (​ថា​ត្រង់ ឬ​វៀច​) ជាមុនសិន រួចសឹមមើល​ពី​ភាពរឹងមាំ​តាម​ក្រោយ​។ សេះ ​ត្រូវ​មើល​ពី​ការ​ផ្សាំង​ជាមុន ​ថាតើ ​វា​សាំង​ និងអាចប្រើបានដល់​កម្រិតណា រួច​សឹមមើល​ពី​ភាព​សង្ហា និង​កម្លាំង​របស់​វា​។ រីឯ​នាម៉ឺន​មន្ត្រី ត្រូវ​មើល​ពី​គុណធម៌ និង​ការប្រព្រឹត្ត​ជាមុន រួច​សឹមពិនិត្យ​ពី​សមត្ថភាព​តាម​ក្រោយ​។ មនុស្ស​គ្មាន​គុណធម៌ មានតែ​សមត្ថភាព ច្រើនតែ​ជាម​នុស្ស​ដែល​គ្រោះថ្នាក់​បំផុត មិន​ខុសពី​ឆ្កែព្រៃ ឬ​ជា​ឆ្កែចចក​នោះទេ​ ចូរកុំ​ជ្រើសរើសយក​មក​ប្រើ​ជាដាច់ខាត​»៕

ខណៈដែលគ្មានព័ត៌មានលេចឮពីតារាសម្ដែងស្រី ឌុច លីដា នាងមានគូស្នេហ៍ ឬរៀបការពីពេលណាមកសោះ ស្រាប់តែតារាស្រីរាងតូចច្រឡឹងរូបនេះ បង្ហាញមុខកូនប្រុសដែលទើបសម្រាលបាន ៤ ថ្ងៃ ពិតជាភ្ញាក់ផ្អើលខ្លាំងទាំងក្នុងនិងក្រៅចង្កោមអ្នកសិល្បៈ។ ទាំងអ្នកសិល្បៈ និងមហាជនមួយចំនួនមានការងឿងឆ្ងល់ថា មិនដែលឮថារៀបការ! ហេតុអីបានជា ឌុច លីដា សម្រាលកូនប្រុសម្នាក់បែបនេះទៅវិញ? សង្ស័យមានប្ដីលួចលាក់ទេដឹង? សង្ស័យជាកូនចិញ្ចឹមទេដឹង?

​បើ​ផ្អែក​តាម​សារ​ជា​​ច្រើន​របស់​កញ្ញា​ ឌុច លីដា​ នៅ​ឯ​តាម​បណ្តាញ​​សង្គម​ហ្វេសប៊ុក​ និង​​​រូបភាពនៅលើបណ្ដាញសង្គមហ្វេសប៊ុក ព្រមទាំងអ្នកសិល្បៈដឹងពីជីវិតឯកជនរបស់នាង អាចឱ្យដឹងថា ​មួយ​រយៈពេល​​​ចុង​​ក្រោយ​នេះ លីដា គឺ​ពិត​ជា​​មាន​កូន​មែន​​ នាងរៀបរាប់ថា ៖«កូនគឺជាកម្លាំងចិត្ត ។ មានកូនរួច មិនអាចទៅណាបានព្រោះតែកូនដ៏គួរឲ្យស្រលាញ់នៅជាប់នឹងដើមទ្រូង »។ កញ្ញា ឌុច លីដា ក៏បានសរសេរ​​ទៀតថា​៖ «​​ថ្ងៃ​​​ហ្នឹង​​​​ម៉ាក់​ឲ្យ​អូន​លេង​​​ទឹក មុខ​ខ្លាំង​​ជាង​​​​មុន​ទៀត! អរគុណ​ដល់​​​អ្នក​ទាំង​​អស់់​គ្នា​​សម្រាប់​ការ​​ជូនពរ​អូន និង​​ម៉ាក់​អូន​​!​ »។

ប្រភពដដែរបន្តថា ដំណឹងមានកូនរបស់តារាស្រីរូបនេះបានលេចឡើងកាលពីខែមករាមកម៉្លេះ ប៉ុន្តែក៏មិនមានអ្នកជឿច្រើនដែរ ប៉ុន្តែក្រោយពីបង្ហាញមុខកូន និងឈ្មោះឡេង កិត្យាមណី នោះកាន់តែធ្វើឱ្យអ្នកក្នុងចង្កោមអ្នកសិល្បៈជឿជាក់ថាជាដំណឹងពិត។ បើផ្អែកមកលើបណ្តាញសង្គមរបស់តារាស្រីរូបនេះវិញ នាងបានបញ្ចេញរូបថតជាច្រើនសន្លឹកជាមួយកូនប្រុសដ៏គួរឱ្យស្រលាញ់ ជារៀងរាល់ថ្ងៃ។ មានរូបប៉ុនា្មនសន្លឹកនោះ គេឃើញតារាស្រី ទឹម រដ្ឋា បានកាន់ត្រកងឱបទ្រកូនប្រុសរបស់នាងដោយដៃទាំងពីទាំងរៀបរាប់ថា « Happy birthday to Mommy Lida Duch អូនសុំតំណាងឱ្យmommy ហើយព្រោះ mommy អត់បានរៀបខ្លួនទាន់ ម៉ាក់អ៊ំុ Tim Rotha ទៅសាប្រាយ ហាហាហាហា….»។

ទោះជាយ៉ាងណានៅមិនទាន់លេចចេញការរិះគន់ខ្លាំងៗនៅឡើយទេជុំវិញដំណឹងមានកូនមុនរៀបការរបស់តារាស្រីរូបនេះ និងនៅមិនទាន់មានការបកស្រាយបញ្ជាក់ព័ត៌មានច្បាស់ការពី ឌុច លីដា នៅឡើយទេ៕

តាមរយៈសារព័ត៌មានកម្សាន្ដ Naver របស់កូរ៉េខាងត្បូងដែលបានចុះផ្សាយនៅព្រឹកថ្ងៃទី ២៦ ខែកុម្ភៈ ឆ្នាំ ២០២០ នេះឱ្យដឹងថា តារាសម្ដែង និងតារាចម្រៀងខេប៉បជាច្រើនដួង បានរួមគ្នាបង្ហោះសារបំផុសឱ្យមានសកម្មភាពសប្បុរសធម៌ក្នុងការបរិច្ចាគ ថវិកា ម៉ាស និងវត្ថុដែលមានប្រយោជន៍ក្នុងការជួយដល់ការទប់ស្កត់ការរីករាលដាលឆ្លងវីរ៉ុស Covid-19 នៅទីក្រុង ដេកូ ប្រទេសកូរ៉េខាងត្បូង។ បន្ទាប់ពីបានឃើញនូវទឹកចិត្តតារាស្រី អុី យ៉ុងអេ បរិច្ចាគទឹកប្រាក់ ៥០ លានវ៉ុនដល់ក្រុមគ្រួសារអ្នកផ្ទុក Covid-19 គេក៏ឃើញមានតារាសម្ដែងជាច្រើដួងទៀត ចាប់ផ្ដើមធ្វើការបរិច្ចាគបន្តបន្ទាប់គ្នាជួយដល់ប្រជាជនកូរ៉េ។

នៅក្នុងនោះគេឃើញមានតារាសម្ដែងប្រុស ផាក សជុន (Park Seo Joon) បានប្រកាសបរិច្ចាគប្រាក់ចំនួន ១០០ លានវ៉ុន ជូនដល់មូលនិធិសហគមន៍សុខមាលភាពសង្គមប្រចាំទីក្រុង ដេកូ ដោយលោកអះអាងថា «ខ្ញុំចង់រួមចំណែករក្សាសុខភាពរបស់ជំងឺនៅក្នុងទីក្រុង ដេកូ បន្ទាប់ពីខ្ញុំបានឃើញទឹកចិត្តរបស់តារាសម្ដែងស្រី អុី យ៉ុងអេ »។

តារាសម្ដែងស្រី គីម កុអុឺន (Kim Go-Eun ) ក៏បានបរិច្ចាគប្រាក់ចំនួន ១០០ លានវ៉ុន ដើម្បីទិញម៉ាសការពារវីរ៉ុសសម្រាប់គ្រួសារជំងឺដែលកំពុងខ្វះខាតផងដែរ។

អ្នកនាងអំពាវនាវសកម្មភាពបន្ដ ដោយថេកទៅកាន់ពិធីករលោក គីម ថេក្យុន ( Kim Tae-kyun ) បានបរិច្ចាគម៉ាសអនាម័យចំនួន ១០,០០០ ម៉ាសសម្រាប់កុមារងាយរងគ្រោះ។

សូមជម្រាបថា ក៏មានតារាចម្រៀងខេប៉បជាច្រើនដួងទៀត​បានធ្វើការបរិច្ចាគទឹកអាកុលអនាម័យលាងសម្អាតដៃជាច្រើនដប ដើម្បីរួមចំណែកទប់ស្កាត់ការរីករាលដាលនៃវីរ៉ុស Covid-19 នៅក្នុងទីក្រុង ដេកូ ថែមទៀតផង៕

មា​នប្អូនៗ​ស្ត្រី​មេផ្ទះ​ថ្មោងថ្មី​ជាច្រើន​នាក់​ណាស់​ ដែល​តែងតែមាន​បញ្ហា​ក្នុង​រឿង​ចៀន​ ឬបំពង​ត្រី​ ឬសាច់​ផ្សេង​ៗ ដោយ​មិនដឹងជា​ត្រូវ​ធ្វើ​យ៉ាងណា​ដើម្បី​ឱ្យ​ឆ្អិន​ល្អ​ មិន​ជាប់​ខ្ទះ​ និង​មាន​ពណ៌​ស្អាត​គួរ​ឱ្យ​ចង់​ទទួលទាន​…។ ខាងក្រោម​នេះ​ គឺជា​ចំណេះ​ដឹង​ល្អ​ៗពាក់ព័ន្ធ​នឹង​ការ​ចៀន​ ឬបំពង​ត្រី​ ឬសាច់​ផ្សេង​ៗដែល​ស្ត្រី​មេផ្ទះ​យើង​បានដឹង​ហើយ​ ច្បាស់ជា​ចង់​សាកល្បង​ធ្វើតាម​ជាមិនខាន​។

មើម​ខ្ញី​ជួយ​ឱ្យ​ត្រី​ចៀន​មិន​ជាប់​ខ្ទះ​
នេះ​ជា​វិធី​មួយ​ដែល​នឹង​ជួយ​ឱ្យ​ពេល​ចុងភៅ​(មិនសូវ​)ចំណាន​ដូច​យើង​ប្រុង​ចៀន​ត្រី​ វិធី​តទៅ​នេះ​នឹង​មិន​ធ្វើ​ឱ្យ​ត្រី​ជាប់​ខ្ទះ​ឡើយ​។ វិធី​នោះ​គឺ​ ពេល​ចាក់​ខ្លាញ់​ ឬប្រេងឆា​ចូល​ទៅ​ក្នុង​ខ្ទះ​ និង​ទុក​ឱ្យ​ក្តៅ​ល្មម​ហើយ​ សូម​យក​មើម​ខ្ញី​ស្រស់​ៗមក​ហាន់​ជា​បន្ទះ​ស្តើង​ៗប្រមាណ​ជា​ 2-3បន្ទះ​ រួច​ដាក់​ចូល​ទៅ​ក្នុង​ខ្ទះ​ដែល​មាន​ខ្លាញ់​ក្តៅ​ស្រាប់ហើយ​នោះ​។ រង់ចាំ​ឱ្យ​បន្ទះ​ខ្ញី​នោះ​ឡើង​ក្រៀម​ហើយ​ សឹម​ដួស​ចេញ​ រួច​ដាក់​ត្រី​ចូល​ទៅ​ចៀន​ ​ត្រី​នោះ​នឹង​មិន​ជាប់​ខ្ទះ​ឡើយ​(ធានា​!)។
វីធីចៀនសាច់ត្រីឱ្យមានពណ៌លឿងស្អាត មិនបែក ឃើញហើយគួរឱ្យចង់ទទួលទាន
ស្ត្រី​មេផ្ទះ​ទាំងឡាយ​ប្រហែលជា​ធ្លាប់​ជួប​ច្រើនដង​មក​ហើយ​ នៅពេល​ដែល​ចង់​ពិសា​សាច់​ត្រី​ចៀន​ឱ្យ​ឆ្ងាញ់​មាត់​ម្តង​ តែ​បែរជា​ជួប​នូវ​សាច់​ត្រី​ចៀន​ដែល​បែក​ខ្ទេច​ ឬបាក់​ដាច់​ជា​បំណែ​កតូច​ៗ ឃើញ​ហើយ​មិន​ចង់ឱ្យ​ទទួលទាន​សោះ​… ថ្ងៃនេះ​ អ្នកគ្រូ​ ឆវី​ មាន​តិចនិក​ក្នុង​ការ​ចៀន​ត្រី​បែប​ថ្មី​ មក​ជម្រាប​ជូន​ ធានា​ថា​ សាច់​ត្រី​នឹង​នៅជា​ដុំ​មូល​ មិន​បែក​ និង​មាន​ពណ៌​គួរ​ឱ្យ​ចង់​ញ៉ាំ​ទៀតផង​ ។
– ដាក់ខ្លាញ់​ ឬប្រេង​ចៀន​នៅ​លើ​ភ្លើង​ឱ្យ​ក្តៅ​ខ្លាំង​ជាមុន​សិន​។
– ដាក់​សាច់​ត្រី​ចូល​ទៅ​ចៀន​ ដោយ​ដាក់​ខាង​ស្បែក​ចុះក្រោម​ ព្រោះ​កន្លែង​សាច់​ជាប់​ស្បែក​ក្រ​ឆ្អិន​ជាង​កន្លែង​សាច់​សុទ្ធ​។
– យក​វែក​ឆា​ ឬវែក​ឈើ​សម្រាប់​ចៀន​សាច់​សង្កត់​លើ​សាច់​ត្រី​តិច​ៗ ដើម្បី​កុំឱ្យ​សាច់​ត្រី​-ងឡើង​ និង​កុំ​ប្រែ​ចុះ​ ​ឡើង​ញឹកញាប់​ដោយ​មិន​ចាំបាច់​ ​គួរ​ទុក​ឱ្យ​ឆ្អិន​ម្តង​ម្ខាង​។
– ពេល​សាច់​ខាង​ស្បែក​នោះ​ឆ្អិន​ក្រៀម​ល្អ​ហើយ​ សឹម​ត្រឡប់​ឱ្យ​សាច់​ខាងលើ​ទៅ​នៅ​ខាងក្រោម​ម្តង​ និង​ចៀន​រហូត​ឡើង​ឆ្អិន​ក្រៀម​ សឹម​ស្រង់​ឡើង​ ទុក​ឱ្យ​ស្រក់​ខ្លាញ់​អស់​។
ចូរ​កុំ​ភ្លេច​ មុន​ពេល​ដាក់​ចៀន​ អ្នក​គួរ​រោយ​អំបិល​ពីលើ​សាច់​ត្រី​ឱ្យ​សព្វ​ ដើម្បី​ការពារ​កុំឱ្យ​សាច់​ត្រី​ជាប់​ខ្ទះ​។

គន្លឹះក្នុងការបំពងសាច់មាន់ ឱ្យស្រួយខាងក្រៅ ទន់ខាងក្នុង
យក​សាច់​មាន់​ដែល​លាង​ហើយ​ទៅ​ដាក់​សំដិល​ខ្យល់​ឱ្យ​ស្ងួត​។ បុក​មើម​ខ្ទឹមស​ និង​គ្រាប់​ម្រេច​ឱ្យ​បែក​ល្អិត​ចូលគ្នា​សព្វ​ ដាក់​អំបិល​ចូល​ ហើយ​យក​ទៅ​ប្រឡាក់​ផ្អាប់​ជាមួយ​សាច់​មាន់​ដែល​សំដិល​ស្ងួត​ហើយ​នោះ​ ​រួច​ទុកចោល​យ៉ាងតិច​ឱ្យ​បាន​កន្លះម៉ោង​។ បន្ទាប់ពី​នោះ​យក​មក​ដាក់​ក្នុង​ចាន​ ហើយ​យក​ទៅ​ដាក់​ចំហុយ​នៅក្នុង​ឡាំង​ស៊ឹង​(ឆ្នាំង​សម្រាប់​ចំហុយ​) ដែល​មាន​ទឹកពុះ​ជាស្រេច​(ដាំទឹក​ឱ្យ​ពុះ​សិន​ សឹម​ដាក់​សាច់​មាន់​ចូល​ចំហុយ​)។ ចំហុយ​រហូត​សាច់​មាន់​ឆ្អិន​ល្មម​ សឹម​យកចេញ​ពី​ក្នុង​ឡាំង​ស៊ឹង​ ទុក​ឱ្យ​ត្រជាក់​ និង​ដាក់​សំដិល​ខ្យល់​ឱ្យ​ស្ងួត​ រួចហើយ​យក​សាច់​មាន់​មក​ច្របល់​ជាមួយ​ និង​ម្សៅសាលី​(ឬម្សៅ​បំពង​ស្រួយ​ក៏បាន​) បន្ទាប់មក​យក​ទៅ​ជ្រលក់​នៅក្នុង​ទឹក​ស៊ុត​ក្រឡុក​ រួច​ទើប​យក​ទៅ​ចៀន​បំពង​នៅក្នុង​ខ្លាញ់​ដែល​កំពុង​ក្តៅ​ខ្លាំង​ ដោយ​ប្រើ​ភ្លើង​ខ្លាំង​ល្មម​។ ពេល​មើលឃើញ​ម្សៅ​ខាងក្រៅ​ឆ្អិន​ឡើងពណ៌​លឿង​ស្រួយ​ហើយ​ ចូរ​យក​ចង្កឹះ​ចាប់​ស្រង់​ឡើង​យក​មក​ទុក​ឱ្យ​ស្រក់​ខ្លាញ់​អស់​… តែ​ប៉ុណ្ណឹង​លោកអ្នក​នឹង​បាន​សាច់​មាន់​បំពង​ដែល​ស្រួយ​ក្រៅ​ ទន់​ក្នុង​ មក​ទទួលទាន​យ៉ាង​ឆ្ងាញ់មាត់​មិនខាន​៕