សង្គម និងសេដ្ឋកិច្ច - La Reine Media

បាញ់រះក្នុងរោងចក្រស្រាបៀរនៅអាមេរិក សម្លាប់មនុស្សយ៉ាងតិច5នាក់

ខ្មាន់កាំភ្លើងម្នាក់បានបាញ់សម្លាប់ខ្លួនឯង បន្ទាប់ពីបានបាញ់រះទៅលើមិត្តរួមការងារ នៅក្នុងរោងចក្រស្រាបៀរមួយ នៅក្នុងរដ្ឋ Winconsin សហរដ្ឋអាមេរិក បណ្ដាលឱ្យមានអ្នកស្លាប់យ៉ាងហោច5នាក់។

យោងតាមសារព័ត៌មាន RT ហេតុការណ៍នេះបានកើនឡើងកាលពីថ្ងៃទី26កុម្ភៈ(ម៉ោងនៅអាមេរិក) នៅក្នុងក្រុមហ៊ុនផលិតស្រាបៀរ Miller Coors ដែលស្ថិតក្នុងតំបន់ Milwaukee នៃរដ្ឋ Wisconsin។ បុគ្គលិកម្នាក់អាយុ51ឆ្នាំ ដែលទើបត្រូវបានបណ្ដេញចេញពីការងារ បានត្រឡប់មកកាន់ក្រុមហ៊ុនខាងលើ និងបានបាញ់រះទៅលើបុគ្គលិកក្រុមហ៊ុននេះ បណ្ដាលឱ្យអតីតមិត្តរួមការងារ5នាក់របស់ខ្មាន់កាំភ្លើង បាត់បង់ជីវិត។ បន្ទាប់ពីការបាញ់រះ ខ្មាន់កាំភ្លើងនេះក៏បានបាញ់សម្លាប់ខ្លួននៅនឹងកន្លែងកើតហេតុ។

កន្លែងកើតហេតុខាងលើ ស្ថិតនៅឯករិយាល័យកណ្ដាលរបស់ក្រុមហ៊ុន Miller Coors ដែលស្ថិតនៅតាមបណ្ដោយមហាវិថី West Highland។

មន្ត្រីនគរបាលជាន់ខ្ពស់នៃទីក្រុង Milwaukee លោក Afonso Morales បានឱ្យដឹងថា ខ្មាន់កាំភ្លើងវ័យ51ឆ្នាំរូបនេះ ត្រូវបានបណ្ដេញចេញពីក្រុមហ៊ុនក្នុងថ្ងៃកើតហេតុ មុនពេលមានការបាញ់រះនេះ។ បន្ទាប់ពីកើតហេតុភ្លាម កម្លាំងសមត្ថកិច្ចបានមកដល់កន្លែងកើតហេតុ និងចាប់ផ្ដើមស៊ើបអង្កេតករណីនេះ។

អភិបាលក្រុង Milwaukee លោក Tom Barrett បានថ្លែងថា “នេះគឺជាថ្ងៃដ៏អាក្រក់បំផុតសម្រាប់បុគ្គលិកនៅក្នុងក្រុមហ៊ុននេះ”។

ប្រធានាធិបតីអាមេរិក លោក Donald Trump មានប្រសាសន៍ថា ក្រៅពីអ្នកដែលបានបាត់បង់ជីវិត ក៏មានអ្នករងរបួសជាច្រើននាក់ នៅក្នុងហេតុការណ៍បាញ់រះនេះ។ លោក Trump ថ្លែងថា “ខ្ញុំសូមចូលរួមរំលែកទុក្ខដ៏ក្រៀមក្រំចំពោះអ្នករងគ្រោះ និងគ្រួសារសពនៅតំបន់ Milwaukee ក្នុងរដ្ឋ Wisconsin។ ឃាតករម្នាក់បានបាញ់រះក្នុងក្រុមហ៊ុនផលិតស្រាបៀរមួយ និងបានសម្លាប់មនុស្សចំនួន5នាក់ និងធ្វើឱ្យមនុស្សច្រើននាក់់ទៀតរងរបួស។ បេះដូងរបស់យើងបានប្រេះបែក ព្រោះតែការស្លាប់របស់ជនរងគ្រោះ និងទុក្ខក្រៀមក្រំរបស់ក្រុមគ្រួសារនៃសព”៕

ប្រភព៖ សារព័ត៌មានបរទេស

February 27, 2020

ភរិយាតារាចម្រៀង សួស សងវាចា ប្រកាសលក់ផ្ទះយកលុយព្យាបាលជំងឺស្វាមី

ថ្មីៗនេះ ដោយផ្អែកលើបណ្ដាញសង្គមហ្វេសប៊ុកអ្នកស្រី វ៉ាន់ សុភា ដែលគេស្គាល់ថាជាភរិយារបស់តារាចម្រៀងលោក សួស សងវាចា បានប្រកាសលក់ផ្ទះមួយល្វែងស្ថិតនៅសង្កាត់ចោមចៅទី៣ ខណ្ឌពោធិ៍សែនជ័យ ដោយសារតែគ្មានលទ្ធភាពព្យាបាលស្វាមីតទៅទៀត ។ ខណៈអ្នកស្រី វ៉ាន់ សុភាបង្ហើបពីការដាក់ផ្ទះ ដើម្បីដោះស្រាយជីវភាពមួយគ្រាសិនថា៖ «ធ្វើផ្ទះអស់លុយហើយគាត់ចាប់ធ្លាក់ខ្លួនឈឺហ្មង។ គាត់ឈឺ៥ឆ្នាំហើយ ចឹងបានខ្ញុំពិបាក តែបើលក់ផ្ទះដាច់ធូរហើ»។

ភរិយាតារាចម្រៀងជើងចាស់រូបនេះ ក៏បានអះអាងថា អ្នកស្រីមិនចង់ឱ្យបែកធ្លាយព័ត៌មាននេះទេ ប៉ុន្ដែដោយចិត្ដចង់ព្យាបាលស្វាមី និងទ្រទ្រង់ជីវភាពគ្រួសារ ទើបអ្នកស្រីសុខចិត្ដតារាចម្រៀងលោក សួស សងវិចា មានវ័យ៥៥ឆ្នាំ ហើយលោកបានធ្លាក់ខ្លួនពិកា ដោយរឹងដៃរឹងជើង និងស្លាប់មួយចំហៀងខ្លួនដោយសារជំងឺលើសឈាម។ បច្ចុប្បន្នកំពុងសម្រាកព្យាបាលនៅផ្ទះ ហើយត្រូវទៅជួបគ្រូពេទ្យជំនាញ នៃមន្ទីរពេលព្រះកុសៈមៈយ៉ាងទៀងទាត់ នៅរៀងរាល់មួយខែម្ដង។ ផ្ទះដែលប្រកាសលក់នេះដែរ មានទំហំទទឹង៧ម៉ែត្រកន្លះ និងបណ្ដោយជាង៤០ម៉ែត្រ ហើយមានបន្ទប់ចំនួន១៤។ អ្នកស្រីលក់ក្នុងតម្លៃ១៥ម៉ឺនដុល្លារ ហើយប្រាក់ដែលលក់បាននឹងត្រូវយកទៅបង់ផ្ដាច់ធនាគារ ព្យាបាលជំងឺស្វាមី និងពង្រីកមុខរបរលក់ចាប់ហួយនៅផ្សារស៊ិនជូរីដែលអ្នកស្រីបានជួលតូបគេលក់ដូរនោះ និងរកទិញផ្ទះរស់នៅឡើងវិញក្នុងតម្លៃប្រហែល៣ម៉ឺនដុល្លារ។

គួរបញ្ជាក់បន្ថែមថា លោក សួស សងវាចា កន្លងមកក៏ធ្លាប់ដង្ហើយអំពាវនាវសុំជំនួយពីសប្បុរសជនដែលជាអ្នកគាំទ្រចម្រៀងរបស់លោកផងដែរ តែជំនួយទាំងនោះមិនអាចទប់ទល់ការចំណាយលើការព្យាបាលជំងឺលោកបានឡើយ ៕

February 27, 2020

ប្រទេសបង់ក្លាដែស ថ្វាយព្រះមហាកិត្តិយសដល់ព្រះមហាវីរក្សត្រកម្ពុជា ដោយដាក់ឈ្មោះវិថីមួយនៅក្នុងទីក្រុងដាក្កា

វិថីមួយដែលមានឈ្មោះថា «Park Road» ស្ថិតនៅតំបន់ការទូត Baridhara ក្នុងទីក្រុងដាក្កា ប្រទេសបង់ក្លាដែស ត្រូវបានរដ្ឋាភិបាលនៃប្រទេសនេះប្តូរទៅជា «King Norodom Sihanouk Road» ហើយត្រូវបានសម្ពោធជាផ្លូវការកាលពីថ្ងៃពុធ ទី26 ខែកុម្ភៈ ឆ្នាំ2020។ នេះបើតាមការផ្សាយរបស់សារព័ត៌មាន Dhaka Tribune។

វិថី «King Norodom Sihanouk Road» ដែលដាក់តាមព្រះនាមរបស់ព្រះមហាវីរក្សត្រ សម្តេចព្រះបាទ នរោត្តម សីហនុ ព្រះបរមរតនកោដ្ឋនេះ គឺជាការឧទ្ទិសដល់ទំនាក់ទំនងដ៏ល្អរវាងប្រទេសទាំង2។

ដូចនឹងព្រះមហាវីរក្សត្រដ៏អមតៈនៃព្រះរាជាណាចក្រកម្ពុជាដែរ លោក Sheikh Mijubur Rahman គឺជាបិតាឯករាជ្យជាតិរបស់បង់ក្លាដែស «Father of Benali Nation»។ លោកគឺជាប្រធានាធិបតីដំបូងបង្អស់របស់ប្រទេសបង់ក្លាដែសនៅឆ្នាំ1971 ហើយបន្តកាន់តំណែងជានាយករដ្ឋមន្ត្រីរហូតដល់ថ្ងៃដែលលោកត្រូវបានគេធ្វើឃាតនៅថ្ងៃទី15 ខែសីហា ឆ្នាំ1975។

លោក Md Tajul Islam រដ្ឋមន្ត្រីរដ្ឋាភិបាលមូលដ្ឋាន អភិវឌ្ឍន៍ជនបទ និងកិច្ចសហប្រតិបត្តិការ (LGRAD) ជាអ្នកដែលបានប្រកាសដាក់ឱ្យប្រើប្រាស់ឈ្មោះវិថីថ្មី «King Norodom Sihanouk Road» មួយនេះនៅក្រុងដាក្កា ក្រោមការរៀបចំរបស់អង្គភាព Dhaka North City Corporation (DNCC)៕

February 27, 2020

មហាជនរិះគន់ព្រាត ដាក់មួយឃ្លា « Ok You Win! » រឿង នាយ តាក់ស៊ី បង្ហាញមុខភរិយាថ្មី និងទិញឡាន LEXUS RX330

ផ្អែកលើបណ្ដាញសង្គមហ្វេសប៊ុកនាព្រឹកថ្ងៃទី ២៧ ខែកុម្ភៈ ឆ្នាំ ២០២០ នេះ តារាកំប្លែងនាយ តាក់ស៊ី ខណៈនេះកំពុងរងការផ្ទុះការរិះគន់យ៉ាងចាសដៃពីសំណាក់ទស្សនិកជន បន្ទាប់ពីនាយបានប្រកាសបង្ហាញមុខមាត់គូស្នេហ៍ថ្មីដែលត្រូវចូលរោងការឆាប់ៗនេះ ព្រមជាមួយនឹងរថយន្តLEXUS RX330មានតម្លៃខ្ទង់រាប់ម៉ឺនដុល្លារយ៉ាងភ្ញាក់ផ្អើល។

ដំណឹងនៃការរៀបអាពាហ៍ពិពាហ៍ និងទិញរថយន្តរបស់តារាកំប្លែងចាស់វង្សានាយ តាក់ស៊ី នេះមិនត្រឹមតែមានការចាប់អារម្មណ៍ពីសំណាក់អ្នកគាំទ្រនោះទេ គឺភ្លាមៗនោះ ក៏ស្រាប់តែមានមតិរិះគន់ជាច្រើន បាននិងកំពុងបាញ់ចាក់ស្រោចមកលើតារាកំប្លែងរូបនេះជាមួយនឹងការហួសចិត្តខ្លាំងក្រោយពេលដឹងពីព័ត៌មាននេះ។ តាមរយៈវីដេអូសម្ភាសន៍ផ្ទាល់ថ្ងៃម្សិលមិញនេះ នាយ តាក់ស៊ី បានបញ្ជាក់ថា នាយនិងអនាគតភរិយាវ័យ៣៩ឆ្នាំ មានស្រុកកំណើតនៅក្រុងបាវិតត្រៀមរៀបការឆាប់ៗនេះហើយ។ ជាមួយគ្នានឹងប្រកាសបែបនេះនាយ តាក់ស៊ី ក៏បានបង្ហាញមុខភរិយាថ្មីព្រមជាមួយការប្រកាសទិញរថយន្តLEXUS RX330បង់រំលស់ ដែលត្រូវចំណាយក្នុង១ខែៗខ្ទង់ជិត៤០០ដុល្លារផងដែរ។យ៉ាងណាមិញព្រោះតែដំណឹងនេះ ទើបធ្វើឲ្យមហាជនមានអារម្មណ៍ហួចចិត្តខ្លាំងចំពោះនាយ តាក់ស៊ី ខណៈគ្រាធ្លាក់ខ្លួនឈឺលំបាកអំពាវនាវរកជំនួយពីសប្បុរសជន ហើយដល់ពេលជាសះស្បើយឡើងវិញ បែរជាមានលុយទិញឡាន LEXUS RX330និងប្រកាសការប្រពន្ធធ្វើព្រងើយ។

បើតាមមតិរិះគន់មហាជនមួយចំនួន បានលើកឡើងថា បើសិនជាការពិត សុទ្ធតែបួសខានមិនបានព្រោះមាននិស្ស័យជាមួយពុទ្ធសាសនា សឹកវិញព្រោះបញ្ហាសុខភាព ចុងក្រោយកាត់ចោលមិនបានកាមកិលេសតណ្ហា អស់និយាយអ្នកដែលធ្លាប់ផ្តល់ជំនួយមិនដឹងហួសចិត្តយ៉ាងណាទេ។ ខ្លះទៀតនិយាយថា អាត្មាមិនចង់និយាយរឿងពិភពគុននេះទេ តែហួសពេក! ម្តងលែងប្រពន្ធ ម្តងទឹកនោមផ្អែម ម្តងបួស ម្តងសុំជំនួយ ដល់ទ្រាំលែងបានយកប្រពន្ធទៀត….!អញ្ចឹងបានពាក្យចាស់លោកថា Ok You Win!។ មិនខុសគ្នានោះទេក៏មានការរិះគន់ថា ឈឺ លះបង់ប្រពន្ធកូន ទៅបួស ទេសនា ឈឺ សឹក ចូលសិល្បៈវិញ រៃអង្គាស ទិញឡានកូរ៉ូឡា ឡានខូច រៃអង្គាស ប្រកាសមុខគូស្នេហ៍ថ្មី បង់រំលស់ឡាន ៣៣០ ការឆាប់ៗ….។តាមរយៈការរិះគន់នេះនៅមិនទាន់មានប្រតិកម្មណាមួយពីសាមីខ្លួននាយ តាក់ស៊ី នៅឡើយទេ។

February 27, 2020

សញ្ញាអាក្រក់ចំពោះសុខភាព មិនមែនគ្រាន់តែជាសញ្ញាគម្រាមលេងៗទេ

មុននឹងកើតរឿងហេតុធំឡើង វាតែងតែមានសញ្ញាប្រកាសអាសន្នប្រាប់ជាមុនមិនខាន ប្រៀបដូចមុននឹងកើតមានព្យុះរលកស៊ូណាមិ គេតែងឃើញមានត្រីសមុទ្រទឹកជ្រៅហែលគេចពីសេចក្តីស្លាប់មកទើលើឆ្នេរខ្សាច់អុីចឹងដែរ ចំណែករោគចង្រៃ និងរោគប្លែកៗដែលកើតឡើង នឹងធ្វើឱ្យយើងភិតភ័យដូចគ្នានឹងគ្រានោះដែរ។ ការពិតទៅ វាមិនមែនជាការវាយលុកចូលមកមិនឱ្យយើងដឹងខ្លួននោះទេ តែដោយសារតែយើងបណ្តាយខ្លួនឱ្យក្លាយជាភ្នាក់ងារទទួលមេរោគដោយខ្លួនឯងទៅវិញទេ។

មុនកើតជំងឺចង្រៃនៅក្នុងរាងកាយយើង វាច្រើនតែមកសម្ងំពង្រីកខ្លួនយ៉ាងរីករាយនៅក្នុងខ្លួនយើងមុនមួយរយៈរួចមកហើយ មិនមែននៅស្ងៀមៗវាកើតឡើងតែម្តងនោះទេ ឧទាហរណ៍ដែលមើលឃើញច្បាស់នោះគឺ ជំងឺមហារីក ទំរាំតែរីកធំឡើងក្លាយជាដុំសាច់ដែលយើងស្ទាបដឹងនោះ វាត្រូវពង្រីកខ្លួនបង្កើតកូនចៅរាប់លានក្បាល រហូតចូលទៅនៅក្នុងសរសៃឈាមបានហើយ ទើបដុះចេញមកជាដុំសាច់ឱ្យយើងមើលឃើញនោះ។សញ្ញាប្រកាសអាសន្នទាំងនេះ លោកអ្នកអាចប្រើការសង្កេតមើលខ្លួនឯងក៏បាន មិនពិបាកឡើយ ដូចជា៖
1-លែងចង់ញ៉ាំអាហារ
2-ចុះស្គមខុសប្រក្រតី (ទម្ងន់ខ្លួនស្រកចុះជាង 2គីឡូក្រាមក្នុង 1ខែ)
3-ឆាប់មួម៉ៅ អារម្មណ៍ងាយប្រែប្រួល
4-ចុករួយតាមរាងកាយគួរឱ្យរំខាន
5-ងឿងក្បាលបែបមិនស្រឡះសោះ
6-មានអាការគ្រុនបែបក្តៅរងាៗ
7-មុខមាត់ត្រចៀកមើលទៅឡើងក្រហម ហាក់ដូចជាមានកម្តៅក្តៅគគុកនៅក្នុងរាងកាយ។

សរុបងាយៗថា បើនៅសុខៗមានភាពប្រែប្រួលដែលមិនធ្លាប់កើតមានកើតឡើង មិនថាតែចំពោះរាងកាយ ឬសូម្បីតែក្នុងអារម្មណ៍ និងផ្លូវចិត្តក៏ដោយនោះ សម្តែងថា ច្បាស់ជាមាន “ហេតុភេទ” មិនល្អអ្វីម្យ៉ាងកើតឡើងហើយ ដូច្នេះវាជាតួនាទីរបស់យើងហើយដែលត្រូវតែស្វែងរក “ជនពាល” នោះឱ្យឃើញយ៉ាងឆាប់រហ័ស កុំបណ្តោយឱ្យវានៅសម្ងំពង្រីកខ្លួនក្នុងរាងកាយរបស់យើងរហូតដល់កើតបញ្ហាធំលែងអាចព្យាបាលបានឱ្យសោះ៕

February 27, 2020

10ដំណាក់កាល ដើម្បីគ្រប់គ្រងទម្ងន់ខ្លួនបានយ៉ាងល្អ

1. កុំរំពឹង ឬជឿជាក់ទុកទាំងស្រុងនោះថា មានអាហារដ៏ពិសេសបំផុតដែលនឹងជួយដោះស្រាយបញ្ហាឱ្យអ្នកបាន តែត្រូវគិតថា វាជាការរួមផ្សំគ្នាជាមួយនឹងសកម្មភាពផ្សេងៗទៀត ហើយចម្លើយគឺស្ថិតនៅលើខ្លួនអ្នកផ្ទាល់។
2. នៅពេលណាដែលអ្នកជម្រុញខ្លួនឯងឱ្យទទួលទានអ្វីមួយតាមចិត្តចង់ អ្នកត្រូវសួរខ្លួនអ្នកថា “តើខ្ញុំឃ្លានទេ?” សូមចងចាំថា ភាពឃ្លានខ្លាំង ឬតិចក៏ចេញពីផ្នែកមួយនៃអារម្មណ៍របស់អ្នកដែរ។
3. ប្រសិនបើអ្នកមានអារម្មណ៍ថាហេវ អ្នកត្រូវព្យាយាមស្វែងរកជម្រើសដែលល្អបំផុតក្នុងការបំពេញឱ្យភាពហេវហត់នេះ។ សិក្សាបន្ថែមពីសារធាតុចិញ្ចឹមនៅក្នុងចំណីអាហារ រក្សារសជាតិរបស់វាឱ្យបានល្អ នឹងធ្វើឱ្យការគ្រប់គ្រងទម្ងន់របស់អ្នកកាន់តែមានភាពងាយស្រួលឡើង។
4. ចងចាំថា មិនមានទេអាហារល្អ ឬអាក្រក់ សម្រាប់អ្នកដែលចង់គ្រប់គ្រងទម្ងន់ដូចជារូបអ្នក ប៉ុន្តែវាអាស្រ័យលើចំនួនដែលអ្នកបានដាក់បញ្ចូលទៅក្នុងរាងកាយទៅវិញទេ។
5. កុំចាំដល់ពេលពោះឡើងតឹង មានអារម្មណ៍ថាឆ្អែតដល់កហើយទើបឈប់ញ៉ាំនោះ ត្រូវបញ្ឈប់ការញ៉ាំតាំងពីមុនពេលដែលអ្នកមានអារម្មណ៍ថាឆ្អែតមកម្លេ៉ះ បើទោះជាអាហារនៅសល់ក៏ដោយ។
6. បើមិនឃ្លានទេ សួរខ្លួនអ្នកទៅមើលថា តើអ្វីខ្លះដែលជាកត្តាជំរុញឱ្យអ្នកញ៉ាំ? បរិស្ថានជុំវិញ ឬអារម្មណ៍របស់អ្នក?
7. បើវាជាកត្តាដែលកើតចេញពីបរិស្ថានខាងក្រៅ ដូចជា ពេលវេលា ឬអាហារឆ្ងាញ់ដ៏សន្ធឹកសន្ធាប់… សួរខ្លួនអ្នកថា គួរធ្វើយ៉ាងណា ដើម្បីគ្រប់គ្រងខ្លួនអ្នកពីកត្តាជំរុញចិត្តឱ្យចង់ញ៉ាំមួយនេះ? ហើយចូរស្វែងរកអ្វីផ្សេងមកធ្វើជំនួសសិន រង់ចាំពេលហេវចាំញ៉ាំអាហារ…។
8. បើវាកើតចេញពីអារម្មណ៍របស់អ្នកវិញ អ្នកត្រូវសួរខ្លួនអ្នកថា តើមានវិធីណាដែលអាចដោះស្រាយបាន បើអ្នកតែងតែនឹកឃើញដល់ការញ៉ាំពេលមានអារម្មណ៍ធុញថប់? ដូច្នេះអ្នកគួររកវិធីបំបាត់ភាពធុញថប់ ដោយវិធីផ្សេងដូចជា ហាត់ប្រាណ គេងសម្រាក ឬស្តាប់ចំរៀងជាដើម…។
9. រស់នៅជាមួយនឹងបែបបទនៃជីវិតដែលមានតែភាពរស់រវើកដូចជា ការហាត់ប្រាណជាដើម។
10. កុំរំពឹងថា អ្វីៗវានឹងបានល្អឥតខ្ចោះ តែត្រូវសិក្សាបន្ថែមពីវិធីថ្មីៗ ហើយចំណាយពេលអនុវត្តវាផង៕

February 26, 2020

“ពិរ៉ាន់យ៉ា ត្រីស៊ីមនុស្ស” ពេជ្ឈឃាតនៃដងទន្លេ អាម៉ាហ្សូន

ត្រី “ពិរ៉ាន់យ៉ា” ល្បីឈ្មោះថា ជាត្រីដែលគ្រោះថ្នាក់បំផុតមួយប្រភេទរបស់ពិភពលោក រស់នៅរួមគ្នាជាហ្វូង និងសម្រុកចូលវាយប្រហារចំណីយ៉ាងលឿនរហ័សដោយធ្មេញដ៏មុតស្រួចរបស់វា។ អាចនិយាយបានថា ជាវិធីសម្លាប់គូសត្រូវ ឬចំណីអាហារយ៉ាងសាហាវ ក្នុងរយៈពេលតែមួយប៉ប្រិចភ្នែកប៉ុណ្ណោះ។

ត្រីពិរ៉ាន់យ៉ា (Piranha) មានឈ្មោះខាងវិទ្យាសាស្រ្តហៅថា Serrasalmas spp ជាត្រីទឹកសាបមួយក្រុមដែលត្រូវបានចាត់ចូលទៅក្នុងត្រកូលត្រី ស៊ើរ៉ាសាល់ម៉ាស់ (Serrasalmas) ដែលត្រីក្នុងក្រុមនេះមានទាំងអស់ 25ប្រភេទ តែមានតែ 4ប្រភេទប៉ុណ្ណោះដែលបង្កគ្រោះថ្នាក់ដល់មនុស្ស និងសត្វដទៃទៀត។
ត្រីពិរ៉ាន់យ៉ា ស៊ីសាច់ឆៅជាអាហារ ច្រើនតែរស់នៅរួមគ្នាជាហ្វូងខ្នាតធំ ប្រទះឃើញមានច្រើននៅក្នុងទន្លេអាម៉ាហ្សូន និងទន្លេជាច្រើនទៀតក្នុងទ្វីបអាមេរិកខាងត្បូង។ មានធ្មេញមុតស្រួចរាងត្រីកោណខ្នាតធំ ផ្នែកខាងក្បាលមានទំហំធំ មានសាច់ដុំបរិវេណថ្ពាល់រឹងមាំ សម្រាប់ប្រើខាំស៊ីសាច់របស់សត្វណាដែលធ្លាក់ចូលទៅជិតកន្លែងរស់នៅរបស់ពួកវាជាអាហារ ជាពិសេសសត្វដែលកំពុងភ្ញាក់ផ្អើល ឬស្ថិតក្នុងសភាវទន់ខ្សោយមានរបួស។ សំឡេងគ្រុងគ្រាំងរបស់ទឹកដែលខ្ទាតខ្ចាយ នឹងទាក់ទាញត្រីពិរ៉ាន់យ៉ាឱ្យចូលមកយ៉ាងឆាប់រហ័ស ដោយត្រីពិរ៉ាន់យ៉ានឹងប្រើធ្មេញដែលមុតស្រួចនោះខាំស៊ីសាច់របស់សត្វធំៗ រហូតធ្លុះទៅដល់ឆ្អឹងកងខ្នងបាន ត្រឹមតែមិនប៉ុន្មានវិនាទីប៉ុណ្ណោះ។ ភាពកាចសាហាវរបស់ត្រីពិរ៉ាន់យ៉ា ខុសប្លែកពីគ្នាទៅតាមប្រភេទនីមួយៗ តែគេជឿថា ត្រីពិរ៉ាន់យ៉ាគ្រប់ប្រភេទអាចហឹតចាប់ក្លិនឈាមនៅក្នុងទឹកបាន ដូចត្រីឆ្លាមដែរ។
ត្រីពិរ៉ាន់យ៉ាមានដងខ្លួនសំប៉ែត ពោះទូលាយ ស្រដៀងត្រីកន្រ្តប់របស់ខ្មែរយើងដែរ ប្រភេទនីមួយៗមានពណ៌អុចៗនៅលើដងខ្លួន ខុសប្លែកពីគ្នា ស្រកាបរិវេណខ្សែពោះមានរាងជាបន្លាៗ ស្រដៀងធ្មេញរណាចំនួន 24 – 31គ្រាប់ មានអាវុធសំខាន់គឺ “ធ្មេញ” ដែលមានតែមួយជួរជារាងត្រីកោណ និងមុតខ្លាំងណាស់ អាចខាំសាច់ឆៅឱ្យដាច់យ៉ាងងាយស្រួល បបូរមាត់ខាងក្រោមលយចេញមកវែងជាងបបូរមាត់ខាងលើ តែនៅពេលបិទមាត់ទៅ នឹងជិតឈឹងតែម្តង។

នៅក្នុងពេលដែលត្រីពិរ៉ាន់យ៉ាចាប់ផ្តើមបញ្ចេញអាការឃ្លាន បើគ្មានសត្វអ្វីធ្លាក់ចូលមកក្នុងបរិវេណដែលពួកវារស់នៅទេនោះ ត្រីពិរ៉ាន់យ៉ានឹងស៊ីត្រីផ្សេងទៀតជាអាហារ ដោយប្រើវិធីប្រមាញ់ចំណីដោយការស្ទុះចូលទៅខាំស៊ីយ៉ាង

រហ័ស និងចោមរោមខាំស៊ី រហូតសឹងតែគ្មាននៅសល់បំណែក ទើបពួកវាទទួលបានរហស្សនាមថា “ពេជ្ឈឃាតនៃដងទន្លេទឹកសាប” យ៉ាងណាក៏ដោយ ទោះជាល្បីឈ្មោះថា ជាត្រីដ៏សាហាវ មែនក៏ដោយ តែត្រីពិរ៉ាន់យ៉ាក៏ជាត្រីដែលប៉ឹនភ្ញាក់ផ្អើលណាស់ដែរ ដូច្នេះហើយទើបពួកវាត្រូវរស់នៅជាហ្វូងធំៗ ដើម្បីនឹងបានវាយសម្រុកទៅលើចំណី តែជាញឹកញាប់ណាស់ដែលវាក៏ក្លាយជាចំណីរបស់សត្វដែលមានទំហំធំជាង ដូចជា ត្រីរ៉ស់យក្សអាម៉ាហ្សូន ឬត្រីអៈរ៉ាផៃម៉ា ត្រីឡូម៉ាទន្លេ និងបក្សីស៊ីត្រីជាអាហារច្រើនប្រភេទទៀត រួមទាំងមនុស្សនៅក្នុងតំបន់ដែលនិយមហូបត្រីពិរ៉ាន់យ៉ាជាអាហារផងដែរ។

សម្រាប់ត្រីពិរ៉ាន់យ៉ា ប្រភេទដែលមានឈ្មោះល្បីថា កាចសាហាវខ្លាំងបំផុតនោះគឺ ត្រីពិរ៉ាន់យ៉ាក្រហម ឬពិរ៉ាន់យ៉ាពោះក្រហម ស្រកាមានខ្នាតតូចៗ មានពណ៌ក្រហមលាយផ្កាឈូក ចាំងផ្លេកៗដូចកាកពេជ្រ ទំហំខ្លួនធំពេញទំហឹងប្រមាណជា 33សង់ទីម៉ែត្រ(ជាង 3តឹក) ទម្ងន់ប្រមាណជា 3.5គីឡូក្រាម ថែមទាំងមានអាយុវែងទៀតផង ព្រោះអាចរស់នៅលើគោកដោយគ្មានត្រូវទឹកសោះបានយូរដល់ទៅ 2ម៉ោងឯណោះ៕

February 26, 2020

អ្នកនាង យុគ ចិន្ដា ៖ « ចង់ឱ្យកូនស្រីរឹងមាំនៅលើវិថីសិល្បៈ »

ជួបសម្ភាសន៍ជាមួយអ្នកសារព័ត៌មានឡារ៉ែន អ្នកនាង យុគ ចិន្ដា បានប្រាប់ថា អ្នកនាងនឹងឱ្យកូនស្រីស្នងតំណែងជាពិធីការិនី បើទោះបីជាមិនមានឈ្មោះល្បីល្បាញដូចអ្នកនាងក៏ដោយ ក៏តែត្រូវឱ្យកូនស្រីប្រឹងប្រែងកសាងឈ្មោះបោះសំឡេងឱ្យខ្លាំងជាងអ្នកនាង ឬជោគជ័យឱ្យខ្លាំងជាងអ្នកនាងនៅលើវិថីសិល្បៈ ។ បទសម្ភាសន៍នេះ ត្រូវបានអ្នកនាង យុគ ចិន្ដា ប្រកាសនៅកាលពីថ្ងៃទី ២៣ ខែកុម្ភៈ ឆ្នាំ ២០២០ ជាគ្រាដែលកូនស្រីអ្នកនាងធ្វើជាពិធីការិនីក្នុងកម្មប្រគំតន្ត្រីរបស់សាលា ស្រណោះតន្ត្រី ជាលើកដំបូង។

អ្នកនាង យុគ ចិន្តា ប្រាប់កូនស្រីរបស់ខ្លួនមានទេពកោសល្យគ្រប់គ្រាន់ក្នុងនាមជាតារាសិល្បៈមួយរូប ដែលអាចឈោងឆាប់អាជីពពិធិនីដូចខ្លួនបាន ដោយសារតែនាងមានដុងសិល្បៈ ដោយចេះតែទាំងច្រៀង តន្ត្រី ភាសា និងរបាំ អ្វីដែលសំខាន់គឺបានវោហារទៀតផង។ ដោយអ្នកនាងបញ្ជាក់ថា កូនស្រីថែមទាំងមានកំប្លុកកំប្លែងចង់ល្អជាងអ្នកនាងផងដែរ។ អ្នកនាងបញ្ជាក់ថាអត់បានបង្ខំកូនស្រីឱ្យហក់ចាប់សិល្បៈដូចខ្លួននោះទេ តែបណ្ដាលមកពីកូនមានដុងគ្រប់គ្រាន់ ហើយអ្នកនាងក៏ចង់ជំរុញឱ្យដល់គោលដៅ ទើបអ្នកនាងត្រូវតែបណ្ដុះបណ្ដាល។

អ្នកនាងកូនស្រីរបស់ខ្លួនអាចលេងព្យាណូបានស្ទាត់ ចេះរាំរបាំបុរាណខ្មែរជាង ១០ ប្រភេទខុសៗគ្នា និងរបាំប៉ាឡេ និងចេះច្រៀងអុបប៉េរ៉ា បានស្ទាត់ជំនាញ ដោយក្រៅពីសិក្សាភាសាខ្មែរ កូនអ្នកនាងក៏មានសិក្សាចិន និងអង់គ្លេសស្របគ្នាផងដែរ។ ទើបអ្នកនាងយល់ថា កូនស្រីរបស់ខ្លួនបានត្រូវបានបណ្ដុះឱ្យក្លាយជាពិធីការិនី និយាយពាក្យពេចន៍គឺពិតជាច្បាស់ៗល្អ មិនមែននិយាយតាមសម្ដីនិងពាក្យប្រើប្រាស់ប្រចាំថ្ងៃនោះទេ។

កូនស្រីអ្នកនាងមានឈ្មោះ យុគ ដាពេជ្រ ហៅ អម ក៏បានបង្ហើបប្រាប់ថា តាំងពីដើមដល់ធំ ម្ដាយរបស់ខ្លួនមិនដែលបង្ខំឱ្យនាងរៀនភ្លេង ហាត់ច្រៀង និងសិក្សាទម្រង់សិល្បៈនោះទេ គឺនាងជាអ្នកស្នើសុំទាំងអស់។ ដោយឡែកសម្រាប់អាជីពពិធីការិនី ដ្បិតថានៅពេលនេះ នាងមិនទាន់មានទំនុកចិត្តថាអាចធ្វើបាន ប៉ុន្តែផ្អែកតាមការសន្សំសមត្ថភាព និងការជ្រោមជ្រែងរបស់ម្ដាយ នាងបញ្ជាក់ថាខ្លួនពិតជាអាចធ្វើបាន។ នៅសល់រយៈពេល ៣ ឆ្នាំទៀត នាងនឹងបញ្ចប់ការសិក្សានៅប្រទេសកម្ពុជា ហើយគ្រោងទៅសិក្សានៅបរទេស ដែលជាឱកាសល្អសម្រាប់នាងក្នុងការនាំវប្បធម៌ខ្មែរទៅកាន់ពិភពលោកបានស្គាល់ តាមរយៈការតាំងចិត្តដ៏ខ្ពស់របស់នាង ។ នាងថា នាងនឹងធ្វើជាគ្រូបង្រៀនផ្នែកសិល្បៈខ្មែរ ទៅកាន់កូនខ្មែរដែលរស់នៅបរទេស៕

February 26, 2020

Samsung នៅតែខ្លាំង លក់ស្មាតហ្វូនជាប់លេខ1 ទៀតហើយ

យោងតាមប្រភព he Korea Herald ដែលបានស្រង់ទិន្នន័យពី Counterpiont បានបញ្ចេញឱ្យដឹងថា នៅកូរ៉េខាងត្បូង Samsung គ្រប់គ្រងចំណែកទីផ្សារបាន 57% (Market share) នៅត្រីមាសទី4 ឆ្នាំ2019។ បើធៀបនឹងត្រីមាស3 ក្នុងឆ្នាំដូចគ្នាហ្នឹង ភាគរយបានធ្លាក់ចុះចំនួន 14%។

ស្មាតហ្វូនលក់ដាច់បំផុត 7 ម៉ូដែលផ្សេងគ្នា ក្នុងចំណោម 10ម៉ូដែលរបស់ Samsung ស៊េរីដែលឈរលើគេ គឺ Galaxy Note 10+ មាន 5G ពោលគឺ អ្នកប្រើប្រាស់នៅកូរ៉េខាងត្បូងបានផ្តល់ទំនុកចិត្តទិញយ៉ាងសន្ធឹក។

ចំណែកឯក្រុមហ៊ុន Apple ឈរនៅលេខ2 លើទិន្នន័យដូចខាងលើ គឺត្រឹម 28%។ ស្មាតហ្វូនរបស់ Apple ដែលឈរលេខ2 នោះគឺ iPhone 11 Seris-11 Pro, 11 Pro Max (ស្មាតហ្វូនលក់ដាច់បំផុតលំដាប់ទី2) និងទី3 គឺ Note 10 5G។ អ្វីដែលគួរចាប់អារម្មណ៍នោះគឺ LG ដែលជាម៉ាកល្បីល្បាញយូរមកហើយនៅស្រុកកំណើតរបស់ខ្លួន កាន់កាប់បាន 15% នៃចំណែកទីផ្សារ បើធៀបនឹងផលិតផលកូរ៉េផ្សេងទៀត កើនឡើង 1.6% ទោះបីជាបច្ចុប្បន្នប្រឈមនឹងមេរោគ COVID-19 ក៏ដោយ៕

February 26, 2020

អ្នកនាំពាក្យក្រសួងសុខាភិបាល៖ ត្រូវមានការប្រុងប្រយ័ត្ន និងស្គាល់ពីវិធីបង្ការ ការឆ្លងមេរោគ

អ្នកនាំពាក្យក្រសួងសុខាភិបាលបានបង្ហាញពីរបៀបនៃការបង្ការការចម្លងមេរោគតាមរយៈខ្យល់ ដោយបានណែនាំដល់បងប្អូនប្រជាពលរដ្ឋ ត្រូវមានការប្រុងប្រយ័ត្នដើម្បីចៀសវាងការចម្លង ជំងឺពីមនុស្សម្នាក់ទៅមនុស្សម្នាក់ទៀត។ នេះបើតាមការធ្វើបាឋកថា ស្ដីពីចំណេះដឹង និងស្វែងយល់ពីសកម្មភាពឆ្លើយតប របស់ក្រសួងសុខាភិបាលចំពោះការវិវឌ្ឍរបស់មេរោគកូវីដ-19 កាលពីរសៀលថ្ងៃទី25 ខែកុម្ភៈ ម្សិលមិញ នៅទីស្ដីការក្រសួងសុខាភិបាល។

ឯកឧត្ដមវេជ្ជណ្ឌិត លី សូវ៉ាន់ អ្នកនាំពាក្យ និងជាប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានបញ្ជាក់ថា៖« ការឆ្លងមេរោគធំៗ គឺមាន2 ការឆ្លងតាមខ្យល់អាកាស និងឆ្លងតាមដំណក់លម្អងតូចៗ ដូចជាការកណ្តាស់ និងក្អកជាដើម។ ឯកឧត្ដមបានបន្ដថា ជំងឺដែលឆ្លងតាមខ្យល់មានមេរោគ ដូចជាមេរោគរបេង មេរោគស្អូច កញ្ជ្រឹល អុតស្វាយជាដើម»។

ឯកឧត្ដមមានប្រសាសន៍ថា៖« មេរោគឆ្លងតាមខ្យល់នេះ ទោះបីជាពាក់ម៉ាស់យ៉ាងណា ក៏មិនអាចការពារបានដែរ គឺវាអាចច្រោះចូលតាមប្រហោង តាមម៉ាស់ធំជាង ប៉ុន្តែអាចការពារបានទាល់តែពាក់ម៉ាស់របស់ពេទ្យ ទើបបានទប់ជាប់។ ចំពោះការឆ្លងតាមដំណក់លម្អងទឹកតូចៗវិញ មានន័យថា នៅពេលដំណក់ទឹកតូចៗ ចេញពីអ្នកជំងឺដល់កន្លែងណា មេរោគដល់ទីនោះ ជាក់ស្តែង រួមមានដូចជាជំងឺខាន់ស្លាក់ ជំងឺផ្តាសាយ និងវីរុសកូរ៉ូណា(COVID-19)នេះ ជាដើម»។ ឯកឧត្ដមបានឱ្យដឹងថា៖« ពេលដំណក់ទឹកតូចៗដល់ទីណា មេរោគទៅដល់ទីនោះ ដំណក់ទឹកហ្នឹង កើតមកពីការក្អក និងកណ្តាស់។ បើតាមការសិក្សា ចំពោះកណ្តាស់ និងក្អកនេះ អាចមានចម្ងាយជិត 1ម៉ែត្រ ហើយនៅពេលក្អកកន្លែងណា ទឹកនឹងនៅទីនោះ។ អ៊ីចឹងបានគេឱ្យពាក់ម៉ាស់ ដើម្បីចៀសវាងការឆ្លង ដែលអ្នកជំងឺគួរតែពាក់ម៉ាស់ ដើម្បីទប់ស្កាត់នៅពេលកណ្តាស់ ហើយ ឆ្លងទៅគេ»។

ឯកឧត្ដមបានបញ្ជាក់ថា៖« សម្រាប់អ្នកជាវិញ មិនចាំបាច់ពាក់ម៉ាស់ទេ ប៉ុន្តែត្រូវឧស្សាហ៍ លាងដៃនឹងសាប៊ូ ព្រោះថា អ្នកជា ឧស្សាហ៍ប៉ះពាល់នឹងទីកន្លែងផ្សេងៗ ដែលជាហេតុនាំឱ្យមេរោគឆាប់ឆ្លងនៅពេលយកដៃទៅញីច្រមុះ មាត់ ឬភ្នែក»។

ឯកឧត្ដមបានថ្លែងបញ្ជាក់ទៀតថា៖« អ្នកជា ឬមនុស្សទាំងឡាយ ដើម្បីទប់ស្កាត់ការឆ្លងជំងឺ ត្រូវកាត់បន្ថយការយកដៃទៅប៉ះពាល់ផ្ទៃមុខជាអតិបរមាកាន់តែល្អ ហើយយើងបង្ហាញថ្ងៃនេះមិនសម្រាប់តែមេរោគកូរ៉ូណាទេ មេរោគផ្សេងទៀតក៏ទប់ស្កាត់ការឆ្លងដែរ»។

ឯកឧត្ដមវេជ្ជបណ្ឌិត លី សូវ៉ាន់ បានលើកឡើងថា ដៃប្រៀបដូចជាវត្ថុមួយចំនួនដែលអាចចម្លងជំងឺ ឬអាចនិយាយថា ដៃបានប៉ះពាល់ទីកន្លែងជាច្រើន ដែលជាហេតុនាំឱ្យមេរោគឆាប់ឆ្លង។ ដៃយើងជាអ្នកចម្លង ហើយបណ្តាលឱ្យមានអាលាក់ហ្ស៊ី កើតលើផ្ទៃមុខ ព្រោះថា ដៃមានសារធាតុច្រើន ដូចជាមេរោគដែលអាចចម្លងបាន។

ឯកឧត្ដមបានលើកឡើងទៀតថា ក្រសួងសុខាភិបាលមិនបានបង្ខំឱ្យមានការពាក់ម៉ាស់នោះទេ ប៉ុន្តែការពាក់ម៉ាស់ គឺនៅពេលចាំបាច់ ដូចជានៅតំបន់មួយចំនួនដែលមានមនុស្សច្រើន ឬការទៅសួរសុខទុក្ខអ្នកជំងឺ នៅមន្ទីរពេទ្យជាដើម។

សូមបញ្ជាក់ថា ឯកឧត្តម លី សូវ៉ាន់ ប្រធាននាយកដ្ឋានប្រយុទ្ធជំងឺឆ្លង និងជាអ្នកនាំពាក្យក្រសួងសុខាភិបាលបានឱ្យដឹងថា(គិតម៉ោង 7យប់ ថ្ងៃទី24 ខែកុម្ភ: ឆ្នាំ2020) កម្ពុជាពុំទាន់រកឃើញ ករណីអ្នកឆ្លងមេរោគវីរុសកូរ៉ូណាប្រភេទថ្មី(Covid-19) បន្ថែមទៀតទេ តែលទ្ធភាពរកឃើញករណី អាចនឹងកើតមាន ពីព្រោះជំងឺនេះនៅតែបន្តរាតត្បាតនៅឡើយ នៅទីក្រុង Wuhan ប្រទេសចិន និងមានការឆ្លងជំងឺនេះទៅប្រទេសដទៃ។

បើទោះជាកម្ពុជា ពុំទាន់មានករណីថ្មីនៃវីរុសកូរ៉ូណាថ្មីនេះក្ដី ក៏ក្រុមឆ្លើយតបបន្ទាន់ ក៏ដូចជាក្រុមគ្រូពេទ្យតាមព្រំដែន (មន្រ្តីចត្តាឡីស័ក) បាននិងកំពុងឃ្លាំមើលអ្នកដំណើរចេញចូលគ្រប់ច្រកតាមព្រំដែនគោកទាំងអស់ ដូចជាប្រទេសថៃ ឡាវ វៀតណាម ផ្លូវសមុទ្រ និងអាកាសយានដ្ឋានអន្តរជាតិទាំង3 គឺភ្នំពេញ សៀមរាប ក្រុងព្រះសីហនុ តាមរយ:ម៉ាស៊ីនស្ទង់កម្ដៅ និងពិនិត្យសុខភាព។

ឯកឧត្តម បានបន្តថា «យើងមានមន្ទីរពិសោធន៍នៃវិទ្យាស្ថានប៉ាស្ទ័រកម្ពុជា ដែលដំណើរការទាំងថ្ងៃទាំងយប់ ធ្វើតេស្តវត្ថុវិភាគ ដែលបានផ្ញើមកពីទូទាំងប្រទេស និងយើងត្រៀមមន្ទីរពិសោធន៍ 2ទៀតក្នុងក្រសួងសុខាភិបាលដើម្បីជំនួយក្នុងការធ្វើតេស្តបន្ថែមទៀត។

គួររំឭកថា កន្លងមក កម្ពុជាមានករណីតែ 1គត់ពាក់ព័ន្ធនឹងវីរុសកូរ៉ូណា គឺបុរសជនជាតិចិនម្នាក់អាយុ 60ឆ្នាំ ដែលធ្វើដំណើរពីទីក្រុង Wuhan មកលេងខេត្តព្រះសីហនុ តែត្រូវបានព្យាបាលជាសះស្បើយ និងត្រឡប់ទៅស្រុកកំណើតវិញហើយ៕

February 26, 2020

Category: សង្គម និងសេដ្ឋកិច្ច