Category: សង្គម និងសេដ្ឋកិច្ច

មន្ត្រីជាន់ខ្ពស់ AFI នឹងជួយ គាំទ្រទាំងថវិកា និងបច្ចេកទេស ដើម្បីពង្រឹងខ្សែចង្វាក់ តម្លៃផលិតកម្មកម្ពុជា
នាយិកាថ្មីដែលទើបត្រូវបានតែងតាំងនៃទីភ្នាក់ងារបារាំងសម្រាប់ការអភិវឌ្ឍ ឬ AFD ថ្មីប្រចាំកម្ពុជា បានលើកឡើងថា អង្គការ AFD មានឆន្ទៈយ៉ាងមុតមាំក្នុងការឧបត្ថម្ភគាំទ្រទាំងបច្ចេកទេស និងថវិកាដើម្បីអភិវឌ្ឍន៍វិស័យកសិកម្មកម្ពុជា។
នាយិកានៃទីភ្នាក់ងារបារាំងសម្រាប់ការអភិវឌ្ឍ ឬ AFD ប្រចាំកម្ពុជាដែលទើបត្រូវបានតែងតាំងថ្មីបានថ្លែងបែបនេះនៅក្នុងឱកាសជួបសម្តែងការគួរសម និងពិភាក្សាការងារទាក់ទងនឹងកិច្ចសហប្រតិបត្តិការក្នុងវិស័យកសិកម្មនាពេលកន្លងមក ជាមួយឯកឧត្ដម វេង សាខុន រដ្ឋមន្ត្រីក្រសួងកសិកម្ម ដោយបានសម្ដែងការគាំទ្រក្នុងការរៀបចំគម្រោងអភិវឌ្ឍន៍វិស័យកសិកម្មថ្មី ដែលផ្តោតទៅលើដំណាំរំពឹងទឹកភ្លៀងកាលពីពេលថ្មីៗនេះ។ ក្នុងឱកាសនោះ លោកស្រី Ophelie BOURHIS នាយិកាថ្មីដែលទើបត្រូវបានតែងតាំងនៃទីភ្នាក់ងារ
បាំរាំងសម្រាប់ការអភិវឌ្ឍន៍ (AFD) ថ្មីប្រចាំកម្ពុជាបានលើកឡើងថា AFI នឹងជួយគាំទ្រទាំងថវិកា និងបច្ចេកទេស ដើម្បីពង្រឹងខ្សែចង្វាក់តម្លៃផលិតកម្មកម្ពុជា តាមរយៈការកសាងផែនការ និងគោលនយោបាយអភិវឌ្ឍន៍វិស័យកសិកម្មពាក់ព័ន្ធនឹងខ្សែចង្វាក់តម្លៃផលិតកម្ម និងតម្លៃបន្ថែមលើផលិតកម្មស្រូវ និងបន្លែ ការកែប្រែគុណភាពដី និងកៅស៊ូគ្រួសារកម្ពុជាឱ្យមាននិរន្តរភាព។ លោកស្រីអះអាងថា តាមរយៈកិច្ចគ្រាំទ្រនេះ នឹងជួយបង្កើតការងារ បង្កើនប្រាក់ចំណូល និងកាត់បន្ថយភាពក្រីក្រដល់កសិករនៅក្នុងប្រទេសកម្ពុជាផងដែរ។
នាយិកា AFD រូបនេះ ក៏បានថ្លែងអំណរគុណដល់ក្រសួងកសិកម្ម ដែលតែងតែផ្តល់កិច្ចសហការយ៉ាងជិតស្និទ្ធដល់ក្រុមការងាររបស់អង្គការ AFD ដែលកិច្ចសហការនេះហើយ បានផ្តល់ជាជំនឿទុកចិត្តមកដល់អង្គការ AFD ដើម្បីបន្តការគាំទ្រ និងរៀបចំគម្រោងអភិវឌ្ឍន៍វិស័យកសិកម្មថ្មីដែលផ្តោតទៅលើដំណាំរំពឹងទឹកភ្លៀង។
ពាក៉ព័ន្ធនឹងការលើកឡើងនេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏បានលើកឡើងដែរថា វិស័យកសិកម្ម បានដើរតួនាទីយ៉ាងសំខាន់ក្នុងការធានាសន្តិសុខស្បៀងជំរុញកំណើនសេដ្ឋកិច្ចតាមរយៈការនាំចេញ លើកកម្ពស់ផលិតកម្មក្នុងស្រុក បង្កើតការងារ បង្កើនប្រាក់ចំណូល និងកាត់បន្ថយភាពក្រីក្រនៅក្នុងប្រទេស។
ឯកឧត្តមរដ្ឋមន្ត្រីបានបន្តទៀតថា ដើម្បីដើរឱ្យទាន់បរិបទនៃកំណើនសេដ្ឋកិច្ច និងឈានឆ្ពោះទៅសម្រេចចក្ខុវិស័យរបស់រាជរដ្ឋាភិបាលនាឆ្នាំ2030 ការអភិវឌ្ឍវិស័យកសិកម្មត្រូវផ្ចង់ផ្តោតទៅលើការអភិវឌ្ឍប្រកបដោយចីរភាព និងនិរន្តរភាព និងបរិយាប័ន្ន តាមរយ:ការអនុវត្តបច្ចេកវិទ្យាកសិកម្មទំនើបទាន់សម័យសមស្រប អនុវត្ត និងបំពេញខ្សែចង្វាក់ផលិតកម្ម និងតម្លៃបន្ថែម អនុវត្តផែនការផលិតកម្មច្បាស់លាស់ និងផលិតកម្មកសិកម្មតាមកិច្ចសន្យា ធានានិរន្តរភាពក្នុងការផ្គត់ផ្គង់ គុណភាព អនាម័យ ភូតគាមអនាម័យ និងការប្រកួតប្រជែង។
មិនតែប៉ុណ្ណោះ ឯកឧត្តមថា ដៃគូអភិវឌ្ឍន៍នានាក៏ត្រូវគិតគូរ និងពិនិត្យឡើងវិញនូវរាល់សកម្មភាពគម្រោងដែលបានអនុវត្តកន្លងមក ធ្វើយ៉ាងណាតម្រង់ទិសឱ្យចំគោលដៅរបស់ក្រសួង ក៏ដូចជារបស់រាជរដ្ឋាភិបាល គឺកំណើនសេដ្ឋកិច្ចជាតិ និងសេដ្ឋកិច្ចគ្រួសារ។
ដោយឡែក ឯកឧត្តមរដ្ឋមន្ត្រីក៏បានណែនាំដល់អង្គការ AFD និងក្រុមការងារពិនិត្យពិចារណាលទ្ធភាពជួយផ្តល់ការគាំទ្រលើការពិសោធ និងផលិតពូជ បច្ចេកទេសដាំដុះ និងប្រមូលផល ឃ្លាំងស្តុកឡសម្ងួតលើដំណាំមួយចំនួនទៀត ដូចជាដំណាំពោត ដំឡូងមី ស្វាយ និងស្វាយចន្ទីដែលកំពុងមានសក្តានុពលនៅលើទីផ្សារក្នុង និងក្រៅស្រុក ហើយបានផ្តល់ចំណូលយ៉ាងល្អជូនប្រជាកសិករ។ ទន្ទឹមនឹងនេះ ជំរុញការរៀបចំចងក្រងសហគមន៍ផលិតកម្ម ដើម្បីអនុវត្តផលិតកម្មកសិកម្មតាមកិច្ចសន្យា ប្រយោជន៍ដល់ការធានាការផ្គត់ផ្គង់ទាំងបរិមាណ គុណភាព និងស្ថិរភាពតម្លៃ និងជាពិសេសផែនការមេ និងប្រព័ន្ធធារាសាស្ត្រស្រោចស្រពដែលផ្តោតលើដំណាំទាំងនេះជាសំខាន់។
តបតាមការលើកឡើងរបស់ឯកឧត្តមរដ្ឋមន្ត្រី លោកស្រី Ophelie BOURHIS នាយិកាថ្មីដែលទើបត្រូវបានតែងតាំងនៃទីភ្នាក់ងារបារាំងសម្រាប់ការអភិវឌ្ឍ (AFD) ប្រចាំកម្ពុជា និងក្រុមការងារ បានឯកភាពចំពោះការលើកឡើងរបស់ឯកឧត្តមរដ្ឋមន្ត្រី ហើយនឹងយកសំណើទាំងនោះទៅពិចារណាបន្ថែម រួចដាក់បញ្ចូលក្នុងគម្រោងថ្មីដែលនឹងត្រូវរៀបចំដោយអង្គការ AFD នាពេលឆាប់ៗខាងមុខនេះ៕
March 3, 2020
និស្ស័យល្អ 10យ៉ាងដែលឪពុកម្ដាយសម័យថ្មី គួរបង្រៀនដល់កូន
ការបង្ហាត់កុមារឱ្យមានទស្សនគតិ និងឧបនិស្ស័យក្នុងការរស់នៅឱ្យបានល្អត្រឹមត្រូវ ទាំងរឿងការចូលក្នុងសង្គម និងចេះហាត់មើលថែទាំសុខភាពតាំងពីអាយុនៅតិចៗ នឹងធ្វើឱ្យរឿងល្អៗទាំងអស់នេះនៅដក់ជាប់នឹងខ្លួនគេរហូតមួយជីវិត ហើយខាងក្រោមនេះ គឺជារឿងសំខាន់ៗដែលអាណាព្យាបាលសម័យថ្មីគួរតែបង្រៀនឱ្យកូនៗប្រត្តិបត្តិឱ្យក្លាយជាទម្លាប់និស្ស័យ ៖
1. ញើសសំបោរឱ្យអស់
រឹតតែបង្ហាត់ឱ្យកុមារឆាប់ចេះញើសសំបោរលឿនប៉ុនណា បញ្ហាសុខភាពរបស់ពួកគេនឹងឆាប់បានថយចុះលឿនប៉ុននោះដែរ ព្រោះច្រមុះដែលពោរពេញដោយសំបោរ គឺជាផ្នែកមួយនៃបញ្ហាត្រចៀក និងរោគផ្សេងទៀតជាច្រើន។
2. បរិភោគអាហារពេលព្រឹករាល់ថ្ងៃ
អាហារពេលព្រឹក គឺជាពេលអាហារដ៏សំខាន់បំផុត ព្រោះនឹងជួយឱ្យក្មេងគិត និងរៀនបានកាន់តែល្អឡើង អាណាព្យាបាលគួររកនឹកអាហារពេលព្រឹកប្លែកៗថ្មីៗ ដើម្បីឱ្យកូនៗមានអារម្មណ៍ចង់ញ៉ាំ ដោយសាកល្បងប្តូរពីបាយសាច់ជ្រូក មកជានំសាំងវិច ឬនំប៊ើហ្គ៊ើជាដើម។
3. ការពារស្បែករបស់ខ្លួនឯង
អ្នកដែលកើតរោគមហារីកស្បែកភាគច្រើន ច្រើនតែកើតដោយសារការហាលកម្ដៅថ្ងៃដែលសន្សំបន្តិចម្តងៗតាំងពីវ័យកុមារមកម្ល៉េះ។ ចូរបង្រៀនឱ្យកុមារយល់ដឹងអំពីរឿងនេះ និងលាបឡេការពារកម្ដៅថ្ងៃ មុនពេលចេញក្រៅផ្ទះគ្រប់ពេល។
4. កម្រើករាងកាយ និងហាត់ប្រាណ
កុមារៗឥឡូវនេះច្រើនតែចូលចិត្តអង្គុយលេងហ្គេមកុំព្យូទ័រ ឬមើលទូរទស្សន៍យូរៗដោយមិនកម្រើកខ្លួនទៅណា ធ្វើឱ្យអាចកើតជំងឺផ្សេងៗជាញឹកញាប់ ដូច្នេះឪពុកម្ដាយគួរបង្ហាត់ឱ្យគេចេះធ្វើកិច្ចការឯទៀតខ្លះផង ដូចជាបង្ហាត់ឱ្យចេះហាត់ប្រាណតាមរយ:ការធាក់កង់ ឬលេងបាល់បោះជាដើម។
5. ថែទាំសុខភាពមាត់ធ្មេញរបស់ខ្លួនឯង
បង្រៀនកូនៗថា ការមិនដុសសម្អាតធ្មេញ ឬបណ្តោយឱ្យធ្មេញពុក នឹងមានជំងឺអាក្រក់ផ្សេងទៀតកើតឡើង។ បង្រៀនឱ្យគេចេះដុសធ្មេញឱ្យបានត្រឹមត្រូវ និងនាំទៅទិញច្រាសដុសធ្មេញម៉ូដណាដែលគេស្រឡាញ់ ដើម្បីជាការជំរុញឱ្យគេកាន់តែចង់ដុសធ្មេញឡើង។
6. ខ្ទប់មាត់ និងលាងដៃពេលកណ្តាស់រួច
មានមេរោគច្រើនប្រភេទណាស់នៅក្នុងទឹកមាត់ពេលយើងក្អក ឬកណ្តាស់ចេញមក ដូចជា មេរោគផ្តាសាយ មេរោគកញ្រ្ចឹលជាដើម។ល។ បង្ហាត់ឱ្យក្មេងៗចេះលើកដៃខ្ទប់មាត់ពេលក្អក ឬកណ្តាស់ រួចហើយលាងដៃនឹងសាប៊ូឱ្យបានស្អាតដើម្បីការពារការចម្លងរោគទៅគ្នាទៅវិញទៅមក។
7. ខំប្រឹង និងព្យាយាម ដើម្បីធ្វើឱ្យបានល្អបំផុត មិនមែនដើម្បីឱ្យក្លាយជាមនុស្សពូកែបំផុតនោះទេ
នៅក្នុងពិភពនៃការប្រកួតប្រជែង និងសម្ពាធដែលគ្មានហេតុផល គ្មាននរណាម្នាក់ទទួលបានគ្រប់យ៉ាងដែលខ្លួនចង់បាននោះឡើយ។ ចូរបង្រៀនឱ្យកូនបានដឹងថា គេបានប្រើប្រាស់ភាពជំនាញរបស់គេយ៉ាងអស់ពីសមត្ថភាពហើយ នោះគឺជាមោទនភាពរបស់ខ្លួនយើង មិនមែនស្ថិតនៅលើការសម្រេចរបស់អ្នកដទៃនោះទេ។ បង្រៀនឱ្យគេយល់ថា កុំរីករាយនឹងរង្វាន់ខ្លាំងជ្រុលពេក តែចូរផ្តល់ភាពសំខាន់ទៅលើការអភិវឌ្ឍ និងលទ្ធផលនៃការព្យាយាមរបស់ខ្លួនយើងវិញ ទើបប្រសើរជាង។
8. ចេះបរិភោគអាហារដែលមានគុណប្រយោជន៍
កុំឱ្យកុមារញៀនអាហារដែលមិនសូវមានប្រយោជន៍រហូតក្លាយជានិស្ស័យ ដែលនាំឱ្យកើតរោគធាត់ និងប្រថុយនឹងការកើតជំងឺទឹកនោមផ្អែមនៅពេលធំឡើង។ ចូរបង្ហាត់កូនឱ្យចេះបរិភោគបន្លែ និងផ្លែឈើដែលមានគុណប្រយោជន៍ឱ្យបានញឹកញាប់។
9. ចូលបន្ទប់ទឹករៀងរាល់ពេលព្រឹក
កុមារគួរតែត្រូវបានបង្ហាត់ឱ្យយល់ដឹងពីការបន្ទោបង់ប្រចាំថ្ងៃ។ គ្រូពេទ្យបានបញ្ជាក់ថា អាការដាស់តឿនទាក់ទិននឹងប្រព័ន្ធបន្ទោបង់របស់រាងកាយតែងកើតឡើងច្រើនបំផុត គឺក្នុងអំឡុងពេលក្រោយអាហារពេលព្រឹក ហើយក្មេងៗគួរតែមានពេលចូលបន្ទប់ទឹកនៅពេលនោះ។
10. ចេះគ្រប់គ្រងកំហឹងមិនថាតែអាការក្រេវក្រោធ ឬការបញ្ចេញទឹកមុខបង្ហាញពីអារម្មណ៍ជំនួសឱ្យការទម្លាយវាចេញមកក៏ដោយ អាណាព្យាបាលគួរបង្ហាត់ឱ្យកូនៗចេះទប់ និងគ្រប់គ្រងអារម្មណ៍របស់ខ្លួនឯង និងចេះសម្របសម្រួលក្នុងគ្រប់ស្ថានការណ៍ ដោយប្រាប់កូនៗថា អារម្មណ៍ទាំងនោះមិនល្អទេ។ ត្រូវចេះពិចារណាក្នុងកម្រិតណាមួយសិន មុននឹងបង្ហាញវាចេញមក ឬក៏បោះបង់់វាចោល មិនបាច់នឹកដល់វាតែម្តង រឹតតែប្រសើរទៅទៀត។
រឿងការមើលថែទាំកុមារ ប្រៀបដូចជាការដាំដើមឈើដែរ បើសិនជាមនុស្សធំយកចិត្តទុកដាក់ ឧស្សាហ៍រៀបចំតុបតែង និងផ្តល់ឱ្យនូវអ្វីដែលស័ក្តិសមនោះ ដើមឈើជាទីស្រឡាញ់របស់យើងនឹងរីកលូតលាស់ធំធាត់យ៉ាងល្អស្អាត និងរឹងមាំមិនខាន៕
March 3, 2020
រដ្ឋមន្ត្រីទេសចរណ៍ផ្សព្វផ្សាយវិធានការរបស់រាជរដ្ឋាភិបាល និងក្រសួងទេសចរណ៍ជូនដល់បុគ្គលិកនិយោជិត និងមគ្គុទ្ទេសក៍នៅសៀមរាបដែលរងផលប៉ះពាល់ក្នុងដំណាក់កាលវិបត្តិជំងឺ COVID-19
(សៀមរាប)៖ ក្រសួងទេសចរណ៍បានរៀបចំការផ្សព្វផ្សាយវិធានការទាំង 7ចំណុច របស់រាជរដ្ឋាភិបាលជុំវិញដំណោះស្រាយគាំទ្រវិស័យទេសចរណ៍ ជូនដល់បុគ្គលិក និយោជិត ប្រតិបត្តិករទេសចរណ៍ និងមគ្គុទ្ទេសក៍ទេសចរណ៍នៅខេត្តសៀមរាប ដែលរងផលប៉ះពាល់ដល់ការងារ និងមុខរបររបស់ខ្លួន ក្នុងដំណាក់កាលកើតមានវិបត្តិជំងឺ Covid-19 ដែលបណ្ដាលឱ្យភ្ញៀវទេសចរនៅកម្ពុជា ក៏ដូចជានៅលើពិភពលោកមានការធ្លាក់ចុះ។
ពិធីផ្សព្វផ្សាយវិធានការខាងលើនេះធ្វើឡើងក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍ នៅសណ្ឋាគាររីជេនស៊ីអង្គរ នាថ្ងៃទី០2 ខែមីនា ឆ្នាំ2020 ដើម្បីឱ្យបុគ្គលិក និយោជិត ប្រតិបត្តិករទេសចរណ៍ និងមគ្គុទ្ទេសក៍ទេសចរណ៍នៅខេត្តសៀមរាប បានយល់ច្បាស់ពីសភាពការណ៍ពិតជាក់ស្ដែងជុំវិញបញ្ហាជំងឺ Covid-19 ដែលកម្ពុជាមិនទាន់ករណីឆ្លងជំងឺនេះទៀតនោះឡើយ បន្ទាប់ពីកើតមានលើភ្ញៀវទេសចរចិនតែម្នាក់គត់ (ត្រូវបានព្យាលបាលជាសះស្បើយដោយជោគជ័យ) ព្រមទាំងលើកទឹកចិត្តឱ្យពួកគេខិតខំបំប៉នសមត្ថភាពក្នុងកាលៈទេសៈនេះ កុំមានការព្រួយភ័យពីការបាត់បង់ការងារ និងមុខរបររបស់ខ្លួន។
ឯកឧត្តមរដ្ឋមន្ត្រី ថោង ខុន បានអាន និងពន្យល់វិធានការរបស់រាជរដ្ឋាភិបាលទាំង 7ចំណុចនោះដូចតទៅ៖
*ទី1៖ លើកលែងនូវការបង់ពន្ធប្រចាំខែគ្រប់ប្រភេទរបស់សណ្ឋាគារ និងផ្ទះសំណាក់ (រដ្ឋទទួលបន្ទុកពន្ធជំនួស) ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មក្នុងខេត្តសៀមរាប សម្រាប់រយៈពេលបួនខែ ដោយគិតចាប់ខែកុម្ភៈរហូតដល់ខែឧសភា ឆ្នាំ2020។ អាជីវកម្មសណ្ឋាគារ និងផ្ទះសំណាក់នៅតែមានកាតព្វកិច្ចដាក់លិខិតប្រកាសពន្ធ-អាករ និងប្រើប្រាស់ប្រព័ន្ធអនឡានសម្រាប់គ្រប់គ្រងអាករលើតម្លៃបន្ថែម (E-VAT) ជារៀងរាល់ខែ ក្នុងរយៈពេលលើកលែងពន្ធនេះ។
*ទី2៖ មិនធ្វើសវនកម្មពេញលេញសម្រាប់ការិយបរិច្ឆេទឆ្2020 ចំពោះសហគ្រាសក្នុងវិស័យសណ្ឋាគារ និងផ្ទះសំណាក់ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មក្នុងខេត្តសៀមរាប។
*ទី3៖ ធ្វើវិចារណកម្មថវិកាជាតិឆ្នាំ2020 ទាំងចំណាយចរន្ត និងចំណាយវិនិយោគ ពិសេសកាត់បន្ថយការធ្វើដំណើរចូលរួមក្នុងកិច្ចប្រជុំនៅក្រៅប្រទេស ដោយគ្រប់ក្រសួង-ស្ថាប័នរបស់រាជរដ្ឋាភិបាល និងចូលរួមជំរុញវិស័យទេសចរណ៍ក្នុងស្រុកឲ្យទៅជាចលនាជាតិធំទូលាយ តាមរយៈការជំរុញនូវការធ្វើសិក្ខាសាលា កិច្ចប្រជុំ វគ្គបណ្តុះបណ្តាលខ្លីៗ និងកម្មវិធីផ្សេងៗទៀត រៀបចំដោយគ្រប់ក្រសួង-ស្ថាប័នរបស់រាជរដ្ឋាភិបាល វិស័យឯកជន ស្ថានទូត អង្គការមិនមែនរដ្ឋាភិបាលឱ្យទៅធ្វើនៅតាមខេត្តសំខាន់ៗ ពិសេសគឺខេត្តសៀមរាប។
*ទី4៖ បង្កើនប្រសិទ្ធភាពនៃការធ្វើដំណើររួមគ្នាតាមផ្លូវគោក ផ្លូវទឹក និងផ្លូវអាកាស ជាពិសេសជាមួយប្រទេសជិតខាង (បាងកក-សៀមរាប និង ហូជីមិញ-សៀមរាប) ពិសេសតាមរយៈរថយន្តក្រុង ឬរថយន្តផ្ទាល់ខ្លួន ដោយធ្វើការសម្របសម្រួលដោះស្រាយប្រកបដោយប្រសិទ្ធភាពនូវបញ្ហាប្រឈមនានា ដែលកើតមានឡើងនៅកន្លែងទទួលសេវាកម្មឆ្លងកាត់ព្រំដែន និងបញ្ហាពាក់ព័ន្ធដទៃទៀត។
*ទី5៖ ក្រសួងទេសចរណ៍ និងក្រសួង-ស្ថាប័នពាក់ព័ន្ធ ត្រូវបើកយុទ្ធនាការរៀបចំសកម្មភាព និងព្រឹត្តិការណ៍ទាក់ទាញផ្សេងៗនៅក្នុងខេត្តសៀមរាប ដូចជា អង្គរសង្រ្កាន្ត (2020) ពិធីបុណ្យប្រពៃណី សាសនា កម្មវិធីប្រកួតកីឡា ការប្រគុំតន្រ្តី ការបញ្ចាំងភាពយន្ត និងការបង្ហាញម៉ូដសម្លៀកបំពាក់ជាដើម សម្រាប់ទាក់ទាញភ្ញៀវទេសចរជាតិ-អន្តរជាតិ។
*ទី6៖ រក្សាថ្លៃសំបុត្រចូលទស្សនាតំបន់អង្គរឲ្យនៅដដែល ប៉ុន្តែបន្ថែមចំនួនថ្ងៃសម្រាប់ប្រភេទសំបុត្រនីមួយៗ សំបុត្រសម្រាប់ 1ថ្ងៃ អាចចូលមើលបាន 2ថ្ងៃ សំបុត្រសម្រាប់ 3ថ្ងៃ អាចចូលមើលបាន 5ថ្ងៃ និងសំបុត្រសម្រាប់ 7ថ្ងៃ អាចចូលមើលបាន 10ថ្ងៃ ដើម្បីទាក់ទាញទេសចរឱ្យស្នាក់នៅបន្ថែមនៅកម្ពុជា។
*ទី7៖ ក្រសួងទេសចរណ៍នឹងរៀបចំកម្មវិធីបណ្តុះបណ្តាលដល់កម្មករ-និយោជិត ដែលបាត់បង់ការងារនៅក្នុងវិស័យទេសចរណ៍ (បុគ្គលិកបម្រើការនៅតាមសណ្ឋាគារ ផ្ទះសំណាក់ និងភ្នាក់ងារទេសចរណ៍) តាមរយៈការរៀបចំឲ្យមាននូវវគ្គបណ្តុះបណ្តាលនៃមុខវិជ្ជាចំណេះដឹងថ្មី (Re-skilling) ឬការបង្កើនចំណេះដឹងបន្ថែម (Upskilling) និងការផ្តល់នូវប្រាក់ខែសមរម្យ។ ចំណុចនេះ លោករដ្ឋមន្ត្រី បានលើកទឹកចិត្តអោយ មគ្គុទេសក៍ទេសចរណ៍ យើងចូលរួមឧទ្ទេសនាមដល់ក្រុមភ្ញៀវទេសចរក្នុងស្រុកអោយបានល្អ ដែលការងារនេះមគ្គុទេសក៍ទេសចរណ៍យើង នឹងទទួលបានកម្រៃសមរម្យផងដែរ។
ឯកឧត្តមរដ្ឋមន្ត្រី ថោង ខុន បានលើកជាគំនិតយោបល់ថា ក្នុងពេលមិនសូវមានភ្ញៀវទេសចរដូចនេះ ម្ចាស់សណ្ឋាគារ ផ្ទះសំណាក់ដែលចង់ជួសជុលទីតាំងរបស់ខ្លួន អាចឆ្លៀតពេលនេះអនុវត្តផែនការរបស់ខ្លួន លុះដល់នៅពេលមានភ្ញៀវទេសចរច្រើនមកវិញ កន្លែងរបស់ពួកគេត្រូវបានរៀបរយហើយស្រេច។
ឯកឧត្តមបានលើកទឹកចិត្តដល់អ្នកពាក់ព័ន្ធខាងលើកុំមានការអស់សង្ឃឹម ឬភ័យព្រួយថាខ្លាចបាត់បង់ការងារ និងមុខរបររបស់ខ្លួនដោយសារតែមានវិបត្តិជំងឺ Covid-19 នេះ ហើយសូមជឿជាក់ និងចូលរួមអនុវត្តវិធានការទាំង 7ចំណុចជាមួយរាជរដ្ឋាភិបាល ដើម្បីសាមគ្គីគ្នាជម្នះឧបសគ្គនេះឱ្យបាន។
ពិសេសលើសពីនេះ ឯកឧត្តមរដ្ឋមន្ត្រី ថោង ខុន បានអំពាវនាវយ៉ាងទទួចដល់បុគ្គលិក និយោជិត ប្រតិបត្តិករទេសចរណ៍ និងមគ្គុទ្ទេសក៍ទេសចរណ៍ទាំងនៅខេត្តសៀមរាប ក៏ដូចជានៅទូទាំងប្រទេស សូមកុំចូលរួមផ្សព្វផ្សាយ ឬចែកចាយព័ត៌មានបំភ្លៃបំភ្លើសមិនពិតពាក់ព័ន្ធនឹងជំងឺ Covid-19 នេះតទៅទៀត ពីព្រោះវាមិនបានធ្វើឱ្យប្រជាពលរដ្ឋ និងប្រទេសជាតិទទួលបានផលចំណេញអ្វីឡើយ ផ្ទុយទៅវិញវារឹតតែបង្កការភ័យខ្លាចដល់ប្រជាពលរដ្ឋ ខណៈហេតុការណ៍ឆ្លងជំងឺនៅក្នុងប្រទេសកម្ពុជាមិនបានកើតមានពិតជាក់ស្ដែងនោះឡើយ៕

ប្រភព៖ ក្រសួងទេសចរណ៍
March 3, 2020
កម្ពុជា ឈ្នះ2 ចាញ់2 ក្នុងពានរង្វាន់ JENESYS នៅប្រទេសជប៉ុន
ការប្រកួតចុងក្រោយរបស់កម្ពុជា ក្នុងពានរង្វាន់ JENESYS 2019 Japan-ASEAN U19 Men’s Football Tournament នៅប្រទេសជប៉ុន កម្ពុជាបានយកឈ្នះក្រុមបាល់ទាត់ជម្រើសជាតិអាយុក្រោម 19ឆ្នាំរបស់ម៉ាឡេស៊ី ដោយបាល់ស៊ុតកាត់សេចក្ដី 11ម៉ែត្រ ក្នុងលទ្ធផល 5ទល់នឹង 3 ក្រោយស្មើគ្នា 0ទល់នឹង0។

ក្នុងពានរង្វាន់មួយនេះ ឆ្លងកាត់ 4ប្រកួតក្នុងពូលមកនេះ កម្ពុជាឈ្នះ 2ប្រកួត និងចាញ់ 2ប្រកួត ដោយបានចាញ់ប្រកួតទី1 ជាមួយទីម័រខាងកើត 3ទល់នឹង7, ចាញ់ Kagoshima FC 1ទល់នឹង0, ឈ្នះ មីយ៉ាន់ម៉ា 3ទល់នឹង0, និងចុងក្រោយឈ្នះម៉ាឡេស៊ី ដោយបាល់ស៊ុត 11ម៉ែត្រ 5ទល់នឹង3។

គួរបញ្ជាក់ផងដែរថា ក្រុមកម្ពុជាអាយុក្រោម 19ឆ្នាំបានត្រឡប់មកដល់ប្រទេសកម្ពុជាវិញដោយសុវត្តិភាពហើយ បន្ទាប់ពីចូលរួមការប្រកួត JENESYS 2019 Japan-ASEAN U19 Men’s Football Tournament នៅប្រទេសជប៉ុន៕
March 3, 2020
ភ័យរន្ធត់.. សើចចុកពោះ ! ភាពយន្ដ «វិញ្ញាណតៃហោង» ប្រមូលផ្ដុំតារាសម្ដែងល្បីៗចាប់បញ្ចាំងហើយ
ភាពយន្តខ្នាតធំរឿង “វិញ្ញាណតៃហោង” របស់ផលិតកម្មបដិហារ្យភាពយន្ត បានសម្ពោធដាក់បញ្ចាំងជាផ្លូវការហើយនៅរាត្រីថ្ងៃទី2 ខែមីនា ឆ្នាំ២០២០នេះនៅរោងភាពយន្ត Legend ស៊ីធីម៉ល ក្រោមវត្តមានតារាល្បីៗចូលរួមយ៉ាងច្រើនកុះករ។
ថ្លែងក្នុងពិធីសម្ពោធភាពយន្តខាងលើលោក ស៊ុម ភារិន ចាងហ្វាងផលិតកម្ម “បដិហារ្យភាពយន្ត” បានឲ្យដឹងថា រឿង “វិញ្ញាណតៃហោង” គឺជាស្នាដៃទី៩របស់ផលិតកម្មលោក ដោយបានចំណាយវេលាថតអស់រយៈពេល៦ខែ មុនប្រកាសដាក់បញ្ចាំងនៅថ្ងៃនេះ។ ឯគុណភាព សាច់រឿង ព្រមទាំងប្លង់ថតគឺល្អជាងរឿងមុនៗ ដោយបានសម្រិតសម្រាំងឡើងជាពិសេសតែម្ដង។
មូលហេតុដែលលោក ហ៊ាននិយាយថារឿង “វិញ្ញាណតៃហោង” ល្អនិងពិសេសជាងរឿងមុនៗដោយសារតែសាច់រឿងប្រទាក់ក្រឡាគ្នា ជាមួយអត្ថន័យអប់រំជាច្រើនដល់សង្គមខ្មែរនាពេលបច្ចុប្បន្ន។ បន្ទាប់ពីរឿងនេះទៅលោក ត្រៀមនឹងផលិតភាពយន្តថ្មីដែលមានរសជាតិថ្មី “បុរសសាច់កម្ម” ជាប្រភេទបែបស្នេហាបែបកំប្លែង។
“វិញ្ញាណតៃហោង” ជារឿងខ្មោចបែបភ័យរន្ធត់ព្រឺព្រួចលាយលំជាមួយឈុតឆាកកំប្លែងជាច្រើន ធ្វើឲ្យទស្សនិកជនទស្សនាហើយទប់សំណើចមិនបាន ដែលគ្រោងនឹងដាក់បញ្ចាំងនៅរោងភាពយន្តគ្រប់រោងភាពយន្តទំនើបៗ ទាំងនៅរាជធានីភ្នំពេញ និងតាមបណ្ដាខេត្តនៅថ្ងៃទី៥ ខែមីនា ឆ្នាំ២០១៩ ខាងមុខនេះហើយ៕

March 3, 2020
ការប្រកួតទាំងអស់នៅក្របខ័ណ្ឌលីកថៃ នឹងត្រូវប្រកួតបិទទ្វារទាំងអស់ក្នុងខែមីនានេះ
ក្រោយពីមានការរាលដាលនៃវីរុស COVID-19 ស្ទើរពាសពេញពិភពលោក និងក្នុងប្រទេសថៃផងនោះ ពេលនេះសហព័ន្ធកីឡាបាល់ទាត់ថៃ បានប្រកាសអាសន្នគ្រប់ការប្រកួតទាំងអស់របស់លីកថៃទាំង 4លំដាប់។
ក្នុងនោះដែរ លីកកំពូលថៃទាំង 4លំដាប់ នឹងត្រូវប្រកួតបិទទ្វារ ពោលគឺមិនឱ្យមានអ្នកទស្សនា ចាប់ពីថ្ងៃទី7 រហូតដល់ទី 31 ខែមីនា ឆ្នាំ2020។ លើសពីនេះទៀត ក្នុងការប្រកួតបិទទ្វារទាំងអស់នោះ ក៏កំពុងពង្រឹងនូវបញ្ហាសុវត្ថិភាពដើម្បីបញ្ចៀសពីការឆ្លងមេរោគ COVID-19 ( Corona Virus ) ដោយផ្អែកលើគោលការណ៍ ផ្តល់ម៉ាស់ និងទឹកអាល់កុល នៅតាមកីឡដ្ឋាននីមួយៗ សម្រាប់ក្រុមប្រកួត ហើយប្រសិនបើមានបញ្ហាធ្ងន់ធ្ងរ៖ លីករដូវកាលនេះ នឹងត្រូវលុបចោលតែម្ដង ប្រសិនមានការរីករាលដាលខ្លាំងក្លានៃជំងឺដ៏កាចសាហាវនេះ៕
March 3, 2020
សណ្ឋាគារត្រូវក្ស័យធន ព្រោះតែអាសន្នរោគកូរ៉ូណា Covid-19
ជប៉ុន៖ សណ្ឋាគារមួយនៅក្នុងខេត្ត Aichi បានក្លាយជាក្រុមហ៊ុនដំបូងគេបង្អស់នៅប្រទេសជប៉ុន ដែលបានដាក់ពាក្យសុំក្ស័យធន ដោយសារតែចំនួនភ្ញៀវមកស្នាក់នៅ បានថយចុះយ៉ាងគំហុក ខណៈអាសន្នរោគកំពុងរាតត្បាតប្រទេសនេះ។
សណ្ឋាគារ Fujimiso នៅក្នុងតំបន់ Gamagori នៃខេត្ត Aichi កាលពីសប្ដាហ៍មុនបានប្រកាសថានឹងដាក់ពាក្យសុំក្ស័យធនទៅកាន់តុលាការខណ្ឌ Nagoya ក្នុងទីក្រុង Toyohashi ខេត្ត Aichi ប្រទេសជប៉ុន។ នេះគឺជាក្រុមហ៊ុនដំបូងគេបង្អស់នៃប្រទេសជប៉ុន ដែលត្រូវក្ស័យធនទាក់ទិននឹងវិបត្តិអាសន្នរោគ Covid-19។ នេះបើតាមការឱ្យដឹងពីក្រុមហ៊ុនស្រាវជ្រាវ Tokyo Shoko Research។
សណ្ឋគារ Fujimiso បានចាប់ផ្ដើមផ្ដោតទៅលើការទាក់ទាញភ្ញៀវទេសចរពីប្រទេសចិនក្នុងអំឡុងប៉ុន្មានឆ្នាំចុងក្រោយនេះ។ ប៉ុន្តែ ចាប់ពីខែមករា ភ្ញៀវទេសចរពីប្រទេសចិន បានលុបចោលការកក់បន្ទប់ជាបន្តបន្ទាប់ ធ្វើឱ្យសណ្ឋាគារនេះជួបបញ្ហាហិរញ្ញវត្ថុ។ សណ្ឋាគារនេះ បានបង្កើតឡើងកាលពីឆ្នាំ1956 ហើយបច្ចុប្បន្ន មានទុន96លានយ៉េន។
មន្ត្រីផ្នែកទេសចរណ៍បានឱ្យដឹង ភ្ញៀវទេសចរចិនដែលលុបចោលការកក់សណ្ឋាគារនៅជប៉ុន នឹងកើនឡើងដល់ 400,000ក្រុមនៅចុងខែនេះ ដោយសារតែការរាតត្បាតខ្លាំងនៃអាសន្នរោគកូរ៉ូណា។ សមាគមក្រុមហ៊ុនទេសចរណ៍ជប៉ុនយល់ថា តួលេខពិតអាចនឹងខ្ពស់ជាងនេះច្រើន ព្រោះថាពួកគេមិនទាន់បានបូករួមទាំងក្រុមអ្នកទេសចរដែលមកក្នុងនាមបំពេញបេសកកម្មនៅឡើយ។
យោងតាមការស្ទង់មតិអនឡាញដែល Tokyo Shoko Research បានធ្វើឡើងទៅលើក្រុមហ៊ុនចំនួនជាង12,300ចាប់ពីថ្ងៃទី7កុម្ភៈ ដល់26កុម្ភៈ បានឱ្យដឹងថា 66% បានប្រាប់ថា ពួកគេទទួលរងផលប៉ះពាល់ពីអាសន្នរោគកូរ៉ូណា ដូចជាបញ្ហាអតិថិជនលុបចោលដំណើរទេសចរណ៍ សង្វាក់ផ្គត់ផ្គង់ត្រូវអាក់ខាន និងប្រាក់ចំណូលត្រូវថយចុះជាដើម។ នេះបើតាមទីភ្នាក់ងារសារព័ត៌មាន Japan Times។
គិតមកដល់ពេលនេះ ប្រទេសជប៉ុន មានអ្នកស្លាប់ដោយសារជំងឺកូរ៉ូណាចំនួន 6នាក់ និងមានអ្នកជំងឺចំនួន 256នាក់ ដែលនេះមិនទាន់បានបូករួមទាំងអ្នកជំងឺនៅលើនាវា Diamond Princess នៅឡើយ។ នៅទូទាំងពិភពលោក អ្នកស្លាប់ដោយសារអាសន្នរោគ Covid-19 បានកើនដល់3,048នាក់ និងអ្នកបានឆ្លងមេរោគនេះ មានចំនួនជាង 89,198នាក់៕
ប្រភព៖ សារព័ត៌មានបរទេស
March 2, 2020
ក្រសួងសុខាភិបាល៖ មកដល់ថ្ងៃទី2 មីនានេះកម្ពុជាមិនទាន់មានករណីឆ្លងជំងឺកូរ៉ូណាថ្មី ឬ COVID-19 នោះទេ
ក្រសួងសុខាភិបាលបានអះអាងថា កម្ពុជាមិនទាន់មានករណីឆ្លងជំងឺកូរ៉ូណាថ្មី ឬ COVID-19 នោះទេ ដើម្បីឆ្លើយតបទៅនឹងព័ត៌មាននៅលើបណ្ដាញសង្គមថាកម្ពុជាបានឆ្លងជំងឺកូរ៉ូណាថ្មី ឬ COVID-19។
ថ្លែងក្នុងសន្និសីទសារព័ត៌មាន ស្តីពីការឆ្លើយតប ការការពារ និងការត្រៀមអន្តរាគមន៍លើការចម្លងជំងឺកូរ៉ូណាថ្មី ឬ COVID-19 នៅកម្ពុជា នារសៀល ថ្ងៃទី02 ខែមីនា ឆ្នាំ2020 ឯកឧត្ដម ម៉ម ប៊ុនហេង រដ្ឋមន្រ្ដីក្រសួងសុខាភិបាល បានមានប្រសាសន៍ថា៖ “មន្រ្ដីសុខាភិបាលបានតាមដាន និងពិនិត្យកំហាក រហូតមកទល់ពេលនេះ គឺមិនទាន់បានរកឃើញពលរដ្ឋកម្ពុជាណាម្នាក់ បានឆ្លងជំងឺកូរ៉ូណាថ្មី ឬ COVID-19 នៅឡើយនោះទេ មិនដូចការបង្ហោះព័ត៌មាននៅលើបណ្ដាញសង្គមនោះឡើយ”។
ឯកឧត្ដមរដ្ឋមន្រ្ដីក្រសួងសុខាភិបាលបានបញ្ជាក់ថា៖ “ការពិនិត្យកំហាកនេះ ដើម្បីធានាឱ្យច្បាស់លាស់ជូនដល់ប្រជាពលរដ្ឋ កុំឱ្យមានការភាន់ច្រឡំ និងមានភាពភ័យខ្លាចដល់សាធារណជន”។
ឯកឧត្ដមរដ្ឋមន្រ្ដីបន្ដថា៖ “ក្រសួងនឹងបន្ដតាមដានជំងឺកូរ៉ូណាថ្មី ឬ COVID-19 ជាប់ជាប្រចាំ ដើម្បីការពារ និងអាចព្យាបាលបានឱ្យទាន់ពេលវេលា ហើយចៀសវាងឆ្លងរីករាលដាលបន្ដទៀត”។
លោកស្រីតំណាងអង្គការសុខភាពពិភពលោក បានកោតសរសើរមន្រ្ដីសុខាភិបាលកម្ពុជា ដែលធ្វើការតាមដានការងារស្វែងរកជំងឺកូរ៉ូណាថ្មី ឬ COVID-19 បានយ៉ាងល្អ និងមានភាពច្បាស់លាស់។
សូមបញ្ជាក់ថា កម្ពុជាបានរកឃើញការឆ្លងមួយករណីនៅលើខ្លួនជនជាតិចិនម្នាក់ដែលធ្វើដំណើរពីក្រុងវូហាន ប្រទេសចិន ចូលមកកាន់ខេត្តព្រះសីហនុ ប្រទេសកម្ពុជា ហើយជនជាតិចិនម្នាក់នោះត្រូវបានព្យាបាលជាសះស្បើយ ហើយអនុញ្ញាតឱ្យចាកចេញពីប្រទេសកម្ពុជាទៅកាន់ប្រទេសចិនវិញដែរ។ ប៉ុន្ដែថ្មីៗនេះ មានការដួលសន្លប់ និងស្លាប់នោះ មិនមែនជាជំងឺកូរ៉ូណាថ្មី ឬ COVID-19 នោះទេ៕
ប្រភព៖ ក្រសួងព័ត៌មាន
March 2, 2020
អ្នកវិទ្យាសាស្រ្តរកឃើញថា ការនិយាយជាមួយក្មេងតូចច្រើន អាចជួយឱ្យគេរៀនឆាប់ចេះ
មនុស្សធំជាច្រើនយល់ថា ក្មេងតូចដែលមិនទាន់ចេះនិយាយ ប្រហែលជាមិនទាន់ចេះស្តាប់ និងមិនទាន់យល់ពីអ្វីដែលមនុស្សធំនិយាយទេមើលទៅ។
ហេតុនេះហើយទើបគេមិនសូវយកចិត្តទុកដាក់រវីរវល់ជាមួយក្មេងតូចប៉ុន្មានទេ នៅពេលដែលក្មេងតូចស្ថិតក្នុងវ័យដែលមិនទាន់អាចឆ្លើយតបឬមិនទាន់ចេះនិយាយ។ សកម្មភាពនេះត្រូវបានគេរកឃើញថា មិនមែនជារឿងល្អសម្រាប់កុមារតូចនោះទេ ព្រោះថ្មីៗនេះអ្នកវិទ្យាសាស្រ្តខាងការអភិវឌ្ឍកុមារតូច បានរកឃើញថា ក្មេងតូចៗអាចចេះស្តាប់ និងចេះគិតតាំងពីពួកគេនៅតូចៗម៉្លេះ។
យោងតាមការបញ្ជាក់របស់វេទិកាសេដ្ឋកិច្ចពិភពលោកបានលើកឡើងថា អ្នកវិទ្យាសាស្រ្តកុមារបានរកឃើញថា ការនិយាយជាមួយកុមារតូចៗ អាចជួយឱ្យពួកគេចំណាំពាក្យបានច្រើន និងរៀនឆាប់ចេះទាំងការនិយាយ និងការចងចាំលើផ្នែកផ្សេងៗទៀតនៅពេលពួកគេធំឡើង។ តាមការបញ្ជាក់របស់ស្ថាប័នវិទ្យាសាស្ត្រអប់រំអាមេរិក PNAS (Proceedings of the National Academy of Sciences of the United States of America) បានឱ្យដឹងថា ការព្យាយាមនិយាយមិនច្បាស់តាមកុមារ ឬបញ្ចេញសំឡេងតាមកុមារតូចមិនមែនជាវិធីល្អនោះទេសម្រាប់កុមារក្នុងការអភិវឌ្ឍសមត្ថភាព តែអាណាព្យាបាលគួរនិយាយពាក្យច្បាស់ៗ និងព្យាយាមទំនាក់ទំនងឱ្យបានច្រើនដោយការនិយាយជាមួយពួកគេបើទោះបីជាទារក ឬកុមារតូចមិនទាន់ចេះនិយាយតបមកយើងក៏ដោយ។
អ្នកអប់រំក្នុងស្ថាប័នខាងលើបានណែនាំថាអាណាព្យាបាលអាចព្យាយាមសាកល្បងនិយាយជាមួយកុមារតូចនូវពាក្យយឺតៗដដែលៗ ឬពាក្យទាំងឡាយណាដែលពួកគេងាយចងចាំដើម្បីពិនិត្យមើលពីការឆ្លើយតបរបស់ពួកគេ។
ច្បាស់ណាស់កុមារនឹងចងចាំ ឬយល់នូវអត្ថន័យដែលយើងកំពុងនិយាយ ព្រោះពួកគេពួកគេអាចមានសមត្ថភាពចាប់បាននូវអ្វីដែលមនុស្សធំចង់ឱ្យគេធ្វើ។
ម្យ៉ាងវិញទៀត ទន្ទឹមនឹងការព្យាយាមនិយាយជាមួយពួកគេ យើងក៏គួរទុកឱកាសឱ្យពួកគេធ្វើតាម រៀនបញ្ចេញសំឡេងតាម ឬឆ្លើយតបតាមដំណាក់កាល។
នៅពេលដែលពួកគេមិនទាន់ចេះនិយាយ យ៉ាងហោចណាស់ក៏អាចធ្វើឱ្យពួកគេឆ្លើយតបដោយកាយវិការ ដូចជាការណែនាំឱ្យគេសើច ឬឱ្យគេធ្វើសកម្មភាពណាងាយៗដើម្បីដឹងថា ពួកគេអាចយល់ ឬមិនទាន់យល់នូវអ្វីដែលមនុស្សធំកំពុងទំនាក់ទំនងជាមួយគេ។
ការទំនាក់ទំនងជាមួយកូនជួយអភិវឌ្ឍការចងចាំបានល្អ
អ្នកវិទ្យាសាស្រ្តរកឃើញថា កុមារតូច ដែលមានអាណាព្យាបាលភ្ជាប់ទំនាក់ទំនងល្អ ឬមានវិធីសាស្រ្តក្នុងការទំនាក់ទំនង និងបង្រៀនបានល្អ ភាគច្រើនជាក្មេងដែលមានសមត្ថភាពឆាប់ចេះនិយាយមុនអាយុ និងអាចចងចាំពាក្យបានល្អជាងក្មេងដទៃ2ដង។
នៅពេលពួកគេចូលសាលារៀន ការចងចាំពីភាសា និងការយល់ពីអត្ថន័យនៃពាក្យនីមួយៗមានភាពឆាប់រហ័ស ហើយគេអាចនឹងរៀនបានលឿនជាងកុមារដែលអាណាព្យាបាលមិនបានហ្វឹកហាត់ ឬនិយាយជាមួយពួកគេពេលពួកគេនៅតូច។
ការចាប់ឱកាសអភិវឌ្ឍន៍សមត្ថភាពក្នុងការអភិវឌ្ឍភាសានៅវ័យក្មេងនេះ ត្រូវបានអ្នកវិទ្យាសាស្ត្រអប់រំរកឃើញថា មានប្រយោជន៍ខ្លាំងណាស់សម្រាប់ពេញមួយជីវិតតែម្តងព្រោះពួកគេអាចនឹងឈានទៅអភិវឌ្ឍសមត្ថភាពផ្នែកដទៃទៀតលឿនជាងកុមារទូទៅ។
ជាឧទាហរណ៍ កុមារម្នាក់មានសមត្ថភាពចងចាំផ្នែកភាសាល្អ ពួកគេក៏នឹងមានសមត្ថភាពអាន ឬចូលចិត្តអានផងដែរនៅពេលពួកគេធំឡើង។ ហេតុនេះហើយទើបធ្វើឱ្យពួកគេមានប្រភពព័ត៌មានច្រើនជាងក្មេងដទៃទៀត ឬមានកម្រិតបញ្ញា (IQ) ខ្ពស់ជាងក្មេងផ្សេងៗដែលទទួលបានព័ត៌មានតិចតួចពីការអាន ឬពីការស្តាប់ជាដើម។
តាមការបញ្ជាក់របស់ស្ថាប័នអប់រំ Sutton Trust នៅឆ្នាំ2010 បានបញ្ជាក់ថាកុមារអាយុ 5ឆ្នាំ មកពីគ្រួសារដែលមិនបានអប់រំល្អ ឬមិនបានភ្ជាប់ទំនាក់ទំនងល្អរវាងអាណាព្យាបាល និងកូនតូច មានកម្រិតយល់ដឹងផ្នែកពាក្យយឺតជាងកុមារដែលទទួលបានការភ្ជាប់ទំនាក់ទំនងល្អជាមួយមនុស្សធំដល់ទៅ 16ខែ។
ហេតុនេះអាណាព្យាបាលគួរចាប់ឱកាសនេះឱ្យបានប្រសិនបើកំពុងមានកូនតូចនៅក្នុងផ្ទះកុំឱ្យឱកាសនៃការអប់រំដ៏ល្អនេះរំលងផុត ដោយការយល់ឃើញថាកុមារមិនយល់អ្វីទាំងអស់៕
March 2, 2020
យុវជនគួររៀបខ្ទង់ចំណាយបែបណាដើម្បីអភិវឌ្ឍជីវិតបានល្អ?
ព្រោះវ័យនេះ ជាវ័យនៃការចាប់ផ្តើមនៃដំណើរជីវិតបែបឯករាជ្យ។ ប្រសិនបើយុវវ័យមានទម្លាប់ល្អក្នុងការចាយវាយ នោះជីវិតរបស់ពួកគេនឹងអាចអភិវឌ្ឍបានយ៉ាងប្រសើរទៅថ្ងៃអនាគតការគ្រប់គ្រងហិរញ្ញវត្ថុ ឬមានទម្លាប់ល្អក្នុងការចាយវាយ ជារឿងដ៏សំខាន់សម្រាប់យុវវ័យ ហើយជីវភាពក៏មានលក្ខណៈល្អប្រសើរផងដែរ តែប្រសិនបើពួកគេគ្រប់គ្រងថវិកាមិនល្អ ពួកគេត្រូវរស់នៅក្នុងជីវិតក្រីក្រយូរអង្វែង ឬត្រូវធ្លាក់ក្នុងសភាពដុនដាបពេញមួយជីវិតក៏អាចថាបានដែរ។
ពាក់ព័ន្ធនឹងបញ្ហានេះ លោក ង៉ែត ជូ អ្នកជំនាញផ្នែកហិរញ្ញវត្ថុ បានលើកឡើងថា យុវវ័យគួរចេះគិតគូរឱ្យបានល្អិតល្អន់ពីការគ្រប់គ្រងហិរញ្ញវត្ថុ ព្រោះបច្ចុប្បន្ននេះប្រជាជនមួយចំនួនកំពុងរស់នៅក្នុងស្ថានភាពសម្ភារនិយម និងចូលចិត្តចាយលុយច្រើនជាងសន្សំលុយ។ ហេតុនេះដើម្បីឱ្យជីវិតអភិវឌ្ឍបានល្អយុវជនគួរចាយលុយឱ្យបានត្រូវខ្ទង់ដោយក្នុងនោះលោកបែងចែករបៀបចាយជា 4ចំណុចគឺ ទី1 ការវិនិយោគលើការកសាងសមត្ថភាព។
ការកសាងសមត្ថភាពជារឿងសំខាន់ខ្លាំងណាស់សម្រាប់មនុស្សម្នាក់ៗ ព្រោះគ្រប់គ្នាត្រូវតែរៀន មិនអាចចៀសផុតបានទេ បើទោះបីជាមិនរៀននៅក្នុងសាលា ក៏ត្រូវរៀនពីការរស់នៅជាក់ស្តែងដែរទើបអាចអភិវឌ្ឍជីវិតបានល្អ។
ហេតុនេះ ការចំណាយក្នុងការវិនិយោគលើការអប់រំ ដូចជាការទៅរៀនបន្ត ឬរៀនបន្ថែមនូវជំនាញនានាដើម្បីក្លាយជាពលរដ្ឋល្អ ឬជាបុគ្គលដែលមានសមត្ថភាពខ្ពស់ ជារឿងល្អបំផុតសម្រាប់យុវវ័យ។ ក្រៅពីនេះ កាលណាយើងមានចំណេះដឹងខ្ពស់ យើងអាចនឹងមានគំនិតច្រើនក្នុងការស្វែងរកចំណូល ក៏ដូចជាចេះវិនិយោគប្រសើរជាងមុនផងដែរ។
លោក ង៉ែត ជូ បាននិយាយថា៖ «ជម្រើសសំខាន់ទី2 ដែលយុវជនគួរចាយនោះ គឺវិនិយោគដើម្បីបង្កើតប្រាក់ ដូចជាវិនិយោគលើផ្សាហ៊ុន (Stocks) វិនិយោគលើអចលនទ្រព្យ និងវិនិយោគដោយចូលហ៊ុនបង្កើតអាជីវកម្មជាដើម»។
លោកថា ការវិនិយោគរបៀបនេះជាការវិនិយោគដ៏ប្រសើរ បន្ទាប់ពីការវិនិយោគលើការកសាងសមត្ថភាពផ្ទាល់ខ្លួន។ ការវិនិយោគបន្ថែមនេះអាចនឹងជួយឱ្យយើងមានសមត្ថភាពក្នុងការវិភាគ ក៏ដូចជាការគិតពិចារណារឿងលុយកាក់ និងរឿងផ្សេងៗទៀត។ បន្ថែមពីលើនេះ វាក៏ជួយឱ្យយើងមានការសម្រេចចិត្តល្អប្រសើរជាងមុនដែរ ព្រោះកាលណាយើងដាក់លុយកាក់វិនិយោគ យើងត្រូវការប្រមូលព័ត៌មានឱ្យបានច្បាស់លាស់ជាមុនសិន។
លើសពីនេះទៅទៀតការចាយវាយដើម្បីវិនិយោគបន្តិចម្តងៗនឹងធ្វើឱ្យយើងមានបទពិសោធក្នុងការគ្រប់គ្រងហិរញ្ញវត្ថុ ក៏ដូចជាស្គាល់កាន់តែច្បាស់នូវច្រកសំខាន់ៗដែលធ្វើឱ្យចំណូលរបស់យើងកើនឡើងជាលំដាប់។
បន្ថែមពីលើជម្រើសខាងលើ ចំណុចទី3 ដែលយុវជនគួរចំណាយនោះគឺ ទិញផ្ទះបង់រំលស់ ឬសន្សំប្រាក់នៅធនាគារ។ លោកថា ការទិញផ្ទះបង់រំលស់ និងសន្សំប្រាក់នៅធនាគារ ជាជម្រើសល្អព្រោះប្រសិនបើយើងទិញផ្ទះបង់រំលស់ យើងនឹងនៅសល់ទ្រព្យ ហើយវាក៏ធ្វើឱ្យយើងមានវិន័យល្អក្នុងការគ្រប់គ្រងហិរញ្ញវត្ថុដែរ។
ការទិញផ្ទះ ត្រូវការចំណូលដែលមានស្ថិរភាពល្អ ទើបអាចធានានិរន្តរភាពក្នុងការបង់ប្រចាំខែបាន ហេតុនេះប្រសិនបើគ្រប់គ្រងមិនបានល្អទេនោះ យើងនឹងមានហានិភ័យ ហេតុនេះវាទាមទារឱ្យមានទម្លាប់ល្អ និងចាំបាច់តែម្តងត្រូវតែមានសមត្ថភាពគ្រប់គ្រងហិរញ្ញវត្ថុប្រចាំខែឱ្យបានច្បាស់លាស់។ ជម្រើសនេះល្អ តែមិនល្អខ្លាំង ដូចជាការចាយវាយលើជម្រើសទី1 និងជម្រើសទី2 ខាងលើទេ។ ម្យ៉ាងវិញទៀតផលចំណេញពីផ្ទះឡើង
ថ្លៃ ឬការប្រាក់ធនាគារ គឺមានអត្រាទាប។
ចំណែកឯជម្រើសទី4 គឺកាត់បន្ថយការចំណាយលើភាពហ៊ឺហាតាមបែបយុវវ័យភ្លេចខ្លួន។ យុវវ័យគួរបង្កើនភាពចាស់ទុំ ឬកុំធ្វើខ្លួនដូចជាអ្នកនៅលីវជាច្រើនទៀតដែលចូលចិត្តទិញសម្ភារទំនើបៗ ចូលក្លិបកម្សាន្ត ឬចូលខារ៉ាអូខេជាដើម ព្រោះទង្វើទាំងអស់នេះ ជាជម្រើសអាក្រក់បំផុតដែលយុវជនខ្មែរមួយភាគធំចូលចិត្តប្រព្រឹត្ត។ សកម្មភាពនេះនឹងធ្វើឱ្យយើងខាតបង់ទាំងទ្រព្យធន ខាតបង់ទាំងពេលវេលា និងបាត់បង់ឱកាសកសាងសមត្ថភាពទៀតផង៕
March 2, 2020