នាថ្ងៃបុណ្យសិទ្ធិនារី 8មីនា ដែលជាថ្ងៃរំឭកពីភាពជោគជ័យរបស់នារីទូទាំងពិភពលោក ម៉ូដសម្លៀកបំពាក់ដែលអ្នកគួរស្លៀកពាក់ ក៏ត្រូវតែជាសម្លៀកបំពាក់បែបជឿជាក់ មានអំណាច និងពេញដោយភាពស្រស់ស្អាតបែបទុកចិត្ត និងជោគជ័យ ទោះជាមើលពីជ្រុងណាមកក៏មិនទើស មិនឃើញទន់ខ្សោយឡើង ស្អាតហើយ ពេញដោយសមត្ថភាព និងភាពជឿជាក់សម្រាប់នារីសម័យថ្មី ដើម្បីបង្ហាញដល់មនុស្សទាំងអស់ពីភាពជានារីរបស់យើង។ តោះចឹង! កុំភ្លេចជ្រើសរើសម៉ូដសម្លៀកបំពាក់បែបជឿជាក់ និងទាន់សម័យសម្រាប់ខែមីនានេះ៕
Category: សង្គម និងសេដ្ឋកិច្ច
ម៉ូដសម្លៀកបំពាក់បែបជឿជាក់សម្រាប់នារីសម័យថ្មី
Kim Jong-un ជូនពរកូរ៉េខាងត្បូង ឆ្លងផុតពីវិបត្តិសុខភាព ខណៈប្រទេសនេះ មានអ្នកផ្ទុក Covid-19 ជាង 6,088នាក់
មេដឹកនាំកូរ៉េខាងជើង លោក Kim Jong-un បានផ្ញើលិខិតមួយច្បាប់ជូនកូរ៉េខាងត្បូង សម្ដែងការជឿជាក់ថា ប្រទេសនេះនឹងឆាប់ទទួលបានជោគជ័យលើរោគរាតត្បាត Covid-19 និងអាចការពារសុខភាពរបស់ប្រជាជន។
លេខាធិការសារព័ត៌មាននៃវិមានប្រធានាធិបតីកូរ៉េខាងត្បូង បានឱ្យដឹងនៅថ្ងៃនេះថា “ប្រធានរដ្ឋ Kim Jong-un មានបំណងលើកទឹកចិត្តប្រជាជន (កូរ៉េខាងត្បូង) ដែលកំពុងប្រយុទ្ធប្រឆាំងនឹងវីរុសកូរ៉ូណា។ គាត់ជឿជាក់ថា យើងនឹងទទួលបានជ័យជំនះ ហើយសង្ឃឹមថា សុខភាពរបស់ប្រជាជនកូរ៉េខាងត្បូងនឹងត្រូវបានការពារ”។
លិខិតមួយច្បាប់នោះ ត្រូវបានលោក Kim ផ្ញើទៅកាន់ប្រធានាធិបតីកូរ៉េខាងត្បូង លោក Moon Jae-in កាលពីថ្ងៃ ទី4មីនា ឆ្នាំ2020។ នៅក្នុងលិខិតនោះ លោក Kim Jong-un បានសម្ដែងការព្រួយបារម្ភចំពោះសុខភាពរបស់ថ្នាក់ដឹកនាំកូរ៉េខាងត្បូង ព្រមទាំងបានបកស្រាយអំពី “គំនិតស្មោះត្រង់” របស់លោក Kim Joong-un អំពីស្ថានការណ៍នៅលើឧបទ្វីបកូរ៉េនាបច្ចុប្បន្ន។
ប្រធានាធិបតីកូរ៉េខាងត្បូង លោក Moon Jae-in ក៏បានផ្ញើលិខិតមួយច្បាប់ឆ្លើយតបទៅកាន់កូរ៉េខាងជើង ក្នុងនោះលោក Moon បានសម្ដែងការអរគុណចំពោះការយកចិត្តទុកដាក់របស់ប្រធានរដ្ឋកូរ៉េខាងជើងផងដែរ។
កូរ៉េខាងត្បូង ថ្ងៃនេះបានរកឃើញអ្នកផ្ទុកមេរោគ Covid-19 បន្ថែមចំនួនជាង332នាក់ នាំឱ្យចំនួនអ្នកបានឆ្លងមេរោគនេះ សរុបឡើងដល់ជាង 6,088នាក់ ក្នុងនោះមាន 35នាក់បានបាត់បង់ជីវិត និងជាង40នាក់បានជាសះស្បើយពីជំងឺ។ ប្រទេសនេះ បានក្លាយជាសម្បុកមេរោគ Covid-19 ធំជាងគេក្នុងពិភពលោកបន្ទាប់ពីប្រទេសចិន។
ចំណែកនៅទូទាំងពិភពលោកវិញ មនុស្សចំនួន 95,748នាក់ ត្រូវបានគេរាយការណ៍ថា បានឆ្លងមេរោគ Covid-19 ក្នុងនោះមាន 3,286នាក់ បានស្លាប់ និង 53,423នាក់ បានជាសះស្បើយពីជំងឺ៕
ប្រភព៖ សារព័ត៌មានបរទេស
សេដ្ឋកិច្ចចិននឹងអាចស៊ូទ្រាំជាមួយរោគរាតត្បាត Covid-19 បានដល់ពេលណា?
សាស្ត្រាចារ្យ Michael Spence ដែលធ្លាប់ទទួលបានពានរង្វាន់ Nobel សេដ្ឋកិច្ច យល់ថា ឥទ្ធិពលរបស់ Covid-19 ទៅលើសេដ្ឋកិច្ចចិន គ្រាន់តែកើតឡើងមួយរយៈពេលខ្លីប៉ុណ្ណោះ ចំណែករយៈពេលវែងវិញ វាហាក់មិនអាចទៅរួចនោះទេ។
រោគរាតត្បាត Covid-19 មកដល់បច្ចុប្បន្ន បានសម្លាប់មនុស្សរាប់ពាន់នាក់ និងធ្វើឱ្យមនុស្សរាប់រយលាននាក់នៅទូទាំងពិភពលោក ត្រូវរងផលប៉ះពាល់យ៉ាងធ្ងន់ធ្ងរ។ ដោយសារតែអ្នកវិទ្យាសាស្ត្រមិនទាន់រកឃើញថ្នាំ ឬវិធីពិសេសដែលអាចទប់ស្កាត់ ឬព្យាបាលមេរោគនេះ ដូច្នេះមិនមានអ្នកណាម្នាក់ហ៊ានអះអាងថា ពេលណារោគរាតត្បាតនេះត្រូវបានគេគ្រប់គ្រងទាំងស្រុងនោះទេ កុំថាឡើយនិយាយដល់រឿងសេដ្ឋកិច្ចនឹងល្អប្រសើរឡើងវិញក្នុងរយៈពេលខ្លី។
ក៏ប៉ុន្តែ ប្រការខាងលើនេះ មិនមែនមានន័យថា គេមិនអាចព្យាករអ្វីបានទាំងអស់នោះទេ។ កាលពីអតីតកាល បទពិសោធប្រហាក់ប្រហែលគ្នានឹងរោគរាតត្បាតកូរ៉ូណា Covid-19នេះ បានបង្ហាញថា ការខាតបង់សេដ្ឋកិច្ចរយៈពេលខ្លី អាចមានច្រើន ហើយវិស័យដែលទទួលរងផលប៉ះពាល់ច្រើនជាងគេនោះគឺ វិស័យដឹកជញ្ជូន ទេសចរណ៍ រថយន្ត និងផលិតផលប្រណិត។
ការព្យាករមួយចំនួនដែលអាចជឿទុកចិត្តបាន ក៏បានបង្ហាញថា កំណើន GDP របស់ចិន អាចថយចុះពី 2-4ពិន្ទុភាគរយរៀងរាល់ត្រីមាស រហូតដល់រោគរាតត្បាតនេះបានកើនឡើងដល់កំពូល។ ផលិតផលនាំចេញនាំចូល សុទ្ធតែមានការថយចុះ ដោយសារមានការកាត់បន្ថយសកម្មភាពផលិត ការបញ្ជាទិញ និងការដឹកជញ្ជូន ទាំងស្ម័គ្រចិត្ត ទាំងត្រូវបង្ខំ។ កត្តាជំរុញកំណើនសេដ្ឋកិច្ចដែលពឹងទៅលើរដូវកាលបុណ្យចូលឆ្នាំចិនឆ្នាំនេះក៏មិនបានកើនឡើង។
សំណួរសួរថា តើពេលណារោគរាតត្បាតនេះឡើងដល់កម្រិតកំពូល? ការព្យាករប្រកបដោយភាពជឿជាក់ យល់ថា សេដ្ឋកិច្ចមួយផ្នែកនឹងងើបឡើងវិញនៅក្នុងត្រីមាសទី2។ លោក Michael Spence អ្នកវិទ្យាសាស្ត្រដែលទទួលបានពានរង្វាន់ Nobel សេដ្ឋកិច្ច និងជាសាស្ត្រាចារ្យផ្នែកសេដ្ឋកិច្ចមកពីសាលាសេដ្ឋកិច្ច Stern របស់សកលវិទ្យាល័យ New York និងជាសមាជិកជាន់ខ្ពស់នៃវិទ្យាស្ថាន Hoover យល់ថា វានឹងឃើញជាក់ស្ដែងជាងនេះ បើសិនគេរង់ចាំការងើបឡើងវិញនៃសេដ្ឋកិច្ចនៅត្រីមាសទី3។
ប៉ុន្តែ លោក Michael Spence ក៏បានថ្លែងថា គេនឹងមិនអាចទាត់ចោលនូវលទ្ធភាពដែល Covid-19 ក្លាយជាមហារោគរាតត្បាត ដែលអុកឡុកពិភពលោករយៈពេលវែង ដែលបង្ករការខាតបង់ច្រើនជាងនេះ ចំពោះសេដ្ឋកិច្ច ព្រោះថាអ្នកជំនួញកាន់តែពិបាករកស៊ី ចំនួនអ្នកធ្វើការក៏ត្រូវបានកាត់បន្ថយច្រើនឡើង អ្នកវិនិយោគមានការរារែកកាន់តែខ្លាំង។ល។
អ្នជំនាញផ្នែកសេដ្ឋកិច្ចខាងលើបានអះអាងថា ជារួម ឥទ្ធិពលរយៈពេលវែងរបស់ Covid-19 ទៅលើសេដ្ឋកិច្ចចិន គឺមានតិចតួច។ សេដ្ឋកិច្ចរបស់មហាអំណាចចិនបច្ចុប្បន្ន គេមិនអាចប្រើពាក្យថា “ទន់ខ្សោយ” បានទៀតទេ។ ជាការពិត ប្រទេសនេះលែងពឹងផ្អែកច្រើនទៅលើការនាំចេញ បើធៀបនឹងឆ្នាំ2003 ដែលពេលនោះអាសន្នរោគ SARS កំពុងកើតឡើង។ សេដ្ឋកិច្ចប្រទេសចិន ក៏មានកត្តាជាច្រើនដើម្បីងើបឡើងវិញយ៉ាងលឿន ចេញពីវិបត្តិសុខភាពនេះ។
លោកសាស្ត្រាចារ្យ Michael Spence យល់ថា ប្រភពកម្លាំងដែលកន្លងមកត្រូវបានគេវាយតម្លៃទាបនោះគឺការពង្រីកខ្លួនយ៉ាងលឿនរបស់សេដ្ឋកិច្ចឌីជីថលនៃប្រទេសចិន។ ការលក់រាយតាមអនឡាញនៅប្រទេសចិន បានកើនឡើងរហូតដល់ 35,3% ឬ 25% (តាមស្ថិតិមួយផ្សេងទៀត)។ ការរកស៊ីតាមអនឡាញនៅប្រទេសចិន ពេលនេះកំពុងតែមានកំណើនខ្ពស់។
កត្តាខាងលើនេះ ក៏ជាជំនួយមួយផ្នែកធំដែលជំរុញឱ្យសេដ្ឋកិច្ចចិន ងើបឡើងវិញបានឆាប់រហ័ស ពិសេសគឺនៅចំពោះមុខវិបត្តិមួយដែលកាត់បន្ថយលទ្ធភាពនៃការធ្វើដំណើរ។ វិស័យបច្ចេកវិទ្យារីកចម្រើនខ្លាំង ក៏មានន័យថា បុគ្គលិកក្រុមហ៊ុនអាចធ្វើការឱ្យក្រុមហ៊ុនពេលដែលពួកគេនៅឯផ្ទះ ឬកន្លែងណាមួយដែលនៅខាងក្រៅក្រុមហ៊ុន សូម្បីតែពេលពួកគេត្រូវបង្ខាំងដើម្បីការពារការឆ្លងមេរោគក៏ដោយ។ ចំណែកវិស័យអប់រំក៏មិនខុសគ្នាប៉ុន្មានដែរ ដោយសារគ្រូ និងសិស្សអាចបង្រៀន និងទទួលចំណេះដឹងដោយប្រើអ៊ីនធើណិត។
ក្រុមហ៊ុនដែលជួបបញ្ហាទាក់ទិននឹងលម្ហូរសាច់ប្រាក់ និងទុន នោះឥណទានអាចនឹងត្រូវបានពន្យាពេល និងផ្គត់ផ្គង់ពីចម្ងាយ។ ប្រការនេះនឹងជួយកាត់បន្ថយការខាតបង់ក្នុងរយៈពេលវែងសម្រាប់វិស័យទេសចរណ៍ ពិសេសគឺក្រុមហ៊ុនខ្នាតតូច និងមធ្យម។ ផលិតផល ឬសេវាកម្មធានារ៉ាប់រងតាមអនឡាញក៏អាចត្រូវបានពង្រីកទៅក្នុងវិស័យមួយចំនួន។ ការបញ្ជាទិញសម្ភារវេជ្ជសាស្ត្រតាមអនឡាញ ក៏អាចជួយបញ្ចៀសបញ្ហាខ្វះខាតដោយសារវិបត្តិសុខភាពនេះ ព្រោះថាកម្មវិធីកុំព្យូទ័រ មានសមត្ថភាពដឹង នឹងដោះស្រាយបញ្ហាបានយ៉ាងឆាប់រហ័ស។
កម្មវិធី ផ្សារ ឬ App អនឡាញនានាក៏អាចការពារមិនឱ្យមានបញ្ហាឱកាសនិយម និងការពារអ្នកដែលងាយរងគ្រោះ។ ឧទាហរណ៍ ក្រុមហ៊ុនផ្សារអនឡាញ Amazon បានព្រមានមិនឱ្យ “ម្ចាស់តូប” នៅលើផ្សារអនឡាញនេះ ដាក់លក់ផលិតផលម៉ាស់ក្នុងតម្លៃខ្ពស់ បើសិនករណីនេះកើតឡើង “ម្ចាស់តូប” នោះនឹងត្រូវបានគេបិទចោល។
នៅពេលសេដ្ឋកិច្ចត្រូវបានដាក់នៅលើអនឡាញ ការតាមដានប្រសិទ្ធភាពរបស់វា បានក្លាយជារឿងងាយស្រួល លឿន និងសុក្រឹតជាងមុន។ ទិន្នន័យនេះ អាចត្រូវបានប្រើប្រាស់ដើម្បីកែសម្រួលលើបញ្ហានានាដែលកើតមាន ព្រមទាំងអាចជួយកែលម្អសុក្រឹតភាពនៃការព្យាករ ជាហេតុធ្វើឱ្យមានទំនុកចិត្តទៅលើការរកស៊ី និងជំរុញឱ្យសេដ្ឋកិច្ចអាចងើបឡើងបានឆាប់រហ័ស។
និយាយមួយ ការដាំក្បាលចុះដល់កម្រិតអាក្រក់បំផុតនៃសេដ្ឋកិច្ចចិន គឺពិតជាគួរឱ្យខ្លាច និងមានហានិភ័យខ្ពស់។ ប៉ុន្តែ បញ្ហានេះមិនងាយនឹងកើតឡើងនោះឡើយ ព្រោះថា ប្រទេសចិន និងពិភពលោកបាន និងកំពុងតែចាត់វិធានការយ៉ាងខ្លាំងក្លា ដើម្បីទប់ទល់នឹងបញ្ហានេះ។ ក៏ប៉ុន្តែ អ្វីដែលគេសោកស្ដាយនោះ គឺការបាត់បង់ជីវិតមនុស្ស៕
ប្រភព៖ សារព័ត៌មានបរទេស
COVID-19៖ កម្ពុជាដាក់មនុស្ស40នាក់ក្រោមការតាមដានសុខភាព និង4នាក់ទៀតដាក់ឱ្យនៅដាច់ដោយឡែក ព្រោះមានជាប់ទាក់ទិននឹងជនជាតិជប៉ុនដែលផ្ទុកមេរោគ Covid-19
មនុស្ស4នាក់ត្រូវបានដាក់ក្រោមវិធានចត្តាឡីស័ក ពោលគឺតម្រូវឲ្យនៅដាច់ដោយឡែកពីគេចំនួន14ថ្ងៃ និង40នាក់ទៀតស្ថិតក្រោមការតាមដានសុខភាព បន្ទាប់មានព័ត៌មានថា ជនជាតិជប៉ុនម្នាក់ដែលធ្លាប់ស្នាក់នៅសៀមរាប ត្រូវបានរកឃើញវិជ្ជមាន COVID-19 នៅក្រុង Nagoya ប្រទេសជប៉ុន។ នេះបើតាមការបញ្ជាក់របស់លោក លី សូវ៉ាន់ អ្នកនាំពាក្យក្រសួងសុខាភិបាល។
បច្ចុប្បន្នស្ថាប័នជំនាញ និងអាជ្ញាធរខេត្តសៀមរាបរកឃើញមនុស្ស4នាក់ដែលមានប្រវត្តិប៉ះពាល់ផ្ទាល់ និង40នាក់ដែលប៉ះពាល់ដោយប្រយោលជាមួយជនជាតិជប៉ុនដែលរកឃើញករណីឆ្លងនៅប្រទេសជប៉ុន។
នាយកដ្ឋានប្រយុទ្ធនឹងជំងឺឆ្លង (CDC) របស់ក្រសួងសុខាភិបាល បានអះអាងតាមរយៈហ្វេសប៊ុករបស់ខ្លួនថា ក្រុមមន្ត្រីសុខាភិបាលថ្នាក់ជាតិ ថ្នាក់ខេត្ត និងអាជ្ញាធរខេត្តសៀមរាប កំពុងយកចិត្តទុកដាក់លើករណីនេះដោយតម្លាភាព និងធ្វើការប្រកបដោយភាពត្រឹមត្រូវបំផុតទៅតាមនីតិវិធីរបស់អង្គការសុខភាពពិភពលោក មជ្ឈណ្ឌលប្រយុទ្ធនឹងជំងឺឆ្លងសហរដ្ឋអាមេរិក និងវិទ្យាស្ថានប៉ាស្ទ័រ។
ជនជាតិជប៉ុនដែលត្រូវបានតេស្តវិជ្ជមាននៅប្រទេសកំណើតខ្លួននោះ ជាអ្នកធុរកិច្ចគាត់បានធ្វើដំណើរជាបន្តបន្ទាប់ក្នុងរយ:ពេលខ្លីពីវៀតណាម ថៃ ហ្វីលីពីន កម្ពុជា បន្ទាប់មកទៅវៀតណាម និងត្រឡប់ចូលប្រទេសជប៉ុនវិញហើយរកឃើញវិជ្ជមាន COVID-19 នៅទីនោះ ។
លោក លី សូវ៉ាន់ បានពន្យល់ថា មនុស្ស4នាក់ត្រូវស្ថិតក្រោមវិធានចត្តាឡីស័ក ដោយនៅដាច់ដោយឡែកពីគេ14ថ្ងៃ និងច40នាក់ទៀតអាចចេញក្រៅ ប៉ុន្តែស្ថិតក្រោមការតាមដានសុខភាពជាប្រចាំ ហើយតម្រូវឲ្យពាក់ម៉ាស់ និងវិធានការការពារផ្សេងៗ៕
ជួបជាមួយការប្រគំតន្រ្តីយ៉ាងកក្រើកនៅក្រុងតាខ្មៅ ជាមួយស្រាបៀរ ថៃហ្គ័រ
រាជធានីភ្នំពេញ៖ នៅថ្ងៃសៅរ៍ និងថ្ងៃអាទិត្យទី០៧-០៨ ខែមីនា ឆ្នាំ២០២០ ខាងមុខនេះ ស្រាបៀរ ថៃហ្គ័រ (CBL) នឹងរៀបចំការប្រគំតន្រ្តីដ៏ធំសម្បើមរបស់ Tiger Street Football 2020 រួមជាមួយកម្មវិធីសប្បាយជាច្រើនទៀតយ៉ាងកក្រើក និងកាន់តែពិសេសអស្ចារ្យ នៅក្នុងបរិវេណទីធ្លាសួនច្បារច្រមុះជ្រូក មាត់ទន្លេក្រុងតាខ្មៅ ដើម្បីអបអរសាទរក្រុមជើងឯកម្ចាស់ពាន Tiger Street Football 2020 វគ្គផ្តាច់ព្រ័ត្រទូទាំងប្រទេស ដែលបានធ្វើឡើងនៅរាជធានីភ្នំពេញ កាលពីសប្តាហ៍មុន។
កម្មវិធីពិសេសនេះនឹងមានការផ្សាយផ្ទាល់លើកញ្ចក់ទូរទស្សន៍ រស្មីហង្សមាស ចាប់ពីម៉ោង ៨ យប់រហូតដល់ចប់កម្មវិធី ដោយមានការចូលរួមសម្តែងដ៏អស្ចារ្យពីតារាចម្រៀងល្បីឈ្មោះជាច្រើនរូបដើម្បីផ្តល់ការកម្សាន្តសប្បាយរីករាយជូនទស្សនិកជនមានដូចជា លោក ខេមរះ សិរីមន្ត អ្នកនាង ឪក សុគន្ធកញ្ញា កញ្ញា ពេជ្រ សោភា លោក ណុប បាយ៉ារិទ្ធ កញ្ញា សុខ សីឡាលីន លោក ហ្សូណូ លោក ខាត់ ជែមស៏ លោក នីកូ លោក Step និងកញ្ញា ឈិន ម៉ានិច្ច។ការប្រគំតន្រ្តីដ៏កក្រើកពិសេសរបស់ Tiger Street Football 2020 ដែលរៀបចំផ្តាច់មុខដោយស្រាបៀរថៃហ្គ័រ (CBL)។ ស្រាបៀរថៃហ្គ័រ ជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ១៩៣២ នៅប្រទេសសិង្ហបុរី និងមានលក់នៅច្រើនជាង៧០ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះ ពានរង្វាន់លំដាប់ថ្នាក់អន្តរជាតិច្រើនជាង៤០ មេដាយផ្នែករសជាតិ និងគុណភាព។សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH.។
ពិសាដោយការទទួលខុសត្រូវ៕
ទិវាសិទ្ធិនារីអន្តរជាតិ 8មីនា
ទិវានារីអន្តរជាតិ 8មិនា គឺជាទិវាមួយដែលនារីជុំវិញពិភពលោកតែងប្រារព្ធពិធីដើម្បីរំឭក និងអបអរសាទរពីថ្ងៃដ៏មានអត្ថន័យនេះ។ អង្គការសហប្រជាជាតិ ក៏បានប្រារព្ធពិធីអបអរសាទរទិវានេះផងដែរ ហើយប្រទេសជាច្រើនបានកំណត់ទិវានេះ ថាជាថ្ងៃបុណ្យជាតិរបស់ខ្លួនផងដែរ។ ស្ត្រី និងបុរសត្រូវបានបង្កើតឡើងនៅលើផែនដីនេះ ដើម្បីឱ្យក្លាយជាគូនឹងគ្នា ហើយត្រូវធ្វើដំណើរជាមួយគ្នាគ្រប់កិច្ចការ និងគ្រប់គ្រងលើផែនដីទាំងមូល ប៉ុន្តែពួកគេមានរូបរាង និងចិត្តគំនិតខុសពីគ្នា។ ធម្មជាតិបានផ្តល់នូវភាពរឹងមាំខាងផ្នែករាងកាយដល់បុរសក្នុងភាពជាអ្នកប្រយុទ្ធ និងជាអ្នកដឹកនាំ ទើបជំរុញឱ្យបុរសភាគច្រើនតែងប្រើឥទ្ធិពលនេះ ដើម្បីគ្របដណ្តប់លើស្ត្រី និងចាត់ទុកស្ត្រីជាភេទទន់ខ្សោយ មិនស្មើនឹងខ្លួនស្ទើរតែគ្រប់ប្រទេសទាំងអស់។ ដោយហេតុនេះហើយទើបបង្កឱ្យមានការងើបតវ៉ាពីបណ្ដានារីៗទូទាំងពិភពលោក រហូតជំរុញឱ្យមានទិវារំឭកអំពីសិទ្ធិនារី នៅថ្ងៃទី8 មីនា ជារៀងរាល់ឆ្នាំ។ តើប្រវត្តិនៃថ្ងៃសិទ្ធិនារីមានដំណើររឿងបែបណាដែរ? សូមតាមដានដូចខាងក្រោមនេះ។
អំពីការទាមទារសិទ្ធិ
ដោយសារតែភាពលំអៀងមិនស្មើភាពគ្នាទើបពួកស្រីៗចាប់ផ្តើមបង្ហាញនូវភាពខ្លាំងរបស់ខ្លួនទៅកាន់បុរសៗ ហើយចាប់ផ្តើមងើបឡើងទាមទារសិទ្ធិ និងភាពស្មើភាពគ្នាជាមួយបុរសរហូតទទួលបានជោគជ័យ ដោយទទួលបានសិទ្ធិពេញបរិបូរស្មើនឹងបុរស ហើយថ្ងៃទី8 មីនានេះហើយ ដែលនារីៗទាំងអស់ទទួលបាននូវការទទួលស្គាល់ និងមានសិទ្ធិស្មើបុរស ទើបនារីៗទូទាំងពិភពលោកបានលើកថ្ងៃនេះឡើងជាថ្ងៃរំឭកពីថ្ងៃជោគជ័យរបស់ខ្លួន។ បន្ទាប់ពីនារីៗបានទទួលសិទ្ធិស្មើនឹងបុរសៗហើយ នារីទាំងអស់មានសិទ្ធិ និងសេរីភាពក្នុងការចូលប្រឡូកនៅក្នុងការងារនយោបាយ វប្បធម៌ សេដ្ឋកិច្ច និងការងារសង្គមជាតិដូចគ្នានឹងបុរសដែរ។ប្រវត្តិនៃ
ទិវាសិទ្ធិនារីអន្តរជាតិការប្រារព្ធទិវាសិទ្ធិនារីអន្តរជាតិមុនដំបូងបង្អស់ ចាប់ផ្តើមឡើងពីសកម្មភាពនៃចលនាការងារក្នុងបណ្ដាប្រទេសក្នុងតំបន់អាមេរិកខាងជើង និងបានរីករាលដាលទូទាំងទ្វីបអឺរ៉ុប ដែលបណ្តាលឱ្យមានការផ្លាស់ប្តូរដ៏ធំមួយក្នុងសតវត្សទី20។ ដំបូងឡើយថ្ងៃបុណ្យសិទ្ធិនារីត្រូវបានប្រារព្ធឡើងនៅថ្ងៃទី28 ខែកុម្ភៈ ឆ្នាំ1909 ក្នុងសហរដ្ឋអាមេរិក។ ការរៀបចំនេះ ធ្វើឡើងដោយគណបក្សសង្គមនិយម (ក្នុងសម័យនោះ) ក្នុងគោលបំណងរំឭកពីការធ្វើកូដកម្មរបស់កម្មការិនីកាត់ដេរ ប្រឆាំងនឹងលក្ខខណ្ឌការងារក្នុងទីក្រុងញូវយ៉កកាលពីឆ្នាំ1908។នៅឆ្នាំ1910 ក្រុមអ្នកសង្គមនិយមបានធ្វើការជួបជុំគ្នានៅទីក្រុងកូប៉េនហាជ (Copenhagen)ប្រទេសដាណឺម៉ាក ជាលក្ខណៈអន្តរជាតិ ដើម្បីគោរពដល់ចលនាសិទ្ធិនារី និងគ្រាំទ្រឱ្យនារីៗមានសិទ្ធិបោះឆ្នោតជាសកល។ សំណើរនេះ ត្រូវបានយល់ព្រមជាឯកច្ឆន្ទៈ ក្នុងសន្និសីទដែលមានស្ត្រីចូលរួមចំនួន100នាក់ មកពី17ប្រទេស។
មួយឆ្នាំក្រោយមក មានការបង្ហាញពីលទ្ធផលនៃជំនួបផ្តួចផ្តើមគំនិតក្នុងទីក្រុងកូប៉េនហាជ ដដែលស្តីពីថ្ងៃបុណ្យសិទ្ធិនារីត្រូវបានធ្វើឡើងដំបូងគេនៅថ្ងៃទី19 ខែមីនា ក្នុងប្រទេសចំនួន3 មានប្រទេសអូទ្រីស ប្រទេសដាណឺម៉ាក និងប្រទេសស្វីស ដោយមានស្ត្រី និងបុរសចូលរួមជួបជុំគ្នា ច្រើនជាងមួយលាននាក់ ដើម្បីទាមទារសិទ្ធិក្នុងការបោះឆ្នោតជាសាកល និងការបញ្ឈប់ការរើសអើងលើស្ត្រីក្នុងវិស័យការងារនៅក្នុងសង្គម។
ក្នុងឆ្នាំ1913-1914 ថ្ងៃបុណ្យសិទ្ធិនារីអន្តរជាតិបានក្លាយជាយន្តការសម្រាប់ធ្វើការតវ៉ាក្នុងសង្គ្រាមលោកលើកទីមួយ។ ស្ត្រីជនជាតិរុស្សីបានប្រារព្វធ្វើថ្ងៃបុណ្យសិទ្ធិនារីអន្តរជាតិរបស់ខ្លួននៅថ្ងៃអាទិត្យ ចុងខែកុម្ភៈ។ រីឯនៅប្រទេសផ្សេងៗទៀតក្នុងទ្វីបអឺរ៉ុប ស្ត្រីទាំងអស់ក៏បានប្រារព្ធទិវានេះនៅថ្ងៃទី8 មីនា និងនៅថ្ងៃជាបន្តបន្ទាប់ ខណៈពេលដែលស្ត្រីផ្សេងទៀតបានធ្វើការតវ៉ាប្រឆាំងនឹងសង្គ្រាម និងចូលរួមធ្វើសកម្មភាពក្នុងជួរកងទ័ពដូចជាបុរសដែរ។
នៅក្នុងឆ្នាំ1917 ស្ត្រីជនជាតិរុស្ស៊ីបានជ្រើសរើសការតវ៉ា និងធ្វើបាតុកម្មម្តងទៀត ដោយដាក់ចំណងជើងនៃការតវ៉ានេះថា “នំបុ័ង និងសន្តិភាព”កាលពីថ្ងៃអាទិត្យ ចុងខែកុម្ភៈ (ត្រូវជាថ្ងៃទី8 មីនាក្នុងប្រតិទិនគ្រីកូរី)។ បួនថ្ងៃក្រោយមក ស្តេចត្សារ(Czar) បានដាក់រាជ្យ ហើយរាជរដ្ឋាភិបាលបណ្តោះអាសន្នបានផ្តល់សិទ្ធិដល់ស្ត្រីក្នុងការបោះឆ្នោតដូចគ្នាដែរ។
បន្ទាប់មក អង្គការសហប្រជាជាតិបានជ្រើសរើសថ្ងៃ8 មីនា ជាថ្ងៃចាប់ផ្តើមប្រារព្ធទិវាសិទ្ធិនារីអន្តរជាតិ។ 2ឆ្នាំក្រោយមក នៅក្នុងខែធ្នូ ឆ្នាំ1977 មហាសន្និបាតបានអនុម័តសេចក្តីសម្រេចប្រកាសជាសាធារណៈឱ្យសមាជិកទាំងអស់នៃអង្គការសហប្រជាជាតិ ប្រារព្ធថ្ងៃបុណ្យសិទ្ធិនារីជារៀងរាល់ឆ្នាំ ស្របទៅតាមប្រពៃណី និងប្រវត្តិសាស្ត្ររបស់ខ្លួន។ មហាសន្និបាតក៏បានរំឭកឡើងវិញពីតួនាទីរបស់ស្ត្រីក្នុងកិច្ចការសន្តិភាព ការអភិវឌ្ឍ ការជំរុញឱ្យបញ្ឈប់នូវការរើសអើងភេទ ព្រមទាំងការពង្រឹងឱ្យមានការគាំទ្រដល់ស្ត្រីក្នុងការប្រើប្រាស់សិទ្ធិរបស់ខ្លួនឱ្យបានពេញលេញ។
ពិសេស អង្គការសហប្រជាជាតិបានចាប់ផ្តើមអនុម័តសន្ធិសញ្ញា និងច្បាប់ជាបន្តបន្ទាប់ទៀតស្ទើររាល់ឆ្នាំ ដើម្បីជួយពង្រឹងសិទ្ធិនារីបន្ថែមទៀត ខណៈពេលដែលថ្ងៃបុណ្យសិទ្ធិនារី ត្រូវបានប្រារព្ធធ្វើឡើងជារៀងរាល់ឆ្នាំ រហូតដល់ពេលបច្ចុប្បន្ន ដោយសង្ឃឹមថា សិទ្ធិសេរីភាពរបស់ស្ត្រីនឹងត្រូវបានអនុវត្តទូទាំងពិភពលោកជាមិនខាន៕
ម៉ូដក្រចកដៃបែបសាមញ្ញសម្រាប់នារី ក្នុងថ្ងៃសិទ្ធិនារី
សម្រាប់សុភាពនារីដែលនិយមការតុបតែងខ្លួនបែបសាមញ្ញ ស្រគត់ស្រគំ ការតុបតែងម៉ូដក្រចកក៏ត្រូវតែសាមញ្ញ មិនឆើតឆាយពេកដែរ ទើបស័ក្តិសមនឹងរូបអ្នក។ នៅក្នុងលេខថ្មីនេះ ឡារ៉ែន សូមណែនាំនូវម៉ូដក្រចកពណ៌ស្រាលៗ និងសុភាពរាបសារជូនដល់នារីៗវិញម្តង ដើម្បីលេងម៉ូដតាមយ៉ាងស្រស់ស្អាត។ ដូច្នេះសូមជ្រើសរើសម៉ូដក្រចកដែលអ្នកស្រឡាញ់ពេញចិត្តដូចតទៅ៕
ចាប់ពីពេលនេះទៅ ស្ថាប័នស្ទើរទាំងអស់ នឹងត្រូវកាត់បន្ថយចំណាយ 50% លើកលែងតែក្រសួង3ប៉ុណ្ណោះដែលកាត់ត្រឹម 25%
ស្ថាប័នទាំងអស់នឹងត្រូវកាត់បន្ថយចំណាយរហូតដល់ 50% លើកលែងតែក្រសួងការបរទេស ក្រសួងពាណិជ្ជកម្ម និងទីស្តីការគណៈរដ្ឋមន្ត្រីប៉ុណ្ណោះ ដែលត្រូវកាត់បន្ថយចំណាយចំនួន 25%។ នេះជាការលើកឡើងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីបិទសន្និបាតសុខាភិបាលកាលពីម្សិលមិញ។
សម្តេចបានលើកឡើងថា ដើម្បីទប់ស្កាត់បញ្ហាសេដ្ឋកិច្ច និងបញ្ហាដែលប៉ះពាល់ដោយមេរោគឆ្លង Covid-19 រាជរដ្ឋាភិបាលនឹងកាត់បន្ថយការចំណាយទាំងឡាយណាដែលមិនចាំបាច់។ សម្តេចបញ្ជាក់ថា ចាប់ពីពេលនេះទៅ សូមគ្រប់ក្រសួងស្ថាប័នទាំងអស់ កុំសុំការបង្កើនចំណាយអ្វីទាំងអស់ ព្រោះយើងមិនមែនត្រឹមតែមិនបង្កើនទេ តែយើងត្រូវកាត់បន្ថយតែម្តង។ ចំពោះខ្ទង់ចំណាយដែលយើងមិនកាត់ គឺមានតែបៀវត្សរ៍តែប៉ុណ្ណោះ ដែលមិនអាចបន្ថយបាន តែចំពោះចំណាយនានា ដូចជាការចេញទៅក្រៅប្រទេស និងការវិនិយោគផ្ទាល់របស់រដ្ឋ ជាដើមត្រូវតែកាត់បន្ថយ។
សម្តេចតេជោ ហ៊ុន សែន ណែនាំថា៖ «ការចេញទៅក្រៅប្រទេស បើមិនចាំបាច់ទេ កុំទៅ។ ហើយបើត្រូវទៅ 5នាក់ ឱ្យទៅតែ 2នាក់ គ្រប់គ្រាន់ហើយ»។
បន្ថែមពីលើនេះសម្តេចបានជំរុញឱ្យរដ្ឋមន្ត្រីនៃក្រសួងនីមួយៗ អាចសុំឱ្យឯកអគ្គរាជទូតនៅតាមបណ្តាប្រទេសចូលរួមប្រជុំជំនួសប្រសិន បើករណីមិនមានបទអន្តរាគមន៍របស់កម្ពុជានៅក្នុងកិច្ចប្រជុំនោះទេ។ ចំណាត់ការនេះ គឺដើម្បីសន្សំថវិកាសម្រាប់ដោះស្រាយបញ្ហានានាដែលនឹងអាចកើតឡើង។ ចំណែកឯ គម្រោងវិនិយោគផ្ទាល់របស់កម្ពុជាវិញ ចំពោះការដ្ឋានណាដែលមិនទាន់បានបើក គឺនឹងត្រូវផ្អាកសិន លើកលែងតែគម្រោងដែលជាហិរញ្ញប្បទានរបស់បរទេស ដែលមានបដិភាគជាមួយកម្ពុជាតែប៉ុណ្ណោះ។ គម្រោងនានាអាចលើកទៅឆ្នាំក្រោយ ក៏មិនទាន់ហួសពេលដែរ គឺយើងរង់ចាំឱ្យផុតពីបញ្ហា Covid-19 សិន៕
ភាពយន្ដ ១៥៧ ចំណងជើង បានប្រកាសបើកក្នុងមហោស្រពភាពយន្ដអន្ដរជាតិលើកទី១០ CIFF
មហោស្រពភាពយន្ដអន្ដរជាតិ ឬ CIFF លើកទី ១០ នេះ បានប្រកាសបើកភាពយន្ដរហូតដល់ ១៥៧ ចំណងជើង មកពី៤៤ ប្រទេស រួមមានភាពយន្ដខ្នាតធំ ភាពយន្ដខ្នាតខ្លី ភាពយន្ដឯកសារ និងភាពយន្ដគំនូរជីវចល ។
លោក CEDRIC ELOY ប្រធានមហោស្រពភាពយន្តអន្តរជាតិកម្ពុជានិងជាអ្នករៀបចំកម្មវិធីនេះ បានប្រាប់អ្នកសារព័ត៌មានឡារ៉ែនថា ៖ «CIFFលើកទី១០ នេះ ជាព្រឹត្តិការណ៍វប្បធម៌អន្តរជាតិដែលធំជាងគេបង្អស់នៅកម្ពុជានឹងប្រារព្ធខួបគម្រប់ ១០ ឆ្នាំរបស់ខ្លួន ដែលនឹងធ្វើឡើងចាប់ពីថ្ងៃទី ១៣ ដល់ថ្ងៃទី ២២ ខែមីនា ឆ្នាំ ២០២០។ ឆ្នាំនេះការចូលរួមគាំទ្រយ៉ាងពេញទំហឹងពីសំណាក់ដៃគូសហការ ព្រមទាំងអ្នកគាំទ្រផ្នែកបច្ចេកទេសជាច្រើន ហើយយើងខ្ញុំពិតជាមានសេចក្ដីរំភើបបំផុតដែលក្រុមហ៊ុនទូរស័ព្ទចល័ត CELLCARD បានចូលរួមធ្វើជា “ម្ចាស់ឧបត្ថម្ភកម្មវិធីធំ” នៃមហោស្រពរបស់យើង។
ភាពយន្ដទាំង ១៥៧ ចំណងជើង ក៏ត្រូវបានសម្រិតសម្រាំងពិសេសៗយកមកដាក់បញ្ចាំងនៅលើផ្ទាំងសំពត់សក្នុងរោងភាពទំនើបៗ ដូចជារឿង «រសាត់អណ្ដែត» (ជាភាពយន្តដែលឈ្នះពានរង្វាន់នៅក្នុងមហោស្រពភាពយន្តអន្តរជាតិជាច្រើន)។ ភាពយន្តនេះបង្ហាញពីប្រធានបទ ការជួញដូរមនុស្សនៅកម្ពុជា និងនៅអាស៊ីអាគ្នេយ៍។ ជាមួយគ្នានេះដែរ ភាពយន្តរឿង «នាឡិកាដាស់វិញ្ញាណ» ដែលដឹកនាំដោយលោកលៀក លីដា (ជាភាពយន្តដែលរកបានចំណូលខ្ពស់ និងទទួលងារជាភាពយន្តឆ្នើមក្នុងមហោស្រពភាពយន្តជាតិកាលពីឆ្នាំ ២០១៩) ក៏នឹងត្រូវចាក់បញ្ចាំងក្នុងមហោស្រពភាពយន្តអន្តរជាតិកម្ពុជាលើកទី ១០ ផងដែរ» ។
កម្មវិធីភាពយន្តខ្មែរដ៏ពិសេស គឺជាការចាក់បញ្ចាំងលើកដំបូងបង្អស់នៃទស្សនីយភាព «បង្សុកូល ៖ ការរំឭកដល់កម្ពុជា» ជាទស្សនីយភាពបង្កើតឡើងថ្មីដោយអង្គការសិល្បៈខ្មែរអមតៈ និងថតដោយមជ្ឈមណ្ឌលបុប្ផាណា។ ការចាក់បញ្ចាំងលើកដំបូងបង្អស់លើពិភពលោក ជាមួយការសម្ដែងទស្សនីយភាព។ មហោស្រពភាពយន្តអន្តរជាតិកម្ពុជាក៏សូមគោរព រំឭកដល់សម្ដេចរាជបុត្រី ព្រះរៀម នរោត្តម បុប្ផាទេវី ដែលបានសោយទិវង្គតកាលពីខែវិច្ឆិកា ឆ្នាំ ២០១៩។ កម្មវិធីពិសេសរួមមានការបញ្ចាំងភាពយន្ត ពិធីគោរពរំឭក ព្រមទាំងពិព័រណ៍ដ៏ពិសេសមួយស្ដីពីរបាំព្រះរាជទ្រព្យ នៅឯសណ្ឋាគារ Rosewood។ នេះជាការបញ្ជាក់បន្ថែមរបស់លោក CEDRIC ELOY។
សូមជម្រាបថា ការចាក់បញ្ចាំងខ្សែភាពយន្តលើសពី ១៥០ លើក នៅតាមរោងភាពយន្តធំៗមួយចំនួនក្នុងរាជធានីភ្នំពេញ ហើយឆ្នាំនេះ ទីតាំងទាំងនោះមានដូចជា រោងភាពយន្ត LEGEND, រោងភាពយន្ត MAJOR CINEPLEX, មជ្ឈមណ្ឌលបុប្ផាណា, សាលមហោស្រពចតុម្មុខ, សណ្ឋាគារ ROSEWOOD និង THE CIFF VILLAGE នៅផ្សារទំនើប EXCHANGE SQUARE។ កុំឱ្យខកខានឱ្យសោះណា៎ ជួបគ្នាជាថ្មីម្ដងទៀតនៅថ្ងៃបើកមហោស្រពថ្ងៃទី ១៣ មីនា ខាងមុខនេះ៕
តារាហ្វេសប៊ុក « ម៉ែរួយ » ប្រកាសជួយសាងសង់សាលារៀនមួយខ្នងជូនសិស្សក្រក្សត់នៅខេត្តក្រចេះ
តាមការលើកឡើង និងស៊ែរជាច្រើននៅលើបណ្ដាញសង្គមហ្វេសប៊ុកបានឱ្យឃើញថា តារាហ្វេសប៊ុក « ម៉ែរួយ » ដែលធ្លាប់តែកើបចំណូលពីការលក់ផលិតផលនៅលើហ្វេសប៊ុក ខណៈនេះស្រាប់តែអ្នកនាងធ្វើឱ្យកុមារៗសិស្សនុសិស្សនៅក្នុងសាលារៀនមួយកន្លែងក្នុងខេត្តក្រចេះ រំភើបចិត្តជាអនេក និងញញឹមបិទមាត់មិនជិត ដោយអ្នកនាងប្រកាសផ្ដល់ជំនួយសាងសង់សាលារៀនក្នុងទំហំទឹកប្រាក់ 60000ដុល្លារ។
ផ្ដល់ការបញ្ជាក់បន្ថែមជូនសារព័ត៌មានឡារ៉ែន ម៉ែរួយ ឆ្លើយឆ្លងថា នេះជាការផ្ដល់ក្ដីសង្ឃឹមថ្មីមួយជូនកុមារទីទាល់ក្រនៅក្នុងខេត្តក្រចេះ ឱ្យមានថ្នាក់សិក្សារៀនសូត្រក្រេបយកចំណេះដឹង។ ទំហំទឹកប្រាក់ 60000ដុល្លារ គឺតិចតួចបំផុត ក៏ប៉ុន្ដែជាការរួមចំណែកក្នុងន័យមនុស្សធម៌ និងកិច្ចការងារសង្គម។ ម៉ែរួយ មើលឃើញថា សាលារៀនចាស់មានសភាពទ្រុដទ្រោមខ្លាំង ពេលភ្លៀងរឺក្តៅក្មេងៗរៀនមិនកេីត ទេីប «មែរួយ» សម្រេចចិត្តជួយតែម្តង មិនយូរទៀតទេក្មេងៗនិងមានសាលារៀនថ្មីរៀនឆាប់ៗ។ ហើយបងប្អូនតំណាងចែកចាយក្រុមហ៊ុនរបស់ម៉ែរួយទាំងអស់នេះ ក៏បានរួមចំណែកដល់សាលានៅ ភូមិក្រញូងសែនជ័យ ឃុំក្រញូងសែនជ័យ ស្រុកស្នួលខេត្តក្រចេះ ដែលជាអំណោយដ៏ថ្លៃថ្លាដោយទឹកចិត្តដ៏ល្អបរិសុទ្ធរបស់អ្នកម្ដាយ ដេីម្បីឱ្យក្មេងៗបានរៀននៅសាលាល្អនិងឱ្យក្មេងក្លាយជាពលរដ្ធល្អនៅក្នុងសង្គមទៅថ្ងៃមុខ។
គួរបញ្ជាក់ផងដែរថា រហូតមកទល់និងពេលនេះសាលារៀនដែលខាងម៉ែរួយ ជាស្ថាបនិករបស់ក្រុមហ៊ុនរួយអ៊ិនហ្វីនិធី បានលេចចេញជារូបរាងនិងផ្លែផ្កាហើយ៕
