Category: សង្គម និងសេដ្ឋកិច្ច

មហាញាប់ញ័រ…នាយករដ្ឋមន្ត្រីនៃប្រទេសស៊ូដង់ រួចផុតពីការលបធ្វើឃាតយ៉ាងប្រផិតប្រផើយ កាលពីព្រឹកមិញ(ថ្ងៃចន្ទទី9មីនា)
យោងតាមសេចក្ដីរាយការណ៍ព័ត៌មានរបស់ទីភ្នាក់ងារព័ត៌មានរ៉យទ័រ និងអាអេហ្វប៉េ បានឱ្យដឹងថា នាយករដ្ឋមន្ត្រីនៃប្រទេសស៊ូដង់ លោក អាប់ឌុលឡា ហាមដក(Abdulla Hamdok) បានរួចផុតពីការលបធ្វើឃាតកាលពីព្រឹកថ្ងៃចន្ទ(ទី9មីនា) ក្នុងអំឡុងពេលដែលក្បួនរថយន្តរបស់លោកបានក្លាយជាគោលដៅនៃការវាយប្រហារកណ្ដាលទីក្រុង ខាធូម។ ប្រភពព័ត៌មានលំដាប់គណៈរដ្ឋមន្ត្រីស៊ូដង់ និងស្ថានីយទូរទស្សន៍ផ្លូវការរបស់ស៊ូដង់បានបង្ហើបឱ្យដឹងអំពីរឿងនេះ។
រ៉យទ័របានរាយការណ៍កាលពីថ្ងៃចន្ទ(ទី9មីនា)ថា លោក អាប់ឌុលឡា ហាមដក ដែលបានទទួលការតែងតាំងឱ្យក្លាយជាមេដឹកនាំរដ្ឋាភិបាលឈុតថ្មីរបស់ស៊ូដង់ ក្រោយពីអតីតប្រធានាធិបតីស៊ូដង់ លោក អូម៉ា អាល់-បាសៀ(Omar al-Bashir)ដែលបានគ្រប់គ្រងអំណាចដ៏យូរអង្វែងត្រូវបានផ្ដួលរំលំ។
ដោយក្រោយពីការកើតហេតុលបធ្វើឃាតក្បួនរថយន្តរបស់លោក ក្នុងខណៈដែលកំពុងធ្វើដំណើរនៅក្នុងទីក្រុងខាធូម កាលពីព្រឹកមិញនេះ(ថ្ងៃចន្ទទី9មីនា)គេបានដឹងថា លោកប្រធានាធិបតី ហាមដក នៅមានសុវត្ថិភាព និងត្រូវបានជម្លៀសទៅកាន់កន្លែងសុវត្ថិភាព។ នេះបើតាមស្ថានីយទូរទស្សន៍ផ្លូវការរបស់ស៊ូដង់រាយការណ៍។
រូបភាពព័ត៌មានបានបង្ហាញឱ្យឃើញពីក្បួនរថយន្ត រួមទាំងរថយន្ត SUV ពណ៌សដែលមានសភាពរងការខូចខាតមិនជាធ្ងន់ធ្ងរប៉ុន្មាន និងរថយន្ត 1គ្រឿងទៀតដែលរងការខូចខាតយ៉ាងដំណំ។
សាក្សី 3នាក់ បានបង្ហើបប្រាប់ទីភ្នាក់ងារព័ត៌មានរ៉យទ័រថា ការលបធ្វើឃាតនេះ បានកើតឡើងនៅជិតផ្លូវចូលផ្នែកខាងជើងរបស់ស្ពាន ខូប៊ើរ(Kober) ដែលតភ្ជាប់ជាមួយទីក្រុងខាធូមខាងជើង ដែលមានទីស្ដីការគណៈរដ្ឋមន្ត្រីស៊ូដង់របស់លោក ហាមដក ស្ថិតនៅកណ្ដាលទីក្រុង។
អាអេហ្វប៉េ បានរាយការណ៍ថា ជាការលបធ្វើឃាតក្នុងអំឡុងពេលដែលលោកនាយករដ្ឋមន្ត្រីកំពុងធ្វើដំណើរទៅទីស្ដីការគណៈរដ្ឋមន្ត្រីស៊ូដង់ ដែលមកដល់ពេលនេះ នៅមិនទាន់ដឹងច្បាស់នៅពីព័ត៌មានលម្អិតនៅឡើយ តែត្រូវបានគេដឹងថា ហេតុការណ៍នេះបានកើតឡើងនៅវេលាម៉ោង09.00ព្រឹក។ នេះបើយោងតាមសេចក្ដីរាយការណ៍ពីទីភ្នាក់ងារព័ត៌មានសាណា(SANA)។
នៅពេលបន្ទាប់មក លោកនាយករដ្ឋមន្ត្រី ហាមដក បានថ្លែងការណ៍តាមរយៈប្រព័ន្ធធ្វីតធើរផ្លូវការផ្ទាល់ខ្លួន ដោយបានបញ្ជាក់ថា៖ “ខ្ញុំសូមធានានៅចំពោះមុខប្រជាជនស៊ូដង់ទាំងអស់ថា ខ្ញុំមានសុវត្ថិភាព និងនៅល្អគ្រប់ប្រការ” ព្រមទាំងបន្ថែមទៀតថា “រឿងដែលកើតឡើងនេះ នឹងមិនអាចបញ្ឈប់ដំណើរក្បួននៃការផ្លាស់ប្ដូរបានឡើយ”។
“ទាំងអស់នេះ មើលទៅហាក់ដូចជា ការវាយប្រហារក្បួនរថយន្តរបស់លោកនាយករដ្ឋមន្ត្រីនេះ ចេញមកពីផ្នែកខាងលើ…” សាក្សីទាំងអស់បានរៀបរាប់ ចំណែកឯស្ថានីយវិទ្យុរបស់រដ្ឋបានបញ្ជាក់ថា ក្បួនរថយន្តត្រូវបានវាយប្រហារដោយគ្រាប់កាំភ្លើង និងវត្ថុដែលបាញ់ដោយវិធីកោង ខណៈដែលស្ថានីយទូរទស្សន៍ស៊ូដង់រាយការណ៍ថា គឺរថយន្តគ្រាប់បែក ដែលបានវាយប្រហារក្បួនរថយន្តលោកនាយករដ្ឋមន្ត្រី។
សាក្សីម្នាក់បាននិយាយថា៖ “បានឃើញអំឡុងពេលដែលកើតការផ្ទុះឡើង និងការវាយប្រហារដែលបាញ់ចេញមកពីលើអគារខ្ពស់”
ហ្វូងមនុស្សចំនួនដ៏ច្រើន បាននាំគ្នាមកចោមរោមមើល ក្នុងខណៈដែលខាងភ្នាក់ងារប៉ូលីសខំព្យាយាមយ៉ាងខ្លាំងក្លាក្នុងការគ្រប់គ្រងទីកន្លែងកើតហេតុ។
ចំណែកលោក ខាលីដ អូមើរ(Khalid Omer) សមាជិកថ្នាក់ដឹកនាំរបស់ក្រុមពលរដ្ឋចម្រុះ ដែលគាំទ្រការក្រោកឈរឡើងតស៊ូកាលពីឆ្នាំទៅ បានបង្ហាញពីការយល់ឃើញអំពីការលបធ្វើឃាត លោក ហាមដក ថា៖ “ការព្យាយាមលបធ្វើឃាតលោកនាយករដ្ឋមន្ត្រី អាប់ឌុលឡា ហាមដក នេះ គឺជាទំព័រប្រវត្តិសាស្ត្រថ្មីដ៏អាក្រក់ក្នុងការរៀបផែនការធ្វើរដ្ឋប្រហារ ដើម្បីតតាំងការបដិវត្តន៍”។
រ៉យទ័របានបង្ហាញថា លោក ហាមដក គឺជាអ្នកសេដ្ឋសាស្ត្រ និងជាអតីតមន្ត្រីលំដាប់ខ្ពស់របស់អង្គការសហប្រជាជាតិ ជាអ្នកដែលមានសម្ព័ន្ធភាពល្អជាមួយសហគមន៍ពិភពលោក។
គួររំឭកដែរថា អ្នកតវ៉ាប្រឆាំងនឹងកងទ័ពស៊ូដង់ ចំនួនច្រើនពាន់នាក់ បានចេញមកប្រមូលផ្ដុំគ្នាកាលពីប៉ុន្មានសប្ដាហ៍កន្លងទៅ ដើម្បីសម្ដែងការគាំទ្រដល់លោក ហាមដក និងរដ្ឋាភិបាលឈុតថ្មីរបស់លោក។
ការលបធ្វើឃាតនេះបានកើតឡើងក្នុងអំឡុងពេលដែលលោក ហាមដក កំពុងព្យាយាមកែបញ្ហាវិបត្តិសេដ្ឋកិច្ចដ៏ដុនដាប ដែលក្រោយពីការវាយប្រហារក្នុងថ្ងៃចន្ទ(ទី9មីនា) សហព័ន្ធវិជ្ជាជីវៈស៊ូដង់ ឬ SPA (Sudanese Professionals Association) ដែលជាក្បាលម៉ាស៊ីនផ្ដួលរំលំអតីតមេដឹកនាំស៊ូដង់ លោក បាសៀរ បានទាមទារឱ្យមានការតវ៉ាដើម្បីសម្ដែងការគាំទ្រដល់ការអនុញ្ញាតឱ្យជនស៊ីវិលឡើងធ្វើជាអ្នកគ្រប់គ្រងប្រទេស៕
https://www.youtube.com/watch?v=7TJ879i6RiU&feature=emb_logo
https://www.youtube.com/watch?v=foUNQU74liI&feature=emb_logo
https://www.youtube.com/watch?v=RL3Z00EAni8&feature=emb_logo
ប្រភព៖ សារព័ត៌មានបរទេស
March 10, 2020
“មហារីកសុដន់” ឆាប់ដឹងមុន មានសង្ឃឹមព្យាបាលបាន ដោយមិនបាច់វះកាត់
ជំងឺមហារីកសុដន់នៅតែជាប្រភេទជំងឺមហារីកលំដាប់ទី1 ដែលកើតមានចំពោះស្ត្រីនៅជុំវិញពិភពលោក។ ទោះជាយ៉ាងណាក៏ដោយ ស្ត្រីយើងមិនគួរបណ្ដោយខ្លួនឱ្យកើតជំងឺដ៏អាក្រក់មួយនេះ ដែលមកបំផ្លាញទឹកចិត្ត និងបំផ្លាញក្ដីសង្ឃឹមនៅក្នុងជីវិតរបស់យើងនោះទេ។ សម័យវិទ្យាសាស្ត្រទំនើបនេះ ជំងឺមហារីកសុដន់ លែងជាបញ្ហាចោទគួរឱ្យព្រួយបារម្ភក្នុងការព្យាបាលមិនជាសះស្បើយទៀតហើយ ដោយមានវិធីព្យាបាលដោយការវះកាត់សុដន់ចេញជាដើម។ ក៏ប៉ុន្ដែ ហេតុអ្វីស្ដ្រីយើងចាំបាច់ត្រូវឱ្យជំងឺដ៏អាក្រក់នេះមករុករានរាងកាយរបស់យើងដល់កម្រិតមួយព្យាបាលមិនជានោះ? ស្ត្រីយើងគួរតែមានវិធានការប្រុងប្រយ័ត្នខ្លួនជាមុន ទើបជាការប្រសើរ។ ថ្ងៃនេះ ឡារ៉ែន សូមណែនាំនារីទាំងអស់ ដើម្បីឱ្យអ្នកឆាប់ដឹងបានឆាប់រហ័សពីជំងឺមហារីកសុដន់ដូចខាងក្រោមនេះ។
ការពិនិត្យរកមើលជំងឺមហារីកសុដន់តាំងពីដំណាក់កាលដំបូងគឺជាវិធីដ៏ល្អបំផុត ដើម្បីឱ្យការព្យាបាលបានទាន់ពេលវេលា និងមានឱកាសខ្ពស់ក្នុងការជាសះស្បើយ ដោយមិនចាំបាច់ធ្វើការកាត់សុដន់ចេញ ហើយនៅមានជីវិតបន្ដរស់រាន្តទៅថ្ងៃខាងមុខទៀត។ ជំងឺមហារីកសុដន់ដំណាក់កាលដំបូង មិនអាចប្រើប្រាស់ថ្នាំព្យាបាលដោយខ្លួនឯងបាននោះទេ អ្នកត្រូវតែទៅពិនិត្យជាមួយគ្រូពេទ្យជំនាញ ដើម្បីឱ្យដឹងជាក់ច្បាស់អំពីអាការជំងឺ និងទទួលបានការណែនាំក្នុងការព្យាបាលឱ្យបានត្រឹមត្រូវ ទាន់ពេលវេលា និងចៀសវាងទុកឱ្យជំងឺនេះកាន់តែរីករាលដាលកាន់តែធ្ងន់ធ្ងរឡើង។

តើអ្វីទៅជាជំងឺមហារីកសុដន់?
មហារីកសុដន់ គឺជាទម្រង់ពិសេសមួយនៃជំងឺមហារីក ដូចជាជំងឺមហារីកផ្សេងទៀតដែរ ដែលកោសិកាធ្វើការវិវឌ្ឍលូតលាស់យ៉ាងលឿនបំផុត។ កោសិកាមានជំងឺ (សាច់កាច) បង្កើនខ្លួនច្រើនឡើងៗ ដោយមិនមានសណ្តាប់ធ្នាប់ រហូតបង្កើតជាដុំពក ដែលមានសមត្ថភាពវាយប្រហារជាលិកាសរីរាង្គល្អៗនៅជិតនោះ និងអាចពង្រីកការរាតត្បាតជាកោសិកាមហារីកពេញខ្លួន ដែលគេហៅថា ដំណើរប្តូរកន្លែងឈឺ ឬការឆ្លងជំងឺពីតំបន់មួយទៅតំបន់មួយទៀតនៃរាងកាយ។ បើពន្យល់យ៉ាងងាយស្រួល គឺអ្នកប្រហែលជាធ្លាប់ឮថា ជំងឺមហារីកសុដន់តែងតែកើតមានឡើងក្នុងរូបរាងជាដុំពក។ នោះជាការពិត វាជារោគសញ្ញាជំងឺមហារីកសុដន់ទូទៅ។ នោះហើយជាមូលហេតុ ដែលគ្រូពេទ្យជំនាញចង់ណែនាំឱ្យអ្នកទៅពិនិត្យមើលដុំពកថ្មីនៅក្នុងសុដន់ ប្រសិនបើវានៅតែមិនបាត់ទៅវិញក្រោយពេលវដ្តរដូវច្រើនដងហើយ។
ការវះកាត់កោសិកាមហារីក
2ភាគ3នៃជំងឺមហារីកសុដន់ មានកើតនៅលើស្ត្រីដែលមានអាយុចាប់ពី50ឆ្នាំឡើងទៅ។ ផ្ទុយទៅវិញ គេកម្រឃើញជំងឺនេះកើតមានចំពោះស្ត្រីក្រោមអាយុ35ឆ្នាំណាស់ ហើយកាន់តែកម្រ ឬអាចជាករណីពិសេសផង បើមានកើតលើស្ត្រីក្រោមអាយុ20ឆ្នាំ។ ក្នុងករណីនេះ សូមគិតគូរដល់បញ្ហាពូជអម្បូររបស់អ្នកផងដែរ។ នៅក្នុងការព្យាបាលជំងឺមហារីកសុដន់ វិធីសាស្ត្រដែលប្រើញឹកញាប់ជាងគេនោះគឺ ការវះកាត់សុដន់។ សព្វថ្ងៃនេះ ប្រសិទ្ធភាពក្នុងការព្យាបាលក៏មានខ្ពស់ផងដែរ ហើយគ្រោះបាត់បង់សរីរាង្គក៏មានកាន់តែតិចទៅដែរ។ ប្រសិនបើដុំមហារីកមានទំហំតូចជាង3សង់ទីម៉ែត្រ គ្រូពេទ្យជំនាញនឹងសាកល្បងវះឆ្កៀលកាត់យកសាច់នោះចេញ និងស្រាវផ្តាច់ឱ្យអស់ (យកតែដុំមានជំងឺចេញ) ដោយរក្សាក្រពេញផ្សេងៗទៀត ពោលគឺរក្សាសុដន់ឱ្យនៅដដែល។ ចំណែកការវះកាត់តាមបែបវិទ្យុសកម្ម (កាំរស្មី) ឬគីមីវិទ្យា ក៏មានអមជាមួយផងដែរ។ ប្រសិនបើដុំមហារីកធំខ្លាំង គ្រូពេទ្យនឹងវះកាត់ចេញទាំងអស់នូវក្រពេញទឹកដោះ ក្រពេញកូនកណ្តុរ ដោយរក្សាទុកតែសាច់ដុំសុដន់ ដើម្បីឱ្យអ្នកជំងឺអាចធ្វើការវះកាត់កែទម្រង់សុដន់ឡើងវិញបាននៅថ្ងៃក្រោយ។

យើងនឹងបង្ហាញអ្នកនូវរោគសញ្ញាមួយចំនួន ដែលអ្នកគួរតែចាប់អារម្មណ៍ ដើម្បីទទួលបានការពិនិត្យឱ្យបានទាន់ពេលវេលាដូចខាងក្រោមនេះ៖
ការឈឺចាប់ : មានអារម្មណ៍ឈឺចាប់ ភាគច្រើនមិនសូវទាក់ទងទៅនឹងមហារីកសុដន់នោះទេ។ តែវាជាការឈឺចាប់របស់សុដន់ ដែលជាទូទៅកើតឡើងដោយសារតែការប្រែប្រួលអ័រម៉ូន គីសសុដន់ ភាពតានតឹង ឬការប្រើថ្នាំពន្យារកំណើតជាដើម។ ទោះជាយ៉ាងណាក៏ដោយ ពេលខ្លះជំងឺមហារីកសុដន់អាចមានការឈឺចុកចាប់តែម្ខាង ឬទាំងសងខាងនៃសុដន់របស់អ្នក។
ក្បាលសុដន់លិបចូលក្នុង : ដោយសារតែមានការប្រែប្រួលកោសិកា នោះទើបធ្វើឱ្យក្បាលដោះដែលមានបញ្ហាទាញលិបចូលទៅខាងក្នុងអស់។
មានអាការហើមសុដន់ : ទោះបីជាអ្នកមិនបានពិនិត្យឃើញដុំពកនៅលើសុដន់ក៏ដោយ តែសភាពរបស់សុដន់ ឬផ្នែកណាមួយរបស់វាមានលក្ខណៈហើម និងតឹងជាដើម ក៏អ្នកត្រូវទៅពិនិត្យឱ្យបានល្អិតល្អន់ជាមួយគ្រូពេទ្យជំនាញដែរ។
សុដន់មានសភាពគគ្រាមដូចសម្បកផ្លែក្រូច : នេះជាសញ្ញាសម្គាល់សំខាន់បំផុត ដើម្បីកំណត់លក្ខណៈរបស់ជំងឺមហារីកសុដន់ ដោយវាមានសភាពខួចនៅលើសុដន់ ដែលមើលទៅស្រដៀងនឹងសម្បកក្រូចដែរ។
កើតកូនកណ្តុរឡើងធំនៅលើសុដន់ : ចំពោះជំងឺមហារីកសុដន់ អ្នកអាចសម្គាល់បានថា មានកើតកូនកណ្តុររីកធំនៅក្នុងតំបន់ក្លៀក ដែលនេះជាសញ្ញាបញ្ជាក់ថា មានការរីករាលដាលពីសុដន់ទៅដល់ប្រព័ន្ធកូនកណ្តុរហើយ។
ការហូរទឹកពីសុដន់មិនធម្មតា : ការហូរទឹកមិនធម្មតាចេញពីសុដន់ ក្រៅពីទឹកដោះ (ប្រសិនបើអ្នកបំបៅកូនដោយទឹកដោះម្តាយ) គឺជាសញ្ញាអាសន្នមួយនៃជំងឺមហារីកសុដន់ ប្រសិនបើមានរោគសញ្ញានេះ អ្នកមិនត្រូវបង្អង់យូរ ក្នុងការពិនិត្យព្យាបាលនោះទេ។
ការស្រកទម្ងន់ដោយមិនដឹងពីមូលហេតុ : ជំងឺមហារីក ជាធម្មតាគឺបណ្តាលឱ្យបាត់បង់ចំណង់អាហារ និងបញ្ហាស្រកទម្ងន់ដោយមិនដឹងពីមូលហេតុ។
ពណ៌នៃក្បាលសុដន់ប្រែប្រួល : ជំងឺមហារីកសុដន់ អាចធ្វើឱ្យសុដន់ ឬក្បាលសុដន់របស់អ្នកមានពណ៌ក្រហម សំប៉ែត និងមានពងបែកនៅបរិវេណសុដន់។
ការផ្លាស់ប្តូរទំហំរបស់សុដន់ : វាជារឿងធម្មតាទេ ដែលស្រ្តីមានទំហំ ឬរាងសុដន់មិនស្មើគ្នា។ ប៉ុន្តែប្រសិនបើ វាមានការផ្លាស់ប្តូរទំហំ ឬរូបរាងរបស់វាភ្លាមៗ នោះអ្នកគួរតែទៅជួបជាមួយគ្រូពេទ្យដើម្បីពិនិត្យឱ្យបានច្បាស់។

ការព្យាបាលដំណាក់កាលដំបូងនេះជួយឱ្យអ្នកជំងឺមានទំនុកចិត្តខ្ពស់។ យ៉ាងណាមិញចំពោះការវះកាត់សុដន់ អាចធ្វើឡើងនៅក្នុងរយៈពេលមិនលើសពី4-6ម៉ោង អ្នកជំងឺភាគច្រើនអាចអង្គុយលើគ្រែ និងអាចដើរបាន អាចសម្រាកព្យាបាលនៅមន្ទីរពេទ្យរយៈពេល5-7ថ្ងៃ បន្ទាប់មកអ្នកជំងឺអាចទៅផ្ទះវិញបានហើយ។ ប្រសិនបើអ្នកមានរោគសញ្ញាដូចបានរៀបរាប់ខាងលើ នោះអ្នកគួរតែទៅពិគ្រោះយោបល់ជាមួយគ្រូពេទ្យជំនាញ ដើម្បីទទួលការព្យាបាលឱ្យបានទាន់ពេលវេលា៕
March 10, 2020
ធ្វើតាមសន្យា ..តារាមច្រៀង ខេម ស្ម័គ្រចិត្តចូលរួមផ្សព្វផ្សាយបន្លែធម្មជាតិផ្សារទំនើបកសិផលធម្មជាតិឡេងណាវ៉ាត្រា
ថ្មីៗនេះ តារាចម្រៀងសំឡេងស្អក ខេម បានធ្វើតាមពាក្យសន្យារបស់ខ្លួនពិតមែន ដោយលោកបានចុះជួបកសិករផ្ទាល់ ដើម្បីស្វែងយល់ក៏ដូចជា លើកទឹកចិត្តកសិករខ្មែរយើងក្នុងផលិតបន្លែផ្លែឈើក៏ដូចជាត្រីសាច់ដែល មិនមានប្រើជាតិគីមីនោះ។ តារាចម្រៀងលោក ខេម បានប្រកាសថា ខ្លួននឹងចូលរួមផ្សព្វផ្សាយផ្សារកសិផលធម្មជាតិ ឡេង ណាវ៉ាត្រា ដោយមិនគិតប្រាក់ឡើយ ដើម្បីឱ្យផលិតផលធម្មជាតិដែលដាំដោយកសិករខ្មែរមានទីផ្សារ។
លោក ខេម បាននិយាយថា សូមបងប្អូន ប្រជាកសិករព្រួយបារម្ភលើទីផ្សារ បន្លែផ្លែឈើដែលដាំដោយធម្មជាតិតទៅទៀត ព្រោះមាន ផ្សារទំនើបកសិផលធម្មជាតិឡេងណាវ៉ាត្រាចាំ ទទួលទិញហើយ នឹងសូមដាំដុះតាមលក្ខណៈស្តង់ដារបច្ចេកទេស។ ការចុះទៅជួបប្រជាកសិករនោះ ខេមនិយាយថា ខ្លួនចូលរួមនោះជាការស្ម័គ្រចិត្ត ដោយមិនគិតប្រាក់ឡើយ ដើម្បីរួមចំណែកដល់ទីផ្សារ កសិករខ្មែរឲ្យមានទីផ្សារ។ តារាចម្រៀងល្បីឈ្មោះរូបនេះបានសម្ដែងភាពសប្បាយចិត្តជាខ្លាំង នៅពេលដែលបានធ្វើសកម្មភាពជួយដល់ កសិករខ្មែរ ពិសេសជួយ ដល់អ្នកខេត្តខ្លួនបែបនេះ។ គួរបញ្ជាក់ដែរថា ទីតាំងដែលម្ចាស់បទ”ស្រលាញ់ស្រី១ម៉ែត្រ៧៣” រូបនេះចុះទៅនោះ គឺស្ថិតនៅ ដឹកដីខេត្ត កំពង់ឆ្នាំង ដែលជាស្រុកកំណើតរបស់លោកតែម្ដង។ ខេម បានសិក្សាស្វែងយល់ក៏ដូចជាលើកទឹកចិត្តកសិករដែលលោកបានចុះទៅជួបនោះ ហើយប្រជាពលរដ្ឋពិសេសកសិករខ្មែរបានសម្ដែងភាពសប្បាយចិត្តជាខ្លាំងនៅពេលដែលបានជួយ លោក ខេម។
មិនមែនមានតែ ខេម ម្នាក់ប៉ុណ្ណោះទេ តាមការប្រកាសជាសាធារណៈកន្លងទៅ គេឃើញមាន តារាចម្រៀងល្បីជាច្រើនទៀតដែល នឹងស្ម័គ្រចិត្តចូលរួមផ្សព្វផ្សាយ ផ្សារទំនើបកសិផលធម្មជាតិឡេងណាវ៉ាត្រា របស់ឧកញ៉ា វ័យក្មេងដែលកំពុងមានប្រជាប្រិយភាពនេះ ក្នុងនោះមានដូចជា តារាចម្រៀង លោក ខេមរៈ សិរីមន្ត ប៉ែន ចំរ៉ុង កញ្ញា តាន់ ច័ន្ទសីម៉ា ជាដើម។ តាមប្រភពច្បាស់ការមួយទៀតបានទម្លាយឱ្យដឹងថា កំពូលតារាចម្រៀងល្បីឈ្មោះ លោក ព្រាប សុវត្ថិ ក៏អាចនឹងស្ម័គ្រចិត្តចូលរួមផ្សព្វផ្សាយ ផ្សារទំនើបកសិផលធម្មជាតិឡេងណាវ៉ាត្រា ដោយឥតគិតថ្លៃថ្លៃផងដែរ៕

March 10, 2020
ក្រៅពីអាជីពសម្ដែងភាពយន្ដ ទ្រី ដារ៉ាវុធ ព្យាយាមពង្រឹងតម្លៃខ្លួនជាពិធីករ
តារាសម្ដែងប្រុសមានឈ្មោះល្បីនៅភាពយន្ដ «កុំងាកក្រោយ » លោក ទ្រី ដារ៉ាវុធ បានឱ្យដឹងថា មួយរយៈចុងក្រោយនេះខ្លួនកំពុងមមាញឹកខ្លាំងលើការថតភាពយន្តភាគឱ្យស្ថានីយ៍ទូរទស្សន៍ក្នុងស្រុក តែក៏ឈ្លៀតពេលខ្លះធ្វើជាពិធីករតាមកម្មវិធីទូទៅផងដែរ។
រំលឹកពីបទពិសោធន៍ជាពិធីករ តារាសម្តែង និងជាតារាម៉ូដែលរូបនេះបានទម្លាយប្រាប់អ្នកសារព័ត៌មានថា ដំបូងបំផុតនៃអាជីពជាពិធីករខ្លួនទទួលបានប្រាក់តម្លៃកម្លាំងពលកម្មត្រឹម ២០ដុល្លារប៉ុណ្ណោះ ប៉ុន្តែបច្ចុប្បន្នតម្លៃពលកម្មនេះបានប្រែប្រួលហើយ ដោយខ្លួនអាចទទួលបានចន្លោះពី៣៥០ដុល្លារទៅ៥០០ដុល្លារក្នុងមួយកម្មវិធី។ ត្បិតតម្លៃនេះមិនច្រើនស្មើរពិធីករ ពិធីការនីអាជីពតែម្តងក្តី តែ ដារ៉ាវុធ រីករាយណាស់ដែលខ្លួនអាចទទួលបានវា ព្រោះវាជាអ្វីដែលខ្លួនខិតខំប្រឹងប្រែងក្នុងនាមជាសិល្បករមួយរូប។
ជានិច្ចកាលគេតែងឃើញ អតីត Freshie Boy ចំណាត់ថ្នាក់លេខ១ប្រចាំ២០១៦ កាន់ម៉ៃក្រូហ្វូនក្នុងទឹកមុខប្រកបដោយភាពរីករាយតាមកម្មវិធីនានា។ ទ្រី ដារ៉ាវុធ ជាតារាម៉ូដែលម្នាក់ តែងធ្វើឲ្យប្រិយមិត្តមានការចាប់អារម្មណ៍ តាមរយៈរូបភាពសិចស៊ីប្លែកភ្នែកជាច្រើនសន្លឹកកាលពីពេលកន្លងទៅ ដោយលោកតែងស្លៀកតែលីអូ និងដោះអាវបញ្ចេញសាច់ដុំទ្រូងទាំងដុំៗ៕

March 10, 2020
អ្នកជំនាញចិត្តសាស្ត្របញ្ជាក់ថាអាណាព្យាបាលជាច្រើនលើពិភពលោកកំពុងបង្រៀនកូនខុស
ស្ទើរគ្រប់អាណាព្យាបាលទាំងអស់លើពិភពលោក សុទ្ធតែចង់អប់រំកូនឱ្យក្លាយជាមនុស្សល្អ តែអ្វីដែលជាបញ្ហាប្រឈម និងធ្វើឱ្យកូនៗក្លាយជាមនុស្សកាន់តែអាក្រក់ គឺវិធីសាស្ត្របង្រៀនដែលអាណាព្យាបាលភាគច្រើនប្រើចំពោះកូន គឺជាវិធីសាស្រ្តមិនត្រឹមត្រូវ។
លោក Adam Grant អ្នកជំនាញចិត្តសាស្រ្ត បានលើកឡើងថា អាណាព្យាបាលជាច្រើន គិតថា
រាល់ពេលកូនធ្វើខុសគឺត្រូវតែទទួលពិន័យដើម្បីអប់រំពួកគេកុំឱ្យដើរជាន់កំហុសដដែល។ មានអ្នកខ្លះអង្គុយចាំមើលតែសកម្មភាពរបស់កូន ឱ្យតែកូនធ្វើខុស ឬមានឥរិយាបថមិនល្អភ្លាម គាត់នឹងស្តីបន្ទោស ដាក់ពិន័យ និងប្រាប់ភ្លាមថា រឿងដែលក្មេងកំពុងធ្វើនោះជារឿងខុស ហើយធ្វើតាមគាត់ទើបជារឿងត្រឹមត្រូវ។ ការធ្វើបែបនេះ ពេលខ្លះអាចធ្វើឱ្យក្មេងក្លាយជាមនុស្សម្នាក់ដែលដើរត្រូវបន្ទាត់របស់មនុស្សទូទៅ តែមិនប្រាកដថាអាចធ្វើឱ្យក្មេងក្លាយជាមនុស្សខ្លាំងបាននោះទេ ព្រោះគ្រាន់ដឹងថាសកម្មភាពបែបណាខុស ហើយសកម្មភាពបែបណាត្រូវមិនទាន់គ្រប់គ្រាន់នៅឡើយទេសម្រាប់ជីវិតមនុស្សម្នាក់ៗ។
លោកបានបញ្ជាក់ថា ការអប់រំតាមបែបបុរាណ គឺភាគច្រើនជំរុញឱ្យមនុស្សធ្វើអ្វីដដែលៗនៅលើបន្ទាត់មួយដូចៗគ្នា គឺរស់នៅក្នុងទម្លាប់ដូចៗគ្នា មានសកម្មភាពដូចៗគ្នា និងការគិតដូចៗគ្នា។ គ្រាន់តែក្មេងដើរខុសបន្ទាត់តែបន្តិច បើទោះបីជារឿងនោះល្អ ឬមិនសូវល្អក៏ដោយក៏មនុស្សធំភាគច្រើនតម្រង់មករកភាពដើមវិញ។
ចំណុចនេះបានបង្កើតឱ្យមានបញ្ហាជាច្រើនសម្រាប់អនាគតរបស់មនុស្សលើពិភពលោក ដែលយើងកំពុងត្រូវការមនុស្សប្រកបដោយសមត្ថភាពខ្លាំងជាងមុន មានថាមពលនៃភាពច្នៃប្រឌិតខ្ពស់ជាងមុន និងមានភាពឆ្លាតវៃមុតស្រួចជាងមុន។
លោក Adam Grant បាននិយាយថា៖ «ជាធម្មតានៅក្នុងសហគមន៍ នីមួយៗយើងមើលឃើញថា នៅពេលគេឃើញមានមនុស្សណាម្នាក់ចេញពីសហគមន៍នោះ ហើយក្លាយជាមនុស្សជោគជ័យ ឬក្លាយជាមនុស្សដែលមានសមិទ្ធផលជីវិតខ្លាំងមនុស្សគ្រប់គ្នាតែងតែគិតថាគាត់ជាមនុស្សអស្ចារ្យ
(Hero)។ អ្វីដែលនៅពីក្រោយភាពអស្ចារ្យនេះគឺសិល្បៈក្នុងការអប់រំរបស់អាណាព្យាបាល»។
អ្នកជំនាញខាងលើបានបញ្ជាក់ថា ជាធម្មតាបើគេមើលលើមនុស្សដែលមានគំនិតច្នៃប្រឌិតខ្ពស់ៗ មានសមត្ថភាពខ្លាំងនៅក្នុងពិភពលោក គេនឹងឃើញថាអ្នកខ្លាំងទាំងអស់នោះទទួលការអប់រំបានល្អទាំងក្នុងសាលា និងក្នុងគ្រួសារ។ ការឆ្លើយតបដោយវិជ្ជមានរបស់អាណាព្យាបាលក្នុងការបណ្តុះផ្នត់គំនិតល្អ ទើបជាចម្លើយយ៉ាងសំខាន់ដែលរុញច្រានឱ្យក្មេងក្លាយជាមនុស្សខ្លាំង មិនមែនដើរតាមទម្លាប់ដដែលៗនោះទេ។ អ្វីដែលអាណាព្យាបាលឆ្លាតវៃទាំងអស់នោះធ្វើ គឺបង្រៀនកូនឱ្យចេះធ្វើអ្វីថ្មីៗ ក្នុងវិធីខុសប្លែកពីទម្លាប់ពិន័យដដែលៗ ហើយពួកគេអភិវឌ្ឍសមត្ថភាពកូនដោយការលើកទឹកចិត្ត។
ជំនួសឱ្យការពិន័យនៅពេលធ្វើខុសគេ គាត់អាចលួងលោមកូនឱ្យមើលឃើញពីហេតុ និងផលនៃសកម្មភាព បន្ទាប់មកក៏ជំរុញកូនឱ្យធ្វើអ្វីដោយផ្អែកលើភាពខ្លាំងរបស់ខ្លួន។ ពេលខ្លះគាត់អាចខុសគេបន្តិចមែនតែគាត់ខ្លាំងខុសគេ មិនមែនខុសគេដោយភាពផ្តេសផ្តាសនោះទេហេតុនេះប្រសិនបើយើងមើលឃើញពីគុណសម្បត្តិនៃសកម្មភាពរបស់កូនច្បាស់លាស់ហើយ យើងគួរជំរុញ និងចេះផ្តល់រង្វាន់។ កុំបង្រៀនមនុស្សដោយភាពឈឺចាប់ តែត្រូវចេះដាស់ស្មារតីដោយថាមពលនៃភាពរីករាយ ឱ្យកូនចេះរស់ក្នុងសេចក្តីសុខ និងការអភិវឌ្ឍ ជាជាងអំពើហិង្សា។
អ្នកចិត្តសាស្ត្រខាងលើបានបញ្ជាក់ផងដែរថា ជំនួសឱ្យការកំណត់បន្ទាត់ឱ្យកូនដើរ យើងគួរពង្រឹងសមត្ថភាពនៃការពិចារណាឱ្យបានល្អ បង្រៀនកូនឱ្យមានភាពចាស់ទុំ និងចេះប្រើប្រាស់ហេតុផលដើម្បីដោះស្រាយបញ្ហាក្នុងការរស់នៅជាក់ស្តែង។
នៅពេលក្មេងមានប្រភពចំណេះដឹងច្បាស់លាស់ក្នុងការវិភាគ ពិចារណាស៊ីជម្រៅ និងមានទម្លាប់រស់នៅល្អហើយ យើងនឹងមិនចាំបាច់ខ្វល់ច្រើនថាគាត់នឹងអាចប្រឈមនឹងបញ្ហា ឬធ្វើអ្វីខុសប្លែកពីទម្លាប់របស់មនុស្សទូទៅនោះទេ ព្រោះយើងដឹងច្បាស់ថាគាត់មានប្រព័ន្ធការពារមួយដ៏ល្អរួចបាត់ទៅហើយ។ ម្យ៉ាងវិញទៀត យើងដឹងច្បាស់ណាស់ថាទោះជាយ៉ាងណាក៏ដោយអាណាព្យាបាលនឹងមិនអាចលែងដៃពីកូនបាននោះទេ បើទោះបីជាដឹងថាគេមានវិធីសាស្ត្រគិតល្អហើយក៏ដោយ។ ហេតុនេះអ្វីដែលអាណាព្យាបាលអាចធ្វើបាន គឺចែករំលែកបទពិសោធ និងជួយប្រឹក្សាជាមួយកូននៅពេលពួកគេត្រូវការជំនួយ ឬសង្ស័យថាគាត់មិនទាន់អាចបែងចែកហេតុផលនៃសកម្មភាពទាំងឡាយណាដែលគ្រោះថ្នាក់ដល់ជីវិតរបស់គាត់៕
March 10, 2020
ពេលវេលាតែ “2ថ្ងៃ” ក៏អាចធ្វើឱ្យជីវិតមនុស្សយើងផ្លាស់ប្ដូរបានដែរ…
អាយុរបស់ខ្លួនឯង បើ “មិនចង់ចាំ” ក៏មិនអីដែរ
តែ “ថ្ងៃផុតកំណត់” របស់វត្ថុមួយចំនួន មិនចង់ចាំ មិនបានទេណា៎…
ព្រោះការពិតទៅ ត្រូវតែខំព្យាយាម “ចាំ” ឱ្យបាន
បើមិនចង់ “ខាតបង់” ឬ “ហួសពេលកែកុន”
ជាពិសេស វត្ថុដែលមានតម្លៃ ជាទឹកប្រាក់រាប់ម៉ឺន រាប់សែន(ដុល្លារ)…
ហាស ហាស ហា…
ទាំងអស់នេះ តាមរយៈព័ត៌មាន បានរៀបរាប់ថា កាលពីពេលថ្មីៗនេះ ស្ថាប័នឆ្នោតជាតិរបស់រដ្ឋខូឡូរ៉ាដូ សហរដ្ឋអាមេរិក បានផូស្តលើហ្វេសប៊ុកនិយាយពីបុរសអ្នកសំណាងល្អម្នាក់ ដែលប៊ិះនឹងក្លាយជា “បុរសសំណាងអាក្រក់” ដោយមិនដឹងខ្លួន។
នៅពេលរូបគេបានទិញសន្លឹកឆ្នាត ឌឹ ឡាកគី ហ្វ័រ ឡៃហ្វ៍ រួច និងទម្រាំតែដឹងខ្លួនថា ត្រូវរង្វាន់ទឹកប្រាក់ចំនួន 2,5000ដុល្លារ…និងធ្វើដំណើរទៅឡើងទទួលប្រាក់រង្វាន់នោះ ក៏ជ្រុលហួសទៅដល់ថ្ងៃទី4 មីនា ដែលនៅសល់តែ 2ថ្ងៃទៀតប៉ុណ្ណោះ សន្លឹកឆ្នោតនោះ នឹង “ផុតកំណត់” លែងមានសិទ្ធិទទួលបានរង្វាន់ នៅថ្ងៃទី6 មីនា!!!។
ទាំងអស់នេះ ខាងស្ថាប័នឆ្នោតរដ្ឋ នៃសហរដ្ឋអាមេរិក បាននិយាយថា បើម្ចាស់សន្លឹកឆ្នោតដែលត្រូវរង្វាន់ មិនធ្វើដំណើរមកទទួលប្រាក់រង្វាន់ទេនោះ ប្រាក់រង្វាន់នោះ ក៏នឹងត្រូវនាំយកទៅបូករួមជាមួយប្រាក់រង្វាន់ក្នុងគ្រាបន្តទៀត ដែលនឹងធ្វើឱ្យវាកាន់តែកើនច្រើនឡើងទៅជារឿយៗ៕
ប្រភព៖ សារព័ត៌មានបរទេស
March 9, 2020
កម្ពុជាប្រកាសស្តារវិស័យ ទេសចរណ៍បណ្តាលពីផលប៉ះពាល់ជំងឺ COVID-19 ខណៈការផ្សព្វផ្សាយពីសក្តានុពលទេសចរណ៍នៅតែបន្ត
ស្ថិតនៅក្នុងស្ថានភាពដែលកំពុងរងឥទ្ធិពលអាក្រក់ និងគួរឱ្យព្រួយបារម្ភចំពោះវិស័យទេសចរណ៍កម្ពុជា ដោយសារវិបត្តិសេដ្ឋកិច្ចពិភពលោក និងជាពិសេសនាពេលបច្ចុប្បន្នដែលកំពុងតែប្រឈមនឹងភាពភ័យខ្លាចនៃការរាតត្បាតរបស់វីរុស Covid-19 នោះ តាមការព្យាករសាជាថ្មីរបស់ក្រសួងទេសចរណ៍ បានបង្ហាញថា ក្នុងឆ្នាំ2020 នេះ ចំនួនភ្ញៀវទេសចរអន្តរជាតិមកកាន់កម្ពុជា អាចនឹងមានការធ្លាក់ចុះរហូតដល់ប្រមាណ 1លាននាក់។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា ដោយសារតែវិបត្តិជំងឺ Covid-19 បញ្ហាសង្គ្រាមពាណិជ្ជកម្ម និងបញ្ហាមួយចំនួនទៀតដែលមានប្រភពពីកត្តាខាងក្រៅ បានបណ្ដាលឱ្យកម្ពុជាទទួលភ្ញៀវទេសចរអន្តរជាតិមិនបានដូចការព្យាករជាក់ស្ដែងនៅឆ្នាំ2020 នេះ។ ការព្យាករសាជាថ្មីរបស់ក្រសួងទេសចរណ៍ បានបង្ហាញថា ភ្ញៀវទេសចរអន្តរជាតិនឹងមានការធ្លាក់ចុះប្រមាណ 1លាននាក់ ខណៈប្រទេសថៃក៏បានព្យាករដែរថាប្រទេសគេនឹងជួបបញ្ហាធ្លាក់ចុះភ្ញៀវទេសចរអន្តរជាតិប្រមាណ 6លាននាក់។
ឯកឧត្តម ថោង ខុន បានបន្តថា៖“ប្រសិនបើភាគីពាក់ព័ន្ធមិនជួយគ្នាអនុវត្តវិធានការនានារបស់រាជរដ្ឋាភិបាល និងវិធានការរបស់ក្រសួងទេសចរណ៍ដើម្បីដោះស្រាយឧបសគ្គនៅចំពោះមុខនេះទេ ភ្ញៀវទេសចរនៅកម្ពុជានឹងធ្លាក់ចុះប្រមាណ40% ប៉ុន្តែបើភាគីពាក់ព័ន្ធចូលរួមសាមគ្គីគ្នាជម្នះឧបសគ្គនេះបាន ភ្ញៀវទេសចរប្រហែលជាធ្លាក់ចុះត្រឹម 10-15%ប៉ុណ្ណោះ”។
តាមការអះអាងរបស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា ទោះបីជាកម្ពុជាជួបវិបត្តិទាំងនេះក៏ដោយ ប៉ុន្តែនៅឆ្នាំ2025 ភ្ញៀវទេសចរនៅកម្ពុជានឹងកើនឡើងប្រមាណ 25% មកវិញ។ នេះបើតាមការព្យាករ។
ដោយឡែកវិស័យទេសចរណ៍ទូទាំងសកលលោក បានព្យាករថា នឹងខាតបង់ថវិកាជាង 22 ពាន់លានដុល្លារ។ ប្រធានអង្គការនៃក្រុមប្រឹក្សាដំណើរកម្សាន្ត និងទេសចរណ៍ពិភពលោក (WTTC) បានមានប្រសាសន៍ថា៖“ការរីករាលដាលនៃជំងឺឆ្លង COVID-19 អាចនឹងធ្វើឱ្យវិស័យទេសចរណ៍ទូទាំងសកលលោក ខាតបង់ថវិកាជាង 22ពាន់លានដុល្លារ ហើយការខូចខាតនេះ ក៏មានការចូលរួមចំណែកពីការធ្លាក់ចុះនៃចំនួនអ្នកទេសចរចិនផងដែរ។ នេះបើតាមការចេញផ្សាយដោយសារព័ត៌មាន CNA Channel NewsAsia កាលពីថ្ងៃសុក្រ ទី28 ខែកុម្ភៈ ឆ្នាំ2020។
ប្រធានអង្គការ WTTC លោកស្រី ក្លូរៀ ហ្គេវ៉ារ៉ា (Gloria Guevara) បានធ្វើការកត់សម្គាល់ខាងលើប្រាប់សារព័ត៌មានអេស្ប៉ាញ អែល ម៉ាន់ឌូ (El Mundo) ដោយបានគូសបញ្ជាក់យ៉ាងដូច្នេះថា “វាដូចជាលឿនពេកដើម្បីដឹងពីទំហំខាតបង់ថា…ការរីករាលដាលនៃជំងឺ COVID-19 អាចនឹងធ្វើឱ្យវិស័យទេសចរណ៍សកលលោកខាតបង់ថវិកាជាង 22ពាន់លានដុល្លារ។
ប៉ុន្តែ WTTC បានធ្វើការគណនាជាបឋមនេះ ក្រោមកិច្ចសហការជាមួយក្រុមហ៊ុនស្រាវជ្រាវសេដ្ឋកិច្ច អុកស៍ហ្វ៉ដ(Oxford Economics)”។ គួរបញ្ជាក់តាមលោកស្រី Gloria ទៀតថា ការគណនានេះ គឺផ្អែកលើបទពិសោធនៃវិបត្តិដែលបង្កឡើងដោយជំងឺឆ្លងមុនៗដូចជាជំងឺ SARS ឬ H1N1 ព្រមទាំងផ្ដោតលើការធ្លាក់ចុះនៃភ្ញៀវទេសចរចិន ក្នុងរយៈពេលប៉ុន្មានសប្ដាហ៍ថ្មីនេះ។
អ្វីដែលជាភាពជាក់ស្តែងនោះ គឺការផ្អាកជើងហោះហើរ និងការណែនាំរបស់រដ្ឋាភិបាល របស់ប្រទេសនានាទូទាំងពិភពលោក ឱ្យប្រជាជនរបស់ពួកគេ មានការប្រុងប្រយ័ត្ន និងកុំធ្វើដំណើរទៅកាន់បណ្តាប្រទេសដែលមានការផ្ទុះជំងឺ COVID-19 ខ្លាំងក្លានោះ ទាំងអស់នេះគឺសុទ្ធតែជាចំណាត់ការដែលបង្កផលប៉ះពាល់ធ្ងន់់ធ្ងរ ទៅដល់វិស័យទេសចរណ៍។
ជាបទពិសោធ ក្នុងគ្រាដែលពិភពលោកជួបវិបត្តិជំងឺ SARS នៅចុងឆ្នាំ2002 ដល់ឆ្នាំ2003ចំនួនភ្ញៀវទេសចរដែលមកទស្សនានៅកម្ពុជា មានការធ្លាក់ចុះយ៉ាងគំហុក ប៉ុន្តែនៅខណៈនោះក្រសួងទេសចរណ៍បានជំរុញឱ្យមានចលនាទេសចរក្នុងស្រុក ដើម្បីជួយទប់ទល់ការចំណាយរបស់សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន និងមូលដ្ឋានអាជីវកម្មទេសចរណ៍នានា។ ជាក់ស្ដែង ដោយអនុវត្តតាមវិធានការនេះហើយ កម្ពុជាបានទទួលនូវកំណើនភ្ញៀវទេសចរក្នុងស្រុក ដល់ទៅ 9% ហើយបញ្ហានានាត្រូវបានដោះស្រាយគួរជាទីគាប់ប្រសើរ។
ជាអកុសល នៅចុងឆ្នាំ2019 រហូតដល់ដើមឆ្នាំ2020 នេះ ពិភពលោកបានជួបប្រទះវិបត្តិជំងឺ Covid-19 ថ្មីនេះទៀត ដែលបណ្ដាលឱ្យវិស័យទេសចរណ៍លើពិភពលោកជួបបញ្ហាឱនភាព ក្នុងនោះកម្ពុជាក៏គេចមិនផុតពីបញ្ហានេះដែរ ដូច្នេះហើយបានជារាជរដ្ឋាភិបាលកម្ពុជា និងក្រសួងទេសចរណ៍បានដាក់ចេញវិធានការ ជំរុញឱ្យមានចលនាទេសចរក្នុងស្រុកឱ្យកាន់តែខ្លាំងក្លា។
ជាមួយនឹងការរំពឹងទុកថា ភ្ញៀវទេសចរណ៍ក្នុងស្រុកនឹងមានការកើនឡើងដែរនោះ រដ្ឋមន្ត្រីក្រសួងទេសចរណ៍ បានអំពាវនាវដល់មគ្គុទ្ទេសក៍ទេសចរណ៍ក្នុងប្រទេស ជាពិសេសនៅខេត្តសៀមរាប ត្រូវត្រៀមខ្លួនទទួលភ្ញៀវទេសចរក្នុងស្រុកឱ្យបានត្រឹមត្រូវ និងបញ្ចេញឱ្យអស់ពីសមត្ថភាព ដើម្បីបកស្រាយពន្យល់ប្រាប់ពួកគាត់នូវអ្វីដែលមាននៅតាមគោលដៅទេសចរណ៍នីមួយៗ ខណៈពួកគាត់ក៏ចង់ដឹងពីព័ត៌មាន ឬអាថ៌កំបាំងផ្សេងទៀតដែលបង្កប់លើជញ្ជាំងប្រាសាទ ប្រាង្គប្រាសាទ តំបន់បេតិកភណ្ឌវប្បធម៌ អច្ឆរិយភាពរបស់ស្នាដៃដូនតាខ្មែរជាដើមដែរ។
ជាមួយគ្នានេះដែរ នាយកដ្ឋានអភិវឌ្ឍផលិតផលទេសចរណ៍ នៃក្រសួងទេសចរណ៍ កម្ពុជា បានអះអាងចំពោះភ្ញៀវទេសចរអន្តរជាតិថា “កម្ពុជាមានសុខសន្តិភាព សុវត្ថិភាព គ្មានការឆ្លងជំងឺ Covid-19 និងមានឱកាសច្រើនសម្រាប់ការវិនិយោគ” ដែលការផ្សព្វផ្សាយនេះធ្វើឡើងដើម្បីបង្ហាញពីសក្តានុពលទេសចរណ៍ក្រោមប្រធានបទ “កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ”។ នេះបើតាមក្រុមការងារក្រសួងទេសចរណ៍ក្នុងពិព័រណ៍ទេសចរណ៍អន្តរជាតិនៅសហរដ្ឋអាមេរិក។
ក្រុមការងារដែលដឹកនាំដោយលោក សូ វិសុទ្ធី (So Visothy) អនុរដ្ឋលេខាធិការ និងលោក ថោងរដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានចូលរួម និងផ្សព្វផ្សាយ នៅក្នុងវេទិកាទេសចរណ៍អាស៊ាន (ATF2021) តាមរយៈការតាំងបង្ហាញស្តង់កម្ពុជា នៃការចូលរួមតាំងពិព័រណ៍ទេសចរណ៍អន្តរជាតិ (Travel and Adventure Show) ដែលបានប្រព្រឹត្តទៅកាលពីថ្ងៃទី29 ខែកុម្ភៈ ដល់ថ្ងៃទី1 ខែមីនា ឆ្នាំ2020 កន្លងទៅនៅទីក្រុងអាត្លង់តា រដ្ឋចចជា សហរដ្ឋអាមេរិក។
ការផ្សព្វផ្សាយនេះ ជាការបង្ហាញពីសក្តានុពលនៃវិស័យទេសចរណ៍កម្ពុជា ដែលនឹងទទួលធ្វើជាម្ចាស់ផ្ទះវេទិកាទេសចរណ៍អាស៊ាន (ATF2021) នាពេលខាងមុខ ដើម្បីទាក់ទាញភ្ញៀវទេសចរ និងវិនិយោគិនពីអាមេរិកមកទស្សនាកម្ពុជាឱ្យកាន់តែច្រើនថែមទៀត។
នាឱកាសនោះ គណៈប្រតិភូនៃក្រសួងទេសចរណ៍បានអះអាងចំពោះភ្ញៀវទេសចរ និងដៃគូអន្តរជាតិយ៉ាងដូច្នេះថា៖ “កម្ពុជា បច្ចុប្បន្នមានសុខសន្តិភាព មានសុវត្ថិភាព ផ្ដល់ភាពកក់ក្ដៅចំពោះភ្ញៀវទេសចរ និងអ្នកដំណើរគ្រប់គ្នា ជាពិសេសគ្មានការឆ្លងជំងឺ Covid-19 និងផ្ដល់ឱកាសពិសេសៗយ៉ាងច្រើនសម្រាប់អ្នកវិនិយោគ និងអ្នកធ្វើធុរកិច្ចគ្រប់ៗគ្នា”។
លោក ថោង រដ្ឋសក្តិ បានឱ្យដឹងថា ព្រឹត្តិការណ៍ Travel & Adventure Show ជាពិព័រណ៍ទេសចរណ៍ធំជាងគេបង្អស់របស់សហរដ្ឋអាមេរិក ដែលប្រារព្វធ្វើឡើងជារៀងរាល់ឆ្នាំនៅទីក្រុង ចំនួន10 ផ្សេងគ្នា ដែលឆ្នាំនេះជាលើកទី1 ហើយសម្រាប់ទីក្រុងអាត្លង់តា ដោយមានអ្នកចូលរួមតាំងពិព័រណ៍ប្រមាណជាង 500ស្ថាប័ន មកពីប្រមាណ 60ប្រទេស ក្នុងនោះពន្លាក្រសួងទេសចរណ៍កម្ពុជា ដែលបានរៀបចំតុបតែងយ៉ាងស្អាត និងមានភាពទាក់ទាញ ដោយទទួលបានភ្ញៀវចូលទស្សនា និងសាកសួរព័ត៌មានយ៉ាងផុលផុស។
លោកបានបន្តថា ក្នុងព្រឹត្តិការណ៍នោះក្រុមការងារក៏បានជួបប្រជុំជាមួយនឹងលោក John Spooner និងលោក Jonathan Goazlic ដែលជាអ្នករៀចចំកម្មវិធី ដើម្បីពិភាក្សាពីការងារផ្សព្វផ្សាយសក្តានុពលទេសចរណ៍កម្ពុជាទៅកាន់ទីផ្សារអាមេរិកទាំងមូល ជាពិសេសនៅតាមបណ្ដារដ្ឋ និងទីក្រុងធំៗ ដូចជា San Francisco, San Diego រដ្ឋ California, ទីក្រុង Philadelphia រដ្ឋ Pennsylvania, ទីក្រុង Denver រដ្ឋ Colorado, ទីក្រុង Tampa Bay និង Miami រដ្ឋ Florida, ទីក្រុង Chicago រដ្ឋ Illinois ដែលជាទីផ្សារធំៗរបស់សហរដ្ឋអាមេរិក។
ឆ្លៀតក្នុងឱកាសនេះ ក្រុមការងាររបស់ក្រសួងទេសចរណ៍កម្ពុជា ក៏បានចុះពិនិត្យក្នុងរបៀបជា Study Tour & Research នៅ Studio 7 របស់បណ្តាញស្ថានីយទូរទស្សន៍អន្តរជាតិ CNN ក្នុងទីក្រុងអាត្លង់តា ដើម្បីបន្តកិច្ចសហប្រតិបត្តិការផ្សព្វផ្សាយសក្តានុពលវិស័យទេសចរណ៍កម្ពុជាក្នុងភាព ជាដៃគូយូអង្វែងផងដែរ។
យោងតាមស្ថិតិរបស់ក្រសួងទេសចរណ៍ឆ្នាំ2019 កម្ពុជាទទួលបានភ្ញៀវទេសចរអាមេរិក ប្រមាណ 25ម៉ឺននាក់ ឈរនៅក្នុងលំដាប់ទី6 នៃទីផ្សារទេសចរកំពូលទាំង 10របស់កម្ពុជា៕
March 9, 2020
បញ្ហាជំងឺកូវីដ19 ធ្វើឱ្យមានប្រទេស មួយចំនួនធ្លាក់ក្នុងវិបត្តិសេដ្ឋកិច្ច
ស្ថិតក្នុងស្ថានភាពបច្ចុប្បន្ននេះ ជំងឺរលាកផ្លូវដង្ហើមធ្ងន់ធ្ងរ កូរ៉ូណា(COVID-19) បានធ្វើឱ្យ មានការប្រឈមដ៏ធំមួយទៀត ក្នុងចំណោមបញ្ហាប្រឈមដែលមានសម្រាប់ប្រទេសក្នុងសកលលោក ពិសេសសង្គ្រាមពាណិជ្ជកម្ម និងការអន់ថយនៃកំណើនសេដ្ឋកិច្ច។
ថ្លែងក្នុងសន្និសីទសារព័ត៌មានកាលពីថ្ងៃទី24 ខែកុម្ភៈ ឆ្នាំ2020 នៅវិមានសន្តិភាព សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានគូសបញ្ជាក់ថា ជំងឺកូវីដ19 (COVID-19) បានធ្វើឱ្យប្រទេសមួយចំនួនធ្លាក់ក្នុងវិបត្តិសេដ្ឋកិច្ចផងដែរ។
“ផលប៉ះពាល់ជំងឺ COVID -19 បានមកដល់មិនអាចព្យាករ ទុកមុនបានអំពីទំហំរបស់វា ហើយកំពុងបង្កឱ្យមានផលប៉ះពាល់ធ្ងន់ធ្ងរ ដល់សេដ្ឋកិច្ចប្រទេសនានានៅក្នុងតំបន់អាស៊ី និងអាចរុញច្រានឱ្យប្រទេសមួយចំនួនធ្លាក់ក្នុងវិបត្តិ។ ប្រការនេះបានបង្កើតឱ្យមានការព្រួយបារម្ភ ចំពោះនិយោជកផងដែរ”។ នេះបើតាមប្រសាសន៍សម្តេចតេជា។
សម្តេចតេជោ ហ៊ុន សែន បានមានប្រសាសន៍បន្ថែមថា ៖“រដ្ឋាភិបាលនៃប្រទេសជាច្រើនបានដាក់ចេញនូវវិធានការជាច្រើន ដើម្បីធ្វើការស្រោចស្រង់ ក្នុងគោលបំណង កាត់បន្ថយផលប៉ះពាល់ និងគាំទ្រលើកស្ទួយកំណើនសេដ្ឋកិច្ចក្នុងតំបន់។ ទន្ទឹមនេះជំងឺកូវីដ19នេះ បានធ្វើឱ្យប៉ះពាល់ដល់វិស័យសំខាន់ៗនៃសេដ្ឋកិច្ចកម្ពុជាផងដែរ។
សម្តេចតេជោនាយករដ្ឋមន្ត្រីបានថ្លែងបញ្ជាក់ថា៖ “វិស័យ2របស់កម្ពុជាដែលរងផលប៉ះ ពាល់ធ្ងន់ជាង គេគឺ1-វិស័យទេសចរណ៍ ដោយសារអ្នកទេសចរភ័យលែងហានធ្វើដំណើរកម្សាន្ត និងទី2-វិស័យកាត់ដេរ ដោយសារខ្វះវត្ថុធាតុដើម បិទរោងចក្រមួយចំនួន នៅប្រទេសចិនមិនទាន់ដំណើរការឡើងវិញជាប្រក្រតី”។
យោងតាមការផ្សព្វផ្សាយរបស់ធនាគារជាតិនៃកម្ពុជា កិច្ចប្រជុំគណៈកម្មាធិការជាន់ខ្ពស់អាស៊ាន លើកទី19 នៅទីក្រុងហាណូយប្រទេសវៀតណាម ថ្ងៃទី22 ខែកុម្ភៈ ឆ្នាំ2020កន្លងមកនេះ ឱ្យដឹងថា ការឆ្លើយតបនឹងផលប៉ះពាល់នេះ គោលនយោបាយមួយចំនួនត្រូវ បានលើកឡើង ដូចជា ការរក្សាឱ្យបាននូវកម្រិតអតិផរណា ការបង្កើនការចំណាយរបស់រដ្ឋាភិបាល ធ្វើឱ្យប្រសើរឡើងនូវកម្លាំងពលកម្មនិងបច្ចេកវិទ្យា ការផ្តល់ហិរញ្ញប្បទានចំពោះការ ចំណាយទប់ទល់នឹងការរីករាលដាលនៃមេរោគនេះ បង្កើនហេដ្ឋារចនាសម្ព័ន្ធ និងការតភ្ជាប់ក្នុងតំបន់អាស៊ានជាដើម។
កំណើនសេដ្ឋកិច្ចអាស៊ានត្រូវបានព្យាករថា អាចនឹងថមថយពី 4.9% ក្នុងឆ្នាំ 2019 មកត្រឹម4.5% នៅឆ្នាំ2020 ដោយសារការរីករាលដាលនៃមេរោគកូរ៉ូណា (COVID-19) ដែលអាចមានហានិភ័យចំពោះសេដ្ឋកិច្ចក្នុងតំបន់រយៈពេលមធ្យម និងជះឥទ្ធិពលខ្លាំង លើផ្នែកសេវា ការវិនិយោគ និងការប្រើប្រាស់របស់ប្រជាជន។
មូលនិធិរូបិយវត្ថុអន្តរជាតិ(IMF)ក៏បានព្រមានដែរថា ការរីករាលដាលវីរុសកូរ៉ូណាដែលបណ្ដាលឱ្យមនុស្សស្លាប់នឹងមានប៉ះពាល់ដល់សេដ្ឋកិច្ចពិភពលោក ខណៈក្រុមរដ្ឋមន្ដ្រីក្រសួងហិរញ្ញវត្ថុក្រុមប្រទេស G20 និងប្រធានធនាគារកណ្ដាលបានថ្លឹងថ្លែងផលប៉ះពាល់សេដ្ឋកិច្ចរបស់ខ្លួន ។
លោកស្រី Kristalina Georgieva ប្រធាន IMF បានឱ្យដឹងថា ការរីករាលដាលនេះនឹងកាត់បន្ថយប្រហែល 0,1 % ពីកំណើនសេដ្ឋកិច្ចពិភពលោក និងរារាំងកំណើនសេដ្ឋកិច្ចរបស់ប្រទេសចិនមកនៅត្រឹម5.6% នៅឆ្នាំនេះ។យើងក៏កំពុងសម្លឹងមើលសេណារីយោ កាន់តែអាក្រក់ដែលការរីករាលដាលរបស់វីរុសនេះបន្តក្នុងរយៈពេលកាន់តែវែង និងកាន់តែច្រើនទៀតទូទាំងពិភពលោក និងផលវិបាកកំណើនសេដ្ឋកិច្ចមានរយៈពេលកាន់តែវែងផងដែរ។
លោកបណ្ឌិតហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានមានប្រសាសន៍ប្រាប់ឡារ៉ែន ពាណិជ្ជថា៖“តាមពិតបើគិតទៅតាមការព្យាករសេដ្ឋកិច្ចយើងនឹងមាន6.0-6.5%នៃផលិតផលសរុបរបស់ប្រទេសក្នុងឆ្នាំនេះ។ សញ្ញាណនេះបើជំងឺកូវីដ នៅតែបន្តសកម្មភាពវាអាចបន្តទៅដល់ឆ្នាំ 2021 ទៀត។ ដូច្នេះវិស័យទេសចរណ៍ នឹងមានផលប៉ះពាល់ជាងគេ រួមទាំងរោងចក្រជាច្រើនដែលត្រូវប៉ះពាល់ក្នុងរឿងEBA ដែលជាបញ្ហាធំ ដែលចំនួនប៉ះពាល់ អាចដល់ទៅ 100 លានដុល្លារ។ ព្រោះបើតាមគណនាចំនួន 20% នៃទឹកប្រាក់ 600លានដុល្លារ ដែលជាផលប៉ះពាល់នៃវិស័យនេះទាំងមូល”។
លោកបណ្ឌិតបានបញ្ជាក់ថា បើតាមខ្ញុំគិត វាមានផលប៉ះពាល់ទំហំធំ នៅក្នុងនោះផលិតកម្ម ទាំងអស់ត្រូវគាំង។ សកម្មភាពលក់ដូររបស់ពលរដ្ឋមានសភាពតានតឹង ពោលគឺស្របពេលដែលជនជាតិចិនបានចាកចេញ បន្ទាប់ពីការប្រកាសបិទហ្គេមអនឡាញ ក៏ត្រូវនឹងមេរោគកូវីដ19 បានកើតឡើងផងដែរ ដែលជាអកុសល ធ្វើឱ្យសេដ្ឋកិច្ចយើងត្រូវទទួលរងនូវបញ្ហា។
លោកបណ្ឌិតបានបញ្ជាក់ដែរថា បើយើងមើលទៅសេដ្ឋកិច្ចកម្ពុជា ដែលទទួលរងពីបញ្ហា ជំងឺកូវីដ19 គឺមាន2 ព្រោះបញ្ហានៃជំងឺនេះវាមានលក្ខណៈជាសកលហើយ ធ្វើឱ្យឥទ្ធិពលរបស់វាដែលបានធ្វើឱ្យកម្ពុជាទទួលរង គឺមានការពាក់ព័ន្ធនឹងវិស័យភ្ញៀវទេសចរ ពិសេសទេសចរជនជាតិចិន ដែលពីមុនមានចំនួនក្នុង 1ឆ្នាំប្រមាណ 200លាននាក់ សម្រាប់សកល និងមកទេសចរណ៍នៅកម្ពុជាដល់ទៅ 2 លាននាក់តែឥឡូវបានថយចុះដល់ទៅ 90%។
បញ្ហាមួយទៀតគឺបញ្ហារោងចក្រមួយចំនួនដែលកំពុងដំណើរការ ត្រូវទទួលរងនូវការខ្វះវត្ថុធាតុដើម មិនអាចផ្គត់ផ្គង់បានដោយសារជំងឺកូវីដ19 ដែលកើតឡើងនៅប្រទេសចិន ធ្វើឱ្យរោងចក្រមួយចំនួន នៅប្រទេសចិនមិនទាន់ដំណើរការឡើងវិញបាន ស្របពេល ដែលបញ្ហា EBA ក៏បានកើតឡើងផងដែរ។
លោកបណ្ឌិតបានបញ្ជាក់ទៀតថា៖“ដូច្នេះសេដ្ឋកិច្ចប្រទេសមួយបើមានបញ្ហាផ្ទួនៗគ្នាពេក វាធ្វើឱ្យជួបប្រទះនូវវិបត្តិជាក់ជាមិនខានឡើយ។ តែយើងឃើញរាជរដ្ឋាភិបាលបានចាត់វិធានការ បន្ទាន់ ដូចជាការលើកទឹកចិត្តដល់វិស័យអចលនទ្រព្យ ដែលតម្លៃត្រឹម 7ម៉ឺន គឺរដ្ឋមិនយកពន្ធប្រថាប់ត្រា និងការមិនយកពន្ធ 4 ខែសម្រាប់សណ្ឋាគារ នៅខេត្តសៀមរាបជាដើម”។
ក្រៅពីនោះរាជរដ្ឋាភិបាលក៏បានស្វែងរកអ្នកវិនិយោគ ដែលក្នុងរយៈពេលនេះមានការទទួលបានអ្នកវិនិយោគ ដោយទទួលបានទឹកប្រាក់ក្នុងចំនួនច្រើនគួរសម ក៏ប៉ុន្តែបើតាមផលប៉ះពាល់មិនអាចទូទាត់គ្នាបានទេ ព្រោះថាវាអាចទើបនឹងចាប់ផ្តើមដោយយើងមិនអាចប៉ាន់ស្មានបានព្រោះបញ្ហាវាស្ទួនគ្នាពេក។
លោកបណ្ឌិត ហុង វណ្ណៈ បានបញ្ជាក់ផងដែរថា៖ “បើតាមខ្ញុំគិត វាមិនទាន់ដល់ដំណាក់ការដែលយើងមិនអាចថាទប់ទល់ស្ថានការណ៍បាននោះទេ ពីព្រោះរដ្ឋាភិបាលយើងបានត្រៀមប្រាក់បម្រុងសម្រាប់ប្រតិបត្តិការសេដ្ឋកិច្ចរបស់ខ្លួន ក្នុងចំនួនសមស្រប សម្រាប់ប្រការក្នុងស្ថានការណ៍អាក្រក់។ ជាមួយគ្នានេះដែររដ្ឋាភិបាល ក៏បានធ្វើការកំណែទម្រង់ប្រព័ន្ធហិរញ្ញវត្ថុសាធារណៈ រួមទាំងប្រាក់ចំណូលពីពន្ធដារ គយ និងការវិនិយោគផងនោះ យើងអាចធ្វើឱ្យចំណូលនោះទូទាត់ក្នុងចំណាយចរន្តបានក្នុងកាលៈទេសៈចាំបាច់នេះ។ ក្នុងស្ថានការណ៍ដែលរដ្ឋាភិបាលនៅបន្តការគ្រប់គ្រងដោយម៉ឺងម៉ាត់ទៅលើប្រព័ន្ធប្រាក់ចំណូល នោះយើងនៅអាចទប់ទល់បញ្ហាមូយផ្នែកណាមួយបាន”៕
March 9, 2020
បាក់រលំសណ្ឋាគារនៅចិន៖ 4នាក់បានស្លាប់ និង38នាក់ត្រូវបានជួយសង្គ្រោះ ខណៈ33នាក់កំពុង…
មនុស្សយ៉ាងតិច4នាក់ បានបាត់បង់ជីវិត និង33នាក់ផ្សេងទៀតជាប់នៅក្រោមគំនរបាក់បែក ក្នុងករណីបាក់រលំសណ្ឋាគារមួយដែលគេប្រើសម្រាប់ដាក់អ្នកជំងឺដែលបានឆ្លងមេរោគកូរ៉ូណា Covid-19 នៅឯខេត្ត Fujian ប្រទេសចិន កាលពីម្សិលមិញ។
“ក្រុមអ្នកសង្គ្រោះ បានជួយយកមនុស្ស38នាក់ដែលនៅមានជីវិត ចេញពីគំនរបាក់បែក ក្នុងនោះមាន5នាក់ស្ថិតក្នុងស្ថានភាពអាសន្នបំផុត។ នៅក្នុងអំឡុងអគារនេះត្រូវបាក់រលំ គឺមានមនុស្សចំនួន71នាក់កំពុងស្ថិតនៅក្នុងនោះ” នេះបើតាមការប្រកាសពីក្រសួងគ្រប់គ្រងគ្រោះអាសន្ននៃប្រទេសចិន។
សណ្ឋាគារកម្ពស់5ជាន់ ឈ្មោះ Xinjia នៅក្នុងខណ្ឌ Licheng ក្រុង Jinan ខេត្ត Fujian បានបាក់រលំកាលពីវេលាម៉ោងប្រហែល19:30ម្សិលមិញ។ សណ្ឋាគារនេះ ត្រូវបានអាជ្ញាធរប្រើប្រាស់ជាមជ្ឈមណ្ឌលសម្រាប់ដាក់អ្នកដែលត្រូវបានសង្ស័យថាមានផ្ទុកមេរោគកូរ៉ូណា Covid-19។
ក្រោយការបាក់រលំនៃអគារនេះបន្តិច ក្រុមអ្នកពន្លត់អគ្គិភ័យចំនួន 800នាក់ និងអ្នកស្ម័គ្រចិត្តចំនួន 200នាក់ បានទៅដល់កន្លែងកើតហេតុ។ ក្រៅពីនេះក៏មានអ្នកស្វែងរក និងអ្នកសង្គ្រោះចំនួន11ក្រុម រួមនឹងសុកជំនាញចំនួន7ក្បាល ក៏បានចូលរួមស្វែងរក និងជួយសង្គ្រោះជនរងគ្រោះក្នុងហេតុការណ៍នេះផងដែរ។
អាជ្ញាធរខេត្ត Fujian បានឱ្យដឹងថា គិតមកដល់ថ្ងៃទី6មីនា ខេត្តនេះ មានអ្នកផ្ទុកមេរោគកូរ៉ូណាសរុបចំនួន 296នាក់ និងអ្នកដែលត្រូវបានតាមដានសុខភាពជាពិសេសចំនួន 10,819នាក់។ នៅថ្ងៃទី8មីនានេះ ប្រទេសចិនបានប្រកាសថា មានអ្នកឆ្លងមេរោគកូរ៉ូណាថ្មីចំនួន44នាក់បន្ថែមទៀត និងអ្នកស្លាប់ថ្មីចំនួន27ករណី ដែលទាំងអស់សុទ្ធតែនៅក្នុងខេត្ត Hubei។ ប្រទេសនេះ បច្ចុប្បន្ន មានអ្នកផ្ទុកមេរោគកូរ៉ូណាសរុប 80,695នាក់ និងអ្នកស្លាប់បានឡើងដល់ 3,097នាក់។ នេះបើតាមសារព័ត៌មាន AFP។
Covid-19 បានឆ្លងរាលដាលនៅទីក្រុង Wuhan កាលពីចុងឆ្នាំ2019 ហើយមកដល់ពេលនេះ វាបានបង្ហាញខ្លួននៅក្នុងប្រទេស និងដែនដីចំនួន202 នៅទូទាំងពិភពលោក បណ្ដាលឱ្យមានអ្នកឆ្លងជំងឺរាតត្បាតនេះ ចំនួន 106,165នាក់ ក្នុងនោះមានអ្នកស្លាប់ជិត 3,600នាក់ និងអ្នកបានជាសះស្បើយ មានចំនួន59,963នាក់៕
ប្រភព៖ សារព័ត៌មានបរទេស
March 8, 2020
ប្រដាល់គុនខ្មែរតាមស្ថានីយ សម្រាប់ចុងសប្ដាហ៍នេះ (ថ្ងៃអាទិត្យ ទី08 ខែមីនា ឆ្នាំ2020)

March 7, 2020